2 TESALONIKAƑUƆ

¹ Ami Paulo ku Silvano ku Timoteo búnweni ɔku ɔmɛni buute amii bani ndi bula Unwoti Katɔti ku Blɔti Yesu Kristo badi na Tesalonika. ² Na buuvele bɔnii bɛkɛ Unwoti Katɔti ku Blɔti Yesu Kristo keyi buɛɛ ku lɛƒɔndia. ³ Banwa, bɔda Katɔti enugya kayu uwi ƒui na amii ɔsu. Na ɔdia ka butaaƒɔ-ka, ɔsika bina bɔƒɔtaadi bɔɔkɔ́ katɔ, na bina lɛlɔ bɔyɔ lɛnɔ buusié anumi teebu ɔsu. Ɔmɛni ɔsu na bɔɔlɔ-mii lɛnyi buni na Katɔti baƒɔtaadine akɔ. ⁴ Na bɔɔtalaku bina lɛnyi katɔ ɔsika binye bina bɔƒɔtaadi lɛlɔ kpakplaa na bɛɛkya ɔkplu ina ka beekpóku-mii na biibó abi. ⁵ Ɔmɛni ɔɔtina-bu ka Katɔti ɔɔtɛ litemi siin. Na ɔdubute-mii keliekɔ na nwuna lɛga kadikɔ kani ɔsu na biibó abi. ⁶ Katɔti ɔdubɔtɛ litemi na ulu lɛlɔ. Na ɔdubɔni bani muukpóku-mii ƒui kɔtu. ⁷ Na ɔdubɔya na abu ku amii bani ƒui muubó abi bɔkɛ bɔnwuna. Katɔti ɔdubɔbla ala amɛni uwi ɔni na Blɔti Yesu ku Katɔti batu badubɔda bɔlɛ kayaa na ɔyikun kemo ku ogya. ⁸ Na bekyuli bani naaabu Katɔti na bátaƒɔ Blɔti Yesu Kristo litemi buni bátadi ni, ɔdubɔni-ma kɔtu na lɛgyavonku kemo. ⁹ Lɛni na Blɔti ɔdubɔgya-ma ɔlɛku nwuna anumi. Na balanu nwuna bukeye ku ɔyikun. Na ɔdubɔyila-ma ku udu. ¹⁰ Ala amɛni adubɔlɛ na limeyi libendi lɛni lɛlɔ na Yesu wasɔ webo. Na limeyi lɛmmɔ lɛlɔ ni, nwuna baƒɔtaadine ƒui badubɔsiaku-nwu ku bumwi kudu. Na amii lɛnɔ bɛdubɔkya-ma akɔ, ɔsika bɛ́ƒɔ nwuna litemi buni lɛni bɔ́su-mii mmɔ bɛ́di. ¹¹ Ɔmɛni ɔsu na bɔɔkpali katɔ na bina lili uwi ndi uwi. Na buuvele bula Katɔti bɔnii bina ɔbladu ɔmanku bɔlɔ bɔni na ɔ́lɔ-mii. Na nwuna ɔyikun ubunku-mii na ɔkya bina kasusu buni biala ogya kalɛ na lɛla biala lɛni na bɛdubɔbla na anwu ɔsu lɛtɛ. ¹² Buuvele ala amɛni teete-mii kalɛ na bakɔliku Blɔti Yesu Kristo lɛnyi katɔ na amii ɔsu. Na anwu lɛnɔ wakɔliku-mii lɛnyi katɔ na anwu ku Katɔti lɛƒɔndia ɔsu.

¹ Banwa, bɔɔyɔ́ ka bɔsu-mii lɛla kpakplaa lɛdi na Blɔti Yesu Kristo bɔsɔ bubo ku bula bɔsala na nwuna kudɔ lɛlɔ. ² Si bínu bɛnii Blɔti bubo limeyi lɛmmɔ líbo líbavi ni, buláwia ka bina kasusu keƒu iye ɔtɔtɔ ɔgyu-mii. Ɔƒɛni kalɛ ɔdubɔbla-mii aani ka abu násu ɔmɛni uwi ɔni na buudie Katɔti kenye iye bɔɔkɔ́ litemi lɛmmɔ lɛsa iye búnweni ɔku ɔdi búmene-mii. ³ Bitaya na ukyuli ɔdi ɔtɔlɔ-mii na ulu biala lɛlɔ. Ɔsika Blɔti limeyi lɛmmɔ lilebo tɔ utédu uwi ɔni na bekyuli pii badubuni Katɔti asa na ukyuli ukpidi ɔmmɔ ɔni na Katɔti údie úse ka ɔkyula ɔda ɔlɛ. ⁴ Na ɔdubɔta unye utile kɔyu ɔyikun biala ulu na ɔtina ka anwu lɛti ndi ayu ƒui utulone. Na ɔdubo bɔta muedi butélie Katɔti kakpakɔ na ɔbla lɛlɔ aani anwu ndi Katɔti ɔmmɔ. ⁵ Binyimo ka uwi ɔni na lɛ́kya-mii kudɔ ni, lɛ́su-mii ala amɛni ƒui. ⁶ Nsu ni, ɔyikun ɔdi uutile ala ammɔ kuƒi ka alɛ ɔƒɛni. Na amii alati bɛ́gyi lɛla lɛni na lɛdi. Na ukyuli ukpidi ɔmmɔ ɔdubudie lɛlɔ keyi si nwuna uwi údu. ⁷ Na likyulikpi ala ani baabla taabɛ éese kalɔ aalɛ́. Na ala ani ndubɔlɛ ni, aaadubo bɔlɛ tɔ wetédu ka Katɔti ɔ́da ukyuli ɔni muutile ukyuli ukpidi ɔmmɔ ulu údie. ⁸ Na ɔmɛni kama ni, Katɔti ɔdubudie ukyuli ukpidi ɔmmɔ keyi ɔtina. Na si uwi ɔni na Blɔti Yesu Kristo úbo ni, ɔdubuti nwuna kenye ɔƒɛƒɛɛ ku bukeye ɔkyula-nwu na ɔyila-nwu udu ƒui. ⁹ Na ukyuli ukpidi ɔmmɔ ɔdububo ku Satan ɔyikun, na ɔdubudie ɔkɔ akɔla budie taatina lidu lidu ɔtina. ¹⁰ Na bekyuli bani ƒui ndubo bɔyii ku udu ni, ɔdubɔsia likyulikpi katɔlɔ ulu biala lɛlɔ na ɔtɔlɔ-ma. Badubo bɔyii ɔsika bátaƒɔ litemi buni lɛmmɔ bátadi na Katɔti ɔƒɔ-ma ngba. ¹¹ Ɔmɛni ɔsu na Katɔti ɔdubɔnyonu-ma kalɛ na baƒɔ ɔkɔ badi. ¹² Kawɔlɔkɔ ƒui ni, Katɔti ɔdubɔdu-ma kɔtɔ, ɔsika bátaƒɔ litemi buni bátadi. Mmomu bátaakɛ ebiti na ekpidi bɔbla kemo. ¹³ Nsu ni, banwa, bɔda Katɔti enugya kayu uwi ƒui na amii ɔsu. Bɔgyi ka ɔɔyɔ́-mii sɔsɔ. Ɔsika ɔ́ƒuna-mii ɔnii bɛkɛ bɔƒɔ. Na ɔ́bla-mii nwuna badi ɔ́si kalɔ kesekɔ uwi ɔni na Katɔti Kɔyu kúveli bina ekpidi údie-mii lɛlɔ ɔsika bɛ́ƒɔ litemi buni lɛmmɔ bɛ́di ɔsu. ¹⁴ Na ɔkɛnku bula litemi buni lɛmɛni bɔsu kemo ni, Katɔti ɔ́lɔ-mii ɔnii bibo na bɛƒɔ lɛnyi aani kalɛ na Blɔti Yesu Kristo ubo lɛnyi. ¹⁵ Ɔmɛni ɔsu ni, banwa, binye kpakplaa na biƒie etemila ani na bɔ́tina-mii na bula lɛku bunweni ku bɔtɛmi kemo bɛda. ¹⁶ Na buuvele kebunku taasiku Blɔti Yesu Kristo ku bula Unwoti Katɔti kudɔ ɔni mɔɔyɔ́-bu, na úti kayi buse ku lɛnunsia úte-bu ɔ́si nwuna lɛƒɔndia ɔsu. ¹⁷ Buuvele-nwu bɔnii, ute-mii ɔyikun na ɔkya-mii kayi ogya kalɛ na bɛsu na bɛbla ala abuni ƒui lɛnɔ.

¹ Asa na mawɔlɔ ni, banwa, binyimo na bitaakpali katɔ na bula lili kalɛ na Blɔti litemi lɛmɛni liteegyingya teesie kesi kesii ku ɔbu aani kalɛ na amii lɛnɔ bɛ́ƒɔ-ni. ² Na bivele lɛnɔ kalɛ Blɔti wada-bu wedie na bekyuli bekpidi enu kemo, ɔsika ɔɔɔdi bekyuli ƒui náƒɔ nwuna litemi lɛmmɔ bádi. ³ Nsu Blɔti unye-mii kama, na ɔdubɔkya-mii ɔkplu na wanu-mii lɛlɔ kalɛ na ukisine ɔmmɔ uladi-mii lɛlɔ. ⁴ Blɔti ɔ́ya na bubo lɛnunsia na bina lɛlɔ ka bɛɛbla ala ani na bɔ́tina-mii, na bɔgyi ka bɛdubɔkana-nya butaabla. ⁵ Buuvele Blɔti bɔnii ubimi-mii anumi na bɛnu bɛti kalɛ na anwu Kristo ɔɔkɛ́ kayi teete-bu ku kalɛ na Katɔti ɔɔyɔ́-bu. ⁶ Banwa, bɔɔlɛ-mii geen na Blɔti Yesu Kristo lɛnyi kemo bɔnii bɛda lɛlɔ bɛmami baƒɔtaadine bakɔsɔne bani neeeti bula ala bɔtina lɛlɔ. ⁷ Amii alati bɛgyi kaduɛ ka ɔdi ka bɛbla kabla aani kalɛ kani na abu lɛnɔ bɔ́bla, ɔsika bútabla kɔkɔsɔ uwi ɔni na bɔ́kya-mii kudɔ. ⁸ Búteti bula etila bútasia ɔdi lɛlɔ. Na mmomu bɔ́bla kabla kpakplaa usien ku ɔƒɛ ɔni na ɔdi útebo bula lɛlɔ bɔnu kayu. ⁹ Bubo ɔyikun ka nka buti bula etila bɔsia-mii lɛlɔ. Nsu ka bɔɔyɔ́ ka bɛtɛya kalɛ na beenye kabla lɛlɔ ɔsu ni, bútabla lɛni. ¹⁰ Bɛdubunyimo ka uwi ɔni na bɔ́kya-mii kudɔ ni, bɔ́su-mii geen bɔnii ukyuli ɔni muuní kabla ni, bitete-nwu lɛla lɛdi na ɔdi. ¹¹ Bɔɔsu ala amɛni ɔsika buunú ka bakɔsɔne badi bakya-mii akɔ na bana bakpana lɛlɔ etemila kani na bakɛ baasu taavi. ¹² Buubó bekyuli bamɛni ɔda kpakplaa na Blɔti Yesu Kristo lɛnyi kemo bɔnii bada ngba kaduɛ na beti bana enu bawia bana lɛdila. ¹³ Nsu amii ni, banwa, bitaya na enu aƒɛ-mii na lɛbuni bɔbla kemo. ¹⁴ Na si ukyuli ɔdi ulábla taasiaku litemi lɛni na bɔ́su-mii na ɔku ɔmɛni kemo lɛlɔ ni, bise-nwu likpo na bɛda lɛlɔ bɛmami-nwu lɛlɔ na kɔƒa kukpo-nwu. ¹⁵ Nsu bitekisi ukyuli ɔmmɔ. Mmomu bɛlɛ-nwu aani bina ɔnwani kalɛ. ¹⁶ Buuvele Blɔti ɔlatidi ɔni muute keyi buɛɛ bɔnii ute-mii keyi buɛɛ na bina ngba bulie ƒui kemo. Blɔti ɔda bina ƒui na ulu biala lɛlɔ. ¹⁷ Ami Paulo muunweni bɔkada bɔmɛni ku ami ɔlati mina kɔnu aani likpose lɛni mɔɔtina ka ami na ɔdi. Lɛni na muunweni na mina lɛku ƒui kemo. ¹⁸ Buuvele bɔnii Blɔti Yesu Kristo ɔda bina ƒui na nwuna lɛƒɔndia kemo.