1 TIMOTEO

Kukue Tutɛ Ko Paulo Lɛwɔni Útǝ Timoteo

¹Mɔ, Paulo, wǝ ni Yesu Kristo eto nwǝ ótsyese ɛyɛ lǝ bo Ofomfokǝtǝ Boanto Onanto ku Bonamute Yesu Kristo wǝ bɔnlɛ kusu bobee, nlɛ kukue komfo bɔwɔni. ²Nya mimfi minlɛ fǝ Timoteo botsyese. Eyi fǝ eyifo mɛ fe ubi lǝ bofokanɔ ǝsuǝ. Nyaso minlɛ Bonamute Onanto Ku Boanto Yesu bɔtɔ miǝ lǝ mǝ kaminsǝnyǝnyǝ lǝ kǝtǝkǝko fǝ lǝ bǝnyǝ fǝ kaminsǝ lǝ bǝtǝ fǝ diyuǝsǝ.

Paulo Álɛ Wǝ Kɔlɛ Itsyi Lǝ Bidia Eto Bateasa Ǝsuǝ.

³Nla miǝ lǝ esi ǝsiǝ lǝ Efeso mfó fe kase míntɛyi fǝ lefe nǝ mínyɛ mfo mímfe mintɔ lǝ Makedonia. Nnya ni bǝ eyi fǝnkǝ betidi bǝtsyuǝ kpǝ lǝ mfo ba nlɛ asa nnya loobiasǝ nsusu itsyi lǝ bo asatete lǝ Kristo bofokanɔ ǝsuǝ. Ele bǝ ani komǝ nye ala betidi bamfo bǝ lǝ bayɛ nya kakloe buyifo. ⁴Tɛyi mǝ lǝ bayɛ lefe bobiasǝ lǝ akokosatete ku bakoko eto ntsyikɔ eto katobobesǝ ǝsuǝ. Asa nyamfo eto okle bote akpe kǝnǝ lǝ betidi nti. Nya yaanyɛ lǝ Onanto eto nsusu ǝsuǝ. Nsusu bo nyɛ lǝ bofokanɔ ǝsuǝ hã ele bǝ bote. ⁵Nya lesa nǝ lefe bǝ biyifo ni bǝ ele bǝ bola bo bafokanɔfɔ tsyuǝ ku kafo faa, ku utu wǝ lǝmbolo bo dikpi lǝ asa buayifoyifo saa ǝsuǝ. Nya ele bǝ bo bofokanɔ lǝ Kristo ǝsuǝ tsya yifo sitinti. ⁶Fɛ betidi bǝtsyuǝ étsyi kama bakpe asa nyamfo. Nyaso bányɛ kusu sɛɛ komfo. Nya bǝǝnǝ etiki bimba nya lǝmbǝ kutǝkǝ. ⁷Baala bǝ baatsyi bawuninsǝ bafiani Mose eto kɔfi eto bateasa. Fɛɛ mǝ bamǝ kosate mannɔ etiki nyamǝ kasɔ tsya. Beedi etiki kekleke itsyi lǝ kɔfi komǝ ǝsuǝ, fɛ mǝ bamǝ kosate maannɔ lesa nǝ banlɛ bɔtɛyi kasɔ.

⁸Bomblɛ kenke yi boǝ Mose eto kɔfi komǝ alɛkɛ, fɛɛ ele bǝ bǝtsyue ko koto fe kase boate ko. ⁹Nya ele bǝ bukakloma tsya boǝǝ, inni betidi sɛɛ eso béyifo afi kǝkǝ mǝ ato, bomu mba ditidi ato baata Onanto eto afi kebu ku mba leeyifo asa bua ku mǝ kakle ba eto nkpǝ diyi ku abuayifoyifo. Mǝ ni betidi ba lǝmbǝ bofokanɔ saa, mba laalo mǝ antomǝ ku ambemǝ ku mba ni bewudifɔ. ¹⁰Mba ni betidi ba leedi asɔnɔ ku basani ba laalabeko mǝ basanitsyuǝ. Mǝ ni betidi ba leeyu betidi bamba kǝmuǝ kate ku mba ni badia ku mba laasɔ akɔɛsi nye kakpadi asa katɛyi bidia. Nya ku mba kenke ba dímamfo Ditiki Sɛɛ nǝmǝ eto asatete bánɔɔ, mǝ ni mba baanlɛ ato nyamfo bukǝ nɛ. ¹¹Boonyǝ asa nnya minlɛ bote lǝ Ditiki Sɛɛ nǝ béfi bákpe mɛ lǝ kɔni bǝ nte itsyi diyǝnde eto Onanto wǝ boatɛsǝ nte ɔflɔ.

Paul Ásɔ Onanto Ani Lǝ Wǝ Kaminsǝnyǝnyǝ Eso.

¹²Mǝmbofo Bonamute Yesu Kristo ani bɔsɔ lǝ ǝsuǝale nnya ufi utǝ mɛ nkǝ lǝ mfo keyifo kamfo buyifo eso. Nya lǝ ɔnukualɛɛ, úfi ke ókpe mɛ lǝ ani. Itsyise únyǝ mɛ nya uunyi nkǝ mǝmbutsyetsyi ke nyani wǝ ntsyǝ. ¹³Ite bǝ lǝ lefe ditsyuǝ nǝ lefee, nńyǝ lǝ wǝ ǝsuǝ, lǝ etikibuadidi ku lǝ aka ǝsuǝ fɛ mímbǝ míntsyi mɔ lɛkɔɛsi minwuninsǝ, Onanto ǝnyǝ mɛ kaminsǝ. Itsyise lǝ lefe nǝmfoo, mámfo wǝ nnɔ tɔ nya mánte lesa nǝ mínkeyifo tsya. ¹⁴Bonamute ǝnǝ mɛ kafo tinti nya útǝ mɛ bofokanɔ ku lelabi se buunyǝ lǝ bo lɔniyifoyifo ku Yesu Kristo.

¹⁵Ditiki nǝ minlɛ bɔtɛyi mfo eyifo etiki eto ɔnukualɛ, nya ele bǝ utidi saa fo ɔnɔ. Kristo Yesu wǝ ni Nwǝ Onanto Lékpo Ɔhile Utsyǝ, díbǝ kawunsiǝ kamfo nkǝ lǝ ubǝ ulǝkǝ babuayifo. Nya mɔ ni obuayifo kenke enso lǝ babuayifo nti. ¹⁶Fɛɛ Onanto dínyǝ mɛ kaminsǝ nkǝ lǝ ɛyɛ lǝ mɔɔ ni obuayifo kenke enso ǝsuǝǝ, Kristo Yesu lǝ utǝ lǝ betidi lǝ bǝnyǝ bǝ okpe lelabi nǝ eso woefi katsyɛ babuayifo ba lefo wǝ banɔ. Lǝ nya esoo, wuutǝ mǝ nkpǝ bo lǝmbǝ kalosǝkɔ kulefe tsya. ¹⁷Nyaso bitǝ lǝ bukatɛsǝ bo Oka wǝ nkpe kato wǝ boǝnyǝ ku bo ǝnǝmi wǝǝ hã ni Onanto wǝ nsi nkpǝ isu manlo manlo. Nya lǝ bukabesǝ wǝ Onanto wǝ leenkpǝ eto diye kato lefe saa. Ibǝ itǝ.

¹⁸Mɔ ubi Timoteo, keyifo ku afi nnya mimfi mintǝ fǝ mfoo, eka asa nnya bo Onanto eto bǝnyɛlǝkǝtidi lɛ́tɛyi itsyi le fǝ ǝsuǝ. Lɛ etiki nyamfo kɔni kekleke fe bemake, ebutǝkǝ kabua kato lǝ lema nǝmfo ǝsuǝ. ¹⁹Lɛ fǝ bofokanɔ kɔni kekleke, tǝ bǝ fǝ utu manlo fǝ dikpi. Betidi bǝtsyuǝ ba dímǝntsyue mǝ ketu eto kɔlɛ kotoo, mǝ dídu bánɔ banyansǝ mǝ bofokanɔ nɛ. ²⁰Nya lǝ mǝ ntii, ni Himeneo ku Aleksandro. Nnǝ mǝ ato lǝ se mímfi mǝ míntǝ Obonsam bǝ lǝ bǝnyǝ kanyi lǝ wǝ ani. Nyamfo luutǝ bǝ bakase bǝ bayɛ etiki bua budi lǝ Onanto ǝsuǝ.

Bikato Ola.

¹Lesa tutɛ nǝ moola miǝ bete ni bǝ bikato ola bikǝtǝ Onanto lǝ bikalɛ wǝǝ lekpakpa kasɔ wǝ ani lǝ betidi ba tã eto disi. Bikǝfi mi ku mǝ mblɛ eto ahiã bikǝtsyǝ lǝ Onanto eto ǝnǝmi. ²Nya bikato ola kǝtǝ Onanto lǝ baka ku betidi ba kenke ntɔnko betidi bǝ lǝ bomblɛ lǝ bɔkɛ lǝ diyuǝ ǝsuǝ kalebe saa. Itǝ bǝ lǝ bobokosǝ bo ǝsuǝ kasɔ butǝ Onanto nya bufi dibu butǝ utsyuǝ saa. ³Olatoto eyifo lesa nǝ laakɛ bo Ofomfokǝtǝ Onanto ɔkɔɛ. ⁴Itsyise ola nkǝ utsyuǝ saa te wǝ Ditiki Sɛɛ nǝmǝ lǝ ote ɔnukualɛ ǝmǝ bǝ lǝ utǝ wǝ nkpǝ. ⁵Lǝ ɔnukualɛɛ, Onanto ɔni ete nkpe. Nya Ofomfokǝtǝ tsya ɔni ete nkpe. Wǝ ni utidi wǝ baakpo Kristo Yesu. Wǝ ni futsyǝ laalɔ bonko Onanto eto nti. ⁶Wǝ ni fuutsyuǝ dífi wǝ ǝsuǝ útǝ fe kedi lǝ kawunsiǝ kenke eto betidi eto disi. Yesu éyifo nyamfo sitinti bǝ Onanto eto kɛnyɛ ka útsyǝ nkǝ woofo utǝ wǝ betidi kenke eto lefe eboyo. ⁷Nyamfo eso Onanto lékpe mɛ fe wǝ ɔtɔnkpe ku wǝ oteasa. Nyamfo menyifo bǝ sidia minlɛ bɔtɛyi. Nlɛ mi bɔtɛyi sitinti minkǝ wǝ dílǝkǝ mɛ fe oteasa nkǝ lǝ mbǝ nlǝkǝ wǝ bofokanɔ eto Ditiki Sɛɛ nǝmǝ nte betidi ba lennitɔ Yudafɔ.

⁸Lǝ bafokanɔfɔ eto katsyakɔ saa, nla minkǝ basani besǝ mǝ ani kato bato ola ku ketu ka lekpa kɛnkɛ. Nya ɔblɔ nye kǝnǝ saa mankɛ mi lǝ nti. ⁹Nla tsya miǝ besio lɛ mǝ ǝsuǝ ola ɛyɛ lǝ mǝ bikelɛlɛ ǝsuǝ, lǝ ete bǝ balɛ mǝ ǝsuǝ kasɔ bobokosǝ. Inni bǝ bakle mǝ esi ku sika eto bikǝ akpa akpa nya lefo koya kpǝ nya loote bǝ balɛ mǝ ǝsuǝ kato bobesǝ. ¹⁰Bomuu, ele bǝ mǝ ditsyǝbi sɛɛ te bǝ beyifo besio ba laate Onanto sikpi. ¹¹Nya ele bǝ usio saa bokosǝ wǝ ǝsuǝ kasɔ lǝ okase asa, lǝ busiǝ kpo ǝsuǝ. ¹²Minlɛ mǝ kusu butǝ minkǝ baté basani asa nye bǝtǝkǝ basani kato. Bomu ele bǝ bǝsiǝ kpoo, betsyue koto. ¹³Itsyise Adam ni futsyǝ Onanto leka buyifo fɛ úlǝkǝ Eva utsyiko lǝ wǝ. ¹⁴Nya inni Adam ni nwǝ olo ǝmǝ lɛwɛ, bomu usio ǝmǝ ni nwǝ ɔwɛ. Nya útǝ úyifo lebua. ¹⁵Nya lǝ usio ebuńyǝ kekleke lǝ wǝ bofokanɔ ǝsuǝ ku lǝ lelabi ǝsuǝ nya wuusiǝ nkpǝ kɛnkɛ nya woobokosǝ ǝsuǝ kasɔɔ, wɔɔyɛ lǝ kanyi ka nkpe lǝ ubilele ǝsuǝ ɔbɔ ofe.

Ditsyǝbi Nǝ Ele Bǝ Lɛkɛ Bofokanɔfɔ Eto Batɔnkotɔnko.

¹Ɔnukualɛ uni, baatɛyi bǝnkǝǝ, lǝ utsyuǝ aala nkǝ woeyifo bafokanɔfɔ eto ɔtɔnkotɔnkoo, ete bǝ woala nkǝ woeyifo keyifo sɛɛ. ²Fe bafokanɔfɔ eto ɔtɔnkotɔnkoo, ele bǝ uyifo utidi wǝ bulǝ saa lǝmbǝ lǝ ǝsuǝ, uufi kusiǝ kɔni, uyifo obesibe, ɔkɛ dibusǝ, ɔlɛ ǝsuǝ ola, nya betidi leebu wǝ. Ɔkɛ kafoɛkpɛ kafo bafɔ nya uyifo oteasa sɛɛ. ³Yanle bǝ uyifo utǝkpǝ, nya woankpɔ ekiti. Ele bǝ uyifo utidi wǝ diyuǝ, nya woenyifo nwǝ lǝǝnǝ etiki, nya woansɛsǝ ǝnǝmi lǝ atabi ǝsuǝ tsya. ⁴Ele bǝ uyifo nwǝ laalɛ wǝ diyo eto betidi ola, nya wǝǝtǝ nkǝ wǝ bebi tsyue ditiki koto lǝ kusu saa ǝsuǝ. ⁵Nya lǝ utidi utsyuǝ kpe wǝ leenyi kase woobe wǝ diyoo, ntsyǝ wɔɔyɛ obe Onanto eto betidi ba wɔɔyɛnko? ⁶Yanle bǝ uyifo nwǝ léfo Onanto ɔnɔ fɔfɔ kase woembobesǝ ǝsuǝ kato, nya ɛyɛ lǝ nnya ǝsuǝ ote ǝsuǝ, lǝ ubǝ udu ɔnɔ, nya Onanto luunǝ wǝ koto fe kase únǝ olontidi ǝmǝ koto. ⁷Ele bǝ uyifo utidi wǝ nkpe diye sɛɛ lǝ mba dímamfo banɔ tsya eto ǝnǝmi, nya luutǝ bǝmbɔtɛyi kulesa bua saa bakpe wǝ kofani bǝ lǝ obuale ǝmǝ lǝ unyǝ wǝ umuǝ.

⁸Nko kǝ ini bǝ wǝ bawunsǝkotsyuǝ tsyaa, ele bǝ mǝǝ tsya yifo betidi ba nkpe ditsyǝbi sɛɛ, nya baalɛ keyifo ola kekleke. Ele bǝ beyifo betidi ba lǝǝnnǝ ntǝ kǝkpǝ, nya baansɛsǝ ǝnǝmi lǝ atabi ǝsuǝ tsya. ⁹Ele bǝ beyifo bǝtsyuǝ léfo Ditiki Sɛɛ nǝmǝ báboko mfo banɔ kekleke ketu ka laanlo mǝ dikpi. ¹⁰Nya ele bǝ beto mǝ ditsyibi bebe fɛ. Nya lǝ bǝnyǝ kabua saa lǝ mǝ ǝsuǝǝ, bitǝ lǝ beyifo bawunsǝkotsyuǝ. ¹¹Ele bǝ mǝ bǝsiǝ tsya, yifo besio ba nkpe ditsyǝbi sɛɛ, nya benyifo betidi ba leedi betidi eto ntikima. Bomu ele bǝ beyifo besio ba leekpǝ ntǝ, nya beeyifo lesa saa lǝ kusu ǝsuǝ. ¹²Be fǝ, bawunsǝkotsyuǝ bamfo eto utsyuǝ saa fi kusiǝ kɔni kplon, nya woalɛ wǝ bebi ku wǝ diyo eto betidi kenke ola. ¹³Nya bawunsǝkotsyuǝ ba nlɛ mǝ keyifo olaa, mǝ kosate ebunyǝ dibu ku kǝńyǝsǝ sɛɛ lǝ betidi eto ǝnǝmi. Nya bɔɔkɛ utu bedi etiki lǝ mǝ bofokanɔ lǝ Yesu Kristo ǝsuǝ kate betidi bamba.

^14-15Nlɛ bobe bǝ yǝmbɔklɛ muubǝ nyǝ mi. Fɛɛ nlɛ asa nyamfo bɔwɔni kǝtǝ fǝ bǝ lǝ minlɛ bubǝ mlǝǝ, lǝ efo fǝ bɔwunsǝko lǝ ate lesa nǝ ele bǝ yifo fe ɔtɔnkotɔnko lǝ Onanto eto bebi nti. Nya mǝ ba ni Onanto wǝǝ nkpe nkpǝ eto bebii, mǝ ni omayi itǝ Ditiki Sɛɛ nǝmǝ. ¹⁶Onanto eto ditiki kɛnkɛ nǝ bǝlǝkǝ bátee, kpe kalende tinti nya kuutsyuǝ saa ǝmbofo bɔni nko. Nya ni bǝnkǝ,

“Bonamute ǝbǝ bale fe kawunsiǝ eto utidi.

Lɛwɔnɔ Kɛnkɛ ǝlǝkǝ óte nkǝ uyifo kɛnkɛ.

Nya Onanto eto batɔnkpe dínyǝ wǝ.

Nya bǝlǝkǝ wǝ báte lǝ kawunsiǝ eto betidi kenke nti.

Kawunsiǝ eto betidi kpǝ áfo wǝ bánɔ.

Nya Onanto dítsyi wǝ úsuko kato lǝ diyǝnde kplɛ ǝsuǝ.”

Betidi Ebutǝkǝko Bidia Eto Bateasa Kama.

¹Lɛwɔnɔ Kɛnkɛ ǝlǝkǝ óte bo ókpasǝ nkǝ, fɛ kawunsiǝ eto kalosǝkɔ looyoo, betidi bǝtsyuǝ ebɔbɔ lǝ bofokanɔ eto Ditiki Sɛɛ nǝmfo ǝsuǝ bǝtǝkǝko bidia eto awɔnɔ nnya mba luufi mǝ ǝsuǝ bǝtǝ obuale ǝmǝ eto asatete. ²Bidia eto asa betidi bamfo laate, nya buufi mǝ disiale eto asatete bakula, itsyise mǝ akɔɛsi ǝkpǝ fe situ ku ute béfi bátonsǝ nnya, bǝmbǝ ɔnukualɛ. ³Mǝ laate bǝ yanle bǝ betidi fi kusiǝ. Nya baatɛyi bǝnkǝ yanle bǝ bedi edisa ǝtsyuǝ eto okle tsya. Fɛɛ Onanto wǝ díyifo edisa kenke utsyǝ nkǝ mba léfo wǝ ditiki banɔ bentekǝko wǝǝ, lǝ bedi ku lɛninsɔ. ⁴Nya sitintii, asa nnya kenke Onanto díyifoo, alɛkɛ. Nyaso yanle bǝ utidi saa kisi didisa kuditsyuǝ. Bomu ele bǝ bafo ditsyuǝ saa ku olatoto ku lɛninsɔ. ⁵Itsyise Onanto eto ditiki nǝmǝ ku bo lɛninsɔ lǝǝyifo didisa nǝmǝ kɛnkɛ.

Kristo Yesu Eto Usumunyǝ Sɛ.

⁶Lǝ até fǝ bayimitsyuǝ asa nyamfoo, nya ǝsuǝ fɔɔyɛ afiani Yesu Kristo eto ɔwunsǝko sɛɛ nɛ. Lǝ nya féfi bofokanɔ eto etiki nyamǝ ku asatete fékluǝsǝ ǝsuǝ esoo, nyamfo luutǝ fǝ ǝsuǝle nɛ. ⁷Nyaso lǝkǝ fǝ ǝsuǝ etsyiko lǝ amamosa nnya betidi laatɛyi nya dimanyɛ lǝ konantosu nya lǝmbǝ kutǝkǝ saa. Nya kase konantosu lǝ ǝtǝkǝko ko kekleke. ⁸Ǝsuǝ eto bunǝ itǝ ale bɔkɛ alɛkɛ lǝ kusu kutsyuǝ, tsya Anantotiki bufi kekulǝsǝ ǝsuǝ ku nya bokase kpe kutǝkǝ eso nyamblɛ kenke. Itsyise yuutǝ fǝ kutǝkǝ lǝ nkpǝ bomfo ku lǝ kǝkpǝma eto nle tsya. ⁹Nyamfo eyifo ɔnukualɛ wǝ ele bǝ utsyuǝ saa fo ɔnɔ. ¹⁰Nyamfo eso bɔnlɛ keyifo kekleke nya bɔnlɛ kanyi saa bunyǝ nɛ. Itsyise bo kusubebe tǝkǝ lǝ nkpǝ manlo bo Onanto wǝ ni betidi ba tã eto Ofomfokǝtǝ ǝsuǝ. Nya mba luunyǝ wǝ bofokǝtǝ ni mba léfo wǝ bánɔ.

¹¹Nyamfo ni asa nnya ele bǝ te mǝ nɛ. ¹²Mǝntǝ lǝ betidi bǝtsyuǝ lǝ bǝnyǝ fe amamflɔ itsyise eyifo okosobi eso. Bomuu, fiani ditsyǝbi sɛɛ itǝ bafokanɔfɔ kenke ɛyɛ lǝ fǝ etikididi ku fǝ ditsyǝbi ku fǝ lelabi itǝ betidi ku fǝ bofokanɔ ku fǝ nkpǝ kɛnkɛ busiǝ tsya ǝsuǝ. ¹³Ńyǝ kekleke lǝ akakla Onanto eto Ditiki Sɛɛ nǝmǝ ǝkǝtǝ bafokanɔfɔ kenke. Nyaso lǝkǝ nya kasɔ lǝ ate mǝ asa nyamǝ isu ese lefe nǝ muusinkli mbǝ. ¹⁴Nya manyɛ Onanto eto Lɛwɔnɔ eto ǝtǝsa nnya úfi útǝ fǝ ɛyɛ lǝ wǝ bǝnyɛlǝkǝtidi ku bafokanɔfɔ eto batɔnkotɔnko ba dítǝkǝ fǝ anii, eto keyifo buyifo. ¹⁵Tǝ lǝ fǝ nsusu lǝ butǝkǝ lǝ nyamfo ǝsuǝ, nya lǝ alɛ nko ekeyifo itǝ lǝ betidi ba tã lǝ bǝnyǝ lǝ fǝ nkpǝ sɛɛ bo fensi eto sɛtɔsusu. ¹⁶Lɛ fǝ ǝsuǝ kukɔnɔ ku asa nnya faate. Nyǝ kekleke lǝ keyifo ka fanlɛ ǝsuǝ. Itsyise lǝ eyifo nkoo, ebulǝkǝ fǝ ǝsuǝ ku betidi kenke ba laanɔ fǝ ditiki etsyiko lǝ kotonǝnǝ ǝsuǝ.

Ele Bǝ Lɛ Bakɔbǝsiǝ Ku Batɔnkotɔnko Ku Beyifoyifo Ola Kukɔnɔ.

¹Meyenki akpe nye manlɔ osani wǝ ni fǝ sininǝ ǝtsyǝ ku kudu. Bomu lǝkǝ asa kasɔ ate wǝ ku utu buɛɛ fe fanto seka. Lǝ bakosobi fe bayanisani. ²Lɛ besio ba lebe banso fǝ fe fambe mǝ. Nya lǝ alɛ mbitɛ tsya fe fǝ bayimisio, nya lǝ alɛ fǝ ǝsuǝ kɛnkɛ.

³Bakɔbǝsiǝ ba lǝmbǝ bawunsǝkotsyuǝǝ, lɛ mǝ kukɔnɔ ku dibu. ⁴Fɛ lǝ bakɔbǝsiǝ bǝtsyuǝ kpe bebi nye bǝflufluu, tǝ lǝ bebi bamǝ lǝ bakase tutɛ, bakase kase bɔɔlɛ mǝ diyo eto betidi ku mǝ mba léle mǝ ola fe kase mǝ bofokanɔ eto keyifo lete. Ele bǝ bedi betidi ba lǝǝtsyǝ mba léle mǝ kɔlɛ. Nyamfo lǝǝdufǝ Onanto ǝnǝ nɛ. ⁵Nya ɔkɔsiǝ wǝ lǝmbǝ ɔwunsǝkotsyuǝ saa, ufi wǝ kusubebe utǝkǝ lǝ Onanto ǝsuǝ lǝ ukato ola ukǝtǝ Onanto ketsye ku kakɔmi itsyise ohiã wǝ bɔwunsǝko. ⁶Fɛɛ ɔkɔsiǝ wǝ leedi sɛsɔnɔɔ, umbǝ nkpǝ lǝ Onanto eto ǝnǝmi, ite bǝ usi nkpǝ tsya. ⁷Di mǝ etiki ǝkǝ mǝ ato itsyi lǝ asa nyamfo ǝsuǝ bǝ lǝ mǝ bǝtsyuǝ nye betidi bamba lembudi mǝ ketikima. ⁸Nya lǝ utsyuǝ lǝ mi nti áni nkǝ woǝmbɔlɛ wǝ diyo eto betidi ola kukɔnɔɔ, nyalɛ te fǝ ɔ́ni wǝ bofokanɔ eto kusu komǝ, nya wǝ etiki abia eso utidi wǝ dimamfo ɔnɔ kulaa tsya.

⁹Memfi ɔkɔsiǝ wǝ dimamfo tɔ alɛ fosi akua eto diye akɔ ku bakɔbǝsiǝ eto ditsyukpa nǝ nkpe lǝ bafokanɔfɔ nti. Nya nnya nsi nso ni bǝǝ, ɔkɔsiǝ wǝ nkpe lǝ ditsyukpa mǝmfo nti di usio ni kusǝ kɔni hã úkǝsiǝ. ¹⁰Uyifo nwǝ betidi laakpadi diye sɛɛ lǝ kase unsi nkpǝ sɛɛ eso. Ele bǝ udi usio wǝ nkpe ditsyǝbi sɛɛ wǝ dínǝ wǝ bebi kukɔnɔ nya onkpe kafoɛkpɛ itǝ bafɔbofo. Ele bǝ uyifo usio wǝ nkpe kafo ɛkpɛ itǝ wǝ bǝtsyuǝ ku bafokanɔfɔ tsyuǝ. Nya woawunsǝ ko betidi ba kenke nkpe lǝ bulǝ ǝsuǝ. Nya lǝ ɔnukualɛɛ, ufi nkpǝ bo kenke unsi itǝ kasɛɛ eto buyifo.

¹¹Bakɔbǝsiǝ ba dimamfo tɔ alɛ fosi akuaa, mǝmfi mǝ aye akɔ lǝ bakɔbǝsiǝ eto ditsyukpa nǝmfo nti. Itsyise lǝ kusǝsiǝsiǝ lǝ mǝ ɔkɔɛ, boosinkli lǝ Kristo kama besu bǝsiǝ bese fɔfɔ. ¹²Nya nyamfo ebutǝ bata kakle ka nkpe lǝ mǝ ku Onanto nti bebu itǝ bedi dikpi. ¹³Lǝ nnya kamaa, boofiani baflɔ bakatsyilama betidi eto ayo kedi etiki bimba nnya lǝmbǝ kutǝkǝ. Nya nnya nsi lebia enso ni bǝǝ, bookakpadi betidi aye bua kedi mǝ ketikima katɛyi etiki nnya dimamfe. ¹⁴Nyasoo, nla miǝ bakɔbǝsiǝ bamfo eto kakle siǝ bese lǝ bale bebi lǝ bǝsiǝ babe mǝ ayo bomu. Nyamfo ebutǝ bǝ bembuyifo asa nnya dimǝńyǝ itǝ nya luutǝ bo balo kusu bǝ bǝkedi etiki bua saa lǝ bo ǝsuǝ. ¹⁵Itsyise bakɔbǝsiǝ bǝtsyuǝ ébusinkli bésu bǝtǝko Obonsam.

¹⁶Lǝ bakɔbǝsiǝ bǝtsyuǝ kpe lǝ usio wǝ díkafo banɔ eto diyoo, ele bǝ obe mǝ ɔlɛ mǝ ola, itǝ bǝ mǝ bitsyikǝ ǝmbubǝ itǝkǝ lǝ Onanto eto bafokanɔfɔ ǝsuǝ. Nyamfo luutǝ kusu bǝ bafokanɔfɔ mfó eto ditsyukpa ebofo bakɔɛsiǝ bamba ba lǝmbǝ bawunsǝkotsyuǝ ola bɔlɛ.

¹⁷Nya bafokanɔfɔ eto batɔnkotɔnko ba nlɛ mǝ keyifo kamǝ olaa, ele bǝ bǝtǝ mǝ kayofofo ka disu sɛtɔ eto sinuǝ. Titlu mba laate asa fɛ bensi beedi betidi Ditiki Sɛɛ nǝmǝ tsya. ¹⁸Itsyise bátɛyi lǝ Awɔnisa Eto Kukue Kɛnkɛ bǝnkǝ, “Mankle onantsyui wǝ laafodi kamɔ kǝtǝ fǝ eto kɛnyɛ lǝ ɔlɛ keyifo.” Besi bátɛyi tsya bǝǝ, “Ele bǝ uyifoyifo saa nyǝ wǝ kayofofo itsyi lǝ keyifo ka ɔnlɛ ǝsuǝ.” ¹⁹Lǝ utidi utsyuǝ ǝbǝ ɔlɛ ɔtɔnkotɔnko utsyuǝ kɛnyɛ bolaa, mamfo nnya anɔ isu ese lefe nǝ ɛflɔ betidi inuǝ ku kama. ²⁰Nya betidi ba lǝǝsiǝ nkpǝ buaa, lǝkǝ mǝ até lǝ mǝ bǝtsyuǝ nti lǝ ǝkǝ mǝ ato lǝ bafokanɔfɔ kenke eto ǝnǝmi. Nyamfo luutǝ bafɛfɛ te sikpi nɛ.

²¹Nyaso nlɛ fǝ kɔlɛ bɔlɛ lǝ Onanto ku Kristo ku Onanto eto batɔnkpe kenke eto ǝnǝmi minkǝ lɛ nyamfo ola kukɔnɔ lǝ ayɛ betidi eto ǝnǝmi bobe bǝ lǝ esu ala utsyuǝ aso utsyuǝ. ²²Tsyǝ ǝsuǝ, mankpɔ lǝ ani butǝkǝ lǝ utsyuǝ ǝsuǝ itǝ kanantoyifo buyifo. Nya makɔko babuayifo saa, bomu lǝkǝ fǝ ǝsuǝ lǝ lebuayifoyifo saa ǝsuǝ.

²³Nya se kafo eto bufi nkpe fǝ lǝ ǝsuǝ esoo, mantɛyi fǝ ǝkǝnǝ ntu fufu ete. Yɔɔlɛkɛ bǝ ǝkǝnǝ nte sɛkɛ sɛkɛ fe kofa seka.

²⁴Betidi bǝtsyuǝ eto abua nnya beeyifo amfo bɔbiɔ nyaso yǝǝlǝkǝ mǝ dikpididi kate koko. Fɛ bǝtsyuǝǝ, kama kama fɛ mǝ asabuayifoyifo tsya lǝǝbǝ kabɔ bǝǝnyǝ. ²⁵Nko kǝ ini bǝ asasɛyifoyifo tsya ǝmbofo bɔbiɔ, nya nnya lɛbiɔ tsya ebubǝ ɛbɔɔ lekple utsyuǝ saa nyǝ.

¹Tɛyi bafokanɔfɔ ba ni ndomufɔ kenke fǝnkǝ ele bǝ babokosǝ mǝ ǝsuǝ kasɔ bǝtǝ mǝ banamute lǝ keyifokɔ, bǝ betidi saa embudi etiki bua saa itsyi lǝ Onanto ku bo bofokanɔ eto asatete ǝsuǝ. ²Nya ndomufɔ eto banamute ni bafokanɔfɔɔ, mántaka bǝńyǝ lǝ banamute bamǝ ǝsuǝ lǝ bofokanɔ eto sɛyimididi bataka. Bomu ele bǝ babokosǝ ǝsuǝ kasɔ bǝtǝ mǝ bawunsǝko mǝ kulaa enso. Itsyise betidi ba baanlɛ bɔwunsǝko mfoo, beyifo mba lefo Yesu banɔ. Nya mǝ ku mǝmǝ kenke eyifo wǝ bale ba woala tinti. Nyamfo ele bǝ te mǝ lǝ akpe mǝ nkɛale lǝ beyifo ele bǝ beyifo lǝ bakpe mǝ nkɛale.

Binyǝ Kekleke Lǝ Mi Onanto Kama Butǝkǝko Ǝsuǝ.

^3-4Utidi wǝ ke laate asa bamba nya laanlɛ bɔyɛ lǝ Bonamute Yesu Kristo eto Ditiki Sɛɛ ǝsuǝ, utsyǝ ǝmǝ lɛ wǝ ǝsuǝ kato bobesǝ unyi kulesa. Iyifo etiki bunǝ bimba ku kǝdiǝ ku bulǝ bimba ete woakpe. Nyamfo lǝǝtǝ betidi kǝnǝnsɛ, ndiǝkpekpe ku abiesese, ku nsusu bua bufi lǝ utidi ǝsuǝ nɛ. ⁵Nya bǝǝnǝ etiki kǝntsyɛɛ lefe saa. Betidi bamfo eto okle eto nsunsu ebukpǝ nya bensiyi Ditiki Sɛɛ nǝmǝ eto ɔnukualɛ. Mǝ nsusu ete ni bǝnkǝ bǝǝtǝkǝko Ditiki Sɛɛ nɛ mǝ kama lǝ bayɛ lǝ nnya ǝsuǝ bafiani batabinyǝ. Lǝkǝ fǝ ǝsuǝ etsyiko mbamfo eto okle ǝsuǝ.

⁶Fɛɛ lǝ utidi akpe ɔtsyini kekleke lǝ Onanto eto bɔsumu ǝsuǝ nya asa nnya nte wǝ tsya dídufǝ wǝ ǝnǝǝ, uyifo otabinyǝ. ⁷Itsyise fe kase bále boo, bóanlɛ kulesa boboko kawunsiǝ. Nya lǝ bukpe tsyaa, boǝmbufi kulesa busuko. ⁸Nyaso bitǝ lǝ bikǝ ku edisa nya ntǝ bo lǝ imi bo. ⁹Fɛɛ betidi ba laasɛsǝ ǝnǝmi lǝ bikǝ eto bɔkɛ ǝsuǝǝ, mǝ leedufǝ lǝ Obonsam eto uyibi wǝ obio utsyǝ mǝ nɛ. Nya beetsyiko asa bimba buyifo, nya beefi kawunsiǝ eto bikǝ bɔbɛbɛ kakpimi lǝ ǝsuǝ nya baabiasǝ mǝ nkpǝ itǝ bǝǝkpǝ kanya kulaa. ¹⁰Itsyise ǝnǝmi bɔsɛsǝ lǝ atabi bɔbɛbɛ ǝsuǝ laayɛnko asa bua kpǝ eto buyifo. Betidi bǝtsyuǝ lǝ kǝnǝsɛ lǝ atabi eto bɔkɛ eso áyansǝ mǝ bofokanɔ eto kusu. Nya mǝ nkpǝ kenke édufǝ lǝ bulǝ ǝsuǝ.

Ńyǝ Lǝ Bofokanɔ Eto Keyifo Eto Kusu Ǝsuǝ Kekleke.

¹¹Nya se feyifo utidi wǝ dífi fǝ ǝsuǝ utǝ Onanto esoo, lǝkǝ ǝsuǝ lǝ asa bua nyamfo kenke eto buyifo ǝsuǝ lǝ efi fǝ ǝnǝmi ǝtǝkǝ lǝ asa sɛɛ buyifo ǝsuǝ. Tǝkǝko Boanto Onanto lǝ bofokanɔ ku lelabi ǝsuǝ. Kɛ dibusǝ lǝ alɛ betidi buɛɛ. ¹²Ńyǝ kekleke lǝ bofokanɔ eto keyifo ǝsuǝ lǝ akpe nkɛale lǝ ǝnyǝ nkpǝ manlo manlo. Nkpǝ bomfo eso Onanto lékpadi fǝ lǝ lefe nǝ fáfo wǝ bokpadi eto bofokanɔ fáte lǝ mba díkafo babɔ ku babamba eto ǝnǝmi nɛ.

¹³Nya lǝ Onanto wǝ diyifo lesa saa ku Kristo wǝ dífǝ wǝ kɛnyɛ úlǝkǝ wǝ bofokanɔ óte lǝ Pontio Pilato eto ǝnǝmii, nlɛ mɔ Ditiki Sɛɛ bufi kǝtǝ fǝ, ini mɔ kɔfi. ¹⁴Nyaso nlɛ fǝ bɔtɛyi minkǝ lɛ asa nyamfo ola kase kuutsyuǝ lǝmbɔtɛyi kulesa bua itsyi lǝ fǝ ǝsuǝ isu ese lefe nǝ Bonamute Yesu Kristo luusinkli ubǝ. ¹⁵Nya Onanto ebutǝ Yesu Kristo sinkli ubǝ lǝ lefe nǝ ɛlɛkɛ itǝ wǝ. Onanto ni nwǝ nso kenke ku ni nwǝ fate nlɛ seka budi lǝ lesa saa ǝsuǝ, nya uni baka kenke eto oka. Nya lesa saa laakpo wǝ Bonamute Onanto. Nya wǝ ni nwǝ boatɛsǝ. ¹⁶Wǝ fate insi nkpǝ itsyise wǝǝkpe kulefe kulefe. Nya wǝǝyǝnde itǝ bǝ kuutsyuǝ saa ǝmbofo buńyǝ lǝ wǝ ǝnǝmi lǝ ɔlɛ bubǝ. Kuutsyuǝ saa mǝnnyǝ wǝ tɔ unyǝ nya kuutsyuǝ saa tsya ǝmbofo wǝ ǝnǝmi bobe. Nya atɛsǝ ku ǝsuǝale ni wǝ ale lefe saa. Ibǝ itǝ.

¹⁷Tɛyi mba nkpe kawunsiǝ kamfo eto bikǝ fǝnkǝ, bambesǝ ǝsuǝ kato befi mǝ ǝnǝmi bǝtǝkǝ lǝ mi, bikǝ bia lalo ǝsuǝ. Bomu befi mǝ ǝnǝmi bǝtǝkǝ lǝ Onanto ǝsuǝ. Wǝ uni lǝǝtǝ bo lesa saa kafo faa nkǝ lǝ bunyǝ disuǝyuǝ. ¹⁸Tɛyi mǝ fǝ bekeyifo kasɛɛ nya luutǝ boofiani batabinyǝ bǝnyǝ atsyɔkpokpo lǝ nnya buuyifo ǝsuǝ. Nya lǝ bǝkǝtǝ betidi asa kafo faa. ¹⁹Lǝ beyifo nkoo, balɛ bikǝ bia lambia bɔɔlɔ kǝtsyǝ itǝ mǝ ǝsuǝ lǝ kama ka nlɛ bubǝ. Lǝ nya ǝsuǝ boonyǝ nkpǝ tinti bǝtǝ ǝsuǝ.

²⁰Timoteo, be fǝ alɔ asa nnya Onanto dífi útǝ fǝ ǝtsyǝ kukɔnɔ. Memfi fǝ ǝsuǝ akpe lǝ eyifosa bimba ku etikinǝnǝ bimba ǝsuǝ. Nyamfo ǝsuǝ betidi bǝtsyuǝ laayɛ kawɛ betidi fe mba ni babesibe. ²¹Itsyise bǝtsyuǝ efi bǝ beyi asa nyamfo. Fɛɛ ɛyɛ lǝ nyamfo ǝsuǝ bányansǝ mǝ bofokanɔ eto kusu.

Nlɛ Onanto bɔtɔ miǝ ufi wǝ lefonǝ obe mi.