Kalasi

Nufule enú Bóol ŋɔ yɔɔ́ŋɔ́kɛ́ná belumitinine bá

Kalasi

Bɛsana a bɛ́ ŋɔ yɔɔ́lɔ anyía bá lɔ́kɔ́máka bɔmbányɛ nyɛfana nyí nufule eenu

Bóol ŋɔ yɔɔ́ŋɔ́kɛ́ná tuɔ́bɔ tú belumitinine tú iisí cɛ Asi Minɛ́ɛl ; wuúci u ŋeé beébe hulíkínyi Ambányɛ yɛ́ Ɛsɔ́ma e cííyé ɛkanda ci buólí eébú ; na ɛ ɛkanda ífendí na ɛ ɛkanda ɛ́tátɔ́ (BBƐ 16.6 ; 18.23). Baacɔ beéŋí bɔ́ hákɛ́na mɔŋɔlɛ́ né Yésus, ne Besuif na baacɔ bá mɔnɔŋɔ me etémbí áyá.

Yááŋa anyía Besuif a bɔ́ŋa na nyíábɔ́ nyɛbɛ́kɛ́lɛ́na anyɛ́ ɔɔcɔ okime eé beébe á nyɛmaná wu ɔlátákɛ́na. Nyɛ́áŋa anyía ɔwááca ɔɔ́nɔ́ ɔnɔ́mɔcɔ́ okime. Hibílícínyínyí hɛ́ nyíábɔ́ nyɛlatana na *Bandɔ́mɛsɛ́ híáŋa.

Aáná, ekúlú ayɛ́ baacɔ a bá tɛ abɔ́ bá Besuif ŋe bú túme ɔháya mɔŋɔlɛ́ né Yésus, bɔ́mɔtɛ́ ŋa bɔ́ bá bábɔ́ kɔɔnaka báyɛ ɔɔcɔ okime awɔ́ u tɛ a bá ɔɔcɔ u Besuif ŋa nyɛmána wu ɔ cáŋa látákɛ́na bikotí bí Besuif, hɔlákáhɔ́láka ɔbɛ́áca, ɔ ɔkɛla anyía mbá Bandɔ́mɛsɛ́ é wuúci hiíte háyɛ atálɛ́mánánɔ́ yɛ́ ɔɔcɔ eeyé eé buúse. Mbá Bóol, wuúci u ŋaá bá wé yeékúnyíki anyía ɔɔcɔ awɔ́ u ŋaá háya mɔŋɔlɛ́ né Yésus, Bandɔ́mɛsɛ́ ŋa kɛla anyía wá bá atálɛ́mánánɔ́ yɛ́ ɔɔcɔ, mbá tɛ́ cáŋa a asana na ɔbɛ́áca.

A asana eyí Bóol ŋaá lɔ́kɔ́máka anyía ɔkɔ́tɛ́mákánɔ́ yí nyiékúnyi eényí ma yáányána ɛ ɛkatɛ́katɛ́ cɛ tuɔ́bɔ tú belumitinine tɔ́ Kalasi, ɛ́ɛhɛ́ u ŋeé beébe ɔɔ́ŋɛ́na nufule eenu o okoó beébe hálámánána a ambányɛ yí ohónyí.

Bú ŋa hɔ́la ɔhɛka anyía ɔ́ɔ cáŋa omenyi bɔmbányɛ asana yɛ́ Abɛ́laham, ɔ ɔkɛla anyía ɔ́ɔ lɔ́kɔ́máka bɔmbányɛ bɔmbányɛ bɛsana bí nufule eenu. Abɛ́laham ŋaá bá wa yánáŋa iindú, mbá Bandɔ́mɛsɛ́ ŋá lɛca anyía u ŋaá háya mɔŋɔlɛ́ nááyá ; aáná u ŋeé wuúci hiíte háyɛ atálɛ́mánánɔ́ yɛ́ ɔɔcɔ eeyé eé buúse (Sɛn 15.6). E elime eécí, bá ŋa yááca Abɛ́laham háyɛ hibílícínyínyí hɛ́ nyɛlatana ne wuúci na Bandɔ́mɛsɛ́ (Sɛn 17.11). Fanáka tɔ́na Lom 4.11-12.

¹Yaŋɔ́ Bóol ɛ́ ŋa mɛ́ banɔ́ ɔɔ́ŋɛ́na nufule eenu. Ya mɛ́ŋa *ɔɔcɔ u ɛndɔ́ma u *Yésus *Kilís, tɛ́ cáŋa a makɛ́nda ma baacɔ, ta anyía a nyɛkɛla nyɛ́ ɔɔcɔ a wɔmɔtɛ́. Mbá ya mɛ́ŋa ɔɔcɔ u ɛndɔ́ma a makɛ́nda ne me Yésus Kilís na ma ciasɔ́ Síkíne *Bandɔ́mɛsɛ́. Wuúci u ŋeé héenyi Yésus e biwéewé. ²Na yaŋɔ́ ne benyíinyí bé olumitinine bekime a bá bɔ́ŋa aaha tu ŋa sɔ́ banɔ́ téŋi, banɔ́ tuɔ́bɔ tú belumitinine tú iisí ci Kalasi.

³Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá banɔ́ sayábákɛ́na, bá banɔ́ iínjíékíne mbuumu ɛ ɛtɛ́má noómi. ⁴Énu menyí anyía Kilís ŋeé bílénékíné okoówé a yáásɔ́ asana anyía mbá Bandɔ́mɛsɛ́ á basɔ́ nyɛ́ánákɛ́nɛ́na maasɔ́ maabɛ́, mbá u basɔ́ kétúnyíki a bɛɛbɛ́ bɛ́ bɛsana bɛ́ ɔmɛsɛ́ ooci. U ŋaá kɛ́láka aáná a nyɛháŋa nyɛ́ cíásɔ́ Síkíne Bandɔ́mɛsɛ́. ⁵Nuúmi á bámɔ́kɔ́na ná Bandɔ́mɛsɛ́ bikúlú bikime, híáná yááŋa.

⁶Báámɛ benyíinyí, Bandɔ́mɛsɛ́ ŋaá banɔ́ lɔ́ŋɔ́kɔ a asana na yaála yí nuubo yí Yésus Kilís. I ŋeé mi kéké buéŋí ɔ ɔhɔla anyía nú me tényí enú wuúci bɛ́yúataka, nuó túme ɔlátɛ́na nyɛnamá nyɛ́ ambányɛ yɛ́ ɛsɔ́ma yí etémbí a yɛ́ tɛ á bá ambányɛ.1.6 Baacɔ a bá ŋa bɔ́ bá bébú húlikinyi bɔsɔ́ɔ́kɔ́ ambányɛ yɛ́ ɛsɔ́ma yí etémbí eéyé ŋa bɔ́ bá bébú beébe eékíkínyi o yiíyi látɛ́na ɔ ɔlata na ɔháya mɔŋɔlɛ́ né Kilís, ne okéke ú bikotí bí Besuif bikime.⁷Aá taaká nyɛnamá nyɛ́ ambányɛ yɛ́ ɛsɔ́ma yí etémbí tɛ á bá. Asana ɔ́mɔtɛ́, baacɔ a bɔ́mɔtɛ́ á bɔ́ŋa hɔ́á e bé ŋe bú túŋúlinyi cíínú ɛtɛ́má ; bá ŋa bɔ́ áamba otúmúlíene Ambányɛ yɛ́ Ɛsɔ́ma a yɛ́ ŋa lɛca Kilís. ⁸Ɛ ŋa mɛ́ banɔ́ láana anyía mbɔ́kɔ ɔɔcɔ a wɔmɔtɛ́ ŋáá banɔ́ húlíkínyi ambányɛ yɛ́ ɛsɔ́ma yí etémbí a yɛ́ tɛ á bá eeye ayɛ́ tu ŋa sɔ́ banɔ́ húlíkínyi, Bandɔ́mɛsɛ́ é wuúci lɔmɔ́kɔ,1.8 Fanáka 1Kɔ 16.22 ; Lom 9.3. ta yɛ́ caŋa á bá basɔ́, te elilé yɛ́ bɔsɔ́ma yɛ́ Bandɔ́mɛsɛ́ a yɛ́mɔtɛ́. ⁹Tu na maá sɔ́ banɔ́ láakɛna, tu ŋa sɔ́ hálɔ́mɔ́nɛ́na ɔ banɔ́ láana aámbáya anyía, mbɔ́kɔ ɔɔcɔ a wɔmɔtɛ́ ŋaá banɔ́ húlínyi ambányɛ yɛ́ ɛsɔ́ma yí etémbí a yɛ́ tɛ á bá eeye ayɛ́ nu ŋa nɔ́ lɔ́kɔ́máká, núó lumitinine, Bandɔ́mɛsɛ́ é wuúci lɔmɔ́kɔ.

¹⁰Ɔ́kɔ, aámbáya, ɛ ŋa mɛ́ aamba anyía baacɔ é mi lémbíki ayɛ́ʼ Bandɔ́mɛsɛ́ e ? Aá yaŋɔ́, i ŋeé mi léne anyía Bandɔ́mɛsɛ́ á nyɛmána wu o mi lémbíki. Mbɔ́kɔ ɛ ŋa mɛ́ aamba taaká anyía yémi bílénékíne baacɔ, ɛ tɛ ámɛ bá munyiɔnɔ mu Kilís.

¹¹Baláamɛ, énu menyí anyíaʼo : Ambányɛ yɛ́ Ɛsɔ́ma ayɛ́ ɛ ŋa mɛ́ banɔ́ húlíkínyi ti ómo húle ná ɔɔcɔ a wɔmɔtɛ́. ¹²Ta ɔɔcɔ a wɔmɔtɛ́ ti ómo mi yiíyi laana, te o mi yiíyi eékúnyi ; mbá Yésus Kilís ú ŋe mi yiíyi nambɔ́nɛ́na.

¹³Nu tɛ ŋá nɔ́ nána uúmi olíhe ú buáyá, ekúlú ayɛ́ ɛ ŋaá mɛ bá yamɛ́ látákɛ́na abɛ́kɛ́lɛ́na cé olumitinine ú *Besuif ; ɛ ŋa mɛ́ bá yémi tékeseke buéŋí tuɔ́bɔ tú belumitinine Kilís, ɛ aámbáka ohónyí okime wú o tuútu menyisiki. ¹⁴Baacɔ bé híími hɛɛya ŋa bɔ́ bá bábɔ́ látákɛ́na abɛ́kɛ́lɛ́na cé olumitinine ú Besuif eécé, mbá yaŋɔ́ ɛ ŋaá mɛ bá yémi beébe hɔlaka o o biíbi látɛ́na ; i ŋeé mi bíínjíé e nyiwééné a nyɛlátɛ́na nyɛ́ abɛ́kɛ́lɛ́na cá babaabá, mío beébe hɔlaka.

¹⁵Mbá, Bandɔ́mɛsɛ́ ŋaá mɛ́ lɔ́tɔ́, yaŋɔ́ tɛ́ka ne obíbíéne. U ŋeé mi boosíki ekúlú e yí ŋeé wuúci bílénékíné, yɔ́ mɛ lɔ́ŋɔ́kɔ anyía yémi wuúci nyiɔkɛna buólí. ¹⁶U ŋa mɛ́ nambɔ́nɛ́na uúyé Ɔɔ́nɔ́ anyía yémi wuúci menyi, mbá i hulíkínyi baacɔ a bá tɛ ábɔ́ bá Besuif Ambányɛ yɛ́ Ɛsɔ́ma ; ɛ tɛ ɔ́mɔ kɔ báta ɔɔcɔ ta bɔkɔ. ¹⁷Yaŋɔ́ ta ɔcɔba eé *Yelúsalɛm né eebe a bá ŋa bɔ́ cáŋa ɔbámɔ́kɔ́na *baacɔ bá ɛndɔ́ma na yaŋɔ́. Mbá i ŋe tényí ámɛ cɔba fiaŋɔ a Alabi;1.17 Iisí na a bulɔɔ́lɔ na a aháŋá yɛ́ nyɛhatɔna nyɛ́ ɔɔ́cɔ́ a Balɛstíne. e elime eécí, ɛ ŋa kaá mɛ halɔ́mɔ́na aá Tamás. ¹⁸E elime cɛ tuɔŋɔ tɔ́tátɔ́, nyiámɛ nyɛcɔba eényí eé Yelúsalɛm anyía tuésú ményínyi ne Bíel. I ŋe mí limékíne ne wuúci hú mɔɔ́sɛ́ buunyi. ¹⁹Yaŋɔ́ ta ɔlɛca ɔɔcɔ u ɛndɔ́ma u Yésus u etémbí ; mbá ɛ ŋa mɛ́ lɛcá Sáak, onyíinyí1.19 Bɔ́mɔtɛ́ baacɔ ŋa bɔ́ lɔ́kɔma aaha anyía « onyíinyí », ta anyía « onúséyé ». Sáak ooci ŋaá bá ɔɔcɔ ɔmɔtɛ́ u bekendisi belumitinine eé Yelúsalɛm. U ŋɔɔ́ yɔɔ́ŋɔ́kɔ́ nufule nɔ́ Sáak. Fanáka tɔ́na Kal 2.9, 12 ; BBƐ 15.13 ; 21.18 ; 1Kɔ 15.7. u Otéŋí a Waáŋá. ²⁰Aá taaká, eé nyiínyi nyɛ́ Bandɔ́mɛsɛ́, bɛsana eebi abɛ́ ɛ ŋa mɛ́ kɔɔna áŋa taaká, i ti ŋé mi néŋe.

²¹E elime eécí, ɛ ŋa mɛ́ cɔbá i iisí ne ci Silíi ne ci Silisí. ²²Mbá a aháŋá na tuɔ́bɔ tú belumitinine Kilís tú iisí ci *Yuté, bá ŋa bɔ́ bá ɛ́cɛ bá tɛ ŋa bɔ́ mɛ lɛcá ta buɔ́sɛ́ ; ²³bá ŋa bɔ́ bá bábɔ́ lɔ́kɔ́máka bɔ́ lɔ́kɔ́máka bɔsɔ́ɔ́kɔ́ ábɔ́ táŋáka, bá kɔ́ɔnaka báyɛ : « Ɔɔcɔ awɔ́ u ŋaá bá waá basɔ́ tékeseke buáyá a yáaŋa o ohulinyi baacɔ aámbáya anyía bá hákɛ́na mɔŋɔlɛ́ né Kilís, asana ayɛ́ u ŋaá bá wa yáambaka omenyisi buáyá ! » ²⁴Aáná bá ŋa bɔ́ bá bébú iínjíékíne Bandɔ́mɛsɛ́ nuúmi aámɛ a asana.

Ne Bóol na Baanábas ŋa bɔ́ bɛ́bándákána na baacɔ bá ɛndɔ́ma

¹Ɛ́makɛ́la tuɔŋɔ túɔ́hátá ne túnyíse á hɔ́láka, nyiámɛ nyɛhálɔ́mɔ́na eényí eé Yelúsalɛm ɔlɔŋɔ na *Baanábas.2.1 Ɔɔcɔ u bɔnyɛ Léfi. U ŋaá háya mɔŋɔlɛ́ né Yésus. U ŋgeé síke Bóol e úúyé ɔkanda ú buúse wú ohúle húlinyi baacɔ Ambányɛ yɛ́ Ɛsɔ́ma. Ɛ ŋa mɛ́ cɔbána tɔ́na Tite.2.1 Tite ta ɔbá u Besuif, mbá u ŋaá háya mɔŋɔlɛ́ né Yésus. Bóol ŋeé wuúci ɔɔ́ŋɔ́nɛ́na nufule a númɔtɛ́. A nyɛlɛca nyɛ́ baacɔ beéŋí, ɔkanda oócí áŋa ɔkanda ewú bé ŋeé bíkéti e BBƐ 11.30 ; 12.25ɔ hiɔŋɔ hoóhi 46.²Ɛ ŋa mɛ́ cɔba ɔ ɔkanda oócí anyía Bandɔ́mɛsɛ́ ú ŋeé mi tóŋínyi anyía yámɛ cɔba. Tu ŋa sɔ́ bɛ́bándákána na baacɔ bá maatá masáánɔ́ a mafákálɛ́ana, mío beébe búlúnékíne asana yɛ́ Ambányɛ yɛ́ Ɛsɔ́ma ayɛ́ ɛ ŋaá mɛ bá yémi hulikinyi baacɔ a bá tɛ ábɔ́ bá *Besuif. Ɛ ŋaá mɛ bá i ti émi léne anyía ne buólí abɔ́ ɛ ŋa mɛ́ nyiɔkɔ ne buólí abɔ́ ɛ ŋa mɛ́ nyiɔ á bɛ́cáŋáka buólí bú nubókó. ³Mbá baacɔ eébé ti ómo bú eékínyi ta aláamɛ Tite, ɔɔcɔ u *Kɛlɛ́k, anyía wá bɛ́áca. ⁴Ta yɛ́ caŋa á bá anyía baacɔ a bá ŋa bɔ́ bɛ́sɔ́ɔ́nɔ́kɛ́na e uúsú ɔlɔŋɔ, bé bíhiíteke háyɛ belumitinine *Kilís, ŋa sɛ́ bébú wuúci aacá. Bá ŋa bɔ́ bɛ́sɔ́ɔ́nɔ́kɛ́na háyɛ tuféfí anyía bábɔ́ lɛ́cáka anyána nyíásɔ́ nyimónjóló ne Yésus Kilís ŋaá basɔ́ ááŋia a buɔ́lɛ́ bɔ́ nyɛlátɛ́na nyí *bikotí bí Besuif, mbá bá aámbáka ɔ basɔ́ hélúmúnyi a buɔ́lɛ́ eébú. ⁵Mbá, tu tɛ ɔ́mɔ sɔ́ bɛ́nyɛ́ana te hikúlúkúlú, mbá ta ɔlɔ́kɔ́ma ta bɔkɔ ; tu lénéke hú anyía Ambányɛ yɛ́ Ɛsɔ́ma a yááŋa taaká ɔ́ lɔbɔ híáná náánɔ́. ⁶Mbá ta baacɔ ɔ bɔ́mɔtɛ́ abá baacɔ ŋa bɔ́ bá bábɔ́ lɛcaka háyɛ baacɔ bá maatá masáánɔ́ ti ómo bú sólínyi ta bɔkɔ bú etémbí a búmɔtɛ́ a bɛsana abɛ́ ɛ́ ŋa mɛ́ kɔɔnáka. Mbá baacɔ eébé tɛ ɔ́mɔ bɔ́ bá háyɛ bɔkɔ a búmɔtɛ́ a nyiámɛ nyɛlɛca, anyía eé buúse bɔ́ Bandɔ́mɛsɛ́, baacɔ bekime á bɔ́ŋa bɔkɔ búmɔtɛ́. ⁷Baacɔ eébé ŋa bɔ́ lɛ́ca anyía Bandɔ́mɛsɛ́ ŋeé mi iínjíé bɔsɔ́ma bú ohulikinyi baacɔ a bá tɛ ábɔ́ bá Besuif Ambányɛ yɛ́ Ɛsɔ́ma, bɔkɔ búmɔtɛ́ háyɛ u ŋe yíínjíé Bíel anyía wé yiíyi hulíkínyi Besuif. ⁸Yááŋa anyía Bandɔ́mɛsɛ́ ewú u ŋe yíínjíé Bíel makɛ́nda ma ɔbámɔ́kɔ́na ɔɔcɔ u ɛndɔ́ma u Besuif, wuúci u ŋeé mi iínjie makɛ́nda ma ɔbámɔ́kɔ́na ɔɔcɔ u ɛndɔ́ma u eebe a bá tɛ ábɔ́ bá Besuif. ⁹Aáná na Sáak, ne Bíel, na Sáaŋ, *bekendisi belumitinine bá hɔ́á, ŋa bɔ́ lɛca anyía Bandɔ́mɛsɛ́ ú ŋe mi cumé buólí eébú. Nyɛ basɔ́ téŋíki na aabá eényí na yaŋɔ́ na Baanábas, bú tóŋgínyi anyía tua sɔáŋa a nyɛlɔ́kɔ́mána nyí buólí ne beébe. Aáná tu ŋa sɔ́ cɔba ɔ ɔkɔɔ́nyiɔnɔ baacɔ a bá tɛ ábɔ́ bá Besuif ; beébe, bá ŋá cɔbá ɔ ɔkɔɔ́nyiɔnɔ Besuif. ¹⁰Asana ɔ́mɔtɛ́ ayɛ́ bá ŋa bɔ́ basɔ́ bátá ŋaá bá hú anyía tu tɛ bɛ́hɔ́ya ɔwɔɔ́lɔ́kɔ báábɔ́ belumitinine a bá bɔ́ŋa na ɔsɔ́ka ; asana eéyé i ŋe mí bíínjíé o búle kɛla tɔ́na.

Bóol ŋaá kákálɛ́na Bíel a Antióse

¹¹Ɛ ŋaá mɛ kákálákɛ́ná te Bíel ɛ ɛkatɛ́katɛ́ ci belumitinine, ekúlú ayɛ́ u ŋaá bá a Antióse2.11 Antióse yí Silíi (fanáka BBƐ 11.19-26). anyía ú ŋaá bɛ́kɛ́lákɛ́na taaká bɔɔbɛ́. ¹²Yááŋa anyía, a nyíáyɛ́ nyɛkaáháma a Antióse, Bíel ŋaá bá weé nyíékínyi na baacɔ a bá tɛ ábɔ́ bá *Besuif. Ɛ́makɛ́la baacɔ e bé ŋe bú húlé hoóhi na Sáak á ka bɔ́ hámá, Bíel nyitúme ohúébe eényí ; u ti túné nyíényi ne beébe anyía u ŋaá bá weé líkíméke Besuif a bá ŋa bɔ́ bá bábɔ́ kɔ́ɔnaka anyía baacɔ bekime ŋá bɔ́ nyɛmána bá ɔbɛ́ácáka.2.12 Yɛ́ ŋaá bá e bikotí anyía ɔɔcɔ u Besuif ti nyíényi na baacɔ a bá tɛ abɔ́ bá Besuif.¹³Báásɔ́ benyíinyí bé Besuif a bɔ́mɔtɛ́ nyitúme ɔlátɛ́na nyɛkɛlaka nyí Bíel eényí ɔ ɔkɔɔ́háma ayɛ́ bé ŋe bú bísúétíne ta *Baanábas e mesíŋítí ma nyɛbɛ́kɛ́lɛ́na eényí. ¹⁴Ɛ́makɛ́la yámɛ lɛca anyía bá tɛ ŋá bɔ́ bɛ́kɛ́lɛ́na háyɛ indélímínyínyi cɛ taaká cɛ Ambányɛ yɛ́ Ɛsɔ́ma ŋo tóŋínyi, nyiámɛ nyɛhatɔna eényí ɛ ɛkatɛ́katɛ́ ci belumitinine bekime, i ŋé túme ɔkákálɛ́na Bíel, mbá ɛsɛ́ : « Huúúʼ baabá ! Mbɔ́kɔ kuɔŋɔ́ awɔ́ ɔ ɔ́ŋa u Besuif, óo líhéke aaha háyɛ ɔɔcɔ awɔ́ u tɛ á bá u Besuif, anyíatɛ́ ɔ ŋɔɔ́ waamba oweékínyi baacɔ a bá tɛ ábɔ́ bá Besuif anyía bé líhéke, bá bɛ́kɛ́lákɛ́na háyɛ Besuif e ?

¹⁵Basɔ́, bá ŋaá basɔ́ bíénéké Besuif, tu tɛ asɔ́ bá bakɛla maabɛ́ e bé ŋe bú húle ɔ mɔnɔŋɔ me etémbí. ¹⁶Ta híáná, tu ŋe sú menyi anyía atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́ áŋa ooci awɔ́ u ŋaá háya mɔŋɔlɛ́ né Yésus *Kilís, tɛ́ cáŋa ooci awɔ́ u ŋa látɛ́na *bikotí. Ta basɔ́ tɔ́na tu ŋa sɔ́ hákɛ́ná mɔŋɔlɛ́ né Yésus Kilís ɔ ɔkɛla anyía Bandɔ́mɛsɛ́ á kɛla anyía túásɔ́ bámɔ́kɔ́na bɛtálɛ́mánánɔ́ bɛ́ baacɔ eéyé eé buúse, tɛ́ cáŋa anyía tu ŋa sɔ́ látɛ́na bikotí, ananyía nyɛlátɛ́na nyí bikotí tɛ ŋáá kɛ́la anyía ɔɔcɔ á bá ɔtálɛ́mánánɔ́ eé buúse bɔ́ Bandɔ́mɛsɛ́. »2.16 Fanáka Maŋ 143.2.¹⁷Basɔ́ Besuif, tu ŋa sɔ́ áamba ɔbámɔ́kɔ́nɛ́na bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́ anyía tu ŋa sɔ́ háya mɔŋɔlɛ́ né Kilís. Ekúlú ayɛ́ tu ŋa sɔ́ kɛla aáná, tɛ́ka tua sɔáŋa háyɛ eebe a bá náŋa bábɔ́ kɛlaka bɔɔbɛ́ e ? Mbá Kilís áŋa wu ɔ basɔ́ nyɛ́kɛtakɛna ɔ ɔkɛla bɔɔbɛ́ e ? Eéʼeé, bú tɛ á bá aáná buúse bukime. ¹⁸Aana búáŋa : Mbɔ́kɔ ɔɔcɔ ŋaá nyɛana nyɛlátɛ́na nyí bikotí anyía nyɛ́ tɛ ŋɔ́ɔ yɔɔ́lɔ o ofúúmínyi ɔɔcɔ, mbá u háná halɔ́mɔ́na ɔlátɛ́na bikotí anyía bɛ́áŋa bí o wuúci ɔ́ɔlɔ o ofúúméne, yaátɛ́ ekúlú eéyé ɔɔcɔ oócí ŋa kɛla bɔɔbɛ́ eé buúse bɔ́ Bandɔ́mɛsɛ́. ¹⁹A asana a yɛ́ ŋa lɛca nyɛlátɛ́na nyí bikotí, yaŋɔ́ yamɛ́ á báka owéénú noómi, anyía mbá yémi líhéke ɔ ɔnyiɔnɔ Bandɔ́mɛsɛ́ buólí, ya mɛáŋa ɔwáátákɛ́nánɔ́ ɔ ɔmbásá ɔ ɔmuaná ɔlɔŋɔ ne Kilís. ²⁰Ɛ tɛ ŋá háná émi líhe a ciamɛciamɛ, mbá Kilís u ŋa kɛ́la anyía yémi líhéke. Yááŋa anyía, úúmi olíhe ú aámbáya, i ŋe mí wuúci líhe ɔ mɔŋɔlɛ́ amá ɛ ŋaá mɛ háya ná Ɔɔ́nɔ́ u Bandɔ́mɛsɛ́. U ŋeé mi lénéke, yó bílénékíne okoówé aámɛ a asana. ²¹Ɛ tɛ ámɛ bá wu ɔbɛ́sáŋɔ́na bɔmbányɛ bɔ́ yaála yí nuubo yɛ́ Bandɔ́mɛsɛ́ a asana na nyɛlátɛ́na nyí bikotí anyía, mbɔ́kɔ ɔɔcɔ ŋe fúúméne eé buúse bɔ́ Bandɔ́mɛsɛ́ a asana na nyɛlátɛ́na nyí bikotí, bú ŋo tóŋínyi anyía owé ú Kilís tɛ ŋɔ́ yɔ́ɔ́lɔ buúse bukime.

Olumitinine ŋa yáaŋia ɔɔcɔ a buɔ́lɛ́ bú bikotí

¹Banɔ́ baacɔ bá Kalasi, anyána ! Nu tɛ anɔ́ bá na bɛɛtɔ́ e ? Aányɛ́ u ŋaá banɔ́ cáŋgɛ́na ɛtɛ́má e ? Yaŋɔ́ ɛsɛ bá ŋaá banɔ́ búlúnékíné bɔmbányɛ anyána Yésus *Kilís ŋeé wé waátákɛ́nánɔ́ ɔ ɔmbásá e ? Mbá anyána ! ²Ánɔ mɛ́ bɛ́káma hú ɛmbataka eeci : Bandɔ́mɛsɛ́ ŋaá banɔ́ íínjíé yááyɛ́ Elilé anyía nyɛlátɛ́na nyí *bikotí ayɛ́ʼ, anyía nu ŋa nɔ́ lɔ́kɔ́máká Ambányɛ yɛ́ Ɛsɔ́ma, núó yiíyi lumitekinine e ? ³Nu tɛ anɔ́ bá na bɛɛtɔ́ eenyi e ? Banɔ́ ebé nú ŋe nú túméké buáyá na makɛ́nda me Elilé, anyána nu ŋa nɔ́ áamba aná okuenyinyi na makɛ́nda ma nyɛbɛ́táá nyɛ́ baacɔ e ? 3.3 Nyɛkɔ́ŋɔ́na a nyɛ́mɔtɛ́ : « Na maanɔ́ makɛ́nda ma bɛ́muátá ɛ́cɛ nu ŋa nɔ́ áamba ɔbámɔ́kɔ́na befúúménénú e ? »⁴Ɛ́cɛ anyía anamánamá cá bɛsana acɛ́ nu na ma nɔ́ lɛ́caka tɛ ŋá banɔ́ ɔ́ɔ́lɔ buúse bukime e ? 3.4 Nyɛkɔ́ŋɔ́na a nyɛ́mɔtɛ́ : « Nu ŋe nú híítéke anamánamá cé indekese e etémbí ne etémbí e ? » Yááŋa asana yí indekese acɛ́ Bakalasiɛ́ŋ ŋe bú híítéke. Aá taaká bɛ́áŋa etémbí e ? ⁵Ɔ́kɔ Bandɔ́mɛsɛ́ ŋaá banɔ́ iínjíé yááyɛ́ Elilé, yɔ́ kɛlaka *bikéki bɛ́ bɛsana náánɔ́ anyía nyɛlátɛ́na nyí bikotí ayɛ́ʼ, anyía nu ŋa nɔ́ lɔ́kɔ́máká Ambányɛ yɛ́ Ɛsɔ́ma, nuó yiíyi lumitekinine e ?

⁶Ánɔ bɛ́táá asana yɛ́ *Abɛ́laham : U ŋaá háyá mɔŋɔlɛ́ ná Bandɔ́mɛsɛ́, buátɛ́ bɔkɔ Bandɔ́mɛsɛ́ ŋeé wuúci lɛcá háyɛ atálɛ́mánánɔ́ yɛ́ ɔɔcɔ eeyé eé buúse.3.6 Fanáka Sɛn 15.6.⁷Énu menyi bɔmbányɛ anyía hú baacɔ a bá ŋa bɔ́ hákɛ́ná mɔŋɔlɛ́ ná Bandɔ́mɛsɛ́ á bɔ́ŋa taaká cɛ́ baáná bá Abɛ́laham. ⁸Ciɔɔ́ŋɛ́ cɛ́ Bandɔ́mɛsɛ́ ŋe bíkétíki buáyá anyía u káá kɛ́laka anyía baacɔ a bá tɛ ábɔ́ bá *Besuif á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse a asana ne úúbú olumitinine. Ɛ́ɛhɛ́ Bandɔ́mɛsɛ́ ŋaá laána Abɛ́laham ɔsɛ : « Ɛ ká mɛ́ hɔlɛna nɔ́ɔ́wɔ ɔ ɔsayabɛna baacɔ bekime bá ɔmɛsɛ́. »3.8 Sɛn 12.3⁹Abɛ́laham ŋee lumítíníne, ɛ́ɛhɛ́ Bandɔ́mɛsɛ́ ŋeé wuúci sayábɛ́na. Aáná baacɔ bekime e bé ŋe bú lúmitinine, Bandɔ́mɛsɛ́ kéé beébe sáyábákɛ́na tɔ́na.

¹⁰Yááŋa anyíaʼo, baacɔ bekime e bé me bú bíínjie a nyɛlátɛ́na nyí bikotí á búáŋa bɔlɔmɔ́kɔ́nɔ́, anyía yááŋa yɔɔ́ŋɔ́kɔ́nɔ́ anyía « Ɔɔcɔ okime ewú u ti ŋée bíínjie ekúlú ekime ɔ ɔlátɛ́na bɛsana bikime a bɛ́áŋa bɛɔ́ŋɔ́kɔ́nɔ́ e nufule nú bikotí áŋa na nyɛlɔmɔ. »3.10 Tet 27.26¹¹Tu ŋe sú ményi bɔmbányɛ anyía ta ɔɔcɔ tɛ á bá wu ɔbá atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́ a asana na nyɛlátɛ́na nyí bikotí. Yááŋa aáná anyía : « Ɔɔcɔ a wáŋa atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́ anyía u ŋaá háya mɔŋɔlɛ́ nááyá kéé líhéke taaká ci olíhe. »3.11 Aba 2.4. Nyɛkɔ́ŋɔ́na a nyɛ́mɔtɛ́ : « Atálɛ́mánánɔ́ yɛ́ ɔɔcɔ kéé líhéke e úúyé olumitinine. »¹²Mbá nyɛálɔ́nána áŋa hɔ́á ɛ ɛkatɛ́katɛ́ cɛ na ɔɔcɔ awɔ́ u ŋa látɛ́na bikotí ne ooci awɔ́ u ŋaá háya mɔŋɔlɛ́ ná Bandɔ́mɛsɛ́. Yááŋa yɔɔ́ŋɔ́kɔ́nɔ́ anyía : « Ɔɔcɔ okime awɔ́ u ŋa látɛ́na bɔmbányɛ bikotí bikime káá bá ne olíhe a asana ne biíbi. »3.12 Lef 18.5

¹³Bandɔ́mɛsɛ́ ŋaá basɔ́ lɔ́mɔ́kɔ basɔ́ bekime anyía tu tɛ ɔ́mɔ sɔ́ látɛ́na bikotí bikime. Mbá Kilís ŋaá faáya, yɔ́ basɔ́ háŋɔ́náka anyía mbá Bandɔ́mɛsɛ́ é wuúci lɔ́mɔ́kɔ a yáásɔ́ asana. Bú ŋo tóŋínyi anyía ú maá basɔ́ kétúnyíki a nyɛlɔmɔ eényí. Aáná yááŋa yɔɔ́ŋɔ́kɔ́nɔ́ anyía : « Ɔɔcɔ okime awɔ́ bá tɔ́ŋá a bɔɔtɛ́ ɔ ɔmuaná áŋa na nyɛlɔmɔ. »3.13 Tet 21.23¹⁴Kilís ŋa kɛ́láka aáná anyía ɛndána acɛ́ Bandɔ́mɛsɛ́ ŋaá bɛ́tánɛ́na Abɛ́laham á bámɔ́kɔ́na tɔ́na ná baacɔ a bá tɛ ábɔ́ bá Besuif e elime ci Yésus Kilís, yɔ́ basɔ́ iínjíé tɔ́na, basɔ́ bekime, Elilé ayɛ́ u ŋaá basɔ́ bɛ́tánɛ́na owiínjie a asana ne olumitinine.

¹⁵Baláamɛ, ɛ ŋa mɛ́ áamba ɔ banɔ́ tóŋínyi hibílícínyínyí a bɛsana a bɛ́ náŋa bɛ́ a bɛ́kɛ́láka : Mbɔ́kɔ ɔɔcɔ a wɔmɔtɛ́ ŋé síke nyɛlɛ́ha a nyɛ́mɔtɛ́ háyɛ yɛ́ ŋaá bɛ́ámba, ɔɔcɔ u etémbí tɛ á bá wu ɔwaáŋia mbá te osolinyi bɔkɔ a búmɔtɛ́ a nyɛlɛ́ha eényí. ¹⁶Búáŋa híáná na Bandɔ́mɛsɛ́, anyía buáyá u ŋaá bɛ́tánɛ́na ɔkɛla Abɛ́laham bɔmbányɛ ne hííyé hɛnyɛ́nɔ́ áyá.3.16 Fanáka Sɛn 12.7. Bu tɛ á bá anyía u ŋaá kɔɔ́na anyía « tɔnyɛ́nɔ́ » háyɛ anyía túáŋa tuéŋí, mbá hɛnyɛ́nɔ́ áŋa hú hɛ́mɔtɛ́ ; hííyé hɛnyɛ́nɔ́ ŋe hembule anyía Kilís. ¹⁷Bɔkɔ abɔ́ ɛ ŋa mɛ́ áamba ɔkɔɔna áŋa anyía Bandɔ́mɛsɛ́ ŋaá látana bumbénú3.17 Ta anyía : « síke nyɛlɛ́ha ». na Abɛ́laham, yɔ́ bɛ́tána anyía u ŋa cɔ́ba o o buúbu nyióyísínyi. Buátɛ́ bɔkɔ bikotí e bí ŋe síké á fáaya aaha e elime cɛ hɔ́ndɛ́tɛ cɛ́ tuɔŋɔ ínyíse na tuɔŋɔ nyitíne na túɔ́hátá3.17 Ekúlú eéyé áŋa a Nyh 12.40. Yiíyi eéyé baacɔ bé Islayɛ́l ŋe bú limekíne e Esíbit. tɛ á bá bɛ́ ɔnyɔ́kɔ́tɔ́na nyɛlatana eényí, mbá te onyietinyi ɛndána cɛ Bandɔ́mɛsɛ́. ¹⁸Nu ŋe nú keti yáakɛlá anyía Bandɔ́mɛsɛ́ ŋa sáyabɛna ɔɔcɔ a asana na nyɛlátɛ́na nyí bikotí, tɛ́ cáŋa ɛ ɛndána acɛ́ u ŋaá bɛ́tánɛ́na ɔɔcɔ. Eéʼeé, yááŋa anyíaʼo, Bandɔ́mɛsɛ́ ŋa sáyábákɛ́ná Abɛ́laham ananyía u ŋeé wuúci bɛ́tánɛ́ná.

¹⁹Mbɔ́kɔ aáná yááŋa, aátɛ́ bikotí abɛ́ Bandɔ́mɛsɛ́ ŋe yiínjíékíne baacɔ ŋɔ yɔɔ́lɔ e ? U ŋeé biíbi télímíkínyi anyía tuesú ményúkúne anyía tu ŋa sɔ́ nánaka ɔ ɔkɔɔ́háma anyía ɔɔcɔ u hɛnyɛ́nɔ́ hɛ́ Abɛ́laham a wáŋa ɛ́cɛ Kilís áa fáaya ; ná ɔɔcɔ oócí Bandɔ́mɛsɛ́ ŋe yiínjíé ɛndána eécí. Bililé bɛ́ masɔ́ma bɛ́ Bandɔ́mɛsɛ́ bí ŋe húlíkínyi baacɔ bikotí eébí,3.19 Fanáka BBƐ 7.38, 53 ; Ebe 2.2. bɛ́ ɔhɔlakɛna né ohényíhényi. Mbá ohényíhényi naŋa wɔɔ́ nyíɔ́kɔ buólí ɛ ɛkatɛ́katɛ́ cɛ baacɔ béfendí. ²⁰A aháŋá na Bandɔ́mɛsɛ́, wuúci bɛ́muátá u ŋaá bɛ́tánɛ́ná Abɛ́laham, u tɛ ɔ́mɔɔ́ tɔ́ma ohényíhényi.3.20 Nyɛkɔ́ŋɔ́na a nyɛ́mɔtɛ́ : « Mbá, mbɔ́kɔ u ŋaá bá ne ohényíhényi, u ŋaá bá a aatɔ́ yɛ́ baacɔ beéŋí. Mbá Bandɔ́mɛsɛ́ wáŋa hú wááyá bímuócí. »

²¹Ɛ́cɛ bú ŋe hémbule anyía bikotí ŋe núusi ɛndána cɛ Bandɔ́mɛsɛ́ e ? Eéʼeé, buúse bukime. Yááŋa anyía, mbɔ́kɔ okotí a yɛ́mɔtɛ́ á bámɔ́kɔ́na hɔ́á a yááŋa yí owiínjíékíne baacɔ olíhe, keyé baacɔ e bé ŋe bú yiíyi latákɛ́ná ŋa bɔ́ bá bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́. ²²Mbá yááŋa yɔɔ́ŋɔ́kɔ́nɔ́ anyía baacɔ bekime bá ɔmɛsɛ́ á bɔ́ŋa bɛɔ́lɛ́ bɛ́ bɔɔbɛ́, ananyía mbá Bandɔ́mɛsɛ́ é beébe iínjíékíne bɛnyɛ́ma abɛ́ u ŋaá bɛ́tánákɛ́ná baacɔ a bá ŋa bɔ́ háya mɔŋɔlɛ́ né Yésus Kilís.

²³Ekúlú ayɛ́ tu ŋa sɔ́ bá ɛ́cɛ tu tɛ ŋá sɔ́ háya mɔŋɔlɛ́ né Kilís, tu ŋa sɔ́ bá ɛ́cɛ tua sɔánáŋa a buɔ́lɛ́ bú bikotí ɔ ɔkɔɔ́háma ekúlú ayɛ́ tu ŋa sɔ́ hákɛ́na mɔŋɔlɛ́ né Kilís. ²⁴Yááŋa anyía bikotí ŋaá bá háyɛ mutóŋínyi ohónyí3.24 Mumenyi bikotí bí oweékúnyi. Ná Bakɛlɛ́k, oócí ɔɔcɔ aáná ŋaá bá u ti e yeékúnyi, mbá u ŋaá bá háyɛ yɔɔ́lɛ́ ; búáyɛ́ buólí ŋaá bá otétényi banásɛ́, u ke beébe síkékúne e sukúlu (fanáka 1Kɔ 4.15). Híáná bɔkɔ búmɔtɛ́ buólí bú bikotí ŋaá bá. ɔ ɔkɔɔ́háma a nyɛfaaya nyí Kilís, ananyía mbá túásɔ́ bámɔ́kɔ́na bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́ anyía tu ŋe sú lumitinine. ²⁵Mbá, aámbáya tua sɔáŋa o olumitinine Kilís, tu tɛ asɔ́ bá tɔ́na e butéŋí bú mutóŋínyi ohónyí eémú. ²⁶Banɔ́ bekime nua nuáŋa baáná bá Bandɔ́mɛsɛ́ anyía nu ŋa nɔ́ hákɛ́ná mɔŋɔlɛ́ né Yésus Kilís ; bú tóŋgínyi anyía nua nɔ́ŋa e nyimónjóló ne Yésus Kilís. ²⁷A asana eyí nu ŋe nú bíótókíne, nua nɔ́ŋa e nyimónjóló ne wuúci. Aámbáya nua nuáŋa o olíhe i iŋetí ci Kilís bɛ́muátá. ²⁸Aáná tua sɔáŋa bɔkɔ búmɔtɛ́ eé buúse bɔ́ Bandɔ́mɛsɛ́ ; nyɛálɔ́nána tɛ á bá tɔ́na ɛ ɛkatɛ́katɛ́ ci ne Besuif na baacɔ a bá tɛ ábɔ́ bá Besuif, ta ɛ ɛkatɛ́katɛ́ cɛ na bɛɔ́lɛ́ na baacɔ a bá tɛ á bá bɛɔ́lɛ́, ta cɛ na banɔ́mɔcɔ́ ne beénjú. Banɔ́ bekime nua nuáŋa bɔkɔ búmɔtɛ́ e nyimónjóló ne Yésus Kilís. ²⁹Banɔ́ abá nua nuáŋa baacɔ bé Kilís, nua nuáŋa aná bɔnyɛ Abɛ́laham ; nua nuáŋa nú ɔbɔ́ŋɔ nuafa a bɛnyɛ́ma bikime abɛ́ Bandɔ́mɛsɛ́ ŋaá bɛ́tánákɛ́ná o beébe iínjie.

¹Asana ayɛ́ ɛ ŋa mɛ́ áamba anyía núánɔ́ lɔ́kɔ́ma bɔmbányɛ áŋa anyía : Ɔɔ́nɔ́ okime a wá nyɛmána wu ɔbá na nuafa a bɛnyɛ́ma bí síkíne ŋeé líhe i iŋetí ci olíhe ú yɔɔ́lɛ́, ta yɛ́ cáŋa á bá anyía nuafa eénú áŋa núáyɛ́ nukime. ²Ekúlú ayɛ́ wa yánáŋa ɔɔ́nɔmbɔ́, wáŋa e butéŋí bɔ́ baacɔ e bé ŋe bú wuúci tétényi ; bé kéndisiki bíáyɛ́ bɛsana ɔ ɔkɔɔ́háma ekúlú eyí síkíne ŋaá sɔ́mbɔ́tɔ́na anyía wá bá na núáyɛ́ nuafa.4.2 Ná Bakɛlɛ́k, síkíne u ŋaá bá wɔ sɔ́mbɔ́tɔ́na nɔkɔma nú uuyé ɔɔ́nɔ́ háyɛ bú ŋeé wuúci bíléníne.³Híáná búáŋa tɔ́na náásɔ́, anyía ekúlú ayɛ́ tu ŋa sɔ́ bá ɛ́cɛ tu tɛ ŋá sɔ́ háyá mɔŋɔlɛ́ né Kilís, tu ŋa sɔ́ bá tua sɔánáŋa i iŋetí cɛ banásɛ́ ; tu ŋa sɔ́ bá a buɔ́lɛ́ bɔ́ abɛ́kɛ́lɛ́na cé ilumitinine cá baacɔ. ⁴Ɛ́makɛ́la ekúlú ayɛ́ Bandɔ́mɛsɛ́ bɛ́muátá ŋaá sɔ́mbɔ́tɔ́na á kaáháma, u ŋá tɔ́ma uuyé Ɔɔ́nɔ́, yó ko bíbíéne a tɔɔna tú oónjú ; u ŋe líhéké a nyɛbɛ́kɛ́lɛ́na nyí bikotí bí Besuif, ⁵ananyía mbá wá háŋɔ́náka eebe a bá bɔ́ŋa bɛɔ́lɛ́ bí bikotí eébí, túɔ́ bámɔ́kɔ́na basɔ́ bekime baáná bá Bandɔ́mɛsɛ́. ⁶Asana e yí ŋo tóŋínyi anyía nua nuáŋa baáná bá Bandɔ́mɛsɛ́ áŋa anyía : Bandɔ́mɛsɛ́ ŋaá basɔ́ nyióyísíkínyi Elilé yí uuyé Ɔɔ́nɔ́ ɛ ɛtɛ́má noómi ; yiíyi yɛ́ ŋa kɔ́ɔna okelú ɔ ɔmuaná anyía « Ába ! »,4.6 Ɔ ɔtáŋa ú Alamɛyɛ́ŋ. ɛ́cɛ anyía « Taatá. » ⁷Ɛ́ɛhɛ́ bú ŋo tóŋínyi anyía nu tɛ anɔ́ bá tɔ́na bɛɔ́lɛ́ bɛ́ abɛ́kɛ́lɛ́na cé ilumitinine cá baacɔ, mbá nua nuáŋa aná bááyɛ́ baáná. A asana ayɛ́ nua nuáŋa baáná bá Bandɔ́mɛsɛ́, nua nɔ́ŋa na nuafa a bíáyɛ́ bɛnyɛ́ma anyía núáyɛ́ nuubo.

⁸Buáyá, ekúlú ayɛ́ nu ŋa nɔ́ bá ɛ́cɛ nu ti ŋé nú menyi Bandɔ́mɛsɛ́, nu ŋa nɔ́ bámɔ́kɔ́ná bɛɔ́lɛ́ bɛ́ bɛbɔ́kɔ́bɔ́kɔ a bɛ́ tɛ ɔ́mɔɔ́ bá taaká cɛ Bandɔ́mɛsɛ́. ⁹Mbá aámbáya ayɛ́ nua nuáŋa o omenyinyi na Bandɔ́mɛsɛ́, anyána yááŋa tɔ́na anyía nuánɔ́ hálɔ́mɔ́kɔ́na ɔlátɛ́na abɛ́kɛ́lɛ́na cé ilumitinine cá baacɔ4.9 Fanáka bik. 3ne nyihembule. a cɛ́ tɛ á bá na makɛ́nda, cɛ́ tɛ ɔɔ́lɔ ta bɔkɔ e ? Anyíatɛ́ nu ŋa nɔ́ áamba ɔ háná bá bíábɔ́ bɛɔ́lɛ́ e ? ¹⁰Nu ŋe nú bíínjie ɔ ɔlátɛ́na manáka ma mɔɔ́sɛ́ a mɔ́mɔtɛ́, ne me iílí a cɛ́mɔtɛ́, ne me bikúlú a bɛ́mɔtɛ́ bɛ́ hiɔŋɔ, na ma tuɔŋɔ a túmɔtɛ́ tɔ́na.4.10 Bá ŋaá bɛ́táá aaha manáka me Besuif a ma ŋaá bá na ɛndána e citélímíkínyínyi (fanáka Lom 14.15 ; Kol 2.16-23).¹¹Ɛ ŋaá mɛ bɛ́ákɛ́na buéŋí a yáánɔ́ asana, anyía muuyé emú i ŋe mí hiitéke ɔ ɔnyiɔ buólí náánɔ́ tɛ bɛ́cáŋa buólí bú nubókó. ¹²Baláamɛ, ɛ ŋa mɛ́ banɔ́ bɛ́cɔ́kɔ́lɛ́na anyía ánɔ bámɔ́kɔ́na na nyɛbɛ́kɛ́lɛ́na anyɛ́ ɛ ŋa mɛ́ bá ne nyiínyi náánɔ́. Nu tɛ ɔ́mɔ nɔ́ mɛ kɛla bɔɔbɛ́ ta búmɔtɛ́. ¹³Nu ŋa nɔ́ bɛ́táá anyía ekúlú ayɛ́ ɛ ŋa mɛ́ cáŋacáŋa ɔ banɔ́ húlinyi Ambányɛ yɛ́ Ɛsɔ́ma, ɛ ŋa mɛ́ bá yámɛ kɔnɔkɔ. ¹⁴Ta yɛ́ cáŋa á bá anyía nu ŋa nɔ́ lɔ́kɔ́máka muuyé aámɛ a asana anyía ɛ ŋa mɛ́ bá yámɛ kɔnɔkɔ, nu ti ómo nú mi kényéme, banɔ́ te o mi omboko. Mbá nu ŋa nɔ́ mɛ káhá bɔmbányɛ i iŋetí cɛ nyɛkáha bɔmbányɛ nyí *elilé yɛ́ bɔsɔ́ma yɛ́ Bandɔ́mɛsɛ́. Yɛ́ ŋaá bá háyɛ anyía Yésus Kilís bɛ́muátá nu ŋa nɔ́ káha bɔmbányɛ. ¹⁵Etéeyé ekúlú nu ŋa nɔ́ bá ne obíléne weéŋí. Mbá anyíatɛ́ nu tɛ ŋá háná enú bíléne aámbáya e ? Yaŋɔ́ bɛ́muátá i ŋe mí menyi bɔmbányɛ anyía e ekúlú eéyé, mbɔ́kɔ banɔ́ ne ohónyí wú ɔbɛ́sɔ́mɔ́kɔ eése anyía nuénú mi iínjíékíne, keyé nu ŋa nɔ́ bɛ́sɔ́mɔ́kɔ.4.15 Ekélékéti eeye ŋa yáamba otóŋínyi anyía ɔkɔnɔ ewú Bóol ŋá kɔɔna e bik. 14 áŋa ɔkɔnɔ ú eése. Yiíyi eéyé yí ŋe hémbule 6.11 (fanáka tɔ́na 2Kɔ 12.7).¹⁶Ánɔ mɛ laana aámbáya aná, ya mɛáŋa muanɔ́ muliŋine anyía ɛ ŋa mɛ́ banɔ́ laana taaká e ?

¹⁷Nyɛlatana anyɛ́ baacɔ eébé4.17 Ɛ́cɛ baacɔ e bé ŋe bú léne bikotí bí Besuif ɔ ɔhɔla ; bɔ́ hɔ́láka a tuɔ́bɔ tú belumitinine tɔ́ Kalasi e elime cɛ ɔkanda ú Bóol, bé húlikinyi baacɔ bá hɔ́á anyía bá ŋá nyɛmána bá ɔlátákɛ́na bikotí, ta bá hákɛ́na mɔŋɔlɛ́ né Yésus Kilís tɔ́na. ŋá bɔ́ áamba ɔlatana na banɔ́ ne munéŋéne tɛ á bá nyɛmbányɛ buúse bukime, mbá bá ŋa bɔ́ áamba yáaŋa anyía bábɔ́ banɔ́ aálɔ́na na yaŋɔ́, mbá nu bá ɔlɔŋɔ ne beébe. ¹⁸Búáŋa bɔmbányɛ anyía baacɔ á latákána na bɔsɔ́ɔ́kɔ́ ; mbá nyɛlatana eényí ŋá nyɛmána nyɛ́ ɔbá bikúlú bikime, ta yaŋɔ́ aanɔ́ ɛ ɛkatɛ́katɛ́, ta yaŋɔ́ tɛ́ka. ¹⁹Ééʼ, banɔ́ báámɛ baáná bá ɔtɛ́má ! Ya mɛáŋa ɔ háná lɔ́kɔ́ma muuyé a yáánɔ́ asana i iŋetí ci muuyé mu inúmí ci oónjú. I ké mí muúmu lɔ́kɔ́máka aáná ɔ ɔkɔɔ́háma ekúlú eyí Kilís kéé téŋgínyi bɔmbányɛ bɔmbányɛ e cíínú ilíhe noómi, núó lúmitekinine hú bɛsana abɛ́ u ŋaá kɛ́láka.4.19 Nyɛkɔ́ŋɔ́na a nyɛ́mɔtɛ́ : « Ɔ ɔkɔɔ́háma anyía ahɔ́ánánána ne Kilís é bítóŋínyi aanɔ́ ɛ ɛkatɛ́katɛ́ ».²⁰Ya mɛ́ŋa na ɛcaná buéŋí cɛ́ ɔbámɔ́kɔ́na aanɔ́ ɛ ɛkatɛ́katɛ́ aámbáya, ananyía mbá yémi menyí bɔmbányɛ anyána ya mɛ́ŋa wu ɔ banɔ́ láakɛna bɛsana eébí anyía bú ŋeé mi yébi buéŋí ; ɛ tɛ háná ményi ta aátɛ́ ya mɛ́ŋa wu ɔ banɔ́ láakɛna tɔ́na.

²¹Isíʼo, banɔ́ abá nua nuánáŋa o oléne olíhe a buɔ́lɛ́ bú bikotí, ánɔ mɛ laána, yámɛ lɔ́kɔ́ma : Nu tɛ ŋá nɔ́ lɔ́kɔ́ma bɔmbányɛ aátɛ́ bikotí ŋaa kɔɔna ayɛ́ʼ anyána e ? ²²Tɛ́ka yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía Abɛ́laham ŋaá bá na baáná a banɔ́mɔcɔ́ béfendí e ? U ŋeé bíéné ooci ne yoombi, yó bíéné a wɔmɔtɛ́ ne oónyí. Nyiínyi nyí yoombi ŋaá bá anyía Akáal, bɔ́ lɔ́ŋɔ́kɔ oónyí anyía Sáala.4.22 Fanáka Sɛn 16.15 ; 21.2.²³Ɔɔ́nɔ́ ewú u ŋeé bíbíéne ne yoombi ŋeé bíbíéne háyɛ baáná bé etémbí bekime naŋa bébú bíbíénéke, mbá ɔɔ́nɔ́ ewú u ŋeé bíbíéne ne oónyí ŋeé bíbíéné ɛ ɛndána acɛ́ Bandɔ́mɛsɛ́ ŋeé wuúci bɛ́tánɛ́ná.4.23 Fanáka Sɛn 17.16 ; 18.10.²⁴Asana eéyé áŋa hibílícínyínyí e hí ŋo tóŋínyi anyía : Beénjú eébé béfendí á bɔ́ŋa alatana cé membénú éfendí. Yoombi Akáal ŋo tóŋínyi nyɛlatana nyí bumbénú anyɛ́ Bandɔ́mɛsɛ́ ŋaá látána ne *Moyís a nɔkɔndɔ nú Sinayi ɔ ɔmuaná. Bááyɛ́ baáná á bɔ́ŋa bɛɔ́lɛ́. ²⁵Akáal oócí áŋa tɔ́na nyiínyi nyɛ́ nɔkɔndɔ nú Sinayi i iisí cɛ Alabi ; u ŋo tóŋínyi4.25 Cɛ́mɔtɛ́ Ciɔɔ́ŋɛ́ cɛ́ buáyá áŋa na « Yááŋa anyía Sinayi áŋa nɔkɔndɔ nɔ́ Alabi. Sinayi eécí ŋo tóŋínyi tɔ́na bálɛ́ka… » bálɛ́ka ci Yelúsalɛm cɛ aámbáya4.25 Ɛ́cɛ olumitinine ú Besuif. a cɛ́áŋa ɔ buɔ́lɛ́,4.25 Buólí bú bikotí. na bááyɛ́ baáná áyá. ²⁶Mbá Yelúsalɛm cɛ Ɔmuaná ŋeé líhe a ciayɛ́ciayɛ́ háyɛ Sáala ; ciáŋa ciasɔ́ iinyí. ²⁷A asana ne Yelúsalɛm eécí, Ciɔɔ́ŋɛ́ cɛ́ Bandɔ́mɛsɛ́ ŋaá kɔ́ɔna cɛ́sɛ :

« Kuɔŋɔ́, ahúátá yí oónjú ewú o ti ómoó bíéne baáná, bílénéke ;

kuɔŋɔ́ ewú o ti ómo númi ta buɔ́sɛ́, biolikinyi,

anyía oónjú awɔ́ ɔnɔ́mɛ ŋaá bɛ́yúata kéé bíénéke baáná beéŋí

ɔ ɔhɔla oónjú awɔ́ ɔnɔ́mɛ ŋaá bá weé lénéke. »4.27 Ɛsa 54.1

²⁸Aá banɔ́ baláamɛ, nua nɔ́ŋa taaká cɛ́ baáná bá Bandɔ́mɛsɛ́ háyɛ ciayɛ́ ɛndána ŋaá bá ; nua nɔ́ŋa háyɛ *Isak awɔ́ Bandɔ́mɛsɛ́ ŋaá bɛ́tánɛ́ná Abɛ́laham anyía u kéé bíéne. ²⁹Buáyá, etéeyé ekúlú, ɔɔ́nɔ́ ewú é bíbíéné háyɛ baáná bé etémbí bekime ŋaá bá weé tékeseke ɔɔ́nɔ́ ewú é bíbíéné a makɛ́nda ma ɛndána ci Elilé yɛ́ Bandɔ́mɛsɛ́. Búáŋa tɔ́na híáná aámbáya. ³⁰Yááŋa anyía Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : « Ɔɔ́ŋɔ́kɛ́na ne yoombi ne uuyé ɔɔ́nɔ́ áyá, anyía ɔɔ́nɔ́ u yoombi tɛ ɔ́mɔ nyɛmána wu ɔbá na nuafa a bɛnyɛ́ma bɛ́ ciayɛ́ síkíne ; hú ɔɔ́nɔ́ u oónyí wá nyɛmána wu ɔbá na bɛnyɛ́ma eébí. »4.30 Sɛn 21.9-10³¹Aáná baláamɛ, basɔ́ bekime tu tɛ asɔ́ bá baáná bé yoombi a bá bɔ́ŋa e butéŋí bú bikotí ; tua sɔ́ŋa baáná bé oónyí a wáŋa a ciayɛ́ciayɛ́.

Tua sɔ́ŋa a ciasɔ́ciasɔ́ e elime ci Kilís

¹*Kilís ŋaá basɔ́ háŋɔ́náka taaká taaká a buɔ́lɛ́ bú *bikotí, ananyía mbá tuásɔ́ bámɔ́kɔ́na buúse bukime a ciasɔ́ciasɔ́. Ánɔ bɛ́kɛ́ndákɛ́na aná olimine a cianɔ́cianɔ́ ekúlú ekime, nɔtɛ bɛ́nyɛ́anɛna tɔ́na anyía ɔɔcɔ a wɔmɔtɛ́ á háná banɔ́ hélúmúnyi a buɔ́lɛ́ bɔ́ bɔkɔ a búmɔtɛ́.

²Yaŋɔ́ Bóol, ɛ ŋa mɛ́ banɔ́ láana anyía : Mbɔ́kɔ nu ŋe nú lúmítíne anyía bá banɔ́ áácáka anyía nuenu fúúmékéne eé buúse bɔ́ Bandɔ́mɛsɛ́, asana eyí Kilís ŋa kɛ́láka tɛ ŋáa banɔ́ ɔɔ́lɔ buúse bukime. ³Ɛ ŋaá mɛ hálɔ́mɔ́nɛ́na ɔ banɔ́ laana anyía ɔɔcɔ okime awɔ́ á bɛ́áca ŋá nyɛmána wu ɔlátákɛ́na bɔmbányɛ bɔmbányɛ bikotí bí etémbí bikime. ⁴Banɔ́ eebe abá nu ŋa nɔ́ bɛ́táá anyía nua nɔ́ŋa nú ɔbá bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́ anyía nyɛlátɛ́na nyí bikotí bí *Besuif, énu menyi anyía nú ma nɔ́ aálɔ́nána ne Kilís ; yááyɛ́ yaála yí nuubo tɛ á bá yɛ́ ɔ háná bá náánɔ́. ⁵A yáásɔ́ aháŋá, tu ŋa sɔ́ tátá na mɔŋɔlɛ́ anyía makɛ́nda me *Efúúménénú yí Elilé ma kaá basɔ́ télímíkínyi bifúúménénú bɛ́ baacɔ eé buúse bɔ́ Bandɔ́mɛsɛ́5.5 Bandɔ́mɛsɛ́ káá basɔ́ fúúmínyi bɔmbányɛ bɔmbányɛ a nyɛhaanyua nyí biwéewé (fanáka Fil 3.9-14, 20 ; Lom 8.22-24 ; 2Ti 4.8). anyía tu ŋa sɔ́ háya mɔŋɔlɛ́ né Kilís. ⁶Yááŋa anyía ɔ ɔɔcɔ okime a wáŋa e nyimónjóló ne Yésus Kilís, te wuúci ɔbɛ́ácánɔ́ te wuúci iindú, bú ti ŋé wuúci ɔɔ́lɔ ta bɔkɔ. Bɔkɔ a bɔ́ ŋɔ yɔɔ́lɔ áŋa hɛ́ anyía wá bá ne olumitinine ɔ ɔtɛ́má noómi ewú ú ŋe wuúci kɛla anyía wé lénéke bɔsɔ́ɔ́kɔ́.

⁷Buáyá, e nyitúme nyí úúnú olumitinine, nu ŋa nɔ́ bá nuanɔ́ látákɛ́na bɛsana bɔmbányɛ ; mbá aányɛ́ u ŋaá banɔ́ léké ɔcɔba ne buúse ɔ ɔlátɛ́na taaká cɛ́ bɛsana eébí e ? ⁸I ŋe mí bíkéti anyía tɛ́ cáŋa Bandɔ́mɛsɛ́ u ŋa kɛ́láka aáná, anyía i ŋe mí menyi anyía wuúci u ŋaá banɔ́ lɔ́ŋɔ́kɔ́. ⁹Tɛ́ka nu ŋe nú menyi ɛnjaba a cɛ́ ŋa kɔɔna anyía : « Meŋuŋeŋúŋé me enutisi oŋuŋe ŋe nutisi oŋuŋe a wɔtɔ́bɔ́kɔ́nɔ́ okimekime » e ? 5.9 Nyɛkɔɔna nyɛ́ ɛnjaba eényí áŋa tɔ́na a 1Kɔ 5.6.

¹⁰A asana ayɛ́ tua sɔ́ŋa balatánɔ́ e nyimónjóló ne Otéŋí a Waáŋá na banɔ́, i ŋe mí bíkéti anyía nu ŋa nɔ́ bɛ́táá bɔkɔ búmɔtɛ́ háyɛ yaŋɔ́. Bá kɔ́ɔ́ bɔ́nɔ́sɛ́á ɔɔcɔ okime awɔ́ u ŋa kɛla anyía cíínú ɛtɛ́má á bɛ́nyíáka, ta u cáŋa á bá nyɛnamá nyɛ́ ɔɔcɔ nyɛ́ háányɛ́.

¹¹Banɔ́ báámɛ benyíinyí, a náámɛʼo : Mbɔ́kɔ ya mɛánáŋa o oweékúnyi baacɔ anyía bá bɛ́ácáka o ofúúméne, mbá anyíatɛ́ aná bá yánáŋa ɔ ɔcɔba ne buúse o o mi tekese e ? Mbɔ́kɔ yiíyi aáná, keyé owé ú Yésus ɔ ɔmbásá ɔ ɔmuaná tɛ ŋa háná e yébi ta ɔɔcɔ. ¹²I ŋeé mi léne anyía baacɔ a bá ŋa bɔ́ banɔ́ túŋulinyi bá ka bɛ́ákáka, mbɔ́kɔ bé ŋe bú léne.

¹³Mbá a yáánɔ́ aháŋá, banɔ́ báámɛ benyíinyí, énu menyí anyía Bandɔ́mɛsɛ́ u ŋaá banɔ́ lɔ́ŋɔ́kɔ́ anyía núánɔ́ bámɔ́kɔ́na a cianɔ́cianɔ́. Ɛ́ɛhɛ́ yááŋa anyía nuti bíkétíki anyía nua nɔ́ŋa nuo búle kɛla bɛsana a bɛ́ ŋa banɔ́ bíléníne anyía nua nɔ́ŋa a cianɔ́cianɔ́. Mbá énu lénékénéne, nu ɔɔ́lɔ́kɔ́nɔ́nɔ, ¹⁴ananyía bikotí bikime ŋa ka látana o okotí eeye ɔ́mɔtɛ́ : « Lénéke sɔ́ɔ́kɔ́ háyɛ o ŋoó léne ciɔwɔ cɛɛ́tɔ cɛ bɛ́muátá. »5.14 Lef 19.18¹⁵Mbá mbɔ́kɔ nu ŋa nɔ́ nɔ́mánána, nu nyíákánána, énu bíkékényíki anyía nua nɔ́ŋa nú ɔmanakanana banɔ́ na banɔ́.

¹⁶Ɛ ŋa mɛ́ banɔ́ láana anyía ánɔ nyɛána Efúúménénú yí Elilé é kendísíki cíínú ilíhe ; aáná nu tɛ ká háná anɔ́ kɛla bɛsana a bɛ́ ŋa banɔ́ bíléníne. ¹⁷Bɛsana a bɛ́ ŋa hámɛ́na ɔɔcɔ ɔ ɔtɛ́má a aháŋá ne olíhe ú imehú ŋa yaálɔ́nána na bɛsana a bɛ́ ŋa hámɛ́na ɔɔcɔ ɔ ɔtɛ́má a aháŋá ne olíhe ú Elilé ; anamá cá bɛsana eécé éfendí ŋaá nua ɛcálɛ e cíínú ɛtɛ́má noómi, cá tɛ banɔ́ iínjíé ohónyí wú ɔkɛlaka bɔkɔ ebú nu ŋe nú léne. ¹⁸Mbɔ́kɔ Efúúménénú yí Elilé yí ŋé kéndisi cíínú ilíhe, nu tɛ anɔ́ bá nú ɔ háná bá e butéŋí bú bikotí noómi.

¹⁹Bɛsana a bɛ́ ŋa hámɛ́na ɔɔcɔ ɔ ɔtɛ́má a aháŋá ne olíhe ú imehú tɛ ŋá nánɔnua ; bɛ́áŋa anyía na ɛnjɔkɔ́nɔ́nɔ, na mɔnyɔ́kɔ́lɔ́, na mafala, ²⁰ne onyemi bɛbɔ́kɔ́bɔ́kɔ, na ɔkɛla maŋála, ne muliŋenene, na ɛsáká, na yɔɔtɛ, ne tuliŋéliŋe, na bɛhɔnɔnɔ, na mɔbɛ́sálɔ́tɔ́na, ²¹na yaáká yí eése, na nyɛ-tɛ-lɔ́kɔ́mána, ne ohíólo meluku, ne tuuhú, na anamánamá cé ihúényínyí cɛ́ bɛsana eébí. Ɛ ŋa mɛ́ banɔ́ láákɛ́na, ɛ ŋaá mɛ hálɔ́mɔ́nɛ́na ɔ ɔ banɔ́ láana ɛsɛ́ : Baacɔ a bá ŋa bɔ́ kɛla anamá cá bɛsana eécé tɛ ká bɔ́ lɛca anyána Bandɔ́mɛsɛ́ ŋeé téŋínyi baacɔ.

²²Mbá Elilé ŋa kɛ́la anyía baacɔ ábɔ́ bá ne nulénéne, ne obíléne, ne mbuumu, ne oweéhínyínyi, na ambányɛ yɛ́ ɔtɛ́má, na yaála yí nuubo, bá hákɛ́na mɔŋɔlɛ́ náábɔ́, ²³ne nuhóhi, na nyɛnɔ́mátána nyɛ́ bɛsana. Bikotí ti ŋé líŋine anamá cá bɛsana eécé.

²⁴Yááŋa anyía, baacɔ a bá bɔ́ŋa e nyimónjóló ne Yésus Kilís ne me bú ményisiki bɛsana bikime bí olíhe ú imehú e bí ŋe beébe hámɛ́na ɛ ɛtɛ́má ; búáŋa háyɛ anyía bé me bú biíbi aátákɛ́na ɔ ɔmbásá ɔ ɔmuaná. ²⁵Efúúménénú yí Elilé yɛ́ ŋa basɔ́ iínjie olíhe ; yaátɛ́ asana túásɔ́ nyɛmána tú o búle kanda a mááyɛ́ makɛ́nda noómi. ²⁶Túá nyɛána ɔkɛla bumálá, ne oliŋine bɔsɔ́ɔ́kɔ́, tu beébe aákákɛ́na tɔ́na.

¹Báámɛ benyíinyí, mbɔ́kɔ yɛ́ ŋá banɔ́ hámɛ́na anyía nuánɔ́ cuánɛ́na ɔɔcɔ a wɔmɔtɛ́ waá kɛ́laka asana a yaabɛ́, banɔ́ ebé Elilé ŋá banɔ́ kéndisi nuánɔ́ nyɛmána nú okoó wuúci hálámánána o ohónyí a wɔmbányɛ ; ánɔ kɛláka aáná ne nuhóhi, mbá nú bíkékényíki ɔkua a bɔɔbɛ́ eébú. ²Ánɔ ɔ́ɔ́lɔ́kɔ́nɔ́ e ekúlú yí muuyé. Mbɔ́kɔ nu ŋa nɔ́ kɛ́la aáná, nu ká nɔ́ látákɛ́na okotí yí Kilís. ³Mbɔ́kɔ ɔɔcɔ a wɔmɔtɛ́ ŋe bíhíite háyɛ ɔɔcɔ a waáŋá, yiíyi anyía u tɛ á bá ta bɔkɔ, u ŋe bínéŋe. ⁴Ɔɔcɔ okime é búlúnéke nyíáyɛ́ nyɛbɛ́kɛ́lɛ́na nyɛ́ bɛ́muátá. Mbɔ́kɔ u ŋa lɛ́ca anyía nyɛ́áŋa nyɛmbányɛ, wá bá na bɔɔcɔ eé wuúci bɛ́muátá, tɛ́ cáŋa anyía u ŋa hɔ́láka bɔsɔ́ɔ́kɔ́ a nyɛbɛ́kɛ́lɛ́na, ⁵ananyía ɔɔcɔ okime káá bɛ́túáhɛ́na búáyɛ́ bɔlamɔ́ wuúci bɛ́muátá eé buúse bɔ́ Bandɔ́mɛsɛ́.

⁶Ɔɔcɔ okime ewú bé ŋe yeékúnyi Bɛsana bɛ́ Bandɔ́mɛsɛ́ ŋá nyɛmána wu owiínjíékíne ɔɔcɔ ewú u ŋeé wuúci eékúnyi nuafa a númɔtɛ́ nɔ́ bíáyɛ́ bɛnyɛ́ma bikime.

⁷Nuti bínéŋéke, bá náŋa bé ti é féníne Bandɔ́mɛsɛ́. Bá naŋa bá bándáka bɛyɔyɛ́ hú a nyɛnamá nyɛ́ bɛnyɛ́ma anyɛ́ bɔ́ yɔɔ́nɔ́kɔ. ⁸*Híáná yááŋa a baacɔ : Ɔɔcɔ awɔ́ u ŋa kɛla bɛsana e bí ŋeé wuúci hámɛ́na ɔ ɔtɛ́má a aháŋá ne olíhe ú imehú kéé wé ; mbá ɔɔcɔ awɔ́ u ŋa kɛla bɛsana e bí ŋeé wuúci hámɛ́na ɔ ɔtɛ́má a aháŋá ne olíhe ú Elilé kéé líhéke yɔɔ́sɔɔ́sɔ yí olíhe yí ekúlú ekime e yí ŋe húle né Elilé. ⁹Túá cɔbá ne buúse ɔ ɔkɛla bɛmbányɛ bɛ́ bɛsana, tu tɛ tɔmbɔ, anyía tu ké sú híiteke bɛmbányɛ bɛ́ bɛnyɛ́ma ɛ́cɛ ekúlú ma nyɛ́mana. ¹⁰Yaátɛ́ asana, túá bɛ́kɛ́ndɛ́na aámbáya ayɛ́ ekúlú áŋa ambányɛ ɔ ɔkɛla bɔmbányɛ a baacɔ bekime, hɔlákáhɔ́láka né eebe a bá bɔ́ŋa báásɔ́ benyíinyí bé olumitinine Kilís.

¹¹Ánɔ lɛcá aámbáya háyɛ ɛ ŋa mɛ́ banɔ́ ɔɔ́ŋɛ́na na bɛandándá bɛ́ ciɔɔ́ŋɛ́ ne úúmi ɔɔbɔ́ ú bɛ́muátá.

¹²Baacɔ a bá ŋa bɔ́ aamba obíléníne baacɔ bekime, beébe bá ŋa bɔ́ banɔ́ eékínyi anyía nuánɔ́ bɛ́ácáka. Bá tɛ ŋá bɔ́ áamba anyía baacɔ é beébe tékéséke, anyía mbɔ́kɔ bé ŋe bú húlinyi baacɔ anyía owé ú Kilís ɔ ɔmbásá ŋo nóhínyi, keyé bé kéé beébe tekeseke.6.12 Ohulikinyi baacɔ asana yí buecí ŋaá bá wó nóhikinyi i indekese ne ci Besuif ne ci Boloomɛ́ŋ.¹³Baacɔ eébé a bá ŋa bɔ́ bɛ́áca tɛ ŋá bɔ́ látɛ́na beébe bɛ́muátá bikotí bí Besuif bikime. Bá ŋa bɔ́ áamba anyía núánɔ́ bɛ́ácáka ananyía mbá bébú bíbéétíki eé buúse bɔ́ baacɔ a yáánɔ́ asana. ¹⁴Aámɛ a aháŋá, i ti ŋé mí bíbééti ; ɛ́ maá mɛ háya yáaŋa maamɛ mɔŋɔlɛ́ né uusú Otéŋí a Waáŋá Yésus Kilís ewú u ŋeé wé aámɛ a asana ɔ ɔmbásá. A asana eéyé ya mɛ́ŋa owéénú a asana na ɔmɛsɛ́ ; ɔmɛsɛ́ owéénú aámɛ a asana. ¹⁵Yááŋa anyía bú tɛ ŋɔ́ yɔɔ́lɔ buúse bukime, ta ɔɔcɔ á bá ɔbɛ́ácánɔ́ ta waá bá iindú. Bɔkɔ a bɔ́ ŋɔ yɔɔ́lɔ áŋa hú anyía ɔɔcɔ á bá yɔɔ́sɔɔ́sɔ yɛ́ ɔɔcɔ. ¹⁶Bandɔ́mɛsɛ́ á sáyábákɛ́na baacɔ bekime a bá ŋa bɔ́ látɛ́na ohónyí oócí ne eebe a bá bɔ́ŋa taaká cɛ́ baacɔ bá Bandɔ́mɛsɛ́ ; wé beébe iínjíékíne tɔ́na mbuumu ɛ ɛtɛ́má noómi.

¹⁷O otúme aámbáya ɛ tɛ ŋá háná ámɛ áamba anyía ɔɔcɔ é mi yébíki tɔ́na. Yááŋa anyía ɛndɔ́lá6.17 Cɛ́áŋa tubílícínyínyí e tú ŋo tóŋínyi indekese ecí Bóol ŋe híítéke a asana yí Yésus. a cɛ́áŋa aámɛ a cɛɛ́tɔ ŋo tóŋínyi anyía ya mɛ́ŋa bɔkɔ bú Yésus.

¹⁸Báámɛ benyíinyí, Otéŋí a Waáŋá Yésus Kilís á banɔ́ sayábákɛ́na banɔ́ bekimeʼo. Híáná yááŋa.