2 Timothy

NA RUANA KEKEDELAA NIA A PAUL FUANA A TIMOTHY

¹I nau a Paul, na aposol a Christ Jesus ana na kwaidooria nia a God, na e fale nau eeri kuka ainitalo ana mouria na nia e bae aalualu ana fuaga na tooa na gia manata mamana ana a Christ Jesus. ²I nau ku kekede fuamu a Timothy na o iilingia na wela rakediana nau.

I nau ku fooa eeri a God na Maa ma a Christ Jesus na Lord gia daaro ka falea na dianalaa ma na kwaimanataia ma na fanualama fuamu.

Na baelafea ma na kwaiareia.

³I nau ku baelafea a God, na wane na ku rao fuana ma kuka haitamana langi kusi iilia doo taꞌa, iilingia na koo nau gi da rao fuana. Ma i nau ku baelafe nia ana fe hato ma fe rodo si kada ku fooa ana ma kuka gania a God hai ka adomi oe. ⁴Si kada i nau ku manatatoona na aangilaa baa o iilia, ku dooria asianaa hai kuka riki oe lau hai kuka eele agu. ⁵Ma ku manatatoona na fiimamanalaa diana na o too ana, iilingia laugo na fiimamanalaa baa koo oe ni Lois ma ni tee oe ni Iunis daaro too ana. Sulia nau ku haitamana nia na o too laugo ana. ⁶Nia naa, nau ku faamanatatoomu lau hai oko faarigitaa na falelaa na a God e falea ana fuamu si kada baa ku aalua na abagu gi faafi oe. ⁷Sulia a God langi si falea na Aanoedoo Aabu fuaga hai gia ka mou. Nia e falea na Aanoedoo Aabu eeri ka faarigita gia ma eeri gia ka rakediana fuaga kwailiu ma eeri gia ka olosi gia i talaga.

⁸Nia nae, langi osi ida uria na faamamanalana ana na Lord gia, ma langi osi ida laugo ani nau na wane na ku nii laona beu ni kanilaa sulia na raolaa nau fuana a Christ. Oko ainitalongainia amu na Faarongolaa Diana, boroi ana gera faanonifii oe, sulia tara a God e falea na rigitaa fuamu uria na iililana. ⁹A God e faamouri gia ma ka fili gia naa eeri gia ka aalua na tooa nia gi, langi lau sulia si doo gi na gia iilida. I nia e faamouri gia ma ka fili gia ana, sulia na manataa nia i talana ma si rakedianalaa nia i talana fuaga. I nia e falea na dianalaa nae fuaga ana a Christ Jesus, i nao ua na mai si kada e langi nia kasi haungainia ua ana tesi doo. ¹⁰Sui, e faatai naa na dianalaa nae fuaga si kada naa ana na daolana mai na Faamouri gia a Christ Jesus. I nia e lafua naa na rigitalana na maea, ma ana na Faarongolaa Diana, nia ka faatainia na mouria na e afetai ka sui.

¹¹Ma a God e fili nau eeri kuka hau ana ta aposol ma na wane faatolomai uria na faatalolaa ana na Faarongolaa Diana. ¹²Nia naa, nau kuka nonifii i laona na beu ni kanilaa uria si doo naa gi. Sui taa, nau ku manata ngado ua go agu, sulia nau ku haitamana na wane na ku fiitoona. Ma i nau ku haitamana mamana hasa i nia e bobola go ana fai nia na fololaa usia si doo gi na e aaluda i abagu, lea ka dao ana fe dani na nia ka ooli lau mai. ¹³Oko tasa dongaa uria manata mamanalaa ana na faatolomaia mamana na ku falea fuamu, ma oko roosulia, ma oko too ngado ana na fiimamanalaa ma na rakediana na gia too ana sulia na oofulaa gia fai nia a Christ Jesus. ¹⁴Ma ana na rigitalana na Aanoedoo Aabu na e too ani gia, oko aadasulia na doo diana gi na a God e aalua i abamu.

¹⁵I oe o haitamana go amu naa na tooa gi sui i laona na bali fera i Asia da aabulo eꞌete naa faasi nau. A Figelus fai nia a Hermogenes naa roo wane urinae. ¹⁶A Lord ka manatainia ana a Onesiforus ma na aebara nia, sulia nia e faanoni hahala nau ana si kada oro, ma ka langi si ida ana toolaa nau i laona na beu ni kanilaa. ¹⁷Sulia si kada nia dao ana i Rom, i nia ka nani uri nau lea ka daotoogu. ¹⁸Nau ku fooa eeri a Lord ka kwaimanatai ani nia ana fe dani na nia ka ooli lau mai. Ma oko haitamana diana naa si kwaiꞌadomia oro baa gi nia e iilia fuagu lao fera i Efesus.

Na afetaia na a Timothy e naofia.

¹Oe mala wela nau ae, oko rigita ana manata mamanalaa oe. Sulia e bobola fai nia oko iili urinae sulia na rakedianalaa a God fuaga na tooa na gia manata mamana ana Christ Jesus. ²Ma si doo gi na o rongoa ku faatolomainia fuana na tooa oro gi, oko falea fuada na tooa fiitooa gi na da bobola fai nia na faatolomailana lau fuana teni tooa aai gi lau.

³Ma oko ado ana si nonifiilaa sulia na raolaa oe fuana Christ Jesus, iilingia ta wane ana oomea diana nia. ⁴Ta wane ni oomea, na e dooria haia ka faanonihahalaa na wane baita nia, ma e langi kasi aberosia i talana ana ta raoa eꞌete gi. ⁵Ma na wane ni lalaoa afetai ka saitasa lea so e langi kasi lea sulia na malutana lalaolaa. ⁶Ma na wane na e rao rigita i hara, nia ka ngalia ana fuedoo moringa totongenao ana na doo gi na e gonida. ⁷Oko manata sulia si doo gi na ku haea, sulia a Lord tara ka adomi oe hai oko haitamana na doo naa gi sui.

⁸Oko manatatoona a Jesus Christ, na wane ana kwalafaa a David, baa a God e tataea faasia na maea, iilingia baa ku ainitalongainia laona na Faarongolaa Diana. ⁹Ma si kada nae, nau ku nonifii ma ku too i laona beu ni kanilaa iilingia ta wane baa e iilia tesi doo na e garo, sulia na ainitalolaa ana na Faarongolaa Diana. Haia, ma na baelana a God afetai daka kani faafia. ¹⁰Nia naa, nau ku maabe uria nonifii ana doo gi sui uria na dianalana na tooa gi na a God e aadafilida, eeri ni gera laugo daka ngalia na mouria sulia a Christ Jesus, fai nia na toolaa ana initooa firi i langi.

¹¹Si baelaa e mamana baa e urii, <<Lea gia ka mae sui fai nia a Christ, tara gia ka mouri laugo fai nia. ¹²Lea gia ka tasa dongaa ana manata mamanalaa, gia ka initoo laugo fai nia. Ma lea gia ka kwaigoloi ana, nia tara ka kwaigoloi laugo ani gia. ¹³Sui boroi ana lea so gia ka langi si iilia na kwaidooria nia gi, nia afetai ka lugasia taa naa nia haea tara ka iilia fuaga, sulia afetai nia ka langi si faamamanaa na baelana.>>

Na wane ni rao na a God e aalafaafia.

¹⁴Oko faamanatatoona na tooa loko gi ana si doo naa, ma oko bae fifii fuada i maana a God, hai langi dasi oolisusuu faafia na baea gi. Sulia iililaa urinae langi kasi falea go ta doo diana, ma e nagaa go ana tooa na da fafurongo gi. ¹⁵O hasi rigita hai a God ka eele faafia na raolaa oe, iilingia ta wane rao baa langi si ida ana raoa nia, ma na wane na e faatolomai oꞌolo ana baelana God na e mamana teefou. ¹⁶Oko too faasia na uunuunu kaubarea gi, sulia si doo nae ka talaia na tooa gi faasia a God. ¹⁷Gwounge na faatolomaia urinae e iilingia ta mae maala baa e harufia baita na nonina wane. Ma na roo wane na da faatolomai urinae gi a Haemeneas ma a Filetus. ¹⁸Sulia daaro lea sui naa faasia na mamanaa ma daaro ka haea hasa na tataelaga faasia na maelaa e fuli sui naa, ma daaro ka nagaa urinae naa na manata mamanalaa gera teni tooa gi. ¹⁹Haia, na faatolomaia a God e iilingia ta fou baita sulia nia e langi si gelogelo, ma na faatolomaia nae gi da kekede urii, <<A Lord e haitamana go ana na tooa nia gi,>> ma, <<Ni tei na e haea nia na doo a Lord ka aabulo faasia aade taꞌalaa gi.>>

²⁰I lao luma baita, na doo ni fangalaa gi e oro i laona. Teni doo gi da haungainia ana gold ma na silva, ma teni doo gi daka haungainia ana na ai ma na hae gano. I aena naa teni doo gi e too uria fangalaa ana fe dani baita gi ma teni doo aai gi ka too uria malana go ana fe dani. ²¹Ma lea so ta wane ka faafaalu nia i talana faasia na doo taꞌa gi, nia ka iilingia na doo ni fangalaa ana fe dani baita gi. Sulia nia e aabutai nia i talana ma ka aade aagau ani nia uria na iililana ta raoa diana fuana na aarai baita nia.

²²Oko too faasia na kwaidooria taꞌa wane daraa gi. Oko hasi rigita amu uria na oꞌoloa ma na manata mamanalaa ma na rakedianaa ma na fanualama, fai nia ni tei gera na lioda e folaa ma daka gania a Lord uria na kwaiꞌadomilaa. ²³Ma oko too faasia na oolisusuu ooewanealaa gi, sulia o haitamana na doo nae gi e haitamana ka haungainia na firufirua gi. ²⁴Sulia na wane ni rao nia a Lord langi kasi too firufiru ni baea. Nia ka aade diana fuana tooa gi sui, ma ka faatolomai diana fai nia gwaromaabelaa. ²⁵Ma nia ka hahaore fuana tooa gi na da take suusi nia si kada nia ka faatainia na garolaa gera gi. Sulia tara a God ka bulasia oto na lioda hai daka haitamana na mamanaa. ²⁶Ma gera ka manata ooli ma daka tafi faasia na tori nia a Satan, na wane na e dau faafi gera ma ka suungaini gera hai daka iilia na doo gi na nia e dooria.

Fe dani iꞌisi gi.

¹Oko manatatoona tara na kada afetai gi ka dao mai ana dani iꞌisi gi. ²Ma na tooa gi tara gera ka nounou, ma daka faabaita gera, ma daka bae tataga. Ma ka langi dasi roosulia baelana maa gera gi ma ni tee gera gi, ma dasi baelafea ni tei na e iili diana fuada, ma daka aaefaraa na doo a God gi. ³Ma gera ka aade taꞌa, ma langi dasi kwaimanatai ana tooa eꞌete gi, ma daka suge faafia na tooa gi, ma daka dooria firulaa, ma daka hau ana na tooa kwasi gi, ma daka oote gera ana na doo diana gi. ⁴Ma tara gera ka olea na maelana na tooa gi, ma langi dasi manata sulia na iililaa gera gi, ma daka lafe asianaa, ma daka rakediana ada ana na kwaidoorilaa ana noni ma a God ka langi. ⁵Haia, gera ka haea daka manata mamana, sui daka tofea ada na rigitaa nia a God. Lea doo oko too tau faasia na tooa urinae gi. ⁶Ma teni tooa urinae gi na da ruu la luma gera tooa gi ma daka baita na ada usia na geni gi. Ma na geni nae gi, na garolaa gera gi ka faamakeso gera ma na kwalukaela kwaidooria taꞌa gi ka baita faafi gera, ⁷ma daka doori fafurongo tarau go ada uria haitamadoolaa, sui ka afetai daka haitamana na mamanaa. ⁸Na tooa naa gi tara daka oote gera ana na mamanaa, iilingia a Janes ma a Jambres baa daaro oote daaro ana a Moses. Na tooa naa gi na manatalada e langi kasi rao oꞌolo, ma na manata mamanalaa gera e langi kasi mamana. ⁹Haia, e afetai na tooa urinae daka iilia na kwaidooria gera gi, sulia na tooa gi sui tara da rikia naa na ooewanealada, iilingia baa e fuli ana a Janes ma a Jambres.

Si faatolomailaa iꞌisi gi.

¹⁰Haia, i oe o roosulia naa na faatolomaia nau ma na aabulolagu ma si doo na ku hasi uria ana na mourilagu. Ma oko rikia naa na manata mamanalaa nau ma na gwaromaabelaa nau ma na rakedianalaa nau ma na tasa dongaalaa nau, ¹¹ma oko rikia naa na nonifiilaa nau gi. Ma oko haitamana sui naa si doo afetai gi sui na e iilia fuagu i laona na fera i Antiok ma i Ikonium ma i Listra. Sui, a Lord naa e adomi nau hai langi kusi mae. ¹²Ma so ni tei na e dooria na too oꞌolo laona na oofuofulaa fai nia a Christ Jesus, tara gera ka iinokesia. ¹³Na tooa taꞌa gi ma na wane faatolomai susuge gi tara daka hau ana taꞌa ka tasa, ma daka talai garo ana teni tooa gi aai ma i gera i talada laugo. ¹⁴Haia, ma ni oe mone, oko lea dongaa amu sulia na mamanaa gi na oko manata mamana rigita na ana. Ma oe o haitamana go amu tei naa da faatolomai oe, ¹⁵ma oe manatatoona e ita ana si kada baa o toꞌou mai ana, oko haitamana na Kekedelaa Aabu gi na e bobola fai nia na falelana na liotooa haia ka talai oe uria na mouria sulia na manata mamanalaa ana a Christ Jesus. ¹⁶A God naa na e falea na Kekedelaa Aabu gi sui. Ma na Kekedelaa Aabu gi ka diana uria na faatolomailana mamanaa, ma na olosilana si doo gi na e garo, ma na toolamailana na doo oꞌololaa, ¹⁷eeri na wane na e rao fuana a God, ka bobola uria na iililana na raoa diana gi sui.

¹I nau ku gani oe i maana a God ma a Christ Jesus na wane na tara ka ketoa na tooa da mouri gi ma na tooa da mae gi, ma ka ooli mai hai ka aaofia. Haia, nau ku gani oe, ²eeri oko ainitalo ana Faarongolaa Diana. Ma oko aade aagau uria na iililana ana si kada gi sui. Ma oko bulasia na lioda na tooa gi, ma oko ngatafida, ma oko kwaiareida, si kada oko faatolomai ana gwaromaabea. ³Sulia tara ka dao na ana si kada na tooa gi langi dasi fafurongo naa uria na faatolomaia mamana. Ma da dooria ada lealaa sulia na kwaidooria gera i talada, ma daka nani ada uria na wane faatolomai oro gi haia da haea na doo gi na da doori rongoa. ⁴Ma gera ka aabulo eꞌete ada faasia na fafurongolana na mamanaa ma daka fafurongoa ada na uunuunua haungailana gi. ⁵Haia, oe mone, oko susuli oe i talamu ana si kada gi sui, ma oko tasa dongaa ana raoa oe boroi ana si kada afetai gi. Ma oko iilia amu na raoa oe ana na ainitalongailaa ana na Faarongolaa Diana, ma oko iilia na raoa gi sui ana na raolaa oe fuana a God.

⁶Haia, ma ni nau mone, e dao na ana si kada fuana daka haumaeli nau naa iilingia na kwaisuusilaa. ⁷I nau ku faasuia naa na raolaa gi sui na a God e falea fuagu iilingia na wane na e lalao ma ka faasuia na lalaolaa, ma ku dau ngado na ana na manata mamanalaa. ⁸Ma na kwaiaraa nau ka maasi nau naa, sulia na too oꞌololaa nau. Ma a Lord, na wane ni ketolaa ana na oꞌoloa naa tara ka falea na kwaiaraa nae fuagu ana fe dani tara nia ka ooli mai ana. Ma taifili nau ka langi, ma na tooa gi sui na da rakediana fuana a Christ ma daka kwaimaasimaasia na faatailana mai.

Na faarongolaa nia a Paul.

⁹Oko hasi rigita eeri oko dao aliꞌali siagu. ¹⁰Sulia a Demas e rakediana ana fuana dongaa na molaagali naa, ma ka tafusi nau ma ka lea na ana uria i Tesalonika. Ma a Kresens e lea na ana uria i Galesia, ma a Titus ka lea na ana uria i Dalmatia. ¹¹Tee taifilia a Luke go na e too fai nau. Lea doo oko talaia mai a Mark fai oe, sulia i nia e bobola fai nia na adomilagu ana na raolaa. ¹²I nau ku oodua naa a Taekikus uria i Efesus. ¹³Ma si kada o lea mai ana, oko ngalia mai na maku tekwa nau baa ku tafusia mai siana a Karfus i Troas. Ma oko ngalia laugo mai na buka nau baa gi, ma tasa ana na buka diana nau baa gi na da haungainia ana na ungana na sipsip gi.

¹⁴A Aleksanda na wane na e rao ana kakai halo gi, e falea na fiilaa baita asianaa fuagu. Ma tara a Lord ka duua si doo na nia e iilida. ¹⁵I oe laugo, oko aadaada diana suli oe, sulia nia e oote nia asianaa ana na faarongoa golu.

¹⁶Haia, ana na eetana si kada gera keto nau ana, langi ta wane kasi adomi nau go. Na tooa gi sui da eekwatai nau na ada. Nau ku fooa eeri a God kasi falea mone ana na kwaelaa fuada uria si doo nae. ¹⁷Sui, a Lord naa e too fai nau ma ka faarigita nau eeri kuka bobola fai nia na ainitalongailana na faarongolaa loulou fuana tooa maadiu oro gi eeri daka rongoa ada. Ma a Lord ka faamouri nau faasia na kwaelaa ana na ui anilagu fuana doo fai ae kwasi gi. ¹⁸Ma a Lord tara ka faamouri nau faasia na doo taꞌa gi sui, ma ka ngali nau uria laona na Initooa nia i langi. Na initooa baita ka too fuana sulia dani firi! Amen.

Si bae dianalaa iꞌisi gi.

¹⁹Nau ku falea na bae dianalaa nau gi fuana ni Prisila ma na aarai nia a Akuila, ma na aebara a Onesiforus. ²⁰A Erastus e too i Korint, ma nau ku tafusia mai a Trofimus i Miletus, sulia nia e matai. ²¹O hasi rigita hai oko dao i seenaa i nao ana si kada ana gwagwaria.

A Iubulus ma a Pudens ma a Linus ma ni Kladia, ma na tooa manata mamana gi ana a Christ sui na da too i seenaa, da falea laugo kou na bae dianalaa gera gi fuamu.

²²Nau ku fooa eeri a Lord ka too fai oe, ma na faadianalaa a God ka too fai gamu sui.