1 TIMOTHE

¹ Mɛr Polɩkɛ dɔnɩ Jeju Kirisitii thɔ̃thɔn, dɩɩ ha mɔ̃kɛ Thãgbaakɛ dɔnɩ asɩ Taadaar pɛrnɩ gɩ hana, na Jeju Kirisitiikɛ dɔnɩ ʋrɛ sɩ-n pɛnɩ nũu, ² thɔna sɛbɛɛkɛ a ha Timotheekɛ dɔ marnι bikuun na sobɔr ha pɛdaara: Thãgba Thιrɛ, na asι Kɔ̃tɩ̃ Jeju Kirisiti na-n jɛ fɩ bʋɔra, a na-n dɔna fɩ dakha bʋɔ, a na-n hana fɩ dakha ha ɩɩ. ³ Ɔbɔɔkɛ mɩ-n gbanɩ hʋɛ ɩ̃ jal Masedʋan, mɩ kɔɔ so farɛ fɩ tɔɔ Efɛjɩ a vara kĩkĩ tibil ɩkhasɔra wa-n dɩɩr sõso dɩɩra’. ⁴ Wa-n bo na pɛ dakha kpuro nɩɛsɔ nũə’, na thɩ kɔ̃ jɔfʋsɔa’, kɛ ga thɩmɩɩ na-n hananɩ khu paara ga, sɩɩ do kɩla gɩ-n ɩɩr, sɩ ga-n ka cʋʋ gɩrɛ Thãgba n ƴaalnɩ ga-n cʋɛa’, gɩdonɩ ha pɛrɛra gele n cʋʋ. ⁵ Gɩrɛ Thãgbaa so ’laa n ƴaalnɩ ga-n cʋɛ dʋɔn gɩ dɔ naʋ a na thɛ ha phuurə, na kpɩɛrnɔraakɛ ’leanɩ dɩ paar, na ha pɛrɛraakɛ na hananɩ fɩɩla’. ⁶ Ɩkhasɔ kɔɔ dɩrɛ hʋɛra, a lɛ̃, a lõ mɔlɔ thɩ̃ banaana; ⁷ sɩ wɩ-n ƴaalɛ ɩnɩ-n dɔ jɔfʋ dɩɩrdara, sɩrakɛ gɩrɛ wɩ-n sonɩ wa-n jɩ ga kɩra’, dɩ thɩmɩɩ nɔ ʋrɛ wɩ-n bonɩ wa-n ɩɩrɔ, wa jɩ ɔɔ kɩr dakha ga. ⁸ Sɩ sɩ jɩrɛ dɩ jɔfʋ bɔrɛ a fɩ jɩ mɔ̃ na mɔ̃ gɩ teenanɩ fɩ cʋɛnaa, ⁹ a fɩ jɩ dɩɩ do ga do tɩɩ sarʋra jɔfʋ kɔɔ pɛra’, sι jɔfʋ ’leedarara wɛ, na nũ nʋʋrdarara, na wɩrɛraakɛ na-n therananɩ Thãgba ga, na sopugodarara, na Thãgba fʋɔr bodarara, na Thãgba so ƴɔ̃ƴɔ̃ɔdarara, na thɩ kʋdarara, na nɩ kʋdarara, na tɩɩ kʋdarara, ¹⁰ na bɔdɛl cʋʋdarara, na konanaakɛ n ƴaalɛnɩ kuun khɛr khaa, na khɛraraakɛ n ƴaalɛnɩ khɛr kũu khaa, na tɩɩ dolõdarara, na sõsodarara, na sõso ʋlfɛdarara, na gɩrɛ fɛʋraakɛ n varanɩ dɩɩr bɔ. ¹¹ Dɩɩrɛɛlera tutugo bʋɔraakɛ Thãgba pɛ marnɩ dɩ ma mɩɩ, le gɩ the; dɩ tutugo bʋɔ gɩɩkɛ n nɛnanɩ mɔ̃ Thãgbaakɛ hɩnanɩ i dʋbɩrɛ a hɩna bɔnanɛ hanɩ. ¹² Mɩ-n khɩɩrɛ ʋrɛɛkɛ hana mɩnɩ fãga, kɛ dɔnɩ Jeju Kirisiti asι Kɔ̃tɩ̃, na gιrɛraakɛ a we mɩnɩ sobɔ tibil a gba mɩ pɛ thɔmana, ¹³ mɛrkɛ mamara kɔɔ dɔnɩ ɔɔ i kʋɛdaar, na kpõkpoodaar, na nĩkhi khedaar, sɩ Thãgba kɔɔ jɩ mɛr bʋɔra, gɩdonɩ yʋ ’leerera na ha pɛ ’leerera mι kɔɔ cʋʋ gelela. ¹⁴ Asɩ Kɔ̃tɩ̃ nɩna mɛr ɔɔ bɔ jɩ dɩɩ thʋ̃ kãasɩ, a hanana mɩ ha pɛrɛ na naʋʋkɛ thɛnɩ Jeju Kirisitira. ¹⁵ Sobɔr thɩmɩɩrɩkɛ do a teena tuur koo, gɛr dʋɔn Jeju Kirisiti kɔɔ ɩnɛ kɛ thɩɩra a taa sopugodara, kɛ mɛrɛ donɩ cacadaar. ¹⁶ Sɩ Thãgba kɔɔ jɩ mɛr bʋɔra, gɩ do mɛr dɔ cacadaarɩkɛ Jeju Kirisiti kɔɔ nɩrɔnɩ ɔɔ ha fʋ koo, ɩ̃ do thɩ̃ nɩrɔrɛ wɩrɛraakɛ na pɩɛnɩ haar a na ’lɛ yire khorr. ¹⁷ Ʋrɛ dɔnι bɔɔ khorr fãgadaar, kɛ na dɔnι dakhinənə’, aa do wo dayιnana’, kɛ dɔnι Thãgba bιɛl dιbara ’lẽ’lẽ’lẽ, ɔr teana a hιna cʋrɛ na i dʋbιrɛ bɔɔ fɛʋ waa khorr vʋ̃ʋ. Amɛn. ¹⁸ Mι gbaar sorɩkɛ dɩ ma-n ha fɛr Timothe ɩ̃ bikuun, mɔ̃kɛ Thãgbaa bobonaa thɩmɩɩkɛ telene fɩnɩ kɔɔ maanɩ sor, gba gɩ a na kɛ̃kɛrɛna kɛ̃kɛrɛ̃ bʋɔ, ¹⁹ a jɩɛ hanana ha pɛrɛ na kpɩɛrnɔɔkɛ na heene fɩnɩ sora’; ga kpɩɛrnɔ caalera ɩkhasɔ kɔɔ dʋna gɛr a faa a kʋɛ awɩ ha pɛ; ²⁰ Imene na Alesãdɩɩr kɔɔ harrɛ, dɩ mɩ kɔɔ faa wɛr a ha Satã gɩ dɩɩr wɩ fɩlɛ wɩ faa Thãgbaa i kʋɛrɛ.

¹ Dɩ gɩrɛ dɔnɩ caca thɩ̃ɛ mɩ-n ƴaalnɩ dʋɔn, phʋʋrɛ, na bɩɛlɛ, na ƴɛɛrɛ, na Thãgba khɩɩrɛ, sa-n pɛ tɩbɩlala fɛʋ. ² Sɩ bɩɛlnɛ a na pɛ fãgadarara fɛʋ na wɩrɛraakɛ dɔnɩ kɔ̃tɩnasɔ, dɩ mɛ̃ sa too dɩɩra cɔcɔcɔ na ha ɩɩ, sɩ hana Thãgba fɩlɛ na fɩl bʋɔ; ³ thale bʋɔnɔ, gɛr n da dakha Thãgbaraakɛ dɔnɩ asɩ Taadaar, ⁴ kɛ n ƴaalɛnɩ tɩbɩla fɛʋ n ’lɛ taarɛ a jɛ gɩrɛ n dɔnɩ sobɔr. ⁵ Gɩdonɩ Thãgba bɩɛl dɩbara haanle, na dakha so ƴɛɛdaar bɩɛl tɩbɩlala na Thãgba, Jeju Kirisitiikɛ dɔnɩ tibil gɩ. ⁶ Ɔr dɔ ʋrɛ kɔɔ faanɩ dɩbara a birse tɩbɩla fɛʋ, dɩ ɔbɔɔkɛ ga bɔɔlera kɔɔ danɩ gɩ har mɔna gɩ kɔɔ mɩɩnɩ. ⁷ Gɛr dɔ gɩrɛ Thãgba pɛ marnɩ dɩ ɩ̃ do ga mɩmɩɩ na thɔ̃thɔn, ma-n dɩɩr ca kpala ha pɛrɛ, na gɩrɛ dɔnɩ sobɔr, dɩ sobɔr mɩ-n so ga do sõsor mɩ kurə’. ⁸ Dɩ gɛr gɩ mɩ-n ƴaalɛ kona n ’laanɛ nyɛ̃ phuu ƴũ a na bιɛlna Thãgba paar fɛʋ, sι wa-n hana nĩkhiə’, wa-n hana thɩ̃ banaa ga. ⁹ Mι-n ƴaalɛ dakha khɛra na-n tɔ kẽkena mɔ̃kɛ gι teenanι, na fɩl bʋɔ na fιl phuu, wa-n li yʋʋ dι yʋ lιιr gɩ, a gbana dɛ thɩ̃ɛsɔ na lẽbiisɔ na kẽkẽ the nɔ khena ka, a na cʋʋna biirə’; ¹⁰ sɩ gɩrɛ na dɔnɩ awɩ biir cʋʋ n ka dɔ thɔ̃ bɔ cʋʋrɛ, kɛ dɔnɩ gɩrɛ teananɩ khɛraakɛ n yɛnι Thãgba cʋ khɛra ιnɩ do. ¹¹ Dɔ khɛra n ’wɩɩ kɩrkɩrkɩr sɩ wa-n pɛ dɩɩrɛ nũu na dɩbara jor. ¹² Ma-n tu khɛr n dɔ dɩɩrdaara’, agɩbo a do yʋʋ kuunna ga, sɩ a teenanɛ a ’wɩa kɩrkɩrkɩr. ¹³ Gɩdonɩ Adã Thãgba kɔɔ ti ɓo sa pιιrɔ Ɛvɩ. ¹⁴ Sɩ ga do Adã kɔɔ telene a ’lɛ fifiləla’, sι khɛr kɔɔ ’lɛ fifiləle a lõ Thãgbaa jɔfʋ kʋɛrɛra. ¹⁵ Sɩrakɛ Thãgba na tagʋʋrɛ mɔ̃ a donɩ bi kɔn, ado a too a hana fɩl phuu ɔɔ ha pɛra, na naʋra, na kpɩɩ leerera.

¹ Sobɔr thɩmɩɩrɩkɛ do gɩ yɩ: Ado tibil na ɩnɩ-n dɔ we gbɛbɩdaraa hɩɩndaar thɔ̃ bʋɔ a-n ƴaal. ² Dɩ gɛr gɩ we gbɛbɩdaraa hɩɩndaar teenanɛ a dɔ ʋrɛ tibil na punoni na pɛr sora’ a hanana khɛ bɩɛl, a dɔ dɩbara fʋdaar, a dɔ yʋ bɔ tibil, a hanana fɩl bʋɔ, a dɔ kpakpal tee tibil, a punone a na dɩrɛ tibil thɩ̃ɛ; ³ a na-n do ta laardaara’, a na-n do kɩl ƴaal tibilə’, sɩ a dɔ bɩ̃ bɔ tibil, na ha ie ƴaal tibil, a na-n do war laardaara’. ⁴ Dɔ a do tibilikɛ n punoneni da-n ma ɔɔ cɔra, dɩ jɩɩ fʋ ɔɔ bɩsãsɔ dɩ wa-n nɩ nũu dɩ wɩ hananaa cʋʋr. ⁵ Gɩdonɩ ado tibil na puno a na ma ɔɔ cɔra ga, mɔ̃ a na fʋ sɩ na ma Thãgbaa we gbɛbɩdarara? ⁶ Sɩ wo ntɛ na-n do Thãgbadaar phaa ga, anaa a na kar ire a na ba lõ so heen ca bɩɛlla na Satã. ⁷ Sɩ a dɔ tibilikɛ hananɩ i bʋɔ wɩrɛraakɛ na dɔnɩ ha pɛdara ga, dɩ mɛ̃ tibil na yɩɩraa so paara’, a na ji dakha Satãa pherra ga. ⁸ Mɛna gɩ ha dakha na wɩrɛ dɔnɩ we gbɛbɩdaraa thɔ̃ dodara, wɩ teenanɛ wɩ dɔ tɩɩ cʋnanɛ, wa-n do khalƴιɛ yenyɔdara ga, wa-n do ta laardara ga, wa-n phʋʋn tɩbɩla na fãga bɩɩ awɩ war ƴaalla ga, ⁹ wɩ jɩɛ ma thɩ̃ gbulləəkɛ dɔnɩ ha pɛrɛɛda, a hanana kpɩɛrnɔɔkɛ ’leanɩ dɩ paar. ¹⁰ Wa jʋʋr wɛr ɓo na hɩɩn ado wa hana so paara’ wa-n do awɩ thɔ̃. ¹¹ Ɔmɛna gɩ dakha na khɛra, wɩ teenanɛ wɩ dɔ tɩɩ cʋnanɛ, wa-n do i kʋɛ tibilə’, wɩ hana dɩbara fʋrɛ, wɩ dɔ sobɔ cʋʋ tɩbɩla thɩ̃ɛ fɛʋra. ¹² We gbɛbɩdaraa thɔ̃ dodara teenanɛ wɩ hanana khɛ bɩɛl, wɩ jɩɛ ma awɩ bɩsãsɔra na awɩ thɛthɛɛ cɔra. ¹³ Gɩdonɩ wɩrɛ n jɩɛnnɩ do awɩ thɔ̃ bɔɔbɔɔ, wɩ-n tɔr awɩ thɛthɛɛ cʋ dɩ wa-n pɛr, dɩ wɩ hananɛ dakha ’lar ha pɛrɛraakɛ wɩ hananɩ Jeju Kirisitira. ¹⁴ Mι khere farɛ thɩ̃ɛsɔɔkɛ sι mι pɛrɛ haar kιɛr na gbe ma pɔr afι pa. ¹⁵ Dι ado ma pʋɔr sι fι jι mɔ̃ tibil teenanι ɔɔ fιl n hana Thãgbaa too thɩ̃thιιn, kɛ dɔnι dakha Thãgba yidaarι we gbɛbιdara, a dona thιkarʋ ka sobɔr dɛɛnι. ¹⁶ Tibil na puno na bana mɔ̃ Thãgba fʋɔrɛ donι thɩ̃ hulõo a ka ga, gɛr dʋɔn: Jeju Kirisiti kɔɔ gbaar tibil tomιr a debi do tιι yιnanɛ, Thu Phuu kɔɔ nιrɔrɛ dι tιι sarʋ a do; thɔ̃thɔ̃daar thusɔ kɔɔ yιιrɛ. Ɔɔda kɔɔ mιιrɛ casι tibil caarsɔra; wι kɔɔ pιɛrɛ haar thιιraakɛ, Thãgba kɔɔ khəsuure dι ’lɛ i dʋbιrɛ le ƴũ.

¹ Thu Phuu sor casι ayι: Pιpιι bɔɔ ιkhasɔ na-n pɛr kɔ̃tɛɛbiisɔɔda nũu, kɛ na cʋɛ wιnι wι buur, wι faana ha pɛrɛ gι the kɔ̃tɛɛbiisɔɔ dιιrraalera. ² Sõsodaraakɛ daanɔnι nʋɔ, kɛ haar dibini mɔ̃ wι-n fɔfɔrɔnι haar na the phʋɛ, na fιlɛ wι nayι, ³ tibil na-n he khɛr dι kuun ga; aa, wa-n sãsιnɛ dakha thɩ̃ khonanɛɛkɛ Thãgba tini, dι wιrɛ dɔnɩ ha pɛdara a jɩna sobɔr na kho na fɔfʋɔr haar. ⁴ Gɩdonɩ thɩ̃ɛ fɛʋʋkɛ Thãgba tini gɩ bɔrɛ, thɩ̃ bonanɛ na hala’, sɩ gɩ dor gɩrɛ tibil na fʋɔrɔnɩ Thãgba sɩ a na-n tee; ⁵ gɩdonɩ Thãgbaa thɩmɩɩ na Thãgba bɩɛlɛ n cʋʋrɛ thɩ̃ɛ fɛʋ dɩɩ phu. ⁶ Ado fɩ gba ga thɩ̃ɩkɛ a na dɩɩr omɩna, ga dor fɩ dor Jeju Kirisitii thɔ̃daar bʋɔɔkɛ ha pɛ thɩmɩɩr n haannɩ na dɩɩr bʋɔ, kɛ dakha fɩ kparɔnɩ bɔɔbɔɔ. ⁷ Bɔ mama sɔɔkɛ hɔnɩ kpuro nɩɛ, sɩ na gbuoro yʋʋ Thãgba fɩlɛla. ⁸ Gɩdonɩ tomɩ gbʋ̃gbʋnyanɛ wer, dabʋɔ harrɛ gbe, sɩ Thãgba fɩl hananɛ, dabʋɔ harrɛ a thʋ̃ kãasɩ, gɩdonɩ gɩ-n ɩnanɛ nɛnɛ̃ yire na yireekɛ na ɩnanɩ ƴɛ kʋʋlɔ. ⁹ Sobɔr thɩmɩɩrɩkɛ do a teena tuur koo. ¹⁰ Gɛr gɩ dɩ sa-n gbũgbulõ thɔmana dɩ sa-n kɛ̃kɛrɛna gɩ, gɩdonɩ asɩ nũ pɛ Thãgba yidaarra gɩ ha, kɛ dɔnɩ tɩbɩla fɛʋʋ Taadaar, sι ha pɛdaraa Taadaar a do cacaca. ¹¹ Na kpãkpaanɛ war ga thɩ̃ιkɛ a na dιrɛna wɩ. ¹² Tibil na-n beesi lι daɓol dʋʋrra ga, sɩ ka dɔ thɩ̃ nɩrɔrɛ ha pɛdarara, thɩmɩɩ mɩɩrɛra na cʋʋ paarra, na naʋra, na ha pɛrɛra, na phurrə. ¹³ Gɩ dana bɔɔkɛ ma pɔnɩ le, gbuoro yʋʋ a na sɔ sɛbɛ, a na mɩa Thãgbaa thɩmɩɩ, a na dɩrɛna tɩbɩla. ¹⁴ Fa-n hɛbɩ bɔ jɩ khaardaakɛ ha farnɩ, kɛ fɩ kɔɔ ’lɛnɩ dɩɩ ha mɔ̃kɛ Thãgba tukɩr tidara kɔɔ mɩɩnɩ bɔɔraakɛ we gbɛbɩdaraa kɔ̃tɩ̃sɔ kɔɔ dɛ̃ɛ farnɩ nyɛ̃a’. ¹⁵ Na jɩɛ tɩrɔ ga thɩ̃ɩle; faa afɩbara gɛrra, dɩ mɛ̃ tɩbɩla fɛʋ na yɩ mɔ̃ fɩ-n bãbanɩ. ¹⁶ Na jɩɛ hɩɩn afɩbara, na afɩ dɩɩr, na yɩrana ga thɩ̃ɩle; gɩdonɩ mɔ̃ fa-n cʋʋnɩ thalera fa taarɛ afɩbara na wɩrɛɛkɛ n pɛ fɩnɩ nũu.

¹ Fa-n phaan kũu kɔ̃tɩ̃ɩ na fɩlɛɛkɛ khiinona’, sɩ mɩanaa mɔ̃ a donɩ thɩrɛ; fɔ daɓola õkũu khaa, ² na khɛ kɔ̃tɩna nɩ khaa, na khɛ biirə õkhɛ̃ khaa, sɩ dɔ gɩ do na fɩl phuu. ³ Wɩrɛ dɔnɩ khikhɛra na sobɔr, na jɩɛ hɩɩn wɩ. ⁴ Sɩ a khikhɛrʋ gι a hana bɩsana, agɩbo ɔɔ bii bɩsãsɔ gɩ, dɔ wɩ jɩ dɩ caca thɩ̃ɛ Thãgba fʋɔrɛra dʋɔn awɩ cɔdaraa hɩɩn, dɩ wa tiir dakha helu wɩrɛraakɛ kɔɔ haanɛ wɩnɩ, gɩdonɩ gɛr dʋɔn thɩ̃ɛɛkɛ n danɩ Thãgba haar. ⁵ Sɩ ʋrɛ dɔnɩ khikhɛrʋ na sobɔr, aa hana tibil bã, Thãgba a-n pɛ nũu; dɩtɩnɔ na dɩwɩlʋ a-n yɩr da-n phʋʋr Thãgba da-n bɩɛlnaa. ⁶ Sɩ khikhɛrʋʋkɛ n faanɩ dɩbara da-n ’lɛ gɩrɛɛkɛ n daaraanɩ khaakhaar cʋʋrɛra, fɩ-n yɩɩrɛ na yire wer sɩ a khire. ⁷ Na kpãkpaanɛ war thɩ̃ɛsɔra thakɛ, dɩ mɛ̃ tibil na puno na pɛ war sora’. ⁸ Ado tibil na-n hɩɩn ɔɔ toa’, dɩ ado aa-n hɩɩn ɔɔ cɔdara da-n jɔa’, ha pɛrɛ a bo, a ka puurore a jɔ ʋrɛɛkɛ na dɔnɩ ha pɛdaara’. ⁹ Khikhɛrʋʋkɛ kanɩ yɛna kpalãther, ɔɔ i punone khere sɛbɛra, sɩ dɔ a do khɛrɩkɛ kɔɔ hɛnɩ kũu bɩɛl, ¹⁰ a dɔ khɛrɩkɛ hananɩ i bʋɔ thɔ̃ bɔ cʋʋrɛra, a dɔ ʋrɛ kɔɔ haanɛnɩ bɩsana, a dɔ dakha kpakpal tee khɛr, a dɔ ʋrɛ n kɔɔ tuonni da-n cʋʋ sikpulo thɔma tιι phuusɔra, na ʋrɛ n kɔɔ buloni wιrɛ n gaarɛnι, a dɔ dakha ʋrɛ n kɔɔ cʋɛnɩ thɔ̃ bɔ caar dɩɩdɩɩ fɛʋ. ¹¹ Fa-n khere khikhɛraakɛ na tɩnanaa iə’, gɩdonɩ ɔbɔɔkɛ thue n fʋ wɩnɩ gɩ-n cʋʋ wɛr dɩ wɩ hʋnɔna Kirisiti, dι wι-n ƴaalɛ ιnι-n birə hɛ kona, ¹² dιι do wι hananɛ dιι gιrɛraakɛ wι phiini awι caca ʋlfɛɛkɛ wι kɔɔ ʋlfɛnanι Kirisiti. ¹³ Dɩ wo, wa hananɩ thɩ̃ɛ a na cʋa’, wɩ-n ɩɩrɛ dɩ wa-n kpaar cɔna cɔna, sɩ gɩrɛ puuroni a jɔ dʋɔn mɔ̃ wɩ donɩ wɩrɛ n kpaarnanɩ sɔ, dɩ wa-n ’lɔɔ gɩrɛraakɛ na ba wɩna’, dɩ wa-n mɩɩna thɩmɩaakɛ na teananɩ mɩɩra’. ¹⁴ Gɛr gɩ mɩ-n ƴaalɛ dɩ wɩrɛ na tɩnana’ n birə hɛ kona, a hanana bɩsana, a jɩɛ fʋ awɩ cɔ, dɩ wa-n ’laa hʋɛ lãlaardaarra a na-n kʋɛ sɩ irə’. ¹⁵ Gɩdonɩ ɩkhasɔ kɔɔ ’lire kɛrrɛ gɩrɛ dɩ wa-n kpa Satana. ¹⁶ Ado ha pɛdaar hale, a kuun gɩ, a khɛr gɩ, a hana khikhɛra, ntɛsɔ na-n hɩnɛ wɩ, ga-n do we gbɛbɩdaraa heenda ga, dɩ mɛ̃ we gbɛbɩdara na puno na jɩɩ hɩɩn wɩrɛ jɩɛnnɩ do khikhɛra na sobɔr. ¹⁷ We gbɛbɩdaraa kɔ̃tɩ̃sɔɔkɛ jɩɛnnɩ gba ƴɛ kʋʋlɛ wɩ teenanɛ cʋ dɛbɩnaa, sɩ wɩrɛ n gbũgbuloneni Thãgbaa thɩmɩɩ mɩɩrɛra na tibil dɩɩrɛra, wɛr teana gɩ a jɔ. ¹⁸ Gɩdonɩ Thãgbaa sɛbɛ sor ayɩ: “Nakɩɩrɩkɛ na-n sanɩ jɔ, fa-n lii nʋɔa’.” Wo: “Thɔ̃daar teenanɛ ɔɔ lɩmɩ.” ¹⁹ Fa-n pɛ nũu sorιkɛ wa pɛnɩ we gbɛbɩdaraa kɔ̃tɩna saagado gɩrɛ tɩbɩla yenyɔ dɩ yẽther gɩ tornɩ yirəə ga. ²⁰ Wɩrɛ n cʋɛnɩ sopugo, phaanɛ wɩ tɩbɩla fɛʋʋ ƴɛra, ga cʋʋrɛ dakha maar dι ga fʋ wɩrɛ sɛnɩ. ²¹ Mɩ-n kpãkpãa farɛ kheu Thãgbaa ƴɛra, na Jeju Kirisitii ƴɛra, na thɔ̃thɔ̃daar thusɔɔkɛ Thãgba phiirnii ƴɛra dɩ fa jɩɩ hɩɩn ga thɩ̃sɔɔkɛ, sɩ fa-n do tibil bo pɛrɛ na-n hale na dɩɩdɩɩ hɩɩna’. ²² Fa-n phana kɔrɔ a na dɛ̃ɛ tibillə nyɛ̃ɛ Thãgba thɔmana ga, dɩ fa-n do tibili sopugo n ma fa’. Jɩɛ fʋ dɩbara a ’lea dɩɩ. ²³ Fa-n yɔ yɔ haar dɩbara bã, sɩ na ’lɛ taan gbegbe afɩ bɩ̃ khorara na afɩ tomɩraakɛra n sɛ fɩnɩ tɔ̃tɔ̃tɔ̃. ²⁴ Ʋkhasɔ sopugo n yɩrrɛ sɩ dɩ kɩɩlʋ n pɩɩrɔ dɩɩ adã wɩ, sɩ ɩkhasɔɔda wer pɩpɩɩ paar gɩ-n yɩr. ²⁵ Mɛna dakha thɔ̃ bʋɔ n yɩr, sɩ gɩrɛ na yɩrana’ ga puno na too thale gɩ do gɩ kerra’.

¹ Wɩrɛ fɛʋʋkɛ dɔnι dea teenanɛ wa-n hɩnɛ awɩ kɔ̃tɩ̃sɔ mɔ̃kɛ wɩ teenanɩ cʋʋr na sobɔr, dɩ mɛ̃ Thãgbaa i na kʋɛ dɩ dɩɩrɛɛkɛ sɩ-n dιιrnι ga. ² Dι dee ƴιrɛ hananι kɔ̃tιna dι wι do ha pɛdara, wa-n ’lar õkũu dʋʋrra sι na beesi wa’, sι wι ka na jιɛ do war thɔma gιdonι wιrɛ awɩ thɔ̃ɔle n bulni dɔ ha pɛdaraakɛ wɩ-n nanɩ. Na dɩrɛ ga thɩ̃ɩkɛ dɩ na kpãkpaanɛ gar. ³ Ado tibil na dɩɩr dɩɩr kpɩɩ, dɩ ado aa-n tu thɩmɩɩ bʋɔɔkɛ dɔnɩ asɩ Kɔ̃tɩ̃ Jeju Kirisitiida ga, na dɩɩrɛɛkɛ n jalanɩ kha na Thãgba fɩla’, ⁴ ire ntɛ n ka mɔlɔ, aa jɩ thɩ̃a’; thɩ̃ bana tibil gɩ, na tɩɩ khɩɛsɩdaar, gɛr n ɩrɛna gbugi, na kɩla, na i kʋɛrɛ, na so jɩɩr na yinə, ⁵ na sɔ tə̃tə̃tə̃. Gɩrɛ fɛʋʋkɛ har tɩbɩlalaakɛ fɩlɛ gõgolonɩ, wa-n mar dɩ wɩ jɩ gɩrɛ dɔnɩ sobɔr bã, dɩ wɩ-n kpɩɛrɛ Thãgba fɩl hananɛ dor lẽle thɩ̃ ’lɛ paar. ⁶ Sobɔr gɩ wer Thãgba fɩl hananɛ dor lẽle thɩ̃ kɔ̃tɩ̃ɩ tibillə ado a tu dɩ gɩrɛ ɩnɩ hananr dã nɛr mɛ̃. ⁷ Gιdonι sa kɔɔ hana thɩ̃ɛ a ιna kɛ thιɩra ga, dι a sa the sa puno a na gba thɩ̃ɛ dakha ga. ⁸ Dɩ gɛr gɩ ado sɩ hana dιkor na kẽkena, gele dã sɛr. ⁹ Sɩ wɩrɛ n ƴaalɛnɩ ɩnɩ-n dɔ lẽledara, wɩ-n təəre ji fifiləlela, na pheruraakɛ dɔnι də̃bəəl thɩ̃ ƴaal jɔɔkɛ kpalanι ka, gɛr n hala tιbɩla dɩ wι mʋʋ kʋɛrɛra na bũburonena. ¹⁰ Gιdonι war naʋ dʋɔn sopugo jɔjʋɔɔ fʋ pa; dɩ ɩkhasɔɔkɛ kɔɔ ƴaalɛ gɩnɩ dɩ wa-n kpãkpaanɔ, wɩ faarɛ ha pɛrɛ sa gba dɩbara a mʋʋ ha hellela. ¹¹ Sɩ fɛr Thãgbaa tibil, fe khiru pɛ ga thɩnaakɛ, sɩ na ƴaalɛ fɩl sarʋ, na Thãgba fɩlɛ, na ha pɛrɛ, na naʋ, na ha fʋrɛ, na hɛlɛlɛ fɩlɛ. ¹² Na kɛ̃kɛrɛnɛ ha pɛ kɛ̃kɛrɛ̃ bʋɔ. Fɔrɔ yire khorr gɩrɛraakɛra Thãgba kɔɔ we fɩnɩ na gɩrɛraakɛ fɩ kɔɔ canɩ afι ha pɛ pasι tibil jɔjʋɔɔ ƴɛra. ¹³ Mɩ-n kpãkpãa farɛ Thãgbaa ƴɛra, ʋrɛɛkɛ n ’laanɛnɩ thɩ̃ɛ fɛʋra yire, na Jeju Kirisitii ƴɛra, ʋrɛ kɔɔ cananι ɔɔ ha pɛ pasι Pɔ̃sι Pιlatιι ƴɛra, ¹⁴ dι fa jιι hιιn ga soolera ga hana sι paara’, tibil na yιrɔ dakha dιa’, phaphapha asι Kɔ̃tɩ̃ Jeju Kirisiti n ɩna, ¹⁵ kɛ dɔnɩ ʋrɛ̃ bɔɔ na danɩ dɩ Thãgba na nɩrɔ, Thãgbaakɛ dɔnɩ ʋrɛ hɩnanɩ bɔnanɛ, ɔr bɩɛl dʋɔn Fãga hɩ̃daar, ɔr dʋɔn Fãgadaar kpɩɛ fãgadarara, na Kɔ̃tɩ̃ kpɩɛ kɔ̃tɩnana, ¹⁶ ɔr dɩbara na dɔ dakhinənə’, ɔr haan dahɩrɛraakɛ na dɔnɩ dadanana’; tibil bɩɛllakɛ na kɔɔ yɩa’, dɩ tibil bɩɛllakɛ na puno na yɩa’. Ɔr teana a hɩna cʋrɛ na fãga khorr. Amɛn. ¹⁷ Kpãkpaanɛ nɛnɛ̃ bɔɔkɛɛ lẽledarara wa-n ti gunə’, wa-n gba awɩ nũ pɛ faa lẽle thɩɛnaakɛ na dɔ̃nɩ dapʋɔrnaa gaaga, sɩ wɩ faa Thãgbaraakɛ n ’laanɛnɩ thɩ̃ɛ fɛ̃ʋ dɩɩ dã sɩ thu, sɩ puno sɩ gba gɩ gɩ do asɩ kãkada. ¹⁸ Sɔ war wa-n cʋɛ bɔɔ, wɩ dɔ lẽledara thɔ̃ bɔ cnʋrɛra, wa-n ’laanɛ thɩ̃ɛ na haar, wa-n bulo tɩbɩla; ¹⁹ gɩ do mɛ̃ wɩ khɩɩ lẽle thɩ̃ɛɛkɛ dɔnɩ dapʋɔrnaa a thɩɩn dɩɩ do bɔɔkɛ na ɩnanɩɩda, gɩ do yireekɛ wa ’lɛnɩ mɛ̃ gɩ jɩɩ do yi hana bɔ. ²⁰ Timothe wei, jɩɛ fʋ gɩrɛ wɩ kɔɔ gbanɩ a dʋ fɩ nyɔ̃kɔɔ. Golone folo folola na khaakhaar thɩmɩara, na thɩ̃ banaasɔraakɛ thɛnɩ jɩɩrraakɛ tɩbɩla n wenɩ jɩɩr sɩ ga do jɩɩr ga; ²¹ dɩ ɩkhasɔɔkɛ yɛnɩ ɩnɩ hana gɛr wɩ kɔɔ dɩrɛ hʋɛra, a lɛ̃, sa faa ha pɛrɛ. Thãgba na-n jɛ nɩ bʋɔra.