2 PƖƐR

¹ Mɛr Sɩmɔ̃ Pɩɛrɩkɛ dɔnɩ Jeju Kirisitii thɔ̃daar na thɔ̃thɔn, thɔna sɛbɛɛkɛ a ha nɛrɛɛkɛra ’lɛnɩ ha pɛ ca bɩɛlɩkɛ ɓɔnanɩ mɔ̃kɛ sɩ ’lɛ gɩnɩ, dɩɩ the Jeju Kirisitii fɩl sarra, kɛ dɔnɩ asɩ Thãgba a dona Taadaar. ² Thãgba na-n jɛ nɩ bʋɔra jɔɔ, a na-n hana nɩ dakha ha ɩɩ jɔɔ, mɔ̃ nɩ-n jɩnɩ ɔr Thãgba na Jeju asɩ Kɔ̃tɩ̃ dɩ ga-n pɛr. ³ Fãgaakɛ thɛnɩ ɔɔ Thãgba dora, gɛr hana sɩ thɩ̃ɛ fɛʋʋkɛ na bulo sini asɩ yi hanana na Thãgba fɩl hananɛna, gɩ the asɩ jɩraakɛ sɩ jɩnɩ ʋrɛɛkɛ kɔɔ wɛ sɩnɩ sɩ bulo kha na ɔɔ i dʋbɩ na ɔɔ bɔɔkɛ a bɔrnɩ, ⁴ kɛ dɔnɩ thɩ̃ɛsɔɔkɛ dɔnɩ nɔɔ dɩ ʋlfɛna sɩ ʋlfɛrɛsɔɔkɛ kɔ̃tɩnanɩ ka a ɓɔ̃ dakha ka, dɩ gɛrra na dɔ hʋɛ na yɩrɔnɩ a na debiro na do wɩrɛ na ɓananɩ kha na Thãgba ɔɔ Thãgba dora, mɔ̃ nɩ fuuni kʋɛrɛraakɛ ha pɩɛrɛ cʋʋnɩ dɩɩ lõ thɩɩraakɛ. ⁵ Dɩ gɛrra dɔ nɔɔ na-n gbɛ̃gbɛrɛnɛ dɩphã a hanana fɩl telẽe a dɛba anɩ ha pɛra, a hanana jɩɩr a dɛba fɩl teleena, ⁶ a hanana dɩbara fʋrɛ a dɛba jɩɩrra, a hanana yɩrrɛ a dɛba dɩbara fʋrɛra, a hanana Thãgba fɩlɛ a dɛba yɩrrɛra, ⁷ a hanana omi naar a dɛba Thãgba fɩlɛla, a hanana naʋ hulõo a dɛba omi naarra. ⁸ Gɩdonɩ ado ga thɩ̃sɔɔkɛ har anɩ bɩnɔ jɔɔ na too mɔlɔa’, sɩ na-n cʋʋrɛ thɩ̃ɛ, na khʋɔn dakha na-n pɛr jɩɩrraakɛ nɩ jɩnɩ asɩ Kɔ̃tɩ̃ Jeju Kirisiti. ⁹ Sɩ ʋrɛɛkɛ na hananɩ ga thɩ̃sɔɔka’, yaarʋ a do, aa-n yɩ ƴɔa’, a diinəne mɔ̃ Thãgba cɔcɔgɔɔnɩ ɔɔ sopugo tɩ̃sɔ. ¹⁰ Gɛr dɔ nɔɔ ɩ̃ omisɔ, na-n bãbanɛ a cʋɛ werɩkɛ Thãgba we nɩnɩ na phiireekɛ a phiir nini gɩ jɩɩ do thɩ̃ɛ phubi. Ado na cʋʋ mɛ̃ na tharsɩ na ji kpɩɩraka’. ¹¹ Ga dor mɛ̃ Thãgba na ha nɩ hʋɛ kpẽgelẽ dɩ na lõ asɩ Kɔ̃tɩ̃ na Taadaar Jeju Kirisitii khorr fãgadaar dɩra. ¹² Gɛrra dɔ kɩrʋ dɩ ɩ̃ ƴaal ma-n khe nar wire fɛʋ ga thɩ̃sɔɔkɛ sɩɩ dorakɛ nɩ kɔɔ ’lire jɩ gar a jɩɩl kɩbɩ sobɔrraakɛ nɩ kɔɔ ’lɛnɩ. ¹³ Bɔɔraakɛ mɩ hanɩ gɩrɛ ɩ̃ waraakɛ, mɩ yɩɛrɛ dɩɩ bɔr dɩ ma khe nar ga thɩ̃sɔɔkɛra gɩ jaa nar, ¹⁴ mɔ̃ mɩ jɩnɩ tue gɩrɛ dɩɩ ha mɔ̃kɛra asɩ Kɔ̃tɩ̃ Jeju Kirisiti kɔɔ nɩ marnɩ, dɩ bɔɔkɛ ma thenɩ ɩ̃ warara ga hʋnɔa’. ¹⁵ Ma dor bʋɔ sɩ ɩ̃ cʋʋ thɩ̃ɛ, a mɩ kɔ̃ pɩ sɩ dɩɩ ha mɔnakɛ, sɩ na-n jɩna gɩ. ¹⁶ Ɔbɔɔkɛ sɩ kɔɔ mɩɩ nɩnɩ asɩ Kɔ̃tɩ̃ Jeju Kirisitii fãgada na ɔɔ bir ɩ̃ thɩmɩɩ, ga do kpuro nɩɛ ’lã’lã’lã sɩ kɔɔ pɛ nũu a gba a dιιrna na’, sι wιrɛ kɔɔ yɛnι ɔɔ wabι na yire sι do. ¹⁷ Gιdonι a kɔɔ ’lɛr Thãgba Thιrɛra cʋrɛ na i dʋbιrɛ ɔbɔɔkɛ nʋɔ kɔɔ thenι carbara kʋkʋʋraale a so ayι: “Ʋrɛɛkɛra dʋɔn ɩ̃ Bikuunikɛ mι-n nanι, ɔr dɔ ʋrɛ lona mιnι haar ka.” ¹⁸ Sɛrɛɛ thɛthɛ kɔɔ nιɛnɛ na asι nũ nʋɔɔkɛ kɔɔ thɛnι ƴũ ɔbɔɔkɛ sι kɔɔ hanι kha na ɔr gɔ̃gɔ̃ phuurəəle. ¹⁹ Mɛ̃ sι jιɩ jι tue gel thιmιιrraakɛ Thãgbaa bobonasɔ kɔɔ mιɩnɩ; gɩ bɔrɛ dɩ na pɛ gɩ nũu, gɩdonɩ gɩ hʋrɛ lãphãakɛ n hɩrɛnɛnɩ pa birə paar phaphapha dɩɩ n wɩl, dɩwɩl ƴepələ̃bire n phã anɩ hara. ²⁰ Sɩ caca thɩ̃ɛ, dɔ nɩ jɩ dɩ tibil na puno na ɔɔ thɛthɛɛ kpɩɛr na ti Thãgbaa bobonɩ thɩmɩɩkɛ kherenenɩɩ kɩra’; ²¹ gɩdonɩ Thãgbaa bobonɩ thɩmɩɩkɛ kɔɔ thɛnɩ, ga do mɔ̃ tibili ƴaal hanɩ mɛ̃ gɩ kɔɔ ha kpɩɩraka’, sɩ Thu Phuu kɔɔ cʋɛ tɩbɩla dɩ wɩ kɔɔ mɩɩ thɩmɩɩrɩkɛ thɛnɩ Thãgbaa pa.

¹ Mamara sõso bobona kɔɔ hale tɩbɩlaa thɩ̃thɩɩn, mɛna gɩ sõso dɩɩrdara na wolone na lõ anɩ thɩ̃thɩɩn na sõso dɩɩrɛɛkɛ na bũburoneni tibil. Wa bor Kɔ̃tɩnɩkɛ kɔɔ thɛ wɩnɩ dɩ wa gbaar bũburoneekɛ na phuroneni tibil dapaara a na heen dɩbara. ² Tibil jɔjʋɔ na kpar awɩ dakhaba thɔna, dɩ wɛr na dɔ nɔɔ dɩ tɩbɩla na mɩɩ dapuu wa-n pɛ sobɔ hʋɛra. ³ Ha pɩɛrɛ na cʋʋ wɛr dι wa gba sõso thιmɩɩr wɩ fɩɩlna nɩ wa-n ’lɛrɔ khor; sɩ gɩ maanɛ awɩ so heen hanɩ gbɛbɩrɔ, dɩ awɩ bũburõ ga do gɩ phɩnɛ daara’. ⁴ Gɩdonɩ Thãgba na kɔɔ sɩ thɔ̃thɔ̃daar thusɔraakɛ kɔɔ cʋɛnɩ sopugoə’, sɩ a kɔɔ fʋlɛ wɛr, a li a faa kõkor huloona dabirə paar tĩtĩtĩ gɩ dana kɩɩl wire. ⁵ Aa kɔɔ sɩrɔ dakha mama thɩa’, sɩ a kɔɔ cʋʋrɛ yɔ kɔ̃tɩ̃ɩ dɩɩ phã a thii tɩbɩla fɛʋʋkɛ na-n theranaana’; Noe dɩbara, kɛ n kɔɔ mɩanɩ tɩbɩla fɩl sar thɩmɩɩr, a kɔɔ taa na wɩ̃ tibil makonyɔ. ⁶ Dɩ dakha a kɔɔ heene Sɔdɔm na Gɔmɔɔrdara bũburõ so heene a thii wi na dɔɔ, a gba gɩ gɩrɛ da-n dɩɩrna wɩrɛ na-n theranaana’ gɩrɛ na dana wɩnɩ. ⁷ A kɔɔ taarɛ dakha Lɔtɩ tɩɩ sarʋʋkɛ haar n helnɩ tɩɩ khabaasɔɔ cʋʋ pa kpalaale; ⁸ kũu sarʋʋlera kɔɔ hanɩ awɩ thɩ̃thɩɩn, wire fɛʋ haar n heluu gɩdonɩ tɩɩ sarʋ a do, sɩ da-n yɩ awɩ cʋʋ pa puu da-n nɩɛna ga thɩmɩɩ dakha. ⁹ Wɩrɛ n cʋɔnnɩ Kɔ̃tɩn a-n jɩ gɛr da-n taa wɩ bɔ gaarɛra, sɩ dɩ thɩɩn wɩrɛ na sarana’, a heen wɩ sor kɩɩl wirera. ¹⁰ Wɩrɛ n bɔnɩ dɩ wa-n ɩɩrna thɩ̃ puu ƴaalɛɛkɛ n kɔnɩ awɩ tibil do pa thue, dɩ wa-n beesina dakha fãgaakɛ pɩɛrnɩ, wɛr ga bo na ɩɩrɔ. Sõso dɩɩrdaraale wɩ-n ’lar ka, wɩ gbɩllɛ, maar na-n kʋ wɩ ƴũ fãgadarasɔɔ kpɛra ga; ¹¹ sɩ thɔ̃thɔ̃daar thusɔɔkɛrakɛ hananɩ fãga na punone a jɔ wɩ, na tu na pɛ ƴũ fãgadarasɔɔle sor na kpɛɩ Kɔ̃tɩnɩ ƴɛra ga. ¹² Sɩ tibil ca wele wɩ hʋrɛ lɩɔ̃ nʋnɩaakɛ na hananɩ yʋa’, kɛ wɩ kɔnɩ wɩ fɔ a na kɔ; wɩ-n kpɛr gɩrɛɛkɛ wa jɩna’, nʋ̃ khaara wa bũburõ. ¹³ Wa ’lɛr bɔ gaarɛ gɩdonɩ mɛ̃ wɩ-n gaar tɩbɩla. Gɩrɛ n daan warnɩ dʋɔn wɩ tɔɔ gbelẽ gbelẽ a na cʋɛ puureekɛ n kɔ wɩnɩ thue. Jɩɩn tɩbɩla wɛ a khã; mɔ̃ wɩ-n hanɩ anɩ fɛtɩ cʋʋ pa dι wa-n fιιl nι gι-n da warɛ ka. ¹⁴ Khɛ kpιι ƴaal ƴιɛ wι hana; wa-n hi sopugo cʋʋra’; wι-n fιɩlɛ dakha tɩbɩlaakɛ na tɩɛnna’; ha pɩɛrɛ hi wer bɩnɔ; tɩbɩlaakɛ hanɩ sʋɔnna wɩ do. ¹⁵ Mɔ̃ wɩ faanɩ hʋ telẽe pɩ, wɩ buure dɩ wa-n kpaan Balam Bewɔɔrɩ bikuuni hʋra, kɛ kɔɔ naannɩ gõgolõ lɩmɩnɛ. ¹⁶ Sɩ a kɔɔ caananɛ phaanɛ ɔɔ puu cʋʋrara. Kũkə̃əkɛ na-n mιanι nʋɔa’, sι a kɔɔ mιιraarɛ thιmιιr tibil khaa dιι cʋʋ bobon də̃bəl dι jιιl. ¹⁷ Tιbιlaale hor yɔ bu kanaakɛ na-n hananι nyʋɔna’; wι hor dakha thãgbaakɛ n jonanι sι dι jιɛ n ti gi; pa hulõ paarιkɛ birəneni tĩtĩtĩ Thãgba thιιn khorr dι ga-n pιɛr wι. ¹⁸ I ƴaal thιmιa na nɔfaar n thɛ wι nɔɔ. Thɩ̃ puukɛ n kɔnι tibil thue, kɛ dɔnι dakhaba thɔma wι gba dι wa-n fιιlna tιbɩlaakɛ fuonni fuu phaa a the sa faa wɩrɛ hanɩ sõsorra. ¹⁹ Dɩ wɩ-n so warɛ dɩ wɩ yɩ, ɩna cʋʋ wɛr dɩ wa do waɩa, sɩɩ do wɛr thɛthɛ dea wɩ do thɩɛnaakɛ na kʋɛa wɩnɩ, gɩdonɩ tibil n dor dee thɩɛnaakɛ jʋɔraanɩ. ²⁰ Ado tɩbɩla fuu thɩɩkɛɛdaraakɛ n biseneni tibil pɩ, mɔ̃ wɩ jɩnɩ asɩ Kɔ̃tɩ̃ na Taadaar Jeju Kirisiti, sɩ ado wɩ bir lõ ga thɩnaale dɩɩ puno wi, awɩ pɩpɩɩ pa na puurore a na jɔ cacadaa. ²¹ Mɔ̃kɛ wɩ jɩnɩ jɔfʋ phuukɛ Thãgba kɔɔ ha wɩnɩ sa gba faa, gɩ ka baarrakɛ ado wa ka kɔɔ jɩ fɩl sar hʋɛa’. ²² Gɩ dã warɛ waa mɔ̃kɛ sobɔ sokpaara hanɩ ger kɛ sɔnɩ ayɩ: “Bɩɩn n fire dɩ kho gɩrɛ a kɔɔ kpeenɩ”, dakha wo: “Sɩthookɛ wɩ-n cɔcɔɔnɩ n bire dapaara dɩ bɩɩr pɔɔsɔ.”

¹ Nɛrɛɛkɛ mɩ-n nanɩ, ʋrɛ dʋɔn balanyɔ sɛbɛɛkɛ mɩ khere narnɩ gɩrɛ. Sɛbɛ yenyɔraakɛ fɛʋ mɩ khe narɛ gɩ cʋʋ kpɩɛrɛ gɩ jaa nar; ² dɩ mɛ̃ na jɩna gɩrɛɛkɛ Thãgbaa bobon phuusɔ kɔɔ maanɩ mɩɩrɛ, na Kɔ̃tɩnɩkɛ dɔnɩ Taadaarɩ jɔfʋʋkɛ anɩ thɔ̃thɔna kɔɔ ’laanɩ. ³ Cacaca nɩ jɛna dɩ pɩpɩɩ wiresɔra ɓoɓorodara na ɩɩrɛ na maanɛ jɔɔ. Wɛr dɔ wɩrɛ n ɩrɛnɩ mɔ̃kɛ awɩ thɩ̃ puu ƴaal n kʋ wɩnɩ thue. ⁴ Wa sor nayɩ: Ɩɩnkɛra a kɔɔ yɩnɩ ɩna bire na ɩ̃, kana gɩ ha? Gɩdonɩ a fʋna wireekɛ asɩ thɩthɩsɔ kɔɔ khiirni, oti thɩ̃ɛ fɛʋ too mɔnanakɛ Thãgba kɔɔ ti gini. ⁵ Sɩɩ do wɩ-n jɩrɛ gbobi, sɩ dɩ wɩ diinə, dɩ mamara nʋɔ Thãgba kɔɔ sona dɩ ƴũ na thɩɩkɛ hale gɩrɛ. Nyʋɔn a kɔɔ gba a cʋʋna thɩɩ dɩ nyʋɔnnana thɩɩ kɔɔ the. ⁶ Dɩ nyʋɔnna kɔɔ the thɩɩraakɛ kɔɔ hanɩle mamara dɩɩ kʋɛ. ⁷ Sɩ ƴũ na thɩɩkɛ hanɩkɛ nɛnɛ̃, thɩmɩɩ nɔ ca bɩɛlɩlera thɩnɛ gɩ, dɔɔ n kʋɛa gɩ wireekɛ dɔnɩ kɩɩl wire, kɛ wɩrɛ na-n therananɩ Thãgba ga na bũburoni. ⁸ Nɛrɛɛkɛ mɩ-n nanɩ, thɩ̃ bɩɛl hale na-n diinə ga, gɛr dʋɔn, Kɔ̃tɩnna wi bɩɛl hor yɛna gbɩlanɩ, dɩ yɛna gbɩlanɩ ho wi bɩɛl. ⁹ Kɔ̃tɩn na-n pʋɔr sɩ dɩ cʋʋ gɩrɛɛkɛ a-n yɩnɩ ɩna cʋʋra’, mɔ̃kɛ ɩkhasɔ n kpɩɛrnɩ gɩra’, sɩ haar a-n fʋ nɛrɛra aa-n ƴaal tibil bɩɛl n buə’, sɩ a-n ƴaalɛ tɩbɩla fɛʋ n deba haar. ¹⁰ Kɔ̃tɩnɩ wi na daan mɔ̃ yu n ɩnɩ, ga Wiile thãgbara ƴũ na phor na ka na helle, dɩ ƴepələ̃be na mar dɔɔ a na hɩ̃ fɛʋ, dɩ thɩɩ na thɔmaakɛ n dʋɔnnɩ kɛ na thiire fɛʋ. ¹¹ Dɩ gɩdonɩ thɩ̃ɛɛle fɛʋ thale ga kʋɛ, ʋmɔ̃ɔ tibil ca teana nɩ dɔ? Gɩ teenanɛ nɩ hanana fɩl phuu na Thãgba maar. ¹² Na-n pɩɛrɛ sɩ nɩ phana dakha Thãgbaa wi gɩ dã, kɛ thãgbara ƴũ na donɩ dɔ haar a na hɩ̃ fɛʋ, ƴepələ̃be dakha n ma dɔɔ ga-n hɩl. ¹³ Ƴũ phaa na thɩ phaakɛ fɩl sarʋ na harɔnɩ sɩ-n pɩɛr, mɔ̃kɛ Thãgba kɔɔ ʋlfɛna sɩnɩ ɩna ha sɛr. ¹⁴ Gɛr gɩ, nɛrɛɛkɛ mɩ-n nanɩ, mɔ̃ nɩ hanɩ pɩɛrɔ gɩrɛ, na-n bãbanɛ na-n do a yɩ nɩ na jiine na dɩ paara’, sɩ nɩ dɔ a yɩ nɩ na ha ɩɩ. ¹⁵ Na-n jɛna dɩ asɩ Kɔ̃tɩ̃ɩ ha fʋ dʋɔn anɩ taa, mɔ̃kɛ Pol asɩ omiikɛ sɩ-n nanɩ kɔɔ khere narnɩ na kpɛsɛrɛɛkɛ Thãgba kɔɔ haanɩ. ¹⁶ Mɛ̃ a-n so ɔɔ sɛbɛsɔra fɛʋ ka a-n mɩɩnɩ ga thɩmɩɩ. Paar hale a khɩɩr jɩɩrra, dɩ jɩ ’leedara na wɩrɛ na tɩɛnna’ n fi gi mɔ̃kɛ wɩ-n cʋʋnι na gɩ̃ Thãgbaa sɛbɛsɔ dakha, sι dιι do awι thɛthɛɛ kʋɛ gι. ¹⁷ Gɛr gι nɛrkɛ mι-n nanι, ne wer ’lire jιιr ga thɩ̃sɔɔle; na-n jιɛ hιιn dι tιι khabaasɔɔ fιl puu na-n cʋʋ nι nι lɛ̃ hʋɛra sι nι faa anɩ kɩbɩ jɩɩla’. ¹⁸ Nɩ jɛ asɩ Kɔ̃tɩ̃ Jeju Kirisitiikɛ kɔɔ taa sɩnɩ ga-n pɛr, dɩ dɔ nɩ jɩ dakha bɔ jɩɩrɩkɛ a kɔɔ jɩ sɩnɩ ga-n pɛr. Ɔr hɩna i dʋbɩrɛ nɛnɛ̃ waa, gɩ jalna khorr.