1 PƖƐR

¹ Mɛr Pɩɛrɩkɛ dɔnɩ Jeju Kirisitii thɔ̃thɔn thɔna sɛbɛɛkɛ a ha nɛrɛɛkɛ Thãgba phiirni, kɛ bɩ̃bɩlanɛnɩ gɩrɛ a do kpakpala Pɔ̃, na Galasɩ, na Kapadɔsɩ, na Ajɩ, na Bitini. ² Thãgba Thɩrɛ kɔɔ phire ni dɩɩ do ɔɔ thɩ̃ mãa jιra gι ɩhe, Thu Phuu n lee nɩ kpɩɩ, na-n nι Jeju Kirisiti nũu, ɔɔ tɔmɩ̃ dakha na-n jɛbɩ nar. Thãgba na-n jɛ nɩ bʋɔra jɔɔ, a na-n hana nɩ dakha ha ɩɩ jɔɔ. ³ Thãgba asɩ Kɔ̃tɩ̃ Jeju Kirisitii Thɩ hɩna khɩɩrɛ, ɔɔ bɔ dona kɔ̃tɩnaakɛ a bironi kɔ̃ sɩ wo dɩɩ do Jeju Kirisitii khi ɩɩrra gɩ the, dɩ sa hana nũ pɛ yire, ⁴ dɩ sa ’lɛ dakha thɩ̃ɛɛkɛ na punoneni na kʋɛa’, ga puno dakha na bisə’, bɔɔkɛ gɩ bɔrnɩ ga puno wo a na deba’, dɩ Thãgbaa dʋɔ gɩ thɩɩn anɩ thɩɩn, ⁵ nɛrɛɛkɛ pɩɛrnɩ haar dɩ Thãgba na-n bɛr nɩ na ɔɔ fãga nɩ puno nɩ ’lɛ taarɛɛkɛ na yɩranɩ dɩphã pɩpɩɩ bɔɔ. ⁶ Dɩ nɩ hana garɛ kãkar sɩrakɛ gɩ teenanɛ bɔɔ gbe nɩ yɛ bɔ gaar caar dɩɩdɩɩkɛ n hana nɩnɩ gbobire, ⁷ gɩ mɩɛ anɩ ha pɛ gɩ hɩɩn, kɛ ɔɔ the nɔ khɩɩrnɩ a jɔ dɛɛkɛ n kʋɛanɩ, kɛ wɩ-n gbanɩ dɔɔ dɩ wɩ mɩɛna hɩɩn, thale anɩ ha pɛ na hana khɩɩrɛ, a na do i dʋbɩ thɩ̃ɛ, na cʋ thɩ̃ɛ bɔɔraakɛ Jeju Kirisiti na-n mɩ. ⁸ Nɩ-n naarɛ sɩrakɛ na kɔɔ yɩa’, na yɩɩnɩ gɩra’, sɩ nɩ pɩɛrɛ haar, dɩ daʋʋkɛ na hanɩ mɩɛrɛra ga a kɔ̃tɩ̃ dakha ka n fʋ nɛr; ⁹ gɩdonɩ gɩrɛ na ’lɛnɩ anɩ ha pɛra pɩpɩɩ paar dʋɔn anɩ thɛthɛɛ taa. ¹⁰ Thãgbaa bobonaakɛ kɔɔ mɩanɩ bɔ jɩɩrɩdaakɛ Thãgba na jɩ nɩnɩ, kɔɔ ƴaalɛ ka a ’lo wɩ jɩ mɔ̃ taarɛɛdaalera hanɩ. ¹¹ Kirisitii Thuukɛ hanɩ awɩ bɩnɔ kɔɔ mãa mɩɩrɛ Kirisitii bɔ gaarda na i dʋbɩrɛɛkɛ na kpa garnɩ, a mɩɩ wɛr dɩ wa-n ’lo wɩ jɩ bɔ ca dɔɔkɛ gelela na danɩ na mɔ̃ ga hanɩ. ¹² Thãgba kɔɔ nɩ warɛ dɩ ga do wɛr na ’lɛ ga thɩ̃ɩlera wɩ-n mɩɩna’, sɩ anɩda gɩ. Dɩ nɛnɛ̃, wɩrɛ n mɩanɩ tutugo bʋɔ na Thu Phuu fãgaakɛ thɛnɩ ƴũ kɔɔ mɩa nɩ ga thɩ̃ɩle. Dɩ Thãgbaa thɔ̃thɔ̃daar thusɔ yɛrɛrakɛ n ƴaalɛ wɩ kpu wa-n hɩɩn ga thɩ̃ɩlera. ¹³ Gɛr gɩ nɩ fɔ dɩbara anɩ kpɩɛrra, a na jʋrɛna, a na pɩɛrna bɔɔbɔɔ bɔ jɩ khaardaakɛ na ’lɛnɩ bɔɔraakɛ Jeju Kirisiti na ɩnɩ. ¹⁴ Mɔ̃kɛ nũ nɩdara n hanɩ, nɩ hana ɔmɛ̃. Na-n bir na hana thɩ̃ puu ƴaalɛɛkɛ n kɔɔ kɔ nɩnɩ thuee fɩl, mɔ̃kɛ nɩ kɔɔ hana gɩnɩ mamara bɔɔraakɛ nɩ kɔɔ donɩ yʋ ’leedara ga. ¹⁵ Sɩ mɔ̃kɛ ʋrɛɛkɛ kɔɔ wɛ nɩnɩ donɩ Tɩɩ phuu, nɛrɛ dakha nɩ deba a dɔ tɩɩ phuusɔ anɩ fɩlla fɛʋ. ¹⁶ Gɩdonɩ gɩ kherere Thãgbaa sɛbɛra ayɩ: “Nɩ pho gɩdonɩ mɛrɛ Tɩɩ phuu ha mɩ.” ¹⁷ Ado nɩ-n wer ʋrɛɛkɛ na-n hɩnɛnɩ tɩbɩla dɩɩdɩa’ Thɩrɛ, kɛ dɔnɩ ʋrɛ na kɩlɛnanɩ tɩbɩla fɛʋ bɩɛlbɩɛl mɔ̃ awɩ thɔ̃ hanɩ, a nɩ jɩ na-n jɩɛ ɩɩr na maar anɩ yi hanana kɛ thɩɩra. ¹⁸ Gɩdonɩ nɩ jɩrɛ dɩɩ do, ga do thɩ̃ kʋɛnaakɛ dɔnɩ war na dɛ Thãgba kɔɔ birsena nɩ anɩ thɩthɩsɔɔ də̃bəəl fɩllaakɛ nɩ hanana’, ¹⁹ sɩ Kirisitii tɔmɩ̃ɩkɛ dɔnɩ thɩ̃ kʋkʋʋ tə̃ə gɩ, mɔ̃kɛ a donɩ bana biikɛ na hananɩ taana’, aa hana dakha jiinə’. ²⁰ Thãgba kɔɔ mãa phiirəə kɛkɛkɛ sɩ thɩɩkɛ na fʋ tir pa’, sɩ pɩpɩɩ bɔɔkɛ a gbaarɛ nɩna dɩphã dɩɩ do anɩda dɔ nɔɔ. ²¹ Ɔr dɔ nɔɔ nɩ pɛrɔnɩ gɩrɛ Thãgba haar, kɛ kɔɔ cʋgɛɛnɩ dɩ ɩɩr a the khirera, a cʋʋnaa dakha dɩ ’lɛ i dʋbɩrɛ, dɩ mɛ̃ anɩ ha pɛ na anɩ nũ pɛ na ha Thãgbara. ²² Anɩ nũukɛ nι-n nιnι sobɔr, gι cʋʋ nɛr dι nι phu na-n jιι na anι omisɔɔkɛ nι donanι kha ha pɛdara na naʋʋkɛ huloneni; na-n jιɛ na kha bɩɛlbɩɛl sobɔr na haar fɛʋ, ²³ nɛrkɛ Thãgba birni kɔ̃ kɔ̃ phaa sɩ ga do thɩ̃ diir kʋɛsʋ kɔna na’, sɩ thɩ̃ diireekɛ na dɔnɩ dakʋɛnaa gaa gɩ, kɛ dɔnɩ Thãgbaa thɩmɩɩkɛ hananɩ yire, a dona dakha khorrdaa. ²⁴ Gɩdonɩ gɩ kherere Thãgbaa sɛbɛra ayɩ: “Tibil hʋrɛ hʋɔn, dɩ ɔɔ ɓɔ̃ ɓibi ho hɔ̃ phɩ̃ɩ. Hʋɔn n khɩrɛ dɩ phɩ̃ɩ n jɛ, ²⁵ sɩ Kɔ̃tɩnɩ thɩmɩɩ khorr gɩ ha.” Dɩ ga thɩmɩɩlera dɔ tutugo bʋɔɔkɛ kɔɔ mɩa nɩnɩ.

¹ Gɛr gɩ nɩ dɔna bɩ̃ kpallɛ fɛʋ a faa, na fɩɩlɛ fɛʋ, na bɩnɛ yenyɔ fɩlɛ, na gbugi, na tɩɩ kuere ɓibi; ² sɩ na-n ƴaalɛ na gbɛ̃gbɛrɛnɛ ilẽ bʋɔɔkɛ dɔnɩ Thãgbaa thɩmɩɩ mɔ̃ bibɔrɔsɔ n ƴaalnɩ ɩlɛ̃, gɛr na khɔnɔ na dana taarɛ, ³ gɩdonɩ “nɩ jɩrɛ Kɔ̃tɩnɩ bɔɔkɛ a bɔrnɩ.” ⁴ Na-n wɔrɔnɛ ɔr thɛthɛɛkɛ dɔnɩ boka yireekɛ tɩbɩla kɔɔ bonɩ, sɩɩ do thɩ̃ɛ a do waa gel Thãgbara dɩ phiiruu. ⁵ Dɩ nɛrɛ dakha mɔ̃ nɩ donɩ boka ye, nɩ dɔ Thãgba n gba nɩ a na-n mɩna cʋɔrɩkɛ dɔnɩ ɔɔ Thuuda, nɩ doro bonɩ jida phuusɔ na-n ji bonɩɛɛkɛ dɔnɩ Thudaa, kɛ n danɩ Thãgba haar, gɩ do Jeju Kirisiti dɔ nɔɔ. ⁶ Gɩdonɩ gɩ kherere Thãgbaa sɛbɛra ayɩ: “Hɩnɛ, mɩ thɩɩnɛ Sɩyɔna go tɩ bokaar, kɛ dɔ marnɩ thɩ̃ɛ waa gel dɩ ɩ̃ phiir. Dɩ ʋrɛ pɩɛrnɩ haar ɔrra, ga ɩ̃ kpɩɩrakɛ a na dʋʋraa yicuruə’.” ⁷ Nɛrkɛ wer pɩɛrnɩ haar, a do narɛ daɓʋ̃ɔ ka, sɩ ado wɩrɛraakɛ na-n pɩɛrnɩ haara gɩ, Thãgbaa sɛbɛ sor ayɩ: “Bokaarɩkɛ cɔ mɛ kɔɔ bonɩ a do, sɩɩ do ɔr deba a do go tɩ bokaar.” ⁸ Wo: “Nɛ bara bokaar gɩ a dona nɛ bara gbãgbaan.” Wɩ-n berore nɔɔ gɩdonɩ wɩ nʋʋrɛ Thãgbaa thɩmɩɩra nũu dɩ ga thɩɩn wɩ kɔɔ thɩɩn wɩrakɛ. ⁹ Sɩ ne wer, nɛr dɔ caarɩkɛ Thãgba phiirni, a dona Fãgadaarɩ bonɩ jidara, nɩ dor ɔɔ tibilsɔɔkɛ phonɩ, na ɔɔ tookɛ a hɩnɩ, gɩ do nɔɔ na-n mɩɩ ɔɔ nɔ kpaa thɩ̃ cʋʋ, ɔrkɛ wɛ nɩnɩ dɩ nɩ the dabirəra a lõ ɔɔ nɔ kpaa dahɩrɛra. ¹⁰ Nɛrkɛ mamara na kɔɔ dɔnɩ ɔɔ toa’, nɩ dor nɛnɛ̃ Thãgbaa too; nɛrɛɛkɛ na-n kɔɔ yɛnɩ bɔ jɩɩra’, sɩ nɛnɛ̃ Thãgba jɩ nɛr bʋɔra. ¹¹ Nɛrkɛ mɩ-n nanɩ, nɩ jɛna kpakpala ha nɩ dɩ nɩ dona kpãkpara, gɛr gɩ mɩ-n kpãkpãa narɛ nɩ faa thɩ̃ puu ƴaalɛɛkɛ n kɔ nɩnɩ thue, kɛ n kɛ̃kɛrɛnanɩ thudaa. ¹² Na-n hana fɩl bʋɔ thɩldaraa thɩ̃thɩɩn, dɩ thɩ̃ dooraakɛ wɩ-n kue nini dɩɩ ho puu cʋʋdara ha nɩ, wa ƴɩrɛ anɩ thɔ̃ bɔ wa-n khɩɩ Thãgba wireekɛ a na birni na kher nɩ. ¹³ Kɔ̃tɩn dɔ kɩrʋ, gɛr gɩ nɩ jɔ dɩbara ƴɛ kʋlasɔraakɛ fɛʋ tɩbɩla pɛrnɩ, a gobanɛrɩkɛ dɔnɩ yʋʋ gɩ, ¹⁴ ado fãgadara wɛɛkɛ a pɛrnɩ wa-n heene puu cʋʋdara sor sɩ na khɩa bɔ cʋʋdara; ¹⁵ gɩdonɩ gɩrɛ Thãgba n ƴaalnɩ dʋɔn na-n hana fɩl bʋɔ ga-n khaan dəbələəkɛ na-n jɛnɩ gɩrɛ wɩ-n mɩɩna’ nʋɔ. ¹⁶ Na-n ɩrɛ mɔ̃ nɩ donɩ waɩa, sɩ na-n gba wa dʋʋrɩle a phiro sɩ na cʋʋ gɩrɛ puuronə’, sɩ nɩ ka na ɩrɛ mɔ̃ nɩ donɩ Thãgbaa thɔ̃dara. ¹⁷ Na-n cɔ tɩbɩla fɛʋ; na-n na omɩna; na-n ma Thãgba; na-n cɔ fãgadaar. ¹⁸ Thɔ̃dara na-n jɔ anɩbara anɩ kɔ̃tɩ̃sɔra na maar, ga do kɔ̃tɩ̃ bɔɩra na hɛlɛlɛ fɩldarara dɩbara ga, sɩrakɛ na wɩrɛraakɛ awɩda khɩɩrnɩ. ¹⁹ Ha fʋʋr bɔ gaarɛraakɛ tibil n yɩnɩ sɩ ga-n do ɔɔ pa dɩɩ tha’, sɩɩ do Thãgba a-n nana, gɛr n da Thãgba haar. ²⁰ Gɩdonɩ anyee bɔ ca na yɩrɔ ado nɩ cʋʋ sopugo dɩ bɔ gaarɛ ɩ̃ a thʋ nɩ? Sɩ ado nɩ ka na cʋʋ bɔɔ dι ga ιna nar bɔ gaarɛ dι nι fʋrɔ haar, gɛr n da Thãgba haar. ²¹ Gιdonι gelela Thãgba ka we nar, gιdonι Kirisitii thɛthɛ dakha kɔɔ gaarɛ bʋɔ anι sora a nι nar fιlɛɛkɛ na phɛlnι gι do nɔɔ na-n ’loro ɔɔ nɛkara. ²² Ɔr dɔ ʋrɛɛkɛ na kɔɔ cʋɛnι sopugoə’, dι fιιlɛ dakha na kɔɔ the ɔɔ nɔa’. ²³ Ɔr dɔ ʋrɛ wι-n kɔɔ nιιrnι sι aa-n bir dι nιιra’, a-n kɔɔ gaarnι bʋɔ sι aa kɔɔ so tibilə’, sι a kɔɔ faa gɛr a ha ʋrɛ n kιlɛnι kιιl sarʋ. ²⁴ Ɔr thɛthɛ dɔ ʋrɛ kɔɔ heenenι asι sopugosɔ ɔɔ thɛthɛɛ tomιra thιrʋra, gι do nɔɔ gι do nι khire sopugo cʋʋrɛra sa hana yire dιι do fιl sardaa. Ɔɔ kho sɛɛkɛ a ’lɛnι dɔ asι kho kpɛɛda. ²⁵ Gιdonι nι kɔɔ hor banaakɛ bureni, sι nɛnɛ̃kɛ nι kɛrrɛ bir khekheraakɛ dɔnι ʋrɛ n bɛranι anι thu.

¹ Mɛ̃ gι ha dakha na nɛr khɛra, na-n jɔ anιbara anι kora, gι do nɔɔ a ιkhasɔ halerakɛ a na nι Thãgbaa thιmɩɩ nũə’, sɩ fɩlɛɛkɛ awɩ khɛr hananɩ ga cʋʋ wɛr dɩ wa pɛr haar, sɩ ga dorakɛ khɛr mɩa thɩ̃a’; ² sɩ gɩdonɩ wɩ-n yɩrɛ mɔ̃kɛ nɩ hananɩ fɩl phuu na cʋʋr. ³ Na-n barana yʋ lɩɩr, na dɛ thɩ̃ tʋʋr, na kẽkẽ ɓɔ̃ tʋʋr mɔ̃ na bɔrnɩ hɩɩnɛna ga, ⁴ sɩ nɩ dɔ anɩ biir cʋʋ n do hadaa, kɛ dɔnɩ hɛlɛlɛ fɩlɛ, a ha jɔjɔjɔl ga do dakʋɛnaa ga, gɩdonɩ gɛr dɔ thɩ̃ kɔ̃tɩ̃ɩ Thãgbaa ƴɛra. ⁵ Mɛ̃ khɛ bɔɩɩkɛ mamara n kɔɔ pɛnɩ Thãgba nũu n kɔɔ gbɛbɩ awɩ biir, mɔ̃ wɩ-n jonɩ dɩbara awɩ kora. ⁶ Thale Sara kɔɔ ha. A kɔɔ nɩrɛ Abɩraham nũu a thʋ̃ da-n wɩɩ kɔ̃tɩn, dɩ ɔɔ bikhɛrsɔ nɩ debi do gɩrɛ ado nɩ-n cʋʋrɛ bɔɔ, ado dakha thɩ̃ bιɛl na-n cʋʋ nɩ dɩ maar na-n fʋ na’. ⁷ Mɛ̃ gɩ dakha na nɛr kona, na-n jɩɛ too kha bɔɔbɔɔ na anɩ khɛr mɔ̃ a donɩ tibilikɛ yɔɔnɩ a jɔ nɩ, na-n cʋɔnɛɛ mɔ̃kɛ nɩ bulni kha khaardaakɛ dɔnɩ yireekɛ thɛnɩ Thãgbara, dɩ mɛ̃ thɩ̃ɛ na bãbarã anɩ Thãgba bɩɛla’. ⁸ Ɩ̃ thɩmɩɩ kpa pa dʋɔn: Na-n hana kpɩɛrnɔ bɩɛl, na-n hana pəpər haar, nɩ dɔ omi naar, na bɔ jɩɩr, na dɩbara jor n hi ni haarra. ⁹ Na-n gba puure a lɩmɩ puurə’; a tibil nɩɩr nɩ na-n bir nɩɩrʋa’, sɩ nɩ ka na bɔnaa, gɩdonɩ gɛr Thãgba we nar dɩ mɛ̃ na ’lɛ dakha bɔnanɛ. ¹⁰ Dɩ Thãgbaa sɛbɛ sor ayɩ: “Ado tibil hale a na yi hananɛ, a ƴaal dakha wi bʋɔ na-n phana nar, dɔ ntɛ n fʋ ɔɔ delẽbi thɩmɩɩ puu mɩɩrɛra, na ɔɔ nɔfa fɩɩlɛla. ¹¹ Dɔ a hʋnɔna puure, sɩ a na-n cʋʋ bɔɔ. Dɔ ha ii ƴaalɛ n do ɔɔda a na-n gbuuro yʋʋ. ¹² Gιdonι Kɔ̃tιn n gar ɔɔ yi tιι sarara, dι a-n pɛr dakha awι bιɛl nũu, sι Kɔ̃tɩn n fire khiru di pɛ wɩrɛraakɛ n cʋɛnɩ puure.” ¹³ Amɛ na hʋɔlɛ nar ado na cʋʋ thɩ̃ bʋɔɔkɛ n kɔ nɩnɩ thue? ¹⁴ Adorakɛ na gaar bʋɔ gɩrɛraakɛ saranɩ, sɩ bɔnadaa gɩ do nar. Na-n ma gɩrɛɛkɛ tɩbɩla n mana’; na-n do haar na-n jẽ nɩ fɩɩʋraka’. ¹⁵ Sɩ na-n cɔ Kirisiti Kɔ̃tɩ̃ cʋʋr le anɩ hara. Nɩ tɔɔ ga too a na nɛna tibilikɛ n bulene nini kɩrʋ nũ pɛrɛraakɛra nɩ hananɩ, sɩ na-n cʋɛ na hɛlɛlɛ fɩlɛ na maar. ¹⁶ Na-n hanana dakha kpɩɛrnɔɔkɛ na heene nɩnɩ sora’, dɩ thɩ̃ dooraakɛ wɩ-n kue nini dɩɩ ho puu cʋʋdara ha nɩ, anɩ fɩl bɔɔkɛ nɩ hananɩ Kirisitira na pɛ warɛ yicuru. ¹⁷ Gaarɛ thɩ̃ bɔ cʋʋrɛra, ado gɛr n da Thãgba haar, gɩ baar gaarɛ puu cʋʋrɛra. ¹⁸ Gɩdonɩ Kirisiti dakha kɔɔ khire asɩ sopugora babɩɛl, ɔrkɛ saranɩ khe sɛrɛraakɛ na sarana’, dɩ a na kpa sɩ na ha Thãgba. Wɩ kɔɔ kʋrɛ ɔɔ tomɩ wer, sɩ Thue pallɛ ɩɩr na yire. ¹⁹ Thueelera a jalna a mɩɩ thuesɔɔkɛ hanɩ khaɩra mɔ̃ thɩ̃ɛ hanɩ, ²⁰ kɛ dɔnɩ wɩrɛ kɔɔ nʋrɛnɩ nũu mamara bɔɔraakɛ Thãgba fʋnɩ haar ƴɛrr Noee bato cʋʋ bɔ, kɛ tɩbɩla fɩɩʋ kɔɔ lʋʋnnɩ, a thɩɛna gaa tɩbɩla makõther wɛ, a kɔɔ taa nyʋɔnna. ²¹ Gɛr n hʋɔn kha na yɔ kpɛɛrɛɛkɛ n taa nɩnɩ nɛnɛ̃, dɩɩ do Jeju Kirisitii khi ɩɩrra gɩ the, dɩ yɔ kpɛɛrɛɛle ga do tomɩ jiin yɔ hʋr ga, sɩɩ do kpɩɛr tir gɩ Thãgbaa ƴɛra, mɔ̃ sa hananɩ kpɩɛrnɔɔkɛ na heene sɩnɩ sora’. ²² Jeju Kirisitira kɔɔ jʋʋnɛ Thãgbaa dʋɔ a too Thãgbaa nyɔ̃bɔra, ɔr dɔ ʋrɛ punoneni thɔ̃thɔ̃daar thusɔ, na fãgadarasɔ, na punodara dɩ wɩ jʋʋraa.

¹ Gɛr gɩ gɩdonɩ Kirisiti kɔɔ gaarɛ bʋɔ tomɩrra, nɛrɛ dakha nɩ hana ga kpɩɛr ca, gɩdonɩ ʋrɛɛkɛ gaarɛnɩ bʋɔ tomɩrra a-n sɩrɔrɛ sopugo cʋʋrɛ. ² Thɩ̃ puu ƴaalɛɛkɛ n kɔnɩ tibil thue ga-n do gɛr dɔ ɔɔ yi hana bã, sɩ mɔ̃kɛ Thãgba n ƴaalnɩ a-n hana fɩlɛ ɔɔ yirəəkɛ sɩɛraanɩ kɛkɛ thɩɩra. ³ Gɩdonɩ bɔɔkɛ kɔɔ kanɩ gɩ thʋnɛ dã mɛ̃ mɔ̃ nɩ kɔɔ cʋʋnɩ gɩrɛɛkɛ n kɔɔ danɩ thɩldara haar dɩ wa-n cʋʋ. Nɩ kɔɔ faarɛ dɩbara dakhaba cʋʋrɛra, na thɩ̃ puu ƴaalɛlaakɛ n kɔ nɩnɩ thue, na ta laarɛra, na gbõgolõ dɩko khorra, na ta yɔ kpãkpaanɛna, na thɩl kpal dɩɩrsɔra. ⁴ Dɩ wɩ yɩɛnɩ dɩɩ kpal war mɔ̃ na-n tuni na-n kpaarɛ kha na wɛr dakhaba thɩ̃ cʋʋ jɔjʋɔraalera bã wɩ-n kue ner; ⁵ sɩ wa mɩɩrɛ awɩda na ha ʋrɛɛkɛ tɔɔnɩ ga too sɩ a na-n kɩɩlna yidara na khe. ⁶ Gɛrra dɔ nɔɔ dakha dɩ Thãgbaa thɩmɩɩ kɔɔ mɩɩ wɩrɛraakɛ kɔɔ khenɩ, dɩ ga dor mɔ̃ awɩ tomɩ ’lɛnɩ kɩɩlʋ mɔ̃ wɩ donɩ tibil, awɩ thu na hananɛ yire mɔ̃ Thãgba hana gɩnɩ. ⁷ Thɩ̃ɛ fɛʋʋ khu pa wɔrɔnɛ, gɛr gɩ nɩ fɔ dɩbara, a na jʋrɛna, a na bɩɛlna Thãgba. ⁸ Sɩ gɩrɛ jɔnɩ thɩ̃ɛ fɛʋ dʋɔn na-n jɩɛ na kha bɔɔbɔɔ, gɩdonɩ naʋ n thire sopugo jɔjʋɔra. ⁹ Na-n tea kha kpakpaalɛ sɩ hũhuune na-n hala’. ¹⁰ Mɔ̃ nɩ donɩ wɩrɛ ’lɛnɩ Thãgbaa bɔ jɩ khaardasɔ dɩɩdɩɩ dɩ na-n dona thɔmaakɛ bʋɔnɔnɩ, dɔ nɛrɛ fɛʋ bɩɛlbɩɛl n gba khaardaakɛra nɩ ’lɛnɩ na-n bulnə ɩkhasɔ. ¹¹ Dɩ a tibil ’lɛ punone thɩmɩɩ mɩɩrɛra, dɔ a na-n mɩɩ thɩmɩaakɛ thɛnɩ Thãgbaa nɔɔ; dɩ a tibil ’lɛ punone thɔ̃ dʋʋrra, a na-n dɔ na Thãgbaa fãgaakɛ a haanɩ; dɩ mɛ̃ thɩ̃ɛ fɛʋra Thãgba na ’lɛr khɩɩrɛ, gɩ do Jeju Kirisitii pa gɩ the, kɛ hɩnanɩ i dʋbɩrɛ na fãga bɔɔ fɛʋ waa khorr vʋ̃ʋ. Amɛn. ¹² Nɛrɛɛkɛ mɩ-n nanɩ, na-n do gɩ kpal nar gɩ ho nar thɩ̃ phaa, dɔɔraakɛ nɩ hanɩ gɩrɛ dɩɩ mɩɛ nɩ dɩ ga-n hɩɩna’. ¹³ Sɩ nɩ ka na kãkanɛ mɔ̃ nɩ bulni kha na gaarɛɛkɛ Kirisiti kɔɔ gaarnɩ, gɩ do nɔɔ dakha na-n kãka na daʋ ɔɔ i dʋbɩ wirəəkɛ na phananɩ. ¹⁴ A Kirisitii i do kɩrʋ dɩ wa nɩɩr nɩ ga-n da nar, gɩdonɩ Thãgbaa Thuukɛ n nɛnanɩ mɔ̃ ɔɔ i dʋbɩ hanɩ ha narɛ. ¹⁵ Tibil nɛrɛra na-n gaar tɩɩ kʋdaar dʋʋrra ga, dɩ yudaar dʋʋrra ga, dɩ puu cʋʋdaar dʋʋrra ga, dɩ gɩrɛraakɛ na hɩɩrɛɛnaa ga, ¹⁶ sɩ ado Kirisitiida dʋʋrra gι, yicuru na-n fʋ nta’, sι a ka na khιa Thãgba ireraalera. ¹⁷ Gιdonι bɔɔkɛ Thãgba na kɔɔ fʋnanι ɔɔ too kιιlɛ gι daan; dι ado sɛr ga kɔɔ fʋna ɓo, wιrɛ na-n nιɛnι Thãgbaa tutugo bʋɔɔ thιmιι nũə’, mɔ̃ awιda na ha? ¹⁸ Gιdonι gι kherere Thãgbaa sɛbɛra ayι: “A gι sι fιιʋ sιι do tιι sarʋ na ’lɛ taara’, dι mɔ̃ ga ha ʋrɛraakɛ na-n therananι Thãgba ga a dona sopugodaar?” ¹⁹ Gɛr gι wιrɛ n gaarɛnι mɔ̃kɛ Thãgba tuur hanι na-n jalana awι bɔ cʋʋra a gbana awι ha na pɛ thɩ̃ Tidaar bʋɔɔ nyɔ̃kɔɔ.

¹ Mι sor wιrɛraakɛ dɔnɩ we gbɛbɩdaraa kɔ̃tɩ̃sɔ anɩ pa, mɔ̃kɛ mɩ donɩ dakha kɔ̃tɩn awɩ kha, a tor yire Kirisitii bɔ gaarra, a dona dakha ʋrɛ na buloni kha na i dʋbɩrɛɛkɛ na yɩranɩ, ² nɛrɛɛkɛ dɔnɩ kɔ̃tɩna mɩ so gɩrɛ ayɩ: Na-n khɛ Thãgbaa banaakɛ a pɛ narnɩ; na-n cʋʋ gɩ ho fɛrɛ pɛr ga, sɩ na-n cʋɛ na haar fɛʋ Thãgbara. Na-n khe wɩ warra ga, sɩ na-n khɛ wɩ na bɩ̃ bʋɔ. ³ Na-n cʋʋ thɩ̃ɛ na fãga wɩrɛraakɛ wɩ pɛ narnɩ na-n hɩna’, sɩ nɩ dɔ thɩ̃ nɩrɔrɛ banaana. ⁴ Dɩ ɔbɔɔkɛ bana khedaar kɔ̃tɩn na ɩnɩ na ’lɛr khor cacadaar dʋʋrra, kɛ dɔnɩ i dʋbɩrɛɛkɛ na dɔnɩ dakʋɛnaa ga. ⁵ Mɛ̃ gɩ dakha na nɛr daɓola, nɩ jɔ dɩbara kɔ̃tɩnana. Nɛrɛ fɛʋ bɩɛlbɩɛl anɩ cʋʋ para nɩ hanana kha dɩbara jor, gɩdonɩ Thãgbaa sɛbɛ sor ayɩ: “Thãgba n bãbaranɛ i ƴaaldara, sɩ a-n jɩrɛ dɩbara jodara bʋɔra.” ⁶ Gɛr gɩ na-n jɔ dɩbara Thãgbaa fãga nyɔ̃kɔɔ dɩ ɔr, a bɔɔ dã, a na ɩɩr nɛr. ⁷ Nɩ gba anɩ dɛsɔ fɛʋ a na faaraa gɩdonɩ ɔr dɔ ʋrɛ n hɩnɛ nɩnɩ. ⁸ Na-n jʋrɛ a na jɩɛ dʋ bʋrɛ, anɩ lãlaardaar Satã a-n kpaarɛ a ho sidũ’ũukɛ n huoneni, da-n ƴaalna ʋrɛ a na khonɩ. ⁹ Nɩ pɩɛrɛɛ kĩkĩ mɔ̃ nɩ jɩɩlnɩ kɩbɩ ha pɛrɛra, dɩ na-n jɛna gɩ dɩ bɔ gaar ca bɩɛlla anɩ omisɔ thɩɩraakɛ n yɩ. ¹⁰ Thãgbaakɛ bɔ jɩɩr fɛʋ n thernɩ, kɛ kɔɔ wɛ nɩnɩ nɩ bulo kha na ɔɔ khorr i dʋbɩ, gɩ the anɩ bɩɛl dora na Kirisiti, ado nɩ pɩ bʋɔɔkɛ nɩ-n gaarnɩ gɩrɛ bɔɔ gbe, a na cʋʋ nɛr dɩ na bɔr na ka, a na tɩ, a na hana dakha fãga, na ha tutugo paara’. ¹¹ Ɔr hɩna fãga bɔɔ fɛʋ waa khorr vʋ̃ʋ. Amɛn. ¹² Sɩlvɛ̃ɛkɛ mɩ-n wenɩ sobɔ omine, ɔr bulo mi dɩ ɩ̃ khere sɛbɛ buukɛ gɩ cʋʋ nι nι faa haar, ɩ̃ mιι nɩ dakha nɩ jɩɩ jɩ tue dɩ Thãgbaa bɔ jɩɩkɛra nɩ harɔnɩ bɔ jɩɩr gι gel, nι tɔɔ gar kɩbɩ. ¹³ We gbɛbιdaraakɛ hanι Babιlɔn, kɛ Thãgba phiirni anι kha, wι fʋɔr nɛr. Ɩ̃ bikuun Markɩ dakha fʋɔr nɛr. ¹⁴ Na-n fʋɔrɛ khasɔ na ha lõ fʋɔrɛ. Thãgba na-n hana nɛrɛ fɛʋʋkɛ hanɩ Kirisitira ha ɩɩ.