KƎLƎKƎ KATE

KƎLƎKƎ KATE

Yohanes Eto Kǝlǝkǝ Kate Eto Kukue

¹Kukue komfo eto asa eyifo asa nnya Onanto dítǝ nkǝ Yesu Kristo lǝkǝ ote beyifoyifo lǝ nnya lǝǝbǝ bubǝ lǝ lefe kliminti ǝsuǝ. Kristo ǝtǝ Yohanes wǝ ni wǝ uyifoyifo áte nyamfo lǝ lefe nǝ ótsyese Onanto eto ɔtɔnkpe wǝ ɔflɔ. ²Nya Yohanes lɛtɛyi asa nnya kenke únyǝ. Nyǝ nyamfo ni kɛnyɛ ka ditsyi Onanto ɔflɔ ku ɔnukualɛ eto ditiki nǝ Yesu Kristo dílǝkǝ óte. ³Disuǝyuǝ itǝ nwǝ lookla kukue komfo, nya disuǝyuǝ itǝ betidi ba tsya lɔɔnɔ Onanto eto katɛyikǝtsyǝ eto etiki nyamfo nya bootsyue asa nnya báwɔni bákpe lǝ kukue komfo koto. Itsyise lefe nǝ ǝsuǝ asa nyamfo luubǝ ebɔfi.

Yohanes Ǝsiǝsǝ Bafokanɔfɔ Eto Etsyukpa Akuanse Nya Nkpe Lǝ Asia Eto Lekpake Mfó.

⁴Mɔ Yohanes uni lɛwɔni kukue komfo minlɛ mi bafokanɔfɔ eto etsyukpa akuanse nnya nkpe lǝ Asia eto lekpake nǝmfo botsyese.

Lefonǝ ku diyuǝ nǝ ditsyi Onanto wǝ nsi nkpǝ mɔmɔ, wǝ dísiǝ taa kasɔ ketsyikokɔ, wǝ nsi nlɛ bubǝ, lǝ usiǝko mi lefe nǝ kenke. Nko ke awɔnɔ akuanse nnya ńyǝ lǝ Onanto eto lekankpomɛ eto ǝnǝmi ⁵ku Yesu Kristo wǝ ni ɔnukualɛ odansiɛnyǝ wǝ ni nwǝ Onanto létakasǝ utsyiko ɔkɔmǝ tutɛ nya uni kasɔ mfo eto baka kenke eto oka wǝ ntǝkǝ kato eto lefonǝ ku diyuǝ lǝ disiǝko mi. Waala bo, nya úlǝkǝ bo utsyiko lǝ bo abua ǝsuǝ ku wǝ kɔtɔ. ⁶Nya útsyǝ sekakedikɔ útǝ bo, úyifo bo besumunyǝ lǝ busumu wǝ Onanto ku Anto ǝmǝ. Yesu Kristo eto ale ni diyǝnde ku ǝsuǝale idu manlo isu manlo. Ibǝ itǝ.

⁷Bebe! Utǝkǝ lǝ asɔmiloku ǝsuǝ ɔlɛ bubɛ!

Utsyuǝ saa ebunyǝ wǝ

ku mba léto wǝ afle kenke tsya.

Kawunsiǝ eto betidi kenke ebuwi kaminsǝku bembe ku binǝntu lǝ wǝ ǝsuǝ!

Ibǝ itǝ.

⁸Bonamute Onanto, Ǝsuǝalenyǝ Kenke ǝmǝ lɛtɛyi nkǝ, “Mɔ ni kasɔ ketsyikokɔ ku kaalosǝkɔ, wǝ nkpe mɔmɔ, wǝ lɛkɛ taa ketsyikokɔ, wǝ nsi nlɛ bubǝ.”

Yesu Kpe Ǝsuǝale Lǝ Ukpe Ku Bekpenkpe Ǝsuǝ.

⁹Mɔ Yohanes, mi ɔyimi wǝ dítǝkǝko Yesu ku mi, nya biakpe utu kakplatsya lǝ disuǝtsyǝ ǝsuǝ kǝnyǝ kanyi ka leetu mba ni wǝ sekakedikɔ kamǝ eto bale. Béti mɛ bakpe lǝ kasɔ ka ntu letsyilama baakpo Patmos itsyise mbe Onanto eto Ditiki Sɛɛ nǝmǝ letsya ku ɔnukualɛ wǝ Yesu dílǝkǝ óte eso. ¹⁰Lǝ Bonamute eto diyi nǝmǝ ǝsuǝǝ, Lɛwɔnɔ Kɛnkɛ áyifǝ dísiǝ lǝ mɛ, ete mínnɔ ɔkɔɛ wǝ léle bembembe fe kakpatsyaku eto kakle lǝ mɔ kama eti. ¹¹Ɔkɔɛ ǝmǝ átɛyi nkǝ, “Wɔni lesa nǝ fǝnyǝ ǝtsyǝ nya lǝ efi kukue komfo atsyese bafokanɔfɔ eto etsyukpa nnya nkpe lǝ kǝmǝnkplɛ ekuanse kamfo. Ke ni Efeso, Smirna, Pergamo, Tiatira, Sardis, Filadelfia, ku Laodikea.”

¹²Nya lefe nǝ míntsyi míwunisǝmiǝ lǝ mbe futsyǝ nlɛ mɛ etiki budinkoo, nnyǝ sika sia eto kakandiɛyi ekuanse. ¹³Nnyǝ lǝ ke nti lesa nǝ lele utidi eto ditsyǝbi nǝ nkpe awukɛntsyɛ nnya dikulǝ ekpo wǝ lǝ nkpato nya seka eto abɔsu nkle wǝ lǝ lɛkɔɛsi. ¹⁴Wǝ disi eto sewɔni eflubi futututu fe osamu eto sele nye olokotuku nya wǝ ǝnǝmi nlɛ buyǝnde fe ute wǝ nlɛ buńyǝ. ¹⁵Wǝ nkpato lɛ buyǝnde fe ayiwa nnya bǝlǝkǝ lǝ ute bási lele nya wǝ ɔkɔɛ eto nnya nlɛ bɔbɔ lele ketu eto ntu bo ditsyi koba kato bɔnlɛ boto lǝ ditumbu kasɔ eto kudu. ¹⁶Utidi ǝmǝ ákɔbe befandebi bekuanse ɔlɛ lǝ wǝ kodiani. Nya lesiabi nyɛ nnuǝ yayaya lɛbɔ dítsyi lǝ wǝ kɛnyɛ. Nya wǝ ǝnǝmi kenke nlɛ buyǝnde fe nkɔminti eto kofe.

¹⁷Se mínyǝ wǝǝ, ndu nnɔ lǝ wǝ akɔ fe utidi wǝ díkpe. Úfi wǝ kodiani útǝkǝ mɛ lǝ ǝsuǝ nya ɔ́tɛyi nkǝ, “Mante sikpi! Mɔ ni Ututɛ ku Ɔfɛfɛ. ¹⁸Mɔ ni nwǝ nsi nkpe nɛ! Ńkpe, fɛ mɔmɔɔ, nsi nkpe idu isu manlo manlo. Nkpe ǝsuǝale lǝ ukpe ku bekpenkpe eto kawunsiǝ ǝsuǝ. ¹⁹Nyaso wɔni asa nnya fǝnyǝ, asa nnya nkpe mɔmɔ ku nnya luubǝ kama tsya ǝtsyǝ. ²⁰Akulasa nnya nkpe lǝ befandebi akuanse nnya fǝnyǝ lǝ mɔ kodiani ku sika sia eto kakandiɛ eto keyi ekuanse kamǝ ni bǝnkǝ befandebi bekuanse biamǝ ni Onanto batɔnkpe itǝ bafokanɔfɔ eto etsyukpa akuanse nyamǝ. Nya iyi ekuanse nyamǝ ni etsyukpa akuanse nyamǝ.”

Kukue Ko Ɔ́wɔni Utǝ Efeso Eto Bafokanɔfɔ Eto Ditsyukpa.

¹Mfo nya ɔ́tɛyi mɔ Yohanes nkǝ, “Wɔni etiki nyamfo atsyese Efeso eto bafokanɔfɔ eto ditsyukpa eto Onanto eto ɔtɔnkpe fǝnkǝ,

Mɔ, Yesu, nwǝ nlɛ befandebi bekuanse lǝ kodiani, nya ɔnlɛ bɔyɛ lǝ sika sia eto kakandiɛ eto keyifo ekuanse nti eto etiki ni nnya nlɛ bubǝ mfo nɛ.

²Nnyi keyifo ka fékeyifo, nyi kase fákplatsya ku kase fákpe dibusǝ ku kase fákpe nkɛale fǝnyǝ kanyi. Nnyi miǝ aanla babuyifo tidi eto asa. Áto mba laakpo mǝ ǝsuǝ bǝ batɔnkpe abe, fɛɛ benni, nya fǝnyǝ fǝ beyifo badiantidi. ³Nyi miǝ akpe dibusǝ nya fǝnyǝ kanyi lǝ mɔ disi nya ani mánlo fǝ.

⁴Fɛɛ kabua ka minyǝ lǝ fǝ ǝsuǝ ni bǝnkǝ, ensi anla mɛ mɔmɔ fe kase fákala mɛ kɔ. ⁵Nyaso kloma kaka fǝtǝkǝ fɛ fáfankli fetsyi ǝsuǝ. Tsyi awuninsǝ lǝ ǝtsyǝ fe kase fǝtsyǝ kɔ. Nya lǝ tsyi awunisǝ lǝ fǝ abua ǝsuǝ, lǝ inni nko muubǝ ntsyi fǝ okandiɛ eto uyi ǝmǝ lǝ wǝ kǝnyǝkɔ ⁶Fɛɛ nnya ni fǝ afele ni bǝnkǝ, leekisi asa nnya Nikolatia eto betidi leeyifo fe kase mintsya leekisi nya.

⁷Lǝ akpe atoo, nyalɛ tsyue ato lǝ anɔ lesa nǝ Lɛwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi. Mba ditǝkǝ kato, muutǝ mǝ kuyi ko lǝǝtǝ nkpǝ ko ńyǝ lǝ Onanto eto ɔkpɔ kafo eto eyibibi ǝtsyuǝ miǝ bedi.”

Kukue Ko Ɔ́wɔni Útǝ Smirna Eto Bafokanɔfɔ Eto Ditsyukpa.

⁸Nya ɔ́tɛyi mɛ nkǝ, “Wɔni kukue komfo atsyese Smirnafɔ eto bafokanɔfɔ eto Onanto eto ɔtɔnkpe fǝ,

Mɔ, Yesu, wǝ ni ututɛ ku ɔfɛfɛfɛ, wǝ díkpe fɛ usi ótaka útsyi ɔkɔmǝ úbǝ nkpǝ, nlɛ nyamfo bɔtɛyi minkǝ,

⁹Nnyi kanyi ka bɛnlɛ bunyǝ ko ohiã wǝ bɛnlɛ bunyǝ. Fɛɛ lǝ sitinti, biyifo batabinyǝ. Nnyi asa bua nnya mba bǝ mǝ ni Yudafɔ fɛ benni Yudafɔɔ, laatɛyi kefi kabiasǝ mi. Bomu beyifo mba nkpe lǝ Obonsam eto ditsyukpa nti. ¹⁰Biante kanyi saa ka biǝbǝ bunyǝ sikpi. Bitsyue ato lǝ bǝnɔ. Obonsam eboto mi bǝtsyuǝ obe, utǝ bǝ beti mi bǝtsyuǝ bakpe lǝ aba eto diyo, biunyǝ kanyi itǝ eyi lefosi. Bidi ɔnukualɛ bitǝ mɛ lǝ ibǝ bǝ balo mi kulaa tsya, nya muutǝ mi nkpǝ manlo eto lekankpakpa fe mba dítǝkǝ kato.

¹¹Lǝ bekpe atoo, nyalɛ bɛnɔ lesa nǝ Lǝwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi! Mba luutǝkǝ lebua kato, embudufǝ lǝ ukpǝ nuǝfǝ manlo manlo ǝsuǝ.”

Kukue Ko Ɔ́wɔni Útǝ Pergamo Eto Bafokanɔfɔ Eto Ditsyukpa.

¹²Nya ɔ́tɛyi mɛ nkǝ, “Wɔni kukue ǝtǝ Pergamo eto bafokanɔfɔ eto ditsyukpa eto Onanto eto ɔtɔnkpe nkǝ,

Mɔ, Yesu, wǝ nkpe lesiabi nyɛ nnuǝ yayaya eto etiki ni nkǝ,

¹³Nnyi kaka binsi, kaka Obonsam dítsyǝ wǝ sekakedikɔ. Befo mɛ bɛnɔ kekleke. Nya bianyani mi bofokanɔ lǝ mɛ lǝ lefe nǝ bálo Antipa kulaa tsya, wǝ didi mɔ etiki lǝ ɔnukualɛ eto kusu ǝsuǝ lǝ kaka Obonsam nsi.

¹⁴Fɛɛ nkpe etiki sɛkɛ lǝ mi ǝsuǝ. Bekpé betidi bǝtsyuǝ lǝ mi nti ba ntekeko Balam eto asatete. Utidi ǝmfo ni nwǝ léte Balak kase ɔɔwɛ Israel bebi okpe lǝ lebua ǝsuǝ, nya ɔ́wɛ mǝ ókpe bédi lesa nǝ béfi bǝtǝ bǝfiǝ kedi, nya bédi sɛsɔnɔ. ¹⁵Nko kee, mi bǝtsyuǝ tsya ntǝkǝko Nikolatiafɔ eto asatete kama. ¹⁶Bisinkli lǝ mi abua kama! Lenni nkoo, yǝmbɔklɛ muubǝ mi ɔflɔ nya muufi lesiabi nǝ nkpe mɛ lǝ kɛnyɛ nkpɔnko betidi bamfó lema.

¹⁷Lǝ bekpe atoo, nyalɛ bɛnɔ lesa nǝ Lɛwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi. Mba ditǝkǝ katoo, muutǝ mǝ manna eto didisa kulakula nǝmǝ ditsyuǝ. Muutǝ mǝ utsyuǝ saa tsya lebaflubia nǝ ǝsuǝ báwɔni diye fɔfɔ nǝ kuutsyuǝ saa lenyi bǝtǝkǝ enso nwǝ hã léfo ni.”

Kukue Ko Ɔ́wɔni Útǝ Tiatira Eto Bafokanɔfɔ Eto Ditsyukpa.

¹⁸“Wɔni kukue komfo atsyese Tiatira eto bafokanɔfɔ eto Onanto eto ɔtɔnkpe fǝnkǝ,

Kɛnyɛ kamfo etsyi Onanto eto Ubi wǝ eto ǝnǝmi nlɛ bunyǝ fe ute seka, nya wǝ akpa nlɛ buyǝnde fe ayiwa nnya bási ele kɛnkɛ.

¹⁹Nyi keyifo ka feyifo. Nyi kase fala mɛ, fǝ bofokanɔ lǝ mɛ ku fǝ kesumu lǝ kanyinyǝnyǝ ǝsuǝ ku dibusǝ nǝ nkpe fǝ, nyi miǝ alɛ bokplatsya mɔmɔ kaso kɔ.

²⁰Fɛɛ nnya minyǝ lǝmbǝ kɔnɔ lǝ fǝ ǝsuǝ ni bǝnkǝ bítǝ usio wǝ baakpo Isabel, wǝ nkǝ uyifo Onanto eto unyɛlǝkǝtidi kusu ɔnlɛ asa bote mɔ beyifoyifo, kanyansǝ mǝ kusu kedi asɔnɔ, nya beedi edisa nnya béfi bǝtǝ bǝfiǝ kedi. ²¹Ntǝ wǝ lefe miǝ ɔtsyi ɔwuninsǝ lǝ ɔyɛ abua buyifo, fɛɛ ɔ́ni nkǝ wǝmbɔyɛ wǝ sɛsɔnɔdi. ²²Lǝ nnya esoo, muutǝ unyǝ kanyi lǝ wǝ belabeke biamǝ ǝsuǝ nya mba laakpo wǝ ebunyǝ kanyi sitinti. Muuyifo nyamfo nko lǝ bantsyi bawuninsǝ bayɛ asa bua nyamfo buyifo ku wǝ. ²³Moolo mba ntǝkǝko wǝ tsya lǝ bafokanɔfɔ eto etsyukpa kenke tsya lǝ bate bǝ nyifo nwǝ nyi utsyuǝ saa eto nsusu kǝmiǝ ku wǝ alasa. Moofo utsyuǝ saa kayo ɛyɛ lǝ wǝ eyifosa eto kɛnyɛ.

²⁴Fɛɛ mi Tiatirafɔ fɛfɛ ba dímamfo wǝ asatete bua nyamǝ, mimba dímankase wǝ asatete nnya baakpo bǝ Obonsam eto asakulakula nnya eto kǝmiǝ letsyo, bɛnɔ, mensimbutsyisǝ mi bitsyike bamba saa. ²⁵Fɛɛ isu ese lefe nǝ muubǝ, bɛkɔbe lesa nǝ bɛnlɛ kɔni kekleke bɛlɛ.

^26-27Nya mi bǝtsyuǝ ba luutǝkǝ lebua kato nya bɔɔlɛnko nko isu ese lǝ kalosǝkɔɔ, muutǝ mǝ ǝsuǝale fe kase mímfo mintsyiko mɔ Anto ɔflɔ. Muutǝ mǝ ǝsuǝale bedi seka lǝ ese ese ǝsuǝ,

‘Bedi seka lǝ mǝ ǝsuǝ ku kɔni ale,

baba mǝ besense bakpo fe kase baaba ekplibi seka.’

²⁸Muutǝ bǝyǝnde fe kolensiǝnto eto sefandebi ke tsya.

²⁹Lǝ bekpe atoo, nyalɛ bitsyue koto lesa nǝ Lɛwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi.”

Kukue Ko Ɔ́wɔni Útǝ Sardisfɔ Eto Bafokanɔfɔ Eto Ditsyukpa.

¹“Wɔni etiki nyamfo atsyese Sardisfɔ eto bafokanɔfɔ eto ditsyukpa eto Onanto eto ɔtɔnkpe fǝnkǝ,

Mɔ nwǝ nlɛ Onanto eto awɔnɔ akuanse ku befandebi bekuanse lǝ kɔni nlɛ bɔtɛyi nɛ.

Nyi keyifo ka fanlɛ buyifo, nyi miǝ afo diye bǝ esi nkpǝ, fɛɛ ebukpǝ fɛ fanyɛ! ²Nyaso taka lǝ akpe ǝsuǝ nkɛale fɛ lǝ ekpe alo kenke. Itsyise nyǝ ntsyǝ lekpo miǝ nnya fékeyifo mamflɔ tɔ elo lǝ mɔ Onanto eto ǝnǝmi. ³Nyaso kloma lesa nǝ báte fǝ ku lesa nǝ fánɔ, tsyue nnya koto lǝ etsyi fǝ nkpǝ awunisǝ ǝlǝkǝ fǝ ǝsuǝ lǝ abua ǝsuǝ. Fɛɛ lǝ ǝmansankli atsyi awuninsǝǝ, muubǝ fǝ ɔflɔ fe uyu seka, nya fǝmbote lefe nǝ muubǝ. ⁴Fɛɛ betidi esiani lǝ mi nti lǝ Sardis ebu ba dímanansǝ tɔ mǝ awu. Bookpe awu flubia bǝtǝkǝko mɛ, itsyise mǝ dińyǝ itǝ bǝ beyifo mɔ bale. ⁵Utsyuǝ saa ke luutǝkǝ lebua kato, okpe awu flubia fe mǝ kee, membulǝkǝ wǝ aye lǝ mba nsi nkpǝ eto kukue komǝ kafo. Muudi wǝ adansiɛ lǝ mɔ Anto ku Onanto eto batɔnkpe kenke eto ǝnǝmi miǝ uyifo mɔ bale.

⁶Lǝ bekpe atoo, nyalɛ bitsyue koto lesa nǝ Lɛwɔnɔ nlɛ bafokanɔfɔ eto etsyukpa nyamǝ bɔtɛyi.”

Kukue Ko Ɔ́wɔni Útǝ Filadelfia Eto Bafokanɔfɔ Eto Ditsyukpa.

⁷Lǝ nyamfo eto kamaa, ɔ́tɛyi mɛ nkǝ, “Wɔni nyamfo atsyese Filadelfia eto bafokanɔfɔ eto ditsyukpa eto Onanto eto ɔtɔnkpe fǝnkǝ,

Nwǝmfo eyifo ɔkɛnkɛnyǝ nya wǝ ditiki eyifo ɔnukualɛ. Wǝ nlɛ Oka David eto ǝsuǝale eto safui sia lǝ ɔsini siku sitsyuǝǝ, kuutsyuǝ saa ǝmbǝ wǝ loofo se buti. Nya lǝ uti see, kuutsyuǝ saa embofo se bɔsini.

⁸Nyi keyifo ka feeyifo. Nyi miǝ akpé ǝsuǝale sɛkɛ tsya, áfo mɔ asatete nya fámani mɛ. Nsini kusu ntsyǝ fǝ sɛtɔ ko kuutsyuǝ saa lǝmbofo buti. ⁹Lɔ abe! Betidi bǝtsyuǝ kpe ba nkpe lǝ Obonsam eto ditsyukpa ǝsuǝ nya baakpo mǝ ǝsuǝ bǝ Yudafɔ, fɛɛ benni Yudafɔ, badia beni. Muuyifo mǝ bǝbǝ base akonki lǝ fǝ akɔ. Muutǝ mǝmblɛ te bǝ maala fǝ. ¹⁰Nya se bitsyue mɔ etiki koto, nya bíńyǝ kekleke bínyǝ kanyi saa eto okloe esoo, muulǝkǝ mi ntsyiko lǝ kanyinyǝnyǝ eto bulǝ kekleke eto lefe nǝ lǝǝbǝ bubǝ lǝ kawunsiǝ kamfo ǝsuǝ ka buufi bato kasɔ mfo eto betidi kenke babe.

¹¹Nlɛ bubǝ lǝ lefe kliminti ǝsuǝ. Bɛkɔbe lesa nǝ bɛnlɛ lǝ kɔni bɛlɛ kekleke bǝ kuutsyuǝ saa embɔlɛ lesa nǝ ni mi kayofofo ofo. ¹²Muuyifo nwǝ luutǝkǝ kato, oseke lǝ mɔ Onanto eto Disumuyo eto diyo. Uńyǝ mfó lefe nǝ kenke nya bembudi wǝ bewui kulefe. Mɔɔwɔni mɔ Onanto eto diye ku mɔ Onanto eto umǝnkplɛ, Yerusalem fɔfɔ, wǝ lɔɔbɔ utsyi mɔ Onanto ɔflɔ kato ubǝ kasɔ ntǝkǝ lǝ wǝ. Mɔɔwɔni mɔ diye fɔfɔ tsya ntǝkǝ lǝ wǝ.

¹³Lǝ bekpe atoo, nyalɛ bɛnɔ lesa nǝ Lɛwɔnɔ nlɛ bafokanɔfɔ eto etsyukpa bɔtɛyi.”

Kukue Ko Ɔ́wɔni Útǝ Laodikea Eto Bafokanɔfɔ Eto Etsyukpa.

¹⁴Nya usi ɔ́tɛyi mɛ nkǝ, “Wɔni ǝtǝ Laodikea eto bafokanɔfɔ eto Onanto eto ɔtɔnkpe fǝnkǝ,

Nwǝ ni ibǝ itǝ wǝ ni nwǝ leeyifo asa lǝ kusu ǝsuǝ ku nwǝ laatɛyi Onanto eto ɔnukualɛɛ, wǝ ǝsuǝ ɛyɛ Onanto díyifo asa nnya kenkee, eto etiki ni bǝ,

¹⁵Nyi keyifo ka féyifo nya minyi miǝ ǝmǝnyuǝ nya famamfo ute tsya. Fɛɛ eni nla miǝ yuǝ nye fo ute. ¹⁶Fɛɛ se feyifo lentilenti, fǝmǝnyuǝ nye famamfo ute esoo, muutufǝ fǝ nwui lǝ mɔ kɛnyɛ. ¹⁷Aatɛyi fǝ, ‘Otabinyǝ mini, bike kpé mɛ nya kulesa manhiã mɛ.’ Fɛɛ enyi fǝ uminsǝtidi ku ohiãfɔ, utidi wǝ dimamflɔ, unǝmba ku nwǝ nyɛ leyaleya feni. ¹⁸Nyaso nlɛ fǝ kɔlɛ bɔlɛ minkǝ ya sika sia lɛlɛkɛ, sia báyinklisǝ lǝ ute etsyiko mɔ ɔflɔ bǝ lǝ afiani otabinyǝ, ya kafia flubia lǝ eti bǝ lǝ ayɛ leya bɔyɛ kakpe fǝ ǝsuǝ kofani. Ya ǝnǝmi eto afa akpo lǝ ǝnǝmi lǝ ǝnyǝ asa kukɔnɔ. ¹⁹Betidi ba maalaa, mǝ mǝǝyǝnki kakpe kǝnǝ koto nɛ. Nyaso fo ute lǝ akɔse atsyi lɛkɔɛsi awunisǝ lǝ fǝ abua ǝsuǝ. ²⁰Nɔɔ! Nńyǝ lǝ kesie nlɛ siku bɔsɔ. Lǝ utsyuǝ anɔ mɔ ɔkɔɛ nya ɔsini mɛ sikuu, muudufǝ wǝ diyo nya bonko wǝ lookpe kɔni lǝ ɔkpɛ ɔni budi lesa. ²¹Utsyuǝ saa ke lɛkpɔ utǝkǝ lebua kato, muutǝ kusu usiǝ lǝ mɔ ɔflɔ lǝ kaka minsi lǝ mɔ lekankpomɛ ǝsuǝ, fe kase míntǝkǝ kato nya minsi lǝ mɔ Anto eto lekankpomɛ ɔflɔ seka.

²²Lǝ bekpe ato, nyalɛ bɛnɔ lesa nǝ Lɛwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi.”

Kase Banlɛ Onanto Bɔtɛsǝ Lǝ Wǝ Sekakedikɔ.

¹Lǝ lefe nǝmfóo, nsi nyǝ bulǝkǝkate butsyuǝ nya mínyǝ siku sia básini bǝtsyǝ leya lǝ Onanto eto.

Nya mfó mínɔ ɔkɔɛ utsyuǝ wǝ nlɛ bole fe kakpatsyaku nsi nlɛ bufǝ katɛyi mɛ nkǝ, “Bǝ kato mfo, lǝ nlǝkǝ nnya lǝǝbǝ bubǝ kama nte fǝ.” ²Lamfolamfo, Lɛwɔnɔ nǝmǝ áyifǝ dísiǝ lǝ mɛ nya mínyǝ lekankpomɛ ditsyuǝ kato mfó nǝ ǝsuǝ utsyǝ nsi. ³Nwǝ nsi lǝ lekankpomɛ nǝmǝ lǝ buyǝnde fe yaspa ku sardis eto aba nnya lefo koya nya kɔlɛsensǝ ko nlɛ buyǝnde fe emeralda eto leba seka létsyilama lekankpomɛ nǝmǝ. ⁴Bétsyue akankpomɛ awosi ǝnuǝ ana tsya nya létsyilama lekankpomɛ nǝmǝ, nya beninɛ fosi ǝnuǝ ana tsya ba nkpe awuflubia, nya benti sika sia eto akankpakpa nsi lǝ akpomɛ nyamǝ ǝsuǝ. ⁵Nya ofamfa ku ɔsitoto eto kɔsɔ lɛ bɔbɔ ketsyi lǝ lekankpomɛ nǝmǝ ǝsuǝ. Atɛ akuanse nlɛ bunyǝ lǝ lekankpomɛ nǝmǝ eto sɛtɔ. Nyamfo ni Onanto eto awɔnɔ akunse nyamǝ nɛ. ⁶Nya lekankpomɛ nǝmǝ eto sɛtɔ akpa wuee, fe lekpo befi ahũhuɛ beyifo.

Asayifoyifo nya nkpe nkpǝ, nya dikǝ ǝnǝmi kpenkpenkpe sɛtɔ ku kama, ńyǝ etsyilama lekankpomɛ nǝmǝ eto akpake nnya ta kenke ⁷Etutɛ ále tsyata. Ǝnuǝfǝ ale ɔtrɔmu. Ǝtsyǝfǝ kpe ǝnǝmi fe utidi. Nya anale ale kɔlikpo ko nlɛ bufunini. ⁸Asa nnya nkpe mfó eto ǝsuǝ saa kpe mbamba akua akua, nya ǝnǝmi diyi nnya etsyilama kalebe saa, nya ɛnlɛ ese busǝ lefe saa katɛyi nkǝ,

“Kɛnkɛ, kɛnkɛ, kɛnkɛ

ni Bonamute Onanto wǝ ni ǝsuǝalenyǝ lefe nǝ ta,

wǝ nsi nkpe mɔmɔ, wǝ dísiǝ taa kasɔ ketsyikokɔ,

wǝ nsi nlɛ bubǝ.”

⁹Asa nnya nsi nkpe mfó eese atɛsɛ, dibu ku lɛninsɔ eto ese itǝ nwǝ nsi lǝ lekankpomɛ ǝsuǝ wǝ nsi nkpǝ lefe saa isu lefe saa. ¹⁰Lǝ beyifo nkoo, beninǝ fosi ǝnuǝ ǝna bamǝ aataka kakpoo kasɔ lǝ nwǝ nsi lǝ lekankpomɛ eto ǝnǝmi kesumu wǝ ke ni nwǝ nsi nkpe itǝ lefe manlo manlo nya bǝǝlǝkǝ mǝ akankpakpa kǝtsyǝ lǝ lekankpomɛ nǝmǝ eto sɛtɔ kese ese katɛyi nkǝ,

¹¹“Bonamute ku bo Onanto!

Fǝ dińyǝ itǝ atɛsɛ ku dibu ku ǝsuǝale.

Itsyise fǝ diyifo asa nnya ta kenke,

nya fǝtǝ fǝ mǝmblǝ siǝ nkpǝ

bo lɛflɔ lǝ fǝ lelabi ǝsuǝ.”

Lesamubi Nǝmǝ Áfo Kukue Ko Bǝkǝnǝ Mfó.

¹Nyamfo eto kamaa, nnyǝ kukue kutsyuǝ ko bǝkǝnǝ ko nwǝ nsi lǝ lekankpomɛ ǝsuǝ nlɛ lǝ wǝ kodiani. Báwɔni asa lǝ ko lekpake nǝ ku nnɛ, nya béfi sitǝ eto etinsa beti ko kɛnyɛ lǝ akpa akuanse. ²Mfó mínyǝ Onanto eto ɔtɔnkpe kplɛ utsyuǝ wǝ léto ɔkɔɛ bembembe ɔ́tɔ nkǝ, “Owoe ni nwǝ dińyǝ utǝ bǝ ufǝ sitǝ eto etinsa siamǝ lǝ ɔsini kukue komfo?” ³Fɛɛ bǝnnyǝ kutsyuǝ saa lǝ kato lee kasɔ lee lǝ ɔkɔmǝ wǝ loofo kukue komǝ bɔsini lǝ obe ko kafo. ⁴Nwi keku tinti se bámfo kutsyuǝ saa bunyǝ wǝ díńyǝ utǝ bǝ umǝnkli ko lǝ okla.

⁵Mfó ǝmǝ nya beninǝ bamǝ eto ɔni lɛtɛyi mɛ nkǝ, “Mensiwi keku. Bee! Yesu wǝ baakpo Tsyata wǝ lɛbɔ utsyi lǝ Yuda eto kusǝ, ɔkplɛnyǝ wǝ ni Oka David eto ufluflu, wǝ dítǝkǝ kato, wǝ dińyǝ utǝ bǝ ɔsini sitǝ eto etinsa akpa akuanse nya béfi béti kukue komǝ eto kɛnyɛ nɛ.”

⁶Lǝ nnya kamaa, nnyǝ Lesamubi nǝ nńyǝ lǝ lekankpomɛ nǝmǝ eto ntinti, nya asa ana nnya nsi nkpe mfó ǝmǝ létsyilama wǝ ku beninǝ bamǝ. Nya íyifo fe bolo bálo lesamubi nǝmǝ. Aakpɛ akuanse ńyǝ ni lǝ disi ku ǝnǝmi akuanse, nya ni Onanto eto awɔnɔ akuanse nnya bátsyese kawunsiǝ kamǝ kenke. ⁷Lesamubi nǝmǝ ésu ófo kukue ko nwǝ nsi lǝ lekankpomɛ nǝmǝ nlɛ lǝ wǝ kodiani. ⁸Kase ófo kukue komǝǝ, asa ana nnya nsi nkpe nyamǝ ku beninǝ fosiǝnuǝ ena bamǝ ákpo kasɔ lǝ lesamubi nǝmǝ eto ǝnǝmi. Mǝ utsyuǝ saa lɛ osanku ku sika eto ɔkpɛ lǝ kɔni. Kakpɛ kamǝ éyi ku lufui nnya ni Onanto eto betidi ba lefo banɔ eto olatoto. ⁹Bése kusǝ fɔfɔ ko nlɛ bɔtɛyi nkǝ,

“Aflɔ ǝtǝ bǝ afo kukue komǝ,

nya bǝ lǝ efe sitǝ eto etinsa ekuanse sia nti lǝ kukue komǝ eto kɛnyɛ.

Itsyise bálo fǝ,

nya ɛyɛ lǝ fǝ ǝsuǝ bufi kǝtǝ kedi eto ukpe ǝsuǝǝ,

áfó betidi kpǝ eto disi eto kayo ǝtǝ Onanto.

Betidi bamfo etsyi ese ese, bele bele, nsɔ nsɔ, ku kawunsiǝ eto betidi kenke.

¹⁰Éyifo mǝ báfiani besumunyǝ eto sekakedikɔ ba leesumu bo Onanto,

nya boodi seka lǝ kasɔ kamfo.”

¹¹Nya se minsi mímbe, nnyǝ kato eto batɔnkpe akpi, akpi ku awo, awo ba lǝmbǝ leklabii, ńyǝ batsyilama lekankpomɛ nǝmǝ ku asa ana nnya nkpe nkpǝ nyamǝ ku beninǝ bamǝ. ¹²Nya banlɛ ese busǝ bembembe bǝnkǝ,

“Lesamubi nǝ bálo ǝńyǝ ditǝ bǝ,

lɛkɛ ǝsuǝale, setabikɛ, kobe, bofobuyifo,

dibu, diyǝnde ku atɛsǝ.”

¹³Nya mínɔ se asa nnya kenke Onanto díyifo nkpe kato ku kasɔ mfo, kasɔ kǝmiǝ ku lekpo kafo ku asa nnya kenke nsi nkpǝ nlɛ ese busǝ katɛyi nkǝ,

“Nwǝ nsi lǝ lekankpomǝ ǝsuǝ ku Lesamubi nǝmǝ,

mǝ mbǝ atɛsǝ, dibu, diyǝnde ku ǝsuǝale idu manlo isu manlo.”

¹⁴Nya asa ana nnya nsi nkpǝ léfo bátanɔ bǝ, “Ibǝ itǝ.” Nya beninǝ bamǝ lékpo lǝ kasɔ, nya bésumu Onanto ku Lesamubi nǝmǝ.

Lesamubi Nmǝ Ásini Sitǝ Eto Etisa Nyamǝ.

¹Nya mínyǝ se Lesamubi nǝmǝ dífǝ sitǝ eto etinsa tutɛ nyamǝ ɔ́sini kukue komǝ nya mínnɔ se asa ana nnya nsi nkpǝ eto ani léto ɔkɔɛ íkumi fe ofamfa seka ɛtɛyi nkǝ, “Bǝ!” ²Mbe, nya mínyǝ ɔtɔmli flubia utsyuǝ. Nwǝ nsi lǝ wǝ lɛ sifie lǝ kɔni nya bǝtǝ wǝ lekankpakpa ditsyuǝ. Úsiǝ lǝ wǝ nya ɔ́bɔ fe omamanyǝ wǝ lǝǝtǝkǝ kato ntɔ kato kǝtǝkǝkɔ.

³Nnya kamaa, Lesamubi nǝmǝ ǝfǝ lɛsini sitǝ eto etinsa eto etinsa nuǝfǝ nyamǝ nya mínnɔ asa ana nnya nsi nkpǝ eto unuǝfǝ lɛtɛyi nkǝ, “Bǝ!” ⁴Nya ɔtɔmini bamba wǝ lɛsɛ lɛbɔ úbǝ. Bǝtǝ nwǝ lǝǝsiǝ wǝ ǝsuǝale bǝ unǝ lema oboko kawunsiǝ eto betidi lǝ balo mǝ bǝtsyuǝ. Bǝtǝ wǝ lesiabi nyɛ nuǝ nǝ lɛmɔ.

⁵Nyamfo eto kamaa, Lesamubi nǝmǝ ǝfǝ sitǝ eto etinsa tsyǝfǝ nyamǝ nti lǝ wǝ kukue komǝ eto kɛnyɛ. Mfó mínɔ se asa ana nnya nsi nkpǝ eto ǝtsyǝfǝ lɛtɛyi nkǝ, “Bǝ!” Nya se mímbee, nnyǝ ɔtɔmini naa bamba nya nwǝ nsi lǝ wǝ lɛ nseni lǝ kɔni. ⁶Nnɔ ɔkɔɛ utsyuǝ wǝ nte fe bɔbɔ ɔ́bɔ utsyi lǝ asa nnya nsi nkpǝ ɔflɔ wǝ lɛtɛyi nkǝ, “Kamɔ eto ɔkpɛ tɔ itǝ diyi lɔni eto kayofofo nya antabi eto ɛkpɛ itsyǝ ńyǝ itǝ diyi eto kayofofo. Fɛɛ mambiasǝ nnuǝbi ku wain eto eyi nnya ńyǝ mfó!”

⁷Nya kama nnya Lesamubi nǝmǝ dífǝ sitǝ eto etinsa nale. Nya mínɔ asa nnya nsi nkpǝ eto anale didi etiki ɛtɛyi nkǝ, “Bǝ!” ⁸Lǝ mbe mfó, nnyǝ miǝ ɔtɔmini wǝ nte fe ntɔ eto ditsyǝbi nńyǝ. Baakpo nwǝ lǝǝsiǝ lǝ wǝ bǝ ukpe. Nya utidi bamba tsya tǝkǝko wǝ kama baakpo ɔkɔmǝ. Bǝtǝ mǝ ǝsuǝale bǝ balo kawunsiǝ eto betidi eto lekpa nale, ɛyɛ lǝ lema, kukpɛnsɛ, bufi ku ɛyɛ lǝ bebutubuki ba lǝǝmuǝ betidi ǝsuǝ.

⁹Se Lesamubi nǝmǝ dífǝ sitǝ eto etinsa nɔnde, ńyǝ awɔnɔ ǝtsyuǝ lǝ kedikǝtǝkɔ eto lǝba nǝmǝ kalɔ, mba bálo eto awɔnɔ, se bǝbǝ Onanto eto leba nǝmǝ kalɔ, mǝ ni mba bálo se bábé Onanto eto Ditiki Sɛɛ nǝmǝ letsya nya bédi ni ɔnukualɛ eso. ¹⁰Awɔnɔ nyamǝ áfã bembebe ɛtɛyi nkǝ, “Bonamute, eni ǝsuǝalenyǝ kenke, ɔkɛnkɛnyǝ ku ɔnukualɛnyǝ. Nte lefe nǝ eto lefe ko, fookponko kawunsiǝ eto betidi lekpo, ǝnǝ mba lélo bo koto?” ¹¹Bǝtǝ mǝ utsyuǝ saa awu flubia kɛntsyɛ ókpe, nya bátɛyi mǝ bǝnkǝ besi babe mǝ kusu sɛkɛ isu ese lefe nǝ eto lefe bálo mǝ beyifotsyuǝ ku mǝ bayimi eto sitiditu kenke balosǝ fe kase bálo mǝ tsya.

¹²Lǝ nyamfo eto kamaa, nnyǝ se Lesamubi nǝmǝ difǝ sitǝ eto etinsa lǝ lekpa kuande ǝsuǝ, kawunsiǝ kenke étinkǝ kekleke, nya kofe lɛyɛ bofa nya lesa saa lena sũũ fe kafia na, nya kofande lɛsɛ hǝǝ fe kɔtɔ. ¹³Befandebi, álo bitsyi kato bibǝ bɛsɔ kasɔ fe kase eyibibi mambemambe laalo kakpo lǝ kasɔ lǝ ufiebi asɔ kekleke. ¹⁴Difule ánya lamfolamfo fe kase bǝǝkǝnǝ kukue seka nya kɔtini saa ku kasɔ ka ntu letsyilama lɛnyi lǝ nyǝnkɔ.

¹⁵Mfó nya kawunsiǝ eto baka, Aba bamamanyǝ ninǝ, batabinyǝ ku bǝsuǝalenyǝ, ku betidi ba kenke, ndomufɔ ku mba nsi lǝ mǝ ǝsuǝ ǝsuǝ, difi mǝ ǝsuǝ bákula lǝ ǝbiǝku ku abanse kalɔ ku lǝ atini ǝsuǝ. ¹⁶Báfa bákpadi atini ku abanse bǝ, “Beba bekpo bo lǝ ǝsuǝ biti bo bekpe itsyi lǝ nwǝ nsi lǝ lekankpomɛ eto ǝnǝmi ku lǝ Lesamubi nǝmǝ eto lɛblɔfi eto ǝnǝmi. ¹⁷Itsyise Onanto ku Lesamubi bamǝ eto lǝblɔfi eto diyi nǝmǝ eboyo! Nya owoe loofo bunyǝ lǝ nnya ǝnǝmi?”

Únyǝ Israel Eto Betidi Kɔkpi Lofa Betidi Fosi Ana Betidi Ena.

¹Lǝ nyamfo eto kamaa, ńnyǝ Onanto eto batɔnkpe ena bǝtsyuǝ ba nyǝ lǝ kawunsiǝ eto esi ana nyamǝ ba lɛkɔbe kefiebi ǝna kamǝ banlɛ, beti kefiebi kamǝ bǝ kayɛ bɔsɔ lǝ kasɔ, lǝ lekpo nye lǝ eyi ǝsuǝ.

²Nya minsi minyǝ Onanto eto ɔtɔnkpe bamba wǝ lɛbɔ utsyi lǝ kofekatokɔ ɔnlɛ kato bobe, nya Onanto wǝ nsi nkpǝ eto lekpotsyǝsa ntǝkǝ lǝ wǝ. Onanto ditǝ ǝsuǝale nkǝ beyifo lesafimfi kasɔ ku lekpo, ³nya ɔ́tɛyi nkǝ, “Bienyifo lesafimfi kasɔ, lekpo nye eyi saa, isu eyo lefe nǝ buufi sitǝ eto etinsa butsyǝ Onanto eto beyifoyifo eto nto lekpo.” ⁴Nya bátɛyi mɛ bǝnkǝ betidi ba béfi Onanto eto sitǝ eto etinsa bǝtsyǝ lekpo lǝ mǝ nto eto leklabi ebuyifo betidi akpi kolofa awosi ana ana (144,000). Betidi bamfo étsyi Israel eto lefosi mfo nuǝ kafo.

^5-8Betidi lefosi akpi ǝnuǝ étsyi Israel eto kafo ǝsuǝ. Mǝ ni

Yuda, Ruben, Gad, Aser, Naftali,

Manase, Simeon, Lewi, Isakar,

Sebulon, Yosef ku Benyamin.

⁹Lǝ nyamfo eto kamaa, ńyǝ sitiditu kplɛ ditsyuǝ nǝ eto betidi kuutsyuǝ lembofo bokla! Betsyi kasɔ saa, ese saa, bele tɛyi tɛyi saa, betidi betidi saa eto okle, nya bǝnyǝ lǝ lekankpomɛ nǝmǝ ku Lesamubi nǝmǝ eto ǝnǝmi, nya bankpe awuflubia, nya banlɛ bekabe lǝ ani. ¹⁰Nya báfa ku ɔkɔɛ bembembe bátɛyi bǝnkǝ,

“Bofokǝtǝ etsyi Boanto Onanto

wǝ nsi lǝ lekankpomɛ ǝsuǝ

ku Lesamubi nǝmǝ ɔflɔ!”

¹¹Onanto eto batɔnkpe kenke bǝńyǝ batsyilama lekankpomɛ nǝmǝ ku beninǝ bamǝ ku asa ana nyamǝ, nya batɔnkpe bǝmǝ difusǝ ǝnǝmii kasɔ lǝ lekankpomɛ nǝmǝ eto ǝnǝmi, besumu Onanto, ¹²katɛyi nkǝ,

“Ibǝ itǝ! Atɛsǝ, diyǝnde, kobe,

lɛninsɔ, dibu, ǝsuǝale ku kakplɛkɔ

lǝ idi bo Onanto ǝmǝ eto ale

idu manlo isu manlo!

Ibǝ itǝ!”

¹³Beninǝ bamǝ eto ɔni átɔ mɛ nkǝ, “Bawoe ni betidi ba nkpe awu flubia kɛntsyɛ mfo? Nya se bétsyi?”

¹⁴Mfó nya mintɛyi mǝ miǝ, “Bonamute, minnyi. Fǝ nyi.”

Mfo nya ɔ́tɛyi mɛ nkǝ, “Mba mfó ni betidi ba dínyǝ kanyi kekleke fɛ bábɔ báfe. Bǝflǝ mǝ awu éle futufutu lǝ Lesamubi nǝmǝ eto kɔtɔ ǝsuǝ. ¹⁵Nyasoo,

bǝǝńyǝ lǝ Onanto eto lekakpomɛ nǝmǝ eto ǝnǝmi

kesumu wǝ ketsye ku kakɔmi lǝ wǝ Disumuyo.

Itsyise nwǝ nsi lǝ lekankpomɛ nǝmǝ ǝsuǝ ebota mǝ disi lǝ wǝ ǝnǝmi.

¹⁶Kukpɛnsɛ nye utukuɛ

esi ǝmbɔlɛ mǝ kulefe.

Nya kofe nye utefofo saa ensiembufi mǝ.

¹⁷Itsyise Lesamubi nǝ nkpe lǝ lekankpomɛ nǝmǝ eto ntinti mfóo, ebɔlɛ mǝ ola, obe mǝ.

Wookpa mǝ ɔyɛnko usuko kaka nkpǝ eto ntu bo laayifǝ lefe saa nkpe.

Nya Onanto tsya lɔɔsi mǝ binǝntu saa lǝ ǝnǝmi.”

Lesamubi Nǝmǝ Éfe Sitǝ Siamǝ Lǝ Lekpa Kuansele.

¹Se Lesamubi nǝmǝ dífǝ sitǝ eto etinsa sia nti lǝ lekpa kuansele ǝsuǝǝ, ídi kanana lǝ kato itǝ fe lebombosɔsɔ eto kutsyǝ.

²Nnya kamaa, nnyǝ Onanto eto batɔnkpe ekuanse ba lǝǝńyǝ lǝ Onanto eto ǝnǝmi, nya útǝ mǝ nkpatsyaku nkuanse.

³Nya Onanto eto ɔtɔnkpe bamba wǝ lɛlɛ sika sia eto dikplibi nǝ kafo baatonsǝ lufui kɔnii, lɛbɔ úńyǝ lǝ leba nǝ ǝsuǝ bǝǝtǝ kedi ɔflɔ. Bǝtǝ wǝ lufui kpǝ bǝ ufi ɔkɔ ku Onanto eto betidi ba kenke eto olatoto ǝsuǝ lǝ ufi utǝ kedi lǝ sika sia eto kedikǝtǝkɔ eto leba nǝ ńyǝ lǝ lekankpomɛ nǝmǝ ɔflɔ. ⁴Se banlɛ lufui nǝmǝ botonsǝǝ, ni kuyuǝ ko nlɛ boto kabɔ lǝ dikplibi nǝmǝ kafo ákɔ ku Onanto eto betidi eto olatoto ɛyɛ lǝ Onanto eto ɔtɔnkpe wǝ nńyǝ lǝ wǝ ǝnǝmi eto ani isu Onanto ɔflɔ. ⁵Lǝ nyamfo eto kamaa, Onanto eto ɔtɔnkpe ǝmǝ ǝlǝkǝ ute lǝ Disumuyo eto leba nǝmǝ ǝsuǝ úfi úyisǝ lufui eto dikplibi nǝmǝ nya úsǝ wǝ ókpo lǝ kasɔ ǝsuǝ. Se úyifo nkoo, nnɔ se kato díkumi bembembe, nya kato léto ɔsi, nya kasɔ dítinkǝ.

Onanto Eto Batɔnkpe Bamǝ Éfe Mǝ Nkpatsyaku.

⁶Mfó nya Onanto eto batɔnkpe ekuanse ba nlɛ nkpatsyaku dímuǝ ǝsue bǝ beefǝ mǝ nkpatsyaku bomǝ.

⁷Onato eto ɔtɔnkpe tutɛ ǝmǝ éfe wǝ kakpatsyaku. Lamfolamfo, etubankli ku ute wǝ létsyaka ku kɔtɔ ábɔ ékpo lǝ kasɔ nya étonsǝ kawunsiǝ eto lekpa tsyǝfǝ, nya eyi eto lekpa tsyǝfǝ léto. Fɛɛ sefaa, semblɛ kenke áto.

⁸Nyamfo eto kamaa, Onanto eto ɔtɔnkpe nuǝfǝ tsya éfe wǝ kakpatsyaku. Nya lesa nǝ lele kɔtini kplɛ ko nlɛ ute bunyǝ lɛbɔ nya báto ko bákpe lǝ lekpo kǝmiǝ. Nya lekpo eto ntu bomǝ eto lekpa tsyǝfǝ léfiani kɔtɔ. ⁹Nya akpɛ ku bebuki ba nkpe lǝ ntu bomǝ eto lekpa tsyǝfǝ kenke díkpe. Nya ntu eto efue nnya ntǝkǝ lǝ ntu bomǝ eto lekpa tsyǝfǝ lébia.

¹⁰Onanto eto ɔtɔnkpe tsyǝfǝ éfe wǝ kakpatsyaku. Mfó nya sefandebi kplɛ sitsyuǝ sia nlɛ ute bunyǝ fe lɛtɛ léfankli sitsyi kato sídufǝ lǝ ntu bo laabɔdi ku mbo ni ntuyifǝyifǝ eto lekpa tsyǝfǝ ǝsuǝ. ¹¹Baakpo sefandebi siamǝ bǝ Kalokatakata. Ntu eto lekpa tsyǝfǝ áfiani ntu bo nkpe kalo, nya betidi kpǝ bǝtsyuǝ díkpǝ itsyise bǝnǝ ntu bomǝ eso.

¹²Mfó nya ɔtɔnkpe nale dífǝ wǝ kakpatsyaku. Ítǝ bǝ kofe eto lekpa tsyǝfǝ, kofande eto lekpa tsyǝfǝ ku befandebi eto lekpa tsyǝfǝ, nnya ǝtsyuǝ saa eto diyǝnde eto lekpa tsyǝfǝ áni. Lǝ nyaso ketsye ku diyi eto lekpasǝ nǝ laakɛ eto lekpa tsyǝfǝ áni.

¹³Lǝ nyamfo eto kamaa, se minyǝ minlɛ bobe, ńnyǝ kɔlikpo kplɛ kutsyuǝ se kɔnlɛ bufunini kato fanlo, kafe katɛyi ku ɔkɔɛ bembembe katɛyi nkǝ, “Mbɔbɔɛ, mbɔbɔɛ, mbɔbɔɛ mǝǝtǝ betidi ba luubu besiǝ lǝ kawunsiǝ lǝ lefe nǝ Onanto eto batɔnkpe fɛfɛ itsyǝ ba luubu luufe mǝ nkpatsyaku ntsyǝ bomǝ.”

¹Mfó Onanto eto ɔtɔnkpe nɔnde dífe wǝ kakpatsyaku. Nya mínyǝ sefandebi sitsyuǝ ditsyi kato síbǝ sɛsɔ lǝ kasɔ, nya béfi ukpe kǝmiǝ eto dibiǝ nǝ lena sũũ eto safui bǝtǝ se. ²Sɛsini ukpe kǝmiǝ eto dibiǝ kplɛ nǝmfo nya kuyuǝ ko nte fe ditefɛnku ǝsuǝ kɔ́bɔ kutsyii, díti kofe eto ǝnǝmi ku ko diyǝnde itǝ difule kenke lena sũũ lǝ kuyuǝ ko lɛbɔ kutsyi lǝ dikpǝmbiǝ nǝmǝ eso. ³Bekpese áló betsyi kuyuǝ komǝ ǝsuǝ bǝbǝ bákpo lǝ kasɔ nya Onanto dítǝ mǝ ǝsuǝale fe bakpoe ba laata seka. ⁴Bátɛyi mǝ bǝnkǝ, bambiansǝ afanto nye seefa nye kuyi saa enso betidi ba Onanto dímǝntǝkǝ mǝ leba lǝ mǝ nto. ⁵Bǝtǝ bekpese bamǝ kusu bǝ bate betidi bamǝ ohiã itǝ afa anɔ, fɛɛ banlo mǝ. Lǝ bata utidi, yeefi fe kanyi ka fuunyǝ lǝ okpoe ata utidi seka. ⁶Lǝ afa anɔ nyamfo nti, bɔɔbɛbɛ ukpe bǝ beekpe, fɛɛ bembunyǝ wǝ bekpe. Boola bǝ beekpe, fɛɛ ukpe ebutsyetsyi udu lǝ mǝ ɔflɔ.

⁷Bekpese bamǝ eto ditsyǝbi te fe batɔmli ba léto akpatsya itǝ lema bɔkpɔ. Béti mǝ akpakpa nnya lele sika sia eto akankpakpa lǝ mǝ esi. Nya mǝ ǝnǝmi lele betidi eto ǝnǝmi. ⁸Mǝ disi eto sewɔni ekulǝ fe besio eto sele, nya mǝ anyi lele tsyata eto ale. ⁹Nya béfi asa ǝtsyuǝ nnya nte fe bitu eto awu nnya leeti lɛkɔɛsibi bákpe. Kudu ko nlɛ bɔbɔ ketsyi lǝ mǝ mbamba ǝsuǝ ale nkeke bo batɔmini lǝǝnǝ kpǝ bo batɔmini nlɛ bunǝ bantɔnko lǝ lema. ¹⁰Bekpese bamfo kpé kǝkǝ ku kabé bo laata fe okpoe eto ale, nya bankpe ǝsuǝale lǝ mǝ kǝkǝ ǝsuǝ boofo bufi keyifo utidi lesafimfi itǝ afa anɔ. ¹¹Bakpé Oka wǝ nlɛ seka budi lǝ mǝ ǝsuǝ. Wǝ ni ɔtɔnkpe wǝ nsi lǝ ukpe eto dibiǝ eto kɛnyɛ mfó. Wǝ diye ni Abadon lǝ Sihibri ǝsuǝ. Nya lǝ Sigriki ǝsuǝ, Apolion eto kasɔ ni nwǝ laabiasǝ asa.

¹²Kanyinyǝnyǝ kplɛ tutɛ ébubǝ káfe. Nyamfo eto kamaa, nnuǝ bamba si bɔlɛ bubǝ.

¹³Nnya kama, nya Onanto eto ɔtɔnkpe kuande dífǝ wǝ kakpatsyaku. Nya mínɔ se ɔkɔɛ utsyuǝ lɛbɔ utsyi lǝ sika sia eto Disumuyo eto leba nǝ ńyǝ lǝ Onanto eto ǝnǝmi eto akpɔ ana nyamǝ ǝsuǝ. ¹⁴Ɔkɔɛ ǝmǝ átɛyi Onanto eto ɔtɔnkpe kuande ǝmǝ nkǝ, “Benyankli batɔnkpe ena ba bákle bǝtsyǝ lǝ Ketukplɛ Frate ɔflɔ!” ¹⁵Mfo báyankli batɔnkpe ena bamǝ. Bálɔ mǝ bǝtsyǝ nya bǝmuǝ ǝsuǝ itǝ lebombosɔsɔ nǝmǝ, diyi nǝnǝ, kofa komǝ ku lɛlɛ nǝmǝ bǝmuǝ ǝsuǝ bǝtsyǝ lǝ balo kawunsiǝ eto betidi kenke eto lekpa tsyǝfǝ.

¹⁶Bátɛyi mɛ bǝ bamamanyǝ ba nsi lǝ batɔmli dimuǝ ǝsuǝ bǝnyǝ itǝ lema bɔkpɔ eto utu. Beyifo awo alofa ǝnuǝ. ¹⁷Nya lǝ ǝnǝtǝtǝ eto kǝlǝkǝkate eto bunyǝ ǝsuǝǝ, nnyǝ batɔmli bamǝ ku mba nsi lǝ mǝ ǝsuǝ. Bakpe lɛkɔɛsibi eto bitu eti awu nya nlɛ buyǝnde fe ute eto lɛsɛbi seka ku safir eto leba eto diyǝndebi ku ǝtsyuǝ lɛsɛ fe dikusɛmfɔ eto kasiakɔ seka. Batɔmli bamǝ eto esi eyifo fe tsyata eto disi seka, nya ute kuyuǝ ku ute ku etenkli eto aba nlɛ bɔbɔ ketsyiko lǝ mǝ nnyɛ. ¹⁸Nya kanyinyǝnyǝ eto akpa ǝtsyǝ nyamfo, ini ute, kuyuǝ ku ute eto leba nǝ ditsyi lǝ batɔmli bamfo eto nnyɛ lelo kawunsiɛ eto betidi eto lekpa tsyǝfǝ kenke. ¹⁹Batɔmli eto ǝsuǝale nyamfo ábɔ itsyi lǝ mǝ nnyɛ ku mǝ kǝkǝ ǝsuǝ. Nya mǝ kǝkǝ eyifo fe bawa ku esi nnya beefi keyifo betidi asafimfi.

²⁰Betidi fɛfɛ ba kenke dímenkpe ɛyɛ lǝ kanyi kamǝ ǝsuǝǝ, ménsinkle lǝ asa nnya mǝ kosate dífi ani béyifo eto busumu kama. Bénsinkli lǝ awɔnɔ bua, sika sia ku sika flubia, bitu sia, abambi ku eyi nnya báwoe, nnya lǝǝnnyǝ, laanyɛ nye laannɔ eto busumu kama. ²¹Bántsyi bawuninsǝ lǝ mǝ betidilolo, asabɔtɔkanɔ, sɛsɔnɔdi ku mǝ kuyu ǝsuǝ.

Onanto Eto Ɔtɔnkpe Lɛ Kukue Kɛkɛ Kutsyuǝ.

¹Nnya kamaa, nnyǝ Onanto eto ɔtɔnkpe kplɛ utsyuǝ wǝ lɛyifǝ utsyi kato úbǝ kasɔ. Okpe lǝ difule ǝsuǝ nya kɔlɛsensǝ letsyilama wǝ lǝ disi. Wǝ ǝnǝmi lɛ buyǝnde fe kofe seka nya wǝ akpa nte fe ute eto ala nnya ńyǝ kasɔ. ²Ɔlɛ kukue kɛkɛ kutsyuǝ ko básini lǝ kɔni. Úfi wǝ kodianikpa útǝkǝ lǝ lekpo ǝsuǝ, nya úfi wǝ kǝmǝnikpa útǝkǝ lǝ kasɔ ǝsuǝ. ³Mfo nya óto ɔkɔɛ bembembe fe tsyata seka. Nya se ófã nkoo, bánɔ bukumi sekuanse eto ɔkuɛ kato. ⁴Lefe nǝ mínɔ bukumi bomfoo, nla lǝ nwɔni asa nnya mínɔ ntsyǝ. Fɛɛ nnɔ ɔkɔɛ utsyuǝ wǝ lɛbɔ utsyi kato lɛtɛyi nkǝ, “Ti akulasa nnya bukumi sekuanse siamǝ lɛtɛyi ǝtsyǝ, manwɔni nnya ǝtsyǝ.”

⁵Ete mínyǝ Onanto eto ɔtɔnkpe wǝ nńyǝ lǝ kasɔ ku lekpo ǝsuǝ lébesǝ wǝ kodiani kato. ⁶Nya óka ntamu lǝ Onanto wǝ nsi nkpǝ lefe saa, wǝ díyifo kato ku nnya nkpe kasɔ mfo ku asa nnya nkpe lǝ ke, lekpo ku asa nnya nkpe lǝ ni eto diye ǝsuǝ ɔ́tɛyi nkǝ, “Lefe biasǝbiasǝ saa ensibǝ. ⁷Nya lǝ ɔtɔnkpe kuansele ǝmǝ efe wǝ kakpatsyaku koo, ete Onanto eto ketsyue kulakula ka bábe letsya bǝtǝ wǝ bǝnyɛlǝkǝtidi ba ni wǝ beyifoyifo ebubǝ itǝ.”

⁸Lǝ nnya kamaa, ɔkɔɛ wǝ ditsyi kato dídinko mɛ etiki esi ɔ́tɛyi mɛ nkǝ, “Su afo kukue kɛkɛ ko básini bǝtsyǝ nkpe lǝ Onanto eto ɔtɔnkpe wǝ nńyǝ lǝ lekpo ku kasɔ ǝsuǝ eto kɔni.”

⁹Mfó nya mínsu ɔtɔnkpe ǝmǝ ɔflɔ nya míntɛyi wǝ minkǝ ufi kukue kɛkɛ komɛ utǝ mɛ. Ɔ́tɛyi mɛ nkǝ, “Fo lǝ ayimi ko. Kɔɔkɛ kalo lǝ fǝ kafo, fɛɛ lǝ kɛnyɛ kɔɔkɛ kamini fe bablɔ seka.”

¹⁰Mmfo kukue kɛkɛ komǝ lǝ wǝ kɔni, nya míyimi ko, nya kɔkɛ kamuni fe bablɔ lǝ mɔ kɛnyɛ. Fɛɛ lefe nǝ mímmini ko mínlosǝǝ, kɔkɛ kalo lǝ mɔ kafo kǝmiǝ. ¹¹Lǝ nnya kamaa, ɔtɔnkpe ǝmǝ átɛyi mɛ nkǝ, “Ele bǝ esi abe Onanto eto Ditiki Sɛɛ nǝmǝ letsya ǝtǝ ese kpǝ, betidi kpǝ, bele bele ku baka kpǝ.”

Onanto Ǝtǝ Bǝnyɛlǝkǝtidi Inuǝ Ǝsuǝale.

¹Nyamfo eto kamaa, Onanto éfi uyi wǝ lele nwǝ beefi kesusu asa utǝ mɛ. Nya ɔ́tɛyi mɛ nkǝ, “Su esusu mɔ kedikǝtǝkɔ ku leba nǝ ǝsuǝ bǝǝtǝ kedi ku lǝ akla betidi ba nlɛ busumu lǝ kedikǝtekɔ mfó. ²Fɛɛ mensusu diyo nǝmǝ eto lekpata, itsyise béfi mfo bǝtǝ mba lenni Yudafɔ. Mǝ lǝǝbǝ botaka kǝńyǝ lǝ umǝ kɛnkɛ ǝmǝ ǝsuǝ itǝ afa fosi ana afa ǝnuǝ. ³Mootsyese mɔ badansiɛ inuǝ ba lɔɔkɛ lǝ nkumfia ǝsuǝ babé mɔ Ditiki Sɛɛ nǝmǝ letsya itǝ eyi kɔkpi alofa ǝnuǝ awosi akua (1,260) nyamfó.”

⁴Bǝnyɛlǝkǝtidi inuǝ bamfo ni nnuǝbi eto eyi ǝnuǝ ku kakandiɛyi inuǝ nnya ńyǝ lǝ kawunsiɛ eto Onamute eto ǝnǝmi nɛ. ⁵Lǝ utsyuǝ ala nkǝ weeyifo mǝ kabuaa, ute aabɔ ketsyi lǝ mǝ nnyɛ katsylɔsǝ mǝ. Nyaso utidi wǝ ke laala nkǝ weeyifo mǝ kabuaa, kusu komfo ǝsuǝ bɔɔyɛ balo wǝ nɛ. ⁶Bakpe ǝsuǝale baafo ɔsɔmi kusu buti bǝ woanni lefe nǝ banlɛ Onanto eto Ditiki Sɛɛ nǝmǝ letsya bobe. Bakpe ǝsuǝale tsya lǝ etubiǝ kenke ǝsuǝ nya bootǝ bǝ ntu bomǝ fiani kɔtɔ. Bakpe ǝsuǝale tsya bǝ kanyinyǝnyǝ ate ate bǝ lǝ kawunsiǝ kenke ǝsuǝ lǝ lefe nǝ kee baala ǝsuǝ.

⁷Lefe nǝ ke babé Onanto eto Ditiki Sɛɛ nǝmǝ letsya balosǝǝ, ubutubuki kplɛ wǝ lɛbɔ utsyi lǝ dikpembiǝ kplɛ nǝmǝ ubǝǝ, ebɔkpɔnko mǝ utǝkǝ mǝ kato olo mǝ. ⁸Mǝ ǝsuǝ eto sinǝ kpenkpe siamǝ ebolabelǝ obia lǝ umǝnkplɛ ǝmǝ bǝtǝkǝ diye kulakula bǝ Egipte nye Sodom eto obia. Mfo básɔ mǝ Onamute lǝ uyikabie ǝsuǝ nɛ. ⁹Lǝ eyi ǝtsyǝ ku kutsyǝ ǝsuǝǝ, betidi ebutsyi ese saa ese, nlɛ saa nlɛ, bele tɛyitɛyi saa beletɛyitɛyi ku kawunsiǝ eto betidi ba tã bǝbǝ babe mǝ bakɔ nya bǝmbɔtɔnɔ bǝ bebikǝ mǝ. ¹⁰Nya kaawunsiǝ eto betidi ebunyǝ disuǝyuǝ lǝ betidi inuǝ bamfo eto ukpe eso. Booto keyudu, bǝtǝ bǝtsyuǝ asa, itsyise Onanto eto bǝnyɛlǝkǝtidi inuǝ bamfo ekpe esoo, lǝ kanyi kpǝ ka bǝnǝ baboko betidi ǝsuǝ eso.

¹¹Lǝ eyi ǝtsyǝ ku kutsyǝ kama, ufiebi wǝ lǝǝtǝ nkpǝ ditsyi Onanto ɔflɔ ǝbǝ údufǝ lǝ mǝ nya bátaka bǝńyǝ bǝbǝ nkpǝ! Sikpi ǝmuǝ mba kenke dínyǝ mǝ tinti. ¹²Nnya kamaa, bǝnyɛlǝkǝtidi inuǝ bamǝ ánɔ ɔkɔɛ utsyuǝ wǝ lɛbɔ útsyi kato wǝ lɛtɛyi mǝ nkǝ, “Bibǝ kato mfo!” Kase mǝ balo ńyǝ banlɛ mǝ bobee, bédufǝ lǝ lɛsɔmiloku ǝsuǝ nya dítsyi mǝ disuko kato.

¹³Lǝ lefe nǝmfó ǝsuǝ tututuu, kasɔ étinkǝ kekleke nya umǝ eto lekpafosile léba lékpo kasɔ muɛmuɛmuɛ, nya betidi akpi akuanse díkpe. Sikpi ǝmuǝ betidi fɛfɛ bamǝ nya bátɛsǝ Onanto wǝ nkpe kato eto diye!

¹⁴Kanyinyǝnyǝ nuǝfǝ ébubǝkafe, fɛɛ kǝtsyǝfǝ teke kama ɛlɛ bubǝ kitikpo.

Béfe Kakpatsyaku Kuansele.

¹⁵Lǝ nnya kamaa, Onanto eto ɔtɔnkpe kuansele éfe wǝ kakpatsyaku, nya mínɔ kakɔɛ bembembe lǝ kato ka nlɛ bɔtɛyi nkǝ,

“Kawunsiǝ kamfo eto sekakedikɔ áfiani Boanto Onanto ku Wǝ Nwǝ Bákpo Ɔhile Bǝtsyǝ eto kale,

nya wuudi seka idu manlo isu manlo!”

¹⁶Mfó ǝmǝ nya beninǝ fosi ǝnuǝ ena ba nsi lǝ Onanto eto ǝnǝmi lǝ mǝ akankpomɛ ǝsuǝ lékpo kasɔ béfusǝ ǝnǝmi nya bátɛsǝ Onanto ¹⁷banlɛ bɔtɛyi bǝnkǝ,

“Bonamute wǝ ni ǝsuǝalenyǝ kenke, wǝ nkpe nya ɔkɛ!

Bɔasɔ fǝ ani,

itsyise éfi fǝ ǝsuǝale kplɛ nyamǝ

nya fétsyiko seka budi.

¹⁸Kafo ányi betidi ba dímamfo fǝ bánɔ.

Lefe nǝ ele bǝ lǝkǝ fǝ lɛblɔfi ate eboyo.

Lefe nǝ ele bǝ bakponko bekpenkpe lekpo eboyo.

Lefe nǝmǝ eboyo bǝ lǝ afo fǝ bǝnyɛlǝkǝtidi ba ni fǝ beyifoyifo, bamǝ kayo sɛɛ,

ku fǝ betidi kenke ba nkpe dibu itǝ fǝ,

bakplɛnyǝ ku betidi wuewue ta kenke.

Nya lefe eboyo bǝ lǝ atsyɔlɔsǝ betidi bua ba lélo fǝ betidi lǝ kawunsiǝ.”

¹⁹Básini Onanto eto kedikǝtǝkɔ kɛnkɛ ka kato, nya mínyǝ kɛnyɛklekle eto lelaka nǝmǝ mfó. Nya difule léto ɔsi díńyǝ ute ku kudu kplɛ. Kato ékumi nya kasɔ dítinkǝ nya etubankli kplɛ kpǝ lélo.

Usio Ku Kola Komǝ.

¹Mfo nya ayanisa ǝtsyuǝ dílǝkǝ ǝsuǝ éte lǝ difule ǝsuǝ.Usio utsyuǝ wǝ nkpe awu nnya nte fe kofe seka, dílǝkǝ ǝsuǝ óte. Ómankli kofande uńyǝ nya lekankpakpa nǝ béfi lefo befandebi binuǝ béyifo nti wǝ lǝ disi. ²Usio ǝmǝ lɛ kafo. Kafo kamǝ lɛ wǝ bunǝ, nya se kafo nlɛ wǝ bunǝ esoo, úkafa bembembe. ³Ekpinsa bamba esi ɛbɔ lǝ difule bio! Owa kplɛ wǝ nkpe sikpi, lɛsɛ, nkpe esi akuanse ku akpɛ lefosi, nya wǝ disi saa ntsyi lekankpakpa tsya lɛbɔ. ⁴Úfi wǝ uke únǝ befandebi eto lekpa tsyǝfǝ utsyiko difule nǝmǝ ǝsuǝ kato ókpo lǝ kasɔ ǝsuǝ. Nnya kamaa, ótaka uńyǝ lǝ usio ǝmǝ eto sɛtɔ nkǝ lǝ ole ubi ǝmǝ koo, lǝ umuǝ wǝ ɔmini. ⁵Nya usio ǝmǝ léle osaibi, wǝ luudi seka lǝ kawunsiǝ kenke ǝsuǝ, ku situ eto oka eto uyi. Fɛɛ Onanto eto Lɛwɔnɔ étsyi ubi ǝmǝ údunko mlǝ úsuko Onanto ku wǝ lekankpomɛ nǝmǝ ɔflɔ. ⁶Usio ǝmǝ étsyetsyi úsu mfim nti kaka Onanto lɛlɔ kǝsiǝkɔ utsyǝ wǝ, kaka bɔɔlɛ wǝ ola itǝ eyi kɔkpi kɔni eyi alofa ǝnuǝ eyi fosiakua (1,260).

⁷Mfo nya lema díbǝ lǝ kato. Nya Onanto eto ɔtɔnkpe ninǝ kenke wǝ baakpo Mikael lɛtɔnko Onanto eto batɔnkpe bátaka lema lǝ owa kplɛ ku wǝ batɔnkpe bamǝ ǝsuǝ nya batsyaka lema. ⁸Bǝtǝkǝ owa kplɛ ku wǝ batɔnkpe bamǝ kato, nya bénsitǝ wǝ ku wǝ batɔnkpe bamǝ kusu bǝ bǝsiǝ lǝ kato mfó bio. ⁹Bála owa kplɛ ǝmǝ bǝlǝkǝ lǝ kato mfó. Wǝ ni owa koko kplɛ ǝmǝ baakpo olo ǝmǝ nye Obonsam nɛ, wǝ lɛwɛ kawunsiǝ kenke okpe nɛ. Nya bála wǝ ku wǝ batɔnkpe kenke bátsyese kasɔ mfo.

¹⁰Nyamfo eto kamaa, nya mínɔ ɔkɔɛ kplɛ utsyuǝ lǝ kato nlɛ bɔtɛyi nkǝ,

“Mɔmɔɔ, Onanto eto bofokǝtǝ utidi ebubǝ!

Onanto eto ǝsuǝale ku sekadidi ebubǝ.

Wuulǝkǝ wǝ Nwǝ Onanto Lékpo Ɔhile Utsyǝ eto ǝsuǝale ote.

Itsyise bǝlǝkǝ nwǝ díkala bo bayimi kɛnyɛ ketsye ku kakɔmi kǝtǝ Onanto báto bákpe itsyi kato.

¹¹Bǝtǝkǝ wǝ kato ɛyɛ lǝ

Lesamubi nǝmǝ eto kɔtɔ

ku ɔnukualɛtiki nnya ǝsuǝ bábe letsya.

Itsyise bátɔnɔ faa bǝ bookpe

nya béfi mǝ nkpǝ bǝtǝ fe keditǝtǝ seka.

¹²Nyaso binyǝ disuǝyuǝ

mimba nkpe kato mfo!

Fɛɛ mǝǝtǝ kasɔ ku lekpo mbɔbɔɛ!

Itsyise Obonsam áyifǝ úbǝ mi ɔflɔ ku lɛblɔfi.

Itsyise uyi nkǝ lefe sɛkɛ hã dibu itǝ wǝ.”

¹³Se owa kplɛ ǝmǝ dínyǝ utsyǝ lekpo nkǝ bála wǝ báto bakpe lǝ kasɔ mfóo, ɔ́ti usio wǝ léle osaibi ǝmǝ kama. ¹⁴Nya béfi kɔlikpo eto mbaba kplɛ nuǝ bǝtǝ wǝ lǝ ufunini usu kaka wɔɔkɛ lǝ mfiminti kaka bɔɔlɛ wǝ ola itǝ alɛ ǝtsyǝ ku kutsyǝ bǝ lǝ ɔbɔ ofe lǝ owa kplɛ ǝmǝ eto ani. ¹⁵Lǝ nnya kamaa, owa kplɛ ǝmǝ ala ntu kpenkpenkpe ntsyuǝ bǝ lǝ bɔbɔdi fe ketu kplɛ busu butsyi usio ǝmǝ budunko. ¹⁶Fɛɛ kasɔ áfo kǝtǝ usio ǝmǝ nya kéminkli kɛnyɛ kámini ntu boǝ kenke owa kplɛ ǝmǝ léla. ¹⁷Ete owa kplɛ ǝmǝ dínyǝ ɔblɔ kekleke ókpe usio ǝmǝ, nya údu úsu nkǝ weesu ɔkpɔnko usio ǝmǝ eto befluflu ba díbu ba leetsyue Onanto eto etiki koto nya báfo ɔnukualɛ wǝ bǝlǝkǝ bate mǝ lǝ Yesu ǝsuǝ bánɔ. ¹⁸Nya owa kplɛ ǝmǝ díńyǝ lǝ lekpo kɛnyɛ mfó.

Yohanes Ǝnyǝ Bebutubuki Bua Inuǝ.

¹Nyamfo eto kamaa, nnyǝ ubutubuki utsyuǝ nlɛ bɔbɔ ketsyi lekpo kǝmiǝ. Okpe esi akuanse ku aakpɛ lefosi. Lɛɛkpɛ saa tsyi lekankpakpa. Nya báwɔni mbusiotiki nnya ńyǝ lǝ Onanto ǝsuǝ bǝtǝkǝ lǝ wǝ disi saa ǝsuǝ. ²Ubutubuki ǝmǝ ale ɔkplɛle, nya wǝ akpa te fe ukiti eto ale, nya wǝ kɛnyɛ te fe tsyata eto kale. Owa kplɛ ǝmǝ éfi wǝ kosate eto ǝsuǝale, wǝ lekankpomɛ ku wǝ sekadidi eto ǝsuǝale kplɛ nyamǝ útǝ ubuki ǝmfo. ³Ubutubuki ǝmǝ eto disi lɔni te fenkǝ léfo dikpemfabe kekleke ditsyuǝ, fɛɛ lefabe nǝmǝ ébukpe. Nyamfo éyifo kawunsiǝ eto betidi kenke naa, nya bǝtǝkǝko ubutubuki ǝmǝ kama. ⁴Betidi ésumu owa kplɛ ǝmǝ, itsyise kúfi ko ǝsuǝale kútǝ ubutubuki ǝmfo. Bémusu ubuki ǝmǝ bátɛyi bǝnkǝ, “Owoe nte fe ubutubuki ǝmfo? Nya owoe loofo wǝ bɔkpɔnko?”

⁵Bǝtǝ ubutubuki ǝmǝ ǝsuǝale údi emutiki nya lǝ Onanto ǝsuǝ, nya ditǝ únyǝ ǝsuǝale itǝ afa fosi ana afa ǝnuǝ. ⁶Útsyiko Onanto eto diye, wǝ kǝsiǝkɔ ku betidi ba kenke nsi lǝ wǝ ɔflɔ kato bukudi. ⁷Bǝtǝ wǝ kusu bǝ ɔkpɔnko Onanto eto betidi lǝ utǝkǝ mǝ kato, nya besi bǝtǝ wǝ ǝsuǝale lǝ ese saa ese, betidi saa betidi, bele saa bele ku kafo saa kafo ǝsuǝ. ⁸Nya betidi ba kenke nsi lǝ kasɔ mfo ebusumu wǝ enso betidi ba hã eto aye báwɔni fɛ béyifo kawunsiǝ bákpe lǝ nkpǝ eto kukue ko ni Lesamubi nǝ bálo eto bale.

⁹Nwǝ ato nkpee, lǝ ɔnɔ.

¹⁰Utidi wǝ ele bǝ bǝmuǝ,

boomuǝ wǝ.

Nya nwǝ tsya ele bǝ balo ku lesiabi tsyaa,

ele bǝ balo wǝ nko.

Nyamfo esoo, mi Onanto eto betidi, ele bǝ bińyǝ kekleke lǝ kanyinyǝnyǝ ǝsuǝ nya lǝ bidi ɔnukualɛ bitǝ wǝ.

¹¹Mfo minsi mínyǝ ubutubuki bua bamba wǝ lɛbɔ utsyi kasɔ. Ukǝ aakpɛ ǝnuǝ lǝ disi fe lekposubi eto ale, fɛɛ údi etiki fe owa kplɛ ǝmǝ seka. ¹²Ófo ǝsuǝale kplɛ nnya nkpe wǝ utsyiko lǝ ututɛ ǝmǝ ɔflɔ, nya úyifo nnya keyifo lǝ wǝ ǝnǝmi. Útǝ nkǝ betidi ba nsi kasɔ mfo ku ke betidi kenke lǝ besumu ubutubuki bua tutɛ ǝmǝ wǝ bǝtǝkǝ dikpemfabe kekleke fɛ díkǝkpǝ. ¹³Ubutubuki nuǝfǝ ǝmfo éyifo ayanisa kplɛ. Útǝ ute kulaa tsya ábɔ utsyi kato úbǝ kasɔ lǝ betidi ba kenke eto ǝnǝmi.

¹⁴Ɔ́wɛ betidi ba kenke nsi lǝ kasɔ lǝ ayanisa nnya bǝtǝ wǝ kusu bǝ uyifo lǝ ubutubuki tutɛ eto ǝnǝmi eso. Ubuki ǝmǝ átɛyi kawunsiǝ eto betidi nkǝ bato ubutubuki bua wǝ eto disi bǝtǝkǝ lefabe ku lesiabi fɛ ɔkɛ nkpǝ eto ditsyǝbi lǝ befi bakpe wǝ dibu. ¹⁵Bǝtǝ bǝ ubutubuki bua nuǝfǝ ǝmǝ nkpe ǝsuǝale mfoo, wɔnɔ nkpǝ okpo lǝ ubukitonto tutɛ ǝmǝ ǝsuǝ bǝ lǝ ofo etiki budi nya lǝ utǝ lǝ balo betidi ba kenke lembusumu wǝ.

¹⁶Ubutubuki ǝmǝ ǝtǝ nkǝ bǝtǝkǝ betidi ba kenke, betidi wuewue ku beninǝ, batabinyǝ ku bakombo, ndomufɔ ku mba nsi lǝ mǝ ǝsuǝ ǝsuǝ leba lǝ mǝ kodiani lee lǝ mǝ nto. ¹⁷Kuutsyuǝ saa embofo lesa bote lee oya lǝ bǝntǝkǝ wǝ leba nǝmfo, ini ubutubuki bua ǝmǝ eto diye nye leklabi nǝ nyǝ itǝ wǝ diye.

¹⁸Ditiki nǝmfo atɔ itǝ kobetete. Utsyuǝ saa wǝ laanɔ asa kasɔ bu ubutubuki bua eto leklabi nǝmfo obe. Itsyise leklambi nǝmfo ńyǝ ditǝ utidi eto diye. Ni leklabi ni alofa akua awosi akua akua (666).

Yohanes Ǝnyǝ Lesamubi Ku Wǝ Betidi.

¹Nyamfo eto kamaa, nnyǝ Lesamubi nǝmǝ se dinyǝ lǝ Sion eto kɔtini ǝsuǝ. Nnyǝ betidi akpi kolofa awosi ana ana (144,000) ba eto nto bawɔni wǝ diye ku wǝ Anto ǝmǝ eto diye bǝtǝkǝ, nya bǝńyǝ wǝ lǝ akɔ. ²Ete mínɔ ɔkɔɛ utsyuǝ wǝ ditsyi kato fe ntu bo nlɛ boto lǝ ketsyue kplɛ nye ofamfa seka bembembe. Ɔkɔɛ wǝ minɔ esi ole fe betidi nlɛ kasanku bɔsɔ. ³Betidi akpi kolofa awosi ana ana bamǝ ńyǝ lǝ lekankpomɛ nǝmǝ ɔflɔ, asa ana nya nsi nkpǝ ku beninǝ bamǝ. Balɛ kusǝ fɔfɔ ko mǝ hã lekase busǝ. Lǝ betidi kenke ntii, mǝ hã ni mba dinyǝ bofo nɛ. ⁴Mǝ ni basani ba lɛlɛ mǝ ǝsuǝ kɛnkɛ betsyiko lǝ sɛsɔnɔdi ǝsuǝ. Mǝ ni mba dítǝkǝko Lesamubi nǝmǝ kaka ke lɛntɔ. Mǝ disi báfo kayo nɛ lǝ betidi nti nya mǝ ni betidi tutɛ ba befi bǝtǝ Onanto ku Lesamubi nǝmǝ nɛ. ⁵Bantɛyi tɔ sidia bǝnyǝ, nya bǝnyǝ tɔ kabua saa lǝ mǝ ǝsuǝ bǝnyǝ.

Yohanes Ǝnyǝ Kato Eto Batɔnkpe Itsyǝ Bǝtsyuǝ.

⁶Nyamfo eto kamaa, nnyǝ Onanto eto ɔtɔnkpe bamba utsyuǝ wǝ nlɛ bufunini kabe kato fanlofanlo ku nkpǝ manlo eto Ditiki Sɛɛ nǝmǝ itǝ betidi ba nkpe kasɔ eto lekpake saa, ese saa, bele saa ku nsɔ saa nsɔ. ⁷Ófá ɔ́tɛyi nkǝ, “Bibu Onanto lǝ bɛtɛsǝ wǝ sɛkplɛ siamǝ! Itsyise lefe éboyo bǝ okponko kawunsiǝ kenke lekpo. Bisumu wǝǝ diyifo kato ku kasɔ, lekpo ku ntu bo laayifǝ saa eto okle!”

⁸Onato eto ɔtɔnkpe nuǝfǝ ǝtǝkǝko ututɛ nya ɔnlɛ bɔtɛyi nkǝ, “Oba o-o! Babilonia wǝ lefo diye ǝmǝ aba sitinti! Útǝ betidi kenke ba díkpe nte ɛyɛ lǝ mǝ sɛsɔnɔdidi eto lebua ǝsuǝ ǝkpǝ nte fe bunǝ bǝnǝ mu bǝkpǝ!”

⁹Onanto eto ɔtɔnkpe tsyǝfǝ ǝtǝkǝko betutɛ inuǝ kama nya ɔnlɛ bofa bembembe katɛyi nkǝ, “Utsyuǝ saa ke lusumu ubutubuki ǝmǝ ku wǝ awesa nyamǝ nya utǝ bǝtǝkǝ leba lǝ wǝ kato nye lǝ wɛ kɔni, ¹⁰ebunǝ Onanto eto lɛblɔfi ku wǝ lefonyi kekleke nǝmǝ fe nte bo nkpe ale lɛkɔbetɔ nǝ béfi bákpo lǝ wǝ lɛblɔfi ǝsuǝ! Boofi ute ku ute eto leba bǝtǝkǝ mba diyifo nyamfo bǝnyǝ kanyi lǝ Onanto eto batɔnkpe kɛnkɛ ku Lesamubi nǝmǝ eto ǝnǝmi. ¹¹Ute wǝ nlɛ mǝ botonsǝ eto kuyuǝ ko nlɛ bɔbɔ ketsyi lǝ kanyinyǝnyǝ kamɛ ǝsuǝ ebukabe kato idu manlo isu manlo. Nya lefe saa, ketsye ku kakɔmii, betidi ba dísumu ubutubuki ǝmǝ ku wɛ awesa ku mba ǝsuǝ wǝ diye eto leba ntǝkǝ embɔkɛ diyuǝ kulefe.

¹²“Nyamfo lɛ bote nkǝ mba ni Onanto eto betidi nya beetsyue Onanto eto etiki koto nya báfo Yesu banɔ, ńyǝ kekleke lǝ mǝ kanyinyǝnyǝ ǝsuǝ.”

¹³Nya mínɔ ɔkɔɛ utsyuǝ kato ɔnlɛ bɔtɛyi nkǝ, “Wɔni nyamfo ǝtsyǝ bǝ idu mɔmɔ ɛntɔɔ, bákpo betidi ba diyifo bani ku Bonamute fɛ békpe atsyɔ!” Nya Lɛwɔnɔ nǝmǝ léfo lǝ nnya ǝsuǝ nkǝ, “Ee, bootsyǝ ɔnwɛ lǝ mǝ nyifo ǝsuǝ. Nya boonyǝ mǝ kayofofo.”

Kawunsiǝ Eto Bɛkuɛnke Eto Lefodife Eboyo.

¹⁴Nnya kamaa, nnyǝ asɔmiloku flubia ǝtsyuǝ, nnya ǝsuǝ lele utidi eto ditsyǝbi nsi. Úti sika eto lekankpakpa lǝ disi nya ɔnlɛ sɛyikpɛbe sia nkpe kobe lǝ kɔni. ¹⁵Mfó nya ɔtɔnkpe bamba utsyuǝ lɛbɔ utsyi lǝ Disumuyo nǝmǝ kafo nya ófã bembembe ótsyese nwǝ nsi lǝ asɔmiloku nyamǝ ǝsuǝ ɔ́tɛyi nkǝ, “Bike biamǝ lefodife éboyo, nyaso fi fǝ sɛyikpɛbe lǝ afodi bidike biamǝ itsyise kasɔ eto bidike biamǝ eboyo lefodife!” ¹⁶Nya nwǝ nsi lǝ lɛsɔmiloku nǝmǝ ǝsuǝ lɛwunya wǝ sɛyikpɛbe siamǝ ofia nya ófodi kawunsiɛ eto bɛkuɛnke biamǝ kenke.

¹⁷Nnya kama, nnyǝ Onanto eto ɔtɔnkpe bamba wǝ lɛbɔ utsyi Onanto eto kedikǝtǝkɔ, nya wǝ tsya nlɛ sɛyikpɛbe sia nkpe kobe.

¹⁸Nya Onanto eto ɔtɔnkpe bamba tsya wǝ nsi lǝ ute eto kɛnyɛ, lɛbɔ utsyi kedikǝtǝkɔ eto leba mfó úbǝ. Ɔtɔnkpe ǝmfo áfã ku ɔkɔɛ bembembe ɔ́tɛyi ɔtɔnkpe wǝ nlɛ sɛyikpɛbe nkǝ, “Fi fǝ sɛyikpɛbe sia nkpe kobe lǝ alɛ nte eto eyibibi nnya nkpe lǝ kawunsiǝ eto ɔkpɔ ǝmǝ kafo, itsyise eyibibi nyamǝ ebobe itǝ bɔlɛ.”

¹⁹Nyaso Onanto eto ɔtɔnkpe ǝmǝ awunya wǝ sɛyikpɛbe siamǝ ofia nya ɔlɛ ebibi nyamǝ lǝ kawunsiǝ kenke ókpo lǝ kaka bǝǝkǝ eyibibi eto ntu kakpo ka ni Onanto eto lɛblɔfi kplɛ nǝmǝ ǝsuǝ. ²⁰Nya béké eyibibi nyamǝ lǝ kaka ǝsuǝ beeke eyibibi eto ntu kakpo ǝmǝ lǝ umǝmflɔ, nya kɔtɔ lɛbɔ kɔ́bɔdi fe esunkpo lofa ǝnu sɔ̃ɔ̃ lǝ dikulǝbi ǝsuǝ nya kotsyo tsya fe akpa anɔ.

Onanto Eto Batɔnkpe Bǝtsyuǝ Ǝnǝ Kanyinyǝnyǝ Fɛfɛ Báboko.

¹Nyamfo eto kamaa, nsi nnyǝ ǝnyǝsa kplɛ bamba kato nnya díyifo ǝnyǝsa nnya lɛkɛ ale. Nnyǝ Onanto eto batɔnkpe ekuanse ba lɛkɔbe kanyinyǝnyǝ akuanse fɛfɛ banlɛ, itsyise nnya dílǝkǝ Onanto eto lɛblɔfi fɛfɛ éte nɛ.

²Nya mínyǝ lesa nǝ nte fe ahuhɔɛ eto lekpo nnya letsyaka ku nte wǝ lɛsɛ hee. Nnyǝ betidi ba tsya dílǝkǝ ubutubuki bua ǝmǝ ku wǝ asawenwe nyamǝ ku nwǝ eto diyee, aklansa dílǝkǝ éte. Bǝńyǝ lǝ ahuhɔɛ eto lekpo nǝmǝ nya banlɛ kasanku ka Onanto dítǝ mǝ.³Nya banlɛ Moses, Onanto eto uyifoyifo ku Lesamubi nǝmǝ eto kusǝ busǝ katɛyi bǝnkǝ,

“Bonamute Onanto, Ǝsuǝalenyǝ Kenke,

ntsyǝ fǝ eyifosa lɛmɔ iyifo yanii mmǝ!

Ǝse nnya kenke eto Oka,

nya fǝ asayifoyifo lɛflɔ nya fǝ etiki diyifo ɔnukualɛ.

⁴Owoe loofo buńyǝ fǝ lǝ ǝnǝmi nya wǝmbote fǝ sikpi, O Bonamute,

nya wembufi atɛsǝ utǝ fǝ dinye?

Itsyise fǝ hã diyifo kɛnkɛ,

nya kawunsiǝ eto betidi kenke luubǝ bǝtǝ fǝ dibu.

Itsyise bǝlǝkǝ fǝ asasɛ yifoyifo bate utsyuǝ saa ǝnyǝ.”

⁵Lǝ nyamfo eto kamaa, ńnyǝ se Kedikǝtǝkɔ lǝ kato ku kaka ni Kakɛnkɛkɔ Kenke lǝ mfó lɛsini nte. ⁶Nya Onanto eto batɔnkpe ekuanse ba nlɛ kanyinyǝnyǝ akuanse nyamǝ lɛbɔ betsyi lǝ Disumuyo nǝmǝ. Bakpe awu flubia nya nlɛ buyǝnde nya béfi sika sia eto kekue bákle mǝ akɔɛsi. ⁷Mfo nya asa ana nyamǝ nsi nkpǝ eto ɔni dífi sika sia eto ekplibi akuanse nnya díyi ku Onanto wǝ nsi nkpǝ manlo manlo eto lɛblɔfi útǝ batɔnkpe ekuanse bamǝ. ⁸Nya kuyuǝ ko lɛbɔ kutsyi lǝ Onanto eto diyǝnde ku ǝsuǝale nyamǝ diyi Disumuyo nǝmǝ kenke, nya kuutsyuǝ saa mamfo Disumuyo nǝmǝ budufǝ ese lefe nǝ efimbi akuanse nya batɔnkpe ekuanse bamǝ lébokodibǝ éfe.

Bawuninsǝ Onanto Eto Lɛblɔfi Eto Ɛkpɛ Ekuanse Nyamǝ Bákpo Lǝ Kawunsiǝ.

¹Mfó minɔ ɔkɔɛ bembembe utsyuǝ lɛbɔ utsyi Disumuyo nlɛ batɔnkpe ekuanse bamǝ nlɛ bɔtɛyi nkǝ, “Bisu bɛwuninsǝ Onanto eto lɛblɔfi eto ɛkpɛ ekuanse nyamǝ bekpo lǝ kawunsiǝ ǝsuǝ!”

²Onanto eto ɔtɔnkpe tutɛ ǝmǝ esu ɔwuninsǝ wǝ ɔkpɛ ǝmǝ okpo lǝ kawunsiǝ ǝsuǝ. Nyamfo ǝtǝ bǝ afabe nya nkpe kɛnyɛ ale, leefi, abɔ ekpo lǝ mba ubutubuki ǝmǝ eto leba ntǝkǝ ku mba disumu wǝ awenwesa.

³Nya ɔtɔnkpe nuǝfǝ lɛwuninsǝ wǝ ɔkpɛ ókpo lǝ lekpo ǝsuǝ, nya ntu bomǝ lɛtsyi bɔwuninsǝ bofiani fe betidi kpenkpe eto kɔtɔ seka, itǝ bǝ asa nnya nkpe nkpǝ lǝ lekpo nǝmǝ kenke ekpe.

⁴Nya ɔtɔnkpe tsyǝfǝ lɛwuninsǝ wǝ ɔkpɛ ókpo lǝ ntu ku etubiǝ kenke ǝsuǝ nya nyamblɛ léfiani kɔtɔ. ⁵Mfo mínɔ se ɔtɔnkpe wǝ laabe ntu lɛtɛyi nkǝ,

“O ɔkɛnkɛnyǝ, fǝǝ nsi nkpǝ idu taa kokolefe ke,

fǝ akpokponkpo kenke aayɛ lǝ kusu tsyɔntsyɔ ǝsuǝ lo!

⁶Betidi bamfo ákpo fǝ betidi ku fǝ bǝnyɛlǝkǝtidi eto kɔtɔ kasɔ.

Nyaso fǝtǝ mǝ kɔtɔ fǝ bǝnǝ nɛ.

Kotonǝnǝ komfo ǝńyǝ kutǝ mǝ tinti!”

⁷Mfo mínɔ ɔkɔɛ lɛbɔ utsyi Onanto eto kedikǝtǝkɔ eto leba ǝsuǝ nlɛ bɔtɛyi nkǝ, “Bonamute Onanto, Ǝsuǝalenyǝ Kenke! Fǝ lekpokponkpo yɛ lǝ kɔtsyɔntsyɔsu ku lǝ ɔnukualɛ ǝsuǝ.”

⁸Nyamfo eto kamaa, Onanto eto ɔtɔnkpe nale áwuninsǝ nnya nkpe lǝ wǝ ɔkpɛ ǝsuǝ ókpo lǝ kofe eto ǝnǝmi ǝsuǝ nya Onanto dítǝ ko ǝsuǝale nkǝ otonsǝ betidi ku ko utefofo. ⁹Ute eto ǝsuǝale átonsǝ mǝ nya békudi Onanto eto diye. Onanto kpé ǝsuǝale lǝ kanyi kamfo ǝsuǝ, fɛɛ báni bǝ bǝmbɔtsyi bawuninsǝ lǝ mǝ abua ǝsuǝ batɛsɛ wǝ sɛkplɛ.

¹⁰Ɔtɔnkpe nɔnde ǝmǝ áwuninsǝ nnya nkpe lǝ wǝ ɔkpɛ mǝ ǝsuǝ ókpo lǝ ubutubuki bua ǝmǝ eto lekankpomɛ ǝsuǝ. Kale ko léna lǝ ubutubuki ǝmǝ eto sekakedikɔ kenke nya betidi lɛyimi anyi lǝ kanyi ka banlɛ bunyǝ eso. ¹¹Nya betidi bamǝ díkudi Onanto wǝ nkpe kato lǝ kanyi ka banlɛ bunyǝ lǝ afabe nyamǝ eso. Tsyaa, báni bǝ bǝmbɔtsyi bawuninsǝ lǝ mǝ abua ǝsuǝ.

¹²Nyamfo eto kamaa, Onanto eto ɔtɔnkpe kuande ǝmǝ áwuninsǝ asa nnya nkpe lǝ wǝ ɔkpɛ ǝsuǝ ókpo lǝ Ketukplɛ Frate ǝsuǝ. Ketu kamǝ ákpi kǝtǝ baka ba ditsyi kofekatokɔ kusu lǝ bayɛ bafe. ¹³Mfó nya mínyǝ awɔnɔ bua ǝtsyǝ nnya nte fe asasa lɛbɔ itsyi lǝ owa kplɛ ǝmǝ, ubutubuki bua ǝmǝ ku bidiabidia eto unyɛlǝkǝtidi ǝmǝ eto nnyɛ.

¹⁴Beyifo awɔnɔ bua nnya leeyifo ayanisa. Awɔnɔ bua etsyǝ nyamfo leesu kakpadi kawunsiǝ eto baka kakɔ itǝ lema bɔkpɔ lǝ Boanto Onato, Ǝsuǝalenyǝ Kenke ǝmǝ, eto Diyi Kplɛ nǝmǝ ǝsuǝ.

¹⁵“Bɛnɔ! Muubǝ fe uyu seka! Disuǝyuǝ itǝ nwǝ luutǝkǝ ǝnǝ nya umuǝ ǝsuǝ utsyǝ ku wǝ awu bikelɛlɛ wǝmbɔyɛ leyaleya okpe wǝ ǝsuǝ kofani lǝ betidi nti.”

¹⁶Mfó nya awɔnɔ bua nyamǝ lékpa baka bamǝ bǝtsyǝ lǝ kaka baakpo Armagedon lǝ Hebri eto sele ǝsuǝ.

¹⁷Nya Onanto eto ɔtɔnkpe kuansele ǝmǝ lɛwuninsǝ nya nkpe lǝ wǝ ɔkpɛ ǝmǝ kafo okpo lǝ difule ǝsuǝ. Ete ɔkɔɛ kplɛ utsyuǝ lɛbɔ utsyi lǝ lekankpomɛ nǝ nte lǝ Disumuyo nǝmǝ nlɛ bɔtɛyi nkǝ, “Elo o-o!” ¹⁸Mfóo, difule ko ditsyiko ɔsi boto, kafa kekumi nya kasɔ ditinkǝ kekleke. Kasɔ butinkǝ kamfo eto okle mǝmbǝ tɔ kǝnyǝ idu lǝ kawunsiǝ eto kasɔ ketsyikokɔ. ¹⁹Umǝnkplɛ ǝmǝ ába lǝ akpa ǝtsyǝ, nya ese ese eto kǝmǝnkplɛ léba. Onanto ákloma Babilonia kplɛ nya utǝ únǝ nte útsyiko lǝ wǝ lɛkɔbe nǝmǝ kafo wǝ lɛblɔfi nǝmǝ eto nte. ²⁰Nsɔ bo ntu letsyilama kenke ánya vi, nya atini kenke tsya lénya. ²¹Etubankli kplɛ kplɛ fe nkedibo awosi anɔ seka áni itsyi kato ibǝ ɛblɛ betidi. Mǝ dikudi Onanto ɛyɛ lǝ etubankli nyamǝ eto kɛnyɛ ale ǝme eso.

Onanto Ebunǝ Ɔsɔnɔdi Ninǝ Kenke Koto.

¹Mfo batɔnkpe ekuanse bamǝ eto ɔni wǝ nlɛ kakpɛ ekuanse dibǝ ɔtɛyi mɛ nkǝ, “Bǝ lǝ nte fǝ kase boonǝ ɔsɔnɔdi koto. Uyifo umǝnkplɛ wǝ bato bǝnyǝnsǝ lǝ ntu bɔdibɔdi kpǝ ɔflɔ. ²Nya kawunsiǝ eto baka laa labe ko wǝ fe kase utsyuǝ leesu ɔsɔnɔdi ɔflɔ, nya kawunsiǝ eto betidi eto le bua buuyifo te fe kase bǝǝnǝ nte kekpe seka.”

³Lɛwɔnɔ nǝmǝ ǝsiǝ lǝ mɛ ǝsuǝ nya ɔtɔnkpe ǝmǝ lékpa mɛ úsu ko mfiminti. Mfó minyǝ usio utsyuǝ nsi lǝ ubutubuki sia utsyuǝ wǝ aye nya báwɔni bǝtǝkǝ lǝ ubuki ǝmǝ ǝsuǝ kenke diyifo aka itǝ Onanto. Ubuki ǝmǝ kpe esi akuanse ku akpɛ lefosi. ⁴Usio ǝmǝ kpe awu nya diyifo tũũ asiasia kpakpa akpa nya balɔkɔsǝ wǝ ku sika sia ku aba ku atsyabi nya lefo koya nya ɔnlɛ sika sia eto kɔpo lǝ kɔni ko diyi ku asa nnya laanɔ bobe ku asinsa úńyǝ utsyiko lǝ wǝ sɛsɔnɔdidi ǝsuǝ. ⁵Bawɔni lɛkulaye bǝtǝkǝ lǝ wǝ kato nǝ eto kasɔ ni bǝnkǝ

Umǝnkplɛ Babilonia,

Ɔsɔnɔdi kenke eto ambe

ku asa nnya beekisi lǝ kawunsiǝ eto ambe.

⁶Nya minyǝ usio ǝmǝ mfo wǝ dikpǝ nte ku Onanto eto betidi eto kɔtɔ ko únǝ ku mba bálo eto kɔtɔ itsyise bǝtǝkǝko Yesu kama eso. Se minyǝ wǝǝ, iyifo mǝ yanii tinti. ⁷Mfo nya ɔtɔnkpe ǝmǝ lɛtɔmɛ nkǝ, “Beso iyifo fǝ yanii mǝ? Muulǝkǝ akulasa nya nkpe lǝ usio ǝmfo ku ubutubuki esi akuanse ku aakpɛ lefo wǝ ǝsuǝ unsi nte fǝ. ⁸Ubutubuki ǝmfo ébusiǝ nkpǝ uńyǝ, fɛɛ unsisi. Ola nkǝ eni lǝ ɔbɔ utsyi lǝ ukpe eto dibiǝ kplɛ nǝmǝ kafo udu, nya lǝ bátsylɔsǝ wǝ. Betidi ba disiǝ lǝ kawunsiǝ ba eto aye báwɔni bakpe lǝ nkpǝ eto kukue fɛ Onanto diyifo kawunsiǝ, yuuyifo mǝ naa lǝ bǝnyǝ ubutubuki ǝmǝ. Itsyise úsiǝ nkpǝ uńyǝǝ, fɛ unsibǝ, nya usi wuubǝ bio.

⁹“Nyamfo ahiã itǝ kobe ku kasɔnɔnɔ. Esi akuanse nyamǝ ńyǝ itǝ atini akuanse nya ǝsuǝ usio ǝmǝ lǝǝsiǝ. Beyifo baka ekuanse tsya. ¹⁰Baka ɛnɔ bamǝ ébusiǝ nkpǝ bǝnyǝ, ɔni si lǝ lekpomɛ, nya ɔfɛfɛ mǝmbǝ tɔ. Lǝ ubǝǝ, lefe kliminti hã ete wuusiǝ. ¹¹Nya ubutubuki wǝ dísiǝ nkpǝ ibǝ efe fɛ unsisii, wǝ kosate eyifo oka flamflale wǝ ni ekuanse bamǝ eto ɔni wǝ bantɔɔ katsylɔsǝkɔ.

¹²“Aakpɛ lefosi nya fǝnyǝǝ, eyifo baka lefosi ba eto sekadidi fe dimanyo tɔ. Fɛɛ bootǝ mǝ kusu bedi seka itǝ lebombosɔsɔ lɔni ku ubutubuki ǝmǝ. ¹³Nsusu bɔni ete nkpe baka lefosi bamǝ, nya boofi mǝ ǝsuǝale ku mǝ kɛnyɛbusiǝ bǝtǝ ubutubuki ǝmǝ. ¹⁴Bɔɔkpɔnko Lesamubi nǝmǝ ku wǝ betidi ba bákpadi, ba ulǝkǝ, mba léfo wǝ banɔ ntǝkǝko wǝ, ebutǝkǝ mǝ kato, itsyise wǝ ni banamute eto Onamute, ku baka eto oka.”

¹⁵Ɔtɔnkpe ǝmǝ tsya atɛyi mɛ nkǝ, “Ntu bo fǝnyǝ bo ǝsuǝ ɔtsyetɔ ǝmǝ nsi, eyifo ese ese, betidi betidi, nle nle ku bele bele. ¹⁶Aakpɛ lefosi nyamǝ fǝnyǝ ku ubutubuki ǝmǝ, ebukisi otsyetɔnyǝ ǝmǝ. Bɔɔlɛ lesa saa nǝ nte wǝ bafo, usiǝ leyaleya. Bɔɔyimi wǝ ǝsuǝ eto sinǝ nya bootonsǝ sinǝ sia dibu ku ute. ¹⁷Itsyise Onanto éfi nyamfo okpe mǝ lǝ utu kǝmiǝ nkǝ lǝ beyifo lesa nǝ wǝ ala ǝsuǝ. Nya útǝ nkǝ beyifo bani lǝ befi mǝ sekadidi bǝtǝ ubutubuki ǝmǝ, isu ese lefe nǝ Onanto eto etiki luubǝ itǝ ¹⁸usio wǝ fǝnyǝ mfo, eyifo umǝnkplɛ wǝ nlɛ seka budi lǝ kawunsiǝ eto baka ǝsuǝ.”

Yohanes Ánɔ Nkǝ Bába Babilon.

¹Lǝ nyamfo eto kamaa, nńyǝ Onanto eto ɔtɔnkpe bamba utsyuǝ wǝ ditsyi kato ɔnlɛ kasɔ bubǝ. Okpe ǝsuǝale tinti nya wǝ diyǝnde díyǝnde lékpo lǝ kawinsiǝ kenke ǝsuǝ. ²Ófa bembembe ɔ́tɛyi nkǝ,

“Óba o-o! Babilon wǝ léfo diye sitinti nso aba kenke!

Ófiani awɔnɔ bua kenke eto ɔkplɛ eto kabiɔkɔ.

Mfó nya baklɔbɛ bua saa eto okle ba bendi kenke nsi nɛ.

³Itsyise kawunsiǝ eto betidi kenke

ǝnǝ wǝ nte bo nkpe ale ini nnya wǝ sɛsɔnɔdidi eto lebua dínǝ éboko.

Kawunsiǝ eto baka álabeko wǝ,

nya kawunsiǝ eto mba laasa asi léfiani batabinyǝ ɛyɛ lǝ wǝ setsyetɔ kekleke siamǝ ǝsuǝ.”

⁴Nya minsi mínɔ ɔkɔɛ bamba ditsyi kato nlɛ bɔtɛyi nkǝ,

“Mɔ betidi, bɛbɔ lǝ umǝ ǝmǝ bibǝ!

Bǝ lǝ bɛyɛ wǝ abua nnya ɔnlɛ buyifo buyifo.

Kase biǝmbɔkɛ lekpake lǝ kotonǝnǝ ko luubǝ lǝ wǝ betidi ǝsuǝ.

⁵Itsyise wǝ abua etsyue itǝkǝ lǝ ǝsuǝ itǝ bǝ ísu ítidi taa kato,

nya Onanto laakloma wǝ esu bua nyamǝ.

⁶Biyifo wǝ fe kase wuntsya díyifo mi eto kɛnyɛ.

Tisǝ wǝ oko sinuǝ lǝ nnya úyifo mi eto kɛnyɛ.

Lɛkɔbe nǝ kafo békuti nte bo nkpe ale bǝtǝ fǝǝ, kuti ni sinuǝ ǝtǝ wǝ.

⁷Bitǝ lǝ unyǝ kanyi,

lǝ ɔkɛ lǝ lɛwɛnlo ǝsuǝ fe kase inyǝ itǝ,

lǝ wǝ kɔlɔkɔ kekleke ku nkpǝ minimini bo údi ǝsuǝ.

Itsyise wǝǝsiǝ katɛyi wǝ ǝsuǝ nkǝ,

‘Besio eto Oka mini mfo.

Minni ɔkɔsiǝ nya membusiǝ nkewi keku kulefe!’

⁸Mmǝ eso bule bo ni kanyinyǝnyǝ ebutu wǝ diyi lɔni.

Wuudufǝ lǝ kanyi ka ni bufi,

ukpe ku kukpɛnsɛ kplɛ ǝsuǝ.

Itsyise Bonamute Onanto wǝ laakponko wǝ lekpoo eyifo ǝsuǝalenyǝ.

⁹“Lǝ kawunsiǝ eto baka ba dídinko wǝ sɛsɔnɔ, nya bédi nkpǝ ku wǝ ǝńyǝ ute wǝ nlɛ wǝ botonsǝ eto kuyuǝ ko nlɛ botakaa, boofa bewi nku bǝtǝ wǝ. ¹⁰Boonyǝ kɔsɛsɛ ke lǝ sikpe sia dímuǝ mǝ lǝ kanyi ka bǝnyǝ ɔnlɛ bunyǝ esoo, batɛyi bǝnkǝ,

‘Mbɔbuɛ! Mbɔbuɛ!

Umǝnkplɛ Babilonia!

Lebombosɔsɔ lɔni ete béfi bǝnǝ fǝ koto mǝ!’

¹¹“Mba laasa asi kplɛ ba nkpe lǝ kasɔ kamǝ tsya éwi nku bǝtǝ wǝ, ílǝ mǝ itǝ wǝ itsyise kuutsyuǝ saa ensianya fǝ bike. ¹²Kuutsyuǝ saa anya mǝ bike bia ni sika sia ku siflubia, atsyabi ku aba nnya lefo koya, mfia sia, nkufia ku mfia bo lǝǝyǝnde, eyi akpa akpa eto kakle ku nnya laanyi fififi, ku asa nnya béfi atonyi ku eyi nnya lefo koya, bitu ku situnaa ku aba nnya lefo koya béyifo tsya. ¹³Nya ɔklɔ eto bike bamba nsi ni diyikpe nǝ laanyi fififi baakpo sinamɔn ku asa fififi ate ate nnya beefi keyifo ɔklɛ. Nuǝbi bo laanyi fififi, uyudu ku lifui, nte ku nnuǝ, bloblo eto nnamfo ku edisa, batobuki ku banantsyui, batɔmini ku nkenke kplɛ bo leetsyi bike, ndomufɔ ku betidi ba buufi bǝtǝ kedi kulaa tsya.

¹⁴“Mba laasa asi átɛyi bǝnkǝ, ‘Babilonia! Asa sɛɛ nnya fábɛbɛ fǝtǝ ǝsuǝ, nnya lɛbɔ fǝ lǝ ani mmǝ nɛ. Fǝ setabikɛ ku sisuǝlɔ tsya ánya, ensiebunyǝ nnya kulefe.’ ¹⁵Mba laasa asi ba léfiani batabinyǝ ɛyɛ lǝ biketete ǝsuǝǝ, ebuńyǝ kɔsɛsɛ famfamfa itsyise báte sikpi bǝ bofo lekpa lǝ wǝ kanyi ka ǝsuǝ. Boofa nya buwi kamisǝ ku batǝyi bǝnkǝ,

¹⁶‘Mbɔbɔɛ! Mbɔbuɛ, umǝnkplɛ wǝ lefo diye.

Umǝ wǝ bálɔkɔsɛ ku mfia flubia ku nsia eto aflanka,

nya bálɔkɔsɛ wǝ ku sika sia ku aba ku atsyabi nnya lefo koya ni nwǝmfo nɛ.

¹⁷Fɛɛ lǝ lebombosɔsɔ lɔni kama, setabi siamfo kenke áfiani abiabia!’

“Ntu eto efue eto beninǝ kumba nyɛ kusu lǝ ntu ǝsuǝ, mba laaka ntu eto efue ku mba laasa asi lǝ ntu eto efue ǝsuǝ ǝkǝnǝ bǝńyǝ kɔsɛsɛ. ¹⁸Nya báfá ku keku se bǝnyǝ umǝ ǝmǝ nlɛ ute bunyǝ eto kuyuǝ, nya bátɛyi bǝnkǝ, ‘Umǝnkplɛ saa mensikɛ tɔ wǝ lekateko nwǝ mfo!’ ¹⁹Mfó bákpa utembu bákpo lǝ mǝ esi, béwi kaminsǝku bátɛyi sitinti bǝnkǝ,

‘Mbɔbɔɛ, mbɔbɔɛ boǝtǝ umǝ wǝ lefo diye mfo.

Wǝ ni umǝnkplɛ wǝ efue kplɛ

nnya laayɛ lǝ lekpo ǝsuǝ eto basate lɛyɛ bakɛ atabi ɛyɛ lǝ wǝ setabikɛ ǝsuǝ.

Nya lǝ lebombosɔsɔ lɔni ǝsuǝǝ, áfiani umǝbaba.

²⁰O mimba nkpe kato kenke, binyǝ disuǝyuǝ.

Binyǝ disuǝyuǝ mi Onanto eto betidi kenke ku wǝ bǝnyɛlǝkǝtidi ku Kristo eto batɔnkpe!

Itsyise Onanto ákponko wǝ lekpo ólo wǝ dikpi lǝ nnya úyifo mi eso!’ ”

²¹Lǝ nyamfo eto kamaa, nńyǝ Onanto eto ɔtɔnkpe wǝ nkpe ale utsyuǝ dítsyi kobansǝ kplɛ kutsyuǝ nya óto ko ókpe lǝ lekpo katɛyi nkǝ,

“Mmǝ ke booto Babilonia eto umǝnkplɛ ǝmǝ basɔ lǝ kasɔ bembembe,

nya bensiembunyǝ wǝ bio kulefe nɛ.

²²Nya bensiǝmbɔnɔ kasanku, katlowoe ku nkpatsyaku eto

kɔsɔ lǝ fǝ kulefe!

Bensiembunyǝ ani eto kɔsi eto uyifoyifo saa lǝ fǝ bio.

Nya bensimbɔnɔ ǝkuǝ saa eto kɔsɔ lǝ fǝ bio.

²³Bensiembunyǝ kakandiɛ eto buyǝnde lǝ fǝ bio.

Nya bensiembɔnɔ kusiǝkpakpa eto ese tsya lǝ fǝ.

Fǝ mba laasa asi ni bǝsuǝalenyǝ kenke lǝ kawunsiǝ,

nya ɛyɛ lǝ fǝ kasayifoyifo ǝsuǝ fawɛ kawunsiǝ eto betidi kenke fakpe!

²⁴Bǝnǝ Babilonia eto umǝ koto itsyise bǝnyǝ Onanto eto bǝnyɛlǝkǝtidi ku Onanto eto betidi

ku mba kenke bálo lǝ kasɔ mfo

eto kɔtɔ ko bákpo lǝ kasɔ mfo eso!”

¹Lǝ nyamfo eto kamaa, nnɔ kudu kplɛ ko lele sitiditu kplɛ eto kɔsɔ kato ko nlɛ bɔtɛyi nkǝ,

“Atɛsǝ itǝ Onanto!

Bofokǝtǝ, diyǝnde ku ǝsuǝale eyifo bo Onanto eto ale!

²Itsyise woakpo lekpo lǝ ɔnukualɛ ǝsuǝ,

kala etiki kǝlǝkǝ lǝ kusu tsyɔntsyɔ ǝsuǝ.

Olo otsyetɔsio bua wǝ nlɛ kawunsiǝ bobiasǝ ku wǝ sɛsɔnɔdi dikpi.

Onanto ǝnǝ wǝ koto itsyise ólo Onanto eto beyifoyifo.”

³Nya besi báfa bátɛyi bǝnkǝ,

“Atɛsǝ itǝ Onanto!

Kuyuǝ ko nlɛ bɔbɔ ketsyi lǝ ute wǝ létonsǝ umǝnkplɛ ǝmǝ lɛ bɔbɔ isu manlo manlo!”

⁴Beninǝ fosi ǝnuǝ ena bamǝ ku asa nnya nsi nkpǝ ena nyamǝ ákpo kasɔ nya bátɛsǝ Onanto wǝ dísiǝ lǝ wǝ lekankpomɛ ǝsuǝ, nya bátɛyi bǝnkǝ,

“Ibǝ itǝ nko! Atɛsǝ itǝ Onanto!”

Lesamubi Nǝmǝ Eto Kusiǝkpakpa Eto Diyi Sɛ.

⁵Ete ɔkɔɛ utsyuǝ lɛbɔ útsyi lekankpomɛ nǝmǝ ɔflɔ lɛtɛyi nkǝ,

“Bɛtɛsǝ bo Onanto,

mi wǝ beyifoyifo,

ku betidi ba ta, bakplɛnyǝ ku betidiwewe kenke

ba laate wǝ sikpi.”

⁶Nnya kamaa, nnɔ ɔkɔɛ utsyuǝ fe sitiditu eto ole nye nwǝ lele ketu eto ntu bo nlɛ boto ketsyi ketsyue kato kakpo lǝ ditumbu ǝsuǝ, nye fe ofamfa wǝ lɛbɔ utsyi kato seka, wǝ nlɛ bɔtɛyi nkǝ,

“Atɛsǝ itǝ Onanto!

Itsyise Bonamute, bo Onanto Ǝsuǝalenyǝ Kenke, ni oka.

⁷Bitǝ lǝ bunyǝ disuǝyuǝ, bobesǝ wǝ kato,

nya bufi atɛsǝ butǝ wǝ!

Itsyise Lesamubi nǝmǝ eto kusiǝkpakpa eto diyi nǝmǝ eboyo,

nya wǝ kusiǝ komǝ dílɔ wǝ ǝsuǝ

utsyǝ itǝ diyi nǝmǝ.

⁸Béfi aklala flubia nnya lele eto awu nnya nlɛ buyǝnde bǝtǝ wǝ bǝ okpe.”

Nya aklala flubia nnya lele ǝmǝǝ, eyifo Onanto eto betidi eto asa sɛɛ yifoyifo.

⁹Mfó nya Onanto eto ɔtɔnkpe ǝmǝ lɛtɛyi mɛ nkǝ, “Wɔni nyamfo ǝtsyǝ. Disuǝyuǝ itǝ mba bákpo báboko Lesamubi nǝmǝ eto kusiǝkakpakɔ eto lesakedikɔ.” Nya ɔtɔnkpe ǝmǝ disi ɔ́tɛyi nkǝ, “Nyamfo eyifo Onanto kosate eto kɛnyɛ eto etiki.”

¹⁰Mfó mínse akonki lǝ wǝ ɔflɔ miǝ lǝ nsumu wǝ, fɛ ɔtɛyi mɛ nkǝ, “Menyifo nko! Uyifoyifo ete mini fe fǝ ke ku fǝ bayimi ba léfo Yesu eto ditiki bánɔ ke. Onanto ete ele bǝ busumu!”

Itsyise ɔnukualɛ eto asa nnya Yesu dílǝkǝ ótee, nnya ni lesa nǝ lékpe Onanto eto bǝnyɛlǝkǝtidi nkɛale nɛ.

Yohanes Ǝnyǝ Nwǝ Nsi Lǝ Ɔtɔmli Flubia Ǝsuǝ.

¹¹Lǝ nnya kamaa, nnyǝ se kato lɛsini kenke nya mínyǝ ɔtɔmli flubia utsyuǝ. Baakpo nwǝ nsi lǝ wǝ bǝ Nwǝ leeyifo asa lǝ kusu ǝsuǝ ku Ɔnukualɛnyǝ. Woakpo lekpo kayɛnko lǝ kusu tsyɔntsyɔ ǝsuǝ woakpɔ lemma kayɛnko lǝ kusu tsyɔntsyɔ ǝsuǝ. ¹²Wǝ ǝnǝmi éyifo fe ute wǝ nlɛ buńyǝ nya unti akankpakpa kpǝ lǝ wǝ disi. Báwɔni diye ditsyuǝ bǝtǝkǝ lǝ wǝ nǝ kuutsyuǝ saa lenyi enso wǝ kosate hã. ¹³Ókpé awu nnya bédi bákpé lǝ kɔtɔ ǝsuǝ. Wǝ diye ni Onanto Eto Ditiki Nǝmǝ. ¹⁴Nya kato eto bamamanyǝ ba nkpe awu nya lɛlɛkɛ iflubi nnya ele, nya bensi lǝ batɔmli flubia ǝsuǝ ntǝkǝko wǝ kama. ¹⁵Útsyi lesiabi nyɛ nnuǝ yayaya lǝ wǝ kɛnyɛ nǝ wuufi ɔkpɔnko, ese ese utǝkǝ nnya kato. Wuufi situ eto uyi udi seka lǝ mǝ ǝsuǝ, nya wɔɔnwɔ wain eto ebibi ulǝkǝ nte lǝ mu kawakɔ lǝ Onanto Ǝsuǝalenyǝ Kenke eto lefonyi ku lɛblɔfi kekleke ǝsuǝ. ¹⁶Nya báwɔni diye ditsyuǝ lǝ wǝ awu nnya onkpe ku lǝ lekpabu ǝsuǝ nlɛ bɔtɛyi nkǝ,

Baka eto Oka ku Banamute eto Onamute.

¹⁷Lǝ nnya kamaa, nnyǝ Onanto eto ɔtɔnkpe utsyuǝ wǝ díńyǝ lǝ kofe ǝsuǝ, ófa bembembe ókpadi baklɔbɛ ba kenke leefunini kato ɔ́tɛyi nkǝ, “Bibǝ bɛkɔ lǝ bidi Onanto eto ditsyitsyosa kplɛ nǝmǝ! ¹⁸Bibǝ bɛyimi baka, bamamanyǝ ninǝ, bamamanyǝ, batɔmini ku betidi ba lǝǝsiǝ lǝ mǝ ǝsuǝ, betidi ba kenke, ndomufɔ ku mba nsi lǝ mǝ ǝsuǝ ǝsuǝ, bakplɛnyǝ ku betidiwewe eto ǝsuǝ eto sinǝ!”

¹⁹Nya mínyǝ ubutubuki bua ǝmǝ ku kasɔ mfo eto baka ku mǝ bamamanyǝ lɛkɔ bátaka lema lǝ Nwǝ nsi lǝ ɔtɔmini ku wǝ bamamanyǝ ǝsuǝ. ²⁰Fɛɛ bǝmuǝ ubutubuki bua ǝmǝ ku bidiabidia eto unyɛlǝkǝtidi wǝ díyifo ayanisa ǝmǝ lǝ wǝ ǝnǝmi. Ayanisa nyamfó béfi bawɛ betidi ba ubutubuki bua ǝmǝ eto leba nteke ku mba lésumu ubutubuki bua ǝmǝ eto ditsyǝbiwenwe bákpé. Béfi ubutubuki bua ǝmǝ ku bidiabidia eto unyɛlǝkǝtidi bamǝ báto bakpe ku nkpǝ lǝ ute eto aba nya nlɛ bunyǝ lǝ ditumbu klinklaa kplɛ nǝmǝ kafo. ²¹Nya nwǝ nsi lǝ ɔtɔmini ǝmǝ ǝsuǝ lélo bamamanyǝ fɛfɛ ku lesiabi nǝ lɛbɔ ditsyi lǝ nwǝ nsi lǝ ɔtɔmi ǝmǝ ǝsuǝ nya baklɔbɛ bamǝ kenke díbǝ bétsyuebi sinǝ sia ke boofo butsyuebi kamini.

Bǝmuǝ Olo Ǝmǝ Bákpe Lǝ Amana Itǝ Alɛ Kɔkpi.

¹Nya mínyǝ Onanto eto ɔtɔnkpe utsyuǝ ditsyi kato ɔnlɛ bɔyifǝ kǝbǝ kasɔ nya ɔnlɛ dikpǝmbiǝ eto safui ku kɔnyɔ ko ditidi kutsyuǝ lǝ kɔni. ²Úmuǝ owa kplɛ ǝmǝ, wǝ nkpe taa kokolefe ke wǝ baakpo Obonsam nye Olo ǝmǝ, nya úmuǝ wǝ ókpe lǝ amana itǝ alɛ kɔkpi. ³Onato eto ɔtɔnkpe ǝmǝ áto wǝ ókpe lǝ dikpembiǝ nǝmǝ kafo, nya úti ni kɛnyɛ kpã ku sitǝ, itǝ lǝ ɔyɛ kusu bunyǝ kabɔ kawɛ ese ese eto betidi isu ese lefe nǝ alɛ kɔkpi nyamǝ díbǝ éfe. Nya kama fɛ boolǝkǝ wǝ amana ǝsuǝ sɛkɛ nɛ.

⁴Nyamfo eto kamaa, nnyǝ akankpomɛ ǝtsyuǝ, nya bǝtǝ mba nsi lǝ nnya ǝsuǝ ǝsuǝale bǝ bakpo akpo. Mǝ ni betidi ba bálo eto awɔnɔ se bédi adansiɛ bǝtǝ Yesu ku Onanto eto Ditiki Sɛɛ nǝmǝ eso. Báni bénsumu ubutubuki bua ǝmǝ ku wǝ ditsyǝbi wenwe nye bǝtǝkǝ wǝ leba lǝ mǝ nto nye mǝ ani. Bátaka bǝsiǝ nkpǝ nya bédi seka ku Kristo itǝ alɛ kɔkpi. ⁵Nyamfo ni bekpenkpe eto botaka kǝbǝ nkpǝ tutɛ nɛ. Bekpenkpe fɛfɛ mámtaka bǝbǝ nkpǝ fɛ alɛ kɔkpi komǝ léyo. ⁶Diyuǝ ku Onanto eto atsyɔkpokpo kplɛ itǝ betidi ba dínyǝ kedikɔ lǝ bekpenkpe eto botaka kǝńyǝ tutɛ bomfo kǝmiǝ. Ukpe nnuǝfǝ ǝmbɔkɛ ǝsuǝale lǝ mǝ, bomu booyifo Onanto ku Kristo eto besumunyǝ nya buudi seka ku wǝ itǝ alɛ kɔkpi.

Bǝtǝkǝ Obonsam Kato.

⁷Nya lǝ alɛ kɔkpi komǝ ayoo, nya fɛ boolǝkǝ Obonsam lǝ diyo nǝmǝ nɛ. ⁸Nya wuusu kawunsiǝ eto akpɔ ana nyamǝ kenke usu ɔwɛ betidi okpé, ba ni Gog ku Magog. Wookpa mǝ utsyǝ ditsyu itǝ lema bɔkpɔ, nya boofui fe lekpo eto kɔwunimi. ⁹Bésense bakpo lǝ kawunsiǝ kenke nya bátsyalama kaka Onanto eto betidi nsi wǝ ni wǝ umǝkplɛ lala ǝmǝ. Fɛɛ ute áyifǝ utsyi kato úbǝ ótonsǝ mǝmblɛ kenke. ¹⁰Nya Obonsam ǝmǝ lɛwɛ mǝ ókpee, béfi wǝ báto bákpe lǝ ute ku ute bambi eto ditumbu klinklaa kplɛ nǝmǝ kafo kaka báto ubutubuki bua ǝmǝ ku bidiabidia eto unyɛlǝkǝtidi ǝmǝ bákpe. Mfó boonyǝ kanyi ketsye ku kakɔmi itǝ manlo manlo.

Onanto Ákponko Kawunsiǝ Kenke Lekpo.

¹¹Nya kamaa, nnyǝ lekankpomɛ kplɛ flubia ditsyuǝ ku nwǝ lǝǝsiǝ lǝ ni. Kasɔ ku kato étsyetsyi bánya lǝ wǝ ǝnǝmi nya bésinyǝ mǝ bio. ¹²Nya mínyǝ bekpǝnkpe kpǝ, bakplɛnyǝ ku betidiwewe ńyǝ lǝ lekankpomɛ nǝmǝ eto ǝnǝmi. Básini ekue, nya besi básini kukue kɔni, ko ni mba nsi nkpǝ eto kukue. Bákponko bekpenkpe bamǝ lekpo, utsyuǝ saa lǝ kase úsiǝ nkpǝ fe kase báwɔni bákpe lǝ ekue nyamǝ kafo. ¹³Lekpo ǝlǝkǝ bekpenkpe ba nkpe lǝ ni óboko, nya ukpe ku ɔkɔmǝ tsya dílǝkǝ bekpenkpe ba nkpe lǝ mǝ bǝtǝ. Nya Onanto lékponko utsyuǝ sa lekpo ɛyɛ mǝ eyifosa ǝsuǝ. ¹⁴Nnya kamaa, béfi ukpe ku ɔkɔmǝ báto bákpe lǝ ute eto ditumbu klinklaa kplɛ nǝmǝ kǝmiǝ. Ute eto ditumbu klinkla kplɛ nǝmǝ ni ukpǝ nuǝfǝ nɛ. ¹⁵Utsyuǝ saa wǝ eto diye báwɔni bákpe lǝ nkpǝ eto kukue komǝ kafoo, béfi wǝ báto bákpe lǝ ute eto ditumbu klinklaa nǝmǝ kafo.

Kato Fɔfɔ Ku Kasɔ Fɔfɔ.

¹Nyamfo eto kamaa, nnyǝ kato fɔfɔ ku kasɔ fɔfɔ. Itsyise kato tutɛ ku kasɔ tutɛ ébubǝ kafe nya lekpo tsya lénya. ²Ete mínyǝ Umǝ kɛnkɛ ǝmǝ, wǝ ni Yerusalem fɔfɔ, ditsyi Onanto ɔflɔ kato ɔnlɛ kasɔ bubǝ. Nya bálɔkɔsɛ wǝ kukɔnɔ fe okafɔ itǝ wǝ usǝ eto bokpa seka. ³Nya mínɔ ɔkɔɛ kplɛ utsyuǝ lɛbɔ utsyi lekankpomɛ nǝmǝ ɔflɔ wǝ nlɛ bɔtɛyi nkǝ, “Bebee! Mɔmɔɔ, Onanto eto kǝsiǝkɔ ébubǝ kakpé lǝ betidi nti mfo. Wuusiǝ lǝ mǝ ɔflɔ nya boofiani wǝ betidi. Onanto kosate ebusiǝko mǝ nya wuuyifo mǝ Onanto. ⁴Nya wɔɔsi mǝ binǝntu kenke lǝ ǝnǝmi. Nya ukpe tsya ensiǝmbɔkɛ. Nko ke ini itǝ bolo kǝsiǝ, nku buwi ku kanyinyǝnyǝ tsya nɛ. Akokosa kenke ébubǝ efe.”

⁵Ete nwǝ nsi lǝ lekankpomɛ ǝsuǝ lɛtɛyi nkǝ, “Bebee! Mbusinkli nyifo asa nnya kenke afɔfɔ.” Nya ɔ́tɛyi nkǝ, “Wɔni nyamfo ǝtsyǝ, itsyise iyifo etiki nnya diyifo sitinti nya utsyuǝ saa loofo bofo kanɔ.”

⁶Nya ɔ́tɛyi mɛ nkǝ, “Lesa saa aflɔ. Mɔ ni ututɛ ku ɔfɛfɛ, ketsyikokɔ ku kalosǝkɔ. Utsyuǝ saa ke utukɔɛ nlɛɛ, muutǝ wǝ kusu unǝ nkpǝ eto ntu bo laayifǝ ketsyi ditubiǝ ǝsuǝ nya wǝmbofo kayo saa. ⁷Utsyuǝ saa ke ditǝkǝ kato ebofo nyamfo utsyiko mɔ ɔflɔ. Muuyifo wǝ Onanto nya wuuyifo mɔ ubi. ⁸Fɛɛ betidi ba laate asa sikpi, mba leedu bǝtsyuǝ kǝtǝ, mba leeyifo asinsa, mba laalo betidi ku batsyetɔnyǝ ku bafate, ku mba leesumu bǝfiǝ, ku badia kenke, eto kǝsiǝkɔ ni ditumbu klikla kplɛ nǝ nlɛ bunyǝ ku ute eto aba kafo. Nyamfo ni ukpe nuǝfǝ nɛ.”

Yerusalem Fɔfɔ Ǝmǝ.

⁹Nya kamaa, Onanto eto batɔnkpe nlɛ ɛkpɛ ekuanse ka díyi ku kanyinyǝnyǝ ka nkpe kɛnyɛale ekuanse fɛfɛ eto ɔni ǝbǝ mɛ ɔflɔ nya ɔ́tɛyi mɛ nkǝ, “Bǝ, lǝ nte fǝ Okafɔ wǝ ni Lesamubi nǝmǝ eto kusiǝ.” ¹⁰Lɛwɔnɔ nǝmǝ áfo disiǝ lǝ mɛ nya Onanto eto ɔtɔnkpe ǝmǝ ditsyi mɛ usuko kɔtini ko letaka fefe eto kato. Óte mɛ Yerusalem, umǝnkplɛ kɛnkɛ ǝmǝ lɛbɔ utsyi Onanto ɔflɔ kato ɔnlɛ kasɔ bubǝ. ¹¹Nya ɔnlɛ buyǝnde ku Onanto eto diyǝnde. Umǝnkplɛ ǝmǝ ǝyǝnde fe leba nǝ lefo koya tinti. Dite fe Yaspa eto leba seka nya lekpa wuee fe ahuhɔɛ seka. ¹²Báto ofati wǝ ditidi nya otaka bátsyilama wǝ, nya bákpe lefosi mbɔsie nnuǝ lǝ wǝ. Nya Onanto eto lefosi batɔnkpe inuǝ ńyǝ lǝ mu nnyɛ. Báwɔni Israel eto lefosi atobi ǝnuǝ nyamǝ eto aye bǝtǝkǝ lǝ nsie bomǝ ǝsuǝ. ¹³Nsie ntsyǝ lǝ kofekatokɔ, ntsyǝ lǝ ɔnwɛ kato, ntsyǝ nkpe lǝ ɔnwɛ dikue nya ntsyǝ nkpe lǝ diyo kedufǝkɔ eti tsya. ¹⁴Bákpe lefosi aba ǝnuǝ lǝ kasɔ fɛ báto umǝ ǝmǝ eto kafati bǝńyǝnsǝ. Nya báwɔni Lesamubi nǝmǝ eto batɔnkpe lefosi inuǝ bamǝ eto aye bǝtǝkǝ lǝ nnya ǝsuǝ.

¹⁵Onanto eto ɔtɔnkpe wǝ dídinko mɛ etikii, lɛ sika sia eto esususa nnya wuufi ususu umǝ ǝmǝ ku wǝ nsie bomǝ ku kafati lǝ kɔni. ¹⁶Akpɔ ana nkpe umǝ ǝmǝ, nya wǝ akpake eto kekulǝ ku lɛblɛbe lekate. Onanto eto ɔtɔnkpe ǝmǝ ésusu umǝ ǝmǝ ku esususa nyamǝ, nya unyǝ nkǝ umǝ ǝmǝ eto lekpa lɔni ekulǝ esunkpo kɔkpi alofa anɔ. Nya umǝ ǝmǝ eto dikulǝ, lɛblɛbe ku botaka akate pɛpɛɛpɛ. ¹⁷Onanto eto ɔtɔnkpe ǝmǝ ésusu ofati ǝmǝ tsya, nya únyǝ nkǝ wǝ ditidibi eyifo akpa alofa ǝnuǝ lefosi akpa akua ɛyɛ lǝ esususa nnya ɔnlɛ ǝsuǝ. ¹⁸Aba nnya béfi báto ofati ǝmǝ ni yaspa, nya béfi sika sia nso bɔlɛkɛ, sia lekpa fe ahuhuɛ seka báto umǝ ǝmǝ kosate. ¹⁹Nya béfi aba nya léfo koya akpa akpa bálɔ umǝ ǝmǝ eto aba nnya kasɔ ǝsuǝ báto kafati kamǝ bǝtǝkǝ.

Kasɔ eto leba tutɛ ni nǝ baakpo yaspa.

Dinuǝfǝ ni nǝ baakpo sapir.

Ditsyǝfǝ ni nǝ baakpo yalkedon,

nya lenale ni nǝ baakpo smaragdo.

²⁰Lɛnɔnde ni nǝ baakpo sardonik,

nya lekuande baakpo sardis.

Akuansele baakpo krisolit,

nya leflamflale baakpo beril.

Lɛwɔnɔmbǝle baakpo topas.

Lefosile baakpo krisopra.

Lefosi ɔnwɛ baakpo yanikint,

nya lefosi unuǝfǝ baakpo ametist.

²¹Umǝ ǝmǝ eto lefosi nsie nnuǝ eyifo lefosi aba ǝnuǝ nnya lefo koya. Leba kplɛ béfi béyifo kesie saa nɛ. Sika sia lefo koya béfi bálɔ umǝ ǝmǝ eto usunte kplɛ, nya ebunyǝ asa wuee ayɛ lǝ sika siamǝ ǝsuǝ fe kase bǝǝnyǝ asa lǝ ahuhuɛ ǝsuǝ seka.

²²Nya mǝnnyǝ Disumuyo saa lǝ umǝ ǝmǝ, itsyise Bonamute Onanto Ǝsuǝalenyǝ ǝmǝ ku Lesamubi nǝmǝ ni wǝ Disumuyo. ²³Kofe nye kofande eto bofa nye buyǝnde manfe itǝ umǝ ǝmǝ, itsyise Onanto eto diyǝnde ǝǝyǝnde kakpo wǝ nya Lesamubi nǝmǝ ni wǝ okandiɛ. ²⁴Kawunsiǝ eto betidi ebɔyɛ lǝ ni buyǝnde ǝsuǝ, nya kasɔ eto baka ebufi mǝ setabikɛ baboko wǝ. ²⁵Nya bembuti umǝ ǝmǝ eto nsie ku lefe, itsyise kale tsya embona lǝ wǝ. ²⁶Ese, ese eto betidi kenke ebufi mǝ sɛkplɛ ku mǝ setabikɛ bǝbǝ baboko mfó. ²⁷Fɛɛ kɔfiɔ eto kulesa embedufǝ lǝ wǝ kulefe. Nya badia ku mba leeyifo afanisa embudufǝ lǝ wǝ. Bomu mba eto aye báwɔni bákpe lǝ Lesamubi nǝmǝ eto nkpǝ eto kukue komǝ kafoo, mǝ hã luudufǝ umǝnkplɛ ǝmǝ nɛ.

Onanto Eto Ketu Ka Lǝǝtǝ Nkpǝ.

¹Nyamfo eto kamaa, Onanto eto ɔtɔnkpe ǝmǝ áte mɛ ketu ka lǝǝtǝ nkpǝ eto ntu. Ketu kamǝ aabɔdi ketsyi lǝ Onanto ku Lesamubi nǝmǝ eto lekankpomɛ ǝsuǝ. Ntu bomǝ akpa kɛnkɛnkɛ fe ahuhuɛ. ²Nya bɔnlɛ bɔbɔdi lǝ umǝnkplɛ ǝmǝ eto obia kplɛ. Nya lǝ ke etukpenkpe ǝnuǝ nyamǝ ǝsuǝǝ, nkpǝ eto kuyi ńyǝ, nya kuanwɔ kofa saa kofa. Ko afanto eyifo afantosi itǝ ese ese eto betidi kenke. ³Bembunyǝ kulesa nǝ Onanto díkudi lǝ umǝnkplɛ ǝmǝ. Onanto ku Lesamubi nǝmǝ eto lekankpomɛ ebɔkɛ lǝ umǝnkplɛ ǝmǝ, nya wǝ beyifoyifo luusumu wǝ. ⁴Boonyǝ wǝ ǝnǝmi nya wǝ diye luutǝkǝ lǝ mǝ nto. ⁵Kale ensi embolo mfó. Nya bembohiã kakandiɛ nye kofe, itsyise Bonamute Onanto ebudi mǝ diyǝnde nya boodi seka isu manlo manlo.

Yesu Eto Dibǝfe

⁶Mfó nya Onanto eto ɔtɔnkpe ǝmǝ lɛtɛyi mɛ nkǝ, “Ɔnukualɛ eto etiki ni nyamfo nya boofo nya bofo kanɔ sitiniti. Nya Bonamute Onanto wǝ leefi wǝ Lɛwɔnɔ kǝtǝ wǝ bǝnyɛlǝkǝtidi, wǝ ni létsyese wǝ ɔtɔnkpe nkǝ ote wǝ beyifoyifo asa nnya lǝǝbǝ bubǝ lǝ lefe kliminti ǝsuǝ.”

⁷“Bebe! Muubǝ lǝ lefe kliminti ǝsuǝ. Disuǝyuǝ itǝ mba leetsyue etiki nnya bábe letsya lǝ kukue komfo kǝmiǝ koto.”

⁸Mɔ Yohanes, mɔ ni nwǝ lɛnɔ nya mínyǝ asa nyamfo kenke. Nya lefe nǝ mínyǝ nya mínɔ nnya mínlosǝǝ, nse akonki lǝ Onanto eto ɔtɔnkpe wǝ dílǝkǝ asa nyamfo óte mɛ eto akɔ miǝ lǝ nsumu wǝ. ⁹Fɛɛ ɔ́tɛyi mɛ nkǝ, “Menyifo nko! Mintsyaa, uyifotsyuǝ mini fe fǝ ku fǝ bayimi ba ni Onanto eto bǝnyɛlǝkǝtidi ku mba kenke leetsyue etiki nnya nkpe lǝ kukue komfo koto. Onanto mate ete ele bǝ sumu.”

¹⁰Mfó nya ɔ́tɛyi mɛ nkǝ, “Menfi bǝnyɛlǝkǝtidi eto etiki nnya báwɔni bákpe lǝ kukue komfo akula, itsyise lefe nǝmǝ eboyo lelo nyamfo kenke luubǝ itǝ. ¹¹Utsyuǝ saa ke leeyifo asa buaa, sukosǝ lǝ ukeyifo asa bua, nwǝ ke leeyifo asinsa sukosǝ lǝ ukeyifo asinsa, nwǝ kee leeyifo kasɛɛ, sukosǝ lǝ ukeyifo kasɛɛ, nwǝ kee diyifo kɛnkɛ, usukosǝ lǝ uyifo nwǝ diyifo kɛnkɛ.”

¹²Yesu nkǝ, “Bebe! Muubǝ lǝ lefe kliminti ǝsuǝ! Muubǝ ku kayofofo ka dińyǝ kǝtǝ utsyuǝ saa lǝ keyifo ka úyifo kumǝ. ¹³Mɔ ni Ututɛ ku Ɔfɛfɛ, Kasɔ Ketsyikokɔ ku Kaalosǝkɔ.

¹⁴“Disuǝyuǝ itǝ betidi ba dumuǝ ǝsuǝ bǝtsyǝ fe kase bǝǝflǝ bikǝ kɛnkɛ kǝtsyǝ. Mǝǝ dunyǝ kusu bedi nkpǝ eto kuyi komǝ eto eyibibi nɛ, nya bɔɔyɛ lǝ kesie kamǝ bedufǝ lǝ kato eto umǝnkplɛ ǝmǝ lafo. ¹⁵Nya mba luunyǝ lǝ ɔkpɔ ǝmǝ kama ba ni mba leeyifo afanisa, mǝ ni betidi ba ni bafate, mba ni batsyetɔ, mba laalo betidi, mba lǝǝtǝ bǝfiǝ kedi ku betidi ba ni badia ba laawɛ betidi kakpe lǝ etiki ku lǝ eyifosa ǝsuǝ.

¹⁶“Mɔ, Yesu, ni nwǝ létsyese mɔ ɔtɔnkpe miǝ lǝ ubǝ ulǝkǝ asa nyamfo ote mi bafokanɔfɔ eto etsyukpa kenke. Mɔ ni kuyi eto ote kplɛ ǝmǝ wǝ ni Oka David eto ufluflu. Mɔ ni kolensiǝnto eto sefandebi sia lǝǝyǝnde.”

¹⁷Lɛwɔnɔ nǝmǝ ku okafɔ ǝmǝ nkǝ, “Bǝ!”

Nya nwǝ ke nlɛ nnya bɔnɔ tsya tɛyi nkǝ, “Bǝ!”

Nya nwǝ ke utukɔɛ nlɛɛ, ubǝ. Nya nwǝ ke nlɛ ntu bo lǝǝtǝ nkpǝ bɔbɛbɛɛ, ubǝ ofo mu unǝ, kayo saa mamfo mamfo.

¹⁸Mɔ Yohanes lɛ utsyuǝ saa wǝ laanɔ etiki nnya nkpe lǝ kukue komfo kafoo ato bukǝ kekleke miǝ utsyuǝ saa ke luufi lesatsyuǝ okpé lǝ nnya ǝsuǝǝ, Onanto ebufi kanyinyǝnyǝ ka báwɔni bakpé lǝ kukue komfo utǝkǝ wǝ lǝ ǝsuǝ fe kotonǝnǝ. ¹⁹Nya lǝ utsyuǝ tsya ǝlǝkǝ lesatsyuǝ utsyiko lǝ nnya ǝsuǝǝ, Onanto embutǝ unyǝ kayofofo ka báwɔni bákpe lǝ kukue komfo ǝsuǝ. Weebunyǝ kedikɔ ka untǝnyǝ lǝ nkpǝ eto kudiyi komǝ ǝsuǝ ku lǝ umǝ kɛnkɛ ǝmǝ tsya ǝsuǝ.

²⁰Nwǝ nlɛ adansiɛ budi lǝ nyamfo ǝsuǝ lǝ bɔtɛyi nkǝ, “Ee, muubǝ lǝ leefe kliminti ǝsuǝ!”

Ibǝ itǝ. Bonamute Yesu, bǝ!

²¹Bonamute Yesu eto lefonǝ lǝ disiǝko utsyuǝ saa.