MARKO

MARKO

¹ Ɔmɛni ndi litemi buni lɛni nkɛnku Yesu Kristo lɛlɔ ɔni ndi Katɔti ɔlati ubidi. ² Kukuuku ni, Katɔti Kenye Udiene Yesaia únweni úse ka Katɔti ɔ́su Ubidi ɔnini, “Ndubɔtala ɔtu ɔdi na wagyu watɔ-ɔ, kalɛ na ɔklibi bekyuli ute ƒula bubo. ³ Adubunu ka ukyuli ɔmɛni ɔkɛ ɔɔva na ketele kemo taasu ɔnini, ’Binye kagyumana bite Blɔti. Bɛklibi bina lɛlɔ kaduɛ bite nwuna bubo!’ ” ⁴ Ɔtu ɔmɛni ndi Yohane. Anwu nébo úbelie ketele kemo, kesii kani na ɔɔkpila bekyuli ntu na ketu kemo aani kalɛ na Yudaƒuɔ baabla kalɛ. Na ɔɔkɔ́ lɛsa ka ɔlɛka bekyuli benwini kayi na bada ekpidi bɔbla baya na baƒɔ ntu bɔkpila ɔdi ɔmmɔ, na Katɔti ɔdubuti bana alaekpidi ɔkyiɛ-ma. ⁵ Bekyuli pii bási Yudea kalɔ lɛlɔ ku bana ɔma unengudi ɔni baalɔ Yerusalem bésie ketele kamɛni kemo béténu Yohane litemi. Bédie bana ekpidi kalɔ béte Katɔti, na Yohane ɔ́kpila-ma ntu na ketu kani baalɔ Yordan kemo. ⁶ Uwi ɔmɛni kemo ni, Yohane ɔkya ɔƒlumu linwini awu, na úti ebuo ɔku kabuli ɔ́da kevobi. Nwuna adila ani na ɔɔdi ndi uwɔ ku baalɔlɔ bani muubile edula. ⁷ Nwuna linyesia lɛni lɛlɔ na ɔɔkɔ́ lɛsa ndi ɔnii, “Ukyuli ɔni nkpɛ-mi kama ɔdubo ni, anwu utulo-mi ƒui. Ńtedu ka lɛbla kabla kadi lite-nwu muedi. ⁸ Ami ni, ntu na muuti taabla bula bɔkpila ɔdi. Nsu anwu ndubuti Katɔti Kɔyu ɔkpila-mii.” ⁹ Uwi útetu asa na Yesu ɔ́si ɔma ɔni baalɔ Nasaret na Galilea kalɔ lɛlɔ úbo, na ɔ́ƒɔ Yohane ntu bɔkpila ɔdi na Yordan kemo. ¹⁰ Ka Yesu ɔ́nya ɔ́lɛ ntu bɔmmɔ kemo ni, ɔ́nu ka katɔ kébimi na Katɔti Kɔyu kɔ́si kɔɔyu-nwu lɛlɔ aani aasɛ. ¹¹ Na lɛdi lɛdi lɛ́si Katɔ lɛɛsu lɛnii, “Awɔ ndi mina ubi ɔni náƒɔ-mi kuye, na kubiti kɔɔda-mi ƒula lɛlɔ.” ¹² Kɔnakunwi ni, Katɔti Kɔyu kɔ́kpanku Yesu kúsienku ketele kemo, kesii kani na beƒiebuo bakya. ¹³ Anwu lɛti úlie mmɔ emeyi aavlene. Uwi ɔmmɔ kemo na Satan úkpoku Yesu ɔ́nu si wasiaku-nwu. Ɔmɛni kama ni, Katɔti batu bébo bébebunku-nwu na bákya-nwu ɔkplu. ¹⁴ Uwi ɔni na béƒie Yohane ɔni mɔɔbla ntu bɔkpila ɔdi bákya ɔtɔ ni, Yesu ɔ́tɔlɔ úsie Galilea na útásu Katɔti litemi buni mmɔ. ¹⁵ Ɔkya ɔɔsu ɔnini, “Uwi ɔbuni ɔmmɔ úudu. Katɔti lɛga bɔdi uwi úude. Binwini kama bɛkya bina ekpidi na bɛ́ƒɔ litemi buni lɛmɛni bɛdi!” ¹⁶ Ka Yesu ɔkɛ ɔɔví na ɛpu ɔdi kudɔ na Galilea kalɔ lɛlɔ ni, ɔ́nu asawu bewine inyɔ badi bani ndi Simon ku ɔnwani Andrea ka bakya beewi asawu. ¹⁷ Amu na Yesu ɔ́su-ma ɔnii, “Bibasiaku-mi, na matina-mii kalɛ na bidie bekyuli biboku Katɔti kudɔ.” ¹⁸ Na kɔnakunwi ni, báda bana lɛsawu béwi na báta básiaku-nwu. ¹⁹ Úsie anumi blii úbu na ɔ́nu banwani inyɔ badi bani ndi Sebedeo bebie Yakobo ku Yohane. Na belie bana ɔkɔlɔ kemo baaklibi bana lɛsawu. ²⁰ Ka Yesu ɔ́nu-ma kani na ɔ́lɔ-ma. Ama lɛnɔ báta kɔnakunwi na báda bana ɔti Sebedeo ku nwuna kabla bablane lɛti pɛ bákya ɔkɔlɔ kemo, na básiaku Yesu. ²¹ Yesu ku nwuna basiakune bamɛni bésie bétéduo ɔma ɔni baalɔ Kapernaum. Na lɛnwunameyi lɛni nébo na bana mmɔ busie kama ni, Yesu úsie bana kasalakɔ na úsie ɔkya ɔɔsu litemi buni. ²² Ɔ́bla bekyuli bani nénu nwuna ala bɔtina kalɛ kadi, ɔsika uuuse aani ama bani baatina ɔda bubo. Mmomu ni, ɔɔtina ala ku ɔyikun taasiku nwuna kayi kemo. ²³ Uwi ɔmmɔ kani kemo ni, ɔnana ɔdi ɔni na kɔyu kukpidi kulie-nwu lɛlɔ ɔkya kasalakɔ mmɔ na ɔ́va momoomo ɔnini, ²⁴ “Yesu Nasareni, bi na aawia asiku bula kudɔ? Bubo na ébo anii abakyula-bu? Ngyi ukyuli ɔni na adi. Awɔ ndi Katɔti Ɔtalane Kedee!” ²⁵ Yesu ɔ́bala kɔyu kɔmmɔ ɔnini, “Da bɔtɛmi ya! Na avi alɛ ɔnana ɔmmɔ kemo.” ²⁶ Kɔyu kɔmɛni kɔ́kunku ɔnana ɔmɛni momoomo na kɔ́ya-nwu ɔ́va asa na kɔ́vi kɔ́lɛ-nwu lɛlɔ kemo. ²⁷ Ɔ́bla bekyuli bani nnye ƒui yaa na béye lɛlɔ banii, “Bi litemi lɛdi mɛni? Bi bɔkpa bɔwɔdi udu na bɔmɛni bɔdi? Ukyuli ɔmɛni ubo ɔyikun ɔni na ɔɔtɛmi ku ayu ekpidi na eenú-nwu litemi!” ²⁸ Anwuɔsu Yesu lɛlɔ litemi lígyingya na Galilea kalɔ lɛlɔ ƒui. ²⁹ Yesu ku nwuna batɛyane ku Yakobo ku Yohane bálɛ kasalakɔ mmɔ, na bátɔlɔ bésie Simon ku Andrea kaduli. ³⁰ Ka bétéduo mmɔ ni, bekyuli badi básu Yesu ka Simon ulekudi uni uuƒi ɔtɛ ɔni na lɛlɔ lɛbi-nwu. ³¹ Anwuɔsu Yesu úsie útéduo-nwu kudɔ, na úƒie-nwu kɔnu ɔ́da na ɔ́tala-nwu únyene. Kɔnakunwi na nwuna ɔlɛ ɔ́da-nwu ɔ́ya, na ɔ́ta na úte-ma adila. ³² Ka useyi uwi údu ni, bekyuli béti balɛne pii ku bekyuli bani na ayu ekpidi asiaku-ma béboku Yesu banii ɔbwi-ma. ³³ Na ɔma ɔmmɔ bekyuli ƒui bébenye kayakun mmɔ baanu. ³⁴ Yesu ɔ́bwi bekyuli pii bani muuƒi lɛlɛ lidu lidu na ɔ́gya ayu ekpidi pii lɛnɔ ɔ́lɛku bekyuli bani na ayu ekpidi asiaku-ma lɛlɔ. Ka Yesu ɔgyi ɔnii ayu amɛni agyi ukyuli ɔni na ɔdi ɔsu ni, útatuna ka ayu ammɔ asu lɛla lɛdi asiku nwuna lɛlɔ. ³⁵ Ɔtanta tutuutu asa na kadi kadubɔda ni, Yesu ɔ́ta ɔ́lɛ kaduli mmɔ. Na ɔ́lɛ ɔma ɔmmɔ kemo úsie kesii kani na ukyuli ɔdi biala uuude, na útákpali katɔ. ³⁶ Kama ni, Simon ku nwuna bakpana bésie bakya baawia Yesu. ³⁷ Na uwi ɔni bánu-nwu ni, básu-nwu banini, “Bekyuli pii bakya baawia-a!” ³⁸ Nsu Yesu ɔ́su-ma ɔnini, “Bɛya na busie lɛma lɛbambadi lɛnɔ. Ɔlɛka lɛsu ama lɛnɔ litemi buni lɛmɛni, ɔsika ɔmɛni ndi mina kabla kani na líbo mabla na kayawi kemo.” ³⁹ Anwuɔsu úsie ɔ́vi Galilea kalɔ kesii biala. Ɔkɛ ɔɔsu litemi buni na kasalakɔ, na ɔɔgyá ayu ekpidi taalɛku bekyuli lɛlɔ lɛnɔ. ⁴⁰ Ɔnana ɔdi ɔni muuƒi ɔlɛgyie úbo Yesu kudɔ. Ɔ́lɛ akɔnkɔ, na úvele-nwu ɔnii ubunku-nwu. Ɔ́su Yesu ɔnii, “Si aayɔ́ ni, akana na abwi-mi na lɛlɔ lɛbla-mi sɛɛn.” ⁴¹ Nwuna lɛlɔ lɛ́kywi Yesu kaƒɔ, anwuɔsu únene kɔnu na útuku-nwu. Amu na ɔ́su-nwu ɔnini, “Mɔɔyɔ́. Lɛlɔ lɛbla-a sɛɛn ƒui!” ⁴² Kɔnakunwi ɔlɛ ɔmmɔ ɔ́ba-nwu. ⁴³ Mmɔ kani na Yesu ɔ́su-nwu ka ɔtɔlɔ mmɔ, na úbo-nwu ɔda kpakplaa ɔnini, ⁴⁴ “Tedi tenye ulu lɛlɔ na asu bekyuli lɛla lɛni nébo. Mmomu teesie na eti lɛlɔ atátina ɔkpane. Na ete akpala ani na Mose ɔda bubo bɔ́tina. Na ɔmɛni ɔdubɔtina bakpane bammɔ ka ɔlɛ ɔmmɔ ɔ́ba-a na ábla sɛɛn.” ⁴⁵ Nsu ka ukyuli ɔmɛni úsela ni, úse kalɔ ɔɔva taasu kalɛ na Yesu ɔ́bwi-nwu. Na ɔmɛni ɔsu ni, Yesu útakana na uduo ɔma ɔdi kemo, ɔsika bekyuli pii beebo-nwu kudɔ. Ɔmɛni ɔsu Yesu ɔ́ƒɔ lɛlɔ ɔkya alakpi akɔ. Nsu bekyuli básɔ bási ekpo ekpo bébo-nwu kudɔ mmɔ.

¹ Emeyi adi kama ni, únwini úsie Kapernaum na nwuna bɔsɔ bubo lɛlɔ kɔtɛ kúbeyi ɔma ɔmmɔ kemo uwi klukui kemo. ² Uwi útetu asa na bekyuli bébeyi kesii kani na úduo mmɔ na kaduli ku keyi ƒui. Na ɔkya ɔɔsu-ma litemi buni lɛmmɔ. ³ Mmɔ na nkyuli ine béti ɔlɛne ɔdi náƒɛ uwi kalɔ béboku-nwu. ⁴ Na ka bátakɛ kavinkɔ na kayakun ɔ́si bekyuli bumomo ɔsu ni, bátákɔ ɔtɔ katɔ na báyula ɔlɛne ɔmmɔ ku nwuna atɛla báva Yesu anumi. ⁵ Ka Yesu ɔ́nu kalɛ na báƒɔ bádi kpakplaa ka ɔdubɔkana ɔlɛne ɔmɛni bɔbwi ɔsu ni, Yesu ɔ́su ɔlɛne ɔmɛni ɔnii, “Ubi, líti ƒula ekpidi lɛ́kyiɛ-ɔ.” ⁶ Nsu ɔda bubo ala batinane bani nkya mmɔ beeti kasusu na bana kayi kemo banii, ⁷ “Bi ɔsu na ɔɔtɛmi lɛni? Katɔti lɛti mɔɔkana ekpidi buti taakyiɛ!” ⁸ Yesu ɔ́nu bana kasusu kemo ɔ́ti na ɔ́su-ma ɔnii, “Bi ɔsu na ɔmɛni uukpóku-mii? ⁹ Ukyuli biala ɔkana ɔsu ɔnii, ’Líti ƒula ekpidi lɛ́kyiɛ-ɔ.’ Nsu ubo ɔkplu utulo si ɔ́su ɔnini, ’Ta, na eti ƒula lɛtala na eteesie.’ ¹⁰ Anwuɔsu kalɛ na bɛƒɔ bɛdi ka ami ɔni ndi Ukyuli Ɔyawine Ubi mbo kuƒi ka liti ekpidi lɛkyiɛ bekyuli na kayawi kamɛni kemo ɔsu ni, bɛnu!” ¹¹ Mmɔ ni, Yesu ɔ́sɔ únwini anumi ɔ́tina ɔlɛne ɔmmɔ na ɔ́su-nwu ɔnini, “Ta, na eti ƒula lɛtala na eteesie kaduli.” ¹² Na ɔnana ɔmɛni ɔ́ta kɔnakunwi na úti nwuna lɛtala na úsie ɔ́vi bekyuli bani nnye mmɔ akɔ, na ɔ́tɔlɔ úsie nwuna kesii. Ɔmɛni ɔ́bla bekyuli bani nnye mmɔ ƒui kalɛ kadi. Na bátakɔsi Katɔti bumwi. Bana ƒui básu banii bátanu lɛla lɛmɛni udu kudii! ¹³ Amu na Yesu ɔ́sɔ ɔ́tɔlɔ úsie Galilea Ɛpu kudɔ na bekyuli bammɔ ƒui bébo nwuna kudɔ mmɔ, na ɔ́su-ma litemi buni. ¹⁴ Ka úti úsela ɛpu kudɔ mmɔ ni, útánu Lewi ɔni ndi Alƒeo ubidi ka ɔ́bla keliekɔ kadi na ulie mmɔ ɔɔƒɔ́ kuyi. Amu na Yesu ɔ́su-nwu ɔnini, “Bo basiaku-mi kama.” Amu na Lewi úmii ɔ́ta kɔnakunwi na ɔ́siaku-nwu. ¹⁵ Useyi uwi ɔmmɔ ni, Yesu ku nwuna batɛyane ku bekyuli pii bani nsiaku-nwu bébo Lewi kesii banii babadiku-nwu. Na basiakune bammɔ akɔ ni, badi badi kuyi baƒɔne ku alaekpidi bablane. Amu na ɔda bubo ala batinane bani nkya Yudaƒuɔ lɛkpa linwi lɛni baalɔ Ƒarisiƒuɔ kemo lɛnɔ bébo mmɔ. ¹⁶ Anwuɔsu uwi ɔni na ɔda bubo ala batinane bani nási Ƒarisiƒuɔ lɛkpa lɛmmɔ kemo bánu ka Yesu ulie ɔɔdiku bekyuli bani lɛlɔ neeebo ɔbu mɛni ni, béye nwuna batɛyane banii, “Dɛ na ɔ́bla na anwu ku bekyuli bamɛni udu nlie mɔɔdi?” ¹⁷ Ka Yesu únu litemi lɛni na badaku bɔsu ni, ɔ́su-ma ɔnini, “Balɛne mɔɔwia kuvo ɔblane, na ɔɔɔdi bekyuli bani mbo lɛlɔ ɔkplu. Ńtebo nnii mbalɔ bekyuli babuni na benwini kayi, mmomu líbo na bekyuli bani ngyi ka alaekpidi bablane badi ɔsu.” ¹⁸ Amu uwi ɔdi ka Yohane ku nwuna batɛyane ku Ƒarisiƒuɔ beelie kɔka na bana katɔ bɔkpali ɔsu ni, bekyuli badi bébo Yesu kudɔ bébeye-nwu banii, “Bi ɔsu na ƒula batɛyane ama belélie kɔka aani kalɛ na Yohane badi ku Ƒarisiƒuɔ beelie kɔka?” ¹⁹ Yesu údie kenye na úbo-ma lɛgba ɔnii, “Uleku ɔgya bakpana beení adila na uleku ketikɔ? Munuu útalɛka ebiti ada-ma ka uleku ɔgya ɔkya-ma akɔ? ²⁰ Nsu limeyi lɛdi ni, badubuti-nwu bɔtɔlɔku nwuna bakpana kudɔ na bakpana bammɔ badubunyimi kenye ku kɔnyana. ²¹ Ukyuli ɔdi ulétile kɔdi kɔkukudi liƒi ku lɛdiku lɛwɔdi. Lɛdiku lɛwɔdi lɛmmɔ lɛdubɔni kɔkukudi kɔmmɔ kugyingya si báƒɔ-ku. Na ɔdubɔya na liƒi lɛkukudi lɛmmɔ liibómo litulo kalɛ na lise kudeedi. ²² Na lɛnɔ ni, beléti ntɛ bɔwɔdi teewi ɔku koƒo kɔkukudi kɔni kemo béewi ntɛ dii. Ntɛ bɔwɔdi bɔdubuƒuƒuo na bɔya ɔku koƒo kɔkukudi kɔmmɔ kɔbwɛ na ntɛ ku koƒo lɛnɔ kulálɛ kɔsia. Mmomu ni, ntɛ bɔwɔdi beeti teewi ɔku koƒo kɔwɔdi kemo.” ²³ Uwi ɔdi ka Yesu ku nwuna batɛyane bási baaví anta kemo kadi kemo na lɛnwunameyi lɛlɔ ni, báƒɛ anta amɛni adi na baakun. ²⁴ Anwuɔsu Ƒarisiƒuɔ badi básu Yesu banii, “Bi ɔsu na ƒula batɛyane baabla lɛni? Bula ɔda bubo útete kuƒi ka babla lɛni na lɛnwunameyi lɛlɔ.” ²⁵ - ²⁶ Mmɔ ni, Yesu úye-ma ɔnini, “Bítaka Katɔti Bunweni Kedee Ɔku kemo bítenu lɛla lɛni na Ɔga Dawid ɔ́bla? Uwi ɔni na kɔka kɔɔda anwu ku nwuna bakpana ni, Dawid úsie útéduo Katɔti kakpakɔ na lebo lɛni na ukyuli ɔni baalɔ Abiatar ɔdi ɔkpane unengudi. Údie bodobodo kedee ɔni nse nte bakpane lɛti pɛ na kakpakɔ mmɔ ɔ́di, na úti ɔdi lɛnɔ úte nwuna bakpana na bádi. Ɔmɛni lɛnɔ na nka ɔda bubo bútéte kuƒi, nsu bátasu-ma lɛla lɛdi.” ²⁷ Na Yesu ɔ́su-ma ɔnini, “Katɔti úse lɛnwunameyi úte ukyuli lɛbuni. Na ɔɔɔdi ukyuli na úse úte lɛnwunameyi. ²⁸ Anwuɔsu ami Ukyuli Ɔyawine Ubi ndi lɛnwunameyi lɛnɔ Unwoti.”

¹ Nwuna kama ni, Yesu ɔ́sɔ ɔ́tɔlɔ úsie Yudaƒuɔ kasalakɔ. Na mmɔ ni, útánu ukyuli ɔni na kɔnu kunwi kɔ́gogolo-nwu. ² Uwi ɔmmɔ ni, Ƒarisiƒuɔ badi bakya kasalakɔ kammɔ. Na benye baanu si ɔdubɔbwi ɔnana ɔmmɔ na lɛnwunameyi lɛlɔ na bawia-nwu litemi. ³ Yesu ɔ́lɔ ɔnana ɔni na kɔnu kunwi kɔ́gogolo-nwu mmɔ ɔnii ubenye bekyuli ƒui anumi. ⁴ Amu na únwini anumi ɔ́tina bekyuli bammɔ na úye-ma ɔnini, “Ɔdia ka ukyuli ɔbla lɛbuni na lɛnwunameyi lɛlɔ? Munuu lɛnwunameyi ɔdi limeyi lɛni lɛlɔ na ukyuli ubile lɛla? Ɔdi limeyi lɛni lɛlɔ baaƒɔ́ ngba, munuu ɔdi limeyi lɛni lɛlɔ na beebile ngba?” Nsu bátakana-nwu lɛla lɛdi bɔsu. ⁵ Yesu únwini ɔ́nu bana ƒui na kɔnyi kemo, ɔsika livo líƒi-nwu na bana ukyulikpana kebunku tete ɔsu. Amu na ɔ́su ɔlɛne ɔmɛni ɔnii, “Nene kɔnu boku.” Únene kɔnu. Na kɔnakunwi ni, nwuna kɔnu kɔ́ba-nwu. ⁶ Amu na Ƒarisiƒuɔ bammɔ bátɔlɔ na bátása ku Herode lɛkpa badi na básusu Yesu bɔdu lɛlɔ. ⁷ - ⁸ Amu na Yesu ku nwuna batɛyane bésie Galilea Ɛpu kudɔ. Na bekyuli lisu pim bani nási Galilea ku Yudea ku Yerusalem ku Idumea ku bani nási Yordan ketu ɔvi ku bani nási Tiro ku Sidon lɛnɔ básiaku-ma. Ɔsika nwuna akɔla bɔbla búusie ɔgyu kakaaka ƒui, na bekyuli pii baayɔ́ ka beti anumi babanu-nwu. ⁹ - ¹⁰ Lebo lɛmmɔ ka Yesu ɔ́ɔbwi bekyuli pii ɔsu ni, balɛne pii baanwanɛ lɛlɔ ka bebetuku-nwu na lɛlɔ lɛyu-ma ɔkplu. Anwuɔsu Yesu ɔ́su nwuna batɛyane ɔnii bawia ɔkɔlɔ ɔdi bebese ketudɔ kalɛ na si bekyuli bammɔ beemomo taavili ni, na ɔkɔ uduo-nwu kemo. ¹¹ Bekyuli badi bakya bani na ayu ekpidi eli-ma lɛlɔ. Si bánya bánu Yesu ni, béboku lɛlɔ kalɔ na baava taasu banii, “Awɔ ndi Katɔti Ubi!” ¹² Nsu Yesu ɔ́bala-ma ka bataya bekyuli bati ukyuli ɔni na ɔdi. ¹³ Nwuna kama ni, Yesu úsie kɔbi kɔdi lɛlɔ. Na mmɔ ni, ɔ́lɔ nwuna basiakune bani na ɔɔwia. ¹⁴ Bekyuli bamɛni bébo-nwu kudɔ na údie leevu-inyɔ na bana akɔ, na úte-ma lɛnyi ɔnii batalane. Ɔ́su-ma ɔnii, “Lídie-mii nnii bɛsiaku-mi uwi biala. Na ndubɔtala-mii na bitátaasu litemi buni. ¹⁵ Bɛdubɔgya ayu ekpidi bɔlɛku bekyuli lɛlɔ kemo.” ¹⁶ - ¹⁹ Nkyuli leevu-inyɔ bani na údie mɛni anyi ndi Simon ɔni na Yesu ɔ́sia lɛnyi ɔnii Petro ku Yakobo ku ɔnwani ɔnamudi Yohane bani ndi Sebedeo bebi ɔni na Yesu úte-ma lɛnyi ɔnii Boanerges ɔni kalɔ ndi ɔnii beetemi ku ɔyikun aani kalɛ na kayaa kabwɛ ogya ku kɔku bonwu. Na bakladi ndi Andrea ku Ƒilipo ku Bartolomeo ku Mateo ku Toma ku Yakobo ɔni ndi Alƒeo ubidi ku Tadeo ku Simon ɔni nási Kana na nka ɔ́ta únye aban lɛlɔ ku Yuda Iskariot ɔni ndubɔkya Yesu kakya. ²⁰ Ka Yesu ɔ́si mmɔ ni, ɔ́tɔlɔ úbo kaduli kadi. Na bekyuli pii badi básɔ bébo-ma kudɔ mmɔ. Anwuɔsu ɔ́yu Yesu ku nwuna batɛyane ɔkplu ka bakɛ kuƒi badi muedi. ²¹ Ka nwuna lɛlɔ bekyuli bénu ɔmɛni ni, bésie banii batákpanku-nwu besienku kaduli, ɔsika básu banii, “Kuli kemo muubie-nwu!” ²² Na ɔda bubo ala batinane bani nási Yerusalem básu banii, “Kɔyu kukpidi kɔkya Yesu lɛlɔ kemo. Na ayu ekpidi ɔtɔnkune Beelsebul néte-nwu ɔyikun asa na ɔɔkana ayu ammɔ bɔbɔku taalɛku bekyuli lɛlɔ kemo!” ²³ Anwuɔsu Yesu ɔ́lɔ-ma na ɔ́tɛmiku-ma na lɛgba kemo ɔnini, “Dɛ na wabla asa na Satan wabɔku anwu ɔlati walɛku ukyuli lɛlɔ kemo? ²⁴ Si lɛga kadikɔ kadi kéle lɛlɔ akpa akpa na akpa ammɔ eekpóku lɛlɔ ni, lɛga kadikɔ kammɔ kalakana bunye. ²⁵ Si ɔtɔ ɔdi bekyuli béle lɛlɔ ati ati na beekpóku lɛlɔ ni, ɔtɔ ɔmmɔ ulakana bunye. ²⁶ Anwuɔsu si Satan ɔ́ta unye uukpóku lɛlɔ na nwuna lɛga kadikɔ kéle lɛlɔ akpa akpa ni, lɛga kadikɔ kammɔ kadubɔbwɛ, na nwuna lɛga bɔdi bubo kawɔlɔkɔ. ²⁷ “Na sɔsɔ geen ni, ukyuli ɔdi ulakana na weduo ukyuli ɔni mbo ɔyikun ɔtɔ kemo na uti nwuna ala ɔtɔlɔku. Amu ntu ɔ́ka ɔyikune ɔmɛni buƒie bunyimi asa na wakana-nwu ɔtɔ kemo buduo buti nwuna ala. ²⁸ “Mɔɔsu-mii geen ka Katɔti ɔdubuti alaekpidi biala na bekyuli bábla ku anyikpi biala ani na bálɔ Katɔti ɔkyiɛ-ma. ²⁹ Nsu anyikpi ani na ukyuli ɔdi ɔdubɔlɔ Katɔti Kɔyu ni, Katɔti uleti ulakyiɛ-nwu kudi kudii. Ɔsika ɔdubuti likpidi lɛmɛni aani likpidi lɛni na ulayiƒla kudii.” ³⁰ Yesu ɔ́su ɔmɛni ɔsika bekyuli bammɔ básu banii kɔyu kukpidi kɔkya anwu Yesu lɛlɔ kemo. ³¹ Uwi ɔmmɔ ni, Yesu banwani ku nwuna uni bébo mmɔ. Kalɛ bekyuli bemomo mmɔ ɔsu ni, bátala ɔtu na nwuna kudɔ ka baawia-nwu. ³² Amu na bekyuli bani náka bámana-nwu mmɔ básu Yesu banini, “Nu, ƒ^ini ku ƒula banwani benye keyi baawia-a banii bo!” ³³ Amu na Yesu úye-ma ɔnini, “Ɔma ndi mina uni? Ɔma bene ndi mina banwani?” ³⁴ Amu na únwini ɔ́nu bekyuli bani nlie bámana-nwu mmɔ na ɔ́su ɔnii, “Bɛnu, bamɛni ndi mina uni iye mina banwani! ³⁵ Ukyuli biala ɔni mɔɔbla Katɔti lɛƒɔyɔ ni, anwu ndi mina ɔnwani ɔnanabi iye mina ɔnwani ulekubi iye mina uni.”

¹ Yesu ɔ́sɔ úsie Galilea Ɛpu kudɔ na úsie ɔɔtina litemi buni lɛmmɔ. Na bekyuli pii bani nábaka bámana-nwu bumomo ɔsu ni, úduo ɔkɔlɔ kemo na úlie ɔkɔlɔ ɔni nsia ntu anumi. Na bekyuli bammɔ bébenye utublii ka Yesu ɔɔtɛmiku-ma. ² Uwi pii na nwuna ala bɔtina kemo ni, agba na uubó teeti teedie lɛla lɛni na ɔɔyɔ́ ka ɔsu kalɔ taatina-ma. Ala ani na ɔ́tina-ma ndi amɛni. ³ Ɔ́su-ma ɔnini, “Binu! Uwi ɔdi ni, ɔnana ɔdi úsie kemo ɔnii utágya edula adi. ⁴ Ka ɔkya ɔɔgya edula amɛni ni, adi álɛ ébo kuludɔ, na baasɛ bébo na bála-nya bádi. ⁵ Adi álɛ ébo atabi lɛlɔ, kesii kani na lɛti liiibo pii. Anwuɔsu edula amɛni ákwɛ pla. ⁶ Nsu ka ɔƒɛ ɔ́sia ni, áyɛyɛ na ékpi. Ɔsika ana lidu lítakɛ adila ɔ́si atabi ammɔ ɔsu. ⁷ Edula ammɔ adi álɛ ébo liyu akɔ. Na liyu lɛmmɔ líyi lɛ́da-nya na átakɛ lɛlɔ. Anwuɔsu átama bebi. ⁸ Na adi álɛ ébo kalɔ kabuni lɛlɔ. Na ákwɛ, na ádia, na áma bebi. Na adi ánwu ebi liti ku leevu, na adi lɛnɔ ánwu ebi eti anyɔ.” ⁹ Kawɔlɔkɔ ni, Yesu ɔ́su-ma ɔnii, “Anwuɔsu, si bibo atu ni, na binu kaduɛ!” ¹⁰ Uwi ɔni na Yesu lɛti ulie ni, bekyuli bani nénu nwuna lɛgba lɛmmɔ badi ku nwuna leevu-inyɔ bammɔ bébo-nwu kudɔ na béye-nwu banii udie lɛgba lɛmmɔ kalɔ ute-ma. ¹¹ Amu na Yesu ɔ́su-ma ɔnini, “Katɔti úti nwuna lɛga bɔdi abɛla ani na bekyuli pii baaagyi ɔ́tina-mii. Na bakladi bani nkya kama ni, ama agba kemo kani na badubunu etemila. ¹² Anwuɔsu úbo aani kalɛ na Katɔti kenye udiene ɔdi únweni úse ɔnii, “ ’Badubo bɔnu, nsu balanu baláti. Badubo bunu, nsu belénu kalɔ. Ɔsika ina ka beenú na baanu ni, belénu kalɔ na benwini anumi besienku Katɔti kudɔ na uti bana alaekpidi ɔkyiɛ-ma.’ ” ¹³ Amu na Yesu úye-ma ɔnini, “Bilenu lɛgba lɛmɛni kalɔ? Dɛ na bɛdubɔbla asa na binu lɛgba lɛbambadi biala kalɔ? ¹⁴ Ala ɔgyane ɔmɛni ɔɔgya Katɔti litemi. ¹⁵ Bekyuli badi bese aani ebi ani nálɛ ébo na kuludɔ. Ka bánya bénu kani na Satan ɔ́da-ni údie-ma kuli kemo ɔ́tɔlɔku. ¹⁶ Bekyuli babambadi lɛnɔ bese aani ebi ani nálɛ ébo atabi akɔ. Na si uwi ɔni na beenú-ni ni, ebiti aada-ma. ¹⁷ Nsu litemi lɛmmɔ lidu lítada kalɔ kaduɛ. Báƒɔ bádi uwi blii suɛ kani. Nsu si lɛsɛ lɛdi iye bukpoku bɔdi búbo-ma lɛlɔ na litemi lɛmɛni lɛlɔ ɔsu ni, badubunwini baasɔ teesie kama. ¹⁸ “Na bekyuli badi lɛnɔ bese aani ebi ani nálɛ ébo liyu akɔ. Na ama ndi bekyuli bani nénu litemi buni lɛmɛni, ¹⁹ nsu kayawi liƒu bɔda ku lɛnungyie likpidi na sika lɛlɔ ku ɔlɔna ɔkwɛ adala akya-ma kayi kemo. Ala amɛni ényimi litemi lɛmmɔ na litanwu ebi. ²⁰ “Na bekyuli badi lɛnɔ bénu Katɔti litemi aani egyiibi ani nálɛ ébo kalɔ kabuni lɛlɔ. Bekyuli bammɔ báƒɔ-ni ku kayi kemo ƒui. Na uwi ndi uwi ni, baalɛ́ lili na baanwu kɔyu kemo ebi. Badi bese aani edula ani nánwu ebi aavlatɛ, iye liti ku leevu, iye eti anyɔ.” ²¹ Yesu ɔ́sɔ úye-ma úsienku anumi ɔnini, “Ukyuli ɔdi ɔɔtu asogya taakya kagyigyɛ iye nwuna atɛla kalɔ? Ɔɔɔdi asogya kasiakɔ na beeti asogya taasia? ²² Lɛla biala lɛni na bekyuli béti babala lɛdubɔlɛ keyi, na Katɔti ɔdububimi lɛla biala na bébi-ni ala. ²³ Anwuɔsu si bibo atu ni, na binu kaduɛ!” ²⁴ Amu na Yesu ɔ́sɔ ɔ́su-ma ɔnini, “Bise atu kaduɛ na lɛla lɛni biinú lɛlɔ! Ɔsika kalɛ na aakɔ́ku bekyuli bamba taanu ni, lɛni kani na Katɔti ɔdubɔkɔku-ɔ bɔnu, utulo muedi! ²⁵ Lɛni básu bése ka ukyuli ɔni mbo lɛla lɛdi ni, anwu na Katɔti ɔsɔ ɔdubute ubunku-nwu. Na ukyuli ɔni neeebo lɛla lɛdi na ute ni, ubliidi ɔni na ubo muedi ni, Katɔti ɔdubɔƒɔ nwuna ƒui ɔsiku-nwu kudɔ.” ²⁶ Yesu ɔ́sɔ ɔ́su-ma ɔnini, “Katɔti lɛga kadikɔ kese aani ɔnana ɔni nágya egyiibi. ²⁷ Ɔɔtɛ taata emeyi biala, na ebi ammɔ aakwɛ́ na aalɛ́ lili. Nsu ɔɔɔgyi kalɛ na ɔ́bla asa na úbo lɛni. ²⁸ Kalɔ kani lɛlɔ na báva ala kani mɔɔtumini ebi ammɔ lɛni. Kudeedi, si kɔ́kwɛ ni, kɔdubudie lili asa na nwuna kugyii kɔlɛ. Na si kɔɔlɛ́ lili ni, na kɔɔnwu ebi pii. ²⁹ Si ebi ammɔ ábi lɛlɔ ni, na béede-nya. Ɔsika na edula udewi úudu.” ³⁰ Yesu úye ɔnini, “Bi na ndubuti Katɔti lɛga kadikɔ bɔkɔku? Bi lɛgba na meti medie-ni kalɔ? ³¹ Use aani si ukyuli úti kegyiibi kebliidi ƒui na kayawi útáva. ³² Uwi uletu asa na kaakwɛ́ na kaabla kugyii. Na kugyii kɔmɛni muubómo teetulo na lɛku egyii ƒui akɔ. Kɔɔta kɔgba pii na kɔɔbla ɔyuli. Na baasɛ baabla ayu taakya kugyii kɔmmɔ lili.” ³³ Yesu ɔ́su-ma etemila buni na agba amɛni udu kemo kalɛ na baakana kalɔ bunu. ³⁴ Útetemi útete-ma ɔni na útebo agba. Nsu si uwi ɔni na anwu ku nwuna batɛyane lɛti belie ni, na uudie-nya kalɔ taatina-ma. ³⁵ Limeyi lɛmmɔ kani useyi uwi ni, Yesu ɔ́lɔ nwuna batɛyane ɔnini, “Bɛya na busie ɛpu ɔmɛni ɔvi ɔni ngye.” ³⁶ Anwuɔsu bátɔlɔ bekyuli lisu lɛmɛni kudɔ na bétéduo ɔkɔlɔ ɔdi ɔni kemo na Yesu úuduo úlie kalɔ kemo, na bétiku-nwu báviaku. Lɛkɔlɔ lɛbambadi lɛnɔ lisie mmɔ. ³⁷ Kɔnakunwi ni, ɔƒɛƒɛɛ ubendi ɔdi úse kalɔ uukpó, na uubó ntu teewi ɔkɔlɔ lɛlɔ na buuduo-nwu kemo ɔni na ubu blii na nka ɔkɔlɔ ɔmmɔ uyi na ɔnyi. ³⁸ Uwi ɔmmɔ na Yesu ulie ɔkɔlɔ kama na úti lili ɔ́sia ɔsiadi lɛlɔ ɔɔlɛɛ. Amu na nwuna bakpana bágyila-nwu na básu-nwu banini, “Ala ɔtinane, ulekpoku-ɔ ka bɔdaku bukpi?” ³⁹ Yesu ɔ́ta únye na údie lɛdi na ɔ́su ɔnini, “Ɔƒɛƒɛɛ, da bukpo ya!” Na ɔ́sɔ ɔ́su ntu lɛnɔ ɔnini, “Ntu, bla buɛɛ.” Amu na ɔƒɛƒɛɛ ɔ́da bukpo ɔ́ya, na ntu anumi ƒui bɔ́bla kpoo. ⁴⁰ Amu na Yesu uuye nwuna batɛyane ɔnini, “Bi ɔsu na bibo liƒu lɛni? Bitakɛ tɔ bɔƒɔtaadi?” ⁴¹ Nsu liƒu lɛni mɔɔda-ma ɔsu ni, bakya beeye lɛlɔ banii, “Ɔma geen na ukyuli ɔmɛni ɔdi? Na ntu ku ɔƒɛƒɛɛ ƒui beenú-nwu litemi!”

¹ Ɔmɛni kama ni, Yesu ku nwuna batɛyane bammɔ bétéduo Galilea Ɛpu ɔvi ɔni ngye na Geraseƒuɔ kalɔ lɛlɔ. ² Amu ka Yesu ɔ́nya ɔ́lɛ ɔkɔlɔ kemo ni, ukyuli ɔdi na kɔyu kukpidi kɔsiaku-nwu ni, úbasiaku-ma. ³ Ɔnana ɔmɛni ɔ́si bekyuli kavakɔ kadi nde mmɔ, ɔsika mmɔ na uli. ⁴ Uwi ɔni návi ni, bekyuli ƒui balákana-nwu lɛkpu bubo. Uwi pii ni, baakana na benyimi-nwu enu ku lɛgba. Nsu uukúlo kɔgba kɔni bébo-nwu mmɔ. Ukyuli ɔmɛni ubo ɔkplu geen ɔni na ukyuli biala ulákana-nwu bɔda. ⁵ Usien ku ɔƒɛ ƒui na ɔkɛ ɔɔví bekyuli kavakɔ mmɔ ku abi lɛlɔ, na ɔkɛ ɔɔva taavi na ɔda atabi uukúlo lɛlɔ. ⁶ Ukyuli ɔmɛni unye ɔgyu asa na ɔ́nu Yesu. Anwuɔsu úkeli úbalɛ akɔnkɔ na Yesu anumi. ⁷ Na ɔ́va momoomo ɔ́su ɔnini, “Yesu, katɔ ku kalɔ Ɔyikune Ƒui Ubi! Buvele, su-mi se ka aláni-mi kɔtu!” ⁸ Ɔ́su lɛni ɔsika únu ka Yesu ɔɔsu ɔnini, “Kɔyu kukpidi, vi lɛ ɔnana ɔmɛni kemo!” ⁹ Amu na Yesu úye-nwu ɔnii, “Dɛ baalɔ-ɔ?” Mmɔ na kɔyu kɔmɛni kɔ́su kɔnini, “Ami baalɔ Lisu, ɔsika abu bani nkya ɔnana ɔmɛni kemo ni, bumomo!” ¹⁰ Na kɔyu kɔmmɔ kɔ́sia kama kúvele Yesu ka utabɔku ayu amɛni utalɛku kalɔ kammɔ kemo. ¹¹ Uwi ɔmmɔ kemo ni, baplakuo pii badi benye baadi na kataku kadi lɛlɔ. ¹² Amu na ayu amɛni évele Yesu anii, “Bɔku-bu tákya baplakuo bani nnye ngye akɔ na butéduo-ma kemo.” ¹³ Amu na úte-ma kuƒi, na ayu amɛni álɛ ɔnana ɔmɛni lɛlɔ kemo na étéduo baplakuo bammɔ lɛlɔ kemo. Amu na baplakuo bamɛni ƒui, bani mabla aani mpimu inyɔ békeli báyu kataku kammɔ lɛlɔ, na bétéduo ɛpu kemo na bana ƒui békpi. ¹⁴ Amu na bekyuli bani mɔɔnu-ma lɛlɔ mmɔ békeli bésie ɔmankemo ku amadɔ mmɔ, na bátásu bekyuli ƒui lɛla lɛni nébo. ¹⁵ Bekyuli békeli bésie mmɔ banii batánu lɛla lɛni nébo. Na ka bésie Yesu kudɔ ni, bánu ukyuli ɔni na nka ayu ekpidi pii akya-nwu lɛlɔ kemo mmɔ. Na ulie kalɔ, na ubi kɔdi lɛlɔ, na nwuna kasusu kese nwaa. Na liƒu lɛda bana ƒui! ¹⁶ Bekyuli bani nánu-nwu kudeedi ni, básu lɛla lɛni nálɛ ƒui na ɔnana ɔmmɔ ku baplakuo bammɔ lɛlɔ. ¹⁷ Anwuɔsu bévele Yesu banii ɔtɔlɔ na bana kalɔ lɛlɔ. ¹⁸ Ka Yesu utéduo ɔkɔlɔ kemo ni, ɔnana ɔni na nka ayu ekpidi akya-nwu lɛlɔ kemo mɛni úvele-nwu ɔnini, “Ya-mi libo buteesie!” ¹⁹ Nsu Yesu útatuna. Mmomu ɔ́su-nwu ɔnini, “Sɔ teesie ƒula lɛlɔ bekyuli kudɔ na atásu-ma kalɛ na Unwoti úbunku-ɔ ku kalɛ na ɔ́nu-ɔ kɔnyana.” ²⁰ Anwuɔsu ɔnana ɔmɛni ɔ́tɔlɔ na útávi lɛma leevu kemo, na ɔ́su bekyuli bammɔ lɛla lɛni ƒui na Yesu ɔ́bla úte-nwu. Na ɔ́bla bani nénu ƒui kalɛ kadi. ²¹ Yesu ɔ́sɔ únwini úse ɛpu ɔmmɔ ɔvi ɔni ngye. Ka údu ketudɔ mmɔ ni, bekyuli pii badi bábaka bámana-nwu. ²² Na ukyuli ɔni baalɔ Yairo na ɔkya ɔma ɔmmɔ kasalakɔ batɔnkune akɔ ni, úbo mmɔ. Ka ɔ́nu Yesu ni, úboku lɛlɔ kalɔ. ²³ Na úvele-nwu kpakplaa ɔnini, “Muuvele nda-a! Mina ubi ulekubi blii ɔdi uuƒi geen. Anwuɔsu bo na ebeti ƒula enu asia-nwu lɛlɔ kalɛ na wakɛ ɔlɔkplu na welie ngba.” ²⁴ Amu na Yesu ɔ́ta na ɔsiaku-nwu. Bekyuli bani nsiaku Yesu bemomo ɔsu ni, báka-nwu bakya ntɛ uwi ɔni na úsela. ²⁵ Na uleku ɔdi ɔkya-ma akɔ ɔni na ubugya uuwi-nwu lɛlɔ akwa leevu-anyɔ sɔɔn, ina ka bevone baabla-nwu evo. ²⁶ Úubile nwuna egulabi ƒui na ɔlɛ ɔmɛni bɔbwi ɔsu, nsu ɔlɛ ɔmmɔ ulába-nwu. Mmomu katɔ kani na ɔɔkɔ́. ²⁷ Únu Yesu lɛlɔ litemi, anwuɔsu úbasiaku bekyuli bani nkpɛ Yesu kama. ²⁸ Na ɔɔsu nwuna lɛlɔ ka, “Si bɔ́kana makana-nwu awu butuku ni, nka lɛlɔ lɛdubɔba-mi.” ²⁹ Amu ka útuku Yesu awu ni, nwuna ubugya buwi bɔmmɔ kenye kékulo kɔnakunwi! Na ɔ́ƒɔ ɔ́di na nwuna lɛlɔ kemo ka nwuna ɔlɛ ɔ́ba-nwu na ɔ́lɛ nwuna lɛbibo kemo. ³⁰ Kɔnakunwi ni, Yesu ɔ́ti ka ɔyikun ɔdi ɔ́lɛ-nwu lɛlɔ kemo. Anwuɔsu ɔ́tu únwini na úye bekyuli bani nsiaku-nwu ɔnii, “Ɔma nétuku mina awu?” ³¹ Nwuna batɛyane básu-nwu banini, “Aanu kalɛ na bekyuli bamɛni báka bámana-bu. Bi ɔsu na eeye anii ɔma nétuku-ɔ?” ³² Nsu Yesu ɔ́mua unye ɔɔtɛ anu ɔnu si wanu ukyuli ɔni nétuku-nwu. ³³ Uleku ɔmmɔ ɔ́nu ɔ́ti lɛla lɛni nábla-nwu ɔ́ti. Anwuɔsu na liƒu ku lɛlɔ bɔtɔ kemo ni, úbalɛ akɔnkɔ na Yesu lɛgba akɔ. Na ɔ́su-nwu lɛla lɛni nébo nwaa. ³⁴ Yesu ɔ́su-nwu ɔnini, “Mina ubi ulekubi, ƒula bɔƒɔtaadi bɔ́bwi-ɔ. Teesie ku keyi buɛɛ. Na ƒula lɛbibo lɛmmɔ lɛsɔ lilebo-ɔ lɛlɔ.” ³⁵ Uwi ɔni na Yesu ɔɔsu ɔmɛni ni, batu badi bási Yairo kesii bébo bábasu-nwu banini, “Ƒ^ubidi úukpi. Bi ɔsu na ásɔ aakya ala ɔtinane ɔmɛni bɔnɔ lɛnɔ?” ³⁶ Yesu útakpete litemi lɛni na básu mmɔ. Mmomu ɔ́su Yairo ɔnini, “Tayia, awɔ ƒɔ di kani!” ³⁷ Amu na Yesu útiku Petro ku Yakobo ku ɔnwani Yohane lɛti pɛ na bátɔlɔ bésie mmɔ. ³⁸ Na ka bédu Yairo kaduli na Yesu ɔ́nu kalɛ na benye baabla lɛlɔ ku keku kani na benye beewulo ni, ³⁹ úduo úsie-ma kudɔ na úye-ma ɔnini, “Bi néboku lɛsɛ lɛmɛni? Bi ɔsu na biiwulo? Ɔnamu ɔmɛni útekpi. Bɔlɛɛ na ɔda!” ⁴⁰ Ka ɔ́su lɛni ni, bekyuli bani nnye mmɔ bakya baamá-nwu. Anwuɔsu Yesu ɔ́ya bana ƒui bávi bálɛ, na ɔ́ya na ubi ɔti ku uni ku nwuna batɛyane ɛtɛ bammɔ béduo bésie kesii kani na ɔnamu ɔmmɔ ɔtɛ. ⁴¹ Yesu úƒie-nwu kɔnu ɔ́da na ɔ́su-nwu ɔnini, “Talita Koumu.” Na nwuna kalɔ na lɛdi lɛmmɔ kemo ndi ɔnii, “Ulekubi blii, mɔɔsu-ɔ nnii ta nye!” ⁴² Kɔnakunwi ulekubi ɔni náaƒɔ akwa leevu-anyɔ mɛni ɔ́ta únye na ɔkɛ uusié taavi. Ka lɛla lɛmɛni líbo lɛni ni, ɔ́bla bana ƒui yaa! ⁴³ Nsu Yesu úbo-ma ɔda kpakplaa ka batasu ukyuli ɔdi biala. Na ɔ́sɔ ɔ́su-ma ɔnini, “Bite-nwu lɛla lɛdi na ɔdi.”

¹ Yesu ɔ́tɔlɔ mmɔ na anwu ku nwuna batɛyane bátɔlɔ bésie ɔma ɔni kemo na Yesu ɔ́si. ² Na lɛnwunameyi lɛlɔ ni, úsie ɔkya ɔɔtina litemi buni na kasalakɔ mmɔ. Amu ka nwuna ɔma bekyuli pii bésie béténu-nwu ala bɔtina ni, ɔ́bla-ma kalɛ kadi. Beeye lɛlɔ banii, “Wɛ na ɔ́tɛya ɔmɛni udu ɔ́siku? Bi lɛlati udu béte-nwu asa na ɔɔkana akɔla amɛni udu bɔbla? ³ Ɔɔɔdi anwu ndi Maria ubidi ɔni ndi ligyii ɔnwine? Munuu ɔɔɔdi Yakobo ku Yose ku Yuda ku Simon banwani na ɔdi? Na nwuna banwani belekubi lɛnɔ nkya mɛni!” Anwuɔsu bekyuli bamɛni béni-nwu. ⁴ Yesu ɔ́su-ma ɔnini, “Katɔti kenye udiene ubo ɔbu na kesi kesii. Nsu na nwuna ɔma ku nwuna lɛlɔ bekyuli ku nwuna kaduli bekyuli anumi ni, uuubo ɔbu.” ⁵ - ⁶ Ka nwuna ɔma bekyuli bátaƒɔ-nwu bátadi ɔsu ni, litemi lɛmmɔ líkpoku Yesu. Ɔ́kɛnku ɔmmɔ ɔsu ni, útakana akɔla pii adi bɔbla na mmɔ, ntu ɔni na úti nwuna enu ɔ́sia balɛne badi lɛlɔ na ɔlɛ ɔ́ba-ma. Nwuna kama lɛnɔ ni, Yesu útávi akpaklɔ ani nkya amadɔ mmɔ, na ɔkɛ ɔɔtina-ma litemi buni. ⁷ Na ɔ́lɔ nwuna batɛyane leevu-inyɔ bammɔ úbasala, na ɔ́tala-ma nkyuli inyɔ inyɔ. Úte-ma ɔyikun na ayu ekpidi lɛlɔ. ⁸ Na ɔ́bala-ma ɔnii, “Ɔdi uteti lɛla lɛdi utada na nwuna ulu busie kemo, ntu ugyii ɔdadi lɛti pɛ. Biteti adila iye koƒo aani kalɛ na ala bevelene baada. Bitada egulabi na bina aƒo kemo. ⁹ Bɛkya bina agbanvuo, nsu biteti awu ɔbambadi ɔdi bitada bitebunku ɔni bɛkya.” ¹⁰ Ɔ́sɔ ɔ́su-ma ɔnini, “Si kesi kesii na báƒɔ-mii ni, bilie mmɔ kani bitédu uwi ɔni bɛdubɔtɔlɔ. ¹¹ Si bídu ɔma ɔdi na bekyuli bammɔ bátaƒɔ-mii iye banii belenu bina litemi ni, bɛtɔlɔ na biveli bina lɛgba kalɔ ɔtumu bíwi-ma. Ɔmɛni ɔdubɔtina ka ɔma ɔmmɔ bekyuli béni-mii. Anwuɔsu lɛla lɛdi biala mebo ni, bana litemi lɛdi.” ¹² Amu na batɛyane bammɔ bátɔlɔ bésie bakɛ baaví taasu litemi buni kalɛ na ukyuli biala unwini kama ɔkya alaekpidi bɔbla. ¹³ Bábɔku ayu ekpidi pii bálɛku bekyuli lɛlɔ kemo. Na báwɛɛ balɛne pii inɔmii na bábwi-ma. ¹⁴ Lebo lɛmɛni ni, Ɔga Herode uunú amɛni bene ƒui, ɔsika Yesu lɛnyi liigyingya kesi kesii. Bekyuli badi baasu ka, “Yohane ɔni ndi ntu ɔkpilane násɔ úbo uli ngba! Anwuɔsu na úbo ɔyikun ɔni na ɔɔbla akɔla!” ¹⁵ Badi lɛnɔ baasu banii, “Anwu ndi Elia.” Babambadi lɛnɔ básu ka, “Kenye udiene na ɔdi, use aani Katɔti kenye bediene bakukudi bammɔ kemo unwi.” ¹⁶ Nsu uwi ɔni na Herode únu etemila amɛni ni, anwu lɛnɔ ɔ́su ɔnini, “Yohane ɔni kuli na lɛ́ya na békulo ni, anwu násɔ ɔ́ta úbo uli ngba!” ¹⁷ Herode ɔlati náya na béƒie Yohane, na ɔ́ya na bényimi-nwu na béti-nwu bákya aban ɔtɔ. Herode ɔ́bla ɔmɛni na Herodia ɔni na úti ɔsu, ɔsika nka ɔnwani Ƒilipo ulekudi na ɔdi. ¹⁸ Yohane útaasu Herode ɔnini, “Ɔɔɔdia ka éti ƒ^ɔnwani ulekudi.” ¹⁹ Anwuɔsu Yohane lɛlɔ litemi líteekpoku Herodia, na uukisi-nwu. Na ɔ́wia ka ɔdu-nwu. ²⁰ Nsu ulákana na Herode ɔsu. Ɔsika Herode útaayia Yohane, na ɔgyi ka Yohane ɔdi ukyuli ɔni nse siin na use kedee. Anwuɔsu útaagyumana-nwu. Ɔ́yɔ ka uteenu-nwu ala bɔtina uwi ndi uwi ina ka nwuna litemi líteekpoku-nwu kayi si únu-ni. ²¹ Kama kama ni, Herodia úbakɛ nwuna kuƒi. Limeyi lɛmmɔ lɛdi Herode lɛwɔmeyi. Herode ɔ́lɔ bekyuli benengudi na nwuna bagadine akɔ ku bekpone batɔnkune ku Galilea kalɔ lɛlɔ batɔnkune na kadikɔ. ²² Herode ubidi ugblebi úbatɔ na ɔkya Herode ku nwuna bakpana ebiti na kadikɔ mmɔ. Anwuɔsu Herode úye ugblebi ɔmɛni ɔnini, “Bi na aayɔ́ ka lite-ɔ?” ²³ Na ɔ́su-nwu lɛnɔ ɔnini, “Lɛka ku mina lɛgaboku ka ndubute-ɔ lɛla biala lɛni na adubuye-mi, ina mina lɛga kadikɔ kakɛ muedi!” ²⁴ Anwuɔsu ugblebi ɔmɛni ɔ́ta ɔ́lɛ na útéye uni ɔnini, “Bi na liye?” Amu na uni ɔ́su-nwu ɔnini, “Ye-nwu Ntu Ɔkpilane Yohane kuli.” ²⁵ Ugblebi ɔmɛni ɔ́babla útéduo ɔtɔ kemo na ɔ́su Herode ɔnini, “Mɔɔwia ka eti Ntu Ɔkpilane Yohane kuli akya lɛkyami kemo ete-mi ɔƒɛni kani!” ²⁶ Ɔmɛni ɔ́bla Ɔga Herode kɔnyana, nsu ulakana ɔda budie na ala ani na ɔ́kpali na bekyuli benengudi bamɛni anumi ɔsu. ²⁷ Anwuɔsu ɔ́tala nwuna eli ukulone ɔdi kɔnakunwi, na úte-nwu ɔyikun ɔnii usie na utékulo Yohane kuli uboku. Amu na Eli ukulone ɔmɛni ɔ́tɔlɔ na úsie aban ɔtɔ kemo mmɔ útékulo Yohane lili. ²⁸ Kama ni, úti kuli kɔmmɔ ɔkya lɛkyami kemo na úti úboku ulekubi ɔmmɔ. Na anwu lɛnɔ úti-ku úte uni. ²⁹ Uwi ɔni na Yohane batɛyane bénu litemi lɛmɛni ni, bésie bététi nwuna ukpine ɔmmɔ na bátáva-nwu. ³⁰ Batalane bani na Yesu ɔ́tala na bátávi amadɔ mmɔ ni, básɔ bénwini bébo na básu-nwu ala ani ƒui na bátábla ku ala ani na bátátina na bana ulu ɔni na bésie kemo. ³¹ Nsu likpo lɛni na Yesu ku ama belie ni, bekyuli bani muuduo-ma kudɔ mmɔ taalɛ bemomo. Na Yesu ku nwuna batɛyane balakɛ uwi ɔni na beti badi munu munu. Anwuɔsu Yesu ɔ́su-ma ɔnini, “Bɛya na abu lɛti buteesie kesii kani nse kpoo na butélie mmɔ bɔnwuna blii.” ³² Amu na bésie bétéduo ɔkɔlɔ kemo banii beteesie kesi kani na bekyuli beeebo. ³³ Nsu uwi ɔni na bésela ni, bekyuli babambadi pii bánu-ma báti, na békeli bakɛ lɛgba batɔ na bétéduo asa na Yesu ku nwuna batɛyane bébedu mmɔ. ³⁴ Ɔni na Yesu ɔ́yu ɔkɔlɔ kemo ni, ɔ́nu bekyuli lisu lɛmɛni na bana lɛlɔ lɛ́kywi-nwu kaƒɔ, ɔsika bese aani baƒonu bani neeebo lɛlɔ ɔnune. Anwuɔsu úse kalɔ ɔɔtina-ma ala pii taasiku Katɔti litemi lɛlɔ. ³⁵ Uwi ɔni na useyi uwi úudu ni, nwuna batɛyane bákpɛ béde-nwu na básu-nwu banini, “Kadi káasa káwɔlɔ. Na kalɛ na mɛni kese ɔsu ni, balákɛ lɛla lɛdi baladi. Anwuɔsu ya na bana ƒui beteesie. ³⁶ Na si bédu lɛma ku akpaklɔ ani nde mɛni ni, na bakɛ lɛla lɛdi beye badi.” ³⁷ Yesu ɔ́su-ma ɔnini, “Amii bite-ma lɛla lɛdi na badi.” Amu na básu-nwu banini, “Ɔmmɔ ɔdubɔƒɔ aani ukyuli abuli maane lɛyuƒɔla! Aayɔ́ ka bubile ɔmɛni na bodobodo lɛti pɛ lɛlɔ bute bana bɔdi?” ³⁸ Amu na Yesu úye-ma ɔnini, “Bodobodo ɛlɛ nkya-mii ala akɔ? Bisie bitánu.” Amu ka bésie bátánu ni, básu-nwu ka, “Bodobodo ɛlɔ ku kɔkpaku inyɔ lɛti pɛ nse.” ³⁹ Yesu ɔ́su nwuna batɛyane ɔnii baya na bekyuli bamɛni ƒui belie kalɔ esu esu na livo lɛlɔ mmɔ. ⁴⁰ Anwuɔsu bekyuli bamɛni ƒui bélie kalɔ esu esu. Na esu adi ábla aani eti anyɔ, na adi lɛnɔ ábla aani liti. ⁴¹ Amu na Yesu úti bodobodo ku kɔkpaku kɔmɛni na ka ɔ́nu katɔ laa ni, ɔ́gya Katɔti enu na ɔ́bwɛ bodobodo ku kɔkpaku kɔmɛni. Na úti úte nwuna batɛyane ɔnii bele bete esu esu ammɔ ƒui. ⁴² Bana akɔ ɔdi biala ɔ́di na úmo, ɔsika Yesu ɔ́ya adila amɛni émomo ébu. ⁴³ Na ka nwuna batɛyane bála adila ani nébu básala ni, úyi kɔgyigyɛ leevu-inyɔ. ⁴⁴ Na ama bani nádi adila amɛni ni, banana lɛti pɛ bumomo bɔdi nkyuli mpimu ɛlɔ. ⁴⁵ Kɔnakunwi ni, Yesu ɔ́ya na nwuna batɛyane bákɔ béduo ɔkɔlɔ kemo ɔnii bataatɔ ɔma ɔni baalɔ Betsaida na ɛpu ɔmmɔ ɔvi ngye kemo. Na anwu ɔ́ya na bekyuli pii bamɛni lɛnɔ bégyingya. ⁴⁶ Ɔmɛni kama ni, anwu lɛnɔ ɔ́tɔlɔ úsie kɔbi kɔdi lili útákpali katɔ. ⁴⁷ Ka useyi údu ni, ɔkɔlɔ ɔmmɔ údu ɛpu ɔmmɔ ntɛ, na Yesu lɛti pɛ unye ɔvi ɔmɛni. ⁴⁸ Ɔ́nu ka nwuna bekyuli benye beebó abi na bana ɔkɔlɔ ɔmmɔ bɔka lɛlɔ, ɔsika ɔƒɛƒɛɛ uukpó taasiaku-ma. Anwuɔsu asa na ɔtanta lɛdɔ ɛlɔ libo ni, Yesu ɔkɛ ntu anumi na úbo-ma kudɔ. Ka ɔ́kpɛ úde-ma ni, ⁴⁹ báva básu banini, “Ukpine na ɔdi!” ⁵⁰ Ɔ́gyu bana ƒui ɔtɔtɔ ka bánu-nwu na ntu bɔmɛni anumi. Nsu Yesu útemiku-ma kɔnakunwi ɔnini, “Bitayia! Ami mmɔ. Bɛkɛ kayi!” ⁵¹ Amu na ɔ́kɔ úduo-ma kudɔ na ɔkɔlɔ ɔmmɔ kemo, na ɔƒɛƒɛɛ ɔmɛni ɔ́da bukpo ɔ́ya. Ɔmɛni ɔ́bla nwuna batɛyane dɛye dɛye! ⁵² Ɔsika bátati kalɛ geen na ɔ́bla asa na úte nkyuli mpimu ɛlɔ bamɛni adila na bádi bébu. Bana kasusu kátabla-ma nwaa na ɔmɛni lɛlɔ ka bátaƒɔ bátadi ɔsu. ⁵³ Ka bétédu ɛpu ɔmmɔ ɔvi ngye ni, bátáyu na Genesaret. Na mmɔ na bényimi bana ɔkɔlɔ bényene. ⁵⁴ Ka báyu na bana ɔkɔlɔ ɔmmɔ kemo kani ni, bekyuli bánu Yesu báti. ⁵⁵ Anwuɔsu bekyuli bammɔ békeli bámana bana kalɔ kammɔ lɛlɔ batásu ukyuli biala. Na kesi kesii kani na bénu ka Yesu ɔkya ni, béti balɛne béboku-nwu. ⁵⁶ Na ekpo ani ƒui na Yesu úsie ni, ɔma na ɔdi o-o, lɛkpaklɔ na lɛdi o-o ni, bekyuli beeti balɛne teesienku kuyeya na beevele-nwu ka ɔya na betuku nwuna awu kɔtu. Na bani nétuku-nwu ni, lɛlɔ lɛ́yu-ma ɔkplu.

¹ Ƒarisiƒuɔ ku ɔda bubo ala batinane badi bási Yerusalem bébo bábaka bámana Yesu. ² Bánu ka nwuna batɛyane belie baadi, na badi bátaƒɔ bana enu aani kalɛ na ama Ƒarisiƒuɔ baatina bekyuli ka bataaƒɔ. ³ Bánu ɔmɛni báti ɔsika Ƒarisiƒuɔ ku Yudaƒuɔ babambadi ƒui baasiaku bana bati kuuku ɔdi ala bɔbla bɔni na báda bése-ma. Amu ntu báƒɔ bana enu kalɛ na bátina-ma asa badi. ⁴ Na si béye lɛla lɛdi básiku kuye lɛnɔ ni, ɔlɛka baƒɔ bana enu asa na badi. Na baasiaku ɔda bubo pii lɛnɔ lɛni na bálɛ lili bábanu aani kalɛ na baaƒɔ lɛɛƒɛɛ ku kutubwi ku ebwi. ⁵ Anwuɔsu Ƒarisiƒuɔ ku ala batinane bammɔ béye Yesu banini, “Bi ɔsu na ƒula basiakune balásiaku bula bati kuuku ɔdi ala bɔbla kama? Na ama baadi si bátaƒɔ enu muedi!” ⁶ Yesu údie kenye ɔnini, “Anumi lɛlɔ bekyuli bɛdi! Yesaia únweni ɔ́su ala ɔ́siku-mii lɛlɔ na úbo lɛni sɔsɔ! Ɔ́su-bu ka Katɔti ɔ́su ɔnii, “ ’Bekyuli bamɛni bada bana kenye kani baabu-mi, nsu balayɔ-mi na bana kayi kemo. ⁷ Keeke kani na baabla-mi kabla. Baatina kayawi lɛlɔ ala aani si mina ɔda bubo bɔdi.’ ⁸ Ɔɔtina ka bɛ́da Katɔti ɔda bubo bɛ́va, na bíti bayawine ɔda bubo ɔni bátina-mii bɛda.” ⁹ Yesu ɔ́sɔ ɔ́su-ma ɔnini, “Bibo kakwɛ kani lɛlɔ bɛɛsia taanyonu Katɔti ɔda bubo taava kalɛ na bɛsiaku bina bati kuuku ɔdi ala bɔbla kama. ¹⁰ Mose únweni úse ɔnii, ’Bu ƒ^ɔti ku ƒ^ini. Na ukyuli ɔni muudumi ɔti iye uni ni, ɔlɛka badu-nwu.’ ¹¹ Nsu bɛɛsu ka, si ukyuli ɔdi ubo lɛla lɛdi lɛni na ɔkana na uti ubunku nwuna bawɔne ni, ɔkana ɔsu ka úse lɛla lɛmɛni kenye ɔni kalɔ ndi ukyuli ɔmɛni ɔ́da litela lɛmmɔ úse ka uti ɔkpa ute Katɔti. ¹² Na bítete-nwu ulu ka ɔka litela lɛmɛni buti bubunku nwuna bawɔne muedi! ¹³ Lɛni na biiti bina bati kuuku ɔdi ala bɔbla teebile Katɔti ɔda bubo bɔmmɔ. Na bɛɛbla ala abambadi pii lɛnɔ aani ɔmɛni udu.” ¹⁴ Ɔmmɔ kama ni, Yesu ɔ́sɔ ɔ́lɔ bekyuli lisu lɛmmɔ ɔnii bakpɛ bede-nwu. Amu na ɔ́su-ma ɔnini, “Bina ƒui bise atu na binu. ¹⁵ Lɛla biala lɛni na ukyuli ɔ́di na líduo-nwu lɛlɔ kemo ni, lilaya na uusé lɛlɔ na Katɔti anumi. ¹⁶ Mmomu ni, lɛla lɛni nálɛ-nwu kayi kemo ni, ani ndi lɛla lɛni mɔɔyá na uusé lɛlɔ.” ¹⁷ Nwuna kama uwi ɔni na ɔ́tɔlɔ bana kudɔ na úsie kaduli ni, nwuna batɛyane béye-nwu banii udie litemi lɛmmɔ kalɔ ɔtina-ma. ¹⁸ Yesu ɔ́su-ma ɔnini, “Si bítenu litemi lɛmɛni kalɔ ni, na bina kasusu kalákana ala buƒie! Use nwaa ka lɛla biala lɛni muuduo ukyuli lɛlɔ kemo ni, lilaya na ukyuli uusé lɛlɔ. Ɔsika líteduo-nwu kayi kemo. ¹⁹ Mmomu nwuna kaƒɔ kemo na líduo, na lɛɛsɔ taalɛ-nwu ɔlɔna kemo aani lɛla lɛni nébie.” Na lɛla lɛni na Yesu ɔ́su mɛni ni, ɔ́tina ka adila biala adia éte bɔdi. ²⁰ Na ɔ́sɔ úsie anumi na ɔ́su ɔnini, “Lɛla lɛni nálɛ ukyuli kayi kemo ni, ani mɔɔyá na uusé lɛlɔ. ²¹ Ɔsika ukyuli kayi kemo na kasusu kekpidi kaasí, na aka mɔɔyá na ɔɔbla ala ani naaadia. Na ala ammɔ ndi lɛyalɛ bɔbla ku kuyu ku ukyuli bɔdu ku kɔsɔnɔ bɔdi ku ²² ɔdivo ku kasusu kekpidi buti ku ɔkɔ bɔnyi ku ɔlɔna ala ɔkwɛ bɔda bɔni muukpó kɔƒa ku lɛnungyie na bekyuli bamba ala lɛlɔ ku linyeda ku lɛlɔ bɔtina ku kɔdɔlɔ. ²³ Ala ekpidi amɛni ƒui ási ukyuli lɛlɔ kemo na aayá na uusé lɛlɔ.” ²⁴ Ɔmɛni kama ni, Yesu ɔ́tɔlɔ úsie kalɔ kani nde ɔma ɔni baalɔ Tiro kemo. Úsie kaduli kadi na útayɔ ka ukyuli ɔdi ɔti ka ɔkya mmɔ, nsu útakana bɔbɛ. ²⁵ Mmɔ ka uleku ɔdi na kɔyu kukpidi kɔsiaku ubidi únu ɔnii Yesu ɔkya mmɔ ni, úbo-nwu kudɔ na úbalɛ akɔnkɔ na nwuna anumi. Uleku ɔmɛni ɔdi ɔƒɔ ɔni na Yudaƒuɔ balayɔ. Báwɔ-nwu na ɔma ɔni baalɔ Ƒoinike na Siria kalɔ lɛlɔ. ²⁶ Na úvele Yesu ɔnii ɔbɔku kɔyu kɔmmɔ ɔ́lɛku ubidi lɛlɔ kemo. ²⁷ Nsu Yesu údie kenye ɔnini, “Ya bɔka banamu adila bute asa. Ɔɔɔdia ka buti banamu adila bubo buwi bana bakpɛwe.” ²⁸ Mmɔ na uleku ɔmɛni lɛnɔ údie kenye ɔnini, “Ao, Ati, bakpɛwe bani mbi kalɔ na kadikɔ mmɔ ni, bebo kuƒi ka badi adila ani na banamu baadi teewi kalɔ.” ²⁹ Amu na Yesu ɔ́su-nwu ɔnini, “Na ƒula kenye kani nédie mɛni ɔsu ni, teesie kaduli. Na adubɔnu ka kɔyu kɔmmɔ kɔ́tɔlɔ ƒ^ubidi lɛlɔ!” ³⁰ Amu na uleku ɔmɛni úsie kaduli. Na mmɔ ni, útánu ka ubidi ɔtɛ nwuna katɛnkɔ na kɔyu kukpidi kɔmmɔ kɔsɔ kuuulie-nwu lɛlɔ. ³¹ Yesu ɔ́tɔlɔ Tiro amadɔ mmɔ, na ɔkɛ Sidon ɔ́vi úsie Galilea Ɛpu kudɔ na ɔvi ɔni nésie lɛma leevu kakɛ mmɔ. ³² Na mmɔ ni, bekyuli badi béti ukyuli ɔni na atu éti-nwu na ulakana butemi lɛnɔ béboku-nwu, na bévele-nwu ka uti enu ɔsia-nwu lɛlɔ. ³³ Anwuɔsu Yesu ɔ́kpanku-nwu úsienku kɔƒɛlɛ kesii kani na bekyuli beeebo, na úti nwuna animi ɔ́kya-nwu atuƒi kemo. Útuo lisuo na útuku ɔnana ɔmmɔ unyemi. ³⁴ Amu na Yesu ɔ́talaku anumi ɔ́nu katɔ na údumo geen, na ɔ́su ɔnana ɔmmɔ ɔnini, “Heƒata,” ɔni kalɔ ndi “Lɛmi!” ³⁵ Kɔnakunwi ni, ɔnana ɔmɛni atu álɛmi, na nwuna unyemi kabuli lɛnɔ káƒɛnimi-nwu na ɔ́kana butemi! ³⁶ Yesu ɔ́bala bekyuli bani nnye mmɔ ka batasu ukyuli ɔdi lɛla lɛdi batasiku lɛla lɛni na bánu mɛni lɛlɔ. Nsu ɔ́bala-ma keeke, ɔsika bana ƒui bakɛ baasu lɛla lɛmɛni taavi. ³⁷ Na bekyuli bani ƒui nénu ala ammɔ ni, ɔ́bla-ma yaa! Na básu lɛlɔ banini, “Ɔɔbla ala ani ƒui kaduɛ sɔsɔ! Ɔɔyá na bamumu baatɛmi, na batutine lɛnɔ beenú!”

¹ Uwi útetu asa na bekyuli pii badi bábasa mmɔ. Na ka lɛla lɛdi lítebu-ma na badi ɔsu ni, Yesu ɔ́lɔ nwuna batɛyane úboku nwuna kudɔ na ɔ́su-ma ɔnini, ² “Bekyuli bamɛni lɛlɔ lɛɛkywí-mi kaƒɔ, ɔsika báakya-mi kudɔ emeyi atɛ sɔɔn. Na ɔƒɛni ni, balakɛ lɛla lɛdi badi. ³ Si lɛ́nyonu-ma na bátɔlɔ ni, badubusie batátaayila na ulu. Ɔsika bana badi bási kesii kani nágyu.” ⁴ Amu na nwuna batɛyane béye-nwu banini, “Ketele kemo mɛni ni, wɛ na ukyuli ɔdi ɔdubɔkɛ adila bute bekyuli bamɛni na badi bemo?” ⁵ Mmɔ na Yesu úye-ma ɔnini, “Bodobodo ɛlɛ na bɛda?” Básu-nwu banini, “Bodobodo maatɛ na bɔda.” ⁶ Yesu ɔ́su bana ƒui ɔnii basɔ belie kalɔ. Amu na úti bodobodo maatɛ ɔmmɔ, na ɔ́gya Katɔti enu, na ɔ́bwɛ-nwu kɔkɛ kɔkɛ, na úti úte nwuna batɛyane ɔnii beti bete bekyuli bamɛni ƒui. Ama lɛnɔ béti béle béte-ma. ⁷ Ka bánu banii kɔkpaku blii kɔdi lɛnɔ kuse ni, Yesu úti aku lɛnɔ na ɔ́gya enu. Na úti-ku úte nwuna batɛyane ɔnii bele aku lɛnɔ bete-ma. ⁸ - ⁹ Bekyuli bamɛni ƒui bádi na bémo. Na banana lɛti bumomo bɔdubɔbla mpimu ine. Amu ka bádi báwɔlɔ ni, batɛyane bamɛni bála bodobodo kɔkɛ kɔni nébu ƒui na kúyi kɔgyigyɛ maatɛ. Nwuna kama ni, Yesu údie bekyuli bamɛni ƒui ulu na bátɔlɔ. ¹⁰ Amu na Yesu ku nwuna batɛyane béduo ɔkɔlɔ kemo na bátɔlɔ bésie Dalmanuta kalɔ lɛlɔ. ¹¹ Ƒarisiƒuɔ badi bébo Yesu kudɔ na bakya beeye-nwu etemila taakɔku-nwu taanu. Anwuɔsu básu-nwu banii ɔbla akɔla adi na banu ka Katɔti kudɔ na ɔ́si. ¹² Nsu Yesu údumo geen, na úye-ma ɔnini, “Bi ɔsu geen na ɔmwi bekyuli baawia akɔla bataanu? Oowo, mɔɔsu-mii ka lɛɛɛdubo akɔla ani udu na bɛɛwia mɛni bɔbla bɔtina-mii!” ¹³ Amu na ɔ́tɔlɔ-ma kudɔ, na ɔ́sɔ útéduo ɔkɔlɔ kemo na ɔ́via úsie ɛpu ɔmmɔ ɔvi ɔni ngye. ¹⁴ Nwuna batɛyane bamɛni báyiƒla bodobodo ɔdi bɔwia bɔda, anwuɔsu bodobodo unwi pɛ na bada na ɔkɔlɔ kemo mmɔ. ¹⁵ Amu na Yesu ɔ́su-ma ɔnini, “Binye kagyumana na bɛnu kaduɛ na Ɔga Herode ku Ƒarisiƒuɔ bɔnyii bɔni na baakya bodobodo kemo na uuƒu lɛlɔ.” ¹⁶ Amu na ama lɛti bákya bátaatɛmiku lɛlɔ taasu banini, “Ɔni na bɔɔɔda bodobodo pii ɔdi ɔsu na ɔɔsu ɔmɛni yoo?” ¹⁷ Nsu ka Yesu ɔ́ti litemi lɛni na baasu ɔsu ni, úye-ma ɔnini, “Bi ɔsu na bɛɛtɛmi taasiku bodobodo tada lɛlɔ? Ku ɔƒɛni ni, bilánu na bilenu tɔ kalɔ? Bina atu ebo ɔkplu bɔdi! ¹⁸ Bibo anumi, nsu bilánu! Bibo atu, nsu bilenu! ¹⁹ Bítanu uwi ɔni na lɛ́ƒɛ bodobodo ɛlɔ líte nkyuli mpimu ɛlɔ na bádi? Kɔgyigyɛ ɛlɛ na kɔkɛ wɛlɛ wɛlɛ kɔni nébu kúyi?” Básu-nwu banii, “Kɔgyigyɛ leevu-inyɔ.” ²⁰ Yesu ɔ́sɔ úye-ma ɔnini, “Na uwi ɔni na lɛ́ƒɛ bodobodo maatɛ líte nkyuli mpimu ine ni, kɔkɛ wɛlɛ wɛlɛ kɔni nébu ni, kɔgyigyɛ ɛlɛ na kúyi?” Básu-nwu banii, “Maatɛ.” ²¹ Amu na úye-ma ɔnini, “Asa na bítenu tɔ ukyuli ɔni na ndi kalɔ?” ²² Ka bésie bétédu Betsaida ni, bekyuli badi béti ɔnumbwɛne ɔdi béboku Yesu na bévele-nwu banii utuku-nwu. ²³ Yesu ɔ́da ukyuli ɔmmɔ kɔnu na útiku-nwu ɔ́lɛku ɔma kemo. Ka útuo lisuo úwi ukyuli ɔmmɔ anumi lɛlɔ na úti enu ɔ́sia-nwu lɛlɔ ni, úye-nwu ɔnini, “Aanu lɛla lɛdi?” ²⁴ Amu na ukyuli ɔmɛni ɔ́talaku anumi ɔ́nu katɔ na ɔ́su ɔnini, “Ɛɛn, mɔɔnu bekyuli, nsu bese aani egyii. Nsu akɛ eesié taavi.” ²⁵ Amu na Yesu ɔ́sɔ útuku-nwu anumi. Uwi unyɔdi ɔmɛni kemo ni, ukyuli ɔmmɔ úbimi anumi kaduɛ na nwuna anumi ábla-nwu nwaa na ɔɔnu lɛla biala kaduɛ! ²⁶ Amu na Yesu údie-nwu ulu ɔnii uteesie kaduli, nsu ɔsɔ utavi ɔma ɔni kemo na bási bébo mmɔ. ²⁷ Ɔmmɔ kama ni, Yesu ku nwuna batɛyane bátɔlɔ mmɔ na bésie akpaklɔ ani nkya Kaesarea Ƒilipi kudɔ. Na ka bákɛ ulu ni, Yesu úye-ma ɔnini, “Bɛsu-mi ukyuli ɔni na bekyuli baasu ka ndi?” ²⁸ Básu-nwu banini, “Badi baasu banii awɔ ndi Ntu Ɔkpilane Yohane. Na badi lɛnɔ baasu banii awɔ ndi Elia. Na babambadi lɛnɔ baasu banii adi Katɔti kenye bediene bammɔ kemo unwi.” ²⁹ Amu na Yesu ɔ́sɔ úye-ma ɔnini, “Na amii nɔɔ? Ɔma na bɛɛkali ka ami ndi?” Petro ɔ́su-nwu ɔnini, “Awɔ ndi Kristo ɔmmɔ.” ³⁰ Amu na Yesu úbo-ma ɔda ka batasu ukyuli ɔdi biala lɛla lɛni bagyi básiku-nwu lɛlɔ mɛni. ³¹ Amu na Yesu úse kalɔ ɔɔtina nwuna batɛyane ala adi. Ɔ́su-ma ɔnini, “Ɔlɛka Ukyuli Ɔyawine Ubi ubo abi pii na ɔma benengu ku bakpane benengu ku ɔda bubo ala batinane enu kemo na bɛdumi-nwu. Badubɔdu-nwu, nsu na limeyi lɛtɛdi lɛlɔ ni, ɔdubɔta ulie ngba.” ³² Ɔ́su-ma ɔmɛni nwaa, na bénu kalɔ. Amu na Petro ɔ́kpanku-nwu úsienku kɔƒɛlɛ na ɔ́dɔnku-nwu. ³³ Nsu ka Yesu úbo únwini na ɔ́nu nwuna batɛyane ni, ɔ́dɔnku Petro ɔnini, “Satan, gyu lɛgba na mina kudɔ!” Ɔ́sɔ ɔ́su ɔnini, “Aláwia ala ani na Katɔti ɔɔwia, mmomu aawia bayawine ayɔla kani!” ³⁴ Amu ka Yesu ɔ́lɔ bekyuli lisu lɛmmɔ ku nwuna batɛyane úboku nwuna kudɔ ni, ɔ́su-ma ɔnini, “Si ukyuli ɔdi ɔɔyɔ́ ka ɔsiaku-mi kama sɔsɔ ni, ɔlɛka udie nwuna lɛlɔ atu, na ubo abi na ɔsiaku-mi kama. ³⁵ Ɔsika ukyuli biala ɔni mɔɔwia ka ɔƒɔ nwuna lili ngba ute lɛlɔ ni, ɔdubɔyila-mu. Na ukyuli biala ɔni nányonu nwuna ngba na ami ɔsu ku litemi buni lɛmɛni ɔsu ni, ɔdubɔkɛ ngba geen. ³⁶ Bi kɔsia na ukyuli ɔdubɔkɛ si ɔ́kɛ kayawi ala ƒui na ɔ́yila ngba geen bɔmmɔ? ³⁷ Munuu bi na ukyuli ubo uti ɔvumana na ɔkɛ ngba geen bɔmmɔ? ³⁸ Ɔƒɛni ni, bekyuli pii baabla ekpidi na beenwíni kama taakya Katɔti. Anwuɔsu si ami ku mina ala ani mɔɔtina ƒui ékpo ukyuli ɔdi kɔƒa ni, anwu lɛnɔ ɔdubukpo ami Ukyuli Ɔyawine Ubi kɔƒa uwi ɔni na mebo ku Katɔti batu kedee na Katɔti ɔmmɔ bukeye ƒui kemo.”

¹ Amu na Yesu ɔ́sɔ ɔ́su-ma ɔnini, “Mɔɔsu-mii geen ka bina akɔ badi bilekpi tɔ wetédu ka bɛ́nu ka Katɔti lɛga bɔdi búbo ku ɔyikun.” ² Emeyi aku kama ni, Yesu útiku Petro ku Yakobo ku Yohane úsienku kɔbi kɔdi lili. Na ama lɛti pɛ bésie bakya. Ka batɛyane bammɔ baanu ni, kavumana kadi kébo Yesu lɛlɔ! ³ Na nwuna awu uukeye na ɔ́ƒuala ƒututuutu ɔni na uukeye teetulo kalɛ na ukyuli ɔyawine ɔdubɔkana lɛla lɛdi bɔƒɔ na ntu kemo na ukeye. ⁴ Amu na nwuna batɛyane ɛtɛ bamɛni bánu ka Mose ku Elia báda bálɛ na baatɛmiku Yesu. ⁵ - ⁶ Liƒu lɛ́da Petro ku bakladi bammɔ ɔni na bátati lɛla lɛni na basu. Amu na Petro ɔ́su Yesu ɔnini, “Ala ɔtinane, bula mɛni bubo bɔdia geen! Ya bɔtu nvo ɛtɛ. Kenwi kadi ƒula kadi, na kenwi kadi Mose kadi, na kenwi lɛnɔ kadi Elia kadi.” ⁷ Amu na uyɔlɔ ɔdi úbewi bana ƒui lɛlɔ, na lɛdi lɛdi lɛ́su lɛnini, “Ɔmɛni ndi mina ubi ɔyɔne. Bise atu na binu-nwu litemi!” ⁸ Bátɛ anu bámana, nsu bátanu ukyuli ɔdi ntu Yesu ɔni nnye-ma kudɔ kani. ⁹ Ka báyu kɔbi lɛlɔ bási mmɔ bébo ni, Yesu úbo-ma ɔda ɔnini, “Bitasu ukyuli ɔdi biala lɛla lɛni na bɛ́nu mɛni wetédu ka ami Ukyuli Ɔyawine Ubi lɛ́ta lɛ́lɛ bekpine akɔ.” ¹⁰ Bábala etemila amɛni na bana akɔ, nsu si ama lɛti belie ni, na beeye bana lɛlɔ banii, “Kekpine bɔta taasi bɔmmɔ kalɔ ndi dɛ?” ¹¹ Amu na béye Yesu banini, “Bi ɔsu na ɔda bubo ala batinane básu ka Elia na ɔlɛka ɔka Kristo bubo?” ¹² Yesu ɔ́su-ma ɔnii, “Sɔsɔ na básu. Elia na ɔlɛka ɔka bubo kalɛ na wabaklibi lɛla biala wese. Nsu Bunweni Kedee Ɔku lɛnɔ ɔ́su ka Ukyuli Ɔyawine Ubi ɔdububo abi pii na badubudumi-nwu. Dɛ bɛɛkali ka ɔmɛni lɛnɔ kalɔ kaatina? ¹³ Mɔɔsu-mii ka Elia ɔmmɔ úubo. Nsu bekyuli bátabu-nwu kaduɛ. Mmomu bábla-nwu kalɛ na ama baayɔ́. Lɛla lɛmɛni líbalɛ aani kalɛ na Katɔti kenye bediene bénweni bése na Bunweni Kedee Ɔku kemo básiku-nwu lɛlɔ.” ¹⁴ Uwi ɔni na Yesu ku Petro bene bénwini bébo batɛyane bakladi kudɔ ni, bábanu ka bekyuli pii badi benye bámana-ma, na ama ku ɔda bubo ala batinane badi benye baaní litemi lɛdi teenene. ¹⁵ Ka bekyuli bammɔ ƒui bánu ka Yesu ɔdubo ni, ɔ́bla-ma yaa, na békeli bátasiaku-nwu na bakya-nwu kenye. ¹⁶ Yesu úye nwuna batɛyane ɔnini, “Bi lɛsɛ lɛlɔ na amii ku-ma binye bɛɛní?” ¹⁷ Amu na ɔnana ɔdi unye bekyuli bammɔ akɔ na ɔ́su Yesu ɔnini, “Ala ɔtinane, líti mina ubi líboku-ɔ, ɔsika kɔyu kukpidi kɔdi kɔsiaku-nwu na kɔ́ya na ulakana butemi. ¹⁸ Uwi biala si kɔyu kɔmɛni kuukpóku-nwu ni, na kuubó-nwu kɔva kalɔ, na avlɔvɔ aalɛ́-nwu kenye, na ɔɔdu anyi, na nwuna lɛlɔ ƒui lɛɛsinsi. Amu na líti-nwu líboku ƒula batɛyane nnii babwi-nwu, nsu bátakana.” ¹⁹ Amu na Yesu ɔ́su-ma ɔnini, “Eei! Ɔmwi keyi kamɛni bekyuli, bina bɔƒɔtaadi bɔ́sɔ! Uwi ɛlɛ na ɔlɛka lɛkya-mii kudɔ ntédu asa na bɛƒɔ bɛdi? Munuu uwi ɔmani na ndubɔda-mii asa na binu ala kalɔ? Biti ɔnamu ɔmmɔ biboku-mi!” ²⁰ Amu na béti-nwu béboku Yesu. Na ka kɔyu kɔmɛni kɔ́nya kɔ́nu Yesu ni, kɔ́kunku ɔnamu ɔmmɔ na kɔ́ya na úbuli ɔ́tɛ kalɔ uubó teeminime, na avlɔvɔ aalɛ́-nwu kenye. ²¹ Amu na Yesu úye ɔti ɔmmɔ ɔnini, “Ka úse kalɔ ɔɔbla-nwu lɛni ni, uwi úutu?” Ɔnana ɔmmɔ ɔ́su-nwu ɔnini, “Úse kalɔ úti ɔ́si uwi ɔni na ɔdi ɔnamu. ²² Uwi pii kɔyu kɔmɛni kɔɔkya ɔkplu ka nka kɔdu-nwu. Si úbo lɛni ni, kɔɔyá na uubuli teeduo ogya iye ntu kemo. Buvele, nu-bu kɔnyana na ebunku-bu si ɔdi lɛla lɛni na akana bɔbla!” ²³ Yesu ɔ́su-nwu ɔnini, “Bi ɔsu na aasu-mi anii si makana? Lɛla lɛdi liiibo ɔkplu liite ukyuli ɔni náƒɔ-mi ɔ́di.” ²⁴ Kɔnakunwi ni, ubi ɔti ɔmmɔ ɔ́va momoomo ɔ́su ɔnini, “Mbo bɔƒɔtaadi, nsu buuumomo. Bunku-mi na lɛkɛ bɔƒɔtaadi libu!” ²⁵ Amu na uwi ɔni na Yesu ɔ́nu ka bekyuli pii bammɔ baaní teede-ma ni, útemi úte kɔyu kɔmɛni ɔnini, “Kɔyu kukpidi kɔni neeenu na kulétemi, mɔɔsu-ɔ ka vi lɛ ɔnamu ɔmɛni lɛlɔ kemo, na sɔ teduo-nwu lɛlɔ kemo kudi kudii lɛnɔ!” ²⁶ Kɔyu kɔmɛni kɔ́va momoomo, na kúdi ɔnamu ɔmɛni kúbo kalɔ na kɔ́lɛ-nwu lɛlɔ kemo kɔ́tɔlɔ. Ɔnamu ɔmɛni ɔ́tɛ mmɔ aani si bukpi na úkpi. Na ukyuli biala ɔni nnye mmɔ ɔɔsu ɔnini, “Úkpi!” ²⁷ Nsu Yesu ɔ́da ɔnamu ɔmɛni kɔnu na ɔ́ta únye. ²⁸ Nwuna kama uwi ɔni na Yesu útéduo kaduli ni, nwuna batɛyane béye-nwu buɛɛ banini, “Bi ɔsu na abu bútakana kɔyu kɔmɛni bɔbɔku bɔlɛku ɔnamu ɔmmɔ lɛlɔ kemo?” ²⁹ Amu na Yesu ɔ́su-ma ɔnini, “Ntu ukyuli ɔni mɔɔkpali katɔ uwi ndi uwi na uulie kɔka kani ndubɔkana kɔyu kɔmɛni udu bɔbɔku bɔlɛku ukyuli lɛlɔ kemo.” ³⁰ Yesu ku nwuna bakpana bátɔlɔ mmɔ na bátávi Galilea. Yesu útayɔ ka ukyuli ɔdi ɔti kesii kani na ɔkya, ³¹ ɔsika ɔkya ɔɔtina nwuna batɛyane ala. Ɔ́su-ma ɔnini, “Ukyuli ɔdi ɔdubo Ukyuli Ɔyawine Ubi kakya bɔkya na uti-nwu ute bekyuli na badu-nwu. Na limeyi lɛtɛdi lɛlɔ ni, ɔsɔ ɔdubɔta na ulie ngba.” ³² Nsu bétenu lɛla lɛni na ɔɔsu-ma mɛni kalɔ, na baayia ka beye-nwu litemi lɛmɛni kalɔ benu. ³³ Amu ka bésie bétédu Kapernaum ni, bétéduo kaduli kadi kemo. Mmɔ ni, Yesu úye nwuna batɛyane ɔnini, “Bi litemi na bɛda bɛɛní teenene bina akɔ ka bɔdubo?” ³⁴ Nsu bátaka kenye budie. Ɔsika ɔni badubo ni, bakɛ baaní lɛsɛ ka bati ukyuli ɔni ntulo ƒui na bana akɔ. ³⁵ Amu na Yesu úlie kalɔ na ɔ́lɔ nwuna batɛyane leevu-inyɔ bammɔ, na ɔ́su-ma ɔnini, “Bina akɔ ukyuli ɔni mɔɔwia ka bakladi bete-nwu ɔbu ni, ɔlɛka uti lɛlɔ ɔbla aani si uuubo kenyekɔ biala na bina ƒui akɔ na ɔbla bina akɔ ƒui kabla.” ³⁶ Amu na ɔ́ya na ɔnamu ɔdi úbenye bana anumi. Na ɔ́gyu ɔnamu ɔmɛni ɔ́sia nwuna lɛgba lɛlɔ na ɔ́su-ma ɔnini, ³⁷ “Ukyuli biala ɔni mɔɔƒɔ́ ɔnamu na ami ɔsu ni, ami na ɔ́ƒɔ. Na ukyuli biala ɔni mɔɔƒɔ́-mi ni, ɔɔɔdi ami lɛti na ɔ́ƒɔ. Mmomu ɔ́ƒɔ mina Ɔti ɔni nátala-mi lɛnɔ.” ³⁸ Nwuna kama ni, ɔtɛyane ɔni baalɔ Yohane ɔ́su Yesu ɔnini, “Ala ɔtinane, bɔ́nu ka ukyuli ɔdi ɔkya ɔɔbɔku ayu ekpidi na ƒula lɛnyi kemo. Na bɔ́su-nwu bɔnii ɔda ɔya, ɔsika uuubo-bu akɔ.” ³⁹ Yesu ɔ́su-ma ɔnini, “Bitetile-nwu kuƒi, ɔsika ukyuli ɔni mɔɔbla akɔla budie taatina na mina lɛnyi kemo ni, ulásu lɛla likpidi taasiku-mi lɛlɔ. ⁴⁰ Na ukyuli ɔni nétenye útetile-bu ni, abu ku-nwu bɔdi benwi. ⁴¹ “Na muute-mii bɔti ka ukyuli biala ɔni ndubute-mii ntu ɔnii bɛni ka mina badi na bɛdi ɔsu ni, Katɔti ɔdubɔƒɔ-nwu kayu. ⁴² “Nsu si ukyuli ɔdi ɔ́ya na banamu bani náƒɔ bádi mɛni ɔdi únwini kama ɔ́kya nwuna bɔƒɔtaadi ni, ɔdububo abi geen! Si béti kabuli bényimi báda lɛtabi bonwu lɛdi na béti báƒala-nwu limɔ, na bébo-nwu bákya ɛpu kemo ni, ɔdia-nwu utulo. ⁴³ - ⁴⁴ “Anwuɔsu si ƒula kɔnu kunwi kuubile ƒula bɔƒɔtaadi ni, tuna na ekulo-ku edie! Ɔdia ka ebo kɔnu kunwi pɛ na eli ngba uwi ɔni ƒui utulo ka ebo enu anyɔ na Katɔti ɔdububo-ɔ ɔvaaku na kebu kani na baakyula ala ani naaadia kemo. ⁴⁵ - ⁴⁶ Na si ƒula ɔgba muubile ƒula bɔƒɔtaadi ni, ɔlɛka ekulo ɔgba ɔmmɔ edie. Ɔdia si ebo ɔgba unwi na ákɛ ngba ƒui utulo si ebo lɛgba inyɔ na bébo-ɔ bátákya ogya kemo. ⁴⁷ Na si ƒula lɛnumi lɛɛkpanku-ɔ taatákya likpidi kemo ni, da-ni die. Ɔdia si ebo lɛnumi linwi na éduo Katɔti lɛga kadikɔ utulo si ebo anumi anyɔ na bébo-ɔ bátákya kebu ⁴⁸ kani kemo básu banii, “ ’Beklubi bani muubile ala na mmɔ ni, belekpi kudii! Na ogya ɔni mɔɔkyula ala na mmɔ ni, uleni kudii.’ ⁴⁹ Ɔsika kalɛ na beeti mma taakya adila kemo ni, lɛni kani na Katɔti ɔdubɔya na ama bani meduo ogya ɔmmɔ kemo bebo abi. ⁵⁰ “Mma bɔdia. Nsu si buuubo emini ni, alakana-mu emini bɔsɔ bɔkya lɛnɔ. Anwuɔsu ni, binye lɛbibo biala kenye kpakplaa. Na bilieku lɛlɔ na bɔyɔ kemo.”

¹ Amu na Yesu ɔ́tɔlɔ mmɔ úsie Yudea kalɔ lɛlɔ, na útávia Yordan Ketu. Bekyuli pii básɔ bébo bábaka bámana-nwu mmɔ lɛnɔ, na ɔkya ɔɔtina-ma litemi buni aani kalɛ na ɔɔyɔ́ bɔbla kalɛ. ² Ƒarisiƒuɔ badi bébo-nwu kudɔ na nka báyɔ ka bakywɛ-nwu kakpagyuɛ. Béye Yesu banini, “Katɔti ɔda bubo uute kuƒi ka ɔnana ɔnyonu ulekudi?” ³ Amu na Yesu lɛnɔ údie kenye na úye-ma ɔnini, “Bi ɔda bubo na Mose úte-mii?” ⁴ Bédie kenye banini, “Mose úte kuƒi ka ɔnana ɔni nsɔ naaayɔ ulekudi unweni ɔku na uti ute bɔti asa na ɔnyonu-nwu.” ⁵ Yesu ɔ́su-ma ɔnini, “Mose únweni ɔmɛni úte-mii lɛni ɔsika biidé ala bɔtina. ⁶ Na kalɔ kesekɔ na kayawi budie kemo ni, Katɔti údie ɔnana ku uleku. ⁷ Bunweni Kedee Ɔku ɔɔsu ɔnini, ’Na ɔmɛni ɔsu ni, ɔnana ɔdubɔmami ɔsiku ɔti ku uni lɛlɔ, na anwu ku ulekudi belie basala. ⁸ Na bana inyɔ badubɔbla unwi.’ Na Katɔti anumi ni, ukyuli unwi na ɔɔnu. Na ɔɔɔdi inyɔ! ⁹ Anwuɔsu bekyuli bani na Katɔti úti ɔ́sala ni, ukyuli ɔyawine biala utegyingya-ma ntɛ!” ¹⁰ Kama, uwi ɔni na bésie kaduli ni, nwuna batɛyane béye-nwu etemila básiku lɛla lɛni na ɔ́su na ɔda bubo bɔmmɔ lɛlɔ. ¹¹ Yesu údie kalɔ ɔnini, “Ɔnana ɔni nányonu ulekudi na ɔ́sɔ úti ɔbambadi ni, ɔ́di kɔsɔnɔ ɔ́ƒiɔ ulekudi ɔkukudi ɔmmɔ. ¹² Lɛni kani si uleku ɔ́nyonu ɔgyani na ɔ́sɔ útélie kɔgya kɔbambadi lɛnɔ ni, anwu lɛnɔ ɔ́di kɔsɔnɔ ɔ́ƒiɔ ɔgyani ɔkukudi ɔmmɔ.” ¹³ Uwi ɔmmɔ kani ni, bekyuli badi béti bana bebi béboku Yesu banii uti nwuna enu ɔsia-ma lɛlɔ. Nsu nwuna batɛyane bádɔnku-ma. ¹⁴ Ka Yesu ɔ́nu lɛni ni, úbeti kɔnyi na ɔ́su nwuna batɛyane ɔnini, “Bɛya na banamu bebo-mi kudɔ, na bitetile-ma kuƒi. Ɔsika Katɔti lɛga kadikɔ kese kete bekyuli bani néboku lɛlɔ kalɔ aani banamu wɛlɛ wɛlɛ bamɛni udu kalɛ. ¹⁵ Mɔɔsu-mii geen ka ukyuli ɔni naaadubo Katɔti lɛga bɔdi bɔƒɔ aani kalɛ na ɔnamu blii suɛ uuboku lɛlɔ kalɔ ni, uleduo Katɔti lɛga kadikɔ kudii.” ¹⁶ Amu na ɔ́sala banamu bani nnye mmɔ lisu na úti nwuna enu ɔ́sia-ma lɛlɔ na ɔ́su-ma ɔnii, “Kusɛ kusɛ.” ¹⁷ Ka Yesu ɔ́ta ɔnii ɔɔtɔlɔ uteesie ulu ni, ɔnana ɔdi ɔkɛ usi úbo-nwu kudɔ úbalɛ akɔnkɔ na nwuna anumi, na úye-nwu ɔnini, “Ala ɔtinane buni, bi na ɔlɛka lɛbla asa makɛ ngba bɔni naaadubo bɔsa kudii?” ¹⁸ Yesu úye-nwu ɔnini, “Agyi lɛla lɛni ɔsu na aalɔ-mi ɔbuni? Ukyuli ɔdi biala ɔɔɔdia ntu Katɔti lɛti pɛ. ¹⁹ Agyi Katɔti ɔda bubo bɔmmɔ ƒui. Tadu ukyuli, tadi kɔsɔnɔ, teyu, tada ukyuli ɔdi kenye, tatɔlɔ ukyuli na aƒɔ-nwu ala, bu ƒ^ɔti ku ƒ^ini.” ²⁰ Ɔnana ɔmɛni ɔ́sɔ ɔ́su-nwu ɔnini, “Ala ɔtinane, ka ɔ́si uwi ɔni na nse ɔnamu úbedu ɔmwi ni, mɔɔdi ɔda bubo bɔmɛni ƒui lɛlɔ.” ²¹ Yesu ɔ́nu-nwu ku bɔyɔ na ɔ́su-nwu ɔnini, “Lɛlakpa linwi kani nébu-ɔ bɔbla. Teesie na etéti ala ani na ebo ƒui eye na eti egulabi ammɔ ete bawabane, na adubunwini ɔlakɛne na katɔ. Ɔmɛni kama ni, na ebo abasiaku-mi kama ƒui!” ²² Ka ɔnana ɔmɛni únu litemi lɛmɛni ni, enu áƒɛ-nwu na ɔ́tɔlɔ ku kɔnyana, ɔsika ubo ala pii. ²³ Yesu únwini ɔ́nu nwuna batɛyane ɔ́mana na ɔ́su-ma ɔnini, “Ubo ɔkplu geen asa na balakɛne badubɔkana na beduo Katɔti lɛga bɔdi kemo.” ²⁴ Litemi lɛmɛni lɛ́bla nwuna batɛyane bamɛni kasusu dɛye dɛye. Nsu Yesu ɔ́sɔ ɔ́su-ma ɔnini, “Mina banamu, bɛnu kalɛ na ubo ɔkplu ute balakɛne ka bakɛ kuƒi na Katɔti lɛga kadikɔ! ²⁵ Bana mmɔ buduo ubo ɔkplu utulo kalɛ na ebuo ala utine ubendi ƒui ɔvi udila liƒi!” ²⁶ Ka ɔ́su-ma litemi lɛmɛni ni, ɔ́ya na bana kasusu kásɔ kábla kalɛ kadi kébu! Na bakya beeye bana lɛlɔ banini, “Na ɔma geen ndubɔkɛ bɔƒɔ?” ²⁷ Amu na Yesu údie ɔmɛni kalɔ ɔnini, “Ɔyawine biala ulakana ɔmɛni bɔbla. Nsu Katɔti anwu ni, ɔɔkana lɛla biala bɔbla.” ²⁸ Amu na Petro ɔ́su ɔnini, “Nu, bɔ́da bula lɛla biala búse na bɔkɛ bɔsiaku-ɔ. Bɔdubɔkɛ bɔƒɔ?” ²⁹ Amu na Yesu ɔ́su ɔnini, “Mɔɔsu-mii geen ka bɛdubɔkɛ ala ani ntulo ani bɛ́da bíse. Ɔsika ukyuli biala ɔni náda nwuna ɔma úse, iye banwani bananabi ku belekubi, iye uni, iye ɔti, iye nwuna banamu, iye kemo na mina bɔsiaku ku litemi buni lɛmɛni bugyingya ɔsu ni, ³⁰ ɔdubɔkɛ ala ammɔ akpa eti anyɔ ɔsia kama na kalɔ lɛlɔ mɛni. Ɔdubɔkɛ lɛtɔ ku banwani bananabi ku banwani belekubi ku beni ku bebi ku imo. Nsu ni, bekyuli badubo-nwu bukpoku lɛnɔ. Na ɔmɛni kama ni, ɔdubɔkɛ ngba bɔni nsɔ naaadubo bɔsa kudii na kayawi kawɔdi kani ndububo kemo. ³¹ Nsu bekyuli pii bani ntɔ ɔƒɛni ni, badubɔvi bakpɛ kama. Na bani nkpɛ kama ɔƒɛni ni, badubɔvi batɔ.” ³² Uwi ɔni na bákɛ ulu lɛlɔ bésela Yerusalem ni, Yesu ɔtɔ asa na nwuna batɛyane basia. Na ɔtɔtɔ ɔɔgyú batɛyane bammɔ, na liƒu lɛɛda bekyuli bani nsiaku-ma lɛnɔ. Yesu ɔ́sɔ ɔ́lɔ nwuna batɛyane úsienku kɔƒɛlɛ na ɔ́su-ma ala ani ndubo bɔlɛku-nwu. ³³ Ɔ́su-ma ɔnini, “Binu! Búsela Yerusalem kesii kani na badubuti ami, ɔni ndi Ukyuli Ɔyawine Ubi, bakya bakpane benengudi ku ɔda bubo ala batinane enu kemo. Badubɔdu-mi kukpi kɔtɔ na beti-mi bakya Romaƒuɔ lɛkɔkɔ. ³⁴ Na ama lɛnɔ badubuwi-mi anumi kalɔ, na betuo lisuo bewi-mi, na bebo-mi, na badu-mi. Nsu limeyi lɛtɛdi lɛlɔ ni, nsɔ ndubɔta mbelie ngba.” ³⁵ Amu na Sebedeo bebi bani ndi Yakobo ku Yohane bébo Yesu kudɔ na básu-nwu banini, “Ala ɔtinane, lɛla lɛdi lɛkya na bɔɔyɔ́ ka abla ete-bu.” ³⁶ Yesu úye-ma ɔnini, “Bi na ɔdi?” ³⁷ Básu-nwu banini, “Si ésie Katɔ Ɔga Ɔma etélie lɛga bɔdi liboku lɛlɔ ni, abu lɛnɔ bɔɔyɔ́ ka bubelie-ɔ kudɔ na mmɔ. Na bula akɔ unwi ulie-ɔ kɔdianu kakɛ, na unwi lɛnɔ ulie-ɔ kɔmiinu kakɛ.” ³⁸ Yesu ɔ́su-ma ɔnini, “Bɛɛɛgyi lɛla lɛni na biiye! Bɛ́ƒɔ bɛ́di ka bɛdubɔkana na bɛni lɛbibo ɔɔƒɛɛ ɔni na mɔɔní? Na bɛdubɔkana na bɛƒɔ bɔkpila ɔdi ɔni na mɔɔƒɔ́ na kayawi mɛni?” ³⁹ Amu na bédie kenye banini, “Bɔdubɔkana.” Yesu ɔ́su-ma ɔnini, “Ɛɛn, bɛdubɔni ɔɔƒɛɛ ukpidi ɔni udu na mɔɔní, na bɛdubɔƒɔ bɔkpila ɔdi ɔni udu na mɔɔƒɔ́ mɛni. ⁴⁰ Nsu liiibo kuƒi ka lidie ukyuli ɔni ndubulie-mi kɔmiinu iye kɔdianu. Mina Ɔti ndubuti ute bekyuli bani na ɔ́klibi mmɔ úse úte.” ⁴¹ Ka batɛyane leevu bakladi bénu etemila amɛni ni, béti kɔnyi bakya Yakobo ku Yohane. ⁴² Anwuɔsu Yesu ɔ́lɔ bana ƒui ɔ́sala lisu na ɔ́su-ma ɔnini, “Bina ƒui bɛgyi ka aban lɛlɔ badine benengudi bebo ɔyikun na kalɔ bamba bekyuli lɛlɔ. Na lɛlɔ badine benengu bammɔ baanya-ma taamana na bana lɛlɔ bɔtina kemo. ⁴³ Nsu útalɛka use lɛni na bina akɔ. Si bina akɔ ɔdi ɔɔyɔ́ ka ɔbla ɔtɔnkune ni, ɔlɛka uti lɛlɔ ɔbla bakladi ƒui kabla ɔblane. ⁴⁴ Na si bina akɔ ɔdi ɔɔyɔ́ ka ɔƒɔ lɛnyi ni, ɔlɛka uti lɛlɔ ɔbla aani ukyuli ɔni neeebo kenyekɔ biala na bakladi ƒui akɔ. ⁴⁵ Ɔsika Ukyuli Ɔyawine Ubi muedi útebo ɔnii babla-nwu kabla. Bubo na anwu ɔlatidi úbo ubabla kabla ute bekyuli na uti nwuna ngba ute na ɔƒɔ kayu na bekyuli pii ekpidi lili.” ⁴⁶ Ɔmmɔ kama ni, Yesu ku nwuna batɛyane bésie bétéduo Yeriko. Na ɔni na baatɔlɔ ɔma ɔmmɔ ni, bekyuli pii badi básiaku-ma. Amu ka bákɛ ulu ni, bávi ɔnumbwɛne ɔdi baalɔ Bartimeo ɔni kalɔ ndi Timeo ubidi. Na ulie uuvele ala. ⁴⁷ Ka únu ɔnii Yesu Nasareni mɔɔví ni, ɔ́va ɔ́su ɔnini, “Yesu! Dawid kaba kemo ubi! Nu-mi kɔnyana!” ⁴⁸ Bekyuli pii bani mɔɔví mmɔ bábɔku-nwu banii ɔba lɛsɛ. Nsu ɔƒɛni geen na ɔ́sɔ ɔɔva momoomo taasu ɔnini, “Dawid kaba kemo ubi! Nu-mi kɔnyana!” ⁴⁹ Amu ka Yesu únu-nwu butemi ni, údi únye na ɔ́su ɔnini, “Bɛlɔ-nwu bite-mi.” Anwuɔsu bálɔ ɔnumbwɛne ɔmɛni banini, “Kɛ kubiti! Ta pla, ɔsika ɔɔlɔ-ɔ.” ⁵⁰ Kɔnakunwi ni, údie nwuna kɔdi úwi na ɔ́ba lɛgyu úsie Yesu kudɔ. ⁵¹ Yesu úye-nwu ɔnini, “Bi na aawia ka lɛbla lite-ɔ?” Ɔnumbwɛne ɔmɛni ɔ́su-nwu ɔnini, “Unwoti, ya mina anumi alɛmi na ntaanu!” ⁵² Amu na Yesu ɔ́su-nwu ɔnini, “Teesie. Ƒula bɔƒɔtaadi bɔ́bwi-ɔ.” Na kɔnakunwi ni, nwuna anumi ébimi na úse kalɔ ɔɔnu. Amu na ɔ́siaku Yesu, na bana ƒui bátɔlɔ bésie bana ulu.

¹ Uwi ɔni na bákpɛ béde Yerusalem na bétédu Betƒage ku Betania amadɔ mmɔ ni, bébedu kɔbi kɔni baalɔ Inɔ Egyii Kɔbi kudɔ. Na mmɔ ni, Yesu ɔ́tala nwuna batɛyane inyɔ ɔnii ama bataatɔ. ² Na ɔ́su-ma ɔnini, “Si bítédu ɔma udeedi ɔni bɛdubɔda bɔlɛ kemo ni, bɛdubɔnu ka bakya ebuo ala utine ubi ɔdi kabuli bényene mmɔ ɔni na ukyuli ɔdi útelie-nwu kama kudii. Bidie-nwu kabuli na biti-nwu biboku-mi. ³ Na si ukyuli ɔdi úye-mii ɔnii, ’Bi bɛɛka-nwu?’ ni, bɛsu-nwu ka bina Unwoti mɔɔwia-nwu, na biti-nwu biboku mɛni ɔƒaani.” ⁴ Anwuɔsu nkyuli inyɔ bamɛni bésie na bátánu ka bakya ebuo ala utine ubi ɔdi kabuli bényene ukyuli ɔdi kayakun. Na uwi ɔni beedie-nwu na kabuli kemo ni, ⁵ bekyuli bani nnye mmɔ badi béye-ma banini, “Bi biidie-nwu kabuli bɛbla?” ⁶ Básu kalɛ na Yesu ɔ́su-ma. Amu na ama lɛnɔ béte-ma kuƒi na bédie-nwu. ⁷ Ka béti ebuo ɔmɛni béboku Yesu ni, bébimi bana adi béwi ebuo ɔmmɔ lɛlɔ, na Yesu ɔ́kɔ úlie-nwu kama. ⁸ Bekyuli pii lɛnɔ bébimi bana adi béwi kalɔ, na badi lɛnɔ békulo evete ku like béwi ulu ɔni lɛlɔ na ɔdubo bɔvi. ⁹ Bekyuli bani ntɔ ku bani nkpɛ ƒui baava taasu banini, “Hosiana! Bimwi anwu ɔni ndubo na Blɔti lɛnyi kemo! ¹⁰ Biti bumwi bite Ɔga Dawid lɛga kadikɔ kani ndubo! Hosiana ute Katɔti na katɔ ƒui!” ¹¹ Ɔni na úduo Yerusalem ni, Yesu úsie Yudaƒuɔ kakpakɔ. Na ɔ́nu mmɔ ku lɛla biala ɔ́mana. Nsu ka kadi káayu ɔsu ni, ɔ́tɔlɔ úsie Betania ku nwuna batɛyane na bátátɛ mmɔ. ¹² Kadi kégye uwi ɔni na bávia Betania badubo ni, kɔka kúbo kɔɔda Yesu. ¹³ Ɔ́nu ɔgyu ka kɔdingyii kɔdi kunye kɔni lɛlɔ na evete asia pii. Anwuɔsu úsie ɔnii útánu si ebi adi asia-ku lili. Nsu ka údu kugyii kɔmmɔ kalɔ ni, ɔ́nu ka kútanwu ebi. Evete kani nsia-ku lili. Na uwi ɔni na kɔsɔ kɔnwu lɛnɔ útedu tɔ. ¹⁴ Amu na Yesu ɔ́su kugyii kɔmmɔ ɔnini, “Ukyuli ɔdi uleti ƒula kegyiibi ulakya kenye kudii lɛnɔ!” Na nwuna batɛyane bénu ka ɔ́su lɛni. ¹⁵ Ka bétéduo Yerusalem ni, Yesu úsie Yudaƒuɔ kakpakɔ na ɔkya ɔɔgyá bekyuli bani nkya mɔɔdi kuye na mmɔ taalɛku kaduli kammɔ. Údi egulabi bavumanane ala kasiakɔ úbo. Na údi bani nlie beeyé babloduma lɛnɔ eboku úbo. ¹⁶ Na útatuna ɔnii ukyuli ɔdi uti lɛla lɛdi ɔvinku útéye na kakpakɔ kaduli mmɔ. ¹⁷ Amu na ɔ́tina bekyuli bammɔ ala na ɔ́su-ma ɔnini, “Bénweni na Bunweni Kedee Ɔku kemo ka Katɔti ɔ́su ɔnii, ’Badubɔlɔ mina kesii banii kaduli kani kemo na bayawine ƒui baakpali katɔ.’ Nsu amii bíti-ka bínwini beyune kabɛkɔ!” ¹⁸ Bakpane benengudi ku ɔda bubo ala batinane bani nkya mmɔ bénu etemila ani na Yesu ɔ́su. Anwuɔsu báwia ulu ɔni lɛlɔ na nka basia na badu-nwu. Nsu baayia-nwu ɔ́si kalɛ na lɛlɔ lɛɛyɔ́ bekyuli ƒui na nwuna ala bɔtina ɔsu. ¹⁹ Ɔni na useyi uwi údu ni, Yesu ku nwuna batɛyane bátɔlɔ na ɔma ɔmmɔ kemo. ²⁰ Kadi kégye ɔtanta uwi ɔni na bákɛ ulu lɛlɔ bésela ni, bánu ka kɔdingyii kɔmmɔ kúkpi ku lidu. ²¹ Petro ɔ́kali lɛla lɛni nébo, na ɔ́su Yesu ɔnini, “Ala ɔtinane, nu kugyii kɔni na éwida mmɔ kúkpi!” ²² Yesu ɔ́su-ma ɔnini, “Bɛƒɔ Katɔti bɛdi. ²³ Mɔɔsu-mii geen ka ukyuli biala ɔni ndubɔsu kɔbi ɔnii kɔgyu na kutéduo ɛpu kemo, na nwuna kayi kétetile-nwu ulu mmomu ɔ́ƒɔ ɔ́di ni, ɔdububo ute lɛni. ²⁴ Anwuɔsu mɔɔsu-mii nnii lɛla biala lɛni na bɛdubuye Katɔti na uwi ɔni na bɛɛkpali katɔ ni, bɛƒɔ bɛdi bɛnii bɛdubɔkɛ-ni. Na Katɔti ɔdubɔbla lɛla lɛmmɔ ute-mii. ²⁵ Na si bíboku eli kalɔ bɛnii bɛɛkpali katɔ na bɛ́nu ka ukyuli ɔdi ɔ́ƒiɔ-mii ni, ɔlɛka biti bɛkyiɛ-nwu kalɛ na bina Ati ɔni nkya katɔ lɛnɔ weti bina ekpidi wakyiɛ-mii. ²⁶ Nsu si bíteti bítakyiɛ-nwu ni, bina Ati ɔni nkya katɔ lɛnɔ uleti bina ekpidi ulakyiɛ-mii.” ²⁷ Amu na Yesu ku nwuna batɛyane básɔ bésie Yerusalem. Ɔni na Yesu úsie útéduo kakpakɔ mmɔ ni, bakpane benengu ku ɔda bubo ala batinane ku ɔma benengu badi bébo-nwu kudɔ. ²⁸ Na bébeye-nwu banini, “Ɔma ɔyikun na aabla ala amɛni? Na ɔma lɛnɔ néte-ɔ ulu?” ²⁹ Yesu údie kenye ɔnini, “Kudeedi ni, ndubuye-mii litemi linwi pɛ. Na si bídie-ni kenye ni, ndubɔsu-mii ukyuli ɔni ɔyikun nda mɔɔbla ala amɛni. ³⁰ Bɛsu-mi wɛ na Yohane ɔ́ƒɔ ɔyikun ɔ́siku asa na ɔ́kpila bekyuli ntu na ketu kemo? Ɔyikun ɔmmɔ ɔ́si Katɔti kudɔ, munuu ukyuli ɔyawine néte-nwu ulu?” ³¹ Bése kalɔ baaní lɛla lɛmɛni teenene na bana akɔ, na beeye lɛlɔ banini, “Bi na ɔlɛka bɔsu? Si bɔ́su bɔnii ɔyikun ɔmmɔ ɔ́si Katɔti kudɔ ni, ɔdubuye ɔnii, ’Si use lɛni ni, bi ɔsu na bitaƒɔ Yohane bitadi?’ ³² Nsu si bɔ́su-nwu bɔnii ukyuli ɔyawine nátala-nwu ni, ɔmɛni lɛnɔ ɔɔɔdia!” Baayia ka basu lɛni lɛnɔ, ɔsika bekyuli bani nnye mmɔ ɔdi biala ɔ́ƒɔ ɔ́di ka Yohane ɔdi Katɔti kenye udiene. ³³ Anwuɔsu básu Yesu banini, “Bɔɔɔgyi.” Amu na Yesu ɔ́su-ma ɔnini, “Ami lɛnɔ lɛɛɛdubo-mii ɔyikun ɔni mbo ɔsu mɔɔkana ala amɛni bɔbla bɔsu!”

¹ Amu na Yesu úbo-ma lɛgba ɔnini, “Dii ni, ɔnana ɔdi úse kɔdingyii kemo kadi. Na ɔ́gyi ɔba ɔ́mana-ka. Na úku ubu na kalɔ kammɔ ntɛ kesii kani na ɔdubo ebi ammɔ ntu butaamana teewi. Na ɔ́tu kesii kani nákuku kalɛ na benye mmɔ bataagyumana kemo kammɔ. Amu na úti kemo kammɔ úte kabla bablane badi ɔnii bataanu-ka lɛlɔ, na anwu ku-ma beti lɛla lɛni bákɛ mmɔ bele. Amu na ɔ́tɔlɔ úsie ulu. ² Ka uwi údu na béde ebi ammɔ ni, ɔnana ɔmɛni ɔ́tala ɔtu ɔdi ɔ́kya-ma ɔnii si béede ebi ammɔ ni, na beti nwuna kakɛ bete ɔnana ɔmmɔ na uboku-nwu. ³ Nsu nwuna kabla bablane bamɛni béƒie ɔtu ɔmɛni bébo na bágya-nwu, na ɔ́tɔlɔ ku enukplu. ⁴ Amu na ɔnana ɔmɛni ɔ́sɔ ɔ́tala ɔtu ɔbambadi. Na ka úsie ni, kabla bablane bamɛni bébo-nwu na ɔ́ƒɔ ɔlɛ lili, na béwi-nwu anumi kalɔ geen. ⁵ Amu na ɔnana ɔmɛni ɔ́sɔ ɔ́tala ɔtu ɔbambadi lɛnɔ, na bébo anwu lɛnɔ na bádu-nwu. Ɔ́sɔ ɔ́tala babambadi pii. Na bébo badi na bádu bakladi. ⁶ “Ukyuli ɔni násɔ úbu na ɔdubɔtala-nwu ndi ɔnana ɔmɛni ubidi ɔyɔne. Kawɔlɔkɔ ni, ɔ́tala ubidi ɔyɔne ɔmɛni. Na ɔ́su lɛlɔ ɔnini, ’Mɔɔƒɔ́ taadi ka badubute mina ubi anwu ɔbu.’ ⁷ “Nsu kabla bablane bammɔ básu lɛlɔ banini, ’Ɔmɛni ndi bula unwoti ala ɔdine. Bibo na bɛya bɔdu-nwu, na buti nwuna kadikɔ bɔbla bula kadi!’ ⁸ Anwuɔsu béƒie ɔnamu ɔmɛni. Na ka bádu-nwu ni, bébo-nwu báva kemo kammɔ ɔba kama.” ⁹ Amu na Yesu úye benengu bammɔ ɔnini, “Bi na bɛɛkali ka ɔnana ɔmɛni ɔdubɔbla? Ndubo-mii bɔsu! Ɔdubusie mmɔ utádu kabla bablane bammɔ na uti kemo kamɛni ɔkya bekyuli bamba lɛkɔkɔ. ¹⁰ Ngyi ka bɛ́ka Bunweni Kedee Ɔku kemo kesii kani na ɔ́su ɔnii, ’Lɛtabi lɛni na batune béni báva banii lɛɛɛdia ni, ani mmomu nébenwini lɛtabi lɛni náƒɔ kuye litulo na atabi ƒui akɔ. ¹¹ Katɔti nábla lɛla bonwu lɛmɛni. Na lɛ́ƒɔ-bu anu geen!’ ” ¹² Amu ka bénu lɛla lɛmɛni ni, Yudaƒuɔ benengu bákya ɔkplu ka nka beƒie Yesu. Ɔsika bagyi ka úbo lɛgba lɛmmɔ ɔ́sia-ma lɛlɔ. Nsu báyia bekyuli lisu lɛni nnye mmɔ. Anwuɔsu bágyu lɛgba bátɔlɔ-nwu kudɔ. ¹³ Kama ni, bátala Ƒarisiƒuɔ badi ku Herode kama basiakune badi, na bésie Yesu kudɔ banii beesié na betéwi-nwu kenye benu. ¹⁴ Ka bétédu-nwu kudɔ ni, básu-nwu banini, “Ala ɔtinane, bɔgyi ka aasu litemi geen uwi biala. Na alávumana ƒula etemila na ɔ́si kalɛ bekyuli baakali taasiku-ɔ lɛlɔ ɔsu. Alánu anii ɔmɛni ɔdi ukyuli ubendi iye ɔmɛni ɔdi ukyuli ubliidi. Nsu aatina ukyuli biala Katɔti kudɔ ulu na ulu geen lɛlɔ. Anwuɔsu su-bu si ɔdia ka butaaƒɔ kuyi teete Romaƒuɔ Ɔga Unengudi. ¹⁵ Ɔlɛka bɔƒɔ, munuu butaƒɔ?” Nsu Yesu ɔ́ti ka anumi lɛlɔ bekyuli badi, na úye-ma ɔnini, “Bi ɔsu na bɛɛyɔ́ ka bɛkywɛ-mi kakpagyuɛ? Biti kaplɛ kadi bite-mi na lɛnu.” ¹⁶ Béti béte-nwu. Amu na úye-ma ɔnini, “Ɔma lili ku lɛnyi bávɔ básia mɛni?” Mmɔ na bédie kenye banini, “Romaƒuɔ Ɔga Unengudi Kaesare na ɔdi.” ¹⁷ Amu na Yesu ɔ́su-ma ɔnini, “Amu ni, biti lɛla lɛni ndi Kaesare lɛdi bite-nwu. Na biti lɛla lɛni ndi Katɔti lɛdi bite Katɔti.” Ɔmɛni ɔsu ni, bébimi bana inye béwi, ɔsika ɔ́bla-ma dɛye dɛye. ¹⁸ Amu na Sadukiƒuɔ bani mɔɔsu ka si ukyuli úkpi ni, ɔsɔ uláta teelie ngba badi bébo Yesu kudɔ, na bébeye-nwu litemi lɛdi. ¹⁹ Béye-nwu banini, “Ala ɔtinane, Mose únweni úse-bu ka si ɔnana ɔdi úkpi na ɔ́da ulekudi úse ɔni na bátawɔ bebi ni, ɔlɛka ɔnwani ɔnanabi uti ukpinele ɔmɛni kalɛ na si báwɔ bebi ni, na badubɔbu-ma ka ɔgya udeedi ɔmmɔ bebi badi. ²⁰ Amu na dii ni, banwani maatɛ badi bélie. Udeedi úti uleku ɔdi na úkpi ɔni na bátawɔ ubi ɔdi. ²¹ Amu na unyɔdi lɛnɔ úti-nwu, na anwu lɛnɔ úkpi ɔni na anwu ku uleku ɔmɛni bátawɔ ubi ɔdi. Ɔnwani ɔtɛdi lɛnɔ úbeti uleku ɔmɛni, na anwu lɛnɔ úbekpi ɔni na bátawɔ ubi ɔdi. ²² Lɛni kani na bana maatɛ bammɔ ƒui béti uleku unwi ɔmɛni bása. Nsu bana ƒui békpi ɔni na ama ku uleku ɔmɛni bátawɔ bebi badi. Na kawɔlɔkɔ ni, uleku ɔmɛni lɛnɔ úkpi. ²³ Na uwi ɔni na bekpine ƒui badubɔta bɔsi kekpine bebelie ngba ni, bana akɔ ɔmani ndubɔbla uleku ɔmɛni ɔgya ka bana nkyuli maatɛ bamɛni ƒui béti-nwu dii?” ²⁴ Amu na Yesu údie kalɔ ka, “Uuuse lɛni munu munu. Mɔɔnu ka bilenu litemi lɛmɛni kalɔ, ɔsika bɛɛɛgyi Bunweni Kedee Ɔku kemo etemila iye Katɔti ɔyikun. Anwuɔsu na bɛɛƒiɔ́-nwu. ²⁵ Uwi ɔni na bekpine badubɔta ni, badubuse aani Katɔti batu kalɛ, na beleti beleku. ²⁶ Nsu na bekpine bɔsɔ taata litemi lɛlɔ ni, Mose únweni lɛla lɛdi na Bunweni Kedee Ɔku kemo ɔ́siku kugyii blii kɔni mɔɔkywí lɛlɔ. Munuu bilenyimo? Mmɔ na únweni ka Katɔti ɔ́su-nwu ɔnini, ’Ami ndi Abraham Katɔti ku Isak Katɔti ku Yakob lɛnɔ Katɔti.’ ²⁷ Ɔmɛni kalɔ ndi ɔnii bekyuli bani néekpi bamua beli ngba, na ɔdi ama lɛnɔ Katɔti. Nsu amii ni, bɛ́yii ulu ɔmmɔ geen!” ²⁸ Amu na ɔda bubo ala ɔtinane ɔni nnye mmɔ únu kɔtɛ kɔni badaku. Na únu ka Yesu údie lɛla lɛmɛni kemo kaduɛ. Anwuɔsu ɔ́ni úde Yesu na úye-nwu ɔnini, “Ɔda bubo bɔmani ndi bunengudi ƒui na ɔda bubo ƒui akɔ?” ²⁹ Mmɔ na Yesu ɔ́su-nwu ɔnini, “Bénweni ɔda bubo bɔni ntulo ƒui básu banini, ’Israelƒuɔ, binu kaduɛ! Unwoti ndi bula Katɔti, na anwu lɛti pɛ nkya. ³⁰ Anwuɔsu ɔlɛka bɛyɔ Unwoti ɔni ndi bina Katɔti ku bina kayi ƒui ku bina kɔyu ƒui ku bina kasusu ƒui ku bina ɔyikun ƒui.’ ³¹ Na ɔda bubo bɔni nsɔ nsia ɔmɛni kama ndi ka, ’Yɔ ƒula ukyulikpana aani ƒula lɛlɔ kalɛ.’ Ɔda bubo bɔbambadi bɔsɔ buuubo bɔni ntulo ɔda bubo bɔmɛni.” ³² Amu na ɔnana ɔmmɔ údie kenye ɔnini, “Ala ɔtinane, ásu kaduɛ! Sɔsɔ na ɔdi aani kalɛ na áasu ka Unwoti lɛti pɛ ndi Katɔti, na Katɔti ɔbambadi ɔsɔ uuubo ntu anwu lɛti pɛ. ³³ Na ɔlɛka ukyuli ɔyɔ Katɔti ɔ́siku nwuna kayi kemo ƒui ku nwuna kasusu kemo ƒui ku nwuna ɔyikun kemo ƒui. Na ɔlɛka ɔyɔ nwuna ukyulikpana aani kalɛ na ɔɔyɔ́ anwu ɔlatidi nwuna lɛlɔ kalɛ. Ɔdia ka ukyuli ɔsia ɔda bubo bɔmɛni kama utulo si úti bebuo ku akpala abambadi útákpa Katɔti.” ³⁴ Ka Yesu únu lɛnunda ala ani kalɔ na ɔnana ɔmɛni údie ni, ɔ́su-nwu ɔnini, “Awɔ ni, kébu blii asa na eduo Katɔti lɛga bɔdi kemo.” Ɔmɛni kama ni, ukyuli ɔdi ɔ́sɔ útese kayi ɔnii uuye Yesu lɛla lɛdi lɛnɔ. ³⁵ Ka Yesu ɔkya ɔɔtina litemi buni na Yudaƒuɔ kakpakɔ ni, úye litemi lɛdi ɔnini, “Dɛ na ɔ́bla asa na ɔda bubo ala batinane baasu ka Ukyuli Ɔƒunadi ɔdi Ɔga Dawid kaba kemo ubi? ³⁶ Dawid ɔmmɔ ɔlati nkɛnku Katɔti Kɔyu lɛlɔ na únweni úse ɔnini, ’Katɔti ɔ́su mina Ɔti ɔnini, “Sɔ lie-mi kɔdianu kakɛ wetédu uwi ɔni na maya na akɔliku ƒula lɛgba anya ƒula bekisine lɛlɔ.” ’ ³⁷ Na mɛni ni, Dawid ɔlatidi ɔɔlɔ Ukyuli Ɔƒunadi ɔnii nwuna ɔti. Anwuɔsu dɛ na ɔ́bla na anwu ɔmmɔ ɔɔbla Dawid kaba kemo ubi?” Na bekyuli pii badi benye beenú ala ani na Yesu unye ɔɔsu ku kubiti. ³⁸ Ka Yesu ɔdaku bekyuli bamɛni ala bɔtina ni, ɔ́su-ma ɔnini, “Bɛnu kaduɛ na ɔda bubo ala batinane lɛlɔ. Ama mɔɔkya lɛwu libendi na baayɔ́ busie taavi kuyeya kalɛ na bekyuli bataakya-ma kenye ku ɔbu. ³⁹ Ama mɔɔwia ka belie kuliekɔ kunengudi na kasalakɔ ku emeyi kadikɔ. ⁴⁰ Beedie bekpinele kɔkpana. Na kama ni, beeƒie-ma bana ala ƒui taaƒɔ. Na beetile Katɔti atu si baakpali katɔ, ɔsika baatɛmi gyɔlɔɔ teeti taatina lɛlɔ. Bana kɔtu bɔni bɔdubo bumomo butulo bekyuli bakladi bɔdi ƒui!” ⁴¹ Amu na Yesu ɔ́yu úlie kalɔ na kakpakɔ mmɔ na egulabi kesekɔ kudɔ, na ulie ɔɔnu kalɛ na bekyuli baaví teetéte bana etela. Balakɛne pii bététe egulabi bonwu banii beeti batina lɛlɔ. ⁴² Na ukpinele ɔwabane ɔdi lɛnɔ úbavi na úti kaplɛ inyɔ útéyi. ⁴³ Amu na Yesu ɔ́lɔ nwuna batɛyane ɔ́sala lisu na ɔ́su-ma ɔnini, “Mɔɔsu-mii geen ka na Katɔti anumi ni, ukpinele ɔwabane ɔmɛni néte egulabi útulo na bekyuli bamɛni ƒui akɔ. ⁴⁴ Sɔsɔ ni, bekyuli bamɛni ama bana lɛlakɛ kenye na bakɛ bébo beete etela amɛni. Nsu ni, basɔ bebo egulabi abambadi pii. Na uleku ɔmɛni anwu ni, ina ka ɔwabane na ɔdi ni, úti lɛla lɛni nse-nwu ƒui úbete. Lɛla lɛni na ɔdubuti uye nwuna lɛdila ni, ani na úti úbete mɛni.”

¹ Ka Yesu ɔ́si ɔɔlɛ́ Yudaƒuɔ kakpakɔ mmɔ ni, nwuna batɛyane akɔ unwi ɔ́su-nwu ɔnini, “Ala ɔtinane, nu atabi abuni ani béti bátu lɛtɔ libendi lɛmɛni ku kalɛ na bátu-ni! Ɔɔdia bɔnu!” ² Yesu ɔ́su-nwu ɔnini, “Nu lɛtɔ libendi lɛmɛni kaduɛ, ɔsika atabi ani béti bátu-ni kemo linwi pɛ lilébu lilasia lɛdi lɛlɔ! Lɛtɔ lɛmɛni ƒui lɛdubɔƒɛ na atabi ammɔ ƒui adubugyingya ewi kalɔ.” ³ Yesu úsie ulie kɔbi kɔni lɛlɔ na inɔ egyii akya mmɔ lɛlɔ. Na mmɔ ni, ɔɔnu kakpakɔ ɔtɔ ɔvi ɔni ngye. Amu na Petro ku Yakobo ku Yohane ku Andrea lɛti bébo-nwu kudɔ na béye-nwu banini, ⁴ “Blɔti, uwi ɔmani na lɛtɔ lɛmmɔ lɛdubɔƒɛ? Su-bu lɛla lɛni mebo asa na bɔdubɔnu bɔti ka uwi ɔmmɔ údu ka ala amɛni alɛ.” ⁵ Amu na Yesu ɔ́su-ma ɔnini, “Binye kagyumana, na bitaya na ukyuli ɔdi ɔtɔlɔ-mii. ⁶ Bekyuli pii badubuti lɛlɔ bakɔku-mi na basu-mii banini, ’Ami mɛni!’ na batɔlɔ bekyuli pii. ⁷ Na utabla-mii kalɛ kadi si biinú kekpo kɔku na bina kudɔ iye na ɔgyu kakaaka. Ɔlɛka ala amɛni udu ebo. Nsu ulátina ka kayawi kawɔlɔkɔ nédu. ⁸ Kalɔ kadubukpoku kalɔ bamba lɛlɔ. Na lɛga kadikɔ kadubukpoku lɛga kadikɔ. Kalɔ kadubɔkunku kesii biala, na kɔka kɔdububo. Ala amɛni ese aani kawɔƒɔ bɔdu kalɔ kesekɔ. ⁹ “Ɔlɛka amii alati binye kagyumana. Badubuƒie-mii na beti-mii besienku litemi katɛkɔ. Badububo-mii na kasalakɔ. Na ami ɔsu ni, bɛdubunye baga ku lɛlɔ badine anumi, na bɛdubɔsu-ma Katɔti litemi buni lɛmɛni. ¹⁰ Nsu asa na kawɔlɔkɔ kadububo ni, ɔlɛka basu kadi ƒui Katɔti litemi buni lɛmɛni. ¹¹ Na si uwi ɔni na béƒie-mii na béti-mii bésienku litemi katɛkɔ ni, biteti kasusu bitasiku lɛla lɛni na bɛdubɔsu lɛlɔ. Si uwi ɔmmɔ údu ni, na bɛsu litemi biala lɛni na Katɔti Kɔyu kɔdubute-mii. Ɔsika ɔɔɔdi amii alati kasusu kemo litemi na bɛdubutemi. Mmomu Katɔti Kɔyu kɔdubɔya na bitemi ku nwuna kasusu. ¹² “Bekyuli badubuti ama alati banwani bete banii badu. Na bebi bati lɛnɔ badubɔbla bana bebi lɛni kani. Bebi badubɔta benye bana bawɔne lɛlɔ na bakya-ma kakya kalɛ na badu-ma. ¹³ Ukyuli biala ɔdubukisi-mii, ɔsika bɛɛyɔ́-mi ɔsu. Nsu ukyuli biala ɔni ndubunye kpakplaa na nwuna bɔƒɔtaadi kemo wetédu nwuna ngba bulie kawɔlɔkɔ ni, Katɔti ɔdubɔda-nwu udie kɔtu bɔni bɔni nse nte ekpidi bablane ƒui kemo. ¹⁴ “Na mɛni ni, bise atu kaduɛ na binu kalɔ. Si bɛ́nu ala ani udu na Katɔti ukisi ka álɛ na nwuna kakpakɔ kedee ni, bekyuli bani nkya Yuda bekeli besie batábɛ na abi lɛlɔ. ¹⁵ Ukyuli ɔni nnye nwuna ɔtɔ lili iye lɛsa lili ni, ɔsɔ uteti kasusu ɔnii ɔɔyu ubo kalɔ ubeti lɛla lɛdi ɔsiku nwuna ɔtɔ kemo ɔnii uuti ɔda. ¹⁶ Ukyuli ɔni nkya kemo ɔsɔ utasi utebo kaduli ɔnii ubeti nwuna awu. ¹⁷ Uwi ɔmmɔ ɔdubo ɔkplu bɔyu bute beleku bani nda kaƒɔ ku bani muute bebi lɛnyi. ¹⁸ Bivele Katɔti na uwi ɔmmɔ utebo na kɔyɔ uwi! ¹⁹ Ɔsika lɛbibo lɛni ndubo uwi ɔmmɔ kemo ni, lɛdubo bubomo butulo lɛdi biala lɛni udu na kayawi kamɛni káanu dii ɔ́si kana kalɔ kesekɔ úti úbedu ɔmwi limeyi. Na lɛbibo lɛmɛni udu lɛdi lɛsɔ lilebo lɛnɔ kudii. ²⁰ Nsu Unwoti ɔ́su úse ka ɔdubɔƒana emeyi ammɔ. Ɔsika si ɔɔɔdi lɛni ni, ukyuli ɔdi biala ulébu. Nsu na nwuna bekyuli bani na ɔ́ƒuna ɔsu ni, ɔdubɔƒana emeyi amɛni. ²¹ “Na si ukyuli ɔdi ɔ́su-ɔ ɔnii, ’Nu! Aanu Kristo mɛni!’ iye ’Aanu-nwu ngye!’ ni, taƒɔ-nwu tadi! ²² Ɔsika ama bani ndubɔbla lɛlɔ aani Kristo ku Katɔti kenye bediene kedee pii badubudie lɛlɔ keyi. Badubɔbla akɔla ku ayiala pii kalɛ na si bakana ni, na batɔlɔ Katɔti bekyuli bani na ɔ́ƒuna lɛnɔ. ²³ Anwuɔsu binye kagyumana! Lɛ́su-mii lɛla biala líse asa na uwi ɔmmɔ wedu. ²⁴ “Na emeyi ani ndububo na lɛbibo lɛmɛni kama ni, ’ɔƒɛ ulekeye kaduɛ, na kɔbuli lɛnɔ kulekeye. ²⁵ Ayabi adubɔbla aani si bɔnu na ada taasiku katɔ, na katɔ ala ƒui adubɔkunku.’ ²⁶ “Amu na bekyuli badubɔnu ami, ɔni ndi Ukyuli Ɔyawine Ubi, ka ndubɔda lɛlɛ kayaa na uyɔlɔ kemo. Na ndububo ku Katɔti ɔyikun ku bukeye bonwu. ²⁷ Na ndubɔtala mina katɔ batu na kayawi lɛƒɛnyi ine lɛmmɔ lɛlɔ na basala mina bekyuli bani na lɛ́ƒuna lise mmɔ básiku kalɔ kawɔlɔkɔ kamɛni utédu kawɔlɔkɔ kani ngye. ²⁸ “Binyimo lɛla lɛni na bɛ́tɛya bɛ́siku kɔdingyii lɛlɔ. Si uwi ɔni na bɛ́nu ka kugyii kɔmmɔ kɔdaku evete bɔta ni, na bɛdubɔti ka ketudi kéede. ²⁹ Lɛni kani si uwi ɔni na bɛ́nu ka ala ani na lɛ́su mɛni adaku bɔlɛ ni, na bɛdubɔti ka kawɔlɔkɔ kamɛni kéedu na kéebo kénye bina kegbuta kama geen! ³⁰ Mɔɔsu-mii geen ka ala amɛni ƒui adubɔlɛ asa na bina kadi bekyuli ƒui badubukpi basa. ³¹ Katɔ ku kalɔ ƒui kadubɔvumana bɔdi, nsu mina litemi lilavumana kudii. ³² “Nsu ni, ukyuli biala ɔɔɔgyi limeyi iye lebo lɛni na kawɔlɔkɔ kamɛni kadubudu ina Katɔti batu ku Katɔti Ubidi muedi baaadubo bɔti, ntu Katɔti lɛti pɛ ngyi. ³³ Bɛsia anu na binye kagyumana, ɔsika bɛɛɛgyi limeyi lɛni na uwi ɔmmɔ wedu. ³⁴ Ɔdubuse aani ɔnana ɔni náta ɔ́lɛ ɔma ɔnii úsela ulu ɔdi, na ɔ́da nwuna kabla bablane ɔ́kya kaduli. Úte ɔdi biala nwuna kabla kani na ɔdubo bɔbla. Na nwuna kama ni, ɔ́su ukyuli ɔni nnye nwuna kayakun kenye ɔnii ɔgyumana kayakun kammɔ kaduɛ. ³⁵ “Lɛni kani na ɔlɛka amii lɛnɔ binye kagyumana. Ɔsika bɛɛɛgyi lebo lɛni na bina Unwoti webeduo. Ɔkana na ɔbla useyi uwi, iye usientɛ, iye uwi ɔni na bakɔkɔ béte kenye, iye ɔtanta. ³⁶ Si ɔ́da úbalɛ kɔnakunwi ni, útalɛka ubanu ka bilie bɛɛlɛɛ. ³⁷ Lɛla lɛni mɔɔsu-mii mɛni ni, ani kani ndaku bekyuli ƒui bɔsu. Na ani ndi ka binye kagyumana.”

¹ Kébu emeyi anyɔ asa na Yudaƒuɔ badi bana emeyi kedee ani baalɔ Kukpi Lili Bɔvia Limeyi ku Bodobodo Ɔni Néteƒu Bɔdi Emeyi. Na bakpane benengu ku ɔda bubo ala batinane badi bakya baawia ulu ɔni lɛlɔ basia na bɔbɛ kemo na beƒie Yesu na badu-nwu. ² Básu lɛlɔ banii, “Útalɛka bɔbla lɛla lɛmɛni na emeyi amɛni bɔdi kemo. Ɔsika si ɔɔɔdi lɛni ni, bekyuli badubɔkɛ kɔnyi na bata benye-bu lɛlɔ.” ³ Yesu ɔ́kya Betania na Simon ɔni néƒi ɔlɛgyie dii kesii. Uwi ɔni na Yesu ulie ɔdaku bɔdi ni, uleku ɔdi úbo mmɔ na ɔda lɛtabi suɛlɛ suɛlɛ ɔsii ɔni baalɔ alabasta. Na ɔsii ɔmmɔ kemo ni, inɔmii bɔni muunwenyi ƒɛƒɛɛ bɔdi buwi. Na baalɔ inɔmii bɔmɛni nard, na bɔ́ƒɔ kuye geen. Uleku ɔmɛni ɔ́lɛmi ɔsii na úti inɔmii bɔmmɔ úwi Yesu lili lɛlɔ. ⁴ Ɔmɛni úkpoku bekyuli bani nnye mmɔ. Na béti kɔnyi básu banini, “Bi ɔsu na uubile inɔmii bɔmɛni udu lɛni? ⁵ Ɔkana na nka uti-mu uye na ɔkɛ aani lɛkwa limodi kabla lɛyuƒɔla na uti ɔmmɔ ute bekyuli bani neeebo lɛla lɛdi.” Na ɔmɛni ɔsu ni, bádɔnku-nwu momoomo. ⁶ Nsu Yesu ɔ́su-ma ɔnini, “Bɛnyonu-nwu! Bi ɔsu na bilaya na ɔkɛ kɔtu bɔyɔ? Ɔ́bla lɛla lɛbuni úte-mi. ⁷ Bawabane bakya-mii akɔ uwi biala. Na uwi biala na amii bɛɛyɔ́ ni, bɛkana na bibunku-ma. Na ami ni, ɔɔɔdi uwi biala na ndubɔkya-mii kudɔ. ⁸ Uleku ɔmɛni ɔ́bla lɛla lɛni na wakana. Úti inɔmii bɔmɛni úwi-mi lɛlɔ úse ute mina kukpi asa na bava-mi. ⁹ Na muute-mii bɔti sɔsɔ ka kesi kesii na badubɔkɔ lɛsa na Katɔti litemi buni lɛlɔ na kayawi kamɛni ƒui ni, badubuti lɛla lɛni na uleku ɔmɛni ɔ́bla mɛni basu batina na beti beteenyimo-nwu.” ¹⁰ Amu na Yuda Iskariot ɔni ndi Yesu batalane leevu-inyɔ akɔ unwi ni, ɔ́tɔlɔ úsie bakpane benengu kudɔ ɔnii utákya Yesu kakya na uti-nwu ɔkya-ma enu kemo. ¹¹ Kubiti kɔ́da-ma geen na etemila ani na úbasu-ma ɔsu, na ama lɛnɔ básu ka badubute-nwu egulabi. Anwuɔsu Yuda ɔkya ɔɔwia ulu ɔbuni ɔni lɛlɔ na ɔdubɔsia na udie-nwu ute-ma. ¹² Na limeyi lideedi na Bodobodo Bɔdi Emeyi kemo na limeyi lɛni lɛlɔ na baadú Kukpi Lili Bɔvia koƒonubi bakpa na bana ɔdi kenye ni, Yesu batɛyane béye-nwu banini, “Wɛ na aayɔ́ ka butáklibi bula limeyi lɛmɛni bɔdi buse bute-ɔ?” ¹³ Amu na Yesu ɔ́ƒuna bana akɔ inyɔ na ɔ́su-ma ɔnini, “Bisie ɔmankemo na bɛdubɔsiaku ukyuli ɔdi ka uti ntu ku ketubwi. Bɛsiaku-nwu na bitéduo kaduli kani kemo na wetéduo. ¹⁴ Na bɛsu kaduli ɔlati bɛnini, ’Ala ɔtinane ɔnii tina-bu ɔtɔ ɔni kemo na anwu ku nwuna batɛyane badubo babadi bana Kukpi Lili Bɔvia Limeyi adila.’ ¹⁵ Mmɔ ni, ɔdubɔtina-mii ɔtɔ ubendi ɔdi na ɔtɔ katɔ ɔni kemo na báklibi ala bése-bu kaduɛ. Bɛnwa limeyi buni lɛmɛni adila bise mmɔ.” ¹⁶ Batɛyane bamɛni bátɔlɔ na bésie ɔmankemo, na bátánu ka lɛla biala lise aani kalɛ na Yesu ɔ́su-ma. Na bánwa Kukpi Lili Bɔvia Limeyi lɛmɛni adila bése. ¹⁷ Ka useyi uwi údu ni, Yesu ku nwuna batɛyane leevu-inyɔ bammɔ bésie bétéduo mmɔ. ¹⁸ Na uwi ɔni na belie badaku bɔdi ni, Yesu ɔ́su ɔnini, “Mɔɔsu-mii geen ka bina akɔ unwi ɔni na ami ku-nwu bulie bɔɔdi mɛni ɔdubɔkya-mi kakya.” ¹⁹ Litemi lɛmɛni lɛ́bla-ma ɔkwɛnu, na bakya beeye-nwu unwi unwi banini, “Geen ni, ngyi ka ɔɔɔdi ami na ada, munuu ami?” ²⁰ Yesu údie kenye ɔnini, “Bina leevu-inyɔ bamɛni kemo unwi na ɔdi. Na ami ku-nwu mɔɔkya kɔnu lɛkyami kemo mɛni. ²¹ Ami, ɔni ndi Ukyuli Ɔyawine Ubi, lísela ntékpi aani kalɛ na Bunweni Kedee Ɔku ɔ́tina kalɛ. Nsu ulése buɛɛ ulete ukyuli ɔni ndubɔkya-mi kakya. Si bátawɔ ukyuli ɔmmɔ muedi ni, nka ɔdia-nwu utulo!” ²² Uwi ɔni na badaku bɔdi ni, Yesu úti bodobodo ɔdi. Na ka ɔ́gya Katɔti enu ɔ́wɔlɔ ni, ɔ́bwɛ-nwu kɔkɛ kɔkɛ na úle úte nwuna batɛyane. Na ɔ́su-ma ɔnini, “Bɛƒɔ ɔmɛni na bɛdi. Ɔmɛni ndi mina ɔlɔna.” ²³ Amu na úti ɔɔƒɛɛ ɔdi, na ka ɔ́gya Katɔti enu ni, úti úte-ma na báni. ²⁴ Na ɔ́su-ma ɔnini, “Ɔmɛni ndi mina ubugya ɔni na ndubuti liwiakun na bekyuli pii lili, na ɔsɔ ɔdi bunyimi bɔwɔdi na bayawine ku Katɔti ntɛ. ²⁵ Na sɔsɔ ni, nsɔ lɛɛɛdubo ntɛ bɔmɛni udu bɔdi bɔni lɛnɔ, ntu lɛni ntɛ bɔwɔdi bɔdi udu na Katɔti lɛga kadikɔ.” ²⁶ Amu na bátu ɔnu ɔdi béte Katɔti bumwi na bávi bálɛ bésie Inɔ Egyii Kɔbi lɛlɔ. ²⁷ Mmɔ ni, Yesu ɔ́su nwuna batɛyane ɔnini, “Bina ƒui bɛdubukeli-mi. Ɔsika Katɔti ɔ́su na Bunweni Kedee Ɔku kemo ɔnini, ’Ndubɔdu baƒonu ɔdane, na nwuna baƒonu badubugyingya.’ ²⁸ Nsu na mina bɔsɔ bɔta bɔsi kekpine kama ni, ndubɔgyu lɛtɔ-mii na Galilea.” ²⁹ Amu na Petro ɔ́su-nwu ɔnini, “Ami ni, lɛɛɛdubo-ɔ bukeli kudii, si ina bakladi ƒui badubukeli-ɔ!” ³⁰ Yesu ɔ́su Petro ɔnini, “Mɔɔsu-ɔ geen ka asa na akɔkɔ ɔdubute kenye kunyɔdi ɔmwi lɛdigye lɛmɛni ni, awɔ ɔlati adubɔsu kɔtɛ ƒui ka aaagyi-mi.” ³¹ Petro ɔ́sɔ ɔ́su-nwu kpakplaa útulo udeedi ka, “Si ina ɔlɛka badu ami ku-ɔ ƒui ni, lɛɛɛdubo bɔsu ka lɛɛɛgyi-ɔ.” Na nwuna batɛyane bamɛni ƒui básu lɛni kani. ³² Ɔmmɔ kama ni, bésie bétédu kesii kani baalɔ banii Getsemane. Na Yesu ɔ́su nwuna batɛyane ɔnini, “Bɛsɔ bilie kalɔ mɛni na ami lisie ntákpali katɔ.” ³³ Amu na útiku Petro ku Yakobo ku Yohane ɔ́da. Na ka kayi keekpóku-nwu na lɛla lɛni ndubo-nwu lɛlɔ ɔsu ni, ³⁴ únwini na ɔ́su-ma ɔnini, “Muunú ɔlɛ na mina kɔyu kemo geen aani si bukpi nda. Bɛsɔ binye mɛni na bitaagyumana.” ³⁵ Ka úsie anumi blii ni, ɔ́sɔ úbi kalɔ na úvele Ɔti ɔnii, “Si nka wadia ni, na lɛbibo uwi ɔmɛni ɔvi-mi lɛlɔ.” ³⁶ Amu na ɔ́su ɔnini, “Ati, mina Ɔti! Akana na abla lɛla biala. Si átuna ni, na aƒɔ lɛbibo ɔɔƒɛɛ ɔmɛni na mina kudɔ. Nsu ni, tabla mina lɛyɔla, mmomu bla ƒula lɛdi.” ³⁷ Amu na únwini úbo nwuna batɛyane ɛtɛ bammɔ kudɔ, na úbanu ka batɛ baalɛɛ. Na ɔ́su Simon Petro ɔnini, “Simon, bɔlɛɛ bɛda? Bitakana bulie bɔgyumana budu ɔdɔ unwi pɛ?” ³⁸ Amu na ɔ́su-ma lɛnɔ ɔnini, “Bilie bitaagyumana na bitaakpali katɔ kalɛ na bileduo bukpoku taanu kpakplaa kemo. Kɔyu kɔɔyɔ́ ka kɔbla, nsu ɔlɔna use kpɛtɛ kpɛtɛ.” ³⁹ Ɔ́sɔ ɔ́tɔlɔ úsie kama utákpali katɔ aani kudeedi kalɛ kani. ⁴⁰ Na ɔ́sɔ únwini úbo nwuna batɛyane kudɔ na ɔ́sɔ úbanu ka bátɛ baalɛɛ. Bátakana bana anumi bubimi. Na bátati lɛla lɛni basu-nwu. ⁴¹ Ka ɔ́sɔ únwini úbo kɔtɛdi kɔmɛni ni, úye-ma ɔnini, “Bɔtɛ na bɛtɛ bɛɛnwuna, na bɛdaku bɔlɛɛ? Ɔ́dia, bɛgyinya! Uwi ɔmmɔ úudu! Kakya ɔkyane úuti ami, ɔni ndi Ukyuli Ɔyawine Ubi, ɔkya bekyuli bekpidi enu kemo. Bɛɛnu-ma ka bási badubo. ⁴² Bɛta na buteesie butásiaku-ma. Bɛɛnu ukyuli ɔni nákya-mi kakya ka ɔtɔnku-ma.” ⁴³ Yesu ɔ́mua únye-ma kudɔ mmɔ na ɔdaku bɔtɛmi asa na Yuda ɔni ndi nwuna batɛyane leevu-inyɔ bammɔ kemo unwi úbo. Na bekyuli lisu lɛni nási bakpane benengu ku ɔda bubo ala batinane ku ɔma benengu kudɔ básiaku-nwu badubo. Bada ligyii ku lɛkɛɛ. ⁴⁴ Kakya ɔkyane ɔmɛni ɔ́su bekyuli bamɛni úse ɔnini, “Ukyuli ɔni na bɛdubɔnu ka mɔɔkya kɔgbu ni, anwu mmɔ. Biƒie-nwu na bɛda-nwu kpakplaa bɛtɔlɔku.” ⁴⁵ Uwi ɔni na Yuda ɔ́da ɔ́lɛ Yesu kudɔ pɛ ni, ɔ́lɔ-nwu ɔnini, “Unwoti!” Ka ɔ́ni úde-nwu ni, ɔ́kya-nwu kɔgbu. ⁴⁶ Anwuɔsu béƒie Yesu na báda-nwu kpakplaa. ⁴⁷ Nsu bani nnye mmɔ ku Yesu badi kemo unwi ɔ́ni nwuna ɔkɛɛ ɔ́kpa na úbeyi ɔkpane unengudi kabla ɔblane kɔtu. ⁴⁸ Amu na Yesu ɔ́su-ma ɔnini, “Bi ɔsu na ɔlɛka biti ligyii ku lɛkɛɛ bɛda asa bibo bɛnii bibeƒie-mi aani si uyune ɔdi na ndi? ⁴⁹ Limeyi biala ami ku-mii bɔkya kakpakɔ, na nkya mɔɔtina litemi buni mmɔ na bíteƒie-mi. Nsu aani kalɛ na Katɔti Bunweni Kedee Ɔku ɔ́su ni, ubo lɛni.” ⁵⁰ Amu na nwuna batɛyane ƒui békeli bátɔlɔ-nwu kudɔ. ⁵¹ Na uwi ɔmɛni kemo ni, okloƒu ɔdi mbi kɔdi blii kɔdi lɛlɔ kani nkɛ nsiaku-nwu na ɔɔnu ala amɛni. Beƒiene bammɔ báwia ka nka beƒie okloƒu ɔmɛni. Nsu nwuna kɔdi kani báda. Ɔ́nwanɛ lɛlɔ ɔ́ƒɔ, ⁵² na ɔ́lɛ-ma enu kemo. Na úkeli ɔ́tɔlɔ ku kasɔngya. Na ɔda nwuna kɔdi ɔ́kya-ma kudɔ. ⁵³ Amu na bétiku Yesu bésienku ɔkpane unengudi kesii. Mmɔ na bakpane benengu ku ɔma benengu ku ɔda bubo ala batinane bása belie. ⁵⁴ Petro anwu ɔkpɛ kama buɛɛ na úbavi útéduo kaduli kammɔ. Na ɔ́sɔ úlie bagyumanane bammɔ kudɔ, na ɔɔwaa ogya. ⁵⁵ Bakpane benengu bamɛni ku litemi batɛne bani nlie mmɔ ƒui báyɔ ka nka bawia Yesu litemi lɛdi lɛni lɛlɔ basia na bakɛ-nwu badu. Nsu bátakana lɛla lɛdi bɔnu bɔsiku-nwu lɛlɔ. ⁵⁶ Bekyuli pii bébo bébetemi básiku-nwu lɛlɔ, nsu bana ƒui inye bɔ́vumanaku lɛlɔ. ⁵⁷ Amu na badi báta báda-nwu kenye na básu banini, ⁵⁸ “Búnu ka ɔ́su ɔnini, ’Ndubɔƒɛ kakpakɔ kani na bátu mɛni. Na emeyi atɛ kama ni, nsɔ ndubɔtu kabambadi kani na ɔɔɔdi bekyuli bayawine nátu-ka.’ ” ⁵⁹ Nsu ama lɛnɔ, bana butemi bútabla unwi ku bana bakpana bɔdi. ⁶⁰ Ɔkpane unengudi ɔ́ta únye bana ƒui anumi na úye Yesu ɔnini, “Eenú etemila ani na baasu? Elebimi kenye? Bi na ebo na asu?” ⁶¹ Nsu Yesu úbile kenye na útasu lɛla lɛdi. Ɔkpane ɔmɛni ɔ́sɔ úye-nwu ɔnini, “Awɔ ndi Kristo ɔni na Katɔti ɔ́ƒuna úse? Awɔ ndi Unwoti Kedee Ubidi?” ⁶² Yesu ɔ́su-nwu ɔnini, “Ami mmɔ. Na bɛdubɔnu Ukyuli Ɔyawine Ubi ka ulie keliekɔ kenengudi kani nsiaku Katɔti Ɔyikune Ƒui kadi. Na bɛdubɔnu ka ɔ́si katɔ ɔdubo na uyɔlɔ kemo!” ⁶³ Mmɔ ni, ɔkpane unengudi ɔmɛni ɔlati ɔ́ni nwuna awu ɔ́bwɛ na kɔnyi kemo na ɔ́va ɔnini, “Anii bi? Bɔsɔ buláwia litemi kama benyene badi lɛnɔ! ⁶⁴ Ɔ́tɛmi enyekpi na Katɔti lɛlɔ! Dɛ na bɛ́nu?” Amu na bana ƒui báyuli banii badu-nwu kukpi kɔtɔ. ⁶⁵ Bana akɔ badi bése kalɔ beetuo lisuo teewi Yesu. Na bényimi-nwu anumi, na badaku-nwu bubo ku bana enu. Na bakya baasu-nwu banini, “Ka agyi ala ƒui ni, su-bu ukyuli ɔni nébo-ɔ!” Amu na bagyumanane badi bétiku Yesu bátɔlɔku, na bétébo-nwu. ⁶⁶ Petro ɔ́ƒɔ lɛlɔ ulie kaduli mmɔ asa na kaduli ulekubi ɔni nlie ɔkpane unengudi kudɔ úbo. ⁶⁷ Uwi ɔni na ɔ́nu Petro ka uli ɔɔwaa ogya ni, ɔ́su-nwu ɔnini, “Awɔ lɛnɔ nka asiaku Yesu Nasareni ɔmmɔ!” ⁶⁸ Amu na Petro úni na ɔ́su ɔnini, “Bi? Ńtenu lɛla lɛni na aasu mɛni kalɔ!” Amu na ɔ́ta ɔ́lɛ úsie kayakun. Ka uudú kayakun kani na akɔkɔ úte kenye. ⁶⁹ Ulekubi ɔmɛni ɔ́sɔ úbanu-nwu mmɔ, na ɔ́sɔ ɔdaku bekyuli bani nnye mmɔ bɔsu ɔnini, “Ɔdi bana akɔ unwi!” ⁷⁰ Nsu Petro ɔ́sɔ úni. Uwi útetu asa na bani nnye mmɔ baasu-nwu banini, “Útalɛka eni anii aaadi-ma akɔ unwi, ɔsika awɔ lɛnɔ ási Galilea.” ⁷¹ Amu na Petro ɔ́va ɔnini, “Lɛka ka Katɔti ɔni-mi kɔtu si ɔkɔ na ndaku bɔnyi! Lɛɛɛgyi ukyuli ɔni lɛlɔ na biitemi mɛni!” ⁷² Kɔnakunwi ni, akɔkɔ ɔ́sɔ úte kenye kunyɔdi, na Petro únyimo ka Yesu ɔ́su-nwu ɔnini, “Asa na akɔkɔ ɔdubute kenye kunyɔdi ni, adubɔsu kɔtɛ ƒui ka aaagyi-mi.” Ka úbenu nwuna lɛlɔ kalɔ ni, kɔyɔ kúwi Petro na ɔ́da lɛdi údie na uuwulo.

¹ Ɔtanta tutuutu ni, bakpane benengu bátása ku Yudaƒuɔ benengu ku ɔda bubo ala batinane ku litemi batɛne ƒui. Ka béti litemi lɛmɛni lɛlɔ kasusu ku kalɛ na badubɔbla-ni ni, bényimi Yesu na bétiku-nwu bátɔlɔku bésienku aban unengu ɔni baalɔ Pilato kudɔ. ² Mmɔ ni, Pilato úye Yesu ɔnini, “Awɔ ndi Yudaƒuɔ Ɔga?” Yesu ɔ́su-nwu ɔnini, “Ɛɛn, lɛni na use aani kalɛ na adaku bɔsu.” ³ Bakpane benengu béti etemila pii básia Yesu lili. ⁴ Anwuɔsu Pilato ɔ́sɔ úye-nwu ɔnini, “Alasu lɛla lɛdi? Se kɔtu na enu etemila ani na badaku bɔsu taasiku-ɔ lɛlɔ!” ⁵ Nsu Yesu ɔ́sɔ útebimi kenye, na ɔ́bla Pilato dɛye dɛye! ⁶ Na limeyi lɛmɛni bɔdi biala uwi ni, Pilato úti ɔ́sia lɛlɔ ka ɔdubɔnyonu ukyuli unwi na bekyuli bekpidi bani béƒie bákya ɔtɔ akɔ ɔni lili na badubuvele bete. ⁷ Uwi ɔmɛni kemo ni, béƒie ɔnana ɔdi baalɔ Baraba bákya ɔtɔ. Anwu nátɔnku bekyuli bani náta bénye Romaƒuɔ Ɔga lɛlɔ. Na bana lɛsɛ lɛni na bákya ɔsu ni, béƒie anwu ku nwuna basiakune na bádu-ma kukpi kɔtɔ na bekyuli bɔdu ɔsu. ⁸ Amu na uwi ɔni na bekyuli pii bamɛni bábasa ni, béye Pilato banii ɔkali nwuna ɔtɔ batɛne kɔnyana bɔnu aani kalɛ na ɔɔbla uwi ndi uwi mmɔ. ⁹ Úye-ma ɔnini, “Bɛɛyɔ́ ka lɛnyonu Yudaƒuɔ Ɔga lite-mii?” ¹⁰ Pilato úye-ma ɔmɛni ɔsika ɔ́ti ka lɛnungyie ɔsu na bakpane benengu bamɛni béti Yesu béboku-nwu. ¹¹ Nsu bakpane benengu bammɔ bénwini bekyuli lisu lɛmɛni kasusu kalɛ na Pilato ɔnyonu Baraba mmomu uti ute-ma. ¹² Pilato ɔ́sɔ útemi úte bekyuli lisu lɛmɛni na úye-ma ɔnini, “Bi na bɛɛwia ka lɛbla ku ukyuli ɔni na bɛɛlɔ Yudaƒuɔ Ɔga mɛni?” ¹³ Amu na báva básu-nwu banini, “Kana-nwu mana ugyii lɛlɔ!” ¹⁴ Pilato úye-ma ɔnini, “Bi ɔsu? Bi bɔƒiɔ na ɔ́ƒiɔ?” Nsu bana ƒui básɔ báva momoomo básu banini, “Kana-nwu mana ugyii lɛlɔ!” ¹⁵ Ka Pilato ɔɔyɔ́ ka ebiti ada-ma ɔsu ni, ɔ́nyonu Baraba úte-ma. Na ɔ́ya na bébo Yesu kaduɛ ku kɔbuli kɔni na bélii básala, na úti-nwu úte bekpone ɔnii batákana-nwu bamana ugyii lɛlɔ. ¹⁶ Bekpone bammɔ bétiku Yesu na bétéduo aban unengu ɔmmɔ kaduli na bálɔ bekpone bakladi banii bebo. ¹⁷ Amu na béti awu ugyiedi ɔdi bákya Yesu aani ɔga kalɛ, na bédi liyu kabwa kadi bébi-nwu aani kagabwa. ¹⁸ Na bakya beewi-nwu anumi kalɔ banini, “Yiidu! Yudaƒuɔ Ɔga ulie ngba gyɔlɔɔ!” ¹⁹ Béti kegyiimi bébo-nwu kuli na bétuo lisuo béwi-nwu lɛlɔ. Amu na bálɛ akɔnkɔ na nwuna anumi na béboku eli kalɔ béte-nwu. ²⁰ Uwi ɔni na báma-nwu báwɔlɔ ni, bédie nwuna awu ugyiedi ɔmmɔ na basɔku nwuna lɛwu geen bakya-nwu. Amu na bétiku-nwu bátɔlɔku banii batákana-nwu bamana ugyii lɛlɔ. ²¹ Uwi ɔni na bakɛ bésela ni, básiaku ɔnana ɔni baalɔ Simon ka ɔ́si lɛkpaklɔ ɔdubo Yerusalem. Amu na bekpone bammɔ básu-nwu banii ɔlɛka ubunku Yesu ugyii ɔmmɔ buti. Na Simon ɔmɛni ɔ́si Sireni, na nwuna bebi ndi Aleksandra ku Ruƒo. ²² Béti Yesu bésienku kataku kadi baalɔ Golgota ɔni kalɔ ndi kesii kani nálɛ ukyuli kuli. ²³ Mmɔ na béte-nwu ntɛ bɔni na básala ku kuvo kɔni mbo ɔdu kati kati banii ɔni, nsu Yesu útani. ²⁴ Amu na bekpone bammɔ bákana-nwu bámana ugyii lɛlɔ mmɔ. Na bátu egulabi bánu asa na béti nwuna lɛwu béle béte lɛlɔ kalɛ na bati ɔdi biala ku nwuna lɛla. ²⁵ Bákana-nwu bámana ugyii lɛlɔ na ɔtanta lɛdɔ yaalenwi. ²⁶ Na bébo kegyiikɛ kadi bámana-nwu eli na bénweni lɛla lɛni ɔsu na bádu-nwu básia-ka lɛlɔ banini, “Ɔmɛni ndi Yudaƒuɔ Ɔga.” ²⁷ Na bákana beyune inyɔ lɛnɔ bámana ligyii lɛlɔ mmɔ bébunku Yesu. Unwi ɔ́ma-nwu kɔdianu kakɛ, na unwi lɛnɔ ɔ́ma-nwu kɔmiinu kakɛ. ²⁸ Ɔmɛni úbo úte lɛni kalɛ na bénweni bése na Bunweni Kedee Ɔku kemo banini, “Bádu-nwu bébunku ekpidi bablane.” ²⁹ Bekyuli bani návi ƒui bákunku bana eli na bédumi Yesu básu banini, “Ɛhɛɛn! Awɔ násu ka adubɔƒɛ bula kakpakɔ kenengudi na asɔ atu-ka emeyi atɛ kama! ³⁰ Yu na aƒɔ lɛlɔ asiku kukpi enu kemo na bɔnu!” ³¹ Lɛni kani na bakpane benengu ku ɔda bubo ala batinane bammɔ lɛnɔ báma-nwu básu lɛlɔ banini, “Úbunku badi, nsu ulákana nwuna lɛlɔ bubunku! ³² Si anwu ɔni baalɔ Yudaƒuɔ Ɔga mɛni ndi Kristo ɔni na Katɔti ɔ́ƒuna úse sɔsɔ ni, ɔkya ɔkplu na ɔyu ɔ́si ugyii lɛlɔ ubo kalɔ na bɔƒɔ-nwu bɔdi!” Nkyuli inyɔ bani na bákana bámana ligyii lɛlɔ bébunku Yesu mɛni ni, ama lɛnɔ bédumi-nwu. ³³ Ɔƒii uwi ni, kalɔ kammɔ ƒui kábla suu. Na ɔmɛni ɔ́bla lɛni laa útédu lɛdɔ ɛtɛ kemo. ³⁴ Na lɛdɔ ɛtɛ ɔmmɔ kemo ni, Yesu ɔ́va momoomo ɔ́su ɔnini, “Eli, Eli, lama sabaktani?” Bɔtɛmi bɔmɛni kalɔ ndi bɔnii, “Mina Ati, mina Ati, bi ɔsu na áda-mi ányonu?” ³⁵ Bekyuli bani nnye mmɔ badi bénu lɛla lɛni na ɔ́su na badaku lɛlɔ bɔsu banini, “Binu! Ɔɔkpali Elia.” ³⁶ Bana akɔ ɔdi úkeli útéti unwo ɔni na béti bákya ntɛ bɔni nányi kemo na úti ɔ́tu kegyiimi kadi lɛlɔ úboku Yesu ɔnii ɔni. Amu na ɔ́su bakladi ɔnini, “Bɛya na bɔnu si Elia ɔdubo ubamami-nwu ɔsiku ugyii ɔmɛni lɛlɔ!” ³⁷ Nsu Yesu ɔ́va momoomo na ɔ́yula. ³⁸ Kɔnakunwi ni, kɔdi kubendi kɔni nƒa Yudaƒuɔ kakpakɔ na béti bábala Katɔti katɔma kedee kayakun mmɔ kɔ́bwɛ kemo inyɔ kɔ́si katɔ kúbewi kalɔ. ³⁹ Na ka bekpone unengu ɔni nnye ugyii ɔmɛni anumi únu Yesu bɔva na ɔ́nu kalɛ na úkpi ni, ɔ́su ɔnini, “Sɔsɔ na ukyuli ɔmɛni ɔdi Katɔti Ubidi.” ⁴⁰ Beleku badi lɛnɔ benye ɔgyu na baanu. Bana akɔ badi ndi Maria Magdalene ku Salome ku Maria ɔni bebi ndi Yakobo ɔnamudi ku Yose. ⁴¹ Uwi ɔni na Yesu ɔ́kya Galilea ni, ama nátaasiaku-nwu na béteebunku-nwu. Beleku babambadi pii bani násiaku-nwu bébo Yerusalem lɛnɔ benye mmɔ. ⁴² Ala amɛni ƒui álɛ na limeyi lɛni ntɔ lɛnwunameyi lɛlɔ. Na ka ɔdaku useyi uwi budu ni, ⁴³ Yudaƒuɔ litemi batɛne kemo unwi ɔni baalɔ Yoseƒ na ɔ́si Arimatea ni, úse kayi na úsie utánu Pilato. Yoseƒ ɔmɛni ɔlati ɔdi ukyuli ɔni nnye mɔɔsia anu na Katɔti lɛga kadikɔ bubo lɛlɔ. Ka útédu Pilato kudɔ ni, úvele-nwu ɔnii ute-nwu ulu na ɔƒami Yesu ukpine ɔmɛni utáva asa na lɛnwunameyi lidu. ⁴⁴ Ɔmɛni ɔ́bla Pilato kalɛ kadi ka únu ɔnii Yesu úkpi pla lɛni. Anwuɔsu ɔ́lɔ bekpone unengudi ɔni nnye ablala amɛni kenye mmɔ, na úye-nwu únu si Yesu úukpi sɔsɔ. ⁴⁵ Na ka unengu ɔmɛni ɔ́su-nwu ka sɔsɔ na ɔdi ni, Pilato úte Yoseƒ kuƒi ɔnii utáƒami ukpine ɔmmɔ. ⁴⁶ Amu na Yoseƒ úse útáƒami Yesu ukpine na únyimi-nwu ɔ́kya lɛdiku lɛwɔdi lɛni na úye kemo. Na úti-nwu útákya lɛtakpɛ kaƒiɔtɔ kani béku bése na kɔbi kɔdi kaƒɔna. Amu na ɔ́ya na béminime lɛtakpɛ lɛdi béti bétile kaƒiɔtɔ kamɛni kenye. ⁴⁷ Na uwi ɔmɛni kemo ni, Maria Magdalene ku Maria ɔni ndi Yoseƒ uni bébo mmɔ bébenye bánu kesii kani na béti Yesu ukpine bátákya.

¹ Kadi kégye useyi uwi ɔni na lɛnwunameyi kadi káyu ni, Maria Magdalene ku Maria ɔni ndi Yakobo uni ku Salome bétéye klobo banii batáwɛɛ Yesu ukpine. ² Amu ka kadi kégye Kwasida ɔtanta ni, báta bésie kaƒiɔtɔ kammɔ kudɔ. ³ - ⁴ Uwi ɔni na bakɛ bésela ni, béye lɛlɔ banini, “Ɔma na bɔdubɔkɛ na uminime lɛtakpɛ lɛmmɔ udie na kaƒiɔtɔ kammɔ kenye ute-bu?” Béye lɛlɔ ɔmɛni ɔsika lɛtakpɛ lɛmmɔ líbomo geen. Nsu ka bédu mmɔ ni, bánu ka ukyuli ɔdi úuminime lɛtakpɛ lɛmmɔ údie. ⁵ Anwuɔsu ka béduo kaƒiɔtɔ kammɔ kemo ni, bánu okloƒu ɔdi ka ulie kɔdianu kakɛ. Na ɔda ala aƒualadi sɔɔn! Ɔtɔtɔ ɔ́gyu-ma. ⁶ Amu na okloƒu ɔmmɔ ɔ́su-ma ɔnini, “Bitayia. Ngyi ka Yesu Nasareni na bɛɛwia, anwu ɔni na bákana bámana ugyii lɛlɔ. Uuubo mɛni! Ɔ́ta uli ngba! Bɛnu! Mɛni ndi likpo lɛni na béti-nwu bákya. ⁷ Anwuɔsu biteesie na bitásu nwuna batɛyane ku Petro lɛnɔ bɛnii, ’Yesu ɔtɔ-mii na Galilea. Mmɔ na bɛdubɔnu-nwu aani kalɛ na ɔ́su-mii úse.’ ” ⁸ Ɔmɛni ɔ́bla beleku bamɛni kalɛ kadi, na bálɛ kaƒiɔtɔ kamɛni kemo ku lɛlɔ bɔtɔ, na békeli bátɔlɔ. Ɔni bakɛ ulu bésela ni, bátasu ukyuli biala lɛla lɛdi, ɔsika liƒu lɛɛda-ma. ⁹ Ka Yesu ɔ́ta ɔ́lɛ kaƒiɔtɔ kemo na Kwasida ɔmɛni lɛdigye ni, ɔ́ka lɛlɔ budie bɔtina Maria Magdalene ɔni lɛlɔ kemo na ɔ́bɔku ayu ekpidi maatɛ ɔ́lɛku dii. ¹⁰ Anwu nésie útásu Yesu bakpana ka Yesu ɔ́ta uwi ɔni kemo na ama bakya beewulo kɔnyana na nwuna kukpi ɔsu. ¹¹ Na ka Maria ɔ́su-ma ɔnii Yesu ɔ́ta uli ngba na ɔ́nu-nwu ni, bátaƒɔ-nwu bátadi. ¹² Ɔmɛni kama ni, Yesu údie lɛlɔ ɔ́tina batɛyane inyɔ ka bakɛ ulu. Bátanu-nwu bátati na kalɔ kesekɔ. ¹³ Nsu kama ka bábati ni, básɔ bénwini bátásu bakladi. Nsu bakladi bammɔ bátaƒɔ-ma bátadi. ¹⁴ Kukplodi ni, Yesu údie lɛlɔ ɔ́tina nwuna batɛyane leevu-unwi uwi ɔni na belie baadi. Nsu ɔ́dɔnku-ma ɔsika beeebo bɔƒɔtaadi, na bábla atu ɔkplu bágya, na bátaƒɔ bekyuli bani nánu-nwu ka ɔ́ta ɔ́sɔ úbo uli ngba bátadi. ¹⁵ Ɔ́su-ma ɔnini, “Biteesie kayawi ƒui na bitákɔ Katɔti litemi buni lɛmɛni lɛsa na bekyuli ƒui akɔ. ¹⁶ Ukyuli ɔni náƒɔ litemi buni lɛmɛni ɔ́di na ɔ́ƒɔ ntu bɔkpila ni, Katɔti ɔdubudie-nwu ɔlɛku ekpidi kɔtu bɔni kemo. Na ukyuli ɔni nátaƒɔ útadi ni, Katɔti ɔdubɔdu-nwu kɔtɔ. ¹⁷ Na Katɔti ɔdubute baƒɔtaadine ɔyikun na babla akɔla lidu lidu. Badubɔgya ayu ekpidi na mina lɛnyi kemo. Badubutemi adi lidu lidu. ¹⁸ Na si béƒie kɔlakpi báda iye báni ugyulo ukpidi ɔdi biala ni, ulabla-ma lɛla lɛdi. Si béti bana enu básia balɛne lɛlɔ ni, badubɔkɛ lɛlɔ ɔkplu.” ¹⁹ Uwi ɔni na Blɔti Yesu ɔ́tɛmiku-ma mmɔ kama ni, Katɔti úti-nwu úsienku katɔ na útélie keliekɔ kenengudi kani nsiaku Ɔti kadi. ²⁰ Nwuna basiakune lɛnɔ bávi kayawi ƒui na básu litemi buni lɛmɛni. Na Blɔti ɔ́kɛnku-ma lɛlɔ na údie ɔ́tina ka nwuna litemi lɛdi litemi geen ɔ́si akɔla lidu lidu lɛni na bátaabla na nwuna ɔyikun kemo ɔsu.