1 JÃ

1 JÃ

¹ Gιrɛ kɔɔ hanι kɛkɛkɛ fʋ paar, gιrɛ sɩ kɔɔ nɩɛnɩ, gɩrɛ sɩ kɔɔ yɩnɩ na asɩ yi dɩ sa-n hɩɩn, dɩ asɩ nyɛ̃ dakha kɔɔ tharrɔ, kɛ dɔnɩ yi thɩmɩɩ, gɛr sɩ khere nar. ² Dɩ yireele kɔɔ yɩrrɛ dι sɩ kɔɔ yɩ gɩ, dɩ sa-n mɩɩ sobɔ so jɩɩr, dɩ yire khorrɩdara sɩ-n mɩɩ nɩ, kɛ kɔɔ hanɩ Thɩrɛɛ pa sa yɩr sar gɩrɛ. ³ Gelela sɩ kɔɔ yɩnɩ a nɩɛna gɛr sɩ-n mɩɩ nɩ, dɩ mɛ̃ nɛrɛ dakha na do kha kũu bɩnɔ na sɛrɛ; dɩ ado sɛr gɩ sɩ dor kha kũu bɩnɔ na Thɩrɛ nakha ɔɔ Bikuun Jeju Kirisiti. ⁴ Dɩ sɩ-n kherere ga thɩ̃sɔɔkɛ dɩ mɛ̃ asɩ da na jɩɩ do daʋ na ka. ⁵ Dɩ thɩmɩɩrɩkɛra sι kɔɔ nιnι ɔɔ pa, dι sa-n mιι nι gιrɛ, gɛr dʋɔn Thãgba dʋɔn dahιrɛ, dabirə na haaraa fιιʋraka’. ⁶ Dι a sι so ayι, sι dor kha kũu bιnɔ na ɔr, sιι do dabirə sι-n jalna, sõsor sι kur, sa-n cʋʋ gιrɛ dɔnι sobɔra’. ⁷ Sι ado sι-n jaal na dahιrɛ mɔ̃kɛ ɔɔ thɛthɛ hanι dahιrɛra, ga dor sι kuune khasɔ bιɛlbιɛl dι ɔɔ Bikuun Jejuu tɔmɩ̃ na-n cɔcɔɔ sɛr sopugo ɓibi. ⁸ Ado sι so ayι, sa hana sopugoə’, ga dor dɩbara sɩ-n fɩɩl dɩ sobɔr na ha sara’. ⁹ Sɩ ado sɩ cã asɩ sopugosɔ, sobɔdaar Thãgba do, na fɩl sardaar, a na faa asɩ sopugosɔ na ha sɩ, sɩ a cɔcɔɔ sɩ asɩ thɩ̃ gõgolõ fɛʋ. ¹⁰ Dɩ ado sɩ so ayɩ, sa kɔɔ cʋʋ sopugoə’, ga dor sõsodaar sɩ cʋgʋʋ dɩ do, dɩ ga dor ɔɔ so na haan asɩ bɩnɔa’.

¹ Ɩ̃ bɩsã bi mɩ-n khere narɛ ga thɩ̃sɔɔkɛ dɩ na-n cʋʋ sopugoə’, sɩ ado tibil cʋʋ sopugo, sι hananɛ so ƴɛɛdaar Thιrɛɛ pa, Jeju Kirisiti fιl sardaar gι. ² Dι ɔɔ thɛthɛra dʋɔn bonι jirikɛ hɛlanι asι sopugosɔ, ga do asι sopugosɔ dιbara ga, sι tɩbɩla fɛʋ thιιraada dakha. ³ Ado sι-n hιιnɛ ɔɔ jɔfʋ, liir sa jιι jɩna dɩ sɩ jɩɩrɛ. ⁴ Tibilikɛ sɔnɩ ayɩ, ɩnɩ jɩɩrɛ sɩ aa-n hɩɩn ɔɔ jɔfʋa’, sõsodaar gɩ, dɩ dakha sobɔr na haaraa ga. ⁵ Ado tibil na hɩɩn ɔɔ so, ga dor Thãgba naʋ daan waa vʋ̃ʋ ntɛɛ pa, gɛr na cʋɛ sɩ dɩ sa jɩ tue dɩ sɩ haaraarɛ. ⁶ Dɩ tibilikɛ sɔnɩ ayɩ, ɔrra ɩnɩ too, gɩ teenanɛ ntɛ na-n ɩrɛ mɔ̃kɛ ɔɔ thɛthɛ kɔɔ ɩɩrnɩ. ⁷ Nɛrɛɛkɛ mɩ-n nanɩ, ga do jɔfʋ phaa mɩ-n khere nara’, sɩ jɔfʋ tɩ̃ɩ gɩɩkɛ nɩ kɔɔ ’lɛnɩ kɛkɛkɛ fʋ paar, dɩ jɔfʋ tɩ̃ɩkɛra dʋɔn thɩmɩɩrɩkɛ nɩ kɔɔ nɩɛnɩ. ⁸ Sɩrakɛ jɔfʋ phaa gɩ dɩ ɩ̃ khere nar, dɩ sobɔr gɩ do ɔrra na nɛrɛra, gɩdonɩ dabirə n kar sɩ dɩ dahɩrɛ bɔ ’li yɩrrɛ. ⁹ Tibilikɛ sɔnɩ ayɩ, ɩnɩ har dahɩrɛra, sɩ da-n laar ɔɔ omi, dabirəra a ha ’lo. ¹⁰ Tibilikɛ n naannɩ ɔɔ omi dahɩrɛra a too, dɩ nɛ baradaa na haaraa ga. ¹¹ Sɩ tibilikɛ n laarɛnɩ ɔɔ omi dabirəra a ha, dɩ dabirərara a-n ɩɩr, dɩ aa jɩ kãkɛ a-n jalna’, gɩdonɩ dabirə tɔnaa yɩr. ¹² Mɩ khere narɛ bɩsã bii, gɩdonɩ ɔɔ i dɔ nɔɔ dɩ nɩ ’lɛ sopugo faarɛ. ¹³ Mɩ khere narɛ thɛ, gɩdonɩ nɩ jɩrɛ ʋrɛ kɔɔ hanɩle kɛkɛkɛ fʋ paar. Mɩ khere narɛ daɓola, gɩdonɩ nɩ punone puu cʋʋ hɩ̃daar. Mι kɔɔ khere narɛ bιsana, gιdonι nι jιrɛ Thɩrɛ. ¹⁴ Mɩ kɔɔ khere narɛ thɛ, gɩdonɩ nɩ jɩrɛ ʋrɛ kɔɔ hanɩle kɛkɛkɛ fʋ paar. Mɩ kɔɔ khere narɛ daɓola, gɩdonɩ nɩ hananɛ fãga, dɩ dakha Thãgbaa thɩmɩɩ too nɛrɛra, dɩ nɩ puno puu cʋʋ hɩ̃daar. ¹⁵ Na-n do thɩɩkɛ na ɔɔda n bo ga-n too nɩ haara ga. A tibil na na thɩɩkɛɛ thɩ̃ aa-n hana naʋ Thɩrɛra ga. ¹⁶ Gɩdonɩ thɩ̃ɛ fɛʋʋkɛ hanι thιιra, kɛ dʋɔnnι thɩ̃ puukɛ n kɔnɩ tibil thue, na gɩrɛ n kɔnɩ yinə thue, na i ƴaalɛ thɩ̃ hananɛna, ga do Thɩrɛɛ pa gɩ tha’, sɩ thɩɩra gɩ the. ¹⁷ Dɩ thɩɩra n kar na gɩrɛra n kɔnɩ tibil thue kɛ n thɩɛraanɩ, sɩ tibilikɛ n cʋɛnɩ Thãgba tuur n toore khorr. ¹⁸ Bɩsana, pɩpɩɩ bɔɔ ha gɩrɛ, dɩ mɔ̃ nɩ kɔɔ nɩɛnɩ dɩ Kirisitii vardaar n ɩnɛ, nɛnɛnakɛ Kirisitii vardarasɔra jɔɔ hale, gɛrra sɩ jɩ dɩ pɩpɩɩ bɔɔ gɩ. ¹⁹ Wɩ kɔɔ ther asɩ thɩ̃thɩɩn, dɩ asɩda wɩ kɔɔ doraka’; gɩdonɩ ado asɩda wɩ kɔɔ do ga dor wa kɔɔ toona sɛr. Sɩ gele daan dɩ mɛ̃ ga nɩna dɩ bɩɛl na kɔɔ do asɩda ga. ²⁰ Sɩ nɛrɛ, ʋrɛɛkɛ dɔnɩ Daphuu, Thu Phuu a kɔɔ ha nɩ, dɩ nɛrɛ fɛʋ jɩɩr na ’lee na’. ²¹ Mɩ kɔɔ khere narɛ gɩdonɩ ga do na jɩ sobɔraa ga, sɩ gɩdonɩ nɩ jɩ gɛr, dɩ sõso bɩɛllakɛ na the sobɔrra ga. ²² Amɛ dʋɔn sõsodaar saagado ʋrɛ n bananɛnɩ dɩ yɩ Kirisiti Jeju doaa ga; dɩ olela dʋɔn Kirisitii vardaar, ɔr n bɔ Thɩrɛ na Bikuun. ²³ Tibil wo tibilikɛ n bɔnɩ Bikuun aa hana dakha Thɩra’, sɩ tibilikɛ n tuonni Bikuun a hananɛ dakha Thɩrɛ. ²⁴ Ado ne wer gɩ, nɩ dɔ gɩrɛ nɩ kɔɔ nɩɛnɩ kɛkɛkɛ fʋ paar n too nɛrɛra; ado gɩrɛ nɩ kɔɔ nɩɛnɩ kɛkɛkɛ fʋ paar n toore nɛrɛra, ga dor nɛrɛ dakha na toore Bikuunna na Thɩrɛra. ²⁵ Dɩ ʋlfɛrɛɛkɛ ɔɔ thɛthɛ kɔɔ ʋlfɛna sɩnɩ gɛr dʋɔn yire khorr. ²⁶ Wɩrɛ n cʋɛ nɩnɩ dɩ na-n lɛ̃ hʋɛra dɔ kɩrʋ dɩ ɩ̃ khere nar ga thɩ̃ɩkɛ. ²⁷ Ado nɛr gɩ, Thu Phuukɛ nɩ kɔɔ ’lɛnɩ ɔɔ pa toore nɛrɛra, dɩ na hana ƴaalɛ ʋkha na-n dɩrɛ nɩ thɩ̃a’, sɩ mɔ̃kɛ ɔɔ Thu Phuu n dɩɩr nɩnɩ thɩ̃ɛ fɛʋ, na mɔ̃ a donɩ sobɔ sodaar ga do sõsodaar ga, nɩ tɔɔ ɔrra mɔ̃kɛra a kɔɔ dɩɩr nɩnɩ. ²⁸ Dι nɛnɛ̃ bɩsã bii, nι tɔɔ ɔrra dɩ mɛ̃ wireekɛ a na phanɩ sa hananɛ ’lar, gɩ do ɔɔ bir ɩ̃ bɔɔ yicuru na fʋ sɩ sɩ hʋnɔnaa ga. ²⁹ Ado nɩ jɩrɛ dɩɩ do fɩl sardaar a do, nɩ jɛ dɩ tibil wo tibilikɛ n cʋɛnɩ dasarʋ ɔr kɔna ntɛ.

¹ Nɩ yɛ naʋ caakɛ Thɩrɛ kɔɔ na sɩnɩ ɓoɓo dɩ wɩ thʋ̃ dɩ wa-n we sɩ Thãgbaa bɩsãsɔ, dɩ gɛrra sɩ do. Dɩ gɛrra dɔ kɩrʋ dɩ thɩdara na jɩ sa’, gɩdonɩ wa kɔɔ jɩɩ dakha ga. ² Nɛrɛɛkɛ mɩ-n nanɩ, Thãgbaa bɩsãsɔ sɩ do gɩrɛ, sɩ gɩrɛ sa donɩ ga yɩr pa’; sɩ sɩ jɩrɛ wireekɛ a na phanɩ sa hʋʋrɛ, gιdonι sa yιιrɛ mɔ̃kɛ a hanι. ³ Dι tibil wo tibilikɛ hananι nũ pɛ caakɛ n cʋʋrɛ dιbara a na-n phu mɔ̃kɛ ɔɔ thɛthɛ phuni. ⁴ Tibil wo tibilikɛ n cʋɛnι sopugo Thãgbaa jɔfʋ a-n kʋɛ, dι sopugo cʋʋrɛ dʋɔn jɔfʋ kʋɛrɛ. ⁵ Sι nι jιrɛ dι Jeju kɔɔ ιnɛ kɛ a ti asι sopugosɔ, dι ɔɔ thɛthɛra sopugo na haaraa ga. ⁶ Dι tibil wo tibilikɛ tɔɔnι ɔrra aa-n cʋʋ sopugoə’; tibilikɛ n cʋɛnɩ sopugo ntɛɛle na kɔɔ yɩa’, aa kɔɔ jɩɩ dakha ga. ⁷ Bɩsã bii, na-n do tibil n fɩɩl na’; tibilikɛ n cʋɛnɩ dasarʋ, fɩl sardaar a do mɔ̃kɛ ɔɔ thɛthɛ donɩ fɩl sardaar. ⁸ Ʋrɛɛkɛ n cʋɛnɩ sopugo Satãa pa a the, gɩdonɩ Satã kɔɔ mãa fʋrɛ sopugo cʋʋrɛ kɛkɛkɛ fʋ paar, dɩ gɛr gɩ dɩ Thãgbaa Bikuun kɔɔ ɩ̃ a bũburõ Satãa thɔna. ⁹ Tibil wo tibilikɛ Thãgba kɔnɩ aa-n cʋʋ sopugoə’, gɩdonɩ beekɛ Thãgba diirni har ɔɔ bɩnɔ, dɩ aa-n puno dɩ cʋʋ sopugoə’, gιdonι Thãgba kɔnaa. ¹⁰ Gɩrɛ wɩ-n jɩnanɩ Thãgbaa bɩsãsɔ na Satãa bɩsãsɔ ha gɩrɛ: Tibil wo tibilikɛ na-n cʋɛnɩ dasarʋa’, ga do Thãgbaada a doa’, mɛna gɩ na ʋrɛ na-n naannɩ ɔɔ oma’. ¹¹ Thɩmɩɩrɩkɛ nɩ kɔɔ nɩɛnɩ kɛkɛkɛ fʋ paar gɛr ha gɩrɛ: Sa-n na kha fɛʋ bɩɛlbɩɛl. ¹² Dɩ sa-n ho Kayɛ̃ɛkɛ kɔɔ dɔnɩ puu cʋʋ hɩ̃daarɩda, kɛ kɔɔ kɔnɩ ɔɔ õkuuna’. Dɩ mɔ̃gɩdo dɩ kʋʋ? Gɩdonɩ ɔɔ thɔ̃ puurore sɩ ɔɔ õkuunida sar. ¹³ Omɩna ado tɩbɩla thɩɩra na laar nɩ, na-n do nʋɔ n kpaa na’. ¹⁴ Sɛrɛ sɩ jɩrɛ dɩ sɩ ther khirrə a lõ yirera, gɩdonɩ sɩ-n nar omɩna; ʋrɛɛkɛ na hananɩ naʋa’, khirrə a bo too. ¹⁵ Tibil wo tibilikɛ n laarɛnɩ ɔɔ omi tɩɩ kʋ haa, dɩ nɩ jɩrɛ dɩ tɩɩ kʋ bɩɛllakɛ na-n hana yire khorra’. ¹⁶ Sι jιrɛ gιrɛ n dɔnι naʋ, dι gɩ ther gιrɛraakɛ Kirisiti kɔɔ faa sarnι ɔɔ yi, sɛrɛ dakha gι teenanɛ sa-n faa asɩ yi omɩnana. ¹⁷ Ado tibil hana thɩɩkɛɛ thɩ̃ sa yɩ ɔɔ omi thɩ̃ ɓɔrɛra sɩ aa ƴaal a kher a hɩɩnʋa’, mɔ̃ dɔ Thãgba naʋ haaraarɛ? ¹⁸ Bɩsã bii, sa-n na kha na nʋɔ dɩbara dɩ delẽbire ga, sɩ sa-n na kha na thɩ̃ cʋʋrɛ nakha sobɔr. ¹⁹ Gɛr sa jɩna dɩ sɩ dor sobɔdara, dɩ sa faarɛ haar yala ɔɔ ƴɛra. ²⁰ Gɩdonɩ ado asɩ ha na heen sɩ sor, Thãgba kɔ̃tɩnɛ a jɔ asɩ ha, dɩ a jɩrɛ thɩ̃ɛ fɛʋ. ²¹ Nɛrɛɛkɛ mɩ-n nanɩ, ado asɩ ha na-n heen sɩ sora’, sɩ hananɛ tu jɩɩr Thãgbaa pa, ²² dɩ thɩ̃ɛ wo thɩ̃ɛɛkɛ sɩ-n bɩɛlnɩ a-n ha sɛr, gɩdonɩ sɩ-n hɩɩnɛ ɔɔ jɔfʋ dɩ sa-n cʋʋna gɩrɛ n daaraanɩ. ²³ Dɩ gɩrɛ dɔ ɔɔ jɔfʋ ayɩ: Dɔ sɩ pɛr ɔɔ Bikuun Jeju Kirisitii i haar dɩ sa-n na kha fɛʋ bɩɛlbɩɛl mɔ̃kɛ jɔfʋʋkɛ a kɔɔ ha sɩnɩ n sonɩ. ²⁴ Ʋrɛɛkɛ n hɩnɛnɩ Thãgbaa jɔfʋ ɔr n tɔɔraa dɩ Thãgba n haaraa; dɩ Thu Phuukɛ a kɔɔ ha sɩnɩ sɩ jɩna dɩ a-n hana sɛr.

¹ Nɛrɛɛkɛ mɩ-n nanɩ, na-n pɛ tɩbɩla fɛʋʋda haara’, sɩ na-n jʋrɛ wɩ na hɩnɛ ado Thãgbaa Thu n thɔɔ wɩ, gɩdonɩ sõso bobona jɔɔ ɩɩrɛ a lõ thɩɩra. ² Gɩrɛ na jɩrɔnɩ dɩ Thãgbaa Thu gɩ: Tibil wo tibilikɛ n tuonni dɩ tomɩr Jeju Kirisiti kɔɔ hana a ɩnɩ, Thãgbaa Thu ntɛɛle hana. ³ Sɩ tibil wo tibilikɛ na-n tuonni Jeju thala’, ga do Thãgbaa Thu ntɛɛle hana ga, gɛr dʋɔn Kirisitii vardaarɩdara nɩ kɔɔ nɩɛnɩ ga ɩ̃, kɛ ’lenɩ hakɛrakɛ gɩrɛ thɩɩra. ⁴ Bɩsã bii, nɛrɛ, Thãgbaada nɩ do, dɩ nɩ puno wer, gɩdonɩ ʋrɛɛkɛ hanɩ anɩ bɩnɔ a kɔ̃tɩnɛ a jɔ ʋrɛɛkɛ hanɩ thɩdarara. ⁵ Wɛr, thɩɩda wɩ do, gɛr gɩ dɩ wa-n mɩɩ gɩrɛ thɩdara n mɩɩnɩ, dɩ thɩdara n pɛ wɛr nũu. ⁶ Sɩ sɛrɛ, Thãgbaada sɩ do. Ʋrɛɛkɛ jɩɛnnɩ jɩ Thãgba a-n pɛ sɛr nũu, sɩ ʋrɛɛkɛ na dɔnɩ Thãgbaada ga, aa-n pɛ sɩ nũə’; liir sɩ-n jɩna sobɔ thue na fɩfɩɩl thue. ⁷ Nɛrɛɛkɛ mɩ-n nanɩ, sa-n na kha fɛʋ bɩɛlbɩɛl, gɩdonɩ naʋ Thãgbara gɩ the, dɩ tibil wo tibilikɛ hananɩ naʋ, Thãgba kɔnaa dɩ jɩ Thãgba. ⁸ Ʋrɛɛkɛ na hananɩ naʋa’, aa jɩ Thãgba ga, gɩdonɩ Thãgba dʋɔn naʋ. ⁹ Gɩrɛ n nɛnanɩ naʋʋkɛ Thãgba na sɩnɩ dʋɔn mɔ̃ a kɔɔ thɔnɩ ɔɔ Bikũu bɩɛl ’lẽ’lẽ’lẽ thɩɩra, dɩ mɛ̃ sa ’lɩɛraa yire. ¹⁰ Dɩ hɩnɛ mɔ̃ naʋra hanɩ, gɛr dʋɔn ga do sɛr kɔɔ naan Thãgba ga, sɩ ɔr gɩɩkɛ kɔɔ naan sɩnɩ a thɔ̃ ɔɔ Bikuun dɩ do sar bonɩ jirikɛ hɛlanɩ asɩ sopugo. ¹¹ Nɛrɛɛkɛ mɩ-n nanɩ, ado Thãgba kɔɔ na sɛr thale, gɩ teenanɛ sɛrɛ dakha sa-n na kha fɛʋ bɩɛlbɩɛl. ¹² Tibil na kɔɔ yɩ Thãgba yuuraka’, sɩ ado sɩ-n nar kha fɛʋ bɩɛlbɩɛl Thãgba har asɩ bɩnɔ, dɩ ɔɔ naʋ daan waa vʋ̃ʋ sɛrɛra. ¹³ Gɩrɛ sɩ jɩnanɩ dɩ sɩ tooraarɛ dɩ ɔr ha sɛrɛra dʋɔn gɩ ther gɩrɛraakɛ a kɔɔ ha sɩnɩ ɔɔ Thu. ¹⁴ Dɩ sɛrɛ, sɩ yɩrɛ mɔ̃kɛ Thɩrɛ kɔɔ thɔnɩ ɔɔ Bikuun dɩ do tɩbɩla fɛʋ thɩɩraa Taadaar, dɩ gɛr sɩ-n mɩɩrɔ sobɔ so jɩɩr. ¹⁵ Ʋrɛɛkɛ na tuonni nayɩ Jeju dʋɔn Thãgbaa Bikuun, Thãgba haaraarɛ, dɩ ɔr dakha too Thãgbara. ¹⁶ Dɩ sɛrɛ, sɩ jɩrɛ naʋʋkɛ Thãgba hana sarnɩ dɩ sɩ pɛ gɛr haar. Thãgba dʋɔn naʋ, dɩ ʋrɛɛkɛ tɔɔnɩ naʋra a toore Thãgbara, dɩ Thãgba haaraa. ¹⁷ Mɔ̃ a hanɩ mɛ̃ sɩ ha ser thɩɩraakɛ, gelela dɔ nɔɔ dɩ naʋ dã waa vʋ̃ʋ asɩ bɩnɔ, dɩ mɛ̃ sa hana tu jɩɩr kɩɩl wire. ¹⁸ Naʋ na-n hana maara’, sɩ naʋʋkɛ dananɩ vʋ̃ʋ n weere maar, gɩdonɩ maar n nɩnanɛ dɩ so ’lɛr n kpaanɛ, dɩ ʋrɛɛkɛ maar n kʋnɩ na hana naʋʋkɛ dananɩ bɔɔbɔa’. ¹⁹ Ado sɛr gɩ, sɩ-n naarɛ gɩdonɩ ɔr kɔɔ naan sɩ caca. ²⁰ Ado tibil so ayɩ, ɩnɩ-n nar Thãgba, sɩ na laar ɔɔ omi, sõsodaar gɩ; gɩdonɩ ʋrɛɛkɛ na-n naannɩ ɔɔ omiikɛ a-n yɩna’, mɔ̃ a na puno a na na Thãgbaakɛ aa yɩna? ²¹ Dɩ ɔrra sɩ ’lɛ jɔfʋʋkɛ ayɩ: Dɔ ʋrɛɛkɛ n naannɩ Thãgba a na-n na dakha ɔɔ omi.

¹ Tibil wo tibilikɛ pɩɛrnɩ haar dɩ Jeju dʋɔn Kirisiti, Thãgba kɔnaa; dɩ tibil wo tibilikɛ n naannɩ Thãgbaakɛ n kɔnanɩ tibil, a-n nar dakha ʋrɛɛkɛ Thãgbara kɔnɩ. ² Sɩ jɩrɛ dɩ sɩ-n nar Thãgbaa bɩsãsɔ ɔbɔɔkɛ sɩ-n nanɩ Thãgba dɩ sa-n cʋʋna ɔɔ jɔfʋ. ³ Gɩdonɩ Thãgba naar dʋɔn ɔɔ jɔfʋ hɩɩnɛ, dɩ ɔɔ jɔfʋra na khɩɩra’. ⁴ Gɩdonɩ ʋrɛ Thãgba kɔnɩ n punone thɩdaa; dɩ fãgaakɛ n punoneni thɩdaa dʋɔn asɩ ha pɛ. ⁵ Amɛ dɔ ʋrɛ n punoneni thɩdaa? Ʋrɛ dɩbara pɩɛrnɩ haar dɩ Jeju dʋɔn Thãgbaa Bikuun gɩ. ⁶ Ɔr dɔ Jeju Kirisitiikɛ kɔɔ ɩnanɩ na nyʋɔn na tɔmɩn, ga do nyʋɔn a ɩna dɩbara ga, sɩ nyʋɔn gɩ na tɔmɩn. Dɩ Thu Phuu dʋɔn ʋrɛɛkɛ n mɩanɩ sobɔ so jɩɩr, gɩdonɩ Thu Phuu dʋɔn sobɔr. ⁷ Gɩdonɩ yẽther hale n mɩanɩ sobɔ so jɩɩr: ⁸ Thu Phuu, nyʋɔn na tɔmɩn, dɩ wɛr yẽther dor kha nɔ bɩɛl. ⁹ Ado sa tu tɩbɩlaa sobɔ so jɩ, Thãgbaa sobɔ so jɩ kɔ̃tɩnɛ a jɔ gɩ, dɩ sobɔ so jɩɩrɩlera Thãgbaa thɛthɛ mɩa a pɛ ɔɔ Bikuunna. ¹⁰ Dɩ ʋrɛɛkɛ n pɩɛrnɩ haar Thãgbaa Bikuunna, a hananɛ ga sobɔ so jɩɩle ɔɔ bɩnɔ; sɩ ʋrɛɛkɛ na-n pɩɛrnɩ Thãgba haara’, n cʋʋrɛ dɩɩ do sõsodaar Thãgba do, gɩdonɩ aa pɛr haar sobɔ so jɩɩrraakɛ Thãgba mɩɩnɩ a pɛr ɔɔ Bikuunna ga. ¹¹ Dɩ hɩnɛ gɩrɛ dɔnɩ ga sobɔ so jɩɩkɛra, gɛr dʋɔn yire khorrɩkɛ Thãgba kɔɔ ha sɩnɩ, dɩ yireelera ɔɔ Bikuunna gɩ ha. ¹² Ʋrɛɛkɛ hananɩ Bikuun a hananɛ yire, sɩ ʋrɛɛkɛ na hananɩ Thãgbaa Bikuuna’, aa hana yirə’. ¹³ Mɩ khere narɛ ga thɩ̃sɔɔkɛ dɩ mɛ̃ na jɩɩ jɩ dɩ nɩ hananɛ yire khorr, nɛrɛɛkɛ n pɩɛrnɩ Thãgbaa Bikuuni i haar. ¹⁴ Tu jɩɩrɩkɛ sɩ hananɩ ɔrra dʋɔn, ado sa bɩɛlaa thɩ̃ɛ wo thɩ̃ɛ dɩɩ do ɔɔ tuur gɩ, a-n pɛ sɛr nũu. ¹⁵ Dɩ ado sɩ jɩrɛ dɩ a-n pɛ sɛr nũu thɩ̃ɛ wo thɩɛnaakɛ sɩ-n bɩɛlnɩ, sɩ jɩrɛ dɩ sɩ ’lɛr thɩ̃ dookɛra sɩ kɔɔ bɩɛlaanɩ. ¹⁶ Ado tibil yɩ ɔɔ omi dɩ cʋʋ sopugookɛ na halaanɩ na jalna khirrə ga, a bɩɛlnɛ Thãgba omi dɔɔle na ’lɛr yire. A thɩɛna gaa, wɩrɛɛkɛ na-n cʋɛnɩ sopugookɛ n halanɩ dɩɩ jalna khirrə ga mɩ so. Sopugo hale n halanɩ tibil dɩɩ jalna khirrə, ga do ga sopugoole mɩ yɩ nɩ bɩɛllɔ Thãgba ga. ¹⁷ Thɩ̃ɛ wo thɩ̃ɛ fɛʋʋkɛ na sarana’, sopugo gɩ, sɩ sopugo hale na-n halanɩ tibil dɩɩ jalna khirrə ga. ¹⁸ Sɩ jɩrɛ dɩ tibil wo tibilikɛ Thãgba kɔnɩ aa-n cʋʋ sopugoə’, gɩdonɩ Thãgbaa Bikuun n bɛraa, dɩ puu cʋʋ hɩ̃daar na-n thaaraa ga. ¹⁹ Sɩ jɩrɛ dɩ Thãgbaada sɩ do, sɩ thɩɩ koo puu cʋʋ hɩ̃daarɩ nyɔ̃kɔɔ gɩ ha. ²⁰ Sɩ jɩrɛ dakha dɩ Thãgbaa Bikuun kɔɔ ɩnɛ kɛ a ha sɩ jɩɩr dɩ sa jɩna sobɔdaar; dɩ mɔ̃ sɩ hanɩ ɔɔ Bikuun Jeju Kirisitira, sobɔdaarra sɩ ha; ɔr gɩɩkɛ dɔnɩ sobɔ Thãgba a dona yire khorr. ²¹ Bɩsã bii, na-n jɩɛ hɩɩn, na-n ha kha dɩkha na thɩla fɩɩʋraka’.