HEBRIƑUƆ

HEBRIƑUƆ

¹ Na uwi ɔni návi kemo ni, Katɔti ɔ́sia nwuna kenye bediene lɛlɔ ɔ́tɛmiku bula bati kuuku kɔlɛ kɔlɛ na lilu bun bun lɛlɔ. ² Nsu na uwi ukplodi ɔmɛni kemo ni, Katɔti ɔ́tɛmiku-bu ɔ́siaku Ubidi lɛlɔ. Ubi ɔmmɔ na ɔ́ƒuna úse ka ɔbla nwuna ala ƒui ɔdine. Na nwuna lɛlɔ kani na ɔ́sia údie kayawi ƒui. ³ Ubi ɔmmɔ ndi Katɔti bukeye bɔni mɔɔsí Katɔti ɔni nse kede kede lɛlɔ. Na ɔdi Katɔti ukyuli udu ɔmmɔ geen. Na ɔkɛnku nwuna litemi lɛni mbo ɔyikun lɛlɔ ɔsu na lɛla biala linye nina kenyekɔ na kayawi. Na uwi ɔni na úti lɛlɔ ɔ́kpa kalɛ na Katɔti uti bayawine ekpidi ɔkyiɛ-ma ni, úsie útélie keliekɔ kenengudi ƒui na Katɔti kɔdianu kakɛ. ⁴ Ɔmɛni ɔsu na ubo kenyekɔ utulo Katɔti batu. Na lɛni kani na lɛnyi lɛni na ubo lɛnɔ lɛ́ƒɔ kuye litulo ama lɛdi. ⁵ Ɔsika ni, Katɔti útasu nwuna ɔtu ɔdi dii ɔnini, “Awɔ ndi mina ubi. Na ɔmwi ni, línwini-ɔ ɔti.” Na ɔ́sɔ útasu ɔtu ɔdi ɔnini, “Ami madi-nwu kɔti, na anwu wadi mina ubi.” ⁶ Uwi ɔni na Katɔti Ubi ɔni ntɔ ala ƒui úbo kayawi kamɛni lɛlɔ ni, Katɔti ɔ́su ɔnini, “Bɛya na Katɔti batu ƒui bakɔliku-nwu lɛnyi katɔ.” ⁷ Na etemila ani ndanku Katɔti batu lɛlɔ ni, ɔ́su ɔnini, “Lɛ́bla mina batu na bese aani ɔƒɛƒɛɛ. Na ama bani mɔɔbla mina kabla ni, lɛ́bla-ma na bese aani ogya linyemi.” ⁸ Nsu na Ubidi ɔmmɔ lɛlɔ ni, Katɔti ɔ́su ɔnini, “Ati, awɔ ni, ƒula lɛga kadikɔ kadubo buse uwi ƒui. Na adubɔdi ƒula bekyuli lɛlɔ na ulu siin lɛlɔ. ⁹ Awɔ mɔɔyɔ́ lɛla lɛni nse siin, na ekisi ala ani naaakɛ ulu lɛlɔ. Anwuɔsu ni, ami ƒula Katɔti lɛ́ƒuna awɔ, Ati, ka akɛ kenyekɔ etulo na bakladi ƒui akɔ. Na lɛ́ya-a na ákɛ lɛlɔyɔ na uwi ɔni na líti inɔmii líwi-ɔ aani likpose.” ¹⁰ Katɔti ɔ́sɔ ɔ́su ɔnini, “O Blɔti, na kalɔ kesekɔ ni, awɔ nédie kayawi kamɛni ƒui, na éti ƒula enu ábla kayaa. ¹¹ Ala amɛni ƒui adubɔyii udu. Nsu awɔ ni, adubulie uwi ƒui. Ala ammɔ ƒui adubɔtɔ aani adala kalɛ. ¹² Adubɔƒɛ-nya asala aani kalɛ na baaƒɛ awu. Na aani kalɛ na baavumana adala ni, lɛni kani na Katɔti ɔdubo ala ammɔ bɔvumana. Nsu kalɛ kani na awɔ ese ni, lɛni na adubo buse. Na ƒula akwa alása kudii.” ¹³ Ɔɔɔdi Katɔti ɔtu ɔdi na Katɔti ɔ́su ɔnini, “Sɔ lie keliekɔ kani náƒɔ kuye ketulo ƒui na mina kɔdianu kakɛ wetédu uwi ɔni na meti ƒula bekisine makya-a lɛgba kalɔ.” ¹⁴ Na nwuna batu ƒui ama ni, ɔɔɔdi ayu ani muusié-nwu bɔtala ka beteebunku bekyuli bani na Katɔti ɔdubɔya na bakɛ bɔƒɔ na badi yoo?

¹ Ɔmɛni ɔsu na ɔdi ka bɔbla bɔsiaku ala ani na búnu lɛlɔ kaduɛ na bɔda-nya kpakplaa kalɛ na bulayii ulu geen ɔmmɔ. ² Na ɔƒɛni ni, si kenye kani na Katɔti batu básu bula bati kuuku kábala-ma na Katɔti ɔ́ni ɔdi biala kɔtu kɔni námanku si báƒiɔ ni, ³ dɛ na bɛɛkali bɛnii bɔdubɔkana na bukeli kɔtu bɔni bɔni nse nte-bu si búni ngba bɔƒɔ bonwu bɔmɛni? Bɔƒɔ bɔmɛni lɛsa na Blɔti ɔ́ka bɔkɔ bute-bu. Na bekyuli bani ƒui nénu lɛsa lɛmɛni ni, básia kama na bédie-ni básu-bu nwaa. ⁴ Katɔti ɔlati lɛnɔ údie ɔ́tina-bu nwaa ka litemi lɛmɛni lɛdi litemi geen ɔkɛnku akɔla budie taatina lidu lidu ku Katɔti Kɔyu etela lidu lɛni na úle ɔ́kya bekyuli kemo na nwuna bɔyɔ kenye. ⁵ Ɔɔɔdi Katɔti batu na Katɔti ɔ́su ka badubɔdi kayawi kani litemi na bɔɔsu ka kadububo mɛni lɛlɔ. ⁶ Nsu likpo lɛdi lɛkya na Bunweni Kedee Ɔku kemo na básu Katɔti banii, “Bi na ukyuli ɔdi, ɔsu na aasia-nwu anu lɛni? Na bi na Ukyuli Ɔyawine Ubi ɔdi, ɔsu na aanu-nwu lɛlɔ lɛni? ⁷ Na áya na úbo úbenye kenyekɔ kani náyu kalɔ blii kétulo Katɔti batu bammɔ kadi. Na áya na uukeye na bekyuli baabu-nwu. ⁸ Na éti lɛla biala ákya-nwu kalɔ.” Ka Katɔti úti lɛla biala ɔ́kya-nwu kalɔ ɔsu ni, lɛla lɛdi lɛsɔ liiibo na lɛɛɛkya-nwu kalɔ. Nsu ɔƒɛni ni, bulánu taati si lɛla biala lɛkya-nwu kalɔ. ⁹ Nsu bɔɔnu Yesu ɔni na úbenye kenyekɔ kani náyu kalɔ blii kétulo batu bammɔ kadi ka uukeye na bekyuli baabu-nwu ɔƒɛni, ɔsika úbo kukpi abi. Na Katɔti úte-nwu ɔyikun ka ukpi na bekyuli ƒui lili. ¹⁰ Ɔdi lɛla lɛni na Katɔti ɔni nédie ala ƒui na ɔɔnu-nya lɛlɔ ɔ́nu ka lɛdia ka ukyuli ɔni mɔɔtɔnku bekyuli pii teeduoku bukeye kemo ni, ɔka abi bubo kalɛ na ɔwɔlɔ nwuna kabla na ɔƒɔ-ma. ¹¹ Anwu ɔni nábla bekyuli kedee ku bekyuli bani na ɔ́bla kedee ƒui ni, badi bekyuli benwi. Ɔmɛni ɔsu na kɔƒa kulekpo Yesu ka ɔlɔ-ma ɔnii banwa. ¹² Ɔɔsu Katɔti ɔnini, “Ndububo ƒula lɛnyi kudu bubo bute mina banwa. Na ndubumwi-ɔ lɛnyi kedee na baƒɔtaadine lɛkpa ƒui anumi.” ¹³ Na ɔɔsu lɛnɔ ɔnini, “Ndubuti mina anu ƒui lɛsia Katɔti lɛlɔ.” Na ɔsɔ ɔɔsu ɔnini, “Aanu ami ku bebi bani ƒui na Katɔti úti úte-mi.” ¹⁴ Ka bekyuli bamɛni badi ɔlɔna ku ubugya ɔsu ni, anwu lɛnɔ úti ukyuli udu kalɛ na ɔkɛnku nwuna kukpi lɛlɔ ni, na wadi ukyuli ɔni nda kukpi ɔyikun lɛlɔ. Na ukyuli ɔmɛni ndi ukisine ɔmmɔ. ¹⁵ Na ɔkɛnku ɔmɛni lɛlɔ na udie bani ƒui na kukpi liƒu líbo-ma lɛkpu líse bana ngba ƒui kemo. ¹⁶ Ɔsika geen ni, ɔɔɔdi Katɔti batu na uubunku, mmomu Abraham kaba kemo bebi. ¹⁷ Ɔmɛni ɔsu na Katɔti ɔ́bla-nwu aani nwuna banwa kalɛ na ulu biala lɛlɔ. Ɔ́bla lɛni kalɛ na unwini ɔkpane unengudi ɔni mɔɔnu kɔnyana na ɔɔbla lɛla biala ulu lɛlɔ teete Katɔti, na uti nwuna ngba ɔkpa kalɛ na Katɔti uti bekyuli ekpidi ɔkyiɛ-ma. ¹⁸ Na ka ala lidu lidu ékpoku anwu ɔlati na úbo abi ni, ɔɔkana na uubunku bekyuli bani ƒui na ala ammɔ eekpóku.

¹ Anwuɔsu ni, banwa kedee bani na Katɔti ɔ́lɔ ka bɛdi Katɔ Ɔga Ɔma ala, biti bina anu bɛsia Yesu ɔni ndi ɔtalane ku ɔkpane unengudi ɔni kenye na buudie lɛlɔ. ² Ɔ́bla ala ulu lɛlɔ úte ukyuli ɔni náƒuna-nwu úse aani kalɛ na Mose ɔ́bla ala ulu lɛlɔ na Katɔti kaduli. ³ Yesu ɔ́manku ɔbu útulo Mose aani kalɛ kani na ukyuli ɔni nátu ɔtɔ ɔ́ƒɔ lɛnyi útulo ɔtɔ ɔni na ɔ́tu mmɔ. ⁴ Ɔsika ɔtɔ biala ubo ukyuli ɔni nátu-nwu. Nsu Katɔti nátu lɛla biala. ⁵ Mose ɔ́bla lɛla biala ulu lɛlɔ na Katɔti kaduli aani kabla ɔblane. Na údie ala ani na Katɔti ɔdubo ubasu ɔ́tina. ⁶ Nsu Kristo anwu ni, ɔ́bla ala ulu lɛlɔ aani ubi ɔni ntɔnku Katɔti kaduli. Na abu ndi nwuna ɔtɔ ɔmmɔ si búse kayi na búƒie lɛnunsia lɛni kudu na buubó bɔ́da kpakplaa. ⁷ Anwuɔsu na Katɔti Kɔyu kɔ́su kɔnini, “Si bínu Katɔti lɛdi ɔmwi ni, ⁸ bitabla atuɔkplu aani kalɛ na bɛ́bla uwi ɔni kemo na bɛ́ta bínye-mi lɛlɔ na bɛ́kɔku-mi bɛ́nu na ketele mmɔ. ⁹ Mmɔ na bina bati kuuku bákɔku-mi bánu banii baanu lɛla lɛni mabla ina ka bánu ala ani na lɛ́bla na akwa aavlene kemo. ¹⁰ Ɔmmɔ ɔsu na líti kɔnyi lɛ́kya kaba kammɔ. Na lɛ́su nnini, ’Bana kayi ƒui kakɛ ulu bamba lɛlɔ, na bátanu mina lilu bátati kudii.’ ¹¹ Anwuɔsu na lɛ́kpali lɛlɔ lɛ́su na mina kɔnyi kemo nnii baláni beléde-mi na bakɛ bɔnwuna kudii!” ¹² Banwa, bɛnu lɛlɔ kemo kaduɛ kalɛ na ɔdi uleti likpidi kasusu na kayi kemo na unwini ukyuli ɔni naaaƒɔ taadi na walɛ Katɔti ɔni muute ngba kama. ¹³ Mmomu bɛkya lɛlɔ ogya limeyi ndi limeyi si kadi biala kégye-mii na baalɔ-ka banii ɔmwi. Ɔmmɔ ndubɔya na likpidi lilátɔlɔ ɔdi na wenwini ukyuli ɔni mɔɔbla atuɔkplu. ¹⁴ Bubo kadikɔ ɔkɛnku Kristo lɛlɔ si búƒie-nwu bɔ́da kpakplaa na búti bula lɛlɔ ƒui bɔ́sia-nwu lɛlɔ útédu kawɔlɔkɔ. ¹⁵ Lɛni na básu bábavi ɔƒɛni banini, “Si bínu Katɔti lɛdi ɔmwi ni, bitabla atuɔkplu aani kalɛ na bɛ́bla uwi ɔni na bɛ́ta binye Katɔti lɛlɔ.” ¹⁶ Na ɔma bene na bɛɛkali ka ama nénu na báta bénye Katɔti lɛlɔ mmɔ? Ɔɔɔdi bekyuli bani ƒui na Mose ɔ́tɔnku ɔ́lɛku Egyipte kalɔ lɛlɔ mmɔ badi yoo? ¹⁷ Na ɔma bene na Katɔti úti kɔnyi ɔ́kya akwa aavlene sɔɔn mmɔ? Ɔɔɔdi bekyuli bani nábla ala ekpidi na Katɔti ɔ́yila-ma udu na ketele kemo mmɔ badi yoo? ¹⁸ Na ɔma bene na Katɔti ɔ́kpali lɛlɔ ɔ́su ka baláni beléde-nwu na bakɛ bɔnwuna si ɔɔɔdi bekyuli bani nétenu-nwu litemi mmɔ. ¹⁹ Anwuɔsu bɔ́nu bɔ́ti ka ɔni na bátaƒɔ-nwu bátadi ɔsu na bátakana-nwu bɔni bude na bakɛ bɔnwuna.

¹ Anwuɔsu ka linyese lɛni na úte-bu ka buduo nwuna bɔnwuna ƒui kemo kamua kese kéte-bu ɔsu ni, bɛya na bɔnu lɛlɔ kemo kaduɛ kalɛ na ɔdi ulásɔ na kenye kammɔ lɛlɔ. ² Ɔsika básu abu lɛnɔ litemi buni lɛmmɔ aani kalɛ kani na básu ama lɛnɔ. Nsu litemi lɛni bénu kátalɛ kɔsia kɔdi kétete-ma. Ɔsika ama bani nénu kenye kammɔ ni, bátaƒɔ-ka bátadi. ³ Nsu abu bani mɔɔƒɔ́ taadi ni, bɔdubɔkɛ bɔnwuna bɔmmɔ. Na bani nátaƒɔ bátadi ni, bátakɛ-mu aani kalɛ kani na Katɔti ɔ́su lebo lɛni na ɔ́su ɔnini, “Anwuɔsu lɛ́kpali lɛlɔ lɛ́su na kɔnyi kemo nnini, ’Baláni beléde-mi na bakɛ bɔnwuna kudii!’ ” Katɔti ɔ́su ɔmɛni ina ka úte kuƒi úse uwi ɔni na ɔ́wɔlɔ kayawi budie. ⁴ Ɔsika na Bunweni Kedee Ɔku kemo ni, bénweni lɛla lɛdi na limeyi maatɛdi lɛlɔ banini, “Na limeyi maatɛdi lɛlɔ ni, Katɔti ɔ́da kabla ƒui ɔ́ya na ɔ́nwuna.” ⁵ Na litemi lɛni bɔ́su bɔ́vi mɛni kemo ni, Katɔti ɔ́su ɔnini, “Baláni beléde-mi na bakɛ bɔnwuna kudii!” ⁶ Litemi lɛmɛni lɛmua lise lɛni ka badi badubɔkɛ bɔnwuna bɔmmɔ. Na bani na báka lɛsa lɛmmɔ bɔkɔ bute ni, ama mmomu néteduo bɔnwuna bɔmmɔ kemo ɔ́si bana atuɔkplu ɔsu. ⁷ Ɔmɛni ɔsu na Katɔti ɔ́sɔ úse limeyi lɛbambadi lɛni na ɔɔlɔ ɔnii ɔmwi úse uwi ɔni na ɔ́tɛmiku kuuku bekyuli ɔkɛnku Ɔga Dawid lɛlɔ lɛni na bɔ́su búbavi bɔnini, “Si bínu Katɔti lɛdi ɔmwi ni, bitabla atuɔkplu.” ⁸ Ɔsika bɔya na si Yosua ɔ́ya na bákɛ bɔnwuna ni, nka Katɔti ɔ́sɔ útasu lɛla lɛdi útasiku limeyi lɛbambadi lɛdi lɛlɔ. ⁹ Ɔmɛni ɔsu na lɛnwunameyi lɛmua lise lite Katɔti bekyuli. ¹⁰ Ɔsika ukyuli biala ɔni muuduo Katɔti bɔnwuna kemo ni, ɔɔda nwuna kabla ƒui taaya na ɔɔnwuna aani kalɛ kani na Katɔti ɔ́bla. ¹¹ Anwuɔsu bɛya bɔkya ɔkplu biala na buduo bɔnwuna bɔmmɔ kemo. Na ɔdi biala uláwɔ ulu ka ɔsiaku bana atuɔkplu bɔbla kama ɔsu. ¹² Katɔti litemi lɛdi lɛla lɛni mbo ngba na lɛɛbla kabla pla pla teetulo kewii kani na bádɔ-ka lɛvi inyɔ. Na liiduo ukyuli kasusu ku kɔyu ntɛ. Na lɛɛbla lɛni aani kalɛ na kewii keele ɔlɔna ku ekubi ntɛ. Litemi lɛmmɔ lɛɛnu lɛla biala lɛni nkya ukyuli kasusu ku kayi kemo taatina-nwu. ¹³ Ala ani ƒui na Katɔti údie lítabɛ-nwu. Na ɔɔnu lɛla biala kalɛ na lise. Na nwuna anumi na bɔdubo bula akunta ƒui bɔbu. ¹⁴ Anwuɔsu ka bubo ɔkpane unengudi ɔbuni ƒui ɔni ndi Katɔti Ubidi Yesu ɔni nkya-nwu kudɔ na katɔ mmɔ ɔsu ni, bɛya na buƒie bɔƒɔtaadi bɔni kenye na buudie mɛni bɔda kpakplaa. ¹⁵ Ɔɔɔdi ɔkpane unengudi ɔni na bula lɛlɔ lilakywi-nwu kaƒɔ na bula kpɛtɛ kpɛtɛ bɔbla kemo. Mmomu ɔdi ukyuli ɔni na ala ékpoku-nwu ánu na ulu biala lɛlɔ aani bula kalɛ kani. Nsu útabla likpidi lɛdi. ¹⁶ Anwuɔsu bɛya na buti bula lɛlɔ ƒui bute-nwu na bɔkpɛ bude-nwu na nwuna lɛgaboku kudɔ ku kayi buse ka ubo lɛƒɔndia ɔsu. Na ɔkɛnku nwuna lɛƒɔndia ɔsu ni, ɔdubɔnu-bu kɔnyana na ubunku-bu uwi biala na búvele-nwu lɛla lɛdi.

¹ Ɔkpane unengudi biala ni, bekyuli akɔ na baaƒuna-nwu taalɛku. Na anwu muunye bekyuli bammɔ kenye na ala ani ƒui ndanku Katɔti lɛlɔ. Na uuti etela ku akpala teete Katɔti na bana ƒui ekpidi lili. ² Na bekyuli bani naaagyi ɔda bubo bɔmmɔ na báyii ulu ni, ɔkpane ɔmmɔ ɔgyi kalɛ na ɔbla bana litemi buɛɛ. Ɔsika anwu lɛnɔ ulákana ɔda bubo bɔmmɔ ƒui lɛlɔ bɔdi. ³ Lɛni ɔsu na ɔlɛka ɔbla akpala na anwu ɔlati ekpidi ku bekyuli bammɔ ƒui ekpidi lili. ⁴ Ukyuli ɔdi ulakana ɔkpane unengudi kenyekɔ kamɛni bɔƒuna bute lɛlɔ. Mmomu ɔdi ka Katɔti náƒuna-nwu aani kalɛ na ɔ́ƒuna Aaron. ⁵ Lɛni kani na Kristo lɛnɔ útaƒuna ɔkpane unengudi kenyekɔ kamɛni útete lɛlɔ kalɛ na bekyuli babu-nwu. Mmomu Katɔti ɔ́su-nwu ɔnini, “Awɔ ndi mina ubi. Na ɔmwi ni, línwini-ɔ ɔti.” ⁶ Na likpo bamba ni, ɔ́sɔ ɔ́su ɔnini, “Adi ɔkpane úsela uwi ƒui na Melkisedek ɔkpane bɔdi ulu lɛlɔ.” ⁷ Uwi ɔni na Yesu úlie ngba na kayawi kamɛni lɛlɔ ni, ɔ́kpali katɔ úvele Katɔti ɔni kani ndubɔkana na udie-nwu na kukpi kemo ku kɔvanu momoomo ku imii. Na Katɔti únu-nwu bɔkpali, ɔsika úboku lɛlɔ kalɔ úte-nwu na ɔɔbu-nwu ɔsu. ⁸ Na ina ka ubidi na ɔdi ni, ɔ́tɛya abi ani na ɔdi ka ukyuli ubo si uunú Katɔti litemi. ⁹ Na ka Katɔti ɔ́ya na ɔ́bla nwuna kabla ɔ́wɔlɔ ni, únwini ukyuli ɔni lɛlɔ na bekyuli bani muunú-nwu litemi ƒui baasia taakɛ ngba bɔƒɔ. ¹⁰ Na Katɔti nédie-nwu ka unwini ɔkpane unengudi na Melkisedek ɔkpane bɔdi ulu lɛlɔ. ¹¹ Bubo ala pii na bɔsu bɔsiku ɔmɛni lɛlɔ, nsu ka bilákana ala buƒie taakya lili kemo pla pla ɔsu ni, nwuna kalɔ budie bubo ɔkplu. ¹² Sɔsɔ ni, ɔƒɛni kalɛ bene nka bɛdi ala batinane muedi. Nsu bɛsɔ bɛɛwia ukyuli ɔni nsɔ medie Katɔti litemi buni lɛmmɔ ala kalɔ kesekɔ mete-mii. Ɔni na bɛwia adila geen kama ni, bɛɛwia lɛnyi ntu mmomu. ¹³ Na ukyuli ɔni na lɛnyi ntu kani na ɔɔnyimi ni, ɔmua ɔdi ɔnamu na útedu ka unu ala bɔtina bɔni ndanku ukyuli lɛlɔ bɔbla siin kalɔ. ¹⁴ Nsu adila geen ani mbo unu ni, ese ete bekyuli bani náabi lɛlɔ. Lɛni kani na bekyuli bani náabi lɛlɔ ni, báanyuɛ lɛlɔ na báti kavumana kani nkya lɛbuni ku likpidi ntɛ.

¹ Ɔmɛni ɔsu ni, bɛya na busie anumi, na bulasɔ bulakya lɛnamu uwi kalɔ kesekɔ ala ani na bɔ́tɛya na Kristo mmɔ kani lɛlɔ kemo. Bitaya na bɔsɔ butése kalɔ kesekɔ ala bɔtɛya kalɔ. Ala amɛni adanku kayi bunwini na ala ekpidi lɛlɔ ku kalɛ na bɔƒɔ Katɔti bɔdi lɛlɔ. ² Na adanku lɛla lɛni ɔsu na beeti ntu taabla ntu bɔkpila ɔdi ku enu lili bɔsia ku kalɛ na bekpine badubɔsɔ bata balɛ bekpine akɔ ku Katɔti litemi lɛni na ɔdubɔtɛku-bu na ɔsɔ ulavumana-ni kudii lɛlɔ. ³ Anwuɔsu bɛya na busie anumi. Na si Katɔti ɔ́tunaku-bu ni, ulu ɔmɛni lɛlɔ na bɔdubɔsia. ⁴ Na bekyuli bani nánu bukeye dii na bákɛ Katɔti lɛƒɔndia na bákɛ kɔsia kɔdi ɔkɛnku Katɔti Kɔyu lɛlɔ, ⁵ na bánu lɛbuni lɛni nkya Katɔti litemi buni lɛmmɔ kemo báti ku ɔyikun ɔni ndanku Katɔti lɛga bɔdi bɔni mebo lɛnɔ lɛlɔ ⁶ si béni bana bɔƒɔtaadi na Katɔti lɛlɔ ni, basɔ balakana na benwini kayi. Ɔsika basɔ baaka Katɔti Ubidi ɔmmɔ taamana ugyii lɛlɔ na baakya-nwu kɔƒa na kadi ƒui anumi. ⁷ Kalɔ kani mɔɔƒɔ́ ntu si ɔnantu ɔ́na na kaadia edula abuni teete bemonsene ni, Katɔti kusɛ kusɛ ɔɔsiáku-ka. ⁸ Nsu kalɔ kani na liyu na alakpi mɔɔkwɛ́-ka lɛlɔ ni, kadanku ewida na keeebo kɔsia kɔdi. Na kasɔ kaladia lɛla lɛdi bɔbla lɛnɔ. Na kawɔlɔkɔ ni, kadubɔkywi. ⁹ Bayɔne, ina ka bɔɔsu ala amɛni ƒui ni, bɔsia anu ka ala abuni ani ndanku ngba bɔƒɔ adubɔsiaku amii ƒui. ¹⁰ Katɔti ɔɔbla lɛla biala ulu lɛlɔ. Na uláyiƒla bina ala ani na bɛ́bla. Ɔgyi ka bɛɛyɔ́-nwu ɔkɛnku kalɛ na bíbunku nwuna bekyuli. Na bɛmua biibunku-ma úbedu ɔƒɛni. ¹¹ Lɛni na bɔɔwia ka bina akɔ ɔdi biala ɔda lɛlɔ ku udu buni ɔmɛni kaduɛ utédu kawɔlɔkɔ kalɛ na bina lɛnunsia lɛlɛ-mii kɔsia. ¹² Buláwia ka bitaabla kɔkɔsɔ. Mmomu bɛtɛya bekyuli bani nákɛ kayi buɛɛ na báƒɔ bádi ɔsu na kɔnu kútuku-ma linyese lɛni na Katɔti úse-ma mmɔ. ¹³ Uwi ɔni na Katɔti úse Abraham kenye ni, ɔ́kpali lɛlɔ úse kenye kammɔ, ɔsika lɛla lɛdi liiibo na litulo anwu Katɔti. ¹⁴ Na ɔ́su ɔnini, “Geen ni, ndubute-ɔ kusɛ kusɛ. Na ndubɔya na edie kaba pii.” ¹⁵ Na ɔmmɔ kama ka Abraham ɔ́kɛ kayi buɛɛ na ɔ́sia Katɔti anu ɔsu ni, kɔnu kútuku-nwu kenye kani na Katɔti úse-nwu mmɔ. ¹⁶ Bekyuli baakpali ala ani ntulo-ma teese kenye taatina ka lɛla lɛni baasu lɛdi litemi geen, na unyeƒi ɔdi uuubo-nwu kemo. ¹⁷ Na ka Katɔti ɔɔwia ka bekyuli bani na úse kenye ƒui bati nwaa ka kavumana kadi kelebo nwuna linyese kemo ɔsu ni, ɔ́kpali lɛlɔ úse kenye kammɔ. ¹⁸ Katɔti ɔ́bla ɔmɛni ɔkɛnku alakpa anyɔ ani naaavumana lɛlɔ. Na Katɔti lɛnɔ ulakana ɔkɔ bɔnyi. Na ɔmɛni ɔdubɔya na abu bani nékeli bɔ́tamiku-nwu ni, enu alaƒɛ-bu na lɛnunsia lɛni na úti ɔ́kya-bu lɛlɔ kemo ɔsu. ¹⁹ Bula lɛnunsia lɛmɛni mɔɔyá na bɔda Katɔti kpakplaa na bula kayi kemo aani kalɛ na kugyii lidu lɛɛda kalɔ geen. Na bɔsia Yesu anu. Anwu néduo katɔma kedee kani kenye na lɛdiku lɛƒa kemo. ²⁰ Mmɔ na Yesu ɔ́gyu ɔtɔ útéduo na abu ɔsu. Na únwini ɔkpane unengudi úte uwi ƒui na Melkisedek ɔkpane bɔdi ulu lɛlɔ.

¹ Melkisedek ɔmɛni ɔ́di lɛga na Salem, na ɔ́bla ɔkpane kabla úte Katɔti ɔni ntulo ƒui. Uwi ɔni na Abraham ɔ́si kekpokɔ útádi baga bani nkya amadɔ mmɔ lɛlɔ ɔdubo ni, Melkisedek ɔmɛni útásiaku-nwu na úte-nwu kusɛ kusɛ. ² Na Abraham úti nwuna ala ƒui lɛkpa leevudi úte-nwu. Kudeedi ni, Melkisedek lɛnyi kalɔ ndi Siin Bɔbla Ɔga. Na ɔmmɔ kama ni, Salem Ɔga kalɔ budie ndi Keyi Buɛɛ Ɔga. ³ Na bétenweni lɛla lɛdi bátasiaku ɔti iye uni, iye kaba lɛlɔ, iye nwuna bɔwɔ iye kukpi lɛlɔ. Na Katɔti ɔ́ya na use aani anwu Katɔti Ubidi, ɔsika ɔdi ɔkpane ute uwi ƒui. ⁴ Bɛnu kalɛ na Melkisedek ɔmɛni ɔ́ƒɔ kuye geen. Abraham ɔni ndi bula nana ɔni nédie bula kaba kamɛni muedi úti ala ani na úkpo ɔ́ƒɔ na kekpokɔ mmɔ lɛkpa leevudi úte-nwu! ⁵ Na ɔƒɛni ni, ɔda bubo bɔmmɔ búte Lewi kaba kemo bebi bani nébenwini bakpane ka baƒɔ ala lɛkpa leevudi basiku bekyuli kudɔ ina ka bekyuli bamɛni badi bana banwani bani nási Abraham ɔmmɔ kaba kemo. ⁶ Melkisedek ɔmɛni útasi Lewi kaba kemo, nsu ɔ́ƒɔ ala lɛkpa leevudi ɔ́siku Abraham ɔni na Katɔti úse-nwu kenye úse mmɔ kudɔ, na Melkisedek ɔmmɔ úte-nwu kusɛ kusɛ. ⁷ Na ɔkɔ ɔdi uuubo-nwu kemo ka ni, ukyuli ɔni muute kusɛ kusɛ utulo ukyuli ɔni na béte kusɛ kusɛ mmɔ. ⁸ Na bekyuli bani mɔɔƒɔ́ ala lɛkpa leevudi ni, badi bakpane bani muukpi. Nsu na Melkisedek kakɛ anwu ni, ɔ́ƒɔ lɛkpa leevudi lɛmmɔ aani ɔkpane ɔni nli ngba aani kalɛ na Bunweni Kedee Ɔku ɔɔsu. ⁹ Na bɔkana na bɔsu muedi bɔnii Lewi ɔni mɔɔƒɔ́ ala lɛkpa leevudi lɛnɔ ɔ́sia Abraham lɛlɔ úte Melkisedek ala lɛkpa leevudi lɛmmɔ. ¹⁰ Ɔsika uwi ɔni na Abraham ɔ́siaku Melkisedek na uute-nwu ala lɛkpa leevudi lɛmɛni ni, na Lewi ɔmua ɔkya bana nana bene ubugya kemo. ¹¹ Katɔti úte kadi ƒui bekyuli ɔda bubo bɔni nkɛnku Lewi ɔkpane bɔdi kabla ulu lɛlɔ. Na si bɔbla na bábla bana kabla na kédu káwɔlɔ ni, bi ɔsu na Katɔti ɔ́sɔ ɔ́ƒuna ɔkpane ɔbambadi ka ubo ɔsiaku Melkisedek ɔkpane bɔdi ulu lɛlɔ na ɔɔɔdi aani kalɛ na ɔ́ƒuna Lewi bebi bani ndi Aaron kaba? ¹² Anwuɔsu si kavumana kadi kébo na ɔkpane bɔdi ulu ɔdi lɛlɔ ni, na agyi anii ɔdi ka kavumana kadi kebo na ɔda bubo bɔmmɔ lɛnɔ kemo. ¹³ Na ukyuli ɔni lɛlɔ na básu ala amɛni ƒui básiku ni, ɔ́si kaba bekyuli babambadi akɔ. Na kaba kammɔ bekyuli akɔ ɔdi útabla ɔkpane kabla na lɛkpabi lɛlɔ kudii. ¹⁴ Ɔsika bɔgyi kede kede ka Yesu ni, Yuda kaba kemo na báwɔ-nwu básiku. Na kaba kammɔ lɛlɔ ni, Mose útasu lɛla lɛdi útasiku bakpane lɛlɔ. ¹⁵ Na ɔƒɛni ɔni na ɔkpane ɔbambadi ɔdi ɔ́da ɔ́lɛ aani Melkisedek kalɛ ni, lɛla lɛni na bɔ́su mɛni lɛdubɔbla-mii nwaa libu. ¹⁶ Ɔdi ukyuli ɔni nébenwini ɔkpane na ɔɔɔkɛnku ɔda bubo bɔni ndanku kaba kemo ɔkpane bɔdi ulu lɛlɔ. Mmomu únwini ɔkɛnku ɔkpane ɔyikun ɔni nkya nwuna ngba bɔni naaadubo bɔsa kudii kemo. ¹⁷ Ɔsika Katɔti ɔ́su nwaa ɔnini, “Adi ɔkpane úsela uwi ƒui na Melkisedek ɔkpane bɔdi ulu lɛlɔ.” ¹⁸ Béliiku ɔda bubo bɔkukudi bése kɔmadɔ, ɔsika buuubo ɔyikun na buuubo kɔsia kɔdi lɛnɔ. ¹⁹ Ɔsika ɔda bubo bɔni na Katɔti úte-bu ɔkɛnku Mose lɛlɔ ni, bútabla Katɔti kabla bútawɔlɔ. Na ɔƒɛni ni, bɔ́kɛ lɛnunsia lɛni ndia ntulo na lɛɛyá na bɔɔní teede Katɔti. ²⁰ Ɔƒɛni ni, ɔɔɔdi ɔmmɔ lɛti, mmomu ɔkpane bɔdi ulu ɔmmɔ ɔdanku Katɔti linyese. Na uwi ɔni na bése bakpane babambadi ni, ɔɔɔdanku linyese lɛdi. ²¹ Nsu Yesu úbenwini ɔkpane ɔkɛnku Katɔti linyese lɛlɔ uwi ɔni na ɔ́su ɔnini, “Unwoti úse kenye kpakplaa kadi na ulavumana-ka kudii ɔnini, ’Adi ɔkpane úsela uwi ƒui.’ ” ²² Ɔkɛnku Katɔti linyese lɛmɛni lɛlɔ ɔsu ni, Yesu ndi bula kama kekpokɔ na bunyimi bɔni ndia ntulo mɛni lɛlɔ. ²³ Kavumana kabambadi kadi lɛnɔ kakya kani ndi ka bakpane bakukudi bammɔ bémomo, ɔsika ɔdi útakana nwuna kabla kenye bunye uwi ƒui ɔ́si kalɛ na beekpi ɔsu. ²⁴ Nsu Yesu anwu uli úsela uwi ƒui, na ulavumana nwuna ɔkpane kabla ulete ɔdi kudii. ²⁵ Anwuɔsu ni, ukyuli biala ɔni muubo Katɔti kudɔ ɔkɛnku-nwu lɛlɔ ni, Yesu ɔmmɔ ɔɔkana na ɔɔƒɔ́-ma ngba uwi ƒui ɔdubo buteevele teete-ma na Katɔti kudɔ. ²⁶ Ɔmɛni ɔsu ni, Yesu ɔmɛni ndi ɔkpane unengudi ɔni kani ndubɔbla lɛla lɛni na bɔɔwia ute-bu. Na use kedee, na lɛla lɛdi lɛɛɛda-nwu. Use sɛɛn na Katɔti údie-nwu ɔ́lɛku alaekpidi bablane akɔ, na ɔ́kɔliku-nwu útése sɛsɛɛ na katɔ kakaaka ƒui. ²⁷ Na uuuse aani bakpane benengudi babambadi bammɔ kalɛ bani nálɛ ka bataabla akpala na ama ku bekyuli bakladi lili taasia kama limeyi ndi limeyi. Mmomu kunwi kɔni na anwu úti lɛlɔ ɔ́kpa na bekyuli ƒui lili ni, ɔ́kpa kunwi pɛ kɔmmɔ kani na ɔ́sa. ²⁸ Ɔsika ni, ɔda bubo bɔmmɔ bɔɔƒuna bakpane bani naaakana bunye kpakplaa ama alati. Nsu linyese lɛni nébo na ɔda bubo bɔmmɔ kama ni, bɔ́ƒuna Ubi ɔmmɔ na ɔ́ya na ɔ́wɔlɔ nwuna kabla úte uwi ƒui.

¹ Lɛla lɛni geen na bɔɔyɔ́ budie bɔtina na litemi lɛmɛni kemo ndi ka ni, bubo ɔkpane unengudi ɔmɛni ɔni nlie kesii kani náƒɔ kuye na Katɔti lɛgaboku kudɔ na katɔ. ² Na ɔɔbla Katɔti kabla na kakpakɔ kedee kani ndi kakpakɔ geen kani na Katɔti ɔlati úti nwuna enu ɔ́bla. Na ɔɔɔdi bekyuli nábla-ka. ³ Báƒuna ɔkpane unengudi biala ka uti ala ani na béte ku ani na badubuti bakpa ƒui ɔkpa ute Katɔti. Na lɛni kani na ɔlɛka ɔkpane ɔmɛni lɛnɔ uti lɛla lɛdi ɔkpa ute Katɔti. ⁴ Na si nka kalɔ lɛlɔ mɛni na ɔkya ni, nka ulabla ɔkpane kabla kulaa. Ɔsika bakpane bakya bani mɔɔbla akpala kalɛ na ɔda bubo bɔni ntɛ nse bɔɔtina. ⁵ Baabla kabla na bana kakpakɔ kani nálɛ kani geen nkya katɔ. Ɔmmɔ geen ɔsu na Katɔti úbo Mose ɔda uwi ɔni na ɔ́su-nwu ɔnii ɔtu bana kakpakɔ. Na ɔ́su-nwu ɔnini, “Nu kaduɛ na atu kakpakɔ kammɔ na kamanku ulu ɔni na lɛ́tina-a na kɔbi lili mmɔ lɛlɔ.” ⁶ Nsu kabla kani na Katɔti úti ɔ́kya Yesu enu kemo ni, káƒɔ kuye ketulo bana ɔdi ƒui. Lɛni na bunyimi bɔwɔdi bɔni kenye na Yesu unye ni, bɔ́ƒɔ kuye butulo bunyimi bɔkukudi bɔmmɔ ƒui. Ɔsika bése bunyimi bɔmɛni bése na linyese lɛni ndia ntulo lɛlɔ. ⁷ Si lɛla lɛdi nétebie na bunyimi bɔkukudi lɛlɔ ni, na nka ɔ́sɔ útamanku na ulu biala lɛlɔ ka basɔ bete-bu bunyimi bɔwɔdi bɔbambadi bɔdi. ⁸ Nsu Katɔti ɔ́nu ka bekyuli báƒiɔ, na ɔ́su ɔnini, “Ami Unwoti mɔɔsu ka ni, uwi ɔdubo ɔni na ndubo lɛla lɛwɔdi bunyimiku Israel kadi bekyuli ku Yuda kadi bekyuli. ⁹ Na ulése aani kalɛ na línyimiku bana bati kuuku na uwi ɔni na lɛ́da-ma kɔnu kɔnu na lɛ́tɔnku-ma lɛ́lɛku Egyipte kalɔ lɛlɔ. Ɔsika bátadi lɛla lɛni na línyimiku-ma lɛlɔ. Anwuɔsu línwini kama lɛ́kya-ma. ¹⁰ Bunyimi bɔni na ndubo bunyimiku Israel kadi bekyuli uwi ɔni ndubo kemo ndi ɔmɛni. Ndubuti mina ɔda bubo lɛkya-ma kasusu kemo. Na ndubunweni-mu lɛkya-ma kayi kemo. Ndubɔbla bana Katɔti na ama lɛnɔ babla mina bekyuli. ¹¹ Na ɔ́si ɔƒɛni ni, ukyuli ɔdi ɔsɔ ulatina ɔkpanadi iye ɔnwani ka ɔti Blɔti. Ɔsika bana ƒui badubo-mi bɔti ɔ́si ubliidi ƒui útálɛ unengudi lɛlɔ. ¹² Na ndubuti bana alaekpidi ani ƒui bábla lɛkyiɛ-ma. Na nsɔ lɛɛɛdubo bana ekpidi bunyimo kudii.” ¹³ Na ka Katɔti ɔ́su ɔnii ɔdubuse bunyimi bɔwɔdi ni, na budeedi bɔ́bla bɔkukudi. Na lɛla lɛkukudi lɛni néetu uwi ni, lɛdubo bɔyii uwi klukui kemo.

¹ Bunyimi budeedi bɔmmɔ ni, bɔdanku ulu ɔni beeti taakpa ku kesii kani na baakpá na kalɔ lɛlɔ mɛni. ² Bátu kakpakɔ kani na béle ɔtɔ ku katɔma. Na ɔtɔ udeedi kemo ni, ligyii lɛni lɛlɔ na baatu asogya taasia lɛlɛ. Na ala kasiakɔ kani lɛlɔ na bodobodo ɔni na béti bákpa bete Katɔti ɔsia lɛnɔ use. Mmɔ baalɔ banii kakpakɔ kedee. ³ Na kakpakɔ kammɔ katɔma kesii kani na béti kayakun kɔdi báda ni, mmɔ baalɔ banii ɔtɔ ɔni nse kedee ntulo ƒui. ⁴ Mmɔ na sika ugyiedi lɛbi lɛni lɛlɔ na baakyula oloƒui lɛlɛ ku sika ugyiedi adaka ɔni kemo na Katɔti bunyimi bɔkya. Na adaka ɔmɛni kemo ni, atabi kɔlɛkɛ kɔni lɛlɔ bénweni bunyimi bɔmmɔ basia kɔkya. Na Aaron ugyii ɔdadi ɔni nédie evete lɛnɔ ɔkya-nwu kemo ku sika ugyiedi lɛkyami lɛdi. Na nina kemo ni, Katɔti adila ani baalɔ mana akya. ⁵ Na adaka ɔmmɔ katɔ ni, bávɔ Katɔti batu badi udu mbo avwi na baalɔ-ma Kerubim bényene. Na ama mɔɔtina ka Katɔti ɔkya mmɔ. Na bana avwi ebi likpo lɛni na beeti bekyuli ekpidi taakyiɛ mmɔ. Nsu bulakana kɔtɛ kɔmmɔ kemo buduo busie ɔgyu ɔƒɛni tɔ. ⁶ Lɛni na bábla ala amɛni bése mmɔ. Na bakpane béteeduo ɔtɔ udeedi kemo mɛni buduo buduo taatábla bana bakpane kabla. ⁷ Na katɔma kammɔ kemo aka ni, ɔkpane unengudi kani néteeduo mmɔ kunwi na lɛkwa kemo. Na ntu úti ebuo ɔni na béeti bákpa ubugya ɔ́da na weti wakpa na anwu ɔlati ku bekyuli ekpidi ani bátati asa na bábla lili. ⁸ Katɔti Kɔyu kɔkɛnku ɔmmɔ lɛlɔ kɔɔtina-bu nwaa ɔ́si uwi ɔmmɔ ka ulu ɔni lɛlɔ na bɔdubɔsia buduo Katɔti katɔma geen kammɔ kemo ni, útedie-nwu tɔ keyi uwi ɔni na kakpakɔ kedeedi kammɔ kamua kenye. ⁹ Mmomu ɔmmɔ ɔdi lɛla lɛni mɔɔtina ka etela ku akpala ani ƒui na bada baabla akpala ammɔ ni, elédie bɔƒiɔ na ukyuli ɔni mɔɔbla akpala ammɔ lɛlɔ. ¹⁰ Ɔsika ala ammɔ ƒui adanku bɔdi ku bɔni ku lɛlɔ bɔƒɔ ɔdi na lilu bun bun lɛlɔ. Na adi ɔlɔna lɛlɔ ɔda bubo bɔni ndubɔbla kabla ɔƒɛni wetédu ka ulu ɔwɔdi ɔmmɔ úbo. ¹¹ Uwi ɔni na Kristo úbo aani ɔkpane unengudi kalɛ úte ala abuni ani náada alɛ ni, ɔ́vi úduo kakpakɔ kani náƒɔ kuye na kadia ketulo ƒui kemo. Na ɔɔɔdi ukyuli enu na béti bátu-ka. Na bɔkana budie kalɔ bɔnii ɔɔɔkɛnku kalɛ na bédie kayawi kamɛni lɛlɔ ala kalɛ. ¹² Na ɔɔɔdanku bese iye bakɔ bebi ubugya útetéduo mmɔ. Mmomu anwu ɔlati ubugya na úti útéduo likpo lɛni nse kedee ntulo ƒui mmɔ kunwi pɛ kani, na ɔ́ƒɔ-bu lili kayu úte uwi ƒui. ¹³ Bekyuli bani nábla ala ani náya na beesé lɛlɔ na ɔdi ala bɔbla kenye ni, baakana na beeti bese ku bakɔ ubugya ku bebuo bamɛni ntɔ teewi-ma lɛlɔ na bana lɛlɔ lɛɛsɔ taabla sɛɛn ute ɔdi ala bɔbla. ¹⁴ Na si ɔbladu ɔmɛni ɔɔyá na ukyuli ɔɔbla sɛɛn ni, na Kristo ubugya ɔɔkana na ɔɔbla ukyuli sɛɛn teetulo. Ɔkɛnku Katɔti Kɔyu kɔni nli uwi ƒui lɛlɔ ni, Kristo úti lɛlɔ ɔ́bla akpala ani nédu áwɔlɔ úte Katɔti na lɛla lɛdi lítebie-mu lɛlɔ. Nwuna ubugya ɔdubɔbla bina kayi sɛɛn bɔsiku ɔdi bɔbla bɔni nsɔ neeebo kɔsia ƒui kudɔ kalɛ na bɔbla Katɔti ɔni nli kabla. ¹⁵ Ɔmɛni ɔsu na Kristo ndi ukyuli ɔni nnye bunyimi bɔwɔdi bɔmɛni kenye kalɛ na bekyuli bani na Katɔti ɔ́lɔ ka babla anwu badi ni, bana kɔnu kutuku linyese lɛni ndi ngba bɔni nsɔ naaadubo bɔsa kudii. Ɔmɛni uubo teete lɛni, ɔsika Kristo kukpi ɔsu na Katɔti uuti ekpidi ani na bekyuli bábla na bunyimi bɔkukudi kemo taakyiɛ-ma. ¹⁶ Si bédie ɔku ɔni mɔɔtina kalɛ na beele ukyuli ɔdi ala keyi ni, ɔlɛka batina ka ukyuli ɔni nénweni ɔku ɔmmɔ úukpi. ¹⁷ Ɔsika ɔku ɔmɛni uuubo tɔ ɔyikun ɔdi si ukyuli ɔni nénweni-nwu mmɔ ɔmua uli ngba. Amu ntu nwuna kukpi kama kani asa na ɔku ɔmmɔ wabla kabla. ¹⁸ Ɔmmɔ ɔsu ni, asa na bunyimi bɔkukudi bɔbala ukyuli ni, ubugya néwi kalɔ. ¹⁹ Kudeedi ni, Mose úbo ɔda ute bekyuli na ala ani mɔɔbala na ɔda bubo bɔmmɔ kenye. Ɔmmɔ kama ni, úti bese ku bakɔ ubugya ɔ́salaku ntu na úti ɔ́kuna ubugya ɔmmɔ úwi ɔda bubo ɔku ɔmmɔ lɛlɔ ku bekyuli bammɔ ƒui lɛlɔ. Na úti unwu ugyiedi únyimi evete ani baalɔ bani hisope na úti ɔ́bla ɔdi ɔmmɔ. ²⁰ Na ɔ́su ɔnini, “Ɔmɛni ndi ubugya ɔni na Katɔti úti úse nwuna bunyimi bɔmɛni likpo. Na ɔ́su-mii ka bɛdi-mu lɛlɔ.” ²¹ Lɛni kani Mose ɔ́kuna ubugya úwi kakpakɔ kammɔ ku ala ani na beeti taabla lɛkpa lɛmmɔ ƒui. ²² Geen ni, ɔda bubo bɔmmɔ bɔɔtina na bɔkana na bɔsu bɔnii ala ƒui aabla sɛɛn ɔkɛnku ubugya lɛlɔ. Na ɔkɛnku ubugya kalɔ buwi kemo na Katɔti uuti bula ekpidi taakyiɛ-bu. ²³ Ɔ́manku úte ka ekposela ani baabla na kalɔ lɛlɔ mɛni na katɔ adi udu kenye ni, babla-nya sɛɛn ku akpala amɛni udu. Nsu katɔ adi alati anya ni, ɔlɛka beti akpala ani ndia ntulo ammɔ babla-nya sɛɛn. ²⁴ Ɔsika ɔɔɔdi kakpakɔ kani na bekyuli bayawine béti enu bábla básiaku katɔ ɔdi kenye kemo na Kristo úduo. Mmomu Katɔ Ɔga Ɔma geen kadi kemo na úduo ɔkya ɔƒɛni na Katɔti anumi na bula lili. ²⁵ Na uléti lɛlɔ taakpa lɛkwa ndi lɛkwa aani kalɛ na ɔkpane unengudi uuduo kesii kani nse kedee ntulo ƒui mmɔ ku ubugya ɔni naaadi anwu ɔlati ɔdi kalɛ. ²⁶ Si lɛni na use ni, ɔlɛka nka Yesu ɔsɔ ubebo abi ɔsia kama kɔlɛ kɔlɛ ɔ́si kayawi kalɔ kesekɔ ƒui. Nsu kalɛ na use ni, kunwi pɛ kani na úbo kayawi kamɛni kemo úbedie-bu na ekpidi ƒui kemo ku nwuna ubugya ɔni na úti ɔ́kpa na bula lili. Na ɔdanku uwi ƒui utédu kayawi kawɔlɔkɔ. ²⁷ Katɔti ɔ́lɛ ugyii úse ka ukyuli ukpi kunwi pɛ kani, na ɔmmɔ kama na ɔtɛku-nwu litemi. ²⁸ Lɛni kani na Kristo lɛnɔ úti lɛlɔ ɔ́kpa kunwi pɛ kani na údie bekyuli pii na bana ekpidi kemo. Na ɔdubɔsɔ ubo kunyɔdi. Na ɔɔɔdi ɔni na ɔsɔ ubebo abi na ekpidi ɔsu. Mmomu kalɛ na uti ngba bɔƒɔ uboku bekyuli bani na benye bagya-nwu.

¹ Ɔda bubo ndi ekposela úte ala abuni ani ndubo. Na ɔɔɔdi ɔda bubo bɔmmɔ ndanku ala abuni ammɔ alati geen tɔ. Ɔmɛni ɔsu ni, akpala ani nkɛnku ɔda bubo bɔmɛni ani na baabla lɛkwa ndi lɛkwa ni, alakana bekyuli bani mɔɔwia ka bakpa Katɔti bɔbla sɛɛn bɔwɔlɔ. ² Na si bɔkana na akpala ammɔ adubɔkana-ma bɔbla sɛɛn bɔwɔlɔ ni, nka báada bɔkpa báya na bana kayi kasɔ kaladu-ma kɔtɔ kɔdi. ³ Nsu ni, akpala ammɔ geen mɔɔyá na beenyimo bana ekpidi lɛkwa ndi lɛkwa. ⁴ Ɔsika bese ku bakɔ ubugya ulakana ekpidi bɔƒɔ budie ukyuli lɛlɔ. ⁵ Ɔmmɔ ɔsu na asa na Kristo webo kayawi kamɛni lɛlɔ ni, ɔ́su ɔnini, “Ati, ani na béti babakpa bete-ɔ ni, aláda-a kubiti. Mmomu ɔlɔna ɔni na éti éte-mi ka liti lɛkpa lite-ɔ mɔɔda-a kubiti. ⁶ Na akpala ani na bákyula ku ekpidi lili buvele akpala aláda-a kubiti. ⁷ Mmɔ na lɛ́su nnini, ’Ati, aanu-mi. Líbo nnii mbabla ƒula lɛƒɔyɔ aani kalɛ na bénweni básiku-mi lɛlɔ na Bunweni Kedee Ɔku kemo.’ ” ⁸ Kudeedi ni, ɔ́su ɔnini, “Ala ani na béti béboku na bábla akpala ku ani na béti bákyula ku ala ekpidi lili buvele akpala ni, átada-a kubiti. Na útayɔ-ɔ kaƒɔ lɛnɔ,” ina ka ɔda bubo bɔmmɔ nátina ka babla lɛni. ⁹ Mmɔ na ɔ́su ɔnini, “Aanu-mi. Líbo nnii mbabla ƒula lɛƒɔyɔ.” Katɔti údie akpala edeedi úse kɔmadɔ. Na úse Kristo ɔdi na ana kenye. ¹⁰ Na Katɔti ɔ́bla-bu kedee na nwuna bɔyɔ kenye ɔkɛnku kalɛ na Yesu Kristo úti nwuna ɔlɔna ɔ́kpa úte-nwu kunwi pɛ kani úte uwi ƒui ɔsu. ¹¹ Limeyi ndi limeyi ni, Yudani ɔkpane biala uunye taabla nwuna ɔkpane kabla kani ndanku bɔkpa ulu ɔmmɔ lɛlɔ. Ɔɔbla akpala ammɔ udu kani limeyi ndi limeyi ani naaadubo bɔkana na udie likpidi na ukyuli lɛlɔ kudii. ¹² Nsu uwi ɔni na Kristo anwu úbo úbeti lɛlɔ ɔ́kpa kunwi úte bekyuli ƒui ekpidi lili ɔni ndanku utédu kayawi kawɔlɔkɔ ni, ɔ́yu úlie Katɔti kɔdianu kesii kani náƒɔ kuye. ¹³ Na ɔ́si uwi ɔmmɔ kemo ni, Kristo unye ɔgya uwi ɔni na Katɔti ɔdubuti nwuna bekisine ɔkya-nwu lɛgba kalɔ. ¹⁴ Ɔsika ɔkɛnku kunwi kɔni na úti lɛlɔ ɔ́kpa mmɔ ɔsu ni, ɔ́wɔlɔ nwuna kabla úte bekyuli uwi ƒui kalɛ na babla kedee. ¹⁵ Katɔti Kɔyu ɔlati údie ɔmɛni ɔ́tina-bu nwaa ɔnini, ¹⁶ “Bunyimi bɔni na ami Katɔti mɔɔsu ka ndubo bunyimiku-ma na uwi ɔni ndubo kemo ndi ɔmɛni. Ndubuti mina ɔda bubo lɛkya-ma kayi kemo. Na ndubunweni-mu lɛsia-ma kasusu lɛlɔ.” ¹⁷ Na ɔ́sɔ ɔ́su ɔnini, “Nsɔ lɛɛɛdubo bana ekpidi ku bana likyulikpi bunyimo.” ¹⁸ Na ka Katɔti úti ala amɛni ɔ́kyiɛ ni, ala ekpidi lili buvele akpala adi asɔ eeebo. ¹⁹ Ɔmɛni ɔsu ni, banwa, ulu ɔtɛ ute-bu ka bɔkana na buduo katɔma kani nse kedee ntulo ƒui mmɔ kemo ɔkɛnku Yesu ubugya lɛlɔ. ²⁰ Ɔsika úti nwuna ɔlɔna úte na bula lili na ɔ́lɛmi ngba bɔni naaadubo bɔsa ulu ɔwɔdi úte-bu. Ɔ́bla ɔmɛni kalɛ na bɔkana bɔvi kayakun kɔdi kɔni nnye nte nwuna ɔlɔna, na bɔda bɔlɛ Katɔti anumi. ²¹ Na ka bubo ɔkpane unengudi na Katɔti kakpakɔ kani na katɔ mmɔ ɔsu ni, ²² bɛya na bɔni bude Katɔti ku kayi kani naaatɔlɔ-bu na bɔda bɔƒɔtaadi bɔmmɔ kpakplaa. Yesu ɔ́kuna nwuna ubugya ɔmmɔ úwi-bu lɛlɔ kalɛ na bula kayi kaládu-bu kɔtɔ. Na úti ntu bɔni nse sɛɛn ɔ́ƒɔ-bu lɛlɔ ƒui. ²³ Na bɛya na bunye bɔƒɔtaadi bɔni kenye na buudie lɛlɔ kpakplaa. Ɔsika ukyuli ɔni nése-bu kenye kammɔ ni, ɔɔbla ala ulu lɛlɔ. ²⁴ Na butaabu taanu ulu ɔni lɛlɔ na bɔdubɔkana na bɔkya lɛlɔ ogya, na butaayɔ bekyuli, na butaabla ala abuni. ²⁵ Bitaya na bɔda bɔsa bɔya aani kalɛ na badi badaku lɛlɔ bɔda teedie. Mmomu bɛya na bɔkya lɛlɔ ogya, na bɔbla lɛni butulo na uwi ɔni kemo na limeyi linengudi lɛmmɔ lɛdaku bɔni teede geen mɛni kemo. ²⁶ Nsu si bɔgyi ƒui na búti bɔ́sia lɛlɔ na bɔɔbla ala ekpidi na uwi ɔni na bédie litemi geen lɛmmɔ ala bátina-bu ni, na likpidi buti taakyiɛ akpala adi asɔ eeebo na babla lɛnɔ. ²⁷ Mmomu ɔlɛka bunye butaanu ulu ku liƒu ka badubɔtɛku-bu litemi. Ɔsika ogya bonwu ɔni muubile ala ubakyula Katɔti bekisine ƒui. ²⁸ Ukyuli biala ɔni néni Mose ɔda bubo na nkyuli inyɔ iye ɛtɛ bédie kenye ka use lɛni ni, bekyuli baadú ukyuli ɔmmɔ ɔni na balánu-nwu kɔnyana. ²⁹ Bekyuli bani manu Kristo ubugya aani lɛla lɛni neeese kedee ni, bɔgyi ka Katɔti ɔdubo-ma kɔtu bɔni geen! Ɔsika beedumi Katɔti Kɔyu kɔni mɔɔbla-bu lɛƒɔndia na baanu Katɔti Ubidi aani ɔɔɔdi lɛla lɛdi. Nsu ubugya ɔmmɔ na Katɔti úti ɔ́ƒɔ ekpidi údie-ma lɛlɔ, na ubugya ɔmmɔ kani na úti úse bunyimi bɔmmɔ likpo. ³⁰ Ɔsika bɔgyi anwu ɔni násu ɔnini, “Ami ndubudie ukyuli likpidi lɛni na ɔ́bla kasi na lɛƒɔ-nwu kayu na nwuna kayu kenye.” Anwu kani násɔ ɔ́su ɔnini, “Ami Katɔti ndubɔtɛku mina bekyuli litemi.” ³¹ Liƒu lɛla bonwu lɛdi si Katɔti ɔni nli ngba uwi ƒui ɔ́da-a na kɔnyi kemo. ³² Binyimo uwi ɔni na bɛ́nu Katɔti bukeye na bínwini nwuna badi ku bukpoku bɔni kemo na bɛ́sia bɛ́lɛ. ³³ Uwi ɔdi ni, beedumi-mii na beekpóku-mii na kadi anumi. Na uwi bamba kemo lɛnɔ ni, bɛɛnu kalɛ na baabla bekyuli bamba lɛnɔ aani kalɛ na bábla-mii. ³⁴ Biiwuloku bani na batɛ aban ɔtɔ kɔnyana. Na bɛɛkɛ́ kayi ƒaa si ina béƒie-mii ala báƒɔ, ɔsika bɛgyi ka bibo akɛla ani ndia ntulo ammɔ na elébie kudii. ³⁵ Anwuɔsu bitaya na enu áƒɛ-mii na kalɛ na biisé kayi kemo. Ɔsika bɛdubɔkɛ lɛyuƒɔla bonwu geen. ³⁶ Ɔdi ka binye kpakplaa kalɛ na si bɛ́bla lɛla lɛni mɔɔyɔ́ Katɔti kaƒɔ bɛ́wɔlɔ ni, na bina kɔnu kutuku linyese lɛmmɔ. ³⁷ Ɔsika Bunweni Kedee Ɔku ɔ́su ɔnini, “Kébu blii na ukyuli ɔni ndubo mmɔ ɔda ɔlɛ ɔni na ɔsɔ uletu uwi. ³⁸ Mina bekyuli bani nse siin ni, badubulie na bɔƒɔtaadi kemo. Nsu bani menwini kama makya-mi ni, lɛlɔ liláyɔ-mi na bana lɛlɔ.” ³⁹ Nsu abu ni, bɔɔɔdi bekyuli bani muunwíni bula bɔƒɔtaadi kama na bɔyii udu. Mmomu bɔ́ƒɔ bɔ́di, na Katɔti ɔ́ƒɔ-bu.

¹ Si ebo bɔƒɔtaadi ni, ɔɔtina ka ebo lɛnunsia kpakplaa na ala adi lɛlɔ. Na agyi geen ka adubɔkɛ ala adi ina ka alánu-nya. ² Ɔkɛnku bɔƒɔtaadi lɛlɔ na bekyuli bani nákya kuuku ni, Katɔti úmwi-ma ka badi bekyuli babuni. ³ Ɔkɛnku bɔƒɔtaadi lɛlɔ na búnu kalɔ ka Katɔti úti nwuna kenye litemi údie kayawi ƒui. Na lɛla lɛni na bula anumi aakana bɔnu mɛni ni, Katɔti údie-nya ɔ́siku lɛla lɛni na bulákana bɔnu kemo. ⁴ Ɔkɛnku bɔƒɔtaadi lɛlɔ na Abel úti akpala ani ndia ntulo Kain akpala ɔ́kpa úte Katɔti. Na ɔkɛnku nwuna bɔƒɔtaadi lɛlɔ ɔsu na Katɔti úmwi-nwu na ɔ́nu-nwu ka ɔdi ukyuli ɔni nse siin. Ɔsika nwuna akpala áyɔ Katɔti kaƒɔ. Ina ka Abel úkpi ni, ɔkɛnku nwuna bɔƒɔtaadi lɛlɔ ɔsu na nwuna ablala amua aatɛmiku-bu. ⁵ Ɔkɛnku Enok bɔƒɔtaadi lɛlɔ na Katɔti útiku-nwu ɔ́tɔlɔku ngba bɔmɛni kemo ɔni na útekpi. Ɔdi biala útanu-nwu kesii kadi, ɔsika Katɔti útiku-nwu ɔ́tɔlɔku. Na asa na ɔdubutiku-nwu ɔtɔlɔku ni, ɔdi ukyuli ɔni na bémwi na Bunweni Kedee Ɔku kemo ka nwuna lɛlɔ lɛ́da Katɔti kubiti. ⁶ Na ukyuli ɔdi lɛlɔ liláda Katɔti kubiti si uuubo bɔƒɔtaadi. Ɔsika ukyuli biala ɔni muubo Katɔti kudɔ ni, ɔdi ka ɔƒɔ ɔdi ka Katɔti ɔkya na ɔɔƒɔ kayu buni teete bekyuli bani mɔɔwia-nwu kama ulu kpakplaa. ⁷ Uwi ɔni na Katɔti ɔ́lɛ Noa kpakplaa na ala ani na útanu tɔ lɛlɔ ni, Noa ɔ́ƒɔ ɔ́di. Anwuɔsu ɔ́nwi ɔkɔlɔ ubendi ɔni kemo na anwu ku nwuna kaduli bekyuli béduo bákɛ bɔƒɔ na bɔyia bɔni na úti úte Katɔti ɔsu. Noa bɔƒɔtaadi bɔmɛni búnwini kɔtɔ bɔdu úte kayawi bekyuli ƒui. Na ka Noa ɔ́ƒɔ Katɔti ɔ́di ɔsu ni, Katɔti ɔ́su ka Noa ɔdi ukyuli ɔni nse siin. ⁸ Ɔkɛnku bɔƒɔtaadi lɛlɔ ɔsu na Abraham únu Katɔti litemi uwi ɔni na Katɔti ɔ́lɔ-nwu ka uteesie kalɔ kani lɛlɔ na Katɔti ɔ́su ka ɔdubuti ute-nwu lɛlɔ. Únu kalɔ na úsie ina ka ɔɔɔgyi likpo lɛni na úsela. ⁹ Ɔkɛnku bɔƒɔtaadi lɛlɔ na úlie kalɔ kani na Katɔti ɔ́su ka ɔdubute-nwu mmɔ kemo. Na ɔ́kya mmɔ aani ɔƒɔ na kalɔ kammɔ lɛlɔ. Kevo lɛtɔ kemo kani na ɔ́kya. Na lɛni kani na Isak ku Yakob lɛnɔ bebelie. Ama lɛnɔ badi Katɔti ala badine aani anwu Abraham kalɛ úte ala ani na Katɔti ɔ́su úse. ¹⁰ Ɔsika Abraham unye ɔɔnu ulu ute ɔma unengudi ɔni na Katɔti ɔ́da na use uwi ƒui. ¹¹ Ɔkɛnku bɔƒɔtaadi lɛlɔ ɔsu na ina ka Abraham ɔ́ɔbi ɔ́vili na Sara ɔlati muedi ɔ́vi kɔwɔ ni, Katɔti ɔ́ya na úbenwini ubi ɔti. Ɔsika Abraham ɔgyi ka Katɔti ɔni násu lɛla lɛmɛni úse ni, ɔɔdi nwuna etemila lɛlɔ. ¹² Ɔmɛni ɔsu ina ka use aani si kaƒiɔtɔ kɔtu na unye muedi ni, údie kaba kani mmomo aani kayaa ayabi. Na bemomo aani ɛpu kɔnwinimi kɔni na balakana bɔka. ¹³ Bekyuli bamɛni ƒui ni, bélie ngba ku bɔƒɔtaadi útédu uwi ɔni na békpi. Ala ani kenye na Katɔti ɔ́su-ma úse ni, étetuku-ma kɔnu. Nsu ni, bánu-nya ɔ́gyu kakaaka na bégyingya enu bése ka baƒɔ linyese lɛmmɔ. Na básu nwaa ka badi baƒɔ na kalɔ kamɛni lɛlɔ. ¹⁴ Na bekyuli bani mɔɔsu ala amɛni ni, baatina ka baanu ulu teete ama alati bana kalɔ. ¹⁵ Na si kalɔ kani lɛlɔ na bátɔlɔ lɛlɔ kasusu na beeti ni, nka bákɛ ulu ɔni na basɔ benwini besie mmɔ. ¹⁶ Mmomu ni, baanu ulu teete kalɔ kani ndia ntulo kammɔ. Na aka ndi Katɔ Ɔga Ɔma kadi. Ɔmmɔ ɔsu ulekpo Katɔti lɛnɔ kɔƒa ka balɔ-nwu banii bana Katɔti. Ɔsika ɔ́ɔda ɔma unengudi ɔdi úse-ma. ¹⁷ Ɔkɛnku Abraham bɔƒɔtaadi lɛlɔ ɔsu na uwi ɔni na Katɔti ɔ́kɔku-nwu ɔ́nu ni, na Abraham únu kalɔ ka uti ubidi Isak ɔkpa ute-nwu. Na Abraham, ɔni na Katɔti úse kenye kamɛni úse ni, anwu nénu kalɔ ka uti ubidi unwi ɔni kani na ubo mɛni ɔkpa ute Katɔti. ¹⁸ Ɔ́bla lɛni ina ka ɔkɛnku ubidi Isak ɔmmɔ lɛlɔ na Katɔti ɔ́su ɔnini, “Ɔkɛnku Isak lɛlɔ na adubudie kaba aani kalɛ na lɛ́su-ɔ líse.” ¹⁹ Abraham kasusu klukui ndi ka Katɔti ɔɔkana na ɔɔgyila bekpine na baasɔ teebelie ngba. Na sɔsɔ ni, bɔkana bɔsu ka bɔƒɔ na Katɔti ɔ́ƒɔ Isak ɔ́siku kekpine na úbo uli ngba. ²⁰ Ɔkɛnku bɔƒɔtaadi lɛlɔ na Isak úte Yakob ku Esau ku bana bawɔ ƒui kusɛ kusɛ. ²¹ Ɔkɛnku bɔƒɔtaadi lɛlɔ ni, uwi ɔni na Yakob ɔ́ɔbi na ɔ́bu ɔƒa nwuna ugyii ɔdadi lɛlɔ na ɔɔyɔ́ ukpi ni, úte Yoseƒ bebi ɔdi biala kusɛ kusɛ, na úmwi Katɔti. ²² Ɔkɛnku bɔƒɔtaadi lɛlɔ na uwi ɔni na Yoseƒ ɔ́nu ka ɔdubo bukpi ni, ɔ́su kalɛ na Israelƒuɔ badubo bɔtɔlɔ Egyipte kalɔ lɛlɔ. Na ɔ́tina kalɛ na babla nwuna ekubi ani ndubuwi kaƒiɔtɔ kemo uwi ɔmmɔ. ²³ Ɔkɛnku bɔƒɔtaadi lɛlɔ ɔsu na Mose bawɔne béti-nwu bábla abuli atɛ ɔni na báwɔ-nwu. Ɔsika bánu-nwu báti ka ɔɔɔdi ubi keeke na ɔdi na báwɔ. Na bátayia ɔda ɔni na kalɔ kammɔ ɔga úbo bawɔne ƒui lɛnɔ. ²⁴ Ɔkɛnku bɔƒɔtaadi lɛlɔ ɔsu na Mose úni ɔnii batalɔ-nwu banii Ɔga Ƒarao ulekubi ubidi uwi ɔni na ɔ́lɛ lili. ²⁵ Únu kalɔ ka babla anwu lɛnɔ kalala aani nwuna badi bani ndi Katɔti bekyuli utulo ɔni na wasiaku ala ekpidi bablane kama na ɔkɛ ebiti uwi klukui ɔdi kemo. ²⁶ Ɔ́nu ka si bákya-nwu kɔƒa na Ukyuli Ɔƒunadi ɔni lɛlɔ na nwuna anu asia lɛlɔ ni, ɔ́ƒɔ-nwu kuye utulo ka ɔsiaku Egyipteƒuɔ akɛla kama. Ɔsika unye ɔɔnu ulu ute lɛyuƒɔla lɛni na Katɔti ɔdubute-nwu. ²⁷ Na ɔkɛnku bɔƒɔtaadi bɔmmɔ ɔsu na ɔ́tɔlɔ Egyipte ɔni na útayia kɔnyi kɔni na ɔga ɔmmɔ wakɛ. Na únye kpakplaa aani si bɔnu na ɔ́ɔnu Katɔti ɔni na bula anumi alákana bɔnu tɔ. ²⁸ Ɔkɛnku bɔƒɔtaadi lɛlɔ na ɔ́bla Kukpi Lili Bɔvia ɔdi ku ubugya ɔni na ɔ́kuna úwi kayakun biala. Na ɔkɛnku ɔmmɔ lɛlɔ ni, Katɔti ɔtu ɔni nébo úbadu ubi ɔnanabi udeedi biala na Egyipte mmɔ ni, útetuku Israel bebi ama. ²⁹ Ɔkɛnku bɔƒɔtaadi lɛlɔ na Israel bekyuli bakɛ kalɔ kakwidi lɛlɔ bávia Ɛpugyie. Nsu Egyipteƒuɔ ama ni, ɛpu ɔmmɔ úti-ma ɔni na baavia-ka. ³⁰ Ɔkɛnku bɔƒɔtaadi lɛlɔ ɔsu na awodu bonwu ani na bátu bámana Yeriko ɔma ɔmmɔ áƒɛ ewi kalɔ ɔni na Israelƒuɔ bésie báka bámana-nya lɛlɔ emeyi maatɛ. ³¹ Ɔkɛnku bɔƒɔtaadi lɛlɔ ɔsu na bátadu Rahab ɔni ndi ɔyalɛ mmɔ aani kalɛ na bádu bakladi bani nátaƒɔ Katɔti bátadi. Ɔsika Rahab úgyingya enu na ɔ́ƒɔ Israelƒuɔ batu bani nésie baatú kalɔ mmɔ. ³² Bi lɛnɔ na nsɔ nsu-mii? Uwi uuubo ka lɛtɛmi lɛsiku Gideon ku Barak ku Samson ku Yeƒta ku Dawid ku Samuel ku Katɔti kenye bediene lɛlɔ. ³³ Ɔkɛnku bɔƒɔtaadi lɛlɔ ni, bana badi békpo na bádi lɛga kadikɔ lɛlɔ. Na badi báya na bekyuli baabla ala ulu lɛlɔ. Na badi kɔnu kútuku Katɔti linyese lɛmmɔ. Na badi bákalɛ bagyata inye. ³⁴ Na badi benine lɛgyavonku bonwu lɛni mɔɔkywí teebile ala. Na badi bálɛ bekyuli bani mɔɔwia-ma badu ku kuwii enu kemo. Na ina ka bekyuli bamɛni ƒui beeebo ɔyikun ɔdi ni, Katɔti ɔ́ya na bénwini bayikune! Na bénwini bekpone bani mbo ɔyikun geen na bádi kadi bamba bekpone ƒui lɛlɔ. ³⁵ Na beleku bani na bana bebi békpi ni, bana bebi bammɔ básɔ báta. Na babambadi ni, bátatuna ka bekyuli besusu-ma na kalala kemo na bekpi. Ɔsika bátatuna ka balɛ bana Katɔti kama na bakɛ bɔnwuna na bekyuli bammɔ kemo. Mmomu básu banii badubɔkɛ ngba bɔwɔdi bɔni ndia ntulo bɔmmɔ. ³⁶ Bekyuli béwi badi anumi kalɔ na bébo-ma. Na badi lɛnɔ ni, bébo-ma kɔgba na bákya-ma aban ɔtɔ. ³⁷ Bébo badi atabi na bábwɛ badi lɛnɔ kemo inyɔ. Na bádu badi ku kewii. Na badi béteenyimi baƒonu ku bese lɛku taavi, ɔsika beeebo lɛla lɛdi. Na bekyuli bábla-ma kalala, na bébo abi geen! ³⁸ Bátakɛ keliekɔ na bekyuli bayawine akɔ. Na bakɛ baaví ketele kemo ku abi akɔ na bélie atakpɛ ku kalɔ libu kemo. Nsu bekyuli bamɛni badia betulo kayawi bekyuli. ³⁹ Ɔkɛnku bɔƒɔtaadi lɛlɔ ɔsu na Katɔti ɔ́lɔ bekyuli bamɛni ƒui anyi buni. Nsu ɔmɛni ƒui kama ni, bana akɔ kɔnu kútetuku linyese lɛmmɔ. ⁴⁰ Katɔti nábla ɔmɛni úse lɛni ka benye bagya-bu útédu ka abu ku-ma ƒui bɔ́kɛ lɛla lɛni na ɔ́su úse ka lɛdia litulo na mɛni na ɔbla bula ƒui ngba bɔƒɔ kabla ɔwɔlɔ.

¹ Anwuɔsu ka bubo bekyuli pii bamɛni udu bani muudie bɔƒɔtaadi bɔmɛni kenye ni, bɛya buti ala ani muutile-bu kuƒi mmɔ ku ekpidi ani mɔɔbala-bu uwi pii bɔvaakun. Na bukeli usi ɔni ntɛ-bu anumi ku lɛnungyie. ² Na bɛya na butaanu Yesu lɛti pɛ anumi. Anwu ntɔnku-bu na anwu kani ndubɔya na bula bɔƒɔtaadi bɔbla bɔƒɔtaadi geen bɔwɔlɔ. Ka ɔgyi lɛlɔyɔ lɛni na Katɔti ɔdubɔya na ɔkɛ ɔsu ni, ɔ́kya ɔkplu na úbo abi na ugyii lɛlɔ. Na útakpete edumi ku kɔƒa kɔni bákya-nwu. Na ɔmmɔ kama ni, útélie lɛgaboku lɛlɔ na Katɔti kɔdianu kesii kani náƒɔ kuye ketulo. ³ Bɛtɛya Yesu ɔni nákya ɔkplu na úbo abi na ala ekpidi bablane bamɛni enu kemo, kalɛ na enu alaƒɛ-mii na binwini kama. ⁴ Lɛlɔ lɛni na biikpóku kalɛ na bɛdi likpidi lɛlɔ ni, útedu tɔ kalɛ na bina ubugya uwi kalɔ. ⁵ Munuu bɛ́ɛyiƒla Katɔti etemila ani na ɔ́su-mii úti ɔ́kya-mii ogya aani bebi kalɛ? Ɔ́su ɔnini, “Mina ubi, teti Katɔti kɔtu bɔni tabla lɛla keeke. Na enu ataƒɛ-ɔ si ɔɔdɔnku-ɔ. ⁶ Ɔsika bekyuli bani na Katɔti ɔɔyɔ́ ni, ama na ɔɔlɛ kpakplaa. Na bani lɛnɔ na ɔɔƒɔ́ ka badi anwu badi ni, ama na ɔɔní kɔtu.” ⁷ Binye lɛbibo biala kenye aani kɔtu bɔni bɔni na ubi ɔti uute ubi. Na ɔmɛni ɔɔtina ka Katɔti mɔɔní-mii kɔtu lɛni aani nwuna bebi. Ɔsika ubi ɔti ɔdi uuubo ɔni na ulani ubidi kɔtu. ⁸ Si balani-ɔ kɔtu aani kalɛ na bɔgyi ka baaní ɔdi biala kɔtu ni, na ɔgbami na báwɔ-ɔ básiku na aaadi kaduli kammɔ kemo ubi. ⁹ Ɔmɛni kama bubo bati bani náwɔ-bu na kalɔ kamɛni lɛlɔ na baaní-bu kɔtu na bɔɔbu-ma lɛnɔ na ɔmɛni ɔsu. Anwuɔsu ɔlɛka buboku lɛlɔ kalɔ bute Katɔti ɔni ndi bula kɔyu kemo Ɔti kalɛ na bulie ngba. ¹⁰ Bula bati bani na bubo mɛni baaní-bu kɔtu uwi klukui ɔdi kemo kani kalɛ na bánu ka ɔ́manku-bu. Nsu Katɔti ɔɔní-bu kɔtu kalɛ na ɔdia ute-bu na abu lɛnɔ bɔbla kedee aani kalɛ na use. ¹¹ Kɔtu bɔni biala buláyu ukyuli emini na uwi ɔmmɔ kemo. Mmomu bɔɔyu ɔlɛ. Nsu ɔmmɔ kama ni, bani na báni-ma kɔtu lɛni ni, baabla ala abuni na ulu siin lɛlɔ, na baakɛ́ keyi buɛɛ. ¹² Ɔmɛni ɔsu ni, bina akɔnkɔ ku enu ani mɔɔtɔ́-mii ni, bɛya na ɔyikun ɔwɔdi uduo-ni kemo. ¹³ Bɛbwɛ na bina kɔvinkɔ ƒui na kɔdia bɔvi kalɛ na bani neeebo ɔlɔkplu ni, balakpa balaƒɛ belewi kalɔ, mmomu basia-mii kama na bakɛ ɔlɔkplu bawɔlɔ. ¹⁴ Bɛsia ulu biala lɛlɔ na keyi buɛɛ kakya amii ku bekyuli ƒui ntɛ na bɛbla kedee. Ɔsika ɔdi biala ulakana na wanu Katɔti si uuuse kedee. ¹⁵ Bɛnu kaduɛ kalɛ na ɔdi ulayii Katɔti lɛƒɔndia ulu ɔmmɔ, kalɛ na ulénwini ligyukwi likpidi ulakya bakladi akɔ na weboku ɔgbankpi na webile bekyuli pii. ¹⁶ Bɛnu kaduɛ kalɛ na lɛyalɛ ala elebile ɔdi kasusu iye ɔsɔ ulayia Katɔti aani kalɛ na Esau útayia ɔsu na úti nwuna linengu kadikɔ úye ɔ́vumanaku adila bɔdi kunwi pɛ. ¹⁷ Na ɔmmɔ kama aani kalɛ na bɛgyi ni, uwi ɔni na ɔɔwia ka ɔti use-nwu kama ku kusɛ kusɛ ni, úni-nwu. Na Esau ɔ́sɔ útakana lɛla lɛni na ɔ́bla bɔvumana ina ka ɔ́wia kusɛ kusɛ ɔmmɔ ku keku. ¹⁸ Amii biiise aani Israelƒuɔ bani nébenye lɛla lɛni na bakana bɔnu bɔti iye betuku kudɔ ɔni ndi Sinai kɔbi kɔni mɔɔda ku ogya bonwu na lɛdisa ku kesii kani nse suu na ɔƒɛƒɛɛ kpakplaa kemo. ¹⁹ Bítenu tɔ kakpɛɛ kani náku momoomo iye lɛdi lɛni etemila na bani nénu bévele ka basɔ baláwia belénu lɛnɔ. ²⁰ Ɔsika balákana ala ani na ɔ́su-ma lɛlɔ bɔdi ɔni na ɔ́su-ma ɔnini, “Si ina ebuo ɔdi nétuku kɔbi kɔmmɔ ni, ɔdi ka bebo-nwu atabi badu.” ²¹ Lɛla lɛni báanu mmɔ lɛdi liƒu lɛla libendi lɛni náya na Mose ɔ́su ɔnini, “Liƒu lítulo-mi, na lɛlɔ lɛɛtɔ́-mi!” ²² Biiise aani Israelƒuɔ bammɔ. Mmomu amii ni, Sion kɔbi kudɔ na bíbo bínye ɔni ndi Katɔ Ɔga Ɔma Yerusalem ɔni ndi Katɔti ɔni nli ngba uwi ƒui ɔma unengudi. Katɔti batu mpimu mpimu kasala bani na lɛlɔyɔ lɛ́ƒɔ-ma kemo na bíbo bíbasiaku. ²³ Na bíbo bíbasiaku Katɔti bekyuli bani nse aani nwuna bebi bedeedi bani anyi na bénweni bése katɔ. Katɔti ɔni ndubɔtɛku bayawine ƒui litemi anumi na bíbo bínye na bekyuli babuni bani nékpi na Katɔti ɔ́bla bana ayu sɛɛn ɔ́wɔlɔ akɔ. ²⁴ Na bíbo bíbasiaku Yesu ɔni ndi bunyimi bɔwɔdi bɔmɛni kenye unyene. Na ɔ́kuna nwuna ubugya ɔni mɔɔsu etemila ani mbo ɔyikun etulo Abel ɔdi úwi-mii lɛlɔ. ²⁵ Bɛnu kaduɛ na biléni anwu ɔni mɔɔtɛmiku-mii. Ɔsika si bekyuli bani nénu anwu ɔni nálɛ-ma kpakplaa na kayawi kamɛni lɛlɔ batakana na bekeli bana kɔtu bɔni ni, bɛti ka ulése abu lɛnɔ buɛɛ uletulo ama si búni anwu ɔni nási katɔ úbalɛ-bu. ²⁶ Uwi ɔmmɔ kemo ni, nwuna lɛdi lɛkunku kayawi. Nsu ɔƒɛni ni, ɔ́su-bu úse ɔnini, “Nsɔ ndubo kayawi kammɔ bɔkunku kunwi. Na ɔɔɔdi aka lɛti, mmomu ku katɔ lɛnɔ.” ²⁷ Etemila ani na ɔ́su ɔnii, “Nsɔ ndubo bɔkunku kunwi” ni, ɔɔtina ka Katɔti ɔdubɔda ala ani na údie na aakunku mmɔ budie ana kenyekɔ. Na ani na balákana bɔkunku asɔ akya. ²⁸ Anwuɔsu ka lɛga kadikɔ kani kemo na bɔdubuduo kalákunku ɔsu ni, bɛya na bɔgya Katɔti enu na bumwi-nwu na ulu ɔni námanku lɛlɔ ku ɔbu ku bɔyia. ²⁹ Ɔsika bula Katɔti use aani ogya ɔni mɔɔkyula ala.

¹ Bitaayɔ lɛlɔ uwi biala kemo aani banwa kalɛ. ² Na bitayiƒla baƒɔ bɔƒɔ, ɔsika badi báƒɔ Katɔti batu na béduo-ma kudɔ ɔni na baaagyi. ³ Na binyimo bani lɛnɔ ntɛ aban ɔtɔ aani si amii lɛnɔ na bákya ɔtɔ ku-ma ku bekyuli bani na baabla-ma kalala aani si amii muubó abi. ⁴ Ɔgya ku ule ngba bulie ni, ɔdi ka bite-mu ɔbu geen. Na ɔdi utalɛ ɔkpanadi kama. Ɔsika Katɔti ɔdubɔtɛku ukyuli ɔni mɔɔdi kɔsɔnɔ litemi ku bani na lɛyalɛ ala áƒɔ-ma lɛlɔ kemo. ⁵ Anumi asɔ etegyie-mii na egulabi lɛlɔ. Mmomu bɛya na lɛla lɛni bibo limo-mii. Ɔsika Katɔti ɔ́su ɔnini, “Lɛɛɛdubo-mii bɔnyonu kudii, na neeedie-mii atu lɛnɔ kudii.” ⁶ Anwuɔsu bɔɔsu ku kayi ƒui bɔnini, “Blɔti ndi mina ubunkune, anwuɔsu lɛɛɛdubo bɔyia. Bi na ukyuli ɔdubɔkana-mi bɔbla?” ⁷ Binyimo bina batɔnkune bani násu-mii Katɔti litemi. Na bɛbu bɛnu kɔsia kɔni na bákɛ na ulu ɔni na béti bélie ngba kemo. Na bɛnu bana bɔƒɔtaadi bɛtɛya. ⁸ Yesu Kristo ulávumana. Kalɛ kani na úse uwi ɔni návi kemo ni, lɛni kani na use ɔƒɛni ku uwi ɔni mebo ƒui lɛnɔ kemo. ⁹ Bitaƒɔ lɛla bamba lɛni na ukyuli ɔdi watina-mii bitadi. Katɔti lɛƒɔndia mɔɔyá na bɛɛkya kayi ɔkplu, na ɔɔɔdi ɔda bubo bɔni ndanku adila bɔdi kama bɔsia. Bekyuli bani mɔɔsia ala ammɔ kama ni, balakɛ kɔsia kɔdi. ¹⁰ Abu ni, bubo lɛkpabi lɛni lɛlɔ ala na ama bani mɔɔkpá na Yudaƒuɔ kakpakɔ kammɔ kemo beeebo kuƒi ka badi. ¹¹ Mmɔ na ɔkpane unengudi uuti bebuo ubugya teeduoku kesii kani nse kedee ntulo ƒui mmɔ. Na uusié mmɔ taatákpa teevele ala na bekyuli ekpidi lili. Nsu baakyula bebuo bammɔ na kabanye. ¹² Lɛni kani na Kristo lɛnɔ úbo abi na ɔma kabanye kalɛ na ɔbla nwuna badi kedee ɔkɛnku nwuna ubugya lɛlɔ. ¹³ Anwuɔsu ni, bɛya na busie butásiaku-nwu na kabanye mmɔ na bakya-bu kɔƒa kɔni bákya anwu lɛnɔ. ¹⁴ Ɔsika na kayawi mɛni ni, buuubo ɔma ɔni ndubuse buteesie uwi ƒui. Mmomu bunye bɔɔnu ulu teete ɔma ɔni mebo. ¹⁵ Anwuɔsu ni, bɛya na bɔsia Kristo lɛlɔ na buteeti linugya akpala teete Katɔti. Na akpala ammɔ ndi kalɛ na buubó nwuna lɛnyi kedee kudu ku bula kenye. ¹⁶ Na bitayiƒla ka bɛbla lɛbuni bite lɛlɔ, na bite lɛlɔ ala. Ɔsika akpala ammɔ udu mɔɔda Katɔti kubiti. ¹⁷ Binu bina batɔnkune litemi na biboku lɛlɔ kalɔ bite-ma na badi-mii lɛlɔ. Ama mɔɔnu-mii lɛlɔ aani bekyuli bani na ɔlɛka babu akunta bete Katɔti. Bɛbu-ma kalɛ na bana kabla kenwini lɛlɔyɔ na ulabla-ma etila. Ɔsika ɔmmɔ ulete-mii kenyekɔ kabuni kadi. ¹⁸ Bɛkpali katɔ na bula lili. Bɔgyi nwaa ka bula kayi kaladu-bu kɔtɔ kɔdi. Na bɔɔyɔ́ ka butaabla lɛla lɛni ndia uwi biala. ¹⁹ Na ɔni ntulo ndi ka muuvele-mii geen nnii bɛkpali katɔ na mina lili, kalɛ na Katɔti ɔya na lɛsɔ libo-mii kudɔ pla. ²⁰ Na muuvele keyi buɛɛ Katɔti ɔni nkɛnku bunyimi bɔwɔdi bɔni nse úsela ƒui ɔsu na ɔ́gyila Yesu Kristo ɔni ndi baƒonu ɔdane buni ɔ́lɛku bekpine akɔ nnii ²¹ ute-mii ala abuni ani ƒui na bɛkana biti bɛbla nwuna lɛyɔla. Na muuvele-nwu nnii ɔbla lɛla lɛni na ɔɔyɔ́ na bula lɛlɔ kemo ɔkɛnku Yesu Kristo ɔni námanku úte bumwi uwi ƒui lɛlɔ. Ɔsia lɛni. ²² Banwa, muuvele-mii geen nnii binu-mi ala ani na mɔɔsu-mii ku ogya ɔni mɔɔkya-mii. Ɔsika ɔku klukui ɔdi kani na línweni-mii. ²³ Mɔɔyɔ́ ka lɛya bɛti ka bányonu bula ɔnwa Timoteo na aban ɔtɔ. Na si úyile mɛni búbeduo ni, ami ku-nwu bɔdubo bubanu-mii. ²⁴ Bigyele bina batɔnkune ƒui bite-bu ku Katɔti bekyuli bammɔ ƒui. Banwa bani nkya Italia ƒui beegyele-mii. ²⁵ Katɔti lɛƒɔndia lɛsiaku bina ƒui.