2 TIMOTEO

2 TIMOTEO

¹ Ami Paulo ɔni nkɛnku Katɔti lɛƒɔyɔ lɛlɔ na ndi Yesu Kristo ɔtalane ni, ami muunweni-ɔ ɔku ɔmɛni taasiku ngba bɔni na bɔdubɔkɛ na Blɔti Yesu Kristo lɛlɔ na abu ku-nwu unwi bɔbla kemo. ² Mina ubi ɔyɔne Timoteo, muuvele Katɔti ku Blɔti Yesu Kristo lɛƒɔndia nnii lɛsiaku-ɔ na lɛnu-ɔ kɔnyana na lite-ɔ keyi buɛɛ. ³ Mɔɔgyá Katɔti ɔni na mɔɔkpá enu aani kalɛ kani na mina bati kuuku bátaabla. Na mɔɔbla lɛni na kayi kani naaadu-mi kɔtɔ kemo. Lɛnɔ ni, mɔɔgyá-nwu enu usien ku ɔƒɛ na muuvele na ƒula lili si mɔɔkpali katɔ. ⁴ Na mɔɔkali taanu ƒula keku kani na éwulo na mɔɔwia geen ka lɛnu-ɔ kalɛ na ebiti ada-mi. ⁵ Mɔɔkali taanu ƒula bɔƒɔtaadi kpakplaa bɔni na ebo. Bɔƒɔtaadi bɔmmɔ nákya ƒ^inieku Lois ku ƒ^ini Eunike alati kemo. Lɛ́ƒɔ lɛ́di ka awɔ lɛnɔ ebo-mu. ⁶ Kasusu kamɛni geen ɔsu na muunyimene-ɔ kalɛ na ada litela lɛni na Katɔti úte-ɔ kpakplaa uwi ɔni na líti mina enu lɛ́sia-a lɛlɔ na lɛ́kpali katɔ. ⁷ Ɔsika Katɔti úteti kɔyu kɔni náya na liƒu litaada-bu útete-bu. Mmomu ni, úte-bu Kɔyu kɔni mɔɔyá na bɔɔkɛ́ ɔyikun, na bɔɔyɔ́ lɛlɔ, na bɔɔkana na bɔɔtí lɛlɔ bɔda lɛnɔ. ⁸ Ɔmɛni ɔsu ni, taya na kɔƒa kukpo-ɔ ka enye Blɔti litemi kama, iye kɔƒa kukpo-ɔ na mina lɛlɔ aani ɔtɔntɛne kalɛ na Kristo ɔsu. Mmomu ni, awɔ lɛnɔ nye lɛbibo lɛmmɔ kenye kpakplaa na eteedie Blɔti litemi buni lɛmmɔ keyi. Ɔsika Katɔti úte-ɔ ɔyikun kalɛ na akana na abla ɔmɛni. ⁹ Blɔti ɔmmɔ náƒɔ-bu ngba na ɔ́lɔ-bu ɔnii bunwini nwuna bekyuli. Ɔɔɔdi bula lɛbuni lɛni na bɔ́bla ɔsu. Mmomu ni, Katɔti ɔmmɔ ɔlati kasusu ku lɛƒɔndia lɛni na ubo ute-bu ɔsu. Na ɔkɛ Blɔti Yesu Kristo lɛlɔ na bɔ́kɛ Katɔti lɛƒɔndia lɛmɛni asa na údie kayawi. ¹⁰ Nsu ɔƒɛni na Katɔti údie ɔmɛni ɔ́tina-bu nwaa na Blɔti Yesu Kristo ɔmɛni bubo kemo. Anwu nádi kukpi ɔyikun lɛlɔ. Na ɔkɛ nwuna litemi buni lɛlɔ ni, údie ngba bɔni nsɔ naaadubo bɔsa kudii keyi. ¹¹ Katɔti úti-mi ɔ́bla lɛsa ɔkɔne ku ɔtalane ku nwuna litemi buni lɛmɛni ala ɔtinane. ¹² Na ɔkɛ ɔmɛni lɛlɔ ɔsu muubó abi na kɔƒa kulekpo-mi. Ɔsika lɛ́ƒɔ lɛ́di geen, na ngyi ukyuli ɔni lɛlɔ na mina anu asia. Na ngyi lɛnɔ ka ɔdubɔgyumana-mi na lɛda lɛla lɛni na úti ɔ́kya-mii enu kemo kaduɛ wetédu limeyi lɛkladi lɛmmɔ lɛlɔ. ¹³ Da etemila geen ani na lɛ́tina-a ƒui kaduɛ na abla asiaku-nya lɛlɔ. Nye bɔƒɔtaadi bɔmmɔ lɛlɔ kpakplaa na abla unwi ku Blɔti Yesu Kristo na bɔyɔ kemo. ¹⁴ Na ɔkɛ Katɔti Kɔyu ɔyikun ɔni nkya-bu lɛlɔ kemo ɔsu ni, da ala abuni ani ƒui na Blɔti úti ɔ́kya-a enu kemo kaduɛ. ¹⁵ Agyi ka Asiaƒuɔ baƒɔtaadine ƒui bálɛ-mi kama, na Ƒigelo ku Hermegene lɛnɔ báda-mi bése. ¹⁶ Muuvele Katɔti nnii ɔnu Onesiƒoro ku nwuna kaduli bekyuli kɔnyana, ɔsika kɔƒa kútekpo-nwu na mina lɛlɔ aani ɔtɔntɛne kalɛ. Mmomu ɔ́kya-mi lɛlɔ na úbunku-mi kaduɛ. ¹⁷ Na uwi ɔni na Onesiƒoro úbo Roma ni, ɔwia-mi ɔ́vi laa útédu uwi ɔni na ɔ́nu-mi. ¹⁸ Na muuvele Katɔti nnii ɔnu-nwu kɔnyana na Litemi Bɔtɛ Limeyi lɛmmɔ lɛlɔ. Ɔsika awɔ ɔlati agyi kɔlɛ kɔlɛ kɔni na úbunku-mi na Eƒeso.

¹ Na awɔ, mina ubi, kya ɔkplu na bula unwi bɔbla ku Kristo na nwuna lɛƒɔndia lɛni na ubo ute-bu kemo. ² Na ala ani na énu ka lɛ́tina bekyuli pii anumi ni, anya kani na ɔlɛka eti akya bekyuli bani náƒɔ bádi enu kemo na beti-nya batina bekyuli bamba lɛnɔ. ³ Nye lɛbibo lɛmmɔ kenye kpakplaa aani ukpone ɔbuni ɔni nnye ute Yesu Kristo. ⁴ Ɔsika ukpone ɔni nnye nwuna kabla lɛlɔ geen ni, ɔɔwia ka nwuna ablala ada nwuna ɔtɔnkune ebiti. Anwuɔsu ɔsɔ ulakya bekyuli bani naaadi bekpone ablala kenye. ⁵ Lɛni kani na asa na usi ukeline ɔni lɛnɔ nnye lɛlɔ kakukɔ wadi lɛlɔ ni, ɔlɛka ɔbla ɔsiaku nwuna ɔda bubo lɛlɔ kaduɛ. ⁶ Umonsene ɔni nábla kogyoklo geen na nwuna kemo ni, anwu mɔɔka edula edeedi bɔdi. ⁷ Kali ala ani mɔɔsu-ɔ mɛni ƒui nu, ɔsika ngyi nnii Blɔti ɔdubɔya na enu ana ƒui kalɔ. ⁸ Nyimo Yesu Kristo ɔni ndi Dawid kaba kemo ubi ɔni na Katɔti ɔ́gyila ɔ́lɛku bekpine akɔ aani kalɛ na litemi buni lɛni mɔɔsu mɛni lɛɛtina. ⁹ Muubó abi na litemi buni lɛni mɔɔsu ɔsu. Na bébo-mi lɛkpu muedi aani ukyuli ɔni na ubo lɛkanta likpidi. Nsu Katɔti litemi ni, bétebo-ni lɛkpu! ¹⁰ Ɔmɛni ɔsu na mɔɔƒɔ́ lɛla biala teebweli na Katɔti bekyuli baƒunadi ɔsu, kalɛ na ama lɛnɔ bakɛ bɔƒɔ bɔni na Yesu Kristo lɛlɔ kani na bɔɔsia na buuti ngba ƒui lɛlɔ bɔyɔ teete-bu. ¹¹ Kenye kamɛni kadi litemi geen ka ni, “Si bɔ́bla unwi ku Blɔti na nwuna kukpi kemo ni, bɔdubɔsɔ bɔta buliku-nwu ngba. ¹² Si bɔ́kana na bunye kpakplaa na lɛbibo biala kemo ni, abu ku-nwu bɔdubɔdi lɛga. Na si buuní-nwu ni, anwu lɛnɔ ɔdubuni-bu. ¹³ Si ina bɔlɛ bula bɔƒɔtaadi kama muedi ni, anwu ulálɛ nwuna linyese kama. Ɔsika ulakana na walɛ anwu ɔlati lɛlɔ kama kudii.” ¹⁴ Ya na beteenyimo ala amɛni na alɛ-ma kpakplaa na Katɔti anumi anii batataakya unyeƒi. Ɔsika kɔsia kɔdi kulálɛ ɔmmɔ kemo. Mmomu ɔdubɔya na bekyuli bani muunú ala ammɔ bɔƒɔtaadi bɔyuɛ. ¹⁵ Da lɛlɔ kaduɛ na ulu biala lɛlɔ na Katɔti uwi-ɔ livo. Taya na kɔƒa kuteekpo-ɔ na ƒula kabla lɛlɔ. Mmomu bla ukyuli ɔni mɔɔtina Katɔti litemi lɛmmɔ geen. ¹⁶ Die lɛlɔ na kɔbɔ ala ku kɔdɔlɔ atɛ bɔtɛmi kemo. Ɔsika bekyuli bani na baabla ala amɛni udu ni, uudie bana kasusu na Katɔti kudɔ teesienku ɔgyu kakaaka. ¹⁷ Ala ammɔ udu bɔtina ese aani lɛnyama lɛni mɔɔnyi. Na nkyuli inyɔ bani nátina ala ammɔ udu ndi Himeneo ku Ƒileto. ¹⁸ Bénwini kama bákya litemi geen lɛmmɔ na bakya beeƒú baƒɔtaadine badi kasusu banii bula ngba bɔsɔ bɔta bubelie ku Katɔti búubo búbavi. ¹⁹ Nsu ni, Katɔti ɔtɔ kalɔ lɛtabi lɛni na ɔ́kya ni, lɛla biala lilakana-ni bɔkunku. Na lɛtabi lɛmɛni lɛlɔ ni, únweni etemila amɛni ɔ́sia ɔnini, “Blɔti ɔgyi bekyuli bani ndi anwu badi,” ku “Ukyuli ɔni masu ɔnii ɔsiaku Blɔti ni, ɔlɛka unwini kama ɔkya ekpidi bɔbla.” ²⁰ Na ɔlakɛne ɔtɔ ni, akyami lidu lidu liisé. Na adi adi sika ugyiedi ku ɔƒualadi. Na adi lɛnɔ adi kavɔ ku kanwi akyami. Na akyami amɛni lɛlɔ kabla ni, adi ese ete emeyi buni bɔdi. Na adi lɛnɔ emeyi keeke bɔƒuƒuɛ na ese ete. ²¹ Anwuɔsu si ukyuli ɔdi ɔ́da lɛlɔ údie likpidi kemo na ɔ́bla lɛlɔ sɛɛn ni, anwu náƒɔ Blɔti kuye aani akyami ani nse nte emeyi buni bɔdi. Na ɔ́manku ute ka ɔbla kabla kabuni. ²² Da atu die lɛkloƒu bɔdi ala keeke kama bɔsiaku kemo. Na abla lɛla biala ulu lɛlɔ, na elie ɔƒɔtaadine ngba buni, na ataayɔ bekyuli, na elieku-ma ku keyi buɛɛ. Siaku ala amɛni ku bekyuli bani ƒui mɔɔkpali Katɔti na kayi sɛɛn kama. ²³ Da lɛlɔ mami kɔbɔ ala ku kɔdɔlɔ atɛ batɛmine lɛlɔ, ɔsika kadɔ na ala ammɔ udu eeboku. ²⁴ Na utalɛka ukyuli ɔni na ɔɔtɔnku Blɔti bekyuli utaadɔ. Mmomu ɔdi ka utaabla lɛƒɔndia teete ukyuli biala, na ɔkana ala butaatina, na ɔbla ukyuli ɔni na use buɛɛ. ²⁵ Na bekyuli bani ƒui mɔɔta teenye litemi buni lɛmɛni lɛlɔ ni, ɔlɛka udie ala kalɔ ute-ma ku kayi buɛɛ. Na ɔƒɛni kalɛ Katɔti ɔdubɔya na benwini kayi na banu litemi geen lɛmmɔ bati. ²⁶ Ɔmɛni ɔsu bana kasusu kadubɔlɛmi na balɛ Satan ɔni néti-ma únwini nwuna lɛƒɔyɔ bablane kakpagyuɛ kemo.

¹ Se ɔmɛni likpo ka ni, na emeyi ekplodi kemo ni, likyulikpi lɛdubɔya na keliela kayu ɔkplu. ² Bekyuli badubɔyɔ bana lɛlɔ lɛti bɔdia na bayɔ egulabi. Badubo lɛmɛnɛ butaakun na bataatalaku lɛlɔ katɔ. Ama ndi bekyuli bani muudumi bekyuli, ku bani naaabu bana bawɔne. Na belese kɔdɛ, ku bekyuli bani naaasiaku bɔƒɔtaadi bɔmmɔ kama. ³ Badi bekyuli bani na ukyuli bamba lɛlɔ lilakywi-ma kaƒɔ, ku bani naaanu kɔnyana. Badi bekyuli bani mɔɔnyi ɔkɔ taada litemi taasia bekyuli lɛlɔ, ku bekyuli bani mbo kalala. Na bana anumi eeese buɛɛ. Na badi bekyuli bani nkisi lɛla lɛbuni. ⁴ Badi bekyuli bani mɔɔkya bana bakpana kakya. Na badi bekyuli bani nábi basiaku bana lɛnunsia kama, ku bekyuli bani mɔɔkali banii ama kani ntulo ku bekyuli bani mɔɔyɔ́ kayawi ebiti teetulo Katɔti. ⁵ Bekyuli bamɛni udu mɔɔtina ku kenyekplu ka badi bekyuli babuni, nsu beení Katɔti ɔyikun ka ɔdi-ma lɛlɔ na bana keliela kemo. Da lɛlɔ mamiku bekyuli bamɛni lɛlɔ ⁶ Ɔsika bekyuli bamɛni udu ni, baabɛ́ teeduo bekyuli kɔduli na baadi beleku bani naaakana bana lɛlɔ bɔda lɛlɔ, ɔsika ekpidi lidu lidu bɔbla bɔ́ya na beeebo bunwini teewi. ⁷ Beleku bamɛni baatɛya ala uwi ƒui, nsu belenu etemila geen ammɔ kalɔ kudii. ⁸ Na aani kalɛ na Yane ku Yambri báta bénye Mose lɛlɔ dii ni, lɛni kani na ɔkɔ ala batinane bamɛni lɛnɔ baata teenye litemi geen lɛmɛni lɛlɔ. Bekyuli bamɛni badi bekyuli bani na likpidi bɔbla bɔ́ƒɔ-ma kasusu ƒui, na báyila baƒɔtaadine geen bɔmmɔ ulu. ⁹ Nsu ni, bekyuli bamɛni belésie ɔgyu, ɔsika bana kɔkwɛ kukpidi kɔdubɔlɛ keyi na bekyuli ƒui anumi aani bani nábla udu ɔmɛni bávi kalɛ kani. ¹⁰ Nsu awɔ ni, áanu mina ala bɔtina áti ku mina ngba keliela ku mina kasusu ku mina bɔƒɔtaadi ku kalɛ na muuwi lɛlɔ ku kalɛ mɔɔyɔ́ bekyuli ku kalɛ na mɔɔkya ɔkplu na lɛbibo kemo. ¹¹ Agyi kalɛ na básiaku-mi na békpoku-mi ku abi ani na líbo na Antiokia ku Ikonion ku Listra. Kali nu bukpoku bɔni kemo na línye kpakplaa. Nsu na ɔna ƒui kemo ni, Blɔti údie-mi. ¹² Sɔsɔ na ɔdi ka ni, bekyuli bani ƒui melie ngba buni na Kristo kemo ni, badububo abi na bekpoku-ma. ¹³ Nsu bekyuli bekpidi ku ɔkɔ ala batinane ama ni, bubie bɔmmɔ bɔdubɔkɔ-ma katɔ bubu na bataatɔlɔ bekyuli. Na bana ɔbladu ɔmmɔ ɔdubɔtɔlɔ ama alati lɛnɔ. ¹⁴ Nsu awɔ ni, mɔɔwia ka enye ala ani na atɛya na áƒɔ ádi lɛnɔ lɛlɔ kpakplaa. Ɔsika agyi bekyuli bani kudɔ na átɛya-nya. ¹⁵ Ka ɔ́si-ɔ lɛnamu uwi ni, áti Bunweni Kedee Ɔku kemo etemila ani náya-a na áda anu na ebo ngba bɔƒɔ etemila ɔkɛ Kristo bɔƒɔtaadi lɛlɔ. ¹⁶ Katɔti ɔyikun lɛlɔ na bɔ́sia bɔ́kɛ ala ani ƒui bénweni na Bunweni Kedee Ɔku kemo. Na ɔdia ute ukyuli bɔdɔnku ku bɔklibi ku bɔnyuɛ na ngba buni bulie kemo. ¹⁷ Bénweni-nya kalɛ na ukyuli biala ɔni néti lɛlɔ úte Katɔti wamanku na ɔklibi-nwu ute ala abuni bɔbla.

¹ Nnye Katɔti ku Kristo ɔni ndubɔsɔ ubo ubatɛku bayawine ku bekpine litemi anumi. Na ka ɔdubɔsɔ ubo na nwuna lɛga bɔdi kemo ɔsu ni, mɔɔlɛ-ɔ kpakplaa nnii ² si bebo kɔnu o-o, iye beeebo kɔnu o-o ni, die litemi buni lɛmmɔ kenye. Klibi-ma, na adɔnku-ma, na akya-ma ogya. Na si eedie ala kalɔ taatina-ma ni, na ewi lɛlɔ na akɛ ku-ma kayi geen. ³ Ɔsika uwi ɔdi ɔdubo ɔni na bekyuli basɔ baaadubo litemi buni lɛmɛni bɔda. Mmomu badubɔwia ala bamba batinane bete lɛlɔ na bataasu-ma ala ani udu na baawia beteenu. ⁴ Badubo kama bunwini bɔkya litemi buni lɛmɛni na basiaku etemila anwidi kama. ⁵ Na awɔ ni, da lɛlɔ kaduɛ na ulu biala lɛlɔ, na ataakya ɔkplu na lɛbibo biala kemo. Na abla kabla aani litemi buni lɛmɛni lɛsa ɔkɔne. Na abla ƒula baƒɔtaadine ɔtɔnkune kabla ƒui kaduɛ. ⁶ Ɔsika ami ni, mina ngba bɔdaku kalɔ buwi aani ntɛ lɛkpa. Na uwi lɛnɔ úudu ka lɛtɔlɔ kayawi kamɛni kemo. ⁷ Líkpo kekpo kabuni na lɛ́wɔlɔ mina kabla aani usi ukeline buni kalɛ. Na lɛ́da mina bɔƒɔtaadi na Kristo kemo útédu kawɔlɔkɔ. ⁸ Na ɔ́si ɔƒɛni ni, Katɔti ɔ́ɔklibi mina kagabwa kani mɔɔtina ka lílie ɔƒɔtaadine ngba ulu lɛlɔ úse-mi. Ɔdi kagabwa kani na Blɔti ɔni mɔɔtɛ bula ƒui litemi ulu lɛlɔ ɔdubo-mi bute limeyi likplodi lɛmmɔ. Na ɔɔɔdi ami lɛti pɛ ndubɔkɛ-ka, mmomu ami ku bekyuli bamba bani ƒui lɛnɔ nsia anu bete Blɔti bɔsɔ bubo bɔmmɔ. ⁹ Sia ulu biala lɛlɔ na eyile-mi bubanu. ¹⁰ Ɔsika Dema ɔ́tɔlɔ-mi kudɔ na ɔsiaku kayawi ala kama úsie Tesalonika. Na Kreske anwu ni, úsie Galatia, na Tito úsie Dalmatia. ¹¹ Luka lɛti nébu ɔkya-mi kudɔ. Anwuɔsu tiku Marko na bibo, ɔsika ɔdi-mi ubunkune geen. ¹² Lɛ́tala Tihiko na Eƒeso. ¹³ Na si adubo ni, ti mina kɔyɔ awu gyɔlɔɔ ɔni na lɛ́da líse Karpo kudɔ na Troia boku-mi. Na eti mina lɛku ku kɔkunkɛ kɔni na mɔɔwia teetulo lɛnɔ boku-mi. ¹⁴ Aleksandro ɔni ndi ɔkywɛne ɔ́bla-mi kalala geen. Na Blɔti ɔdubɔƒɔ-nwu lɛla lɛni na ɔ́bla kayu. ¹⁵ Anwuɔsu awɔ lɛnɔ nye kagyumana te-nwu, ɔsika ɔ́ta únye bula ala ani na bɔɔtina lɛlɔ geen. ¹⁶ Kudeedi kɔni na bátɛku-mi litemi ni, ɔdi biala útakana na ubo ubenye-mi litemi kama, mmomu béni-mi bése. Nsu muuvele Katɔti nnii utani-ma kɔtu na ɔmɛni lɛlɔ. ¹⁷ Nsu ni, Blɔti únyeku-mi na ɔ́kya-mi ɔyikun na lɛ́kana lɛ́su Blɔti litemi lɛmmɔ kaduɛ lite bani naaadi Yudaƒuɔ na mmɔ. Na Blɔti údie-mi kukpi kemo. ¹⁸ Blɔti ɔdubudie-mi na ɔgbankpi biala kemo, na ɔdubo-mi bɔkpanku buɛɛ buɛɛ na liduo Katɔ Ɔga Ɔma. Bumwi na buute Katɔti ɔ́si ɔƒɛni úsela ƒui. Ɔsia lɛni. ¹⁹ Muugyele Priska ku Akwila ku Onesiƒoro kaduli bekyuli ƒui. ²⁰ Erasto ɔmua ɔkya Korinto, na Troƒimo anwu uuƒi ɔsu lɛ́da-nwu lɛ́kya Mileto. ²¹ Kya ɔkplu na ebo ebeduo mɛni asa udu kɔyɔ uwi. Eubulo ku Pude ku Lino ku Klaudia ku baƒɔtaadine banwa bakladi ƒui beegyele-ɔ o-o! ²² Blɔti ɔda-a kɔyu, na muuvele-nwu nnii ɔda-mii kaduɛ na nwuna lɛƒɔndia kemo.