12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

TITO

Kukue Ko Paulo Lɛwɔni Útǝ Tito

1

1Mɔ, Paulo, wǝ ni Onanto eto usumunyǝ ku Yesu Kristo eto ɔtɔnkpe, mɔ ni futsyǝ nlɛ fǝ kukue komfo bɔwɔni. Onanto dílǝkǝ mɛ nya ótsyese mɛ nkǝ nsu nwunsǝko wǝ betidi ba úlǝkǝ útsyǝ eto bafobanɔ lǝ nyɛnko mǝ lǝ bafo Ditiki Sɛɛ nǝmǝ bánɔ lǝ bo bafokanɔsu ǝsuǝ. 2Bofokanɔsu komfo dítǝ bɔnlɛ kusu bobe itǝ nkpǝ manlo bo ǝsuǝ bófo bɔ́nɔ nɛ. Nya Onanto wǝ lǝmbɔwɛ bo kosatee, wǝ lɛtɛyi ditiki nǝmfo útsyǝ fɛ úyifo kawunsiǝ. 3Wǝ dílǝkǝ nkpǝ manlo eto Ditiki Sɛɛ nǝmfo óte bo ɛyɛ lǝ wǝ ditiki nǝ minlɛ mi bɔtɛyi lǝ lefe nǝ wǝ kosate lɛtɛyi utsyǝ ǝsuǝ. Nyamfo ni lesa nǝ ufi okpe mɛ lǝ ani nya mimfi minlɛ letsya bobe kǝtǝ betidi. Boanto Onanto wǝ ni bo Ofomfokǝtǝ, wǝ lɛtɛyi mɛ nkǝ mbe ni letsya nɛ.

4Mɔ olala Tito, nlɛ kukue komfo bɔwɔni kǝtǝ fǝ itsyise eyifo mɔ ubi tinti lǝ bofokanɔ bɔni bo ǝsuǝ bonkpe eso. Nya nlɛ Boanto Onanto ku Kristo Yesu wǝ ni bo Ofomfokǝtǝ lekpakpa bǝ ɔlɛ fǝ ku lefonǝ ku diyuǝ ǝsuǝ, nya lǝ utǝ fǝ diyuǝsǝ.

Paulo Ǝtǝ Tito Keyifo Kǝtsyuǝ Lǝ Kreta.

5Nyani fǝ ntsyǝ lǝ Kreta ku nsusu bǝ lǝ alɔ lesa saa nǝ díbu bɔlɔkǝtsyǝ ǝtsyǝ. Nya lǝ umǝ saa, lǝkǝ batɔnkotɔnko ba loofo buńyǝ lǝ bafokanɔfɔ eto kɛnyɛ fe kase míntɛyi fǝ miǝ yifo. 6Fe bafokanɔfɔ eto batɔnkotɔnkoo, yanle bǝ etiki bua saa kɛ lǝ mǝ ǝsuǝ. Nya ele bǝ uyifo utidi wǝ mfi kusiǝ kɔni hã. Nya wǝ bebi tsya eyifo bebi ba léfo banɔ kekleke, nya beenyifo mba ditidi ato, nya beebu mǝ antomǝ. 7Fe bafokanɔfɔ eto ɔtɔnkotɔnko wǝ laabe Onanto eto keyifoo, yanle bǝ bǝnyǝ nye befi etiki bua saa lǝ wǝ nye ukabesǝ ǝsuǝ kato nye kafo kanyi wǝ mlǝmlǝmlǝ. Nya yanle bǝ udui utekpe, nya yanle bǝ okakpɔ ekiti kekleke nye ukasɛsǝ ǝnǝmi tsya lǝ atabi ǝsuǝ. 8Ele bǝ ofo bafɔ bofo, keyifo kafoɛkpɛ nya woala asa sɛɛ nya woalɛ wǝ ǝsuǝ ola. Nya ele bǝ uyifo utidi wǝ nkpe ditsyǝbi sɛɛ, nya uyifo kɛnkɛ lǝ lɛwɔnɔ ǝsuǝ, nya wooyɛ lǝ kɔfi ǝsuǝ. 9Ele bǝ uyifo nwǝ nlɛ Ditiki Sɛɛ nǝmǝ lǝ kɔni kekleke fe kase bofokanɔ eto kusu leté. Nya kusu komfo ǝsuǝ hã ele bǝ wuukayɛ bǝ lǝ okpe betidi bamba tsya ute lǝ ǝsuǝ, nya lǝ ofo mba laataka kǝńyǝ lǝ Ditiki Sɛɛ nǝmfo ǝsuǝ eto botakebu bulǝkǝ kate mǝ.

10Itsyise betidi kpǝ kpe ba nlɛ betidi bɔwɛ nya bátaka bǝńyǝ lǝ ditiki nǝmǝ ǝsuǝ ku mǝ ebukisa buyifo. Nya mba nso asa nyamfo kenke buyifo, mǝ ni Yudafɔ eto bafokanɔfɔ. 11Efe bǝ taka ǝńyǝ lǝ mǝ asa nyamfo eto okle eto bote ǝsuǝ, itsyise asa nyamfo ǝǝnǝ bulǝ kakpe lǝ diyo eto betidi eto bofokanɔ ǝsuǝ. Nya se ini atabi asa buabote eto bateasa bamfo lǝǝnyǝ ketsyiko le nya ǝsuǝ esoo, nyaso banlɛ asa bua nyamfo bote nɛ. 12Nya Kreta eto utidi ɔni wǝ ni mǝ unyǝlǝkǝtidi lɛtɛyi nkǝ, “Kretafɔ, bidia baatɛyi mi lefe saa nya beeyifo mba laabiasǝ asa kakpe fe bebuki, nya bedikpũ beni nya bankpe sɛflɔ tsya.” 13Asa nya unyɛlǝkǝtidi ǝmfo lɛtɛyi eyifo ɔnukualɛ. Nyaso bikǝ mǝ ato bǝ lǝ bayɛ ditsyǝbi bua nǝmfo bote itǝ lǝ mǝ bofokanɔ lǝ buyifo sitinti. 14Nyamfo luutǝ bǝ bǝlǝkǝ mǝ ato betsyiko lǝ Yudafɔ eto etikitsyuɛntsyuɛ ku betidi ba eto asatete nnya lanyɛ lǝ ɔnukualɛ eto Ditiki Sɛɛ nǝmǝ ǝsuǝ nɛ.

15Betidi ba kenke diyifo mǝ ǝsuǝ kɛnkɛɛ, mǝ eyifosa tsya eyifo kɛnkɛ. Fɛɛ lǝ betidi ba diyifo mǝ ǝsuǝ betidi bua nya bámfo banɔ ɔflɔɔ, kulesa menyifo kɛnkɛ. Mǝ esibubu ku mǝ ketu eyi ku asa bua, lǝ nyaso bǝǝmbofo nya ni asɛ lekpo butsyǝ ketsyiko lǝ abua ǝsuǝ. 16Mǝ kosate aatɛyi bǝ beebu Onanto, fɛɛ mǝ eyifosa mante nko. Beyifo betidi ba laabiasǝ mǝ ǝsuǝ nya beembu kulesa nya bǝǝńyǝ bǝtǝ lesa sɛɛ saa buyifo.

2

Te Bofokanɔ Eto Asa Nnya Nyɛ Lǝ Ɔnukualɛsu Ǝsuǝ.

1Fɛ fǝǝ, te asa nnya nyɛ lǝ bofokanɔ eto kusu sɛɛ ǝsuǝ. 2Te basani eto beninǝ kenke bǝ ele bǝ bebu mǝ ǝsuǝ, lǝ bakafo mǝ lɛkɔɛle ani boso ku bǝtǝ ǝnǝ lefe saa. Nya lǝ balɛ mǝ ǝsuǝ kukɔnɔ, balɛ mǝ bofokanɔ kɔni kekleke, lǝ bala mǝ bǝtsyuǝ, nya lǝ bakpe nkɛale ku lǝ bakɛ dibusǝ tsya. 3Nko ke ini itǝ besioninǝ tsya nɛ, te mǝ kase ele bǝ bǝsiǝ nkpǝ bo dinyǝ itǝ besio ba diyifo kɛnkɛ. Yanle bǝ bakakpadi betidi aye bua. Nya yanle bǝ bǝnǝ nte bǝkpǝ tsya. Bomu ele bǝ bate betidi ditsyǝbi sɛɛ. 4Nya ele bǝ baté besiobitɛ ba nsi bese kase ele bǝ bala mǝ bese ku mǝ bebi tsya. 5Nya ele bǝ bate mɛ kase bɔɔlɛ mǝ ǝsuǝ ola, nya ele bǝ bǝsiǝ nkpǝ bo diyifo kɛnkɛ, nya lǝ beyifo bǝsiǝ ba laalɛ mǝ bese ola kukɔnɔ, mba leebu mǝ bese. Nyamfo luutǝ bǝ kuutsyuǝ saa ǝmbɔtɛyi kulesa bua saa iitsyi lǝ Ditiki Sɛɛ nǝ ditsyi lǝ Onanto ɔflɔ ǝsuǝ nɛ.

6Nko ke ɛyɛ lǝ kusu komfo ǝsuǝ ele bǝ lǝ ayɛnko bakosobi bamǝ tsya lǝ akpe mǝ nkɛale lǝ kase ele bǝ balɛ mǝ ǝsuǝ ola. 7Lǝ asa nyamfo kenke eto kamaa, ele bǝ yifo fǝ ǝsuǝ futsyǝ eto ditsyǝbi ele bǝ utidi saa be lǝ okase utsyiko. Nya lǝ ǝńyǝ kekleke lǝ akate asa ku ɔnukualɛ. 8Be kukɔnɔ lǝ ekedi betidi etiki ku lǝ kusu sɛɛ ǝsuǝ itǝ bǝ bǝmbunyǝ kabua saa itsyi lǝ fǝ ǝsuǝ, nya luutǝ bǝ fǝ baló tsya ɛmbɔtɛyi kabua saa lǝ bo ǝsuǝ, bomu lǝ kofani lǝ kɔlɛ mǝ.

9Ele bǝ ndomufɔ bokosǝ mǝ ǝsuǝ kasɔ bǝtǝ mǝ banamute. Nya ele bǝ mǝ eyifosa kpe mǝ banamute disuǝyuǝ lǝ lesa saa ǝsuǝ. Nya yanle bǝ bǝnǝnko mǝ etiki. 10Yanle bǝ beyu mǝ tsya, bomu ele bǝ baté mǝ bǝnkǝ betidi sɛɛ beni, nya beeyifo asa lǝ kusu ǝsuǝ kǝtǝ mǝ. Nyamfo luutǝ buunyǝ bǝtsyǝ lekpo bǝ bo asa nnya boate iitsyi lǝ Boanto Onanto wǝ ni bo Ofomfokǝtǝ ǝsuǝǝ, eyifo asa sɛɛ.

11Itsyise Onanto ǝlǝkǝ wǝ lefonǝ onkpe óte bo, bǝ kawunsiǝ eto betidi kenke nyǝ dilǝkǝ. 12Onanto eto kafoɛkpɛ kamǝ lɛ bo bote nkǝ, bulǝkǝ bo ato butsyiko lǝ nkpǝ bua busiǝ ku kawunsiǝ eto asa bimba kama butǝkǝko ǝsuǝ. Nyaso ele bǝ bɔlɛ bo ǝsuǝ kukɔnɔ, nya lǝ busiǝ nkpǝ sɛɛ, lǝ buyifo ǝsuǝ kɛnkɛ lǝ kawunsiǝ kamfo ǝsuǝ 13Kusu komfo buufi bukabe sɛtɔ itǝ diyi kplɛ nǝ ǝsuǝ búfi bo kusubebe bútǝkǝ nɛ. Diyi nǝmfo ni diyi nǝ ǝsuǝ bo Onanto Ɔkplɛnyǝ, bo Ofomfokǝtǝ Yesu Kristo eto diyǝnde lɔɔbɔ utsyuǝ saa nyǝ. 14Úfi wǝ ǝsuǝ útǝ lǝ bo disi, bǝ lǝ ulǝkǝ bo utsyiko lǝ bo abua saa ǝsuǝ lǝ bofiani betidi kɛnkɛ ba ni wǝ kosate eto bale, nyaso bíala bǝ biekeyifo kasɛɛ hã nɛ.

15Te asa nyamfo ku ǝsuǝale nya Onanto dítǝ fǝ, nya lǝ akpe nkɛale betidi ba kenke laanɔ fǝ Ditiki Sɛɛ nǝmǝ kekleke, nya lǝ ǝnyǝnki akpe mba lanlɛ bɔyɛ lǝ kusu ǝsuǝ tsya. Nyaso mǝntǝ kuutsyuǝ saa kusu lǝ unyǝ fǝ olosǝ.

3

Bikǝyifo Kasɛɛ Ka Looboko Kutǝkǝ Itǝ Betidi Ba Ta.

1Klomasǝ mǝ lǝ mǝmblɛ bakloma lǝ babokosǝ ǝsuǝ kasɔ kǝtǝ mǝ batɔnkotɔnko ku aba lǝ bǝtsyue mǝ ditiki koto, nya lǝ bekeyifo kasɛɛ lǝ kusu saa ǝsuǝ. 2Tɛyi mǝ fǝnkǝ bankatɛyi betidi eto kabua. Bomu beyifo sɛhɔ ku utsyuǝ saa lǝ bǝsiǝ lǝ diyuǝ ǝsuǝ ku utsyuǝ saa. Nya lǝ bekebu utidi saa lǝ kusu saa ǝsuǝ.

3Fɛɛ bo ǝmǝ tsya ébuyifo ebukisa bunyǝ ku ato titli, nya bóta bubu kɔ ǝmǝ. Nya ǝsuǝ eto sinǝ eto abua yifoyifo butǝkǝko tsya diyi bo ǝsuǝ kɔ. Nya búfi bo lefe bútǝ disialeyifoyifo, asabuyifo ku kǝnǝminsɛ, nya betidi díkisi bo nya bo tsya díkisi mǝ. 4Fɛɛ lǝ lefe nǝ Boanto Onanto, bo Ofomfokǝtǝ, dílǝkǝ wǝ kafoɛkpɛ ku lelabi óte boo, 5ófo bo lǝ nkpǝ. Inni lǝ bo kasɛɛ ka búyifo eso, bomu ɛyɛ lǝ Onanto lǝ wǝ kosate eto kaminsǝnyǝnyǝ ǝsuǝ, itsyise útǝ nkǝ wǝ Lɛwɔnɔ bǝ didufǝ lǝ bo ǝsuǝ. Lɛwɔnɔ nǝmfo esi dítǝ besinkli bále bo nya dítǝ bo nkpǝ fɔfɔ, nya díflǝ bo itǝ bǝ buyifo kɛnkɛ. 6Onanto efi wǝ Lɛwɔnɔ útǝ bo kpǝ ɛyɛ lǝ bo Ofomfokǝtǝ Yesu Kristo ǝsuǝ. 7Nya ɛyɛ lǝ wǝ lefonǝ esoo, bonko wǝ eto nti ǝbǝ bɔlɛkɛ itǝ eso bontsya ditiki ǝbǝ búnyǝ nkpǝ manlo bo bɔnlɛ kusu bobe. 8Ditiki nǝmfo eyifo ɔnukualɛ.

Nya nla miǝ lǝ afo nya kekleke. Nya betidi ba díkafo Onanto banɔɔ, ele bǝ befi mǝ lefe bǝtǝ asa sɛɛ buyifo nya looboko kutǝkǝ itǝ betidi ba kenke.

9Mǝǝnnǝ etiki ku utidi lǝ asa bimba ǝsuǝ. Mambiasǝ lefe lǝ betidi eto ketsyikɔ bokla kate ǝsuǝ, mǝndiǝ kǝdiǝ lǝ efi Mose eto afi eto etiki eyifo kǝnǝ eto etiki. Asa nyamfo kenke ǝmbǝ kutǝkǝ saa. 10Kǝ ato utidi wǝ laakpe ntisensǝsensǝ lǝ bafokanɔfɔ nti sinuǝ. Lǝ nnya kamaa, yani wǝ. 11Eyi fǝ utidi ǝmfo eto oklee, lebua edi wǝ ǝsuǝ nya wǝ asa buayifoyifo ǝǝlǝkǝ wǝ kate, nya ókalo wǝ ǝsuǝ dikpi.

Etiki Fɛfɛ Ku Nkla.

12Lǝ ntsyese fǝ Artema nye Tihikoo, yɛ kusu saa ǝsuǝ lǝ ǝbǝ ǝnyǝ mɛ lǝ Nikopoli. Itsyise mfó mimfi nsusu miǝ mɔɔkɛ lǝ lɛyɔ lefe nɛ. 13Kplatsya lǝ ayɛ kusu saa lǝ awunsǝko Zena wǝ ni afi eto ukuente ku Apolo bǝ lǝ bǝmuǝ ǝsuǝ itǝ mǝ kusu komǝ busu. Nya laabe fǝ bakɛ lesa saa nǝ baahiã. 14Ele bǝ mba dikafo baanɔ kasé kase boofi mǝ lefe kenke bǝtǝ asasɛyifoyifo nya looboko kutǝkǝ itǝ mǝ. Nya kamaa, ele bǝ bafo betidi bamba tsya bɔwunsǝko lǝ bayɛ aflɔsa.

15Bayimi ba kenke nkpe mɛ lǝ ɔflɔ mfo bǝ bǝǝsiǝsǝ fǝ. Fintsya siǝsǝ bayimi mba dikafo baanɔ ba nkpe mfó ǝtǝ bo.

Onanto lǝ ɔlɛ mimblɛ kenke lǝ wǝ lefonǝ ǝsuǝ.