TITO

¹ Ami Paulo ɔni ndi Katɔti kabla ɔblane ku Blɔti Yesu Kristo ɔtalane ni, ami muunweni-ɔ ɔku ɔmɛni. Katɔti ɔ́ƒuna-mi na ɔ́tala-mi ɔnii mbunku nwuna bekyuli baƒunadi bɔƒɔtaadi na lɛtɔnku-ma na banu litemi geen lɛni na bula bɔƒɔtaadi ulu ɔɔtina bati. ² Ulu ɔmɛni ndanku ngba ƒui lɛnunsia lɛni bɔƒɔtaadi na bubo lɛlɔ. Na Katɔti ɔni naaanyi ɔkɔ ɔlati nése-bu kenye kamɛni úse asa na údie kayawi. ³ Údie ngba ƒui litemi ɔ́tina-bu na nwuna litemi lɛni mɔɔsu mɛni kemo na uwi ɔni lɛlɔ na anwu ɔlati úse úse lɛlɔ. Ɔmɛni na úti ɔ́kya-mi enu kemo na mɔɔkɔ́-ni lɛsa teete kadi. Na Blɔti ɔni ndi bula Ɔƒɔne násu-mi ɔnii nkɔ lɛsa lɛmɛni. ⁴ Ɔyɔne Tito, muunweni-ɔ ɔku ɔmɛni ka adi-mi ubi geen na bɔƒɔtaadi bɔni kemo bɔkya ɔsu. Na muuvele Katɔti ku Yesu Kristo ɔni ndi bula Ɔƒɔne nnii ɔda-a na nwuna lɛƒɔndia kemo na ute-ɔ keyi buɛɛ. ⁵ Lɛ́ya-a na ásɔ akya Kreta kalɛ na aklibi ala ani nébu bɔklibi. Na ɔma biala kemo ni, die benengu bani menye baƒɔtaadine kenye aani kalɛ na lɛ́su-ɔ nnii bla. ⁶ Ɔƒɔtaadine unengu ni, útalɛka litemi lɛdi lɛda-nwu. Na ɔdi ukyuli ɔni na úti uleku unwi. Na nwuna bebi lɛnɔ badi bebi bani nda bɔƒɔtaadi kaduɛ, na beeebo atuɔkplu, na baabu bana bawɔne. ⁷ Na ɔƒɔtaadine ɔtɔnkune ɔni mɔɔnu Katɔti kabla lɛlɔ ni, utalɛka litemi lɛdi lɛda-nwu iye utaakɔliku lɛlɔ katɔ iye uteeti kɔnyi buti buti. Na ɔɔɔdi ka utaani ntɛ teekpi, na ulekpo udi, iye anumi lɛnɔ elégyie-nwu na egulabi lɛlɔ. ⁸ Ɔlɛka utaaƒɔ baƒɔ na utaayɔ lɛbuni na ɔda lɛlɔ kaduɛ. Na ɔbla ukyuli ɔni na ubo udu, na use kedee, na ɔɔkana anwu ɔlati lɛlɔ lɛnɔ bɔdi. ⁹ Ɔdi ka uƒie litemi geen lɛmmɔ ɔda kpakplaa aani kalɛ na bɔƒɔtaadi ulu ɔmmɔ ɔɔtina. Na ulu ɔmɛni lɛlɔ kani na ɔdubɔkana bɔsia na ɔkya bekyuli bamba lɛnɔ ogya na udie bani mɔɔta teenye litemi lɛmɛni lɛlɔ bɔƒiɔ ɔtina-ma. ¹⁰ Ɔsika bekyuli pii bakya baatɔ́lɔ bekyuli na baata teenye litemi lɛmmɔ lɛlɔ ku bana kɔdɔlɔ ala. Na bani mɔɔbla ala ammɔ ketulodikɔ badi Yudaƒuɔ. ¹¹ Ɔdi ka enye etile bana ala ammɔ udu bɔtina lɛlɔ, ɔsika ala ammɔ mɔɔyá na kɔduli bekyuli ƒui beeƒú bana bɔƒɔtaadi. Na ala batinane bammɔ lɛkɛ likpidi lɛni baawia ɔsu na baatina ala ekpidi amɛni. ¹² Na Kretani ɔdi ɔni ndi kenye udiene ɔ́su ɔnini, “Kretaƒuɔ ni, ɔkɔ kani na baanyi uwi biala na bebo kalala kekpidi, na baadi ɔdivo, na bebo kɔkɔsɔ lɛnɔ.” ¹³ Lɛla lɛni na kenye udiene ɔmmɔ ɔ́su ɔdi sɔsɔ. Anwuɔsu bɔku-ma na bada udu ɔmɛni baya kalɛ na bakɛ bɔƒɔtaadi geen bɔmmɔ. ¹⁴ Ɔmɛni ɔdubɔya na bada atu bedie Yudaƒuɔ atɛ anwidi ku bekyuli bani néni litemi geen lɛmmɔ ala bɔtina kudɔ. ¹⁵ Lɛla biala lise kedee lite bekyuli bani alati nse kedee. Nsu bekyuli bani ndi bekyuli bekpidi na balaƒɔ taadi ni, lɛla biala liiise kedee, ɔsika bana kasusu kemo kéyi ku ala ekpidi, na basɔ balanu lɛbuni ku likpidi taati. ¹⁶ Ama alati baasu banii baabu Katɔti, nsu bana ablala alátina lɛni. Badi bekyuli bani muusé lɛlɔ na balábu lɛla lɛdi na bátamanku lɛbuni lɛdi lɛnɔ bɔbla.

¹ Nsu awɔ ni, tina ala ani nkɛnku bɔƒɔtaadi ulu ɔmmɔ lɛlɔ. ² Tina benengu bammɔ ƒui anii ɔdi ka babla anumi ku kasusu nwaa uwi biala. Na bada lɛlɔ kaduɛ ku bana bɔƒɔtaadi, na bataayɔ lɛlɔ, na bataakya ɔkplu lɛnɔ. ³ Lɛni kani na beleku benengu bammɔ lɛnɔ ni, tina-ma anii belie ngba bɔni námanku beleku bani nse kedee ka belie. Na batataalɔ bekyuli anyikpi. Na ntɛ bɔni lɛnɔ butadi-ma lɛlɔ. Mmomu batina bekyuli udu buni. ⁴ Na batina begblebi bani nlie agya ala kalɛ na bataayɔ bana bagya ku bana bebi lɛnɔ. ⁵ Na bati lɛlɔ bɔda, na babla lɛlɔ kedee, na babla agya beliene babuni bani muuboku lɛlɔ kalɔ teete bana bagya. Ɔmɛni ndubɔya na ukyuli ɔdi ulasu lɛla likpidi lɛdi ulásiku linyesia lɛni nási Katɔti kudɔ lɛlɔ. ⁶ Ulu ɔmɛni kani lɛlɔ na ɔlɛka eti akya bakloƒu lɛnɔ ɔkplu kalɛ na bada lɛlɔ kaduɛ. ⁷ Na ala amɛni ƒui kemo ni, awɔ ɔlati ɔlɛka enwini ukyuli ɔni na ɔlɛka banu batɛya. Na enye momoomo na atina ala kaduɛ. ⁸ Ti kalɛ na atɛmiku bekyuli ku etemila ani mbo ɔbu kalɛ na beledie-ɔ bɔƒiɔ bɔdi, na ƒula bekisine lɛnɔ balasu lɛla lɛdi balásiku-bu lɛlɔ, mmomu na kɔƒa kukpo-ma. ⁹ Bekyuli bani mɔɔbla bekyuli bamba kabla beboku lɛlɔ kalɔ bete bana batɔlati. Na bana ablala ataada bana batɔlati ebiti na lɛla biala kemo. Na batakyaku-ma unyeƒi. ¹⁰ Beteyu-ma lɛnɔ, mmomu batina-ma ka badi bekyuli babuni na baabla ala ulu lɛlɔ teete-ma. Ɔmɛni ndubɔya na banu bati ka bula ala ani na bɔɔtina na Blɔti ɔni ndi bula Ɔƒɔne lɛlɔ ni, adi ala abuni. ¹¹ Ɔsika Katɔti údie nwuna lɛƒɔndia ɔ́tina-bu na ngba bɔƒɔ bɔni na ubo ute bekyuli bayawine ɔsu. ¹² Lɛƒɔndia lɛmmɔ mɔɔtina-bu ka ɔlɛka bɔda atu budie ngba bukpidi bulie kemo ku kayawi ala keeke kama bɔsiaku. Na bɔda lɛlɔ kaduɛ, na bulie ngba bɔbuni, na bɔbla lɛlɔ kedee na kayawi kamɛni kemo. ¹³ Lɛni na bɔdubuti butaanu ulu bute limeyi libendi lɛni lɛlɔ na bɔsia anu. Limeyi lɛmmɔ lɛlɔ na Utulone Blɔti, bula Ɔƒɔne, Yesu Kristo bukeye bɔdubɔda bɔlɛ. ¹⁴ Úti lɛlɔ úte na bula lili kalɛ na udie-bu na likpidi biala kemo na bɔbla bekyuli kedee bani ndi nwuna badi kani, na baawia ka bataabla lɛbuni. ¹⁵ Tina ala amɛni ku kenyekɔ kani na Katɔti úte-ɔ, na akya bekyuli bani ƒui muunú-ɔ litemi ɔkplu, na abɔku bani naaabla taasiaku ulu lɛlɔ lɛnɔ. Na taya na ɔdi ɔnu-ɔ ɔnii ásɔ.

¹ Na aya na bana ƒui benyimo na beboku lɛlɔ kalɔ bete bana batɔnkune ku lɛlɔ badine, na benu-ma litemi, na bataabla lɛbuni na ulu biala lɛlɔ. ² Na asu-ma anii batalɔ ukyuli ɔdi lɛnyikpi. Mmomu badi kɔnwa na belie ku keyi buɛɛ. Na bataabu bekyuli na ulu biala lɛlɔ. ³ Ɔsika abu alati lɛnɔ bɔ́bla adɔlɔla ku atuɔkplu, na bɔ́ƒiɔ dii. Na ɔlɔna kemo ala ekpidi áda-bu ɔkwɛ lɛnɔ dii. Na búti bula uwi búte kalala bɔbla ku lɛnungyie, na bekyuli békisi-bu na abu lɛnɔ búkisi-ma. ⁴ Nsu uwi ɔni na Blɔti, bula Ɔƒɔne, údie nwuna lɛƒɔndia ku bɔyɔ ɔ́tina-bu ni, ⁵ ɔ́ƒɔ-bu. Ɔɔɔdi banii bula lɛbuni lɛni na bɔ́bla ɔsu, mmomu Katɔti ɔkɛ anwu ɔlati kɔnyana bɔnu ɔsu na ɔ́ya na nwuna Kɔyu kɔ́ƒɔ-bu. Kɔyu kɔmmɔ mɔɔsɔku-bu taawɔ na kuute-bu ngba bɔwɔdi, na kɔɔyá na bɔɔbla kedee. ⁶ Katɔti úti nwuna Kɔyu úte-bu ku kuna ɔyikun pii ɔ́siaku bula Ɔƒɔne Yesu Kristo lɛlɔ. ⁷ Na ɔkɛ nwuna lɛƒɔndia ɔsu ni, abu ku-nwu ntɛ bɔ́dia kalɛ na abu lɛnɔ bɔ́kɛ ngba ƒui bɔni lɛlɔ na bula anu asia. ⁸ Litemi lɛmmɔ lɛdi litemi geen. Na mɔɔwia ka asia-ni lɛkpuna. Na bekyuli bani náƒɔ Katɔti bádi ni, ɔdi ka beti bana uwi bete na bataabla lɛbuni lɛni malɛ kɔsia mete bekyuli ƒui. ⁹ Na takyaku ukyuli ɔdi kɔdɔlɔ unyeƒi. Tebile uwi tete kaba bekyuli bɔka bɔdi, tadɔ na ataakya Mose ɔda bubo etemila lɛlɔ unyeƒi ɔdi. Ala amɛni ƒui eeebo kɔsia kɔdi. ¹⁰ Bɔku ukyuli ɔni muuƒú bekyuli kasusu na bɔƒɔtaadi litemi lɛmmɔ lɛlɔ kunyɔ. Na ɔmmɔ kama ni, na ada atu edie-nwu lɛlɔ. ¹¹ Agyi anii ukyuli ɔmmɔ udu ni, likpidi lɛdi-nwu lɛlɔ na nwuna ekpidi muudie nwuna kɔtɔ bɔdu taatina. ¹² Si lɛ́tala Artema iye Tihiko lɛ́kya-a ni, kya ɔkplu na ebo-mi kudɔ na Nikopoli. Ɔsika mmɔ na lɛ́bla kasusu ka ndubɔkya na kɔyɔ uwi. ¹³ Kya ɔkplu na ebunku Sena ɔni mɔɔtɛ litemi teedie bekyuli ku Apolo na bataaklibi lɛlɔ teete bana ulu busie. Na anu ka bákɛ lɛla biala lɛni baawia. ¹⁴ Ɔdi ka baƒɔtaadine batɛya kalɛ na beeti bana uwi ƒui taabla lɛbuni lɛni malɛ kɔsia. Na bakana bekyuli bamba lɛnɔ buteebunku na ɔɔɔdi ka bataabla kɔkɔsɔ. ¹⁵ Banwa bani nkya-mi kudɔ mɛni ƒui banii beegyele-mii o-o! Awɔ lɛnɔ gyele banwa baƒɔtaadine bani nkya mmɔ te-bu. Katɔti ɔda bina ƒui na nwuna lɛƒɔndia kemo.