Nufule nɔ́ ɔláta enú
Bíel
ŋɔ yɔɔ́ŋɔ́kɔ́
Bɛsana a bɛ́ ŋɔ yɔɔ́lɔ anyía bá lɔ́kɔ́máka bɔmbányɛ nyɛfana nyí nufule eenu
Né bekilísíten bekime, Bíel ŋɔ yɔ́ɔ́ŋɛ́ná nufule eenu (1.1) ; bá bɔ́ŋa baacɔ abá u ŋaá bá weé ményukune bɔmbányɛ. Bɛsana bɛ́ núáyɛ́ nufule ŋa hɔ́ánána buéŋí na bɛsana a bɛ́áŋa bɔ́ɔ́ŋɔ́kɔ́nɔ́ e nufule nú Súute. Asana a yɛ́ ŋa hɔ́la o wuúci tímbie ɔ ɔtɛ́má áŋa onuusi baacɔ e bé me bú óófokine a abɛ́bándána cé belumitinine o oweékúnyi bɛsana a bɛ́ ŋa yaálɔ́nána na Ambányɛ yɛ́ Ɛsɔ́ma yí Yésus. A bɛsana eébí ebí bé ŋe bú eékúnyi, bá ŋa bɔ́ kɔɔna báyɛ Yésus tɛ ká háná ká hálɔ́mɔ́na. Aáná bé ti ŋé bú bééti *Bandɔ́mɛsɛ́, bá kɛlaka bɛsana bɛ́ ɛnjɔkɔ́nɔ́nɔ.
Bíel ɔsɛ ɔɔcɔ a wáŋa mulumitinine ŋá nyɛmána wu ɔlátákɛ́na hú nyiékúnyi nyɛ́ baacɔ a bá ŋa bɔ́ lɛcaka Otéŋí a Waáŋá, bɔ́ lɔ́kɔ́máka na cáábɔ́ eetú bɛsana ebí Yésus bɛ́muátá ŋe húlíkinyi baacɔ ekúlú ayɛ́ u ŋaá bá aaha ɔ ɔmɛsɛ́ anyía nyiékúnyi eényí áŋa taaká.
1Bíel ŋeé téŋi belumitinine
1Yaŋɔ́, Símon Bíel, munyiɔnɔ mu *Yésus *Kilís ; yaŋɔ́ tɔ́na uuyé *ɔɔcɔ u ɛndɔ́ma. Yaŋɔ́, ɛ ŋa mɛ́ banɔ́ ɔɔ́ŋɛ́na nufule eenu, banɔ́ eebe abá nu ŋa nɔ́ háya mɔŋɔlɛ́ né Yésus Kilís, bɔkɔ búmɔtɛ́ háyɛ basɔ́. Wuúci wáŋa na ciasɔ́ *Bandɔ́mɛsɛ́ na muasɔ́ Munohi. U ŋaá kɛ́la anyía túásɔ́ háya mɔŋɔlɛ́ nááyá aáná basɔ́ bekime, anyía wáŋa ɔtálɛ́mánánɔ́. 2Bandɔ́mɛsɛ́ á banɔ́ sayábákɛ́na, mbá u banɔ́ iínjíékíne mbuumu ciéŋí ɛ ɛtɛ́má noómi bikúlú bikime, anyía nu ŋe nú wuúci menyi, nu menyukune tɔ́na Yésus Kilís, uusú Otéŋí a Waáŋá. 3Yááŋa anyía makɛ́nda ma Bandɔ́mɛsɛ́ ŋaá basɔ́ ɔ́ɔ́lɔ ɔkɛlaka bɔkɔ bukime a bú á nyɛ́mana o olíhe a nyɛnamá e nyí ŋeé wuúci bíléníne. Yésus Kilís wuúci, u ŋa kɛ́la anyía túésú ményí Bandɔ́mɛsɛ́, Mu-basɔ́-lɔ́tɔ, anyía túásɔ́ bámɔ́kɔ́na bááyɛ́ baacɔ. U ŋaá kɛ́láka aáná o ohónyí wú ɔ basɔ́ tóŋínyi na núáyɛ́ nuúmi na yááyɛ́ ambányɛ yɛ́ nyɛbɛ́kɛ́lɛ́na. 4Yaátɛ́ asana u ŋaá basɔ́ bɛ́tánákɛ́ná na bɛmbányɛ́kɛ́ na bɛandándá bɛ́ bɛnyɛ́ma. Ekúlú eyí nu ké nú biíbi hiiteke, nu ká nɔ́ bá na makɛ́nda a ma ŋaá banɔ́ ɔ́ɔ́lɔ ɔ ɔsɔ́mba ɔkɔlɔ́ ɔ ɔkɛla bɛɛbɛ́ bɛ́ bɛsana bɛ́ ɔmɛsɛ́ a bɛ́ ŋaá hámɛ́na baacɔ ɛ ɛtɛ́má noómi, mbá nu hiiteke nuafa a ambányɛ yɛ́ ɔtɛ́má yɛ́ Bandɔ́mɛsɛ́. 5Ɛ́ɛhɛ́ ánɔ bɛ́kɛ́ndákɛ́na buéŋí o osolinyi e úúnú olumitinine ambányɛ yɛ́ nyɛbɛ́kɛ́lɛ́na;1.5 Ta anyía : « ɛndɔŋá a cɛmbányɛ ». ánɔ latɛ́nɛ́na a ambányɛ yɛ́ nyɛbɛ́kɛ́lɛ́na ɔ ɔmuaná omenyi Bandɔ́mɛsɛ́. 6O omenyi Bandɔ́mɛsɛ́ ɔ ɔmuaná, ánɔ háya nyɛnɔ́mátána nyɛ́ bɛsana ; a nyɛnɔ́mátána nyɛ́ bɛsana ɔ ɔmuaná, énu solínyi nyiéhínyínyi nyí muuyé ; e nyiéhínyínyi nyí muuyé ɔ ɔmuaná, ánɔ latɛ́nɛ́na nyɛlátɛ́na nyɛ́ bɛsana bí olumitinine. 7A nyɛlátɛ́na nyɛ́ bɛsana bí olumitinine ɔ ɔmuaná, ánɔ tála nulénéne nú benyíinyí ; e nulénéne nú benyíinyí ɔ ɔmuaná, énu solínyi nulénéne nɔ́ baacɔ bekime. 8Aáná, mbɔ́kɔ nua nɔ́ŋa na anamá cá bɛmbányɛ bɛ́ abɛ́kɛ́lɛ́na eécé ekime ceéŋí bikúlú bikime, cá káá banɔ́ ɔɔ́lɔ́kɔ buéŋí ɔ ɔnyiɔ buólí bú olumitinine ; cé kóó tóŋínyi tɔ́na nyíánɔ́ nyimenyinyi ne Otéŋí a Waáŋá Yésus Kilís. 9Mbá ɔɔcɔ awɔ́ u tɛ á bá ne ceéce áŋa ne indímé, wáŋa ne bibúté. Ú maá bɛ́hɔ́ya anyía Bandɔ́mɛsɛ́ ŋeé wuúci nyɛanɛna, yó fúúmínyi maayɛ́ maabɛ́ amá u ŋaá kɛ́láka buáyá.
10Yaátɛ́ asana aná, banɔ́ báámɛ benyíinyí, ánɔ bɛ́kɛ́ndákɛ́na ekúlú ekime olíhe ambányɛ yí olíhe anyía nuénú oónyínyísíkínyi na nyɛ́ánɔ́ nyɛlɔ́ŋɔ na nyɛlɔtɔ anyɛ́ Bandɔ́mɛsɛ́ ŋaá banɔ́ lɔ́tɔkɔ ; mbɔ́kɔ nu ŋa nɔ́ kɛ́la aáná, nu ti ké nú kúfétene ta buɔ́sɛ́. 11Aáná Bandɔ́mɛsɛ́ káá banɔ́ káháka aabá ekime, yɔ́ banɔ́ oófikinyi e Butéŋí bú ekúlú ekime bú Yésus Kilís, ne uusú Otéŋí a Waáŋá na muasɔ́ Munohi.
12Yaátɛ́ asana ɛ ŋa mɛ́ banɔ́ bítéési bɛsana eébí bikúlú bikime, ta yɛ́ cáŋa á bá anyía nua núáŋa o o biíbi menyi, nu látákɛ́na bɔmbányɛ taaká acɛ́ nu ŋa nɔ́ aákɔ́nákɛ́ná. 13-14I ŋe mí menyi anyía ya mɛáŋa hoóhi ne owé ; aáná uusú Otéŋí a Waáŋá ŋeé mi tóŋínyi. Buátɛ́ bɔkɔ búáŋa butálɛ́mánánɔ́ anyía yámɛ banɔ́ bítéésíki bɛsana eébí, ekúlú ekime ayɛ́ ya mɛ́ánáŋa o olíhe, anyía nu ti wéékúne cɛɛ́tɔ. 15Yaátɛ́ asana ɛ ŋaá mɛ bɛ́kɛ́ndɛ́na ɔ banɔ́ láana bɛsana eébí aámbáya, anyía núé síké biíbi bɛ́tááka, ta yaŋɔ́ owéénú.
16Yááŋa anyía tú ŋa sɔ́ banɔ́ láákɛ́na anyána uusú Otéŋí a Waáŋá Yésus Kilís ŋa kaá fááya na maayɛ́ makɛ́nda ; tu tɛ ɔ́mɔ sɔ́ banɔ́ láakɛna na bɛmbányɛ bí tuhélúméke bí injiŋé cɛ baacɔ, mbá anyía cáásɔ́ eése cá bɛ́muátá ŋaá lɛ́cáka búáyɛ́ buáŋá. 17Síkíne Bandɔ́mɛsɛ́ u ŋeé wuúci iínjíé nuúmi a nuáŋá e ekúlú eyí okelú ú búáyɛ́ buáŋá a bú á hɔ́la ŋaá lɔ́kɔ́mána, ú kɔɔnaka ɔ́sɛ : « Ooci áŋa uumí Ɔɔ́nɔ́ u ɔtɛ́má ; nááyá ɛ́ maá mɛ háya úúmi obíléne okime. » 18Waáta okelú oócí tu ŋa sɔ́ lɔ́kɔ́máka basɔ́ bɛ́muátá, ú húlúkúne ɔ Ɔmuaná, ekúlú ayɛ́ tu ŋa sɔ́ bá ɔlɔŋɔ ne Yésus e efúúménénú yɛ́ nɔkɔndɔ ɔ ɔmuaná.1.18 Bíel ŋaá táŋa asana yɛ́ nyɛhɛŋɛna enyí Yésus Kilís ŋaá hɛ́ŋɛ́na nyɛlɛcana (fanáka Mat 17.1-5 ; Mak 9.2-7 ; Luk 9.28-35).
19Basɔ́, tu ŋa sɔ́ hɔ́la olumitine anyía mehúnyi me *behémúnyi bɛsana áŋa taaká. Mehúnyi eémé núánɔ́ nyɛmána nú ohiite ekúlú o o meéme ɔlɔ́kɔ́ma anyía maáŋa háyɛ *lámba a cɛ́ ŋa nɔ́ma i ibíne noómi ɔ ɔkɔɔ́háma ekúlú ayɛ́ ɔyá á yaáŋɔ́nuaka bɔmbányɛ mbá hinjoti hɛ́ alalɛ yɛ́ ɔyá é bítóŋínyi e cíínú ɛtɛ́má noómi. 20Asana yí buúse ayɛ́ núánɔ́ nyɛmána nú ɔ caŋa menyi áŋa anyía : Mbɔ́kɔ ɔɔcɔ ŋaá bɛ́kána ohembule a ciayɛ́ injiŋé cɛ bɛ́muátá bɛsana a bɛɔ́ŋɔ́kɔ́nɔ́ ebí behémúnyi bɛsana bá Bandɔ́mɛsɛ́ ŋa bɔ́ kɔ́ɔ́naka, wáŋa a nyɛnana,1.20 Bɔ́mɔtɛ́ baacɔ ŋa bɔ́ lɔ́kɔ́ma anyía : « Behémúnyi bɛsana bá Bandɔ́mɛsɛ́ ti ómo bú hémúnyinyi baacɔ asana ta ɔ́mɔtɛ́ a Bɛsana bɛ́ Bandɔ́mɛsɛ́ na ciabɔ́ injiŋé cɛ bɛ́muátá ».21anyía te behémúnyi bɛsana bá Bandɔ́mɛsɛ́ ti ómó bú hémúnyi bɛsana aá ciabɔ́ injiŋé cɛ bɛ́muátá, mbá bé ŋe bú biíbi hémúkúnyí a makɛ́nda me *Efúúménénú yí Elilé.
2Beékúnyi bɛsana bá bɛfala
1Buáyá, *behémúnyi bɛsana bá bɛfala ŋa bɔ́ bá bébú líhéke ɛ ɛkatɛ́katɛ́ cɛ baacɔ bé *Islayɛ́l. Híáná tɔ́na, ɔ mɔɔ́sɛ́ a má ŋa fáakɔna beékúnyi bɛsana bá bɛfala ké bú líhéke tɔ́na aanɔ́ ɛ ɛkatɛ́katɛ́ ; bé ké bú óofikinyi e menjiŋé bɛɛbɛ́ bí eékúnyi bí onenisiki baacɔ. Bé ké bú bínéŋítíkínyi uubú Waáŋá ewú u ŋeé beébe háŋɔ́náká a bɔɔbɛ́ noómi. Bé ké bú bísúékíne o obísúékíne búábɔ́ bunyímé bɔ́ bɛ́muátá. 2Baacɔ beéŋí ká bɔ́ látákɛ́na yáábɔ́ aabɛ́ yɛ́ nyɛbɛ́kɛ́lɛ́na yɛ́ mɔnyɔ́kɔ́lɔ́ ; a asana na yáábɔ́ aabɛ́ yɛ́ nyɛbɛ́kɛ́lɛ́na eéyé baacɔ a bɔ́mɔtɛ́ ké bú fénékíne taaká ci ohónyí. 3A asana ayɛ́ mɔɔnyɛ́ ŋaá hámɛ́na buéŋí ɔ ɔtɛ́má beékúnyi eébé, bá ká bɔ́ banɔ́ néŋéke na anamánamá cá bɛsana ɔ ɔ banɔ́ nyíákɛ́na. Mbá Bandɔ́mɛsɛ́ na maá bɔ́sɔ́na yáábɔ́ asana feeké ; wuúci yɔ́ cɔ́ba o o beébe menyisiki, tɛ́ka ne efule.
4Yááŋa anyía Bandɔ́mɛsɛ́ tɛ ɔ́mɔ́ nyɛ́anɛnɛna te *bililé bɛ́ masɔ́ma a bɛ́ ŋaá kɛ́láka bɔɔbɛ́;2.4 Yáakɛlá bililé bɛ́ masɔ́ma a bɛ́ ŋaá látáka Sátan a aatɔ́ ɔnata ayɛ́ u ŋaá kɛ́lákɛ́na Bandɔ́mɛsɛ́. mbá u ŋeé biíbi aahákɛ́na bɛɔ́tɔ́kɔ́kɔ́nɔ́ a Talatáala, ɛ́cɛ anyía nɔɔfia nú tiímé, haála ehé ibíne áŋa hú fííʼ ; hɔ́á bɛ́ ŋaá táta nyíáyɛ́ nyɛbɔsɔna nyɛ́ bɛsana. 5U tɛ ɔ́mɔ́ nyɛ́anɛnɛna tɔ́na bakɛla mɔnyɔ́kɔ́lɔ́ bá buáyá, mbá u ŋeé beébe tɔ́mɛ́na yaandándá yí olondí. Olondí oócí ŋaá hɔ́mbáka, yó beébe ɔ́ɔ́nɔ́kɔ bekime. U ŋoó nóhi hú baacɔ bánámányɛ́. Nɔ́a, ɔɔcɔ ɔmɔtɛ́ awɔ́ u ŋaá bá wá láakɛna baacɔ anyía bé líhéke háyɛ bú ŋeé bíléníne Bandɔ́mɛsɛ́, ŋaá bá ɔ ɔlɔŋɔ ú bɛ́námányɛ́ eébí. 6Híáná tɔ́na, u ŋeé lúliki buúse bukime bálɛ́ka cɛ́ na *Sɔ́tɔm na *Kɔmɔ́ɔlɛ anyía wéé tóŋínyi hibílícínyínyí a baacɔ bekime a bá tɛ ŋá bɔ́ látɛ́na Bɛsana bɛ́ Bandɔ́mɛsɛ́. 7Ta híáná, u ŋá cáŋa onohi atálɛ́mánánɔ́ yɛ́ ɔɔcɔ Lɔt. Wuúci, ɔtɛ́má ŋaá bá wá bɛ́nyíáka buéŋí a asana ne ebébékénú yɛ́ nyɛbɛ́kɛ́lɛ́na yɛ́ baŋána eébé. 8Yááŋa anyía, atálɛ́mánánɔ́ yɛ́ ɔɔcɔ eéyé ŋaá bá yé líhéke aabɔ́ ɛ ɛkatɛ́katɛ́, yɛ́ lɛcaka, yɛ́ lɔ́kɔ́máka mɔɔ́sɛ́ mekime bibébékénú bɛ́ bɛsana abɛ́ bá ŋa bɔ́ bá bábɔ́ kɛ́laka. Yááyɛ́ atálɛ́mánánɔ́ yɛ́ ɔtɛ́má bɛ́nyíáka ekúlú ekime a bɛsana eébí. 9Nyɛkɛlaka nyí Otéŋí a Waáŋá eényí ŋo tóŋínyi anyía u ŋeé ményi onohi baacɔ e bé ŋe bú wuúci látɛ́na ekúlú ayɛ́ baacɔ eébé á bɔ́ŋa e muuyé noómi. U menyukune tɔ́na otétísi bakɛla maabɛ́ anyía mbá u kéé beébe bɔ́nɔ́sɛ́áka a buɔ́sɛ́ bɔ́ nyɛbɔsɔna nyɛ́ bɛsana. 10U ŋaá kɛ́la aáná hɔlákáhɔ́láka eebe a bá naŋa bábɔ́ kɛ́laka bɛsana bɛ́ mɔnyɔ́kɔ́lɔ́ e bí ŋe bíléníne imehú, bá bábákɛ́na Butéŋí bú Otéŋí a Waáŋá.
Beékúnyi bá bɛfala eébé á bɔ́ŋa na ɛtɛ́má cɛáŋá, beébe na bɔsɛsɛ, bé ti líkíme ta ɔwɔɔ́mbɔ́na bililé bɛ́ Ɔmuaná e bí ŋeé líhe eé nuúmi noómi, 11yiíyi anyía te bililé bɛ́ masɔ́ma bɛ́muátá e bí ŋeé beébe hɔ́la buéŋí na a makɛ́nda ne e butéŋí ti ŋéé beébe sɔ́mɛ́na na masálɔ́ eé buúse bú Otéŋí a Waáŋá. 12Mbá baacɔ eébé ŋa bɔ́ bɛ́kɛ́lɛ́na háyɛ ɛnyama a cɛ́ tɛ á bá ne injiŋé ; bé ŋeé ciíci ketíki hú anyía bá hatɛ́akɛ́na, bá ɔ́ɔ́nɔ́kɔ, cíɔ́ fɔnɔ́kɔ. Bá ŋa bɔ́ ɔɔ́mbɔ́na bɛnyɛ́ma e bé ti ŋé bú ményi. Bandɔ́mɛsɛ́ kéé beébe menyisiki buúse bukime, bɔ́ fɔ́nɔkɔ buúse bukime háyɛ ɛnyama eécí. 13Aáná u kéé beébe namaka a asana na yáábɔ́ ɔkɔ́tɛ́mákánɔ́ yɛ́ nyɛbɛ́kɛ́lɛ́na. Bɛɛbɛ́ bɛ́ bɛsana ŋeé beébe hámɛ́na ɔ ɔtɛ́má, bé bílénékíne o biíbi kɛla na ɛŋalaŋanda cɛ nabuɔ́sɛ́. Yááŋa asana yɛ́ na aatɔ́ ɔlama na mahana buéŋí a bɛfala abɛ́ bá ŋa bɔ́ sɔ́mba ekúlú eyí bé ŋe bú nyíényi2.13 Cɛ́mɔtɛ́ Ciɔɔ́ŋɛ́ cɛ́ buáyá áŋa na « bá banɔ́ néŋéke ekúlú eyí u ŋe nú nyíényi… » maŋanda na banɔ́. 14Cííbú ɛtɛ́má ŋeé beébe hámɛ́na hú ɔ ɔfianana beénjú ; ɔkɛla bɔɔbɛ́ beébe bílénékíne ekúlú ekime. Bé ŋe bú bísúéne baacɔ a bá bɔ́ŋa na ɛtɛ́má ɛcɔ́ɔ́cɔ́, mɔɔnyɛ́ beébe hámɔ́kɔ́nɛ́na ɛ ɛtɛ́má buéŋí. Ɛ́ɛhɛ́ Bandɔ́mɛsɛ́ ne meé beébe lɔmɔkɔ. 15Bá ŋa bɔ́ nyɛ́ana ɔlátɛ́na nyɛbɛ́kɛ́lɛ́na nyɛ́ atálɛ́mánánɔ́ yí ohónyí ; bó túme ɔlátɛ́na nyɛ́ aabɛ́ yí ohónyí nyí *muhémúnyi bɛsana Balaam, ɔɔ́nɔ́ u Bɔsɔ́ɔl. Wuúci, u ŋeé lénéke ɔhɔ́ma bɛnamá bɛ́ ɔkɔ́tɛ́mákánɔ́ yɛ́ nyɛbɛ́kɛ́lɛ́na. 16Mbá Bandɔ́mɛsɛ́ ŋeé wuúci kákálákɛ́na a yááyɛ́ aabɛ́ yɛ́ nyɛbɛ́kɛ́lɛ́na, yɔ́ kɛla anyía abaŋabɛbɛa á táŋɛ́ta nááyá háyɛ ɔɔcɔ, ta yɛ́ cáŋa á bá anyía ɛnyama naŋa cɛ tɛ á táŋa. Yí ŋe menyisi aáná buála ebú muhémúnyi bɛsana eémú ŋaá bá muá kɛ́laka.
17Aáná beékúnyi bɛsana bá bɛfala eébé á bɔ́ŋa háyɛ tucéme a tɔ́ tɛ á bá ne menyífé ; beébe tɔ́na háyɛ bɛlɔndɔ́ ebí ehúne ŋe kéndi háyɛ yí ŋeé léne, nɔbɔ́lá tɛ naa. Bandɔ́mɛsɛ́ ne meé beébe bátɛ́nɛ́na nyilimíné a haála ehé ibíne áŋa hú fííʼ. 18Bá ŋa bɔ́ táŋa bɛandándá bɛ́ bɛsana bɛ́ buála a bɛ́ tɛ ŋɔ́ yɔɔ́lɔ. Aáná bá kɛlaka bɛsana bɛ́ mɔnyɔ́kɔ́lɔ́ e bí ŋeé beébe hámɛ́na ɛ ɛtɛ́má noómi, bé ŋe bú tóndi baacɔ a bá ma bɔ́ bɛ́hɔ́ɔkɔ ɔ ɔbɛ́hɔ́ɔkɔ ɛ ɛkatɛ́katɛ́ cɛ ɔlɔŋɔ ú baacɔ bé bunyímé. 19Bá ŋa bɔ́ bɛ́tánɛ́na baacɔ anyía bé ké bú líhéke a ciabɔ́ciabɔ́, yiíyi anyía beébe bɛ́muátá bá bɔ́ŋa bɛɔ́lɛ́ bɛ́ maabɛ́ e me ŋeé beébe cɔbana e bunyímé. Yááŋa anyía, mbɔ́kɔ bɔkɔ a búmɔtɛ́ ŋɔ́ bɛ́ɔ́tɔ́kɔ́kɛ́na ɔɔcɔ, ɔɔcɔ oócí a yáaŋa yɔɔ́lɛ́ yɛ́ bɔkɔ eébú. 20Yááŋa anyía bá na maá bɔ́ sɔ́mba ɔkɔlɔ́ o olíhe ú mɔnyɔ́kɔ́lɔ́ ú ɔmɛsɛ́, anyía bé ŋe bú menyi ne uusú Otéŋí a Waáŋá na muasɔ́ Munohi, Yésus *Kilís. Mbá bá ŋa bɔ́ bɛ́nyɛ́ana ɔ háná hálɔ́mɔ́na o olíhe ú mɔnyɔ́kɔ́lɔ́ oócí ; wuúci, ú ŋe beébe téŋgínyi tɔ́na. Aáná úúbú olíhe ú elime oócí a yáaŋa obébékénú ɔ ɔhɔla úúbú olíhe ú buúsebuúse. 21Bú ŋaá bá bɔmbányɛ ɔ ɔhɔla náábɔ́ anyía bé ti menyi atálɛ́mánánɔ́ yí ohónyí na anyía bébú yiíyi menyi, bó túméke elime, bá tɛ látɛ́na efúúménénú yí okotí eyí bé ŋeé beébe hulíkínyi. 22Asana e yí ŋeé beébe hámɛ́na ŋo tóŋínyi bɔmbányɛ ɛnjaba a cɛ́ ŋaá kɔɔna anyía : « Ɛɛbɔ́, na nyɛanyakaka, na nyɛhálɔ́mɔ́na ɔ ɔnyíá túáyɛ́ tuenyi »2.22 Ɛnj 26.11 ; « Ɛŋɔnáfá, na nyɛmana o ciíci bíékébi, na nyɛhálɔ́mɔ́na ɔ ɔkɔbɛ́tɔ́bɔ a nyɛndɔbɛ noómi. »
3Asana yɛ́ nyɛkahálɔ́mɔ́na nyí Otéŋí a Waáŋá
1Baláamɛ bá ɔtɛ́má, ánɔ lɛcá : Núámɛ nufule nɔ́ ɔláta eenu ɛ ŋa mɛ́ banɔ́ ɔɔ́ŋɛ́na. Eémi e tufule tukime túfendí, ɛ ŋa mɛ́ banɔ́ bítéésíki bɛsana a bɛ́mɔtɛ́ anyía yámɛ banɔ́ héényíki ɛtɛ́má, núánɔ́ bámɔ́kɔ́nɛ́na na mɔsɔŋɛ́ e mefúúménénú a bɛɛtɔ́. 2Ɛ ŋa mɛ́ aamba anyía núánɔ́ bɛ́tááka bɛsana ebí befúúménénú bé *behémúnyi bɛsana bá Bandɔ́mɛsɛ́ ŋa cáŋa ébú hulikinyi baacɔ e nyuúté nyɛ́ baacɔ buáyá. Ánɔ bɛ́tááka tɔ́na okotí eyí uusú Otéŋí a Waáŋá, muasɔ́ Munohi, ŋaá basɔ́ húlikinyi e nyuúté nyɛ́ báánɔ́ *baacɔ bá ɛndɔ́ma. 3Ánɔ cáŋa omenyi bɔmbányɛ anyía ɔ mɔɔ́sɛ́ ma nyɛmana nyɛ́ ɔmɛsɛ́,3.3 Mehúnyi eémé ŋó tóŋínyi ekúlú yɛ́ nyɛmana o otúme a nyɛfaaya nyí Yésus Kilís. baacɔ a bɔ́mɔtɛ́ ká bɔ́ fáakɔna, bá banɔ́ cɛ́cáka, bá kɛ́laka anamá cá bɛsana a bɛɛbɛ́ bikime e bí ŋeé beébe hámɛ́na ɛ ɛtɛ́má noómi, 4bá kɔ́ɔnaka báyɛ : « Mbá ɛndána acɛ́ u ŋaá táná anyía u ká ká hálɔ́mɔ́na ciíci ciényí aná e ? Yááŋa anyía ɔ ɔtɔkɔ otúme eyí cíísú síkíne ŋe bú líheke, bíó wéékúne, ta bɔkɔ tɛ ŋaá hɛ́ŋɛ́na e nyilimíné. Bɛsana bikime a yánáŋa bɔkɔ búmɔtɛ́ o otúme ayɛ́ ɔhuálɔ́ ŋaá bɛ́bɔ́ta. » 5A nyɛkɔɔna eényí, bé ŋe bú kíne omenyi anyía buáyá Bandɔ́mɛsɛ́ ŋeé kétíki na ɔmɛsɛ́ na ɔmuaná ne buhúnyi bɔ́ nyíáyɛ́ nyuúté ; yó ketiki na ɔmɛsɛ́ ne menyífé, aáná ɔmɛsɛ́ áŋa hɔ́á a asana ne menyífé. 6Híáná ne menyífé a ma ŋa hɔ́mbáka a yaandándá yí olondí, Bandɔ́mɛsɛ́ ŋaá kátákɛ́ná ɔmɛsɛ́ awɔ́ ú ŋa cáŋa ɔbá. 7Asana ɔ́mɔtɛ́, na ɔmɛsɛ́ na ɔmuaná abɛ́ tu ŋa sɔ́ lɛ́ca hɛ́nánɔ áŋa bɛnyɛ́ma ebí buhúnyi bɔ́ Bandɔ́mɛsɛ́ ne meé tétísi anyía oocó kéé biíbi lulíki a buɔ́sɛ́ bɔ́ nyɛsɔ́mbɔ́tɔ́na nyɛ́ bɛsana ebú u kéé ményisiki bakɛla maabɛ́.
8Mbá, banɔ́ baláamɛ bá ɔtɛ́má, asana ayɛ́ nu tɛ ɔ́mɔ nɔ́ nyɛ́mana nú ɔbɛ́hɔ́ya áŋa anyía : A nyɛlɛca nyí Otéŋí a Waáŋá, buɔ́sɛ́ búmɔtɛ́ áŋa háyɛ tɔ́sɛ́na cɛ́ tuɔŋɔ ; tɔ́sɛ́na cɛ́ tuɔŋɔ áŋa háyɛ buɔ́sɛ́ búmɔtɛ́.3.8 Fanáka Maŋ 90.4.9Yááŋa anyía u ti ŋe yéényísi onyíóyísínyi ciayɛ́ ɛndána háyɛ baacɔ ɔ bɔ́mɔtɛ́ ŋá bɔ́ bɛ́táá ; mbá u ŋaá banɔ́ eéhínyínyi bu eéhínyínyi, ananyía u ti ŋé léne anyía ɔɔcɔ ɔmɔtɛ́ é nyíme. U ŋeé léne yáaŋa anyía baacɔ bekime ɔ́ bɔ́ŋgɔ́na ohónyí wú ɔbɛ́kákálákɛ́na máábɔ́ maabɛ́, mbá bá sɔ́mba ɔkɔlɔ́ eé meéme. 10Buɔ́sɛ́ bɔ́ nyɛkahálɔ́mɔ́na nyí Otéŋí a Waáŋá káá háma hú huasɛ, háyɛ weébi naŋa waá fáaya, ɔɔcɔ tɛ bɛ́tátá. Buɔ́sɛ́ eébú, ɛŋɔ́lɔ́muaná kéé séŋúlue hú fuab na yaandándá yí ekundí, oocó yó séŋúlísíki bɛnyɛ́ma bikime e bí ŋe iínjie eese ɛ ɛŋɔ́lɔ́muaná ; na ɔmɛsɛ́ na bíáyɛ́ bɛnyɛ́ma bikime bɛ́ɔ mánɔ́kɔ́na hú táákɔ.3.10 Cɛ́mɔtɛ́ Ciɔɔ́ŋɛ́ cɛ́ buáyá áŋa na « …bɛ́ɔ tálɛ́mákɛ́na a nyɛkála. »
11A asana na nyɛnamá anyɛ́ bɛnyɛ́ma bikime eébí á nyɛ́mana bí oséŋúlúeke aáná, nu ŋá nɔ́ nyɛmána nú ɔbámɔ́kɔ́na baacɔ abá na yáánɔ́ ambányɛ yɛ́ nyɛbɛ́kɛ́lɛ́na na nyíánɔ́ nyibíínjie o olumitinine áŋa bifúúménénú. 12Tɛ́ka banɔ́ nú ŋa nɔ́ tátá, nu eeŋelikinyi fiaŋɔ nyɛkaáháma nyɛ́ buɔ́sɛ́ bú *Kilís abɔ́ Bandɔ́mɛsɛ́ maá táfa e ? Buɔ́sɛ́ eébú, oocó kéé lulíki ɛŋɔ́lɔ́muaná, ɔbála ú tɔbɛ́mbɛ tú oocó tú oséŋúlísíki bɛnyɛ́ma bikime e bí ŋe iínjie eese ɛ ɛŋɔ́lɔ́muaná. 13Mbá Bandɔ́mɛsɛ́ ŋaá basɔ́ bɛ́tánɛ́na na yɔɔ́sɔɔ́sɔ yɛ́ ɔmuaná na yɔɔ́sɔɔ́sɔ yɛ́ ɔmɛsɛ́ ; hɔ́á bɛsana a bɛtálɛ́mánánɔ́ áŋa ekúlú ekime, biíbi tu ŋa sɔ́ táta.
14Yaátɛ́ asana, baláamɛ bá ɔtɛ́má, a nyɛtáta anyɛ́ nú ŋa nɔ́ táta bɛsana eébí, ánɔ bɛ́kɛ́ndákɛ́na ɔbámɔ́kɔ́nɛ́na befúúménénú tɛ́ka na hɛkɔma, banɔ́ e mbuumu noómi eé buúse bɔ́ Bandɔ́mɛsɛ́. 15Énu menyí anyía yaandándá yí nyiéhínyínyi yí uusú Otéŋí a Waáŋá eéyé ŋaá banɔ́ iinjie ohónyí wú ɔnɔhɔkɔ banɔ́ bekime. A asana eéyé uusú onyíinyí u ɔtɛ́má Bóol ŋaá banɔ́ ɔ́ɔ́ŋɔ́kɛ́na tɔ́na i injiŋé acɛ́ Bandɔ́mɛsɛ́ ŋeé wuúci iínjíé. 16Híáná u naŋa wɔ yɔ́ɔ́ŋɔ́kɔ a túáyɛ́ tufule tukime ekúlú ayɛ́ u ŋaá táŋá bɛsana eébí. Tufule eétú áŋa na bɛhaála a bɛ́mɔtɛ́ a bɛ́ ŋa náta ɔlɔ́kɔ́ma ; biíbi eébí baacɔ a bɔ́mɔtɛ́ a bá tɛ abɔ́ bá ne injiŋé, beébe tɛ́ka bé bíínjíénú o olumitinine, ŋe bú kótímísi nyɛlɔ́kɔ́ma. Híáná bá ŋa bɔ́ kɛla tɔ́na a bɛhaála bí etémbí bɛ́ Ciɔɔ́ŋɛ́ cɛ́ Bandɔ́mɛsɛ́. A nyíábɔ́ nyɛkɛlaka eényí, bé ŋe bú bísúéne búábɔ́ bunyímé bɔ́ bɛ́muátá.
17Baláamɛ bá ɔtɛ́má, a yáánɔ́ aháŋá nua núáŋa o omenyi bɛsana eébí, bá maá banɔ́ kúuneke biité. Yaátɛ́ asana, énu bíkékényíki aná, nɔtɛ bɛ́nyɛ́ána anyía baŋána eébé ábɔ́ banɔ́ nénísíki ohónyí na yáábɔ́ aabɛ́ yɛ́ nyɛbɛ́kɛ́lɛ́na, bɔ́ banɔ́ aáŋíáka mɔŋɔlɛ́ a mɔɔ́nɛ́nánɔ́ a maáŋa e cíínú ɛtɛ́má noómi. 18Mbá ánɔ cɔ́cɔ́báka ne buúse, nu kɔmaka na a yaála yí nuubo noómi ne o omenyinyi ne Yésus Kilís, wáŋa ne uusú Otéŋí a Waáŋá na muasɔ́ Munohi. Nuúmi á bámɔ́kɔ́nɛ́na nááyá o otúme aámbáya ɔ ɔkɔɔ́háma bikúlú bikime, híáná yááŋa.