12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 TESALONIKAFƆ

Kukue Nuǝfǝ Ko Paulo Lǝwɔni Útǝ Tesalonikafɔ

1

1Mɔ, Paulo, ku Silvano ku Timoteo bo lɛwɔni kukue komfo butǝ mi mba ni bo Boanto Onanto ku Banamute Yesu Kristo eto bale lǝ Tesalonika. 2Bɔlɛ bɔtɔ minkǝ Boanto Onanto ku Bonamute Yesu Kristo eto diyuǝ ku lefonǝ lǝ disiǝ ko mi.

Bɔlɛ Onanto Lekpakpa Bǝ Fe Nkpesiǝsiǝ Lǝ Bokate Ko Bokpadi Bo Ókpadi Fǝ.

3Mɔ bayimi, ele bǝ bɔsɔ Onanto ani lefe saa lǝ mi disi. Lǝ nyaso ɛlɛkɛ bǝ bukato ola, kasɔ wǝ ani bǝ mi bofokanɔ lǝ busi bɔkɛ ale boso ku mi lelabi tsya lǝ difui lekpe enso. 4Nyamfo eso boakpo mi diye sɛɛ lǝ mba lefo Onanto banɔ nti. Iyifo bo lɛmɔ nya boatɛsǝ mi itsyise bińyǝ kekleke lǝ mi bofo kanɔ ǝsuǝ nya bɛnlɛ otsyekle bokpe lǝ lefe nǝ eto lefe banlɛ mi bulǝ kakpɔ mi ku kanyi ka bɛnlɛ bunyǝ eso.

5Nyamfo lɛ bote nkǝ Onanto aakpo akpo lǝ kusutsyɔntsyɔ ǝsuǝ. Nya wuutǝ mi kǝsiǝkɔ lǝ wǝ sekakedikɔ kasɔ bɛnlɛ kanyi ka bɛnlɛ bunyǝ eso. 6Onanto ebuyifo lesa nǝ lɛyɛ. Nya wuunǝ mba nlɛ mi bulǝ kenke koto. 7Nya wuutǝ nkǝ bo ku mi mba kenke nlɛ kanyi bunyǝ lǝ buunyǝ ɔnwɛkǝtsyǝkɔ sɛɛ. Onanto ebuyifo nyamfo lǝ lefe nǝ Bonamute Yesu ku Onanto eto batɔnkpe nkpe asuale kplɛ lɔɔbɔ betsyi kato ku ǝsuǝale. 8Buunǝ betidi ba lǝǝmbu Onanto nya bámfo Bonamute Yesu Kristo eto Ditiki Sɛɛ banɔɔ, koto. 9Nya Bonamute loola mǝ udunko lǝ wǝ ǝnǝmi. Nya bǝǝmbunyǝ wǝ diyǝnde ku wǝ ǝsuǝale. Nya wɔɔtsylɔsǝ mǝ ku mǝ ditsyǝbi bua nǝmǝ. 10Asa nyamfo ebubǝ itǝ lǝ diyi kplɛ nǝ ǝsuǝ Yesu luusinkli ubǝ. Nya lǝ diyi nǝmfo ǝsuǝǝ, bafokanɔfɔ kenke ebutǝkǝko wǝ ku atɛsǝ eto ǝsǝ ku kudu. Nya miitsya ǝbɔkɛ mǝ lenti, itsyise béfo wǝ Ditiki Sɛɛ nǝ bɔ́tɛyi mi mfó bɛnɔ.

11Nyamfo eso boato ola lǝ mi disi lefe saa nɛ. Nya boalɛ bo Onanto lekpakpa boǝ lǝ utǝ lǝ mi nkpǝsiǝsiǝ lǝ bokate ku mi bokpadi bo ókpadi mi. Nya lǝ wǝ ǝsuǝale lǝ ɛwunsǝ ko mi lǝ itǝ mi nsusu sɛɛ bo lookpe mi nkɛale bǝ lesa saa nǝ biuyifo lǝ mi wǝ bofokanɔ esoo lǝ ibǝ itǝ kukɔnɔ. 12Bɔlɛ asa nyamfo bɔtɔ kǝtǝ mi ku lekpakpalɛlɛ bǝ lǝ babesǝ Bonamute Yesu Kristo eto diye kato ɛyɛ lǝ mi eso. Nya wuuntsya lǝ obesǝ mi diye kato lǝ wǝ ku Onanto eto kafoɛkpɛ eso.

2

Biǝntǝ Lǝ Kuutsyuǝ Saa Lǝ Ɔwɛ Mi Okpe.

1Mɔ bayimi, itsyi lǝ Bonamute Yesu Kristo eto businkli kǝbǝ bio ku bo bɔkɔ botsyanko wǝ. 2Biǝntǝ lǝ nyamfo lǝ ile mi nsusu nye ekpe mi bule, lǝ nnya banlɛ bɔtɛyi bǝ Bonamute eto dibǝyi ébubǝ koko. Ǝtsyuǝ biubu bǝ ébɔ lǝ Onanto eto kɛnyɛ bulǝkǝ kate nye bo asatete nye etiki nnya bɔ́wɔni bútǝ mi ǝsuǝ. 3Biǝntǝ lǝ kuutsyuǝ saa lǝ ɔwuɛ mi lǝ kusu saa ǝsuǝ kon. Itsyise Bonamute eto diyi nǝmǝ ǝmbubǝ tɔ isu ese lefe nǝ usialetidi ǝmǝ lootaka uńyǝ lǝ Onanto ǝsuǝ nya obuale ǝmǝ lǝǝbǝ bɔtsylɔ lǝ ute luulǝkǝ ǝsuǝ ote. 4Nya wootaka uńyǝ nkǝ lǝ uti Lɛwɔnɔ Kɛnkɛ eto ǝsuǝale kusu lǝ ote nkǝ wǝ hã ni awɔnɔ kenke eto ǝsuǝaletidi. Nya wootaka ubǝ usiǝ lǝ Onanto eto Disumuyo nya wuuyifo wǝ ǝsuǝǝ, fe wǝ ni Onanto.

5Bíakloma biǝ lefe nǝ minkɛ mi lǝ ɔflɔɔ, ntɛyi mi asa nyamfo kenke. 6Fɛɛ lesatsyuǝ leeti asa nyamfo kusu nkǝ yǝǝbǝ tɔ mɔmɔ. Nya mi kosate yi lesa nǝ ini. Nya obuale ǝmǝ ebulǝkǝ wǝ ǝsuǝ lekple lǝ wǝ lefe ayo. 7Nya disiale eto asa nnya banlɛ buyifo kakula kokoko efe ɛlɛ bubǝ. Nya asa nnya luubǝǝ, ǝmbubǝ tɔ isu ese le fe nǝ Onanto dilǝkǝ nwǝ diti obusle ǝmǝ kusu. 8Nya lǝ nyamfo eto kamaa, Onanto ebulǝkǝ obuale ǝmǝ ote. Nya lǝ lefe nǝ Bonamute Yesu luubǝǝ, wuufi wǝ kɛnyɛ eto ufiebi ku wǝ diyǝnde otonsǝ wǝ obiasǝ wǝ ditsyǝbi kenke. 9Usialetidi ǝmǝ bǝ ku Obonsam eto ǝsuǝale, nya wuuyifo bidia eto ayanisa akpa akpaa ote. 10Nya betidi ba kenke lɔɔyɛ lǝ nnya ǝsuǝǝ, ebonya kenkee, wɔɔyɛ lǝ disiale ku kɔwɛsu saa bǝ lǝ ɔwɛ mǝ okpe. Boonya itsyise bamfo Ditiki Sɛɛ nǝ Onanto lete mǝ bǝ bǝnyǝ nkpǝ banɔ. 11Nyamfo eso Onanto eboyani mǝ utǝ kawɛ eto lɛwɔnɔ nǝ luutǝ bafo bidia banɔ. 12Lǝ kalosǝkɔɔ, Onanto ebolo mǝ dikpi, itsyise bamfo Ditiki Sɛɛ nǝmǝ banɔ. Bomu bǝnyǝ disuǝyuǝ lǝ asa buayifoyifo ǝsuǝ.

Bińyǝ Kekleke.

13Mɔ bayimi, ele bǝ bokasɔ Onanto ani lefe saa lǝ mi disi eso. Buyi boǝ woala mi sitinti. Mi ni betidi tutɛ Onanto dílǝkǝ nkǝ binyǝ bofo. Úfi Lɛwɔnɔ Kɛnkɛ úflǝ mi abua úwi nya béfo ɔnukualɛ bɛnɔ. 14Nya ɛyɛ lǝ bo Ditiki Sɛɛ nǝmfo budi ǝsuǝǝ, Onanto ákpadi mi nkǝ bibǝ befo diye fe kase Bonamute Yesu Kristo léfo. 15Lǝ nyamfo esoo, mɔ bayimi, bińyǝ kekleke lǝ bɛkɔbe ɔnukualɛ eto asatete nnya bóte mi lǝ bo kukue ko bɔ́wɔni ku etiki nnya búdi mi, bɛlɛ nya kɔni kekleke.

16Nyaso bɔlɛ bɔwunsǝko bɔtɔ ku lekpakpalɛlɛ itsyi lǝ Bonamute Yesu Kristo ku Boanto Onanto wǝ laala bo, nya ɛyɛ lǝ wǝ lefonǝ ǝsuǝ ókpe bo nkɛale nya útǝ bo kusubebe tinti. 17Bɔlɛ wǝ lekpakpa buǝnkǝ, utǝ mi ǝsuǝale lǝ okpe mi utu wǝ nkpe osa, bǝ lǝ bidi etiki ku lǝ biyifo asa sɛɛ lefe saa.

3

Bekloma Lǝ Bikato Ola Kǝtǝ Onanto Lǝ Bo Disi.

1Lǝ kalosǝkɔɔ, mɔ bayimi, bekloma lǝ bikato ola kǝtǝ Onanto lǝ bo disi, itǝ bǝ lǝ Bonamute eto Ditiki Sɛɛ nǝmfo lǝ disǝnsǝ disu nlebe ku dibu fe kase miitsya seka. 2Nya lǝ bɛtɔ Boanto Onanto tsya biǝ lǝ ulǝkǝ bo utsyiko lǝ betidibua ku besialetidi eto ani ǝsuǝ, itsyise inni betidi ba tã léfo Ditiki Sɛɛ nǝ mǝ bánɔ. 3Bonamute eyifo ɔnukualɛtidi, uuńyǝ mi kama, ookpe mi nkɛale nya woobe mi bǝ olo Obonsam ǝmbutǝkǝ bo kato. 4Bonamute ǝtǝ bufi bo utu butǝkǝ lǝ mi bǝ bɛlɛ bɔyɛ lǝ esu nya bote mi ǝsuǝ, nya buyi boǝnkǝ biofo buyifo lǝ nnya ǝsuǝ enso. 5Bɔlɛ Bonamute lekpakpa bǝ ɔsini mi ǝnǝmi lǝ binyǝ lǝ bete kase wǝ, Kristo laakpe bo nkɛale ku kase Onanto laala bo.

Binyǝ Kekleke Itǝ Keyifoyifoyifo.

6Mɔ bayimi, bɔlɛ mi kɔfi bokpe kekleke lǝ Bonamute Yesu Kristo eto diye ǝsuǝ boǝ bilǝkǝ mi ǝsuǝ bitsyiko lǝ bayimi ba ni baflɔ nya banlɛ buyifo lǝ bo asatete ǝsuǝ. 7Mi kosate biyi kukɔnɔ biǝ ele bǝ biyifo keyifo fe kase buyifo, itsyise bóenyifo sɛflɔ lefe nǝ bɔ́kɛ mi lenti. 8Bóamfo bɔwunsǝko itsyi lǝ kuutsyuǝ saa ɔflɔ bǝ bóamfo kayo. Bomu búyifo keyifo kekleke ketsye ku kakɔmi bǝ bo bobǝ ményifo bitsyikǝ itǝ kuutsyuǝ saa. 9Inni nnya kasɔ ni bǝnkǝ bumbǝ kusu boatɛyi mi bǝ bebe bo eso. Bomu bóla boǝ bekase kase ele be beyifo keyifo. 10Biokloma biǝ lefe nǝ bɔkɛ mi lentii, bókpe mi kɔfi boǝnkǝ utidi wǝ ke laani nkǝ woǝmbuyifo keyifoo, mendi tsya.

11Bɔlɛ mi nyamfo bɔtɛyi itsyise bɔlɛ bɔnɔ boǝ baflɔ bǝtsyuǝ kpe mi lenti nya ini mǝ bayimitsyuǝ eto ketikima hã te baayɛ kedi. 12Bɔninko betidi bamfo ditsyǝbi nǝmfo kekleke lǝ Bonamute Yesu Kristo eto diye ǝsuǝ, bǝ lǝ balɛ mǝ ǝsuǝ kukɔnɔ lǝ be fi mǝ ani beyifo keyifo bedi.

13Fɛɛ mii, bayimi, biǝntǝ lǝ ani lǝ elo mi lǝ lesa sɛɛ buyifo ǝsuǝ. 14Nya lǝ utsyuǝ nkǝ woǝmbuyifo lǝ ditiki nǝ bɔtɛyi mi lǝ kukue ko mfoo, bitsyǝ wǝ lekpo nya lǝ bilǝkǝ wǝ lǝ mi nti, lǝ kofami lǝ kɔlɛ wǝ. 15Tsyaa bienkisi utidi ǝmǝ. Bomu ele bǝ bɛlɛ wǝ kɔlɛ fe mi ɔyimi seka.

Bɔlɛ Mi Bokla.

16Bɔlɛ Bonamute kosate wǝ lǝǝtǝ diyuǝsǝ lekpakpa bɔlɛ bǝ lǝ utǝ mi kǝmiǝ eto diyuǝsǝ lǝ mi lǝ kusu saa ǝsuǝ. Lǝ Bonamute lǝ ɔlɛ mimblɛ kenke ola.

17Mɔ, Paulo, kosate uni nlɛ etiki fɛfɛ nye nkla bomfo bɔwɔni kǝtǝ mi ku mɔ kɔni. Iyifo mɔ kosate eto lɛnimi eto awɔnisa fe kase maawɔni kakpe lǝ mɔ kukuewɔniwɔni saa kalɔ.

18Bɔlɛ ola boto boǝ Bonamute Yesu Kristo lǝ ɔlɛ mi mblɛ kenke ola lǝ wǝ lefonǝ ǝsuǝ.