GALATIƑUƆ

GALATIƑUƆ

¹ Ami Paulo ɔni ndi Kristo ɔtalane ni, mina bɔlɔ bútasi bekyuli kudɔ iye ɔɔɔdi ukyuli ɔdi náƒuna-mi. Mmomu mina bɔlɔ bɔ́si Yesu Kristo ku Katɔti ɔni nágyila Yesu ɔmmɔ ɔ́lɛku bekpine akɔ kudɔ. ² Ami ɔmmɔ nénweni ɔku ɔmɛni na ami ku mina banwa bani nkya mɛni buugyele amii Katɔti baƒɔtaadine bani ƒui nkya Galatia. ³ Na buuvele bɔnii Katɔti ku Blɔti Yesu Kristo lɛƒɔndia ku keyi buɛɛ kasiaku-mii. ⁴ Kristo ɔmmɔ néti lɛlɔ ɔ́kpa na bula lili kalɛ na udie-bu ɔlɛku bula ekpidi kemo na ɔƒɔ-bu ɔlɛku uwi ukpidi ɔni kemo na ekpidi bɔbla bɔ́ƒɔ kayawi kemo mɛni. Na ɔ́ƒɔ-bu lɛni ɔkɛnku Katɔti ɔni ndi bula Ɔti lɛƒɔyɔ lɛlɔ. ⁵ Anwuɔsu bɛya na bumwi Katɔti ɔ́si ɔƒɛni úsela uwi ƒui! Ɔsia lɛni. ⁶ Bina lɛlɔ lɛ́bla-mi kalɛ kadi geen, ɔsika ńtaƒɔ ńtadi nnii bɛdubɔlɛ Katɔti ɔni nálɔ-mii ɔkɛnku Kristo Yesu kaƒɔ buni kani na ɔ́bla-mii kama na bɛsiaku litemi bamba kama. ⁷ Sɔsɔ na ɔdi ka litemi buni bamba lɛdi liiibo. Nsu mɔɔsu ɔmɛni ɔsika bekyuli badi bakya beeƒú-mii kasusu, na baayɔ́ ka bavumana Kristo litemi buni lɛmmɔ. ⁸ Na mɔɔsu-mii nnii si abu iye kayaa na ɔtu ɔdi ɔ́si úbo úbasu-mii litemi lɛbambadi lɛdi na lɛɛɛdi litemi buni lɛni na bɔ́su-mii mmɔ ni, Katɔti ɔyila-nwu udu ƒui. ⁹ Bɔ́ɔsu-mii búbavi na lɛni kani na nsɔ mɔɔsu-mii ɔƒɛni lɛnɔ ka ni, si ukyuli ɔdi ɔɔsu-mii litemi lɛdi na lɛɛɛdi litemi buni lɛni bínu na bɛ́ƒɔ-ni bɛ́di mmɔ ni, Katɔti ɔyila ukyuli ɔmmɔ udu ƒui kede kede. ¹⁰ Na kabla kani na mɔɔbla mɛni ni, bɛɛkali bɛnii bekyuli bumwi na mɔɔwia? Munuu Katɔti bumwi na mɔɔwia? Munuu mɔɔbla-ka kalɛ na kaƒɔ kayɔ bekyuli? Na si bekyuli lɛyɔla kabla na mɔɔbla ni, nka lɛɛɛdi Kristo kabla ɔblane. ¹¹ Banwa, mɔɔyɔ́ ka lɛsu-mii ka ni, litemi lɛni mɔɔsu mɛni ni, lítasi ukyuli ɔdi kudɔ. ¹² Na ɔɔɔdi ukyuli ɔdi kudɔ lɛnɔ na lɛ́ƒɔ-ni lɛ́siku iye ɔdi nátina-mi lɛla lɛmmɔ lɛnɔ. Mmomu Yesu Kristo ɔlati nédie nwuna ablala etemila ammɔ ɔ́tina-mi. ¹³ Ɔsika bínu ngba bɔni na lílie lɛ́vi uwi ɔni nsiaku Yudaƒuɔ bɔkpa ulu kama kpakplaa ku kalɛ na líti lɛnungyie kemo líkpoku Katɔti baƒɔtaadine akpa ammɔ, na lɛ́yɔ ka lɛyila-nya udu muedi. ¹⁴ Na anumi égyie-mi étulo mina ligyekpa na ntɔ-ma na Yudaƒuɔ bɔkpa ulu ɔmmɔ kemo. Na mina bati kuuku ɔdi kama kani na mina kasusu kasia kpakplaa ka lɛbla. ¹⁵ - ¹⁶ Nsu na Katɔti kɔnyana bɔnu ɔsu ni, ɔ́ƒuna-mi úte nwuna kabla asa na badubɔwɔ-mi. Ka uwi údu-nwu ni, údie Ubidi ɔmmɔ ɔ́tina-mi kalɛ na lɛkana na lɛkɔ-nwu lɛlɔ lɛsa na amii bani naaadi Yudaƒuɔ akɔ. Na ńtatádiku ɔdi kasusu na ɔmɛni lɛlɔ, ¹⁷ iye lisie Yerusalem ntánu bani ndi batalane asa Katɔti úbaƒuna-mi. Mmomu lɛ́tɔlɔ lísie Arabia kɔnakunwi. Kama asa na línwini líbo Damasko. ¹⁸ Na akwa atɛ kama asa na lísie Yerusalem ńtánu Petro, na lílie-nwu kudɔ emeyi leevu-alɔ. ¹⁹ Ɔmmɔ kama lɛ́sɔ ńtanu ɔtalane ɔdi lɛnɔ, amu ntu Yakobo ɔni ndi Blɔti ɔnwani kani. ²⁰ Na sɔsɔ ni, litemi geen na muunweni-mii mɛni, na Katɔti ɔlati ɔgyi ka naaanyi ɔkɔ. ²¹ Ɔmmɔ kama lɛnɔ ni, lísie Siria ku Kilikia. ²² Uwi ɔmmɔ kemo ni, baƒɔtaadine akpa ani nkya Yudea kalɔ lɛlɔ na Kristo kemo bátanu-mi anumi kudii tɔ. ²³ Na lɛla lɛni kani na bénu na mina lɛlɔ ndi ka, “Ukyuli ɔni na nka ɔ́kya úteekpoku-bu mmɔ ni, ɔƒɛni amu ɔkya ɔɔkɔ́ bɔƒɔtaadi bɔni na ɔ́yɔ ka nka ubile mmɔ lɛsa.” ²⁴ Anwuɔsu beemwi Katɔti ɔkɛnku ami ɔsu.

¹ Na akwa leevu-ene kama ni, lɛ́sɔ línwini lísie Yerusalem ku Barnaba. Na líti Tito lɛ́da. ² Lísie mmɔ ɔsika Katɔti nédie ɔ́tina-mi. Na lídie ala kalɔ lɛ́tina-ma ɔkɛnku litemi buni lɛni lɛ́sa na lɛ́kɔ líte bani naaadi Yudaƒuɔ mmɔ lɛlɔ. Nsu ami ku batɔnkune bani ntɔnku baƒɔtaadine akpa ammɔ lɛti nása. Ɔsika naaayɔ nnii ɔkɛnku batɔnkune bammɔ ɔsu na mina kabla kani mɔɔbla mɛni iye kani na lɛ́bla lɛ́vi kabla keeke. ³ Tito ɔni na líti nda ni, ina ka ɔdi Grikini ni, ukyuli ɔdi útenye-nwu lɛlɔ ka ukulo lego. ⁴ Nsu ɔkɔ banyine bani néti lɛlɔ bénwini banwa badi béyu béduo-bu akɔ, na bábɛ baatú-bu kalɛ na bati bɔnwuna bɔni na bubo na Kristo Yesu kemo na baya na bɔsɔ bunwini kabla bablane bute Yudaƒuɔ ɔdi ala bɔbla. ⁵ Nsu abu lɛnɔ bútete-ma kuƒi kɔdi munu munu kalɛ na litemi geen lɛmmɔ lɛkana-mii akɔ bɔkya ɔsu. ⁶ Na bekyuli bani na bɛɛnu ka ama badi batɔnkune ni, ina ka ami naaanu-ma kavumana kadi ina bi na badi ɔsika Katɔti ulánu ukyuli anumi asa na ɔɔtɛku-nwu litemi ni, ama lɛnɔ béteti lɛla lɛdi bétebunku mina litemi lɛni na mɔɔsu ka mbasu-mii. ⁷ Mmomu bánu báti ka Katɔti néti kabla kamɛni ɔ́kya-mi enu kemo ka lɛkɔ litemi buni lɛmmɔ lɛsa lite bani naaadi Yudaƒuɔ, aani kalɛ na úti ɔ́kya Petro enu kemo na ɔkɔ litemi buni lɛmmɔ lɛsa ute Yudaƒuɔ. ⁸ Na ɔkɛnku Katɔti ɔyikun lɛlɔ na ndi ɔtalane nte bani naaadi Yudaƒuɔ, aani kalɛ Petro lɛnɔ ɔdi ɔtalane ute Yudaƒuɔ. ⁹ Na ka Yakobo ku Petro ku Yohane bani nnye baƒɔtaadine lɛkpa lɛmmɔ kenye geen aani batɔnkune kalɛ bánu Katɔti kabla kani na úti ɔ́kya-mi enu kemo mɛni báti ni, bégyingya enu na báƒɔ ami ku Barnaba. Na bénu kalɔ ka abu buteesie butásu litemi buni lɛmmɔ bute bani naaadi Yudaƒuɔ, na ama lɛnɔ bataasu-ni teete Yudaƒuɔ. ¹⁰ Na lɛla lɛni básu-bu ndi ka bunyimo na butaanu bawabane kɔnyana. Na ɔmɛni ndi lɛla lɛni na lɛ́sia anu na mɔɔbla geen. ¹¹ Uwi ɔni na Petro úbo Antiokia ni, lɛ́ta línye-nwu lɛlɔ, ɔsika ɔ́bla lɛla lɛni naaadia. ¹² Ɔsika asa na bekyuli bani na Yakobo ɔ́tala bɔdububo bebeduo ni, Petro ku banwa bani naaadi Yudaƒuɔ básala baadi. Nsu uwi ɔni kani na ɔ́nu batalane bamɛni ni, ɔ́da bɔdi ɔ́ya na ɔ́ta-ma kudɔ. Ɔsika ɔɔyia kasusu kani na bekyuli bani nékulo ago na badi Yudaƒuɔ mmɔ badubuti bɔsiku-nwu lɛlɔ ɔsu. ¹³ Anwuɔsu ka Yudaƒuɔ banwa bani nkya mɔɔdiku-ma lɛnɔ bánu lɛla lɛni na Petro ɔ́bla mmɔ ni, ama lɛnɔ básiaku nwuna anumi lɛlɔ ɔbladu ɔmmɔ kama. Na Barnaba muedi ɔ́bla lɛni kani. ¹⁴ Amu ka lɛ́nu lɛ́ti ka baaakɛ litemi geen lɛmmɔ ulu lɛlɔ ɔsu ni, lɛ́su Petro na bekyuli bammɔ ƒui anumi nnii, “Yudani na adi, nsu eelie aani ukyuli ɔni naaadi Yudani, na ɔɔɔdi aani kalɛ na Yudaƒuɔ beelie kalɛ. Anwuɔsu dɛ na ɔbla asa na éti ƒula ɔbladu eenye bekyuli bani naaadi Yudaƒuɔ lɛlɔ ka basia Yudaƒuɔ ɔdi bɔbla kama? ¹⁵ “Abu bani na báwɔ-bu na bɔdi Yudaƒuɔ ni, buuuse aani bekyuli bani naaadi Yudaƒuɔ na bɔɔlɔ-ma ala ekpidi bablane. ¹⁶ Nsu bɔgyi ka Katɔti ɔɔsɔku anwu ku ukyuli ntɛ taaklibi ɔkɛnku bɔƒɔtaadi bɔni na ukyuli ubo na Yesu Kristo lɛlɔ kani ɔsu. Na ɔɔɔdi ɔda bubo bɔkukudi bɔmmɔ lɛlɔ bɔdi ɔsu. Abu lɛnɔ bɔ́ƒɔ Kristo Yesu bɔ́di ɔsu na Katɔti ɔ́klibi abu ku-nwu ntɛ ɔkɛnku bula bɔƒɔtaadi na Kristo kemo ɔsu. Na ɔɔɔdi ɔni na bɔɔdi ɔda bubo bɔkukudi bɔmmɔ lɛlɔ ɔsu. Ɔsika Katɔti útaklibi anwu ku ukyuli ɔdi ntɛ na ɔda bubo bɔkukudi bɔmmɔ lɛlɔ bɔdi ɔsu. ¹⁷ “Bɔɔwia ka Katɔti ɔklibi abu ku-nwu ntɛ ɔkɛnku Kristo lɛlɔ. Nsu si ɔni na bɔɔbla lɛni badi baanu-bu aani ala ekpidi bablane ka bulábu ɔda bubo bɔmmɔ lɛlɔ ɔsu ni, ɔɔtina ka Kristo mɔɔkya likpidi bɔbla ogya? Oowo, kudii! ¹⁸ Si nka ami ɔlati lɛ́sɔku lɛla lɛni na lɛ́bwɛ mmɔ udu mɔɔtú ni, nka ɔdubɔtina ka lɛ́ta línye ɔda bubo bɔmmɔ lɛlɔ aani ala ekpidi ɔblane sɔsɔ. ¹⁹ Mmomu nse aani ukyuli ɔni nélie ngba ɔkɛnku ɔda bubo bɔkukudi bɔmmɔ lɛlɔ na úkpi ɔsu ɔda bubo bɔmmɔ lɛnɔ búkpi kalɛ na lilie ngba lite Katɔti. ²⁰ Ami ku Kristo na bákana bámana ugyii lɛlɔ. Ɔsɔ ɔɔɔdi ami nli ngba, mmomu Kristo nli ngba na mina kemo. Na ngba bɔni na nli ɔƒɛni ni, nli-mu ɔkɛnku ɔyikun ɔni na lɛ́kɛ ka lɛ́ƒɔ Katɔti Ubidi ɔmmɔ lɛ́di ɔsu. Anwu néti nwuna ngba ɔ́kpa na mina lili, ɔsika ɔɔyɔ́-mi. ²¹ Lɛɛɛdubo Katɔti kɔnyana kɔni na ɔɔnu bekyuli kama bɔlɛ kudii. Ɔsika si ɔda bubo bɔkukudi bɔmmɔ lɛlɔ na Katɔti ɔɔsɔku anwu ku ukyuli ntɛ taaklibi ni, na Kristo úkpi keeke.”

¹ Amii Galatiƒuɔ alati bilákali ɔmɛni bilanu! Ɔma néƒie-mii kasusu úbo likpo lɛni? Ɔsika bina anumi na lɛ́su-mii Kristo kukpi na ugyii lɛlɔ litemi. ² Bɛya na liye-mii ɔmɛni linu. Katɔti Kɔyu kɔni na úte-mii mmɔ ni, ɔkɛnku ɔda bubo bɔni lɛlɔ na bɛɛdi ɔsu munuu ɔkɛnku litemi lɛni na bínu na bɛ́ƒɔ bɛ́di ɔsu? ³ Bi ɔsu na bɛɛbla ala susuusu lɛni? Ka bíse bina ngba bɔmɛni bulie kalɔ ku Katɔti Kɔyu ɔyikun ni, bɛɛyɔ́ ka bɛwɔlɔ ku bayawine ɔyikun? ⁴ Na abi ani na bíbo ni, bɛɛyɔ́ ka abla ukpludi? Nsu nka ɔɔɔdi ukpludi nɔɔ! ⁵ Katɔti Kɔyu kɔni na úte-mii mmɔ ku akɔla lidu lidu ani na ɔ́bla na bina akɔ mmɔ ni, ɔkɛnku kalɛ na bɛɛdi ɔda bubo bɔmmɔ ɔsu na ɔ́bla-nya munuu ka bínu litemi buni lɛmmɔ na bɛ́ƒɔ-ni bɛdi ɔsu? ⁶ Bɛnu Abraham. Bénweni banii, “Ka ɔ́ƒɔ Katɔti ɔ́di ɔsu ni, Katɔti ɔ́bu-nwu aani ukyuli ɔni nse siin.” ⁷ Anwuɔsu bɛnu bɛti ka bekyuli bani mbo bɔƒɔtaadi ni, ama ndi Abraham bebi. ⁸ Na Bunweni Kedee Ɔku kemo básu bése ka ni, Katɔti ɔdubɔklibi anwu ku bani naaadi Yudaƒuɔ ƒui ntɛ ɔkɛnku bana bɔƒɔtaadi na Kristo lɛlɔ ɔsu. Anwuɔsu Katɔti ɔ́su litemi buni lɛmɛni úte Abraham kukuuku ɔnini, “Ndubute kadi ƒui bekyuli kusɛ kusɛ ɔkɛnku awɔ lɛlɔ.” ⁹ Anwuɔsu bani mbo bɔƒɔtaadi ni, Katɔti úte ama ku Abraham ɔni mbo bɔƒɔtaadi ƒui kusɛ kusɛ. ¹⁰ Na bani na ama béti bana anu básia ɔda bubo bɔkukudi bɔmmɔ lɛlɔ ni, ewida asiaku-ma. Ɔsika bénweni bése banii, “Ukyuli biala ɔni naaadubo etemila ani ƒui na bénweni bése na Ɔda Bubo Ɔku kemo lɛlɔ bɔdi ni, ewida adubɔsiaku-nwu kama.” ¹¹ Sɔsɔ na ɔdi ka Katɔti uláklibi anwu ku ɔdi ntɛ ɔkɛnku ɔda bubo lɛlɔ. Ɔsika bénweni banii, “Ukyuli ɔni nse siin ni, ɔɔkɛ́ ngba ɔkɛnku nwuna bɔƒɔtaadi ɔsu.” ¹² Nsu ɔda bubo bɔɔɔdanku bɔƒɔtaadi. Mmomu bénweni banii, “Ukyuli biala mɔɔdi ala amɛni lɛlɔ ni, ana ebi na ɔdubo bude.” ¹³ Na Kristo nébo úbada-bu údie ewida kemo. Na anwu nébenwini ewidala úte-bu. Ɔsika bénweni banii, “Ewida asiaku ukyuli ɔni na badubuti baƒala ugyii lɛlɔ.” ¹⁴ Na Kristo ɔ́bla ɔmɛni kalɛ na kusɛ kusɛ ɔni na Katɔti ɔ́su úse ka wasiaku Abraham mmɔ ɔsiaku bani naaadi Yudaƒuɔ lɛnɔ kama ɔkɛnku Kristo Yesu lɛlɔ. Na ɔkɛnku bɔƒɔtaadi bɔmmɔ lɛlɔ ni, na abu lɛnɔ bɔkɛ Katɔti linyese lɛni ndi nwuna Kɔyu. ¹⁵ Banwa, lɛla lɛni mɔɔsu mɛni ni, bɛya na liti lɛkɔku bula limeyi biala ngba bulie. Si nkyuli inyɔ bénu lɛlɔ kalɔ na lɛla lɛdi lɛlɔ na bényimi-ni lɛlɔ ni, bana kemo ɔdi uuubo kuƒi ka ɔsɔ unweni iye ɔda lɛla lɛdi udie bunyimi bɔmmɔ kemo. Lɛni kani na use na mɛni lɛnɔ. ¹⁶ Linyese lɛni na Katɔti ɔ́su úse mmɔ lise lite Abraham ku ubidi. Na Bunweni Kedee Ɔku ɔmmɔ kemo ni, Katɔti útasu ɔnii, “Abraham ku nwuna bebi.” Si ɔ́su ɔnii, “ku nwuna bebi” ni, na ɔɔtina ka bebi bammɔ bemomo. Mmomu bɔsu na ɔ́su ɔnii ku ubidi. Na ɔmɛni ɔɔtina ka ukyuli unwi pɛ. Na ukyuli ɔmmɔ ndi Kristo. ¹⁷ Lɛla lɛni mɔɔtina ndi ka Katɔti únyimiku Abraham lɛla lɛdi. Na ɔ́su ka wadi bunyimi bɔmmɔ lɛlɔ. Na ɔda bubo bɔni na Katɔti úbete Mose na akwa eti maane ku aavlatɛ kama ni, ulakana na webile Katɔti bunyimi na linyese lɛmmɔ lɛbla kaduɛ. ¹⁸ Na si lɛla lɛni na Katɔti ɔ́su úse ka wete mmɔ lɛkɛnku ɔda bubo lɛlɔ ni, na agyi anii ɔsɔ ɔɔɔdi linyese. Nsu ɔɔɔdi lɛni. Mmomu ɔkɛnku Katɔti ɔlati nwuna lɛƒɔndia ɔsu na úti-ni úte Abraham na nwuna linyese ɔsu. ¹⁹ Na bi na ɔda bubo bɔmmɔ bɔdanku nɔ? Búbebunku na bɔnu likpidi bɔti. Na bɔdubɔkya utédu uwi ɔni na Abraham ubi ɔmmɔ webo. Anwuɔsu na Katɔti úse kenye kammɔ. Katɔti batu béti ɔda bubo bɔmmɔ béboku-bu ɔkɛnku ukyuli unwi ɔni nkya Katɔti ku bekyuli ntɛ. ²⁰ Nsu ka Katɔti ɔlati mɔɔbla lɛla lɛmɛni ɔƒɛni ɔsu ni, utáwia ntɛ ɔkyane ɔbambadi. ²¹ Bɔtina na ɔmɛni ɔda ka ɔda bubo bɔmmɔ bɔ́ta bunye Katɔti linyese lɛmmɔ lɛlɔ? Oowo, kudii! Ɔsika si béti ɔda bubo bɔmmɔ béte ukyuli kalɛ na ɔkɛ ngba ni, na agyi aani ukyuli ɔdubɔbla siin ku Katɔti si ɔ́di ɔda bubo bɔmmɔ lɛlɔ. ²² Nsu Bunweni Kedee Ɔku ɔmmɔ ɔ́su ka kayawi kemodi kénwini kabla ɔblane kéte likpidi. Na kenye kani na Katɔti ɔ́su úse ka wete bekyuli ɔkɛnku bɔƒɔtaadi na Yesu Kristo lɛlɔ kadububo kete bani náƒɔ-nwu bádi. ²³ Asa na bɔƒɔtaadi bɔmmɔ bɔdububo ni, ɔda bubo bɔmmɔ bɔ́bala-bu aani batɔntɛne kalɛ úti útédu ka bédie bɔƒɔtaadi bɔmmɔ keyi. ²⁴ Anwuɔsu ɔda bubo bɔmmɔ mɔɔgyumana-bu kalɛ na ɔtɔnku-bu na bɔnu Kristo, kalɛ na Katɔti ɔklibi abu ku-nwu ntɛ ɔkɛnku Kristo bɔƒɔtaadi bɔmmɔ ɔsu. ²⁵ Na ɔƒɛni ɔni na bɔƒɔtaadi bɔmmɔ búubo ni, ɔɔɔdi ɔda bubo bɔmmɔ nsɔ mɔɔnu-bu lɛlɔ. ²⁶ Ɔkɛnku Kristo bɔƒɔtaadi kemo ɔsu na bina ƒui bɛdi Katɔti bebi. ²⁷ Ɔsika amii bani ƒui náƒɔ ntu bɔkpila ɔdi ɔmmɔ na Kristo kemo ni, bíti Kristo bɛ́kya aani awu kalɛ. ²⁸ Anwuɔsu kavumana kadi kasɔ keeebo Yudani iye Helani iye ukyuli ɔni mɔɔbla ukyuli ɔdi kabla iye ɔni nli nte lɛlɔ iye ɔnana iye uleku ɔdi ntɛ. Ɔsika bina ƒui bɛ́bla ku Kristo Yesu unwi. ²⁹ Anwuɔsu si bɛdi Kristo ɔdi ni, na bɛdi Abraham kaba bebi, na bɛdi Katɔti linyese lɛmmɔ ala badine.

¹ Lɛla lɛni na mɔɔsu ndi ka uwi ɔni na ɔnamu ɔni mɔɔdi ɔti ala ɔmua use blii suɛ ni, ɔnamu ɔmmɔ use aani ukyuli ɔni mɔɔbla ukyuli ɔdi kabla. Ina ka anwu mbo lɛla biala. ² Uwi ɔni na ɔmua ɔdi ɔnamu mɛni ni, ubo bekyuli bani mɔɔnu anwu ku nwuna ala lɛlɔ úti útédu uwi ɔni na ɔti úse úse. ³ Lɛni kani na use abu lɛnɔ uwi ɔni na bɔdi banamu. Na ala ani na baatina na kayawi mɛni nátaadi-bu lɛlɔ. ⁴ Nsu ka uwi ɔni na Katɔti úse mmɔ geen údu ni, ɔ́tala Ubidi ɔ́kya-bu. Na ɔ́ya na uleku ɔdi ɔ́wɔ-nwu ɔ́kya kadi kadi akɔ na bana ɔda bubo bɔdi-nwu lɛlɔ ⁵ kalɛ na ɔda bani nkya ɔda bubo bɔmmɔ kalɔ udie na benwini Katɔti bebi geen. ⁶ Ka bɔdi Katɔti bebi ɔsu ni, ɔ́tala Ubi ɔmmɔ Kɔyu ɔ́kya bula kayi kemo. Na Kɔyu kɔmmɔ mɔɔkpali katɔ taalɔ ɔnini, “Abba” ɔni kalɔ ndi mina Ati. ⁷ Anwuɔsu ni, bɛsɔ bɛɛɛdi bekyuli bani mɔɔbla kabla teete bekyuli badi lɛnɔ. Mmomu bɛdi nwuna bebi. Na ka amii lɛnɔ bɛdi nwuna bebi mɛni ni, Katɔti ɔ́bla-mii nwuna ala badine. ⁸ Uwi ɔni návi kemo ni, na nka bɛɛɛgyi Katɔti. Anwuɔsu ɔyikun ɔni naaadi Katɔti ɔdi nátaadi-mii lɛlɔ. ⁹ Nsu ɔƒɛni ɔni na bɛgyi Katɔti mɛni iye lɛsu nnii Katɔti ɔgyi-mii mɛni ni, bi ɔsu na bɛ́sɔ bíti lɛlɔ biite ɔyikun ɔmmɔ bene udu. Munuu bɛɛyɔ́ ka ɔda bubo bɔdi bɔsɔ butaadi-mii lɛlɔ? ¹⁰ Na bɛ́sɔ bínwini kama bísie bɛɛdi emeyi ku abuli ku uwi ku akwa adi udu lɛlɔ. ¹¹ Liƒu lɛɛda-mi na bina lɛlɔ. Na ɔɔbla-mi aani ka kabla kani na lɛ́bla líte-mii ƒui kadi kabla keeke. ¹² Banwa, muuvele-mii nnii bɛtɛya-mi na bɛlɛ-mi. Ɔsika ami lɛnɔ ukyuli ndi aani bina kalɛ. Na ɔdi útabla-mi likpidi lɛdi. ¹³ Binyimo kudeedi kɔni na lɛ́ka litemi buni lɛmmɔ lɛsa bɔ́kɔ bute-mii mmɔ, ɔsika na lɛlɔ kemo kaaadia-mi. ¹⁴ Ina ka udu ɔni kemo na nkya na mina ɔlɛ ɔsu ɔdi bɔkɔku taanu ute-mii muedi ni, bítanu-mi kalɛ kadi iye bini-mi. Mmomu bɛ́ƒɔ-mi aani kalɛ na bɛdubɔƒɔ Katɔti ɔtu, na bɛ́ƒɔ-mi lɛnɔ aani kalɛ na bɛdubɔƒɔ Kristo Yesu ɔmmɔ ɔlati. ¹⁵ Wɛ na lɛlɔyɔ lɛni náƒɔ-mii lɛlɔ kemo mmɔ ƒui lɛ́vi. Lɛla lɛni lɛlɔ na ami ɔlati muedi lɛkana na lidie-mii kenye ka nka bɛkana bɛkpa bina anumi ani na bɛda bɛɛnu muedi bite-mi. ¹⁶ Munuu línwini-mii ukisine na litemi geen lɛni na lɛ́su-mii ɔsu? ¹⁷ Anumi eegyie bekyuli bani muubo-mii kudɔ ka benwini-mii kasusu basia bana lɛlɔ. Nsu ɔɔɔdi kasusu kabuni na bada. Mmomu kalɛ na bamami-mii bula lɛlɔ na baya bina anumi eteegyie bana lɛlɔ ɔsu kani. ¹⁸ Ɔdia ka ukyuli anumi eteegyie na lɛla lɛbuni lɛlɔ. Na ɔdi ka use lɛni uwi biala, na ɔɔɔdi uwi ɔni na nkya-mii kudɔ kani. ¹⁹ Mina bebi bayɔne, nsɔ muunú-mii lɛlɔ ɔlɛ aani uleku ɔni ntɛ kɔwɔ úti utédu uwi ɔni na manu ka Kristo udu ɔ́ƒɔ-mii lɛlɔ kemo ƒui. ²⁰ Na mɔɔyɔ́ geen ka nka lɛkya-mii kudɔ ɔƒɛni na liboku mina lɛdi kalɔ, ɔsika bina ablala ese-mi kalɛ kadi! ²¹ Mɔɔyɔ́ ka liye amii bani mɔɔyɔ́ ka bɛsɔ bɛkya ɔda bubo bɔmmɔ kalɔ nnii lɛla lɛni na ɔda bubo bɔmmɔ bɔdanku ni, biinú-mu kalɔ geen? ²² Ɔsika ɔda bubo bɔmmɔ bɔɔtina ka ni, Abraham ɔ́wɔ bebi inyɔ. Na ubi udeedi ni, uleku ɔni mɔɔbla-nwu kaduli kabla náwɔ-nwu úte-nwu. Na ubi unyɔdi anwu ni, nwuna kɔduni náwɔ-nwu úte-nwu. ²³ Na ubi ɔni na uleku ɔni mɔɔbla-nwu kaduli kabla ɔ́wɔ ni, báwɔ-nwu na uwi ɔni kemo na ɔnana ku uleku beelie taawɔ kalɛ kani. Nsu ubi unyɔdi ɔni na kɔduni ɔ́wɔ anwu ni, litela na lɛdi lite-ma na Katɔti lɛsuse kenye na uwi ɔni na ɔnana ku uleku basɔ balásia kɔwɔ anu. ²⁴ Ala amɛni adi lɛsugba. Na beleku inyɔ bamɛni benye bete bunyimi bɔkukudi ku bɔwɔdi. Na bebi bani na ɔda bubo búnyimi-ma aani bekyuli bani mɔɔbla bekyuli bamba kabla kalɛ ni, badi Hagar bebi. Na ama nnye nte bunyimi bɔni na Katɔti únyimi ku bekyuli na Sinai kɔbi lili. ²⁵ Hagar ɔni nnye nte Sinai kɔbi na Arabia kalɔ lɛlɔ ni, ɔdi lɛgba lɛni mɔɔtina kalɛ na Yerusalem ɔni nkya ɔƒɛni ku nwuna bebi bakya lɛbibo kemo ɔmwi na bénwini bekyuli bamba kabla bablane. ²⁶ Nsu Yerusalem ɔni nkya katɔ ni, lɛla lɛdi lɛɛɛda-nwu, na anwu ndi kɔduni ɔni ndi bula uni. ²⁷ Ɔsika bénweni bákya Bunweni Kedee Ɔku kemo banii, “Lɛlɔ litaayɔ awɔ udinkɔ. Bo kudu momoomo ku lɛlɔyɔ, awɔ ɔni na kawɔƒɔ kátadu-ɔ kudii. Ɔsika uleku ɔni na ɔgyani údie-nwu atu ni, anwu ndubo bɔwɔ butulo.” ²⁸ Na ɔƒɛni ni, mina banwa, amii bílieku Isak na bɛdi Katɔti bebi ɔkɛnku nwuna linyese lɛlɔ. ²⁹ Na uwi ɔmmɔ kemo ni, ubi ɔni na uleku ɔni mɔɔbla kaduli kabla mmɔ ɔ́wɔ ni, úkpoku ubi ɔni na ɔkɛnku Katɔti Kɔyu ɔyikun lɛlɔ na kɔduni ɔ́wɔ-nwu. Na lɛni kani na ɔɔlɛ́ ɔmwi. ³⁰ Nsu bi na bénweni bákya Bunweni Kedee Ɔku kemo? Bénweni banii, “Bɔku uleku ɔni mɔɔbla kaduli kabla mmɔ ku ubidi na batɔlɔ kaduli mmɔ, ɔsika uleku ɔni mɔɔbla kaduli kabla ubi ku kɔduni ubi balakana bana ɔti ala bule bɔdi.” ³¹ Ɔmɛni ɔsu ni, mina banwa, abu bɔɔɔdi kaduli kabla ɔblane bebi, mmomu kɔduni bebi na bɔdi.

¹ Kristo úte-bu bɔnwuna kalɛ na bɔkɛ bɔnwuna sɔsɔ. Anwuɔsu binye kpakplaa na bɛsɔ bitete kuƒi na ɔdi unye-mii lɛlɔ na bitaabla ukyuli ɔdi kabla lɛnɔ. ² Bise ɔmɛni likpo! Ami Paulo mɔɔsu-mii ka si bíte kuƒi na békulo-mii ago ni, na Kristo ɔsɔ uuubo kɔsia kɔdi uuute-mii. ³ Na nsɔ mɔɔsu-mii nwaa ka si ukyuli ɔdi ɔ́ya na békulo-nwu lego ni, na únyimi lɛlɔ ka ɔdi ɔda bubo bɔkukudi bɔmmɔ ku ala ani na adanku-nwu lɛlɔ ƒui. ⁴ Na amii bani mɔɔkali bɛnii amii ku Katɔti ntɛ bɔdubɔdia ɔkɛnku ɔda bubo bɔmmɔ lɛlɔ bɔdi ɔsu ni, bɛgyi bɛnii bɛ́da lɛlɔ bɛ́mami Kristo lɛlɔ. Na bɛsɔ bilákɛ Katɔti lɛƒɔndia. ⁵ Na abu ni, ɔkɛnku bɔƒɔtaadi ku Katɔti ɔyikun lɛlɔ ni, bɔsia anu kpakplaa ka Katɔti ɔdubɔnu-bu aani bekyuli bani nse siin. Na ɔmɛni na bunye bɔgya. ⁶ Na si bɔ́bla unwi ku Kristo ni, lego bukulo ku tekulo ɔsɔ uuubo kɔsia kɔdi. Lɛla lɛni bɔɔwia ndi bɔƒɔtaadi bɔni mɔɔtina kalɛ na bɔɔyɔ́ lɛlɔ. ⁷ Na nka binye kabla kammɔ lɛlɔ kaduɛ! Na ɔma náya na bɛ́da bɛ́ya, na ɔ́ya na bɛ́da litemi geen lɛmmɔ lɛlɔ bɔdi bɛ́ya? ⁸ Ɔmmɔ udu útasi Katɔti kudɔ. ⁹ Bɔnyii blii suɛ mɔɔyá na ɔlaaƒɔ ɔni bánwu ƒui uuƒu. ¹⁰ Lɛ́ƒɔ lɛ́di na Blɔti lɛnyi kemo ka bɛsɔ bileti kasusu kabambadi. Na ukyuli ɔni muuƒú-mii kasusu mmɔ ni, ɔdubɔkɛ nwuna kɔtu bɔni kalɛ na ɔ́manku-nwu si ina bi ukyuli na ɔdi. ¹¹ Banwa, na mina kakɛ ni, si bɔsu na mmua mɔɔsu bekyuli ka ɔlɛka bekulo ago ni, na nka bi ɔsu na bekyuli beekpóku-mi? Na ɔɔtina ka nka Kristo kukpi na ugyii lɛlɔ lɛsa lɛni mɔɔkɔ́ ni, ɔsɔ ulékpoku Yudaƒuɔ. ¹² Na bekyuli bani muuƒú-mii kasusu mɛni ama ni, ndubɔyɔ ka besie anumi utédu ka bekulo lɛlɔ bedie bina akɔ ƒui. ¹³ Banwa, bɔlɔ na Katɔti ɔ́lɔ-bu ɔnii bɔkɛ bɔnwuna. Nsu utalɛka buti bɔnwuna bɔkɛ bɔmɛni butaabla ala ekpidi. Mmomu ɔlɛka buti-mu buteebunku lɛlɔ na bɔyɔ kemo. ¹⁴ Na ɔda bubo bɔmmɔ ƒui kalɔ budie bɔdanku lɛla linwi pɛ. Na ani ndi ka, “Yɔ ƒula ukyulikpana aani ƒula lɛlɔ kalɛ.” ¹⁵ Nsu si bɛɛtu lɛlɔ akpɛlɛ ka bibile lɛlɔ ni, na bɛti ka lɛkpa lɛmmɔ lɛdubo udu bɔyii ƒui. ¹⁶ Na lɛla lɛni mɔɔsu-mii ndi ka bɛya na Katɔti Kɔyu kɔtɔnku-mii na bina ngba bulie kemo. Na bitaya na bina ɔlɔna ɔkwɛ adala adi-mii lɛlɔ. ¹⁷ Na ala ani na bula ɔlɔna ɔɔyɔ́ ni, aata teenye ala ani na Kɔyu kɔɔyɔ́ lɛlɔ. Lɛni kani na ala ani na Kɔyu lɛnɔ kɔɔyɔ́ aata teenye ala aani na ɔlɔna ɔɔyɔ́ lɛlɔ. Na ɔlɔna ku Kɔyu kɔmɛni badi bekisine bete lɛlɔ. Anwuɔsu bɛsɔ bilakana na bitaabla lɛla biala mɔɔda-mii ɔkwɛ. ¹⁸ Na si Kɔyu kɔ́tɔnku-mii ni, na biiibo ɔda bubo bɔmmɔ kalɔ. ¹⁹ Na ala ani na ɔlɔna ɔɔbla ni, aalɛ́ keyi nwaa na anya ndi lɛyalɛ ku kɔbɔ ala bɔbla ku adɔlɔla bɔbla ²⁰ ku lɛƒiɔkpa ku kabɔ bɔdu ku bekyuli bukisi ku kekpo ku bekyuli bani muukpó kogyulo ku kɔnyi buti ku awɔ lɛti lɛkɛ ku unyeƒi ku lɛlɔ bule akpa akpa ²¹ ku lɛnungyie ku ntɛ bukpi ku adikpi emeyi bɔdi ku ana udu. Na muubó-mii ɔda na ana lɛlɔ aani kalɛ na lɛ́ɛsu-mii ḿbavi ka bekyuli bani mɔɔbla ala ammɔ udu ni, baladi Katɔ Ɔga Ɔma ala! ²² Nsu Kɔyu ablala ani nse aani ebi buni kalɛ ni, anya ndi bɔyɔ ku kubiti ku keyi buɛɛ ku kayi bɔkɛ ku lɛƒɔndia ku lɛbuni bɔbla ku ala bɔbla ulu lɛlɔ ²³ ku lɛlɔ buwi buɛɛ ku lɛlɔ bɔti bɔda. Na ɔda bubo bɔdi bulétile ala amɛni kuƒi. ²⁴ Na bekyuli bani ndi Kristo Yesu badi ni, bákana bana ɔlɔna udu ɔkukudi ɔmmɔ ku nwuna ɔkwɛ adala ekpidi ƒui bámana ugyii lɛlɔ ku Kristo. ²⁵ Na ka ɔkɛnku Kɔyu kɔmmɔ lɛlɔ ɔsu na bulie ngba ni, bɛya na Kɔyu kɔmmɔ kɔtɔnku-bu. ²⁶ Na bitaya na bɔtalaku lɛlɔ katɔ iye butaakya lɛlɔ kɔnyi iye buteekpoku lɛlɔ kogyulo.

¹ Banwa, si ɔdi ɔ́bla likpidi lɛdi ni, amii bani na Katɔti Kɔyu kɔ́ƒɔ-mii lɛlɔ kemo ni, binwini-nwu buɛɛ na ɔda likpidi lɛmmɔ bɔbla ɔya. Nsu bɛnu kaduɛ kalɛ na bina akɔ ɔdi uleduo ɔgbankpi ɔmmɔ udu kemo. ² Bibunku lɛlɔ si ɔdi ɔkya lɛbibo lɛdi kemo. Na si bɛɛbla ɔmɛni ni, na bɛɛdi Kristo ɔda bubo lɛlɔ. ³ Na si ɔdi ɔɔnu lɛlɔ ka ɔdi lɛla lɛdi nsu ɔɔɔdi lɛla biala ni, ukyuli ɔmmɔ ɔɔtɔ́lɔ lɛlɔ. ⁴ Ukyuli biala ɔkɔku nwuna lɛlɔ udu ɔnu. Na si ɔ́nu ɔ́ti ka ɔdia ni, na ɔkana na ɔkun lɛmɛnɛ na nwuna ablala lɛlɔ. Na ɔɔɔdi ɔni na uti lɛlɔ ɔkɔku ukyuli bamba. ⁵ Ɔsika ɔdi ka ukyuli biala uti anwu ɔlati etila. ⁶ Ukyuli ɔni na bátina-nwu bɔƒɔtaadi kemo etemila ni, anwu lɛnɔ ule nwuna akɛla ku ukyuli ɔni mɔɔtina-nwu ala mmɔ. ⁷ Ɔdi utatɔlɔ lɛlɔ, ɔsika ukyuli ɔdi ulakana na wavi Katɔti kekuma. Ɔsika lɛla lɛni na áva ni, ani kani na adubo bude. ⁸ Si aavá ala ani mɔɔda ɔlɔna ɔkwɛ ebi ni, kukpi na adubɔkɛ. Nsu si aavá ala ani mɔɔda Kɔyu ɔkwɛ ebi ni, ngba bɔni nsɔ naaadubo bɔsa kudii na adubɔkɛ. ⁹ Bitaya na enu aƒɛ-bu ku lɛbuni bɔbla. Ɔsika si enu átaƒɛ-bu ni, uwi ɔdubo ɔni na bɔdubɔkɛ edula ani na bɔ́va ebi. ¹⁰ Anwuɔsu uwi biala na kuƒi kɔtɛ-bu ni, bɛya na butaabla lɛbuni teete ukyuli biala. Ɔni ntulo ndi ka bɛbla bite banwa baƒɔtaadine. ¹¹ Amii alati bɛdubɔnu kunweni bonwu kɔni na ami ɔlati líti mina kɔnu línweni mɛni. ¹² Bani nnye-mii lɛlɔ na baayɔ́ ka bikulo ago mmɔ ni, ama ndi bekyuli bani mɔɔkun lɛmɛnɛ na ɔlɔna lɛlɔ. Baabla ɔmɛni kalɛ na bekyuli belékpoku-ma na Kristo kukpi na ugyii lɛlɔ litemi ɔsu. ¹³ Bani muedi nékulo ago mmɔ ni, baládi ɔda bubo bɔmmɔ lɛlɔ. Nsu baayɔ́ ka amii lɛnɔ bikulo ago na bataakun lɛmɛnɛ na bina ɔlɔna bukulo bɔmmɔ lɛlɔ. ¹⁴ Ami ni, mina lɛmɛnɛ lɛni ndubɔkun kani ndi kukpi kɔni na Yesu Kristo úkpi na ugyii lɛlɔ. Na ɔkɛnku nwuna kukpi na ugyii lɛlɔ ɔsu use aani si líkpi na kayawi ala kudɔ aani kalɛ kani na kayawi ala ékpi na mina anumi. ¹⁵ Na ɔɔɔdi lego bukulo iye ago tekulo na bɔɔwia, mmomu lɛla lɛni na bɔɔwia ndi ngba bɔwɔdi bulie. ¹⁶ Na ama bani mɔɔsia ala amɛni anu na bana ngba bulie kemo ni, keyi buɛɛ ku kɔnyana bɔnu kɔsiaku-ma kama, ama ku Katɔti bekyuli ƒui. ¹⁷ Ukplodi ni, nsɔ naaayɔ ka ukyuli ɔdi ɔsɔ ute-mi lɛƒɛda lɛdi. Ɔsika lɛtaala lɛni mma-mi lɛlɔ mɛni ɔɔtina ka ndi Yesu kabla ɔblane. ¹⁸ Banwa, muuvele nnii Blɔti Yesu Kristo lɛƒɔndia lɛsiaku-mii na lɛkya bina kɔyu ɔkplu. Ɔsia lɛni.