ƑILIPIƑUƆ

ƑILIPIƑUƆ

¹ Ami, Paulo ku Timoteo bani ndi Kristo Yesu kabla bablane ni, abu nénweni ɔku ɔmɛni. Na búti buuté amii Kristo Yesu badi ƒui ku baƒɔtaadine lɛkpa batɔnkune ku bebunkune bani ƒui nkya Ƒilipi. ² Na buuvele bɔnii lɛƒɔndia ku keyi buɛɛ kani nási Katɔti ɔni ndi bula Ɔti ku Blɔti Yesu Kristo kudɔ kasiaku-mii. ³ Uwi biala na bina kasusu kébo-mi lili ni, mɔɔgyá Katɔti enu na bina lili. ⁴ Na uwi biala na mɔɔkpali katɔ na bina lili ni, mɔɔkpali ku lɛlɔyɔ ⁵ ɔ́si kalɛ na bíbunku-mi ɔ́si limeyi lideedi lɛni na líti litemi buni lɛmmɔ líboku-mii úbedu ɔƒɛni ɔsu. ⁶ Na lɛ́ƒɔ lɛ́di ka Katɔti ɔni nése kabla kabuni kamɛni kalɔ na bina akɔ ni, ɔdubɔnu ka kabla kamɛni katáwɔlɔ na uwi ɔni na Kristo Yesu wasɔ webo. ⁷ Bina ala akya-mi kayi kemo geen uwi biala na ɔdi ulu lɛlɔ lɛnɔ ka use-mi lɛni. Ɔsika kuƒi kɔni na Katɔti úte-mi na ɔ́ya lɛ́kɛ nwuna litela ni, amii lɛnɔ bɛ́kɛ-nwu lɛlɔ kɔsia na uwi ɔni na ntɛ ɔtɔ mɛni ku uwi ɔni na mbo bɔnwuna ka likpo lite litemi lɛmmɔ na lidie-ni kenye lite bekyuli na baƒɔ-ni kpakplaa. ⁸ Na Katɔti ɔlati nnye-mi kama ka litemi geen na mɔɔsu nnii bina ala akya-mi kayi kemo geen aani kalɛ kani na Yesu Kristo ɔɔyɔ́-mii kalɛ. ⁹ Muuvele Katɔti nnii ɔya na bina bɔyɔ bɔni na bibo butaakɔ katɔ teebu na bɛkɛ lɛlati lɛni na biti bɛnu ala kemo kaduɛ, ¹⁰ kalɛ na bidie lɛla lɛni ndia ntulo. Mmɔ na bɛdubudie lɛlɔ na ala ani muusé lɛlɔ ƒui kudɔ na baládu-mii kɔtɔ na uwi ɔni kemo na Kristo wasɔ webo. ¹¹ Na bɛnwu ebi ani mɔɔtina ka bise siin na bina ngba bulie kemo ka bɛ́ƒɔ Blɔti Yesu Kristo bɛ́di ɔsu, na biti ɔbu ku bumwi bite Katɔti. ¹² Banwa, mɔɔyɔ́ ka lɛ́su-mii ka ala ani nálɛ ku-mi ni, ébunku na litemi buni lɛmmɔ lísie anumi líbu. ¹³ Ɔmɛni ɔsu ni, lɛla biala lɛ́bla nwaa na ɔ́ya na bekpone bani ƒui mɔɔgyumana aban ɔtɔ mmɔ ku bani ƒui nkya mɛni bánu báti ka ɔni ndi Kristo Yesu kabla ɔblane ɔsu na ntɛ ɔtɔ. ¹⁴ Na mina ɔtɔ bɔtɛ bɔmɛni bɔ́ya na mina banwa pii na Blɔti kemo básɔ bákɛ kayi buse bébu na bákana na básu Katɔti litemi lɛmmɔ, na bɔyia bɔdi bɔsɔ buuubo-ma kemo. ¹⁵ Na ɔdi sɔsɔ ka badi baasu Kristo litemi lɛmmɔ ɔsika beekpó kogyulo na baawia lɛnyi ɔsu. Nsu badi ama baasu-ni taasiku kasusu kabuni kemo. ¹⁶ Na bani mɔɔsu-ni ku kasusu kabuni mmɔ ni, baasu-ni ku bɔyɔ. Ɔsika bagyi ka Katɔti néti kabla kamɛni ɔ́kya-mi lɛkɔkɔ ka likpo na lɛgyumana litemi buni lɛmmɔ. ¹⁷ Nsu badi balásu Kristo litemi lɛmmɔ taasiku bana kayi kemo ƒui, mmomu ama alati bana lɛkɛ ɔsu. Na baakali ka baya na mina lɛbibo litaakɔ katɔ teebu ɔni na ntɛ aban ɔtɔ mɛni. ¹⁸ Nsu ɔmɛni ƒui ɔɔɔda! Lɛla lɛni kani mɔɔda-mi kubiti ndi ka Kristo lɛlɔ litemi na baasu. Na si baasu-ni taasiku kasusu kabuni iye kekpidi kemo ni, ami lɛlɔ lɛdubo-mi butaayɔ. ¹⁹ Ɔsika ngyi ka ɔkɛnku bina katɔ bɔkpali na mina lili ku Katɔti Kɔyu kebunku kani nási Yesu Kristo kudɔ ɔsu ni, ndubɔkɛ bɔnwuna. ²⁰ Na lɛla lɛni mɔɔwia na mina anu lɛnɔ asia kpakplaa ndi ka kabla kani mɔɔbla mɛni ni, kɔƒa kulekpo-mi. Mmomu na uwi biala kemo ku ɔƒɛni muedi ni, lɛkya ɔkplu na liti bumwi lite Kristo na mina ngba bulie ƒui kemo. Si ina nli ngba iye líkpi. ²¹ Na bi ndi ngba? Na mina kakɛ ni, anwu ndi si eli aabla kabla teete Kristo. Na kukpi ndububoku kɔsia utulo. ²² Na si bani nsie anumi na lɛsɔ lɛkya ngba bɔmɛni kemo ni, ndubɔkana na lɛbla ala abuni libu. Nsu ɔmani na ɔlɛka lidie? Naaati! ²³ Mina kasusu kéƒu na ala akpa anyɔ amɛni lɛlɔ. Ndubɔyɔ si lɛ́tɔlɔ na lísie nkya Kristo kudɔ. Nka ɔmɛni ɔdia-mi utulo. ²⁴ Nsu amii ɔsu ni, si nkya-mii kudɔ ɔdia utulo. ²⁵ Nsu ngyi ka ndubulie kayawi kamɛni kemo ku-mii na liti libunku bina anumi busie na bɛkɛ kubiti na bina bɔƒɔtaadi kemo. ²⁶ Kalɛ na si nkya-mii kudɔ ni, bina lɛlɔyɔ lɛdubɔyɔ-mii na Kristo kemo geen ɔkɛnku ami ɔsu. ²⁷ Ɔƒɛni lɛla lɛni ntulo ndi ka bina ngba bulie bɔbla aani kalɛ na litemi buni lɛmmɔ lɛɛtina ɔsika ɔmɛni na Kristo ɔɔwia. Na si líbo ḿbanu-mii iye línu-mii kɔku ni, ndubunu ka binye kpakplaa na kɔyu kemo biikpó ku kasusu kenwi na bina bɔƒɔtaadi kemo teete litemi buni lɛmmɔ. ²⁸ Bitayia bina bekisine. Mmomu binye kpakplaa uwi biala kemo. Na ɔmɛni ndubɔtina-ma ka Katɔti ɔdubɔƒɔ-mii na ɔyila-ma udu. Ɔsika Katɔti muukpó bina kekpo teete-mii na anwu mɔɔyá na bɛɛdi kekpo kammɔ lɛlɔ. ²⁹ Na úte-mii kuƒi ka bimwi Kristo, na ɔɔɔdi ka bɛƒɔ-nwu bɛdi ɔsu kani na ɔ́sa. Mmomu ɔdi ka amii lɛnɔ bibo abi na anwu ɔsu. ³⁰ Kekpo kani nnye muukpó mɛni ni, amii lɛnɔ bibunku-mi. Kekpo kamɛni kani na bɛ́nu ka lɛ́kya ńteekpo. Na aani kalɛ na bínu ni, aka kani na mmua nnye muukpó.

¹ Mɔɔƒɔ́ taadi ka bina ngba bɔni na bibo na Kristo kemo ɔ́ya na bɛɛkya ɔkplu. Na nwuna bɔyɔ bɔɔsia-mii kɔnu. Na bɛ́bla ku nwuna Kɔyu unwi, na bɛda lɛlɔ kɔkɔɔkɔ, na bina lɛlɔ lɛɛkywí bina lɛlɔ kaƒɔ. ² Na si use lɛni sɔsɔ ni, na mɔɔkya-mii ogya ka bɛya na lɛlɔ lɛyɔ-mi lɛwɔlɔ, na biti bɛtina ka biiti kasusu kenwi na bɛɛyɔ́ lɛlɔ na bɛdi benwi na kɔyu ku kasusu kemo. ³ Bitabla lɛla lɛdi bitasiaku amii lɛti lɛkɛ lɛlɔ iye bɛbla na biti bɛtina lɛlɔ. Mmomu biboku lɛlɔ kalɔ bite lɛlɔ. Na uwi biala ni, ɔdi biala utaabu ɔkpanadi teetulo lɛlɔ. ⁴ Na bɛwia bina bakpana bɔdia na ɔɔɔdi awɔ kani ɔdi. ⁵ Bina kasusu ɔlɛka kabla kenwi ku Kristo Yesu kadi. ⁶ Anwu nkɛnku Katɔti ukyuli udu uwi biala kemo. Nsu útata útenye ɔnii nwuna udu ɔmmɔ ute-nwu kuƒi kɔdi. ⁷ Mmomu ɔ́bla lɛlɔ aani si ɔɔɔdi lɛla biala. Ɔ́bla lɛlɔ aani ukyuli ɔni mɔɔbla ukyuli bamba kabla. Ɔsika úbo aani ukyuli ɔyawine kalɛ. ⁸ Ɔmmɔ ɔsu ni, úboku lɛlɔ kalɔ na únu Katɔti litemi utédu ka úkpi ugyii lɛlɔ kukpi muedi. ⁹ Ɔkɛnku ɔmɛni ɔsu ni, Katɔti ɔ́talaku-nwu katɔ na úte-nwu kenyekɔ kenengudi ƒui. Na úte-nwu lɛnyi lɛni ntulo na anyi ƒui akɔ. ¹⁰ Na si bálɔ Yesu lɛnyi ni, ɔlɛka ɔdi biala ɔlɛ akɔnkɔ kalɔ, ama bani nkya katɔ ku kayawi ku kalɔ kemo ƒui! ¹¹ Na ukyuli biala ɔdubudie kenye ɔnii Yesu Kristo ndi Blɔti. Na beti bumwi bete Unwoti Katɔti. ¹² Anwuɔsu ni, mina bakpana bayɔne, aani kalɛ na bɛɛdi mina litemi lɛlɔ si nkya-mii kudɔ ni, lɛni kani na ɔdi ka bɛdi-nya lɛlɔ bitulo si uwi ɔni na liiibo-mii kudɔ lɛnɔ. Bise anumi na bitaabla ala ani mɔɔtina ka Yesu ɔ́ƒɔ-mii ngba, na biti ɔbu geen bite Katɔti. ¹³ Ɔsika Katɔti ɔkya-mii akɔ ɔɔbla kabla na bina akɔ uwi biala kalɛ na ɔbla-mii na bɛkana na bɛdi ala ani na ɔ́su-mii lɛlɔ. ¹⁴ Bitaabla lɛla biala basu-mii, na bitata bitenye lɛlɔ lɛlɔ, na bitakyaku lɛlɔ unyeƒi. ¹⁵ Mmɔ na bɛdubɔlɛ kɔtɔ bɔdu biala kemo na bɛbla sɛɛn aani Katɔti bebi bani na likpidi liiibo-ma lɛlɔ. Na ka bilieku bekyuli bekpidi bani nkya kayawi kani nébie mɛni kemo ɔsu ni, bikeye na bana akɔ aani kalɛ na ayabi eekeye na kayaa. ¹⁶ Na bɛda ngba litemi lɛmmɔ kaduɛ. Na si bɛ́kana na bɛ́bla ɔmɛni ni, ndubɔkɛ kenyekɔ na lɛkun lɛmɛnɛ na limeyi lɛni lɛlɔ na Yesu wada walɛ. Ɔsika ɔdubɔtina ka ńtekeli usi ɔmmɔ keeke iye ńtebo abi ńtewiakun. ¹⁷ Nsu si ina mina ubugya na bada beewi kalɔ aani kalɛ baabla akpala na bina lili kalɛ na bina bɔƒɔtaadi buusié anumi ni, lɛlɔ lɛdubɔyɔ-mi na kubiti kɔda-mi na bina ƒui ɔsu. ¹⁸ Lɛni kani na ɔdi ka lɛlɔ lɛyɔ-mii na bɛya na ebiti ada ami ku-mii ƒui. ¹⁹ Si Katɔti ɔ́tunaku-mi ni, uwi klukui kama ndubɔtala Timoteo lɛkya-mii, kalɛ na lɛkɛ ɔlɔkplu si línu bina lɛlɔ lɛla lɛdi lɛsiku-nwu kudɔ. ²⁰ Liiibo ukyuli ɔdi liiitulo anwu ɔni na ami ku-nwu kasusu kaabla kenwi. Ɔsika kalɛ na use-mi na bina lɛlɔ ni, lɛni kani na ɔɔbla-nwu. ²¹ Nsu ukyuli bamba biala ni, anwu ɔlati bɔdia lɛlɔ na nwuna kasusu kasia na kaaakɛnku Yesu Kristo ulu lɛlɔ. ²² Nsu Timoteo anwu ni, amii alati bɛgyi kalɛ na nwuna udu buni ɔmmɔ use. Ɔsika aani kalɛ na ubi ku ɔti baabla kabla taasala ni, lɛni geen na úbunku-mi na litemi buni lɛmmɔ bɔsu kemo. ²³ Anwuɔsu mbo lɛnunsia ka ndubɔtala-nwu lɛkya-mii kɔnakunwi si lɛ́nu kalɛ na ala aavínku-mi. ²⁴ Na lɛ́ƒɔ lɛ́di na Blɔti lɛnyi kemo ka ni, uwi uletu ami lɛnɔ ndububo-mii kudɔ. ²⁵ Nsu lɛ́nu ka ɔlɛka lɛtala Epaƒrodito na ubo-mii kudɔ. Ɔdi mina ɔnwani ɔni nényeku-mi aani ukpone na bɔ́bla Katɔti kabla. Na ɔdi bina ukyuli ɔni na bɛ́tala ka ubo ubanu-mi lɛlɔ. ²⁶ Anwu lɛnɔ unye kpakplaa ka ɔnu-mii. Na ɔdi lɛla lɛni muukpóku-nwu geen ɔsika ɔ́ti ka bínu ka úbeƒi. ²⁷ Sɔsɔ úbeƒi geen na úbu blii suɛ nka úkpi. Nsu Katɔti ɔ́nu-nwu kɔnyana. Na ɔɔɔdi anwu lɛti na ɔ́nu kɔnyana, mmomu ami lɛnɔ. Si ɔɔɔdi lɛni ni, nka mina lɛlɔ lɛdubɔkywi kaƒɔ geen. ²⁸ Anwuɔsu na mɔɔwia geen ka lidie-nwu ulu kalɛ na si bɛ́nu-nwu ni, na kubiti kɔsɔ kɔda-mii. Na ami lɛnɔ mina kɔnyana buwulo bubo kalɔ. ²⁹ Anwuɔsu bigyingya enu na bɛƒɔ-nwu ku kubiti na Blɔti lɛnyi kemo. Na biti ɔbu bite bekyuli bani ƒui nse aani kalɛ na use. ³⁰ Ɔsika úti nwuna ngba ɔ́kpa na úbu blii suɛ nka úkpi ɔ́si Kristo kabla ɔsu. Na úte-mi kebunku kani amii alati bítakana-mi bute.

¹ Ukplodi ni, mina banwa, bɛya na lɛlɔ litaayɔ-mii na Blɔti kemo. Lɛɛɛdaku-ni si nsɔ mɔɔsia kama teenweni-mii ala ani na líinweni ḿbavi. Na si ina lɛ́bla lɛni muedi ni, ɔdi bina kebunku. ² Bɛnu ala ekpidi bablane bani mɔɔbla ala aani bakpɛwe bebuo bekpine mmɔ bɛti. Badi bekyuli bani nnye-mii lɛlɔ ka ɔlɛka bikulo bina ago. ³ Abu ndi bekyuli bani mmomu nékulo ago, ɔsika buumwi Katɔti ɔkɛnku nwuna Kɔyu lɛlɔ na bɔɔkɛ́ ebiti ka abu ku Kristo Yesu bɔ́bla unwi ɔsu. Na búteti lɛlɔ bútasia ɔlɔna lɛlɔ ɔdi ala bɔbla lɛlɔ. ⁴ Na si ukyuli ɔdi ɔɔkali ka ɔkana uti lɛlɔ ɔsia ɔlɔna lɛlɔ ɔdi ablala lɛlɔ ni, na nka ami mbo kuƒi kɔmmɔ ntulo. ⁵ Uwi ɔni na lɛ́kɛ Kwasida unwi ka báwɔ-mi kani na békulo-mi lego. Na ami lɛnɔ ndi Israelni. Na lɛ́si Benyamin kaba kemo. Na mina bati kuuku badi Hebriƒuɔ geen. Na si Mose ɔda bubo lɛti pɛ lɛlɔ bɔdi ɔsu ni, na nka Ƒarisini na ndi. ⁶ Na nnye ɔda bubo bɔmɛni lɛlɔ kaduɛ. Na ɔkɛnku ɔmɛni ɔsu líkpoku Kristo baƒɔtaadine lɛkpa lɛmmɔ. Na si banii ɔda bubo bɔmmɔ lɛti pɛ lɛlɔ bɔdi na baanu ukyuli ɔni nse siin ni, na nka likpidi lɛdi liiibo-mii lɛlɔ. ⁷ Nsu ɔni na nka ɔlɛka lɛnu ala ammɔ aani kɔsia kɔdi ni, ɔƒɛni mɔɔnu-nya aani ala keeke ɔ́si Kristo ɔsu. ⁸ Na ɔɔɔdi ɔmmɔ lɛti. Mɔɔnu lɛla biala aani lɛla keeke si líti mɔɔkɔ́ku lɛla lɛni náƒɔ kuye geen mɛni, na ani ndi ka lɛ́ti Kristo Yesu ɔni ndi mina Ɔti. Na anwuɔsu ni, líbo lɛla biala líwiakun. Na lɛ́nu-nya aani kebu alakpi kalɛ na ami ku Kristo bɔbla unwi. ⁹ Na mɔɔwia ka liti mina lɛlɔ ƒui lite-nwu. Ɔmɛni ɔdubɔtina ka mina siin bɔbla útasi ami ɔlati kudɔ aani bɔni udu na bekyuli baakali ka baakɛ́ ɔkɛnku ɔda bubo lɛlɔ bɔdi kemo, mmomu bɔkɛnku Kristo bɔƒɔtaadi kemo. Na siin bɔbla bɔmɛni nási Katɔti kudɔ na bɔdanku bɔƒɔtaadi. ¹⁰ Na lɛla lɛni kani na mɔɔwia ndi ka lɛti Kristo. Na ɔyikun ɔni náya na ɔ́ta ɔ́lɛ bekpine akɔ ɔkya-mi lɛlɔ kemo. Na liboku-nwu abi na lɛblaku-nwu unwi na nwuna kukpi kemo. ¹¹ Na ntaasia anu ka ami lɛnɔ mata malɛ kekpine na ulu ɔmmɔ kani lɛlɔ. ¹² Na ɔɔɔdi bɔsu na nda nnii lɛ́ɛdi lɛlɔ iye ami lɛ́ɛbla sɛɛn lɛ́wɔlɔ. Mmomu nnye kpakplaa ka lɛkɛ lɛyuƒɔla lɛni na Kristo Yesu ubo ute-mi. Na ani ndi ka ɔya na línwini nwuna ɔdi. ¹³ Banwa, ɔɔɔdi bɔkɛ na lɛ́ɛkɛ lɛyuƒɔla lɛmmɔ. Mmomu lɛla linwi lɛni na mɔɔbla ndi ka lɛyiƒla ala aani na lɛ́bla lɛ́vi. Na lɛkya ɔkplu na likpo ntédu kawɔlɔkɔ. ¹⁴ Anwuɔsu muukeli usi na likulo kabuli kalɛ na lɛkɛ lɛyuƒɔla lɛni na Katɔti ɔ́lɔ-mi ka libo mbaƒɔ na katɔ na Kristo Yesu ɔsu. ¹⁵ Na abu bani ƒui nésie anumi na bɔƒɔtaadi kemo ni, ɔlɛka bɔkɛ kasusu kamɛni. Nsu si badi bebo kasusu kabambadi ni, Katɔti ɔdubɔya na ɔmɛni ɔbla-mii nwaa. ¹⁶ Na lɛla lɛni námanku ndi ka bɛya na bula ngba bulie bɔ́manku kesii kani na búusie anumi búbedu. ¹⁷ Banwa, bisie anumi na bitaatɛya mina udu, na bɛtɛya udu ɔbuni bɛsiaku bani nli ngba bɔbuni bɔni na búlie bɔtina-mii lɛlɔ. ¹⁸ Lɛ́ɛsu-mii kɔlɛ kɔlɛ ḿbavi, na ɔƒɛni nsɔ mɔɔsu-mii ku keku buwulo ka bekyuli pii bakya-mii akɔ ɔni na bana ngba bulie bɔ́ya na bénwini bekisine béte Kristo kukpi kɔni na úkpi na ugyii lɛlɔ. ¹⁹ Na ɔdubɔwɔlɔku-ma na bakywi na lɛgyavonku kemo. Ɔsika bana kaƒɔ kani na beemwi. Na baatina lɛlɔ na ala ani na nka ɔlɛka ekpo-ma kɔƒa lɛlɔ. Na kayawi ala lɛlɔ kasusu kani na beeti. ²⁰ Nsu abu ni, bula ɔma ndi Katɔ Ɔga Ɔma. Na bunye bɔgya bula Ɔƒɔne ɔni ndi Blɔti Yesu Kristo. ²¹ Na ɔdubɔvumana bula kayawi ɔlɔna kpɛtɛ kpɛtɛ ɔmɛni na ɔbla-nwu aani nwuna ɔlɔna ɔni muukeye mmɔ kalɛ ɔkɛnku ɔyikun ɔni na ubo na ɔɔyá na lɛla biala liiboku lɛlɔ kalɔ teete-nwu kenye.

¹ Anwuɔsu ni, mina banwa bayɔne ɔni na naaanu-mii ni, kɔyɔ kúwi-mi! Bɛɛkya-mi kubiti geen na mɔɔtalaku lɛlɔ katɔ na amii ɔsu. Banwa bayɔne geen, lɛni na ɔdi ka binye kpakplaa na Kristo kemo. ² Muuvele Euodia ku Sinteke lɛnɔ ka benu lɛlɔ kalɔ na basɔ belie aani banwa belekubi na Blɔti kemo. ³ Na amii lɛnɔ aani mina kabla bablane bakpana ni, mɔɔyɔ́ ka bibunku beleku bamɛni. Ɔsika báblaku-mi kabla na bɔ́kana na búgyingya litemi buni lɛmmɔ. Bɔ́bla ala amɛni ku Klement lɛnɔ ku banwa kabla bablane bakladi bani anyi na bénweni bakya Katɔti Ngba Ɔku kemo. ⁴ Na mɔɔsu-mii nnii bɛya na lɛlɔ litaayɔ-mii na Blɔti kemo. Na nsɔ mɔɔsia kama nnii bɛya na lɛlɔ litaayɔ-mii. ⁵ Bɛya na ukyuli biala ɔnu ɔti kalɛ na bɛda lɛlɔ buɛɛ. Ɔsika Blɔti bɔsɔ bubo bɔmmɔ búude. ⁶ Ɔdi biala utekpoku lɛlɔ na lɛla biala lɛlɔ, mmomu bitaakpali Katɔti uwi biala kemo, na bitaasu-nwu ala ani bɛɛwia. Na si bɛɛkpali-nwu ni, na bitaagya-nwu enu. ⁷ Na Katɔti ɔni muute keyi buɛɛ bɔni ntulo ɔyawine kalɔ bunu ɔdubɔgyumana bina kayi ku kasusu ƒui ɔni na biliku Kristo Yesu. ⁸ Na ukplodi ni, banwa, biti bina kasusu bɛsia ala ani ndi etemila geen lɛlɔ ku ala ani mbo ɔbu ku ala ani nse siin ku ala ani nse sɛɛn ku ala ani mɔɔdia bɔnu ku ala ani náƒɔ lɛnyi ku ala ani ndia geen ku ala ani námanku bumwi lɛlɔ. ⁹ Biti mina ɔbladu ku mina etemila ani ƒui na bínu na bɛ́tɛya bɛsiku-mi kudɔ bɛkya kabla bɔbla kemo. Na Katɔti ɔni muute keyi buɛɛ ni, ɔdubulieku-mii. ¹⁰ Lɛlɔ lɛɛyɔ́-mi geen na Blɔti kemo ka bɛ́sɔ bɛ́bla kasusu kawɔdi na mina lɛlɔ bɔnu lɛlɔ. Ɔɔɔdi ɔni na bilánu-mi lɛlɔ ɔsu. Mmomu kuƒi nátatɛ ka bɛbla lɛni bite-mi. ¹¹ Na ɔɔɔdi bɔsu na mɔɔsu nnii mɔɔyaki lɛla lɛdi, mmomu ka lɛ́tɛya kalɛ na lɛla biala na lɛ́kɛ liduku-mi ɔsu. ¹² Na ngyi kalɛ na lɛwaba ku lɛlakɛ lise na lɛla biala kemo. Na lɛ́tɛya lɛbɛla lɛni mɔɔtina-mi kalɛ na lɛti lɛlɔ bɔda na kesii biala ku uwi biala kemo. Na kɔka kemo o-o, bumo o-o, lɛkɛ o-o, iye ayaki kemo o-o ni, nnye nte ana ƒui. ¹³ Mɔɔkana na mɔɔbla lɛla biala ɔkɛnku Kristo ɔyikun ɔni na úte-mi ɔsu. ¹⁴ Nsu bɛ́bla-nwu kaduɛ ka bíbunku-mi na mina lɛbibo kemo. ¹⁵ Na amii Ƒilipiƒuɔ ni, amii alati bɛgyi geen ka uwi ɔni na lɛ́tɔlɔ Makedonia na líse kalɔ mɔɔkɔ́ litemi buni lɛmmɔ lɛsa ni, amii kani ndi baƒɔtaadine lɛkpa lɛni néte-mi kebunku na lɛla lɛni na lɛ́bla líte-mii kenye. ¹⁶ Na ɔni lɛ́kya Tesalonika muedi ni, ka mɔɔwia kebunku ni, bíbunku-mi bítulo kunwi. ¹⁷ Na ɔɔɔdi etela na mɔɔwia lite lɛlɔ, mmomu lɛla lɛni mete-mii kɔsia na katɔ na mɔɔsia anu. ¹⁸ Na bɛ́ƒɔ-mi kabla kayu ƒui. Na kayu kammɔ kétulo kalɛ na ɔ́manku muedi. Etela ani ƒui bíti bímene Epaƒrodito mɛni ni, émo-mi! Etela ammɔ ese aani akpala ƒɛƒɛɛ ani béti bákpa béte Katɔti, na áyɔ-nwu kaƒɔ, na aada-nwu kubiti. ¹⁹ Na mina Katɔti ɔdubute-mii etela ani ƒui bɛɛwia ɔkɛnku Kristo Yesu lɛkɛ ku bukeye kemo. ²⁰ Bɛya bumwi Bula Ɔti Katɔti ɔ́si ɔƒɛni úsela ƒui. Ɔsia lɛni. ²¹ Mɔɔkya Katɔti bebi bani ndi Kristo Yesu badi ƒui kenye-oo! Na banwa bani nkya-mi kudɔ mɛni lɛnɔ begyele-mii o-o! ²² Katɔti bekyuli bani ƒui nkya mɛni beegyele-mii. Ɔni ntulo ndi bekyuli bani nkya Kaesare kaduli. Ɔsia lɛni. ²³ Na Blɔti Yesu Kristo lɛƒɔndia lɛsiaku bina ƒui.