ROMAƑUƆ

ROMAƑUƆ

¹ Ami Paulo, ɔni ndi Yesu Kristo kabla ɔblane na ndi ɔtalane ɔni na Katɔti ɔ́ƒuna ka lɛkɔ-nwu litemi buni lɛsa ni, ami muunweni ɔku ɔmɛni. ² Na Katɔti litemi buni lɛni na ɔ́su nwuna kenye bediene úse ka ɔdubudie keyi ni, bénweni-ni bákya Bunweni Kedee Ɔku kemo. ³ Linyese lɛmɛni lɛkɛnku Katɔti Ubidi ɔni ndi Blɔti Yesu Kristo lɛlɔ. Báwɔ-nwu aani ɔyawine kalɛ na ɔdi Dawid kaba kemo ubi. ⁴ Na ɔkɛnku Katɔti Kɔyu lɛlɔ ni, Katɔti údie-nwu ɔ́tina bekyuli ku ɔyikun bonwu ka ɔdi ubidi ɔni na ɔ́gyila ɔ́lɛku bekpine akɔ. ⁵ Na ɔkɛnku Kristo lɛlɔ ni, Katɔti ɔ́nu-bu kɔnyana na úti-bu ɔ́bla batalane úte Kristo kalɛ na bɔya na kadi ƒui bekyuli baƒɔ badi na babla nwuna lɛyɔla. ⁶ Na amii lɛnɔ ni, Katɔti ɔ́lɔ-mii ɔnii bibebunku Yesu Kristo badi bammɔ. ⁷ Ɔmɛni ɔsu na muunweni ɔku ɔmɛni lite amii bani ƒui nkya Roma na Katɔti ɔɔyɔ́-mii, na ɔ́lɔ-mii ka bɛbla nwuna badi. Katɔti ku Blɔti Yesu Kristo lɛƒɔndia ku keyi buɛɛ kasiaku-mii. ⁸ Kudeedi ni, nkɛnku Yesu Kristo lɛlɔ mɔɔgyá mina Katɔti enu na bina ƒui lili, ɔsika kayawi bekyuli ƒui beenú kalɛ na bɛ́ƒɔ Kristo bɛ́di. ⁹ Katɔti ɔni kabla na mɔɔbla ku mina kayi ƒui na litemi buni lɛni lɛsa mɔɔkɔ́ ɔkɛnku ubidi lɛlɔ ni, ani ndubudie-mi kenye ɔ́si kalɛ na naaayiƒla-mii uwi biala kemo si mɔɔkpali katɔ. ¹⁰ Na uwi biala na mɔɔkpali Katɔti ni, muuvele Katɔti nnii si ɔdi-nwu lɛƒɔyɔ ni, na lɛkɛ kuƒi na libo mbanu-mii uwi ɔmɛni kemo. ¹¹ Anumi égyie-mi geen ka libo mbanu-mii na libunku-mii na kɔyu kemo ɔkɛnku Katɔti kɔnyana bɔnu ɔsu na bɛkɛ ɔkplu. ¹² Lɛla lɛni mɔɔsu mɛni ndi ka bɔdubɔkya lɛlɔ ogya na uwi ɔmɛni kemo. Ɔsika bina bɔƒɔtaadi bɔdubo-mi ogya bɔkya, na ami bɔdi lɛnɔ bɔkya-mii ogya. ¹³ Banwa, bɛti ka lɛ́bla kasusu uwi pii kemo ka libo-mii kudɔ nka, nsu lɛla lɛdi lítile-mi kuƒi. Mɔɔyɔ́ ka lɛya na bekyuli baƒɔ Kristo badi na bina akɔ aani kalɛ na lɛ́bla na bekyuli bani naaadi Yudaƒuɔ akɔ. ¹⁴ Kabla kamɛni ndi kayu kani nda bekyuli ƒui, Grikiƒuɔ ku bani naaadi Grikiƒuɔ ku bekyuli bani náda anu ku bani nádɔlɔ. ¹⁵ Ɔmɛni ɔsu na anumi égyie-mi geen ka lɛsu amii bani nkya Roma lɛnɔ litemi buni lɛmɛni. ¹⁶ Litemi buni lɛmmɔ lilekpo-mi kɔƒa, ɔsika lɛdi Katɔti ɔyikun ɔni mɔɔyá na ukyuli biala ɔni mɔɔƒɔ́ taadi ɔɔkɛ́ ngba bɔƒɔ. Na Yudaƒuɔ ndi bedeedi bani ndubunu asa na bani naaadi Yudaƒuɔ basia. ¹⁷ Na litemi buni lɛmɛni muudie ulu siin ɔni mɔɔyɔ́ Katɔti kaƒɔ taatina. Na ulu siin ɔmɛni ɔkɛnku bɔƒɔtaadi lɛlɔ ɔ́si kalɔ kesekɔ útédu kawɔlɔkɔ. Na lɛni na bénweni na Bunweni Kedee Ɔku kemo banini, “Bɔƒɔtaadi lɛlɔ na bekyuli baasia taabla siin, na Katɔti uute-ma ngba.” ¹⁸ Katɔti uudie nwuna kɔnyi keyi taasiku katɔ na ala ani mɔɔta teenye-nwu lɛlɔ ku likyulikpi ala bɔbla bɔni muutile bekyuli kuƒi ka bati Katɔti litemi geen lɛmmɔ. ¹⁹ Uuti kɔnyi ɔsika bekyuli baanu Katɔti ala ani na ɔ́bla ƒui nwaa. Na Katɔti ɔlati nédie-nya nwaa ɔ́tina-ma. ²⁰ Ɔsika ɔ́si uwi ɔni na Katɔti údie kayawi ni, ala ani ƒui na ɔ́bla ɔ́kya kayawi lɛlɔ muudie Katɔti ɔni na bulánu ku bula anumi ɔyikun ku nwuna udu keyi. Anwuɔsu ukyuli biala ɔsɔ ulakana bɔsu ɔnii útaƒɔ Katɔti útadi. ²¹ Ɔsika ina ka bekyuli bagyi Katɔti ni, beléte-nwu ɔbu ɔni námanku-nwu aani Katɔti kalɛ. Na balagya-nwu enu lɛnɔ. Mmomu bana kasusu kéƒu na baabla adɔlɔla. Na lɛdisa lɛ́ƒɔ-ma. ²² Na baanu lɛlɔ aani bekyuli bani na báda anu, nsu bénwini badɔlɔdi. ²³ Na báda Katɔti ɔni nli ngba uwi ƒui bɔkpa báya, na beemwi ala abambadi ani muukpi mmomu. Bábla ala amɛni aani ukyuli iye baasɛ iye bebuo iye bebuo bani mɔɔkpɛ́ kalɔ aani balakpi udu. Na bése-ma béte lɛlɔ aani baƒiɔ. ²⁴ Anwuɔsu ni, Katɔti ɔ́nyonu-ma, na baabla lɛyalɛ ala ani mɔɔyá na beesé lɛlɔ. Na baabla kɔƒa ala na bana akɔ. ²⁵ Na bávumana Katɔti litemi geen lɛmmɔ ku ɔkɔ bɔnyi. Na baakpá ala ani na Katɔti údie. Nsu ɔlɛka bakpa Katɔti ɔlati ɔni námanku bumwi uwi ƒui. Ɔsia lɛni. ²⁶ Ala amɛni bɔbla ɔsu na Katɔti ɔ́nyonu bekyuli, na baabla ala ani mɔɔda bana ɔlɔna ɔkwɛ ani muukpó kɔƒa. Na beleku muedi báda banana bése na baaƒuƒwɛ lɛlɔ na aƒiankpi kemo. ²⁷ Na lɛni kani na banana lɛnɔ báda beleku bése na baabla kɔƒa ala, na beesié lɛlɔ kudɔ aani ɔnana ku uleku kalɛ. Na ɔmɛni ɔsu ni, Katɔti ɔ́ni-ma kɔtu kɔni námanku-ma ɔ́si bana udu ukpidi ɔni na bábla ɔsu. ²⁸ Na ka bése béni banii balatɛya lɛla lɛni na ɔdi ka bati ɔsu ni, Katɔti ɔ́nyonu-ma, na likyulikpi lɛ́ƒɔ-ma kasusu kemo. Na baabla ala ani na utalɛka babla. ²⁹ Na likyulikpi ala bɔbla bɔ́ƒɔ-ma lɛlɔ kemo ƒui. Na anya ndi alaekpidi bɔbla ku ɔdivo ku kalala. Na lɛnungyie na bekyuli bamba ala lɛlɔ ku ukyuli bɔdu ku kekpo ku ɔkɔ bɔnyi ku lɛlɔ bule ati ati bɔ́ƒɔ-ma lɛlɔ kemo. Na beeti lɛlɔ kasusu kekpidi. Na beekeyi atɛ. ³⁰ Na beetemi enyekpi na bana bakpana lɛlɔ. Badi bekyuli bani muukisi Katɔti. Beedumi lɛlɔ, na baatina lɛlɔ, na baakun lɛmɛnɛ. Na baawia likpidi lilu lɛbambadi pii. Na balábu bana bawɔne. ³¹ Badi bekyuli bani naaagyi lɛbuni ku likpidi kavumana. Na baládi bana ala ani na básu lɛlɔ. Na lɛla lɛdi lilakywi-ma kaƒɔ. Na balánu ukyuli kɔnyana. ³² Bagyi ka Katɔti úbo-bu ɔda siin ka bekyuli bani nlie ngba bɔmɛni udu ni, Katɔti ɔdubɔdu-ma kukpi kɔtɔ. Nsu ni, benye momoomo na baabla alaekpidi amɛni. Na ɔɔɔdi ɔmɛni lɛti, mmomu beeti ɔbu teete bekyuli bani lɛnɔ mɔɔbla ala amɛni.

¹ Anwuɔsu ni, si awɔ ɔdi aatɛku ukyuli litemi na aadú-ma kɔtɔ ni, eeebo kenye kadi na eedie. Na ulu biala lɛlɔ na ádu ƒula bakpana kɔtɔ ni, ƒula lɛlɔ na aadú kɔtɔ. Ɔsika ala ani na bábla ni, ana udu kani na awɔ lɛnɔ aabla. ² Bula ƒui bɔgyi ka Katɔti lɛti pɛ mbo kuƒi kɔni na ɔtɛku bekyuli bani mɔɔbla ala amɛni udu litemi. ³ Na si awɔ aani ukyuli ɔyawine kani aabla ala amɛni udu na aadú bekyuli bamba kɔtɔ ni, aakali anii adubukeli Katɔti litemi bɔtɛ? ⁴ Munuu bɛɛbu bɛnii keeke na Katɔti ɔɔbla-bu kaƒɔbuni na ɔɔkɛ́ kayi na uuwiku-bu lɛlɔ? Bɛti geen ka ni, Katɔti ɔɔbla-bu lɛƒɔndia lɛmɛni ɔsika ɔɔwia ka ubunku-bu na bunwini kayi. ⁵ Na ka bina atu ebo ɔkplu na bítenwini kayi ɔsu ni, Katɔti ɔdubo-mii kɔtu bɔni geen na limeyi lɛni na údie úse lɛlɔ ka ɔdubɔtɛku bayawine ƒui litemi na nwuna ulu siin lɛlɔ. ⁶ Na Katɔti ɔdubɔƒɔ ukyuli biala kayu na nwuna kabla kani na ɔ́bla kenye. ⁷ Bekyuli bani mɔɔkya lɛbuni bɔbla ɔkplu na basiaku bukeye ku bumwi ku ngba bɔnii nsɔ naaadubo bɔsa kudii kama ni, Katɔti ɔdubɔya na bakɛ ngba ƒui bɔmmɔ. ⁸ Nsu bekyuli bani mɔɔwia ama lɛti lɛkɛ na beení litemi geen lɛmmɔ na basiaku alaekpidi bɔbla kama ni, Katɔti ɔdubo kɔnyi bɔkɛ na bana lɛlɔ na ɔni-ma kɔtu geen. ⁹ Bekyuli bani ƒui mɔɔbla ekpidi ni, badubo abi bubo na balákɛ bɔnwuna bɔdi. Yudaƒuɔ ndi bedeedi na kɔtu bɔni bɔmɛni kemo, na bani naaadi Yudaƒuɔ basia. ¹⁰ Nsu ama bani mɔɔbla ala abuni ni, Katɔti ɔdubute-ma bukeye ku ɔbu ku keyi buɛɛ. Yudaƒuɔ ndi bedeedi bani ndubɔkɛ ala amɛni, na bani naaadi Yudaƒuɔ basia. ¹¹ Ɔsika Katɔti ulánu anumi lɛlɔ taatɛ litemi. ¹² Bekyuli bani ƒui nábla ekpidi na baaagyi Mose ɔda bubo ni, badubo bukpi bɔyii. Nsu Katɔti ulatɛku-ma litemi na ɔda bubo bɔmmɔ lɛlɔ. Na bani na bakya Mose ɔda bubo bɔmɛni kalɔ na bábla ekpidi ni, ɔkɛnku ɔda bubo bɔmɛni lɛlɔ na Katɔti ɔdubɔtɛku-ma litemi. ¹³ Ɔsika ɔɔɔdi bekyuli bani na bunu kani na beenú ɔda bubo bɔmɛni ndubɔbla siin na Katɔti anumi. Mmomu bekyuli bani mɔɔbla taasiaku lɛla lɛni nkya ɔda bubo bɔmmɔ kemo ndubɔbla siin. ¹⁴ Sɔsɔ ni, bekyuli bani naaadi Yudaƒuɔ ni, baaagyi Mose ɔda bubo bɔmɛni. Nsu si ɔkɛnku bana kayi bɔlɛ kemo na bábla ala ani na Mose ɔda bubo bɔɔtina ni, bana ablala aatina ka bebo ɔda bubo bete lɛlɔ ina ka bétenu Mose ɔda bubo bɔmɛni lɛlɔ litemi dii. ¹⁵ Na ɔɔtina ka Katɔti úti ala ani nkya Mose ɔda bubo bɔmmɔ bɔɔtina ɔ́kya-ma kayi kemo. Na bana kayi lɛnɔ kaatina-ma geen ka ɔmɛni use lɛni. Na uwi ɔdi ni, bana kasusu kaadú-ma kɔtɔ iye keete-ma ubo. ¹⁶ Na litemi buni lɛni lɛsa na mɔɔkɔ́ ni, lɛɛtina ka Katɔti ɔdubɔya na Yesu Kristo ɔtɛku bekyuli litemi ɔ́siku ala ani nábɛ akya-ma kasusu kemo ƒui lɛlɔ. ¹⁷ Na amii bani mɔɔsu bɛnii bɛdi Yudaƒuɔ ni, bíti lɛlɔ bíkpo Mose ɔda bubo lɛlɔ, na bɛɛkun lɛmɛnɛ ka bibo kɔna ku Katɔti. ¹⁸ Bɛɛsu lɛnɔ bɛnii bɛgyi lɛla lɛni mɔɔyɔ́ Katɔti kaƒɔ, na bɛ́tɛya ala abuni ani na ɔdi ka bɛƒuna na ɔda bubo bɔmmɔ kemo. ¹⁹ Na bɛ́ƒɔ lɛlɔ bɛ́di ka bɛdi lɛnumi bite banumbwɛne, na bɛdi bukeye bite bekyuli bani nkya lɛdisa kemo. ²⁰ Na bɛɛsu ka amii mɔɔlɛ badɔlɔdi, na bɛɛtina banamu bakɔdi ala. Na bɛ́ƒɔ bɛ́di geen ka ɔda bubo bɔmmɔ bunye bute lɛlati ku litemi geen ƒui. ²¹ Nsu amii bani mɔɔtina bekyuli bamba ala ni, bɛɛtina bina lɛlɔ ala ammɔ? Bɛɛkɔ́ Katɔti litemi buni lɛsa teete bekyuli bɛnii beteyu, nsu amii alati nɔɔ? Bileyu? ²² Bɛɛsu bekyuli bɛnii batadi kɔsɔnɔ, nsu amii alati nɔɔ? Biladi kɔsɔnɔ? Bɛɛta teenye baƒiɔ lɛlɔ kpakplaa, nsu bileyu bana kakpakɔ kammɔ ala? ²³ Bɛda Katɔti ɔda bubo bɛɛkun lɛmɛnɛ, nsu bɛɛɛgyi ka kɔƒa kuukpó Katɔti ka biládi ɔda bubo bɔmmɔ lɛlɔ ɔsu? ²⁴ Na Bunweni Kedee Ɔku kemo ni, básu banii, “Amii Yudaƒuɔ udunkpi náya na bani naaadi Yudaƒuɔ baalɔ Katɔti lɛnyikpi.” ²⁵ Na si bɛɛdi ɔda bubo bɔmɛni lɛlɔ ni, bina lego bukulo bɔdi lɛla lɛni na libo kɔsia. Nsu si biládi ɔda bubo bɔmmɔ lɛlɔ ni, na lego bukulo ɔdi ɔni na bɛ́bla ɔdi lɛla keeke. ²⁶ Na si ukyuli ɔni naaadi Yudani na útekulo lego ɔɔdi ɔda bubo bɔmɛni lɛlɔ ni, Katɔti ɔɔnu-nwu aani ukyuli ɔni nékulo lego. ²⁷ Ukyuli ɔni mɔɔdi ɔda bubo bɔmmɔ lɛlɔ nsu útekulo lego ni, ɔdubɔdu-mii kɔtɔ ina ka amii na béte ɔda bubo bɔmmɔ na bíkulo ago lɛnɔ nsu biládi-mu lɛlɔ. ²⁸ Ɔɔɔdi ɔlɔna lɛlɔ na bɔɔnu Yudani geen taati. Na lego bukulo geen bɔmmɔ ni, buuunye buuute ɔlɔna lɛlɔ kabla kani na bekyuli baanu taati na ukyuli lɛlɔ kani. ²⁹ Mmomu ukyuli ɔni ndi Yudani geen ndi ukyuli ɔni mɔɔtina na nwuna ablala kemo ka úti nwuna kayi úte Katɔti. Na ɔɔɔkɛnku ɔlɔna ɔni na békulo na ɔda bubo ɔdi kenye lɛlɔ. Mmomu ɔkɛnku Katɔti Kɔyu lɛlɔ. Na ɔɔɔdi ukyuli ɔyawine mɔɔkɔliku ukyuli ɔmmɔ lɛnyi katɔ, mmomu Katɔti.

¹ Na si use lɛni ni, kɔsia kɔmani na Yudani ɔni na békulo lego ubo utulo bani naaadi Yudaƒuɔ? ² Na lilu pii lɛlɔ ni, ɔdanku ala abuni. Kudeedi ni, Yudaƒuɔ enu kemo na Katɔti úti nwuna Bunweni Kedee ɔ́kya. ³ Nsu si úbo úte ka badi bátaƒɔ bátadi nɔɔ? Aaƒɔ́ taadi ka Katɔti uladi nwuna etemila lɛlɔ? ⁴ Kudii! Ina ukyuli biala ɔdi ɔkɔ ɔnyine muedi ni, bɛya bɔti ka Katɔti ɔɔdi nwuna litemi lɛlɔ. Lɛni na bénweni na Bunweni Kedee Ɔku kemo banini, “Lɛla biala lɛɛtina ka ƒula kenye etemila adi litemi geen. Na aatɛku bekyuli ƒui litemi ulu siin lɛlɔ.” ⁵ Bɔsu na bɔdubɔsu bɔnii bula ekpidi ani na bɔɔbla mɔɔyá na bekyuli baanu Katɔti lɛbuni lɛni na ɔɔbla taati? Na ɔmmɔ ɔsu ni, bɔdubɔsu bɔnii Katɔti ulábla kaduɛ si ɔɔní-bu kɔtu? Kudii! Nsu lɛni na badi baakali! ⁶ Na si buse na use aani kalɛ na baakali ni, bi lɛlɔ na Katɔti ɔdubunye ɔtɛku bayawine ƒui litemi? ⁷ Ukyuli ɔdi ɔkana na uye ɔnini, “Nsu si mina ala ani na naaabla ulu lɛlɔ mɔɔyá na Katɔti litemi geen lɛmmɔ liigyingya na beemwi-nwu ni, bi ɔsu na bɛɛdú-mi kɔtɔ ka ukyuli ukpidi na ndi?” ⁸ Si búti-nwu lɛni ni, bɔkana bɔsu bɔnii, “Bɛya na butaabla likpidi kalɛ na lɛla lɛbuni lɛlɛ lɛsiku-nwu kemo.” Bekyuli bani meti-nwu lɛni ni, bámanku ka Katɔti ɔdu-ma kɔtɔ. Nsu lɛni na bekyuli badi beedumi-bu, na baasu taatina ka abu násu lɛni. ⁹ Na ɔƒɛni ni, bi na bɔkana bɔsu na abu Yudaƒuɔ lɛlɔ? Bubo kenyekɔ kabuni butulo bani naaadi Yudaƒuɔ? Kudii! Ɔsika lɛ́ɛtina ḿbavi ka likpidi lɛ́ƒɔ Yudaƒuɔ ku bani naaadi Yudaƒuɔ ƒui lɛnɔ lɛlɔ kemo. ¹⁰ Ɔsika lɛni na bénweni na Bunweni Kedee Ɔku kemo banii, “Ukyuli ɔdi uuubo na use siin na Katɔti anumi. Ina unwi pɛ muedi! ¹¹ Ukyuli ɔdi biala uuubo ɔni mɔɔnu lɛbuni taati. Na ɔdi lɛnɔ uláwia Katɔti kama ulu. ¹² Bekyuli ƒui bénwini kama bákya Katɔti, na bana ƒui báƒiɔ. Na ukyuli ɔdi uuubo ɔni mɔɔbla lɛbuni. Ina unwi pɛ muedi! ¹³ Bana inye buse aani kɔƒiɔtɔ kɔni nálɛmi kuwi. Na bana linyemi lɛɛta na ɔkɔ bɔnyi lɛlɔ. Na bana inye bɔɔdú bekyuli aani kɔlakpi bɔdu kalɛ. ¹⁴ Na ewida ku ɔdu úyi-ma kenye kemo tɛ. ¹⁵ Lɛgba lɛɛta-ma pla pla na bekyuli bɔdu lɛlɔ. ¹⁶ Bana ngba búbie na beebó abi geen. ¹⁷ Na baaagyi lɛla lɛdi na keyi buɛɛ ngba bulie lɛlɔ. ¹⁸ Na bana ɔbladu ulátina ka baayia Katɔti.” ¹⁹ Ɔƒɛni ni, bɔgyi ka ala ani ƒui básu na Mose ɔda bubo ɔku kemo adanku bekyuli bani nkya ɔda bubo bɔmɛni kalɔ. Na ɔyawine ɔdi ulakana kenye kadi budie na Katɔti litemi bɔtɛ kemo. Ɔsika Katɔti ɔdubɔtɛku kayawi ƒui litemi. ²⁰ Anwuɔsu ni, ɔɔɔdi ɔda bubo bɔmmɔ kama bɔsiaku mɔɔyá na ukyuli ɔbla siin na Katɔti anumi. Mmomu ni, ɔda bubo bɔmɛni bɔɔyá na bekyuli baatí ka baabla likpidi. ²¹ Nsu ulu ɔni lɛlɔ na Katɔti údie ɔ́tina ka bekyuli baasia taabla siin ni, ɔɔɔkɛnku ɔda bubo lɛlɔ. Na ɔda bubo bɔmmɔ ku kenye bediene bédie ɔmɛni bátina nwaa. ²² Katɔti ɔɔyá na bekyuli baabla siin si báƒɔ Yesu Kristo bádi. Ɔɔbla ɔmɛni teete bekyuli bani ƒui náƒɔ Kristo bádi. Na ulákya kavumana kadi na bekyuli bammɔ ntɛ. ²³ Bekyuli ƒui bábla likpidi, na bátamanku ka bakɛ Katɔti lɛgadi bukeye. ²⁴ Nsu ni, Katɔti ɔkɛnku Kristo Yesu ɔni náƒɔ bula lili kayu lɛlɔ ɔ́ya na bɔɔbla siin na nwuna lɛƒɔndia ɔsu. ²⁵ Katɔti néti Yesu ɔ́kpa na bula ekpidi lili. Na ɔkɛnku nwuna ubugya ɔni na úwi kalɔ ɔsu ni, bekyuli baakɛ́ bana ekpidi buti taakyiɛ si báƒɔ Kristo bádi. Katɔti ɔ́bla ɔmɛni úti ɔ́tina-bu kalɛ na ɔɔbla ala ƒui ulu lɛlɔ. Ɔ́kɛku-bu kayi na uwi ɔni návi kemo, na útakpete bula ekpidi. ²⁶ Nsu uwi ɔmɛni kemo ni, ɔkɛnku akpala amɛni lɛlɔ na Katɔti ɔ́tina-bu kalɛ na anwu use siin. Na ɔɔbla bani náƒɔ Yesu bádi ƒui siin. ²⁷ Na bi lɛlɔ na bɔdubɔkana lɛmɛnɛ bɔkun ka ani na bɔ́bla asa na bɔ́kɛ bɔƒɔ? Ku lɛla! Ɔsika ukyuli ulábla siin ka ɔɔdi ɔda bubo bɔmmɔ lɛlɔ ɔsu. Mmomu ɔkɛnku bɔƒɔtaadi lɛlɔ kani na Katɔti ɔɔklibi abu ku-nwu ntɛ. ²⁸ Ɔsika bɔgyi nwaa ka ni, ɔkɛnku bɔƒɔtaadi lɛlɔ kani na ukyuli ɔɔbla siin na Katɔti anumi, na ɔɔɔdi nwuna ɔda bubo bɔmmɔ lɛlɔ bɔdi ɔsu. ²⁹ Munuu ni, Yudaƒuɔ lɛti pɛ ɔdi na Katɔti ɔdi? Na ɔɔɔdi bani naaadi Yudaƒuɔ ama ɔdi? Ɛɛn, ɔdi ama lɛnɔ ɔdi. ³⁰ Ɔsika Katɔti unwi pɛ kani nkya na anwu ndubɔbla na Yudaƒuɔ baabla siin ɔkɛnku bɔƒɔtaadi lɛlɔ. Lɛni kani na ɔdubɔbla bani naaadi Yudaƒuɔ lɛnɔ na babla siin ɔkɛnku bɔƒɔtaadi bɔmmɔ kani lɛlɔ. ³¹ Anwuɔsu bi na ɔmɛni ɔɔtina? Ɔɔtina ka bɔ́da ɔda bubo bɔmmɔ buse ka bɔƒɔtaadi bɔ́ƒɔ-mu kenye ɔsu? Kudii! Mmomu lɛla lɛni na ɔda bubo bɔmmɔ bɔdanku geen na bɔɔkɔliku katɔ.

¹ Bi ndi lɛla lɛni na bɔdubɔsu ka bula ɔti kuuku Abraham ɔ́nu ɔ́ti na litemi lɛmɛni lɛlɔ? ² Si ɔkɛnku kabla lɛlɔ na Katɔti ɔ́nu ka Abraham use siin ni, na ubo kenyekɔ ka ɔkun lɛmɛnɛ. Nsu uuubo kenyekɔ kammɔ na Katɔti anumi, ɔsika ɔɔɔdi Abraham kabla na ɔ́nu. ³ Ɔsika na Bunweni Kedee Ɔku kemo ni, básu banini, “Abraham ɔ́ƒɔ Katɔti ɔ́di. Ɔmmɔ ɔsu na Katɔti ɔ́nu ka use siin.” ⁴ Ukyuli ɔni mɔɔbla kabla ni, ulábu nwuna lɛyuƒɔla aani litela, mmomu ɔdi lɛla lɛni námanku-nwu na nwuna kabla kenye. ⁵ Nsu na Katɔti kudɔ ni, ukyuli ɔni néteti anu útasia nwuna kabla lɛlɔ mmomu na úti nwuna anu ɔ́sia Katɔti lɛƒɔndia lɛlɔ ni, Katɔti ɔɔnu ukyuli ukpidi ɔmmɔ ka use siin. ⁶ Na Ɔga Dawid ɔ́su lɛni kani ka lɛlɔ lɛdubɔyɔ ukyuli ɔni na Katɔti ɔ́nu ka use siin. Na ɔɔɔdanku nwuna kabla kani na ɔ́bla ɔsu. Dawid ɔ́su ɔnini, ⁷ “Lɛlɔ lɛdubɔyɔ bekyuli bani na Katɔti úti bana bɔƒiɔ ɔ́kyiɛ-ma na údie ekpidi bana lɛlɔ. ⁸ Lɛlɔ lɛdubɔyɔ ukyuli ɔni ekpidi na Blɔti ulabu ulése-nwu kudii.” ⁹ Na lɛlɔyɔ lɛni lɛlɔ litemi na Dawid ɔ́su mɛni ni, bani nékulo ago kani ndubɔkɛ-ni? Kudii! Lɛdanku bani nétekulo ago lɛnɔ, ɔsika Bunweni Kedee Ɔku ɔɔsu ɔnini, “Abraham ɔ́ƒɔ Katɔti ɔ́di ɔsu na Katɔti ɔ́ƒɔ-nwu ka use siin.” ¹⁰ Na uwi ɔmani na Katɔti ɔ́nu-nwu ka use siin lɛni? Uwi ɔni kemo na Abraham útekulo tɔ lego munuu uwi ɔni na úukulo lego? Ɔɔɔdi uwi ɔni na úkulo lego. Mmomu asa na wetékulo lego. ¹¹ Lego bukulo ɔdi ɔni na Abraham ɔ́bla mɛni ni, anwu ndi likpo buse bɔni mɔɔtina ka Katɔti ɔ́ƒɔ-nwu. Ɔsika nwuna bɔƒɔtaadi náya na Katɔti ɔ́ƒɔ-nwu ka use siin asa na úkulo lego. Na bɔƒɔtaadi bɔmɛni ɔsu ni, Abraham únwini baƒɔtaadine ƒui ɔti. Na Katɔti ɔkɛnku Abraham lɛlɔ ɔ́ƒɔ-ma ka bese siin ina ka bétekulo tɔ lego muedi. ¹² Abraham ɔdi ɔti ute bani na békulo ago lɛnɔ. Nsu ɔɔɔdi ɔni na békulo ago ɔsu, mmomu ka bélie ngba na bɔƒɔtaadi kemo aani kalɛ na bula ɔti Abraham úlie asa na úkulo lego ɔsu. ¹³ Katɔti úse kenye úte Abraham ku nwuna bawɔ ka badubɔdi kayawi kamɛni ala. Nwuna kenye kani na úse mɛni kaaakɛnku kalɛ na Abraham ɔ́siaku ɔda bubo bɔdi kama ɔsu. Mmomu ni, úse-nwu kenye kamɛni ɔsika ɔ́ƒɔ Abraham ka use siin ɔkɛnku nwuna bɔƒɔtaadi ɔsu. ¹⁴ Na si kayawi kamɛni ala bɔdi linyese lise lite bekyuli bani mɔɔdi ɔda bubo lɛlɔ ni, na bɔƒɔtaadi bɔɔɔdi lɛla lɛdi. Na Katɔti linyese lɛdi kɔtɛ keeke. ¹⁵ Ɔsika ɔda bubo buudie Katɔti kɔnyi taatina-bu. Nsu si ɔda bubo buuubo ni, ukyuli lɛla lɛdi lilédie bula bɔƒiɔ taatina-bu. ¹⁶ Anwuɔsu ni, linyese lɛmɛni lɛdanku bɔƒɔtaadi, na ɔdi kama kekpokɔ ute bekyuli na Katɔti kaƒɔbuni kani na ɔ́bla bekyuli bani ƒui ndi Abraham bawɔ. Na ɔɔɔdi bani na Katɔti úte ɔda bubo bɔmmɔ lɛti pɛ ndi-nwu bawɔ ɔsu. Mmomu bani nsiaku Abraham bɔƒɔtaadi bɔmmɔ kama lɛnɔ. Ɔsika ni, Abraham ɔdi baƒɔtaadine ƒui ɔti. ¹⁷ Na lɛni na Bunweni Kedee Ɔku ɔ́su ɔnini, “Líti-ɔ lɛ́bla kadi bekyuli pii ɔti.” Na Abraham ndi bula ɔti ɔni náƒɔ ɔ́di na Katɔti anumi. Katɔti ɔyikun ɔni na úbo ɔsu ni, ɔ́gyila bekpine na básɔ bébo beli ngba. Na ɔkɛnku ɔyikun ɔmmɔ ɔsu ni, útemi na ala ani nátakya kudii áda álɛ! ¹⁸ Kesii kani na lɛnunsia liiibo muedi ni, Abraham únye bɔƒɔtaadi lɛlɔ kpakplaa. Anwuɔsu úbabla kadi bekyuli pii ɔti aani kalɛ na Bunweni Kedee Ɔku ɔ́su ɔnini, “Ƒula bawɔ lɛnɔ badubo bumomo lɛni kani.” ¹⁹ Abraham ɔ́ɔƒɔ aani akwa eti anyɔ. Nsu ni, enu átaƒɛ-nwu na bɔƒɔtaadi kemo ina ka ɔ́nu ɔ́ti ka kaƒiɔtɔ kɔtu na unye, na Sara lɛnɔ ɔ́ɔvi kɔwɔ. ²⁰ Nsu ala amɛni átaƒɛ-nwu enu na nwuna bɔƒɔtaadi kemo. Mmomu úƒie Katɔti linyese ɔ́da kpakplaa, na nwuna bɔƒɔtaadi bɔmɛni bɔ́kya-nwu ɔkplu na úti bumwi úte Katɔti. ²¹ Na ɔgyi nwaa ka Katɔti ubo ɔyikun na ɔbla lɛla lɛni na ɔ́su úse. ²² Na ɔkɛnku bɔƒɔtaadi bɔmɛni ɔsu na básu banini, “Ɔmmɔ ɔsu na Katɔti ɔ́nu ka use siin.” ²³ Na ɔɔɔdi anwu lɛti pɛ lɛlɔ bénweni etemila amɛni basiku banii, “Katɔti ɔ́nu-nwu ka use siin.” ²⁴ Mmomu ɔdanku abu bani lɛnɔ na Katɔti ɔdubɔnu ka buse siin ɔkɛnku kalɛ na bɔ́ƒɔ Katɔti ɔni nágyila Blɔti Yesu ɔ́lɛku kekpine mmɔ bɔ́di lɛlɔ. ²⁵ Katɔti úte kuƒi na bekyuli bádu Kristo ɔ́si bula ekpidi ani bɔ́bla ɔsu. Na Katɔti ɔ́gyila-nwu ɔ́lɛku bekpine akɔ kalɛ na Katɔti ɔnu ka buse siin.

¹ Na ɔƒɛni ni, ka Katɔti ɔ́bla-bu siin ɔkɛnku bula bɔƒɔtaadi lɛlɔ ɔsu ni, Katɔti úte-bu keyi buɛɛ ɔkɛnku Blɔti Yesu Kristo lɛlɔ. ² Na ka bɔ́ƒɔ Kristo bɔ́di ɔsu ni, ɔ́ya na bɔ́kɛ Katɔti lɛƒɔndia lɛni kemo na bɔkya ɔƒɛni. Na lɛlɔ lɛɛyɔ́-bu geen, ɔsika bubo lɛnunsia ka bɔdubulie ku Kristo na Katɔti lɛgadi bukeye bɔmmɔ kemo. ³ Na lɛnɔ ni, lɛlɔ lɛɛyɔ́-bu si buubó abi, ɔsika bɔgyi ka lɛbibo lɛmɛni udu lɛɛyá na buunye kpakplaa. ⁴ Na bula bunye kpakplaa ni, bɔɔyá na bɔɔkɛ́ udu ɔbuni. Na ɔmmɔ ndubɔya na bɔkɛ lɛnunsia. ⁵ Na lɛnunsia lɛmɛni liláya bula anumi ewi kalɔ. Ɔsika Katɔti ɔkɛnku nwuna Kɔyu kɔni na úte-bu lɛlɔ na ɔ́ya na nwuna bɔyɔ bɔ́ƒɔ-bu lɛlɔ kemo ƒui. ⁶ Uwi ɔni na bulakana lɛlɔ bubunku ni, Kristo úbekpi na bekyuli bekpidi lili. Na ɔ́lɛ lɛni na uwi ɔni kemo na Katɔti ɔlati ɔ́lɛ ugyii úse lɛlɔ. ⁷ Ubo ɔkplu ka ukyuli ɔdi ukpi na ukyuli ɔni nse siin lili. Nsu ɔƒaalɛ ukyuli ɔdi ɔkana na use kayi na ukpi na ukyuli ɔbuni lili. ⁸ Nsu Katɔti údie ɔ́tina-bu kaduɛ kalɛ na ɔɔyɔ́-bu. Ɔsika uwi ɔni na bɔkya bula ekpidi kemo ni, ɔ́ya na Kristo úkpi na bula lili. ⁹ Na si ɔkɛnku nwuna kukpi kɔmmɔ lɛlɔ ɔsu na bɔ́bla siin na Katɔti anumi ni, kukpi kɔmmɔ kɔdubudie-bu kɔlɛku Katɔti kɔnyi bonwu kemo utulo! ¹⁰ Na si Katɔti ɔ́sɔku abu ku-nwu ntɛ ɔ́klibi ɔkɛnku ubidi kukpi lɛlɔ na uwi ɔni kemo na nka bɔdi-nwu bekisine mmɔ ni, na uwi ɔni na abu ku-nwu ntɛ bɔdia mɛni ni, Katɔti ɔdubɔnu-bu kɔnyana utulo ƒui na bɔkɛ ngba bɔƒɔ ɔkɛnku Kristo ɔmmɔ lɛlɔ. ¹¹ Na ɔɔɔdi ɔmɛni lɛti, mmomu lɛlɔ lɛɛyɔ́-bu geen na Katɔti lɛlɔ ɔkɛnku Blɔti Yesu Kristo ɔni lɛlɔ na Katɔti ɔ́sia na ɔ́sɔku abu ku-nwu ntɛ ɔ́klibi ɔsu. ¹² Likpidi lɛ́sia ukyuli unwi lɛlɔ na líbo kayawi, na likpidi lɛmmɔ lɛdanku kukpi líboku kayawi. Ɔmɛni ɔsu kukpi kúbo ukyuli biala lɛlɔ. Ɔsika ukyuli biala ɔ́bla likpidi. ¹³ Likpidi lɛkya kayawi kemo asa na Katɔti úte-bu Mose ɔda bubo. Nsu kesii kani na ɔda bubo buuubo ni, Katɔti ulábu ukyuli bɔƒiɔ teese. ¹⁴ Nsu ɔ́si Adam uwi úbalɛ Mose uwi ni, kukpi kɔ́di bayawine ƒui lɛlɔ ku bani na bátabla likpidi lɛdi muedi aani kalɛ na Adam útadi Katɔti ɔda bubo lɛlɔ. Na Adam ɔmɛni unye ute ukyuli ɔni mebo. ¹⁵ Nsu ni, bana inyɔ beeese unwi. Ɔsika Katɔti lɛƒɔndia lɛni na ukyuli ɔmɛni ɔdanku liiise aani ala ani na Adam bɔƒiɔ bɔmmɔ bɔdanku. Adam ɔdi ukyuli unwi ɔni bɔƒiɔ ɔsu na bekyuli pii békpi. Nsu Katɔti ɔdubɔya na ngba bɔƒɔ lɛƒɔndia lɛni nkɛnku Yesu unwi ɔmmɔ lɛlɔ libo lite bekyuli pii litulo na nwuna kaƒɔ buni ɔsu. ¹⁶ Nsɔ mɔɔsu ka Katɔti lɛƒɔndia lɛmmɔ liiise aani ala ani nkɛnku likpidi lɛni na ukyuli unwi ɔmmɔ ɔ́bla. Ɔsika likpidi lɛmmɔ líboku litemi bɔtɛ ku kɔtɔ bɔdu. Nsu bɔƒiɔ pii bɔmmɔ kama ni, Yesu lɛƒɔndia lɛmmɔ lɛ́ya na bekyuli bábla siin. ¹⁷ Ɔkɛnku ukyuli unwi lɛlɔ ɔsu na kukpi kɔ́di bekyuli lɛlɔ ɔ́si ukyuli ɔmmɔ likpidi ɔsu. Anwuɔsu ɔkɛnku Yesu Kristo lɛlɔ ni, bekyuli bani ƒui nákɛ Katɔti lɛƒɔndia na ɔ́bla-ma siin badubuduo ngba bɔwɔdi bɔmmɔ lɛga bɔdi kemo butulo ƒui. ¹⁸ Anwuɔsu ni, kalɛ kani na ɔkɛ likpidi linwi lɛlɔ na bekyuli ƒui bákɛ kɔtɔ bɔdu ni, lɛni kani na ɔkɛ lɛbuni linwi lɛlɔ na Katɔti ɔdubute bekyuli ƒui ubo. ¹⁹ Na ɔkɛnku kalɛ na ukyuli unwi ɔmmɔ ɔ́ta únye Katɔti litemi lɛlɔ na bekyuli ƒui bénwini alaekpidi bablane ni, lɛni kani na Katɔti ɔkɛnku kalɛ na ukyuli unwi ɔ́di nwuna litemi lɛlɔ ɔsu na Katɔti ɔdubɔya na bekyuli pii babla siin. ²⁰ Ka ɔda bubo bɔmmɔ búbo ni, bɔ́ya na bekyuli bánu bana ekpidi báti bébu. Na si bɔ́nu bula alaekpidi pii ani na bɔ́bla bɔ́ti ni, mmɔ kani na bɔdubɔnu Katɔti kɔnyana kɔni na ubo úte-bu lɛnɔ bɔti bubu. ²¹ Anwuɔsu kalɛ na likpidi lɛ́ya na kukpi kɔ́di bekyuli lɛlɔ ni, lɛni kani na Katɔti lɛƒɔndia lɛdubɔya na bɔbla siin na buduo ngba bɔni nsɔ naaadubɔsa kudii lɛga bɔdi kalɔ ɔkɛnku Blɔti Yesu Kristo lɛlɔ.

¹ Ɔmɛni ɔsu ni, bi na ɔdi ka bɔsu? Buusié anumi butaabla likpidi kalɛ na Katɔti lɛƒɔndia limomo libu? ² Oowo! Kudii! Ɔsika búkpi, na likpidi lɛsɔ liládi-bu lɛlɔ! Na bi ɔsu na ɔ́sɔ ɔlɛka bulie butaabla ala ekpidi? ³ Uwi ɔni na bákpila-bu ntu ɔkɛnku Yesu Kristo lɛlɔ na abu ku-nwu bɔ́bla unwi ni, bɛgyi ka ntu bɔni na bákpila-bu mmɔ bɔ́ya na bɔ́bla ku-nwu unwi útédu nwuna kukpi kemo lɛnɔ. ⁴ Na ɔkɛnku ntu bɔkpila bɔmmɔ ɔsu ni, ɔɔtina ka abu lɛnɔ búkpi na báva abu ku-nwu. Na Katɔti ɔkɛnku nwuna bukeye ku ɔyikun lɛlɔ ɔ́gyila Kristo ɔ́lɛku bekpine akɔ kalɛ na abu lɛnɔ bɔta bubelie ku-nwu ngba bɔwɔdi bɔmmɔ. ⁵ Na si abu ku-nwu bɔ́bla unwi na nwuna kukpi kemo ni, Katɔti ɔdubɔya na bɔbla ku-nwu unwi na nwuna bɔsɔ bɔta kemo. ⁶ Na bɔgyi ka bula udu ɔkukudi ɔmmɔ ku Kristo na bákana bámana ugyii lɛlɔ kalɛ na likyulikpi lɛyii udu na bula lɛlɔ, na bula ɔlɔna ɔsɔ ulenye ulátaabla likpidi kabla. ⁷ Ɔsika si ukyuli úkpi ni, likpidi lɛsɔ liiibo ɔyikun ɔdi na nwuna lɛlɔ. ⁸ Na si abu ku Kristo búkpi ni, bɔɔƒɔ́ taadi ka abu ku-nwu bɔdubulie ngba. ⁹ Na bɔgyi ka Katɔti ɔ́gyila Kristo ɔ́lɛku kekpine ɔni na ɔsɔ ulekpi. Na kukpi kɔsɔ kuuubo ɔyikun ɔdi na nwuna lɛlɔ. ¹⁰ Kristo kukpi kɔni na úkpi ni, úkpi kunwi pɛ na likpidi lɛsɔ liládi-nwu lɛlɔ. Na ngba bɔni na uli ɔƒɛni ni, uli-mu úte Katɔti. ¹¹ Na lɛni kani na ɔlɛka amii lɛnɔ bitaanu lɛlɔ ka bíkpi na likpidi lɛsɔ liládi-mii lɛlɔ. Na ɔlɛka bilie ngba bite Katɔti na amii ku Kristo Yesu unwi bɔbla kemo. ¹² Anwuɔsu bitaya na likpidi lɛdi bina ɔlɔna ɔni ndubukpi mɛni lɛlɔ, kalɛ na bilanyonu lɛlɔ bilete ɔlɔna ɔkwɛ adala ekpidi. ¹³ Iye bitete kuƒi na likpidi lɛƒɔ bina ɔlɔna kemo kesii biala na bitaabla likyulikpi. Mmomu biti bina lɛlɔ bite Katɔti aani bekyuli bani na Katɔti ɔ́gyila ɔ́lɛku kukpi kemo úboku ngba kemo. Na bɛnyonu bina lɛlɔ ekpo ƒui bite Katɔti aani ala ani nse siin na uti ɔbla nwuna kabla. ¹⁴ Ɔsika likpidi liiibo ɔyikun na bina lɛlɔ ka biiibo ɔda bubo kalɔ ɔsu. Mmomu bɛkya Katɔti lɛƒɔndia kalɔ. ¹⁵ Na bi na bɔdubo bɔsu? Ka bɔɔɔkya ɔda bubo kalɔ na Katɔti lɛƒɔndia kalɔ mmomu na bɔkya ɔsu ni, ɔlɛka butaabla ekpidi? Oowo. Kudii! ¹⁶ Bɛgyi geen ka ni, si bínu lɛlɔ kalɔ na bíti bina lɛlɔ bɛ́kya ukyuli ɔni kabla na bɛɛbla kalɔ ni, na bɛdi ukyuli ɔmmɔ kabla bablane. Anwuɔsu bɛkana binwini kabla bablane bite likpidi lɛni mɔɔkpanku ukyuli taatákya kukpi kemo. Na bɛkana binwini kabla bablane bite lɛbuni lɛni mɔɔkpanku ukyuli taatákya siin bɔbla kemo. ¹⁷ Nsu bɔɔgyá Katɔti enu, ɔsika uwi ɔdi kemo ni, bɛdi kabla bablane bite likpidi. Nsu ɔƒɛni ni, bíti bina kayi ƒui bɛɛdi litemi geen lɛni lɛ́tina-mii mmɔ lɛlɔ. ¹⁸ Na bɛ́lɛ likpidi enu kemo, na bínwini kabla bablane bíte ala siin bɔbla. ¹⁹ Mɔɔyɔ́ ka lɛsia kalɛ na bekyuli baatɛmi kenye na lidie ɔmɛni kalɔ lite-mii na ɔbla-mii kpɛtɛ kpɛtɛ. Na uwi ɔni nábavi kemo ni, bɛ́nyonu lɛlɔ ƒui bíte alaekpidi bɔbla ku ala ani muusé lɛlɔ ku likyulikpi ala bɔbla. Lɛni kani na ɔlɛka biti lɛlɔ ƒui bite siin bɔbla na bɛbla kedee. ²⁰ Uwi ɔni na bɛdi kabla bablane bite likpidi ni, siin bɔbla uládi-mii lɛlɔ. ²¹ Na bi kɔsia na bɛ́kɛ bɛ́siku ala ani bɛ́bla bɛ́vi na eekpó-mii kɔƒa ɔƒɛni lɛlɔ? Ala ammɔ ƒui kɔsia ndi kukpi. ²² Nsu ɔƒɛni ni, bɛ́lɛ ekpidi enu kemo na bɛ́kɛ bɔnwuna. Na bínwini Katɔti kabla bablane. Ɔmmɔ ɔsu kɔsia kɔni na bɛɛkɛ́ ndi ɔni na bíti lɛlɔ bíte-nwu ƒui na bɛɛbla kedee kalɛ na bɛkɛ ngba bɔni nsɔ naaadubo bɔsa kudii. ²³ Ɔsika likpidi lɛyuƒɔla ndi kukpi. Nsu Katɔti lɛƒɔndia lɛni na úte-bu ndi ngba bɔni naaadubo bɔsa kudii ɔkɛnku abu ku Kristo Yesu ɔni ndi Blɔti unwi bɔbla ɔsu.

¹ Geen ni, banwa, binu lɛla lɛni na ndubo bɔsu mɛni kalɔ, ɔsika bina ƒui bɛgyi ɔda bubo bɔmmɔ. Ɔda bubo bɔmmɔ bɔɔdi ukyuli lɛlɔ uwi ɔni kemo na ulie ngba kani. ² Muuti ɔmɛni lɛtina-mii. Uleku ɔni nli kɔgya ni, ɔgya ku ule ɔda bubo búnyimi-nwu bɔ́mana ɔgyani lɛlɔ uwi ɔni na ɔnana ɔmmɔ uli ngba. Nsu si ɔnana ɔmmɔ úkpi ni, uleku ɔmmɔ ɔ́lɛ ɔda bubo bɔmmɔ kalɔ. ³ Anwuɔsu si uleku ɔmɛni úsie útélieku ɔnana ɔbambadi uwi ɔni na ɔgyani ɔmua ulie ngba ni, bekyuli badubɔlɔ-nwu banii ɔsɔnɔdine. Nsu si ɔgyani ɔmɛni úkpi ni, ɔ́lɛ ɔda bubo bɔmmɔ kalɔ. Na ubo kuƒi ka ulie kɔgya kɔbambadi ɔni na ɔɔɔdi ɔsɔnɔdine. ⁴ Mina banwa, lɛni kani na use ute amii lɛnɔ. Ɔsika na ɔda bubo bɔmmɔ kenye ni, ɔɔtina aani si bíkpi uwi ɔni na Kristo úkpi. Na bɛkana bilieku ukyuli bamba. Anwuɔsu bínwini ukyuli ɔni na Katɔti ɔ́gyila ɔ́lɛku bekpine akɔ mmɔ kalɛ na bula kelie kalɛku ala abuni keyi ete Katɔti. ⁵ Uwi ɔni kemo na ɔda bubo búdie bula ukyuli udu ɔkukudi kelie kani ndanku likpidi bɔbla bɔ́tina-bu ni, ablala ammɔ ákɔ katɔ ébu. Na ala ani na bɔ́lɛku keyi na kelie kammɔ kemo adanku kukpi. ⁶ Nsu ɔƒɛni ni, ka búkpi na bɔ́lɛ ala ani nényimi-bu mmɔ kalɔ ɔsu ni, ɔda bubo bɔmmɔ bɔsɔ buládi-bu lɛlɔ. Ɔmmɔ ɔsu bɔsɔ bulábla lɛla lɛdi na ulu ɔkukudi lɛlɔ. Mmomu ulu ɔwɔdi ɔni nkɛnku Katɔti Kɔyu lɛlɔ na bɔɔbla kabla. ⁷ Na ɔmɛni ɔsu ni, bi na ɔdi ka bɔsu? Bɔsu na bɔsu bɔnii Katɔti ɔda bubo bɔdi likpidi? Kudii! Geen ni, ɔkɛnku ɔda bubo bɔmɛni lɛlɔ na bɔɔtí lɛla lɛni ndi likpidi. Si ɔda bubo bɔmɛni bútasu bɔnii, “Taya na anumi egyie-ɔ na ukyuli ɔdi ala lɛlɔ” ni, na nka lɛɛɛgyi lɛla lɛni ndi lɛnungyie likpidi. ⁸ Nsu ni, likpidi bɔbla bɔ́kɛ kuƒi ɔkɛnku ɔda bubo lɛlɔ na bɔ́ya na lɛnungyie lidu lidu lɛ́kɔ katɔ na mina lɛlɔ kemo. Na si ɔda bubo bɔdi buuubo ni, likpidi bɔbla lɛnɔ búkpi. ⁹ Ami ɔlati líilie ngba bɔmɛni udu dii, ɔni na lɛɛɛgyi ɔda bubo bɔmmɔ. Nsu uwi ɔni na líbo ḿbanu ɔda bubo bɔmmɔ lɛ́ti ka buléte-mi kuƒi ka lɛbla ala pii ni, likpidi bɔbla lɛnɔ bɔ́ta búnye-mi anumi na lɛ́nu lɛ́ti ka ndubo bukpi. ¹⁰ Na ɔda bubo bɔni na nka bɔya na lɛkɛ ngba ni, amu néboku-mi kukpi mmomu. ¹¹ Na bɔkɛnku ɔda bubo lɛlɔ ni, likpidi bɔbla bɔ́kɛ ulu na bɔ́tɔlɔ-mii na bɔ́du-mi. ¹² Ɔmɛni ɔsu ni, ɔda bubo bɔmmɔ buse kedee, na ala ani na bɔɔtina lɛnɔ ese kedee, na asia ulu siin lɛlɔ, na adia. ¹³ Anwuɔsu bɔtina na ɔmɛni ɔda ɔnii lɛla lɛni ndia néboku-mi kukpi? Kudii! Mmomu kalɛ na bɔnu likpidi bɔbla bɔti ka bɔdi likpidi ɔsu ni, likpidi bɔbla bɔkɛnku lɛla lɛni ndia lɛlɔ na búti kukpi búboku-mi. Na ɔkɛnku ɔda bubo bɔmɛni lɛlɔ ɔsu ni, likpidi bɔbla buudie muna udu geen keyi. ¹⁴ Bula ƒui bɔgyi ka ɔda bubo bɔdanku kɔyu kemo ala. Nsu ami nli ngba aani ɔyawine, na likpidi bɔbla bɔɔdi-mi lɛlɔ. ¹⁵ Neeenu ala ani na mɔɔbla kalɔ. Ɔsika si lɛla lɛni na lɛ́kali ka mɔɔyɔ́ lɛbla ni, ɔɔɔdi ani na mɔɔbla. Mmomu ala ani geen na nkisi ni, anya na mɔɔbla. ¹⁶ Na si ala ani na naaayɔ ka lɛbla na mɔɔbla ni, na ɔɔtina ka lɛ́tuna ka ɔda bubo bɔmmɔ bɔdia. ¹⁷ Ɔmmɔ ɔsu ni, ɔɔtina ka ɔɔɔdi ami ɔlati mɔɔbla lɛla lɛmɛni, mmomu likpidi lɛni nkya-mi kemo mɔɔbla lɛla lɛmmɔ. ¹⁸ Na ngyi ka na mina lɛlɔ kemo ni, lɛla lɛbuni lɛdi biala liiibo. Na mɔɔsu ɔmɛni taasiku mina ɔlɔna udu ɔkukudi ɔmmɔ lɛlɔ. Ɔsika mɔɔyɔ́ geen ka nka lɛbla lɛbuni, nsu naaakana-ni bɔbla. ¹⁹ Ɔsika lɛbuni lɛni na lɛ́yɔ ka lɛbla ni, ɔɔɔdi ani na mɔɔbla. Na likpidi lɛni mmomu na naaayɔ ka lɛbla ni, ani na mɔɔbla. ²⁰ Anwuɔsu si mɔɔbla ala ani na naaayɔ ka lɛbla ni, ɔɔɔdi ami ɔlati mɔɔbla-nya. Mmomu ni, likpidi lɛni nkya-mi kemo mɔɔbla-nya. ²¹ Na ɔmɛni ɔsu ni, mɔɔnu lɛla lɛni mɔɔlɛ́ na mina lɛlɔ kemo taati. Si mɔɔwia ka lɛbla lɛbuni ni, likpidi lɛsiaku-mi kpakplaa. ²² Nka na mina kayi kemo geen ni, Katɔti ɔda bubo bɔɔda-mi ebiti geen. ²³ Nsu mɔɔnu ka ala bamba ani mɔɔlɛ́-mi lɛlɔ kemo eekpóku lɛla lɛni na mina kasusu kaatina-mi ka lɛdia. Na áya na likpidi bɔbla búnyimi-mi na bɔ́bala-mi aani ɔtɔntɛne. ²⁴ Mina lɛlɔ libo kɔnyana geen. Na ɔma ndubo-mi budie bɔlɛku ɔlɔna udunkpi ɔkukudi ɔni néti-mi úsela kukpi kemo mɛni? ²⁵ Mɔɔgyá Katɔti enu, ɔsika ɔkɛnku Blɔti Yesu Kristo lɛlɔ ni, ndubɔkɛ bɔƒɔ! Na ɔƒɛni ni, na mina kasusu kemo ni, ndi Katɔti ɔda bubo kabla ɔblane. Nsu mina ukyuli udu ɔɔbla likpidi kabla.

¹ Ɔmɛni ɔsu ni, kɔtɔ bɔdu bɔdi buuubo buuute bani nábla unwi ku Kristo Yesu na bana ngba bulie kemo. ² Ɔsika ɔkɛnku Kristo Yesu lɛlɔ ni, ɔda bubo bɔni nkɛnku Katɔti Kɔyu kɔni muute bekyuli ngba bɔ́ya na lɛ́lɛ ɔda bubo bɔni ndanku likpidi bɔbla ku kukpi kalɔ. ³ Na lɛla lɛni na Katɔti ɔda bubo bɔni na úti úte Mose bútakana bɔbla ka bekyuli bátakana-mu lɛlɔ bɔdi ɔsu ni, Katɔti ɔ́bla-ni. Ɔ́tala Ubidi aani ukyuli ɔni mbo ɔlɔna ɔni na likpidi liikpóku. Úbo úbabla bekyuli ekpidi lili buvele akpala, na ɔ́du likpidi kɔtɔ na ɔ́yila likpidi ɔyikun ɔni mɔɔdi-bu lɛlɔ. ⁴ Katɔti ɔ́bla ɔmɛni úte abu bani nli aani kalɛ na Katɔti Kɔyu kɔɔyɔ́, na ɔɔɔdi kalɛ na ɔlɔna udu ɔkukudi ɔɔyɔ́. Ɔ́bla ala amɛni ƒui na ulu siin lɛlɔ aani kalɛ na nwuna ɔda bubo bɔɔtina. ⁵ Bekyuli bani nli na bana ɔlɔna udu ɔkukudi bɔyɔ kenye ni, bana kasusu kaasia ala ani na bana ɔlɔna ɔɔyɔ́ lɛlɔ. Nsu bani nli ɔkɛnku Katɔti Kɔyu lɛlɔ ni, bana kasusu kaasia lɛla lɛni na Katɔti Kɔyu kɔɔyɔ́ lɛlɔ. ⁶ Ukyuli ɔni kasusu mɔɔsia ɔlɔna ala lɛlɔ ni, ɔɔkɛ́ kukpi. Nsu ukyuli ɔni kasusu mɔɔsia Katɔti Kɔyu lɛlɔ ni, ɔɔkɛ́ ngba ku keyi buɛɛ. ⁷ Na ukyuli ɔni kasusu nsia ɔlɔna ala kani lɛlɔ ni, ɔdi ukisine ute Katɔti, ɔsika uládi Katɔti ɔda bubo lɛlɔ. Na sɔsɔ geen ni, ulakana-mu lɛlɔ bɔdi lɛnɔ kudii. ⁸ Bani náya na bana ɔlɔna ɔɔdi-ma lɛlɔ ni, balakana Katɔti lɛyɔla bɔbla. ⁹ Si Katɔti Kɔyu kɔ́ƒɔ-mii lɛlɔ kemo ni, biiilie na bina ɔlɔna udu ɔkukudi bɔyɔ kenye, mmomu kalɛ na Katɔti Kɔyu kɔɔyɔ́. Na si Kristo Kɔyu kútaƒɔ ukyuli ɔdi lɛlɔ kemo ni, ɔɔɔdi Kristo ɔdi. ¹⁰ Ina Kristo ɔkya-mii kemo ni, bina ɔlɔna ɔdubo bukpi na likpidi ɔsu. Nsu bina kɔyu kɔdubɔsɔ kɔkya ngba, ɔsika Katɔti ɔ́bla-mii siin. ¹¹ Na si Katɔti Kɔyu kɔni nágyila Yesu ɔ́lɛku bekpine akɔ kɔkya-mii kemo ni, anwu ɔni nágyila Kristo Yesu ɔ́lɛku bekpine akɔ mɛni ndubute bina ɔlɔna ɔni ndubukpi mɛni ngba ɔkɛnku nwuna Kɔyu kɔni nli-mii lɛlɔ kemo ɔsu. ¹² Anwuɔsu ni, banwa, ɔɔɔdi ɔlɔna ɔmɛni na bɔda kayu ka bulie ngba na nwuna ɔkwɛ adala kenye. ¹³ Si bɛsiaku likyulikpi udu ala bɔbla kama ni, bɛdubo bukpi. Nsu si bɛkɛnku Katɔti Kɔyu lɛlɔ na bɛ́du bina ɔlɔna udu ukpidi ɔmmɔ ni, bɛdubɔkɛ ngba. ¹⁴ Ɔsika bekyuli bani na Katɔti Kɔyu kɔtɔnku ni, ama ndi Katɔti bebi. ¹⁵ Katɔti útete-mii kɔyu kɔni náya na binwini liƒu ala kabla bablane. Mmomu úte-mii Kɔyu kɔni náya na binwini nwuna bebi. Na ɔkɛnku Kɔyu kɔmmɔ lɛlɔ ɔsu na bɔɔkpali Katɔti bɔnii, “Abba” ɔni kalɔ ndi mina Ati. ¹⁶ Katɔti Kɔyu ku bula ayu ƒui eedie ɔmɛni kenye taatina ka bɔdi Katɔti bebi. ¹⁷ Na si bɔdi nwuna bebi ni, na bɔdi nwuna ala badine. Na abu ku Kristo bɔdubɔdi Katɔti ala bɔsala. Na bɔdubukeye lɛnɔ aani nwuna kalɛ si búbo abi aani kalɛ na Kristo úbo abi. ¹⁸ Mɔɔnu taati geen ka abi ani na buubó ɔƒaani ni, aaadi lɛla lɛdi na kalɛ na Katɔti ɔdubɔya na bukeye kudɔ. ¹⁹ Ala ani na Katɔti údie ƒui aanu ulu kpakplaa teete uwi ɔni na Katɔti ɔdubudie nwuna bebi ɔtina. ²⁰ Na ala ediedi amɛni ƒui ni, éduo lɛbibo kemo. Nsu ɔɔɔdi ala ammɔ alati mɔɔyɔ́ lɛni, mmomu Katɔti ɔlati néte kuƒi lɛni. Na ɔ́ya na ebo lɛnunsia ka ²¹ ɔdubudie ala ammɔ ƒui ɔlɛku kukpi enu kemo na anwuna, na ɔya na ekeye aani nwuna bebi kalɛ. ²² Na bɔgyi ka úti úbedu uwi ɔmɛni kemo ni, ala ani na Katɔti údie ƒui eedumo geen aani uleku ɔni ntɛ kɔwɔ. ²³ Na ɔɔɔdi ala ammɔ lɛti, mmomu ku abu bani na Katɔti ɔ́ka nwuna Kɔyu buti bute lɛnɔ buudumo na bula lɛlɔ kemo, na bɔsia anu kpakplaa ka Katɔti ɔdubɔƒɔ-bu ekpidi lili kayu na bɔnwuna aani nwuna bebi. ²⁴ Na ka bubo lɛnunsia lɛmɛni ɔsu ni, bɔ́kɛ bɔƒɔ. Nsu lɛnunsia lɛla lɛni na bɔɔnu ku bula anumi ni, lɛsɔ lɛɛɛdi lɛnunsia. Ɔsika ukyuli ɔdi ɔsɔ ulasia ala ani na ɔɔnu anu. ²⁵ Nsu si bula anumi asia ala ani na bula anumi alanu lɛlɔ ni, na bɔɔkɛ́ kayi buɛɛ taanu-nya ulu. ²⁶ Na ulu ɔmɛni lɛlɔ na Katɔti Kɔyu kuute-bu kebunku, ɔsika buse kpɛtɛ kpɛtɛ, na bɔɔɔgyi kalɛ bɔkpali Katɔti bɔvinku. Nsu nwuna Kɔyu ɔlati kuuvele na kuudumo teete-bu kalɛ ɔnwa na abu bulaka budie bɔtina. ²⁷ Katɔti ɔni ngyi bekyuli kayi kemo ni, ɔgyi lɛla lɛni nkya nwuna Kɔyu kasusu kemo lɛnɔ. Ɔsika Kɔyu kɔmmɔ kuuvele Katɔti na nwuna badi lili kalɛ na Katɔti ɔmmɔ ɔɔyɔ́. ²⁸ Bɔgyi ka lɛla biala na Katɔti ɔɔbla ni, lɛdi lɛbuni lite bekyuli bani mɔɔyɔ́-nwu na ɔ́lɔ-ma ka babla nwuna kabla. ²⁹ Na bekyuli bani na Katɔti ɔgyi use ni, úse-ma likpo na ɔ́ya bálɛ Ubidi kalɛ na Ubidi ɔbla udeedi na nwuna banwa pii bammɔ akɔ. ³⁰ Anwuɔsu bani na Katɔti úse-ma likpo ni, ama na ɔ́lɔ. Na bani na ɔ́lɔ ni, ɔ́bla-ma siin. Na bani na ɔ́bla siin mmɔ ni, ɔ́ɔkɔliku-ma lɛnyi katɔ. ³¹ Ɔmɛni ɔsu ni, bi na ɔdi ka bɔsu? Si Katɔti unye-bu kama ni, ɔma ndubɔkana na ukpoku-bu? ³² Na si Katɔti útenye útada Ubidi mmomu úti-nwu ɔkpa na bula lili ni, bi ɔsu na ulete-bu ala ƒui ku kaƒɔ ƒaa ɔkɛnku Ubidi ɔmmɔ lɛlɔ? ³³ Na ɔma ndubɔwia Katɔti bekyuli baƒunadi litemi? Katɔti ɔlati uudie-ma kenye ka bɔƒiɔ bɔdi buuubo-ma lɛlɔ. ³⁴ Na ɔma ndubɔkana na ɔdu-ma kɔtɔ? Kristo Yesu ndi ukyuli ɔni nékpi, na ɔni nsɔ nsia ndi ka Katɔti ɔ́gyila-nwu ɔ́lɛku bekpine akɔ na ɔ́sɔ úbo uli ngba na ulie Katɔti kɔdianu na uuvele-nwu teete-bu. ³⁵ Na ɔma ndubɔkana na ukulo abu ku Kristo bɔyɔ bɔni nkya-bu ntɛ kemo? Lɛbibo, munuu ɔlɛ bunu, munuu bukpoku, munuu kɔka, munuu kasɔngya, munuu ɔgbankpi, munuu kukpi na kewii kenye? ³⁶ Ɔkya Bunweni Kedee kemo ka ni, “Na awɔ ɔsu ni, bɔkya kukpi ɔgbankpi kemo limeyi ndi limeyi. Na baabla-bu aani kalɛ na baabla baƒonu bani na béti-ma bésela batádu.” ³⁷ Na ɔmɛni ƒui kemo ni, butulo lɛlɔ badine ɔkɛnku Kristo ɔni mɔɔyɔ́-bu ɔsu. ³⁸ - ³⁹ Na use-mi nwaa ka bɔyɔ bɔni nkya abu ku Katɔti ntɛ ɔkɛnku Kristo Yesu ɔni ndi Blɔti lɛlɔ ni, lɛla lɛdi biala lilakana-mu bukulo. Ina kukpi iye ngba iye katɔ batu badi iye ayu ekpidi iye uwi ɔmɛni iye ɔni mebo iye ɔyikun ɔdi iye bɔkuku iye bɔgyu iye lɛla biala na bédie lilakana!

¹ Lɛla lɛni na ndubo-mii bɔsu mɛni ni, ɔɔɔdi ɔkɔ na mɔɔnyi, ɔsika ndi Kristo ɔdi. Mina kayi kani lɛlɔ na Katɔti Kɔyu kɔɔdi mɔɔtina-mi geen ka naaanyi ɔkɔ. ² Mɔɔyá na bɛti ka kayi kaakpulu-mi na muunú ɔlɛ geen na mina lɛlɔ kemo. ³ Ɔsika mɔɔyɔ́ ka libunku mina kadi bekyuli. Si banii nka Katɔti ɔtuna na ɔmami-mi Kristo lɛlɔ na ɔvumana mina bɔƒɔ ute mina kadi bekyuli ni, nka ndubunu kalɔ na ɔyila-mi udu. ⁴ Ɔsika badi bekyuli bani na Katɔti ɔ́ƒuna. Na úti-ma ɔ́bla nwuna bebi. Na údie nwuna lɛga bɔdi bukeye ɔ́tina-ma. Na ɔ́tina-ma lɛla lɛni na únyimi. Na úti nwuna ɔda bubo úte-ma. Ama na Katɔti ɔ́tina kalɛ na ɔdi ka bakpa-nwu. Na ama na úse kenye. ⁵ Ama mbo Israel ɔtɔ eƒi benengu bani na Katɔti ɔ́ƒuna. Na bana akɔ na Kristo ɔni nébo aani ukyuli ɔyawine ɔ́lɛ ɔ́si. Bɛya na bumwi Katɔti ɔni mɔɔdi ala ƒui lɛlɔ ɔ́si ɔƒɛni úsela ƒui. Ɔsia lɛni. ⁶ Ɔɔɔdi bɔsu na nda nnii Katɔti kenye kani na úse ni, útadi-ka lɛlɔ. Ɔsika ɔɔɔdi Yudaƒuɔ ƒui ndi bekyuli bani na Katɔti ɔ́ƒuna aani nwuna badi. ⁷ Na ulátina ka ni, Abraham kaba ƒui ndi Katɔti bebi. Katɔti ɔ́su Abraham ɔnini, “Isak lɛlɔ na ndubɔsia na akɛ bawɔ bammɔ.” ⁸ Na ɔmɛni ɔɔtina ka ni, ɔɔɔdi Abraham bebi bani ƒui na ɔ́wɔ ndi Katɔti bebi. Mmomu Katɔti bebi ndi bani mɔɔƒɔ́-nwu linyese lɛmmɔ taadi. Na ama na ɔɔnu aani Abraham bebi geen. ⁹ Na etemila ani na Katɔti ɔ́su na nwuna linyese kemo ndi ɔnii, “Ndubunwini libo na uwi ɔni námanku lɛlɔ. Na Sara ɔdubɔwɔ ɔnanabi.” ¹⁰ Na ɔɔɔdi ɔmɛni lɛti. Nsu Rebeka ɔ́wɔ nta na badi bananabi ɔ́siku ɔti unwi pɛ kudɔ ɔni ndi bula Nana Isak. ¹¹ - ¹² Nsu ni, Katɔti ubo ulu ɔni na ɔsia taaƒuna bekyuli. Na kalɛ na ubo-nwu kemo lɛni ɔsu ni, Katɔti ɔ́su lɛla lɛdi úse asa na badubɔwɔ nta bamɛni iye asa na nta bammɔ bati lɛbuni ku likpidi. Na ulu ɔni lɛlɔ na ɔɔsia mmɔ ɔɔɔkɛnku bana kabla kadi lɛlɔ. Mmomu ɔ́su Rebeka ɔnini, “Ubi unengudi ɔdubunwini ɔnamudi kabla ɔblane.” ¹³ Use aani kalɛ na Katɔti ɔ́su na Bunweni Kedee Ɔku kemo ɔnini, “Yakob na lɛ́ƒuna, na líni Esau.” ¹⁴ Ɔmɛni ɔsu ni, bi na ɔdi ka bɔsu ɔƒɛni? Bɔsu na bɔsu bɔnii Katɔti ulábla ala ulu lɛlɔ? Kudii! Ɔɔɔdi lɛni na use. ¹⁵ Nsu ɔ́su Mose ɔnini, “Ukyuli ɔni mɔɔyɔ́ ka lɛnu kɔnyana ni, ndubɔnu-nwu kɔnyana. Na ukyuli ɔni mɔɔyɔ́ ka nwuna lɛlɔ lɛkywi-mi kaƒɔ ni, nwuna lɛlɔ lɛdubɔkywi-mi kaƒɔ.” ¹⁶ Anwuɔsu kalɛ na Katɔti ɔɔnu ukyuli kɔnyana ni, ɔɔɔkɛnku ukyuli ɔmmɔ kabla bɔbla iye tabla lɛlɔ. Mmomu ni, ɔkɛnku kalɛ na Katɔti ɔlati ɔɔnu kɔnyana lɛlɔ. ¹⁷ Na Bunweni Kedee Ɔku kemo ni, Katɔti ɔ́su Ɔga Ƒarao ɔnini, “Ɔmɛni ɔsu geen líse-ɔ lɛga kalɛ na lidie mina ɔyikun lɛtina bekyuli ɔkɛnku ƒula lɛlɔ, na bebo-mi lɛnyi kudu bete kayawi bekyuli ƒui.” ¹⁸ Anwuɔsu ni, Katɔti ɔɔnu ukyuli ɔni na ɔɔyɔ́ kɔnyana. Na uudie ɔbambadi lɛnɔ atu na ɔɔbla atuɔkplu. ¹⁹ Bina akɔ ɔdi ɔdubo-mi buye ɔnini, “Si use lɛni ni, dɛ na ɔ́bla na Katɔti ɔ́sɔ uudie ukyuli bɔƒiɔ bɔdi? Ɔsika ukyuli ɔdi ulakana na wata wenye Katɔti lɛyɔla lɛlɔ.” ²⁰ Na awɔ ndi ɔma geen na eetemi asiaku Katɔti? Libwi liléye ukyuli ɔni návɔ-ni ɔnini, “Bi ɔsu na ávɔ-mi lɛni?” ²¹ Ɔmɛni kama ni, ukyuli ɔni mɔɔvɔ́ ebwi ubo kuƒi na ɔbla lɛvɔti lɛmmɔ kalɛ biala na ɔɔyɔ́. Na ɔkana na ɔvɔ ebwi anyɔ ɔlɛku lɛvɔti linwi lɛmmɔ kemo, kalɛ na uti libwi linwi use ute limeyi bɔdi. Na uti libwi linyɔdi utaaƒuƒwɛ. ²² Na lɛni kani na Katɔti lɛnɔ ɔ́bla. Ɔɔyɔ́ ka udie nwuna kɔnyi keyi na banu nwuna ɔyikun bati. Nsu ɔ́kɛ kayi geen úte bani mɔɔkya-nwu kɔnyi ina ka ɔ́ɔlɛ-ma ugyii úse ka ɔyila-ma udu. ²³ Na lɛni kani na ɔ́yɔ ka údie ala abuni ani nkya nwuna bukeye bonwu kemo keyi ɔtina bani na wanu kɔnyana. Na abu ndi bekyuli bani na ɔ́klibi úse ka bɔdubo bukeye. ²⁴ Anwuɔsu na ɔ́ƒuna abu lɛnɔ, na ɔɔɔdi Yudaƒuɔ lɛti. Mmomu ku bani naaadi Yudaƒuɔ lɛnɔ. ²⁵ Na lɛni na Katɔti ɔ́su na Kenye Udiene Hosea ɔku kemo ɔnini, “Bekyuli bani na nka baaadi mina badi ni, ndubɔlɔ-ma mina bekyuli. Na bekyuli bani na nka baaadi mina bayɔne ni, ndubɔlɔ-ma mina bayɔne. ²⁶ Na kesii kani geen na lɛ́su nnii, ’Bɛɛɛdi mina bekyuli’ ni, mmɔ na bekyuli badubɔlɔ-ma Katɔti Ɔni Nli Uwi Ƒui bebi.” ²⁷ Katɔti Kenye Udiene Yesaia úbo kudu úte Yudaƒuɔ ɔnini, “Si ina Yudaƒuɔ bemomo aani ɛpu kɔnwinimi muedi ni, bana akɔ ɛlɛɛ badi kani ndubo bubu na bakɛ bɔƒɔ. ²⁸ Ɔsika Blɔti ɔdubɔtɛku bayawine ƒui litemi kɔnakunwi na ɔsa.” ²⁹ Na ɔdubɔlɛ aani kalɛ na Yesaia ɔ́su dii ɔnini, “Si Blɔti Ɔyikune Ƒui útebu bula bawɔ badi útese kama ni, bɔdubo udu bɔyii aani kalɛ na Sodom ku Gomora lɛma lɛ́yii udu!” ³⁰ Ɔmɛni ɔsu ni, bi na ɔdi ka bɔsu? Bekyuli bani naaadi Yudaƒuɔ na bátasiaku lɛlɔ bɔbla siin kama ni, bénwini bekyuli bani nse siin ɔƒɛni na Katɔti anumi ka báƒɔ-nwu bádi ɔsu. ³¹ Nsu Yudaƒuɔ bani násiaku ɔda bubo lɛlɔ bɔdi kama kpakplaa kalɛ na babla lɛlɔ siin na Katɔti anumi ni, bátakana mmɔ budu. ³² Na bi ɔsu na bétedu? Ɔsika bátasia bɔƒɔtaadi lɛlɔ na babla siin, mmomu básia ama alati kabla kama. ³³ Ɔmmɔ ɔsu na bétulo Kristo ɔni nse aani lɛtabi lɛni náda-ma ulu aani kalɛ na ɔkya Bunweni Kedee Ɔku kemo banini, “Binu! Lɛ́ƒuna lɛtabi lɛdi na Sion lɛni ndubɔya na bekyuli betulo. Na ani kani ndubɔya na begyiile bebuli. Nsu ukyuli biala ɔni maƒɔ-nwu madi ni, kɔƒa kulékpoku-nwu kudii.”

¹ Mina banwa, ɔdi mina bɔyɔ bɔni nási-mi kayi kemo ku mina katɔ bɔkpali kemo ka Yudaƒuɔ bakɛ bɔƒɔ. ² Nnye-ma kama na mɔɔsu ka ni, anumi eegyie-ma geen na Katɔti bɔsiaku lɛlɔ. Nsu lɛnungyie lɛmmɔ lɛɛɛkɛnku lɛlati lɛlɔ. ³ Ɔsika baaagyi ulu ɔni lɛlɔ na Katɔti ɔɔyɔ́ ka ukyuli ɔsia na ɔbla siin na nwuna anumi. Mmomu ama alati báwia ulu bamba béte lɛlɔ. Ɔmɛni ɔsu béteboku lɛlɔ kalɔ bétete Katɔti kalɛ na ɔtina-ma ulu ɔni lɛlɔ na basia na ɔbla-ma siin. ⁴ Ɔsika Kristo ndi Mose ɔda bubo bɔmmɔ ƒui kawɔlɔkɔ. Na ukyuli biala ɔni maƒɔ Kristo madi ni, ɔ́bla siin na Katɔti anumi. ⁵ Mose únweni ɔ́siku kalɛ na ukyuli ɔɔbla siin ɔkɛnku ɔda bubo lɛlɔ ɔnini, “Ukyuli biala ɔni mɔɔdi ɔda bubo bɔmmɔ lɛlɔ ni, ɔda bubo ulu ɔmmɔ ɔdubute-nwu ngba.” ⁶ Nsu Bunweni Kedee Ɔku ɔ́su ɔ́siku kalɛ na ukyuli ɔɔbla siin na Katɔti anumi ɔkɛnku bɔƒɔtaadi lɛlɔ ɔnini, “Teye lɛlɔ anii, ’Ɔma ndubusie katɔ?’ ” Nwuna kalɔ ndi, ɔma makɔ katɔ matákpanku Kristo meboku? ⁷ “Na teye lɛlɔ anii, ’Ɔma ndubuduo usie kalɔ kemo ƒui?’ ” Nwuna kalɔ ndi, ɔma mesie kekpine matákpanku Kristo meboku? ⁸ Mmomu lɛla lɛni na ɔɔtina ndi ka, “Katɔti litemi lɛmmɔ lɛ́ɛni líde-ɔ, na lɛkya-a kenye ku ƒula kayi kemo.” Na ani ndi bɔƒɔtaadi litemi lɛni lɛsa na bɔɔkɔ́. ⁹ Na si ébimi kenye na ásu anii Yesu ndi Blɔti, na áƒɔ ádi na ƒula kayi kemo ka Katɔti nágyila-nwu ɔ́lɛku kekpine ni, Katɔti ɔdubɔƒɔ-ɔ ngba. ¹⁰ Ɔsika ƒula kayi kemo na aaƒɔ́ taadi na aabla siin na Katɔti anumi. Na ƒula kenye kani na éti eedie ɔmɛni taatina, na aakɛ́ bɔƒɔ. ¹¹ Ɔsika lɛni na Bunweni Kedee Ɔku ɔ́su ɔnii, “Ukyuli biala ɔni maƒɔ-nwu madi ni, kɔƒa kulékpo-nwu kudii.” ¹² Ɔmɛni ɔɔtina ka ni, kavumana kadi keeebo Yudaƒuɔ ku bani naaadi Yudaƒuɔ ntɛ. Na Blɔti ɔdi bula ƒui Ɔti, na uute bekyuli bani ƒui mɔɔkpali-nwu ala abuni. ¹³ Lɛni na ɔkya Bunweni Kedee Ɔku kemo ɔnii, “Ukyuli biala ɔni mɔɔkpali Blɔti lɛnyi ni, ɔdubɔkɛ bɔƒɔ.” ¹⁴ Nsu ukyuli biala ɔni na útaƒɔ útadi ni, dɛ na ɔdubɔkana na ɔkpali-nwu uvele lɛla lɛdi? Na ukyuli ɔni lɛlɔ lɛsa na bátakɔ bétete-ma kudii ni, dɛ na badubɔkana na baƒɔ-nwu badi? Na si ɔdi útatákɔ lɛsa lɛmmɔ útete-ma dii ni, dɛ na badubunu-ni? ¹⁵ Na si bátatala bekyuli nɔɔ? Dɛ na ɔdubɔbla na bakɔ lɛsa lɛmmɔ? Anwuɔsu na bénweni banii, “Binu bekyuli bani ndubo babakɔ litemi buni lɛmmɔ lɛsa kalɛ na bana bubo kɔku kɔɔda kubiti!” ¹⁶ Nsu ni, ɔɔɔdi Yudaƒuɔ ƒui náƒɔ litemi buni lɛmmɔ. Ɔsika Yesaia ɔ́su ɔnini, “Blɔti, ɔma náƒɔ bula litemi ɔ́di?” ¹⁷ Anwuɔsu ni, bɔƒɔtaadi bunye litemi lɛmmɔ bunu lɛlɔ. Na litemi lɛmmɔ bunu lɛkɛnku Kristo litemi lɛlɔ. ¹⁸ Nsu lɛla lɛni muuye ɔƒɛni ndi ka ni, bunu na Yudaƒuɔ bétenu Katɔti litemi lɛmmɔ? Oowo! Bénu-ni aani kalɛ na Bunweni Kedee Ɔku ɔ́su ɔnini, “Bénu-ma kɔku na kayawi ekpo ƒui, na bana etemila égyingya ésie kayawi kawɔkɔ ƒui.” ¹⁹ Na nsɔ muuye nnii na bunu na bétenu-ni kalɔ? Mose ɔlati ndi ukyuli udeedi ɔni náka kenye budie na ɔ́su ka Katɔti ɔ́su ɔnini, “Ndubɔya na anumi egyie-mii na bekyuli bani naaadi Yudaƒuɔ lɛlɔ. Na ndubuti bekyuli bani anumi nétebimi lɛkya-mii kɔnyi.” ²⁰ Na Yesaia úse kayi na ɔ́su-ma nwaa ka Katɔti ɔ́su ɔnini, “Bekyuli bani na nka baláwia-mi ni, ɔƒɛni bánu-mi. Na lídie lɛlɔ lɛ́tina bekyuli bani néteye-mi lɛlɔ.” ²¹ Nsu na Yudaƒuɔ lɛlɔ ni, Katɔti ɔ́su ɔnini, “Lígyingya enu líse limeyi limodi ka lɛƒɔ-ma. Nsu bátakpete-mi, ɔsika badi bekyuli bani naaabu lɛla lɛdi na báta bénye-mi lɛlɔ.”

¹ Anwuɔsu muuye ɔƒɛni nnii Katɔti úni nwuna bekyuli? Oowo. Kudi kudii! Ami ɔlati Yudani na ndi na Abraham kaba kemo, na lɛ́si Benyamin ɔtɔ kemo. ² Katɔti úteni nwuna bekyuli bani na ɔgyi use. Na bɛgyi lɛla lɛni na bénweni bákya Bunweni Kedee Ɔku kemo uwi ɔni na Kenye Udiene Elia úvele Katɔti úte Yudaƒuɔ na ɔ́su ɔnini, ³ “Blɔti, bekyuli bammɔ bádu ƒula kenye bediene na bábwɛ ƒula akpabi ammɔ ƒui. Na ami lɛti pɛ ndi ukyuli ɔni nébu, na baawia ka badu-mi!” Na kenye kamani na Katɔti údie Elia? ⁴ Údie kenye ɔnini, “Lídie bekyuli mpimu maatɛ líse líte lɛlɔ ɔni na bátalɛ akɔnkɔ kalɔ bétete Baal baƒiɔ.” ⁵ Lɛni kani na use ɔƒɛni. Nkyuli ɛlɛɛ badi bébu bani na Katɔti ɔ́ƒuna úse úte lɛlɔ ɔkɛnku nwuna lɛƒɔndia ɔsu. ⁶ Nwuna lɛƒɔndia lɛlɔ na ɔkɛ ɔ́ƒuna-ma, na ɔɔɔdi bana lɛla lɛni bábla ɔsu na ɔ́ƒuna-ma. Na si Katɔti ɔɔƒuna bekyuli na bana kabla bɔbla kenye ni, na nwuna lɛƒɔndia lɛɛɛdi lɛƒɔndia geen. ⁷ Geen ni, lɛla lɛni na Yudaƒuɔ básia anu kpakplaa ni, bátakɛ-ni. Nsu bani na Katɔti ɔ́ƒuna ama bákɛ-ni. Na bakladi báyu atuɔkplu. ⁸ Lɛni na Bunweni Kedee Ɔku ɔ́su ɔnini, “Katɔti ɔ́nyonu-ma na kɔdɔlɔ kɔ́ƒɔ-ma kayi ku kasusu ƒui. Na úti úbalɛ ku ɔmwi kadi ni, belenu na balánu lɛla lɛdi taati.” ⁹ Anwuɔsu Ɔga Dawid ɔ́su ɔnini, “Katɔti ɔya na bana limeyi kadikɔ kenwini kubu kubi-ma lɛlɔ, na betulo na bebuli beduo ɔgbankpi kemo. ¹⁰ Na ɔya na bana anumi abwɛ na batanu lɛla lɛdi batati, na ɔya na bana lɛbibo linwini etila asia-ma lɛlɔ uwi biala.” ¹¹ Na muuye lɛnɔ nnii uwi ɔni na Yudaƒuɔ bétulo na bébuli ni, báyii ku udu na basɔ balakana bɔta? Oowo! Kudii! Mmomu ɔ́si bana bɔƒiɔ ɔsu ni, ngba bɔƒɔ búbedu bekyuli bani naaadi Yudaƒuɔ kalɛ na ɔya anumi egyie Yudaƒuɔ. ¹² Yudaƒuɔ likpidi ɔsu na Katɔti ɔ́ya na kayawi ƒui bákɛ nwuna ala abuni. Na ɔni na Yudaƒuɔ báyila kɔyu kemo ala abuni ɔsu ni, bani naaadi Yudaƒuɔ bálɛ lili na bákɛ Katɔti kusɛ kusɛ geen. Na si bana bɔƒiɔ bɔdanku kusɛ kusɛ ɔmɛni udu búboku kayawi ni, si uwi ɔni na Yudaƒuɔ bakladi bábasalaku Katɔti badi ƒui ni, nwuna kusɛ kusɛ ɔmmɔ ɔdubo bumomo geen bubu! ¹³ Na amii bani naaadi Yudaƒuɔ ni, mɔɔsu-mii nnii uwi ɔni kemo na ami ndi ɔtalane nte-mii mɛni ni, muubo mina kabla kudu. ¹⁴ Na nsia lɛnu ɔkɛnku ɔmɛni lɛlɔ ka ni, anumi adubugyie mina bekyuli, na badi bakɛ ngba bɔƒɔ. ¹⁵ Ɔsika uwi ɔni na Katɔti údie-ma atu ni, Katɔti ɔ́sɔku anwu ku kayawi bekyuli ntɛ ɔ́klibi. Anwuɔsu bi na ndubo bɔlɛ si uwi ɔni na Katɔti ɔ́sɔ ɔ́ƒɔ-ma? Ɔdubuse aani kalɛ na ukpine ɔɔsɔ taata teebelie ngba. ¹⁶ Ɔsika si bodobodo kakɛ kedeedi kani na bábwɛ bákpa béte Katɔti use kedee ni, na bodobodo ɔkladi lɛnɔ use kedee. Na si kugyii kɔdi ugyiitu use kedee ni, na kugyii kɔmmɔ kɔgba lɛnɔ kuse kedee. ¹⁷ Na si kɔgba kɔdi kɔ́ƒɛ kɔ́lɛ kugyii kɔmmɔ lɛlɔ na békulo-mii aani lɛku kemo kugyii kagba blii kadi bébenyimi báda kesii kani na kugyii kɔmmɔ ntu bɔɔyu na ɔ́kun ɔ́da ni, bɛɛní ntu taasiku kugyii kɔmmɔ ligyiitu kudɔ. ¹⁸ Anwuɔsu bitakun lɛmɛnɛ na kugyii kɔmmɔ kɔgba kɔni náƒɛ kɔ́lɛ lɛlɔ. Ɔsika si bɛ́bla lɛni ni, bɛnu bɛti ka ɔɔɔdi amii nda ligyiitu lɛmmɔ. Mmomu ligyiitu lɛmmɔ nda-mii. ¹⁹ Bɛdubɔkana na bɛsu bɛnii, “Kɔgba kɔmmɔ kɔ́ƒɛ kalɛ na beti abu bamana kuna kenye.” ²⁰ Na use lɛni. Nsu bɛti ka bana taƒɔ tadi ɔsu na bámami. Na amii bɛ́kɛ kamakɔ ka bɛ́ƒɔ bɛ́di ɔsu. Nsu ɔmmɔ ulátina ka ɔlɛka biteeƒu, mmomu bitaayia. ²¹ Ɔsika si Katɔti útenye útada Yudaƒuɔ bani nse aani kugyii kɔmmɔ ɔlati kɔgba bɔƒɛ ni, bɛɛkali ka ɔdubunye ɔda amii amu? ²² Ɔmɛni ɔɔtina-bu kalɛ na Katɔti ɔɔnu kɔnyana ku kalɛ na nwuna litemi libo ɔkplu. Ɔ́yu bekyuli bani nébo kalɔ ɔkplu, na ɔdi lɛƒɔndia ute amii si binye bɔƒɔtaadi bɔmmɔ lɛlɔ kpakplaa uwi ƒui. Si bítabla lɛni ni, Katɔti ɔdubukulo-mii udie kugyii kɔmmɔ lɛlɔ. ²³ Na si Yudaƒuɔ lɛnɔ báda bana taƒɔ tadi báya ni, Katɔti ɔdubuti ama lɛnɔ ubamana kugyii kɔmmɔ lɛlɔ. Ɔsika Katɔti ɔlati ubo ɔyikun na ɔsɔku kagba ɔmana kugyii lɛlɔ na ɔkun ɔda. ²⁴ Úse ɔdi lɛla lɛni na balakya unyeƒi ka si bákana na békulo kugyii kɔdi udu basiku lɛku kemo bábamana kɔni bálɛ ɔmantɛ lɛlɔ na ɔ́ku ɔ́da ɔni na nka útamanku ka babla ni, na ɔmantɛ kugyii kɔmmɔ ɔlati kɔgba ni, kɔdubɔkana na kɔkun kɔda kugyii kɔmmɔ lɛlɔ pla utulo. ²⁵ Banwa, ala abɛdi adi akya ɔ́si kukuuku ani na naaayɔ nnii abɛ-mii ƒui kalɛ na bilátaakun lɛmɛnɛ na bina kasusu kenye. Anwu ndi ka ni, Yudaƒuɔ badi atuɔkplu ani baabla ni, ɔɔɔdubo buse lɛni uwi ƒui. Mmomu atuɔkplu ammɔ kenye kadubukulo uwi ɔni na Katɔti ɔ́sala bumomo bɔni na ɔɔwia na bani naaadi Yudaƒuɔ akɔ ɔ́wɔlɔ. ²⁶ Na ulu ɔmɛni lɛlɔ na Yudaƒuɔ ƒui badubɔkɛ bɔƒɔ aani kalɛ na Katɔti ɔ́su na Bunweni Kedee Ɔku kemo ɔnini, “Ɔƒɔne ɔdubɔsi Sion na ɔdubo ubedie likyulikpi na Yakob kaba kemo. ²⁷ Na bunyimi bɔmɛni ndubɔkya ami ku-ma ntɛ si uwi ɔni na lídie ekpidi bana lɛlɔ.” ²⁸ Yudaƒuɔ badi Katɔti bekisine, ɔsika bátaƒɔ litemi buni lɛmmɔ bátadi. Ɔmɛni ɔsu ni, amii bani naaadi Yudaƒuɔ bɛ́kɛ kenyekɔ. Nsu ka Katɔti ɔ́ƒuna-ma ɔsu ni, ɔɔyɔ́-ma na bana bati kuuku ɔsu. ²⁹ Ɔsika si ɔ́ƒuna ukyuli ɔdi iye ɔ́bla-nwu lɛƒɔndia lɛdi ni, ulávumana-ni. ³⁰ Na amii bani naaadi Yudaƒuɔ ni, kalɛ na bɛ́ƒiɔ Katɔti uwi ɔdi nábavi kemo nsu ɔƒɛni Katɔti ɔ́nu-mii kɔnyana na Yudaƒuɔ atuɔkplu ɔsu ni, ³¹ lɛni kani na ɔkɛnku kalɛ na Katɔti ɔ́nu-mii kɔnyana ɔsu na ama lɛnɔ bénwini batuɔkplune kalɛ na Katɔti ɔnu ama lɛnɔ kɔnyana. ³² Katɔti ɔ́nyonu bekyuli ƒui, na bana atuɔkplu ábala-ma aani batɔntɛne kalɛ na ɔnu bana ƒui kɔnyana. ³³ Katɔti úbomo geen na ala abuni ƒui ási-nwu kudɔ. Na geen ni, ɔ́da anu na ɔgyi ala ƒui kemo kaduɛ. Ukyuli ɔdi ulénu ulu ɔni lɛlɔ na ɔɔsia taatɛ litemi kalɔ. Na ukyuli ɔdi ulénu lilu lɛni lɛlɔ na ɔɔsia taabla nwuna ala kalɔ. ³⁴ Lɛni na Bunweni Kedee Ɔku ɔɔsu ɔnini, “Ɔma náti Blɔti kasusu dii? Na ɔma mɔɔkya-nwu kasusu? ³⁵ Ɔma néte Katɔti lɛla lɛdi dii na ɔlɛka Katɔti ɔƒɔ-nwu kayu ɔsia?” ³⁶ Ala ani ƒui nási Katɔti kudɔ, na anwu ɔlati lɛlɔ na ɔkɛ údie-nya, na adi anwu adi. Bɛya na bɔkɔliku-nwu lɛnyi katɔ ɔ́si ɔƒɛni úsela ƒui. Ɔsia lɛni.

¹ Anwuɔsu ni, mina banwa, ka Katɔti ɔ́bla-bu kaƒɔ buni geen ɔsu ni, muuvele-mii geen nnii biti bina lɛlɔ bite Katɔti aani akpala ani nse kedee na aayɔ́-nwu kaƒɔ lɛnɔ bɛda na bina ngba bulie kemo mɛni. Ɔmmɔ ndi bina kɔyu kemo akpala kabla. ² Bɛsɔ bitabla unwi ku kayawi kamɛni lɛlɔ ala bɔbla. Mmomu bɛya na Katɔti ɔvumana-mii kasusu ƒui na binwini bekyuli bawɔdi. Ɔmmɔ ndubɔya na bɛnu lɛla lɛni na Katɔti ɔɔyɔ́ bɛti, na bɛbla lɛla lɛni ndia na lɛɛyɔ́-nwu kaƒɔ na lise sɛɛn lɛ́wɔlɔ. ³ Na ɔkɛnku kabla kani na úte-mi na nwuna lɛƒɔndia ɔsu ni, mɔɔsu bina ƒui nnii bitatalaku lɛlɔ katɔ bitetuloku kalɛ na bise. Mmomu ni, bina kasusu katina ka bíboku lɛlɔ kalɔ na ɔdi biala utaakɔku lɛlɔ taanu na nwuna bɔƒɔtaadi bɔni na ubo kenye. ⁴ Kalɛ na bula ƒui bubo lɛlɔ ugyii unwi ɔni mbo ɔlɔna ekpo pii ani naaabla kabla kenwi ni, ⁵ lɛni kani na bɔdi bekyuli pii na Kristo kemo nsu bɔ́sala bɔ́bla unwi aani lɛlɔ ugyii unwi ɔni ndanku lɛlɔ ekpo pii. ⁶ Anwuɔsu ni, bɛya na buti kɔyu kemo etela lidu lidu ani na Katɔti ɔkɛnku nwuna lɛƒɔndia kemo na úte-bu bɔbla kabla. Si ukyuli ɔdi litela lɛdi Katɔti kenye budie ni, ɔdi ka udie-ni kenye ku bɔƒɔtaadi bɔni na ubo. ⁷ Si ukyuli ɔdi litela lɛdi bekyuli kabla bɔbla ni, ɔdi ka utaabla kabla lɛni kani. Si ɔdi ala bɔtina ni, ɔdi ka ɔtina ala ammɔ lɛni kani. ⁸ Si ɔdi bekyuli ɔkplu bɔkya ni, ɔdi ka ɔkya bekyuli ɔkplu. Si bekyuli na ɔdi ka ute ala ni, na ute ku kaƒɔ ƒaa. Na si bekyuli bɔtɔnku lɛnɔ na ɔdi ni, ɔdi ka uti nwuna anu ƒui ɔsia kabla kammɔ lɛlɔ na ɔtɔnku-ma. Si kɔnyana bɔnu na ɔdi ni, na ɔnu kɔnyana ku kayi ƒui. ⁹ Bɛya na bina bekyuli bɔyɔ bɔbla bɔyɔ geen. Bikisi likpidi na biƒie lɛla lɛbuni bɛda. ¹⁰ Biti bɔyɔ bite lɛlɔ ku kayi ƒaa aani banwa baƒɔtaadine. Na bɛbu bina bakpana bitulo lɛlɔ. ¹¹ Bitabla kɔkɔsɔ, mmomu bɛya na Katɔti Kɔyu kɔƒɔ-mii lɛlɔ kemo ƒui na bitaabla Blɔti kabla. ¹² Lɛlɔ litaayɔ-mii na bina lɛnunsia kemo. Na binye kpakplaa na lɛbibo biala kemo. Na bitaakpali katɔ na ulu lɛlɔ. ¹³ Bile bina lɛlɔ ala bite Katɔti bekyuli bani neeebo lɛla lɛdi. Na bɛgyingya enu na bɛƒɔ baƒɔ. ¹⁴ Bekyuli bani muukpóku-mii ni, bite-ma kusɛ kusɛ. Bite-ma kusɛ kusɛ na bitewida-ma. ¹⁵ Bɛkɛ lɛlɔyɔ ku bani na lɛlɔ lɛɛyɔ́. Na biwuloku bani muuwulo. ¹⁶ Bɛbla unwi ku bina bakpana na bina ngba bulie kemo. Bitatalaku lɛlɔ katɔ, mmomu bɛtuna na bɛsala ku bani neeebo kenyekɔ kadi na bekyuli anumi. Na bitanu lɛlɔ bitetulo bakladi. ¹⁷ Biteti likpidi bitaƒɔ likpidi kayu. Bɛnu kaduɛ na bitaabla ala ani na ukyuli biala ɔɔnu ka adia. ¹⁸ Bɛsia ulu biala lɛlɔ na bɛya na keyi buɛɛ kakya amii ku bekyuli ƒui ntɛ. ¹⁹ Banwa, bitedie ukyuli likpidi kasi kudii, mmomu bite Katɔti kuƒi na ɔbla nwuna kɔnyi kabla na ukyuli ɔmmɔ lɛlɔ. Ɔsika ni, Katɔti ɔ́su na Bunweni Kedee Ɔku kemo ɔnini, “Ami Unwoti muudie kasi, na ami ndubɔƒɔ kayu.” ²⁰ Mmomu na Bunweni Kedee Ɔku kemo ni, básu-bu banii, “Si kɔka kɔɔda ƒula ukisine ni, te-nwu adila na ɔdi. Si utukwɛ mɔɔda-nwu ni, te-nwu ntu na ɔni. Ɔsika si ábla lɛni ni, édie ogya ku agyabi éwi-nwu lili.” ²¹ Bitaya na likpidi lɛdi-mii lɛlɔ, mmomu biti lɛbuni bɛdi likpidi lɛlɔ.

¹ Ɔlɛka ukyuli biala uti ɔbu ute kalɔ lɛlɔ batɔnkune. Ɔsika ɔtɔnkune ɔdi uuubo ɔyikun ɔdi si ɔɔɔdi Katɔti kudɔ na ɔ́si. Na batɔnkune bani nli ɔƒɛni ni, Katɔti néti-ma úse mmɔ. ² Si ukyuli ɔ́di ɔ́ta únye batɔnkune badi lɛlɔ ni, Katɔti lɛla lɛni na úse úse lɛlɔ na ɔ́ta únye. Na bekyuli bani mabla lɛni ni, baawia litemi bɔtɛ teete lɛlɔ. ³ Bekyuli bani mɔɔbla lɛbuni ni, batɔnkune bammɔ baaadi lɛyiala beeete-ma, mmomu bekyuli bekpidi na badi lɛyiala bete. Si bɛɛyɔ́ ka bɛda ɔtɔnkune bɔyia bɛya ni, bɛbla lɛla biala ulu lɛlɔ na ɔdubumwi-mii. ⁴ Ɔsika Katɔti kabla ɔblane na ɔdi, na ɔɔbla kabla kalɛ na ɔdianku-ɔ. Nsu si bɛɛbla likpidi ni, na ɔdi ka bɛyia-nwu. Ɔsika ɔɔɔdi keeke ɔsu na béte-nwu ɔyikun! Katɔti kabla ɔblane na ɔdi. Na ɔdi ukyuli ɔni mɔɔnu ka bábla lɛla biala ulu lɛlɔ na ɔni likpidi ɔblane biala kɔtu. ⁵ Ɔmɛni ɔsu na ɔdi ka biboku lɛlɔ kalɔ bite batɔnkune. Na ɔɔɔdi Katɔti kɔnyi kɔni mebo-mii lɛlɔ ɔsu, mmomu ka biinú bina kayi bɔlɛ ɔsu. ⁶ Ɔmɛni ɔsu lɛnɔ na ɔdi ka bɛƒɔ kuyi bite bina kalɔ lɛlɔ batɔnkune, ɔsika Katɔti kabla na baabla. Na béti bana uwi ƒui béte ka bátaatɔnku bekyuli. ⁷ Anwuɔsu ni, bɛƒɔ bana ɔdi biala kayu kani na bɛda-nwu. Si kalɔ kammɔ egulabi ani na báda béte ɔdi biala na ɔdi ni, na bɛƒɔ-ka. Si kuyi kɔdi ni, na bɛƒɔ aku lɛnɔ. Si ɔbu na ɔdi ka bite ni, na bite. Na si bumwi lɛnɔ ɔdi ni, na bimwi. ⁸ Si bɛda ukyuli ɔdi kayu ni, biteni-ka bɔƒɔ. Bɛƒɔ kana ƒui na kasa. Nsu kayu kani na bɛdubɔda na kalása bɔƒɔ ndi bina ukyulikpana bɔyɔ. Ɔsika ukyuli biala ɔni na ubo bɔyɔ ute nwuna ukyulikpana ni, ɔɔtina ka ɔ́ɔdi Katɔti ɔda bubo bɔmmɔ lɛlɔ. ⁹ Ɔda ɔni bébo-bu banii, “Tadi kɔsɔnɔ, tadu ukyuli, teyu, taya na anumi egyie-ɔ na ukyuli ɔdi ala lɛlɔ,” ku ɔda bubo biala nsɔ nkya ɔmɛni kama ni, ɔna ƒui ɔdanku lɛlakpa linwi lɛni ndi, “Yɔ ƒula ukyulikpana aani ƒula lɛlɔ kalɛ.” ¹⁰ Bɔyɔ bulábla nwuna ukyulikpana likpidi. Anwuɔsu bɔyɔ ndi lɛla lɛni na ɔda bubo bɔmmɔ ƒui bɔdanku. ¹¹ Bɛgyinya! Na bɛsia ulu ɔmɛni lɛlɔ. Ɔsika bɛgyi uwi ɔni kemo na bɔkya. Uwi ɔni kemo na Katɔti ɔdubɔƒɔ-bu úude útulo uwi ɔni na bɔ́ƒɔ Kristo bɔ́di kalɔ kesekɔ. ¹² Usien ɔmmɔ ɔ́ɔvi ɔ́wɔlɔ, na kadi ndaku bugye. Anwuɔsu bɛya na bɔda lɛdisa kemo ala bɔbla bɔya, na bɛkya kekpo awu ɔni námanku bekyuli bani nkya bukeye kemo. ¹³ Bɛya na bɔda bula lɛlɔ kaduɛ aani bekyuli bani nkɛ mɔɔví bukeye kemo. Na ɔɔɔdi adikpi emeyi bɔdi ku ntɛ bukpi ku lɛyalɛ ala ku likyulikpi ala ku lɛlɔ ntɛ bule ku lɛnungyie. ¹⁴ Mmomu biti Blɔti Yesu Kristo bɛkya aani awu, na bɛda kasusu bidie ɔlɔna ala keeke ani mɔɔda-mii ɔkwɛ lɛlɔ.

¹ Bigyingya enu na bɛƒɔ bina bakpana bani bɔƒɔtaadi nátayu tɔ ɔkplu. Bitakyaku-ma unyeƒi na ala ani lɛlɔ na amii ku-ma kasusu kátabla kenwi lɛlɔ. ² Ukyuli ɔdi nwuna bɔƒɔtaadi buute-nwu kuƒi ka ɔdi adila biala. Nsu ɔbambadi ɔni na nwuna bɔƒɔtaadi buuubo tɔ ɔkplu ni, adila ani kemo na bátakya lɛna kani na ɔɔdi. ³ Na ukyuli ɔni mɔɔdi lɛla biala mɛni ni, utanu ɔnwani ɔni mɔɔdi ala aƒunadi ka ɔ́sɔ. Na ukyuli ɔni mɔɔdi ala aƒunadi lɛnɔ utadu ɔni mɔɔdi lɛla biala kɔtɔ. Ɔsika Katɔti ɔ́ƒɔ anwu lɛnɔ. ⁴ Kenyekɔ kamani na ebo na aatɛku ukyuli ɔdi kabla ɔblane litemi? Nwuna unwoti ɔlati ndubɔnu bɔti si unye ute-nwu kpakplaa iye uuunye. Na kabla ɔblane ɔmmɔ lɛnɔ ɔdubunye kpakplaa, ɔsika Blɔti ɔdubɔkana na ɔya na unye ute-nwu kpakplaa. ⁵ Ukyuli ɔdi ɔɔbu limeyi lɛdi ka lise kedee litulo lɛbambadi. Na ɔdi lɛnɔ ɔɔnu emeyi ƒui ka ese unwi. Lɛla lɛni kani námanku ndi ka ɔdi biala ɔƒɔ lɛla lɛni na ɔɔbla ɔdi kaduɛ. ⁶ Ukyuli ɔni mɔɔbu limeyi lɛdi ni, Blɔti na uute ɔbu. Na ukyuli ɔni na adila adi lɛnɔ na ɔɔdi ni, Blɔti na uute ɔbu, ɔsika ɔ́gya Katɔti enu na ana lili. Na ukyuli ɔni néni na uládi adila adi lɛnɔ ni, ɔɔbla lɛni teeti taabu Blɔti. Na ɔɔgyá Katɔti enu. ⁷ Bula akɔ ɔdi uuulie ngba uuute nwuna lɛlɔ. Na lɛni kani na bula akɔ ɔdi lɛnɔ ulekpi ulete lɛlɔ. ⁸ Si buli ngba ni, bulie bute Blɔti. Na si búkpi lɛnɔ ni, búkpi búte Blɔti. Anwuɔsu si buli o-o iye búkpi o-o ni, Blɔti ɔdi kani na bɔdi. ⁹ Ɔsika ɔmɛni ɔsu geen na Kristo úkpi na ɔ́sɔ ɔ́ta úbo uli ngba kalɛ na unwini Blɔti ute bekpine ku bayawine ƒui. ¹⁰ Bi ɔsu na aadú ƒ^ɔnwani kɔtɔ? Iye ni, bi ɔsu na aanu ƒ^ɔnwani aani si ɔ́sɔ? Bula ƒui bɔdubunye Katɔti lɛgaboku lɛmmɔ anumi na ɔtɛku-bu litemi. ¹¹ Ɔsika bénweni banii, “Blɔti ɔnini, ’Ka lɛnya nli ngba mɛni ni, mɔɔsu-mii kpakplaa ka ɔdi biala ɔdubɔlɛ-mi akɔnkɔ kalɔ. Na ukyuli biala ɔdubɔkɔliku Katɔti lɛnyi katɔ.’ ” ¹² Anwuɔsu ni, bula akɔ ɔdi biala ɔdubɔbu nwuna ngba nkunta bute Katɔti. ¹³ Ɔmmɔ ɔsu bɛya na bɔda lɛlɔ kɔtɔ bɔdu bɔya. Mmomu bɛlɛ ugyii ka bɛɛɛdubo lɛla lɛdi bɔbla na lɛbala ɔdi bɔƒɔtaadi ulu na wetulo na weduo likpidi kemo. ¹⁴ Ka nliku Blɔti Yesu ɔsu ni, ngyi geen na mina kayi kemo ka adila adi eeebo na eesé lɛlɔ na anya alati udu kemo. Nsu si ɔdi ɔ́nu lɛla lɛdi aani lɛla lɛni muusé lɛlɔ ni, lɛla lɛmmɔ lɛdubuse-nwu lɛlɔ. ¹⁵ Si aadi lɛla lɛdi na agyi ka liikpóku ƒula ukyulikpana ni, ɔɔɔdi bɔyɔ na eedie taatina-nwu. Taya na lɛla lɛni na aadi libile ƒula ukyulikpana bɔƒɔtaadi, ɔsika Kristo úkpi na anwu lɛnɔ lili. ¹⁶ Na lɛla lɛni na awɔ aanu ka lɛdia ni, taya na ala ammɔ eti unyeƒi ákya Katɔti badi akɔ. ¹⁷ Ɔsika Katɔ Ɔga Ɔma ni, ɔɔɔdanku bɔdi ku bɔni. Mmomu ɔdanku lɛlɔ bɔbla siin ku keyi buɛɛ ku lɛlɔyɔ na Katɔti Kɔyu kemo. ¹⁸ Ɔsika ukyuli ɔni mɔɔbla Kristo kabla na ulu ɔmɛni lɛlɔ ni, ɔɔyɔ́ Katɔti kaƒɔ na bekyuli lɛnɔ baabu-nwu. ¹⁹ Anwuɔsu bɛya na bɔkya ɔkplu biala na bɔbla lɛla lɛni muuboku bekyuli keyi buɛɛ na lɛɛyá na bekyuli baalɛ́ lili na kɔyu kemo. ²⁰ Bitebile Katɔti kabla na adila ɔsu. Lɛdila biala lise sɛɛn, nsu ɔɔɔdia si lɛla lɛni na aadi lɛdubɔya na ukyuli ɔdi utulo na ubuli uduo ɔgbankpi kemo. ²¹ Si alákun lɛna iye alani ntɛ iye alábla lɛla lɛni maya na ƒ^ɔnwani weduo ɔgbankpi kemo ni, ɔdia. ²² Anwuɔsu si lɛla lɛni na áƒɔ ádi na ala amɛni lɛlɔ ni, ya na asɔ akya awɔ ku Katɔti ntɛ kani. Lɛlɔ lɛdubɔyɔ ukyuli ɔni na nwuna kayi kaladu-nwu kɔtɔ na lɛla lɛni na ɔɔnu ka lɛdia lɛlɔ. ²³ Nsu si ukyuli ɔdi ɔɔdi lɛla lɛdi na nwuna kayi kalátunaku-nwu ni, báadu-nwu kɔtɔ kukuuku, ɔsika uládi lɛla lɛmmɔ na bɔƒɔtaadi kemo. Na lɛla biala na ukyuli ɔɔbla na ɔɔɔkɛnku bɔƒɔtaadi lɛlɔ ni, ɔdi-nwu likpidi.

¹ Abu bani na bula bɔƒɔtaadi bɔ́ɔyu ɔkplu ni, ɔlɛka bɔkɛ kayi bute ala ani na bekyuli bani na bana bɔƒɔtaadi bútayu tɔ ɔkplu baabla na bubunku-ma. Na ɔɔɔdi ka bɔbla lɛla lɛni mayɔ-bu kaƒɔ lɛti. ² Ɔdi ka bula akɔ ɔdi biala ɔbla lɛla lɛni mayɔ nwuna ukyulikpana kaƒɔ kalɛ na ɔdia ute-nwu na ɔya na ɔlɛ lili na kɔyu kemo. ³ Ɔsika Kristo muedi ni, ɔɔɔdi lɛla lɛni mayɔ-nwu kaƒɔ kani na ɔ́bla. Mmomu bénweni ka Kristo ɔmmɔ ɔ́su Katɔti ɔnini, “Edumi ani na bekyuli bédumi-ɔ ni, ana ƒui ébo ábasia-mi lɛlɔ.” ⁴ Na ala ani ƒui na bénweni bése uwi ɔni návi kemo ni, bénweni-nya bése kalɛ na batina-bu ala, kalɛ na si búnye lɛbibo biala kenye kpakplaa ɔkɛnku Bunweni Kedee ogya ɔni na ɔɔkya-bu lɛlɔ ni, na bɔkɛ lɛnunsia. ⁵ Muuvele Katɔti ɔni muubunku-bu na bɔɔkana lɛbibo biala kenye bunye kpakplaa na ɔɔkya-bu ogya nnii ɔya na unwi bɔbla bɔkya-mii akɔ uwi ɔni na bíti bɛsiaku Kristo Yesu mɛni. ⁶ Na bina ƒui kayi kasala kabla kenwi ku bina etemila, na bimwi Katɔti ɔni ndi Blɔti Yesu Kristo Ɔti. ⁷ Ɔmɛni ɔsu bigyingya enu na bɛƒɔ lɛlɔ aani kalɛ kani na Kristo úgyingya enu na ɔ́ƒɔ-mii. Ɔmɛni uuti ɔbu teete Katɔti. ⁸ Ɔsika mɔɔsu-mii nwaa nnii Kristo únwini Yudaƒuɔ ubunkune kalɛ na udie ɔtina ka kenye kani na Katɔti ɔ́su Yudaƒuɔ ɔtɔ eƒi benengu úse ni, ɔ́di-ka lɛlɔ na kébo kete lɛni sɔsɔ. ⁹ Na Katɔti kenye kammɔ kadubɔya na bekyuli bani naaadi Yudaƒuɔ lɛnɔ bemwi Katɔti na nwuna kɔnyana bɔnu ɔsu. Katɔti kenye udiene ɔdi ɔ́su Katɔti na Bunweni Kedee Ɔku kemo ɔnii, “Ɔmɛni ɔsu ndubumwi-ɔ na bekyuli bani naaadi Yudaƒuɔ akɔ. Na ndubudie bɔƒɔtaadi lɛnu limwi ƒula lɛnyi.” ¹⁰ Na básɔ básu banii, “Amii bani naaadi Yudaƒuɔ bɛkɛku Katɔti bekyuli ebiti.” ¹¹ Básɔ básu lɛnɔ banii, “Amii bani naaadi Yudaƒuɔ ƒui bimwi Blɔti. Na amii kadi ƒui bekyuli bidie lɛnu bimwi-nwu.” ¹² Yesaia lɛnɔ ɔ́sɔ únweni ɔnini, “Yese kugyii ugyiitu ɔdubɔta. Na ɔdi ukyuli ɔni ndubɔta na ɔdi kadi ƒui bekyuli lɛlɔ. Na bekyuli bani naaadi Yudaƒuɔ ƒui badubɔkɛ lɛnunsia na nwuna lɛlɔ.” ¹³ Muuvele nnii Katɔti ɔni ndi bula lɛnunsia ɔya na lɛlɔyɔ lɛƒɔ-mii lɛlɔ kemo ƒui, na bɛkɛ keyi buɛɛ aani kalɛ na bíti bina lɛlɔ bɛ́sia-nwu lɛlɔ kenye, kalɛ na Katɔti Kɔyu ɔyikun ɔya na bina lɛnunsia lɛƒɔ-mii lɛlɔ kemo ƒui. ¹⁴ Banwa, ami ɔlati lɛ́ƒɔ lɛ́di geen ka ala abuni bɔbla bɔ́ƒɔ-mii lɛlɔ kemo ƒui. Na bɛgyi ala ƒui kalɛ na biti ala ammɔ bɛtina lɛlɔ. ¹⁵ Líse kayi geen na línweni ɔku na ala adi bene lɛlɔ aani si bunyimene na nsɔ nda-mii ala ammɔ ɔkɛnku lɛƒɔndia lɛni na Katɔti úte-mi kenye. ¹⁶ Ɔsika ɔ́bla-mi ɔnii nnwini Kristo kabla ɔblane nte bekyuli bani naaadi Yudaƒuɔ. Na mɔɔbla ɔkpane kabla kani ndi ka lɛkɔ Katɔti litemi buni lɛmmɔ lɛsa lite bekyuli bani naaadi Yudaƒuɔ kalɛ na lɛkpanku-ma liboku Katɔti aani akpala ani Katɔti Kɔyu kɔ́bla kedee na adubɔƒɔ Katɔti anu. ¹⁷ Ɔmɛni ɔsu na mɔɔkun lɛmɛnɛ na lɛla lɛni na Yesu Kristo ɔ́bla ɔkɛnku kabla kani na mɔɔbla teete Katɔti ɔsu. ¹⁸ Lɛɛɛdubo bɔyii bɔsu lɛla lɛdi na lɛla bamba lɛdi lɛlɔ ntu lɛla lɛni na Kristo ɔ́bla ɔkɛnku-mi lɛlɔ kani. Ɔ́ya na lɛ́kpanku bekyuli bani naaadi Yudaƒuɔ, kalɛ bebo na badi Katɔti litemi lɛlɔ ɔkɛnku lɛla lɛni na lɛ́su-ma na lɛ́bla lɛnɔ ɔsu. ¹⁹ Na badubɔbla lɛni ɔkɛnku ɔyikun ala ani na bánu ku akɔla budie taatina ani na Katɔti Kɔyu kɔ́ya na lɛ́bla ɔsu. Anwuɔsu ɔ́si Yerusalem ɔkɛ útávi Iliriko amadɔ ni, lɛ́kɔ Kristo litemi buni lɛmmɔ lɛsa. ²⁰ Ɔ́si kukuuku ƒui ni, ɔdi-mi lɛnungyie ka lɛkɔ litemi buni lɛmmɔ lɛsa na kesii kani na baaagyi Kristo. Na ɔɔɔdi banii ntátu lɛsia ɔdi kowodu kalɔ lɛtabi lɛni na ɔ́ɔkya úse lɛlɔ. ²¹ Mmomu lɛla lɛni na bénweni bése na Bunweni Kedee Ɔku kemo líbo-nwu kemo lɛni banii, “Bekyuli bani na bátasu-ma nwuna lɛlɔ litemi dii ni, badubɔnu-nwu bati. Na bani lɛnɔ nétenu lɛla lɛdi dii ni, badubunu kalɔ.” ²² Kabla kamɛni ndi lɛla lɛni neeete-mi kuƒi ɔsu na naaakana-mii kudɔ bubo. ²³ Nsu ɔƒɛni ka kabla kadi kasɔ keeebo-mi mɛni na kalɛkɛ kamɛni lɛlɔ ku ka lɛ́kya ńtaawia ulu akwa pii mɛni ka lɛnu-mii ɔsu ni, ²⁴ lɛ́bla kasusu ka lɛsia-mii kudɔ si lɛ́vi lísela Spania. Mɔɔwia ka lɛsia-mii kudɔ si mɔɔví na bibunku-mi na mina mmɔ busie kemo si lɛ́kya-mii kudɔ na bɔ́kya lɛlɔ ebiti uwi klukui ɔdi. ²⁵ Nsu kudeedi ni, lísela Yerusalem ntábla kabla kadi libunku Katɔti bekyuli bani nkya mmɔ. ²⁶ Ɔsika ɔ́yɔ baƒɔtaadine bani nkya Makedonia ku Akaia kaƒɔ ka beyi egulabi adi bete baƒɔtaadine bawabane bani nkya Yerusalem mmɔ. ²⁷ Ɔ́yɔ-ma kaƒɔ ka babla lɛni. Na badi-ma bayune sɔsɔ! Ɔsika si bekyuli bani naaadi Yudaƒuɔ bákɛ kadikɔ ku Yudaƒuɔ kɔyu kemo ala abuni ni, agyi anii ama lɛnɔ ɔlɛka bebunku Yudaƒuɔ ku bana akɛla. ²⁸ Anwuɔsu si lɛ́bla kabla kamɛni lɛ́wɔlɔ na bákɛ ala ani na béyi mmɔ ni, ndubusie Spania na ndubɔsia-mii kudɔ mmɔ si lísela. ²⁹ Ngyi ka ɔni na ndubo-mii kudɔ ni, ndanku Kristo kusɛ kusɛ ƒui nduboku-mii. ³⁰ Banwa, muuvele-mii kpakplaa na Blɔti Yesu Kristo lɛnyi kemo ku Katɔti Kɔyu bɔyɔ kemo nnii bibunku-mi na bukpo kekpo kani kenye na nnye na bina Katɔti bɔkpali teete-mi kemo. ³¹ Bɛkpali katɔ bivele Katɔti na udie-mi na Yudea bekyuli bani nátaƒɔ bátadi enu kemo kalɛ na mina kabla na Yerusalem mmɔ kaƒɔ Katɔti bekyuli bammɔ anu. ³² Na si Katɔti ɔ́tuna ni, ndububo mbeduo-mii kudɔ ku ebiti, na bula ƒui bɔkɛ bɔnwuna. ³³ Katɔti ɔni muute keyi buɛɛ ɔsiaku bina ƒui. Ɔsia lɛni.

¹ Muudie bula ɔnwani uleku Ƒoibe lɛtina-mii. Ɔdi ubunkune na Kenkrea baƒɔtaadine akɔ. ² Na muuvele-mii nnii bigyingya enu na bɛƒɔ-nwu na Blɔti lɛnyi kemo na ulu ɔni námanku Katɔti bekyuli lɛlɔ. Bite-nwu kebunku biala na wawia wasiku-mii kudɔ, ɔsika úte bekyuli pii kebunku ku ami lɛnɔ. ³ Bigyele Priska ku Akwila bani ndi mina kabla bablane bakpana na Kristo Yesu kemo. ⁴ Bénye kagyumana ka bekpi na mina lili muedi. Na ɔɔɔdi ami lɛti mɔɔgyá-ma enu, mmomu ku bekyuli bani naaadi Yudaƒuɔ baƒɔtaadine akpa ammɔ ƒui. ⁵ Na bigyele baƒɔtaadine bani mɔɔsa na bana kaduli mmɔ lɛnɔ. Bigyele mina ɔkpana Epaineto ɔni náka kayi bunwini ɔ́ƒɔ Kristo na Asia kalɛkɛ lɛlɔ mmɔ. ⁶ Na bigyele Maria ɔni nábla kabla kpakplaa úte bina lɛkpa lɛmmɔ. ⁷ Bigyele Androniko ku Yunia bani ndi mina kadi bekyuli bani na ami ku-ma na bákya aban ɔtɔ mmɔ. Bekyuli bagyi-ma geen na batalane bammɔ akɔ. Na ama báka-mi Kristo ɔmmɔ bɔƒɔ. ⁸ Bigyele Amplia ɔni na mɔɔyɔ́ geen na Blɔti lɛnyi kemo bite-mi. ⁹ Na bigyele Urbana ɔni ndi bula kabla ɔblane ɔkpana na Kristo kemo. Na bigyele mina ɔkpana ɔyɔne Staki. ¹⁰ Bigyele Apele ɔni na bɔ́kɔku-nwu bɔ́nu na bɔ́nu ka ɔdia na Kristo kemo mmɔ. Na bigyele Aristobulo kaduli bekyuli ƒui. ¹¹ Bigyele Herodion mina kadi ukyuli bite-mi. Na bigyele Narkiso kaduli bekyuli bani néti lɛlɔ béte Blɔti mmɔ. ¹² Bigyele beleku bani ndi Triƒaina ku Triƒosa bani nábla kabla na Blɔti kemo. Na bigyele mina ɔkpana ɔyɔne Persi ɔni ndi uleku ɔbambadi ɔni lɛnɔ nábla kabla kpakplaa na Blɔti kemo. ¹³ Bigyele Ruƒo ɔni náƒɔ lɛnyi na Blɔti kemo ku uni ɔni náda ami lɛnɔ aani mina uni kalɛ. ¹⁴ Bigyele Asinkrito ku Ƒlegon ku Herme ku Patroba ku Herme ku bana banwa baƒɔtaadine bani nkya-ma kudɔ. ¹⁵ Bigyele Ƒilologo ku Yulia ku Nereo ku ɔnwani uleku ku Olimpa ku Katɔti bekyuli bani nkya-ma kudɔ. ¹⁶ Bigyele lɛlɔ na bɛkya lɛlɔ kɔgbu na lɛlɔ bɔbla kedee kemo. Kristo baƒɔtaadine akpa ammɔ ƒui na Kreta banii beegyele-mii o-o. ¹⁷ Banwa, mɔɔlɛ-mii kpakplaa nnii binye kagyumana na bekyuli bani muuti bule taakya bekyuli ntɛ lɛlɔ. Na beeti ala bamba ani náta énye bula ala ani na bɔɔtina lɛlɔ teetile-mii kuƒi. Bɛda lɛlɔ bɛmami-ma lɛlɔ. ¹⁸ Ɔsika bekyuli bammɔ udu ni, balábla Blɔti Yesu Kristo kabla. Mmomu ama alati bana ayɔla na baabla. Na bada kenye emini atɛ ku katɔlɔ beeƒú bekyuli bani naaagyi lɛla lɛdi kasusu. ¹⁹ Ukyuli biala únu kalɛ na bɛɛdi litemi buni lɛmmɔ lɛlɔ, anwuɔsu lɛlɔ lɛɛyɔ́-mi geen na bina lɛlɔ. Nsu mɔɔwia ka bɛda anu na lɛla lɛni ndi lɛbuni lɛlɔ. Na binwini bekyuli bani naaagyi lɛla lɛdi na likpidi ani kudɔ. ²⁰ Katɔti ɔni muute keyi buɛɛ ɔdubususu ukisine ɔmmɔ kpɛtɛ kpɛtɛ na ɔya na bɛdi-nwu lɛlɔ na uwi klukui kemo. Blɔti Yesu Kristo lɛƒɔndia lɛsiaku-mii. ²¹ Timoteo ɔni ndi mina kabla ɔblane ɔkpana uugyele-mii. Na lɛni kani na Lukio lɛnɔ ku Yason ku Sosipatro bani ndi mina kadi bekyuli beegyele-mii. ²² Ami Tertio ɔni nénweni ɔku ɔmɛni líse lɛnɔ muugyele-mii na Blɔti lɛnyi kemo. ²³ Gaio ɔni négyingya enu ɔ́ƒɔ ami ku baƒɔtaadine lɛkpa lɛni mɔɔsa mɛni ƒui uugyele-mii. Na Erasto ɔni ndi ɔma ɔmɛni egulabi lɛlɔ ɔnune ku bula ɔnwani Kwarto banii beegyele-mii. ²⁴ Blɔti Yesu Kristo lɛƒɔndia lɛsiaku bina ƒui. Ɔsia lɛni. ²⁵ Na ɔƒaani ni, bɛya bumwi Katɔti. Anwu ndubɔkana na ɔda-mii na binye kpakplaa aani kalɛ na mɔɔsu na litemi buni lɛni kudu na muubó kemo ɔkɛnku Yesu Kristo lɛlɔ. Litemi buni lɛmɛni nkɛnku ala abɛdi ani na Katɔti údie keyi na ábɛ-bu na akwa pii ani návi kemo. ²⁶ Nsu ɔƒɛni ni, bédie ala ammɔ keyi béte kalɔ ƒui bekyuli aani kalɛ na nwuna kenye bediene bénweni bése. Katɔti ɔni nli ngba úsela ƒui lɛƒɔyɔ ndi ka ɔlɛka bakɔ litemi buni lɛmɛni lɛsa na kadi ƒui baƒɔ-nwu badi na badi nwuna litemi lɛlɔ. ²⁷ Katɔti ɔni lɛti ndi ɔnundane ni, anwu na ɔlɛka bumwi ka ɔ́si ɔƒɛni úsela uwi ƒui na Yesu Kristo lɛnyi kemo! Ɔsia lɛni.