FILIPIFƆ

FILIPIFƆ

Kukue Ko Paulo Lɛwɔni Útǝ Filipifɔ

¹Mɔ, Paulo, ku Timoteo ba ni Kristo Yesu eto beyifoyifo lɛwɔni kukue komfo.

Bufi bɔnlɛ kǝtǝ mi Onanto eto bafokanɔfɔ kenke ba nkpe lǝ Filipi nya biyifo bani ku Kristo Yesu, ɛwunsǝ lǝ mi batɔnkotɔnko ku mi bawunsǝkotsyuǝ tsya. ²Bɔlɛ bɔtɔ boǝ Boanto Onanto ku Bonamute Yesu Kristo eto lefonǝ ku diyuǝ lǝ disiǝko mi.

Paulo Áto Ola Lǝ Bafokanɔfɔ Ba Nkpe Lǝ Filipi Eto Disi.

³Lefe saa nǝ ke minkloma mii, maasɔ mɔ Onanto ani lǝ mi disi ⁴Nya lefe saa nǝ ke minlɛ ola boto lǝ mimblɛ kenke eto disii, maato wǝ ku disuǝyuǝ. ⁵Itsyi lǝ kase bɛwunsǝko mɛ lǝ Ditiki Sɛɛ nǝmǝ eto keyifo ǝsuǝ idu lǝ kasɔ ketsyikokɔ ibǝ ese mɔmɔ eso. ⁶Mfo nnɔ miǝ Onanto wǝ dítsyiko keyifo sɛɛ kamfo kasɔ lǝ mi ntii, ebusukosǝ ke isu ese kalosǝkɔ lǝ Kristo Yesu eto dibǝfe nǝmǝ.

⁷Bekpe mɛ lǝ nsusu lefe saa nya ɛlɛkɛ itǝ bǝ nkebu disi ketsyiko lǝ mimblɛ ǝsuǝ nko. Itsyise mimblɛ efi kǝtsyuǝ lǝ kusu ko Onanto dítǝ mɛ, mɔmɔ ǝmǝ minlabe lǝ diyo ku lǝ lefe nǝ mísiǝ lǝ mɔ ǝsuǝ ǝsuǝ bǝ lǝ nta Ditiki Sɛɛ nǝmǝ disi bǝ lǝ betidi lǝ bafo ni banɔ bǝńyǝ kekleke. ⁸Onanto ni mɔ odansiɛ nkǝ sitinti minlɛ bɔtɛyi minkǝ lelabi nǝ eto okle nkpe lǝ Kristo Yesu ǝsuǝ útɛ boo, ni okle minfi minlɛ mi butǝ nɛ.

⁹Nlɛ ola boto miǝ mi lelabi nǝ nkpe mii, lǝ disi lebe kato lekpe leso, lǝ befo ditiki nǝmǝ kasɔ bɔnɔ kala kǝlǝkǝ kukɔnɔ kǝtǝ ǝsuǝ. ¹⁰Nyamfo luutǝ befo lesa sɛɛ bulǝkǝ kǝtǝ ǝsuǝ bǝ lǝ Kristo eto diyi nǝmǝ ǝsuǝǝ, biuyifo basɛɛ ba ǝsuǝ dikpilolo saa lǝmbɔkɛ. ¹¹Ɛwunsǝ lǝ nyamfo ǝsuǝǝ, bǝ lǝ kasɛyifoyifo ka eto okle Yesu Kristo hã lǝǝtǝ utidi leeyifoo, lǝ keyi mi ǝsuǝ, bǝ lǝ befi babesɛ Onanto kato, bǝtǝ wǝ dibu ku atɛsǝ.

Utidi Wǝ Leeyifo Yesu Eto Keyifo, Ebunyǝ Nkpe.

¹²Mɔ bayimi, nla miǝ bete sitinti miǝ asa nnya dítu mɛɛ, ǝbǝ ɛwunsǝ bǝ Ditiki Sɛɛ nemǝ ǝbǝ dínyǝ sɛtɔsusu bomu. ¹³Itǝ nyasoo, bamamanyǝ ba kenke nkpe lǝ lekayo mfo ku betidi bamba kpǝ ba kenke nkpe lǝ lekayo mfo ǝnyǝ bǝtsyuǝ lekpo bǝ bákpe mɛ lǝ diyo itsyise nyifo Kristo eto uyifoyifo eso. ¹⁴Ɛwunsɛ ku nyamfoo, mɔ bokpe lǝ diyo esi itǝ bafokanɔfɔ kpǝ esi bakpe utu bawunsǝ lǝ Bonamute ǝmǝ ǝsuǝ itǝ bensiate sikpi lǝ Ditiki Sɛɛ nǝmǝ budi ku ute.

¹⁵Lǝ sitintii, mǝ nti betidi eto bǝtsyuǝ aayɛ lǝ kutsyuǝsɛ kpɔkpɔ ǝsuǝ kedi Kristo eto ditiki nǝmǝ kate, nya baala bǝ baatanko mɛ lǝ ni bɔtɛyi ǝsuǝ, fɛɛ bǝtsyuǝ eeyifo nnya ku nsusu sɛɛ. ¹⁶Lelabi dítǝ betidi eto lekpa nuǝfǝ nǝmfo bǝ babe Ditiki Sɛɛ nǝmǝ letsya mmǝ, itsyise beyi bǝnkǝ bokpe Onanto lékpe mɛ nke nta Ditiki Sɛɛ nǝmǝ disi. ¹⁷Fɛɛ betidi eto lekpa tutɛ ábe Kristo letsya lǝ kusu ko ǝmǝ boonyǝ kutǝkǝ kǝtǝ mǝ suǝ eso, nya inni lǝ ɔnukualɛ ǝsuǝ, bomu bǝ lǝ beyifo nko lǝ kanyi ka minlɛ bunyǝ lǝ diyo nǝmǝ kafo lǝ kabe kato kaso.

¹⁸Fɛɛ nyamfo menyifo kulesa. Nya ni bǝ utsyuǝ abe Kristo letsya lǝ sidia, sidia ǝsuǝ o-o, lǝ ɔnukualɛ ǝsuǝ o-o, mɔ alɛɛ, bǝ bábe Kristo letsyaa, nnya mate aakpe mɛ disuǝyuǝ. ¹⁹Nya muusukosǝ disuǝyuǝ nǝmǝ bunyǝ itsyise nyi miǝ ɛyɛ lǝ mi olatoto ǝsuǝ ku lǝ bɔwunsǝko bo laabɔ ketsyi lǝ Yesu Kristo eto Lɛwɔnɔ ǝsuǝǝ, boolǝkǝ mɛ lǝ diyo. ²⁰Nnya ǝsuǝ mimfi ǝnǝ mintǝkǝ ku minlɛ kusu bobe kekleke ni bǝ medi kofani lǝ mɔ keyifo ǝsuǝ. Bomu bǝ lefe saa, ku lǝ titlu mɔmɔɔ, lǝ nkpe nkɛale ku mɔ ǝsuǝale kenke, bǝ muunǝ dibu mboko Kristo, lǝ nkpe nkpǝ o-o nye lǝ bukpǝ mínkpe tsya.

²¹Nya be ni nkpǝ? Lǝ mɔ kutsyǝǝ, nnya ni bǝ lǝ nsi nkpǝ ntǝ Kristo. Nya lǝ nkpee, nnya bomu luusi yooboko mɛ kutǝkǝ eso nɛ. ²²Lǝ nnya ete minsi muusiǝ nkpǝǝ, eni muuyifo keyifo ka luubǝ kutǝkǝ. Fɛɛ mante nnya ele bǝ mfi lenti, ukpǝ lee nkpǝ. ²³Mɔ nsusu áma lǝ akpa ǝsuǝ. Eni moola tinti miǝ maabɔ lǝ nkpǝ bomfo nsu nsiǝ lǝ Kristo ɔflɔ, itsyise nyamfo alɛkɛ eso famfamfamfa. ²⁴Fɛɛ lǝ mi esoo, efe bǝ nsi nsiǝ nkpǝ lǝ kawunsiǝ kamfo. ²⁵Se mimfo nyamfo minɔ nko esoo, nyi miǝ muusiǝ lǝ mimblɛ kenke ɔflɔ nsukosǝ nyifo bo kenke minlɛ buyifo bǝ lǝ busu sɛtɔ, lǝ bunyǝ disuǝyuǝ lǝ Kristo bofokanɔ ǝsuǝ. ²⁶Nyamfo luutǝ bǝ lǝ mbǝ mi ɔflɔ bioo, biunyǝ kusu bebesǝ ǝsuǝ kato ɛyɛ lǝ mɛ ǝsuǝ bǝ biyifo bani ku Kristo Yesu eso.

²⁷Lesa nǝ lefé mɔmɔ ni bǝnkǝ bisiǝ nkpǝ bo dinyǝnko mba léfo Kristo eto Ditiki Sɛɛ nǝmǝ bánɔ. Itǝ bǝ lǝ mbǝ mi ɔflɔ o-o, mǝmbǝ o-o, lǝ nnɔ ntsyiko lǝ mi ǝsuǝ bǝnkǝ bińyǝ kekleke lǝ lɛwɔnɔ ku nsusu ǝsuǝ nya bińyǝ kɛnyɛkani lǝ mi bofokanɔ ǝsuǝ bɛnlɛ Ditiki Sɛɛ nǝmǝ disi bota. ²⁸Biante mi balo sikpi. Bomu bińyǝ ku utu kekleke. Nyamfo loote mǝ bǝ mǝ ebonya bedufǝǝ kasɔ nya mi ebutǝkǝ mǝ kato, itsyise Onanto nwǝ nlɛ bɔkpɔ kǝtǝ mi, ebutǝ bitǝkǝ kato. ²⁹Itsyise bǝtǝ mi kusu bǝ bisumu Kristo inni bǝ lǝ befo wǝ bɛnɔ ete eso, bomu bǝ lǝ binyǝ kanyi tsya lǝ wǝ disi eso. ³⁰Nya mɔmɔɔ, bɛkpɔnko mɛ lema nǝmǝ. Lema nǝmǝ bínyǝ míkakpɔ kɔ ǝmǝ ete nɛ. Nya fe kase bɛɛnɔ, ni ǝmǝ ke ete minsi minlɛ bɔkpɔ nɛ.

Ele Bǝ Bebokosǝ Ǝsuǝ Kasɔ Bitǝ Mi Bǝtsyuǝ.

¹Mfo nnɔ miǝ mi nkpǝ bo benkpe lǝ Kristo ǝsuǝǝ, ǝtǝ bínyǝ ǝsuǝale. Nya wǝ lelabi lǝǝyuǝsǝ mi ketu. Biyifo bani ku wǝ Lɛwɔnɔ, nya bɛnlɛ mi ǝsuǝ wɔkɔkɔkɔɔkɔ lǝ kafoɛkpɛ ku kaminsǝnyǝnyǝ ǝsuǝ bitǝ bǝtsyuǝ. ²Nnya lǝ nko ini sitintii, nyalɛ muukǝnko mi miǝ bitǝ lǝ nyǝ disuǝyuǝ bǝ nsusu bɔni ku lelabi lǝ lɛkɛ bo nya lǝ biyifo lɔni lǝ lɛwɔnɔ ku disibubu ǝsuǝ. ³Bienyifo kulesa nǝ lete mɔ mate hã eto lɛlɛkɛsǝ nye ǝsuǝ katobǝsǝbesǝ eto ditsyǝbi. Bebokosǝ ǝsuǝ kasɔ, nya bibu betidi bamba fe balɛkɛ baso mi. ⁴Nya bɛbɛbɛ betidi bamba eto kasɛɛ, inni fǝ mate eto lɛlɛkɛsɛ ete.

⁵Bitǝ lǝ nsusu bo lɛkɛ Kristo Yesu, lǝ bɔkɛ mi tsya. ⁶Nnya ni bǝ ite bǝ okpe Onanto eto ditsyebi tsyaa, wóemfi nnya lǝ ǝsuǝale ǝsuǝ nkǝ lǝ okate ku Onanto. ⁷Bomu lǝ wǝ kosate eto lelabi ǝsuǝǝ, úfi lesa saa nǝ nte wǝ útǝ kafo faa, nya úyifo wǝ ǝsuǝ usumutidi. Nya úbǝ bále fe kawunsiǝ kamfo eto utidi. ⁸Utidi eto ditsyǝbi lɛkɛ wǝ nya óbokosǝ ǝsuǝ kasɔ nya ɔ́yɛ lǝ kototsyuetsyue eto kusu ǝsuǝ úsu taa ukpǝ kǝmiǝ, ukpǝ lǝ uyikabie ǝsuǝ. ⁹Ɛyɛ lǝ nyamfo esoo, Onanto ábesǝ wǝ kato ka nso kenke, nya úfi diye nǝ nso bɔmɔ kaso diye saa útǝkǝ wǝ. ¹⁰Nya lǝ bakpadi Yesu eto diyee, ele bǝ asayifoyifo nnya kenke nkpe kato ku kasɔ ku nnya nkpe lǝ kasɔnti se akonki bǝtǝ wǝ. ¹¹Nya mǝmblɛ luufe kɛnyɛ batɛyi bǝ Yesu Kristo ni Bonamute, bǝ lǝ befi batɛsǝ Onanto wǝ ni Boanto.

Biyǝnde Fe Befandebi Lǝ Kawunsiǝ Kamfo.

¹²Nyaso, mɔ bayimi, fe kase bietsyue mɛ koto lefe saa, ite bǝ mimbǝ lǝ mi ɔflɔ mɔmɔ tsyaa kulaa, isi efe bǝ bitsyuǝ koto beso. Bekplatsya kekleke lǝ bifi sikpitete ku ketinkǝ biyifo keyifo ka diyǝnko mi bulǝkǝ. ¹³Itsyise Onanto lɛ keyifo lǝ mi ǝsuǝ lefe saa nkǝ lǝ yuutǝ bɛtɔnɔ bitsyue asa nnya útsyue utsyǝ koto.

¹⁴Biankpe kǝnǝ nye beto taflatsyǝ lǝ kulesa buyifo ǝsuǝ. ¹⁵Itǝ bǝ lǝ kawunsuǝ biabia ka diyi ku abuayifoyifo mfoo, mii, biyifo Onanto eto bebi ba lekpa nya beele ku dikpilolo saa lǝmbǝ lǝ mi ǝsuǝ. Lǝ biyǝnde lǝ kawunsiǝ eto betidi eto nti fe kase befandebi lǝǝyǝnde lǝ kato seka. ¹⁶Befo ditiki nǝ lǝǝtǝ nkpǝ nǝmǝ bɛlɛ kekleke, bǝ lǝ Kristo eto diyi nǝmǝ ǝsuǝǝ, moofo lɛkɔɛsi bɔsɔ katɛyi minkǝ méntsyetsyi bimba nye ményifo keyifo bimba. ¹⁷Mi bofokanɔ lǝ Bonamute ǝsuǝ ku mi keyifoyifoyifo te fenkǝ keditǝtǝ kǝtǝ wǝ. Eni mɔ kɔtɔ bokpo lǝ kasɔ ekɔko keditǝtǝ kamfo. Nya lǝ ibǝ nkoo, yɔɔkɛ mɛ ɔkɔɛ nya muunyǝ disuǝyuǝ tinti ku mi mblɛ. ¹⁸Nko ke ini nɛ bǝ mi tsya nyǝ disuǝyuǝ beto keyudu ku mɛ nɛ!

Timoteo Ku Epafrodito.

¹⁹Lǝ Bonamte atɔnɔɔ, yɛmbɔklɛ, mootsyese Timoteo mi ɔflɔ, bǝ lǝ usinkli ubǝ ɔtɛyi mɛ kase asa nte lǝ mi ɔflɔ, lǝ nsi nyǝ disuǝyuǝ. ²⁰Lǝ ɔnukualɛ ǝsuǝǝ, mimbǝ kuutsyuǝ saa wǝ leefi kǝtsyuǝ lǝ mɔ ku mi etiki ǝsuǝ fe wǝ. ²¹Nya bafɛfɛɛ, utsyuǝ saa lɛ wǝ lɛlɛkǝsǝ ete bobe, nya inni nnya ni Yesu Kristo eto kusu eto ale. ²²Fɛɛ mi kosate yi biǝ Timoteo alɛɛ, ɔwunsǝkotsyuǝ uni utǝ mɛ, kase wǝǝkǝnko mɛ lǝ keyifo kamǝ ǝsuǝ fe ubi ku anto itǝ Ditiki Sɛɛ nǝmǝ eto busǝnsǝ ǝsuǝ. ²³Nyaso nlɛ kusu bobe miǝ, lǝ nyǝ kase asa nyamǝ luubǝ itsyǝ ku mɛ koo, mootsyese wǝ mi ɔflɔ mlǝ. ²⁴Nya mfo nnɔ tsya miǝ Bonamute ǝmǝ kosate ebutǝ mɛ kusu nkǝ mbǝ mi ɔflɔ lǝ lefe kliminti ǝsuǝ.

²⁵Mbu tsya miǝ ele bǝ ntsyese bo ɔyimi Epafrodito mi ɔflɔ, wǝ díńyǝko mɛ kekleke lǝ Onanto eto keyifo ǝsuǝ. Wǝ ni mi ɔtɔyɛ wǝ bétsyese mɔ ɔflɔ biǝ ubǝ ɔwunsǝko mɛ. ²⁶Se unyi nkǝ bɛnɔ biǝ ǝsuǝ abia wǝ esoo, ílǝ wǝ tinti nya óla kekleke nkǝ wǝǝbǝ unyǝ mimblɛ. ²⁷Lǝ sitintii, ɔ́nɔ bufi kekleke ibu sɛkɛ lǝ ukpǝ. Fɛɛ Onanto ǝnyǝ wǝ kaminsǝ, nya inni wǝ mate bomu ku mɔ tã. Lenni nko eni mɔ kanyinyǝnyǝ eto bitsyikǝ eboso mɛ ani ku butsyi. ²⁸Nyamfo kulaa eso minla miǝ matsyese wǝ mi ɔflɔ lǝ binyǝ wǝ, lǝ binyǝnko wǝ disuǝnyǝ, nya mintsya loola nwɔnɔ mɔ utu siǝ kasɔ sɛkɛ. ²⁹Nyaso befo wǝ ani ǝnuǝ, binyǝko wǝ disuǝyuǝ lǝ Bonamute eto diye ǝsuǝ. Bitǝ betidi bamfo eto okle dibu. ³⁰Itsyise ufi wǝ ǝsuǝ utǝ nya untǝ kpǝ lǝ Kristo eto keyifo ka nkǝ woawunsǝko mɛ lǝ nyifo ka biamfo mǝ bɔwunsǝko nyifo eso.

Biemfi Ǝsuǝ Bitǝ Ǝsuǝ Ǝto Sinǝ Eto Asayifoyifo.

¹Kafɛfɛkɔɔ, mɔ bayimi, binyǝ disuǝyuǝ bǝ biyifo bani ku Bonamute. Yenlǝ mɛ bǝ nsi nwɔni asa nyamfo ke ntsyese mi, itsyise nyamfo luutǝ buinyǝ kekleke nɛ.

²Bɛlɛ ola bińyǝ bikabe babuayifo bamfó ba leeyifo asa fe bakpa, betidi ba lǝǝńyǝ kekleke bǝ bala ǝsuǝ eto sinǝ, ini lelolala. ³Bo ni mba léfo lelolala eto lekpa inni mǝ, itsyise boesumu Onanto ɛyɛ lǝ wǝ Lɛwɔnɔ ǝsuǝ nya boǝnyǝ disuǝyuǝ se buyifo bani ku Kristo Yesu eso. Nya boemfi ǝsuǝ butǝ ǝsuǝ eto sinǝ bola eto lekpayifoyifo.

⁴Nya lǝ utsyuǝ ebu nkǝ woofo ǝsuǝ bufi kǝtǝ lelolala eto lekpa buyifoo, eni mɔ bomu ele bǝ mfo ǝsuǝ eto sinǝ eto lekpayifoyifo eto asa ntǝ ǝsuǝ nso. ⁵Mɔɔ, se bále mɛ eto diyi flamfla lee, nnya bála mɛ lelo nɛ, Israelnyǝ tinti mini nya mbɔ ntsyi lǝ Benyamin eto kafo. Hebrinyǝ kosate kosate wǝ eto anto ni Hebrinyǝ tinti wǝ mini nɛ. Nya lǝ Yudafɔ eto kɔfi ǝsuǝǝ, nyifo Farisinyǝ. ⁶Nya lǝ kǝtsyuǝfifi lǝ Yudanyǝdidi ǝsuǝǝ, nyifo lǝ nnya ǝsuǝ kekleke itǝ bǝ ntǝkǝko Kristo eto bafokanɔfɔ kama nte mǝ ohiã tinti. Nya lǝ bɔyɛ lǝ Yudafɔ eto kɔfi ǝsuǝǝ, dikpilolo saa ǝmbɔkǝ lǝ mɛ itsyise, nyifo lǝ ko ǝsuǝ tinti.

⁷Fɛɛ lǝ kutǝkǝ kutsyuǝ akɛ lǝ nnya ǝsuǝ itǝ mɛ kɔ ǝmǝ tsyaa, mɔmɔɔ, lǝ Kristo esoo, efiani asa bimba nnya lǝmbǝ kutǝkǝ saa itǝ mɛ. ⁸Sitintii, mfi nyamfo kenke fe asa nnya lǝmbǝ kutǝkǝ saa, itsyise mbǝ nyǝ ntsyǝ lekpo miǝ Kristo Yesu hã ni Bonamute nya nyamfo afe mɛ eso asa fɛfɛ kenke. Lǝ wǝ esoo, ntó lesa saa nkpe nya mimfi asa fɛfɛ kenke fe kuku eto ekubi bǝ lǝ Kristo lǝ oka mɛ kɔni bonko wǝ lǝ buyifo bani, ⁹lǝ mfi mɔ ǝsuǝ kenke ntǝ wǝ. Nyasoo, minsini ɔsɛɛ itǝ mɔ ǝsuǝ ɛyɛ lǝ asayifoyifo lǝ kusu ǝsuǝ lǝ kɔfi komǝ kalɔ. Kasɛɛ ka ni lǝ Kristo bofo kanɔ ǝsuǝ hã moofo buyifo. Kasɛɛ ka Onanto hã lǝǝtǝ ɛyɛ lǝ bofokanɔ lǝ wǝ ǝsuǝ. ¹⁰Nya lesa nǝ minla ni bǝ lǝ nte Kristo ku ǝsuǝale nnya dítǝ ótakasǝ wǝ utsyi ɔkɔmǝ úbǝ nkpǝ. Nya lǝ nnyǝ kanyi ku wǝ, lǝ nyifo lɔni ku wǝ lǝ wǝ ukpǝ ǝsuǝ, ¹¹ku kusubebe bǝ Onanto ebotakasǝ mintsya utsyiko ɔkɔmǝ oboko nkpǝ.

Paulo Átɛyi Kase Ele Bǝ Uyifo Bǝ Lǝ Unyǝ Kayofofo.

¹²Minlɛ bɔtɛyi minkɛ mbutǝkǝ kato nye mbɔflɔ nlo. Bomu nlɛ bokplatsya kekleke bǝ lǝ mfo kayofofo ka Kristo Yesu luufi utǝ mɛ. Itsyise Kristo Yesu éyifo mɛ nkǝ mfiani wǝ ole. ¹³Lǝ sitintii, mɔ bayimi lala, mamfo nnɔ miǝ mɔ kɔni éboka kayofofo kamǝ. Bomu lesa nǝ minlɛ bokplatsya lǝ nyifo ni lǝ nta nnya díkafe ǝsuǝ le mfi ǝnǝmi ntǝkǝ lǝ nnya nte sɛtɔ eto kɔniboka ǝsuǝ. ¹⁴Nyaso meetsyetsyi bebembe bǝ lǝ nsu nsa usunklu ǝmǝ nyila, bǝ lǝ mfo kayofofo ka Onanto lékpadi mɛ nkǝ mbǝ mfo lǝ kato ɛyɛ lǝ Kristo Yesu eso.

¹⁵Bitǝ lǝ nsusu bomfo lǝ bɔkɛ bomba díkabe lǝ Lɛwɔnɔ Kɛnkɛ ǝsuǝ. Nya lǝ mi utsyuǝ kpe nsusu bamba ntsyuǝ, Onanto ebulǝkǝ nyamfo ote mi ekpa wuee. ¹⁶Niǝ, niǝ, nniǝǝ, bitǝ lǝ bɔyɛ busu sɛtɔ lǝ kusu ko ǝsuǝ búkayɛ ibǝ ese mɔmɔ.

¹⁷Mɔ bayimi, bebe mɔ eyifobi ǝsuǝ bɛyɛ. Bɛlɛ ola bebe mba nsi nkpǝ lǝ ditsyǝbi sɛɛ ǝsuǝ fe kase búsiǝ bote mi seka. ¹⁸Mbɔtɛyi mi nyamfo sesia, sesia mfe nya mɔmɔɔ, nsi nlɛ mi nnya bɔtɛyi ku binǝntu miǝ bǝtsyuǝ kpǝ eto nkpǝ bo bensi ǝtǝ beyifo balo itǝ Kristo eto ukpǝ lǝ uyikabie ǝsuǝ. ¹⁹Betidi bamfo eebudufɛ lǝ kanyimanlo manlo eto ute ǝsuǝ. Itsyise mǝ kafo ni mǝ onanto. Nnya ni afanisaa, nnya ǝsuǝ bomu bǝǝnyǝ disuǝyuǝ nya befi mǝ nsusu bǝtǝkǝ lǝ kawunsiǝ eto bikǝ ǝsuǝ. ²⁰Fɛ, bo alɛɛ, bo umǝ ni kato nya buńyǝ bɔnlɛ bo Ofomfokǝtǝ wǝ ni Bonamute Yesu Kristo kusu bobe bǝ lǝ utsyi kato ubǝ. ²¹Wǝ loofloma bo ǝsuǝ eto sinǝ sia lǝmbǝ ale uyifo se fe wǝ kosate eto ǝsuǝ eto sinǝ sia nkpe lǝ dinyǝndǝ ǝsuǝ ɛyɛ lǝ wǝ ǝsuǝale ǝsuǝ. Nya lǝ ǝsuǝalǝ nyamǝ ke ǝsuǝǝ, wuunǝ lesa saa okpe lǝ wǝ kɔfi kalɔ.

Paulo Átɛyi Filipifɔ Lesa Nǝ Ele Bǝ Beyifo.

¹Nyaso, mɔ bayimi lala ba lefe bitǝ mɛ, ba minla miǝ mǝǝkǝnyǝ. Biakpe mɛ disuǝyuǝ tinti nya maasɔ lɛkɔɛsi kabesǝ ǝsuǝ kato lǝ mi disi. Mɔ bayimi lala, nko ele bǝ bińyǝ kekleke lǝ mi nkpǝ lǝ Bonamute ǝsuǝ nɛ.

²Nlɛ Ewodia ku Sinteke lekpakpa miǝ bɛnɔ bǝtsyuǝ kasɔ lǝ besinkli bisiǝ fe bayimisio lǝ Bonamute eso. ³Nya mi tsya ba ni mɔ beyifotsyuǝ lalaa, nla miǝ bɛwunsǝko besio bamfo. Itsyise béyifo keyifo kekleke báwunsǝko mɛ bǝ lǝ busǝnsǝ Ditiki Sɛɛ nǝmǝ ku Klemens ku mɔ beyifotsyuǝ bamba kenke ba eto aye nkpe lǝ Onanto eto Nkpǝ eto Kukue kafo.

⁴Binyǝ disuǝyuǝ lefe saa bǝ biyifo bani ku Bonamute ǝmǝ. Nsi nlɛ bɔtɛyi bio miǝ binyǝ disuǝyuǝ.

⁵Bɛkɛ disuǝtsyǝ bitǝ utsyuǝ saa. Itsyise Bonamute ǝmǝ eto dibǝfe ebɔfi. ⁶Biǝnsiǝ bikala kawɔnɔ lǝ kulesa ǝsuǝ, bomu bikato ola bikǝtǝ Onanto lǝ lesa saa nǝ lehiã mi ǝsuǝ, bikasɔ wǝ ani itsyi taa mi ketu kǝmiǝ ke. ⁷Nya Onanto eto diyuǝ nǝ nso kawunsiǝ eto utidi eto kasɔnɔnɔ saa, lǝ lɛlɔ mi ketu ku nsusu ditsyǝ lǝ lɔniyifoyifo ku Kristo Yesu ǝsuǝ.

⁸Lǝ kalosǝkɔɔ, mɔ bayimi, bitǝ lǝ lesa nǝ nso kɔnɔ ku nnya dińyǝ itǝ atɛsǝ lǝ iyi mi nsusu kǝmiǝ, nyamfo ni lesa nǝ ni ɔnukualɛ, lesa saa nǝ dińyǝ itǝ dibu, lesa saa nǝ ni lɛsɛɛ, lesa saa nǝ lekpa, lesa saa nǝ laanɔ bobe ku lesa sa nǝ dinyǝnko utidi nɛ. ⁹Bisiǝ nkpǝ lǝ lǝsanǝ békase ku béfo bitsyiko mɔ ɔflɔ, itsyi lǝ mɔ etikididi ku mɔ eyifosa tã ǝsuǝ. Nya lǝ Onanto wǝ lǝǝtǝ diyuǝ lǝ usiǝko mi.

Paulo Ásɔ Filipifɔ Ani Lǝ Ǝtǝsa Nya Bǝtǝ Wǝ Eso.

¹⁰Lǝ mɔ lɔniyifoyifo ku Bonamute ǝsuǝǝ, iyifo mɛ disuǝyuǝ tinti bǝ lǝ lefe kɛntsyɛ kamaa bisi bɛlɛ bulǝkǝ kate mɛ biǝ bifi kǝtsyuǝ lǝ mɛ ǝsuǝ. Inni bɔtɛyi minlɛ miǝ bɛni mɛ lǝ lefe nǝmǝ, bomu kusu ete yǝntǝ bǝ bilǝkǝ bete nko. ¹¹Nya inni bɔtɛyi minlɛ miǝ lesaatsyuǝ ahiã mɛ, bomu mbókase lǝ lesa saa ǝsuǝ ku lǝ kalebe saa miǝ lesa nǝ kee nte mɛɛ, dufǝ mɛ ǝnǝ. ¹²Nya lesa nǝ ini bǝ lesa hiã fǝ ku lesa nǝ ini bǝ, lǝsa tsyǝ fǝ eso kase fahiãa, mbokase kobe komfo. Itǝ bǝ lǝ kalebe saa ku lefe saa nyi kase muusiǝ nkpǝ, imi mɛ o-o, kukpɛnsǝ lɛ mɛ o-o, ɛlɛkɛ itǝ mɛ. Lǝ ite mɛ kpǝ o-o nye elonko mɛ tsya. ¹³Ǝsuǝale nnya Kristo ditǝ mɛɛ, nnya lǝǝtǝ maafo nyamfo kenke ǝsuǝ nɛ.

¹⁴Fɛɛ bíyifo ɛlɛkɛ tinti bǝ bɛwunsǝko mɛ lǝ mɔ bulǝ kǝmiǝ. ¹⁵Nya mi Filipifɔ kosate yi biǝ idu lefe nǝ míndu lǝ Makedoniaa, nya mítsyiko Ditiki Sɛɛ nǝmǝ letsya bobe kasɔɔ, mi hã ni bafokanɔfɔ eto ditsyukpa nǝ nlɛ mɛ bɔwunsǝko, kǝtǝ mɛ asa. Kutǝkǝ mínyǝ o-o, bɔsɔ ɛsɔ mɛ o-o, mi hã ni mba díkǝnko mɛ. ¹⁶Lefe nǝ minkɛ lǝ Tesalonika kulaa tsyaa, se mínhiã bɔwunsǝko, bɛwunsǝko mɛ lefe kpǝ. ¹⁷Nya inni ǝtǝsa minhiã itsyi mi ɔflɔ eso, bomu kutǝkǝ ko mi luunyǝ bɛyɛnko lǝ ǝtǝsa nyamfo ǝsuǝ. ¹⁸Béfo mɛ kayo kenke. Nya béfo mɛ kayo besonsǝ kase ele be itsyǝ. Ǝtǝsa nya kenke bétsyese mɛ bɛyɛnko lǝ Epafrodito ǝsuǝ ǝbǝ éka mɛ kɔni. Ǝtǝsa nyamfo eyifo fe keditǝtǝ eto asa nnya laanyi fifififi befi bǝtǝ Onanto nnya dídufǝ wǝ ǝnǝ nya ékpe wǝ disuǝyuǝ. ¹⁹Nya bo Onanto kosate ebutǝ mi ǝtǝsa nnya kenke loohiã mi ɛyɛ lǝ Kristo Yesu eto setabikɛ ku diyǝnde kplɛ nǝmǝ esuǝ.

²⁰Bitǝ lǝ bɔtɛsǝ Boanto Onanto itsyi manlo isu manlo kenke. Ibǝ itǝ.

Kǝsiǝ Fɛfɛ.

²¹Mǝǝsiǝsǝ mba ni Onanto eto bebi ba ni Kristo Yesu eto bale kenke o-o. Nya bayimi ba nkpe lǝ mɔ ɔflɔ mfo tsyaa, bǝ bǝǝ siǝsǝ mi o-o! ²²Betidi ba kenke léfo Onanto bánɔ nkpe mfo ǝsiǝsǝ mi kukɔnɔ, titlu mba nkpe lǝ Roma eto Okankplɛ eto diyo.

²³Lǝ Bonamute Yesu Kristo eto lefonǝ lǝ disiǝko mi.