2 PETRO

2 PETRO

¹ Ami Simon Petro ɔni ndi Yesu Kristo kabla ɔblane ku ɔtalane ni, ami muunweni ɔku ɔmɛni lite amii baƒɔtaadine ƒui bani na abu ku-mii ƒui bɔdi benwi ku Katɔti. Na ɔ́ya na bula ƒui bɔ́ƒɔ bula Ɔti ku Ɔƒɔne Yesu Kristo ɔni nse siin bɔ́di. ² Muuvele Katɔti nnii nwuna lɛƒɔndia ku keyi buɛɛ kasiaku-mii kebu uwi biala kemo ɔkɛnku kalɛ na bɛgyi-nwu ku Yesu ɔni ndi Blɔti lɛlɔ ɔsu. ³ Blɔti Yesu Kristo ɔkɛ Katɔti ɔyikun lɛlɔ úte-bu lɛla biala na bɔɔwia kalɛ na bulie ngba sɛɛn aani baƒɔtaadine. Úte-bu ala amɛni, ɔsika bɔgyi-nwu geen ka anwu nálɔ-bu ɔnii bula ukyulidu ɔbla kedee na buteekeye aani nwuna kalɛ. ⁴ Na ɔkɛnku ala amɛni lɛlɔ ɔsu ni, Katɔti úti nwuna kaƒɔ buni ala enengudi ani náƒɔ kuye úte-bu na kenye kani na úse ɔsu. Na ɔkɛ etela ammɔ lɛlɔ ni, na bɛkana bɛlɛ ɔlɔna ala ani mɔɔda-mii ɔkwɛ na kayawi kamɛni kemo na bɛbla kedee aani nwuna kalɛ. ⁵ Kasusu kamɛni geen lɛlɔ ɔsu ni, bɛkya ɔkplu biala na bɛbla lɛbuni lɛni ndanku kalɛ na bɛ́ƒɔ Kristo bɛ́di. Na lɛbuni lɛmmɔ lɛya na bɛti lɛla lɛni na Katɔti ɔɔyɔ́. ⁶ Na lɛla lɛni bɛgyi mmɔ lɛya na bɛkana na bɛdi lɛlɔ. Na si bɛ́di lɛlɔ ni, na bɛkana na binye kpakplaa. Na si bínye kpakplaa ni, na bɛkana na bilie ngba bɔbuni aani baƒɔtaadine kalɛ. ⁷ Na si bílie ngba bɔbuni bɔmɛni ni, na bɛkana na bɛdi kɔnwa geen. Na si bɛ́di kɔnwa geen kɔmɛni ni, na ɔya na bitaayɔ bekyuli ƒui. ⁸ Ɔsika si ala amɛni ƒui ásadi éte-mii na bítayuɛ ni, adubɔya na bɛkana bitaabla kabla na bɛnwu ebi buni ka bɛ́ti Blɔti Yesu Kristo ɔmmɔ ƒui ɔsu. ⁹ Na si ɔdi ɔɔyaki ala amɛni adi ni, na ukyuli ɔmmɔ use aani ukyuli ɔni na ulánu ɔgyu. Na ɔ́yiƒla lɛnɔ ka Katɔti úti nwuna ekpidi ani na ɔ́ɔbla ƒui ɔ́kyiɛ-nwu. ¹⁰ Banwa, ɔmɛni ɔsu ni, binye kpakplaa bibu. Na lɛla lɛni na Katɔti ɔ́lɔ-mii na ɔ́ƒuna-mii ɔnii bɛbla ni, bɛkya-ni ɔyikun uwi biala kalɛ na bina bɔƒɔtaadi bulayuɛ. ¹¹ Si bɛ́bla lɛni ni, bɛdubɔkɛ kuƒi biala biduo Blɔti ku Ɔƒɔne Yesu Kristo ngba ƒui lɛga kadikɔ. ¹² Ina ka bɛgyi ala amɛni na éedie litu na bina lɛlɔ kemo muedi ni, ndubɔsɔ lɛya na biteenyimo-nya na ɔmɛni ɔsu. ¹³ Mɔɔnu ka ɔlɛka ntaalɛmi-mii kasusu na ɔmɛni lɛlɔ uwi ɔni na nli ngba mɛni. ¹⁴ Ngyi ka kébu blii na linwini kama aani kalɛ na Blɔti Yesu Kristo ɔ́su-mi nwaa kalɛ. ¹⁵ Na ndubɔnu ka mina kekpima ni, bɛdubɔkana na biteenyimo ala amɛni uwi biala kemo. ¹⁶ Ɔɔɔdi kɔtɛ keeke na bɔ́nwi búti bɔ́tina-mii ka Blɔti Yesu Kristo ɔsɔ ɔdububo na ɔyikun kemo. Bɔgyi lɛla lɛni na bɔ́su-mii. Ɔsika abu alati bɔ́nu-nwu ku bula anumi kalɛ na use kedee na ɔdi Ɔga. ¹⁷ Na bunye mmɔ uwi ɔni na Katɔti úti ɔbu úte-nwu na ɔ́ya na uukeye ku uwi ɔni na Katɔti ɔmmɔ lɛdi lɛ́si katɔ na nwuna lɛgadi bukeye kemo lɛnini, “Ɔmɛni ndi mina Ubi ɔni mɔɔƒɔ́-mi anu.” ¹⁸ Na búnu lɛdi lɛni nási katɔ uwi ɔni abu ku-nwu bunye kɔbi kedee kɔmmɔ lili. ¹⁹ Ɔmɛni ɔsu bɔ́sɔ bɔ́ƒɔ kenye bediene linyese lɛmmɔ bɔ́di geen búbu. Na ɔlɛka amii lɛnɔ bise atu geen na binu-ni. Ɔsika lise aani ogya ɔni mɔɔda na kesii kani nse suu utálɛ uwi ɔni na kadi kadubugye. Na kadi bugye bɔmmɔ ndi Kristo bukeye bɔni ndubukeye na bula kayi kemo aani kalɛ na ɔtanta ayabi eekeye lɛdigye. ²⁰ Lɛla lideedi lɛni nálɛka lɛbla-mii nwaa ni, ani ndi ka ukyuli ɔdi ulakana na wedie Katɔti kenye bediene ala ani na básu bése na Bunweni Kedee Ɔku kemo kalɔ. ²¹ Ɔsika kenye bediene bátasia lɛla lɛni na ukyuli ɔɔyɔ́ kenye bátasu lɛla lɛdi bétese. Mmomu Katɔti Kɔyu náƒɔ-ma lɛlɔ kemo ƒui na kɔ́ya na básu kenye kani nási Katɔti ɔlati kudɔ bése.

¹ Kalɛ na ɔkɔ kenye bediene bákya uwi ɔni návi ni, lɛni kani na ɔkɔ ala batinane bammɔ udu badubɔkya-mii akɔ. Badubo ɔkɔ bɔnyi bɔtina ala na ulu ɔni lɛlɔ na ɔdi ka bekyuli basia bada bana ngba lɛlɔ. Nsu ɔmmɔ ɔdubɔya na bekyuli bayii. Na badubuni ala ƒui lɛlɔ ɔdine Blɔti ɔni nédie-ma ɔ́lɛku bana ekpidi kemo. Na ɔmmɔ ndubɔyila-ma udu. ² Baƒɔtaadine pii lɛnɔ badubɔbla ala ekpidi ani na ɔkɔ ala batinane bamɛni baabla. Na si bani nátaƒɔ bátadi bánu lɛla lɛni baƒɔtaadine bamɛni baabla ni, ama lɛnɔ badubɔtɛmi enyekpi na Kristo bɔƒɔtaadi lɛlɔ. ³ Ɔkɔ ala batinane bamɛni bɔdubɔkɛ egulabi kɔsia na bina lɛlɔ na ɔkɔ ala ani na badubɔnwi basu-mii ɔsu, ɔsika baayɔ́ ama lɛti lɛkɛ geen. Ukyuli ɔni ndubɔtɛku-ma litemi ɔ́ɔklibi lɛlɔ úse-ma kuuku. Na ukyuli ɔmɛni ɔni ndubo-ma bɔkyula ni, ɔɔnu-ma nwaa. ⁴ Katɔti útenye útanu batu bani náƒiɔ-nwu. Mmomu úbo-ma útákya abi kebokɔ. Na ɔ́ya na bébo-ma kɔgba bákya kasuudikɔ mmɔ wetédu limeyi lɛni na ɔdubɔtɛku-ma litemi. ⁵ Lɛni kani na ɔ́bla bekyuli bani nákya kukuuku lɛnɔ. Nsu Noa ɔni násu bekyuli kalɛ na Katɔti ɔɔwia ka bekyuli belie ngba ku nwuna badi maatɛ kani na údie. Na ntu bɔ́ƒɔ kayawi ƒui na bɔ́nyina bekyuli bakladi na békpi. ⁶ Na Sodom ku Gomora lɛnɔ ni, Katɔti ɔ́du-ma kɔtɔ na ɔ́kyula-ma ku ogya úti-ma ɔ́tina-bu na bɔnu bɔtɛya lɛla lɛni ndubo bekyuli bani naaabu Katɔti lɛlɔ. ⁷ Katɔti údie Lot ɔni nse siin, ɔsika ngba bukpidi ku lɛyalɛ ala ani na bekyuli bammɔ baabla áda-nwu ɔƒɛ. ⁸ Bana ala ekpidi ani na bataabla na ukyuli ɔbuni ɔmɛni útaanu uwi ɔni na ɔ́kya-ma akɔ ƒui ni, átaada-nwu ɔƒɛ geen. ⁹ Ɔmɛni ɔɔtina ka Katɔti ɔgyi kalɛ na udie bekyuli babuni ɔlɛku ala ani muukpóku-ma kemo na ɔda bekyuli bekpidi use ute uwi ɔni na ɔdubɔni-ma kɔtu na litemi bɔtɛ limeyi lɛmmɔ lɛlɔ. ¹⁰ Na bani geen na ɔdubɔni kɔtu utulo ndi bani na ɔlɔna ala aada-ma ɔkwɛ na balábu Katɔti munu munu. Bekyuli bamɛni ni, beesé kayi kekpidi muedi teedumi kayaa bayikune. ¹¹ Nsu Katɔti batu muedi bani mbo ɔyikun ku ɔkplu betulo bekyuli bamɛni ni, balakana Katɔti anumi bunye na bedumi kayaa bayikune bamɛni. ¹² Nsu bekyuli bamɛni udu ni, baabla ala aani kalɛ na bebuo bani nnye nte ka beƒie-ma badu bese. Lɛlɔ kemo kani na beenú ala kɔku taati. Bekyuli bamɛni baata teenye taatɛmi enyekpi na lɛla biala lɛni na bétenu kalɔ lɛlɔ. Na Katɔti ɔdubɔyila-ma udu aani kalɛ baadú beƒiebuo teevaakun. ¹³ Katɔti ɔdubɔya na bebo abi aani kalɛ na ama báya na bekyuli bébo abi kalɛ. Bana ebiti ndi ka badi lɛla biala ɔdivo ku ɔƒiiwi nwaa muedi. Ɔdi kɔƒa litemi ka basalaku-mii si bɛɛdi. Na bana ɔkɔ ala kani mɔɔda-ma kubiti. ¹⁴ Lɛsɔnɔdi lɛ́ƒɔ-ma anu ƒui, na likpidi ala ɔkwɛ uláda-ma bɔda taaya kudii. Baatɔ́lɔ bekyuli bani bɔƒɔtaadi nátayu tɔ ɔkplu. Na baabla ekpidi. Na ama alati bébimi bana kaƒɔ bése ka beteemu ala taadi. Katɔti úwida bekyuli bamɛni geen. ¹⁵ Bédeyi bɔƒɔtaadi ulu ɔmmɔ ƒui, na báyii ulu. Basiaku Boer ubidi Bileam ɔbladu kama ɔni mɔɔbla ala ekpidi teeti taakɛ egulabi. ¹⁶ Ɔmmɔ ɔsu Katɔti ɔ́dɔnku Bileam na nwuna likpidi lɛmmɔ ɔsu. Nwuna ebuo ɔni muuti-nwu ala útemiku-nwu ukyuli butemi na ɔ́bala-nwu ɔnii ɔda adɔlɔla ammɔ ɔya. ¹⁷ Bekyuli bamɛni bese aani abiɔ ani nákwi, iye uyɔlɔ ɔni na ɔƒɛƒɛɛ ɔda ɔɔvínku. Ama na Katɔti ɔ́da kesii kani nse suu mmɔ úse. ¹⁸ Baasu etemila keeke taatalaku lɛlɔ katɔ. Na bada ɔlɔna ɔkwɛ adala baatɔ́lɔ bani nétetu tɔ uwi ka báda ngba bukpidi bulie báya. ¹⁹ Ɔkɔ ala batinane bamɛni beesé kenye ka badubɔbla bana kama basiakune na bakɛ bɔnwuna uwi ɔni na ama alati bénwini kabla bablane béte ekpidi ani ndubo-ma bɔkyula. Ɔsika ukyuli ɔdi kabla ɔblane ute lɛla lɛni nádi-nwu lɛlɔ. ²⁰ Si bekyuli bávumana kayi na Katɔti údie-ma ɔ́lɛku ala ani muukpóku-ma ƒui kudɔ ka báƒɔ Blɔti ku Ɔƒɔne Yesu Kristo asa na básɔ bénwini bésie belie bana ngba kuuku bɔmmɔ ni, bana ablala eebie teetulo kalɛ na úse kalɔ kesekɔ ƒui. ²¹ Si nka bétenu ngba siin bulie lɛlɔ litemi kudii muedi ni, nka ɔdia-ma utulo. Nsu bénu-ni asa na básɔ bédeyi ulu ɔmmɔ, na baládi ɔda bubo kedee bɔni na béte-ma lɛlɔ. ²² Sɔsɔ na ɔdi ka agba ani na bébo ébo éte lɛni na bana lɛlɔ ka akpɛwe ɔsɔ uuti nwuna kɔdala taadi, na ɔplakuo ɔni na bákpila-nwu ɔsɔ uunwíni taatákpi aba.

¹ Mina banwa bayɔne, ɔmɛni ndi ɔku unyɔdi ɔni na línweni muute-mii. Líti lɛ́sia lɛlɔ ka lɛku inyɔ bɔmɛni kemo ni, ndubɔsɔ lɛgyila-mii kasusu na kabla-mii nwaa na ala amɛni lɛlɔ. ² Mɔɔyɔ́ ka binyimo ala ani na Katɔti kenye bediene kedee básu dii ku ala ani na batalane bátina na Blɔti Yesu Kristo lɛlɔ. ³ Kudeedi ni, bɛya na ɔbla-mii nwaa ka na emeyi ekplodi ammɔ kemo ni, bekyuli bani nsiaku bana ɔlɔna ala ɔkwɛ adala kama badububo-mii kudɔ na bama-mii. ⁴ Na badubuye-mii banii, “Wɛ na ukyuli ɔni ndubo mmɔ ɔkya? Ɔsika ɔ́si uwi ɔni na bula bati békpi ni, lɛla lɛdi biala lɛmua lise aani uwi ɔni na bédie kayawi kalɛ!” ⁵ Na bagyi ƒui nsu béni kalɛ na Katɔti útemi na úti údie katɔ ku kalɔ. Ɔ́bla na kalɔ kákɔ kálɛ ntu kemo. ⁶ Na ɔkɛnku ntu bɔmmɔ kani lɛlɔ ni, ɔ́ya na ntu búyi bɔ́ƒɔ kalɔ kammɔ lɛlɔ ƒui, na ɔ́du kuuku bekyuli bammɔ. ⁷ Na litemi lɛni lɛlɔ na ɔkɛ údie katɔ ku kalɔ ƒui ni, litemi lɛmmɔ kani na úti ɔda kayawi kammɔ use ute uwi ɔni na ɔdubɔkyula-ka ku ogya. Na Katɔti ɔ́bla lɛni úse úte limeyi lɛni na ɔdubɔtɛku bekyuli bekpidi litemi na ɔkyula-ma. ⁸ Banwa bayɔne, ɔƒɛni ni, bitayiƒla lɛnɔ ka na Katɔti anumi ni, kavumana kadi keeebo limeyi linwi ku akwa apimu kemo. Ɔsika ɔna ƒui use-nwu likeke. ⁹ Katɔti uuuse nyɔɔ ka ɔbla lɛla lɛni kenye na ɔ́su úse aani kalɛ na badi baakali. Mmomu ni, ɔɔkɛ́ kayi teete-bu. Ɔsika ulayɔ ɔnii ɔdi ɔyii. Mmomu ɔɔyɔ́ ka bula ƒui bɔda bula ekpidi bɔbla bɔya. ¹⁰ Nsu Blɔti limeyi likplodi lɛmmɔ ni, lɛdubo-bu buyu bɔtu. Na bɔdubunu kɔku bonwu kɔdi. Na kayaa kadubo bɔyii udu. Na ala ani ƒui nkya kayaa mmɔ ni, adubɔkywi kede kede! Na kalɔ ku kana ala ƒui adubo bɔyii. ¹¹ Na si ala amɛni ƒui adubɔkywi lɛni ni, dɛ na ɔlɛka bɛda bina lɛlɔ? Ɔdi ka bɛda ngba bɔni nse kedee na biti lɛlɔ bite Katɔti. ¹² Na kalɛ na bíti bilie siin bɛgya Blɔti limeyi lɛmmɔ ni, anwu ndubɔya na limeyi lɛmmɔ libo pla. Limeyi lɛmmɔ na kayaa kadubo bɔkywi, na ogya liwulu lɛdubɔya na ala ani nkya kayawi ƒui ayɛɛlɛ. ¹³ Nsu abu bunye bɔgya Katɔti kenye kani na úse-bu úse kani ndi katɔ kawɔdi ku kalɔ kawɔdi kani kemo na ala bɔbla siin sɔɔn ndubɔkya. ¹⁴ Anwuɔsu ni, mina banwa, bina ƒui anu asia Blɔti limeyi lɛmmɔ bubo lɛlɔ. Na uwi ɔni binye bɛgya-nwu ni, bɛya na amii ku Katɔti ntɛ bɔdia na bilabla likpidi iye biláƒiɔ-nwu. ¹⁵ Na bɛbu bɛnu kalɛ na Katɔti ɔɔkɛ́ku-mii kayi. Ɔmmɔ ndi kuƒi kɔni na úte-bu ka bɔkɛ ngba bɔƒɔ. Lɛni kani na Ɔnwa Paulo ɔkɛnku lɛlati lɛni na Katɔti úte-nwu kenye únweni ɔku úte-mii. ¹⁶ Na ɔmɛni lɛlɔ kɔtɛ kani na ɔɔtɛmiku-mii si uunweni nwuna lɛku. Ɔƒɛni ni, nwuna ala adi bene kalɔ bunu bɔɔyu ɔkplu teete bekyuli bani néteduo tɔ litemi lɛmmɔ kemo kaduɛ ku bani naaasia ulu geen ɔmmɔ lɛlɔ. Lɛni kani na Bunweni Kedee Ɔku kemo etemila lɛnɔ ese ete-ma. Anwuɔsu beedie-nya kalɔ na ulu bamba lɛlɔ. Ɔmɛni ɔsu na badubo bɔyii ku udu. ¹⁷ Nsu ni, mina bayɔne, bɛgyi ɔmɛni bise. Anwuɔsu bɛti lɛlɔ bɔda kalɛ na bekyuli bekpidi balátɔlɔ-mii ku bana ekpidi ablala na bideyi ulu geen ɔmmɔ lɛlɔ. Naaawia ka bina bɔƒɔtaadi bɔyuɛ! ¹⁸ Bisie anumi na Katɔti lɛƒɔndia ku kalɛ na bɛ́ƒɔ Blɔti Yesu Kristo ɔni ndi bula Ɔƒɔne bɛ́di kemo. Anwu na buute ɔbu ɔ́si ɔƒɛni úsela ƒui! Ɔsia lɛni.