HEBRIFƆ

HEBRIFƆ

Kukue Ko Báwɔni Bǝtǝ Hebrifɔ

Onanto Eto Ditiki Ɛyɛ Lǝ Wuubi Ǝsuǝ.

¹Koko lefee, Onanto édi bo banamǝ etiki sesia sesia sesia, nya lǝ esu kpǝ ǝsuǝ tsyaa, ɛyɛ lǝ wǝ bǝnyɛlǝkǝtidi ǝsuǝ. ²Fɛɛ lǝ eyi fɛfɛ nyamfo ǝsuǝǝ, údi bo etiki ɛyɛ lǝ wǝ Ubi ǝsuǝ. Wǝ ǝsuǝ Onanto lɛyɛ úyifo kawunsiǝ, nya wǝ ni nwǝ Onanto dílǝkǝ nkǝ udi wǝ bikǝ kenke nɛ. ³Ubi ǝmfo dílǝkǝ Onanto eto diyǝnde óte nya Onanto eto ditsyǝbi tututu nkpe wuntsya. Nya úfi Onanto eto Ditiki Sɛɛ kplɛ nǝmǝ úmuǝ kawunsiǝ kenke ɔnlɛ. Se úflǝ bo abua kenke úwii, úsu úsiǝ lǝ Onanto, Ǝsuǝalenyǝ Kenke, eto kodiani kato.

Onanto Eto Ubi Eto Sɛkplɛ.

⁴Onanto eyifo wǝ ubi ɔkplɛ enso wǝ batɔnkpe, fe kase wǝ diye nǝ Onanto dítǝ wǝ nso mǝ lele.

⁵Itsyise Onanto mántɛyi wǝ batɔnkpe eto kuutsyuǝ saa nkǝ,

“Fɛ ni mɔ Ubi.

Mmii, minle fǝ.”

Nye Onanto mántɛyi itsyi lǝ wǝ ɔtɔnkpe saa ǝsuǝ nkǝ,

“Muudi wǝ Anto,

nya wuuyifo mɔ Ubi.”

⁶Fɛɛ lefe nǝ Onanto léla nkǝ woatsyese wǝ Ubi tutɛ kawunsiǝ kamfoo, ɔ́tɛyi nkǝ,

“Onanto eto batɔnkpe kenke ebusumu wǝ.”

⁷Fɛɛ Onanto átɛyi lǝ wǝ batɔnkpe ǝsuǝ nkǝ,

“Onanto eeyifo wǝ batɔnkpe fe ufiebi,

nya wǝ kato eto besumunyǝ bamfó fe ute eto kadiakami.”

⁸Fɛɛ Onanto átɛyi itsyi lǝ wǝ Ubi ǝsuǝ nkǝ,

“Onanto, fǝ sekakedikɔɔ, kalosǝkɔ embɔkɛ lǝ se kulefe kulefe!

Fǝ sekakedidi lǝ fǝ betidi ǝsuǝ ebuyi ku kasɛyifoyifo.

⁹Aala kasɛyifoyifo nya feekisi kabuayifoyifo.

Nyamfo eso Onanto, fǝ Onantoo, dílǝkǝ fǝ,

nya úfi disuǝyuǝ nǝ nso nǝ útǝ fǝ bayɛtsyuǝ kenke útǝ fǝ.”

¹⁰Usi ɔ́tɛyi nkǝ,

“Fǝ, Bonamute, fǝ ni nwǝ taa kasɔ ketsyikokɔ díyifo kasɔ,

nya féyifo kato ku fǝ kosate eto ani.

¹¹Asa nyamfo kenke ebubǝ efe. Fɛɛ fǝ ebubu akɛ lefe saa.

Asa nyamfo kenke ebobia isensǝ fe kase mfia laala kafiani afianku.

¹²Ebukǝnǝ nnya fe kase bǝǝkǝnǝ awu ku mfia itǝ bofloma.

Fɛɛ fǝǝ, nko ete fuutsyǝ nɛ, embofloma,

nya fǝ nkpǝ embolo kulefe.”

¹³Nte ɔtɔnkpe wǝ Onanto lɛtɛyi nkǝ,

“Siǝ lǝ mɔ kodiani, isu ese lefe nǝ muufi

fǝ balo nkpe fǝ kalɔ bafiani nnya ǝsuǝ fuutǝkǝ akpa”?

¹⁴Nyalɛɛ, bawoe ni kato eto batɔnkpe fɛ? Mǝ ni awɔnɔ nnya leesumu Onanto nya woakpe mǝ atɔ nkǝ besu bawunsǝko mba ele bǝ bafo lǝ nkpǝ manlo.

Onanto Ebutǝ Nkǝ Betidi Nyǝ Bofo Tinti.

¹Nyamfo eso ele bǝ bɔlɛ ɔnukualɛtiki nnya bɔ́nɔ ola kekleke nɛ. Lenni nkoo, boonya kusu lǝ nnya ǝsuǝ. ²Kɛnyɛ ka Onanto eto batɔnkpe dítǝ bo banamǝǝ, eyifo ɔnukualɛ, nya lǝ utsyuǝ úta úbu nye útidi ato lǝ nnya ǝsuǝ, bǝnǝ wǝ koto sitinti fe kase íńyǝ itǝ. ³Nyalɛɛ, ntsyǝ boofo butsyetsyi lǝ kotonǝnǝ eto kɛnyɛ, lǝ bɔni koto butsyue akafo Ditiki Sɛɛ kplɛ nǝmfo? Bonamute kosate leka bofo eto Ditiki Sɛɛ nǝmfo bɔtɛyi tutɛ tutɛ, fɛ mba kenke lɛnɔ ni lǝ wǝ kɛnyɛ tsya díbǝ bátɛyi ni báse uyi bǝtǝ bo bǝ, diyifo ɔnukualɛ. ⁴Lǝ nnya ǝsuǝǝ, Onanto kosate tsya édi nnya adansiɛ ku ɔnukualɛ, lǝ nyaso úyifo ayanisa ku ayanisa lǝ esu kpǝ ǝsuǝ, nya úsie Lɛwɔnɔ Kɛnkɛ eto ǝtǝsa útǝ lǝ kase waala ǝsuǝ.

Nwǝ Ǝsuǝ Bɔɔyɛ Bunyǝ Nkpe Manlo.

⁵Onanto mémfi kawunsiǝ fɔfɔ ka lǝǝbǝ bubǝ ka ǝsuǝ bɔnlɛ etiki budi ókpe lǝ batɔnkpe kalɔ. ⁶Fɛɛ Anantotiki eto lekpa ditsyuǝ édi nnya adansiɛ ɛtɛyi nkǝ,

“Be ni utidi, O Onanto, bǝ fǝ ǝnǝmii, lǝ itǝkǝ lǝ wǝ ǝsuǝ nko?

Be ko ni utidinini bǝ lǝ aalɛ wǝ ola nko?

⁷Ábokosǝ wǝ kasɔ itǝ lefe kliminti ditsyuǝ enso Onanto eto batɔnkpe.

Fɛɛ ǝbǝ éfi diyǝnde kplɛ ku dibu étsyisǝ wǝ fe lekankpakpa.

⁸Nya fǝtǝ údi seka lǝ lesa saa ǝsuǝ.”

Bátɛyi bǝnkǝ Onanto éyifo utidi nkǝ udi seka lǝ lesa saa ǝsuǝ nya nyamfo lɛ bote wuee bǝnkǝ, lesa saa banlɛ. Tsya lǝ kase intee, bɔnlɛ tɔ bunyǝ kase utidi nlɛ seka budi lǝ lesa saa ǝsuǝ. ⁹Fɛɛ Yesu ǝmfoo, wǝ lǝ lefe kliminti ǝsuǝ bábokosǝ kasɔ fe okpe lǝ Onanto eto batɔnkpe kalɔɔ, itǝ ɛyɛ lǝ Onanto eto lefonǝ ǝsuǝǝ, lǝ ukpǝ lǝ utsyue saa eto disi. Bɔlɛ wǝ bunyǝ mɔmɔ nwǝ béti ǝtǝsa ku dibu kenke eto lenkpakpa, ɛyɛ lǝ ukpǝ wǝ úkpǝ eso.

¹⁰Ɛlɛkɛ bǝ Onanto wǝ díyifo nya woalɔ lesa saa kǝtsyǝǝ, tǝ Yesu lǝ ɔflɔ ɛyɛ lǝ kanyi ka únyǝ ǝsuǝ bǝ ɛyɛ lǝ nnya ǝsuǝ unǝ bebi kpǝ oboko lǝ bǝnyǝ kedikɔ lǝ wǝ diyǝnde ǝsuǝ. Itsyise Yesu ni nwǝ lookpa mǝ usuko nkpǝ manlo kǝmiǝ. ¹¹Wǝ lǝǝflǝ abua lǝ betidi ǝsuǝ kewui, nya wǝ ku mba ǝsuǝ bǝflǝ abua béwui, anto ɔni uni mǝ. Nyaso yenyifo Yesu afanisa bǝ ókpadi mǝ nkǝ wǝ bayimi. ¹²Woatɛyi Onanto nkǝ,

“Mɔɔtɛyi mɔ bayimi lesa nǝ féyifo.

Nya mɔɔtɛsǝ fǝ lǝ mǝ katsyakɔ.”

¹³Usi ɔ́tɛyi nkǝ,

“Muufi mɔ kusubebe ntǝkǝ lǝ Onanto ǝsuǝ.”

Nya usi ɔ́tɛyi nkǝ,

“Nnyǝ mɔ ku bebi ba Onanto dífi útǝ mɛ.”

¹⁴Se betidi ba woakpadi nkǝ bebi ni betidi ba lɛbɔ betsyi lǝ sinǝ ku kɔtɔ ǝsuǝǝ, Yesu kosate ǝbǝ ófiani fe mǝ nnya úsiǝ nkpǝ fe mǝ ke. Úyifo nyamfo nko bǝ ɛyɛ lǝ wǝ ukpǝ ǝsuǝǝ, lǝ ɔtsylɔsǝ Obonsam wǝ nkpe ukpǝ eto ǝsuǝale. ¹⁵Nya ɛyɛ lǝ kusu komfo ǝsuǝǝ, lǝ ulǝkǝ mba kenke lɛkɛ lǝ sidomu ǝsuǝ lǝ mǝ nkpǝ ǝsuǝ lǝ nnya báte ukpǝ sikpi eso. ¹⁶Nya ekpa bǝ inni Onanto eto batɔnkpe úbǝ kawunsǝko kɔ, bomu Abraham eto bebi eto bebi. ¹⁷Nnya kasɔ ni bǝnkǝ, ele bǝ ofiani fe wǝ bayimi lǝ kusu saa ǝsuǝ bǝ lǝ ofiani ominsǝnyǝtidi ku nwǝ leesumu Onanto lǝ kusu ǝsuǝ eto Usumunyǝ Ninǝ Kenke lǝ utǝ kedi lǝ betidi eto abua eto disi. ¹⁸Nya se wǝ kosate dínyǝ kanyi nya báto wǝ bábe esoo, woofo mba nkpe lǝ botokabe ǝsuǝ bɔwunsǝko.

Yesu Eto Kǝńyǝnkɔ Kpe Kalende Kaso Moses Eto Kale.

¹Mɔ bayimi lala lǝ Kristo ǝsuǝ, mi mba Onanto tsya lékpadi! Bibu Yesu bebe, nwǝ Onanto létsyese nkǝ ubǝ ofiani Usumunyǝ Ninǝ Kenke lǝ bofokanɔ bo bonkpe ǝsuǝ. ²Úyifo wǝ keyifo lǝ kusu ǝsuǝ útǝ nwǝ dílǝkǝ wǝ nkǝ uyifo wǝ keyifo fe kase Moses díyifo asa lǝ kusu ǝsuǝ lǝ wǝ keyifo ǝsuǝ lǝ Onanto eto diyo. ³Beefi dibu kǝtǝ nwǝ léto diyo kaso diyo nǝ báto kosate. Nko ke Yesu nkpe dibu kplɛ enso Moses nɛ. ⁴Itsyise diyo saa kpe ni otonto. Fɛɛ Onanto ni nwǝ léto lesa saa. ⁵Moses éyifo uyifoyifo ɔnukualɛnyǝ lǝ Onanto eto diyo. Nya ɔ́tɛyi asa nnya ǝsuǝ Onanto luubǝ udi etiki utsyiko lǝ lefe nǝ luubǝǝ, ɔ́tɔnsǝ. ⁶Fɛɛ Kristo eyifo ɔnukualɛnyǝ fe Onanto eto Ubi wǝ nsi lǝ Onanto eto diyo eto kɛnyɛ. Bo ni wǝ diyo nǝmǝ nɛ, lǝ bokpe utu nya bofo bɔnɔ kekleke lǝ nnya ǝsuǝ bɔnlɛ kusu bobe.

Ɔwɛkǝtsyǝkɔ Kpe Itǝ Onanto Eto Betidi.

⁷Nnya Lɛwɔnɔ Kɛnkɛ lɛtɛyi nkǝ,

“Lǝ bɛnɔ Onanto eto ɔkɔɛ mmii,

⁸bientidi ato

fe kase ítsyǝ lǝ mi banamǝ eto lefe,

nya bátaka bǝńyǝ mɛ lǝ ǝsuǝ fe kase báto mɛ bábe lǝ mfiminti mfó.

⁹Mfó nya báto mɛ bábe, lǝ babe lesa nǝ muuyifo,

ite bǝ bǝnyǝ asa nnya mínyifo lǝ alɛ fosi ana ǝsuǝ.

¹⁰Lǝ nnya eso nnyǝ ɔblɔ nkpe betidi bamǝ.

Nya míntɛyi minkǝ, ‘Baamfo mɛ akanɔ,

nya baani beentsyue mɔ afi koto.’

¹¹Lǝ nyaso kafo ányi mɛ nya mínka ntamu míntɛyi minkǝ,

‘Bembudufǝ kasɔ ka eni míntǝ tǝ mǝ ɔnwɛkǝtsyǝkɔ kulefe!’ ”

¹²Mɔ bayimi bafokanɔtsyuǝ, bebe sinini biǝ mi nti eto kuutsyuǝ ǝmbɔkɛ lɛkɔɛsi bua nya wǝmbɔkɛ bofokanɔ bǝ wǝǝmbɔtsyi kama okpe Onanto wǝ nsi nkpǝ. ¹³Bomuu, bɛlɛ mi bǝtsyuǝ kɔlɛ diyi saa fe kase Mmii ǝmǝ báwɔni bákpe lǝ Awɔnisa Kɛnkɛ eto Kukue ǝsuǝ leka mi. Lǝ itǝ bǝ biǝmbɔwɛ mi ǝsuǝ bekpe lǝ lebua lǝ befiani mba ditidi ato.

¹⁴Itsyise buyifo bani ku Kristo lǝ bɔlɛ bo bofokanɔ lǝ kɔni kekleke isu ese lǝ kalosǝkɔ fe kase bútsyiko kasɔ. ¹⁵Awɔnisa Kɛnkɛ eto Kukue átɛyi nkǝ,

“Lǝ bɛnɔ Onanto eto ɔkɔɛ mmii,

bientidi ato

fe kase ítsyǝ lǝ mi bana mǝ eto lefe,

nya bátaka bǝńyǝ lǝ Onanto ǝsuǝ.”

¹⁶Bawe ni betidi ba lɛnɔ Onanto eto ɔkɔɛ nya bátaka bǝńyǝ lǝ wǝ ǝsuǝ? Mba kenke Moses lékpa ɔ́yɛnko utsyiko Egipte eto kasɔ ǝsuǝ.

¹⁷Nya bawoe Onanto dínyǝ ɔblɔ ókpe itǝ alɛ fosi ana sɔ̃ɔ̃? Mǝ ni betidi ba díyifo lebua ba díkpǝ lǝ mfiminti. ¹⁸Bawoe ǝsuǝ Onanto léka ntamu ɔ́tɛyi nkǝ, “Kulefe, bembudufǝ kasɔ ka ǝsuǝ eni míntǝtǝ mǝ ɔnwɛkǝtsyǝkɔ.” Bawoe ɔnlɛ? Mba létaka bǝńyǝ wǝ lǝ ǝsuǝ. ¹⁹Bunyǝ boǝ lǝ nnya eso bámfo kasɔ kamǝ budufǝ, itsyise bámfo banɔ.

¹Mɔmɔɔ, se kusubebe nsi nkpe bo bǝ buunyǝ ɔnwɛtsyǝtsyǝ wǝ Onanto dítsyǝ bo kɛnyɛ útsyǝǝ, bitǝ lǝ bobe kukɔnɔ bǝ, yǝǝmbǝ bǝ mi kuutsyuǝ saa mamfo ɔnwɛtsyǝtsyǝ wǝ útsyǝ bo kɛnyɛ útsyǝ. ²Itsyise bátɛyi bo Ditiki Sɛɛ nǝmǝ fe kase bátɛyi mǝ tsya. Bánɔ kɛnyɛ kamǝ, fɛɛ yényifo mǝ keyifo sɛɛ saa lǝ ǝsuǝ, itsyise se banɔ nii, bámfo ni bánɔ tsya. ³Fɛɛ bomba léfo bɔ́nɔɔ, búdufǝ ɔnwɛkǝtsyǝkɔ kamǝ, ka Onanto dítsyǝ kɛnyɛ. Ite fe kase ɔ́tɛyi útsyǝ nkǝ,

“Kafo ányi mɛ nya mínka ntamu míntsyǝ miǝ,

‘Bembudufǝ kasɔ ka eni míntatǝ mǝ ɔnwɛtsyǝtsyǝ kulefe!’ ”

Ɔ́tɛyi nyamfo nko ite bǝ wǝ kosate eto keyifo álo, idu lǝ lefe nǝ úyifo kawunsiǝ ólosǝ fɛ. ⁴Itsyise lǝ Awɔnisa Kɛnkɛ eto Kukue ǝsuǝǝ, báwɔni asa ǝtsyuǝ itsyi lǝ diyi kuansele ǝsuǝ bǝnkǝ,

“Onanto ǝtsyǝ ɔnwɛ lǝ diyi kuansele ǝsuǝ

lǝ keyifo saa buyifo ǝsuǝ.”

⁵Besi bátɛyi ditiki nǝmfo bǝ, “Bembudufǝ kasɔ ka eni míntatǝ mǝ bafo ɔnwɛtsyǝtsyǝ ǝmǝ!”

⁶Mba leka Ditiki Sɛɛ nǝmǝ bɔ́nɔ mámfo ɔnwɛtsyǝtsyǝ ǝmǝ, itsyise bámfo ni banɔ. Fɛɛ itǝ bǝtsyuǝǝ, kusu si kokpe bǝ bafo ɔnwɛtsyǝtsyǝ ǝmǝ. ⁷Bǝlǝkǝ nyamfo báte itsyise Onanto esi útsyǝ diyi bamba nǝ baakpo Mmi. Alɛ kpǝ lǝ nnya kamaa, fɛ údi etiki utsyi lǝ nnya ǝsuǝ, ɛyɛ lǝ Oka David ǝsuǝ ɛyɛ lǝ Awɔnisa Kɛnkɛ eto nnya búkatɛyi bofe bǝ,

“Lǝ bɛnɔ Onanto eto ɔkɔɛ mmii,

bientidi ato.”

⁸Lǝ nnya ete Yosua lɛyɛnko betidi bamǝ bédufǝ lǝ ɔnwɛtsyǝtsyǝ ǝmǝ Onanto dítsyǝ kɛnyɛ útsyǝǝ, eni Onanto ménsidi etiki kama kama utsyiko lǝ diyi bamba ǝsuǝ. ⁹Lǝ nyamfo esoo, Ɔnwɛditsyǝyi bamba si lekpe itǝ Onanto eto betidi fe diyi kuansele nǝ ǝsuǝ Onanto dítsyǝ ɔnwɛ. ¹⁰Itsyise nwǝ kee léfo Ɔnwɛditsyǝyi nǝ Onanto lɛtɛyi utsyǝǝ, ebutsyǝ ɔnwɛ lǝ wǝ kosate eto keyifo kenke ǝsuǝ fe kase Onanto dítsyǝ ɔnwɛ lǝ wǝ kale ǝsuǝ. ¹¹Nyaso bitǝ lǝ bokplatsya lǝ bofo ɔnwɛtsyǝtsyǝ ǝmfo, bǝ lǝ bo kuutsyuǝ saa mentidi ato lǝ nnya ǝsuǝ fe kase béyifo.

¹²Itsyisee, Onanto eto Ditiki Sɛɛ kpe nkpǝ nya lɛnlɛ keyifo kekleke, nya lenkpe kobe lenso lesiabi nyɛ nnuǝ. Diala lesa saa kǝlǝkǝ lǝ nsusu ku lɛwɔnɔ kǝmiǝ, isu ese taa ǝsuǝ eto ntsyakɔ ku dikubi ku afɔ eto katsyakɔ eto nti nya diakpo utidi eto nsusu ku utu kǝmiǝ kasɛɛ kukɔnɔ. ¹³Asayifoyifo saa menyifo akulasa lǝ Onanto eto ǝnǝmi. Wǝǝnyǝ asayifoyifo saa tɛnklɛɛ nya ekpa wuee lǝ wǝ ǝnǝmi. Nya wǝ ni nwǝ ele bǝ bo utsyuǝ saa tǝ wǝ nkpǝ eto nkunta.

Yesu Ni Onanto Eto Usumunyǝ Ninǝ Kenke.

¹⁴Nyaso bitǝ lǝ bɔlɛ bo bofokanɔ bo boǝlǝkǝ kate kekleke. Itsyise bokpe Usumunyǝ Ninǝ Kenke wǝ ni Yesu, Onanto eto Ubi wǝ díkatɔ bo úsu kato úsu úńyǝ lǝ Onanto kosate eto ǝnǝmi. ¹⁵Bo Usumunyǝ Ninǝ Kenke enni nwǝ lǝǝnnyǝ bo kaminsǝ, se bumbǝ ale eso. Bomu bokpe utidi wǝ báto babe lǝ kusu saa ǝsuǝ fe bo ke. Fɛɛ wényifo lebua saa. ¹⁶Lǝ nyaso bitǝ lǝ buńyǝ bembe, lǝ bɔnyi bɔfi Onanto eto lekankpomɛ kaka buunyǝ wǝ lefonǝ. Mfó wuunyǝ bo kaminsǝ bunyǝ wǝ lefonǝ nǝ lɔɔwunsǝko bo lǝ lefe nǝ ke ehiã bo.

¹Usumunyǝ Ninǝ Kenke saa, betidinini nti ete bǝǝlǝkǝ wǝ ketsyiko, nya bǝǝtsyǝ wǝ bǝ lǝ uńyǝ lǝ mǝ kɛnyɛ lǝ Onanto eto kesumu ǝsuǝ, lǝ utǝ wǝ kedi lǝ bǝnyǝ mǝ abua eto bufikatsyɛ. ²Se wǝ kosate, lǝ esu kpǝ ǝsuǝ, lǝmbǝ ale lǝ okla ǝsuǝ esoo, okpe disuǝtsyǝ kǝtǝ mba lenyi kusu ko ǝsuǝ ele bǝ bayɛ eso baata kebu. ³Nya se wǝ kosate lǝmbǝ ale lǝ esu kpǝ ǝsuǝ esoo, ele bǝ utǝ kedi, enni lǝ wǝ betidi hã eto abua eto disi te bomuu, lǝ wǝ kosate tsya eto abua eto disi.

⁴Kuutsyuǝ saa ǝnlǝkǝ wǝ ǝsuǝ Usumunyǝ Ninǝ Kenke kefi dibu nǝ laamankla lǝ ni kǝtǝ wǝ ǝsuǝ. Bomu Onanto hã laakpadi utidi, keyifo wǝ Usumunyǝ Ninǝ Kenke fe kase ókpadi Aaron seka. ⁵Nko ǝmǝ ke, Kristo mémfi Usumunyǝ Ninǝ Kenke eto dibu útǝ wǝ ǝsuǝ, bomu Onanto lɛtɛyi wǝ nkǝ,

“Mɔ Ubisaibi fe ni.

Mmi mínle fǝ.”

⁶Usi ɔ́tɛyi lǝ kalebe bamba tsya nkǝ,

“Usumunyǝ feni idu manlo isu manlo

fe Melkisedek eto okle.”

⁷Se Yesu dídi utidi lǝ kasɔ kamfoo, óto ola ku lekpakpalɛlɛ kekleke ku bofa bembembe ku binǝntu útǝ nwǝ loofo wǝ bulǝkǝ ketsyiko ukpǝ kǝmiǝ. Nya se óbokosǝ ǝsuǝ kasɔ nya woate Onanto sikpi esoo, Onanto ánɔ wǝ olatoto. ⁸Ite bǝ uyifo Onanto eto Ubi tsyaa, lǝ wǝ kanyinyǝnyǝ ǝsuǝ ókase kase baabokosǝ ǝsuǝ kasɔ. ⁹Se Onanto díyifo wǝ nwǝ lɛflɔ lǝ kusu saa ǝsuǝ ólosǝǝ, úbǝ úyifo wǝ nwǝ ǝsuǝ mba kenke leetsyue wǝ koto laayɛ kǝnyǝ nkpǝ manlo. ¹⁰Wǝ ni nwǝ Onanto lɛtɛyi útsyǝ nkǝ wuubǝ ofiani Usumunyǝ Ninǝ Kenke fe Melkisedek eto okle.

¹¹Etiki kpǝ kpe bo lǝ kɛnyɛ bo ele bǝ bɔtɛyi itsyi lǝ etiki nyamfo ǝsuǝ fɛ, fɛɛ nnya bɔtɛyi kpe bulǝ, itsyise bɛnlɛ asa kasɔ bɔnɔ mlǝmlǝmlǝ. ¹²Lefe kpǝ ákɛ bǝ eni befiani bateasa, fɛɛ bisi behiã utsyuǝ bǝ lǝ ote mi asa tutɛ itsyi lǝ Onanto eto Ditiki Sɛɛ nǝmǝ ǝsuǝ, lefe nǝ eto lefe ele bǝ bidi lesa nǝ nkpe ale, isi efe bǝ bɛyimi mmintu. ¹³Utsyuǝ saa wǝ ele bǝ ɔyimi mmintuu, esi uyifo ubisambi wǝ lenyitɔ lesa nǝ ni lɛsɛ nye lebua. ¹⁴Lesa nǝ nkpe alee, eyifo lesa nǝ lɛlɛkɛ itǝ mba díkabe ɛyɛ lǝ buyifokǝnyǝ ǝsuǝ, loofo lekpo butsyǝ lǝ nǝ ni lɛsɛ ku lebua eto nti.

¹Nyaso bitǝ lǝ busu sɛtɔ lǝ bobé lǝ asatete ǝsuǝ, lǝ bɔbɔ lǝ asatete tutɛ nnya bófo itsyi lǝ Kristo ǝsuǝ. Nyamfo ni bǝnkǝ bɔtsyi bo akɔɛsi bɔwuninsǝ bɔbɔ lǝ abua ǝsuǝ ku nyifo bo lǝmbǝ kutǝkǝ saa ku lǝ Onanto bofokanɔ ǝsuǝ. ²Báte mi asa lǝ ntuflǝsǝflǝsǝ, anitǝkǝtǝkǝ lǝ betidi ǝsuǝ, lǝ bekpǝnkpǝ eto businkli kataka kǝbǝ nkpǝ ku lǝ lekpokponkpo fɛfɛ ǝsuǝ. ³Bitǝ lǝ busu sɛtɔ! Nya nyamfo ele bǝ buyifo lǝ Onanto atɔnɔ nkǝ busu sɛtɔ nɛ.

⁴Itsyise ntsyǝ yuubǝ bǝ mba léfo bánɔ kɔ nya bésinkli kamaa, besinkliko mǝ baboko bɔtsyikawuninsǝ eto kusu? Kɔɔ bákɛ lǝ Onanto eto diyǝnde ǝsuǝ, bádia kato eto ǝtǝsa babe nya báfo Lɛwɔnɔ Kɛnkɛ eto ǝsuǝale. ⁵Báte lǝ asa nnya díkǝbǝ éfe ǝsuǝ bǝ Onanto eto ditiki alɛkɛ nya bǝkǝnyǝ kutǝkǝ ko nkpe lǝ ǝsuǝale nnya nkpe lǝ lefe nǝ luubǝ ǝsuǝ. ⁶Lǝ nnya ǝsuǝǝ, báni mǝ bofokanɔ lǝ Onanto ǝsuǝ! Esoo, yɔɔkɛ ale bǝ besi bǝnǝ mǝ baboko bɔtsyikawuninsǝ ǝsuǝ, itsyise besi balɛ Onanto eto Ubi bɔsɔ lǝ uyikabie ǝsuǝ, kǝnǝ wǝ kakpe lǝ kofani ǝsuǝ lǝ kawunsiǝ kenke eto ǝnǝmi.

⁷Onanto aakpo atsyɔ kasɔ ka lǝǝnǝ nsɔmintu bo laani kakpo lǝ ke, ka leeke eyi ku sefa nnya laalɛkɛ itǝ mba eso baafo ke kakpe bidikǝ. ⁸Fɛɛ kasɔ ka leeke biyu ku kanyii, kaanlɛkɛ kǝtǝ kulesa, kakpe lǝ bulǝ ǝsuǝ bǝ Onanto ebukudi ke nya wootonsǝ ke ku ute.

⁹Fɛɛ balala, lǝ búdi etiki mmǝ tsyaa, bófo mi bɔnɔ boǝ lǝ mi kutsyǝ alɛɛ, buyi boǝ béfo atsyɔkpokpo sɛɛ nnya loofo mi lǝ nkpǝ. ¹⁰Onanto enni nwǝ lanyɛ lǝ kusutsyɔntsyɔ ǝsuǝ. Weembota keyifo ka bíyifo nye lelabi nǝ bítǝ wǝ lǝ lɛwunsǝko bo bítǝ nya binsi bɛnlɛ butǝ bafokanɔfɔ bamba. ¹¹Bo lelabi itǝ mi ni bǝnkǝ mi utsyuǝ saa lɛ nnya kekleke nko isu ese lǝ kalosǝkɔ, bǝ lesa nǝ bɛnlɛ kusu bobee, le ibǝ itǝ nko. ¹²Boanla boǝ biyifo sɛflɔ, bomu lǝ biyifo asa fe bafokanɔfɔ ba nkpe dibusǝ bǝ lǝ bafo lesa nǝ Onanto dítsyǝ kɛnyɛ útǝ mǝ.

Onanto Eto Kɛnyɛ Ka Útsyǝ Eyifo Sitinti.

¹³Lefe nǝ Onanto dítsyǝ Abraham kɛnyɛɛ, ɔ́tɛyi óse uyi nkǝ, wuuyifo lǝ lesa nǝ ɔ́tɛyi útsyǝ ǝsuǝ. Se kuutsyuǝ lǝmbǝ lɛmɔ onso wǝ esoo, úfi wǝ kosate eto diye úńyǝnsǝ kama. ¹⁴Ɔ́tɛyi nkǝ, “Nlɛ fǝ kɛnyɛ butsyǝ minkǝ, mookpo fǝ atsyɔ, ntǝ fǝ befluflu kpǝ.” ¹⁵Nya se Abraham lɛkɛ dibusǝ, úmuǝ utu ɔlɛ esoo, únyǝ asa nnya kenke Onanto dítsyǝ wǝ kɛnyɛ.

¹⁶Betidi aakpadi asa nnya lɛmɔ enso mǝ kosate eto diye lǝ befi bala etiki nnya bátɛyi, lǝ befi bala etiki nnya tã. ¹⁷Nyamfo eso Onanto lékpadi asa úfi óse wǝ kɛnyɛtsyǝtsyǝ uyi nɛ, bǝ lǝ ekpako mba luubǝ bafo wǝ kɛnyɛtsyǝtsyǝ wuee bǝ wǝ ketsyue amfloma kulefe. ¹⁸Onanto áyɛ lǝ esu ǝnuǝ ǝsuǝ, nya ni kɛnyɛtsyǝtsyǝ ku asakpadikpadi nnya lantsyi kawuninsǝ, nya bembufi batɛyi sidia tsya, nya bomba díkǝnyǝ kabiɔkɔ lǝ wǝ, bonkpe kusubebe lǝ wǝ ǝsuǝ, lǝ bɔkɔbe nnya bɔlɛ kekleke ku kusubebe ko eto kɛnyɛ bǝtsyǝ bo.

¹⁹Kusubebe ko nkpe bo mfo eyifo fe lesa nǝ dímuǝ bo nkpǝ butsyǝ kekleke. Nya kusubebe komfo aakpia kafia ka nti Disumuyo eto sɛtɔ kafe kedufǝ lǝ kedikǝtǝkɔ kǝmiǝ. ²⁰Mfó ǝmǝ Yesu díkatɔ úsu lǝ bo kɛnyɛ fe ɔtɔusu seka. Wǝ díbǝ ofiani fe Usumunyǝ Ninǝ Kenke Melkisedek eto okle isu ese manlo manlo.

Usumunyǝ Melkisedek

¹Melkisedek ǝmfo édi seka lǝ Salem, nya úyifo usumunyǝ útǝ Onanto wǝ ntǝkǝ kato fanlo fanlo. Ɔ́bɔ ótsyako Abraham lǝ lefe nǝ útsyi lema nǝ úsu ɔ́kpɔ nya útǝkǝ baka ena ba létsyilama mfó kato. Melkisedek ǝmfo ésu ótsyako wǝ nya ókpo wǝ atsyɔ. ²Nya Abraham dítǝ wǝ bikǝ bia ɔkɛ utsyiko mfó eto lekpafosile.

Tutɛɛ, diye Melkisedek eto kasɔ ni Kasɛyifoyifo eto Oka. Nnya kama se údi Salem eto Oka esoo, wǝ diye eto kasɔ ni Diyuǝsǝ eto Oka. ³Bánwɔni kulesa bǝtsyǝ itsyi lǝ wǝ anto nye ambe nye lǝ wǝ ketsyikɔ ǝsuǝ nye wǝ leleyi lee lǝ wǝ ukpǝ ǝsuǝ. Uyifo fe Onanto eto Ubi, nya úyifo usumunyǝ ídu lǝ ketsyikokɔ isu kalosǝkɔ.

⁴Bebe kase úyifo utidi wǝ lefo diye. Abraham wǝ ni bo ona wǝ léfo diye éfi bikǝ bia útsyiko kamato eto lekpafosile kulaa tsya útǝ wǝ! ⁵Nya mɔmɔɔ, bǝtsyǝ kɔfi ko dítǝ kusu bǝnkǝ, Lewi eto befluflu di besumunyǝ. Baafo bikǝ bia Israel bebi ba ni mǝ betidi eto lekpafosile lǝ mǝ ɔflɔ, ite bǝ mǝ betidi bamǝ tsya eyifo Abraham eto befluflu tsya fɛ. ⁶Melkisedek ǝmfo ményifo Lewi eto kafo eto ubi, tsyaa ófo lekpafosile utsyiko lǝ Abraham ɔflɔ, wǝǝ ni utidi Onanto dítsyǝ kɛnyɛ nya ókpo wǝ atsyɔ tsya. ⁷Ɔnukualɛ ǝmǝ ni bǝnkǝ, utidi wǝ laakpo atsyɔ kpe kalende oso utidi wǝ bákpo atsyɔ. ⁸Lǝ besumunyǝ eto kutsyǝǝ, mba laafo asa eto lekpafosilee, eyifo besumunyǝ ba lǝǝkpǝ. Lǝ Melkisedek eto kutsyǝǝ, ófo lekpafosile nǝmǝ fe usumunyǝ, fɛɛ wǝ nsi nkpǝ manlo fe kase Awɔnisa Kɛnkɛ eto Kukue nlɛ bɔtɛyi. ⁹Nya boofo bɔtɛyi kulaa tsya boǝ Lewi wǝ laafo lekpafosile nǝmfoo, ɔ́yɛ lǝ Abraham eto kutsyǝ ófo asa eto lekpafosile nǝmfo útǝ Melkisedek. ¹⁰Itsyise lefe nǝ Abraham létsyako Melkisedek nya útǝ wǝ asa eto lekpafosile nǝmfo, bánle tɔ Lewi, usi ɔ́kɛ lǝ wǝ ona eto kɔtɔ kǝmiǝ.

¹¹Lewi bebi eto besumunyǝdidi ǝsuǝ nnya kɔfi lɛyɛ kubǝ itǝ Israel bebi nɛ. Nya lǝ nnya ete Lewi bebi eto besumunyǝdidi lɛflɔɔ, eni yensife bǝ usumunyǝ bamba eto okle si ubǝ, nwǝ lɛbɔ utsyi lǝ Melkisedek eto okle eto kutsyǝ ǝsuǝ, inni lǝ Aaron eto kutsyǝ. ¹²Lǝ besumunyǝdidi eto kutsyǝ átsyi kɔwuninsǝǝ, ele bǝ kɔfi ko nyɛnko ko tsya tsyi kɔwuninsǝ. ¹³Nya Bonamute wǝ ǝsuǝ bátɛyi asa nyamfo betsyikoo, étsyi lekpake bamba nǝ eto utidi kuutsyuǝ dímendi tɔ usumunyǝ unyǝ. ¹⁴Ékpa wuee bǝ bále wǝ lǝ Yuda eto kafo, nya Moses mánkpo kafo kamfo eto diye ókpe lǝ mba luudi besumunyǝ nti.

Usumunyǝ Bamba Wǝ Ni Fe Melkisedek.

¹⁵Etiki nyamfo esi ekpa eso, lǝ lefe nǝ eto lefe usumunyǝ bamba eto okle fe Melkisedek disi úbǝ údufǝ. ¹⁶Utidi ǝmfo ǝbǝ ófiani usumunyǝ wǝ dímanyɛ lǝ utidi eto afi ku bunǝ ǝsuǝ, bǝ ofiani usumunyǝ lǝ diyo nǝ leedi ǝsuǝ, bomu ɛyɛ lǝ ǝsuǝale nnya eto nkpǝ lǝmbǝ kalokɔ kulefe ǝsuǝ. ¹⁷Awɔnisa Kɛnkɛ nyamǝ átɛyi ekpa wuee nkǝ,

“Usumunyǝ feni idu manlo isu manlo

fe Melkisedek eto okle.”

¹⁸Nyamfo lɛ bote nkǝ bǝlǝkǝ kɔfi koko komǝ bǝtsyǝ kutsyǝ itsyise kumbǝ kɛnyɛale nya koǝńyǝ kutǝ kulesa. ¹⁹Itsyise Moses eto kɔfi mamfo kulesa nǝ lɛflɔ buyifo. Nya mɔmɔɔ, bǝtǝ bo kusubebe fɔfɔ ko lɛlɛkɛ konso, nya bɔɔyɛ lǝ ko ǝsuǝ bɔfi Onanto enso.

²⁰Ɛwunsǝǝ, Onanto aká ntamu ɔ́wunsǝ lǝ usumunyǝdidi fɔfɔ ǝmfo ǝsuǝ. Kɔɔ Onanto mánka ntamu ɔ́wunsǝ lǝ usumunyǝdidi ǝsuǝ. ²¹Fɛɛ se Yesu léfiani usumunyǝǝ, Onanto áka ntamu útǝ wǝ ɔ́tɛyi nkǝ,

“Bonamute áka ntamu,

nya wǝmbɔtsyi wǝ kɛnyɛ ɔwuninsǝ lǝ nnya ǝsuǝ nkǝ, ‘Usumunyǝ feni idu manlo isu manlo.’ ”

²²Nyamfo ǝtǝ bǝ Yesu ǝbǝ ófiani nwǝ ńyǝ kɛnyɛklekle kamfo kama, ka lɛlɛkɛ kanso.

²³Bɔtsyi kawuninsǝ bamba tsya ǝbǝ. Besumunyǝ ba kɔ éfui tinti, nya bánkaklɛ lǝ mǝ keyifo ǝsuǝ. Itsyise békekpǝ. ²⁴Fɛɛ se Yesu, wǝ nsi nkpǝ itǝ manlo manlo esoo, wǝ keyifo fe usumunyǝ amfloma ani kesu utidiamba ɔflɔ. ²⁵Lǝ nyasoo, woafo mba lǝǝbǝ Onanto ɔflɔ lǝ nkpǝ lefe saa ɛyɛ lǝ wǝ kosate ǝsuǝ, itsyise usi nkpǝ lefe saa ɔlɛ bofokǝtǝ mǝ lǝ Onanto ɔflɔ.

²⁶Lǝ nyamfo esoo, ele bǝ Usumunyǝ Ninǝ fe Yesu kɛ bo. Nwǝ diyifo kɛnkɛ, nya kabua saa lǝmbǝ wǝ lǝ ǝsuǝ, nya woambiasǝ ǝsuǝ, wǝ bǝlǝkǝ lete lǝ babuayifo nti, wǝ bábesǝ kato fanlofanlofanlo. ²⁷Yanhiã kulaa bǝ Usumunyǝ Ninǝ Kenke ɛmfo eto oklee, kǝtǝ Onanto kedi lefe saa, tutɛ lǝ wǝ kosate eto disi esoo, nnya kama lǝ betidi bamba eto disi eso, fe kase besumunyǝ ninǝ kenke fɛfɛ leeyifo. Uyifo nyamfo diyifo lɛwɛ itǝ lefe nǝ kenke lǝ lefe nǝ úfi wǝ ǝsuǝ útǝ. ²⁸Lǝ ɔnukualɛ ǝsuǝ, Moses eto kɔfi komǝ ǝtsyǝ betidinini ba dímamflɔɔ, besumunyǝ ninǝ kplɛ, fɛɛ Onanto eto ntamu bo óka lǝ Moses eto kɔfi komǝ kamaa, ǝtsyǝ wǝ Ubi Usumunyǝ Ninǝ Kenke wǝ úyifo lɛflɔ itǝ lefe nǝ kenke.

Yesu Ni Bo Usumunyǝ Ninǝ Kenke.

¹Nnya kenke bɔnlɛ bɔtɛyi ete ni bǝnkǝ, bokpe Usumunyǝ Ninǝ Kenke ǝmfo eto okle, wǝ nsi lǝ Ɔkplɛnyǝ Kenke eto lekankpomɛ eto kodiani lǝ kato. ²Usumunyǝ Ninǝ Kenke ǝmfo eesumu lǝ kakɛnkɛkɔ ka ni Disumuyo tinti ka Bonamute díyifo, inni betidi díyifo.

³Bǝtsyǝ Usumunyǝ Ninǝ Kenke saa bǝ lǝ ufi ǝtǝsa saa ku bebuki utǝ Onanto. Nyaso ele bǝ bo usumunyǝ tsya kɛ lesaatsyuǝ nǝ uufi utǝ kedi. ⁴Nya lǝ kasɔ mfo ete onkpee, eni wǝ ǝmbuyifo usumunyǝ, itsyise besumunyǝ ba lǝǝtǝ kedi lǝ Yudafɔ eto kɔfi eto kusuu, fe bakpe koko. ⁵Keyifo ka beeyifo fe besumunyǝ mfo eyifo nka nte beeyifo lǝ Onanto eto kato eto koyo ete.

Nko esoo, lǝ lefe nǝ Moses nkǝ woato disumunyoo, Onanto lɛtɛyi wǝ nkǝ, “Be fǝnkǝ eyifo ni lekateko ku ditsyǝbi nǝ báte fǝ lǝ kɔtini ǝsuǝ.” ⁶Fɛɛ mɔmɔɔ, bǝtǝ Yesu kesumu eto keyifo ka ntǝkǝ mǝ kale kato, fe kase kɛnyɛklekle ka útsyue lǝ wǝ betidi ku Onanto eto ntii, alɛkɛ kaso nka kɔ, itsyise wǝ kɛnyɛtsyǝtsyǝ eto asa alɛkɛ eso asa nnya nkpe lǝ nka kɔ.

⁷Lǝ nya ete kulesa dimambia lǝ kɛnyɛklekle tutɛ kamǝ ǝsuǝ, eni yensife itǝ kǝnuǝfǝ kamfo. ⁸Fɛɛ Onanto ǝnyǝ kabua lǝ wǝ betidi ǝsuǝ se ɔ́tɛyi nkǝ,

“Lefe lɛ bubǝ se mɔ, fǝ Onamutee,

lookle kɛnyɛ fɔfɔ

ku Israel eto betidi

ku Yuda eto betidi.

⁹Kɛnyɛklekle kamfo embutsyǝ fe nka

mínkle ku mǝ bana mǝ,

lǝ lefe nǝ mínkɔbe mǝ minlɛ lǝ kɔni

nya mínkpa mǝ mímbɔnko lǝ Egipte eto kasɔ.

Itsyise béntsyue mɔ kɛnyɛklekle kamǝ koto.

Nyaso míntsyi kama mínkpe mǝ nɛ.

Mmǝ Bonamute nlɛ bɔtɛyi nɛ!

¹⁰Mɔmɔɔ, nyǝ kɛnyɛ ka mookle ku Israel eto betidi

lǝ lefe nǝ lǝǝbǝ mǝ.

Muufi mɔ kɔfi nkpe mǝ lǝ mǝ nsusu kǝmiǝ.

Nya mɔɔwɔni ko nkpe lǝ mǝ ketu kǝmiǝ.

Muuyifo mǝ Onanto,

nya mǝǝ tsya ebuyifo mɔ betidi.

¹¹Nya mǝ kuutsyuǝ ensi embote wǝ utsyuǝ kulesa

nye wǝ ɔyimitsyuǝ tɛyi nkǝ bete Bonamute ǝmǝ.

Itsyise mǝ utsyuǝ saa ebote mɛ

idu lǝ dikpefi isu ese lǝ uninǝ ǝsuǝ.

¹²Nya muufi mǝ abua nnya kenke béyifo ntsyɛ mǝ.

Nya mensiembokloma mǝ abua nya béyifo kulefe.”

¹³Se Onanto lídi etiki utsyiko lǝ kɛnyɛklekle fɔfɔ ǝsuǝǝ, ete kasɔ bǝ nka kɔ eyifo kakoko. Nya lesa saa nǝ lefiani lekoko nǝ lesibǝ kutǝkǝǝ, ǝmbɔklɛ fɛ dionya kenke.

Kase Biusumu Onanto Lǝ Kasɔ Ku Lǝ Onanto Eto Oto Kato.

¹Kɛnyɛklekle tutɛ eto afi ákɛ kesumu eto afi, nya béyifo kasɔ mfo eto Disumuyo tsya bǝtsyǝ. ²Béyifo Kafia eto Mpatampa Kɛnkɛ nya bésie ni lǝ akpa ǝnuǝ ku kafia. Baakpo sɛtɔ eto lekpa bǝ Kakɛnkɛkɔ. Mfó bǝńyǝnsǝ okandiɛ eto keyi ku kesumu eto ɔpunu wǝ ǝsuǝ bǝǝtǝkǝ abolo nnya beefi kǝtǝ Onanto kedi. ³Lǝ Disumuyo eto kaka befi kafia bala eto kamaa, ni kaka baakpo Kakɛnkɛkɔ Kenke.⁴Mfó béfi sika sia eto ɔpunu wǝ ǝsuǝ baatonsǝ lifui ku kɛnyɛklekle eto lelaka nǝ befi sika sia beti batsyilama bǝtsyǝ. Nya kɛnyɛklekle eto lelaka nǝmǝ kafoo, bákpe asa nnya ni sika sia eto okase utsyuǝ wǝ eto kafo bákpe didisa nǝ baakpo mana, ku Aaron eto uyilɛlɛ wǝ díkǝ ku afanto, ku aba blɛkɛtɛ ǝnuǝ nya ǝsuǝ báwɔni Onanto eto afi bǝtǝkǝ. ⁵Lǝ lelaka nǝmǝ eto kato báwe Onanto eto asa nnya nkpe nkpǝ baakpo bǝ Kerubi eto ditsyǝbi bǝtǝkǝ ba nlɛ Onanto eto diyǝnde bulǝkǝ kate. Mǝ mbamba eto koyo éti kaka bǝǝnyǝ betidi kaminsǝ kefi mǝ abua katsyɛ mǝ. Fɛɛ boǝmbofo etiki budi mfo kǝlǝkǝ asa nyamfo kenke kasɔ kate mɔmɔ.

⁶Nko ini bétsyue asa nyamfo bǝtsyǝ mfó nɛ. Besumunyǝ bamǝ eedufǝ Disumuyo tutɛ kamǝ diyi saa kesu keyifo mǝ kesumuyifo mfó. ⁷Kǝmiǝ eto Disumuyo nǝmǝǝ, Usumunyǝ Ninǝ Kenke hã nkpe kusu weedufǝ mfó lɛlɛ sɔni hã. Nya lǝ ɔtɔɔ, ele bǝ ufi ubuki eto kɔtɔ usuko mfó usu utǝ Onanto kedi lǝ wǝ ku kusǝ komǝ kenke eto betidi eto abua nnya béyifo lǝ mǝ mante mante ǝsuǝ eto disi. ⁸Ɛyɛ lǝ nyamfo ǝsuǝ, Lɛwɔnɔ Kɛnkɛ ǝlǝkǝ óte nkǝ se sɛtɔ eto Disumuyo nǝmǝ nsi nte koo, yǝntǝ kusu bǝ kuutsyuǝ saa kpia mfó ofe udufǝ lǝ Kakɛnkɛkɔ Kenke kǝmiǝ. ⁹Nyamfo eyifo asabulǝkǝ kate ǝtsyuǝ itǝ utidi taa mmi, lǝ mmi eto kesumu ǝsuǝ. Ite bǝ bǝǝtǝ ǝtǝsa ku keditǝtǝ eto asa nyamfo lǝ ketsyue kamfo eto kusu ǝsuǝ tsyaa, nyamfo ǝntǝ bǝ nwǝ nlɛ Onanto kesumu butǝ eto lɛkɔɛsi laakpa kenke. ¹⁰Itsyise nyamfo kenke nyǝ lǝ budi ku bunǝ ku akpa eto etsyuesa kpǝ kpǝ, nnya lɛyɛ lǝ utidi eto ǝsuǝ bokpasǝ eto esu ǝsuǝ ete. Béyifo etsyuesa nyamfo kenke itǝ utidi isu ese lefe nǝ Onanto luubǝ ɔlɔ lesa saa utsyǝ ɛyɛ lǝ kusu fɔfɔ ǝsuǝ.

Kristo Eto Kɔtɔ Ǝǝlǝkǝ Abuayifoyifo Kalosǝ Lǝ Betidi Ǝsuǝ!

¹¹Fɛɛ Kristo ebubǝ koko fe Usumunyǝ Ninǝ Kenke itǝ asa sɛɛ nya díkǝbǝ. Uyifo usumunyǝ lǝ Kafia eto Mpatampa nǝ lɛmɔ, nya lɛflɔ lenso Kafia eto Mpatampa nǝ kɔ. Dienyifo dibu nǝ utidinini dífi wǝ ani uyifo eto kasɔ ni bǝnkǝ dienyifo kasɔ kamfo eto asayifoyifo. ¹²Lefe nǝ Kristo dídufǝ disumuyo nǝ mǝǝ, ɔ́yɛ lǝ ni ofe lɔni kplo, údufǝ lǝ kaka ni Kakɛnkɛkɔ Kenke. Nya wémfi bate nye banantsyui eto kɔtɔ uyifo fe keditǝtǝ, bomu wǝ kosate eto kɔtɔ itǝ lefe nǝ ta! Nya úyifo nko bǝ lǝ Onanto lǝ utǝ bo nkpǝ manlo.

¹³Weefi bate ku banantsyui eto kɔtɔ ku onantsyui eto lɛkpɔ nǝ baatonsǝ eto ntɔ beefi kese lǝ nwǝ eto ǝsuǝ dimanle itǝ lǝ wǝ ǝsuǝ lǝ ele, iyifo wǝ kenkɛ. ¹⁴Lǝ nyamfo eyifo sitinti, nyalɛ ntsyǝ yuutsyǝ bǝ Kristo eto kɔtɔ bomu embokpasǝ bo esuǝ eso nko! Ɛyɛ lǝ wǝ Lɛwɔnɔ nǝ nsi nkpǝ lefe saa ǝsuǝǝ, úfi wǝ ǝsuǝ útǝ fe keditǝtǝ ka lɛflɔ utǝ Onanto. Wǝ kɔtɔ ebuflǝsǝ bo akɔɛsi itsyiko lǝ akpa bimba eto eyifosa nnya lǝmbǝ kutǝkǝ saa bǝ lǝ busumu Onanto wǝ nsi nkpǝ lefe saa.

¹⁵Nyaso Kristo ni nwǝ ɛyɛ lǝ kɛnyɛklekle fɔfɔ kamǝ ǝsuǝǝ, dínyǝ lǝ bo kɛnyɛ ófo útǝ bo, bǝ lǝ betidi ba Onanto lékpadi lǝ bǝnyǝ nkpǝ manlo eto kedikɔ ka Onanto dítsyǝ kɛnyɛ útsyǝ. Nyamfo ebofo bubǝ kǝtǝ itsyise utidi ɔni wǝ díkpee, dílǝkǝ abuayifoyifo nnya lɛkɛ lǝ kɛnyɛklekle koko eto lefe úwui, bǝnyǝ bufikatsyɛ.

¹⁶Lǝ kase yǝǝbǝǝ, lǝ utidi mǝnkpǝǝ, beensensǝ wǝ kɛnyɛtsyǝtsyǝ eto kukue eto bikǝ. ¹⁷Lǝ utidi wǝ dítsyǝ kɛnyɛ si usi nkpǝǝ, bǝmbofo utidi ǝmǝ eto bike busǝnsǝ. ¹⁸Lǝ nnya eso béfi kɔtɔ bákpe ǝsuǝale kɛnyɛklekle koko kamǝ ǝsuǝ nɛ.

¹⁹Tutɛɛ, Moses ábe letsya úlǝkǝ aklesa nnya nkpe lǝ kɔfi komǝ óte kusǝ komǝ kenke eto betidi. Nya úfi bate ku banatsyui eto kɔtɔ otsyakasǝ ku ntu ku basamu eto bisǝ sia ku afantosi nnya laanyi fififi fɛ úfi úse lǝ kɔfi eto kukue ku betidi bamǝ lǝ ǝsuǝ. ²⁰Nya ɔ́tɛyi nkǝ, “Nyamfo ni kɔtɔ ko Onanto dífi ose kɔfi ko utǝ bo uyi nkǝ butsyue ko koto.” ²¹Nko ke Moses dífi kɔtɔ komǝ úsǝ lǝ Kafia eto Mpatampa nǝmǝ ku asa nnya kenke béfi béyifo kesumu kamǝ nɛ. ²²Sitinti lǝ kɔfi komǝ ǝsuǝ kɔtɔ beefi kǝflǝ lesa saa ǝsuǝ. Nya lǝ bankpo kɔtɔɔ kasɔɔ, beemfi lebua katsyɛ.

Kristo Eto Ǝsuǝ Nya Úfi Útǝ Te Fe Kedi Ka Lǝǝflǝ Bo Abua Kewui.

²³Ińyǝ itǝ bǝ béyifo nkomǝ eto akpa nyamfo lǝ befi bakpasǝ asa nnya lele kato eto ale ǝsuǝ. Fɛɛ lǝ asa nnya ni kato eto ale eto kutsyǝ, befi keditǝtǝ eto asa nnya lekpa ǝsuǝ enso kasɔ mfo eto alee, bákpasǝ nnya ǝsuǝ. ²⁴Itsyise Kristo mensu kakɛnkɛkɔ ka befi kawunsiǝ kamfo eto betidi eto ani beyifo, ka ni kakɛnkɛkɔ kato eto okle ete. Bomu úsu kato kosate, kaka woala kǝńyǝ kǝtǝ bo lǝ Onanto eto ǝnǝmi. ²⁵Kristo ménsu mfó nkǝ lǝ ufi wǝ ǝsuǝ utǝ kedi sesia sesia lǝ bo disi, fe kase Yudafɔ eto Usumunyǝ Ninǝ Kenke leedufǝ Kakɛnkɛkɔ Kenke mfó keyifo lɛlɛ saa lɛlɛ ku ubuki eto kɔtɔ, ko lenni wǝ kosate eto kole. ²⁶Lǝ nko ini, eni yoofe bǝ ufi wǝ ǝsuǝ utǝ, unyǝ kanyi sesia sesia idu lǝ kawunsiǝ eto ketsyikokɔ ke. Bomu kase inte mɔmɔ, Kristo ǝbǝ lɔni kplo lǝ kawunsiǝ eto kalokɔ eto eyi nyamfo lǝ ufi wǝ kosate eto ǝsuǝ utǝ fe kedi lǝ ulǝkǝ lebua uwui, lǝ bo disi.

²⁷Onanto dítsyǝ nnya nkǝ utidi kpǝ sɔni kplo, nya lǝ nnya kamaa, bakponko wǝ lekpo. ²⁸Nko ke ini Kristo dífi wǝ ǝsuǝ útǝ fe kedi sɔni kplo, itǝ betidi kpǝ eto bofo ketsyiko lǝ abua ǝsuǝ. Wuusinkli ubǝ dinuǝfǝ, insini lǝ lebua eso, bomu bǝ lǝ ubǝ ulǝkǝ mba nsi banlɛ wǝ kusu bobe itǝ nkpǝ manlo.

Kristo Éfi Wǝ Ǝsuǝ Útǝ Fe Kedi Sɔni Kplo Lǝ Betidi Eto Disi.

¹Yudafɔ eto kɔfi komǝǝ, asa sɛɛ nnya nlɛ bubǝ eto koyo ete kuni, inni asɛ nnya kosate lǝǝbǝ bubǝ ini. Nyaso kɔfi komǝ embofo bɔyɛ lǝ keditǝtǝ ka beeyifo lɛlɛ saa lɛlɛ keyifo betidi ba laanyi kafi Onantoo, baflɔ balo kulefe. ²Lǝ nnya ete boofo betidi ba nlɛ Onanto busumu buyifo kɛnkɛnkɛ babɔ lǝ mǝ abua ǝsuǝǝ, eni mǝ ketu ensiembolo mǝ dikpi bio, nya keditǝtǝ saa ebolo. ³Fɛɛ keditǝtǝ lɛlɛ saa lɛlɛ nyamfo aaklomasǝ betidi mǝ abuayifoyifo hã te. ⁴Itsyise bate ku banantsyui eto kɔtɔ embofo abua buflǝ kewui lǝ utidi ǝsuǝ.

⁵Lǝ nyamfo eso fɛ Kristo luubǝ kawunsiǝ kamfoo, ɔ́tɛyi Onanto nkǝ,

“Ámanhiã keditǝtǝ ku asatǝtǝ,

bomu éyifo ǝsuǝ eto sinǝ ǝtǝ mɛ.

⁶Bebuki botonsǝ kǝtǝ kedi ku lebuayifoyifo eto asatǝtǝ lǝ kedikǝtǝkɔ eto leba ǝsuǝǝ,

aankpe fǝ disuǝyuǝ.

⁷Nya míntɛyi minkǝ, ‘Nyǝ mɔɔ, mbǝ miǝ meyifo fǝ lelabi

fe kase bawɔni lǝ mɛ ǝsuǝ lǝ kɔfi eto Kukue kǝmiǝ.’ ”

⁸Tutɛɛ, ɔ́tɛyi nkǝ, “Ámanhiã keditǝtǝ ku asatǝtǝ, bebuki botonsǝ kǝtǝ kedi ku lebuayifoyifo eto keditǝtǝ.” Nya yǝnyuǝsǝfǝ kafo tsya, ite bǝ kɔfi komǝ áte nkǝ beyifo nko fɛ. ⁹Mfó ɔ́tɛyi nkǝ, “Nyǝ mɔ mfo. Mbǝ miǝ meeyifo fǝ lelabi.” Ɛyɛ lǝ nyamfo ǝsuǝ esoo, Onanto ǝlǝkǝ keditǝtǝ eto asa nnya kɔ útsyǝ kutsyǝ. Nya úfi Kristo eto keditǝtǝ útsyǝ lǝ nnya kɛnyɛ. ¹⁰Se Yesu Kristo díyifo lǝ Onanto eto lelabi ǝsuǝ ɛyɛ lǝ kase úfi wǝ ǝsuǝ eto sinǝ útǝ sɔni kplo itǝ afe nnya ta esoo, Onanto ákpasǝ bo ǝsuǝ lǝ nnya eso.

¹¹Diyi saa, Yudafɔ eto usumunyǝ ǝńyǝ lǝ Onanto eto Disumuyo. We efi ǝtǝsa nyamǝ ke kǝtǝ kedi lefe saa, ite bǝ yembofo abua nyamǝ buflǝ kewui tsya. ¹²Fɛɛ se Kristo díbǝ útǝ kedi kani kamǝ hã lǝ abua eto disi itǝ lefe nǝ kenke ólosǝǝ, úsu úsiǝ lǝ Onanto eto kodiani. ¹³Mfó unsi mɔmɔ idu isu ese lefe nǝ Onanto luufi wǝ balo okpe lǝ wǝ nkpakalɔ. ¹⁴Kristo efi wǝ ǝsuǝ útǝ fe kedi ditǝ lɛwɛ, nya úyifo mba eto ǝsuǝ bákpasǝ lɛflɔ beyifo kɛnkɛ isu manlo.

¹⁵Nyaa, Lɛwɔnɔ Kɛnkɛ ǝlǝkǝ nya ote wee nkǝ,

¹⁶“Nyǝ kɛnyɛ ka mookle ku mǝ lǝ eyi nnya lǝǝbǝ mmǝ kama.

Muufi mɔ kɔfi nkpe lǝ mǝ ketu kǝmiǝ.

Nya mɔɔwɔni nya lǝ mǝ nsusu kǝmiǝ.”

¹⁷Nya usi ɔ́tɛyi nkǝ,

“Mensi embokloma mǝ abua ku mǝ eyifosa bua saa.”

¹⁸Lǝ befi asa nyamfo bátsyɛɛ, yensiembofe bǝ, besi bǝtǝ kedi lǝ abua eto disi.

¹⁹Lǝ nyamfo esoo, mɔ bayimi, bokpe kusu buedufǝ Kakɛnkɛkɔ Kenke kamǝ ɛyɛ lǝ Yesu eto ukpǝ wǝ úkpǝ eso. ²⁰Itsyise ɔ́sini kusu fɔfɔ utǝ bo, ko ni nkpǝ eto kusu ɛyɛ lǝ kafia ka béti lǝ Kakɛnkɛkɔ Kenke eto kɛnyɛ mfó ka ńyǝ itǝ wǝ kosate eto ǝsuǝ eto sinǝ. ²¹Bokpe Usumunyǝ Kplɛ wǝ nsi lǝ Onanto eto diyo nǝmǝ eto kɛnyɛ. ²²Nyaso bitǝ lǝ bɔnyi bɔfi Onanto ku sitinti eto utu, ku bofokanɔ kekleke ku akɔɛsi nnya bǝflǝ éle kɛnkɛnkɛ bǝlǝkǝ betsyiko lǝ abua ǝsuǝ ku ntu bo keni saa lǝmbǝ bǝ bo akɔɛsi ensi aalo bo dikpi. ²³Bitǝ lǝ bɔlɛ nnya bofo bɔnɔ, bɔnlɛ kusu bobe kǝtǝ nya boǝlǝkǝ katee lǝ kɔni kekleke, itsyise Onanto wǝ ditsyǝ bo kɛnyɛɛ, eyifo ɔnukualɛnyǝ. ²⁴Bitǝ bukebu disi lǝ bukakpe bo bǝtsyuǝ otsyekle lǝ lɛyimila ku nkpǝ sɛɛ busiǝ ku bǝtsyuǝ ǝsuǝ. ²⁵Biǝntǝ lǝ bɔyɛ disikakpekɔ busu fe kase bo nti eto bǝtsyuǝ leeyifo seka. Bomu bitǝ lǝ bokpe bǝtsyuǝ nkɛale enso, se binyi biǝ Bonamute eto Diyi nǝmǝ fe lɛlɛ bɔnyi kafi.

²⁶Fɛɛ lǝ buyi ɔnukualɛ ǝmǝ, fɛ busi butsyǝ bɔnlɛ asa bua buyifo, nyalɛ keditǝtǝ saa ensibǝ ka dulǝkǝ abua iwui itǝ bunyǝ bufikatsyɛ bio. ²⁷Bomu nya lesa saa nǝ luubu ni bǝ Onanto ookponko bo lekpo, nya wɔɔtsylɔsǝ mba létaka bǝńyǝ lǝ wǝ ǝsuǝ lǝ ditefɛnku nǝ nkpe kɛnyɛ ale! ²⁸Utsyuǝ saa ke dímentsyue Moses eto kɔfi kotoo, bolo baalo wǝ kaminsǝ mǝnyǝmǝnyǝ, lǝ bakponko wǝ lekpo balo wǝ dikpi lǝ badansiɛ inuǝ nye itsyǝ eto kɛnyɛ kama.

²⁹Nya ntsyǝ yuutsyǝ itǝ nwǝ laani Onanto eto Ubi, nwǝ lǝǝntǝ dibu Onanto eto kɛnyɛklekle eto kɔtɔ ko díflǝ wǝ ǝsuǝ nya úlǝkǝ wǝ utsyiko lǝ lebua ǝsuǝ nya waaka lefonǝ eto Lɛwɔnɔ? Ntsyǝ fɛ kotonǝnǝ kekleke kutsyuǝ eto okle lembunyǝ kutǝ wǝ! ³⁰Itsyise buyi nwǝ lɛtɛyi nkǝ, “Muutsyǝ nnya kɛnyɛ. Mɔɔ, maatisǝ oko.” Nya owoe tsya lɛtɛyi nkǝ, “Bonamute ebokponko wǝ betidi lekpo.” ³¹Mbɔbɔɛ mǝǝtǝ nwǝ luudufǝ lǝ Onanto wǝ nkpe nkpe eto lefonyi ǝsuǝ.

³²Bekloma kase ítsyǝ lǝ lefe nǝ lefe mmǝ. Lǝ lefe nǝ Onanto eto diyǝnde díkabɔ lékpo mi lǝ ǝsuǝ, nya bulǝ kpǝ dítu mi, fɛɛ bulǝ bomǝ mǝntǝkǝ mi kato. ³³Lefe ditsyuǝ, baaka mi kulaa tsya lǝ betidi nti nya beeyifo mi disiale, nya lǝ afe bamba ǝtsyuǝ tsyaa, beebu mi kakpe lǝ mba ǝsuǝ banlɛ asa nyamfo buyifo kakpe eto nti. ³⁴Bińyǝ kanyi ku mba befi bakpe lǝ aba eto diyo. Nya lefe nǝ bǝmuǝ mi balɛ mi bikǝ bafo lǝ ǝsuǝale ǝsuǝ tsyaa, yǝnlǝ mi itsyise bete biǝ bisi bekpe bikǝ bia lefo koya enso mi, bia lembobia kulefe.

³⁵Lǝ nyaso biǝntǝ lǝ elo mi ani itsyise yuunǝ kutǝkǝ kpǝ eboko mi. ³⁶Ele bǝ bekpe dibusǝ lǝ biyifo Onanto eto lelabi lǝ befo lesa nǝ útsyǝ kɛnyɛ utsyǝ mi. ³⁷Itsyise fe kase Awɔnisa Kɛnkɛ eto Kukue lɛtɛyii,

“Ibu sɛkɛɛ, lǝ nwǝ nlɛ bubǝ lǝ ubǝ udufǝ, wǝǝmbofe kama ku bubǝ.

³⁸Mɔ utidi wǝ ni ɔsɛɛ, ebunyǝ bofokanɔ usiǝ nkpǝ.

Fɛɛ lǝ mǝ utsyuǝ etsyi kama okpe mɛɛ,

membunyǝ disuǝyuǝ lǝ wǝ ǝsuǝ.”

³⁹Fɛɛ boo, bunni betidi ba leetsyi kama kakpe bo bofakanɔ bǝ lǝ bonya. Bomu boo, bófo bɔ́nɔ, nya Onanto léfo bo.

Lesa Nǝ Ni Bofokanɔ.

¹Lǝ akpe bofokanɔɔ, eté bǝ akpe kusubebe kekleke itǝ lesa nǝ fanlɛ kusu bobe kǝtǝ. Ite bǝ anlɛ ni bunyǝ tsya. ²Bofokanɔ dítǝ Onanto dínyǝ disuǝyuǝ lǝ bo bana ǝsuǝ lǝ kokolefe.

³Ɛyɛ lǝ bofokanɔ ǝsuǝǝ, nya bɔ́nɔ kasɔ boǝ Onanto éyifo kawunsiǝ kenke lǝ wǝ ditiki ǝsuǝ. Nya úyifo nnya utsyiko lǝ lesa nǝ dimankɛ bǝnyǝ kɔ ǝsuǝ.

⁴Bofokanɔ ǝsuǝ ɛyɛ nya Abel dífi asa nnya lɛlɛkɛ enso Kain eto ale útǝ Onanto kedi eso Onanto dínyǝ wǝ nwǝ leeyifo kasɛɛ. Onanto áfo wǝ ǝtǝsa nnya ɔ́yɛ lǝ nnya ǝsuǝ údi wǝ kɛnyɛ nkǝ uyifo ɔsɛɛ. Ite bǝ Abel ékpe tsyaa, wǝ bofokanɔ si bɔlɛ etiki budi ketsyiko lǝ wǝ ǝsuǝ.

⁵Ɛyɛ lǝ Enok eto bofokanɔ esoo, weenkpe. Onanto étsyi wǝ úsuko kato. Kuutsyuǝ saa mǝnnyǝ wǝ, itsyise Onanto étsyi wǝ usuko kato. Awɔnisa Kɛnkɛ eto Kukue lɛ bɔtɛyi nkǝ, fɛ útsyi Enok úsuko katoo, wǝ asa édufǝ Onanto ǝnǝ. ⁶Kuutsyuǝ eto etiki embudufǝ Onanto ǝnǝ, lenni ɛyɛ lǝ wǝ bofokanɔ ǝsuǝ. Itsyise utsyuǝ saa wǝ ke lǝǝbǝ Onanto ɔflɔ, ele bǝ ofo ɔnɔ nkǝ Onanto kpe nya wǝǝtǝ mba laabɛbɛ wǝ lǝǝnyǝ wǝ.

⁷Ɛyɛ lǝ bofokanɔ ǝsuǝ nnya Onanto díkǝ Noa ato kekleke itsyi lǝ asa nnya lǝǝbǝ bubǝ nya wǝǝnnyǝ tɔ unyǝ ǝsuǝ. Útsyue Onanto koto nya ówe lelaka eto ɔklɔ nǝ léfo wǝ ku wǝ diyo eto betidi lǝ nkpǝ. Ɛyɛ lǝ wǝ bofokanɔ bomfo ǝsuǝ Noa ǝlǝkǝ óte nkǝ kawunsiǝ eto betidi kenke édi dikpi. Nya ófiani ɔsɛɛ lǝ Onanto eto ǝnǝmi nya únyǝ kedikɔ lǝ wǝ ɔflɔ.

⁸Ɛyɛ lǝ bofokanɔ ǝsuǝ nnya Abraham lɛnɔ Onanto eto bokpadi bo ókpadi wǝ nkǝ usu kasɔ ka Onanto dítsyǝ kɛnyɛ útsyǝ nkǝ wuufi utǝ wǝ fe wǝ kedikɔ ǝsuǝ. Údu lǝ wǝ kasɔ úsu kaka wánte kulaa tsya. ⁹Ɛyɛ lǝ bofokanɔ ǝsuǝǝ, úsiǝ fe ɔfɔ lǝ kasɔ ka Onanto dítsyǝ wǝ kɛnyɛ. Úsiǝ lǝ ebu fe Isak ku Yakob ba léfo kɛnyɛtsyǝtsyǝ itsyi lǝ Onanto ɔflɔ. ¹⁰Abraham ákabe kusu itǝ umǝnkplɛ wǝ báto bǝńyǝnsǝ wǝ ni nwǝ Onanto kosate léto.

¹¹Ɛyɛ lǝ bofokanɔ ǝsuǝǝ, ite bǝ Abraham wǝ díkabe ófee, léfiani anto nya Sara wǝ díkabe ofiani uninǝsia tsya lɛlɛ kafo, Onanto ǝtǝ nkǝ Abraham fiani ubianto itsyise uyi nkǝ Onanto wǝ dítsyǝ kɛnyɛ útsyǝ, éyifo lǝ wǝ kɛnyɛ ǝsuǝ. ¹²Ite bǝ Abraham obobe uku tsya, ɛyɛ lǝ utidi ɔni ǝmfo ǝsuǝ, nya befluflu kpǝ lɛbɔ betsyi fe befandebi nkpe kato, fe kase lekpa eto kɔwunumi ko bǝmbofo lǝ lekpa kɛnyɛ.

¹³Betidi bamfo kenke ǝsiǝ nkpǝ lǝ bofokanɔ ǝsuǝ isu ese lefe nǝ bǝkpǝ. Bámfo asa nnya Onanto dítsyǝ kɛnyɛ útsyǝ. Fɛɛ bǝnyǝ nya famfamfamfa nya bǝtǝ nya edufǝ nya batɛyi bǝnkǝ sitinti bafɔ ku mba nyɛ kusu ete beni lǝ kasɔ kamfo ǝsuǝ. ¹⁴Nya betidi ba latɛyi asa nyamfoo, ǝǝlǝkǝ kate wuee bǝnkǝ balɛ kusu bobe kǝtǝ mǝ kosate eto kǝmǝnsɔ. ¹⁵Lǝ kasɔ ka ǝsuǝ bétu ete banlɛ bɔbɛbɛɛ, eni bátafo businkli kesu mfó. ¹⁶Bomuu, bákabe kusu itǝ kasɔ ka lɛlɛkɛ kanso nkamfó. Ke ni Onanto eto kato. Nyamfo eso yaanlɛ Onanto kofani lǝ bakpadi wǝ bǝ mǝ Onanto nɛ, itsyise ɔ́lɔ umǝnkplɛ utsyuǝ útsyǝ itǝ mǝ.

¹⁷Ɛyɛ lǝ Abraham eto bofokanɔ eso lǝ lefe nǝ Onanto léto wǝ óbee, ite bǝ Abraham ni nwǝ Onanto dítsyǝ kɛnyɛ utsyǝ tsyaa, ɔ́tɔnɔ lǝ ufi wǝ ubi ɔni kplo Isak utǝ Onanto kedi. ¹⁸Ite bǝ Onanto ébɔtɛyi wǝ nkǝ, “Ɛyɛ lǝ fǝ ubi Isak ǝsuǝ nya fuunyǝ befluflu kpǝ ba míntɛyi míntsyǝ.” ¹⁹Abraham éfi nnya nkǝ, Onanto ebofo wǝ ubi Isak botakasǝ ketsyiko ɔkɔmǝ kaboko nkpǝ. Nya fe kase íbǝǝ, Abraham ésinkli ófo Isak fe ɔkɔmǝ útsyi úbǝ.

²⁰Ɛyɛ lǝ bofokanɔ ǝsuǝ nnya Isak lékpo Yakob ku Esau atsyɔ itǝ sɛtɔ sia nlɛ bubǝ.

²¹Ɛyɛ lǝ bofokanɔ ǝsuǝ nya Yakob le lefe nǝ ɔnlɛ bukpǝǝ, ókpo Yosef eto bebi atsyɔ, nya ɔ́tɛsǝ Onanto se úkpǝsǝ lǝ uyi wǝ waalɛ ǝsuǝ.

²²Ɛyɛ lǝ bofokanɔ ǝsuǝ se Yosef dínyǝ nkǝ wǝ dikpǝfe éboyoo, údi etiki utsyi lǝ Israel bebi eto budu lǝ Egipte eto kasɔ ǝsuǝ nya ɔ́tɛyi mǝ kase ele bǝ beyifo ku wǝ ɔkɔ.

²³Ɛyɛ lǝ bofokanɔ ǝsuǝ eso Moses eto antomǝ dífi wǝ bákula lǝ afa ǝtsyǝ ǝsuǝ se bále wǝ. Bǝnyǝ bǝ úyifo dikpefi nǝ laanɔ bobe nya bánte sikpi ku oka ǝmǝ eto kɔfi bota kebu ǝsuǝ.

²⁴Ɛyɛ lǝ bofokanɔ ǝsuǝ nya Moses lɛni nkǝ bánkpadi wǝ bǝ Oka Farao eto ubisiobi eto ubi lefe nǝ úkabé. ²⁵Iyifo wǝ lelabi nkǝ lǝ unyǝ kanyi ku Onanto eto betidi enso bǝ unyǝ kamini lǝ lebuayifoyifo ǝsuǝ itǝ lefe kliminti. ²⁶Úbu nnya óbe nkǝ lǝ bakpé wǝ kofani lǝ Kristo eto disii, ɛlɛkɛ famfamfamfa eso kedi ka wuunyǝ lǝ utǝkǝko Egipte eto kasɔ eto asa nnya wuunyǝ kama. Itsyise úfi wǝ ǝnǝmi utǝkǝ lǝ kutǝkǝ ko Onanto luutǝ wǝ lǝ sɛtɔ́ ǝsuǝ. ²⁷Nya ɛyɛ lǝ bofokanɔ bomǝ esoo, údu lǝ Egipte eto kasɔ nya wǝánte oka ǝmǝ eto kafo ka lɔɔnyi wǝ sikpi. Nya fenkǝ únyǝ Onanto wǝ bo ǝnǝmi lǝmbofo bunyǝ, ɔ́ni nkǝ wembusinkli kama. ²⁸Bofokanɔ ǝsuǝ ɛyɛ nya útsyǝ Ukpe Ása Bo Ɔ́yila eto lekpa kasɔ lefe nǝ béfi kɔtɔ bese lǝ biku ku keyi ǝsuǝ. Nya ɛyɛ lǝ nnya ǝsuǝ, Onanto eto ɔtɔnkpe wǝ díbǝ ólo Egiptefɔ eto ubisaibi ninǝ saa lǝ Egipte eto kasɔ nya yanlɛ bǝ utidi Israelfɔ eto bebi saa.

²⁹Ɛyɛ lǝ bofokanɔ ǝsuǝ nnya dítǝ Israel bebi léfo Lekpo Sia bɔyila fe kasɔnti fufu ǝsuǝ bákayɛ nɛ. Fɛɛ lefe nǝ Egiptefɔ lekplatsya bǝ baayila ni, ntu bomǝ étsyiko mǝ búdunko. ³⁰Ɛyɛ lǝ bofokanɔ ǝsuǝ, se Israel bebi lɛyɛ bátsyilama kafati ka báto batsyilama Yeriko eto umǝ eyi akuansee, nnya dítǝ kafati kamǝ léba kákpoo kasɔ nɛ.

³¹Ɛyɛ lǝ bofokanɔ ǝsuǝ nyaso bánlo Rahab wǝ ni otsyetɔ mfó fe kase bálo mba dimamfo Onanto banɔ. Itsyise ófo Israelfɔ eto betidi ba bátsyese ba dísu mfó bésu bátsyilama béyu kasɔ kamǝ bábe kukɔnɔ.

³²Be tsya ele bǝ nsi ntɛyi mi? Lefe kpǝ ǝmbǝ mɛ bǝ lǝ ndi etiki ntsyiko lǝ Gideon, Barak, Samson, Yefta, David ku Samuel ku Onanto eto bǝnyɛlǝkǝtidi ǝsuǝ. ³³Ɛyɛ lǝ bofokanɔ ǝsuǝǝ, bákpɔ nsɔ kpǝ bǝtǝkǝ mǝ kato. Béyifo lesa nǝ dińyǝ itǝ nya bǝnyǝ kɛnyɛ ka Onanto dítsyǝ útǝ mǝ. Nya bǝtsyuǝ díti batsyata eto nnyɛ. ³⁴Nya bǝtsyuǝ lɛninsǝ etefɛnku kplɛ nnya díkatonsǝ asa. Nya bǝtsyuǝ lɛbɔ báfe lǝ lesiabi eto kɛnyɛ lǝ lema ǝsuǝ. Ite bǝ betidi bamfó kenke mankɛ ǝsuǝale saa tsya, Onanto ǝtǝ nkǝ bǝnyǝ ǝsuǝale! Bǝnyǝ ǝsuǝale fe bamamanyǝ ba lɛkɛ ale kekleke, nya bǝtǝkǝ bafɔ eto bamamanyǝ bamǝ kenke kato. ³⁵Nya ɛyɛ lǝ bofokanɔ ǝsuǝǝ, besio léfo mǝ batokpenyǝ ba díkpǝ disi bǝbǝ nkpǝ. Nya bǝtsyuǝǝ, lɛnni bǝ betidi mǝnlǝkǝ mǝ betsyiko lǝ kanyinyǝnyǝ ka ǝsuǝ bákɛ, bomu bála bǝ lǝ bǝkpǝ, bǝ lǝ bǝnyǝ botaka kǝbǝ nkpǝ bo nso kɔnɔ.

³⁶Bákpe bǝtsyuǝ kɔfiɔ nya báblɛ mǝ ku keyibi. Nya bákpe bǝtsyuǝ lǝ amena nya beti mǝ bákpe lǝ Aba eto diyo. ³⁷Bákpɔ bǝtsyuǝ aba nya bákpe bǝtsyuǝ tsya eku ǝnuǝ ku nlande, nya báto bǝtsyuǝ ku asiabi bálo. Nya béfi basamu ku bate eto ekue bémini mǝ ǝsuǝ nya báyɛ bákafe itsyise kulesa mǝntsyǝ mǝ. Nya betidi lékpe mǝ bulǝ, nya bǝnyǝ kanyi tinti. ³⁸Lǝ mǝ nkpǝ sɛɛ bo bǝsiǝ esoo, kawunsiǝ kamfo eto betidi mámfo mǝ. Nyaso bákayɛ bákafe lǝ mfiminti ku atiniku ku kanyinyǝnyǝ fe mba bála lǝ mǝ nsɔ, nya bákɛ lǝ aba kalɔ ku lǝ ǝbiǝ lǝ kasɔnti.

³⁹Ite bǝ bátɛsǝ betidi bamfo kenke ba bákpe bofokanɔ tsyaa, bámfo kɛnyɛ ka Onanto lɛ́tɛyi útsyǝ mǝ. ⁴⁰Itsyise Onanto ǝnye asa bamba nya lɛlɛkɛ enso útsyǝ bo. Nya lǝ bo mankɛ mǝ lǝ ntii, bembuyifo mǝ báflɔ balo.

Onanto Ni Bo Anto.

¹Lǝ nyaso se bonkpe bamanyǝ kpǝ bamfo ba letsyilama bo nya banlɛ bo otsyekle bokpe esoo, bitǝ lǝ bulǝkǝ asa nnya leeti bo kusu ku lebua nǝ laakpa bo kekleke kalɛ lefe kpǝ buwui. Nya lǝ butsyetsyi etsyi nnya nte bo sɛtɔ ku unyǝ, kama bebe mankɛ. ²Bitǝ lǝ bo ǝnǝmi lǝ itǝkǝ lǝ Yesu hã ǝsuǝ. Wǝ hã ni nwǝ ǝsuǝ bo bofokanɔ nkpǝsǝ itsyi lǝ kasɔ ketsyikokɔ isu ese lǝ kalosǝkɔ. Se óte disuǝyuǝ nǝ nte sɛtɔ wuunyǝ esoo, ókpe utu únyǝ kanyi lǝ uyikabie ǝsuǝ. Nya wémfi kofani ko wuudi lǝ uyikabie ǝsuǝ kulesa. Nya mɔmɔɔ, úsu usi lǝ Onanto eto lekankpomɛ ɔflɔ lǝ wǝ kodiani.

³Bibu Yesu bebe, lǝ kanyi ka únyǝ lǝ babuayifo ba dínyǝ wǝ lǝ ǝsuǝ eto ani, bǝ lǝ ani lǝ ɛyɛ mi bolo lǝ bitǝ disi. ⁴Ite bǝ bɛlɛ lema bɔkpɔ ku lebua tsyaa, yányo kaka ele bǝ bɛkpɔ lǝ bakpo mi kɔtɔ lǝ kasɔ tɔ. ⁵Nye biota ǝsuǝ Onanto eto lɛkɔmansǝmansǝ eto etiki nnya ɔ́tɛyi úfi ókpe mi nkɛale fe wǝ bebi? Ɔ́tɛyi nkǝ,

“Mɔ Ubi, tsyue ato nya memfi Bonamute eto bunǝtǝtǝ fe asa bimba.

Nya mǝntǝ lǝ ilǝ fǝ lǝ unyǝki okpe fǝ.

⁶Itsyise nwǝ Bonamute laalaa,

wǝ wǝǝnǝ lǝ kusu sɛɛ ǝsuǝ nɛ.

Nya nwǝ tsya woafo fe ubii,

wǝ wǝǝnǝ koto nɛ.”

⁷Bifi mi kanyi saa ka biǝnyǝ fe Onanto nlɛ mi bunǝ butǝ fe wǝ bebi. Ubi utsyuǝ kpe bǝ anto ǝǝnǝ wǝ? ⁸Lǝ bǝǝnnǝ mi fe kase bunyi boǝ bǝǝnǝ ubi saa, nyalɛ bienyifo wǝ bebi tinti. Etǝ bǝ biyifo fe bebi ba anto dímamfo seka. ⁹Lǝ bo betidinini eto antomǝ seka lǝ kasɔ mfoo, bǝǝnǝ bo nya boebu mǝ tsya lǝ nyamfo eso. Ntsyǝ eso yanle bǝ bobokosǝ ǝsuǝ kasɔ enso butǝ Onanto wǝ ni bo Anto lǝ lɛwɔnɔ ǝsuǝ bǝ busiǝ nkpǝ! ¹⁰Bo kasɔ mfo eto antomǝ ǝǝnǝ bo itǝ lefe kliminti ditsyuǝ fe kase bǝnyǝ bǝ iińyǝ itǝ bo. Fɛɛ Onanto wǝ ǝǝnǝ bo fe kase ɛlɛkɛ itǝ bo bǝ lǝ bo tsya lǝ bunyǝ kedikɔ lǝ wǝ sɛkɛnkɛ ǝsuǝ. ¹¹Bunǝtǝtǝ utidii, aankɛ kutsyuǝ kamini, bomu yeefi wǝ. Fɛɛ lǝ nnya kamaa, mba bǝtǝ bunǝ nkoo, ǝǝtǝ beeyifo asa lǝ kusu ǝsuǝ, nnya lǝǝtǝ bǝǝsiǝ nkpǝ lǝ diyuǝ ǝsuǝ.

¹²Lǝ nyamfo esoo, bekpe mi ani ku akpa nnya leetinkǝ ale, lǝ bitǝ ǝsuǝale fɔfɔ lǝ idufǝ lǝ nnya ǝsuǝ. ¹³Bilǝkǝ esu nnya lekpa lǝ bɛyɛ lǝ nnya ǝsuǝ bǝ lǝ mba eto akpa lǝmbǝ ale lǝ bafo bɔyɛ lǝ nnya ǝsuǝ bǝ bentusǝ. Bomu lǝ bǝtǝkǝko mi kama lǝ bǝnyǝ ǝsuǝale balosǝ.

¹⁴Bekplatsya bǝ lǝ diyuǝ lǝ lɛkɛ lǝ mi ku betidi kenke eto nti, nya lǝ bekplatsya lǝ bisiǝ nkpǝ kɛnkɛ. Itsyise kuutsyuǝ saa embunyǝ Bonamute lǝ wenyifo kɛnkɛ. ¹⁵Bebe kukɔnɔ biǝ lǝ Onanto eto lefonǝ eto kusu manya mi. Bebe kukɔnɔ biǝ biǝntǝ kuutsyuǝ saa tǝ lǝ binyǝ ɔblɔ kekleke bǝ inǝ bulǝ eboko betidi kpǝ ǝsuǝ lǝ bafiani babuayifo. ¹⁶Bebe biǝ mi kuutsyuǝ saa mamfiani ɔsɔnɔdi nye fe nwǝ lǝmbǝ bofokanɔ fe Esau seka, wǝ dífi wǝ sininǝdidi ófloma ku didisa eto ɔkpɛ ɔni hã. ¹⁷Kama kama fe kase binyii, ɔ́bɛbɛ ku binǝntu nkǝ eni lǝ ofo wǝ anto eto atsyɔkpoko. Fɛɛ wátɔnɔ útǝ wǝ, itsyise wámfo kusu saa bunyǝ lǝ ofloma lesa nǝ úkeyifo útsyǝ.

¹⁸Itsyise inni Sinai eto kɔtini ko utidi loofo bunyǝ ketidi ɔflɔ bíbǝ, fe kase Israel bebi díyifo. Mfó ketuntu suu ka diti kpii, nya ufiebi nlɛ bɔsɔ kekleke nkpe, fɛɛ kɔtɔni komǝ nlɛ bunyǝ diadiadia. ¹⁹Kakpatsyaku ka nlɛ bufǝ ku ɔkɔɛ wǝ nlɛ bɔbɔ ketsyi mfó lɛ bole, nya mba nlɛ nya bɔnɔ álɛ lekpakpa bǝnkǝ bensila bǝ baanɔ kolesa nko bio. ²⁰Itsyise bembofo buńnyǝ kanɔ kɔfi ko nlɛ mǝ bɔtɛyi nkǝ, “Lǝ ubuki uni kulaa tsya wǝ eto kokpa ditidi kɔtini komǝǝ, bakpɔ wǝ aba balo.” ²¹Lǝ sitintii, nya bǝlǝkǝ báte mfó kpe sikpi tinti bǝ Moses kosate átɛyi nkǝ, “Sikpi ko dímuǝ mɛ, nya mintinkǝ!”

²²Bomu mi alɛɛ, Sion eto kɔtini komǝ ɔflɔ bíbǝ. Bíbǝ Onanto wǝ nsi nkpǝ eto umǝ wǝ ni Yerusalem kato ku wǝ batɔnkpe ba bembofo bokla ba lekpe disi mfo ɔflɔ. ²³Bíbǝ disuǝyuǝ eto disikakpekɔ ku Onanto eto bebininǝ ba eto aye báwɔni bakpe lǝ Onanto eto kukue kato ɔflɔ. Bíbǝ bińyǝ lǝ Onanto, kawunsiǝ kenke eto okponkpo ku basɛɛ ba béyifo lɛflɔ eto awɔnɔ eto nti. ²⁴Nya mfó bíbǝ Yesu wǝ laafo kǝtǝ lǝ kakle fɔfɔ kamǝ ɔflɔ kaka kɔtɔ ko ókpo lǝ bo disi luunǝ asa sɛɛ kpǝ eboko nnya nso Abel eto kɔtɔ.

²⁵Bebe kukɔnɔ biǝ bianni nwǝ nlɛ mi etiki budinko eto ɔkɔɛ. Itsyise lǝ mba dímentsyue koto nwǝ léboko mǝ Ditiki Sɛɛ nǝmǝ lǝ kasɔ mfo mámfo butsyetsyi kedu lǝ mǝ kotonǝnǝ ǝsuǝǝ, ntsyǝ yoofo bubǝ bǝ bo mba bátɛyi Ditiki Sɛɛ nǝmǝ itsyi kato ebofo butsyetsyi lǝ ni kɛnyɛ? ²⁶Lefe nǝmfó wǝ ɔkɔɛ étinkǝsǝ kawunsiǝ kenke. Fɛɛ mɔmɔ útsyǝ bo kɛnyɛ nkǝ, “Bioo, mǝǝbǝ kawunsiǝ kamǝ butinkǝsǝ. Nya inni nko mate tsya, bomu muutinkǝsǝ kato tsya nwunsǝ.” ²⁷Ditiki nǝmfo bǝ, “Bioo” lǝ bote bǝ, Onanto ebulǝkǝ asa nnya dítinkǝ nnya ni asa nnya úyifo uwui lǝ nnya kǝńyǝnkɔ. Nya asa nnya dímentinkǝǝ, ebubu itsyǝ.

²⁸Nyaso bitǝ lǝ bɔsɔ ani bǝ sekakedikɔ ka lembofo butinkǝ áka bo kɔni. Lǝ nnya esoo, bítǝ lǝ bufi dibu ku sikpitete busumu wǝ lǝ kusu ko lɔɔkɛ wǝ ɔkɔɛ ǝsuǝ. ²⁹Itsyise bo Onanto ǝmǝ eyifo ute wǝ laatonsǝ lesa saa.

Lɛ Ǝsuǝ Lǝ Kase Yuudufǝ Onanto Ǝnǝ.

¹Bitǝ lǝ sɛyimila lǝ siyi mi ǝsuǝ fe bayimi. ²Bianni bafɔ bofo, itsyise ɛyɛ lǝ nyamfo ǝsuǝǝ, bǝtsyuǝ áfo Onanto eto batɔnkpe, fɛɛ bánte nko. ³Bekloma mba bákpe lǝ Aba eto diyo tsya fe mba mi ku mǝ nlabe mfó. Nko kee, bekloma mba banlɛ ohiã bote fe mi ku mǝ banlɛ ohiã bote.

⁴Usǝ ku usiǝ siǝ nkpǝ lǝ lelabi ǝsuǝ, nya ele bǝ utsyuǝ saa fi dibu utǝ kǝsiǝ. Nya kuutsyuǝ mamfe wǝ utsyuǝ kama, itsyise Onanto ebokponko mba leedi asɔnɔ, kakpo kusǝ nye kusiǝ lekpo. ⁵Mansɛsǝ ǝnǝmi tsya lǝ atabi ǝsuǝ. Bomu bitǝ lǝ lesa nǝ nte mi lǝ didufǝ mi ǝnǝ. Itsyise Onanto átɛyi nkǝ,

“Mǝmboyani mi ntsyǝ kulefe,

nya membulǝkǝ ato lǝ mi ǝsuǝ tsya kulefe.”

⁶Nyaso bitǝ lǝ bɔtɛyi taa bo ketu kǝmiǝ boǝ,

“Bonamute ni mɔ ɔwunsǝkotsyuǝ, nyaso mǝmbote sikpi.

Be utiditsyuǝ loofo mɛ buyifo?”

⁷Bekloma mi batɔnkotɔnko ba dísiǝ ba lɛtɛyi mi Onanto eto Ditiki Sɛɛ nǝmǝ. Bekloma kase bǝsiǝ nkpǝ ku kase báfo Onanto bánɔ lǝ bɛyɛ le mǝ kayɛkɔ lǝ bofokanɔ ǝsuǝ. ⁸Yesu Kristo aamfloma kulefe. Fe kase útsyǝ lǝ lefe nǝ léfe mǝǝ, nko ke unte mɔmɔ ku lefe nǝ luubǝ kenke tsya nɛ.

⁹Biǝntǝ lǝ asatete akpa akpa nnya lǝmbǝ disi ku akpa lǝ ɛwɛ mi ekpe lǝ benya kusu. Onanto eto lefonǝ hã laakpe bo nkɛale, nya inni afi nnya lɛyɛ lǝ lesadidi ǝsuǝ. Mba laayɛ lǝ afi nyamfo ǝsuǝ ǝǝnnyǝ bɔwunsǝko nye kutǝkǝ ketsyiko lǝ nnya ǝsuǝ.

¹⁰Boo, bokpe kedikǝtǝkɔ eto leba nǝ ǝsuǝ asa nnya boedi, nya mba lǝǝtǝ kedi lǝ Yudafɔ eto kedikǝtǝkɔ, yanle bǝ bedi betsyiko lǝ bo ole.

¹¹Usumunyǝ Ninǝ Kenke ǝmǝ eefi ubuki eto kɔtɔ kedufǝnko kaka ni Kakɛnkɛkɔ Kenke. Mfó weesu kǝtǝ kedi katɔ bufikatsyɛ lǝ betidi ba kenke eto abua eto disi. Fɛɛ baatonsǝ bebuki eto sinǝ siamǝ lǝ kabanto. ¹²Mmǝ kenke seka ini bǝ Yesu tsya ǝnyǝ kanyi lǝ umǝ ǝmǝ eto kabanto bǝ lǝ uflǝ betidi eto abua uwui ɛyɛ lǝ wǝ kɔtɔ ǝsuǝ.¹³Nyaso bitǝ lǝ busu botsyako wǝ lǝ kabanto mfó lǝ bakpe bo kofani faa, fe kase bákpe wuntsya kofani. ¹⁴Itsyise umǝ saa ǝmbǝ bo lǝ kasɔ mfo wǝ luutsyǝ lefe saa manlo manlo. Bomu bunyǝ bɔlɛ kusu bobe itǝ umǝ wǝ luubǝ.

¹⁵Nyaso bitǝ lǝ bɔyɛ lǝ Kristo ǝsuǝ bufi atɛsǝ fe keditǝtǝ bukǝtǝ Onanto lefe saa. Nya ni nnya laabɔ ketsyi lǝ mba léfo wǝ diye bánɔ eto kɛnyɛ. ¹⁶Bianta asa sɛɛ buyifo kǝtǝ bǝtsyuǝ ku bǝtsyuǝ bɔwunsǝko ǝsuǝ. Itsyise ite fe keditǝtǝ ka eto okle laakpe Onanto disuǝyuǝ.

¹⁷Bitsyue mi batɔnkotɔnko koto lǝ bebokosǝ ǝsuǝ kasɔ bitǝ mǝ itsyise mǝ nlɛ mi kakla bobe lefe saa nɛ, itsyise ele bǝ bǝlǝkǝ nya kɛnyɛ lǝ Onanto ɔflɔ. Lǝ bitsyue mǝ kotoo, booyifo mǝ keyifo ku disuǝyuǝ, fɛɛ lenni nkoo, kuulǝ mǝ ku buyifo nya lǝmbǝwunsǝko mi.

¹⁸Bikato ola lǝ bo disi. Buyi boǝ bo akɔɛsi akpa wuee, itsyise bola boǝ boeyifo kasɛɛ lefe saa. ¹⁹Nya nlɛ mi lekpakpa kekleke miǝ lǝ beto ola biǝ lǝ Onanto lǝ utǝ kusu lǝ nsinkli mbǝ mi ɔflɔ mlǝ.

Olatoto Fɛfɛ.

²⁰Nlɛ bɔtɔ miǝ Onanto wǝ lǝǝtǝ diyuǝ, wǝ létakasǝ Bonamute Yesu wǝ ni basamu eto ɔyɛnkonyǝ kplɛ utsyiko ɔkɔmǝ ɛyɛ lǝ kɛnyɛklekle manlo eto kɔtɔ komǝ ǝsuǝ, ²¹lǝ ufi asa sɛɛ kenke utǝ mi kafo faa bǝ lǝ befo wǝ lelabi buyifo. Lǝ eyɛ lǝ Yesu Kristo ǝsuǝ lǝ Onanto lǝ uyifo lesa nǝ nkpe wǝ ɔkɔɛ lǝ bo nti. Wǝ ale lǝ idi diyǝnde kplɛ idu manlo isu manlo ǝsuǝ! Ibǝ itǝ.

Etiki Fɛfɛ.

²²Mɔ bayimi, nlɛ mi lekpakpa tinti miǝ lǝ bitsyue ato lǝ bɛnɔ kɔlɛ ko minlɛ mi bɔlɛ itsyi lǝ Ditiki Sɛɛ nǝmfo ǝsuǝ. Itsyise kukue kliminti ete miwɔni minlɛ mi botsyese.

²³Nla miǝ mǝǝtǝ mi bote miǝ bǝlǝkǝ bo ɔyimi Timoteo lǝ Aba eto diyo. Lǝ wuubǝ mɔ ɔflɔ mlǝǝ, bonko wǝ ebubǝ bunyǝ mi busiǝsǝ.

²⁴Bisiǝsǝ mi batɔnkotɔnko kenke ku Onanto eto betidi bamfó kenke bitǝ bo. Bo bayimi ba nkpe lǝ Italia kenke tsya ǝsiǝsǝ mi.

²⁵Lǝ Onanto eto lefonǝ lǝ disiǝko mimblɛ kenke.