1 John

NA EETANA KEKEDELAA NIA A JOHN

Si Baea ana mouria.

¹I gemelu melu kekede fuamolu sulia na Baea ana mouria. A Christ naa na Baea ana na mouria nae na e too ua na mai ana hafalilaa. Gemelu melu rongoa naa, ma melu ka rikia naa ana maamelu. Ma melu ka hamotoona na ana na aba melu. ²Ma si kada na mouria naa e daofaatai, melu ka rikia naa. Nia naa melu ka bae sulia, ma melu ka faarongo gomolu ana na mouria firi na e too fai nia a God na Maa ma ka faatai naa fuamelu. ³Haia, si doo gi na melu rikia ma melu ka rongoa, nia na melu ka ainitalo laugo ana fuagamu, hai muka oofu fai gemelu ana na oofulaa na melu too ana fai nia na Maa ma a Jesus Christ na Wela nia. ⁴Melu kedea si doo naa haia gia ka eele asianaa.

A God naa na raralaa.

⁵Ma na faarongolaa na melu rongoa faasia na Wela nia a God ma melu ka haea fuagamu e urii: a God e iilingia na raralaa sulia nia e diana ka tasa asianaa, ma e langi ta rorodolaa ani nia. ⁶Ma lea gia haea hasa gia oofu naa fai nia, ma gia ka too ua go aga i laona na rorodoa, gia gi suge asianaa ana baelaga gi ma na aadelaga gi. ⁷Haia, lea gia too i laona na raralaa, iilingia a God e too i laona na raralaa, urinae gia ka oofu fai gia kwailiu, ma na abuna a Jesus na Wela nia ka faafaalu gia faasia na aade taꞌalaa gi sui.

⁸Ma lea gia haea gia langi go ta garolaa, gia gi suge gia i talaga, ma e langi ta mamanalaa ani gia. ⁹Ma lea so gia ka faarongoa ana na garolaa gia gi fuana a God, nia tara ka manata lukea na garolaa gia gi ma ka faafaalu gia faasia na aade taꞌalaa gia gi sui, sulia i nia tara ka faamamanaa na bae aalualu nia uria iililana na doo nae, ma ka iilia na doo oꞌolo. ¹⁰Ma lea so gia haea gia langi go ta garolaa ani gia, tama gia haea a God nia na wane susuge go ana naa, ma na baelana a God ka langi si too go ani gia.

A Christ e lafua na aade taꞌalaa gia gi.

¹Wela nau gi ae, i nau ku kedea si doo naa gi fuagamu, hai tara muka too faasia na aade taꞌalaa. Haia, lea ta iimola ka iilia taꞌalaa, a Jesus Christ na wane ana oꞌoloa naa ka gania na Maa nia fuaga. ²Ma a Christ naa na kwaisuusilaa uria na lafulana garolaa gia gi. Ma langi lau na garolaa gia gi taifilia, ma garolaa gera na tooa gi sui.

³Ma lea so gia ka roosulia na kwaieresia nia a God gi, gia ka haitamana mamanaa ana na gia haitamana ana a God. ⁴Ma na wane na e haea nia e haitamana a God, sui ka langi si roosulia go na kwaieresia nia gi, na wane nae nia e suge asianaa, ma nia langi kasi too go ana na mamanalaa. ⁵Ma ni tei naa e roosulia na baelana a God, i nia na iimola rakedianalaa nia fuana a God e baita asianaa. Ma si aadelaa na e faamamanaa gia oofu fai nia a God e urii: ⁶Ni tei na e haea nia e too oofu fai nia a God, nia ka aadea doo diana gi iilingia a Jesus Christ e iilia.

Na kwaieresia faalu.

⁷Oote ruana nau gi ae, na kwaieresia na ku kedea kou fuagamu e langi lau ta doo faalu, ma na kwaieresia baa go ana na mu haitamana ua na mai ana hafalilaa. Ma na kwaieresia nae naa na faarongolaa baa mu rongoa sui naa, na muka rake diana fuagamu kwailiu. ⁸Haia, na kwaieresia nae na ku kedea kou fuagamu na e faalu laugo. Sulia na mouria a Christ ma na mouria gamu e faatainia na mamanaa na kwaieresia nae, sulia na rorodoa e garangi sui naa, ma na raralaa mamana e tala naa.

⁹Ma ni tei na e haea nia e too i laona na raralaa, ma ka maasusuala ana na haasina, nia e too ua go ana i laona na rorodoa ana si kada nae. ¹⁰Ma so ni tei na e rakediana ana haasina, i nia e too i laona na raralaa. Ma langi tesi doo ani nia haia ka faagaroa ta wane. ¹¹Ma so ni tei na e maasusuala ana haasina, nia e too i laona na rorodoa. Ma i nia ka liu laona ma ka langi si haitamana si gula na nia e lea uria, sulia na rorodoa e faarodoa naa na maana.

¹²Wela nau gi ae, i nau ku kekede fuagamu, sulia a God e manata lukea na garolaa gamu gi i nunufana a Christ. ¹³Ma i nau ku kekede fuagamu na wane baita gi, sulia gamu na mu haitamana a Christ na e too ua na mai ana hafalilaa. Ma i nau ku kekede fuagamu na daraa gi, sulia i gamu mu saitasa naa ana a Satan na Wane Taꞌa.

¹⁴Wela nau gi ae, i nau ku kekede fuagamu, sulia i gamu mu haitamana a God na Maa. Ma i nau ku kekede fuagamu na wane baita gi, sulia i gamu na mu haitamana a Christ na e too ua na mai ana hafalilaa. Ma i nau ku kekede fuagamu na daraa gi, sulia i gamu mu rigita, ma na baelana a God ka too ani gamu, ma i gamu mu saitasa na ana a Satan na Wane Taꞌa.

¹⁵Langi musi rakediana ana molaagali taꞌa, langi ta doo taꞌa i laona na molaagali. Sulia lea mu rakediana ana molaagali, gamu langi musi rakediana go ana a God na Maa. ¹⁶Sulia na kwaidoorilaa fuana na doo taꞌa gi, ma na doo gi na tooa da rikia ma daka dooria, ma na doo gi na tooa gi gera lafe sulia, ma si doo taꞌa aai gi sui laona na molaagali, langi ta doo ada kasi lea go mai faasia na Maa. Da lea sui go mai faasia na molaagali. ¹⁷Na molaagali ma na doo gi sui i laona naa na tooa gi da dooria, tara ka funu. Ma ni tei na e iilia na kwaidooria nia God naa, tara ka mouri firi.

Na Maalimaea nia a Christ.

¹⁸Wela nau gi ae, na suilana na molaagali e garangi naa! Haia, gamu mu rongoa sui naa tara na Maalimaea a Christ tara ka dao mai. Ma na maalimaea oro nia gi da dao sui naa. Nia naa, gia ka haitamana na suilana na molaagali e garangi sui naa. ¹⁹Na tooa naa gi da lea naa faasi golu, sulia e langi dasi too mamana go i laona na soefaataia golu. Ma lea so da too laona na soefaataia golu, daka too oofu ua go fai golu. Haia, ma gera lea urinae haia ka faatainia e langi ta wane ada si too oofu mamana fai golu.

²⁰Haia, ma ni gamu, a Christ e falea na Aanoedoo Aabu fua gamu, ma nia na gamu sui go muka haitamana na mamanalaa. ²¹I nau ku kekede fuagamu ma e langi lau sulia mu lalafusia na mamanalaa. I nau ku kekede fuagamu, sulia mu haitamana na mamanalaa, ma muka haitamana laugo e langi ta sugelaa ka lea mai faasia na mamanalaa.

²²Haia, ma ni tei naa wane susuge? Na wane nae na e haea hasa a Jesus e langi lau na wane aadafililana a God. Na wane urinae nia na maalimaea Christ, sulia i nia e oote nia ana a God na Maa ma na Wela nia. ²³Sulia so ni tei na e oote nia ana na Wela, i nia e oote nia laugo ana na Maa. Ma ni tei na e manata mamana ana na Wela, nia ka too oofu laugo fai nia na Maa.

²⁴Muka taingainia na faarongolaa na mu rongoa ua na mai la liogamu. Ma lea mu taingainia na faarongolaa nae, muka too oofu fai nia na Wela ma na Maa sulia dani. ²⁵Ma na doo na a Christ e bae aalualu uria falelana fuaga naa na mouria firi.

²⁶Haia, nau ku kekedea kou na doo nae gi fuagamu sulia na tooa na da iiliili uria na sugelaa gamu. ²⁷Haia, ma ni gamu, a Christ e falea sui naa na Aanoedoo Aabu fuagamu. Ma si kada na Aanoedoo Aabu e too ani gamu, langi musi nani naa uria ta wane ka faatolomai doo lau fuagamu. Sulia na Aanoedoo Aabu e faatolomai doo gi sui fuagamu. Ma na doo gi sui na nia e faatolomaida e mamana, ma e langi si suge. Nia naa muka roosulia naa na faatolomaia nia na Aanoedoo Aabu, ma muka too oofu fai nia a Christ.

²⁸Wela nau gi ae, molu too oofu fai nia a Christ, hai ana si kada nia e ooli mai ana, e langi gia kasi mou, ma e langi gia si aagwa lau faasi nia ana idalaa ana fe Dani nia e dao ana. ²⁹Muka haitamana a Christ naa na wane ana oꞌoloa. Nia naa, muka haitamana laugo na tooa gi sui na da iilia na doo na e oꞌolo gi, i gera na wela a God gi.

I gia naa na wela nia a God gi.

¹Gamu ka manata fasi sulia na rakedianalaa baita nia a God na Maa fuaga! Na rakedianalaa nia e baita asianaa, nia naa nia ka alangi gia ana na wela nia gi, ma ka mamana naa. Nia naa, na tooa la molaagali gi dasi haitamaga, sulia dasi haitamana a God. ²Ruana nau gi ae, i gia naa na wela nia a God gi, ma ka langi gia si haitamana ua ana taa naa tara gia ka hau ana. Sui gia ka haitamana ana si kada na a Christ tara ka ooli mai ana, gia ka iilingi nia, sulia tara gia ka riki nia iilingia i nia mamana naa. ³Ma na tooa gi sui na da kwaimaasimaasia a Christ urinae, daka aadasuli gera i talada faasia na taꞌalaa, iilingia a Christ na e too faasia na taꞌalaa.

⁴Ma ni tei na e aade taꞌa, nia ka garoa naa na kwaieresia a God gi. Sulia na aade taꞌalaa naa na oilana ta kwaieresia a God. ⁵Ma gamu mu haitamana naa, a Christ e lea na mai hai ka lafua na aade taꞌalaa gi, ma nia kasi too go ana taꞌalaa. ⁶Ma ni tei gera na gera too oofu fai nia a Christ, e langi dasi tasa dongaa fai nia na aade taꞌalaa. Ma ni tei gera na da tasa dongaa fai nia na aade taꞌalaa, nia langi kasi rikia ma langi kasi haitamana.

⁷Wela nau gi ae, musi manata mamana ana ta wane na e suge gamu. Ni tei na e iilia si doo e oꞌolo, nia ka oꞌolo naa iilingia laugo a Christ naa nia e oꞌolo. ⁸Ma ni tei naa e tasa dongaa fai nia na aade taꞌalaa, nia na wane nia a Satan, sulia a Satan e aade taꞌa ita ana hafalilana ua go mai. Haia, na Wela nia God e lea mai uria si doo nae, hai ka tagalangainia taa na a Satan e iilia naa.

⁹Ma ni tei na e aalua wela nia a God, e langi kasi tasa dongaa fai nia na aade taꞌalaa, sulia i nia e too ana na mouria nia a God ani nia. Ma e afetai ka tasa dongaa fai nia na aade taꞌalaa, sulia a God naa na Maa nia. ¹⁰Nia naa na eꞌetelana na wela a God gi faasia na wela a Satan gi: ta iimola na e langi kasi iili oꞌolo ma ka langi kasi rakediana ana na haasina, langi lau na wela nia a God.

Rakedianalaa fuagamu kwailiu.

¹¹Na faarongolaa baa mu rongoa ua na ana hafalilana mai e urii: gia ka rakediana fuaga kwailiu. ¹²Ma e langi gia si iilingia a Kein. Na wane baa, a Satan e too ana, ma ka haungia haasina a Abel. Uria taa na a Kein ka haungia? Sulia na doo gi a Kein e iilida gi e taꞌa, ma na doo gi na haasina e iilida e oꞌolo.

¹³Oote haasi ae, urinae laugo, langi musi kwele, lea so na tooa taꞌa gi lao molaagali da maasusuala ani gamu. ¹⁴Gia ka haitamana naa na doo naa: i nao ua mai, gia bobola uria maelaa naa, sui si kada nae gia ka too ana mouria firi. Gia haitamana si doo nae, sulia gia rakediana fuana waihaasi gia gi. Ma ni tei naa e langi si rakediana, nia e too ua farana na mamanaa ana maea.

¹⁵Ma so ni tei na e maasusuala ana na haasina, i nia naa na wane hauwane. Ma muka haitamana, na wane hauwane e langi kasi too ana na mouria firi. ¹⁶Si doo na e aadea gia ka haitamana na rakedianalaa, e urii: sulia a Christ e mae usi gia. Nia naa, ni gia laugo, gia ka maabe uria na maelaa laugo usia na haasiga gi. ¹⁷Lea so ta wane todadoo na e rikia na haasina e siofaa, sui langi kasi manatai nia go na haasina nae, ma langi kasi adomia, e afetai ka haea mamana hasa nia e rakediana fuana a God. ¹⁸Wela nau gi ae, langi gia si rakediana go aga ana baea. Gia ka faatainia na rakedianalaa mamana gia ana si doo gi na gia iilia.

¹⁹Nia nae aadea tara gia ka haitamana gia too ana na mamanalaa ma langi gia si manata aꞌabo si kada gia ka take i maana a God. ²⁰Ma lea na manataga ka keto gia, gia ka haitamana a God naa e baita liufia na manata gia gi, ma ka haitamana na doo gi sui. ²¹Haia, oote ruana ae, lea so na manata gia gi langi kasi keto gia, gia si mou i maana a God. ²²Ma gia haitamana gia ka ngalia taa naa gia gania uria, sulia gia roosulia na kwaieresia nia gi, ma gia ka iilia si doo gi na e faaele nia. ²³Haia, na kwaieresia nia e urii: gia ka manata mamana ana a Jesus Christ na Wela nia, ma gia ka rakediana ani gia kwailiu, iilingia na a Christ e oodu gia uria. ²⁴Ma ni tei naa gera roosulia na kwaieresia nia gi, nia ka too ana a God, ma a God ka too ani nia. Ma sulia na Aanoedoo Aabu na nia e falea fuaga, gia ka haitamana naa na a God e too ani gia.

Na aanoedoo mamana ma na aanoedoo susuge.

¹Ruana nau gi ae, langi musi manata mamana ana tooa gi sui na da haea da too ana na Aanoedoo Aabu. Lea doo muka iilitooda fasi hai muka daotoona lea na aanoedoo na da too ana e ita mai faasia a God. Sulia na profet susuge oro gi da lea sui na ana si lifu gi sui. ²Lea mu iili urii, haitamana tara muka daotoona lea so nia na Aanoedoo a God: Lea ta iimola e faarongo ana a Jesus Christ e lea mai ka hau ana wane, na iimola nae nia too ana Aanoedoo na e ita mai faasia a God. ³Ma lea ta iimola na e tofea si doo naa sulia a Jesus, nia kasi too go ana na aanoedoo na e ita mai faasia a God. Na Aanoedoo na nia too ana, e ita mai faasia na Maalimaea a Christ. Haia, gamu mu rongoa sui naa tara na Maalimaea a Christ ka dao mai, ma si kada nae nia e too ua naa i see laona na molaagali.

⁴Wela nau gi ae, ni gamu naa na tooa a God gi, ma muka saitasa na ana na profet susuge gi. Sulia na Aanoedoo Aabu na e too ani gamu e rigita ka tasa ana a Satan na e too ana na tooa taꞌa la molaagali. ⁵Ma na profet susuge nae gi da bae sulia na dongana taꞌalana na molaagali, ma na tooa taꞌa nae gi daka fafurongoda, sulia gera na tooa na taꞌalaa e baita faafida. ⁶Haia, ma ni gia naa na tooa a God gi. Ma ni tei naa e haitamana a God, nia ka fafurongo gia. Ma ni tei na langi si tooa a God, langi kasi fafurongo gia. Nia naa aadea gia ka aada haitamana na eꞌetelaa i matangana na Aanoedoo mamana ma na aanoedoo susuge.

A God e rakediana asianaa fuana tooa gi sui.

⁷Oote ruana nau gi ae, gia rakediana fuaga kwailiu, sulia na rakedianalaa e ita mai faasia a God. Ma ni tei na e rakediana, i nia naa na wela a God, ma i nia ka haitamana laugo a God. ⁸Ma so ni tei na e langi kasi rakediana, nia langi si haitamana a God, sulia a God e rakediana asianaa. ⁹Ma a God e faatainia na rakedianalaa nia fuaga ana falelana mai tee fe Wela muutaia nia lao molaagali, hai gia ka mouri i nunufana. ¹⁰Haia, na rakedianalaa e urii: E langi lau gia na gia rakediana fasi ana a God, ma a God nia rakediana fasi fuaga ma ka falea mai na Wela nia haia ka iilingia na kwaisuusilaa uria na lukelana na garolaa gia gi.

¹¹Ruana nau gi ae, sulia a God e rakediana fuaga urinae, gia ka rakediana laugo fuaga kwailiu. ¹²E langi ta iimola si rikia a God. Sui lea so gia ka rakediana fuaga kwailiu, a God ka too oofu fai gia ma na rakedianalaa nia kafi ngasi ani gia.

¹³Ma gia ka haitamana gia oofu fai nia a God ma ni nia ka oofu fai gia, sulia nia e falea sui na Aanoedoo nia fuaga. ¹⁴Ma melu rikia naa na Wela nia ma melu ka haea naa fuana tooa gi lau naa a God na Maa e fale nia na mai hai ka faamouria na tooa gi sui lao molaagali. ¹⁵Ma lea so ta iimola ka ainitalo ana Jesus naa na Wela nia a God, i nia ka too oofu fai nia a God, ma a God ka too oofu fai nia. ¹⁶Ma gia haitamana naa ma gia ka manata mamana ana na rakedianalaa na a God e too ana fuaga.

A God e rakediana asianaa, ma ni tei naa e rakediana, nia e too oofu naa fai nia a God, ma a God ka too oofu fai nia. ¹⁷Ma na rakedianalaa a God fuaga e baita asianaa eeri gia ka noni raraꞌa ana fe Dani ana Keketoa. Ma tara gia ka noni raraꞌa sulia na mourilaga lao molaagali naa, e iilingia laugo na mourilana a Christ. ¹⁸Ma langi gia si mou ana a God, sulia nia rakediana asianaa fuaga. Tooa eꞌete gi da mou ana kwaelaa a God, sulia langi gera si manata mamana ana rakedianalaa a God. Sui gia mone, langi gia si mou, sulia gia haitamana a God e rakediana asianaa fuaga.

¹⁹Gia rakediana, sulia a God naa na e rakediana fuaga totongenao. ²⁰Lea ta iimola na e haea nia e rakediana ana a God, sui ma ka maasusuala ana na haasina, i nia na iimola susuge go ana. Sulia i nia e afetai ka rakediana ana a God na wane na nia langi si rikia, lea so i nia e langi si rakediana fuana haasina na iimola na nia e rikia. ²¹Ma na kwaieresia na a Christ e falea fuaga e urii: So ni tei naa e rakediana fuana God, nia ka rakediana laugo fuana haasina.

¹So ni tei na e manata mamana ana a Jesus nia naa wane aadafilia a God, nia naa na wela a God. Ma ni tei na e rakediana fuana ta maa, nia ka rakediana laugo fuana na wela nia. ²Haia, gia haitamana gia ka rakediana fuana wela a God gi sulia gia rakediana ana a God ma gia ka roosulia na kwaieresia nia gi. ³Ma lea gia ka rakediana fuana a God, gia ka roosulia na kwaieresia nia gi. Ma na kwaieresia nia gi kasi afetai go fuaga, ⁴sulia na wela a God gi sui, haitamana gera ka saitasa faafia na taꞌalaa gi i laona na molaagali. Ma gia ka saitasa faafia na taꞌalaa sulia na manata mamanalaa gia ana a Jesus. ⁵Ni tei na e haitamana ka saitasa faafia na taꞌalaa? Taifilia na iimola gi na da manata mamana ana Jesus naa na wela a God.

⁶A Jesus Christ naa na wane na e lea mai fai nia na kafo ana siuabulaa ma na abu ana maelana. Nia lea mai langi lau fai nia na kafo go ana, ma nia ka lea mai fai nia roo si doo nae gi sui go, kafo ma na abu. Ma na Aanoedoo Aabu ka faarongo laugo sulia, sulia na Aanoedoo e bae mamanaa. ⁷Na oolu si doo na e faarongo sulia a Jesus: ⁸Na Aanoedoo Aabu ma na kafo ma na abu, ma na oolu si doo nae gi da faamamanaa sui go tee si doo. ⁹Gia manata mamana ana na baelana na wane. Haia, na baelana a God na e rigita ka tasa, ma nia ka bae na sui naa sulia na Wela nia. ¹⁰Nia nae so ni tei na e manata mamana ana na Wela nia a God, nia ka manata mamana ana taa naa a God e bae sulia na Wela nia. Ma so ni tei naa e langi kasi manata mamana ana a God, i nia e haea a God na wane susuge, sulia i nia kasi manata mamana ana si taa na a God e haea sulia na Wela nia. ¹¹Ma si baelaa a God na e faamamanaa sulia na Wela nia e urii: a God e falea sui naa na mouria firi fuaga, ma na mouria naa e ita mai faasia na Wela nia. ¹²Ma so ni tei na e too oofu fai nia na Wela nia a God, nia ka too ana na mouria nae. Ma so ni tei na e langi kasi too oofu fai nia na Wela nia a God, nia kasi too laugo ana na mouria.

Na mouria firi.

¹³I nau ku kedea si doo naa fuagamu hai muka haitamana, i gamu na mu manata mamana ana na Wela nia a God mu too na ana na mouria firi. ¹⁴Ma gia si mou i maana a God, sulia gia haitamana nia e rongo gia si kada gia gania uria tesi doo na e lea sulia na kwaidooria nia. ¹⁵Nia e rongo gia go ana si kada gi sui gia gani nia ana. Ma sulia gia haitamana si doo naa nia mamana, i gia ka haitamana laugo nia ka falea fuaga si taa naa gia gania faasi nia.

¹⁶Ma lea o rikia ta haasi amu e iilia tesi doo taꞌa na e langi kasi mae ana, nia bobola oko fooa fuana a God hai tara ka falea mouria fuana. Nau ku bae sulia na garolaa gi na e langi kasi talaia na tooa gi ua uria na maea. Sui taa, teni garolaa laugo e talaia na wane uria na maea. Ma nau kusi haea hai muka fooa fuana a God sulia si doo nae gi. ¹⁷Na doo gi sui na gia iili taꞌa ana e garo sui go. Sui, teni si taꞌalaa aai gi e langi kasi talaia na wane uria na maea.

¹⁸Gia ka haitamana na wela a God gi e langi dasi tasa dongaa fai nia na aade taꞌalaa, sulia Jesus na Wela a God e aadasulida ma a Satan na Wane Taꞌa e afetai ka aadea tesi doo ani gera.

¹⁹Haia, gia haitamana naa i gia na tooa a God gi, sui boroi ana a Satan e baita usia na molaagali sui.

²⁰Ma gia ka haitamana laugo na Wela nia a God e lea na mai, ma ka falea naa na haitamadooa fuaga, hai gia ka haitamana God mamana. Ma gia ka too oofu fai nia a God mamana ana oofuofua fai nia a Jesus Christ na Wela nia. I nia naa na God mamana, ma nia naa na mouria firi.

²¹Wela nau gi ae, muka aadasuli gamu i talagamu faasia na doo gi na teni tooa da haea na a god gi, sui e langi lau na god mamana gi.