2 KORƐ̃TƖDARA

¹ Mɛr Polɩkɛ dɔnɩ Jeju Kirisitii thɔ̃thɔn mɔ̃ Thãgba tuni, na Timotheekɛ dɔnɩ omine, thɔna sɛbɛɛkɛ a ha Thãgbaa we gbɛbɩdaraakɛ hanɩ Korɛ̃tɩ na tɩɩ phuusɔ fɛʋʋkɛ hanɩ paar fɛʋ Akaɩra. ² Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ a jɛ nɩ dakha bʋɔra. ³ Thãgba asɩ Kɔ̃tɩ̃ Jeju Kirisitii Thɩ hɩna fʋɔrɛ, Thɩrɛ gɩ kɛ bʋɔ n fʋnɩ, a dor dakha Thãgbaakɛ ha faarɛ fɛʋ n thernɩ. ⁴ Ɔr n cʋɛ sɩ dɩ sa-n faa haar asɩ nɩra fɛʋ, dɩ mɛ̃ ha faarɛɛkɛra sɛrɛɛ thɛthɛ n ’lɛnɩ Thãgbaa pa, sa punone ɔmɛ̃ a na cʋʋ wɩrɛ n yɛnɩ nɩ caar wo nɩ caar dɩɩdɩɩ, dɩ wa faa haar. ⁵ Gɩdonɩ mɔ̃kɛ sɩ-n ’lɛnɩ Kirisitii gaar jɔɔ, mɛ̃ dakha sɩ-n ’lɛ ha faarɛ jɔɔ dɩ a-n the Kirisitirara. ⁶ Ado sɩ-n yɩrɛ nɩwɛ hananana, anɩ ha faa na anɩ taa ’lɛ dɔ kɩrʋ; dɩ ado sɩ ’lɛ ha faarɛ, anɩ ha faa dɔ kɩrʋ, kɛ na ba cʋɛ nιnι dɩ na fʋ haar bɔ gaar ca bɩɛllaakɛra sɩ-n yɩnɩ dakha ser. ⁷ Dɩ asɩ nũ pɛ nɛrɛra na ha baal paara’, gɩdonɩ sɩ jɩrɛ dɩ mɔ̃kɛ nɩ bulni kha na sɛrɛ bɔ gaarɛ, mɛ̃ na bul kha na sɛrɛ ha faarɛ. ⁸ Omɩna, sa-n ƴaal na-n jɩ mɔ̃kɛ gɩrɛ hanaa ga: Nɩwɛ kɔɔ dã sɛr Ajɩra waa, dɩ sɩ kɔɔ gbɛ̃gbɛl dɩɩ thʋ̃ kãasɩ asɩ fãgara, sa thʋ̃ jɩrakɛ sa hananɛ yire bã. ⁹ Sɩ kɛrakɛ asɩ bɩnɔ ser yɩ khikhi togʋʋ sɩ too, dɩ mɛ̃ sa pɛ asɩbara haar mɔ̃kɛ sɩ donɩ thɩ̃a’, sɩ sɩ pɩɛr Thãgba haar, ʋrɛɛkɛ n cʋɛnɩ khe dɩ wɩ ɩɩr a the khirera. ¹⁰ Ɔr gɩɩkɛ kɔɔ taa sɩnɩ, dɩ ɔrra na taa sɩ khi puurəəkɛ; ɔrra sɩ hananɔ nũ pɛrɛ dɩ a na taa sɛr wo. ¹¹ Nɛrɛ dakha n bulo si na Thãgba bɩɛlɛ, dɩ bɔ jɩɩrɩkɛra sɩ-n ’lɛnɩ tibil jɔjʋɔɔ Thãgba bɩɛllala na dor nɔɔ, dɩ tibil jɔjʋɔ na khɩɩ Thãgba asɩdara. ¹² Gɩdonɩ asɩ məbida dʋɔn sobɔ so jɩ thɩmɩɩrɩkɛ asɩ kpɩɛrnɔ n ha sɩnɩ, dɩ sa-n ɩɩrna tɩbɩla fɛʋʋ thɩ̃thɩɩn na phur na fɩlɛɛkɛ hanɩ wasɩ, kɛ thɛnɩ Thãgbara, sɩ anɩ thɩ̃thɩɩn jɔ; sɩ ga do tibil kpɛsɛrɛra gɩ tha’, sɩ Thãgbaa bɔ jɩra gɩ-n the. ¹³ Sa khere nar dɩkha kpɩɩ, sɩ ga do gɩrɛ nɩ-n yɩnɩ sɛbɛra na gɩrɛɛkɛ na jɩnɩ kɩrʋ gaaga. Nɩ kɔɔ jɩrɛ asɩda gbe, dɩ mɩ pɛrɛ haar na jɩrɛ tue bɔɔbɔɔ na dana khu paar, ¹⁴ dɩ Jeju Kɔ̃tɩnɩ wirə sɛr na dɔ nar məbidaa mɔ̃kɛ na do sarnɩ məbidaa. ¹⁵ Ga tu jɩɩlera dɔ nɔɔ dɩ ɩ̃ kɔɔ ƴaalla gɩ do anɩ pa mɩ kɔɔ pɔ ɓo, dɩ mɛ̃ na ’lɛ balanyɔ kãkar, ¹⁶ sɩ ɩ̃ the anɩ pa ɩ̃ jal Masedʋan, sɩ ɩ̃ bir ɩ̃ the Masedʋan wo ɩ̃ pɔ anɩ pa, nɩ thɔɔ mɩ dɩphã ma-n jal Jude. ¹⁷ Dɩ mɔ̃ mɩ-n ƴaalnɩ thalera, khʋma khʋma tibil ha maa bɛ? Agɩbo gɩ ho mɔ̃ tibili tibil do pa hanɩ ɩ̃ ƴaal n jal, gɩ ho “ɔɔ” na “ooho” har ɩ̃ pa ya? ¹⁸ Mɔ̃kɛ Thãgba donɩ sobɔdaar, mɛ̃ thɩmɩɩrɩkɛ sɩ kɔɔ mɩɩ nɩnɩ na kɔɔ do “ɔɔ” na “oohoa’.” ¹⁹ Gɩdonɩ Thãgbaa Bikuun Jeju Kirisitiikɛ mɛrɛ na Sɩlvɛ̃ na Timothe kɔɔ mɩɩnɩ ɔɔda anɩ thɩ̃thɩɩn, na kɔɔ do “ɔɔ” dɩ “ooho” ga, ɔrra wer “ɔɔ” haar gɩ dɩbara. ²⁰ Gɩdonɩ Thãgbaa ʋlfɛsɔ fɛʋ “ɔɔ” gɩ do ɔrra. Dɩ gɛr gɩ, ɔr dɔ ʋrɛ sɩ-n gbanɩ dɩ sa-n sona “amɛn” Thãgbaa i na-n dʋbɩrɔ. ²¹ Ʋrɛɛkɛ n cʋɛ sɩnɩ nakha nɛrɛ dɩ sɩ tɩ Kirisitira, kɛ kɔɔ phire sini dakha, Thãgba gɩ. ²² A pɛ sarɛ dakha ɔɔ jẽ, a pɛ asɩ hara Thu Phuu dɩ do barã paar gɩrɛraakɛ sa ’lɛnɩ. ²³ Mɔ̃ ga fʋnɩ sɩɩ do gɩ bul ner dɔ nɔɔ ma kɔɔ birni pɔ Korɛ̃tɩ dɩɩra ga, dɩ Thãgba to garɛ yire dɩ sobɔr mɩ so. ²⁴ Sɩ ga nɩna fãga sɩ-n ƴaal sɩ cʋʋ nar ha pɛdaara ga, sɩ sɩ-n ƴaalɛ sɩ bul kha anɩ da hanana, gɩdonɩ nɩ tɩrɛ ha pɛrɛra.

¹ Mɛrɛɛ thɛthɛ kɔɔ te kpɩɛrɛ kɛ ɩ̃ bɩnɔ sa yɩ, ma bir na pɔ anɩ pa gbobirera ga. ² Gɩdonɩ ado mɩ cʋʋ nι dι nι gbobi, amɛ na cʋɛ daʋ dι a fʋ mι saagado ʋrɛra mι cʋʋnɩ dɩ gbobi ga. ³ Mɩ kɔɔ khere narɛ gɩrɛɛkɛra mɩ kɔɔ kherenɩ, dɩ a ma pɔ anɩ pa, ma-n yɩ gbobire wɩrɛraakɛ dɔnɩ wɩrɛ na cʋɛnɩ wo dɩ daʋ na fʋ ma’. Dɩ mɩ hananɛ ga ha pɛɛkɛ, dɩ ɩ̃ daakɛ na fɔ mɩnɩ na dɔ nɛrɛ fɛʋʋda. ⁴ Gɩdonɩ gbobi kɔ̃tɩ̃ɩ, na ha helle, na yilẽbe jɔɔ mɩ kherena nar sɛbɛɛkɛ, ga do dɩ ma cʋʋ nɩ nɩ gboba’, sɩ dɩ na jɩ dɩ naʋʋkɛ mι hana narnι gι kɔ̃tιnɛ. ⁵ Ado tibil do nɔɔ dι gbobire hale, ga do mɛr dιbara a cʋʋ dɩ ɩ̃ gboba’, sɩ nɛrɛ fɛʋ gɩ; sɩ anaa ga do fɛʋ ga, mɩ sor thakɛ gɩdonɩ ma-n ƴaal ɩ̃ kaya ɩ̃ dɛɛnɔa’. ⁶ Sorɩkɛ ɩkhasɔ bərəəm nɛrɛra kɔɔ pɛrnɩ kuunnaale daan. ⁷ Gɩ baar dɩ na ka na faa ɔɔ sopugo na haa dɩphã, sɩ na ƴɔlʋʋ haar, agado mɛ̃ ga, ha dɩ gbobire na thʋnɛ na jʋɔraa. ⁸ Mɩ-n bɩɛl nɛr dɩ na nɩnaa naʋ. ⁹ Gɛr dɔ nɔɔ dakha dɩ ɩ̃ khere nar, a be nɩ bɩnɛ ma-n hɩɩn, ado na nɩrɛ nũu thɩ̃ɛ fɛʋra. ¹⁰ Sɩ ntɛɛ sopugookɛ nɩ-n faanɩ, mɩ-n faarɛ mer. Sɩ ado mɛrra gɩ, gɩrɛ mɩ-n faanɩ, ado ger mɩ kɔɔ faarɛ dɩkhaa sopugo, nɛr dɔ nɔɔ Kirisitii ƴɛra. ¹¹ Dɩ mɛ̃ Satã na yɩ sar hʋɛa’, gɩdonɩ jɩɩr na ’lee sɩ ɔɔ fɩɩlla ga. ¹² Ɔbɔɔkɛ mɩ kɔɔ danɩ Tʋrʋasɩ ɩ̃ mɩɩ Kirisitii tutugo bʋɔɔ thɩmɩɩ, Kɔ̃tɩn kɔɔ khɛr mɛr loo wer, ¹³ sɩ ɩ̃ ha na kɔɔ jɩɩl cɔcɔa’, gɩdonɩ ma kɔɔ yɩ Tɩtɩ ɩ̃ oma’, dɩ mɩ kɔɔ bɩɛlɛ hʋɛ sa gba jal Masedʋan. ¹⁴ Thãgba hɩna fʋɔrɛ, ɔrkɛ n cʋɛ sɩnɩ wire koo dɩ sa-n kəə, dɩɩ do Kirisiti dɔ nɔɔ, dɩ gba sɩ dɩ cʋʋna dι jιιrιkɛ tιbιla na jιnι Kirisiti na-n pι paar fɛʋ mɔ̃kɛ latιkolo n hʋnι. ¹⁵ Gιdonι ado Thãgbara gι, sι hʋrɛ thɩ̃ɛɛkɛ n hʋnanι daʋ, dι Kirisiti dɔ nɔɔ, wιrɛ ’lɛnι taarɛɛ thɩ̃thιιn na wιrɛ n buurenii thɩ̃thιιn. ¹⁶ Wɛra wer, khi hʋnɛ gι-n do war dι a-n jalna wι khirrə, sι ado wɛra wer, yi hʋnɛ gι-n do war dι a-n jalna wι yirera. Dι ʋmɔ̃ dana thɩɛnaale? ¹⁷ Gɩdonɩ sa ho tibil jɔjʋɔɔkɛ n mɩanɩ Thãgbaa thɩmɩɩ dɩ wa-n pɛ awɩ kũkunoə’, sɩ ha phuu ser n mɩɩna, mɔ̃ sɩ donɩ Thãgbaa thɔ̃thɔna Thãgbaa ƴɛra, a ha Jeju Kirisitira.

¹ A thɩɛna gaa, sɩ bire ma sa-n nɩna asɩbara dɩ tɩɩ teenaa sɩ doaa bɛ? Dɩ agɩbo ʋkhasɔɔ kha sa ƴaal tetee sɛbɛ sɩ nɩna nɩ, agɩbo sɩ ba ƴaal nar? ² Nɛrɛɛ thɛthɛra ka do asɩ sɛbɛ, a khere asɩ hara, dɩ tɩbɩla fɛʋ jɩ gɩ dɩ wa-n hɩɩn. ³ Sɛbɛɛkɛ Kirisiti kherenɩ nɩ do gbelẽ gbelẽ, kɛ sɩ doronɩ thɔ̃ dona. Ga do sɛbɛ khere nƴʋɔn wɩ kherena ga, sɩ Thãgba yidaarɩ Thu gɩ kherena, ga do boka thelnaana gɩ khera’, sɩ tibil haarra gɩ khere. ⁴ Gɛr dɔ tu jɩɩrɩkɛ sɩ hananɩ Thãgbara dɩɩ the Kirisitira. ⁵ Ga do sɛrɛɛ thɛthɛ hɩna punone a na ba kpɩɛr dɩkha gɩ ho asɩ pa gɩ tha’, sɩ asɩ puno Thãgbara gɩ-n the. ⁶ Ɔr hana sɩ punone dɩ sɩ do thɔ̃ dona nɔ bɩɛl ʋlfɛ phaara, ga do jɔfʋraakɛ kherenenɩ gɩ bã, gɩdonɩ jɔfʋʋkɛ kheranɩ n kʋrɛ, sɩ Thu Phuu n ’laanɛ yire. ⁷ Gɩdonɩ ado jɔfʋ ’laarɛɛkɛ kherenenɩ bokaarra kɔɔ ιnanɛ khir sιι dorakɛ gι kɔɔ ιιrnanɛ carbararɛ dιι do Thãgbaa i dʋbιra gι the, dι Ɩjιrayɛl bιsana na-n ba puno na jιι hιιn Mʋιjιι ƴa’, gιdonι ɔɔ ƴɛ carbaraalera dɔ kιrʋ, sιι dorakɛ dakananɛ gι, ⁸ na jι dιι do thɔmaakɛ dɔnι Thu Phuuda n carbararɛ a ka gelaa? ⁹ Ado so heen thɔma hananɛ carbara caale, ga do fιl sar thɔma na-n carbararɛ ka gι jɔ gele fĩiəə? ¹⁰ Mɔ̃ thɩ̃ɛ hanι thaa, gιrɛra n kɔɔ carbaranɛnι na do thɩ̃ɛ bã, gιdonι gιrɛ jɔ gιnι fĩi na carbararɛ ιnɛ a thi gar. ¹¹ Dι ado gιrɛ dɔnɩ dakananɛ kɔɔ hananɛ carbararɛ, dɩ mɔ̃ gɩrɛ n tɔɔnɩ khorrɩ carbara na ha? ¹² Dɩ mɔ̃ sɩ hananɩ ga nũ pɛ caakɛ, sɩ-n mɩɩrɛ na ’lar casɩ. ¹³ Sa-n cʋʋ Mʋɩjɩɩ kha ga, kɛ kɔɔ gbaannɩ kɩ̃kɩɩn a thi ɔɔ ƴɛra, gɩ do nɔɔ Ɩjɩrayɛl bɩsana na-n ba hɩɩn kirkirkir gɩrɛ dɔnɩ dakananɛ gɩ dana khu paaraa ga. ¹⁴ Awɩ kpɩɛr dibi warɛ, gɩdonɩ a dana nĩ ɔbɔɔkɛ wɩ-n sonɩ ʋlfɛ tɩ̃ sɛbɛ, kẽkẽ ca gelela bor hale ’lo ga tə’, gɩdonɩ Kirisiti dɩbara na te gɩ dɩ a ther. ¹⁵ Sɩ a dana nĩkɛ ɔbɔɔkɛ wɩ-n sonɩ Mʋɩjɩɩ sɛbɛ, kɩ̃kɩɩn n hale awɩ hara dɩɩ kɛɛ. ¹⁶ “Sɩ ɔbɔɔkɛ tibil n kɛrnɩ da-n kpa Kɔ̃tɩnna, kɩ̃kɩɩn n tire.” ¹⁷ Dɩ Kɔ̃tɩn, Thu Phuu gɩ; dɩ ka Kɔ̃tɩnɩ Thu n hanɩ, le wa dʋʋr n ha. ¹⁸ Dɩ gɛr gɩ sɛrɛ fɛʋʋkɛ na hananɩ dɩkha dɩɩ kɛɛ sɩ ƴιɛra bã, Kɔ̃tɩnɩ carbara n caranɛ sɩ ƴɛ bire mɛ̃ hɩɩn khaa, dɩ sɩ debi na hʋʋ a na pɛr, dɩɩ do Kɔ̃tɩnɩkɛ dʋɔnnɩ Thu Phuu pa gɩ-n the.

¹ Gɛr dɔ kɩrʋ mɔ̃kɛ sɩ hananɩ thɔ̃ ca ƴɩrɛ, mɔ̃kɛ bɔ jɩɩrɩkɛ sɩ ’lɛnɩ hanɩ, nyɛ̃ɛ na-n khiir sa’. ² Sɩ-n bor yicur thɩ̃ɛ fɛʋʋkɛ n cʋɛnɩ wolonena, dɩ sa-n ɩɩrna fɩɩla’, dɩ sa-n golõ dakha Thãgbaa thɩmɩa’, sɩ sobɔ sorra casι sι-n nιnana Thãgbaa ƴɛra, tibil caar fɛʋʋ kpιɛrra, dι tibil teena sι do. ³ Sι adorakɛ asι tutugo bɔ thιmιι bo ker, wιrɛraakɛ n buureni gι ker, ⁴ kɛ dɔnι ha pɛ ’leedara, kɛ nɛnɛ̃ bɔɔkɛɛ thãgba yaarnι awι kpιɛr, wa-n puno a yι tutugo bʋɔɔ dahιra’, kɛ dɔnι tutugo bʋɔɔkɛ n nɛnanι Kirisitii i dʋbι, kɛ dɔnι ʋrɛ n kureni kha na Thãgba. ⁵ Ga do asιbara sι gba sa-n mιι mɔ̃ sι hana’, Jeju Kirisitii Kɔ̃tɩ̃ do sι-n mιι, na mɔ̃ sι donι anι thɔ̃ dodaarsɔ dιι do Jeju dɔ nɔɔ. ⁶ Gιdonι Thãgbaakɛ sɔnι ayι, dahιrɛ n caranɛ dabirəə thɩ̃thιιn, ɔr cʋɛ dahιrɛ dιι carã asι hara, gι cʋʋ tibil a jι Thãgbaa i dʋbιιkɛ Kirisiti n nιnanι. ⁷ Sι hananɛ ga tιι ko thɩ̃ιkɛ daaraakɛ dɔnι ja daa, dι mɛ̃ fãgaakɛ na hanι mιɛrɛra ga, ga dor Thãgba hιna, ga do asι pa gι tha’. ⁸ Nιwɛ fɛʋra sa-n yι fɛfɛɛ paara’, sι sa ha tiirrə na tə’. Kpιɛrɛ nyanyãa sɛr ka, sι sa-n faa nũ pɛra’. ⁹ Wι-n kpoo sarɛ sι Thãgba na bo sa’. Wι-n thʋna sɛr thιι, sι sa wιɛla’. ¹⁰ Wire fɛʋ paar fɛʋ, asι tomι n khi Jejuu khi, dι mɛ̃ dakha Jejuu yi na yιr asι tomιra. ¹¹ Gιdonι sɛrkɛ hananɩ yire, bɔɔ fɛʋra wɩ-n to sɩ khirrə dɩɩ do Jejuuda dɔ nɔɔ, dɩ mɛ̃ Jejuu yi na yɩr asɩ tomɩraakɛra dɔnɩ dakhinəne. ¹² Mɛ̃ gɩ, khir n dʋɔn thɔma sɛrɛra, sɩ yire n puno a na-n do thɔma nɛrɛra. ¹³ Ha pɛ ca bɩɛlla sɩ hana mɔ̃kɛ gɩrɛ kheranɩ Thãgbaa sɛbɛra sonɩ ayɩ: “Haar mɩ kɔɔ pɛr, gɛr gɩ dɩ ɩ̃ kɔɔ mɩɩ”, sɛrɛ dakha haar sɩ pɛr gɛr gɩ dɩ sa-n mɩɩ. ¹⁴ Gɩdonɩ sɩ jɩrɛ dɩ ʋrɛɛkɛ kɔɔ ɩrɛnɩ Jeju Kɔ̃tɩn khirera, a na ɩɩr sɛr dakha na Jejura, a kpa sɩ sɩ jɩɩl kha na nɛrɛ ɔɔ ƴɛra. ¹⁵ Gɩdonɩ gelela fɛʋ nɛr dɔ kɩrʋ dɩ a-n ha, dɩ mɛ̃ bɔ jɩɩr na-n dɛbɩrɔ gɩ cʋʋ Thãgba khɩɩrɛ jɔɔ n hale tibil jɔjʋɔra, Thãgbaa i na-n dʋbɩrɔ. ¹⁶ Gɛr dɔ kɩrʋ nyɛ̃ɛ na-n khiir sa’, gɩdonɩ adorakɛ asɩ tomɩɩkɛ na kʋɛrɛ, sɩ asɩ tibil ʋrɛ hanɩ bɩnɔ, kɛ na dɔnɩ dayɩnana’, n debire dɩ do daphaa da-n pɛr wire fɛʋ. ¹⁷ Gɩdonɩ asɩ nɩ jaba jabaakɛ sɩ-n yɩnɩ nɛnɛ̃ bɔɔkɛ gbe, har dɩ a-n ɩna sar i dʋbɩrɛɛkɛ dɔnɩ khorrdaa. ¹⁸ Gɩdonɩ ga do gɩrɛ tibil n yɩnɩ na yire ser n hɩɩna’, sɩ gɩrɛ tibil na punoni na yɩ na yirə’ sɩ-n hɩɩn. Gɩdonɩ gɩrɛ tibil n yɩnɩ na yire dakananɛ gɩ, sɩ gɩrɛ tibil na punoni na yɩ na yirə’ khorrdaa gɩ do.

¹ Gɩdonɩ sɩ jɩrɛ dɩɩ do ado asɩ tomɩ kɛ thɩɩra, kɛ dɔnɩ waa wɩɛl, sɩ hananɛ le Thãgbaa dʋɔ cʋɔrɩkɛ dɔnɩ Thãgbaa nyɛ̃ thɔ̃, khorr too paar gɩ, ga do tibil nyɛ̃ɛ ma’. ² Sɩ dakha sɩ-n thʋnɛ sa-n ’wɩɩ waʋʋkɛra ka, dɩ sa-n gbɛ̃gbɛrɛ̃ sɩ mʋa asɩ Thãgbaa dɩ cɔra, ³ gɩdonɩ a sɩ ’li mʋʋrɛ pι, wa yι sι gι do sι ’leere tomιra’. ⁴ Gιdonι sɛrkɛ hanι wa ʋrɛraakɛ, sι-n ’wιιrɛ sι gbɛ̃gbɛlnι, dι sι-n ƴaalɛ ga do dι sa for thιιkɛɛ tomι na fa ga, sι dι sa to ƴũ tomɩr, dɩ mɛ̃ ga dor yire gbaan gɩrɛ dɔnɩ dakhinəne a dɩɩ. ⁵ Dɩ ʋrɛɛkɛ cʋɛ sɩnɩ a pɛ gelelala, Thãgba gɩ, kɛ kɔɔ hana sɩnɩ Thu Phuu dɩ do barã paar gɩrɛraakɛ sa ’lɛnɩ. ⁶ Gɛr gɩ wire fɛʋ sɩ-n hananɛ tu jɩɩr, dɩ sɩ jɩrɛ mɔ̃ sɩ-n cɔnɩ tomɩrraakɛ, sɩ toore a hʋnɔna Kɔ̃tɩn. ⁷ Gɩdonɩ ha pɛrɛra sɩ-n ɩɩr, ga do yi yɩrra ga. ⁸ Gɛr gɩ tu jɩɩrɩkɛra sɩ hananɩ, ƴaal kɔ̃tɩ̃ɩ dʋɔn, sɩ faa tomɩrɩkɛ sɩ hananɩ sa jala a tɔɔna Kɔ̃tɩn. ⁹ Gɛrra dɔ nɔɔ dakha dɩ sa-n do bʋɔ, sɩ sɩ daaraa haar, ado sɩ-n toore kɛ tomɩrraakɛ, a sɩ-n fagʋʋrɛ. ¹⁰ Gɩdonɩ dɔ sɛrɛ fɛʋ n jal sɩ jɩɩl Kirisitii kɩɩl too pa ƴɛ thɩ̃thɩɩn, wɩ nɩrɔ mɔ̃ sɩ hanɩ, dɩ mɛ̃ fɛʋ bɩɛlbɩɛl na ’lɛ thɩ̃ɛ dɩ a ha mɔ̃ ntɛɛ bɔ cʋʋ, na ntɛɛ puu cʋʋ hanɩ, a hanɩkɛ tomɩrra. ¹¹ Dɩ sɩ jɩnɩ gɩrɛ n dɔnɩ sɩ ma Kɔ̃tɩn, sɩ-n ƴaalɛ sa-n yɩrana tɩbɩla, Thãgba jɩ sɛr casɩ mɔ̃kɛ sɩ hanɩ, dɩ mɩ pɛrɛ haar anɩ kpɩɛrnɔra nɩ jɩ sɛr dakha mɔ̃kɛ sɩ hanɩ. ¹² Sa bir ma sa-n nɩna asɩbara nɛrɛra dɩ tɩɩ teena sɩ doa’, sɩ hʋɛ sɩ ha nɩ dɩ na məbi asɩdara, dɩ na puno na birse wɩrɛɛkɛ n məbəni gɩrɛraakɛ dɔnɩ yi yιdaa, sɩ ga-n do hadaa ga. ¹³ Gɩdonɩ ado sɩ də̃bəəl Thãgbaada dɔ nɔɔ, sι ado sι jιrɛ fιlɛ nɛr dɔ nɔɔ. ¹⁴ Gιdonι Kirisitii naʋ n tɔ sɩ, gɩdonɩ sɩ jɩɛ jɩ dɩ ado bɩɛl kɔɔ khire tɩbɩlala fɛʋ, ga dor dι tɩbɩla fɛʋ khiire. ¹⁵ Dɩ ɔr kɔɔ khe tɩbɩlala fɛʋ, dɩ mɛ̃ wɩrɛɛkɛ n hananɩ yire, wa hana yire wa-n nana dɩbara ga, sɩ gɩ dɔ ʋrɛ kɔɔ khe warnɩ sa ɩɩr a the khireraada. ¹⁶ Mɛ̃ gɩ, a fʋna nɛnɛ̃ dɩphã, sa-n hɩιn tibil mɔ̃kɛ tɩbɩla thɩɩra n hɩɩnna’. Dɩ adorakɛ thalee hɩɩn sɩ kɔɔ jɩna Kirisiti, sɩ ga do mɛ̃ sɩ jɩɩ gɩrɛ bã. ¹⁷ Ado tibil ha Kirisitira tibil phaa a-n do, thɩ̃ tɩna phor ka, hιnɛ thɩ̃ɛ fɛʋ n debire dɩɩ do daphaa. ¹⁸ Dɩ gele fɛʋ Thãgbara gɩ the, kɛ cʋɛ sɩnɩ dɩ sɩ bir kũu kha na ɔr dɩɩ the Kirisitira, dɩ ha sɩ bir kũu kha thɔma. ¹⁹ Gɩdonɩ Thãgba kɔɔ haan Kirisitira a cʋʋ tɩbɩla dɩ wɩ bir kũu kha na ɔr Thãgba, aa therna tɩbɩlaa dɩ pa ga, wo a pɛ sarɛ sa-n mɩa bir kũu kha thɩmɩɩr. ²⁰ Sɛr dʋɔn Kirisitii dedeesɔɔkɛ Kirisitira thɔnɩ, dɩɩ ho sɛr Thãgba n gba da-n kpãkpaana dɩ yɩ: Sɩ-n phʋʋr nɛr Kirisitii irə, nɩ birə kuune kha na Thãgba. ²¹ Kirisitiikɛ na kɔɔ jɛnɩ sopugoə’, ɔr a cʋʋ dɩ debi do sopugo dɩɩ do sɛr dɔ nɔɔ, dɩ mɛ̃ sɩ debi do fɩl sarʋ Thãgbara, dɩ Kirisitira gɩ the.

¹ Dɩ mɔ̃kɛ sɩ-n donɩ kha thɔma na Thãgba, sɩ-n phʋʋr nɛr dɩ na-n do Thãgbaa bɔ jɩ na do nar thɩ̃aa ga. ² Gɩdonɩ a sor ayɩ: “Bɔɔkɛ gɩ teenɩ kha mɩ kɔɔ pɛ fɛr nũu, tataa wire mɩ kɔɔ bul fer.” Hɩnɛ, nɛnɛ̃ dʋɔn bɔɔkɛ gɩ teenɩ kha. Hɩnɛ, nɛnɛ̃ dʋɔn tataa wire. ³ Sa-n pɛ nɛ baradaa tibillə thɩ̃ɛ wo thɩ̃ bɩɛllalaka’, gɩ ho thɔmaakɛ na hananɛ kpɛ paara’. ⁴ Sɩ thɩ̃ɛ fɛʋra, asɩ fɩl n nɩna dɩ Thãgbaa thɔ̃dara sɩ do, ha fʋrɛraakɛ sɩ-n hananɩ jɔɔ nɩwɛra, na gɩrɛraakɛ telene sɩnɩ, na mɔ̃ sa-n yɩnɩ fɛfɛɛ paara’, ⁵ na bɩɩrɛra, na khaɩ pɛrra, na dɩ nyanyaanɛna, na thɔ̃ khe dʋʋrra, na yi cɔnanɛna, na kɔmɛr cɔnanɛna, ⁶ dɩɩ the dakha fɩl phuurə, na jɩɩrra, na ha fʋ yɩrrɛra, na ha bulo fɩlɛla, na Thu Phuurə, na naʋ bʋɔra, ⁷ na sobɔ thɩmɩɩrra, na Thãgbaa fãgara, na fɩl sar ko ke thɩ̃ɛɛkɛ sɩ-n pɩɛrnanɩ a dona gɩrɛ sɩ-n phinəni tomɩr; ⁸ na dakha i dʋbɩrɛra, na beesirera, kuerera na i bɔ werra; fɩfɩla wɩ-n we sɩ, sɩrakɛ sobɔ so tɩbɩla ha sɩ. ⁹ Wa jɩ sa’, sɩrakɛ tɩɩ jɩnanɛ bɔɔbɔɔ ha sɩ; wɩ yɩ sa jɩ paar na pɔa’, sɩ sɛrkɛ na yire; wɩ yɩ sɩ-n yɩrɛ naarɛ, sɩ ga do sa khirə’; ¹⁰ wɩ yɩ gbobire wɔɔ sarɛ, sɩ wire fɛʋ daʋ n fʋ sɛr; wɩ yɩ bɔdara ha sɩ, sɩ sɛr n lɛ tɩbɩla jɔɔ; wɩ yɩ sa hana thɩ̃a’, sɩ sɛr hɩna thɩ̃ɛ fɛʋ. ¹¹ Korɛ̃tɩdara wei, sa mʋ̃ nar dɩkha ga, sɩ faarɛ haar yala a ha nɩ. ¹² Asɩ naʋ na ’lũə’, sɩ anɩda ’luno. ¹³ Nι faa haar yala a ha sι mɔ̃ sι faanι asιda a ha nι, mι mιιna nɛr mɔ̃ nι donι ɩ̃ bιsãsɔ. ¹⁴ Na-n tu kpele bιɛl tʋʋr na wιrɛ dɔnι ha pɛ ’leedara ga. Gιdonι anyee bɔ ca fιl sarʋ na fιl gõgolõ na-n bɔ kha? Anye dahιrɛ na dabirə ha kha? ¹⁵ Anyee ’li ca Kirisiti na ’linə kha Belιal? Anyera ʋrɛ pιɛrnι haar na ʋrɛ na pιɛrnι haara’ na bul kha? ¹⁶ Anyee gbɛbι ca Thãgbaa cɔ na gbɛbι na thιla? Gιdonι sɛr dʋɔn cʋɔr Thãgba yidaarra, mɔ̃kɛ Thãgba kɔɔ sonι ayι: “Ma toore awι bιnɔ, ma-n kpaarɛ awι thɩ̃thιιn. Ma dor awι Thãgba, dι wa dor ɩ̃ too.” ¹⁷ Gɛr gι, “Nι thɛ awι thɩ̃thιιn, nι lea hana kpιι, Kɔ̃tιn sɔ. Na-n tha gιrɛraakɛ bisenenə’, dι mɛrɛ ma tee ner, ¹⁸ dι ma do narɛ Thιrɛ, dι nɛrɛ na do marɛ bikona na bikhɛna, mɛr Kɔ̃tιn fãga fɛʋʋ hɩ̃daar sɔ.”

¹ Nɛrɛɛkɛ mι-n nanι, mɔ̃kɛ sι hananι ʋlfɛ ca gιrɛ, sι phʋɔlɛ khorr gιrɛ fɛʋʋkɛ n biseneni tomιr na thue, a na bãbanɛ na asι kpιι lee Thãgba maarra. ² Nι tea sι na haar. Sa dι tibillə ga, sa kʋɛ tibilə’, sa phʋʋn tibil woa’. ³ Ga do sor mι-n heen nι mι mιιnι thakaa koe. Gιdonι mι kɔɔ ’lire sor ayι: Sι fʋ nɛr na haar, a sι har kha kɛ na yire, a sι-n khire kha. ⁴ Mι hana narɛ ha pɛrɛ jɔɔ ka. Mι hananɛ məbidaa ka nɛrɛra, ha ƴɔllɛ ha marɛ vʋ̃ʋ, daʋ thʋnɛ ka mar asι bɔ gaar fɛʋʋ thɩ̃thιιn. ⁵ Gιdonι a fʋna bɔɔkɛ sι kɔɔ danι Masedʋan sa kɔɔ yι hιιrɛ fιιʋraka’, sι sι kɔɔ gaarɛ bʋɔ thɩ̃ɛ dιιdιιra. Kɛ̃kɛrɛnɛ jιɛra, maar bιnɔ. ⁶ Sι Thãgbaakɛ n cʋɛnι wιrɛ kpιɛrɛ nyanyaanι dι wa-n faa haar, ɔr kɔɔ cʋɛ dι Tιtɩɩ ɩ̃ do nɔɔ dɩ sɩ faa haar. ⁷ Sɩrakɛ ga do ɔɔ ɩ̃ιle dɔ nɔɔ dɩbara ga, sɩ gɩdonɩ Tɩtɩɩ thɛthɛ ’lɛr ha faarɛ anɩdara, a mɩɛ sɛr mɔ̃ nɩ-n ƴaal mɩnɩ ka, a mɩɛna anɩ gbobi, na mɔ̃ anɩ gbɛ̃gbɛrɛ̃ mɛrɛra hanɩ, dɩ mɛ̃ daʋ fʋ mɩ dɩphã waa a ka. ⁸ Sɩrakɛ ɩ̃ sɛbɛ cʋʋ nɩnɩ dɩ nɩ gbobi sɩ ma so a ma ja’, gɩdonɩ mɩ yɩɛrɛ dɩ sɛbɛɛle cʋʋ nɛr dɩ nɩ gbobi, sɩ bɔɔ gbe gɩ. ⁹ Dɩ adorakɛ mɩ kɔɔ sor a ma jɩ, sɩ nɛnɛ̃kɛ gɩ da marɛ, ga do gɩdonɩ nɩ gbobire ga, sɩ gɩdonɩ anɩ gbobi thɔɔ nɛr pɛ ha debirera. Gιdonι mɔ̃ Thãgba ƴaalnɩ nɩ kɔɔ gbobi, dɩ mɛ̃ ga do sɛr pɛ nar ga soole fɩɩʋraka’. ¹⁰ Gɩdonɩ gbobire mɔ̃ Thãgba tuni n ɩnanɛ ha debire, kɛ n thɔɔnɩ tibil dɩ pɛ taarɛra, dɩ ha debi ca ole na hana tibil n soro a ma ja’; sɩ gbobireekɛ dɔnɩ thɩdaa khir gɩ-n ɩna. ¹¹ Gbobi ca ʋrɛ hanɩ mɔ̃ Thãgba tuni, nɩ hɩnɛ gɩrɛ gɩ cʋʋ narnɩ ɓoɓo dɩ nɩ pər waa gel, na mɔ̃ nɩ gbuuni thɩmɩɩrraale yʋʋ, na mɔ̃ gɩ hel nɩnɩ haar, na mɔ̃ maar fʋ nɩnɩ, na mɔ̃ anɩ ƴaal kɔ̃tɩ̃ hanɩ, na mɔ̃ anɩ gbɛ̃gbɛrɛ̃ hanɩ, na mɔ̃ anɩ thɩ̃ naar hanɩ. Dɩ thɩ̃ɛ fɛʋraakɛ nɩ nɩna dɩ na hana dɩɩ thɩmɩɩrraala’. ¹² Ado mɩ kɔɔ khere narɛ ga do ʋrɛ cʋɛnɩ puureele, agɩbo dɩ ʋrɛ wɩ cʋʋrɔnɩ puureele mɩ khereroa’, sɩ gɩ do nɔɔ nɩ jɩ anɩbara Thãgbaa ƴɛra mɔ̃ anɩ pər sɛrɛra hanɩ. ¹³ Gɛr dɔ kɩrʋ dɩ sɩ kɔɔ faa haar; sɩ asɩ ha faara kãkar n pɛrɛ jɔɔ, dɩɩ the daʋraakɛ kɔɔ fɔnɩ Tɩtɩ, gɩdonɩ nɛrɛ fɛʋ kɔɔ cʋgʋʋrɛ dɩ daʋ fʋʋ. ¹⁴ Sɩ ado anɩda dɩkha kɔɔ dor nɔɔ dɩ ɩ̃ məbiro Tɩtɩɩ ƴɛra, ƴicuru na kɔɔ fʋ ma’, gɩdonɩ mɔ̃kɛ thɩ̃ɛ fɛʋʋkɛ sɩ kɔɔ mɩɩ nɩnɩ donɩ sobɔr, mɛ̃ asι məbi Tɩtɩɩ ƴɛra ha, dɩ sobɔrra wɩ yɩ gɩ dɩɩ do. ¹⁵ Naʋʋkɛ a hananɩ nɛrɛra n pɛrɛ jɔɔ, mɔ̃ a-n jɩnanɩ nɛrɛ fɛʋʋ nũ nι, na teereekɛ nι kɔɔ teguuni na maar na jẽu. ¹⁶ Gɩ da marɛ mɔ̃ mɩ hana narnɩ tu jɩɩr thɩ̃ɛ fɛʋra.

¹ Omɩna, sɩ cʋʋ nɛr nɩ jɛna Thãgbaa bɔ jɩɩkɛ yɩranɩ Masedʋan we gbɛbɩdaraa thɩ̃thɩɩn. ² Bɔ gaarɛɛ mɩɛ kɔ̃tɩnaakɛ wɩ kɔɔ hanɩ, awɩ daakɛ jʋɔnɔnɩ na awɩ bɔdaar do phuphuphul, pɛ warɛ ha bulo thɩ̃ ’laarɛ dɩɩ kãasɩ. ³ Mɩ punone so wɩ kɔɔ ’laarɛ na haar kpẽgelẽ mɔ̃ awɩ puno hanɩ, wɩ kɔɔ ’laarɛrakɛ dɩɩ ka jɔ mɔ̃ awɩ puno hanɩ. ⁴ Wɩ kɔɔ bɩɛl sɛr na haar fɛʋ aa, hʋɛ n hanale ɩnɩ-n puno iner ɩnɩ-n har tɩɩ phuusɔɔ bul thɔnana. ⁵ Wɩ kɔɔ cʋʋrɛ dɩɩ jɔ gɩrɛ sɩ kanɩ kɔɔ kpɩɛr, sɩ awɩbara wɩ kɔɔ faa a ha Kɔ̃tɩn ɓo, dɩ mɔ̃kɛ Thãgba tuni wɩ kɔɔ faa awɩbara dakha a ha sɩ. ⁶ Gɛr gɩ sɩ kɔɔ bɩɛlɛ Tɩtɩ dɩ na pɩɩr anɩ pa ga ha bulo thɔ̃ caale mɔ̃kɛ a kɔɔ ɩɩrna gɩnɩ. ⁷ Mɔ̃kɛ gɩdonɩ thɩɛna fɛʋ nɛr n jɔ, ha pɛrɛra, thɩmɩɩrra, jɩɩrra, na pərre dɩɩdɩɩra fɛʋ, na anɩ naʋraakɛ thɛnɩ asɩ pa, ɔmɛ̃ nɩ dɔ wɩrɛ na jɔnɩ ga ha bulo thɔ̃ caraale. ⁸ Mɩ sonɩ thakɛ ga do jɔfʋ mɩ-n pɛ nara’, sɩ ɩkhasɔɔ pər mɩ gba a bena nɩ bɩnɛ dɩ ma-n hɩɩn ado anɩ naʋra sobɔr gɩ do. ⁹ Gɩdonɩ nɩ jɩrɛ asɩ Kɔ̃tɩ̃ Jeju Kirisitii bɔ jɩ, mɔ̃ a kɔɔ donɩ lẽledaar sa tu a do bɔdaar anɩ sora, dɩ ɔɔ bɔdaar dora na cʋɛ nɩ dɩ na le. ¹⁰ Ɩ̃ kpɩɛrnɔ mɩ ha nɩ dɩbara dɔrɔɔm gɩdonɩ gɩ teere kha, gɩdonɩ a fʋna ƴakhɛrɔ nɛr kɔɔ kʋlɛ ƴɩɛ, ga do thɔ̃ cʋʋrɛra dɩbara ga, sɩ ƴaalɛla dakha. ¹¹ Gɛr gɩ nɩ pɩrɛ gɩrɛra nɩ kɔɔ cʋʋnι, dι mɔ̃kɛ nι kɔɔ gʋʋrnι na haar fɛʋ gι hana, nι cʋɛ gι gι pι mɔ̃kɛ anι puno hanι. ¹² Ado tibil ’laa thɩ̃ɛ na haar fɛʋ mɔ̃ ɔɔ puno hanι, gɛr n da Thãgba haar, sι ga do gιrɛ ntɛ na hananaa wι soaa dɛ. ¹³ Ga do dι ga pɛ nar bʋɔ sι gι ba ιkhasɔra ga, sι gι cʋʋ thɩ̃ɛ gɩ mãkha kha. ¹⁴ Nɛnɛ̃ bɔɔkɛ anɩ thɩ̃ jɔ hana n bulle awɩ thɩ̃ ɓɔr, dɩ mɛ̃ dakha awɩ thɩ̃ jɔ hana na bul anɩ thɩ̃ ɓɔr, dɩ mɛ̃ mãkhar na hale, ¹⁵ mɔ̃kɛ gɩ kherenɩ Thãgbaa sɛbɛra ayɩ: “Ʋrɛɛkɛ kɔɔ khɩanɩ jɔɔ na hana thɩ̃ɛ dɩɩ kara’, dɩ ʋrɛɛkɛ kɔɔ khɩanɩ gbe thɩ̃ɛ na ɓɔrʋa’.” ¹⁶ Thãgba hɩna fʋɔrɛ, gɩrɛraakɛ a kɔɔ pɛrnɩ Tɩtɩɩ hara dɩ hana nar ga pər ca bɩɛlɩkɛra. ¹⁷ Gɩdonɩ a ture asɩ bɩɛl, sɩ ɔɔ ƴaalla gɩ kɔɔ therakɛ mɔ̃ a-n pərni jɔɔ ka dɩ a na pɔ le na yɩ nɩ. ¹⁸ Sɩ-n thɔnaanɛ kha omineekɛ hananɩ i bʋɔ we gbɛbɩdara fɛʋʋ thɩ̃thɩɩn tutugo bʋɔɔ thɩmɩɩra. ¹⁹ Wo, we gbɛbɩdara kɔɔ phiiruure a dɔ asɩ kpakpaar ga ha bulo thɔ̃ cʋʋraakɛra sι-n cʋʋnι, ga-n dʋba Kɔ̃tιnι thɛthɛɛ i, ga-n nιnana dakha mɔ̃ asι ƴaal bɔ hanι. ²⁰ Gιdonι sa ƴaal tibil n pɛ sar sor mũsũ jɔraakɛ wι dʋ sιnι nyɔ̃kɔa’. ²¹ Gιdonι sι-n ƴaalɛ gιrɛ bʋɔnɔnι, ga do Kɔ̃tιnι ƴɛra dιbara ga, sι dakha tιbιlaa ƴɛra. ²² Sι-n thɔna wɛr dakha asι omi ʋrɛ sι kɔɔ jιιnι jʋʋr ɔɔ pər thɩ̃ɛ dιιdιιra a hιιn, kɛ n nɛnanι nɛnɛ̃ dakha mɔ̃ ɔɔ pərra jɔɔ hanι, dιι the ha pɛrɛraakɛ a hananι nɛrɛra. ²³ Sι ado Tιtι gι, ɔr dʋɔn ɩ̃ bubul na ʋrɛ sι-n donanι kha thɔma anι pa. Sι ado asι omisɔ wɛ, we gbɛbιdaraa thɔ̃thɔna ha wι na Kirisitii i dʋbιdara. ²⁴ Dι gɛr gι nι nɛna wι we gbɛbιdaraa ƴɛra mɔ̃ anι naʋ hanι, na hʋɛɛkɛ sι kɔɔ hananι anιdara dι sa-n məbi.

¹ Ado gιrɛraakɛ dɔnι tιι phuusɔɔ bul thɔ̃ gι, ma laar ’lo na khere nar sɛba’. ² Gιdonι mι jιrɛ anι ƴaal bɔ, dɩ gɛr mɩ-n məbiro anιdara Masedʋandaraa thɩ̃thιιn a so war ayι: Akaιdara kɔɔ gbɛbιrɛ pι kɛkɛkɛ ƴakhɛrɔ. Dι anι gbɛ̃gbɛrɛna kɔɔ jaa tibil jɔjʋɔ. ³ Mι-n thʋɔn omιna dι mɛ̃ anιdaakɛ mι-n məbironi gelelala na do mɔlɔa’, dι dakha wι yι nι nι gbɛbιrι nι pι mɔna mι kɔɔ sonι. ⁴ Ado mɛ̃ ga, sι dι sι pɔ kha na Masedʋandara dι na gbɛbι a pa’, ga dor mɔ̃ sι yιnι sι jιrɛ anι ti, na dor asι yicur na anιda. ⁵ Mι kɔɔ kpιɛrɛ gι bɔrɛ gɛr gι dι ɩ̃ kɔɔ bιɛl omιna wι kʋʋl nι ƴιɛ wι pɔ anι pa, wι kɔɔ gbɛbι ha bulo khaardaakɛ nι kɔɔ ’lini sor na ’laarɛ; mι-n ƴaalɛ gι dɔ ha bulo khaardaa ga-n ho bɩ̃ puudaa ga. ⁶ Nι jɛ ʋrɛ direni fιιʋ, fιιʋra a na kha, sι ʋrɛ direni jɔɔ, jɔɔra a na kha. ⁷ Tιbιla fɛʋ bιɛlbιɛl na-n ’laanɛ mɔ̃ ntɛɛ bɩ̃ kpιɛr hanι, wa-n ’laa na gbobira’, ga-n ho tɔ pɛr gι woa’; gιdonι Thãgba n nar ʋrɛɛkɛ n ’laanɛnι na kãkar. ⁸ Thãgba hananɛ punone a na bɔna nι na bɔna caar fɛʋ dιιdιι, dι mɛ̃ na-n hana wire fɛʋ gιrɛ fɛʋʋkɛ na-n dana nιnι, na hana gɛr dι a jɔr na ka, na-n cʋʋna thɔ̃ bʋɔ fɛʋ, ⁹ mɔ̃kɛ gι kherenι Thãgbaa sɛbɛra ayι: “Ha bulole a-n ’laana khaardaa jɔɔ bɔdarara, ɔɔ fιl sar khorr gι too.” ¹⁰ Ʋrɛ n ’laanɛnι be bi jaldaarra na dιkɔ a khɔ, ɔr na ’laanɛ be na ha nι dι a dɛbιrɔ, dι ɔr na cʋɛ dι ha bulo be na se nar ga-n pɛr. ¹¹ Dι mɔ̃ nι hananι thɩ̃ɛ jɔɔ na punone na-n ’laa thɩ̃ɛ na ha bulole, dɩ anι khaardasɔɔkɛra sι-n ’laanι ga ’laarɛ Thãgba khιιrɛ. ¹² Gιdonι bul thɩ̃ɛɛkɛra n ’laanɛnι, ga do tιι phuusɔ gι-n bul thɩ̃ ɓɔrɛra dιbara ga, sι dakha ga tɔr Thãgba khιιrɛ jɔɔ ga-n pɛr. ¹³ Ga bul thɔ̃ɔkɛ n nɛna mɔ̃ nι hanι, dι wa-n khιι Thãgba anι nũ nιra mɔ̃kɛ nι tuni Kirisitii tutugo bɔ thιmιι, na ha bulo thɩ̃ ’laarɛraakɛra n nɛnanɩ anɩ kũu bɩnɔ do na wɛr, na tɩbɩla fɛʋ. ¹⁴ Dɩ wɩ-n bɩɛlɛ Thãgba dɩ wa-n pɛ nar gɩdonɩ nɩ lõ wer haar, dɩɩ the bɔ jɩɩrraakɛ thʋnanɩ kar, kɛ Thãgba jɩ nɩnɩ. ¹⁵ Thãgba hɩna khɩɩrɛ ɔɔ khaardaraakɛ na hanɩ mɩɛrɛra ga.

¹ Mɛr Pol, mɩ-n phʋʋr nɛr na hɛlɛlɛ fιlɛ na bɩ̃ bʋɔraakɛ dɔnι Kirisitiida, mɛrkɛ n hanι hɛlɛlɛ a mι ha anι thɩ̃thιιn, sι a mι hʋnɔ ma-n ’la nι kpãkpalã ga. ² Mι-n ƴɛɛ nɛr dι na-n do ɔbɔɔkɛ ma hanι anι pa, ma ιιrna narɛ ’larιkɛ mι hananι a kpιɛr ma ιιrnanɛ ιkhasɔraakɛ n kpιɛrɛnι aa, mɔ̃kɛ tibili tibil do pa hanι sι-n ιιra’. ³ Tibil sι do wer, sι ga do mɔ̃kɛ tibili tibil do pa hanι sι-n kɛ̃kɛrã’. ⁴ Gιdonι ko ke thɩ̃ɛsɔɔkɛ sι-n kɛ̃kɛrɛnanι ga do tibildaa ga, sι Thãgba dɔ nɔɔ dιι hana fãga ka, a na puno gɩrɛ na dɔnɩ datutugonaa ga a na wɩɛl. Sɩ-n bũburonanɛ mɔlɔ kpɩɛrɛsɔ, ⁵ na gɩrɛ fɛʋʋkɛ n ɩrɛnɩ na gũ tir dɩ a-n kɛ̃kɛrɛna Thãgba jɩɩr, sɩ-n fʋrɛ kpɩɛrɛ fɛʋ dɩ sɩ khɩmɩnɔ ga-n nɛ Kirisiti nũu. ⁶ Sɩ gbɛbɩrɛ pɩ dɩ sa heen nũ nʋra sor ɔbɔɔkɛ anɩ nũ nɩ danɩ. ⁷ Nɩ hɩnɛ mɔ̃ thɩ̃ɛ hanɩ. A tibil n kpɩɛrɛ Kirisitiida ɩnɩ do, dɔ a bir a kpɩɛr ɔɔ bɩnɔ a hɩɩn, mɔ̃ a donɩ Kirisitiida, sɛrɛ dakha Kirisitiida sɩ do ser. ⁸ Gɩdonɩ adorakɛ ma məbire dɩ a kãasɩ gbe hʋ hananɛnaakɛ Kɔ̃tɩn kɔɔ ha sɩnɩ, gɩ cʋʋ nɩ nɩ khɔ̃ na-n pɛr ga do gɩ kʋɛ na’, yicuru na fʋ ma’. ⁹ Ga do mɩ-n ƴaalɛ ɩ̃ ho mɩ-n phərə ner na ɩ̃ sɛba’. ¹⁰ Wɩ-n sor dɩ wɩ yɩ, ɔɔ sɛbɛ khɩɩrɛ ka, ga-n gɔ kpãkpalã ga, sɩ a fɩ yɩ ɔɔ thɛthɛ, sʋmʋmʋ̃ a ha dɩ ɔɔ nɔ thɩmɩɩ mɔlɔ thɩmɩa yɛ. ¹¹ Dɔ ntɛɛle n mɩanɩ thale n jɩ: Mɔ̃ asɩ thɩmɩɩ n hanɩ sɛbɛra ado sa hala’, mɛ̃ dakha asɩ thɩ̃ cʋʋ n ha ado sɩ hale. ¹² Sa ’la na gba asɩbara na mɩɛna tibil ɩkhasɔɔkɛ n kpãganɛnɩ dɩbara ga, agɩbo sɩ yɩ sɩ jɛ ʋrɛ jɔna’, mɔ̃ wɩ-n mɩɛnɩ dɩbara na awɩ mɩɛda awɩ ha wɩ jɩ ʋrɛ jɔnɩ, fɩlɛ ɓɔra wɩ. ¹³ Sɩ sɛrɛ, asɩ məbi na kãasɩ gɩrɛraakɛ sɩ kɔɔ cʋʋna’, sι ka Thãgba yιnι sι dɔ asι thɔ̃ kho, le sι khu, dι anι pa gι khu. ¹⁴ Sa-n kãasι asι pɛla’, gι ho sa kɔɔ pɔ a dã anι pa gaaga, gιdonι sɛr dɔ wιrɛ kɔɔ dana nιnι waa gel na Kirisitii tutugo bʋɔ. ¹⁵ Asι məbi na kãasι gιrɛraakɛ sι cʋʋna’, dι sa məbi haanι thɔna ga, sι sɩ hananɛ nũ pɛrɛ anɩ ha pɛ n khɔna pɩɛr, sɩ yɩ hʋɛ asɩ thɔ̃ pɛl n tɔ gɩ pɛr, ¹⁶ dɩ sa mɩɩ tutugo bʋɔ anɩ billo, sɩ sa too sa-n məbi thɔmanaakɛ ʋkha kɔɔ ’lini cʋʋra’, gɩ ha mɔna gɩ kherenɩ Thãgbaa sɛbɛra ayɩ: ¹⁷ “Dɔ ʋrɛ n məbəni, a na-n məbi gɩrɛraakɛ Kɔ̃tɩn cʋʋnɩ.” ¹⁸ Gɩdonɩ ga do ʋrɛ n kpãganɛnɩ dɩbara ɔr wɩ-n we tibilə’, sɩ ʋrɛ Kɔ̃tɩn n kpãganɩ gɩ.

¹ Ga da marɛ ado na punone na fʋ haar ɩ̃ mɩɩ də̃bəəle fɩɩʋ, sɩ nɩ-n fʋrɛrakɛ haar. ² Gɩdonɩ gbugiikɛ thɛnɩ Thãgbara fʋ mɛr anɩ sora, gɩdonɩ mɩ kɔɔ gba nɛr a ha kũu bɩɛl dɩ Kirisiti gɩ, dɩ nɩ dʋʋraa khɛ biir phuukɛ na jɛnɩ kuuna’. ³ Sɩ mɔ̃kɛ sii kɔɔ fɩɩlnɩ Ɛvɩ na ɔɔ fɩɩlla, maar n fʋ mɛr dɩ anɩ kpɩɛr na kʋɛrɛ, gɩ kɛr sɩ gɩ faa sobɔr na phur Kirisitira. ⁴ Gɩdonɩ a tibil pɔ nar na mɩɩ nar Jeju kpɩɩ na ʋrɛ sɩ kɔɔ mɩɩ narnɩ, dɩ agɩbo nɩ ’lɛr Thue dɩ ha kpɩɩ na ʋrɛɛkɛ nɩ kɔɔ ’lɛnɩ, agɩbo tutugo bɔ kpɩɩ gɩ na gɩrɛɛkɛ nɩ kɔɔ teenɩ, nɩ-n fʋrɛ haar bɔɔbɔɔ. ⁵ Mɩ pɛrɛ haar ma ’lũ thɩ̃ bɩɛllalakɛ a jɔ wa thɔ̃thɔnaale bʋɔnɔnɩ ka ga. ⁶ Dɩ ado mɩ hor tibil ba thɩmɩɩ mɩɩrɛra, sɩ jɩɩr wer na ɓɔr ma’, dɩ sɩ kɔɔ nɩna gɛr anɩ thɩ̃thɩɩn tɩbɩlala fɛʋ thɩ̃ɛ fɛʋra. ⁷ Sopugo mɩ ba cʋʋ gɩrɛraakɛ mɩ kɔɔ mɩɩ nɩnɩ Thãgbaa tutugo bʋɔ khaar yaa? Mɛr wuro mɛ̃ sɩ ner n ka nɩ ɩɩr. ⁸ Ɩkhaa we gbɛbɩdarara mɩ kɔɔ ’lɛ bulle, wɛrra mɩ-n ’lɛ loka nɔɔ dɩ ma-n dona nar thɔma. ⁹ Dɩ ɔbɔɔkɛ mɩ kɔɔ hanɩ anɩ pa dɩ bʋɔ kɔɔ fʋ mɩ, ma kɔɔ do heendaa tibillə ga; gɩdonɩ omɩnaakɛ thɛnɩ Masedʋan n kɔɔ hana mɩ gɩrɛ n ɓɔra mɩnɩ. Dɩ thɩ̃ɛ fɛʋra mɩ kɔɔ fʋrɛ dɩbara dɩ ma do nar heendaa ga, dɩ ma fʋrɛ dɩbarararakɛ ’lo. ¹⁰ Sobɔrraakɛ n thɛnɩ Kirisitiraakɛ ha marnɩ, mɩ sor ayɩ: Thɩ̃ɛ na hale na tɔ̃ mɩ məbire ga thɩnaakɛ Akaɩ dɩɩra ga. ¹¹ Mɔ̃ dɔ nɔɔ? Gɩdonɩ a thɩɛna gaa ma na naa ya? Thãgba jɩ gɛr. ¹² Gɩrɛra mɩ-n cʋʋnɩ ma cʋʋrɛrakɛ ma-n jalna, dι mɛ̃ ga khaan hʋɛ wιrɛraakɛ n ƴaalɛnι hʋɛ wι yɛ sι mãkhanɛ kha gιrɛraakɛ wι-n məbironi. ¹³ Tιbιlaale sõso thɔ̃thɔna wɛ, dι fιfιιl thɔ̃ dona wɛ, dι wι debi ho Kirisitii thɔ̃thɔ̃sɔ. ¹⁴ Sι gele ga do nɔ kpaa thɩ̃ɛ ga, gιdonι Satãa thɛthɛ n debire dι ho thɔ̃thɔ̃daar thu hιrɛ. ¹⁵ Dι ga do nɔ kpaarɛ gι ado ɔɔ thɔ̃ dodaarsɔɔle debi a ho fιl sar thɔ̃ dona ga. Awι khu pa na har mɔ̃ awι thɔ̃ hanι. ¹⁶ Mι bire ’loro wo, tibil na-n hιιn mι ɩ̃ ho də̃bələ’, dι a gι harakɛ mɛ̃, sι nι tea mι ɩ̃ dole də̃bəllə, dι mɛ̃ ma məbi dakha gbe. ¹⁷ Gιrɛ mι sonɩ gɩrɛ, ga do mɔ̃ Kɔ̃tɩn n ƴaalnɩ mɩ soa’, sɩ gɩ hor mɔ̃kɛ də̃bəəle n ɩɩrnanɩ tibil dɩ mɩɩ thɩ̃ɛ, dɩ gɩrɛra mɩ-n məbironi tu jɩɩr harrɛ. ¹⁸ Gɩdonɩ tibil jɔjʋɔ hale n məbəni sɩɩ do awɩ məbira məbire gɩɩkɛ dɔnɩ tibili tibil do pada, mɛrɛ dakha ma-n məbire. ¹⁹ Gɩdonɩ nɩ-n fʋrɛ haar də̃bələla ka nɛrkɛ jɛnɩ fɩlɛ. ²⁰ Ado tibil na pɔtɔrɔ nɩ, ado tibil na kho nɩ, ado tibil na tagɩrɩ nɩ, ado tibil na so nar kuune, ado tibil be nɩ ƴɩɛ, nɩ-n fʋ garɛ haar. ²¹ Yicuru fʋ mɛr dɩ ma so nayɩ: Sɩ kɔɔ nɩna nɛr mɔ̃kɛ asɩda na khɩɩrna’. Sɩ gɩrɛ tibil n kpãgarɔnɩ dɩbara, mɩ punone cʋʋ mɛ̃ mer, də̃bəəlela mι mɩɩ. ²² Ebirəsɔ ha wɩ ya? Mɛrɛ dakha Ebirəra ha mɩ mer. Ɩjɩrayɛldara ha wɩ ya? Mɛrɛ dakha. Abɩrahamɩ məl ha wɩ ya? Mɛrɛ dakha. ²³ Kirisitii thɔ̃dara ha wɩ ya? Mɩ do ger dɩɩ jɔ mɛ̃, sɩ də̃bəəlela mɩ mɩɩ wo. Thɔ̃ khe dʋʋrra mɩ jɔ wɛr, khaɩ pɛrra mɩ jɔ wɛr, bɩɩrɛra mɩ jɔ wɛr fĩi, bɔɔ jɔɔjɔɔ mɩ-n thɔɔ khir. ²⁴ Balamɔɩ Juifisɔ kɔɔ bɩɩr mɩ be nʋɔ kpalanyɔ phe bire. ²⁵ Balãther wɩ kɔɔ ciil mi na khasa, babɩɛl wɩ kɔɔ dʋʋr mι na bokana, balãther gborõo kɔɔ mʋʋna mι, dι wi bιɛl na dιtɩ̃ bιɛl nyʋɔn kɔɔ gba mι dι ɩ̃ cʋʋ. ²⁶ Ɩ̃ kpaarιkɛ mι-n kpaarnι gι jɔrɛ ka, nιwɛ nɔ mɛr mιιrra, nιwɛ nɔ mɛr yu hɔ̃hɔlaa pa, nιwɛ nɔ mɛr ɩ̃ caa pa, nιwɛ nɔ mɛr ca kpalaa pa, nιwɛ nɔ mɛr dιιra, nιwɛ nɔ mɛr bəənnə, nιwɛ nɔ mɛr lanyʋɔnna, nιwɛ nɔ mɛr wιrɛ n cʋɛnι wι yɛ omιna hanιι thɩ̃thιιn. ²⁷ Mι jιrɛ gιrɛ n dɔnι thɔ̃ dʋʋr, na vɔɔrɛ, na yi cɔnanɛ bɔɔ jɔɔjɔɔ, na kɔmɛr na yɔlkhaa fʋʋr, na kɔmɛr cɔnanɛ bɔɔ jɔɔjɔɔ, na ie fʋʋr na kẽkẽ ’leere. ²⁸ Thɩ̃ jɔjʋɔ hale na mιana’, sι gιrɛɛkɛ heene mιnι a jɔrakɛ fɛʋ dʋɔn dɛrιkɛ mι-n hananι wire fɛʋ we gbɛbιdarara fɛʋ. ²⁹ Ʋmɔ̃ na yɔɔnɛ sιι do ma yɔɔ mera? Ʋmɔ̃ na baranɛ na ji sιι do haar na hel ma? ³⁰ Ado gι dor ɩ̃ məbə, ɩ̃ yɔɔda ma məbiro. ³¹ Thãgbaakɛ dɔnι Jeju Kɔ̃tιnι Thι, kɛ hιnanι fʋɔrɛ khorr, jιrɛ dι ma-n kur sõsora’. ³² Aretasι fãgadaarι gobanɛr kɔɔ pɛrɛ wa-n bɛra Damasι dιι a fɔ mι, ³³ sι wι kɔɔ gbũ mer kpʋʋnɔ a tona fɛnɛtιrι dι ɩ̃ gbũ sortoto, dιι do mι taarɛ ɔɔ nyɔ̃kɔɔ.

¹ Gι teenanɛ ɩ̃ məbi sιrakɛ ga-n hana khora’, sι ma mιɛ nɛr thɩ̃ yιr na thɩ̃ nιrɔrɛɛkɛ Kɔ̃tιn kɔɔ cʋʋ mιnι dι ɩ̃ yι. ² Mι jιrɛ tibil bιɛlιkɛ hanι Kirisitira, kɛ Thãgba kɔɔ vəni a jʋʋnna a dana balãther thãgbara ƴũ, yɛna yʋɔr yenã gι gιrɛ, ado tomιr a kɔɔ hana ya, ado tomιr gaa ya, ma ja’, Thãgba jιɛn. ³ Dι tibilile ado tomιr a kɔɔ hana ya, ado tomιr gaa ya, ma ja’, Thãgba jιɛn. ⁴ Mι jɩrɛ dɩ Thãgba kɔɔ gbaarɛ a lona hɩɩr paar Thãgbaa kal ƴɔɔ, dɩ a kɔɔ nɩrɛ thɩmɩaakɛ tibil na marnɩ na mɩa’, kɛ tibil na hananɩ dakha hʋɛ a na mɩɛa’. ⁵ Ma məbire tibil caarra thale, sɩ ado mɛrɛɛ thɛthɛra wer, ma məbi saagado ɩ̃ yɔɔda gaaga. ⁶ Sɩ ado mɩ-n ƴaalɛ ɩ̃ məbi, ga do də̃bəl ma doa’, gɩdonɩ sobɔr ma so, sɩ ma-n cʋa’, dɩ mɛ̃ tibil na hana mar kpɩɛrɛ gɩ kãasɩ gɩrɛraakɛ wɩ-n yɩnɩ mɛrɛra, agɩbo gɩrɛraakɛ wɩ-n nɩnɩ mɛrɛra ga. ⁷ Mɔ̃ na dɔnɩ nɔɔ sɩ thɩ̃ nɩrɔ caale na hanɩ mɩɛrɛra ga na cʋʋ mɩ dɩ ma ti gunə’, gɛr gɩ dɩ uu ga mar tomɩrra, kɛ dɔnɩ Satãa thɔ̃thɔ̃daar a na-n ʋ̃ʋ mar gɩ do nɔɔ ma ti gunə’. ⁸ Gelelala mɩ kɔɔ bɩɛl Kɔ̃tɩn balãther a cʋɛ gɩ gɩ hʋnɔ mar. ⁹ Sɩ a so marɛ ayɩ, bʋɔraakɛ ɩnɩ-n jɩ mɩnɩ gɩ daan, gɩdonɩ yɔɔrɛra ɩnɩ-n jɩɩ nɩna ɩnɩ fãga. Dɩ gɛr gɩ ma-n ka jɩɛ məbi na daʋ ɩ̃ yɔɔra, gɩdonɩ liir Kirisitii fãga n ha mar. ¹⁰ Gɛr dɔ kɩrʋ dɩ ma-n kãka yɔɔrɛra, na nɩɩrɛra, na nɩwɛra, na kpoorera, na bɔ gaarɛra Kirisitii sora; gɩdonɩ ɔbɔɔkɛ mɩ-n yɔɔnɩ, liir mɩ-n ka ’lɛ fãga. ¹¹ Də̃bəl mɩ debi do, sɩ nɛr kɔɔ tɔ mɩ pɛr dɩ ɩ̃ ha mɛ̃. Gɩdonɩ anɩ pa gɩ kɔɔ teenana gɩ thɛ nɩ yɩ ɩ̃ tɩɩ teena do. Gɩdonɩ ma ’lũ fɩɩʋrakɛ a jɔ wa thɔ̃thɔnaale bʋɔnɔnɩ ka ga, sɩrakɛ ma do thɩ̃a’. ¹² Gɩrɛ n nɛnanɩ ɩ̃ thɔ̃thɔ̃daar do, gɩ yɩrrɛ anɩ thɩ̃thɩɩn na ha fʋrɛɛkɛ jʋɔnɔnɩ ka, na jẽ thɩ̃ɛsɔ, na ma kʋ thɩ̃ cʋʋrɛ, na nɔ kpaa thɩ̃ cʋʋrɛ. ¹³ Anye kɔɔ ɓɔra nɩ sɩ dɩ wɩ̃ we gbɛbɩdara hana gɩ a jɔ nɩ, saagado gekɛ ma kɔɔ do narnɩ heendaa gaaga. Dɩ nɩ faa ɩ̃ dɩɩdɩɩ hɩɩnna ha mɩ. ¹⁴ Hɩnɛ, mɩ gbɛbɩrɛ gɩrɛ pɩ ɩ̃ pɔ anɩ pa balãther pʋɔr, sɩ ga do heendaa ma do nara’, gɩdonɩ ga do anɩ thɩ̃ mɩ-n ƴaala’, sɩ nɛrɛɛ thɛthɛ gɩ. Gɩdonɩ ga do bɩsana teana wa-n thɩnɛ thɩ̃ɛ a hana thɩrɛ na nɩra’, sɩ thɩrɛ na nɩrɛ teana wa-n thɩnɛ thɩ̃ɛ a hana awɩ bɩsãsɔ. ¹⁵ Sɩ ado mɛr gɩ, mɩ ture na haar ɩ̃ ’laa gɩrɛ mɩ hananɩ, ɩ̃ ’laana dakha dɩbara koo gɩ do anɩda thuerə dɔ nɔɔ. Dɩ mɔna mɩ-n na nɩnɩ mɛna dɩɩ thʋ̃ kar, gɩ dor nɔɔ dɩ anɩ naʋ na-n wurəə bɛ? ¹⁶ Sɩ anaa na sor wo nayɩ, ma kɔɔ do nar heendaa wera’, sɩ mɔ̃ mɩ donɩ tɩɩ fɩɩl tibil, gɛr mɩ kɔɔ fɩɩl nar sa ’li ni. ¹⁷ Tɩbɩlaakɛ mɩ kɔɔ thɔnɩ anɩ pa, mɩ ba phiro sɩ ma-n kho nɩ yaa? ¹⁸ Tɩtɩ mɩ kɔɔ bɩɛl a jala anɩ pa, dɩ mɩ kɔɔ thɔnaanɛ dakha omi bɩɛl. Dɩ Tɩtɩ ba khɔ nɩ yaa? Ga do kpɩɛr bɩɛlla sɩ ha kha na ɔraa? Ga do nɛ ka bɩɛlla sɩ-n ’loro kha gaa? ¹⁹ Nɩ kɔɔ mãa kpɩɛrɛ kɛkɛkɛ dɩ sor sɩ-n hɛl dɩbara nɛrɛra. Kirisitira sɩ ha dɩ sa-n mɩɩ Thãgbaa ƴɛra. Nɛrɛɛkɛ mɩ-n nanɩ wei, gelela fɛʋ anɩ khɔ̃ pɛ sɩ-n ƴaal. ²⁰ Gɩdonɩ maar fʋ mɛr dɩ anaa a ma dã le, ma yɩ nɛr dɩ na ha mɔ̃ ma-n ƴaalna’, nɩ yɩ mɩ dakha ɩ̃ ha mɔ̃ na-n ƴaalna’. Maar fʋ mɛr dɩ anaa kɩla, na gbugi, na nĩkhii, na dɩbara na kɛ̃kɛrɛnɛ, na tibil kuere, na wɩ yɩ mɩɩrɛ, na i kaar, na nyanyaanɛ na har anɩ thɩ̃thɩɩn. ²¹ Maar fʋ mɛr dɩ a ma dã le, ɩ̃ Thãgba na cʋʋ mɛr dɩ yicuru na bir na fʋ mɩ anɩ sora, ĩ tha ɩ̃ thʋnɔ sɩ ma-n bɩ wɩrɛraakɛ kɔɔ maanɩ cʋʋrɛ sopugo, sɩ ɩkhasɔ wɛrra na kɔɔ debi haar thɩ̃ bise cʋʋrɛraalera, na bɔdɛl cʋʋrɛra, na dakhaba cʋʋrɛra ga.

¹ Balãther ha gɩrɛ mɩ-n pɔnɩ anɩ pa. “Sɔ ɓibi na gʋʋrɛ mɔ̃kɛ sobɔ so jɩdara yenyɔ agɩbo yẽther yɩɛnɩ dɩɩ ha”, thale gɩ khere Thãgbaa sɛbɛra. ² Balanyɔ pʋɔrɩkɛ mɩ kɔɔ pɔnɩ anɩ pa, mɩ kɔɔ ’lire so gar, na ninəkɛ ma hanɩ gɩrɛ anɩ pa ga, mɩ maanɛ gɩrɛ dɩ ma-n so wɩrɛraakɛ kɔɔ maanɩ cʋʋrɛ sopugo, dɩ mɩ-n sor dakha tɩbɩla fɛʋra ayɩ: Ado mɩ bir na pɔ anɩ pa, na-n yɩ ma pɩrrɛ fɩɩʋrakaa koe. ³ Gɩdonɩ nɩ-n ƴaalɛ nɩ jɩ gɩrɛ n nɛnanɩ dɩ Kirisiti n mɩana mɩ, ɔrkɛ na yɔɔnɛ narna’, sɩ a-n nɩnanɛ ɔɔ fãga anɩ thɩ̃thɩɩn. ⁴ Sobɔr gɩ wer, wɩ kɔɔ kpaarɛ thɩrʋra ɔɔ yɔɔra, sι a hananɛ yire gιrɛ dιι the Thãgbaa fãgara. Dι sɛrɛ dakha ɔɔ khara sι yɔɔ, sι sa hananɛ kha yire na ɔr gι the Thãgbaa fãgara, dι mɛ̃ sa puno sa-n do nar thɔma. ⁵ Nι mιɛnɛ anιbara na hιnɛ ado nι har ha pɛrɛra, nι jʋrɛ dιbara na hιnɛ. Na jι gι anιbara dι Jeju Kirisiti har anι bιnɔaa? Agado nɛr jʋrɛ dιbara a yιɛ dιι do nι ’leera’. ⁶ Sι mι pɛrɛ haar nι jιɛ jι dι asι dιbara jʋʋr wer na do sar ’leera’. ⁷ Sι sι-n bιɛlɛ Thãgba dι na-n cʋʋ dιkha gι puuro fιιʋraka’, sι ga do sι-n ƴaalɛ sι yιra gι ho wι yɛ sɛr ’la’, sι asι bιɛl dʋɔn na-n cʋɛ gιrɛɛkɛ bʋɔnɔnι adorakɛ asι ’li bire ho ’leere. ⁸ Gιdonι sa hana sobɔ pιɛr fãga ga, sι sobɔrι dabɔ ha sι hana. ⁹ Sι-n kãkarɛ ɔbɔɔkɛ sι hanι yɔɔrɛra, sι ne wer khιιr. Dι gιrɛ sι-n bιɛlnι Thãgbara dʋɔn mɔ̃ na jιιnι bɔr. ¹⁰ Gɛr dɔ nɔɔ dι ɩ̃ khere nar gιrɛ sι sa ha kha ga, dι mɛ̃ ɔbɔɔkɛ sa hanι kha ga teena ɩ̃ cʋʋ thɩ̃ɛ na fãga ga. Kɔ̃tιn kɔɔ ha mɛr hʋɛ ɩ̃ cʋɛ nι nι khɔ̃ na-n pɛr, ga do nι kʋɛa ga. ¹¹ Sι gιrɛ sɛnι dʋɔn wɔɔ omιnaa, na-n hana daʋ, na-n yιrana bɔrɛ ka, na-n ƴɔla kha haar, na-n hana kpιɛr bιɛl, na-n tɔɔ kha na ha ιι, dι Thãgbaakɛ naʋ na ha ιι n thernι, na-n har kha na nɛrɛ. ¹² Na-n fʋɔrɛ kha bιɛlbιɛl na ha lõ fʋɔrɛɛkɛ dʋɔnnι daphuu. Tιι phuusɔ fɛʋ fʋɔr nɛr. ¹³ Jeju Kirisiti Kɔ̃tιn na-n jɛ nι bʋɔra, Thãgba n cʋɛ nι na-n jι ɔɔ naʋ, Thu Phuu n cʋʋ nɩ kũu kha na ɔr ga-n pɛr; thale mɩ-n ƴaal gɩ hana nar fɛʋ.