1 Sáaŋ

Nufule nú buúse anɔ́

Sáaŋ

ŋɔ yɔɔ́ŋɔ́kɔ́

Bɛsana a bɛ́ ŋɔ yɔɔ́lɔ anyía bá lɔ́kɔ́máka bɔmbányɛ nyɛfana nyí nufule eenu

Ɔɔcɔ ɔmɔtɛ́ ŋa kɛla anyía u ŋɔɔ́ ɔɔ́ŋɔ́kɔ́ na Ambányɛ yɛ́ Ɛsɔ́ma, ne tufule tɔ́tátɔ́ atɔ́ túáŋa na nyíáyɛ́ nyiínyi. Wáŋa anyía Sáaŋ, ɔɔcɔ u ɛndɔ́ma.

E nufule nú buúse e tufule atɔ́ Sáaŋ ŋɔ yɔɔ́ŋɔ́kɔ́, bá tɛ ŋáa cámba te nyiínyi nyɛ́ muɔ́ŋɔ, mbá ta baacɔ abá bɔ́ ŋɔ yɔɔ́ŋɛ́ná. U ŋo tóŋínyí bɛsana a bɛ́mɔtɛ́ abɛ́ tuɔ́bɔ tú belumitinine ŋaá bá tuɔ́ yɔ́ɔ́ndɛ́mákána. Eékúnyi a cɔkɔ́tɛ́mákánɔ́ acɛ́ baacɔ a bɔ́mɔtɛ́ ŋa bɔ́ bá bé húle ébú míekine ; ceéce tɛ́ka bɔkɔ búmɔtɛ́ na bɛsana bí olumitinine ú Kilís.

Nufule eenu ŋa hɔ́la otóŋínyi taaká ci olíhe ewú kilísíten á nyɛ́mana wu olíhéke. Nú ŋe yiínjie bekilísíten injiŋé, nú beébe ɔɔ́lɔ́kɔ o omenyi anyána bá bɔ́ŋa bá ɔsámbáka bɛsana bɛ́ bɛfala a bɛ́ naŋa bɛ́ á cáŋgɛna ɛtɛ́má cɛ́ baacɔ. Nú ŋo tóŋínyi tɔ́na anyána bábɔ́ nyɛ́mana bá ɔlatana taaká cɛ nyɛlatana e nyimónjóló na *Bandɔ́mɛsɛ́ ne Kilís, Ɔɔ́nɔ́ u Bandɔ́mɛsɛ́. Nyɛ́ ŋa lɛcana e nulénéne a núáŋa ɛ ɛkatɛ́katɛ́ ci benyíinyí. Bekilísíten ŋa bɔ́ nyɛ́mana bé onuusiki eékúnyi cá bɛfala ; mbɔ́kɔ bé ŋe bú líhe aáná, bá ká bɔ́ bá na yɔɔ́sɔɔ́sɔ yí olíhe yí ekúlú ekime.

Buhúnyi e bú ŋe yiínjíéne olíhe

¹Tu ŋa sɔ́ banɔ́ ɔɔ́ŋɛ́na nufule eenu a asana yí Buhúnyi e bú ŋe yiínjíéne olíhe.1.1 Nyɛkɔ́ŋɔ́na a nyɛ́mɔtɛ́ : « …a asana ne Ooci a wáŋa Buhúnyi e bú ŋe yiínjíéne olíhe. » Bú ŋaá bá ɛ́cɛ nyitúme nyɛ́ bɛnyɛ́ma bikime tɛ ŋáá bá. Tu ŋa sɔ́ lɔ́kɔ́máka úúyé ɔtáŋa na cáásɔ́ eetú, túo buúbu lɛcáka na cáásɔ́ eése cá bɛ́muátá, túo buúbu kebeliki ; cáásɔ́ aabá cío buúbu bítíséke. ²Ekúlú ayɛ́ *Bandɔ́mɛsɛ́ ŋeé céŋísi Buhúnyi bú olíhe eébú ɔɔcɔ u cɛɛ́tɔ, yó buúbu tóŋínyi a baacɔ, tu ŋe sú buúbu lɛcáka. Ɛ́ɛhɛ́ tu ŋa sɔ́ banɔ́ bíkétínyi, tu banɔ́ húlikinyi asana yɛ́ yɔɔ́sɔɔ́sɔ yí olíhe yí ekúlú ekime eéyé a yɛ́ ŋaá bá ne Síkíne Bandɔ́mɛsɛ́ ; aámbáya yɛ́ ma basɔ́ bítóŋínyi a miányɛ́. ³Asana eéyé tu ŋa sɔ́ lɛ́cáka, túɔ́ lɔ́kɔ́máka ; yiíyi eéyé tu ŋa sɔ́ banɔ́ húlinyi tɔ́na anyía núánɔ́ bámɔ́kɔ́na e nyimónjóló na basɔ́ abá tua sɔ́ŋa e nyimónjóló ne ne Síkíne ne ne uuyé Ɔɔ́nɔ́ *Yésus *Kilís. ⁴Basɔ́ bɛ́muátá, tu ŋa sɔ́ banɔ́ ɔ́ɔ́ŋɛ́na bɛsana eébí ananyía mbá túásɔ́1.4 Cɛ́mɔtɛ́ Ciɔɔ́ŋɛ́ cɛ́ buáyá áŋa na « núánɔ́ ». bámɔ́kɔ́na háyɛ nyitíne nyí bilúŋe.

Síkíne Bandɔ́mɛsɛ́ áŋa eese

⁵Ɛsɔ́ma acɛ́ tu ŋa sɔ́ lɔ́kɔ́máká né Yésus *Kilís, ícíeci tu ŋa sɔ́ banɔ́ húlinyi : Cɛ́áŋa anyía Bandɔ́mɛsɛ́ áŋa eese, ta bɔkɔ a búmɔtɛ́ bú ibíne tɛ a bá nááyá. ⁶Mbɔ́kɔ tu ŋa sɔ́ kɔ́ɔna anyía tua sɔ́ŋa e nyimónjóló na Bandɔ́mɛsɛ́, basɔ́ hú ɔcɔba ne buúse ɔ ɔkɛla bɛsana bí ibíne, ɛ́cɛ anyía tu ŋe sú néŋe baacɔ, tu ti líhe a taaká noómi. ⁷Asana ɔ́mɔtɛ́, mbɔ́kɔ tu ŋe sú líhe e eese noómi háyɛ Bandɔ́mɛsɛ́ wuúci bɛ́muátá ŋé líhe e eese noómi, tua sɔ́áŋa e nyimónjóló basɔ́ na basɔ́, manɔ́ŋɔ́ me uuyé Ɔɔ́nɔ́ Yésus ŋaá basɔ́ fúúmínyi a búásɔ́ bɔɔbɛ́ bukime.

⁸Mbɔ́kɔ tu ŋa sɔ́ kɔ́ɔna anyía tu tɛ asɔ́ bá bakɛla maabɛ́, tu ŋe sú bínéŋe basɔ́ bɛ́muátá ; aáná taaká tɛ a bá náásɔ́ buúse bukime. ⁹Asana ɔ́mɔtɛ́, mbɔ́kɔ tu ŋa sɔ́ bɛ́kɔ́tɔ búásɔ́ bɔɔbɛ́ eé buúse bɔ́ Bandɔ́mɛsɛ́, wuúci bɛ́muátá u káá basɔ́ buúbu nyɛanɛnɛna, yó buúbu fúúmínyi bukime anyía wáŋa atálɛ́mánánɔ́ yɛ́ ɔɔcɔ, u nyíóyísíkínyi úúyé ɔtáŋa. ¹⁰Túásɔ́ kɔɔna anyía tu tɛ ŋá sɔ́ kɛ́la bɔɔbɛ́, tú me sú hélúmúnyi Bandɔ́mɛsɛ́ ɔfalafala, búáyɛ́ buhúnyi tɛ a bá a cáásɔ́ eetú buúse bukime.

¹Báámɛ baáná e, ɛ ŋa mɛ́ banɔ́ ɔ́ɔ́ŋɛ́na bɛsana eébí anyía nu tɛ kɛláka bɛsana a bɛɛbɛ́. Mbá, mbɔ́kɔ yɛ́ ŋɔ́ yɔ́ɔ hámɛ́na anyía kuɔŋɔ́ ɔɔcɔ a wɔmɔtɛ́ ɔ́ɔ kɛ́la asana a yaabɛ́, menyi anyía tua sɔ́ŋa na Mɔkamɛna eé buúse bú Síkíne Bandɔ́mɛsɛ́ ; wuúci wáŋa Yésus Kilís, atálɛ́mánánɔ́ yɛ́ ɔɔcɔ. ²Yááŋa anyía wuúci bɛ́muátá u ŋaá bɛ́sɔ́mbɛ́na háyɛ etúké anyía mbá Bandɔ́mɛsɛ́ á basɔ́ nyɛanákɛ́nɛ́na maasɔ́ maabɛ́ ; tɛ́ cáŋa hú maasɔ́ maabɛ́ bímuócí, mbá u ŋaá nyɛ́anɛnɛna tɔ́na maabɛ́ ma baacɔ bekime bá ɔmɛsɛ́ okime.

Mumenyi Bandɔ́mɛsɛ́ ŋaá látɛ́na bíáyɛ́ bikotí

³Mbɔ́kɔ tu naŋa tuasɔ́ látákɛ́na *bikotí bɛ́ Bandɔ́mɛsɛ́, bú ŋo tóŋínyi anyía tu ŋe sú wuúci menyi bɔmbányɛ. ⁴Ɔɔcɔ okime awɔ́ ú ŋa kɔɔna anyía u ŋeé wuúci menyi bɔmbányɛ, mbá u tɛ látɛ́na bíáyɛ́ bikotí áŋa na afala, taaká tɛ á bá nááyá buúse bukime. ⁵Mbá yááŋa anyíaʼo, ɔɔcɔ okime awɔ́ ú ŋa látɛ́na bɛsana abɛ́ Bandɔ́mɛsɛ́ ŋa kɔɔna, wuúci oócí u ŋé léne Bandɔ́mɛsɛ́ bɔmbányɛ bɔmbányɛ. A asana eéyé tu ŋe sú ményi anyía tua sɔ́ŋa balatákánɔ́ e nyimónjóló ne wuúci. ⁶Ɔɔcɔ okime awɔ́ u ŋá kɔɔna anyía u ŋee límine e nyimónjóló na Bandɔ́mɛsɛ́ ŋá nyɛmána wu olíhéke i iŋetí ci olíhe ú *Kilís bɛ́muátá.

⁷Baláamɛ bá ɔtɛ́má e, okotí ayɛ́ ɛ ŋa mɛ́ banɔ́ ɔ́ɔ́ŋɛ́na aaha tɛ a bá yɔɔ́sɔɔ́sɔ yí okotí. Mbá okotí yɛ́ buáyá yááŋa ; yiíyi nú ŋe nú ményi o otúme e nyitúme nyí úúnú olumitinine. Okotí yɛ́ buáyá eéyé áŋa buhúnyi abɔ́ nú na maá nɔ́ lɔ́kɔ́máka. ⁸Mbá ta híáná, okotí ɔ́ yɔɔ́sɔ2.8 Fanáka Saŋ 13.34. yáaŋa ɛ ŋa mɛ́ banɔ́ ɔ́ɔ́ŋɛ́na ; yiíyi eéyé yí ŋé bítóŋínyi ne o olíhe ú Kilís ne e úúnú áyá. Yááŋa anyía ibíne á yáaŋa ɔ ɔmanɔkɔna ; taaká ci eese á yáaŋa ɔ ɔnɔma.2.8 Yésus ŋaá bɛ́kɛ́lákɛ́na okotí a yɛ́áŋa e Lef 19.18e úúyé olíhe ú bɛ́muátá, yɔ́ basɔ́ síkíne yááyɛ́ Elilé ɔ ɔkɛla anyía tú síké asɔ́ látákɛ́na cááyɛ́ abaná.

⁹Ɔɔcɔ okime awɔ́ u ŋá kɔɔna anyía u ŋeé líhe ambányɛ yí olíhe e eese noómi mbá, u liŋekine uuyé onyíinyí á yánáŋa i ibíne noómi. ¹⁰Yááŋa anyíaʼo, ɔɔcɔ okime ewú u ŋeé léne uuyé onyíinyí, wuúci u ŋeé líhe ambányɛ yí olíhe e eese noómi ; ta bɔkɔ a búmɔtɛ́ bú o wuúci kúfítínyi tɛ a bá nááyá. ¹¹Mbá ɔɔcɔ okime ewú u ŋe líŋine uuyé onyíinyí ŋeé líhe i ibíne noómi. U ŋaá kánda i ibíne noómi, u ti menyí haála ahá u ŋa cɔ́ba ananyía ibíne meé wuúci kuusi indímé.

¹²Banɔ́ báámɛ baáná e, ɛ ŋa mɛ́ banɔ́ ɔ́ɔ́ŋɛ́na bɛsana eebi anyía Bandɔ́mɛsɛ́ maá banɔ́ nyɛ́ánakɛnɛna máánɔ́ maabɛ́ a asana ne Kilís. ¹³Ɛ ŋa mɛ́ banɔ́ ɔ́ɔ́ŋɛ́na bɛsana eebi, banɔ́, báámɛ be síkíne, anyía nu ŋe nú menyi ooci awɔ́ u ŋaá bá o otúme e nyitúme nyɛ́ bɛnyɛ́ma bikime. Ɛ ŋa mɛ́ banɔ́ ɔ́ɔ́ŋɛ́na bɛsana eebi, banɔ́, na bɛnɔ́kɔ́ na babɔ́la, anyía nú ma nɔ́ yáká ɔɔcɔ u menjiŋé.

¹⁴Banɔ́ báámɛ baáná, ɛ ŋa mɛ́ banɔ́ ɔ́ɔ́ŋɛ́na bɛsana eebi anyía nu ŋe nú menyi ciasɔ́ Síkíne Bandɔ́mɛsɛ́. Ɛ ŋa mɛ́ banɔ́ ɔ́ɔ́ŋɛ́na bɛsana eebi, banɔ́, báámɛ be síkíne, anyía nu ŋe nú menyi ooci awɔ́ u ŋaá bá o otúme e nyitúme nyɛ́ bɛnyɛ́ma bikime. Ɛ ŋa mɛ́ banɔ́ ɔ́ɔ́ŋɛ́na bɛsana eebi, banɔ́, na bɛnɔ́kɔ́ na babɔ́la, anyía nua nɔ́ŋa na makɛ́nda o olumitinine noómi, Bɛsana bɛ́ Bandɔ́mɛsɛ́ ŋeé límine aanɔ́ ɛ ɛtɛ́má ekúlú ekime, nú ma nɔ́ yáká tɔ́na ɔɔcɔ u menjiŋé.

¹⁵Banɔ́ bekime, nuti bíínjíékíne o oléne ɔmɛsɛ́ ooci ta bɛsana a bɛ́áŋa ɔ ɔmɛsɛ́. Yááŋa anyía, ɔɔcɔ okime ewú u ŋeé bíínjie o oléne ɔmɛsɛ́ ooci ti ŋée léne Síkíne Bandɔ́mɛsɛ́ buúse bukime. ¹⁶A bɛsana bikime bɛ́ ɔmɛsɛ́ ooci a bɛ́áŋa anyía : Na bɛsana bí imehú a bɛ́ ŋa basɔ́ hámɛ́na ɛ ɛtɛ́má, na yaáká yí eése, ne obíbééti awɔ́ baacɔ ŋe bú bíbééti na búábɔ́ bɔnɔ́mɛ ; bí ti ŋé húle né Síkíne Bandɔ́mɛsɛ́, mbá bíáŋa bɛ́ ɔmɛsɛ́. ¹⁷Énu menyi anyía ɔmɛsɛ́ ooci á yáaŋa ɔ ɔmana, na bɛsana a bɛ́ ŋa hámɛ́na baacɔ ɛ ɛtɛ́má áyá. Mbá, ɔɔcɔ okime awɔ́ u náŋa waá látákɛ́na bɛsana e bí ŋeé bíléníne Bandɔ́mɛsɛ́ ŋeé líhe bikúlú bikime.

Benuusi Kilís

¹⁸Báámɛ baáná, bikúlú bí nyibíóndísínyi eebi tua sɔáŋa o olíhe. Ánɔ bɛ́tááka anyía bá ŋa banɔ́ láákɛ́na anyía e bikúlú eébí munuusi *Kilís káá hámɛ́na baacɔ hú huasɛ. Yááŋa anyía benuusi Kilís ma bɔ́ háláka aámbáya ; buátɛ́ bɔkɔ bú ŋo tóŋínyi anyía tua sɔáŋa o olíhe bikúlú bí nyibíóndísínyi. ¹⁹Baacɔ eébé ŋa bɔ́ bá buáyá e úúsú ɔlɔŋɔ, bá ŋa bɔ́ hámɔ́kɔ́na anyía bɔ́ tɛ ɔ́mɔ bɔ́ bá taaká cɛ́ baacɔ cí uúsú ɔlɔŋɔ. Yááŋa anyíaʼo, mbɔ́kɔ bábɔ́ bámɔ́kɔ́na baacɔ bé úúsú ɔlɔŋɔ, keyé bá ŋa bɔ́ lɔ́bɔ́kɔ. Mbá bá ŋa bɔ́ hátɔ́kɔ́ná anyía búé bítóŋínyi o motóndóló anyía bɔ́ tɛ ɔ́mɔ bɔ́ bá taaká cɛ́ baacɔ cí uúsú ɔlɔŋɔ.

²⁰Mbá banɔ́, a yáánɔ́ aháŋá, nu ŋe nú ményi anyía Kilís na maá banɔ́ súkunekine *Efúúménénú yí Elilé. Ɛ́ɛhɛ́ nua núáŋa o omenyi taaká,2.20 Nyɛkɔ́ŋɔ́na a nyɛ́mɔtɛ́ : « nu ŋe nú menyi bɛsana bikime ». banɔ́ bekime. ²¹Mbɔ́kɔ yaŋɔ́ ɛ ŋa mɛ́ banɔ́ ɔ́ɔ́ŋɛ́na bɛsana eebi, bú tɛ á bá anyía nu ti ŋé nú ményi taaká ; yááŋa hú anyía nuanua báka o omenyi taaká, nu menyukune tɔ́na anyía afala tɛ á bá yɛ́ ɔháma aá taaká noómi. ²²Ɛ́ɛ, aányɛ́ wáŋa ɔfalafala aná e ? Ɔfalafala áŋa ɔɔcɔ okime awɔ́ u ŋa kɔɔna anyía Yésus tɛ a bá Kilís. Wuúci wáŋa ɔfalafala, wuúci munuusi Kilís, u bínéŋítíkínyi ekúlú ɔ́mɔtɛ́ na ciasɔ́ Síkíne Bandɔ́mɛsɛ́ ne uuyé Ɔɔ́nɔ́ áyá. ²³Yááŋa anyía ɔɔcɔ okime ewú u ŋé bínéŋítínyi Ɔɔ́nɔ́ u Bandɔ́mɛsɛ́ ŋeé bínéŋítínyi tɔ́na Síkíne. Mbá ɔɔcɔ okime awɔ́ u ŋa kɔ́ɔna anyía Yésus áŋa Ɔɔ́nɔ́ u Bandɔ́mɛsɛ́ ŋe ményi tɔ́na Síkíne. ²⁴Yaátɛ́ asana núánɔ́ nyɛmána nú otétényíki bɔmbányɛ e cíínú ɛtɛ́má asana eéyé ayɛ́ nu ŋa nɔ́ lɔ́kɔ́máká e nyitúme nyí úúnú olumitinine. Mbɔ́kɔ nu ŋa nɔ́ cɔ́ba ne buúse o otétényi bɔmbányɛ e cíínú ɛtɛ́má asana ayɛ́ nu ŋa nɔ́ lɔ́kɔ́máká e nyitúme nyí úúnú olumitinine, nu ké nú límine banɔ́ bɛ́muátá e nyimónjóló na Ɔɔ́nɔ́ u Bandɔ́mɛsɛ́ ne Síkíne áyá. ²⁵Bɔkɔ ebú Kilís ŋaá basɔ́ bɛ́tánɛ́ná áŋa yɔɔ́sɔɔ́sɔ yí olíhe yí ekúlú ekime.

²⁶Ɛ ŋa mɛ́ banɔ́ ɔ́ɔ́ŋɛ́na aáná a asana na baacɔ a bá ŋa bɔ́ áamba ɔ banɔ́ nénisi ohónyí. ²⁷Mbá banɔ́, a yáánɔ́ aháŋá, Kilís na maá banɔ́ súkunine Efúúménénú yí Elilé;2.27 Nyɛkɔ́ŋɔ́na a nyɛ́mɔtɛ́ : « Kilís maá banɔ́ iínjie búáyɛ́ buhúnyi. » ɛ́ɛhɛ́ bú tɛ ŋá háná ɔyɔɔ́lɔ anyía bá banɔ́ eékúnyíki nyiékúnyi nyí etémbí. Yááŋa anyía Elilé eéyé ŋaá banɔ́ eékúnyi bɛsana bikime a bɛ́áŋa taaká, biíbi tɛ́ka bɛfala. Énu limíne e nyimónjóló nááyá háyɛ Elilé ŋaá banɔ́ eékúnyíkí.

Baáná bá Bandɔ́mɛsɛ́

²⁸Yaátɛ́ asana aná, banɔ́ báámɛ baáná, énu limíne e nyimónjóló ne *Kilís, ananyía ekúlú ayɛ́ u ká ka hálɔ́mɔ́na, tu ká sɔ́ bámɔ́kɔ́na o moyóyónó, tu tɛ lɔ́kɔ́ma aatɔ́ ɔlama eeyé eé buúse. ²⁹Ahɛ́ nu ŋe nú menyi anyía wáŋa atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́, énu menyí tɔ́na anyía ɔɔcɔ okime awɔ́ u ŋa kɛ́la bɛsana a bɛtálɛ́mánánɔ́ áŋa uuyé ɔɔ́nɔ́.

¹Huúúʼ ! Ánɔ lɛcá nyɛnamá nyí nulénéne anyɛ́ Taatá Bandɔ́mɛsɛ́ ŋaá basɔ́ lénéké. U ŋaá basɔ́ lénéké buéŋí a nyɛnamá anyɛ́ u ŋa basɔ́ lɔ́ŋɔ anyía bááyɛ́ baáná. Túé menyí aná anyía tua sɔ́ŋa taaká bááyɛ́ ; asana ɔ́mɔtɛ́, baacɔ bá ɔmɛsɛ́ ooci ti ŋé bú menyi anyía tua sɔ́ŋa baáná bá Bandɔ́mɛsɛ́, ananyía bó ti ómo bú ményi ciasɔ́ Taatá Bandɔ́mɛsɛ́. ²Baláamɛ bá ɔtɛ́má, aámbáya tua sɔ́áŋa baáná bá Bandɔ́mɛsɛ́ ; bú tɛ ŋáá lɛ́cana bɔmbányɛ aátɛ́ tu ká sɔ́ bámɔ́kɔ́nɛ́na. Ta híáná, tu ŋe sú ményi anyía ekúlú eyí Kilís kéé bítóŋínyi náásɔ́, tu ká sɔ́ bá aá ciayɛ́ iŋetí, anyía tu ké sú wuúci lɛcaka háyɛ wáŋa. ³Yááŋa anyíaʼo, ɔɔcɔ okime awɔ́ u ŋaá háya nyɛnamá nyɛ́ mɔŋɔlɛ́ eényí né Kilís ŋe bítétényi ofúúménénú i iŋetí ecí Kilís áŋa ofúúménénú.

⁴Ɔɔcɔ okime awɔ́ u náŋa waá kɛ́laka bɔɔbɛ́ tɛ ŋá látɛ́na *bikotí bɛ́ Bandɔ́mɛsɛ́. Ɔkɛla bɔɔbɛ́ áŋa ɔnɔkɔ okotí yɛ́ Bandɔ́mɛsɛ́. ⁵Nu ŋe nú ményi anyía Yésus Kilís, awɔ́ bɔɔbɛ́ tɛ á bá nááyá buúse bukime, ŋaá faáya ɔ ɔmɛsɛ́ ɔ ɔkɔɔ́waáŋíaka maabɛ́.3.5 Cɛ́mɔtɛ́ Ciɔɔ́ŋɛ́ cɛ́ buáyá áŋa na « …maasɔ́ maabɛ́ ».⁶Ɛ́ɛhɛ́ ɔɔcɔ okime e wé límine e nyimónjóló ne wuúci tɛ ɔ́mɔ́ nyɛmána wu ɔ háná kɛ́laka bɔɔbɛ́ ; mbá ɔɔcɔ okime awɔ́ a yánáŋa ɔ ɔcɔba ne buúse ɔ ɔkɛla bɔɔbɛ́ ti ómó wuúci lɛca, te o wuúci menyi tɔ́na.

⁷Banɔ́, báámɛ baáná, ta ɔɔcɔ tɛ banɔ́ néŋe. Ɔɔcɔ okime awɔ́ u naŋa waá kɛ́laka bɛtálɛ́mánánɔ́ bɛ́ bɛsana áŋa atálɛ́mánánɔ́ yɛ́ ɔɔcɔ i iŋetí ci Yésus Kilís, wuúci wáŋa atálɛ́mánánɔ́ yɛ́ ɔɔcɔ. ⁸Mbá ɔɔcɔ okime awɔ́ u ŋa cɔ́ba ne buúse ɔ ɔkɛla bɔɔbɛ́ áŋa na Musɔ́mɛ́na, ananyía muáŋa mɔkɛla maabɛ́ hí otúme e nyitúme. Aatɔ́ yɛ́ asana ayɛ́ Ɔɔ́nɔ́ u Bandɔ́mɛsɛ́ ŋaá fááyɛ́na ɔ ɔmɛsɛ́ ooci eé yiíyi ŋaá bá anyía wá ka cáŋgɛ́na monyiókínyí ma Musɔ́mɛ́na mekime.

⁹Ɔɔcɔ okime a wáŋa ɔɔ́nɔ́ u Bandɔ́mɛsɛ́ tɛ ŋá háná a kɛ́la bɔɔbɛ́, ananyía nyɛbá nyɛ́ Bandɔ́mɛsɛ́3.9 Ta anyía : « Buhúnyi » (Sak 1.21 ; 1Bi 1.23), ta anyía : « Elilé yɛ́ Bandɔ́mɛsɛ́, makɛ́nda me olíhe » (Saŋ 3.5). áŋa limine nááyá. U tɛ́ á bá wu ɔ háná cɔcɔbaka ne buúse a nyɛkɛla nyɛ́ bɔɔbɛ́ anyía Bandɔ́mɛsɛ́ áŋa cíáyɛ́ Síkíne. ¹⁰Ɛ́náʼo, asana e yí ŋe yeélúnyi bɔmbányɛ na baáná bá Bandɔ́mɛsɛ́ na bá *Sátan áŋa anyía ɔɔcɔ okime awɔ́ u tɛ ŋá kɛ́la bɛsana a bɛtálɛ́mánánɔ́, u ti léne tɔ́na uuyé onyíinyí, tɛ á bá ɔɔ́nɔ́ u Bandɔ́mɛsɛ́.

¹¹Yááŋa anyíaʼo, asana ayɛ́ nú ŋa nɔ́ lɔ́kɔ́máká e nyitúme nyí úúnú olumitinine áŋa anyía túésú lénékénéne. ¹²Tu tɛ ɔ́mɔ sɔ́ nyɛmána tú ɔhɔ́áka *Káyɛn ; wuúci u ŋaá bá ɔlɔŋɔ na Sátan, ɔɔcɔ u menjiŋé, yɔ́ wɔ́ɔ́nɔ onyíinyí. Mbá nu ŋe nú menyi a asana ayɛ́ aátɛ́ u ŋeé wuúci ɔ́ɔ́nɔ e ? U ŋeé wuúci ɔ́ɔ́nɔ anyía u ŋaá bá waá kɛlaka bɛɛbɛ́ bɛ́ bɛsana, onyíinyí áa kɛlaka a bɛtálɛ́mánánɔ́. ¹³Baláamɛ, nɔtɛ hɔla okéke anyía baacɔ bá ɔmɛsɛ́ ooci ŋa bɔ́ banɔ́ líŋíne.

¹⁴Mbá basɔ́, tua sɔ́áŋa o omenyi aámbáya anyía tú ma sɔ́ bɛ́kátɔ́na o owé noómi, tú okowóofine o olíhe. Tu ŋe sú menyi aáná anyía tu ŋe sú léne báásɔ́ benyíinyí ; ɔɔcɔ okime ewú u ti ŋe léne onyíinyí a yánáŋa o owé noómi. ¹⁵Ɔɔcɔ ewú u ŋe líŋíne onyíinyí áŋa muɔ́nɔ́ baacɔ ; nu ŋe nú menyi anyía muɔ́nɔ́ baacɔ tɛ ŋáa bá na yɔɔ́sɔɔ́sɔ yí olíhe yí ekúlú ekime nááyá. ¹⁶Bɔkɔ abɔ́ bɔ́ ŋɔɔ́ lɔ́ŋɔ anyía nulénéne, íbúebu aná Yésus Kilís ŋe keé iínjíé úúyé olíhe a yáásɔ́ asana. Basɔ́ tɔ́na tu ŋá sɔ́ nyɛmána tú owiínjíékíne cíísú ilíhe a bɛsana bɛ́ báásɔ́ benyíinyí. ¹⁷Mbɔ́kɔ ɛnɔ́mɛ cɛ ɔɔcɔ a cɛ́mɔtɛ́ ŋa lɛ́ca uuyé onyíinyí áa yábáka bɔkɔ a bɔ́mɔtɛ́ mbá u ti wuúci bɛ́cáma mahana, anyána wáŋa wu ɔkɔɔna anyía u ŋeé léne Bandɔ́mɛsɛ́ e uúye ɔtɛ́má noómi e ?

¹⁸Banɔ́, báámɛ baáná, tu tɛ ɔ́mɔ sɔ́ nyɛmána tú ɔtáŋáka hú ne nyuúté ne nyuúté, tu kɔɔnaka anyía tu ŋe sú lénéne na báásɔ́ benyíinyí, mbá tu ŋa sɔ́ nyɛ́mána tú otóŋínyi núásɔ́ nulénéne a nyɛkɛla nyɛ́ bɛsana aá taaká noómi. ¹⁹Aáná tu ké sú menyi anyía tua sɔ́ŋa baacɔ a bá ŋa bɔ́ kánda aá taaká noómi ; cíísú ɛtɛ́má cíɔ hálɔ́mɔ́kɔ́na a tɔɔna ekúlú ayɛ́ tua sɔ́ŋa eé buúse bɔ́ Bandɔ́mɛsɛ́. ²⁰Te cíísú ɛtɛ́má á basɔ́ kákálákɛ́na, tu ŋe sú menyi anyía Bandɔ́mɛsɛ́ ŋeé ciíci téŋínyi, u menyukune tɔ́na bɛsana bikime. ²¹Baláamɛ bá ɔtɛ́má, aáná, mbɔ́kɔ cíísú ɛtɛ́má tɛ ŋá basɔ́ kákálɛ́na, tua sɔ́ŋa ne moyóyónó ɔ ɔtáŋáka eé buúse bɔ́ Bandɔ́mɛsɛ́. ²²U ŋaá basɔ́ iínjie tɔ́na bɔkɔ bukime ebú tu ŋe sú wuúci bata a asana ayɛ́ tu ŋá sɔ́ látɛ́na bíáyɛ́ bikotí, tu kɛlaka bɛsana e bí ŋé wuúci bíléníne. ²³Bikotí abɛ́ u ŋaá basɔ́ iínjíékíne anyía tuásɔ́ látákɛ́na áŋa anyía túá háya mɔŋɔlɛ́ né uuyé Ɔɔ́nɔ́ Yésus Kilís, mbá tu lénékénéne háyɛ u ŋaá basɔ́ láakɛna. ²⁴Ɔɔcɔ awɔ́ u ŋa látɛ́na bíáyɛ́ bikotí ŋeé límine e nyimónjóló na Bandɔ́mɛsɛ́, Bandɔ́mɛsɛ́ tɔ́na e nyimónjóló ne wuúci. Bɔkɔ a bɔ́ ŋa basɔ́ tóŋínyi anyía Bandɔ́mɛsɛ́ ŋeé límine e nyimónjóló na basɔ́ áŋa *Efúúménénú yí Elilé ayɛ́ u ŋaá basɔ́ iínjie.

Anyána bááŋa bá ɔwaálɔ́náka anamá cé bililé

¹Baláamɛ bá ɔtɛ́má, nuti tényí lúmitine baacɔ a bá ŋa bɔ́ kɔ́ɔna anyía bá bɔ́ŋa na Ambányɛ yí Elilé ; mbá, ánɔ cáŋa beébe búlúnéke bɔmbányɛ bɔmbányɛ ananyía núénú ményi mbɔ́kɔ bá bɔ́ŋa taaká ne Elilé e yí ŋeé húle ná Bandɔ́mɛsɛ́. Yááŋa anyía *behémúnyi bɛsana bá bɛfala ma bɔ́ hála haála hekime. ²Ánɔ lɛca anyána nua nɔ́ŋa nú omenyi anyía ɔɔcɔ áŋa ne *Efúúménénú yí Elilé. Ɔɔcɔ okime awɔ́ u ŋa kɔ́ɔna ɛ ɛkatɛ́katɛ́ cɛ baacɔ anyía Yésus *Kilís ŋeé bíbíéné ɔɔcɔ áŋa taaká ne Elilé e yí ŋe húle ná Bandɔ́mɛsɛ́. ³Mbá ɔɔcɔ okime ewú u ti ŋé lúmitinine anyía Yésus Kilís ŋeé bíbíéné ɔɔcɔ4.3 Cɛ́mɔtɛ́ Ciɔɔ́ŋɛ́ cɛ́ buáyá áŋa na « ɔɔcɔ okime awɔ́ u ŋa yaafa Yésus Kilís oócí… » Sáaŋ ŋaá bá we núúsiki nyiékúnyi eenyi a nyɛ́mɔtɛ́ a nyɛ́ ŋaá bá nyɛ́á yaálɔ́náka ne Yésus a nyɛbá nyɛ́ ɔɔcɔ ne Kilís, Ɔɔ́nɔ́ u Bandɔ́mɛsɛ́. tɛ á bá ne Elilé e yí ŋe húle ná Bandɔ́mɛsɛ́. Elilé ayɛ́ wáŋa ne yiíyi áŋa elilé yí munuusi Kilís ; yiíyi nu ŋa nɔ́ lɔ́kɔ́máká anyía yɛ́ káá fáaya ; aámbáya eeci yá yáaŋa aaha ɔ ɔmɛsɛ́.

⁴Banɔ́ báámɛ baáná, aá banɔ́, nua núáŋa baáná bá Bandɔ́mɛsɛ́ ; nu na maa nɔ́ yákáka behémúnyi bɛsana bá bɛfala anyía Elilé a yááŋa náánɔ́ áŋa na makɛ́nda buéŋí ɔ ɔhɔla elilé a yááŋa á baacɔ bá ɔmɛsɛ́. ⁵Yááŋa anyía beébe bá bɔ́ŋa baacɔ bá ɔmɛsɛ́ ; yaátɛ́ asana bá ŋa bɔ́ táŋa bɛsana bɛ́ ɔmɛsɛ́, aáná baacɔ bá ɔmɛsɛ́ ŋe bú beébe lɔ́kɔ́ma. ⁶A yáásɔ́ aháŋá, basɔ́ tua sɔ́ŋa baáná bá Bandɔ́mɛsɛ́. Ɔɔcɔ okime ewú u ŋé ményinyi na Bandɔ́mɛsɛ́, wuúci u ŋá lɔ́kɔ́ma bɛsana abɛ́ tu ŋa sɔ́ kɔ́ɔna ; ɔɔcɔ awɔ́ u tɛ á bá ɔɔ́nɔ́ u Bandɔ́mɛsɛ́ tɛ ŋá lɔ́kɔ́ma bɛsana abɛ́ tu ŋa sɔ́ kɔɔna. Aáná tua sɔ́ŋa tú omenyi ɔwaálɔ́na ne Elilé yí taaká na yɛ́ nyɛnana.

⁷Baláamɛ bá ɔtɛ́má, túé búle lénéne basɔ́ na basɔ́ anyía nulénéne ŋeé húle ná Bandɔ́mɛsɛ́. Ɔɔcɔ okime náánɔ́ ewú u ŋeé léne bɔsɔ́ɔ́kɔ́ áŋa ɔɔ́nɔ́ u Bandɔ́mɛsɛ́, u ŋeé ményinyi ne wuúci. ⁸Ɔɔcɔ okime ewú u ti ŋéé léne bɔsɔ́ɔ́kɔ́ ti ŋéé ményinyi na Bandɔ́mɛsɛ́, anyía Bandɔ́mɛsɛ́ naŋa weé lénéke baacɔ. ⁹Bandɔ́mɛsɛ́ ŋaá basɔ́ námbɔnɛna núáyɛ́ nulénéne ekúlú ayɛ́ u ŋaá tɔ́má hííyé hɛkɔŋɔ́ hí Ɔɔ́nɔ́ ɔ ɔmɛsɛ́, ananyía mbá túásɔ́ bá na taaká ci olíhe nááyá. ¹⁰Asana e yí ŋó tóŋínyi nulénéne áŋa anyía Bandɔ́mɛsɛ́ u ŋa cáŋa ɔ basɔ́ léne, yɔ́ tɔ́ma uuyé Ɔɔ́nɔ́ ɔ ɔkɔbɛ́sɔ́mbɛ́na a yáásɔ́ asana, mbá u basɔ́ nyɛ́ánakɛnɛna máásɔ́ maabɛ́ ; nulénéne eénú tɛ á bá anyía basɔ́ tú ŋa sɔ́ cáŋa olénéke Bandɔ́mɛsɛ́.

¹¹Baláamɛ bá ɔtɛ́má, a asana ayɛ́ Bandɔ́mɛsɛ́ ŋaá basɔ́ lénéke buéŋí aáná, ɛ́ɛhɛ́ basɔ́ tɔ́na túásɔ́ nyɛmána tú olénékénéne. ¹²Énu ményi anyía ta ɔɔcɔ tɛ ŋa lɛ́ca Bandɔ́mɛsɛ́ háyɛ wáŋa ; ta híáná ekúlú eyí tu ŋe sú lénéne basɔ́ na basɔ́, tua sɔ́ŋa limine e nyimónjóló ne wuúci, nulénéne anɔ́ ú náŋa waá basɔ́ lénéke áŋa nunyíóyónú náásɔ́ bɔmbányɛ bɔmbányɛ.

¹³Bɔkɔ a bú ŋa basɔ́ tóŋínyi anyía tua sɔ́ŋa balatánɔ́ e nyimónjóló na Bandɔ́mɛsɛ́, wuúci tɔ́na ɔlatánɔ́ e nyimónjóló na basɔ́ áŋa anyía : U ŋaá basɔ́ iínjíé yááyɛ́ Elilé. ¹⁴Basɔ́ bɛ́muátá tu ŋa sɔ́ lɛ́cáka na cáásɔ́ eése anyía Taatá Bandɔ́mɛsɛ́ ŋaá tɔ́ma uuyé Ɔɔ́nɔ́ o okonóhi baacɔ bekime bá ɔmɛsɛ́ ; aáná tu ŋe sú húlinyi baacɔ anyía asana eéyé áŋa taaká. ¹⁵Ɔɔcɔ okime awɔ́ u ŋá kɔ́ɔna anyía Yésus áŋa Ɔɔ́nɔ́ u Bandɔ́mɛsɛ́ ŋee límine e nyimónjóló na Bandɔ́mɛsɛ́, Bandɔ́mɛsɛ́ tɔ́na e nyimónjóló ne wuúci. ¹⁶Basɔ́ bɛ́muátá tu ŋe sú ményi, tu lumitekinine anyía Bandɔ́mɛsɛ́ náŋa waá basɔ́ lénéke ; wáŋa nulénéne. Aáná ɔɔcɔ okime awɔ́ u náŋa weé líhéke e nulénéne noómi ŋeé límine e nyimónjóló na Bandɔ́mɛsɛ́, Bandɔ́mɛsɛ́ tɔ́na e nyimónjóló ne wuúci.

¹⁷Bɔkɔ a bú ŋaá basɔ́ tóŋínyi anyía tu ŋe sú léne Bandɔ́mɛsɛ́ bɔmbányɛ bɔmbányɛ áŋa anyía tu ti ké sú líkíme ta bɔkɔ buɔ́sɛ́ abɔ́ Bandɔ́mɛsɛ́ káá sɔ́mbɔ́tɔ́kɔ́nɛ́na baacɔ bɛsana. Úúsú olíhe ú ɔmɛsɛ́ ooci áŋa i iŋetí ci olíhe ú Yésus Kilís. ¹⁸Bulíkílíki tɛ á bá e nulénéne noómi, mbá taaká taaká ci nulénéne ŋeé menyisi bulíkílíki ɔ ɔtɛ́má. Yááŋa anyíaʼo, ɔbá ne bulíkílíki ɔ ɔtɛ́má ŋeé hémbule anyía bɔ́nɔ́sɛa áŋa cɛ́ ɔbá hɔ́á ; aáná ɔɔcɔ okime a wáŋa ne bulíkílíki ɔ ɔtɛ́má tɛ ŋá lɔ́kɔ́ma injibí ci nulénéne nú Bandɔ́mɛsɛ́. ¹⁹A náásɔ́, tua sɔ́ŋa ne nulénéne ɛ ɛtɛ́má ananyía Bandɔ́mɛsɛ́ u ŋaá cáŋa ɔ basɔ́ léne. ²⁰Mbɔ́kɔ ɔɔcɔ ŋa kɔ́ɔna anyía : « I ŋeé mi léne Bandɔ́mɛsɛ́ », mbá u líŋékíne bɔsɔ́ɔ́kɔ́, wáŋa na afala. Yááŋa anyía ɔɔcɔ ewú u ti ŋé léne baacɔ abá u ŋa lɛca ne eése, ɔɔcɔ oócí tɛ á bá wu olénéke Bandɔ́mɛsɛ́ awɔ́ u tɛ ŋá lɛca. ²¹Okotí ayɛ́ Bandɔ́mɛsɛ́ ŋaá basɔ́ iínjie íyéeye aná : Ɔɔcɔ ewú u ŋeé léne Bandɔ́mɛsɛ́ ŋá nyɛmána tɔ́na wu olénéke bɔsɔ́ɔ́kɔ́.

Olumitinine Ɔɔ́nɔ́ u Bandɔ́mɛsɛ́ áŋa indíné ci nulénéne

¹Ɔɔcɔ okime ewú u ŋé lumitinine anyía Yésus áŋa *Kilís awɔ́ Bandɔ́mɛsɛ́ ŋaá tɔ́ma o okonóhi baacɔ, ɔɔcɔ oócí áŋa ɔɔ́nɔ́ u Bandɔ́mɛsɛ́. Mbɔ́kɔ ɔɔcɔ ŋeé léne Síkíne, u ŋeé léne tɔ́na bááyɛ́ baáná. ²Bɔkɔ a bú ŋaá basɔ́ tóŋínyi anyía tu ŋe sú léne baáná bá Bandɔ́mɛsɛ́ áŋa anyía tu ŋe sú léne Bandɔ́mɛsɛ́, tu látákɛ́na bíáyɛ́ *bikotí tɔ́na. ³Yááŋa anyíaʼo : Oléne Bandɔ́mɛsɛ́ áŋa nyɛlátɛ́na nyɛ́ bíáyɛ́ bikotí ; aáná nyɛlátɛ́na nyɛ́ bíáyɛ́ bikotí tɛ ŋáá nata, ⁴anyía ɔɔcɔ okime a wáŋa ɔɔ́nɔ́ u Bandɔ́mɛsɛ́ áŋa na makɛ́nda ma ɔyáka bɛsana bɛ́ ɔmɛsɛ́. Tu ŋa sɔ́ yáka bɛsana bɛ́ ɔmɛsɛ́ anyía tu ŋa sɔ́ háya mɔŋɔlɛ́ né Yésus Kilís.

⁵Aányɛ́ wáŋa wu ɔyáka bɛsana bɛ́ ɔmɛsɛ́, ɛ tɛ ŋáa bá hú ooci ewú u ŋe lumitinine anyía Yésus áŋa Ɔɔ́nɔ́ u Bandɔ́mɛsɛ́ e ?

⁶Yésus Kilís oócí u ŋaá fááya ɔ ɔmɛsɛ́, yó bíótíne ne menyífé, manɔ́ŋɔ́ mó wuúci hámɔ́kɔ́na e úúyé owé;5.6 Fanáka Saŋ 19.34. u tɛ ɔ́mɔ fáaya ɔ ɔmɛsɛ́ hú ne menyífé me úúyé obíótíne meéme ne meéme, mbá u ŋaá fááya ne menyífé me úúyé obíótíne na manɔ́ŋɔ́ me úúyé owé. Aáná Efúúménénú yí Elilé ŋaá háya ɛmbasɔ́ ; ciayɛ́ ɛmbasɔ́ áŋa taaká anyía yɛ́áŋa taaká. ⁷Yááŋa anyía bambasɔ́mbásɔ áŋa bátátɔ́ : ⁸Ne *Efúúménénú yí Elilé, ne menyífé, na manɔ́ŋɔ́ ; bɛ́tátɔ́ eébí okelú ɔ́mɔtɛ́. ⁹Mbɔ́kɔ tu náŋa tuesú lumitekine anyía ɛmbasɔ́ cɛ baacɔ áŋa taaká, túé menyí anyía ɛmbasɔ́ cɛ Bandɔ́mɛsɛ́ áŋa taaká ɔ ɔhɔla cɛ baacɔ, ananyía wuúci bɛ́muátá u ŋaá háya ɛmbasɔ́ a asana ne uuyé Ɔɔ́nɔ́. ¹⁰Aáná ɔɔcɔ ewú u ŋe lúmitinine anyía Yésus áŋa Ɔɔ́nɔ́ u Bandɔ́mɛsɛ́ áŋa na ɛmbasɔ́ eécí nááyá bɛ́muátá. Mbá ɔɔcɔ ewú u ti ŋé lúmitinine ŋeé híite Bandɔ́mɛsɛ́ háyɛ ɔfalafala, anyía u ti ómó lúmitinine ɛmbasɔ́ acɛ́ u ŋa hákɛ́nɛ́ná uuyé Ɔɔ́nɔ́. ¹¹Ciátɛ́ ɛmbasɔ́ eécí áŋa anyía Bandɔ́mɛsɛ́ ŋaá basɔ́ iínjíékíne yɔɔ́sɔɔ́sɔ yí olíhe yí ekúlú ekime. Olíhe oócí áŋa né uuyé Ɔɔ́nɔ́. ¹²Ɔɔcɔ okime a wáŋa e nyimónjóló na Ɔɔ́nɔ́ u Bandɔ́mɛsɛ́ áŋa ne olíhe, mbá ɔɔcɔ okime awɔ́ u tɛ á bá e nyimónjóló na Ɔɔ́nɔ́ u Bandɔ́mɛsɛ́ tɛ á bá ne olíhe.

Bɛsana bí nyibíóndísínyi

¹³Banɔ́, belumitinine Yésus *Kilís a wáŋa Ɔɔ́nɔ́ u Bandɔ́mɛsɛ́, ɛ ŋa mɛ́ banɔ́ ɔ́ɔ́ŋɔ́kɛ́na bɛsana eébí ananyía nuénú menyi anyía nua núáŋa na yɔɔ́sɔɔ́sɔ yí olíhe yí ekúlú ekime. ¹⁴Tu ŋe sú menyi anyía Bandɔ́mɛsɛ́ ŋaá lɔ́kɔ́ma bɔkɔ bukime ebú tu ŋe sú wuúci bata mbɔ́kɔ bú ŋeé wuúci bíléníne ; asana eéyé ŋaá basɔ́ iínjie makɛ́nda ɔ ɔtɛ́má noómi. ¹⁵Aáná, háyɛ tu ŋe sú menyi anyía u ŋaá basɔ́ lɔ́kɔ́ma, túé menyi tɔ́na anyía ekúlú eyí tu ŋe sú wuúci bata bɔkɔ a búmɔtɛ́, tua sɔ́áŋa ne buúbu.

¹⁶Mbɔ́kɔ ɔɔcɔ a wɔmɔtɛ́ ŋa lɛ́ca uuyé onyíinyí á kɛlaka asana a yaabɛ́ a yɛ́ tɛ á bá yí o wuúci cɔbana o owé, wá bɛ́cɔ́kɔ́lɔ́kɛ́nɛ́na ɔɔcɔ oócí Bandɔ́mɛsɛ́ ; Bandɔ́mɛsɛ́ kéé wuúci iínjie olíhe. Asana eéyé ŋa lɛca baacɔ a bá ŋa bɔ́ kɛla bɔɔbɛ́ a bú tɛ á bá bú o beébe cɔbana o owé. Mbá bɔɔbɛ́ a búmɔtɛ́ áŋa bú ɔcɔbana ɔɔcɔ o owé ; tɛ́ cáŋa a nyɛnamá nyɛ́ bɔɔbɛ́ eényí ɛ ŋa mɛ́ kɔɔna anyía bá bɛ́cɔ́kɔ́lɔ́kɛ́nɛ́na ɔɔcɔ eé nyiínyi. ¹⁷Nyɛnana nyikime anyɛ́ ɔɔcɔ ŋa nána ŋaa bɛ́lɔ́ŋɔ anyía bɔɔbɛ́. Mbá ta híáná, maabɛ́ a mɔmɔtɛ́ áŋa hɔ́á a má tɛ á bá ma ɔcɔbana ɔɔcɔ o owé. ¹⁸Tu ŋe sú menyi anyía ɔɔcɔ awɔ́ a yáaŋa ɔɔ́nɔ́ u Bandɔ́mɛsɛ́ tɛ ŋá háná á kɛla bɔɔbɛ́. Mbá Ɔɔ́nɔ́ u Bandɔ́mɛsɛ́ ŋeé wuúci tétényi5.18 Cɛ́mɔtɛ́ Ciɔɔ́ŋɛ́ cɛ́ buáyá áŋa na « Mbá ɔɔcɔ awɔ́ a yáaŋa ɔɔ́nɔ́ u Bandɔ́mɛsɛ́ ŋeé bítétényi wuúci bɛ́muátá. » anyía ɔɔcɔ u menjiŋé ti wuúci kɛlá bɔɔbɛ́.

¹⁹Tu ŋe sú menyi anyía basɔ́ tua sɔáŋa bɛnyɛ́ma bɛ́ Bandɔ́mɛsɛ́, mbá baacɔ bekime bé etémbí bá ɔmɛsɛ́ á bɔ́ŋa e butéŋí bɔ́ ɔɔcɔ u menjiŋé noómi.

²⁰Tu ŋe sú ményi tɔ́na anyía Ɔɔ́nɔ́ u Bandɔ́mɛsɛ́ ŋaá faaya ɔ ɔmɛsɛ́, yɔ́ basɔ́ iínjíékíne makɛ́nda me omenyinyi na taaká cɛ Bandɔ́mɛsɛ́. Tua sɔ́ŋa balatákánɔ́ e nyimónjóló na taaká cɛ Bandɔ́mɛsɛ́ oócí e elime ci Yésus Kilís, uuyé Ɔɔ́nɔ́. Wuúci wáŋa taaká cɛ Bandɔ́mɛsɛ́ ; wáŋa yɔɔ́sɔɔ́sɔ yí olíhe yí ekúlú ekime.

²¹Banɔ́, báámɛ baáná, énu bíkékényíki, nuti nyemíki bɛbɔ́kɔ́bɔ́kɔ.