BUDIE TAATINA

BUDIE TAATINA

¹ Ɔku ɔmɛni ndi ala ani na Katɔti údie ɔ́tina nwuna kabla bablane ɔkɛnku Yesu Kristo lɛlɔ ka adubo bɔlɛ na uwi klukui kemo. Báti ɔmɛni ɔkɛnku Katɔti ɔtu ɔni na Kristo ɔ́tala ɔ́kya nwuna kabla ɔblane Yohane na ala ani na údie ɔ́tina-nwu kemo. ² Ami Yohane línweni ala ani ƒui na línu ku ani na lɛ́nu. Na lídie kenye na linyesia lɛni nási Katɔti kudɔ ku litemi geen lɛni na Yesu Kristo údie ɔ́tina lɛlɔ. ³ Lɛlɔ lɛdubɔyɔ ukyuli ɔni mɔɔká ɔku ɔmɛni teete bekyuli. Na lɛlɔ lɛdubɔyɔ bekyuli bani muunú Katɔti linyese etemila amɛni na balábla atuɔkplu na lɛla lɛni na línweni lɛ́kya ɔku ɔmɛni kemo lɛlɔ. Ɔsika uwi ɔni na ala amɛni ƒui adubo bɔlɛ úude. ⁴ Ami Yohane muunweni ɔku ɔmɛni lite amii baƒɔtaadine akpa maatɛ ani nkya Asia kalɛkɛ lɛlɔ. Bɛkɛ lɛƒɔndia ku keyi buɛɛ bɛsiku Katɔti ku nwuna Kɔyu ku Yesu Kristo kudɔ. Katɔti ndi anwu ɔni nli ɔ́si kukuuku, na ulie ɔƒɛni, na ɔdubo bulie uwi ɔni mebo ƒui. Na Katɔti Kɔyu ndi anwu ɔni mbo ɔyikun maatɛ ɔni nnye Katɔti lɛgaboku anumi. ⁵ Na Yesu Kristo ndi anwu ɔni muudie lɛla lɛdi biala kenye ulu lɛlɔ. Ɔdi ukyuli udeedi ɔni na Katɔti ɔ́gyila ɔ́lɛku bekpine akɔ na ɔsɔ ulekpi kudii. Yesu ɔmɛni mɔɔdi kayawi baga ƒui lɛlɔ. Na ɔɔyɔ́-bu. Na úti nwuna ubugya ɔ́kpa na bula lili, na ɔ́ƒɔ-bu ɔ́lɛku bula ekpidi kemo. ⁶ Na ɔ́bla-bu baga ku bakpane bani mɔɔkpanku bekyuli teeboku Ɔti ɔni ndi Katɔti. Uukeye, na ubo ɔyikun ɔ́si ɔƒɛni úsela ƒui! Ɔsia lɛni. ⁷ Bɛnu! Aanu-nwu ka ɔ́si kayaa ɔdubo na uyɔlɔ kemo! Ukyuli biala ɔdubo-nwu bɔnu ku bani ƒui nábla-nwu kalala. Kayawi bekyuli ƒui badubuwulo kɔnyana ku keku. Ɔsia lɛni. ⁸ Blɔti ɔni mbo ɔyikun ƒui mɔɔsu ɔnini, “Ami ndi kalɔ kesekɔ ku kawɔlɔkɔ. Ami nli, na lílie, na ndubo bulie uwi ɔni ndubo ƒui.” ⁹ Banwa, bɔdi bavinkpana ka buliku Yesu ɔsu. Na ami ku-mii ƒui bunye lɛbibo kenye kpakplaa na kayawi kamɛni kemo, na bɔɔdi Katɔ Ɔga Ɔma ala. Ńtaakɔ Katɔti litemi buni lɛni nkɛnku Yesu Kristo lɛlɔ lɛsa na ulu lɛlɔ. Nsu ka bekyuli balayɔ lɛni ɔsu ni, béti-mi bétése ntuntɛ kalɔ kani baalɔ Patmo. ¹⁰ Na limeyi lɛni lɛlɔ na baƒɔtaadine baasa teemwi Blɔti ni, Katɔti Kɔyu kɔ́ƒɔ-mi lɛlɔ kemo ƒui na línu ka lɛdi lɛdi lɛ́ku momoomo aani kakpɛɛ na lɛɛtɛmi na mina kama. ¹¹ Lɛdi lɛmmɔ lɛ́su lɛnini, “Nweni lɛla lɛni na ánu se na eti-ni esienku baƒɔtaadine akpa maatɛ na lɛma linengudi lɛdi kemo. Ani ndi Eƒeso ku Smirna ku Pergamo ku Tiatira ku Sardi ku Ƒiladelƒia ku Laodikea.” ¹² Amu ka lɛ́tu línwini nnii mɔɔnu ukyuli ɔni mɔɔtɛmiku-mi ni, lɛ́nu sika ugyiedi ligyii maatɛ lɛni lɛlɔ na asogya ɔɔsia. ¹³ Na ligyii lɛmmɔ akɔ ni, lɛla lɛdi linye aani ukyuli kalɛ. Na ɔkya awu gyɔlɔɔ ɔni néne útédu-nwu kanintɔ. Na sika ugyiedi kabuli káda kámana-nwu kayi. ¹⁴ Nwuna lili linwini lɛ́ƒuala aani unwo na úlieku etubanke. Na nwuna anumi aada aani ogya. ¹⁵ Na nwuna lɛgba lise aani lɛbuala lɛni bédie na ogya kemo, na lígyie na liikeye. Nwuna lɛdi lɛɛku aani ketu kani mɔɔgbá taasi taayu lɛtabi lɛni nákuku lɛdi lili ku kɔku bonwu. ¹⁶ Ukyuli ɔmmɔ ɔda ayabi maatɛ na nwuna kɔdianu. Na litemi geen lɛni nse aani kewii kani na bádɔ-ka lɛvi inyɔ lɛɛlɛ́-nwu kenye. Na nwuna anumi eekeye aani kalɛ na ɔƒɛ ɔɔbi. ¹⁷ Ka lɛ́nu-nwu ni, líbuli ńtáyu kalɔ aani ukpine na nwuna anumi. Nsu ukyuli ɔmɛni úti nwuna kɔdianu ɔ́sia-mi lɛlɔ na ɔ́su-mi ɔnini, “Sɔ tayia! Ami ndi Udeedi ku Ukplodi. ¹⁸ Ami ndi Ukyuli Ɔni Nli Ngba! Líkpi, nsu ɔƒɛni ni, nli ngba. Na nsɔ lɛɛɛdubo bukpi kudii. Mbo ɔyikun na kukpi ku kekpine lɛlɔ. ¹⁹ Anwuɔsu ala ani na ánu ku ala ani nkya ɔƒɛni ku ani ndubo bɔlɛ lɛnɔ ni, nweni-nya se. ²⁰ Ayabi maatɛ ani na ánu na mina kɔdianu ku sika ugyiedi ligyii lɛmmɔ enye ete lɛla lɛdi. Na ana kalɔ na ndubo budie mɛni. Ayabi maatɛ ammɔ ndi Katɔti batu maatɛ ute baƒɔtaadine akpa maatɛ ammɔ. Na sika ugyiedi ligyii lɛmmɔ ndi baƒɔtaadine akpa maatɛ ammɔ.”

¹ Amu na ɔ́su ami Yohane ɔnini, “Nweni ɔku te Eƒeso baƒɔtaadine lɛkpa ɔtu anii Ami Yesu nda ayabi maatɛ na mina kɔdianu na muusié teebo na sika ugyiedi ligyii maatɛ lɛni lɛlɔ na asogya ɔɔsia mmɔ ntɛ. Na ami mɔɔsu kenye kamɛni. ² Ngyi lɛla lɛni na bɛɛbla. Na ngyi kalɛ na binye kabla kammɔ lɛlɔ kpakplaa ku kalɛ na bɛ́kya ɔkplu. Ngyi ka biléte bekyuli bekpidi kuƒi ku kalɛ na bɛ́kɔku-ma bɛ́nu. Ama ndi bani mɔɔtɔ́lɔ bekyuli banii badi batalane, nsu baaadi batalane. Na bɛ́nu-ma bɛ́ti ka badi ɔkɔ banyine. ³ Ngyi ka binye lɛbibo lɛmmɔ kenye kpakplaa na bɛɛkya ɔkplu na ami ɔsu, na enu átaƒɛ-mii. ⁴ Nsu bɔƒiɔ bɔni muudie-mii lɛlɔ ndi ka bɛsɔ bilayɔ-mi aani kalɛ na bítaayɔ-mi kudeedi. ⁵ Anwuɔsu bɛkali bina kenyekɔ kedeedi kani bínye asa na bíbuli bɛnu. Na binwini kama bɛkya bina ekpidi, na bitaabla lɛla lɛni na bítaabla kudeedi. Nsu si bítenwini kama bítakya bina ekpidi ni, ndububo-mii kudɔ na mbada bina sika ugyiedi ugyii ku nwuna asogya ɔmmɔ lɛgyu nwuna kenyekɔ. ⁶ Nsu lɛla lɛni mɔɔda-mi kubiti na bina lɛlɔ ndi ka ala ani na bekyuli bani nsiaku Nikolatia kama baabla ni, biikisi-nya. Na ami lɛnɔ nkisi-nya. ⁷ Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ. Anwu ɔni madi ekpidi lɛlɔ ni, ndubute-nwu ulu na ɔdi ngba kugyii kɔni nnye Katɔti Paradiso kemo mmɔ ebi.” ⁸ Na ɔ́su-mi ɔnini, “Nweni te Smirna baƒɔtaadine lɛkpa ɔtu anii Ami Yesu ndi Udeedi ku Ukplodi. Na líkpi, nsu lɛ́sɔ lɛ́ta líbo nli ngba. Na ami mɔɔsu kenye kamɛni. ⁹ Ngyi ka biibó abi na bɛɛyaki ala. Nsu geen ni, bibo ala ƒui. Ngyi enyekpi ani na bekyuli bani mɔɔlɔ lɛlɔ banii Yudaƒuɔ básu básiku-mii lɛlɔ. Nsu ni, baaasiaku Katɔti. Mmomu badi kasala kani ndi Satan badi. ¹⁰ Bitayia lɛbibo biala lɛni mebo-mii lɛlɔ. Bise atu na binu! Ukisine ɔmmɔ ɔdubo bina akɔ badi bukpoku bɔnu na ɔya na bakya-mii ɔtɔ na bekpoku-mii emeyi leevu. Ɔlɛka bɛbla ala ulu lɛlɔ bite-mi si ina úbo úte ka bikpi muedi. Na ami ndubuti ngba bɔni nsɔ naaadubo bɔsa kudii lɛƒɔ-mii kayu. ¹¹ Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ. Anwu ɔni madi ekpidi lɛlɔ ni, uleduo kukpi kunyɔdi ɔgbankpi kemo.” ¹² Na ɔ́su-mi ɔnini, “Nweni ɔku te Pergamo baƒɔtaadine lɛkpa ɔtu anii Ami Yesu mbo kewii kani bádɔ-ka lɛvi inyɔ mmɔ. Na ami mɔɔsu kenye kamɛni. ¹³ Ngyi ka ɔma ɔni na bilie ndi likpo lɛni na Satan úse nwuna lɛga kadikɔ. Bɛ́siaku-mi kama kpakplaa. Na bítedie bina bɔƒɔtaadi atu na mina lɛlɔ ina uwi ɔni na bádu Antipa ɔni lɛnɔ nédie-mi litemi kenye ulu lɛlɔ na likpo lɛni na Satan ulie mmɔ. ¹⁴ Nsu alakpa alɛɛ adi ábala-mii. Bibo bekyuli badi na bina akɔ mmɔ bani mɔɔsiaku Bileam ala bɔtina kama. Ukyuli ɔmɛni nátina Balak kalɛ na ɔtɔlɔ Israelƒuɔ. Na ɔ́kpanku-ma útákya likpidi kemo. Baadi adila ani na béti bákpa béte baƒiɔ, na bábla lɛyalɛ ala. ¹⁵ Lɛni kani bibo bekyuli badi na mmɔ bani mɔɔsiaku Nikolatia ala bɔtina kama. ¹⁶ Binwini kama bɛkya bina ekpidi! Na si ɔɔɔdi lɛni ni, ami ndubo-mii kudɔ uwi klukui ku litemi geen lɛni mɔɔtu aani kewii kani mɔɔlɛ́-mi kenye na mbekpoku bekyuli bani nsiaku ala bɔtina bɔmmɔ kama. ¹⁷ Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ. Anwu ɔni madi ekpidi lɛlɔ ni, ndubo-nwu adila ani na Katɔti ɔ́bala úse adi bute. Na ndubute-nwu lɛtabi lɛƒualadi lɛdi lɛnɔ lɛni lɛlɔ na bénweni lɛnyi lɛwɔdi básia lɛni na ukyuli ɔmmɔ kani ndubɔti-ni.” ¹⁸ “Nweni ɔku te Tiatira baƒɔtaadine lɛkpa ɔtu anii Ami Yesu ndi Katɔti Ubidi. Na mina anumi aada aani ogya na mina lɛgba liikeye aani lɛbuala lɛni bákya ogya na lígyie. Ami mɔɔsu kenye kamɛni. ¹⁹ Ngyi lɛla lɛni na bɛɛbla. Na ngyi kalɛ na bɛɛyɔ́-mi na bɛɛƒɔ́-mi taadi ku kalɛ na bɛɛbla-mi kabla na binye lɛbibo kenye kpakplaa. Na ngyi ka kabla kabuni kani bɛɛbla ɔƒɛni ketulo kalɛ na bítaabla kudeedi. ²⁰ Nsu bɔƒiɔ bɔni muudie-mii ndi ka biite uleku Isebel ɔni mɔɔlɔ lɛlɔ ɔnii Katɔti kenye udiene kuƒi. Nsu uleku ɔmmɔ ala ani na ɔɔtina aayá na mina kabla bablane bayii ulu na baabla lɛyalɛ ala, na baadi adila ani na béti bákpa béte baƒiɔ. ²¹ Líte-nwu uwi ɔni na uti ɔvumana na ɔda ekpidi bɔbla ɔya, nsu ulenu kalɔ. ²² Anwuɔsu ndubɔya na ɔlɛ ubo-nwu ɔva lɛtala lɛlɔ. Na bani na anwu ku-ma badi kɔsɔnɔ badububo abi geen, amu ntu bada-nwu kama bɔsiaku báya. ²³ Lɛnɔ ni, ndubo uleku ɔmɛni basɔnɔbi ƒui bɔdu. Na mmɔ ni, baƒɔtaadine lɛkpa lɛmmɔ ƒui badubɔti ka ami ndi ukyuli ɔni ngyi ukyuli biala kayi ku lili kemo. Ndubo bina akɔ ɔdi biala kayu bɔƒɔ na lɛla lɛni na ɔ́bla kenye. ²⁴ Nsu amii bakladi bani nkya Tiatira na bɛɛɛsiaku nwuna ala bɔtina kama na bítatɛya Satan ala abɛdi ani baasu ka ana kemo ágyu mmɔ ni, mɔɔsu-mii ka nsɔ lɛɛɛdubo etila abambadi adi buti bɔsia-mii lɛlɔ. ²⁵ Nsu biƒie bɔƒɔtaadi bɔni na bibo bɛda kpakplaa úti útédu uwi ɔni na mebo. ²⁶ - ²⁷ Na ukyuli ɔni madi ekpidi lɛlɔ na wenye kpakplaa wetédu kawɔlɔkɔ ni, ndubute-nwu ɔyikun aani kalɛ na lɛ́ƒɔ lɛ́siku mina Ɔti kudɔ na ɔdubɔdi kadi ƒui lɛlɔ. Bénweni bése banii, ’Ɔdubɔdi-ma lɛlɔ ku ɔyikun kpakplaa na ɔbwɛ-ma uwi kalɔ kpɛtɛ kpɛtɛ aani ebwi kalɛ.’ ²⁸ Ndubute-nwu bukeye aani ɔtanta lɛyabi lɛnɔ. ²⁹ Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.”

¹ Ɔ́sɔ ɔ́su-mi ɔnini, “Nweni te Sardi baƒɔtaadine lɛkpa ɔtu anii Lɛni na ukyuli ɔni mɔɔdi ayu maatɛ ani mɔɔbla Katɔti kabla na nwuna lɛga boku anumi lɛlɔ na ɔda ayabi maatɛ ammɔ na nwuna kɔdianu ɔɔsu. ² Ngyi kalɛ na bɛɛbla bina kabla, na ngyi lɛnɔ ka bekyuli baanu-mii ka bili ngba, nsu bíkpi na kɔyu kemo! Anwuɔsu bɛgyinya na bɛkya lɛla lɛni nébu lise-mii ogya kalɛ na bilekpi ƒui! Ɔsika lɛ́nu ka lɛla lɛni na bɛɛbla ni, lítedu tɔ lítawɔlɔ na Katɔti anumi. ³ Ɔmɛni ɔsu ni, binyimo lɛla lɛni na bátina-mii na bínu lɛnɔ, na bɛda-ni kaduɛ na bina ekpidi eduo-mii na binwini kama bɛkya-nya. Nsu si bítagyinya ni, ndubo-mii kudɔ aani uyune kalɛ na biláti uwi ɔni kemo na meti mada malɛ-ɔ lɛlɔ. ⁴ Nsu bibo nkyuli ɛlɛɛ badi na Sardi mmɔ bani nétebile bana adala. Na ami ku-ma bɔdubɔda ala aƒualadi na bɔkɛ butaavi, ɔsika bámanku ka babla lɛni. ⁵ Ukyuli ɔni madi ekpidi lɛlɔ ni, ɔdubɔda ala aƒuala aani bana kalɛ. Na lɛɛɛdubo-ma anyi bɔda budie ngba ɔku kemo. Na ndubudie-ma kenye na mina Ɔti ku Katɔti batu ƒui anumi ka badi ami badi. ⁶ Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.” ⁷ Ɔmmɔ kama ni, ɔ́su-mi ɔnini, “Nweni te Ƒiladelƒia baƒɔtaadine lɛkpa ɔtu anii Lɛni na anwu ɔni nse kedee na nwuna litemi lɛdi litemi geen ɔɔsu. Anwu nda Ɔga Dawid ɔyikun ɔni na si ɔ́lɛmi kayakun kadi ni, ɔdi ɔsɔ ulakana-ka bɔkalɛ. Na si ɔ́kalɛ-ka ni, ɔdi ulakana-ka bɔlɛmi. ⁸ Ngyi kalɛ na bɛɛbla bina kabla na ngyi ka bibo ɔyikun blii ɔdi. Bɛ́siaku mina ala bɔtina kama na bɛ́di mina etemila lɛnɔ lɛlɔ ulu lɛlɔ. Lɛ́lɛmi kayakun kadi líte-mii na bina anumi na ukyuli biala ulakana-ka bɔkalɛ. ⁹ Bɛnu! Ɔkɔ banyine bani násala bewi Satan ku nwuna badi kasalakɔ ngye na baalɔ-ma Yudaƒuɔ nsu baaadi Yudaƒuɔ ni, ndubɔya na balɛ akɔnkɔ na ƒula lɛgba akɔ. Na bana ƒui badubɔsu banii mɔɔyɔ́-ɔ. ¹⁰ Na ka bɛ́di mina ɔda ɔni na líbo-mii lɛlɔ na bínye kpakplaa na bɛ́siaku ala ani ƒui muukpóku-mii ɔsu ni, ndubɔda-mii lidie lɛbibo lɛni mebo kayawi ƒui lɛlɔ na lɛkɔku bekyuli bani ƒui nlie kalɔ lɛlɔ lɛnu kemo. ¹¹ Ndubo uwi klukui kemo. Anwuɔsu bɛda lɛla lɛni nse-mii kaduɛ kalɛ na ukyuli ɔdi uláƒɔ bina lɛyuƒɔla ulásiku-mii enu kemo. ¹² Ndubo ukyuli ɔni madi lɛlɔ bɔbla aani lɛkpa na mina Katɔti kakpakɔ ɔni na lɛsɔ lilágyu mmɔ kudii. Ndubo mina Katɔti lɛnyi ku nwuna ɔma kedee ɔmmɔ lɛnyi bunweni bɔsia-nwu lɛlɔ. Na ɔdi Yerusalem ɔwɔdi ɔni mayu masi katɔ na Katɔti kudɔ. Na ndubo ami ɔlati lɛnyi lɛwɔdi lɛnɔ bunweni bɔsia-nwu lɛlɔ. ¹³ Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.” ¹⁴ Na ɔ́sɔ ɔ́su-mi ɔnini, “Nweni te Laodikea baƒɔtaadine ɔtu anii Lɛni na anwu ɔni mɔɔyá na lɛla biala lɛɛsia lɛni ɔɔsu. Na ɔdi Katɔti kenye udiene geen ɔni mɔɔbla ala ulu lɛlɔ, na anwu mɔɔdi Katɔti ala ani ƒui na údie lɛlɔ. ¹⁵ Ngyi lɛla lɛni na bɛ́bla na ngyi ka bítaba na bítaƒɔ ogya lɛnɔ. Nsu nka mɔɔyɔ́ si bɛ́ƒuna linwi. ¹⁶ Nsu ka buse kani na bise guguugu na bítaba iye bítaƒɔ ogya lɛnɔ ɔsu ni, ndubo-mii butuo bɔlɛku mina kenye kemo! ¹⁷ Bɛɛsu bɛnii, ’Mbo ala na ɔdianku-mi, na mbo ala ani ƒui na mɔɔwia.’ Nsu bɛɛɛgyi bɛnii biisé lɛlɔ na bina lɛlɔ libo kɔnyana, na biiibo lɛla lɛdi, na anumi ábwɛ-mii, na bɛkɛ kasɔngya. ¹⁸ Anwuɔsu mɔɔlɛ-mii kpakplaa nnii bibo na bibeye sika ugyiedi ɔni bábla kede kede na ogya kemo na mina kudɔ na binwini balakɛne. Na bibeye adiƒuala ani na binyimi na bekyuli basɔ balanu bina kasɔngya ku kɔƒa. Na biye kuvo bɛkya anumi na bitaanu kaduɛ. ¹⁹ Bekyuli bani na mɔɔyɔ́ ni, ama na mɔɔdɔnku na mɔɔní-ma kɔtu. Anwuɔsu bɛsia lɛlɔ anu kpakplaa na binwini kama bɛkya bina ekpidi. ²⁰ Binu! Nnye kayakun muubó kɔnu. Na si ukyuli ɔdi únu-mi lɛdi na ɔ́lɛmi úte-mi ni, ndubuduo-nwu kudɔ na ami ku-nwu bɔsala bɔdi. ²¹ Anwu ɔni madi ekpidi lɛlɔ ni, ndubute-nwu kuƒi na ulie-mi kudɔ na lɛgaboku lɛlɔ aani kalɛ na lɛ́di lɛlɔ na nli mina Ɔti kudɔ na lɛgaboku lɛlɔ. ²² Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.”

¹ Ɔmɛni kama ni, Katɔti údie kɔyu kemo ala adi ɔ́tina-mi. Na lɛ́nu kayakun kadi ka bálɛmi-ka na katɔ. Amu na lɛdi lɛni na lɛ́ka bunu aani kakpɛɛ ni, línu ka lɛsɔ lɛɛtɛmiku-mi lɛnini, “Bo katɔ kakɛ mɛni na lɛtina-a lɛla lɛni ndubo bɔlɛ na ɔmɛni kama.” ² Kɔnakunwi ni, Kɔyu kɔmmɔ kúti-mi kɔ́kɔliku katɔ. Ka mɔɔnu ni, lɛgaboku lɛdi lise na Katɔti ulie liboku lɛmmɔ lɛlɔ. ³ Na uukeye kede kede! Na bukeye bɔmmɔ buse aani aseebi egyiedi ku aƒualadi ani náƒɔ kuye. Na bukeye bonwu bɔdi bɔ́ka bɔ́mana lɛgaboku lɛmmɔ ƒui aani evete awɔdi bukeye. ⁴ Na agaboku aavlanyɔ-ene áka ámana lɛgaboku lɛmɛni. Na benengu aavlanyɔ-ine lɛnɔ belie-nya lɛlɔ. Na bebi adiƒuala lɛlɔ, na sika ugyiedi kɔgabwa kubi-ma eli. ⁵ Na ogya ɔɔbwɛ ku bukeye geen taasi lɛgaboku lɛmmɔ kudɔ! Na muunú adi adi ku ɔnantu budu kɔku na mmɔ. Na lɛgaboku lɛmmɔ anumi ni, lɛsogya maatɛ lɛɛda. Na ani ndi Katɔti Kɔyu kɔni mbo ɔyikun maatɛ ɔni nnye Katɔti lɛgaboku anumi. ⁶ Na kesii kani na lɛgaboku lɛmmɔ lɛlɛ anumi ni, ɔdi kalɔ kani nwi aani ɛpu na use kede kede aani kanu. Na lɛgaboku lɛmɛni amadɔ ni, ngba batu ine badi udu benye lɛƒɛnyi lɛna ƒui. Na anumi áka ámana-ma lɛlɔ lɛtɔtɔ ku kama ƒui. ⁷ Ngba ɔtu udeedi ɔ́lɛ gyata. Na unyɔdi ɔ́lɛ akɔ. Na ɔtɛdi ɔ́lɛ ukyuli. Na unedi ɔ́lɛ kɔdigbo aasɛ ɔni muuveyi. ⁸ Na ngba batu ine bamɛni ƒui bebo avwi aku aku, na anumi akya avwi amɛni kemo ku kama. Usien ku ɔƒɛ ni, baláda bɔsu taaya banini, “Kedee, kedee, kedee ndi Blɔti ɔni mbo ɔyikun ƒui, ɔni nélie, na uli, na ɔdubo bulie.” ⁹ Ngba batu bammɔ beeti bumwi ku ɔbu ku linugya teete anwu ɔni nlie lɛgaboku lɛmmɔ lɛlɔ na uli ngba úsela ƒui. Na uwi biala na baabla lɛni ni, ¹⁰ benengu aavlanyɔ-ine bammɔ beebimi bana kɔgabwa taava-nwu anumi, na baayu teebi kalɔ. Na beemwi anwu ɔni nli ngba úsela ƒui, na baasu banini, ¹¹ “Blɔti ku bula Katɔti! Awɔ námanku éte bumwi ku ɔbu ku ɔyikun. Ɔsika awɔ nédie ala ani ƒui, na áya na ana ƒui eli ngba na ƒula lɛƒɔyɔ kenye.”

¹ Amu na lɛ́nu ka anwu ɔni nlie lɛgaboku lɛmmɔ lɛlɔ ɔda kakunkɛ kadi na nwuna kɔdianu, na bénweni ala ani ndubo abalɛ básia-ka anumi ku kama. Na báƒɛ-ka, na béti kɔma bábala-nwu kenye ekpo maatɛ kalɛ na ukyuli keeke ulakana bubimi. ² Mmɔ ni, lɛ́nu Katɔti ɔtu ɔyikune ɔdi ɔni násu ku lɛdi momoomo ɔnini, “Ɔma námanku ka ɔmami kɔma kɔmɛni na ɔƒɛnimi kakunkɛ kammɔ?” ³ Nsu ukyuli ɔdi uuubo katɔ iye kalɔ lɛlɔ iye kekpine muedi ɔni makana kakunkɛ kamɛni bɔƒɛnimi na wanu ɔku ɔmmɔ kemo. ⁴ Mmɔ ni, líwulo geen ɔsika bátakana ukyuli ɔdi bɔkɛ na ɔkana ɔku ɔmɛni bɔƒɛnimi bɔka. ⁵ Amu na benengu bammɔ akɔ unwi ɔ́su-mi ɔnini, “Sɔ tewulo. Nu! Yesu ɔni baalɔ banii Gyata ɔni nási Yuda kaba kemo na ɔdi Dawid Kugyii Ugyiitu ni, ɔ́di lɛlɔ. Anwu námanku ka ɔƒɛnimi kɔma kɔni na béti bábala ekpo maatɛ ammɔ.” ⁶ Ɔmmɔ kama ni, lɛ́nu ka Katɔti Koƒonu Ubi ɔdi unye agaboku ammɔ lɛlɔ. Na ngba batu ine bammɔ ku benengu aavlanyɔ-ine bammɔ báka bámana-nwu. Na ɔɔtina aani si bɔkpa na béti-nwu bákpa. Ese maatɛ alɛ Koƒonu Ubi ɔmmɔ lili, na ubo anumi maatɛ. Na alakpa maatɛ amɛni adi Katɔti Kɔyu kɔni mbo ɔyikun maatɛ kɔni na Katɔti ɔ́tala ɔ́kya kayawi ƒui. ⁷ Koƒonu Ubi ɔmmɔ úsie na útáƒɔ kakunkɛ kammɔ ɔ́siku anwu ɔni nlie lɛgaboku lɛmmɔ lɛlɔ kɔnu kemo. ⁸ Na uwi ɔni na Koƒonu Ubi ɔmɛni ɔɔƒɔ́ kakunkɛ kamɛni ni, ngba batu ine bammɔ ku benengu aavlanyɔ-ine bammɔ báyu bébi kalɔ na Koƒonu Ubi ɔmmɔ anumi. Ɔdi biala ɔda agyala ani béti kɔbuli bábla na baagyá taatu lɛnu. Na ɔdi biala ɔda sika ugyiedi kɔlaku kɔni néyi ku oloƒui. Na oloƒui ɔmɛni unye ute Katɔti bekyuli katɔ bɔkpali. ⁹ Bédie ɔnu ɔwɔdi ɔdi banini, “Awɔ námanku ka aƒɔ kakunkɛ kammɔ na amami kɔma kɔmmɔ. Ɔsika awɔ na bádu. Na ɔkɛnku ƒula ubugya akpala ɔsu ni, áƒɔ bekyuli lili kayu, na ásɔku-ma éte Katɔti. Awɔ náƒɔ-ma ásiku kadi ƒui bekyuli ku adi lidu biala batɛmine ku bekyuli lidu ƒui akɔ na kalɔ biala lɛlɔ. ¹⁰ Awɔ nábla-ma bénwini baga ku bakpane bani mɔɔkpanku bekyuli teeboku bula Katɔti. Na badubɔdi lɛga na kalɔ lɛlɔ.” ¹¹ Ka lɛ́sɔ lɛ́nu ni, lɛ́nu katɔ batu mpimu ɛlɛ ɛlɛ ku mpimu leevu akpa leevu alɛ alɛ ka bénye bámana lɛgaboku lɛmmɔ ku ngba batu ine ku benengu bammɔ. ¹² Na katɔ batu bamɛni bédie ɔnu ku lɛdi momoomo banini, “Awɔ ndi Koƒonu Ubi ɔni na béti bákpa. Na ámanku éte ɔyikun ku lɛlakɛ ku lɛnunda ku ɔlɔkplu ku ɔbu ku bumwi ku linugya.” ¹³ Na línu ka ala ani ƒui na Katɔti údie na katɔ ku kalɔ ku kekpine ku ɛpu ku kayawi beedie ɔnu banini, “Linugya ku ɔbu ku bumwi ku ɔyikun na beete anwu ɔni nlie lɛgaboku lɛlɔ ku Koƒonu Ubi ka ɔ́si ɔƒɛni úsela ƒui.” ¹⁴ Amu na ngba batu ine bammɔ bédie kenye banini, “Ɔsia lɛni.” Na benengu bammɔ báyu bébi kalɔ na beemwi-nwu.

¹ Amu na lɛ́nu ka Koƒonu Ubi ɔmmɔ ɔ́mami kɔma kɔni nda kakunkɛ kani mɔɔtina ala ani ndubo abalɛ mmɔ ekpo maatɛ ammɔ akɔ unwi. Na línu ka ngba batu bammɔ akɔ unwi ɔ́su ku lɛdi momoomo lɛni náku aani ɔnantu budu ɔnini, “Bo!” ² Na lɛ́nu ɔpɔnkɔ ɔƒualadi ɔdi ka unye. Ukyuli ɔni nlie ɔpɔnkɔ ɔmmɔ lɛlɔ ɔ́da kantaminta na béti kagabwa kadi béte-nwu. Ukyuli ɔmɛni ulie ɔpɔnkɔ ɔmmɔ lɛlɔ aani ukpone lɛlɔ ɔdine ɔni nésela utádi lɛlɔ. ³ Na ɔmmɔ kama ni, Koƒonu Ubi ɔmmɔ ɔ́mami kɔma likpo linyɔdi na línu ka ngba batu bammɔ akɔ unyɔdi ɔ́su ɔnini, “Bo!” ⁴ Mmɔ na ɔpɔnkɔ ɔbambadi ɔni négyie aani ogya kalɛ ɔ́da ɔ́lɛ. Na Katɔti úti ɔyikun úte ukyuli ɔni nlie ɔpɔnkɔ ɔmɛni lɛlɔ ɔnii uti kekpo uboku kalɔ lɛlɔ ƒui kalɛ na bekyuli badu lɛlɔ. Na úte-nwu kewii bonwu kadi. ⁵ Ɔmɛni kama ni, Koƒonu Ubi ɔmmɔ ɔ́mami kɔma likpo lɛtɛdi. Mmɔ ni, línu ka ngba batu bammɔ akɔ ɔtɛdi ɔ́su ɔnini, “Bo!” Na ka mɔɔnu ni, lɛ́nu ɔpɔnkɔ totonto ɔdi ka unye. Na ukyuli ɔni nlie ɔpɔnkɔ ɔmmɔ lɛlɔ ɔda kakpagyuɛ kani na baakɔ́ku ala unu taanu. ⁶ Línu ka kɔku kɔdi kɔ́si ngba batu ine bammɔ kudɔ aani ukyuli butemi, na lɛdi lɛmmɔ lɛ́su lɛnini, “Ya na kamu kalaku kenwi kuye kɔkɔ kutédu limeyi lɛyuƒɔla, na antabi kɔlaku ɛtɛ kuye lɛnɔ kɔkɔ kutédu limeyi lɛyuƒɔla. Nsu tavumana inɔ iye ntɛ bɔmmɔ kuye!” ⁷ Amu na Koƒonu Ubi ɔmmɔ ɔ́mami kɔma likpo linedi. Na línu ka ngba batu bammɔ akɔ unedi ɔ́su ɔnini, “Bo!” ⁸ Na mmɔ ni, lɛ́nu ka ɔpɔnkɔ ƒuƒuu ɔdi unye aani ɔlɛne. Na básia ukyuli ɔni nlie-nwu lɛlɔ lɛnyi banii Kukpi. Na ukyuli bamba ɔkpɛ-nwu kama ɔni baalɔ Kekpine. Béte-ma ɔyikun ka badu kalɔ lɛkpa linedi bekyuli ƒui. Na kekpo ku kɔka ku ɔlɛ ku beƒiebuo ndubɔdu-ma. ⁹ Amu na Koƒonu Ubi ɔmmɔ ɔ́mami likpo lɛlɔndi. Na lɛ́nu ayu adi na katɔ ka enye lɛbi lɛni lɛlɔ na baakpá mmɔ kalɔ. Badi bekyuli bani ƒui na bádu ayu ka básu Katɔti litemi buni ɔsu. Ama ndi bani nédie ala ammɔ kenye na ulu lɛlɔ. ¹⁰ Ayu amɛni áva ku lɛdi momoomo anini, “Blɔti, ala ƒui lɛlɔ ɔdine, awɔ nse kedee na ƒula etemila lɛnɔ adi litemi geen. Uwi ɛlɛ sɔɔn na adubunye etédu asa na bekyuli bani nádu-bu na kalɔ kamɛni lɛlɔ ni, atɛku-ma litemi na ani-ma kɔtu?” ¹¹ Mmɔ na úte bekyuli bamɛni ɔdi biala awu ɔƒualadi, na ɔ́su-ma ɔnii bakɛ kayi betédu uwi ɔni na kayawi bekyuli bádu bana kabla bablane bakpana bammɔ aani kalɛ na bádu ama lɛnɔ. Ɔsika bana bumomo bútedu bútawɔlɔ tɔ. ¹² Ɔmɛni kama ni, lɛ́nu ka Koƒonu Ubi ɔmmɔ ɔ́mami kɔma likpo lɛkundi. Na kayawi kemodi kákunku kpakplaa, na ɔƒɛ ɔ́da bukeye ɔ́ya, na ala ƒui ábla suu. Na kɔbuli kumodi kɔmmɔ kɔ́vumana kɔ́bla aani ubugya. ¹³ Ayabi ánu ébo kalɔ aani kalɛ na kugyii ebi aanú na ɔƒɛƒɛɛ kpakplaa kemo. ¹⁴ Kayaa káyii aani kalɛ na baaƒɛ ebuo ɔku. Na bágyu abi ku ntuntɛ kalɔ ƒui na ana kenyekɔ. ¹⁵ Amu na kalɔ lɛlɔ baga ƒui ku bekyuli bani mbo kenyekɔ ku bekpone batɔnkune ku balakɛne ku bayikune ku bekyuli bamba lidu ƒui bani mɔɔbla bekyuli bamba kabla ku bani mɔɔbla ama alati kabla ƒui bábala lɛlɔ na libu ku atakpɛ kalɔ na abi lɛlɔ. ¹⁶ Bákpali abi ku atakpɛ ammɔ banii, “Bibo na bibebi-bu lɛlɔ na bɛbala-bu kalɛ na anwu ɔni nlie lɛgaboku lɛmmɔ lɛlɔ ulanu-bu, na Koƒonu Ubi ɔmmɔ uláni-bu kɔtu! ¹⁷ Ɔsika Katɔti ku Koƒonu Ubi ɔmmɔ kɔnyi kpakplaa limeyi lídu! Na ɔma makana kɔnyi kɔmmɔ kenye bunye?”

¹ Na ɔmɛni kama ni, lɛ́nu Katɔti batu ine badi ka benye kayawi ekpo ene ammɔ. Na bada ɔƒɛƒɛɛ ɔni muukpó taasi ekpo ene ammɔ ƒui kenye, kalɛ na ɔƒɛƒɛɛ biala ulékpo na kalɔ lɛlɔ iye ɛpu anumi iye na egyii akɔ. ² Katɔti úte-ma ɔyikun ka babla kalɔ ku ɛpu kalala na beti bani bekyuli kɔtu. Nsu lɛ́nu Katɔti ɔtu ɔbambadi ɔdi ka ɔ́si ɔƒɛ katukɔ ɔdubo na ɔda lɛla lɛni na Katɔti ɔni nli ngba ɔdubuti use bekyuli likpo. Na ɔtu ɔmmɔ ɔ́kpali batu ine ku lɛdi momoomo, ³ na ɔ́su-ma ɔnini, “Bitabla kalɔ iye ɛpu iye egyii adi kalala weti wetédu lebo lɛni na búse Katɔti kabla bablane likpo ku likposela lɛmɛni na bana atɛntɛ.” ⁴ Na básu-mi ka bekyuli bani na béti Katɔti likposela lɛmmɔ bése-ma likpo na bana atɛntɛ bumomo bɔdubɔbla aani bekyuli mpimu eti anyɔ ku aavlene-ine. Na bekyuli bammɔ bási Israel kaba leevu-inyɔ kammɔ kemo. ⁵ Nkyuli mpimu leevu inyɔ bási Yuda kaba kemo. Na mpimu leevu-inyɔ bási Ruben kaba kemo. Na mpimu leevu-inyɔ bási Gad kaba kemo. ⁶ Na mpimu leevu-inyɔ bási Aser kaba kemo. Na mpimu leevu-inyɔ bási Naƒtali kaba kemo. Na mpimu leevu-inyɔ bási Manase kaba kemo. ⁷ Na mpimu leevu-inyɔ bási Simeon kaba kemo. Na mpimu leevu-inyɔ bási Lewi kaba kemo. Na mpimu leevu-inyɔ bási Isakar kaba kemo. ⁸ Na mpimu leevu-inyɔ bási Sebulon kaba kemo. Na mpimu leevu-inyɔ bási Yoseƒ kaba kemo. Na nkyuli mpimu leevu-inyɔ na bése likpo na Benyamin kaba lɛnɔ kemo. ⁹ Na ɔmɛni kama ni, lɛ́nu ka bekyuli pii badi benye mmɔ bani na ukyuli ɔdi ulakana bɔka! Bekyuli bamɛni bási kalɔ biala kemo ku kadi biala akɔ ku bekyuli lidu lidu ƒui akɔ ku adi lidu biala kemo ka bénye lɛgaboku lɛmmɔ ku Koƒonu Ubi ɔmmɔ anumi, na bákya lɛwu lɛƒualadi na bada like. ¹⁰ Na básu ku lɛdi momoomo banini, “Ngba bɔƒɔ bɔɔsí bula Katɔti ɔni nlie lɛgaboku lɛlɔ ku Koƒonu Ubi ɔmmɔ kudɔ.” ¹¹ Batu ƒui benye báka bámana lɛgaboku ku benengu ku ngba batu ine bani nnye mmɔ. ¹² Na báyu bébi kalɔ na lɛgaboku lɛmmɔ anumi na beemwi Katɔti, na baasu banini, “Ɔsia lɛni! Bula Katɔti uukeye, na ubo lɛnunda ku ɔbu ku kenyekɔ ku ɔyikun, na ɔ́manku bumwi ku linugya ɔ́si ɔƒɛni úsela ƒui! Ɔsia lɛni.” ¹³ Amu na benengu bammɔ akɔ unwi úye-mi ɔnini, “Ɔma bene ndi bekyuli bani nkya lɛwu lɛƒualadi mɛni lɛni? Na wɛ na bási?” ¹⁴ Amu na lɛ́su-nwu nnini, “Ati, lɛɛɛgyi-ma. Awɔ ngyi bekyuli bamɛni.” Amu na ɔ́su-mi ɔnini, “Bekyuli bamɛni ndi bani nénye lɛbibo bonwu lɛmmɔ kenye, na bálɛ-nwu kemo. Bábla sɛɛn na Koƒonu Ubi ɔmmɔ ubugya ɔsu, aani kalɛ na baaƒɔ lɛwu na lɛɛƒuala. ¹⁵ Anwuɔsu na “benye Katɔti lɛgaboku lɛmmɔ anumi na baabla-nwu kabla usien ku ɔƒɛ na nwuna kakpakɔ. Ka anwu ɔni nlie lɛgaboku lɛmmɔ lɛlɔ ɔkya-ma akɔ ɔsu ni, ɔdubo-ma bɔgyumana. ¹⁶ Na kɔka iye utukwɛ ɔsɔ uladu-ma kudii. Na ɔƒɛ iye liwulu lɛdi lɛsɔ lileƒi-ma. ¹⁷ Ɔsika Koƒonu Ubi ɔni nlie lɛgaboku lɛlɔ na mmɔ ni, anwu ndubɔda-ma aani baƒonu ɔdane buni. Na ɔdubo-ma bɔtɔnku busienku abiɔ ani kemo na ntu bɔni muute ngba buwi uwi biala. Na Katɔti lɛnɔ ɔdubo-ma imii buni.”

¹ Lebo lɛni na Koƒonu Ubi ɔmmɔ ɔ́mami kɔma likpo maatɛdi ni, katɔ mmɔ ƒui kábla diin, na ɔdubɔbla aani ɔdɔ bubo kakɛ kemo. ² Amu na lɛ́nu Katɔti batu maatɛ bani muunye Katɔti anumi, na úte-ma kɔkpɛɛ maatɛ. ³ Na Katɔti ɔtu ɔbambadi ɔ́da ɔ́lɛ ɔni nda sika ugyiedi libwi lɛni kemo na baakyula oloƒui, na úbenye lɛkpabi lɛmmɔ kudɔ. Béte-nwu oloƒui pii kalɛ na ɔkyula-nwu na sika ugyiedi lɛkpabi lɛni nnye lɛgaboku lɛmmɔ anumi lɛlɔ. Na oloƒui ɔmmɔ ku Katɔti bekyuli ƒui katɔ bɔkpali bɔbla akpala enwi. ⁴ Oloƒui ɔni mɔɔkywí mmɔ uyɔ ku Katɔti bekyuli bammɔ katɔ bɔkpali ƒui bɔ́kɔ búsie Katɔti kudɔ ɔ́si Katɔti ɔtu ɔmmɔ enu kemo. ⁵ Ɔmɛni kama ni, Katɔti ɔtu ɔmmɔ úti oloƒui libwi lɛmmɔ na úyile-ni ku ogya ɔni na údie na lɛbi lɛmmɔ lɛlɔ, na úbo éwi kalɔ lɛlɔ na kayawi. Mmɔ ni, línu ɔnantu budu kudu ku kɔku bonwu, na kayaa kaabwɛ ogya, na kalɔ kaakunku. ⁶ Amu na batu maatɛ bani nda kɔkpɛɛ maatɛ kɔmmɔ báklibi lɛlɔ kalɛ na bavwii bana kɔkpɛɛ. ⁷ Katɔti ɔtu udeedi ɔ́vwii nwuna kakpɛɛ. Mmɔ kani ni, etubanke ku ogya ɔni násalaku ubugya ɔ́bwɛ úbewi kalɔ lɛlɔ na kalɔ kemodi ku egyii lɛkpa lɛtɛdi lɛ́kywi. Nsu livo ƒui lɛ́kywi. ⁸ Ɔmɛni kama ni, Katɔti ɔtu unyɔdi lɛnɔ ɔ́vwii nwuna kakpɛɛ. Amu na úbo lɛla lɛni nálɛ aani kɔbi kɔni mɔɔda ku ogya útákya ɛpu kemo. Na ɛpu lɛkpa lɛtɛdi ƒui línwini ubugya. ⁹ Na ketu kemo bebweyi lɛkpa lɛtɛdi ƒui békpi. Na lɛkɔlɔ linengudi ƒui lɛkpa lɛtɛdi lɛ́kywi. ¹⁰ Katɔti ɔtu ɔtɛdi ɔ́vwii nwuna kakpɛɛ. Amu na lɛyabi bonwu lɛdi lɛni mɔɔda aani ogya lɛ́lɛ líbo lɛ́si kayaa na lɛ́yu ntukpa ƒui lɛkpa lɛtɛdi ku abiɔ ƒui lɛlɔ. ¹¹ Lɛyabi lɛmmɔ lɛnyi ndi Ɔdu Kati Kati. Ntu lɛkpa lɛtɛdi lɛmmɔ ƒui lɛ́yu ɔdu, na bekyuli pii badi békpi na ntu bɔmmɔ ɔdu ɔsu. ¹² Amu na ɔtu unedi ɔ́vwii nwuna kakpɛɛ. Na lɛla lɛdi lɛ́yila ɔƒɛ ku kɔbuli ku ayabi lɛkpa lɛtɛdi bukeye. Anwuɔsu usien ku ɔƒɛ limeyi lɛkpa lɛtɛdi lɛ́sɔ lítanu bukeye. ¹³ Amu ka nnye mɔɔnu budie bɔtina bɔmɛni ni, lɛ́nu kɔdigbo aasɛ ɔdi ɔni néveyi ɔkɛ kayaa kakaaka, na ɔ́su ku lɛdi momoomo ɔnini, “Si uwi ɔni na Katɔti batu ɛtɛ bani nébu mɛni bávwii bana kɔkpɛɛ ni, muute bekyuli bani ƒui nli kalɔ lɛlɔ bɔbwɛ, bɔbwɛ, bɔbwɛ kɔtɛ!”

¹ Amu na Katɔti ɔtu ɔlɔndi ɔ́vwii nwuna kakpɛɛ. Na lɛ́nu ɔtu ɔdi ka ɔ́nu ɔ́si katɔ aani lɛyabi úbayu kalɔ. Na Katɔti úte-nwu ɔyikun ɔni mɔɔbala kasuudikɔ ubu bonwu ɔmmɔ kenye. ² Ɔtu ɔmɛni ɔ́lɛmi ubu bonwu ɔmɛni na uyɔ ɔ́lɛ ubu ɔmmɔ kemo aani uyɔ ɔni mɔɔlɛ́ taasi lɛgyavonku bonwu lɛdi kemo. Na ɔƒɛ bukeye ku kayaa kábla suu na uyɔ ɔmmɔ ɔsu. ³ Baalɔlɔ bani muubile edula badi báyu bási uyɔ ɔmmɔ kemo bébo kalɔ, na Katɔti úte-ma ɔyikun aani ɔni na batamlukpa bebo kalɛ. ⁴ Na ɔ́su baalɔlɔ bammɔ ka batabla livete iye livo iye kugyii kɔdi kalala ntu bekyuli bani na Katɔti útese likpo na bana atɛntɛ. ⁵ Útete baalɔlɔ bammɔ ulu ka baya na ukyuli ɔdi ukpi, nsu babla-ma kalala na bebo abi na benu ɔlɛ abuli alɔ. Na ɔlɛ bunu ɔni nkya lɛbibo lɛmɛni kemo ni, buse aani kalɛ na katamlukpa kaata. ⁶ Ɔƒɛni na abuli alɔ ammɔ kemo ni, badubo kukpi bɔwia, nsu balákɛ-ku. Badubɔwia banii beekpi, nsu kukpi kɔdubo-ma bukeli. ⁷ Baalɔlɔ bammɔ bɔnu buse aani bapɔnkɔ bani nnye kagyumana bete kekpo. Na kɔbwa kɔni nálɛ sika ugyiedi kɔgabwa kubi-ma eli. Na bana anumi álɛ bekyuli anumi. ⁸ Bana lili linwini lise gyɔlɔɔ, na bana kenye kemo anyi ese aani gyata anyi. ⁹ Na béti ala ani nse aani abuala lɛwu lɛni mɔɔgyumana kayi bákya. Na kɔku kɔni na bana avwi aabla ni, aaku aani kɛɛkɛ pii ɔni bapɔnkɔ báni béselaku kekpokɔ. ¹⁰ Baalɔlɔ bamɛni bebo lɛka ku akplɛ aani batamlukpa kalɛ na bana lɛka lɛmɛni kemo, na bebo ɔyikun ɔni na badubo buti bɔbla bekyuli kalala abuli alɔ. ¹¹ Bebo ɔga ɔni ndi ɔtu ɔni mɔɔnu kasuudikɔ ubu bonwu ɔmmɔ lɛlɔ. Ɔtu ɔmmɔ lɛnyi na Hebri lɛdi kemo ndi Abadon. Na Griki lɛdi kemo ni, nwuna lɛnyi ndi Apolion ɔni kalɔ ndi Ɔkyulane. ¹² Bɔbwɛ lɛla lideedi lɛ́vi. Na alakpa anyɔ ani ndanku bɔbwɛ inyɔ bɔni nébu ni, adubo bɔlɛ. ¹³ Amu na Katɔti ɔtu ɔkundi ɔ́vwii nwuna kakpɛɛ. Na línu lɛdi lɛdi ka lɛ́si sika ugyiedi lɛbi lɛni nnye Katɔti anumi ekpo ene ammɔ lɛlɔ lɛdubo. ¹⁴ Lɛdi lɛmmɔ lɛ́su Katɔti ɔtu ɔkundi ɔmmɔ ɔnini, “Táƒɛnimi batu ine bani na bényimi bése Euƒrate ketu bonwu kudɔ!” ¹⁵ Amu na báƒɛnimi batu ine bamɛni bani na bényimi-ma bése mmɔ bete ka báƒɛnimi-ma na ɔdɔ ɔmɛni lɛlɔ na limeyi lɛmɛni kemo na kɔbuli kɔmɛni kemo na lɛkwa lɛmɛni tutuutu kemo kalɛ na badu bayawine ƒui lɛkpa lɛtɛdi. ¹⁶ - ¹⁷ Ɔƒɛni na lɛla lɛni bédie bátina-mi mɛni kemo ni, lɛ́nu bekpone pii bani nlie bapɔnkɔ lɛlɔ bésela kekpokɔ. Na básu-mi bana bumomo ɔni ndi bekyuli bɔka etili eti ene. Na abuala lɛwu lɛni mɔɔgyumana-ma kayi mmɔ égyie aani ogya, na eekeye aani ɛpu ku ogya atabi. Bapɔnkɔ bammɔ eli ese aani bagyata eli, na ogya ku uyɔ ku agyakpabi aalɛ́ taasi-ma inye kemo. ¹⁸ Na alakpa atɛ ani ndanku kukpi na ási bapɔnkɔ bamɛni inye kemo ɔsu ni, bekyuli lɛkpa lɛtɛdi sɔɔn békpi. ¹⁹ Ɔsika bapɔnkɔ bammɔ ɔyikun ɔkya bana inye ku lɛka kemo. Bana lɛka libo eli aani balakpi kalɛ, na beeti taadu bekyuli. ²⁰ Bekyuli bakladi bani ƒui nétekpi na alakpa atɛ ani ndanku kukpi mmɔ kemo ni, béténwini kama bátákya ala ani na ama alati béti bana enu bábla bése béte lɛlɔ ka bataakpa. Ala amɛni adanku ayu ekpidi ku bana baƒiɔ bani na béti sika ugyiedi ku ɔƒualadi bávɔ ku kalɔ kemo abuala ku atabi ku egyii ani na bánwi. Nsu ala amɛni ƒui ni, alánu na elenu na elesie muedi! ²¹ Bétenwini kayi na bana bekyuli bɔdu ku evo ala bɔbla kudɔ iye kɔsɔnɔ ala bɔbla ku kuyu kudɔ.

¹ Amu na lɛ́nu Katɔti ɔtu ɔyikune ɔbambadi ka ɔ́si katɔ ɔɔyu. Na uyɔlɔ ɔ́ka ɔ́mana-nwu aani kɔdi, na bukeye bɔ́ka bɔ́mana-nwu lili. Nwuna anumi eekeye aani ɔƒɛ kalɛ, na nwuna lɛgba lise aani akpa ani nnye kalɔ na aada aani ogya. ² Kakunkɛ blii suɛ kadi kébimi kakya-nwu kɔnu. Na úti nwuna kɔdianu ɔgba únyene ɛpu lɛlɔ, na úti kɔmiinu ɔgba únyene kalɔ lɛlɔ. ³ Amu na údie lɛdi momoomo aani gyata kalɛ. Na ka ɔ́va ni, kayaa kábwɛ ogya ku kɔku bonwu maatɛ! ⁴ Ka línu kɔku bonwu kɔmɛni ni, líse kalɔ nnii muunweni lɛla lɛni na línu. Nsu lɛdi lɛdi lɛ́si katɔ na lɛ́su-mi lɛnini, “Ɔlɛka abɛla lɛla lɛni na énu na kɔku bonwu kɔmmɔ kemo ese, na tenweni-nya.” ⁵ Amu na lɛ́nu ka ɔtu ɔni nnye kalɔ ku ɛpu lɛlɔ mmɔ ɔ́talaku kɔdianu kɔnu katɔ. ⁶ Na ɔ́kpali ala ɔ́lɔ Katɔti lɛnyi. Ɔ́lɔ Anwu ɔni nli ngba ɔ́si ɔƒɛni úsela ƒui ɔni nédie katɔ ku kalɔ ku ɛpu ku ala ani nkya-nya kemo ƒui. Na ɔ́su ɔnini, “Katɔti ɔsɔ ulebile uwi! ⁷ Kabla kabɛdi kani na ɔ́su nwuna kenye bediene bani ndi nwuna kabla bablane ka kadubɔlɛ ni, kadubo kete lɛni si Katɔti ɔtu maatɛdi ɔmmɔ ɔ́vwii nwuna kakpɛɛ.” ⁸ Ɔmmɔ kama ni, lɛdi lɛni nátɛmiku-mi lɛ́si-ku katɔ mmɔ lɛ́sɔ lɛ́su-mi lɛnini, “Sie na atáƒɔ kakunkɛ kani nkya Katɔti ɔtu ɔni nnye ɛpu ku kalɔ lɛlɔ mmɔ kɔnu kemo.” ⁹ Amu na lísie ɔtu ɔmmɔ kudɔ na lɛ́su-nwu nnii uti kakunkɛ kammɔ ute-mi. Amu na ɔ́su-mi ɔnini, “Ƒɔ, na eti-ka akun! Mɔɔsu-ɔ ka ɔdubo ɔdu bɔyu na ƒula kaƒɔ kemo, nsu ɔdubɔyu-ɔ emini aani uwɔ na ƒula kenye kemo.” ¹⁰ Amu na lɛ́ƒɔ kakunkɛ kammɔ, na lɛ́kun. Na ɔ́yu-mi emini na kenye kemo. Nsu ka líbweli-ka lɛ́wɔlɔ ni, ɔ́yu ɔdu na mina kaƒɔ kemo. ¹¹ Nwuna kama ni, ɔtu ɔmmɔ ɔ́su-mi ɔnini, “Ɔlɛka asɔ esie anumi eteedie Katɔti litemi lɛni ndanku bekyuli lidu lidu na kalɔ pii lɛlɔ ku adi lidu lidu batɛmine ku baga pii lɛlɔ ete bekyuli.”

¹ Ɔmmɔ kama ni, Katɔti úti ugyii ɔdi úte-mi ɔni nse aani lɛkɔkula. Na ɔ́su-mi ɔnini, “Sie na atákɔku mina kakpakɔ ku lɛbi lɛni lɛlɔ na baakpá na katɔ mmɔ, na aka bekyuli bani ƒui nkya mmɔ beemwi-mi. ² Nsu takɔku keyi, ɔsika béti mmɔ béte bekyuli bani naaadi Yudaƒuɔ. Badubo mmɔ ku ɔma ɔmmɔ ƒui lɛgba butu bɔvi abuli aavlene-anyɔ. ³ Ndubute mina kenye bediene inyɔ ɔyikun na beedie-mi kenye na emeyi apimu unwi ku emeyi eti alɔ ku leevu kemo. Badubunyimi adala ani mɔɔtina ka bewulo kɔnyana na bekyuli alaekpidi ɔsu.” ⁴ Ɔkya Bunweni Kedee Ɔku kemo ka inɔ egyii anyɔ ku sika ugyiedi ligyii inyɔ lɛni lɛlɔ na asogya ɔsia ni, linye Kayawi Ƒui Unwoti anumi na katɔ. Na akpa anyɔ amɛni enye ete Katɔti kenye bediene inyɔ bamɛni. ⁵ Si ukyuli ɔdi ɔ́kya ɔkplu ɔnii ɔɔbla-ma kalala ni, ogya ɔdubo bɔlɛ bɔsi bana kenye kemo na ɔkyula bekisine bammɔ. Na ukyuli biala ɔni mɔɔwia ɔnii ɔɔbla-ma kalala ni, ulu ɔmmɔ lɛlɔ kani na ɔdubɔsia ukpi. ⁶ Bebo ɔyikun ka betile ɔnantu na ɔsɔ ulana na uwi ɔni kemo na beedie Katɔti kenye mmɔ. Na bebo ɔyikun lɛnɔ na ntukpa ƒui lɛlɔ kalɛ na baya na bunwini ubugya. Na bebo ɔyikun lɛnɔ na baya na lɛlɛ lidu lidu libo kayawi ƒui lɛlɔ uwi biala na baayɔ́. ⁷ Ɔƒɛni si bédie Katɔti kenye báwɔlɔ ni, eƒiebuo ɔni nási ɔɔlɛ́ kasuudikɔ ubu bonwu ɔmmɔ kemo ɔda bukpoku-ma na ɔdi-ma lɛlɔ na ɔdu-ma lɛnɔ. ⁸ Bana ɔlɔna ɔdubɔtɛ lɛblɔnu lɛlɔ na ɔma unengudi ɔni baalɔ na lɛsugba kemo banii Egyipte iye Sodom. Mmɔ na bákana Blɔti bámana ugyii lɛlɔ. ⁹ Ama bani nási bekyuli ku kadi ku adi lidu ƒui akɔ ku kalɔ ƒui lɛlɔ ni, badubo bekyuli bamɛni ɔlɔna bɔnu emeyi atɛ ku kakɛ sɔɔn. Nsu badubuni na baláva-ma. ¹⁰ Na bekyuli bani nlie kalɔ lɛlɔ badubo kubiti bɔkɛ na nkyuli inyɔ bammɔ kukpi ɔsu. Badubo limeyi bɔdi na bete lɛlɔ ala, ɔsika kenye bediene inyɔ bammɔ béti lɛbibo pii béboku kayawi bekyuli lɛlɔ. ¹¹ Na emeyi atɛ ku kakɛ kama ni, ɔƒɛƒɛɛ ɔni muute ngba ɔ́si Katɔti kudɔ úbo na úduo-ma lɛlɔ kemo na báta bénye. Na bani ƒui nánu-ma ni, liƒu lɛ́da-ma. ¹² Mmɔ na kenye bediene inyɔ bammɔ bénu lɛdi bonwu lɛdi ka lɛ́si katɔ na lɛ́su-ma lɛnini, “Bibo katɔ mɛni!” Ka bana bekisine baanu ni, bákɔ bésie katɔ na uyɔlɔ kemo. ¹³ Kɔnakunwi ni, kalɔ bɔkunku kpakplaa bɔdi bɔ́lɛ na ɔma ɔmmɔ lɛkpa leevudi lɛ́bwɛ, na bekyuli mpimu maatɛ békpi. Liƒu pim líƒie bekyuli bakladi, na bákɔliku Ati ɔni nkya katɔ lɛnyi katɔ! ¹⁴ Bɔbwɛ lɛla linyɔdi lɛ́vi, na lɛtɛdi lɛdubo lɛmmɔ kama bɔsia uwi klukui. ¹⁵ Ɔmmɔ kama ni, Katɔti ɔtu maatɛdi ɔ́vwii nwuna kakpɛɛ. Na línu ka bekyuli pii báva na katɔ mmɔ básu banini, “Kayawi lɛga kadikɔ ƒui kénwini bula Unwoti Katɔti ku nwuna Ukyuli Ɔƒunadi kadi! Na ɔdubo lɛlɔ bɔdi ɔ́si ɔƒɛni úsela ƒui!” ¹⁶ Amu na benengu aavlanyɔ-ine bani nlie Katɔti anumi na bana agaboku lɛlɔ báyu bébi kalɔ na bémwi Katɔti. ¹⁷ Na baasu banini, “Blɔti ɔni mbo ɔyikun ƒui, ɔni nli na úlie, bɔɔgyá-a enu, ɔsika áƒɔ ƒula ɔyikun ubendi na ése kalɔ aadi lɛlɔ! ¹⁸ Bekyuli bani ƒui nátaƒɔ-ɔ bátadi ni, béti kɔnyi. Anwuɔsu ƒula kɔtu bɔni kúbo-ma lɛlɔ. Ɔsika uwi údu ka atɛku bekyuli litemi. Ɔdi uwi ɔni na adubɔƒɔ kayu kabuni ete ƒula kabla bablane ku kenye bediene ku ƒula bekyuli ƒui. Na benengu ku banamu bani ƒui mɔɔbu-ɔ ni, adubɔƒɔ-ma kayu kabuni. Na adubɔkyula bekyuli bekpidi bani nádu ƒula bekyuli na kalɔ lɛlɔ!” ¹⁹ Amu na bálɛmi Katɔti kakpakɔ kedee, na bánu bunyimi adaka kedee ka use mmɔ. Na kayaa kábwɛ ogya ku kɔku bonwu. Na katɔ keedu taasia kama. Kalɔ kákunku, na etubanke áyu pii!

¹ Amu na akɔla ala budie taatina bonwu adi áda álɛ kayaa. Na ɔƒɛ ɔ́ka ɔ́mana uleku ɔdi aani kɔdi kalɛ, na kɔbuli kɔkya-nwu lɛgba kalɔ. Na úbi ayabi leevu-inyɔ kagabwa kadi lili. ² Ɔda kaƒɔ. Na ka uwi údu ka ɔwɔ ni, ɔ́va momoomo ka uunú ɔlɛ ɔsu. ³ Amu na lɛ́nu akɔla ala bɔnu bɔbambadi lɛnɔ! Liƒu kɔlakpi bonwu kɔdi négyie geen kɔ́da kɔ́lɛ kayaa. Na kubo eli maatɛ ku ese leevu. Na kagabwa kebi-ku lili biala lɛlɔ. ⁴ Na kútiku kayaa ayabi lɛkpa lɛtɛdi ƒui ku nwuna ɔka úbo úbewi kalɔ lɛlɔ. Kunye uleku ɔmmɔ lɛtɔtɔ kalɛ na kuti ubi ɔni na uleku ɔmmɔ wawɔ ɔkun si ɔ́nya ɔ́wɔ-nwu. ⁵ Na uleku ɔmmɔ ɔ́wɔ ɔnanabi ɔni madi kayawi ƒui lɛlɔ ku ɔyikun kpakplaa. Nsu Katɔti Kɔyu kúkpeli ubi ɔmmɔ kɔ́ƒɔ na kúti-nwu kúsienku Katɔti na nwuna lɛgaboku anumi. ⁶ Na uleku ɔmmɔ úkeli úsie ketele kemo likpo lɛni na Katɔti ɔ́klibi úse-nwu. Mmɔ na badubo-nwu lɛlɔ bɔnu emeyi apimu unwi eti alɔ ku leevu. ⁷ Amu na kekpo kálɛ na katɔ. Na Katɔti ɔtu unengudi ɔni ndi Mikael ɔ́tɔnku Katɔti batu bakladi na báta, na ama ku liƒu kɔlakpi kɔmmɔ ku kuna batu lɛnɔ békpo. ⁸ Nsu kɔlakpi kɔmmɔ kútakana-ma kenye bunye. Anwuɔsu básɔ bátakɛ keliekɔ kadi na katɔ mmɔ. ⁹ Na bábɔku liƒu kɔlakpi kɔmmɔ béboku kalɔ. Aku ndi kɔlakpi kɔkukudi bonwu kɔni baalɔ ukisine ɔmmɔ iye Satan, na ɔɔtɔ́lɔ kayawi kemodi ƒui. Bábɔku anwu ku nwuna batu ƒui bábava kalɔ lɛlɔ mɛni. ¹⁰ Ɔmmɔ kama línu lɛdi bonwu lɛdi na katɔ na lɛɛsu lɛnini, “Ɔƒɛni na Katɔti ngba bɔƒɔ ku nwuna ɔyikun ku lɛgadi lɛ́da lɛ́lɛ. Na nwuna Ukyuli Ɔƒunadi ɔmmɔ kenyekɔ lɛnɔ káda kálɛ. Ɔsika bábɔku baƒɔtaadine ukisine ɔmmɔ bálɛku katɔ mmɔ. Anwu muunye bula Katɔti anumi usien ku ɔƒɛ taawia baƒɔtaadine bammɔ litemi. ¹¹ Bula banwani bádi-nwu lɛlɔ ɔkɛnku Koƒonu Ubi ubugya lɛlɔ ku litemi geen lɛni kenye bédie lɛlɔ. Ɔsika bénye kagyumana ka beti bana ngba bakpa. ¹² Anwuɔsu lɛlɔ lɛyɔ amii bani nkya katɔ mmɔ ƒui! Nsu muute kalɔ ku ɛpu ala ƒui bɔbwɛ! Ɔsika Satan ɔ́ɔda ɔ́lɛ-mii lɛlɔ. Na úti kɔnyi geen, ɔsika ɔgyi ka uwi klukui kani nébu-nwu.” ¹³ Lebo lɛni na liƒu kɔlakpi kɔmmɔ kɔ́nu kɔ́ti ka bábɔku-nwu bábava kalɔ lɛlɔ ni, úse kalɔ ɔ́bi ɔ́siaku uleku ɔni náwɔ ubi ɔnanabi ɔmmɔ. ¹⁴ Amu na Katɔti úte uleku ɔmmɔ aasɛ bonwu avwi kalɛ na uveyi uteesie nwuna keliekɔ na ketele kemo. Mmɔ na badubo-nwu bɔgyumana akwa atɛ ku kakɛ ɔsiku kɔlakpi kɔmmɔ kudɔ. ¹⁵ Ɔmmɔ kama ni, kɔlakpi kɔmmɔ kútuo ntu pii bɔdi bɔ́lɛku nwuna kenye kemo kalɛ na bɔgba butéƒie uleku ɔmmɔ na butiku-nwu bɔtɔlɔku. ¹⁶ Nsu kalɔ kébunku uleku ɔmmɔ na kébimi kenye na káni ntu bɔni nálɛ bɔ́si kɔlakpi kɔmmɔ kenye kemo ƒui. ¹⁷ Mmɔ ni, kɔlakpi kɔmmɔ kúti kɔnyi kɔ́kya uleku ɔmmɔ geen, na kɔ́gyu kɔ́tɔlɔ kúsie kútékpoku nwuna bawɔ bakladi bani muunú Katɔti litemi na beedie Yesu kenye. ¹⁸ Amu na kɔlakpi kukpidi kɔmmɔ kɔ́ƒɔ lɛlɔ kɔkya ɛpu kɔtu mmɔ.

¹ Ɔmɛni kama lɛ́nu eƒiebuo ɔdi ka ɔ́lɛ ɔ́si ɛpu kemo ɔ́kɔ ɔɔlɛ́. Ubo eli maatɛ na ese leevu alɛ-nwu eli ammɔ lɛlɔ. Na lise biala lɛlɔ ni, kagabwa kebi. Na nwuna lili biala lɛlɔ ni, lɛnyi lɛdi lɛsia lɛni muudumi Katɔti. ² Eƒiebuo ɔmmɔ use aani ebuoƒuala, na nwuna lɛgba lise aani kegiti lɛgba, na nwuna kenye kese aani gyata kenye. Liƒu kɔlakpi kɔmmɔ kúti kuna ɔyikun kúte eƒiebuo ɔmɛni ku kuna lɛgaboku ku kenyekɔ kenengudi. ³ Eƒiebuo ɔmmɔ lili linwi lɛ́tina aani si ɔ́ƒɔ ɔlɛ ɔni na ɔlɛka ukpi nka. Nsu ɔlɛ ɔmmɔ ɔ́ɔsa. Ɔmɛni ɔ́bla kayawi bekyuli ƒui dɛye dɛye, na basiaku eƒiebuo ɔmmɔ kama. ⁴ Bekyuli bátaalɛ akɔnkɔ teete kɔlakpi kɔmmɔ, ɔsika kúte eƒiebuo ɔmmɔ kenyekɔ kenengudi. Na bátaalɛ akɔnkɔ teete eƒiebuo ɔmmɔ lɛnɔ. Na baasu banii, “Ɔma nse aani eƒiebuo ɔmɛni? Na ɔma makana-nwu bukpoku? Ɔdi uuubo!” ⁵ Eƒiebuo ɔmmɔ ɔ́kɛ ɔyikun na ɔ́di ala lɛlɔ abuli aavlene-anyɔ, na ɔ́talaku lɛlɔ katɔ, na údumi Katɔti geen. ⁶ Úse kalɔ uuwida Katɔti lɛnyi ku nwuna keliekɔ ku bekyuli bani ƒui nlie-nwu kudɔ. ⁷ Ɔ́kɛ ɔyikun ka ukpo Katɔti bekyuli na ɔdi-ma lɛlɔ. Kaba biala ku bekyuli lidu ku adi ƒui ku ama bani nási kalɔ biala lɛlɔ béduo nwuna lɛlɔ bɔdi kalɔ. ⁸ Na bekyuli bani ƒui nlie kalɔ lɛlɔ badubɔlɛ akɔnkɔ bete-nwu, ntu bekyuli bani anyi na bénweni bákya ngba ɔku kemo bése asa na Katɔti údie kayawi. Ngba ɔku ɔmmɔ ɔdi Koƒonu Ubi ɔni na béti bákpa ɔdi. ⁹ Si bibo atu ni, na binu! ¹⁰ Ukyuli ɔni na badubo buƒie ni, badubuƒie-nwu. Na ukyuli ɔni lɛnɔ na badubo bɔdu na ɔkɛɛ kenye lɛnɔ ni, badubo-nwu bɔdu. Ɔmɛni ɔsu ni, amii Katɔti bekyuli ɔlɛka binye lɛbibo biala kenye kpakplaa na bɛsiaku Blɔti ulu lɛlɔ. ¹¹ Amu na lɛ́nu eƒiebuo ɔbambadi ɔni nálɛ ɔ́si kalɔ kemo. Ese anyɔ alɛ-nwu lili aani koƒonubi, nsu ɔ́talaku lɛlɔ katɔ aani liƒu kɔlakpi kɔni muuƒwii. ¹² Únye eƒiebuo udeedi ɔmmɔ kenye útaabla nwuna kabla. Na únye kayawi kammɔ ƒui lɛlɔ beliene lɛlɔ ka balɛ akɔnkɔ bete eƒiebuo udeedi ɔni ɔlɛ nása mmɔ. ¹³ Eƒiebuo unyɔdi ɔmɛni údie akɔla ɔ́tina-ma, na ɔ́ya na ogya muedi ɔ́si katɔ úbo kalɔ lɛlɔ na ukyuli biala anumi. ¹⁴ Ɔ́tɔlɔ bekyuli bani ƒui nlie kalɔ lɛlɔ na nwuna akɔla bɔbla ani na ɔ́bla ɔkɛnku eƒiebuo udeedi ɔmmɔ lɛlɔ ɔsu. Ɔ́ya na bekyuli bammɔ bése baƒiɔ badi béte lɛlɔ, na bávɔ-ma na bese aani eƒiebuo udeedi ɔni náƒɔ ɔlɛ ka bébeyi-nwu ɔkɛɛ nsu ɔmua uli ngba. ¹⁵ Eƒiebuo unyɔdi ɔmmɔ ɔ́kɛ ɔyikun ka ɔnwuna ngba ɔƒɛƒɛɛ ɔkya eƒiebuo baƒiɔ bani na bése béte lɛlɔ mmɔ kemo kalɛ na ɔkana butemi, na ɔya na badu bekyuli bani ƒui naaadubo akɔnkɔ bɔlɛ bute-nwu. ¹⁶ Na eƒiebuo ɔmmɔ únye bekyuli ƒui lɛlɔ, banamu ku benengu, balakɛne ku bawabane ku bekyuli bani mɔɔbla bekyuli bamba kabla ku bani mɔɔbla ama alati kabla ka bese-ma likpo na bana kɔdianu kɔnu lɛlɔ iye bana atɛntɛ. ¹⁷ Ukyuli ɔdi biala ulakana na weye lɛla lɛdi wasiku ɔdi kudɔ iye uye lɛla lɛdi ute ukyuli bamba lɛnɔ si uuubo likpose lɛmmɔ. Na likpose lɛmmɔ nnye nte eƒiebuo ɔmmɔ lɛnyi iye bumomo bɔka bɔni nnye lɛnyi lɛmɛni kenye. ¹⁸ Ntu ebo lɛnunda asa na ala amɛni adubɔbla-a nwaa. Ukyuli ɔni makana ni, ɔwia bumomo bɔni nnye eƒiebuo ɔmɛni lɛnyi kenye kalɔ unu. Ɔsika bumomo bɔmɛni bɔdi bɔka bɔni nnye nte ukyuli lɛnyi. Na bumomo bɔmmɔ ndi 666.

¹ Ɔmɛni kama ni, lɛ́nu na budie taatina bɔmmɔ kemo ka Koƒonu Ubi ɔmmɔ unye Sion kɔbi lɛlɔ. Na bekyuli bani mabla aani mpimu eti anyɔ ku aavlene-ine benye mmɔ. Na bekyuli bamɛni atɛntɛ ni, bénweni Koƒonu Ubi ɔmmɔ ku Ɔti lɛnyi básia. ² Amu na línu lɛdi bonwu lɛdi lɛni nse aani ntu bɔni mɔɔgbá taayu lɛtakpɛ bonwu lɛdi lɛlɔ na lɛ́sɔ lɛ́lɛ aani si katɔ muudu ku kɔku bonwu. Lɛnɔ ni, use aani ɔnu na bagyane baagyá na lɛbentaa lɛlɔ. ³ Na nkyuli mpimu eti anyɔ ku aavlene-ine bamɛni badi bekyuli bani na bédie básiku kayawi na bákɛ ngba bɔƒɔ. Na bana ƒui benye lɛgaboku ku Katɔti ngba batu ine bammɔ anumi ku benengu bammɔ anumi. Na béteedie ɔnu ɔwɔdi ɔni na ama lɛti pɛ kani nákana-nwu bɔtɛya. ⁴ Ama ndi bekyuli bani náda lɛlɔ sɛɛn. Na bana lɛlɔ lilese lɛlɔ na lɛsɔnɔdi ala lɛlɔ ɔsu. Ama mɔɔsiaku Koƒonu Ubi ɔmmɔ likpo biala na úsela. Ama na bédie bálɛku bayawine ƒui akɔ. Na ama ndi bekyuli bedeedi bani na béti béte Katɔti ku Koƒonu Ubi ɔmmɔ. ⁵ Likpidi lɛɛɛma bekyuli bamɛni lɛlɔ, na ɔkɔ lɛla lɛdi lɛɛɛda-ma. ⁶ Ɔmmɔ kama lɛ́nu Katɔti ɔtu ɔbambadi ɔdi ka úveyi ɔɔví kayaa katɔ katɔ ku litemi buni lɛni nse nte uwi biala. Litemi lɛmmɔ lɛsa na úbo úbakɔ ute bekyuli bani nlie kayawi kamɛni lɛlɔ. Na ama ndi kalɔ biala lɛlɔ bekyuli ku kaba biala ku adi ƒui batɛmine ku bekyuli lidu ƒui. ⁷ Ɔ́su ku lɛdi bonwu ɔnini, “Bɛbu Katɔti na bɛkɔliku-nwu lɛnyi katɔ! Ɔsika nwuna uwi údu ka ɔtɛku bayawine ƒui litemi. Bimwi anwu ɔni nábla katɔ ku kalɔ ku ɛpu ku ntukpa ƒui!” ⁸ Katɔti ɔtu unyɔdi ɔsia udeedi kama na ɔɔva momoomo ɔnini, “Úbuli! Babilon bonwu ɔmmɔ úbuli geen! Kayawi bekyuli ƒui báni ɔma ɔmmɔ alaekpidi bɔbla békpi aani ntɛ. Na ɔ́tɔlɔ-ma aani kalɛ na ɔyalɛ ɔɔtɔ́lɔ bekyuli taatákya likpidi kemo.” ⁹ Katɔti ɔtu ɔbambadi ɔsia bammɔ kama na ɔɔva ku lɛdi momoomo ɔnini, “Bekyuli bani mɔɔlɛ akɔnkɔ teete eƒiebuo ɔmmɔ ku nwuna baƒiɔ bani na bávɔ béte lɛlɔ ni, ama náƒɔ eƒiebuo ɔmmɔ likpose na bana lɛtɛntɛ iye kɔnu. ¹⁰ Ama na Katɔti ɔdubɔya na babani nwuna kɔnyi lɛbibo ɔɔƒɛɛ ku ɔdu kati kati! Ogya ku ogya atabi adubo-ma bɔkyula na Katɔti batu kedee ku Koƒonu Ubi anumi. ¹¹ Na ogya ɔni mɔɔkyula-ma uyɔ ɔdubɔkɔ uteesie katɔ uwi ƒui. Na usien ku ɔƒɛ ni, bekyuli bamɛni balákɛ bɔnwuna! Ɔsika ama mɔɔlɛ akɔnkɔ teete eƒiebuo ɔmmɔ ku nwuna baƒiɔ, na báƒɔ nwuna lɛnyi likpose. ¹² “Ɔmɛni ɔsu ɔlɛka amii Katɔti bekyuli bani mɔɔdi Katɔti litemi lɛlɔ na bɛsiaku Yesu kama ulu lɛlɔ ni, binye lɛbibo kenye kpakplaa.” ¹³ Ɔmmɔ kama línu lɛdi lɛdi ka lɛ́si katɔ na lɛɛsu lɛnini, “Nweni ala amɛni. Bekyuli bani na lɛlɔ lɛdubɔyɔ-ma ndi bani ndubukpi ka básiaku Blɔti kama ɔ́si ɔƒɛni úsela ɔsu.” Na Katɔti Kɔyu kɔɔtuna kɔnini, “Ɛɛn, badubɔkɛ bɔnwuna! Na badubɔkɛ bana kabla kɔsia!” ¹⁴ Ɔmmɔ kama ni, lɛ́nu uyɔlɔ ƒututuutu ɔdi. Na lɛ́nu ka ukyuli ɔni nálɛ Ukyuli Ɔyawine Ubi ulie uyɔlɔ ɔmmɔ lɛlɔ, na sika ugyiedi kagabwa kebi-nwu lili. Na ɔda lɛsaka. ¹⁵ Amu na ɔtu ɔbambadi ɔ́lɛ ɔ́si kakpakɔ mmɔ na ɔ́va ku lɛdi momoomo ɔɔsu ukyuli ɔni nlie uyɔlɔ ɔmmɔ lɛlɔ ɔnini, “Awɔ, sala Katɔti bekyuli lɛku kayawi aani kalɛ na beeti lɛsaka taanwa edula. Ɔsika uwi údu ka basala-ma bete-nwu.” ¹⁶ Amu na ukyuli ɔni nlie uyɔlɔ lɛlɔ mmɔ ɔ́sala-ma na kalɔ kammɔ lɛlɔ ƒui. ¹⁷ Ɔmmɔ kama lɛ́sɔ lɛ́nu Katɔti ɔtu ɔbambadi ka ɔ́si Katɔti kakpakɔ mmɔ ɔ́yu úbo, na anwu lɛnɔ ɔ́da asɔsɔ ɔni mbo ɔbi. ¹⁸ Na ɔtu ɔbambadi lɛnɔ ɔ́si Katɔti lɛbi lɛmmɔ kudɔ úbo. Na anwu ndi ɔni mɔɔdi ogya lɛlɔ. Ɔtu ɔmmɔ ɔ́va ku lɛdi momoomo na ɔ́su Katɔti ɔtu ɔni nda asɔsɔ mmɔ ɔnini, “Awɔ, sala bekyuli bekpidi lɛku kayawi aani kalɛ na beeti asɔsɔ ɔni mbo ɔbi teede egyiibi. Ɔsika uwi údu ka basala-ma.” ¹⁹ Anwuɔsu Katɔti ɔtu ɔmmɔ ɔ́sala bekyuli bammɔ na kayawi lɛlɔ, na úti-ma útéwi kesii kani na Katɔti ɔdubɔni-ma kɔtu aani ebi ani béte béwi ntɛ kablakɔ. ²⁰ Na ɔ́ni-ma kɔtu na ɔma ɔmmɔ kabanye aani kalɛ na baamana ntu teedie ebi ammɔ kemo. Na ubugya ɔ́gba ɔ́si mmɔ, na ɔ́ƒɔ kalɛkɛ kammɔ ƒui. Na ubugya ɔmmɔ bɔgyu ɔdubudu ukyuli limɔ.

¹ Na lɛ́sɔ lɛ́nu akɔla budie taatina bonwu bɔbambadi na katɔ bɔni nábla-mi kalɛ kadi. Lɛ́nu batu maatɛ ka bada lɛbibo maatɛ lɛni ndi lɛbibo maatɛ likplodi. Ɔsika ɔmɛni kemo na Katɔti kɔnyi kúdu kɔ́wɔlɔ. ² Na lɛ́nu kalɔ kani nwi aani ɛpu na use kede kede aani kanu kani kemo na ogya ɔɔda. Na ɛpu ɔmmɔ amadɔ ni, bekyuli benye beedie lɛnu na baagyá lɛbentaa lɛni na Katɔti úte-ma. Ama nádi eƒiebuo ɔmmɔ ku nwuna baƒiɔ ku bumomo bɔni nnye nte nwuna lɛnyi lɛlɔ. ³ Na lɛnu lɛni na beedie mmɔ ni, lɛdi Mose ɔni ndi Katɔti kabla ɔblane ku Koƒonu Ubi ɔmmɔ lɛnu. Na beedie banini, “Blɔti ɔni mbo ɔyikun ƒui, ƒula ala bɔbla ébomo, na bulakana-nya kalɔ bunu. Na ƒula ablala ese siin, na ƒula etemila adi litemi geen. Awɔ ndi Uwi Ƒui Ɔga. ⁴ Ɔma makana-a anumi bunye na ulayia awɔ Blɔti, na uleti bumwi ulete ƒula lɛnyi? Ɔsika awɔ lɛti nse kedee, na kalɔ ƒui bekyuli badubo babakya-a lili kalɔ. Ɔsika bédie bátina ka aabla lɛla biala ulu siin lɛlɔ.” ⁵ Ɔmɛni kama ni, lɛ́nu ka bálɛmi kakpakɔ kedee na katɔ. Na adaka ɔni kemo na Katɔti bunyimi bɔkya ni, use mmɔ. ⁶ Na Katɔti batu maatɛ bani nda lɛbibo maatɛ bammɔ bálɛ bási Katɔti kakpakɔ mmɔ. Na bakya lɛwu lɛƒualadi lɛni muukeye na sika ugyiedi kɔbuli kɔ́da kɔ́mana-ma kayi. ⁷ Amu na ngba batu ine bammɔ kemo unwi úti sika ugyiedi kɔlaku kɔni na Katɔti ɔni nli ngba uwi ƒui kɔnyi kúyi úte batu maatɛ bammɔ. ⁸ Na Katɔti kakpakɔ kammɔ kemo kéyi ku uyɔ ɔni nási Katɔti ɔyikun ku bukeye kemo. Na ukyuli biala ulakana kakpakɔ kammɔ kemo buduo, amu ntu batu maatɛ bammɔ béti lɛbibo maatɛ lɛmmɔ béboku kayawi báwɔlɔ.

¹ Amu na línu lɛdi bonwu lɛdi ka lɛɛtɛmi taasiku Katɔti kakpakɔ mmɔ úte batu maatɛ bammɔ ɔnini, “Bisie na bitéwilimi Katɔti kɔnyi kalaku maatɛ kammɔ biwi kayawi lɛlɔ!” ² Amu na Katɔti ɔtu udeedi úsie na útéwilimi nwuna kalaku úwi kayawi lɛlɔ. Ɔmmɔ ɔ́ya na alɛbi álɛ éwi bekyuli bani mbo eƒiebuo ɔmmɔ likpose na baalɛ akɔnkɔ teete nwuna baƒiɔ mmɔ lɛlɔ. ³ Amu na Katɔti ɔtu unyɔdi úwilimi nwuna kalaku úwi ɛpu kemo, na ntu bɔmmɔ búnwini ubugya aani ɔni nkya ukpine. Na lɛla biala lɛni mbo ngba na lɛkya ɛpu kemo mmɔ líkpi. ⁴ Amu na ɔtu ɔtɛdi úwilimi nwuna kalaku úwi ntukpa ku abiɔ ƒui kemo na búnwini ubugya. ⁵ Amu na línu ka ɔtu ɔni mɔɔnu ntukpa lɛlɔ ɔ́su ɔnini, “Awɔ ɔni nli na élie ni, awɔ nse kedee. Ɔsika átɛ etemila amɛni ƒui na ulu siin lɛlɔ. ⁶ Bekyuli bamɛni nádu ƒula bekyuli ku kenye bediene. Anwuɔsu na éte-ma ubugya ukpidi ɔmɛni na báni. Lɛla lɛni námanku-ma na baaƒɔ́!” ⁷ Amu na línu lɛdi lɛni nási Katɔti lɛbi lɛmmɔ kudɔ ka lɛ́su lɛnini, “Blɔti ɔni mbo ɔyikun ƒui, ƒula litemi bɔtɛ buse siin, na ƒula etemila adi litemi geen.” ⁸ Ɔmmɔ kama ni, ɔtu unedi úwilimi nwuna kalaku úwi ɔƒɛ lɛlɔ na béte kuƒi ka nwuna ogya ɔkyula bekyuli. ⁹ Na bekyuli bákywi ɔ́si ogya liwulu kpakplaa lɛmmɔ ɔsu. Na béwida Katɔti lɛnyi, ɔsika nwuna ɔyikun ɔsu na lɛbibo lɛmɛni líbo-ma lɛlɔ. Nsu ɔmɛni kama ƒui ni, bétenwini kama bátakya bana ekpidi na bemwi Katɔti. ¹⁰ Amu na ɔtu ɔlɔndi úwilimi lɛla lɛni nkya nwuna kalaku kemo úwi eƒiebuo ɔmmɔ lɛgaboku lɛlɔ. Na kalɔ kani lɛlɔ na eƒiebuo ɔmmɔ ɔɔdi lɛga ƒui kábla suu kɔnakunwi! Na bekyuli baadu anyi na lɛbibo ɔsu. ¹¹ Na bekyuli bammɔ béwida Katɔti, ɔsika bana alɛbi áya na beenú ɔlɛ geen! Nsu bátada bana alaekpidi bɔbla bátaya. ¹² Ɔmmɔ kama ni, ɔtu ɔkundi úwilimi lɛla lɛni nkya nwuna kalaku kemo úwi Euƒrate ketu kebendi kammɔ kemo. Na ketu kammɔ kákwi kalɛ na baga bani nási ɔƒɛ katukɔ bakɛ kavinkɔ. ¹³ Amu na lɛ́nu ayu ekpidi atɛ ani nálɛ aani bapɔtɔlɔ ka bási baalɛ́ liƒu kɔlakpi kɔmmɔ kenye ku eƒiebuo udeedi ɔmmɔ kenye ku eƒiebuo unyɔdi ɔni baalɔ ɔkɔ kenye udiene kenye kemo. ¹⁴ Ayu ammɔ ndi ukisine ayu ekpidi ani muudie akɔla taatina. Na ayu atɛ amɛni muusié kayawi baga ƒui kudɔ kalɛ na basala lɛlɔ na bekpo Katɔti bekyuli na Katɔti ɔni ndi Ɔyikune Ƒui limeyi linengudi lɛmmɔ lɛlɔ. ¹⁵ “Binu! Ami Yesu ndubo bɔda bɔlɛ-mii lɛlɔ kɔnakunwi aani uyune kalɛ! Lɛlɔ lɛdubɔyɔ ukyuli ɔni nnye kagyumana na ɔda adala ani mɔɔtina ka use siin uwi biala kemo, kalɛ na ulakɛ kasɔngya ku kɔƒa na kadi akɔ!” ¹⁶ Amu na ayu ekpidi ammɔ ásala baga bammɔ na likpo lɛni baalɔ na Hebri kemo bani Armagedon. ¹⁷ Amu na Katɔti ɔtu maatɛdi úwilimi lɛla lɛni nkya nwuna kalaku kemo úwi kayaa. Na lɛdi bonwu lɛdi lɛ́ku lɛ́si lɛgaboku kudɔ na Katɔti kakpakɔ mmɔ, na lɛɛsu lɛnini, “Ɔ́sa!” ¹⁸ Na kayaa kábwɛ ogya ku kɔku bonwu, na katɔ keedu taasia kama! Na kalɔ kaakunku ɔni na kalɔ bɔkunku bɔmmɔ udu bútalɛ kudii ɔ́si uwi ɔni na Katɔti údie ukyuli! ¹⁹ Na ɔma unengudi ɔmmɔ ɔ́bwɛ úle akpa atɛ, na lɛma linengudi lɛkladi lɛni nkya kayawi ekpo ƒui lɛ́bwɛ ƒui. Mmɔ ni, Katɔti únyimo Babilon ɔma unengudi ɔmmɔ ekpidi na ɔ́ya na ɔ́ni nwuna kɔnyi lɛbibo ɔɔƒɛɛ ɔmmɔ ƒui. ²⁰ Na ntuntɛ kɔlɔ ku abi ani ƒui nkya ni, áyii ákya. ²¹ Etubanke bonwu adi aani atakpɛ áyu ási kayaa ábaƒiɛmi bekyuli, na béwida Katɔti ɔ́si ɔgbankpi ɔmɛni ɔsu.

¹ Amu na batu maatɛ bani nda kɔlaku kɔmmɔ kemo unwi úbo-mi kudɔ na ɔ́su-mi ɔnini, “Bo, na lɛtina-a kalɛ na badubo ɔyalɛ ɔni náƒɔ lɛnyi mmɔ kɔtu bɔni. Anwu ndi ɔma unengudi ɔni na bátu bényene ntukpa pii kudɔ. ² Na kayawi baga bákya béteesie teesie ɔma ɔmmɔ kemo aani kalɛ na banana beesié ɔyalɛ kudɔ. Na ɔma ɔmmɔ ekpidi bɔbla bɔ́ƒɔ kayawi bekyuli lɛlɔ kemo aani kalɛ na baaní ntɛ teekpi.” ³ Ɔtu ɔmmɔ ɔ́kpanku-mi úsienku ketele kemo na kɔyu kemo. Mmɔ na lɛ́nu uleku ɔdi ka ulie eƒiebuo ugyiedi lɛlɔ. Na bénweni anyikpi ani muudumi Katɔti ƒui básia eƒiebuo ɔmmɔ lɛlɔ. Na eƒiebuo ɔmmɔ mbo eli maatɛ ku ese leevu. ⁴ Uleku ɔmmɔ unyimi adi atondi ku egyiedi na úti sika ugyiedi ku asɛɛ ku aseebi ɔ́klibi lɛlɔ. Na ɔda sika ugyiedi ɔɔƒɛɛ ɔdi ɔni kemo na ala ani na Katɔti ukisi na eesé lɛlɔ éyi tɛtɛɛtɛ ɔkɛnku nwuna lɛyalɛ ala bɔbla ɔsu. ⁵ Na nwuna lɛtɛntɛ ni, bénweni lɛsugba lɛnyi lɛdi básia. Babilon, ɔma unengudi. Bayalɛ ƒui uni ku ekisila ƒui uni. ⁶ Amu na lɛ́nu ka uleku ɔmmɔ úkpi ntɛ na Katɔti bekyuli bani ubugya na ɔ́ni ku bani na ɔ́du ɔsika benye Yesu kama kpakplaa ɔsu. Uwi ɔni na lɛ́nu-nwu ni, ɔ́bla-mi kalɛ kadi. ⁷ Amu na ɔtu ɔmmɔ úye-mi ɔnini, “Bi ɔsu na ɔ́bla-a kalɛ kadi? Ndubudie lɛsugba lɛmɛni kalɔ lite-ɔ. Lɛkɛnku uleku ɔmmɔ ku eƒiebuo ɔni lɛlɔ na uleku ɔmmɔ ulie mmɔ lɛlɔ. Na eƒiebuo ɔmmɔ mbo eli maatɛ, na ese leevu alɛ eli ammɔ lɛlɔ. ⁸ Eƒiebuo ɔmmɔ ni, úlie ngba dii, nsu ɔsɔ uuubo. Na ɔdubo bɔlɛ bɔsi kasuudikɔ ubu bonwu ɔmmɔ kemo, na usie na Katɔti ɔyila-nwu udu ƒui. Na bekyuli bani nli kayawi lɛlɔ na bétenweni-ma anyi bátakya ngba ɔku kemo asa na Katɔti údie kayawi ni, ɔdubo-ma bɔbla kalɛ kadi si banu eƒiebuo ɔmmɔ. Ɔsika úlie ngba dii, nsu ɔsɔ uuubo, na ɔsɔ ɔdubo bɔda bɔlɛ. ⁹ “Asa na ukyuli wenu lɛsugba lɛmɛni kalɔ ni, amu ntu ubo lɛnunda. Eƒiebuo eli maatɛ ku uleku ɔyalɛ ɔmmɔ benye bete ɔma ɔni bátu bálɛ abi maatɛ lɛlɔ. Na eli ammɔ lɛnɔ enye ete baga maatɛ badi. ¹⁰ Baga ɛlɔ bádi lɛga bávi, na unwi ɔmua ɔɔdi lɛga, na ɔkladi anwu útadi tɔ lɛga. Nsu si úbo ni, ɔdubo lɛga bɔdi uwi klukui ɔdi kani. ¹¹ Eƒiebuo ɔni nélie ngba dii nsu ɔsɔ uuubo mmɔ ni, anwu ɔdi ɔga maanedi. Na nwuna udu use aani baga maatɛ bammɔ kalɛ, na usie na Katɔti ɔyila-nwu udu ƒui. ¹² “Na ese leevu ani na ánu mmɔ ni, adi baga leevu bani nétese tɔ kalɔ ku lɛga bɔdi. Nsu badubo-ma kuƒi bute uwi klukui na badi lɛga ku eƒiebuo ɔmmɔ. ¹³ Baga leevu bamɛni ƒui bada kasusu kenwi, na beeti bana ɔyikun ku kenyekɔ teete eƒiebuo ɔmmɔ. ¹⁴ Na badubɔta na bekpoku Koƒonu Ubi ɔmmɔ. Nsu Koƒonu Ubi ɔmmɔ ku nwuna bekyuli baƒunadi ku nwuna baƒɔtaadine geen badubo-ma lɛlɔ bɔdi. Ɔsika anwu ndi Blɔti ɔni ndi Bati Ƒui Ɔti ku Baga Ƒui Ɔga.” ¹⁵ Amu na ɔtu ɔmmɔ ɔ́su-mi ɔnini, “Ntukpa bɔni kudɔ na ánu ka ɔyalɛ ɔmmɔ ulie ni, anya nnye nte kalɔ ƒui bekyuli ku bani nkya kaba ku kadi ku kalɔ ku adi ƒui kemo. ¹⁶ Ese leevu ani nnye nte baga bani na ánu ku eƒiebuo ɔmmɔ ni, badubukisi ɔyalɛ ɔmmɔ. Na badubo ala ani nse-nwu ƒui bɔƒɔ bɔsiku-nwu kudɔ na ɔsɔ ɔkɛ utaavi kasɔngya. Badubo-nwu lɛna bɔkun na bakyula lɛni nébu. ¹⁷ Ɔsika Katɔti úti ɔ́kya-ma kayi kemo kalɛ babla lɛla lɛni na anwu Katɔti ɔɔwia. Na bénu lɛlɔ kalɔ ka beti bana ɔyikun bete eƒiebuo ɔmmɔ na ɔdi lɛga uti utédu ka Katɔti etemila ani na ɔ́su úse ébo-nwu kemo lɛni. ¹⁸ Uleku ɔni na ánu mmɔ ni, anwu unye ute ɔma unengudi ɔni mbo ɔyikun na kayawi baga ƒui lɛlɔ.”

¹ Ɔmmɔ kama ni, lɛ́nu Katɔti ɔtu ɔdi ka ɔ́si katɔ mmɔ ɔɔyu ɔdubo kalɔ. Na ubo kenyekɔ geen, na nwuna bukeye bɔ́ƒɔ kalɔ lɛlɔ ƒui. ² Amu na ɔ́va ku lɛdi momoomo ɔnini, “Úbuli o-o! Babilon ɔni náƒɔ lɛnyi geen mmɔ úbuli! Na ɔ́ta únwini ayu ekpidi ƒui kabɛkɔ. Mmɔ na ayu ekpidi ku begbini ku baasɛ bani muusé lɛlɔ ƒui bakya. ³ Ɔsika Kayawi bekyuli ƒui báni ɔma ɔmmɔ alaekpidi bɔbla békpi aani ntɛ. Na ɔ́tɔlɔ-ma aani kalɛ na ɔyalɛ ɔɔtɔ́lɔ bekyuli taatákya likpidi kemo. Kalɔ lɛlɔ baga ƒui beesié ɔma ɔmmɔ teebo aani kalɛ na banana beesié ɔyalɛ kudɔ. Na kalɔ ƒui beyedine benengudi bénwini balakɛne ɔkɛnku bana liyedi na ɔma ɔmmɔ ɔni néyi ku akɛla ani ndanku adikpi bɔdi.” ⁴ Na línu lɛdi bamba ka lɛ́si katɔ mmɔ na lɛɛsu lɛnini, “Mina bekyuli, bɛvi bɛlɛ ɔma ɔmmɔ kemo kalɛ na bilabla ekpidi ani na ɔɔbla, na ɔgbankpi ɔni mebo nwuna bekyuli lɛlɔ ulebo amii lɛnɔ lɛlɔ! ⁵ Ɔsika ɔma ɔmmɔ ekpidi éemomo na ákuku étédu katɔ, na Katɔti únyimo udunkpi ala ani ƒui na nwuna bekyuli bábla. ⁶ Amii Katɔti batu ni, bɛƒɔ-ma kayu na lɛla lɛni na bábla Katɔti kenye. Na bɛƒɔ-ma kayu kammɔ akpa anyɔ na bana ablala kenye. Ala ani na ɔma ɔmmɔ ɔ́sala aani ɔdu ala na ɔɔƒɛɛ kemo úte bekyuli na báni ni, bɛsala ɔdu ɔmmɔ akpa anyɔ na ɔɔƒɛɛ ɔmmɔ kani kemo na bite nwuna bekyuli na bani! ⁷ Na kalɛ na ɔma ɔmmɔ ɔ́kɔliku lɛlɔ katɔ na nwuna adikpi bɔdi akɛla kenye ni, bɛya na ubo abi na uwulo utédu ekpidi ammɔ kenye. Ɔsika ɔma ɔmmɔ use aani uleku ɔni násu na nwuna kayi kemo ɔnini, ’Uleku Ɔga na ndi, na nlie mina lɛgaboku lɛlɔ. Lɛɛɛdi ukpinele, na lɛɛɛdubo kɔnyana kɔdi lɛnɔ buwulo kudii!’ ⁸ Anwuɔsu ɔgbankpi ɔdubuƒie-nwu ɔva limeyi linwi. Na ɔdubuduo ɔlɛ ku kɔnyana buwulo ku kɔka lɛnɔ kemo. Na ogya ɔdubo-nwu bɔkyula, ɔsika Katɔti úbomo na anwu ndubɔtɛku-nwu litemi.” ⁹ “Na kalɔ lɛlɔ baga bani muusié ɔma ɔmmɔ teebo taabla ekpidi na békeli basiaku adikpi bɔdi akɛla kama na mmɔ ni, badubo keku ku kɔnyana buwulo na ɔma ɔmmɔ lili si bánu uyɔ ka ɔɔkɔ́ katɔ uwi ɔni na ɔɔkywí. ¹⁰ Baga bamɛni badubunye ɔgyu kakaaka bataanu ala amɛni, ɔsika baayia ka ɔma ɔmmɔ lɛbibo lɛmmɔ udu lɛdububo-ma lɛlɔ. Na badubɔsu banini, ’Bɔbwɛ! Bɔbwɛ! Ɔma ɔni mbo ɔyikun! Babilon, ɔma bonwu ɔmmɔ! Ɔdɔ bubo unwi kemo kani ƒula kɔtu bɔni kɔ́da kɔ́lɛ-ɔ lɛlɔ!’ ¹¹ “Mmɔ ni, kalɔ ƒui beyedine benengudi béwulo keku ku kɔnyana, ɔsika basɔ beeebo ukyuli ɔni meye-ma ala. ¹² Ka ala beyene basɔ beeebo ɔsu ni, bana sika ugyiedi ku ɔƒualadi ku aseebi ku asɛɛ ani náƒɔ kuye ébo kalɔ. Na bana adi abuni egyiedi ku aƒualadi ku ana lidu ébo kalɔ. Na egyii ani muunwenyi ƒɛƒɛɛ ku ala ani ƒui na béti ɔtunkpɛ bábla lɛnɔ ébo kalɔ. Lɛni kani na use ute ala ani na bábla ku egyii ani náƒɔ kuye ku abuala ani muukeye ku ani neeekeye ku atabi ani náƒɔ kuye lɛnɔ. ¹³ Na evete ani muudie inɔmii ƒɛƒɛɛ ku kutu akyala lidu lidu ku klobo ku oloƒui ku ugyulo ƒɛƒɛɛ lɛnɔ kuye kúbo kalɔ. Ntɛ ku inɔ ku ɔlaaƒɔ ku edula ebi lɛnɔ ébo kalɔ. Na balakɛ bekyuli bani na beye bana ɔmantɛ bakɔ ku baƒonu ku bapɔnkɔ ku kɛɛkɛ ɔni na bapɔnkɔ baaní ku bekyuli bani na béƒie betéye kalɛ na badubɔbla akpala lɛnɔ ƒui. ¹⁴ “Na básu banini, ’Babilon! Ala abuni ani ƒui na áyɔ ka akɛ ni, anya nálɛ-ɔ enu kemo mɛni. Na ƒula ebiti akɛla ku lɛkɛ ni, áyila-nya na asɔ aaadubo-nya bɔnu kudii.’ ¹⁵ Beyedine bani mbo eyedila ani na beeti taakɛ lɛkɛ taasiku ɔma ɔmmɔ kudɔ mɛni ni, badubunye ɔgyu kakaaka na bewulo keku ku kɔnyana momoomo banini, ¹⁶ ’Bɔbwɛ! Bɔbwɛ! Uwi ɔdi kemo ni, ɔma bonwu ɔmmɔ úyi ku adiƒuala abuni ku adi ani nse ƒuƒuu ku egyiedi. Na báklibi ɔma ɔmmɔ ku sika ugyiedi ku aseebi ku asɛɛ ani náƒɔ kuye éyi tɛtɛɛtɛ! ¹⁷ Nsu ɔdɔ bubo unwi kemo kani na akɛla amɛni ƒui ébie!’ “Na lɛkɔlɔ libendi bakane ku bekyuli bani ngyi ketu lɛlɔ kabla kaduɛ ku bani ƒui mɔɔdi kuye na ntu anumi mmɔ bénye ɔgyu kakaaka. ¹⁸ Na báva momoomo uwi ɔni na bánu uyɔ ɔni mɔɔkɔ́ katɔ taasi ɔma bonwu ɔni mɔɔkywí mmɔ kemo banini, ’Ɔma bonwu ɔmani nsɔ nse aani ƒula kalɛ?’ ¹⁹ Amu na béti enu béwi lili na béwulo kɔnyana geen na básu banini, ’Bɔbwɛ, bɔbwɛ na buute ɔma unengudi ɔmɛni. Kesii kani na bekyuli bani mbo lɛkɔlɔ bonwu na beesiénku-ni ntu anumi bákɛ bana lɛkɛ! Ɔdɔ bubo unwi kemo kani ni, lɛla biala líbie! ²⁰ Amii bani nkya katɔ ƒui lɛlɔ lɛyɔ-mii. Na amii Katɔti bekyuli ƒui ku batalane ku Katɔti kenye bediene ni, lɛlɔ lɛyɔ-mii! Ɔsika Katɔti ɔ́tɛku ɔma ɔmmɔ litemi na lɛla lɛni na ɔ́bla-mii ɔsu!’ ” ²¹ Ɔmmɔ kama ni, Katɔti ɔtu ɔyikune ɔdi úti lɛtabi lɛdi nse aani kukɔ bonwu kɔdi úbo ɔ́kya ɛpu kemo na ɔɔsu ɔnini, “Lɛni na Katɔti ɔdubo Babilon ɔma bonwu ɔmɛni bubo butáƒiɛmi kalɔ momoomo ɔni na basɔ balanu-nwu kudii. ²² Na ɔbentaa ku lɛnu bediene ku atoloyi ku kɔkpɛɛ bavwiine ni, basɔ belénu-ma kɔku kudii na ƒula kemo. Enu kabla ɔblane biala ɔ́sɔ ulabla nwuna kabla na ƒula kemo. Na basɔ belénu kukɔ kɔdi kɔku na ƒula kemo. ²³ Na basɔ balanu asogya bukeye bɔdi na ƒula kemo kudii. Na basɔ belénu uleku buti lɛnu lɛdi lɛnɔ. Ƒula beyedine bani néteeti ala teebeye ni, bekyuli bánu-ma aani bekyuli benengudi ƒui na kalɔ lɛlɔ mɛni. Na ɔkɛnku ƒula evo ani na aaƒɛ teete bekyuli ɔsu ni, áya na kalɔ ƒui bekyuli báyii ulu. ²⁴ Na Katɔti kenye bediene ku Katɔti bekyuli ku bekyuli bamba bani ƒui na bádu na kayawi mɛni ni, bana ubugya ɔsiaku-ɔ!”

¹ Ɔmɛni kama ni, línu kɔku bonwu kɔdi na katɔ aani bekyuli lisu bonwu lɛdi. Na báva momoomo básu banini, “Aleluya! Ngba bɔƒɔ ku bukeye ku ɔyikun ɔdi Katɔti ɔmmɔ ɔdi. ² Ɔsika nwuna litemi bɔtɛ buse siin. Na nwuna etemila adi litemi geen. Ɔma ɔni nébile kayawi ku nwuna alaekpidi bɔbla aani ɔyalɛ ni, Katɔti nátɛku-nwu litemi. Na Katɔti kabla bablane bani ubugya na béwi kalɔ ni, údie ɔma ɔmɛni bekyuli kasi na ubugya ɔmmɔ ɔsu.” ³ Básɔ báva básu banini, “Aleluya! Uyɔ ɔni mɔɔkɔ́ katɔ mɛni ni, utaakɔ lɛni usela ƒui.” ⁴ Na benengu aavlanyɔ-ine bammɔ ku ngba batu ine bammɔ báyu bébi kalɔ na bémwi Katɔti ɔni nlie lɛgaboku lɛmmɔ lɛlɔ banini, “Ɔsia lɛni! Aleluya!” ⁵ Na lɛdi lɛdi lɛ́si lɛgaboku lɛmmɔ kudɔ mmɔ na lɛɛsu lɛnini, “Bimwi bula Katɔti amii nwuna kabla bablane bani mɔɔyia-nwu, benengu ku banamu ƒui.” ⁶ Ɔmmɔ kama ni, línu kɔku bonwu aani bekyuli lisu lɛdi na ɔ́lɛ aani ntukpa pii bɔku ku katɔ budu taasia kama. Na baasu banini, “Aleluya! Ɔsika Blɔti ɔni mbo ɔyikun ƒui ni, bédie nwuna lɛga bɔdi keyi! ⁷ Bɛya na bula ƒui bɔkɛ ebiti na lɛlɔ lɛyɔ-bu na bɔkɔliku-nwu lɛnyi katɔ. Ɔsika Katɔti Koƒonu Ubi ɔmmɔ limeyi libendi lɛmmɔ lídu aani kalɛ na beeti uleku. Na Katɔti bekyuli báaklibi lɛlɔ bése aani uleku ɔmmɔ kalɛ. ⁸ Blɔti úte-ma kɔdi kɔbuni kɔni muukeye sɛɛn ka beti benyimi.” Na kɔdi kɔbuni kɔmmɔ ndi ala siin ani na Katɔti bekyuli bammɔ bábla. ⁹ Mmɔ na Katɔti ɔtu ɔmmɔ ɔ́su-mi ɔnini, “Nweni ala amɛni. Lɛlɔ lɛdubɔyɔ ama bani na badubɔlɔ beboku uleku ketikɔ adila kadikɔ.” Na ɔ́sɔ ɔ́su-mi ɔnini, “Etemila amɛni adi Katɔti ɔlati etemila geen.” ¹⁰ Mmɔ ni, lɛ́yu líbi kalɔ na nwuna lɛgba akɔ na límwi-nwu aani Katɔti kalɛ. Nsu ɔ́su-mi ɔnini, “Tabla lɛni! Ami lɛnɔ kabla ɔblane ɔkpana na ndi aani ƒula kalɛ ku ƒula banwa bakladi bani nsiaku Blɔti Yesu ala bɔtina kama. Katɔti kani na ɔlɛka emwi lɛni. Ɔsika ala ani na Yesu ɔ́tina ni, ana kenye budie ndi Kɔyu ɔyikun ɔni nákya Katɔti kenye bediene lɛlɔ kemo.” ¹¹ Ɔmmɔ kama ni, lɛ́nu ka kayaa kálɛmi na ɔpɔnkɔ ɔƒualadi ɔdi ɔ́da ɔ́lɛ. Na ukyuli ɔni nlie-nwu lɛlɔ ni, baalɔ-nwu banii Kama Kekpokɔ ku Litemi Geen. Na ɔɔtɛ litemi siin na uukpó kekpo lɛnɔ siin. ¹² Nwuna anumi ese aani ogya na kɔgabwa pii kubi-nwu lili. Na bénweni lɛnyi lɛdi básia-nwu lɛlɔ lɛni na ukyuli ɔdi ɔɔɔgyi ntu anwu kani. ¹³ Na ɔkya awu gyɔlɔɔ ɔni na báka bɔnyina bɔkya ubugya kemo. Na lɛnyi lɛni kani na bagyi-nwu ndi Katɔti Litemi. ¹⁴ Na katɔ bekpone ƒui bakya lɛwu lɛbuni lɛƒualadi lɛni nse sɛɛn, na belie bapɔnkɔ baƒualadi lɛlɔ na basiaku ukyuli ɔmmɔ kama. ¹⁵ Na litemi geen lɛni nse aani kewii kani bádɔ-ka lɛvi inyɔ lɛɛlɛ́-nwu kenye kani na ɔdubuti ukpo kalɔ ƒui bekyuli, na uti nwuna ɔyikun utaadi-ma lɛlɔ. Na ɔdubɔni-ma kɔtu kpakplaa ku Katɔti Ɔyikune Ƒui kɔnyi geen aani kalɛ na baaka ntu teedie ebi kemo kpakplaa na ntɛ kablakɔ. ¹⁶ Na bénweni lɛnyi lɛdi básia nwuna awu lɛlɔ ku nwuna libuili kakɛ banii BAGA ƑUI ƆGA KU BATI ƑUI ƆTI. ¹⁷ Ɔmmɔ kama ni, lɛ́nu Katɔti ɔtu ɔdi ka unye ɔƒɛ kemo na ɔ́kpali baasɛ bani ƒui muuveyi taavi kaya ku lɛdi momoomo ɔnini, “Bibo bibasala na bɛdi Katɔti adila enengudi ani na ɔ́klibi úse-mii. ¹⁸ Katɔti úte-mii baga ku kekpo kenye benyene ku bayikune ku bapɔnkɔ ku bekyuli bani muulie-ma lɛlɔ. Badi benengu ku banamu ku bani mɔɔbla bekyuli bamba kabla ku bani mɔɔbla ama alati kabla. Bana ɔlɔna na úti úte-mii ka bɛduli bibweli na bimo!” ¹⁹ Na lɛ́nu ka eƒiebuo ɔmmɔ ku kayawi baga ku bana bekpone ƒui básala ka betékpo Anwu ɔni nlie ɔpɔnkɔ ɔmmɔ lɛlɔ ku nwuna bekpone. ²⁰ Nsu béƒie eƒiebuo ɔmmɔ ku eƒiebuo ɔni néti lɛlɔ ɔ́bla ɔkɔ kenye udiene. Anwu ndi ɔni nábla akɔla budie taatina na eƒiebuo udeedi ɔmmɔ kenye, na úti akɔla budie taatina ammɔ ɔ́tɔlɔ bekyuli bani na bése likpo ku eƒiebuo ɔmmɔ likpose na bémwi eƒiebuo ɔmmɔ baƒiɔ. Na bekpone bammɔ béti eƒiebuo ɔmmɔ ku bekyuli bamɛni ƒui na bébo-ma bátákya ogya livongu lɛni nse bonwu aani ɛpu kalɛ, na ɔɔda ku ogya atabi kemo. ²¹ Na bekyuli bakladi ni, ukyuli ɔni nlie ɔpɔnkɔ lɛlɔ na kewii katu-nwu kenye mmɔ ɔ́du-ma ku kewii kammɔ, na baasɛ bammɔ báduli-ma ɔlɔna ƒui bébweli na bémo.

¹ Amu na lɛ́nu ɔtu ɔdi ka ɔ́si katɔ ɔɔyu na ɔda kɔgba bonwu na ubo ɔyikun ɔni na uuti taabala kasuudikɔ ubu bonwu mmɔ kenye. Na úƒie liƒu kɔlakpi kɔni ndi kɔlakpi kɔkukudi kɔni baalɔ ukisine iye Satan. ² Na únyimi-ku úse akwa apimu unwi. ³ Na úbo-nwu útákya kasuudikɔ ubu ɔmmɔ kemo, na ɔ́kalɛ na ɔ́bala ubu ɔmmɔ kenye kalɛ na ɔ́sɔ ulátɔlɔ kadi bekyuli wetédu uwi ɔni na akwa apimu unwi ɔmmɔ webo kawɔlɔkɔ. Ɔmmɔ kama ni, ɔlɛka baƒɛnimi-nwu kɔgba kɔmmɔ uwi klukui ɔdi. ⁴ Na ɔmɛni kama ni, lɛ́nu agaboku adi. Na bekyuli bani na Katɔti úte ɔyikun ka batɛku bekyuli litemi ni, belie-nya lɛlɔ. Na lɛ́nu bekyuli babambadi ayu. Ama ndi bani nédie Blɔti Yesu kenye na básu Katɔti litemi. Anwuɔsu kayawi bekyuli békulo-ma eli. Ama ndi bani nétemwi eƒiebuo ɔmmɔ iye eƒiebuo ɔmmɔ baƒiɔ bani bése béte lɛlɔ ka bataakpa. Na bátasia-ma nwuna likpose lɛdi na bana atɛntɛ iye enu lɛlɔ. Bekyuli bamɛni básɔ báta bébelie ngba na bádiku Kristo lɛga akwa apimu unwi. ⁵ Na ɔmɛni ndi bekpine bɔgyila kudeedi. Bekpine bakladi ama bátata bátalɛ kekpine útédu uwi ɔni na akwa apimu unwi ammɔ ása. ⁶ Lɛlɔ lɛdubɔyɔ bekyuli kedee bani na Katɔti ɔdubɔgyila na bekpine bɔgyila kudeedi kemo. Na bekyuli bammɔ ni, kukpi kunyɔdi kɔ́sɔ kulákɛ ɔyikun na bana lɛlɔ. Mmomu badubo bakpane bunwini na bataakpanku bekyuli teete Katɔti ku Kristo. Na badubɔdiku-nwu lɛga akwa apimu unwi. ⁷ Na si uwi ɔni na akwa apimu unwi ammɔ ása ni, badubo Satan budie bɔsiku nwuna kasuudikɔ kakyakɔ mmɔ. ⁸ Na ɔdubo ubatɔlɔ kalɔ lɛlɔ bekyuli bani nkya kayawi ekpo ƒui, na baalɔ-ma na lɛsugba kemo banii Gog ku Magog. Na ɔdubɔsala-ma kalɛ na betékpo. Na bana bumomo bɔdubɔbla aani ɛpu kɔnwinimi. ⁹ Otogyi ɔmɛni ɔkɛ ɔɔví kalɔ kammɔ ƒui lɛlɔ. Na úbo úbaka ɔ́mana ɔma ɔni na Katɔti ɔɔyɔ́ na nwuna bekyuli kedee belie-nwu kemo mmɔ. Nsu ogya ɔ́si katɔ na úbo úbakyula-ma ƒui. ¹⁰ Na bébo ukisine ɔni nátɔlɔ-ma mmɔ bátákya lɛgyavonku bonwu lɛni mɔɔda ku ogya atabi mmɔ kemo kesii kani na eƒiebuo ɔmmɔ ku ɔkɔ kenye udiene bakya, na badubo abi buteebo usien ku ɔƒɛ usela uwi ƒui. ¹¹ Ɔmmɔ kama ni, lɛ́nu lɛgaboku bonwu ƒuala ƒuala lɛdi ka Katɔti ulie-ni lɛlɔ. Na ka ɔ́da ɔ́lɛ ni, kalɔ ku katɔ ƒui káyii na asɔ alánu-ka lɛla lɛdi na kesii kadi. ¹² Na lɛ́nu ka bekpine ƒui benye lɛgaboku lɛmɛni anumi, banamu ku benengu, na bébimi lɛku lɛdi béwi. Na básɔ bébimi ɔku ɔbambadi ɔni ndi ngba ɔku lɛnɔ béwi. Na lɛku lɛmɛni kemo na baanu taatɛku bekpine ƒui litemi ɔkɛnku ala ani na bábla na bénweni bákya lɛku lɛmmɔ kemo lɛlɔ. ¹³ Bekyuli bani ƒui nékpi ɛpu kemo bási bálɛ. Na bekpine ƒui lɛnɔ báta bálɛ kekpine ku kɔƒiɔtɔ kemo. Na Katɔti ɔ́tɛku ɔdi biala litemi ɔkɛnku ala ani na ɔ́bla lɛlɔ. ¹⁴ Béti kukpi ku kekpine kammɔ ƒui bébo bátákya lɛgyavonku kemo. Na ɔmɛni ndi kukpi kunyɔdi. ¹⁵ Na ukyuli ɔni na bétenweni-nwu lɛnyi bátakya ngba ɔku ɔmɛni kemo ni, béti-nwu bébo bákya lɛgyavonku lɛmmɔ kemo.

¹ Ɔmmɔ kama ni, lɛ́nu katɔ ku kalɔ kawɔdi. Ɔsika katɔ ku kalɔ kedeedi aka káyii, na ɛpu lɛnɔ ɔsɔ uuubo. ² Na lɛ́nu ɔma kedee ɔni ndi Yerusalem ɔwɔdi ka ɔ́yu ɔ́si Katɔti kudɔ na kayaa ɔdubo. Na báklibi-nwu aani kalɛ na baaklibi uleku ɔni béti beete ɔgyani. ³ Na línu lɛdi bonwu lɛdi ɔ́si lɛgaboku lɛmmɔ kudɔ ka lɛɛsu lɛnini, “Bɛnu! Katɔti keliekɔ káyu kébo bekyuli akɔ. Ɔdubulie-ma kudɔ na ama benwini-nwu bekyuli. Na Katɔti ɔlati ɔkya-ma akɔ na ɔdi-ma Kɔti. ⁴ Na ɔdubuni-ma imii biala na bana anumi. Na kukpi kɔsɔ kulakya lɛnɔ. Na keku ku kɔnyana buwulo ku ɔlɛ bunu lɛnɔ bɔdi bɔsɔ bulakya, ɔsika ala akukudi ƒui ávi.” ⁵ Amu na anwu ɔni nlie lɛgaboku lɛmmɔ lɛlɔ ɔ́su ɔnini, “Bɛnu! Lɛ́sɔku ala ƒui lɛ́bla ɔwɔdi.” Na ɔ́sɔ ɔ́su-mi ɔnini, “Nweni ala amɛni se, ɔsika adi etemila ani ndi ukyuli kama kekpokɔ, na adi etemila geen.” ⁶ Na ɔ́su-mi ɔnini, “Ɔ́sa! Ami ndi Alƒa ku Omega ɔni ndi lɛla biala kalɔ kesekɔ ku kawɔlɔkɔ. Na bani na utukwɛ ɔɔda ni, ndubute-ma ntu ƒaa na bani basiku libiɔ lɛni muute ngba ƒui kemo. ⁷ Ukyuli ɔni madi ekpidi lɛlɔ ni, ɔdubɔkɛ kadikɔ kamɛni. Na ami lɛdi-nwu Kɔti, na anwu wadi mina ubi. ⁸ Nsu bekyuli bani mbo liƒu ku bani nátaƒɔ bátadi ku bani muusé lɛlɔ ku bekyuli badune ku bayalɛ ku evo baƒɛne ku bani mɔɔkpá baƒiɔ ku ɔkɔ banyine ku bana udu ƒui ni, badubuduo lɛgyavonku lɛni mɔɔda ku ogya atabi mmɔ kemo. Na ɔmmɔ madi kukpi kunyɔdi kɔmmɔ.” ⁹ Ɔmmɔ kama ni, Katɔti batu maatɛ bani náda kɔlaku maatɛ kɔni néyi ku lɛbibo kpakplaa maatɛ mmɔ akɔ unwi ɔ́da ɔ́lɛ na ɔ́su-mi ɔnini, “Bo, na ndubɔtina-a Katɔti bekyuli bani nse aani Koƒonu Ubi ɔmmɔ uleku ɔni na ɔdubo buti mmɔ.” ¹⁰ Na útiku-mi na kɔyu kemo ɔ́tɔlɔku úsienku kɔbi bonwu kɔni nákuku lili. Na ɔ́tina-mi Yerusalem ɔma unengudi kedee ɔni náyu ɔ́si Katɔti kudɔ na kayaa ɔdubo. ¹¹ Na Katɔti bukeye bɔ́ƒɔ-nwu lɛlɔ ƒui. Na uukeye aani liseebi lɛni náƒɔ kuye geen na baalɔ-ni yaspa, na lise kede kede aani kanu atabi. ¹² Bátu kowodu kangyaa kɔdi báka bámana-nwu, na bakya-ku kɔyakun leevu-inyɔ. Na Katɔti batu leevu-inyɔ benye-ku kenye. Na bénweni Israelƒuɔ kaba leevu-inyɔ bammɔ bebi anyi básia kadi biala lɛlɔ. ¹³ Na ɔƒɛ katukɔ ni, kɔyakun ɛtɛ kɔkya. Na katɔ kakɛ ni, kɔyakun ɛtɛ kɔkya. Na kada kakɛ ni, kɔyakun ɛtɛ kɔkya. Na ɔƒɛ kanukɔ ni, kɔyakun ɛtɛ kɔkya. ¹⁴ Na kowodu kalɔ atabi ani bákya kowodu kɔmmɔ kalɔ ebo atabi leevu-anyɔ. Na bénweni Koƒonu Ubi ɔmmɔ batalane anyi leevu-anyɔ básia kadi biala lɛlɔ. ¹⁵ Amu na ɔtu ɔni nnye mɔɔtɛmiku-mi mmɔ ni, ɔda lɛbuala lɛkɔkula lɛni béti sika ugyiedi bábla ka ɔkɔku ɔma ɔmmɔ ku kɔyakun kɔmmɔ ku awodu ammɔ. ¹⁶ Na ɔma ɔmmɔ ɔtɛ lɛƒɛnyi ine bɔmmɔ ƒui lɛlɔ ɔni na nwuna bune ku bɔbɛbɛ ƒui bɔdi unwi. Na ɔ́kɔku ɔma ɔmmɔ ku nwuna lɛkɔkula. Na ubo liluku bɔkɔku apimu unwi ku eti leevu. Na nwuna linene ku bɔbɛbɛ ku bɔkuku ƒui búlieku lɛlɔ pɛpɛɛpɛ. ¹⁷ Ɔtu ɔmmɔ ɔ́kɔku kowodu kɔmmɔ butigbli, na kubo lɛgba eti ene ku leevu-ɛku aani kalɛ na bekyuli baakɔ́ku ala. ¹⁸ Yaspa aseebi bonwu ani náƒɔ kuye na béti bátu awodu ammɔ. Na ɔma ɔmmɔ ɔlati ɔdi sika ugyiedi na use kede kede aani kanu. ¹⁹ Na awodu ammɔ kalɔ atabi ani lɛlɔ na bátu awodu ammɔ basia ni, bákya-nya akya ku aseebi abuni lidu lidu ani náƒɔ kuye geen. Udeedi ɔdi liseebi lɛni baalɔ yaspa, na unyɔdi baalɔ sapir. Ɔtɛdi baalɔ yalkedon, na unedi baalɔ smardo. ²⁰ Ɔlɔndi baalɔ sardonik, na ɔkundi baalɔ sardis. Maatɛdi baalɔ krisolit, na maanedi baalɔ beril. Yaalenwidi baalɔ topas, na leevudi baalɔ krisopras. Leevu-unwidi baalɔ yiakint, na leevu-unyɔdi baalɔ ametist. ²¹ Kɔyakun leevu-inyɔ kɔmmɔ kɔdi aseebi leevu-anyɔ ani náƒɔ kuye geen, na ɔdi biala ɔdi liseebi libendi linwi. Na ɔma ɔmmɔ ɔblɔnu ɔdi sika ugyiedi ɔni na akana na anu avinku-nwu kemo aani kanu. ²² Na ńtanu kakpakɔ kadi na ɔma ɔmmɔ kemo, ɔsika Unwoti Katɔti ɔni ndi Ɔyikune Ƒui ku Koƒonu Ubi ɔmmɔ alati ndi ɔma ɔmmɔ kakpakɔ. ²³ Na ɔma ɔmmɔ uláwia ɔƒɛ ɔdi iye kɔbuli ka ute bukeye bɔdi, ɔsika Katɔti bukeye ndi-nwu bukeye, na ɔma ɔmmɔ asogya ndi Koƒonu Ubi ɔmmɔ. ²⁴ Na bukeye bɔmɛni na kadi ƒui bekyuli badubɔnu busie. Na kalɔ lɛlɔ baga badubuti bana agala beboku ɔma ɔmmɔ kemo. ²⁵ Na balakalɛ kɔyakun kɔmɛni kɔdubuwi uwi biala, ɔsika lɛdisa liiibo mmɔ. ²⁶ Na kadi bekyuli ƒui badubuti bana akɛla ku ɔbu bebeduo mmɔ. ²⁷ Nsu lɛla biala muusé lɛlɔ lileduo mmɔ kudii. Na bani ƒui mɔɔbla ala ani muusé lɛlɔ iye ala ani muukpó kɔƒa iye ala ani mɔɔtɔ́lɔ bekyuli ni, beleduo mmɔ. Mmomu bani anyi na bénweni bákya Koƒonu Ubi ɔmmɔ ngba ɔku kemo kani ndubuduo mmɔ.

¹ Ɔmmɔ kama ni, ɔ́tina-mi ketu kani ntu muute ngba. Ketu kammɔ kaagbá taasi Katɔti ku Koƒonu Ubi ɔmmɔ lɛgaboku kudɔ. Na buukeye aani kanu. ² Na ketu kammɔ kaagbá taavi ɔma ɔmmɔ ɔblɔnu ntɛ. Na kana lɛvi inyɔ bɔmmɔ lɛlɔ ni, kugyii kɔni muute ngba kunye ku kuna ebi lidu leevu-inyɔ bɔmmɔ, na kɔɔnwu ebi ammɔ kɔbuli biala. Na kugyii kɔmmɔ evete adi kuvo kɔni na beti babwi kalɔ ƒui bekyuli. ³ Ewida eeebo mmɔ. Mmomu Katɔti ku Koƒonu Ubi ɔmmɔ lɛgaboku lɛdubuse mmɔ na nwuna kabla bablane badubo-nwu lɛnyi buteemwi. ⁴ Badubɔnu-nwu anumi na nwuna lɛnyi lɛdubɔsia-ma atɛntɛ. ⁵ Lɛdisa lɛsɔ lilakya mmɔ. Na baláwia bukeye bɔdi taasiku asogya iye ɔƒɛ kudɔ, ɔsika Unwoti Katɔti ɔlati ndi bana bukeye na badubɔdi lɛga usela uwi ƒui. ⁶ Amu na Katɔti ɔtu ɔmmɔ ɔ́su-mi ɔnini, “Etemila amɛni adi ukyuli kama kekpokɔ na adi etemila geen. Na Unwoti Katɔti ɔni muuti nwuna Kɔyu teete nwuna kenye bediene ni, anwu nátala nwuna ɔtu ɔnii ubatina nwuna kabla ɔblane ala ani ndubo abalɛ na uwi klukui kemo.” ⁷ “Bɛnu! Ami Yesu ndubo uwi klukui kemo! Na lɛlɔ lɛdubɔyɔ ukyuli ɔni mada linyese lɛmɛni etemila ani nkya ɔku ɔmɛni kemo.” ⁸ Ami Yohane ni, ami ndi ukyuli ɔni nénu na lɛ́nu ala amɛni ƒui. Na uwi ɔni na línu na lɛ́nu-nya ni, lɛ́yu líbi kalɔ na Katɔti ɔtu ɔni nédie ala amɛni ɔ́tina-mi lɛgba akɔ na límwi-nwu aani Katɔti. ⁹ Nsu ɔ́su-mi ɔnini, “Tabla lɛni! Ami lɛnɔ kabla ɔblane ɔkpana na ndi aani ƒula kalɛ ku ƒula banwa kenye bediene babambadi ku bakladi bani mɔɔda etemila ani nkya ɔku ɔmɛni kemo ƒui kaduɛ. Katɔti kani na ɔlɛka emwi lɛni!” ¹⁰ Amu na ɔ́su-mi ɔnini, “Teti kenye kani na Katɔti údie na ɔku ɔmɛni kemo etemila tabɛla, ɔsika uwi ɔmmɔ úude. ¹¹ Ukyuli ɔni na likpidi na ɔɔyɔ́ ka utaabla ni, usie anumi utaabla likpidi. Na ukyuli ɔni mɔɔyɔ́ ka utaabla ala ani muusé lɛlɔ ni, usie anumi utaabla ala ani muusé lɛlɔ. Na ukyuli ɔni mɔɔbla ala siin ni, usie anumi utaabla ala ulu lɛlɔ. Na ukyuli ɔni nse kedee ni, usie anumi na ɔda lɛlɔ kedee.” ¹² “Bɛnu! Ami Yesu ndubo uwi klukui! Na ndanku lɛyuƒɔla lɛni námanku kabla biala nduboku, na mbaƒɔ ɔdi biala kayu na lɛla lɛni na ɔ́bla kenye. ¹³ Ami ndi Alƒa ku Omega, Udeedi ku Ukplodi, Kalɔ Kesekɔ ku Kawɔlɔkɔ. ¹⁴ “Lɛlɔ lɛdubɔyɔ bekyuli bani náklibi lɛlɔ bése aani kalɛ na baaƒɔ lɛwu sɛɛn. Ama ndubɔkɛ kuƒi ka badi kugyii kɔni muute ngba mmɔ ebi. Na badubɔsia kayakun mmɔ beduo Katɔ Ɔga Ɔma ɔmmɔ kemo. ¹⁵ Na bani ndubunye ɔba kama aani bakpɛwe ni, ama ndi bekyuli bani mɔɔƒɛ evo ku bani mɔɔbla lɛyalɛ ala ku bani mɔɔdú bekyuli ku bani mɔɔkpá baƒiɔ ku bekyuli bani ƒui mɔɔyɔ́ ka batɔlɔ bekyuli na ɔkɔ bɔnyi bɔɔda-ma ɔkwɛ. ¹⁶ “Ami Yesu nátala mina ɔtu lɛ́kya-a nnii ubedie ala amɛni kenye ute awɔ, Yohane, kalɛ na eti asu baƒɔtaadine akpa ammɔ ƒui. Ami ndi Kugyii Ugyiitu ɔmmɔ ɔni ndi Ɔga Dawid kaba kemo ubi. Ami ndi ɔtanta lɛyabi lɛni muukeye mmɔ.” ¹⁷ Katɔti Kɔyu kɔmmɔ ku Yesu bayɔne banii, “Bo!” Na ɔlɛka ukyuli biala ɔni muunú ɔmɛni lɛnɔ ɔsu ɔnii, “Bo!” Na bani ƒui na utukwɛ ɔɔda ni, bebo. Na bani ƒui mɔɔyɔ́ ni, babani ngba ntu bɔmmɔ ƒaa. Kayu kadi taƒɔ taƒɔ. ¹⁸ Mɔɔlɛ ukyuli biala ɔni muunú kenye kani na Katɔti údie na ɔku ɔmɛni kemo ka si úti lɛla lɛdi úbunku ala amɛni lɛlɔ ni, Katɔti ɔdubɔya na ɔgbankpi ɔni lɛlɔ kɔtɛ na bɔ́tɛmi na ɔku ɔmɛni kemo ubo-nwu lɛlɔ. ¹⁹ Na si lɛla lɛdi na ɔ́da údie na kenye budie ɔku ɔmɛni kemo lɛnɔ ni, Katɔti ɔdubudie ukyuli ɔmmɔ kadikɔ na ngba kugyii kɔmmɔ ebi lɛlɔ. Na ɔdubutile-nwu kuƒi ka uduo ɔma kedee ɔmmɔ kemo na katɔ. ²⁰ Yesu ɔni muudie ala amɛni kenye ni, ɔ́su ɔnini, “Ɛɛn, ndubo na uwi klukui kemo!” Amu na ami lɛnɔ lɛ́tuna nnii, “Ɔsia lɛni. O Blɔti Yesu, bo!” ²¹ Muuvele nnii lɛƒɔndia lɛni nási Blɔti Yesu kudɔ lɛsiaku Katɔti bekyuli. Ɔsia lɛni.