KOLOSEƑUƆ

KOLOSEƑUƆ

¹ Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ni, ami ku bula ɔnwa Timoteo muunweni ɔku ɔmɛni. ² Na búti buute amii, bula banwa kedee, bani lɛnɔ náƒɔ Kristo bɛ́di geen na bɛkya Kolose. Buuvele Katɔti bɔnii nwuna lɛƒɔndia ku keyi buɛɛ kasiaku-mii. ³ Uwi biala si bɔɔkpali katɔ ni, bɔɔgyá Katɔti ɔni ndi Blɔti Yesu Kristo Ɔti enu na bina lili. ⁴ Ɔsika búnu kalɛ na bɛda bina bɔƒɔtaadi na Yesu Kristo kemo ku kalɛ na bɛɛyɔ́ bina banwa baƒɔtaadine ƒui. ⁵ Uwi ɔni na básu-mii litemi geen lɛni ndi litemi buni lɛmmɔ kudeedi ni, bínu ala abuni ani nse nte-mii na katɔ. Na ka bɛsia-nya anu ɔsu ni, bina bɔƒɔtaadi ku bina bɔyɔ bunye ala ani bɛsia anu mɛni lɛlɔ. ⁶ Litemi buni lɛmɛni ala abuni amua aalɛ́ku bekyuli na liigyingya na kayawi ekpo ƒui aani kalɛ na ɔ́lɛku-mii uwi ɔni na bínu Katɔti kɔnyana bɔnu litemi geen lɛmmɔ kudeedi, na bɛ́nu bɛ́ti kalɛ na Katɔti ɔɔyɔ́-mii. ⁷ Bula ɔnwa Epaƒra ɔni náƒɔ-bu kuye na anwu lɛnɔ ɔdi kabla ɔblane geen ute Kristo na bula kabla kamɛni kemo nábasu-mii Katɔti kɔnyana bɔnu litemi lɛmmɔ. ⁸ Ɔ́su-bu kalɛ na Katɔti Kɔyu kɔ́ya na bibo bɔyɔ bite bina baƒɔtaadine bakpana. ⁹ Anwuɔsu ɔ́si uwi ɔni na búnu-mii kɔku ni, bútada Katɔti bɔkpali na bina lili bútaya. Na buuvele Katɔti bɔnii ubimi bina kasusu kemo na ɔya na bɛti nwuna lɛyɔla. Na nwuna Kɔyu kute-mii lɛnunda ku ala kalɔ bunu kalɛ na bɛti ala ani na ɔɔyɔ́ ka bɛbla. ¹⁰ Ɔmɛni ndubɔya na bɛti bina lɛlɔ bɔda na bilie ngba bɔni na Blɔti ɔɔwia. Na bina ngba bulie ɔbladu biala ɔbla ɔbuni. Na ɔdubo-mii bubunku na bitaati Katɔti teebu. ¹¹ - ¹² Muuvele-nwu nnii ɔya na nwuna ɔyikun ɔni nási nwuna bukeye kemo ɔƒɔ-mii lɛlɔ kemo ƒui kalɛ na bɛkana bunye kpakplaa na ala ani muukpóku-mii kenye ku kayi buɛɛ. Bɛgya Katɔti enu ku lɛlɔyɔ, ɔsika anwu náya na bínwini ala badine na Katɔ Ɔga Ɔma kesii kani na muukeye. ¹³ Na anwu náda-bu údie ukisine ɔmmɔ enu kemo na kasuudikɔ mmɔ, na úti-bu útákya Ubidi ɔni na ɔɔyɔ́ geen mmɔ lɛga bɔdi kemo. ¹⁴ Na anwu náƒɔ bula ekpidi lili kayu na bɔ́kɛ bula ekpidi buti taakyiɛ. ¹⁵ Kristo ukyuli udu ɔni na bɔɔnu muudie Katɔti ɔni ukyuli udu na bulánu taatina. Na anwu ndi Katɔti Ubi udeedi ɔni mɔɔdi nwuna ala ani na údie ƒui lɛlɔ. ¹⁶ Na ɔkɛnku anwu ɔmmɔ lɛlɔ na Katɔti údie ala ani ƒui nkya katɔ ku kalɔ kamɛni kemo, ala ani na bɔɔnu ku ani na bulánu aani lɛgadi ku bagadine ku bayikune ku kenyekɔ biala ƒui lɛlɔ. Ɔkɛnku ubi ɔmmɔ lɛlɔ na údie ala ƒui, kalɛ na lɛla biala lɛbu Kristo ɔmmɔ. ¹⁷ Kristo ɔ́kya asa na Katɔti údie ala ƒui. Na ɔkɛnku-nwu lɛlɔ na ala ƒui eesié kaduɛ. ¹⁸ Anwu ndi lili ute nwuna ɔlɔna ɔni ndi baƒɔtaadine lɛkpa lɛmmɔ. Na ɔdi lɛkpa lɛmɛni kalɔ kesekɔ. Anwu ndi Katɔti Ubi udeedi ɔni na ɔ́gyila ɔ́lɛku bekpine akɔ, kalɛ na ɔtɔnku lɛla biala. ¹⁹ Na nwuna kemo na Katɔti ɔ́ya na bekyuli bánu nwuna ukyuli udu ƒui báti. ²⁰ Na ɔkɛnku Ubidi ɔmmɔ lɛlɔ na Katɔti ɔ́klibi anwu ku ala ani nkya katɔ ku kalɔ ƒui ntɛ. Na ɔ́ya na bɔ́kɛ keyi buɛɛ ɔkɛnku Ubidi ɔmmɔ ubugya ɔni néwiakun na ugyii ɔni lɛlɔ na bákana-nwu bámana ɔsu. ²¹ Na uwi ɔdi nábavi kemo ni, bínwini kama bɛ́kya Katɔti na bíkisi-nwu na bina kasusu kemo ɔ́si ala ekpidi ku kasusu kekpidi kani na bɛ́bla ɔsu. ²² Nsu ɔƒɛni ni, Katɔti ɔkɛnku nwuna Ubidi kukpi kɔni na úkpi na ugyii lɛlɔ mmɔ ɔsu ni, ɔ́klibi amii ku-nwu ntɛ kalɛ na bɛkana na binye nwuna anumi aani bekyuli bani nse kedee na bátasɔ na beeebo kɔtu bɔni bɔdi. ²³ Anwuɔsu ɔdi ka binye kpakplaa na bina bɔƒɔtaadi kemo, na bitaya na enu aƒɛ-mii na bɛyila lɛnunsia lɛni bibo ɔ́si uwi ɔni na bínu litemi buni lɛmmɔ. Na ɔdi litemi buni lɛni lɛsa na lɛ́kɔ líte bayawine ƒui. Na ani ɔsu na ami Paulo ḿbenwini Katɔti kabla ɔblane. ²⁴ Na ɔƒɛni ni, ɔdi-mi kubiti ka muubó abi na amii ɔsu. Na mina abi ani na muubó na ɔlɔna kemo mɛni ni, ɔ́ya na muubunku na libo abi ani na Kristo ɔlɛka ubo na nwuna baƒɔtaadine lɛkpa lɛni ndi nwuna ɔlɔna ɔmmɔ lili lɛwɔlɔ. ²⁵ Baƒɔtaadine lɛkpa lɛmmɔ ɔsu na ḿbenwini Katɔti kabla ɔblane na kabla kani na úte-mi kenye, kalɛ na lɛkɔ litemi buni lɛmmɔ ƒui lɛsa lite-mii nwaa. ²⁶ Na litemi buni lɛni kalɔ mbo ɔkplu ku bunu mɛni ni, Katɔti úti ɔ́bala kuuku bekyuli. Nsu ɔƒɛni ni, údie-ni keyi ɔ́tina nwuna bekyuli. ²⁷ Katɔti bɔyɔ ndi ka bekyuli bani naaadi Yudaƒuɔ ƒui bati lɛla libendi lɛni na ɔ́da úse-bu, na lɛ́ƒɔ kuye geen. Na ani ndi Kristo ɔni nkya-bu kayi kemo. Na anwu ndi bula lɛnunsia ka abu lɛnɔ bubo kadikɔ na Katɔti bukeye kemo. ²⁸ Na ɔmɛni ɔsu na bɔɔsu Kristo lɛlɔ litemi lɛmmɔ teete ukyuli biala. Na bɔɔlɛ-ma na bɔɔtina-ma ala na lɛnunda ƒui kemo kalɛ na ɔdi biala ɔda ɔlɛ Katɔti anumi na use siin ɔkɛnku lɛla lɛni na Kristo ɔ́bla úte ɔdi biala kenye. ²⁹ Ɔmɛni ɔsu na muukpóku lɛlɔ ɔkɛnku Kristo ɔyikun ɔni nkya-mi lɛlɔ kemo ɔɔbla kabla kamɛni kenye.

¹ Mɔɔyɔ́ ka bɛti kalɛ na muukpóku lɛlɔ na amii ku Laodikeaƒuɔ ku bekyuli bani ami ku-ma bútasa tɔ dii ƒui lili. ² Mɔɔbla ɔmɛni kalɛ na bakɛ ɔkplu bɔkya na bana kayi kemo na babla unwi lɛnɔ na bɔyɔ kemo. Ɔmɛni ndubɔya na bakɛ lɛkɛ libendi lɛni nkɛnku ala kalɔ bunu nwaa. Na badubɔti Katɔti lɛbɛla lɛni ndi Kristo. ³ Kristo ɔmmɔ kemo na Katɔti úti nwuna lɛlati ku lɛnunda ƒui ɔ́bɛla ɔ́kya. ⁴ Mɔɔsu-mii ɔmɛni kalɛ na ukyuli biala uleti kenye emini etemila adi ulakyaku-mii unyeƒi na ɔtɔlɔ-mii. ⁵ Ina ka liiibo-mii kudɔ na ɔlɔna kemo ni, nkya-mii kudɔ na kɔyu kemo. Na lɛlɔ lɛɛyɔ́-mi ka lɛ́nu kalɛ na bɛda lɛlɔ na binye na bina bɔƒɔtaadi kemo kpakplaa bite Kristo ɔsu. ⁶ Na kalɛ na bɛ́ƒɔ Yesu Kristo ku bina kayi ƒui aani bina Ɔti ni, bɛblaku-nwu unwi lɛni kani. ⁷ Binye kpakplaa na nwuna kemo aani kalɛ na kugyii ugyiitu ɔɔnyí kalɔ kemo. Na bina bɔƒɔtaadi buteesie anumi teebu aani kalɛ na bɔ́tina-mii mmɔ. Na bitaagya Katɔti enu uwi ndi uwi. ⁸ Bɛnu kaduɛ kalɛ na ukyuli ɔdi uleti nwuna kayawi lɛnunda lɛni neeebo kɔsia kɔdi ulátɔlɔ-mii. Ɔsika lɛnunda lɛmmɔ ni, lɛsiaku bati kuuku ɔdi bɔbla ku kayawi kamɛni ala bɔtina kama na ɔɔɔdi Kristo kudɔ na ɔ́si. ⁹ Ɔsika Kristo kemo ni, Katɔti ulie ngba na ɔlɔna kemo ku nwuna udu ƒui. ¹⁰ Na Katɔti ɔɔyá na bɔɔlɛ́ lili taawɔlɔ ɔkɛnku abu ku Kristo unwi bɔbla ɔsu. Na Kristo ɔmɛni mɔɔdi bayikune ku kenyekɔ biala lɛlɔ. ¹¹ Ka bɛ́blaku Kristo unwi ɔsu ni, Katɔti úti nwuna Kɔyu úse-mii likpo ka bɛdi nwuna badi. Nsu ɔɔɔdi aani kalɛ na Yudaƒuɔ baabla ago bukulo ɔdi kalɛ. Mmomu Kristo ɔlati nábla-mii ɔmɛni úti úkulo ekpidi udu údie-bu lɛlɔ. ¹² Na uwi ɔni na bɛ́ƒɔ ntu bɔkpila ɔdi ɔmmɔ ni, ɔ́tina ka amii ku Kristo nékpi na báva-mii. Na amii ku-nwu lɛnɔ náta bɛ́lɛ bekpine akɔ ɔkɛ bina bɔƒɔtaadi bɔni bibo kenye. ¹³ Uwi ɔdi kemo ni, bíkpi na kɔyu kemo ɔ́si bina ekpidi ɔsu ku ka bátabla-mii ekpidi bukulo teedie ɔdi ɔmmɔ ɔsu. Nsu Katɔti ɔ́ya na bɔ́sɔ búnwini búbo bulie ngba ku Kristo ka úti bula ekpidi ƒui ɔ́kyiɛ-bu ɔsu. ¹⁴ Katɔti úkulo lɛla biala nétile-bu ulu na lɛ́bala-bu na bula ngba bulie ablala kemo ƒui na ɔda bubo bɔmmɔ etemila kenye údie-bu lɛlɔ kede kede. Na úti-nya ɔ́kana ɔ́mana ugyii lɛlɔ ku Kristo. ¹⁵ Na ugyii ɔmmɔ lɛlɔ ni, Kristo ɔ́ƒɔ ɔyikun ɔ́lɛku bayikune ku kenyekɔ biala enu kemo. Na ɔ́kya-ma kɔƒa na bekyuli anumi ka ɔ́di-ma lɛlɔ. ¹⁶ Anwuɔsu bitaya na ukyuli ɔdi ubo-mii ɔda ɔdi na bina bɔdi ku bɔni lɛlɔ, iye emeyi kedee lɛlɔ, iye abuli awɔdi limeyi bɔdi, iye lɛnwunameyi bɔdi lɛlɔ. ¹⁷ Ɔsika Kristo ndi kebi kani geen na bɔɔwia! Ɔsika ala ammɔ bene ƒui lɛlɔ bɔdi mɔɔtina ka Kristo ɔdubo úbada ɔlɛ. ¹⁸ Bitaya na anumi lɛlɔ ukyuli ɔni mɔɔsiaku katɔ batu ɔdi ɔtɔlɔ-mii na utile-mii ngba bɔƒɔ kuƒi. Bekyuli bamɛni baakun lɛmɛnɛ ka bánu budie taatina bɔdi bɔni na sɔsɔ ni, bɔɔɔkɛnku Katɔti Kɔyu lɛlɔ. ¹⁹ Anwuɔsu baayiƒla lili lɛni lɛlɔ na ɔlɔna ekpo ƒui adanku asa na Katɔti ɔɔyá na ɔlɔna umodi ɔmmɔ ɔɔlɛ́ lili. ²⁰ Kristo kukpi kɔɔtina ka amii ku-nwu nékpi, na úkpo ɔ́ƒɔ-mii ɔ́lɛku kayawi kamɛni ala bɔtina ulu lɛlɔ kemo. Na si use lɛni ni, bi ɔsu na bɛɛbla lɛlɔ aani si bɛmua bɛsiaku kayawi kamɛni ɔda bubo bɔmmɔ kama, na bɛmua bɛɛdi bana ala ani na bényimi lɛlɔ? ²¹ Banii bitani bitede ala adi iye bitetuku-nya, na bitadi adila adi udu lɛnɔ. ²² Ala ani ƒui bényimi na básu-mii banii bitabla mmɔ ni, asɔ eeebo kɔsia kɔdi uwi ɔni na ana uwi ɔ́vi. Na kasusu kani béti asa na bényimi ala ammɔ ni, kayawi kamɛni kani kemo na lɛnunda lɛmmɔ lɛ́si. ²³ Na bɔgyi ka ala ani baasu mɛni ni, aatina aani si adanku lɛnunda lɛdi bɔdi na Katɔti kabla kani na bánwi bámana-ka lɛlɔ ɔsu ku kalɛ na baabla ala adi na bekyuli anumi na baaní ɔlɔna ɔmmɔ kɔtu. Nsu ala ammɔ eléte kebunku kani maya na ukyuli ɔlɛ nwuna ɔlɔna ɔkwɛ adala kemo.

¹ Ka amii ku Kristo na Katɔti ɔ́gyila ɔ́lɛku bekpine akɔ ɔsu ni, bɛwia ala ani nkya katɔ kama ulu na kesii kani na Kristo ulie ɔɔdiku Katɔti lɛga. ² Na bina kasusu kataasia ala ani nkya katɔ mmɔ lɛlɔ, na ɔɔɔdi kalɔ ala lɛlɔ. ³ Ɔsika use aani bíkpi na bɛkya Katɔ Ɔga Ɔma ku Kristo. ⁴ Bina ngba ƒui ndi Kristo. Na si Kristo ɔ́da ɔ́lɛ kayawi kamɛni kemo ni, amii ku-nwu ƒui bɛdubɔdi lɛga bɛsala ku kubiti. ⁵ Anwuɔsu ni, bɛdu ɔlɔna kemo ɔkwɛ adala biala nkya-mii lɛlɔ kemo. Na bitasiaku-nya kama aani lɛsɔnɔdi ku ala ani muusé lɛlɔ ku ɔlɔna ɔkwɛ adala ani muuti ukyuli teesienku likpidi bɔbla kemo na aayá na ukyuli uuti kasusu kekpidi ku ɔdivo udu biala ɔni ndi lɛƒiɔkpa. ⁶ Ala amɛni udu bɔbla ɔsu ni, Katɔti ɔdubo kɔnyi buti bɔkya bani naaabla kalɛ na nwuna litemi lɛɛsu. ⁷ Na uwi ɔdi návi kemo ni, ngba bɔmmɔ udu na bílie. ⁸ Nsu ɔƒɛni ni, ɔlɛka bɛda ala amɛni udu bɔbla bɛya. Anya ndi kɔnyi buti ku ala ani mɔɔtu bekyuli kayi ku bekyuli lɛlɔ kasusu kekpidi buti. Na bitalɔ lɛlɔ anyikpi, na bitaya na etemila ani mɔɔyá na ukyuli uusé lɛlɔ alɛ-mii kenye. ⁹ Bitatɔlɔ lɛlɔ, ɔsika bɛ́da udu ɔkukudi ɔni nákya-mii kemo mmɔ bídie. ¹⁰ Na bínwini bekyuli bawɔdi. Na Katɔti ɔɔyá na bɛɛdia teebu, na bina udu ɔbla aani anwu ɔdi kalɛ na bɛti-nwu geen. ¹¹ Ɔmɛni ɔsu kavumana kadi keeebo bani ndi Yudaƒuɔ ku bani naaadi Yudaƒuɔ ntɛ, iye bani muukúlo ago ku bani neeekulo ntɛ. Lɛni kani na kavumana kadi keeebo bani ndi baƒɔ ku bani nási Sitia ku bekyuli bani mɔɔbla bekyuli bamba kabla ku bani mɔɔbla ama alati kabla ntɛ. Mmomu Kristo ndi-bu lɛla biala, na ulie ɔdi biala lɛlɔ kemo. ¹² Amii lɛnɔ bɛdi Katɔti bekyuli bani na ɔ́ƒuna mmɔ badi. Ɔmɛni ɔsu bitaabla lɛƒɔndia teete bekyuli, na bitaanu bekyuli kɔnyana, na biteeboku lɛlɔ kalɔ, na bitaanyuɛ lɛlɔ ku kayi buɛɛ. ¹³ Na biteebunku lɛlɔ. Na si ɔdi ɔ́ƒiɔ ɔdi ni, uti ɔkyiɛ-nwu aani kalɛ na Blɔti úti ɔ́kyiɛ-mii. ¹⁴ Na ɔmɛni kama ƒui ni, bɛyɔ lɛlɔ. Ɔsika bɔyɔ muunyimi ala ƒui taasala na aabla unwi. ¹⁵ Na bɛya Kristo ɔni muute keyi buɛɛ ɔdi lɛga na bina kayi kemo. Ɔsika Katɔti ɔ́lɔ-bu ɔsala ɔnii bula ƒui bɔbla ɔlɔna unwi na bɔkɛ keyi buɛɛ. Na bitaagya enu. ¹⁶ Bɛya na Kristo litemi buni lilie-mii kayi kemo kaduɛ. Na bitaatina ala na bitaalɛ lɛlɔ na lɛnunda kemo. Bitaatu Bunweni Kedee Ɔku kemo lɛnu ku baƒɔtaadine lɛnu ku lɛnu lɛni nkɛnku Katɔti Kɔyu ala lɛlɔ teeti taagya Katɔti enu ku bina kayi ƒui. ¹⁷ Na lɛla biala lɛni na bɛɛsu iye bɛɛbla kemo ni, bɛbla-ni na Blɔti Yesu lɛnyi kemo. Na bitaagya Katɔti enu taasiaku Blɔti Yesu lɛlɔ. ¹⁸ Amii beleku biboku lɛlɔ kalɔ bite bina bagya, ɔsika ɔmɛni námanku-mii aani Kristo kama basiakune. ¹⁹ Amii banana lɛnɔ, biti bɔyɔ bite bina beleku. Na bana lɛlɔ liteteeƒi-mii livo. ²⁰ Na amii bebi ni, binu bina bawɔne litemi, ɔsika ɔmɛni mɔɔda Blɔti ebiti. ²¹ Amii bawɔne bitakya bina bebi kɔnyi kalɛ na enu aƒɛ-ma na kabla biala kemo. ²² Amii bekyuli bamba kabla bablane binu bina benwoti litemi na ulu biala lɛlɔ. Na bidie kayi na bɛbla kabla uwi biala kemo, na ɔɔɔdi uwi ɔni na bakya-mii kudɔ lɛti kalɛ bakɛ-mii lɛlɔ kubiti. Mmomu bɛbla kabla ku kayi ƒui na ɔbu ɔni bibo bite Blɔti ɔsu. ²³ Na lɛla biala na bɛɛbla ni, bɛbla-ni ku kaƒɔ nwaa aani si Blɔti na bɛɛbla bite na ɔɔɔdi bekyuli. ²⁴ Bɛgyi ka Blɔti ndubute-mii lɛyuƒɔla lɛni na ɔ́su úse ka wete nwuna bekyuli. Na Kristo ndi Unwoti ɔni geen kabla na bɛɛbla. ²⁵ Ukyuli biala likpidi lɛni na ɔ́bla ni, nina lɛlɔ na Katɔti ɔdubo bunye na ɔni-nwu kɔtu. Ɔsika Katɔti ulánu bekyuli anumi si ɔɔní kɔtu.

¹ Amii benwoti bani mbo kabla bablane ni, bɛda-ma na bɛnu-ma lɛlɔ kaduɛ. Ɔsika amii lɛnɔ bɛgyi ka bibo Unwoti ɔni nkya katɔ. ² Bitada Katɔti bɔkpali bitaya. Na binye kagyumana, na biteeti linugya teete-nwu. ³ Na uwi biala kemo na bɛɛkpali katɔ ni, bivele Katɔti na ɔlɛmi ulu ute-bu na bɔkana na bɔsu Kristo litemi buni lɛmmɔ abɛla. Ɔmɛni ɔsu na ntɛ aban ɔtɔ. ⁴ Bɛkpali ku-mi katɔ na lɛkana na lɛsu litemi buni lɛmmɔ na benu-ni kalɔ nwaa. ⁵ Bɛda anu na bina keliela kemo na bɛti kalɛ na bilieku bani naaadi baƒɔtaadine. Na kuƒi biala na bɛ́kɛ ni, bɛbla kabla bite Blɔti. ⁶ Bɛya na bina butemi bɔdia bunu na ɔda kubiti. Bɛya na Katɔti lɛnunda lɛkya-mii kemo kalɛ na bɛti ala kenye budie bite ukyuli biala. ⁷ Tihiko ɔdubɔsu-mii mina lɛlɔ kɔtɛ. Ɔdi bula ɔnwa ɔni litemi na mɔɔyɔ́ geen na unye Blɔti kabla kammɔ kemo sɔsɔ uubunku-bu. ⁸ Ɔmɛni ɔsu na mɔɔtala-nwu lɛkya-mii na ubakya-mii ogya na ɔsu-mii kalɛ na abu lɛnɔ buwi kabla kammɔ lɛlɔ. ⁹ Ɔdubo-mii kudɔ ku bula ɔnwa Onesimo ɔni litemi na bɔɔyɔ́ geen na bɔ́ƒɔ-nwu bɔ́di na ɔdi bina akɔ unwi. Ama ndubɔsu-mii ala ani ƒui mɔɔlɛ́ mɛni. ¹⁰ Aristarko ɔni na ami ku-nwu bɔtɛ ɔtɔ mɛni ku Marko ɔni ndi Barnaba ɔnwani banii beegyele-mii o-o! Líte-mii bɔti na Marko ɔmɛni lɛlɔ ka si úbo-mii kudɔ ni, bigyingya enu na bɛƒɔ-nwu ku ebiti. ¹¹ Yosua ɔni na basɔ baalɔ banii Yusto lɛnɔ uugyele-mii. Yudaƒuɔ nkyuli ɛtɛ bamɛni ndi baƒɔtaadine bani nkya-mi kudɔ na bɔɔbla kabla kalɛ na Katɔti lɛga bɔdi kebo. Kalɛ na benye ku-mi mɛni ni, ɔ́ya na lɛlɔ lɛɛyɔ́-mi geen. ¹² Epaƒra ɔni ndi Kristo kabla ɔblane na ɔdi bina lɛkpa lɛmmɔ baƒɔtaadine kemo unwi lɛnɔ uugyele-mii o-o! Ɔnwa ɔmɛni úti ɔ́sia lɛlɔ kpakplaa na ɔɔkpali katɔ na bina lili kalɛ na binye kpakplaa na bɛlɛ lili bɛwɔlɔ na bina bɔƒɔtaadi kemo na bɛdi Katɔti litemi biala lɛlɔ. ¹³ Ami ɔlati muudie-nwu kenye ka ɔ́bla kabla kpakplaa úte-mii ku bani nkya Laodikea ku Hierapoli. ¹⁴ Bula ɔkpana ɔyɔne Luka ɔni ndi evogyii ɔblane ku Dema lɛnɔ banii beegyele-mii o-o! ¹⁵ Bɔɔkya banwa bani nkya Laodikea ku Ɔnwa Uleku Nimƒa ku baƒɔtaadine lɛkpa lɛni mɔɔsa na nwuna kaduli kenye o-o! ¹⁶ Si bɛ́ka ɔku ɔmɛni ni, biti bimene Laodikea baƒɔtaadine lɛkpa, na ama lɛnɔ baka. Na amii lɛnɔ bɛka ɔku ɔni na línweni líte Laodikea baƒɔtaadine lɛkpa lɛmmɔ. ¹⁷ Na bɛsu Arkipo ka ɔkya ɔkplu na ɔwɔlɔ Blɔti kabla kani na úti ɔ́kya-nwu enu kemo mmɔ. ¹⁸ Ami Paulo ɔlati mina kɔnu na líti muunweni-mii kegye kamɛni. Na bitayiƒla ka ntɛ aban ɔtɔ. Na muuvele Katɔti nnii ɔya na nwuna lɛƒɔndia lɛsiaku-mii.