1 TESALONƖKƖDARA

¹ Mɛr Pol na Sιlvɛ̃ na Timothe thɔna sɛbɛɛkɛ a ha we gbɛbιdaraakɛ hanι Tesalonιkι, kɛ Thãgba Thιrɛ na Jeju Kirisiti Kɔ̃tιn hιnι. Thãgba n hana nι ha ιι a jɛ nι dakha bʋɔra. ² Wire fɛʋ sι-n khιι Thãgba nɛrɛ fɛʋʋdara, dι sι bιɛlna Thãgba dι sa-n pɛ nar na anι i. ³ Bɔɔ fɛʋ sɩ-n jɩna asɩ Thɩ Thãgbaa ƴɛra, anɩ ha pɛ thɩ̃ cʋʋ, na anɩ naʋ thɔ̃ cʋʋ, na anɩ kɩbɩ jɩɩl, nũ pɛrɛraakɛ nɩ hananɩ asɩ Kɔ̃tɩ̃ Jeju Kirisitira. ⁴ Sɩ jɩrɛ tue omɩna dɩ Thãgba naan nɩ a kɔɔ phiir ni. ⁵ Gɩdonɩ Thãgbaa tutugo bʋɔɔ thɩmɩɩkɛ sɩ kɔɔ pɔnanɩ, ga do nʋɔ sɩ kɔɔ mɩɩna dɩbara ga, sɩ sɩ kɔɔ mɩɩ gɛr dɩɩ ha phãphãphã, na Thu Phuu, na tu jɩɩr vʋ̃ʋ; gɩdonɩ nɩ jɩrɛ fɩl caakɛ sɩ kɔɔ hananɩ anɩ thɩ̃thɩɩn gɩ do nɔɔ thɩ̃ɛ n bɔ nar. ⁶ Dɩ nɛrɛɛ thɛthɛrakɛ debire a do asɩ ph ɛldara na Kɔ̃tɩnɩ phɛldara kpoore jɔɔ thɩ̃thɩɩn, kɛ nɩ-n yɩnɩ Thãgbaa thɩmɩɩraakɛ nɩ-n ’lɛnɩ na daʋʋkɛ n thɛnɩ Thu Phuurə, ⁷ a thʋ̃ debi waa a do thɩ̃ nɩrɔrɛ ha pɛdarara fɛʋʋkɛ hanɩ Masedʋan na Akaɩ. ⁸ Sɩ ga do Kɔ̃tɩnɩ thɩmɩɩ kɔɔ ther anɩ pa dɩ ga-n kpaar dɩ Masedʋandara na Akaɩdara nɩɛ dɩbara ga, sɩ paar fɛʋ wɩ nɩrɛ mɔ̃ anɩ ha pɛ Thãgbara hanɩ, dɩ ga do gɩ thʋnɛ harakɛ mɩɩrɛra dɩ sa mɩɩ bã. ⁹ Gɩdonɩ wɩ-n mɩɩrɛ asɩda teereraakɛ nɩ kɔɔ tee sɩnɩ ɓoɓo, na dakha wo mɔ̃kɛ nɩ kɔɔ kɛrnɩ a pɛr Thãgba haar sa faa thɩla, sɩ nɩ do thɔma Thãgba yidaarraakɛ dɔnɩ Thãgba bɔ, ¹⁰ na-n pɩɛrna dakha ɔɔ Bikuunikɛ na thɛnɩ Thãgbaa dʋɔ, kɛ dɔnɩ Jejuukɛ a kɔɔ ɩɩrnɩ dɩ the khirera, kɛ dɔnɩ asɩ tataa Thãgbaa nĩkhirəəkɛ n ɩnanɩ.

¹ Omɩna, nɛrɛɛ thɛthɛ jɩrɛ dɩ asɩ pɔɔkɛ sɩ kɔɔ pɔnɩ anɩ pa na kɔɔ do mɔlɔa’. ² Ɔbɔɔkɛ sɩ kɔɔ gaarnɩ bʋɔ a ’lɛna kpoore jɔɔ Filipira pɩ, mɔ̃kɛ nɩ jɩ gɩnɩ dɩɩ kɔɔ ha, sɩ Thãgba kɔɔ ha sɛr ’lar mɔ̃kɛ sɩ pɔnɩ dɩ sa-n mɩɩ nɩ Thãgbaa tutugo bʋɔɔ thɩmɩɩ bãbaranɛ jɔɔ thɩ̃thɩɩn. ³ Asɩ wewe Thãgba thɩmɩɩkɛ sɩ kɔɔ mɩɩ nɩnɩ na kɔɔ the dədirrə dɩ kpɩɛr puurə ga, dɩ ga kɔɔ do dakha fɩɩl thɩmɩa ga. ⁴ Gɩ ka har mɔ̃kɛ Thãgba kɔɔ jʋʋr sɩnɩ hɩɩn dɩ sɩ teena dɩ heen sɩ tutugo bʋɔɔle, mɛ̃ sɩ-n mɩɩ gɩ, ga do dɩ sa da tɩbɩla haara’, sɩ dɩ sa da Thãgba haar, kɛ n bəəreni asɩ bɩ̃ dɩ jɩ mɔ̃kɛ gɩ hanɩ. ⁵ Nι jιrɛ mɔ̃kɛ gι kɔɔ hanι, ga do fιιl thιmιιr sι kɔɔ mιι nι kpιιraka’, dι sa kɔɔ phɩ̃ nar dakha fιlɛ thʋnɔ, sι sa-n ƴaal nar dιkha ga, Thãgbaa thɛthɛ torre yire; ⁶ dι dakha sa kɔɔ ƴaal i dʋbιrɛɛkɛ thɛnι tιbιlaa pa, dι anι pa gι, dι ʋkhasɔɔ pa ga. ⁷ Mɔ̃kɛ sι donιnakɛ Kirisitii thɔ̃thɔna, sι kɔɔ punone a na nιna asι kɔ̃tɩ̃ do, sι sι ka har hɛlɛlɛlɛ anι thɩ̃thιιn. Mɔ̃kɛ nιrɛ n haannι ɔɔ bιsã bisɔ hɛlɛlɛlɛ, ⁸ mɛ̃ sι kɔɔ ha nar ha lʋʋnna, a ƴaal ga-n do Thãgbaa tutugo bʋɔɔ thιmιι sι-n ha nι dιbara ga, sι sι faa asι thɛthɛɛ yi anι sora, gιdonι nι lõ ser haar ka. ⁹ Omιna, mee nι jιnanɛ asι thɔ̃ do na asι vɔɔ; dιtιnɛ na dιwιlʋ sι-n kɔɔ do thɔma dι sa do heendaa tibil bιɛllalakɛ anι pa ga, thale sι kɔɔ mιι nar Thãgbaa tutugo bʋɔɔ thιmιι. ¹⁰ Nɛrɛɛ thɛthɛrakɛ kɔɔ to garɛ yire, na Thãgba dakha, dι nɛrɛɛkɛ pιɛrnι haar, sι hana narɛ cʋʋ pa bʋɔ, na fιl telẽe na dι pa ’leere. ¹¹ Dι nι jιrɛ dakha mɔ̃kɛ thιrɛ n fʋnι ɔɔ bιsãsɔ, mɛ̃ sι kɔɔ fʋ nɛrɛ fɛʋ bιɛlbιɛl bɔɔbɔɔ, ¹² dι sa-n wɛ nι, dι sa-n ƴɔlna nι haar, dι sa-n fɛrɛna nι ayι: Na-n ιrɛ ga-n da Thãgbaraakɛ kɔɔ wɛ nιnι nι lona ɔɔ fãgadaar dora, a bulo kha na ɔɔ i dʋbι. ¹³ Gɛr dɔ kιrʋ dι sa-n khιι Thãgba wire fɛʋ, gιrɛraakɛ nι kɔɔ tuni Thãgbaa thιmιιkɛ sι kɔɔ mιι narnι, mɔ̃kɛ ga donι tibil thιmιιra’, sιι do Thãgbaa thιmιι bʋɔ gι na sobɔr, dι ga-n cʋʋ thɩ̃ɛ nɛrɛraakɛ pιɛrnι haar. ¹⁴ Gιdonι, nɛr omιna, nι debire a ha mɔ̃kɛ Thãgbaa we gbɛbιdaraakɛ dɔnι Jeju Kirisitii too, kɛ hanι Jude dιιra hanɩ, gaarɛraakɛ anɩ too n kɔɔ gaar nɩnɩ dɩɩ do bɩɛlla gɩ na gaarɛɛkɛ wɩrɛ dɔnɩ Juifisɔ n kɔɔ gaar wɩnɩ. ¹⁵ Juifisɔɔlera wɛr kɔɔ kɔ Jeju Kɔ̃tɩn, na Thãgbaa bobonasɔ, wɛr kɔɔ kpoone sar dakha, awɩda na-n da Thãgba haara’, wɩ-n laarɛ dakha tɩbɩla fɛʋ. ¹⁶ Wɛrra n pɩɛrɛ sɩ aa, sa-n mɩɩna ca kpala wɩ ’lɛ taara’, dɩ thalera wɩ-n cʋʋ dɩ awɩ sopugo thʋ̃ ɩ̃ waa a dã thu, dɩɩ do waa Thãgba gbana wɛr nĩkhii khorr. ¹⁷ Sɩ ado sɛr wɛ omɩna, mɔ̃kɛ sɩ ’lee nɩnɩ gɩrɛ bɔɔ gbe tomɩrra sɩ ga do haarra ga, anɩ thu thʋnɛ fʋ sɩ waa ka, dɩ sa-n ƴaal ka sɩ yɛ nɩ kɔrɔ. ¹⁸ Mɛ̃ sɩ-n ƴaal gɩrɛ dɩphã sɩ pɔ anɩ pa, dɩ mɛr Polɩ thɛthɛ ƴaalɛlakɛ balanyɔ fɛʋ, sɩ Satã kɔɔ pɩɛr sɛr dɩ sa kɔɔ yɩ hʋɛa’. ¹⁹ Gɩdonɩ ʋmɔ̃ dɔrakɛ gɩrɛ asɩ nũ pɛ, agɩbo asɩ kãkada na asι khookɛ dɔnι i dʋbιdaa, ga do nɛr gι asι Kɔ̃tɩ̃ Jejuu bir ɩ̃ bɔaa? ²⁰ Ɔɔ, nɛr dɔ asι i dʋbιda na asι da.

¹ Dι mɔ̃ sa-n marnι dιphã na too sa-n pιɛr mã’, gɛr gι dι sι kɔɔ kpιɛr hιιn sa too dιbara Atɛn dιιra, ² sa thɔ̃ Timothe asι omiikɛ dɔnι Thãgbaa thɔ̃ dodaar Kirisitii tutugo bɔ thιmιι mιιrɛra, a cʋɛ nɩ nɩ tɩ kɩbɩ, na-n yɩr anɩ ha pɛra. ³ Dɩ mɛ̃ tibil na hale a na jẽ kpooreraakɛ nɩ hanɩ gɩra’, gɩdonɩ nɛrɛɛ thɛthɛ jɩrɛ sɩ hananɛ daa ser kpoorera. ⁴ Gɩdonɩ ɔbɔɔkɛ sɩ kɔɔ hanɩ anɩ pa, sɩ kɔɔ mãa so nar dɩ sa yɩrɛ kpoore, dɩ gɩ kɔɔ daan otirə mɔ̃kɛ nɩ yɩɛnɩ. ⁵ Dɩ gɛr gɩ mɔ̃ ma-n punoni dɩ ɩ̃ mar dɩ ɩ̃ toa’, gɛr mɩ thʋɔn ɩ̃ jɩ mɔ̃ anɩ ha pɛ hanɩ, gɩdonɩ mɩ-n kɔɔ dɛr dɩ anaa Satãakɛ dɔnɩ fifilədaar na ba fɩɩl nɛ̃r gɩ ho mɔlɔ thɔma sɩ kɔɔ do. ⁶ Sɩ Timotheekɛ thɛnɩ anɩ pa a ɩ̃ gɩrɛ dɩ ga pʋɔra’, ɔr mɩɛnɛ sɩ mɔ̃ anɩ ha pɛ hanɩ na anɩ naʋ dɩɩ da sar. A so sarɛ dakha dɩ wire fɛʋ nɩ-n hana jɩnanɛɛkɛ daanɔnɩ sɛrɛra, dɩ na-n ƴaal nɩ yɩ sɩ mɔ̃kɛ sɩ-n ƴaalnɩ sɩ yɩ nɩ. ⁷ Gɛr gɩ, omɩna, asɩ nɩ na kpoore fɛʋʋkɛ sɩ-n yɩnɩ, anɩ ha pɛ dor nɔɔ dɩ sɩ faa haar. ⁸ Nɛnɛ̃ mɩ fer waa fə̃ə, gɩdonɩ nɩ tɩrɛ kɩbɩ Kɔ̃tɩnɩ hʋra. ⁹ Mɔ̃ khɩɩrɛɛkɛ sa khɩɩnɩ Thãgba na thʋ̃ na ha kper anɩ sorara, na daʋ fɛʋraakɛ n fɔ sɩnɩ asɩ Thãgbaa ƴɛra nɛrɛra. ¹⁰ Dɩtɩnɛ na dɩwɩlʋ sɩ-n bɩɛlʋʋ phãphãphã a hana sɩ hʋɛ sɩ yɩ nɩ, dɩ ka anɩ ha pɛ ɓɔrnɩ gɩ tɔ gɩ pɛr. ¹¹ Thãgbaa thɛthɛɛkɛ dɔnɩ asɩ Thɩ, na asɩ Kɔ̃tɩ̃ Jeju n phɛla sɩ hʋɛ sɩ pɔ anɩ pa. ¹² Sɩ ado nɛr gɩ, Kɔ̃tɩn n dɛ̃ɛ nar anɩ naʋʋkɛ nɩ hananɩ kha bɩɛlbɩɛl na tɩbɩla fɛʋra, gɩ kɔ̃tɩ̃ ga-n pɛr gɩ ha mɔ̃kɛ asɩ naʋʋkɛ sɩ hana narnɩ hanɩ. ¹³ A cʋʋ nɩ nɩ tɩ, nɩ phu, na hana dɩ paar Thãgba asɩ Thɩɩ ƴɛra fɩɩʋraka’, bɔɔkɛ asɩ Kɔ̃tɩ̃ Jeju na birni na ɩ̃ nakha ɔɔ tɩɩ phusɔ.

¹ Ado gɩrɛ sɛnɩ gɩ omɩna, nɩ nɩɛrɛ mɔ̃ sɩ-n dɩɩr nɩnɩ dɩ gɩ teenanɛ na-n ɩrɛ ga-n da Thãgba haar, dɩɩ dorakɛ gɛr nɩ-n cʋʋ gɩrɛ, sɩ-n bɩɛl nɛr dɩ sa-n phʋʋrna nɩ na Jeju Kɔ̃tɩnɩ i, dɩ na-n ɩrɛ hʋɛrara na bãbar. ² Nɩ jɩrɛ dakha mɔ̃ so ca ʋrɛ Jeju Kɔ̃tɩn kɔɔ ha sɩnɩ dɩ sɩ ha nɩ hanɩ. ³ Gɩrɛ Thãgba n ƴaalnɩ gɛr dʋɔn anɩ kpɩɩ lee sopugora; gɛr dʋɔn nι hʋnɔnɛ na bɔdɛl cʋʋrɛ; ⁴ gɛr dʋɔn nɛrɛ fɛʋ bɩɛlbɩɛl n jɛ mɔ̃ na fʋnι anιbara, anι tomι n do daphuu, na thɩ̃ɛɛkɛ na hananɔnι cʋrɛ. ⁵ Dι na-n do thɩ̃ puu ƴaalɛɛkɛ n hərəneni tibil na-n fʋ nι, mɔ̃kɛ gι-n hanι thιldararaakɛ na jɛnι Thãgba gaaga; ⁶ gɛr dʋɔn tibil na-n tagιrι ɔɔ omi, agιbo a na-n pιɛraa hara thιɛna ga, gιdonι Kɔ̃tιn na tiire helu ga thɩ̃sɔraale fɛʋ mɔ̃kɛ sι kɔɔ maanι so nar a kpãkpaanɔ. ⁷ Gιdonι Thãgba na kɔɔ we sι thɩ̃ bise cʋʋrɛra ga, sι sι pho. ⁸ Gɛr gι ʋrɛ bɔnι sorιkɛ ga do tibil a boa’, sι Thãgba a bo, ʋrɛɛkɛ hana sιnι ɔɔ Thu Phuu. ⁹ Sι ado gιrɛ dɔnι omi naar gι, ma laar na khere nar dιkha bã, gιdonι Thãgbaa thɛthɛ dιrɛ nι ayι, na-n na khasɔ bιɛlbιɛl. ¹⁰ Dι gɛrra dɔrakɛ gιrɛ nι-n cʋʋnι gɩrɛ omɩnasɔra fɛʋʋkɛ hanι Masedʋan dιιra koo, sι sι-n phʋʋr nɛr omɩna, dɩ na jɩɩ bãba gɩ jɔ mɛ̃. ¹¹ Nɩ yɩra a tɔɔ mʋmʋr, na-n jɩɛ ɔ anɩ thɩ̃sɔra bɔɔbɔɔ, na-n gbuo yʋʋ anɩ nyɛ̃kɩɛr thɔna, mɔ̃kɛ sɩ kɔɔ dɩɩr nɩnɩ. ¹² Dɩ mɛ̃ na hana fɩlɛɛkɛ bʋɔnɔnɩ wɩrɛ na dɔnɩ ha pɛdara gaa thɩ̃thɩɩn, gɩ do nɔɔ dakha na too na-n therna tibilə’. ¹³ Omɩna, ado wɩrɛ daarɛnɩ daanɩkɛ dɔnɩ khir gɩ, sa-n ƴaal na-n jɩ mɔ̃ gɩ hanaa ga, na-n bɩ nɩ ho wɛkɛ na hananɩ nũ pɛraa ga. ¹⁴ Gɩdonɩ mɔ̃ sɩ pɛrnɩ haar gel dɩ Jeju kɔɔ khire sa bir a ɩɩr a the khirera, mɛ̃ sɩ jɩ dakha ga har na wɩrɛ pɩɛrnɩ Jeju haar sa daar, Thãgba na kpa wɛr dɩ wa ɩ̃ kha na Jeju. ¹⁵ Nɩ yɛ gɩrɛ sɩ-n mɩɩ nɩnɩ mɔ̃kɛ Kɔ̃tɩn sonɩ, sɛr yidaraakɛ na sɛnɩ Kɔ̃tɩnɩ ɩ̃ bɔɔ, wɩrɛɛkɛ daarɛnɩ daanɩkɛ dɔnɩ khir sa kɔɔ kʋʋl wɩ ƴɩɛ a na jʋʋna’. ¹⁶ Gɩdonɩ Kɔ̃tɩnɩ thɛthɛ na ther Thãgbaa dʋɔ a na-n gbũ, dɩ nɔ khɩɩr na phaan, wa nɩrɛ Thãgbaa thɔ̃thɔ̃daar thu kɔ̃tɩ̃ɩ nɔ, dɩ dakha Thãgbaa tutuu na ʋnɛ, le wɩrɛ pɩɛrnɩ Kirisiti haar sa khiir na kɔɔ ɩɩr cacaca a na the khirera. ¹⁷ Agɩpɩ dɩphã sɛr yidaraakɛ na sɛnɩ, Thãgba na və̃ ser kha na wɛr dɩ sa gbɛbɩ kha kãkɛ ndɔlɔ̃pana hanɩ, gɩ do le sɩ caan Kɔ̃tɩn thãgbara ƴũ. Mɛ̃ na dɔ asɩ too sa toonɩ kha waa khorr na Kɔ̃tɩn. ¹⁸ Gɛr gɩ nɩ gba thɩmɩaakɛra a na ƴɔlana kha haar bɩɛlbɩɛl.

¹ Sɩ omɩna, ado bɔɔkɛ ga donɩ wer na wireekɛ ga donɩ, ma laar na khere nar ga thɩmɩa’, ² gɩdonɩ nɛrɛɛ thɛthɛrakɛ jɩɛ jɩ dɩ Kɔ̃tɩnɩ wi na daan mɔ̃ yu n ɩnɩ dɩtɩnɔ. ³ Ɔbɔɔkɛ tɩbɩla na sonɩ nayι: Ha ιι hale; wo: Thɩ̃ɛ bɔrɛ dιphã waa. Liir bũburone na phuro wi dapaara mɔ̃ wallɛ n phũroni khɛ pɛmɛdaar, gι do wa yι for paar bã. ⁴ Sι ne wer omιna, na ha dabirəra Wi caale n phuroni mɔ̃ yu n phuronə’. ⁵ Nɛrɛ fɛʋ, nɛr dʋɔn dahιrɛdara na dιwιldara, sa ha kha dιkha na dιtɩnɛ dɩ dabirə ga. ⁶ Dɩ gɛr gɩ sa-n daar wɛɛ kha ga, sɩ sa-n jʋrɛ a hanana dakha dɩbara fʋrɛ. ⁷ Gɩdonɩ wɩrɛ n daarɛnɩ dɩtɩnɔ wɩ-n daar, dɩ wɩrɛ taan n kʋnɩ dɩtɩnɔ gɩ-n kʋ wɩ. ⁸ Sɩ sɛrkɛ dɔnɩ dɩwɩldara sɩ hanana dɩbara fʋrɛ, a dɔ wɩrɛ tʋɔnnɩ ha pɛrɛ na naʋ kũkũ kɛɛ the khaa, a subo dakha taa ’lɛ nũ pɛrɛ the kpɛ khaa. ⁹ Gɩdonɩ Thãgba na kɔɔ thɩɩn sɩ sɩ lona ɔɔ nĩkhirə ga, sɩ sɩ ’lɛ taarɛɛkɛ thɛnɩ asɩ Kɔ̃tɩ̃ Jeju Kirisitira, ¹⁰ kɛ kɔɔ khe sarnɩ, dɩ mɛ̃ ado sɩ hananɛ yire, ado sɩ daarɛ, sɩ sa hananɛ kha yire na ɔr. ¹¹ Gɛr gɩ na-n mɩa kha yɩr thɩmɩa bɩɛlbɩɛ̃l, ʋ n tɔ ʋ a na-n jalna ƴɛ kʋʋlɔ mɔ̃kɛ nɩ-n cʋʋnɩ gɩrɛ. ¹² Omɩna, sɩ-n bɩɛl nɛr dɩ na hana cʋrɛ wɩrɛraakɛ n gbũgbuloneni anɩ thɩ̃thɩɩn, kɛ dɔnɩ anɩ ƴɛ kʋʋldara, dɩ wa-n dɩɩr nɩ fɩlɛ Kɔ̃tɩnɩ hʋra. ¹³ Na-n cɔ wɩ dakɔ̃tɩ̃ɩ na naʋʋkɛ hanɩ phãphãphã gɩ do awɩ thɔ̃ dɔ nɔɔ. Na-n tɔ̃ɔ kha na ha ɩɩ. ¹⁴ Sɩ-n phʋʋr nɛr dakha omɩna, na-n kpãkpaanɛ khãkhalala, na-n hana ha phaadara ’lar, na-n bulo wɩrɛ yɔɔnɩ, na-n hana ha fʋrɛ na tɩbɩla fɛʋ. ¹⁵ Na-n jɩɛ hɩɩn dɩ a tibil cʋʋ ʋ̃ tibil puure a na-n bir lɩmʋʋ puurə’, sɩ bɔɔ fɛʋ anɩ hara na tɩɩ kpɩɩsɔra fɛʋ, na-n yɩrana bɔ cʋʋrɛ. ¹⁶ Na-n hana daʋ wire fɛʋ. ¹⁷ Na-n bɩɛlnɛ Thãgba tɔ̃tɔ̃tɔ̃. ¹⁸ Na-n fʋɔrɛ Thãgba thɩ̃ɛ wo thɩ̃ɛ fɛʋra a gɩ ha mɔ̃, gɩdonɩ gɛr dɔ gɩrɛ Thãgba n ƴaalnɩ anɩ pa, nɛrkɛ hanɩ Jeju Kirisitira. ¹⁹ Na-n khiir Thu Phuu dɔa’. ²⁰ Na-n beesi Thãgba tukɩr tirə’, ²¹ sɩ nɩ mɩɛnɛ thɩ̃ɛ fɛʋ na hɩnɛ, sɩ na fʋɔr gɩrɛ bʋɔnɔnɩ. ²² Nɩ hʋnɔnɛ na thɩ̃ puu caar dɩɩdɩɩ fɛʋ. ²³ Thãgbaakɛ ha ɩɩ n thernɩ, ɔɔ thɛthɛ n lea nɩ kpɩɩ koo nɩ phu, dɩ anɩ thɛthɛɛ tɩɩ dorakɛ koo: Thue, na haar, na tomɩr n jɩɩ too gɩ ’lee dɩ paar, gɩ dana wireekɛ asɩ Kɔ̃tɩ̃ Jeju Kirisiti na birni na ɩ̃. ²⁴ Ʋrɛɛkɛ wɛ nɩnɩ sobɔdaar a dõ, dι ɔrra dakha na cʋɛ gι. ²⁵ Omιna, nι bιɛlnɛ Thãgba na pɛ sar. ²⁶ Nι fʋɔrɛ omιna fɛʋ na ha lõ fʋɔrɛ. ²⁷ Kɔ̃tɩnɩ i mι gba dɩ ma-n kpãkpaana nar, nɩ sɔ sɛbɛɛkɛ omɩna fɛʋ n nɩɛ. ²⁸ Asɩ Kɔ̃tɩ̃ Jeju Kirisiti na-n jɛ nɩ bʋɔra.