1 Timoté

Nufule nú buúse enú Bóol ŋɔ yɔɔ́ŋɔ́kɛ́ná

Timoté

Bɛsana a bɛ́ ŋɔ yɔɔ́lɔ anyía bá lɔ́kɔ́máka bɔmbányɛ nyɛfana nyí nufule eenu

Ánɔ cáŋa menyi anyía ne nufule nú buúse nú Bóol na nɔ́ ɔláta, tuútu u ŋɔ yɔɔ́ŋɔ́kɛ́ná uuyé ɔɔ́nɔ́ Timoté, ɔláta tɔ́na tufule atɔ́ u ŋɔ yɔɔ́ŋɔ́kɛ́ná ne Tite ne Filemɔ́ŋ ; túáŋa eé yiíbe yí tufule ayɛ́ bɔ́ ŋɔ lɔ́ŋɔ anyía « Tufule tú Bootonono » a asana eyí tú ŋe yeékúnyi, tú iínjíékíne ɛhɔ́ŋɛ́ ciéŋí né bootonono, bekendisi tuɔ́bɔ tú belumitinine Kilís.

Timoté ewú Bóol ŋɔ yɔɔ́ŋɛ́na nufule eenu ŋaá bá ombíényi u Besuif, anyía iinyí ŋaá bá itónyi, yó lumitinine Kilís. Síkíne ci Timoté ŋaá bá ɔɔcɔ u Kɛlɛ́k. Ne Bóol ne Timoté ŋa bɔ́ ɔɔ́ndɛ́mánána nyibuúsebuúse a bálɛ́ka ci Lisitɛ́lɛ i iisí cɛ Asi Minɛ́ɛl a cɛáŋa aámbáya iisí ci Tuluki, e úúyé ɔkanda ú ɛkanda ífendí (BBƐ 16.1-3). O otúme ayɛ́ ne Bóol ne Timoté ŋa bɔ́ ɔɔ́ndɛ́mánána, bá ŋa bɔ́ látána, bé kéndikinyi ɔ ɔnyiɔ buólí. Yaátɛ́ asana Bóol ŋé wuúci lɔ́ŋɔ anyía uuyé ɔɔ́nɔ́.

Timoté ŋaá bá olíkílíki butíkítíki a nyíáyɛ́ nyɛbá, wuúci tɔ́na ɔkɔnɔ́kɔ́nɔ. Buátɛ́ bɔkɔ Bóol ŋa nyɛ́mána wu o búle wuúci kíndísi ; ta híáná u ŋaá bá na mɔŋɔlɛ́ ne wuúci. U ŋeé wuúci síke ɛ Ɛfɛ́ɛsɛ o okendisi hiɔ́bɔ hí belumitinine bá hɔ́á. Ɛ Ɛfɛ́ɛsɛ ciátɛ́ Bóol ŋɔ yɔ́ɔ́ŋɔ́kɛ́ná Timoté nufule eenu. U ŋeé wuúci ɔɔ́ŋɛ́ná nufule eenu o o wuúci tóŋgínyi na anyána belumitinine Kilís abɔ́ nyɛ́mána bé olíhéke, na anyána ne bekendisi tuɔ́bɔ ne be-beébe-híke abɔ́ nyɛ́mana bá ɔbámɔ́kɔ́na. U ŋeé wuúci tóŋínyi tɔ́na ne nyisókóbi nyí bisíké bí beénjú, na anyána wuúci bɛ́muátá Timoté á nyɛmana olíhéke, u bikékényíki eékúnyi ɔcɔkɔ́tɛ́mákánɔ́, u ti oókóto anyía belumitinine é ceéce látákɛ́na.

Bitéŋíti

¹Yaŋɔ́ Bóol, *ɔɔcɔ u ɛndɔ́ma u *Yésus *Kilís e nyitélímínyi na nyɛ́ *Bandɔ́mɛsɛ́, muasɔ́ Munohi, ne nyí Yésus Kilís, maasɔ́ Mɔŋɔlɛ́. ²Yaŋɔ́, ɛ ŋa mɛ́ ɔ wɔɔ́ŋɛ́na nufule eenu, kuɔŋɔ́ Timoté ; ɔ ɔ́ŋa ciamɛ taaká cɛ ɔɔ́nɔ́ anyía o ŋoó lumitinine. Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá ɔ sayábákɛ́na, bá ɔ bɛ́cáma mahana, bé o wiínjie mbuumu ɔ ɔtɛ́má noómi.

Beékúnyi eékúnyi cá bɛfala

³Ekúlú ayɛ́ ɛ ŋa mɛ́ bá yámɛ cɔbaka a Masɛtuán, ɛ ŋɔ mɛ́ ɔ laána anyía ɔ́ɔ lɔ́bɔ ɛ Ɛfɛ́ɛsɛ1.3 Bálɛ́ka a ciáŋá ci ekéki yí iisí yí butéŋí bú Lóom a Asi, a aháŋá yɛ́ nyɛfianɛna nyɛ́ ɔɔ́cɔ́. anyía ɔ́ɔ sáŋɔ́nákɛ́na baacɔ a bɔ́mɔtɛ́ bá hɔ́á oweékúnyi nyiékúnyi nyɛ́ bɛfala. ⁴Beébe sáŋɔ́nákɛ́na tɔ́na obíínjie ne o obíkéti tuhélúméke tɔ́ buáyá na ɔ ɔfana eénye cá baacɔ cá tɔnyɛ́nɔ́ a cá tɛ ŋá mana.1.4 Aaha yááŋa asana yí obítémbélínyi ɛ ɛnjɔ́ɔ cɛ na abɛ́bɔ́ta na tɔnyɛ́nɔ́ bɛ́ sɔ́kɔ́nɔ́ cɛ́ buáyá acɛ́ Sɛn 4-5 ; 9-11 ŋa cámba. Bɛsana eébí bikime ŋe céhisi hú isuŋí, bɛ́ tɛ ɔɔ́lɔ ɔkɛla nyɛtákɛ́na nyɛ́ bɛsana nyɛ́ Bandɔ́mɛsɛ́. Tu ŋe sú menyi nyɛtákɛ́na eényí anyía tu ŋe sú lumitinine. ⁵Aatɔ́ yɛ́ asana eyí o ŋoó beébe laana aáná áŋa anyía bá ŋa bɔ́ nyɛmána bé olénéke bɔsɔ́ɔ́kɔ́. Nulénéne eénú hulukune e efúúménénú yɛ́ ɔtɛ́má noómi, ne e hííwu hɛcɔɔ́cɔ́ a hɛ́áŋa ɔ ɔtɛ́má a hɛ́ tɛ ŋɔ́ yɔ́ɔ kákálɛ́na, na aá taaká ci olumitinine. ⁶A aháŋá na bɛsana eébí, bɔ́mɔtɛ́ baacɔ ŋa bɔ́ nánáka ohónyí, bɔ́ cɔba hú o ohulinyi baacɔ bɛsana bí isuŋí a bɛ́ tɛ ŋɔ́ yɔɔ́lɔ. ⁷Bé ŋe bú bíhiíte háyɛ eebe e bé ŋe bú menyi oweékúnyi *bikotí bɛ́ Bandɔ́mɛsɛ́ mbá, bé ti biíbi lɔ́kɔ́ma bɔmbányɛ beébe bɛ́muátá : Ta bɔkɔ abɔ́ bá ŋa bɔ́ kɔɔna, mbá te mehúnyi emé bé ŋe bú hémúnyi oweékúnyi na mɔŋɔlɛ́ mekime.

⁸Tu ŋe sú menyi anyía bikotí bɛ́ Bandɔ́mɛsɛ́ áŋa bɛmbányɛ mbɔ́kɔ bé ŋeé biíbi látɛ́na háyɛ yɛ́ á nyɛmána. ⁹Túé menyi anyía bá náŋa bé ti é télímínyi bikotí eé buúse bɔ́ bɛtálɛ́mánánɔ́ bɛ́ baacɔ mbá, bé ŋeé biíbi télímínyi ne eé buúse bɔ́ bacaŋɛna bɛsana, ne eé buúse bɔ́ baacɔ a bá ŋa bɔ́ kɛlɛna Bandɔ́mɛsɛ́ aatɔ́ ɔnata, ne eé buúse bɔ́ na baŋána na bakɛla maabɛ́, ne eé buúse bú eebe e bé ŋe bú féníne na Bandɔ́mɛsɛ́ ne olumitinine, ne eé buúse bɔ́ bɔɔ́nɔ na bíábɔ́ bibíényi na baacɔ bé etémbí áyá. ¹⁰Ɛ náŋa bé télímíkínyi tɔ́na bikotí ne eé buúse bɔ́ balátɛ́na beénjú, ne eé buúse bɔ́ banɔ́mɔcɔ́ a bá ŋa bɔ́ fianana bɔsɔ́ɔ́kɔ́ banɔ́mɔcɔ́. Bikotí áŋa tɔ́na ne eé buúse bɔ́ bakɛla onduné ú baacɔ, ne eé buúse bú benéŋe baacɔ, ne eé buúse bɔ́ baacɔ a bá ŋa bɔ́ talɛmɛna ɛ ɛmbasɔ́ cɛ́ bɛfala, ne eé buúse tɔ́na bɔ́ baacɔ a bá ŋa bɔ́ kɛla bɛɛbɛ́ bɛ́ bɛsana bí etémbí e bí ŋe núusi ambányɛ yí nyiékúnyi. ¹¹Ambányɛ yí nyiékúnyi eéyé áŋa a Ambányɛ yɛ́ Ɛsɔ́ma noómi ; yɛ́ ŋa lɛca Bandɔ́mɛsɛ́, Muómóomo. U ŋeé líhe a ambányɛ yɛ́ haála. Wuúci ú ŋeé mi cuméke Ambányɛ yɛ́ Ɛsɔ́ma eeye.

Bóol ŋe yiínjie Bandɔ́mɛsɛ́ bitéŋíti

¹²I ŋé mi iínjie Yésus *Kilís, uusú Otéŋí a Waáŋá, bitéŋíti, anyía ú ŋa lɛ́ca anyía ya mɛ́ŋa ɔɔcɔ u ɔháya mɔŋɔlɛ́, yó mi hiíte háyɛ múáyɛ́ munyiɔnɔ. Wuúci u ŋeé mi kíndísi tɔ́na ɔ ɔnyiɔ buólí eébú. ¹³Buáyá, ɛ ŋaá mɛ bá yémi wuúci fénékíne, i tekeseke bááyɛ́ baacɔ, i wuúci ɔɔ́mbɔ́náka tɔ́na. Ta híáná, Yésus ŋaá mɛ bɛ́cáma mahana, anyía ɛ ŋa mɛ́ bá i ti émi menyi bɔkɔ abɔ́ ɛ ŋaá mɛ bá yámɛ kɛlaka, ɛ tɛ háya mɔŋɔlɛ́ nááyá. ¹⁴Uusú Otéŋí a Waáŋá ŋaá mɛ sayábákɛ́na buéŋí, yó mi iínjie makɛ́nda na ma ɔhákɛ́na mɔŋɔlɛ́ nááyá ne me olénéke bɔsɔ́ɔ́kɔ́. ¹⁵Buhúnyi eebu áŋa taaká cí buhúnyi ; búáŋa bɔmbányɛ anyía baacɔ bekime é buúbu háya ɔ ɔtɛ́má noómi : Yááŋa anyía Yésus Kilís ŋaá faáya ɔ ɔmɛsɛ́ ooci anyía wó ko nóhíki bakɛla maabɛ́ bekime. Yaŋɔ́, ya mɛ́ŋa mɔkɛla maabɛ́ mú buúsebuúse.1.15 Nyɛkɔ́ŋɔ́na nyí etémbí : « mɔkɛla maabɛ́ a mú á hɔ́la ».¹⁶Ta híáná, Yésus Kilís ŋaá mɛ bɛ́cáma mahana, yaŋɔ́ mɔkɛla maabɛ́ mú buúsebuúse,1.16 Fanáka bik. 15. anyía wó tóŋínyi baacɔ anyána u ŋeé beébe eéhínyínyi buéŋí. U ŋo tóŋínyi hibílícínyínyí eéhí o okíndísi baacɔ a bá ká bɔ́ hákɛ́na mɔŋɔlɛ́ nááyá, bɔ́ bɔ́ŋgɔ́na yɔɔ́sɔɔ́sɔ yí olíhe yí ekúlú ekime.

¹⁷Ne nuúmi ne nyinyemi á bámɔ́kɔ́na né Otéŋí a Waáŋá Bandɔ́mɛsɛ́ anyía u ŋe téŋínyi ekúlú ekime, wáŋa Indiwé ; ta ɔɔcɔ tí ŋé wuúci lɛca, wuúci wáŋa bímuócí Bandɔ́mɛsɛ́. *Híáná yááŋa.

Bóol ŋeé lébe Timoté

¹⁸Uumi ɔɔ́nɔ́ Timoté, i ŋe mí o lébe ne mehúnyi emé *behémúnyi bɛsana bá Bandɔ́mɛsɛ́ ŋa bɔ́ kɔ́ɔnaka ɔ yɔ́ɔ́wɔ asana ananyía ɔ́ɔ kɛ́nda ne meéme ɔ ɔnua ambányɛ yí biité. ¹⁹Tétényíki uúwe olumitinine, mbá a kɛla anyía hííwu hɛcɔɔ́cɔ́ hɛ́ ɔtɛ́má tɛ ɔ kákálɛ́na ; bɔ́mɔtɛ́ baacɔ ŋe bú kínéke ɔlátɛ́na ambányɛ yí ohónyí eéyé, bɔ́ nánáka e uúbu olumitinine. ²⁰Ne Iméné na Alɛkɛsándɛlɛ á bɔ́ŋa ɔ ɔlɔŋɔ ú nyɛnamá nyɛ́ baacɔ eényí ; i ŋe mí beébe báka mío beébe cumeke ná Sátan1.20 Fanáka nyihembule nyí 1Kɔ 5.5. anyía bábɔ́ aákɔ́nákɛ́na omenyi anyía bé ti ŋé féníne Bandɔ́mɛsɛ́.

Nyiékúnyi a asana na ɔbɛ́cɔ́kɔ́lɛ́na

¹Asana yí buúse a yɛ́ á hɔ́la ayɛ́ ɛ ŋa mɛ́ aamba owoókísi baacɔ áŋa anyía bá bɛ́cɔ́bɔ́kɛ́na Bandɔ́mɛsɛ́, bá bɛ́cɔ́kɔ́lɔ́kɛ́na, bé wuúci bataka bɛsana eé buúse bɔ́ baacɔ bekime, bé wuúci iínjíékíne tɔ́na bitéŋíti eébú eé buúse. ²Ánɔ bɛ́cɔ́kɔ́lɔ́kɛ́na Bandɔ́mɛsɛ́ ne eé buúse bú betéŋí, ne eé buúse bɔ́ baacɔ bé etémbí bekime e bé ŋe bú téŋínyi, anyía ne mbuumu ne yeébu á bámɔ́kɔ́nɛ́na a bunɔŋɔ, nu kékéke Bandɔ́mɛsɛ́ na nyɛbɛ́kɛ́lɛ́na a nyɛmbányɛ. ³Ɔbɛ́cɔ́kɔ́lɛ́na Bandɔ́mɛsɛ́ eé buúse bɔ́ baacɔ bekime áŋa ambányɛ yɛ́ asana e yí ŋe bíléníne Bandɔ́mɛsɛ́, Mu-basɔ́-nohi. ⁴U ŋeé léne anyía baacɔ bekime ɔ́ nɔhɔ́kɔ, bé menyukune taaká. ⁵Yááŋa anyía Bandɔ́mɛsɛ́ áŋa hú ɔmɔtɛ́ ; ohényíhényi áŋa hú ɔmɔtɛ́ tɔ́na ɛ ɛkatɛ́katɛ́ cɛ na Bandɔ́mɛsɛ́ na baacɔ, wuúci wáŋa ɔɔcɔ, Yésus *Kilís. ⁶U ŋaá faáya yó koó wé anyía wá háŋɔ́náka baacɔ bekime a buɔ́lɛ́ bɔ́ bɔɔbɛ́. Asana eéyé ŋaá bɛ́kɛ́láka e ekúlú a yɛnyɛmánánɔ́, bú tóŋgínyi anyía Bandɔ́mɛsɛ́ ŋa yáamba onohi baacɔ bekime. ⁷Yaátɛ́ asana Bandɔ́mɛsɛ́ ŋeé mi télímínyi ne muhulinyi baacɔ Ɛsɔ́ma na ɔɔcɔ u ɛndɔ́ma, anyía yémi hulíkínyi baacɔ bɛsana eébí. U ŋaá mɛ tɔ́ma o okowéékúnyi baacɔ a bá tɛ ábɔ́ bá *Besuif, anyía bé lumítékíníne taaká cɛ́ bɛsana. Ɛ ŋa mɛ́ kɔɔna taaká, i ti ŋé mi néŋe.

⁸Aáná ɛ ŋa mɛ́ áamba anyía keyé banɔ́mɔcɔ́ ábɔ́ bɛ́cɔ́kɔ́lɛ́na Bandɔ́mɛsɛ́ bɛhaála bikime ne efúúménénú yɛ́ ɔtɛ́má, tɛ́ka ne meliŋé ɔ ɔtɛ́má, ta na bɛhɔnɔnɔ.

⁹Ɛ ŋa mɛ́ áamba tɔ́na anyía beénjú á bɛ́láŋáka a nyɛnamá a nyɛ́ ŋa bɛ́ámba, bá lɔ́kɔ́máka aatɔ́ ɔlama, bá tɛ bɛ́nua anamá cé tuhúnyi anyía bébú bítóŋgínyi ; bá tɛ bɛ́háya bɛnyɛ́ma bɛ́ nyɛnɔ́kɔ́ bí kóolo, ta bɛ́ bɛnyɛ́ma e bí ŋe mueli bɔmbányɛ, ta hú bɛlaŋa bɛ́ mɔɔnyɛ́ meéŋí. ¹⁰Mbá, beénjú a bá ŋa bɔ́ kɔɔna anyía bé ŋe bú kéke Bandɔ́mɛsɛ́ ŋa bɔ́ nyɛmána bá ɔkɛlaka bɛmbányɛ bɛ́ bɛsana. ¹¹Yɛ́ ŋa nyɛmána anyía beénjú é lesikinyi mbuumu2.11 Nyɛkɔ́ŋɔ́na nyí etémbí : « lesikinyi yeébu » ekúlú eyí bé ŋé beébe eékúnyi, bá lɔ́kɔ́mákɛ́na beékúnyi buéŋí. ¹²Ɛ ŋa mɛ́ sáŋɔ́nɛ́na beénjú anyía bé ti eékúnyíki banɔ́mɔcɔ́, bé ti beébe téŋínyi mbá, bé lesíkínyi mbuumu, ¹³anyía Bandɔ́mɛsɛ́ ŋa cáŋacáŋa o keti *Átam. E elime eécí u ŋe kéti *Ɛfa, ¹⁴tɔ́na anyía *Sátan ti ómo néŋe Átam, mbá oónjú. Yááŋa anyía oónjú u ŋa kɛlakɛna Bandɔ́mɛsɛ́ ɛndɔ́kɔ́. ¹⁵Ta híáná, Bandɔ́mɛsɛ́ kóó nohiki beénjú a asana ne obíéne baáná,2.15 Fanáka Sɛn 3.15. Bɔ́mɔtɛ́ baacɔ ŋa bɔ́ lɔ́kɔ́ma anyía « hííyé hɛnyɛ́nɔ́ ». mbɔ́kɔ bá ŋa bɔ́ cɔba ne buúse o olumitinine, bé lénéke baacɔ, beébe ne efúúménénú yí olíhe e nyibílóosi ɔ ɔmɛsɛ́.

Bekendisi tuɔ́bɔ tú belumitinine

¹Buhúnyi eebu áŋa taaká ci buhúnyi, búáŋa anyía ɔɔcɔ okime awɔ́ u ŋa yáamba ɔbámɔ́kɔ́nɛ́na *mukendisi belumitinine, ɔɔcɔ oócí má táfa ambányɛ yí buólí. ²Mukendisi belumitinine ŋá nyɛmána wu olíhéke bɔmbányɛ, tɛ́ka na tɔkɔma na baacɔ ; muúmu mɔbátɛ́nánɔ́ hú oónjú ɔmɔtɛ́,3.2 Bɔ́mɔtɛ́ baacɔ ŋa bɔ́ lɔ́kɔ́ma anyía « ɔnɔ́mɛ ewú u ŋo nyíóyísínyi esúŋe ne uuyé oónyí », ta anyía « awɔ́ u na maá batɛ́na oónjú hú ekúlú ɔ́mɔtɛ́ » (fanáka tɔ́na 3.12). mu ti bíínjie ɔ ɔmúána meluku, muúmu ne injiŋé a aatɔ́, muúmu na bɔɔcɔ, muúmu na nɔkasa, mu menyukune oweékúnyi baacɔ bɛsana. ³Mu tɛ ɔ́mɔ nyɛmána mu ɔbá ta amúána meluku, ta anua bitule, mbá mu ŋá nyɛmána mu ɔbá mbuumu cɛ ɔɔcɔ, u tɛ sáá ɛsáká ; wuúci tɛ́ka na ɔtɛ́má ɔɔ́ mɔɔnyɛ́. ⁴U ŋá nyɛmána wu okendiki bɔmbányɛ ciayɛ́ ciíbe cɛ baacɔ, bááyɛ́ baáná wuúci lɔ́kɔ́mákɛ́na, bé wuúci kékéke bɔmbányɛ bɔmbányɛ. ⁵Ɛ ŋa mɛ́ táŋa aáná anyía mbɔ́kɔ u ti ŋée menyi okendisi ciayɛ́ ciíbe cɛ baacɔ cɛ bɛ́muátá, anyána wáŋa wu okendiki hiɔ́bɔ hí belumitinine hɛ́ Bandɔ́mɛsɛ́ e ? ⁶U tɛ ɔ́mɔ nyɛmána wu ɔbá yɔɔ́sɔɔ́sɔ yí mulumitinine Yésus, anyía keyé bumálá kéé wuúci bááta a aatɔ́, Bandɔ́mɛsɛ́ yó wuúci túme hɛkɔma háyɛ ú ŋeé túme Musɔ́mɛ́na. ⁷Yɛ́ ŋa nyɛmána tɔ́na anyía baacɔ a bá tɛ ábɔ́ bá belumitinine ébú wuúci kékéke ; anyía keyé bé kéé wuúci séésíki, Musɔ́mɛ́na múó wuúci ɔ́ɔ́tɔ́kɔ na túáyɛ́ tukolí.

Batiákɛ́lɛ

⁸Nyɛbɛ́kɛ́lɛ́na nyɛ́ batiákɛ́lɛ3.8 Nyiínyi nyɛ́ nɔkɛlɛ́k eényí ŋa háná e bíhémbúle anyía « munyiɔnɔ ». ŋá nyɛmána nyɛ́ ɔbámɔ́kɔ́nɛ́na tɔ́na nyɛmbányɛ, bá kɔ́ɔnaka taaká, bé ti bíínjie ɔ ɔmúána meluku, bá tɛ aamba ɔhɔ́ma mɔɔnyɛ́ i ihényí a cɛɛbɛ́. ⁹Bá ŋá bɔ́ nyɛmána bá ɔlátákɛ́na na hɛcɔɔ́cɔ́ hɛ́ ɔtɛ́má e hifúúménénú bɛsana bí olumitinine abɛ́ Bandɔ́mɛsɛ́ ŋa námbɔ́náka. ¹⁰Ekúlú ayɛ́ bá ŋa yáamba o obééti *batiákɛ́lɛ, bá ŋá nyɛmána bá ɔ cáŋa beébe aákɔ́nákɛ́na bɔmbányɛ ; bá a lɛca mbɔ́kɔ bá ŋá bɔ́ nyɛ́mána, bé beébe béétíki aná batiákɛ́lɛ. ¹¹Beénjú3.11 Bɔ́mɔtɛ́ baacɔ ŋa bɔ́ lɔ́kɔ́ma anyía « báábɔ́ beénjú tɔ́na ŋa bɔ́ nyɛmána… » tɔ́na ŋá bɔ́ nyɛmána bá ɔbá na ambányɛ yɛ́ nyɛbɛ́kɛ́lɛ́na, bé ti óóto baacɔ, bé ti bíínjie ɔ ɔmúána meluku, bá kɛlaka taaká cɛ́ bɛsana ekúlú ekime.

¹²Tiákɛ́lɛ ŋá nyɛmána wu ɔbátɛ́na hú oónjú ɔmɔtɛ́, u ŋá nyɛmána wu otétényíki bááyɛ́ baáná, u kendisiki ciayɛ́ ciíbe cɛ baacɔ bɔmbányɛ. ¹³Baacɔ ŋe bú kéké buéŋí batiákɛ́lɛ a bá ŋa bɔ́ nyiɔ ambányɛ yí buólí. Batiákɛ́lɛ eébé á bɔ́ŋa bé ohulikinyi baacɔ bɛsana bí Yésus *Kilís, bé ti líkíme, anyía bá ŋa bɔ́ hákɛ́na mɔŋɔlɛ́ nááyá.

Asana ayɛ́ Bandɔ́mɛsɛ́ ŋa námbɔ́nɛ́na baacɔ

¹⁴Ta ayɛ́ ɛ́ ŋa mɛ́ ɔ wɔɔ́ŋɛ́na nufule eenu, i ŋeé mi bíkéti ɔfaaya ɔ ɔkɔɔ́ kuɔŋɔ́ lɛca hikúlúkúlú. ¹⁵Asana ɔ́mɔtɛ́, mbɔ́kɔ i ti ŋé tényí ká mɛ háma, bɛsana abɛ́ ɛ ma mɛ́ ɔ laakɛna kɔ́ yɔ́ɔ wɔɔ́lɔ omenyi anyána baacɔ bá hɛnyɛ́nɔ́ hɛ́ Bandɔ́mɛsɛ́ ábɔ́ nyɛmána bé olíhéke ; hɛnyɛ́nɔ́ eéhí áŋa hiɔ́bɔ hí belumitinine. Bá bɔ́ŋa baacɔ bá Bandɔ́mɛsɛ́, Ooci a wáŋa wɔɔ́sɔ, beébe nukúse e nú me kíndísi taaká cɛ asana.3.15 Bɔ́mɔtɛ́ baacɔ ŋa bɔ́ lɔ́kɔ́ma anyía « hiɔ́bɔ hí belumitinine eéhí áŋa ne nukúse ne bulímbí bɔ́ taaká ».¹⁶Asana eéyé ayɛ́ Bandɔ́mɛsɛ́ ŋa námbɔ́nɛ́na baacɔ áŋa yaandándá yɛ́ asana, isuŋí tɛ á kɛla.

Yááŋa asana yí Ooci awɔ́ ú ŋaá bɛ́cáŋa ɔɔcɔ,

Elilé yó tóŋínyi anyía wáŋa ɔtálɛ́mánánɔ́,

bililé bɛ́ masɔ́ma bɛ́ Bandɔ́mɛsɛ́ bíó wuúci lɛcaka,

baacɔ bó húlíkínyi baacɔ abá bá tɛ ábɔ́ bá Besuif yááyɛ́ asana,

biliminyi bɛ́ ɔmɛsɛ́ okime bá ɔhákɛ́na mɔŋɔlɛ́ nááyá,

Bandɔ́mɛsɛ́ nyi wuúci bééti eényí ɔ Ɔmuaná aá haála hé nuúmi.

Beékúnyi eékúnyi cá bɛfala

¹Elilé ŋa kɔɔna bɔmbányɛ bɔmbányɛ yɛ́sɛ : Ɔ mɔɔ́sɛ́ me elime, baacɔ a bɔ́mɔtɛ́ ká bɔ́ bɛ́yuátáka olumitinine anyía bábɔ́ lɔ́kɔ́mákɛ́na ne bililé bí munéŋéne ne nyiékúnyi e nyí ŋe húle ná *bɛɛbɛ́ bí bililé. ²Baacɔ bá tɔbɛ́mbɛ túfendí ké bú beébe nenisiki ohónyí ne munéŋéne ; tɔcɔɔ́cɔ́ tɔ́ ɛtɛ́má tɔ́ baacɔ eébé áŋa túweékúnénú. ³Aáná bé ŋe bú eékúnyi anyía nyɛtɔ́nɔ́ áŋa nyɛɛbɛ́, ta ɔnyíá bɛnyɛ́ma bɛ́ ɔnyíá a bɛ́mɔtɛ́, yiíyi anyía Bandɔ́mɛsɛ́ ŋeé kétíki bɛnyɛ́ma bɛ́ ɔnyíá eébí anyía belumitinine *Kilís ; beébe eébé bé ŋe bú menyi taaká, bé biíbi nyíáka, bé iínjíékine Bandɔ́mɛsɛ́ bitéŋíti. ⁴Yááŋa anyía bɛnyɛ́ma bikime abɛ́ Bandɔ́mɛsɛ́ ŋeé kétíki áŋa bɛmbányɛ, bɔkɔ bú owoomboko tɛ á bá hɔ́á ; aáná ɔɔcɔ á nyɛmána wu ɔnyíáka bɔkɔ bukime, wu iínjíékine Bandɔ́mɛsɛ́ bitéŋíti. ⁵Na Bɛsana abɛ́ Bandɔ́mɛsɛ́ ŋaá kɔ́ɔnaka na ɔbɛ́cɔ́kɔ́lɛ́na ewú tu ŋe sú wuúci bɛ́cɔ́kɔ́lɛ́na ŋeé fúúmínyi bɛnyɛ́ma bɛ́ ɔnyíá bikime.

Ambányɛ yɛ́ munyiɔnɔ yí Yésus Kilís

⁶Eékúnyíki bɔnɔ́ɔnyia bé olumitinine bɛsana eébí, aáná ɔ kɔ́ɔ́ bá ambányɛ yɛ́ munyiɔnɔ yí Yésus *Kilís, á kɔmaka a Bɛsana bɛ́ Bandɔ́mɛsɛ́ ebí tu ŋe sú lumitinine, ɔlata na ambányɛ yí nyiékúnyi anyɛ́ ɔ ŋɔɔ́ látɛ́na. ⁷Mbá e kine ɔbɛ́lɔ́kɔ́ma tuhélúméke tɔ́ buáyá e tú ti ŋé bíléníne Bandɔ́mɛsɛ́. Cɔbá ne buúse o obíínjie o olíhe háyɛ Bandɔ́mɛsɛ́ ŋeé léne. ⁸Obíínjie o onyíényi cɛɛ́tɔ anyía ciá kɛndaka ŋɔ yɔɔ́lɔ nyɛnamá ; mbá nyibíínjie anyɛ́ ɔɔcɔ ŋe bíínjie o olíhe háyɛ Bandɔ́mɛsɛ́ ŋeé léne ŋɔ yɔɔ́lɔ buéŋí ɔ ɔhɔla, anyía ɔɔcɔ oócí kéé líhéke bɔmbányɛ o olíhe ú aámbáya, yó líhéke tɔ́na bɔmbányɛ ɔɔ́ yɔɔ́sɔɔ́sɔ yí olíhe yí ekúlú ekime. ⁹Buhúnyi eébú áŋa taaká ci buhúnyi, bá ŋáá nyɛmána bé o buúbu háya ɔ ɔtɛ́má noómi. ¹⁰Yááŋa anyía tu ŋe sú bíyébi, tú bɛ́kákátáka ɔ ɔnyiɔ buólí anyía tú ma sɔ́ háya mɔŋɔlɛ́ ná Bandɔ́mɛsɛ́ a wáŋa wɔɔ́sɔ, wuúci Munohi baacɔ bekime,4.10 Bóol ŋa bɛ́kɛ́lɛ́na buhúnyi bɔ́ nɔkɛlɛ́k a búáŋa ne ehembule ceéŋí : Na « mɔkɛla bɔmbányɛ » ne « munohi ». hɔlákáhɔ́láka mu eebe a bá ŋa bɔ́ háya mɔŋɔlɛ́ né Kilís. ¹¹Bɛsana eébí ɔ́ɔ nyɛmána wu owoónyísíkínyi ɔlaana baacɔ, é beébe eékúnyíki.

¹²Ɔɔcɔ tɛ ɔ bábɛ́na anyía ɔ waánáŋa ɔɔ́nɔmbɔ́ ; asana ɔ́mɔtɛ́, bámɔ́kɔ́nɛ́na nuketi enú belumitinine Kilís ŋa bɔ́ látɛ́na ɔ ɔtáŋa awɔ́ ɔ ŋɔɔ́ táŋa, o olíhe ewú o ŋoó líhe, e nyiléne enyí o ŋoó léne bɔsɔ́ɔ́kɔ́, a mɔŋɔlɛ́ amá ɔ ŋɔɔ́ háya ná Bandɔ́mɛsɛ́, ne ofúúméne ewú o ŋoó fúúméne. ¹³Ɔ ɔkɔɔ́háma a buɔ́sɛ́ abɔ́ ɛ ká mɛ faaya, bíínjie na makɛ́nda ɔ ɔfana Ciɔɔ́ŋɛ́ cɛ́ Bandɔ́mɛsɛ́ haála ahá baacɔ á bɔ́ŋa,4.13 I iŋetí ci eebi abɛ́ bá ŋaá bá bá fanáka a bɛndaŋía bí Besuif (Luk 4.16-21). beébe lébéke, é beébe eékúnyíki. ¹⁴Atɛ bábɛ́na yaála yí nuubo yɛ́ Bandɔ́mɛsɛ́, yiíyi yɛ́ ŋa lɛcana ne ekúlú eyí *behémúnyi bɛsana bá Bandɔ́mɛsɛ́ ŋa bɔ́ kɔ́ɔnaka yɔ́ɔ́wɔ asana ne ekúlú eyí bekendisi hiɔ́bɔ hí belumitinine ŋa bɔ́ ɔ táláka aabá a aatɔ́ ɔ ɔ kuɔŋɔ́ sáyabɛna.4.14 Nyɛkɔ́ŋɔ́na nyí etémbí : « Atɛ bɛ́yúata nyiínjie anyɛ́ Bandɔ́mɛsɛ́ ŋo yóo wiínjie a yááyɛ́ yaála yí nuubo, e elime ci mehúnyi ma Bandɔ́mɛsɛ́ emé Elilé ŋe iínjíékine ekúlú eyí bekendisi hiɔ́bɔ hí belumitinine ŋa bɔ́ ɔ táláka aabá a aatɔ́. »¹⁵Bíínjie ɔ ɔlátɛ́na bɛsana eébí ne úúwe ɔtɛ́má okime, aáná baacɔ bekime ká bɔ́ lɛca anyía ɔ ŋɔɔ́ kɔma e buólí bɔ́ Bandɔ́mɛsɛ́ noómi. ¹⁶Limíne ne ciéhíhi, bíkékényíki o otúme oówo o olíhe ú bɛ́muátá ɔ ɔkɔɔ́háma a bɛsana ebí o ŋoó weékúnyi baacɔ. A nyɛkɛlaka eényí o kóó nohiki baacɔ a bá ŋa bɔ́ lɔ́kɔ́ma bɛsana abɛ́ ɔ ŋɔɔ́ kɔɔna ; kuɔŋɔ́ bɛ́muátá wɔ́ nɔhɔ tɔ́na.

Anyána Timoté á nyɛmána wu olíhéke

¹Uumi ɔɔ́nɔ́, mbɔ́kɔ elunyí yɛ́ ɔnɔ́mɔcɔ́ ŋá kɛ́la asana a yaabɛ́, eti wuúci kákálɛ́na na nyɛŋána nyikime, mbá wuúci hɔ́ŋɔ́náka háyɛ ɔɔtɛ́. Lébéke bɛnɔ́kɔ́ bɛ́ baacɔ háyɛ bɔnɔ́ɔnyia a banɔ́mɔcɔ́. ²Hɔ́ŋɔ́náka bilunyí bí beénjú háyɛ bɔɔnyia, indíkíné ci beénjú háyɛ bɔnɔ́ɔnyia e beénjú tɔ́na ; nyɛkɛla eényí nyikime á bámɔ́kɔ́na nyɛtálɛ́mánánɔ́ eé buúse bɔ́ Bandɔ́mɛsɛ́. ³Sókóbíki ne nyikéke bisíké bí beénjú a bɛ́áŋa taaká cí bisíké. ⁴Mbá mbɔ́kɔ esíké a yɛ́mɔtɛ́ áŋa na baáná ta anyía banana a bá bɔ́ŋa bakɔmákánɔ́, bá ŋa bɔ́ nyɛmána bá ɔ cáŋa aákɔ́nákɛ́na ɔlɔ́kɔ́mɛ́na bíábɔ́ bibíényi, bé biíbi sókóbíki anyía híáná bíábɔ́ bibíényi ŋe bú beébe tétényíki buáyá. Nyɛkɛla eényí ŋeé bíléníne Bandɔ́mɛsɛ́. ⁵Esíké a yááŋa ɔlɔbɔ́nɔ́ taaká esíké, yiíyi tɛ́ka na ɔɔcɔ wu o wuúci sókóbíki, esíké eéyé áŋa ɔháyánɔ́ mɔŋɔlɛ́ ná Bandɔ́mɛsɛ́ ; u ŋeé wuúci bɛ́cɔ́kɔ́lɛ́na mɔɔ́sɛ́ mekime ne nebutúé na nabuɔ́sɛ́ anyía wé wuúci ɔɔ́lɛ́ta. ⁶Asana ɔ́mɔtɛ́, esíké eyí olíhe ú ɔmɛsɛ́ a yánáŋa o obíléníne áŋa ewéénú, ta yɛ́ cáŋa á bá anyía yɛ́ ŋa húánáná yɔɔ́sɔ. ⁷Bɛsana eébí ɔ́ɔ nyɛmána wu owoókísíki baacɔ eébé anyía ta ɔɔcɔ ti beébe kákálɛ́na. ⁸Yááŋa anyía ɔɔcɔ ewú u ti ŋé sókóbi bááyɛ́ baacɔ hɔlákáhɔ́láka bá ciayɛ́ ciíbe ma bɛ́sáŋɔ́na olumitinine ú Yésus, wáŋa ɔɔbɛ́ ɔ ɔhɔla mu-ti-lumitinine bɛ́muátá.

⁹Esíké ayɛ́ nu ŋa nɔ́ aamba ɔwɔɔ́ŋɔ ɔ ɔlɔŋɔ ú bisíké abɛ́ hiɔ́bɔ hí belumitinine ŋɔ yɔɔ́lɔ ŋá nyɛmána yɛ́ ɔ cáŋa bá na tuɔŋɔ etíne átátɔ́, yiíyi yɛ́ ŋɔɔ́ tɔ́nɔ́ hú nyɛtɔ́nɔ́ nyɛ́mɔtɛ́.5.9 Nyɛkɔ́ŋɔ́na nyí etémbí : « …awɔ́ u na mɔɔ́ tɔ́nɔ hú ekúlú ɔ́mɔtɛ́ ». Fanáka 3.2, 12.¹⁰Yɛ́ ŋa nyɛmána yɛ́ ɔbá oónjú awɔ́ baacɔ ŋé bú lémbi nyíáyɛ́ nyɛbɛ́kɛ́lɛ́na, wuúci u ŋeé sókóbíki bááyɛ́ baáná bɔmbányɛ, yɔ́ káháka bekenyí e úúye ooki, yɔ́ súáka akɔlɔ́ cé belumitinine Yésus,5.10 Ɔsua akɔlɔ́ cá baacɔ a bá ŋa bɔ́ faaya o ooki u ɔɔcɔ ŋaá bá buólí búmɔtɛ́ e moólí ma ɔkáháka baacɔ (fanáka Luk 7.44 ; Saŋ 13.4-5). yɔ́ wɔɔ́lɔ́kɔ baacɔ e muuyé, yɔ́ kɛ́laka bɛmbányɛ bɛ́ bɛsana ekúlú ekime. ¹¹A asana ne bisíké a bɛ́ a yánáŋa indíkíné cí beénjú, ɛ ŋa mɛ́ ɔ láana anyía eti biíbi ɔ́ɔ́ŋɔ e nufule, ananyía ɔcɔba nyɛtɔ́nɔ́ áŋa wu ɔ háná beébe bílénékíne buɔ́sɛ́, bɔ́ hámɔ́kɔ́na o olumitinine. ¹²Mbɔ́kɔ bɛ́ ŋa kɛlaka aáná, bé ké biíbi kákálákɛ́na anyía bí ŋe kine ɔlátɛ́na cáábɔ́ esúŋe. ¹³Asana a yɛ́mɔtɛ́ áŋa anyía mbɔ́kɔ o ŋoó biíbi ɔɔ́ŋɔ́kɔ, bɛ́ tɛ ká háná ɔ nyiɔ buólí, bío bíhélínyi o húle kanda hí eé meébe hí eé meébe, bɛ́ ɔ bá ne tukókó, bɛ́ táŋgɛ́na baacɔ, bɛ́ kɔɔ́náka bɛsana abɛ́ bɔ́ tɛ ɔ́mɔ bɔ́ nyɛmána bá ɔkɔɔnaka. ¹⁴Yaátɛ́ asana nyiámɛ nyiléne áŋa anyía bisíké a bɛ́ a yánáŋa indíkíné cí beénjú ŋá nyɛmána bɛ́ ɔtɔ́nɔ́kɔ ; bí bíénéke baáná, bí tétényíki maabɔ́ meébe ma baacɔ, ananyía ba-basɔ́-nuusi tɛ basɔ́ táŋɛ́na. ¹⁵Yááŋa anyía bɛ́mɔtɛ́ bisíké na maá bɔ́ nánaka ohónyí, bɛ́ɔ látákɛ́na Sátan. ¹⁶Mbɔ́kɔ mulumitinine e muénjú a mɔ́mɔtɛ́ áŋa ne bisíké bí beénjú a bɛ́áŋa a ciayɛ́ ciíbe cɛ baacɔ, u ŋá nyɛmána wu o biíbi sókóbíki, u ti túéhínyi hiɔ́bɔ hí belumitinine bɔlamɔ́ eébú. Aáná belumitinine ké bú sókóbíki bisíké bí beénjú a bɛ́áŋa taaká cí bisíké.

¹⁷Bekendisi hiɔ́bɔ hí belumitinine a bá ŋa bɔ́ nyiɔ búábɔ́ buólí bɔmbányɛ, hɔlákáhɔ́láka bɔsɔ́ɔ́kɔ́ e bé mé bú bíínjie muuyé ne o ohulinyi baacɔ Ambányɛ yɛ́ Ɛsɔ́ma ne o beébe eékúnyi bɛsana, bá ŋa nyɛmána bé o beébe kékéke bikúlú bífendí5.17 Bɔ́mɔtɛ́ baacɔ ŋa bɔ́ lɔ́kɔ́ma anyía « bɛnamá anamá éfendí ». ɔ ɔhɔla bɔsɔ́ɔ́kɔ́ bé etémbí. ¹⁸Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía : « Bá tɛ ŋɔ́ɔ́ yɔɔ́tɔ́kɛ́na káwɔ cɛ masáŋá ɛmɔ́má »5.18 Tet 25.4 yiíyi tɔ́na anyía « Munyiɔnɔ ŋá nyɛmána mu ɔnɔhɔkɛna a búáyɛ́ buólí. »5.18 Luk 10.7

¹⁹Atɛ caŋácáŋa olumitine asana ayɛ́ bá sɔ́mɛ́na mukendisi hiɔ́bɔ hí belumitinine a mumɔtɛ́, mbɔ́kɔ baacɔ béfendí ta bátátɔ́ tɛ ŋá bɔ́ háya ɛmbasɔ́.5.19 Tet 17.6²⁰Baacɔ a bá ŋa bɔ́ cɔ́ba ne buúse ɔ ɔkɛla bɔɔbɛ́, beébe bɔmɔ́kɛ́na ɛ ɛkatɛ́katɛ́ cɛ baacɔ bekime ananyía bɔsɔ́ɔ́kɔ́ bé etémbí é búle ebú líkíme ɔkɛla bɔɔbɛ́.

²¹Ɛ ŋa mɛ́ ɔ bɛ́cɔ́kɔ́lɛ́na eé buúse na bɔ́ Bandɔ́mɛsɛ́ ne bú Yésus *Kilís, ne bú *bililé bɛ́ masɔ́ma bɛ́ Bandɔ́mɛsɛ́ a bɛtáfákánɔ́, ɛsɛ́ : Látákɛ́na bɛsana eébí abɛ́ ɛ́ ŋa mɛ́ ɔ laákɛ́na. Atɛ kamɛ́na ɔɔcɔ asana anyía o ŋoó wuúci menyi, mbá á nyɛána mebeé. ²²Atɛ aáŋálɛ́na ɔ ɔtála ɔɔcɔ aabá a aatɔ́ o o wuúci télímínyi e nyilimíné hú anyía ɔyá ma yá. Atɛ aáláka bɔɔbɛ́ bɔ́ ɔɔcɔ ; bítétényíki kuɔŋɔ́ bɛ́muátá ofúúménénú.

²³Nyɛána o búle múána hú menyífé, a múátɛ́tákɛ́na meluku a asana ne úúwe ɔkála ú nuuhú anyía a tɛ háná lɔ́kɔ́ma ɔkála a tɔɔna.

²⁴Maabɛ́ ma baacɔ a bɔ́mɔtɛ́ ŋa lɛ́cana a miányɛ́ te bé ti ŋée beébe kélísi ; mbá baacɔ a bɔ́mɔtɛ́, bá ŋa nyɛmána bá ɔ cáŋa beébe kélísíki, e elime eécí bá ŋa lɛca anyía bá ŋá bɔ́ kɛ́láka bɔɔbɛ́. ²⁵Híáná ambányɛ yí buólí ŋa lɛ́cana a miányɛ́ tɔ́na, te bé ti ŋé tényí e buúbu lɛca, bú tɛ á bá bú olimine ekúlú yeéŋí bunámbánɔ́ tɛ́ka ne obítóŋie a miányɛ́.

¹Belumitinine bekime a bá bɔ́ŋa bɛɔ́lɛ́ ŋa bɔ́ nyɛmána bá ɔlɛcaka báábɔ́ *baáŋá ne nyikéke nyikime a nyɛ́ ŋá bɛ́amba, ananyía baacɔ ti sulísi te nyiínyi nyɛ́ Bandɔ́mɛsɛ́ ta bɛsana ebí tu ŋe sú eékúnyi baacɔ. ²Mbɔ́kɔ báábɔ́ baáŋá eébé ŋa bɔ́ háya mɔŋɔlɛ́ né Kilís, bɔ́ tɛ ɔ́mɔ bɔ́ nyɛmána bé o beébe bábákɛ́na, bá kɔɔnaka anyía bá bɔ́ŋa báábɔ́ benyíinyí bé olumitinine. Mbá, bá ŋá bɔ nyɛmána bé o beébe nyiɔkɛna buólí ɔ ɔhɔla nyinyiɔ nyɛ́ buáyá anyía bá bɔ́ŋa belumitinine, bé beébe lénéke tɔ́na.

Ne beékúnyi eékúnyi cá bɛfala ne beléne mɔɔnyɛ́ buéŋí

Bɛsana eébí ɔ́ɔ nyɛmána wu oweékúnyíki baacɔ, é beébe oókísíki anyía bá kɛláka. ³Mbɔ́kɔ ɔɔcɔ áŋa ne nyiékúnyi nyí etémbí, yó kine olumitinine ta bɛmbányɛ bɛ́ bɛsana bí uusú Otéŋí a Waáŋá Yésus *Kilís, ta nyíásɔ́ nyiékúnyi a asana na ambányɛ yɛ́ nyɛbɛ́kɛ́lɛ́na eé buúse bɔ́ Bandɔ́mɛsɛ́, ⁴ɔɔcɔ oócí áŋa na bumálá ; u ti ŋé menyi ta bɔkɔ bú etémbí, ɛ tɛ ŋáa bá hú na bɛhɔnɔnɔ na ɛsáká cí etémbí ne etémbí. Ciíci cí ŋe yiínjie baacɔ na bɛáká, na bɛhɔnɔnɔ, na muɔ́mbɔ́nána, na ɔbɛ́táá anyía bɔsɔ́ɔ́kɔ́ ŋeé beébe kɛláka bɔɔbɛ́. ⁵Bé ŋe bú súŋunyinyi, bá tɛ tɔmbɔ, anyía cííbú ibíkéti áŋa ɛɛbɛ́ : Bé ti túné menyi taaká. Bé ŋe bú keti yáakɛlá anyía, mbɔ́kɔ bá ŋa bɔ́ látɛ́na abɛ́kɛ́lɛ́na cé olumitinine, bá ŋa bɔ́ cɔ́baka ɔ ɔhɔ́máka mɔɔnyɛ́ meéŋí. ⁶Aá taaká nyibíínjie ɔ ɔlátɛ́na olumitinine áŋa na yaandándá yɛ́ ɔhɔ́ma, mbɔ́kɔ ɔɔcɔ ŋeé bíléníne nyɛnamá nyɛ́ bɛnyɛ́ma anyɛ́ wáŋa ne nyiínyi. ⁷Yááŋa anyía tu ŋa sɔ́ faáya ɔ ɔmɛsɛ́ aabá éfendí, híáná tu ká sɔ́ halɔ́mɔ́kɔ́na tɔ́na aabá éfendí. ⁸Aáná mbɔ́kɔ tua sɔ́ŋa na bɛnyɛ́ma bɛ́ ɔnyíáka na bɔlaka bɔ́ ɔlaŋaba, nyɛnamá eényí ŋaá basɔ́ nyɛmána. ⁹A aháŋá na baacɔ a bá ŋa bɔ́ aamba bɔnɔ́mɛ buéŋí, Sátan áŋa wu o beébe kɔ́kɔ́náka, yɔ́ kɛla anyía bábɔ́ kuakɔnaka a yááyɛ́ abɔkɔ noómi, bɔ́ búle bɛ́táá hú oléne bɛsana na bɛ́ buála na a bɛɛbɛ́ e bí ŋé beébe súéténe ne e bunyímé ne o owé noómi. ¹⁰Yááŋa anyía, oléne mɔɔnyɛ́ buéŋí ŋeé bíéne anamánamá ekime cá bɛɛbɛ́ bɛ́ bɛsana. Aáná baacɔ a bɔ́mɔtɛ́ e bé ŋe bú bíínjíékíne o oléne mɔɔnyɛ́ ŋa bɔ́ bɛ́yuátáka olumitinine, cííbú ɛtɛ́má bɛ́nyíáka buéŋí a asana eéyé.

Ilébé cɛ́ nyɛmána

¹¹Ɔ́ɔ kuɔŋɔ́, munyiɔnɔ Bandɔ́mɛsɛ́, sámbáka bɛsana eébí bikime ; bɛ́kɛ́ndákɛ́na ekúlú ekime ɔ ɔbá atálɛ́mánánɔ́ yɛ́ ɔɔcɔ, é líhéke háyɛ Bandɔ́mɛsɛ́ ŋé léne, mbá á cɔbá ne buúse ne o olumitinine *Kilís, ne o oléne bɔsɔ́ɔ́kɔ́, eéhíkínyínyi bɛsana, a aambáka mbuumu na bɔsɔ́ɔ́kɔ́ tɔ́na. ¹²Ɛ ŋa mɛ́ ɔ láana anyía nuáka bɛmbányɛ bí biité bí olumitinine, mbá é tímbíé bɔmbányɛ yɔɔ́sɔɔ́sɔ yí olíhe yí ekúlú ekime ; yiíyi Bandɔ́mɛsɛ́ ŋɔ yɔ́ɔ bɛ́tánɛ́na ekúlú ayɛ́ ú ŋɔ yɔ́ɔ lɔ́ŋɔ́kɔ, wɔ́ɔ táŋáka bɛmbányɛ bɛ́ bɛsana ebí o ŋoó lumítíníne eé buúse bɔ́ bambasɔ́mbásɔ beéŋí.6.12 Aaha yááŋa ekúlú yí uúyé obíótíne. Aá hiɔ́bɔ hí belumitinine hɛ́ buáyá, óo bíótíne, wɔ́ɔ kɔɔnaka mɔɔwɔ mehúnyi ma mɔŋɔlɛ́ a mááŋa ɔɔwɔ́ ɔ ɔtɛ́má.¹³Ɛ ŋa mɛ́ ɔ laana ne eé buúse bɔ́ Bandɔ́mɛsɛ́, Mulíhísi bɛnyɛ́ma bikime, ne eé buúse bú Yésus Kilís awɔ́ u ŋaá táŋáka na taaká ikime eé buúse bɔ́ Kɔ́mɛ́na Bílat, ɛsɛ́ : ¹⁴Látákɛ́na *bikotí bí olumitinine bikime e bufúúménénú noómi, baacɔ tɛ ɔ kákálɛ́na ɔ ɔkɔɔ́háma a nyɛkahálɔ́mɔ́na nyí uusú Otéŋí a Waáŋá Yésus Kilís. ¹⁵U ká ká hálɔ́mɔ́na a ambányɛ yí ekúlú ayɛ́ Bandɔ́mɛsɛ́ ŋaá táná. Bandɔ́mɛsɛ́ oócí Alámakɛ́nda, wuúci hicéme hɛ́ bɔmbányɛ, Otéŋí u betéŋí bekime, Waáŋá u *baáŋá bekime. ¹⁶Wuúci bímuócí ú ŋe líhe bikúlú bikime, u ti wé ; u ŋeé límine aá yaandándá yí eese ayɛ́ ɔɔcɔ tɛ a bá wu obíkósíti né yiíyi. Ta ɔɔcɔ tí ŋéé wuúci lɛca, ta ɔɔcɔ tɛ́ ŋáá bá wu o wuúci lɛca tɔ́na ; wuúci u ŋé téŋínyi ekúlú ekime, wuúci baacɔ ábɔ́ nyɛmána bé onyemiki, híáná yááŋa.

¹⁷Láákɛ́na ɛnɔ́mɛ cɛ́ baacɔ anyía cí ti bíbéétíki, cɛ́ tɛ hákɛ́na mɔŋɔlɛ́ a bɔnɔ́mɛ, anyía búáŋa bú ɔsɔla. Mbá cɛ́á hákɛ́na mɔŋɔlɛ́ ná Bandɔ́mɛsɛ́ bímuócí anyía ú ŋaá basɔ́ iínjie bɛnyɛ́ma bikime biéŋí anyía tuésú biíbi bílénékíne. ¹⁸Ciíci laákɛ́na anyía cɛ́á kɛláka bɛmbányɛ bɛ́ bɛsana biéŋí, cɛ́ bámɔ́kɔ́na na bɔnɔ́mɛ buéŋí a ambányɛ yɛ́ nyɛkɛla nyɛ́ bɛsana. Cɛ́ ŋá nyɛmána cɛ́ ɔbá ne nuubo, cí iínjíékine bɔsɔ́ɔ́kɔ́ bɛnyɛ́ma. ¹⁹Mbɔ́kɔ cɛ́ ŋaá kɛla aáná, cɛ́ ŋa bɛ́bátɛ́nɛ́na taaká cɛ bɔnɔ́mɛ a bɔ́ tɛ ŋáá mána e bikúlú a bɛ́ ŋa fáakɔna ; aáná cɛ́ káá bá na taaká ci olíhe.

²⁰Timoté, tétényíki bɔmbányɛ bɔkɔ ebú bó ŋo yóo cuméke, mbá á sámbáka ne tukókó tú etémbí ne etémbí e tú ŋe núúsi olumitinine, ne isuŋí e cí ŋo tóŋínyi omenyi a wɔ́mɔtɛ́ awɔ́ ú tɛ á bá taaká. ²¹Yááŋa anyía bɔ́mɔtɛ́ baacɔ ŋa bɔ́ bɛ́táá báyɛ bá bɔ́ŋa na nyɛnamá nyí omenyi eényí ; buátɛ́ bɔkɔ bá tɛ ŋá háná ebú lumitinine bɛsana ebí tu ŋé sú lumitinine.

Bandɔ́mɛsɛ́ á banɔ́ sayábákɛ́naʼo !