YAKOBO

YAKOBO

¹ Ami Yakobo ɔni ndi Katɔti ku Blɔti Yesu Kristo kabla ɔblane muugyele amii Katɔti bekyuli ƒui bani négyingya bakya kayawi ekpo ekpo ƒui. ² Banwa, lɛlɔ litaayɔ-mii si ala lidu lidu eekpóku-mii. ³ Ɔsika si bɛ́kana na bɛ́di ala ani muukpóku-mii lɛlɔ ka bɛ́ƒɔ Kristo Yesu bɛ́di ɔsu ni, ɔdubo-mii bubunku na bɛdubɔkana na binye lɛla biala kenye kpakplaa. ⁴ Bɛya na kalɛ na binye kpakplaa mɛni usie anumi ubu na ɔlɛ-mii kɔsia ɔwɔlɔ. Na bɛbla baƒɔtaadine babuni bani na lɛbuni bɔbla bɔ́ƒɔ-ma lɛlɔ kemo ƒui. ⁵ Si bina akɔ ɔdi ɔɔyaki lɛnunda ni, ɔlɛka uvele Katɔti na ɔdubuti-ni ute-nwu, ɔsika Katɔti uuti-ni teete ukyuli biala ku kaƒɔ ƒaa. ⁶ Nsu si biivele-nwu lɛla lɛdi ni, ɔlɛka bɛƒɔ bɛdi ka ɔdi-nwu bɔyɔ ka ute-mii. Na bina kasusu ketenwini. Ɔsika ukyuli ɔni na nwuna kasusu keenwíni ni, use aani kalɛ na ɔƒɛƒɛɛ uuƒwi ɔnantu ntu taavinku. ⁷ - ⁸ Na ukyuli ɔni na nwuna kasusu kese inyɔ inyɔ na nwuna ablala eeese siin ni, utasia anu ɔnii ɔdubɔkɛ lɛla lɛdi ɔsiku Blɔti kudɔ. ⁹ Si Katɔti ɔ́talaku ɔƒɔtaadine ɔni ndi ɔwabane katɔ ni, ɔya na lɛlɔ litaayɔ-nwu. ¹⁰ Lɛni kani na si Katɔti úboku ɔƒɔtaadine ɔni ndi ɔlakɛne kalɔ ni, anwu lɛnɔ ɔya na lɛlɔ litaayɔ-nwu. Ɔsika ɔlakɛne biala uwi ɔdububo ubavi aani kalɛ na lɛku kemo kugyii kuuwiile kuna anwula teewi kalɔ. ¹¹ Aanu si ɔƒɛ ɔ́tu na ɔɔbi ni, ɔɔyá na eveteli aayɛyɛ na ana anwula eewiile teewi kalɔ. Na ana bɔdia lɛnɔ bɔɔyii udu. Lɛni kani na ɔlakɛne kabla lɛnɔ kadububo kawɔlɔkɔ. ¹² Lɛlɔ lɛdubɔyɔ ukyuli ɔni náƒɔ ɔ́di na unye kpakplaa na ɔɔsiáku ala ani ƒui muukpóku-nwu. Ɔsika si enu átaƒɛ-nwu ni, ɔdubɔkɛ ngba ƒui lɛyuƒɔla lɛni na Katɔti ɔ́su úse ka ɔdubute bekyuli bani mɔɔyɔ́-nwu. ¹³ Si lɛla lɛdi liikpóku ukyuli ɔdi taanu ni, utasu ɔnii Katɔti muukpóku-nwu taanu. Ɔsika lɛla lɛdi lilekpoku Katɔti taanu. Anwuɔsu anwu lɛnɔ ulekpoku ukyuli ɔdi ɔnii ɔbla likpidi. ¹⁴ Mmomu ɔlɔna alaekpidi ani mɔɔda ukyuli ɔkwɛ ni, anya muunwíni teekpoku-nwu. ¹⁵ Na ala ani mɔɔda-nwu ɔkwɛ mmɔ ni, aaƒɔ́-nwu lɛlɔ kemo na ɔɔyá na ɔɔbla likpidi. Na uwi ɔni na likpidi lɛmmɔ lɛnɔ lɛ́di-nwu lɛlɔ ƒui ni, ɔdubukpi ɔkya likpidi kemo. ¹⁶ Banwa bayɔne, bitaya na ukyuli ɔdi ɔtɔlɔ-mii. ¹⁷ Ala abuni ani ƒui na bubo na bɔɔnu ka ɔdia geen sɔsɔ ni, Katɔti kudɔ na aasí. Na ulávumana iye udie-bu atu aani ɔƒɛ ku kɔbuli kɔni nédie kuse na buduo lɛdisa kemo. ¹⁸ Katɔti ɔkɛ ngba bɔƒɔ litemi geen lɛlɔ na ɔ́ya na bɔ́kɛ kɔyu kemo ngba. Ɔ́bla ɔmɛni ɔ́siaku nwuna lɛƒɔyɔ lɛlɔ. Ɔsika ɔɔwia ka bɔbla bedeedi na nwuna ala ani na údie ƒui akɔ. ¹⁹ Banwa bayɔne, binyimo na ukyuli biala use atu unu lɛla biala. Na uwi lɛlɔ na ɔkɔsi bɔtɛmi. Na uteteeti kɔnyi pla pla. ²⁰ Ɔsika ukyuli kɔnyi kulábla ala abuni ani na Katɔti ɔɔwia taasiku-nwu kudɔ. ²¹ Anwuɔsu bɛda lɛlɔ bidie ala ani naaadia bɔnu ku ekpidi udu biala kudɔ. Na biboku lɛlɔ kalɔ bite Katɔti. Na biƒie nwuna litemi buni lɛni na úti ɔ́kya bina kayi kemo bɛda. Ani ndubɔya na bɛkɛ bɔƒɔ. ²² Ɔdi ka bitaabla taasiaku lɛla lɛni na litemi buni lɛmmɔ lɛɛtina lɛlɔ. Na ɔɔɔdi ka binu-ni kani. Si ɔɔɔdi lɛni ni, na bɛɛtɔ́lɔ lɛlɔ. ²³ - ²⁴ Ɔsika ukyuli ɔni na bunu kani na uunú litemi buni lɛmmɔ na ulábla taasiaku-ni lɛlɔ ni, use aani ukyuli ɔni na úti kanu na ɔ́nu kalɛ na nwuna anumi ese. Nsu kɔnakunwi ka ɔ́gyu lɛgba na mmɔ ni, ɔ́yiƒla kalɛ na use. ²⁵ Litemi buni lɛmmɔ ndi Katɔti ɔda ɔni na úbo-bu geen. Na ani mɔɔyá bekyuli baakɛ́ bɔnwuna. Si ukyuli únu na úduo etemila ammɔ kemo kaduɛ na útayiƒla ka ɔbla ɔsiaku-nya lɛlɔ ni, ala ani na ɔɔbla ƒui adubɔtɛ ete-nwu. ²⁶ Si ukyuli ɔdi ɔɔkali ɔnii ɔdi ɔƒɔtaadine buni na ulákana nwuna unyemi bɔda ni, ɔɔtɔ́lɔ lɛlɔ na nwuna bɔƒɔtaadi bɔmmɔ buuubo kɔsia kɔdi. ²⁷ Bɔƒɔtaadi ulu ɔni na Katɔti ɔɔnu ka use sɛɛn na bɔƒiɔ bɔdi buuubo-nwu kemo ndi ɔmɛni. Ɔlɛka ukyuli ubunku bekyuli bani muubó abi aani bekpinebi ku bekpinele kalɛ. Na ɔda lɛlɔ udie kayawi ekpidi biala kemo.

¹ Banwa, ka bɛ́ƒɔ Blɔti Yesu Kristo ɔni ndi Bula Ɔbune bɛ́di ɔsu ni, bitanu anumi bitabla lɛla lɛdi. ² Bɛkali nkyuli inyɔ badi bɛnu bɛnii bébo bina kasalakɔ. Unwi ɔdi ɔlakɛne ɔni nda lɛlɔ ku sika ugyiedi ala. Na unyɔdi ɔdi ɔwabane na unyimi adikpi. ³ Na bina akɔ ɔdi ɔ́su ɔlakɛne ɔmmɔ ɔnini, "Ƒula keliekɔ ndi kabuni kamɛni." Na ɔ́su ɔwabane anwu ɔnini, "Táwia kesiadi lie, iye ténye ngye." ⁴ Lɛla lɛmani na bɛdaku bɔbla mɛni? Bɛɛƒuna bekyuli kemo na biilii bakladi teekpo na bina akɔ. Kasusu kekpidi kadi na bɛda bɛɛbla ala amɛni. ⁵ Banwa, binu! Bɛgyi geen ka Katɔti ɔ́ƒuna kayawi kamɛni bawabane ka babla nwuna badi. Na ka báƒɔ Blɔti Yesu Kristo bádi ɔsu ni, bénwini kɔyu kemo ala bakɛne. Na ama ndubuduo Katɔ Ɔga Ɔma aani kalɛ na Katɔti ɔ́su bekyuli bani mɔɔyɔ́-nwu úse. ⁶ Nsu bilábu bawabane. Na balakɛne bamɛni mɔɔdi-mii lɛlɔ. Na beeti-mii teesienku litemi katɛkɔ. ⁷ Na ama ndi bekyuli bani muutemi enyekpi taasiku lɛnyi lɛni na baalɔ-mii na lɛ́ƒɔ-mii kuye lɛnɔ lɛlɔ. ⁸ Na si bɛ́di Katɔti ɔda bubo bunengudi bɔmɛni lɛlɔ ni, bɛ́bla-nwu kaduɛ. Ɔkya Bunweni Kedee Ɔku kemo ka, "Yɔ ƒula ukyulikpana aani ƒula lɛlɔ kalɛ." ⁹ Nsu si anumi lɛlɔ na bɛɛnu taabla ala ni, na bɛɛbla likpidi. Na ɔda bubo bɔmmɔ bɔɔdú-mii kɔtɔ ka bɛdi alaekpidi bablane. ¹⁰ Ukyuli ɔni na ɔ́ta únye Katɔti ɔda bubo bɔmmɔ ɔdi lɛlɔ ni, ɔ́ta únye ɔda bubo bɔmmɔ ƒui lɛlɔ. ¹¹ Na Katɔti ɔda bubo bɔmmɔ bɔɔsu bɔnini, "Ukyuli ɔdi utadi kɔsɔnɔ." Na ɔ́sɔ ɔ́su ɔnini, "Ukyuli ɔdi utadu ɔkpanadi." Anwuɔsu si aládi kɔsɔnɔ nsu ádu ƒula ɔkpana ni, áta énye ɔda bubo bɔmmɔ ƒui lɛlɔ. ¹² Ka Katɔti ɔdubɔtɛku-bu litemi ɔkɛnku ɔda bubo bɔni muute-bu bɔnwuna lɛlɔ ɔsu ni, bɛnu kaduɛ na lɛla lɛni na bɛɛsu ku lɛla lɛni bɛɛbla lɛnɔ lɛlɔ. ¹³ Ɔsika si Katɔti ɔɔtɛku ɔdi litemi ni, ɔɔɔdubo-nwu kɔnyana bɔnu si ukyuli ɔmmɔ ulánu kɔnyana. Nsu si ɔdi ɔɔnu kɔnyana ni, Katɔti uládu-nwu kɔtɔ. ¹⁴ Mina banwa, si ɔdi ɔ́su ɔnii ubo bɔƒɔtaadi geen na uléti-mu taabla kabla kadi ni, na nwuna bɔƒɔtaadi bɔmmɔ udu buuubo kɔsia kɔdi. Na bulakana na bɔƒɔ-nwu ngba lɛnɔ. ¹⁵ Biboku kasusu na banwa bani neeebo lɛwu lɛni bakya iye adila ani na badi lɛnɔ lɛlɔ. ¹⁶ Si éni na étete-ma ala ani na baawia ni, na kɔsia kɔdi kuuubo-nwu kemo ka asu-ma anii, "Biteesie na Katɔti ɔsiaku-mii. Na bɛdubɔkɛ lɛwu bɛkya na bɛkɛ adila bɛdi." ¹⁷ Anwuɔsu si ɔdi ɔ́ƒɔ ɔ́di na uléti nwuna bɔƒɔtaadi bɔmmɔ taabla kabla ni, na bɔƒɔtaadi bɔmmɔ bɔdi bɔƒɔtaadi bukpludi. ¹⁸ Nsu ɔdi ɔdubɔsu ɔnii, "Ukyuli ɔdi ɔ́ƒɔ ɔ́di, na ɔbambadi lɛnɔ ɔɔbla kabla." Ami mɔɔsu ukyuli ɔmmɔ nnini, "Udie ɔtina-mi kalɛ na ukyuli ɔdi ɔɔƒɔ́ taadi na ulábla kabla. Na ami ndubɔtina-nwu kalɛ na lɛ́ƒɔ lɛ́di na mina kabla kani na mɔɔbla kemo." ¹⁹ Áƒɔ ádi ka Katɔti unwi pɛ nkya, na use lɛni sɔsɔ. Nsu nyimo ka ayu ekpidi lɛnɔ áƒɔ ádi lɛni, na baayia. Anwuɔsu na lɛlɔ lɛɛtɔ́-ma. ²⁰ Ɔdɔlɔdi! Bɔtina na nsɔ ndubo-ɔ bɔtina nnii bɔƒɔtaadi bɔni lɛlɔ na kabla keeebunku ni, bɔdi bɔƒɔtaadi bukpludi? ²¹ Dɛ na ɔ́bla asa na Katɔti ku bula ɔti Abraham ntɛ bɔ́dia? Ɔ́si lɛla lɛni na ɔ́bla ɔsu. Ɔsika úti ubidi Isak ɔ́sia lɛkpabi lɛlɔ ka uti-nwu ɔkpa ute Katɔti. ²² Bilánu taati ka nwuna bɔƒɔtaadi úti ɔ́salaku lɛla lɛni na ɔ́bla? Na kabla kammɔ náya na nwuna bɔƒɔtaadi bɔmmɔ bɔ́bla bɔbuni bɔ́wɔlɔ? ²³ Na Bunweni Kedee Ɔku kemo etemila ébo éte lɛni anini, "Abraham ɔ́ƒɔ Katɔti ɔ́di. Na ɔkɛnku nwuna bɔƒɔtaadi ɔsu ni, Katɔti ɔ́bu-nwu aani ukyuli ɔni nse sɛɛn." Na anwuɔsu Katɔti ɔ́lɔ-nwu ɔnii mina ɔkpana. ²⁴ Bɛnu bɛti ka asa na Katɔti ku ukyuli ntɛ bɔdubɔdia ni, ɔkɛnku kabla kani na ɔɔbla ɔsu. Na ɔɔɔdi kalɛ na ɔ́ƒɔ ɔ́di lɛti pɛ ɔsu. ²⁵ Lɛni kani na ɔ́lɛku Rahab ɔyalɛ ɔmmɔ. Anwu ku Katɔti ntɛ bɔ́dia ɔkɛnku kalɛ na ɔ́ƒɔ Israel batu bani na bátala ɔsu. Úbunku-ma na bábɛ básia ulu bamba bálɛ bana bekisine enu kemo. ²⁶ Anwuɔsu ni, kalɛ na ɔlɔna ɔni kemo na kɔyu kuuubo ɔdi ukpine ni, lɛni kani na si áƒɔ ádi na ƒula bɔƒɔtaadi bulábla kabla kadi ni, bɔƒɔtaadi bɔmmɔ búkpi.

¹ Banwa, bina pii bitenwini litemi buni ala batinane. Bɛgyi ka abu bani mɔɔtina ala ni, Katɔti ɔdubɔtɛku-bu litemi utulo bakladi. ² Ɔsika bula ƒui bɔɔƒiɔ́. Nsu si ukyuli ɔdi ulaƒiɔ na lɛla lɛni na ɔɔsu kemo ni, na ukyuli ɔmmɔ use siin na ɔda lɛlɔ lɛnɔ kaduɛ. ³ Beeti kabuli taabala ɔpɔnkɔ kenye kalɛ na beti-nwu besienku kesii biala na baayɔ́. ⁴ Na ɔkɔlɔ ubendi ɔni nkɛ ɛpu anumi na ɔƒɛƒɛɛ ubendi muudí-nwu ni, ugyii blii ɔdi kani na beti taaka-nwu kavinkɔ. Na baakana na beeti-nwu teesienku kesii kani na baayɔ́ ka besie. ⁵ Lɛni kani na unyemi lɛnɔ use. Ina ka use blii suɛ na ɔlɔna ekpo ƒui akɔ ni, anwu na ukyuli uuti taakun lɛmɛnɛ na ala ebendi lɛlɔ. Nu kalɛ na lɛku líbomo, nsu lɛgyakpabi lɛɛkana na lɛɛkyula-ni. ⁶ Lɛni kani na unyemi use aani ogya kalɛ. Use aani kayawi kani na alaekpidi áƒɔ-ka ƒui. Na ɔkya-bu ɔlɔna kemo uubile ɔlɔna umodi ɔmmɔ ƒui ku nwuna enyekpi. Ɔɔyila-bu udu na ngba bɔmɛni kemo. Na nwuna enyekpi ási ukisine ɔmmɔ ɔyikun kemo na ɔdubuti ɔkyula kayawi kamɛni ku kana ala ƒui. ⁷ Ukyuli ɔɔkana na ɔbla bebuo bebendi ku baasɛ ku balakpi ku kɔkpaku na beteenu-nwu lɛdi. Na bábla lɛni sɔsɔ. ⁸ Nsu unyemi kani ndi lɛla lɛni na ɔdi útakana na ɔbla-nwu na uteenu lɛdi. Ɔdi lɛla likpidi lɛni na balakana bɔbala. Ɔkana ɔdu ukyuli aani kalɛ na kɔlakpi kɔni mbo ugyulo ukpidi kuse kalɛ. ⁹ Unyemi ɔmɛni na buuti teemwi Katɔti. Na anwu kani na buuti teewida bula ukyulikpana ɔni na Katɔti údie aani anwu ɔlati kalɛ. ¹⁰ Kenye kamɛni na bɔda buumwi Katɔti, na bɔda buuwida bekyuli lɛnɔ. Banwa, útalɛka use lɛni. ¹¹ Libiɔ lɛdi biala liláyu ntu buni ku mma ntu na ubu unwi ɔmmɔ kemo. ¹² Mina banwani, kugyii kulátu ebeli na aƒoƒoli alánwu kugyii ebi lɛnɔ. Lɛni kani na libiɔ lɛbuni lilakana na lɛyu mma ntu. ¹³ Si ukyuli ɔdi ɔɔnu lɛlɔ aani ɔnundane na bina akɔ ni, ɔlɛka uboku lɛlɔ kalɔ na ɔɔbla ala buni uti ɔtina ka ɔ́da anu. ¹⁴ Nsu si ebo lɛnungyie na ƒula kayi kemo ku enyekpi na aawia awɔ lɛti lɛkɛ ni, takun lɛmɛnɛ ka áda anu. Ɔsika aanyi ɔkɔ, na alásu litemi geen lɛmmɔ. ¹⁵ Lɛnunda lɛmmɔ udu lítasi Katɔti kudɔ. Kayawi mɛni na lɛ́si, na lɛɛɛkɛnku ngba buni bulie ulu lɛlɔ. Mmomu lɛdi lɛnunda likpidi. ¹⁶ Na kasalakɔ kani na lɛnungyie ku ukyuli unwi lɛkɛ kani nkya mmɔ ni, bekyuli bammɔ beeƒú na alaekpidi lidu lidu mɔɔkya-ma akɔ. ¹⁷ Na lɛnunda lɛni nási Katɔti kudɔ ni, lise sɛɛn. Na lɛdanku keyi buɛɛ na ɔɔyá na ati kalɛ na ada lɛlɔ na ayɔ ƒula bakpana lɛnɔ. Ɔɔyá na ƒula ablala aanwu ebi buni na aanu bekyuli kɔnyana. Na ulánu bekyuli anumi taabla lɛla lɛdi. Mmomu aabla ala ulu lɛlɔ geen. ¹⁸ Na bekyuli bani mɔɔklibi bekyuli ntɛ ni, kɔsia kɔdubɔlɛ bɔsiku unwi bɔbla ogya ɔni na baakya bekyuli kemo, aani kalɛ na beedé edula buni na ebi ani na báva kemo.

¹ Bi muuti kekpo ku kadɔ teeboku bina akɔ? Bina kayawi ebiti ani kama na bɛsiaku na eekpóku-mii na bina lɛlɔ kemo ni, ana kudɔ na ɔɔsí. ² Bɛɛwia kayawi ala, nsu bilakɛ-nya. Anwuɔsu na bɛɛdú lɛlɔ. Anumi eegyie-mii na ana lɛlɔ geen, nsu bilakɛ-nya. Anwuɔsu bɛɛdɔ na biikpóku lɛlɔ. Bɛɛwia-nya nsu kɔnu kuletuku-mii, ɔsika bilévele Katɔti na ute-mii. ³ Si ina bívele Katɔti muedi ni, ulákpete-mii. Ɔsika ɔɔɔdi kasusu kabuni kemo na biiye-nwu ala ammɔ. Na lɛla lɛni kani na bɛɛwia ka biti lɛlakɛ lɛmmɔ bɛbla ndi ka biti-nya bɛsiaku kayawi ebiti ekpludi kama. ⁴ Bɛdi bekyuli bani na biládi Katɔti ɔda bubo lɛlɔ. Bɛɛɛgyi ka si bɛ́bi bɛsiaku kayawi ala ni, bíti lɛlɔ bínwini Katɔti bekisine? Na ukyuli biala ɔni meti kayawi ala aani nwuna ɔkpana ni, ɔdi ukisine ute Katɔti. ⁵ Ɔɔɔdi keeke na Bunweni Kedee Ɔku ɔ́su ɔnini, "Katɔti uukpó kogyulo geen na kɔyu kɔni nkya-bu lɛlɔ kemo ɔsu." ⁶ Nsu ka Katɔti ɔɔyɔ́-bu ɔsu ni, ɔɔkya-bu ɔkplu kalɛ na bɔkana bunye kpakplaa. Ɔmɛni ɔsu Bunweni Kedee Ɔku ɔɔsu ɔnini, "Katɔti ulátunaku bekyuli bani mɔɔtalaku lɛlɔ katɔ, mmomu ɔɔkya bani muuboku lɛlɔ kalɔ ɔkplu." ⁷ Anwuɔsu biboku lɛlɔ kalɔ bite Katɔti. Bitatunaku ukisine ɔmmɔ, na ɔdubukeli-mii kudɔ. ⁸ Bɛni bide Katɔti, na anwu lɛnɔ ɔdubɔni ude-mii. Amii alaekpidi bablane, bɛƒɔ bina enu! Na amii bani bina kasusu kese inyɔ inyɔ ni, bɛvumana bɛsia Blɔti lɛti kama! ⁹ Na biteewulo kɔnyana. Amii bani mɔɔmá ni, bina lɛma linwini keku. Na bina lɛlɔyɔ linwini kɔnyana buwulo. ¹⁰ Biboku lɛlɔ kalɔ bite Blɔti, na ɔdubɔtalaku-mii katɔ. ¹¹ Banwa, bitalɔ lɛlɔ anyikpi. Si ɔdi ɔ́bla lɛni iye ɔ́tɛku ɔnwani ɔdi litemi ni, na ulábu ɔda bubo bɔmmɔ na ɔ́ta únye-mu lɛlɔ lɛnɔ. Si bɛ́ta bínye ɔda bubo bɔmmɔ lɛlɔ ni, na ɔɔtina ka bɛ́da ɔda bubo bɔmmɔ lɛlɔ bɔdi bɛ́ya. Na bínwini bɛɛtɛku ɔda bubo bɔmmɔ litemi. ¹² Katɔti muute-bu ɔda bubo bɔmɛni, na anwu kani ndi Litemi Ɔtɛne ɔmmɔ. Anwu kani ndubɔkana na ɔƒɔ-bu ngba. Na anwu kani ndubɔkana na ɔyila-mu. Anwuɔsu buuubo kuƒi ka bɔtɛku bula banwani litemi. ¹³ Binu, amii bani mɔɔsu bɛnini, "Ɔmwi iye kɔnaadi bɔdubusie ɔma ɔdi butádi kuye, na bɔdubɔkya mmɔ lɛkwa linwi na bɔbla egulabi pii." ¹⁴ Nsu bɛɛɛgyi kɔnaadi lɛla lɛni malɛku-mii. Bise aani uyɔ ɔni na si ɔƒɛƒɛɛ úduo-nwu akɔ pɛ na ɔɔyii taakya. ¹⁵ Lɛla lɛni na ɔlɛka bɛsu ndi ɔnini, "Si Blɔti úte kuƒi na bútekpi ni, bɔdubɔbla kabla kamɛni iye kani ngye." ¹⁶ Nsu ɔƒaani ni, bɛɛtina lɛlɔ na bɛɛkun lɛmɛnɛ lɛnɔ. Na lɛmɛnɛ bɔkun biala bɔɔɔdia. ¹⁷ Anwuɔsu ukyuli ɔni ngyi lɛla lɛbuni bɔbla nsu ulábla-ni ni, ɔdi likpidi ute-nwu.

¹ Ɔƒɛni ni, amii balakɛne, biteewulo geen na lɛbibo lɛni ndubo-mii lɛlɔ ɔsu. ² Bina akɛla adubutili na ayii udu. Na bina adala lɛnɔ kubweyi kɔdububile-nya. ³ Bina sika ugyiedi ku ɔƒualadi ɔni na bibo ni, ɔdubo bɔnyi bukpi. Na ɔmmɔ ndubudie-mii ute na Katɔti Litemi Bɔtɛ Limeyi lɛmmɔ lɛlɔ. Na ala ani nétili mmɔ adubɔkun buduo-mii ɔlɔna kemo aani kalɛ na ogya ɔɔkyula ukyuli. Na bɛ́ɛtɛ-nya bíse bíte lɛlɔ na bina uwi ukplodi ɔmɛni kemo. ⁴ Bɛnu! Kabla bablane bani nkya bina mmo ni, bíni na bítaƒɔ-ma kayu. Binu kalɛ na beewulo kɔnyana momoomo. Na bana keku kédu Katɔti, Bula Unwoti Ɔyikune Ƒui kudɔ. ⁵ Ngba bɔni na bílie na kayawi mɛni ni, bɛ́kɛ kayawi kamɛni kemo ebiti ku lɛlɔyɔ biala. Na bílie lɛmwi kalɛ na badu-mii na Litemi Bɔtɛ Limeyi lɛmmɔ lɛlɔ. ⁶ Bɛ́du bekyuli bani na bátaƒiɔ-mii kɔtɔ. Na bɛ́du-ma ina ka bátata bétenye-mii lɛlɔ. ⁷ Banwa, kalɛ na umonsene ɔɔkɛ́ kayi teete kaƒendi ɔnantu ku ketudi ɔnantu ute nwuna edula ani na ɔ́va bɔdia ɔsu ni, lɛni kani na ɔlɛka bɛkɛ kayi utédu uwi ɔni na Blɔti wasɔ webo. ⁸ Anwuɔsu amii lɛnɔ bɛkɛ kayi. Na enu ataƒɛ-mii, ɔsika Blɔti bɔsɔ bubo bɔmmɔ búude. ⁹ Banwa, bitadɔnku lɛlɔ, kalɛ na Katɔti lɛnɔ ulatɛku-mii litemi. Ɔsika Litemi Ɔtɛne ɔmmɔ úude na ɔ́ɔklibi lɛlɔ ka ɔda ɔlɛ. ¹⁰ Mina banwa, bɛnu Katɔti kenye bediene bani násu Katɔti litemi buni ku kalɛ bákɛ kayi na bénye bébo abi biala. Bɛnu-ma bɛtɛya. ¹¹ Bɔɔlɔ-ma bekyuli bani lɛlɔ lɛ́yɔ-ma ka bénye lɛbibo biala kenye ɔsu. Bínu kalɛ na Hiob ɔ́kɛ kayi ku kalɛ na Katɔti ɔ́ƒɔ-nwu kayu na kawɔlɔkɔ. Ɔsika Blɔti ubo kaƒɔ buni na ɔɔnu kɔnyana. ¹² Mina banwani, ɔmɛni ndi lɛla lɛni náƒɔ kuye lítulo. Bitakpali ala na bɛlɔ katɔ iye kalɔ iye lɛla lɛdi biala. Bɛya na bina ɛɛn ɔbla ɛɛn, na bina oowo ɔbla oowo. Na si bɛɛbla lɛni ni, Katɔti ɔɔɔdubo-mii kɔtɔ bɔdu. ¹³ Si bina ɔdi ɔkya lɛbibo kemo ni, ɔlɛka ɔkpali Katɔti na ɔdububunku-nwu. Na si lɛlɔ mɔɔyɔ́ ɔdi lɛnɔ ni, utaatu lɛnu teemwi Katɔti. ¹⁴ Na si bina kemo ɔdi uuƒi ni, ɔtala na balɔ baƒɔtaadine benengu na bebo babakpali katɔ bete-nwu na bawɛɛ-nwu inɔmii na Blɔti lɛnyi kemo. ¹⁵ Na si baƒɔtaadine bammɔ bákpali Katɔti na bɔƒɔtaadi kemo ni, ɔlɛne ɔmmɔ ɔlɛ ɔdubɔba-nwu na ɔkɛ ɔlɔkplu. Na si ɔ́bla likpidi lɛdi ni, Katɔti ɔdubuti ɔkyiɛ-nwu. ¹⁶ Anwuɔsu bidie bina alaekpidi ani na bɛ́bla kalɔ bite lɛlɔ. Na bitaakpali katɔ teete lɛlɔ kalɛ na Katɔti wabwi-mii lɛlɛ lɛni na biiƒi. Ukyuli ɔni nse sɛɛn ni, nwuna katɔ bɔkpali bubo ɔyikun geen. ¹⁷ Elia úse kalɛ kani na abu lɛnɔ buse. Ɔ́kpali Katɔti kpakplaa na ɔ́su-nwu ɔnii utaya na ɔnantu ɔna. Na sɔsɔ ni, ɔnantu útana útewi kalɔ akwa átɛ ku abuli aku. ¹⁸ Uwi ɔni na ɔ́sɔ ɔ́kpali Katɔ úye ɔnantu ni, ɔ́sɔ úse kalɔ ɔɔna na edula ásɔ ébo. ¹⁹ - ²⁰ Mina banwa, si bina akɔ ɔdi údeyi bɔƒɔtaadi ulu geen ɔmmɔ lɛlɔ na ɔkpanadi ɔ́sɔku-nwu úboku ni, ɔ́ya na ukyuli ukpidi ɔmmɔ kɔyu kɔ́lɛ kukpi kemo. Na Katɔti ɔdubuti ekpidi pii ɔkyiɛ-nwu.