Nufule enú Bóol ŋɔ yɔɔ́ŋɔ́kɛ́ná
Filemɔ́ŋ
Bɛsana a bɛ́ ŋɔ yɔɔ́lɔ anyía bá lɔ́kɔ́máka bɔmbányɛ nyɛfana nyí nufule eenu
Filemɔ́ŋ ŋa nyɛmána wu ɔbámɔ́kɔ́na ɔɔcɔ u nyiínyi a bálɛ́ka ci Kolóso. U ŋaá bá mulumitinine Yésus. Nááyá belumitinine ŋa bɔ́ bá bábɔ́ ɔɔ́ndɛ́mákána (bik. 2). Filemɔ́ŋ ŋaá bá nyɛŋɔ́la nyí Bóol, wáŋa tɔ́na uuyé ɔɔ́nɔ́ u Elilé (bik. 19) ; wuúci na yɔɔ́lɛ́ nyiínyi ɛ́cɛ Onesime awɔ́ bá ŋa cámba e nufule nú Kolóso (4.9). Yááyɛ́ yɔɔ́lɛ́ eéyé ŋa cáŋa e nyíme, yó wuúci cabakɛna. Aá taaká bé ti ŋe menyi anyíatɛ́ u ŋaá cábákɛ́ná ciayɛ́ síkíne Filemɔ́ŋ, yɔ́ cɔba né Bóol awɔ́ u ŋaá bá eé ciíbe cɛ ɛcaná e ekúlú eéyé. Onesime ŋaá háya tɔ́na mɔŋɔlɛ́ né Yésus ; aáná Bóol ŋa lɛca bɔmbányɛ anyía wé hélúmúnyi Onesime né síkíne Filemɔ́ŋ.
A nyɛbɛ́kɛ́lɛ́na nyɛ́ yaátɛ́ ekúlú, Filemɔ́ŋ ŋaá nyɛmána wu ɔbɔ́nɔ́sia Onesime na nyɛhatɛ́ nyikime, ta anyía yó wuúci ɔ́ɔ́nɔ. Mbá e nufule eenu, Bóol ŋa laana Filemɔ́ŋ anyía u tɛ láta nyɛbɛ́kɛ́lɛ́na eényí mbá wá káha Onesime bɔmbányɛ, tɛ́ cáŋa i iŋetí cɛ yɔɔ́lɛ́ a yá cábákɛ́na síkíne, mbá wé wuúci káha i iŋetí ci onyíinyí u olumitinine.
1Bitéŋíti bí Bóol
1Yaŋɔ́ Bóol, ɛ ŋaá mɛ ɔ́ɔ́ŋɔ nufule eenu. Ya mɛ́ŋa eé ciíbe cɛ ɛcaná a asana yí *Yésus *Kilís ; na yaŋɔ́ ne uusú onyíinyí Timoté tú ŋa sɔ́ ɔ wɔɔ́ŋɛ́na nufule eenu, kuɔŋɔ́ yáásɔ́ ekendinyi yɛ́ ɔtɛ́má Filemɔ́ŋ awɔ́ tú ŋa sɔ́ nyiɔ buólí búmɔtɛ́. 2Tu ŋa sɔ́ ɔɔ́ŋɛ́na tɔ́na ne uusú onyíinyí e woónjú Abiya,1.2 Oónyí u Filemɔ́ŋ. na Alésibe1.2 uubú ɔɔ́nɔ́ awɔ́ u ŋaá bá wɔ́ nyiɔkɔ aá hiɔ́bɔ hí belumitinine hí Kolóso. yáásɔ́ ekendinyi yí biité, na hiɔ́bɔ hí belumitinine Kilís a hɛ́ náŋa hɛ́á bɛ́cɔ́kɔ́lɔ́kɛ́na *Bandɔ́mɛsɛ́ oówo eé ciíbe. 3Na cíásɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá banɔ́ sáyábákɛ́na, bá banɔ́ iínjíékíne mbuumu ɛ ɛtɛ́má noómi.
4Filemɔ́ŋ, ekúlú ekime ayɛ́ ɛ ŋa mɛ́ bɛ́cɔ́kɔ́lɛ́na Bandɔ́mɛsɛ́, ɛ ŋa mɛ́ ɔ bɛ́táá, i wuúci iínjíékíne bitéŋíti ɔ yɔ́ɔ́wɔ asana, 5anyía ɛ ŋaá mɛ lɔ́kɔ́máka bé bíkétíki anyía o ŋoó léne belumitinine bekime, e lumitekinine tɔ́na Otéŋí a Waáŋá Yésus. 6Ɛ ŋa mɛ́ báta Bandɔ́mɛsɛ́ anyía wá kɛla anyía nyɛlatana anyɛ́ ɔ ɔ́ŋa na basɔ́ o olumitinine noómi á kɛla anyía túésú ményi bɔmbányɛ bɛmbányɛ bɛ́ bɛnyɛ́ma bikime abɛ́ tua sɔ́ŋa ne biíbi o olíhe ewú tu ŋe sú líhe a asana ne Kilís.1.6 Nyɛkɔ́ŋɔ́na a nyɛ́mɔtɛ́ : « nyɛlatana anyɛ́ ɔ ɔ́ŋa ne nyiínyi a asana ne olumitinine e héyísíki ambányɛ́kɛ́ yí nyimenyi nyɛ́ bɛnyɛ́ma bikime abɛ́ tua sɔ́ŋa ne biíbi ne Kilís ».7Onyíinyí, ɛ ŋaá mɛ bá háyɛ nyitíne nyí bilúŋe, ɔtɛ́má yɔ́ mɛ kua a tɔɔna noómi a asana ne nyiléne enyí o ŋoó léne bɔsɔ́ɔ́kɔ́ belumitinine, e beébe kíndísíki ɛtɛ́má.
Bóol ma tɔ́ma Onesime né Filemɔ́ŋ
8Yaátɛ́ asana ta yɛ́ cáŋa á bá anyía ya mɛ́ŋa na makɛ́nda ma ɔ kuɔŋɔ́ laana bɔkɔ a bɔmbányɛ abɔ́ ɔ́ɔ nyɛmána wu ɔkɛlaka e nyimónjóló anyɛ́ tua sɔ́ŋa ne *Kilís, 9bú ŋaá hɔ́la o mi bíléníne anyía yámɛ ɔ bɛ́cɔ́kɔ́lɔ́kɛ́na a asana a yɛ́mɔtɛ́ anyía o ŋoó léne baacɔ : Yaŋɔ́ Bóol, elunyí yɛ́ ɔɔcɔ, yaŋɔ́ ooci aámbáya eé ciíbe cɛ ɛcaná a asana ne Yésus Kilís, 10ɛ ŋaá mɛ́ ɔ bɛ́cɔ́kɔ́lɛ́na a asana ne Onesime, uumi ɔɔ́nɔ́ ewú i ŋe mí bíéne né Yésus Kilís, yaŋɔ́ eé ciíbe cɛ ɛcaná. 11Wuúci u tɛ ɔ́mɔ́ bá wu ɔ yɔ́ɔ wɔɔ́lɔ́kɔ buúse bukime, mbá aámbáya wáŋa na nyiɔ́lɔ nyiéŋí1.11 Nyɛbɛ́kɛ́lɛ́na nyɛ́ tɔ́fiálɛ́ nyí nyiínyi nyí Onesime ; nyí ŋeé bíhémbule anyía « nyiɔ́lɔ ». aá basɔ́ bekime béfendí.
12Ícíoci í me mí hélúmúnyi ɔ kuɔŋɔ́ tɔ́mɛ́na. Wáŋa háyɛ úúmi ɔtɛ́má.1.12 Cɛ́mɔtɛ́ Ciɔɔ́ŋɛ́ cɛ́ buáyá áŋa na « Kuɔŋɔ́, wuúci káha bɔmbányɛ háyɛ wáŋa búámɛ bɔláŋá bɔ́ cɛɛ́tɔ. »13Ɛ ŋáa mɛ bá we olénéke anyía wɔ́ɔ lɔ́bɔ aaha na yaŋɔ́, u mɛ ɔɔ́lɔ́kɔ ɔɔ́wɔ a aháŋá ekúlú ekime ayɛ́ ya mɛ́ŋa aaha eé ciíbe cɛ ɛcaná a asana na Ambányɛ yɛ́ Ɛsɔ́ma. 14Mbá ɛ tɛ ɔ́mɔ́ kɛla aáná, anyía i ti ómó menyi nyiɔ́wɔ nyibíkéti. Ɛ tɛ ŋá mɛ aamba ɔ kuɔŋɔ́ eékínyi anyía ɔ́ɔ mɛ kɛ́la bɔmbányɛ, mbá bú ŋeé mi bíléníne anyía ɔ́ɔ mɛ kɛ́la bɔmbányɛ háyɛ úúwe ɔtɛ́má ŋe léne.
15Yááŋa háyɛ anyía Onesime ma yáálɔ́nána na kuɔŋɔ́ e hikúlúkúlú a hɛ́mɔtɛ́ anyía mbá ú ka hálɔ́mɔ́na nɔ́ɔ́wɔ, núénú límékíne balatánɔ́ ekúlú ekime. 16Mbá aámbáya u tɛ a bá tɔ́na hú yɔ́ɔ́wɔ yɔɔ́lɛ́, nyíáyɛ́ nyilimíné ŋa hɔ́la nyilimíné nyɛ́ yɔɔ́lɛ́ nyɛ́ bɔtɔhɔ ; wá yáaŋa tɔ́na uusú onyíinyí ewú tu ŋe sú léne. I ŋe mí wuúci léne buéŋí ; o kóó wuúci lénéke buéŋí ɔ mɛ hɔla na aháŋá yí imehú na aháŋá yí olumitinine.
17Mbɔ́kɔ ya mɛ́ŋa ɔlɔ́ɔwɔ, wuúci káha háyɛ ɔ ɔ́ŋa wu ɔ mɛ káha. 18Mbɔ́kɔ u ŋɔ́ yɔ́ɔ kɛla bɔkɔ a bɔɔbɛ́ a búmɔtɛ́, ta anyía o ŋoó wuúci bata buhíné a búmɔtɛ́, mɛ laána ; i ké mi o buúbu tuana. 19Yaŋɔ́ Bóol, ɛ́ ŋa mɛ́ ɔ wɔɔ́ŋɛ́na mehúnyi eeme ne úúmi ɔɔbɔ́ ú bɛ́muátá : Ɛ ŋa mɛ́ kɔɔna ɛsɛ́ i ké mi o buúbu tuana ; mbá atɛ bɛ́hɔ́ya anyía ɔ ɔ́ŋa na búámɛ buhíné tɔ́na, ɛ́cɛ kuɔŋɔ́ bɛ́muátá. 20Ɛ́ɛ, kuɔŋɔ́ uumi onyíinyí, mɛ nyiɔkɛ́na buólí eébú anyía tú ŋe sú léne Otéŋí a Waáŋá basɔ́ bekime ; mi hélúmúnyi ɔtɛ́má a tɔɔna anyía tua sɔ́ŋa e nyimónjóló ne Kilís.
21Ya mɛ́ŋa na mɔŋɔlɛ́ anyía ɔ ŋɔɔ́ cɔba ɔ ɔkɛlaka bɔkɔ abɔ́ ɛ ŋá mɛ́ ɔ bata. Yaátɛ́ asana ɛ ŋá mɛ ɔ wɔɔ́ŋɛ́na nufule eenu. I ŋe mí menyi anyía ɔ ŋɔɔ́ cɔba ɔ ɔkɛlaka ɔ ɔhɔla nyiámɛ nyɛkɔɔna.1.21 Bá ŋa lɛca e mehúnyi eémé nyɛbɛ́táá nyí indiitie nyɛ́ ɔháŋɔ́na Onesime a buɔ́lɛ́.22Ɛ ŋɔ mɛ́ ɔ bata tɔ́na anyía ɔ́ɔ mɛ tábɔ́nákɛ́na ekumbé ; ya mɛ́ŋa na mɔŋɔlɛ́ anyía Bandɔ́mɛsɛ́ káá sáyábɛ́na uúnú ɔbɛ́cɔ́kɔ́lɛ́na, yó mi hélúmúnyi náánɔ́.
Bóol ŋeé téŋi baacɔ
23Ɛbáfas awɔ́ tua sɔ́ŋa ne wuúci aaha eé ciíbe cɛ ɛcaná a asana yí Yésus *Kilís ŋo yóo téŋi. 24Na Malɛ́kus, na Alisitáak, na Tɛ́mas, na Lúkas, baláamɛ bé buólí ŋe bú o téŋí tɔ́na.
25Otéŋí a Waáŋá Yésus Kilís á banɔ́ sayábákɛ́naʼo !