2 KORINTOƑUƆ

2 KORINTOƑUƆ

¹ Ami Paulo ɔni nkɛnku Katɔti lɛƒɔyɔ lɛlɔ na ndi Blɔti Yesu Kristo ɔtalane ni, ami ku Ɔnwa Timoteo muunweni ɔku ɔmɛni bute amii Korintoƒuɔ bani néti lɛlɔ bíte Katɔti ku bekyuli bani ƒui mɔɔbla Katɔti kabla na Akaia kalɛkɛ lɛlɔ mmɔ. ² Buuvele bɔnii Unwoti Katɔti ku Blɔti Yesu Kristo lɛƒɔndia ku keyi buɛɛ kasiaku-mii. ³ Bɛya na bɔgya Katɔti ɔni ndi Blɔti Yesu Kristo Ɔti enu. Anwu ndi Ati ɔni mɔɔnu-bu kɔnyana, na nwuna kudɔ na kebunku kaasí. ⁴ Anwu mɔɔsia-bu kɔnu na bula lɛbibo biala kemo, kalɛ na abu lɛnɔ bɔkana na bubunku bula bekyulikpana na bana lɛbibo biala kemo. Na kalɛ na Katɔti uubunku-bu ni, lɛni na abu lɛnɔ buubunku bekyuli. ⁵ Ɔsika kalɛ na buubó abi geen ani udu na Kristo lɛnɔ úbo na Katɔti ɔ́sia-nwu kɔnu ni, lɛni kani na ɔkɛ bula unwi bɔbla ku Kristo na Katɔti lɛnɔ ɔɔsia-bu kɔnu geen. ⁶ Uwi biala si ami ku mina banwani buubó abi ni, bɔɔkana na bɔkya-mii ogya na bɛkɛ bɔƒɔ lɛnɔ. Katɔti ɔɔsia-bu kɔnu uwi ɔni na buubó abi biala. Lɛni kani na ɔdubɔsia amii lɛnɔ kɔnu uwi biala kemo na biisé kayi teebo abi. ⁷ Bubo lɛnunsia lɛni naaayuɛ na bina lɛlɔ, ɔsika bɔgyi ka kalɛ na biibó abi ani udu na abu lɛnɔ buubó mɛni ni, lɛni kani na Katɔti ɔdubɔsia-mii kɔnu aani kalɛ na ɔɔsia abu lɛnɔ kɔnu. ⁸ Banwa, bɔɔwia ka bɔsu-mii abi ani udu na búbo na Asia kalɛkɛ lɛlɔ. Lɛbibo lɛmmɔ línwini etila líte-bu ɔni na bɔsɔ buuubo lɛnunsia lɛdi bɔnii bɔdubɔkɛ ngba muedi. ⁹ Ɔ́bla-bu aani si kukpi kɔtɔ na bádu-bu! Nsu ɔmɛni úbo úte lɛni kalɛ na buti bula anu bɔsia Katɔti ɔni mɔɔgyila bekpine na baasɔ teebelie ngba lɛlɔ. Ɔɔɔdi abu alati bula lɛlɔ na buti anu bɔsia. ¹⁰ Údie-bu ɔ́lɛku kukpi ɔgbankpi ɔmmɔ kemo. Na ɔdubudie-bu lɛnɔ. Sɔsɔ ni, nwuna lɛlɔ na bɔɔsia anu ka ɔdubo-bu buteedie lɛnɔ. ¹¹ Ɔlɛka amii lɛnɔ bibunku-bu na bɛkpali katɔ bite-bu. Ɔsika si bekyuli pii bákpali katɔ na Katɔti úbunku-bu ni, bekyuli pii badubɔgya Katɔti enu na kalɛ na úbunku-bu ɔsu. ¹² Lɛla lɛni ɔsu na bɔɔkun lɛmɛnɛ ndi ka bula kayi kaladu-bu kɔtɔ, ɔsika bɔ́da bula lɛlɔ kaduɛ na bekyuli ƒui akɔ. Na abu ku-mii kelie kakɛ Katɔti ulu lɛlɔ, na katɔlɔ keeebo-nwu kemo. Ɔɔɔdi kayawi kamɛni kemo lɛnunda na búti bulieku-mii lɛni, mmomu Katɔti lɛƒɔndia ku nwuna ɔyikun lɛlɔ na bɔ́sia. ¹³ Ala ani na bɛkana bɔka na binu kalɔ ni, anya lɛti na buunweni teete-mii. Na lɛ́ƒɔ lɛ́di ka bɛdubunu ala amɛni kalɔ ƒui, ¹⁴ aani kalɛ na bínu ekpo adi kalɔ. Na bɛdubunu kalɔ ka bɛkana bɛkun lɛmɛnɛ na bula lɛlɔ, na abu lɛnɔ bɔkun lɛmɛnɛ na bina lɛlɔ na limeyi lɛni na Blɔti Yesu Kristo wasɔ webo lɛlɔ. ¹⁵ - ¹⁶ Ka lɛ́ƒɔ lɛ́di ka bɛ́ƒɔ-mi ku kayi ƒui ɔsu ni, lɛ́bla kasusu kudeedi ka lɛka-mii kudɔ bubo bubavi na Makedonia asa na linwini libo kalɛ na bibunku-mi si lísela Yudea. Nka ɔmmɔ ndubɔya na bɛkɛ ebiti kunyɔ kunyɔ. ¹⁷ Uwi ɔni na lɛ́bla mina kasusu ka lɛvumana bina kudɔ bubo ni, ɔmmɔ ulátina ɔnii mina ablala eeese siin. Na ɔɔɔdi kayawi kamɛni ala kakali kenye na líti mɔɔbla mina kasusu kammɔ aani ukyuli ɔni mɔɔbabla taasu ɔnii ɛɛn ku oowo. ¹⁸ Mmomu kalɛ na Katɔti ɔɔdi nwuna etemila lɛlɔ geen ni, lɛni kani na lɛla biala na búnweni búmene-mii lise. Na lɛɛɛdi kalɛ na ukyuli ɔɔbabla taasu ɔnii ɛɛn ku oowo na ɔdi. ¹⁹ Katɔti Ubidi Yesu Kristo ɔni lɛlɔ litemi lɛsa na ami ku Silvano ku Timoteo bɔɔkɔ́ teete-mii ni, ɔɔɔdi ɛɛn ku oowo ukyuli. Mmomu ɔdi ukyuli ɔni litemi ndi ɛɛn uwi biala. ²⁰ Ɔsika Katɔti kenye biala na úse-bu úse ni, kébo kéte lɛni na Yesu Kristo lɛlɔ. Ɔmmɔ ɔsu na bɔɔsu na nwuna lɛnyi kemo bɔnii, “Ɔsia lɛni.” Na buti bumwi bute Katɔti. ²¹ Katɔti ɔ́ya na abu ku-mii ƒui bɔ́bla unwi ku Kristo, na anwu ɔlati náƒuna-bu úse ka butaabla nwuna kabla. ²² Anwu nése-bu likpo úti ɔ́tina ka anwu mbo-bu uwi ɔni na úti nwuna Kɔyu ɔ́kya-bu lɛlɔ kemo. Na kuna lɛlɔ na búti bula kama búkpo na ala ani ƒui na ɔ́klibi úse úte-bu lɛlɔ. ²³ Katɔti ɔlati ɔgyi ka naaayɔ ka libo mbani-mii kɔtu. Na ɔmɛni ɔdubɔya na lɛla lɛdi lɛsɔ lilékpoku-mii ka ɔɔɔdi ɔmɛni ɔsu na lɛ́bla kasusu nnii neeebo Korinto tɔ. ²⁴ Ɔɔɔdi banii bɔɔdi-mii lɛlɔ na ala amɛni kemo. Bɔgyi geen kalɛ na bɛda bina bɔƒɔtaadi kpakplaa. Anwuɔsu abu ku-mii bɔɔsála taabla kabla na bɛkɛ ebiti.

¹ Ɔmɛni ɔsu lɛ́bla kasusu ka nsɔ neeebo-mii kudɔ na enu aƒɛ-mii. ² Ɔsika si lɛ́ya na enu áƒɛ-mii ni, ɔdi lɛnɔ ɔ́sɔ uuubo na waya na lɛlɔ lɛyɔ-mi, amu ntu amii bani na lɛ́ya na enu áƒɛ mmɔ kani. ³ Na línweni ɔku kpakplaa ɔmmɔ límene-mii ɔsika si bubo na líbo-mii kudɔ uwi ɔmmɔ kemo ni, nka bɛdubɔya na enu aƒɛ-mi. Nsu amii ndi bekyuli bani nálɛka bɛya na lɛlɔ lɛyɔ-mi. Na lɛ́ƒɔ lɛ́di ka si lɛlɔ lɛɛyɔ́-mi ni, amii lɛnɔ lɛlɔ lɛdubɔyɔ-mii. ⁴ Sɔsɔ ni, ɔku ɔni na línweni-mii mmɔ ni, línweni-nwu na kayi ɔlɛ bunu ku enuƒɛ ku keku buwulo kemo. Na ɔɔɔdi ka mɔɔwia nnii amii lɛnɔ binu ɔlɛ ɔdi, mmomu kalɛ na bɛnu bɛti ka mɔɔyɔ́-mii geen ɔsu. ⁵ Anwuɔsu ukyuli ɔni bɔƒiɔ lɛlɔ litemi línweni-mii ni, ɔɔɔdi ami lɛti na ɔ́ƒiɔ. Mmomu bɔkana bɔsu bɔnii ɔ́ƒiɔ bina ƒui. Nsu naaayɔ ka bɔdɔnku-nwu bɔgya. ⁶ Ɔsika ukyuli ɔmmɔ ni, kɔtu kɔni na bina akɔ pii bɛ́ni-nwu mmɔ ni, ɔmmɔ kani ɔbɔ. ⁷ Na ɔƒɛni ni, biti bɛkyiɛ-nwu na bɛkya-nwu ɔkplu kalɛ na lɛlɔ lilayuɛ-nwu na enu aƒɛ-nwu ƒui. ⁸ Ɔmɛni ɔsu ni, bise-nwu kayi na bidie bɛtina-nwu ka bɛmua bɛɛyɔ́-nwu. ⁹ Ɔmɛni ɔsu na línweni-mii ɔku na lɛ́wia nnii mɔɔtí kalɛ na binye kpakplaa na bɛda mina ala ani ƒui na lɛ́tina-mii kaduɛ uwi biala. ¹⁰ Si bíti ukyuli ɔmmɔ bɔƒiɔ bɛ́kyiɛ-nwu ni, ami lɛnɔ líti lɛ́kyiɛ-nwu. Na si bɔƒiɔ bɔdi bɔkya bɔni na ɔlɛka liti lɛkyiɛ-nwu ni, líti lɛ́kyiɛ-nwu na Kristo anumi kalɛ na bɛbla unwi. ¹¹ Ɔmɛni ndubɔya na butile ukisine ɔmmɔ kuƒi na ulákɛ kasiakɔ kadi na bula lɛlɔ, ɔsika bɔgyi-nwu kɔkwɛ. ¹² Uwi ɔni na líbo ḿbakɔ Kristo litemi buni lɛmmɔ lɛsa na Troas ni, Blɔti ɔ́lɛmi kuƒi ka lɛbla nwuna kabla na mmɔ. ¹³ Nsu mina kasusu kétete-mi bɔnwuna bɔdi, ɔsika ńtanu mina ɔnwani Tito na mmɔ ka línu-mii kɔku. Ɔmmɔ ɔsu lívele ulu na lɛ́tɔlɔ lísie Makedonia. ¹⁴ Nsu ni, bɔ́gya Katɔti enu! Na bula unwi bɔbla ku Kristo ni, Katɔti ɔɔtɔnku-bu uwi biala na bɔkɛ bekyuli bani muusié taavi na Kristo lɛlɔ bɔdi kemo. Na Katɔti ɔsia-bu lɛlɔ na udie Kristo ɔtina kayawi ƒui aani kalɛ na ɔnyi ƒɛƒɛɛ ɔɔƒɔ́ likpo lɛdi ƒui. ¹⁵ Buse bute Katɔti aani ɔnyi ƒɛƒɛɛ ɔni nási Kristo lɛlɔ. Na ɔkɛ ɔɔví bekyuli bani nkɛ ulu buni lɛlɔ bésela ngba bɔƒɔ ƒui kemo ku ama bani nkɛ ulu ukpidi lɛlɔ bésela bɔyii ƒui kemo lɛnɔ. ¹⁶ Bekyuli bani naaadubo bɔkɛ ngba bɔƒɔ ni, ɔnyi ɔmɛni ɔɔtina ka badubɔyii ku udu. Na bekyuli bani ndubɔkɛ ngba bɔƒɔ ama ni, ɔnyi ɔmɛni ɔɔtina ka badubɔkɛ ngba ƒui. Na ɔma geen ndubɔkana na ɔbla kabla kamɛni si ɔɔɔdi kuƒi na béte-ɔ? ¹⁷ Abu buuuse aani bekyuli babambadi pii bani nkɛ bada litemi lɛmmɔ baadi kuye. Mmomu Katɔti úte-bu kenyekɔ na bɔɔkɔ́ litemi lɛmmɔ lɛsa na nwuna anumi aani Kristo kabla bablane kalɛ. Bulatɔlɔ bekyuli.

¹ Ɔmɛni ulátina ka buukú lɛlɔ aani si bɔdi lɛla lɛdi. Buuuse aani bekyuli bamba bani mɔɔwia kakunkɛ kani medie-bu matina-mii. Na lɛni kani na buláwia ka bɔsu-mii bɔnii binweni kakunkɛ kadi na bidie-bu bɛtina bekyuli bamba badi. ² Ɔsika amii alati ndi bula kakunkɛ kani na Katɔti únweni ɔ́sia-mii kayi lɛlɔ. Na ukyuli biala ɔdubɔnu bula udu ɔti na bina lɛlɔ. ³ Use nwaa ka Kristo ɔlati ɔ́sia-bu lɛlɔ na ɔ́ya na bɛ́ƒɔ bɛ́di. Anwuɔsu bise aani ɔku ɔni na únweni. Ɔɔɔdi unwenigyii na úti únweni ala ammɔ. Mmomu Katɔti Kɔyu ɔyikun na úti na únweni-nya ɔsia. Na ɔɔɔdi atabi lɛlɔ na únweni ɔ́sia aani kalɛ na ɔ́bla kukuuku, mmomu bekyuli kayi. ⁴ Bɔ́kana bɔɔsu ɔmɛni na kenyekɔ kani na Katɔti úte-bu na Kristo ɔsu. ⁵ Buuubo kenyekɔ kadi na abu alati lɛlɔ ka bɔbla kabla kamɛni. Mmomu Katɔti kudɔ na kási. ⁶ Anwu úte-bu kenyekɔ ka bɔtina bekyuli kalɛ na badi bunyimi bɔwɔdi bɔni na Katɔti únyimi ku bekyuli mɛni lɛlɔ. Na bunyimi bɔwɔdi bɔmɛni bɔɔɔdanku ɔda bubo bɔkukudi bɔni na bénweni. Mmomu bɔdanku Katɔti Kɔyu. Ɔsika ɔda bubo bɔkukudi bɔmmɔ ni, bɔɔdú-bu kukpi kɔtɔ. Nsu Katɔti Kɔyu muute-bu ngba. ⁷ Katɔti ɔda bubo bɔni na bénweni kukuuku mmɔ ni, bɔdi etemila ani na bánwi bámana atabi lɛlɔ. Na uwi ɔni na béti-nya béte bekyuli ni, Katɔti bukeye bɔ́ya na Mose anumi eekeye. Na ina ka bukeye bɔmmɔ bɔɔƒana na Mose anumi muedi ni, Israelƒuɔ bátakana na benye bataanu-nwu anumi. Na si ɔda bubo bɔni mɔɔdú-bu kukpi kɔtɔ bɔ́da bɔ́lɛ uwi ɔmmɔ ku Katɔti bukeye bɔmmɔ udu ni, ⁸ nwuna Kɔyu ablala bɔdubɔda bɔlɛ ku bukeye bɔni ntulo budeedi bɔmmɔ ƒui! ⁹ Na si ɔda bubo bɔkukudi bɔni muuti kɔtɔ bɔdu teete ukyuli bɔdanku bukeye bɔmɛni udu ni, ɔlɛka bɔti ka litemi buni lɛni mɔɔbla-bu siin ni, nina bukeye butulo budeedi ƒui. ¹⁰ Bɔɔsu ɔmɛni ɔsika bukeye bunengudi ƒui bɔni kemo na bɔkya ɔmwi mɛni ni, bɔ́ƒɔ bukeye bɔkukudi bɔmmɔ ƒui. ¹¹ Na si lɛla lɛni na nina uwi ɔ́vi líkeye lɛni uwi ɔmmɔ kemo ni, bɛgyi bɛnii lɛla lɛwɔdi lɛni neeebo kawɔkɔ ni, nina bukeye butulo bɔmmɔ ƒui. ¹² Na ka bubo lɛnunsia na lɛla lɛwɔdi lɛni neeebo kawɔkɔ lɛlɔ ɔsu ni, anwuɔsu na buusé kayi taasu lɛla biala nwaa. ¹³ Na abu buuuse aani Mose ɔni néti lɛdiku úbi anumi kalɛ na Israelƒuɔ balanu baláti ka Katɔti bukeye bɔni na nsia-nwu anumi bɔɔƒana. ¹⁴ Sɔsɔ na ɔdi ka bana kasusu kalánu ɔmɛni taati. Use aani si lɛdiku lɛmmɔ udu kani lɛmua libi-ma kasusu lɛlɔ si baaká bunyimi bɔkukudi ɔku ɔmmɔ kemo etemila. Ɔsika lɛla lɛni kani na ndubɔya na lɛdiku lɛmmɔ lɛmami ndi si ukyuli úti lɛlɔ ɔ́mana Kristo. ¹⁵ Sɔsɔ úti úbedu ku ɔmwi ni, si baaká Mose ɔda bubo ɔku kemo etemila ammɔ ni, use aani lɛdiku lɛmmɔ lɛmua libi-ma kasusu lɛlɔ na belenu-mu kalɔ. ¹⁶ Nsu ni, aani kalɛ na Bunweni Kedee Ɔku kemo etemila aasu ni, si ukyuli únwini úbo Blɔti kudɔ ni, lɛdiku lɛmmɔ lɛɛmami-nwu kasusu lɛlɔ na uunú etemila ammɔ kalɔ. ¹⁷ Na ɔƒɛni ni, Blɔti ɔni na bɔɔlɔ mɛni ni, anwu ndi Katɔti Kɔyu. Na kesii kani na Katɔti Kɔyu kɔkya ni, lɛla lɛdi lɛsɔ lilényimi ukyuli. ¹⁸ Na abu baƒɔtaadine bani na lɛla lɛdi liiibi-bu anumi ni, bɔɔnu Blɔti bukeye nwaa. Na Blɔti ɔni ndi Katɔti Kɔyu mɛni ni, anwu mɔɔvumana-bu udu taabla nwuna udu kalɛ na buteekeye teebu.

¹ Katɔti ɔ́nu-bu kɔnyana na úti kabla kamɛni ɔ́kya-bu enu kemo. Ɔmmɔ ɔsu na enu aláƒɛ-bu. ² Búdie abɛla ku kɔƒa ala bɔbla atu. Na bulányi ɔkɔ taabla kabla kadi na bulátu Katɔti litemi lɛmmɔ teenwini. Bɔɔsu litemi buni lɛmmɔ nwaa na Katɔti anumi kalɛ na ukyuli biala ɔdubɔnu bula ɔbladu buni ɔti. ³ Na si litemi buni lɛni lɛsa na bɔɔkɔ́ mɛni lɛmua lise bekyuli badi suu ni, bɛgyi bɛnii bekyuli bani ndaku bɔyii na use ute lɛni. ⁴ Na bekyuli bammɔ ni, ukisine ɔmmɔ ɔ́bwɛ ama bani naaaƒɔ taadi anumi. Na uutile-ma kuƒi kalɛ na balanu bukeye bɔmmɔ. Na bukeye bɔmɛni bɔɔsí litemi buni lɛni nkɛnku Kristo bukeye bɔni ndi Katɔti ɔmmɔ ɔlati udu geen kemo. ⁵ Bulakɔ abu alati lɛlɔ lɛsa teete-mii, mmomu Yesu Kristo lɛlɔ lɛsa na bɔɔkɔ́ teete-mii ka ɔdi Blɔti. Na abu bɔdi kabla bablane bute-mii na Kristo ɔsu. ⁶ Katɔti násu na kalɔ kesekɔ ɔnii, “Bukeye bɔƒɔ kasuudikɔ.” Na anwu kani náya na bukeye bɔmmɔ búkeye na bula kɔyi kemo. Na bukeye bɔmmɔ náya na bɔ́nu Katɔti bukeye bɔni muukeye na Kristo anumi bɔ́ti. ⁷ Na abu bani mbo Kɔyu kemo akɛla enengudi amɛni ni, buse aani ebwi avɔdi ani nátamanku ala ammɔ bɔkya. Na ɔmmɔ mɔɔtina geen ka ɔɔɔdi bula kudɔ na ɔyikun ɔmmɔ ɔ́si, mmomu Katɔti kudɔ na ɔ́si. ⁸ Buubó abi uwi ndi uwi, nsu lɛbibo lɛmmɔ lítetulo-bu. Kasusu keekpóku-bu, nsu enu átaƒɛ-bu. ⁹ Bekisine pii basiaku-bu, nsu Katɔti útedie-bu atu. Ina ka bébo-bu banii baadú-bu muedi ni, bútekpi. ¹⁰ Bɔkya ɔgbankpi kemo uwi biala ka badu-bu aani kalɛ na bádu Yesu. Nsu kalɛ na bɔmua buli ngba mɛni ni, lɛni kani na ɔɔtina ka Yesu lɛnɔ uli ngba. ¹¹ Sɔsɔ na bula ngba bulie kemo ƒui ni, bɔkya kukpi ɔgbankpi kemo na Yesu ɔsu. Nsu ɔyikun ɔni na úte-bu na bula ɔlɔna kemo ɔsu ni, ɔdubɔya na bekyuli banu nwuna ngba bati. ¹² Ɔmɛni ɔsu bɔkya ɔgbankpi lɛbibo kemo uwi biala, na amii bɛɛkɛ́ kɔyu kemo ngba. ¹³ Bénweni na Bunweni Kedee Ɔku kemo banii, “Lɛ́ƒɔ Katɔti lɛ́di, anwuɔsu na lɛ́kɔ-nwu lɛlɔ lɛsa.” Na lɛni kani na abu lɛnɔ bɔ́ƒɔ bɔ́di ɔsu na bɔɔkɔ́ litemi buni lɛmmɔ lɛsa. ¹⁴ Na bɔgyi ka Katɔti ɔni ńagyila Yesu ɔ́lɛku bekpine akɔ ni, lɛni kani na ɔdubɔgyila abu lɛnɔ na uti abu ku-mii ƒui usienku Katɔti anumi. ¹⁵ Bina kadia ɔsu na ala amɛni ƒui aalɛ́ lɛni. Na si bekyuli pii baakɛ́ bɔƒɔ teebu ɔkɛnku Katɔti lɛƒɔndia ɔsu ni, lɛni kani na badubo-nwu enu lɛnɔ butaagya teebu si beeti ɔbu teete Katɔti. ¹⁶ Kasusu kamɛni ɔsu na enu aláƒɛ-bu si ina bula ɔlɔna ugyii ɔmɛni ɔɔyii udu muedi ni, bɔgyi ka bula kɔyu kemo ngba bulie bɔɔbla ɔwɔdi uwi biala. ¹⁷ Na abi blii suɛ ani na buubó na uwi klukui ɔmɛni kemo na kayawi mɛni ni, adubɔya na bɔkɛ ɔbu ku lɛlɔyɔ bonwu lɛni nsɔ naaadubo bɔsa kudii na katɔ. Na lɛdubutulo abi ani na búbo ƒui. ¹⁸ Ɔsika búti bula anu bɔ́sia ala ani na bula anumi alakana bɔnu lɛlɔ, na ɔɔɔdi ala ani na bula anumi aakana bɔnu. Na ala ani na bula anumi aakana bɔnu ni, uwi klukui ɔdi kani na anya aakya. Na ani na bula anumi alakana bɔnu ni, ese ésela uwi ƒui.

¹ Na si bula ɔlɔna ɔni nse aani kevo kani kemo bulie na kayawi kamɛni kemo kébie ni, bubo ɔtɔ na Katɔ Ɔga Ɔma. Na ɔtɔ ɔmmɔ ni, anwu ɔlati néti nwuna enu ɔ́tu-nwu, na ɔdubunye uwi ƒui. ² Na uwi ɔni kemo na bɔmua bɔkya kayawi kamɛni ɔlɔna kemo ni, buuubo bɔnwuna bɔdi. Na bɔɔnu ulu kpakplaa ka bɔkɛ Katɔ Ɔga Ɔma ɔlɔna. ³ Na si bɔ́kɛ ɔlɔna ɔmmɔ ni, ulabla-bu aani si bɔkɛ kasɔngya. ⁴ Na uwi ɔni bɔmua bulie kayawi kamɛni ɔlɔna kemo ni, bɔɔnu taati ka búmii na buuubo bɔnwuna. Na ɔɔɔdi ka bɔɔwia bɔnii bɔɔnyonu kayawi ɔlɔna ɔmɛni. Mmomu bɔɔwia ka bɔkya Katɔ Ɔga Ɔma ɔlɔna kemo kalɛ na ɔlɔna ɔni nsɔ naaadubo bukpi ɔƒɔ ɔni muukpi mmɔ ƒui. ⁵ Katɔti náklibi-bu úse úte ka bɔvumana lɛni. Na úti nwuna Kɔyu úte-bu aani lɛla lɛni na buti butaanu ulu bute ala ani ƒui na ɔ́klibi úse úte-bu. ⁶ Ɔmɛni ɔsu na bɔɔkɛ́ kayi. Na bɔgyi ka si bɔkya ɔlɔna ɔmɛni kemo ni, na bulanu Blɔti ku anumi. ⁷ Na bula ngba bɔni na bulie mɛni ni, bɔkɛnku bɔƒɔtaadi lɛlɔ. Na ɔɔɔdi lɛla lɛni na buti bula anumi bɔnu bɔti. ⁸ Bɔɔkɛ́ kayi geen na bɔɔyɔ́ teetulo si bɔ́nyonu ɔlɔna ɔmɛni búse na bútánu Blɔti ku anumi mmomu. ⁹ Na lɛla lɛni na bɔɔwia teetulo ndi ka si mɛni na bɔkya o-o iye Katɔ Ɔga Ɔma o-o ni, na bɔbla Blɔti lɛƒɔyɔ. ¹⁰ Ɔsika bula ƒui bɔdubɔda bɔlɛ Kristo anumi na ɔtɛku-bu litemi. Na ɔdi biala ɔdubɔƒɔ nwuna lɛyuƒɔla lɛni námanku nwuna kabla. Lɛbuni lɛdi o-o iye likpidi o-o, ɔdubɔƒɔ nwuna lɛyuƒɔla ɔkɛnku ngba bɔni na búlie na kayawi kamɛni kemo. ¹¹ Ka bɔgyi kalɛ na ɔlɛka bɔyia Blɔti ɔsu ni, bunye bekyuli lɛlɔ ka benu-bu kalɔ. Katɔti ɔgyi-bu kede kede na mɔɔsia anu ka amii lɛnɔ bɛti bula udu kaduɛ. ¹² Ɔɔɔdi banii lɛlɔ na bɔ́sɔ buukú bɔtina-mii, mmomu bɔɔwia ka bɛkɛ kasusu kabuni na bula lɛlɔ. Mɔɔwia ka bɛkɛ kenyekɔ kabuni na abu ɔsu kalɛ na bidie kenye bɛtina bekyuli bani mɔɔkun lɛmɛnɛ na bekyuli lɛlɔ, na ɔɔɔdi ka bánu bana udu buni ɔdi báti ɔsu. ¹³ Si ina bɛɛnu-bu aani bekyuli bani na muukpi libuo na kabla kani na bɔɔbla ɔsu ni, Katɔti ɔni na bɔɔyɔ́ ɔsu na use-bu lɛni. Nsu si bulékpi libuo ni, ɔdi bina kɔsia. ¹⁴ Kristo bɔyɔ bɔni na ubo ute-bu mɔɔdi-bu lɛlɔ. Ɔƒɛni ka bɔ́nu bɔ́ti ka ukyuli unwi nékpi na bekyuli ƒui lili ɔsu ni, ɔmɛni ɔɔtina ka bula ƒui bútu kukpi kɔmmɔ kenye bɔ́nu. ¹⁵ Kristo nékpi na bekyuli ƒui lili kalɛ na bekyuli bani nli ngba ni, basɔ beeelie ngba beeete bana lɛlɔ. Mmomu belie ngba bete Kristo. Ɔsika ama ɔsu na Kristo úkpi na Katɔti ɔ́gyila-nwu ɔ́lɛku bekpine akɔ. ¹⁶ Na ɔ́si ɔmɛni kama ni, bɔsɔ bulátɛku ɔdi litemi na kayawi kamɛni kasusu kenye. Lɛni na bɔ́tɛku Kristo litemi dii. Nsu ɔƒɛni ni, bɔsɔ bulánu-nwu lɛni. ¹⁷ Anwuɔsu si ukyuli ɔdi ku Kristo bábla unwi ni, ɔgyi ɔnii únwini ukyuli ɔwɔdi. Na nwuna ukyuli udu ɔkukudi ɔmmɔ ɔ́vi. Na ɔwɔdi ɔ́ƒɔ ɔmmɔ kenye. ¹⁸ Katɔti nábla ala amɛni ƒui. Na údie lɛla lɛni nébile abu ku-nwu ntɛ kalɛ na bɔbla ku-nwu unwi ɔkɛnku Kristo lɛlɔ. Na anwu kani néti kabla kamɛni ɔ́kya-bu enu kemo ɔnii bɔkpanku bekyuli bamba buboku na ɔklibi ama ku-nwu ntɛ. ¹⁹ Na lɛsa lɛmɛni ndi ka Katɔti ɔkɛ Kristo lɛlɔ na ɔ́klibi anwu ku bekyuli ƒui ntɛ. Na údie atu na bana ekpidi ƒui lɛlɔ. Na kenye kani na ɔda úte-bu ndi ka ɔɔwia ka bɔsu bekyuli ƒui ntɛ bɔklibi litemi lɛmɛni. ²⁰ Na abu nnye Kristo kenye. Na Katɔti ɔlati nkɛ-bu lɛlɔ na ɔɔsu-mii lɛla lɛni geen na ɔɔwia taasiku-mii kudɔ. Ɔmɛni ɔsu bunye Kristo kenyekɔ buuvele-mii bɔnii bɛya na Katɔti ɔklibi amii ku-nwu ntɛ. ²¹ Kristo útabla likpidi lɛdi. Nsu bula alaekpidi lili ɔsu na Katɔti úti-nwu ɔ́bla alaekpidi ɔblane. Na ɔmɛni maya na abu bani mabla ku-nwu unwi ni, bɔbla siin na Katɔti anumi.

¹ Ka bunye bɔɔblaku Katɔti kabla ɔsu ni, buuvele-mii bɔnii bitebile Katɔti kɔnyana bɔnu. ² Ɔsika Katɔti ɔ́su ɔnii, “Uwi ɔni námanku ka lɛnu-mii kɔnyana ni, línu-mii bɔkpali. 2 Na ka limeyi lɛni na lɛƒɔ-mii lɛnɔ lídu ni, líbunku-mii.” Binu! Mɔɔsu-mii ka ɔƒaani ndi uwi ɔni námanku na Katɔti ɔnu-mii kɔnyana. Na ɔmwi ndi limeyi lɛni na Katɔti ɔƒɔ-mii. ³ Bulayɔ ka ɔdi udie-bu bɔƒiɔ bɔdi na bula kabla kemo. Ɔmɛni ɔsu bulabla lɛla lɛni maya na bekyuli belebo Katɔti kudɔ. ⁴ Mmomu ni, lɛla biala lɛni na bɔɔbla kemo ni, buudie taatina nwaa ka Katɔti kabla bablane na bɔdi. Bunye kpakplaa na lɛƒɛda ku lɛbibo ku bukpoku kemo. ⁵ Bekyuli bébo-bu na bákya-bu aban ɔtɔ na báyoli-bu. Na bɔ́bla kabla bútulo lɛlɔ, na bútatɛ bútalɛɛ, na kɔka lɛnɔ kɔ́da-bu. ⁶ Búdie lɛlɔ bɔ́tina ka bɔdi kabla bablane babuni na kalɛ na bɔda lɛlɔ sɛɛn ku kalɛ na bɔgyi Katɔti litemi buni lɛmmɔ. Buuwi lɛlɔ buɛɛ ku bula ablala na bekyuli akɔ, na bɔɔbla lɛƒɔndia. Katɔti Kɔyu kɔɔkya-bu lɛlɔ kemo, na bɔɔyɔ́ bekyuli ku kaƒɔ nwaa. ⁷ Bulatɔlɔ bekyuli ku bula lɛsa bɔkɔ. Na Katɔti ɔyikun ɔni nsiaku-bu ɔɔtina lɛnɔ ka bɔdi nwuna kabla bablane. Na bula ngba siin bulie ndi bula lɛla biala na kabla kamɛni kemo. Buse aani ekpola ani ukpone ɔda uukpó. ⁸ Bekyuli badi baabu-bu, na badi lɛnɔ beewi-bu anumi kalɔ. Badi beedumi-bu na babambadi lɛnɔ beemwi-bu. Bekyuli baanu-bu aani ɔkɔ banyine, nsu litemi geen lɛmmɔ na bɔɔsu. ⁹ Bekyuli balákpete-bu, nsu bagyi-bu kesii biala. Uwi ndi uwi bɔkya kukpi ɔgbankpi kemo, nsu bɛnu! Bɔmua buli ngba! Báni-bu kɔtu geen, nsu bútekpi. ¹⁰ Ina ka bula lɛlɔ lɛɛkywí kaƒɔ ni, lɛlɔ lɛɛyɔ́-bu uwi biala. Baanu-bu aani bawabane, nsu bɔɔyá na bekyuli beenwíni Katɔ Ɔga Ɔma balakɛne. Baanu-bu aani bekyuli bani neeebo lɛla lɛdi. Nsu geen ni, ala ƒui ása-bu. ¹¹ Banwa Korintoƒuɔ, búgyingya enu búte-mii. ¹² Ɔɔɔdi abu nétedie enu! Mmomu amii námana amangba bɛ́kya-bu. ¹³ Mɔɔtɛmiku-mii aani kalɛ na ubi ɔti ɔɔtɛmiku nwuna bebi. Na kalɛ na buugyingya enu teete-mii ni, amii lɛnɔ bigyingya enu bite-bu lɛni kani. ¹⁴ Bɛnu ka amii ku bekyuli bani naaadi baƒɔtaadine bítabla unwi na lɛla lɛni naaasia bula ulu lɛlɔ. Ɔsika lɛla lɛni nse siin ku lɛla lɛni neeese siin lilábla unwi. Na bukeye ku lɛdisa lilákya liku linwi. ¹⁵ Kristo ku ɔbɔnsamu balatunaku lɛlɔ. Lɛni kani na ɔƒɔtaadine ku ukyuli ɔni nátaƒɔ útadi beeebo kɔna. ¹⁶ Baƒiɔ ku kesii kani na Katɔti uulie ni, katamanku lɛlɔ. Anwuɔsu abu lɛnɔ bútamanku baƒiɔ, ɔsika abu ndi Katɔti ɔni neeekpi keliekɔ. Aani kalɛ na Katɔti ɔlati ɔ́su ɔnini, “Ndubɔkya-ma akɔ na lilie ku-ma, na ndubɔbla bana Katɔti, na ama lɛnɔ babla mina bekyuli.” ¹⁷ Anwuɔsu Blɔti ɔɔsu nwuna bekyuli ɔnini, “Bɛlɛ-ma akɔ, na bɛda lɛlɔ bɛmami bekyuli bani mɔɔbla lɛƒiɔkpa ala lɛlɔ. Bitetuku bana ala ani muusé lɛlɔ mmɔ, na ndubɔƒɔ-mii. ¹⁸ Na ami ndubɔbla bina Ɔti, na amii lɛnɔ bɛbla mina bebi banana ku belekubi. Lɛni na Katɔti Ɔyikune Ƒui ɔɔsu.”

¹ Banwa, ka Katɔti úse-bu kenye na ala amɛni ƒui lɛlɔ úse ɔsu ni, bɛya na bɔbla lɛlɔ sɛɛn na bɔda lɛlɔ budie ala ani ƒui mɔɔyá na bula ɔlɔna ku kɔyu kuusé lɛlɔ kudɔ. Na bɛya na buti lɛlɔ ƒui bute Katɔti ka bɔɔbu-nwu na bɔɔyia-nwu ɔsu. ² Bigyingya bina enu bite-bu. Bútaƒiɔ bina akɔ ɔdi, na bútakpanku ɔdi lɛnɔ bútavinku ulu ukpidi ɔdi lɛlɔ iye bɔnya ɔdi bɔkya. ³ Naaasu ɔmɛni líti lɛkya-mii kɔƒa. Ɔsika lɛ́su ḿbavi nnii bɛ́ƒɔ-bu kuye ɔni na kukpi kemo o-o, ngba kemo o-o ni, lɛla bamba lɛdi muedi lilakana-bu ntɛ bule. ⁴ Mina anu asia-mii lɛlɔ geen! Na mɔɔtina lɛlɔ na amii ɔsu. Na kaƒɔ kaayɔ́-mi ɔsika ina ka buubó abi ni, ebiti áƒɔ-mi kayi kemo ƒui na amii ɔsu. ⁵ Ka búbeduo Makedonia muedi ni, bútakɛ bɔnwuna bɔdi. Mmomu ɔgbankpi sɔɔn na bekyuli bada baasiaku-bu kesii biala. Na bekyuli beekpóku-bu na liƒu lɛkya-bu lɛlɔ kemo. ⁶ Nsu Katɔti ɔni mɔɔsia bekyuli bani muuwulo kɔnyana kɔnu ni, ɔ́ya na kaƒɔ káyɔ-bu ɔni na Tito ɔ́si-mii kudɔ úbo. ⁷ Na ɔɔɔdi Tito bubo bɔmmɔ lɛti náya na bɔ́kɛ kubiti. Mmomu ɔ́su-bu ɔnii ala ani náyɔ-nwu kaƒɔ ni, anya ndi ka bɛɛyɔ́ ka bigyingya bina enu na bɛƒɔ-mi, na bina bɔƒiɔ búduo-mii, na binye-mi kama kpakplaa. Ɔmmɔ ɔsu na ebiti ásɔ áda-mi étulo. ⁸ Ɔku ɔni na línweni-mii ni, úkpoku-mii sɔsɔ. Nsu lɛni kani na ɔdi ka linweni-nwu. Lɛ́ti ka ɔku ɔmmɔ úduo-mii, nsu uwi klukui ɔdi kani na ɔdi. ⁹ Kalɔ kesekɔ ni, útayɔ-mi kaƒɔ ka úduo-mii lɛni. Nsu ɔƒɛni ni, mɔɔkɛ́ ebiti. Ɔɔɔdi ɔni na ɔku ɔmmɔ úduo-mii ɔsu, mmomu ka ɔ́ya na bina bɔƒiɔ búduo-mii na bíni-mu bɔbla ɔsu. Ɔsika Katɔti ala lɛlɔ ɔsu na ala ammɔ éduo-mii lɛni. Anwuɔsu lɛla lɛdi lítebie na ɔdi lɛlɔ na abu ɔsu. ¹⁰ Na si Katɔti ala lɛlɔ ɔsu na ukyuli alaekpidi ani na ɔ́bla éduo-nwu ni, uunwíni kama taakya ekpidi bɔbla na ɔɔkɛ́ bɔƒɔ ɔni na ɔsɔ ulenu ɔlɛ ɔdi. Nsu si kayawi ala lɛlɔ ɔsu na lɛla lɛdi liiduo-ɔ ni, ɔɔyá na aayila ngba geen bɔmmɔ. ¹¹ Bɛnu kalɛ binye kpakplaa ka ala ammɔ éduo-mii na Katɔti ala lɛlɔ ɔsu. Bɛɛwia kpakplaa ka bidie lɛlɔ na likpidi kemo na bilie sɛɛn. Ɔsika ala ammɔ eeƒí-mii livo na ana bɔbla bɔɔda-mii liƒu. Nu kalɛ na bígyingya enu ka bɛƒɔ-mi, na binye-mi kama kpakplaa. Na anumi égyie-mii ka bɛni likpidi ɔblane ɔmmɔ kɔtu. Na bidie lɛlɔ bɛtina na ulu biala lɛlɔ ka bɛɛɛkɛnku ɔbladu ukpidi ɔmmɔ. ¹² Ɔmmɔ ɔsu ɔku ɔni na línweni límene-mii ni, ɔɔɔdi ukyuli ɔni náƒiɔ lɛlɔ litemi kani na lɛdi iye ukyuli ɔni na báƒiɔ lɛti ɔsu. Mmomu línweni-nwu kalɛ na bɛti na Katɔti anumi kalɛ na bɛɛbu-bu geen. ¹³ Ɔmɛni ƒui ɔsu kaƒɔ kaayɔ́-bu. Na lɛla lɛni náya na ebiti ásɔ aada-bu geen teetulo ndi lɛla lɛni náyɔ Tito kaƒɔ. Ɔsika bɛ́ya na nwuna kasusu kábla-nwu buɛɛ. ¹⁴ Bítakya-mi kɔƒa na nwuna anumi ka lɛ́kun lɛmɛnɛ na bina lɛlɔ. Na ala ani ƒui na bɔɔsu-mii uwi biala kemo ni, adi etemila geen. Na lɛni kani na lɛmɛnɛ lɛni na bɔ́kun na Tito anumi lɛnɔ ɔdi ulu lɛlɔ. ¹⁵ Anwuɔsu na ɔɔyɔ́-mii teebu si uunyimo kalɛ bina ƒui bínye kagyumana na bínu ala ani na bɔ́tina-mii ku kalɛ na bɛ́ƒɔ-nwu na bíboku lɛlɔ kalɔ bíte-nwu na bɛɛbu-nwu ɔsu. ¹⁶ Lɛlɔ lɛɛyɔ́-mi ɔsika ɔƒɛni lɛkana na liti mina anu lɛsia-mii lɛlɔ na lɛla biala kemo.

¹ Banwa ɔlɛka bɛti lɛla lɛni na Katɔti ɔ́bla na baƒɔtaadine akpa ani ƒui nkya Makedonia akɔ na nwuna lɛƒɔndia ɔsu. ² Béduo bukpoku taanu kpakplaa kemo na lɛbibo lɛni nébo-ma lɛlɔ ɔsu. Nsu ɔmɛni kemo ƒui ni, ebiti áda-ma geen na lɛni kani na béte bekyuli ala pii ku kaƒɔ ƒaa ina ka badi bawabane geen. ³ Béte bekyuli ala kalɛ na bakana. Na mɔɔsu-mii geen ka béte bétulo kalɛ bebo muedi na ama alati bɔyɔ kemo. ⁴ Ama bévele-bu banii bute-ma kuƒi na bebunku bekyuli bani mɔɔbla Katɔti kabla na Yudea kalɔ lɛlɔ. ⁵ Na ala ani na bábla mɛni ni, étulo ala ani na abu alati bɔ́sia anu ka bakana bɔbla. Kudeedi ni, béti lɛlɔ béte Blɔti na béti lɛlɔ béte abu lɛnɔ aani kalɛ na Katɔti ɔɔwia. ⁶ Ɔmɛni ɔsu na búvele Tito ɔni nése kabla kamɛni kalɔ na amii lɛnɔ akɔ bɔnii usie anumi na ubunku-mii na bɛkana na bɛwɔlɔ bina bawabane ala bute bɔni kalɔ na bíse mɛni. ⁷ Ɔƒɛni ni, bɛtɔ bekyuli ƒui na lɛla biala kemo. Sɔsɔ bɛtɔ na bina bɔƒɔtaadi kemo ku bina bɔtɛmi ku litemi lɛmmɔ bɔti kemo ku kalɛ na bɛɛwia ka bɛsiaku Katɔti kpakplaa ku kalɛ na bɛɛyɔ́-bu lɛnɔ kemo. Nsu ɔlɛka bɛkya ɔkplu na bɛtɔ na bina lɛƒɔndia ala bute kemo lɛni kani. ⁸ Ɔɔɔdi ɔda na muubó-mii, mmomu líti ogya ɔni nkya badi lɛlɔ kemo mɔɔkɔ́ku amii bɔdi kalɛ na bɔnu si bina bekyuli bɔyɔ lɛnɔ bɔdi bɔyɔ geen. ⁹ Ɔsika bɛgyi kalɛ na Blɔti Yesu Kristo lɛƒɔndia lise. Na ina ka ɔdi Katɔ Ɔga Ubi muedi ni, ɔ́nyonu lɛla biala na bina bɔdia ɔsu kalɛ na ɔkɛ nwuna lɛwaba kemo na amii bínwini Katɔ Ɔga Ɔma ala bakɛne. ¹⁰ Na ɔkɛnku kebunku kani na biite bawabane mɛni litemi lɛlɔ ni, mina kasusu kani muute-mii ndi ka ɔdia ka bɛwɔlɔ lɛla lɛni kalɔ na bíse ɔ́si lɛkwa lɛni návi kemo. Amii ndi bekyuli bedeedi bani nábla ɔmɛni kasusu. Na bíse-ni kalɔ lɛnɔ. ¹¹ Na kalɛ na bíti bɔyɔ bísie lɛla lɛmɛni kalɔ ni, bisie anumi na bɛwɔlɔ-ni aani kalɛ na amii alati bíti-nwu lɛlɔ kasusu. Na biti lɛla lɛni na bibo bɛbla ɔmɛni. ¹² Si ɔdi bina bɔyɔ ka bíte bekyuli ala ni, ɔdubɔƒɔ Katɔti anu ɔkɛnku lɛla lɛni nse-mii kenye. Na ɔɔɔdi lɛla lɛni na biiibo. ¹³ Ɔɔɔdi etila na liti mɔɔsia-mii lɛlɔ na lɛtimi adi na bakladi lɛlɔ, mmomu kalɛ na bɛbla likeke. ¹⁴ Na bana bɔyaki bɔmɛni kemo ni, bina ala pii ani bibo adubo-ma bubunku. Na uwi bamba bana ala pii lɛnɔ adububunku bina bɔyaki. Ɔmɛni ndubɔya na bɛbla likeke. ¹⁵ Lɛni na bénweni bákya Bunweni Kedee Ɔku kemo banii, “Ukyuli ɔni násala adila pii ni, uuubo-nya utuloku kalɛ na ɔmanku-nwu. Na ukyuli ɔni lɛnɔ na adi blii suɛ kani na ɔ́sala ni, ulayaki.” ¹⁶ Na bɔɔgyá Katɔti enu, ɔsika ɔ́ya na anumi eegyie Tito lɛnɔ ka ubunku-mii aani abu kalɛ. ¹⁷ Na ɔɔyɔ́ ka ubunku-mii na ɔɔɔdi ɔni na búvele-nwu na únu kalɔ kani ɔsu, mmomu ka ɔdi anwu ɔlati bɔyɔ lɛnɔ ka ubunku-mii ɔsu. Anwuɔsu na ɔ́bla kasusu ka ubo-mii kudɔ. ¹⁸ Na lɛnɔ ni, búti ɔnwa ɔni na baabu geen na baƒɔtaadine akpa ƒui akɔ ku kalɛ na ɔɔsu litemi buni lɛmmɔ ɔsu buumene-mii ku Tito. ¹⁹ Ɔmmɔ kama lɛnɔ ni, ɔdi ukyuli ɔni na baƒɔtaadine akpa ammɔ báƒuna ka ɔsiaku-bu na bula bawabane ala bute kabla kani na bɔɔbla kemo. Kabla kamɛni kadubɔya na bekyuli badubumwi Blɔti Yesu Kristo, na kaatina lɛnɔ ka ɔdi bula bɔyɔ ka bute baƒɔtaadine bakpana kebunku. ²⁰ Na etela ani na bekyuli béte ku kaƒɔ ƒaa mɛni ni, bɔda-nya kaduɛ kalɛ na ukyuli ɔdi ulakyaku-bu unyeƒi ɔdi ɔnii bɔda egulabi ammɔ bɔɔdi. ²¹ Ɔsika ɔɔɔdi Katɔti anumi lɛti na bɔɔyɔ́ geen ka bɔbla lɛla lɛni ndia, mmomu ku bekyuli ƒui anumi. ²² Ɔmmɔ ɔsu ni, bɔ́sɔ búti ɔnwa ɔbambadi búbunku banwa inyɔ bammɔ buumene-mii. Bɔ́kɔku-nwu bɔ́nu na lilu pii lɛlɔ na bɔ́nu bɔ́ti ka ubo kogyoklo geen. Na ka úti kayi ɔ́sia-mii lɛlɔ lɛni ɔsu ni, ɔsia anu kpakplaa ka ubete-mii kebunku. ²³ Na nkyuli ɛtɛ bamɛni kemo ni, Tito ndi mina ɔvinkpana ɔni mɔɔblaku-mi kabla teebunku-mii. Na banwa bakladi bani nsiaku-nwu ama ni, baƒɔtaadine akpa ammɔ kenye na benye. Na bana ɔbladu uuti bumwi teete Kristo. ²⁴ Bɛyɔ-ma kalɛ na baƒɔtaadine bakladi ƒui banu bati ka sɔsɔ ni, ɔdi ulu lɛlɔ ka bɔɔkun lɛmɛnɛ na amii ɔsu.

¹ Geen ni, útalɛka linweni-mii lɛla lɛdi lɛsiku kalɛ na biibunku Katɔti bekyuli bani ndi bawabane na Yudea kalɔ lɛlɔ. ² Ngyi ka bɛɛyɔ́ geen ka bite bekyuli bamɛni kebunku. Na mɔɔkun lɛmɛnɛ na ɔmɛni lɛlɔ uwi biala taatina baƒɔtaadine bani nkya Makedonia. Lɛ́su nnii banwa bani nkya Akaia kalɔ lɛlɔ ni, báklibi lɛlɔ bése ɔ́si lɛkwɛni ka bete kebunku kamɛni. Na bina kebunku ogya bɔkya nágyila bana akɔ pii. ³ Na ɔƒɛni ni, líti banwa bamɛni muumene-mii kalɛ na bula lɛmɛnɛ lɛni na bɔɔkun na bina lɛlɔ ni, lɛ́bla sɔsɔ. Na aani kalɛ na mɔɔsu uwi biala ni, ngyi ka bɛ́klibi bina ala ani na biti bite kebunku kammɔ bíse. ⁴ Na si nka banwa bani nkya Makedonia badi básiaku-mi bébo-mii kudɔ na bábanu ka bítaklibi lɛla lɛdi bítese aani kalɛ na lɛ́su ni, abu ku amii lɛnɔ geen anumi adubuwi-bu kalɔ. Na buláwia kɔƒa kɔdi na kalɛ na búti anu bɔ́sia-mii lɛlɔ ɔsu. ⁵ Ɔmɛni ɔsu na lɛ́bla kasusu ka banwa bamɛni bagyu batɔ-mi bina kudɔ. Na bebunku-mii na bɛsala etela ani na bɛ́su ka bɛdubute mmɔ bise. Na bulayɔ ka ɔbla aani si ukyuli ɔdi nénye-mii lɛlɔ asa na bɛ́bla lɛni. Mmomu ɔdi kaƒɔ ƒaa ala bute. ⁶ Bɛya na ɔbla-mii nwaa ka ni, si ágya edula blii suɛ ni, adubɔƒɛ-nya blii suɛ lɛni kani. Na si ágya-nya pii ni, adubɔƒɛ-nya pii lɛnɔ. ⁷ Bina akɔ ɔdi biala ute lɛla lɛni na anwu ɔlati ɔ́lɛ ugyii ka wete ku lɛlɔyɔ. Na utabla aani si ukyuli ɔdi nnye-nwu lɛlɔ asa na uute. Ɔsika Katɔti ɔɔyɔ́ ukyuli ɔni muute ala ku kaƒɔ ƒaa. ⁸ Na Katɔti ɔkana na ute-ɔ lɛla biala kalɛ na akɛ ala ani ƒui na aawia uwi biala. Na akana ebunku na kabla kabuni biala kemo kaduɛ. ⁹ Bunweni Kedee Ɔku ɔ́su na ukyuli ɔni nse siin lɛlɔ ɔnini, “Uute bekyuli bani mɔɔyaki ala ku kaƒɔ ƒaa, na uláda lɛbuni bɔbla taaya kudii.” ¹⁰ Katɔti ɔni muute umonsene edula ani na ɔɔgya na uute-nwu adila na ɔɔdi ni, anwu ndubute-nwu edula agyadi ani ƒui na ɔɔwia. Lɛni kani na ɔdubɔya ukyuli siin ala ani na uute ɔya na nwuna kabla buni kanwu ebi pii na bekyuli akɔ. ¹¹ Katɔti ɔdubɔya na bɛkɛ ala pii na lilu pii lɛlɔ kalɛ na amii lɛnɔ biteete bekyuli bamba ala pii. Na bekyuli bammɔ badubɔgya Katɔti enu na bina etela ani na búti búsienku-ma ɔsu. ¹² Ɔsika kabla kani na bɔɔbla teete baƒɔtaadine bani mɔɔyaki ala mɛni ni, uubunku-ma geen. Nsu ɔɔɔdi ɔmmɔ lɛti, mmomu ɔdubɔya na bekyuli pii bagya Katɔti enu uwi biala. ¹³ Bina kaƒɔ ƒaa kebunku kani biite bekyuli mɛni mɔɔtina ka bɛɛdi Kristo litemi buni lɛmmɔ lɛlɔ geen. Na kalɛ na biidie bina bɔƒɔtaadi keyi ku kalɛ na biile ala ani nse-mii teete lɛlɔ ku bekyuli bamba lɛnɔ ɔsu ni, bekyuli pii badubuti ɔbu bete Katɔti. ¹⁴ Na badubɔkpali katɔ na bina lili ku bɔyɔ geen na Katɔti lɛƒɔndia libendi lɛni na údie ɔ́tina ɔkɛ bina lɛlɔ ɔsu. ¹⁵ Bɛya na bɔgya Katɔti enu na litela libendi geen lɛni na úti úte-bu ɔsu. Bulakana litela lɛmɛni kalɔ budie.

¹ Ɔmɛni ɔsu ami Paulo ɔlati líti Kristo kayi buɛɛ ku lɛlɔ kalɔ buboku muuvele-mii geen nnii bise atu na binu. Muunú ka bekyuli badi baasu banii mina lɛku lɛni muunweni libo ogya si liiibo-mii kudɔ, nsu lɛ́ba na mina butemi kemo si nkya-mii kudɔ. ² Muuvele-mii nnii bitaya na libo-mii kudɔ mbatɛmiku-mii ku ogya. Ɔsika nsia ulu ndubo ku ogya mbadɔnku bina akɔ badi bani mɔɔnu-bu anumi banii kayawi kamɛni kasusu na bɔda bɔɔbla ala. ³ Sɔsɔ na ɔdi ka kayawi kamɛni kemo na bɔkya bɔdi, nsu ɔɔɔdi kayawi kamɛni lɛlɔ kekpo udu na buukpó. ⁴ Ɔsika ekpola ani na bɔda buukpó ni, aaadi kayawi kamɛni ekpola. Mmomu Katɔti ɔyikun na ɔdi na buti bɔɔdi ukisine ɔmmɔ kama kekpokɔ lɛlɔ. ⁵ Bɔɔdi unyeƒi ku lɛla biala mɔɔtalaku lɛlɔ katɔ na liitile bekyuli kuƒi ka bati Katɔti lɛlɔ. Na buƒie kasusu biala na kasia Kristo ulu lɛlɔ. ⁶ Na si uwi ɔni na bídie bɛ́tina ka bɛdi Kristo etemila lɛlɔ ƒui ni, ɔmmɔ kama ukyuli biala ɔni mata menye litemi lɛmɛni lɛlɔ ni, bɔdubɔni-nwu kɔtu. ⁷ Ɔlɔna lɛlɔ kasusu kani na biiti. Si ukyuli ɔdi ɔ́ƒɔ lɛlɔ ɔ́di ka ɔdi Kristo ɔdi ni, ɔlɛka ɔnu-bu ɔti aani nwuna lɛlɔ kalɛ ka abu lɛnɔ bɔdi Katɔti ɔdi. ⁸ Na si lɛ́kun lɛmɛnɛ líbu na kenyekɔ kani na bubo lɛlɔ ɔsu ni, Katɔti ulálɛ-mi kama. Ɔsika anwu néte-bu kenyekɔ kamɛni kalɛ na bina bɔƒɔtaadi bɔkɔ katɔ bubu. Na ɔɔɔdi kani maya na bina bɔƒɔtaadi bubo kalɔ. ⁹ Naaawia ka bɛkali bɛnii liƒu na mɔɔkya-mii na mina lɛku lɛni na muunweni-mii kemo. ¹⁰ Bina akɔ ɔdi ɔdubɔsu ɔnii muunweni lɛku kpakplaa lɛni etemila mbo unu. Nsu si nkya-mii kudɔ ni, lɛ́ba na mina etemila eeyile atu. ¹¹ Mɔɔyá na ukyuli ɔmmɔ ɔti ka ni, lɛla lɛni na bɔɔsu na lɛku kemo uwi ɔni na buuubo-mii kudɔ ni, ani kani na bɔɔbla si bɔkya-mii kudɔ lɛnɔ. ¹² Bulábabla taakɔku bula kenyekɔ taanu aani bekyuli bani mɔɔnu lɛlɔ katɔ katɔ. Bɔɔɔdi bana udu. Ama alati kasusu kenye na bada baanu lɛlɔ na bana akɔ ka badia. Nsu baaagyi lɛla lɛdi. ¹³ Abu bubo ekpo ani na bɔɔkun lɛmɛnɛ taatáwɔ. Na bula lɛmɛnɛ bɔkun bɔɔwɔ́ ekpo ani na Katɔti ɔ́kɔku úte-bu. Na kesii kani na Katɔti ɔ́kɔku úte-bu kadanku amii lɛnɔ. ¹⁴ Na ka bɛkya ekpo ani na Katɔti úti úte-bu kemo ɔsu ni, bútavia bula kenyekɔ. Ɔsika abu náka-mii kudɔ bubo ku Kristo litemi buni lɛmmɔ. ¹⁵ Anwuɔsu bulákun lɛmɛnɛ na ukyuli bamba kabla lɛlɔ ɔni na ɔɔɔdi bula ekpo ani na Katɔti úte-bu. Mmomu bula anu asia ka bina bɔƒɔtaadi bɔkɔ katɔ bubu kalɛ na bɔkana na bɔbla ala enengudi na bina akɔ na kesii kani na Katɔti úte-bu kabla. ¹⁶ Ɔmmɔ kama bɔkana na bɔsu litemi buni lɛmmɔ na ekpo bamba ani nkya bina kama lɛnɔ kemo. Na bulakun lɛmɛnɛ na kabla kani na ukyuli bamba ɔdi ɔ́bla na nwuna kakɛ lɛlɔ. ¹⁷ Lɛni na bénweni bákya Bunweni Kedee Ɔku kemo banii, “Ukyuli ɔni mɔɔkun lɛmɛnɛ ni, ɔkun lɛmɛnɛ na lɛla lɛni na Katɔti ɔ́bla lɛlɔ.” ¹⁸ Ɔsika ukyuli ɔni na Katɔti uumwi ni, anwu ndi lɛla lɛdi, na ɔɔɔdi ukyuli ɔni muumwi lɛlɔ.

¹ Mɔɔwia ka bigyingya enu na bɛƒɔ-mi si ina bɛnu bɛnii lɛ́dɔlɔ. Buvele na nda-mii! ² Muukpó-mii lɛlɔ kogyulo teete Katɔti. Lívele-mii líte Kristo aani kalɛ na beevele adagyaa ɔni nse sɛɛn teete kɔgya. ³ Nsu mɔɔyia ka ukisine ɔmmɔ ɔdububile-mii kasusu na bɛsɔ bilése sɛɛn na bɛsiaku Kristo lɛti kama. Lɛni na kɔlakpi kɔmmɔ kúti nwuna kɔkwɛ kukpidi kúbile Eva kasusu na ɔ́ya na ɔ́bla likpidi. ⁴ Lɛni na bɛɛbabla teegyingya enu taaƒɔ ukyuli biala ɔni muubo taabasu-mii litemi lɛbambadi lɛni mɔɔvumana Yesu ɔni lɛlɔ lɛsa na bɔ́kɔ búte-mii udu. Na bɛɛƒɔ́ kɔyu ku litemi lɛni naaadi Katɔti Kɔyu ku bula litemi buni lɛmmɔ taadi. ⁵ Nsu lɛ́ƒɔ lɛ́di ka lɛ́ƒɔ kuye ntulo bekyuli bani na biigyingya enu taaƒɔ aani si badi batalane babuni sɔsɔ. ⁶ Ina kenye kátada-mii muedi ni, ɔɔɔdi Katɔti litemi na lɛɛɛgyi. Bɔ́ya na ɔmɛni ɔ́bla-mii nwaa na ulu biala lɛlɔ. ⁷ Uwi ɔni na lɛ́ka litemi buni lɛmmɔ lɛsa bɔkɔ bute-mii ni, ńtakya-mii kayu kadi. Mmomu líboku lɛlɔ kalɔ kalɛ na lɛtalaku-mii katɔ. Na ɔni na lɛ́bla ɔmɛni ɔsu na lɛ́bla likpidi lɛdi? ⁸ Egulabi ani na baƒɔtaadine lɛkpa bamba béyi básala ni, anya na lɛ́ƒɔ ńtaanu mina lɛlɔ uwi ɔni na lɛ́kya-mii kudɔ. Use aani si buyu na líyu-ma na liti libunku-mii. ⁹ Uwi ɔni na lɛ́kya-mii kudɔ ni, mina lɛlɔ bɔnu bútasia-mii lɛlɔ si mɔɔyaki lɛla lɛdi. Banwa bani nási Makedonia néteete-mi kebunku na lɛla biala kemo. Na ńteti etila abambadi ńtasia-mii lɛlɔ na lɛɛɛdubo adi lɛnɔ buti bɔsia-mii lɛlɔ kudii. ¹⁰ Nnye Kristo litemi geen lɛmmɔ lɛlɔ mɔɔsu nwaa ka naaayila kuƒi kɔni ɔsu na mɔɔkun lɛmɛnɛ na Akaia kalɛkɛ lɛlɔ kudii! ¹¹ Na bi ɔsu na nnii naaaƒɔ lɛla lɛdi na bina kudɔ? Ɔɔɔdi ɔni na naaayɔ-mii ɔsu. Katɔti ɔlati ɔgyi ka mɔɔyɔ́-mii. ¹² Ndubusie anumi na naaaƒɔ bina kebunku. Ɔmɛni ɔdubɔya na bani mɔɔlɔ lɛlɔ banii batalane ni, balákɛ kuƒi na bakun lɛmɛnɛ na basu banii ama lɛnɔ baabla kabla aani bula kalɛ. ¹³ Bekyuli bammɔ baaadi batalane geen. Ɔkɔ batalane na badi, na baanyi ɔkɔ na bana kabla kemo. Bávumana bana lɛlɔ kalɛ na bekyuli banu-ma aani si Kristo batalane na badi sɔsɔ. ¹⁴ Na ɔmɛni ɔɔɔdi lɛla lɛwɔdi, ɔsika Satan ɔɔvumana lɛlɔ na ɔɔbla aani Katɔti ɔtu ɔni ndanku Katɔti bukeye. ¹⁵ Anwuɔsu ɔmɛni ɔɔɔdi lɛla lɛwɔdi uuute nwuna kama basiakune ka bavumana lɛlɔ babla aani Katɔti kabla bablane bani nse siin. Nsu kawɔlɔkɔ ni, Katɔti ɔdubo-ma kɔtu bɔni kalɛ na ɔ́manku. ¹⁶ Nsɔ mɔɔsia kama lɛsu-mii nnii ɔdi utakali ɔnii lɛ́dɔlɔ. Nsu ina ɔdi wakali lɛni ni, amii biti-nwu lɛni kani kalɛ na ɔdia-mi na lɛkun lɛmɛnɛ blii. ¹⁷ Na lɛla lɛni mɔɔsu mɛni ni, lɛɛɛdi lɛla lɛni na Blɔti úbo-mi ɔda ɔnii nsu. Ɔsika lɛmɛnɛ bɔkun litemi lɛmɛni kemo ni, ɔdubɔbla-mii aani ɔdɔlɔdi kalɛ. ¹⁸ Nsu ka bekyuli pii baakun lɛmɛnɛ na kayawi ala lɛlɔ ɔsu ni, bɛya na ami lɛnɔ lɛkun lɛmɛnɛ lɛdi blii. ¹⁹ Ka amii alati bɛ́da anu geen ɔsu na bɛɛtunaku badɔlɔdi bamɛni. ²⁰ Na bɛɛtunaku-ma si ɔdi úti-mii ɔ́bla nwuna kabla ɔblane iye ɔ́kɛ-mii lɛlɔ kɔsia kɔdi iye ɔ́kywɛ-mii kakpagyuɛ kadi iye baanu-mii kalɔ kalɔ iye ɔ́ƒiɛmi-mii ɔtugya muedi. ²¹ Nsu abu ni, bɔɔyia ka bɔbla ala ammɔ udu. Munuu bɛɛbu bɛnii kɔƒa muukpó-bu? Nsu si ɔdi ɔkana kayi buse na ɔkun lɛmɛnɛ ni, ami lɛnɔ mbo kuƒi kɔmmɔ udu. Ala amɛni ƒui ese aani kɔnamutɛ, nsu ɔlɛka lɛsu. ²² Si Hebriƒuɔ na badi ni, ami lɛnɔ anwu ndi. Na si Israelƒuɔ badi ni, ami lɛnɔ anwu ndi. Na si Abraham bawɔ lɛnɔ na badi ni, ami lɛnɔ anwu ndi. ²³ Kristo kabla bablane na badi? Ndi Kristo kabla ɔblane ntulo-ma. Báya na mɔɔtɛmi aani ukyuli ɔni muukpi libuo, nsu ɔdi litemi geen ka lɛ́bla Kristo kabla lítulo-ma. Bekyuli bani muukisi Kristo ni, bákya-mi aban ɔtɔ kɔlɛ kɔlɛ. Na bébo-mi lɛnɔ kɔlɛ kɔlɛ. Na líduo kukpi ku ngba ntɛ uwi pii. ²⁴ Kɔlɔ sɔɔn na Yudaƒuɔ bámii kɔbuli bébo-mi bɔka aavlatɛ yaalenwi. ²⁵ Na kɔtɛ na Romaƒuɔ bébo-mi kugyiimi. Na kunwi na bébo-mi atabi. Na kɔtɛ na ɔkɔlɔ bonwu ɔ́bwɛ ku-mii na lɛ́nu líduo ɛpu kemo. Na ɔmmɔ kemo ni, kunwi na ɛpu ntu bútiku-mi usien ku ɔƒɛ ƒui. ²⁶ Na mina ulu busie pii kemo ni, líduo ɔgbankpi lidu lidu kemo. Ketu keyi káda-mi kɔlɛ kɔlɛ, na líduo beyune enu kemo. Líduo ɔgbankpi kemo na mina badi bekyuli Yudaƒuɔ enu kemo ku bani naaadi Yudaƒuɔ lɛnɔ enu kemo. Líduo ɔgbankpi na lɛma linengudi kemo ku ketele kemo. Líduo ɔgbankpi na ntu anumi ku ɔkɔ baƒɔtaadine enu kemo. ²⁷ Lɛ́bla kabla kpakplaa lítu lɛlɔ kaduɛ. Ńtatɛ ńtalɛɛ usien pii. Na kɔka ku utukwɛ ɔ́da-mi, na adila ábɔ-mi uwi pii. Na kɔyɔ kɔda-mi, na ńtakɛ lɛla lɛni na libi lɛlɔ. ²⁸ Na ala pii amɛni kama ni, mina kasusu kalakɛ bɔnwuna ɔ́si baƒɔtaadine akpa ani nkya ekpo ekpo ɔsu. ²⁹ Si ɔdi ɔbla kpɛtɛ kpɛtɛ na kalɛ na ɔ́ƒɔ ɔ́di ɔsu ni, ɔɔyá na enu aaƒɛ-mi. Na si likpidi kemo na ɔdi úduo ni, ɔɔyá na ɔƒɛ ɔɔdá-mi. ³⁰ Si ɔdi ka lɛkun lɛmɛnɛ ni, nka ndubɔkun lɛmɛnɛ na ala ani muudie taatina kalɛ na lɛ́sɔ lɛlɔ. ³¹ Katɔti ɔni ndi Blɔti Yesu Kristo Ɔti, na anwu na buumwi uwi ƒui ni, anwu ngyi geen ka ala ani mɔɔsu mɛni ni, sɔsɔ na adi. ³² Uwi ɔni na lɛ́kya Damasko ni, aban unengu ɔni nákya Ɔga Areta kalɔ ɔ́wia ka uƒie-mi. Anwuɔsu úti bagyumanane útényene kowodu kɔni na bátu báka bámana ɔma ɔmmɔ kɔyakun. ³³ Nsu ni, kowodu kɔmmɔ liƒi na báyula-mi básiaku na kagyigyɛ kemo, na lɛ́lɛ-nwu enu kemo.

¹ Ɔdi ka lɛkun lɛmɛnɛ ina ka kɔsia kɔdi kuuubo-nwu kemo. Na amii ɔsu na ndubusie anumi ntaasu ala ani na Blɔti údie ɔ́tina-mi. ² Ngyi ɔƒɔtaadine ɔni na Blɔti útiku úsienku katɔ katɔ ƒui akwa leevu-ene ani návi kemo. Nsu lɛɛɛgyi si ɔlɔna kemo na útiku-nwu iye kɔyu kemo lɛti kani na útiku-nwu. Katɔti lɛti pɛ ngyi. ³ Lɛla lɛni kani ngyi ndi ka Katɔti útiku ukyuli ɔmɛni úsienku Paradiso na katɔ mmɔ. Nsu mɔɔsu-mii nnii lɛɛɛgyi si ɔlɔna kemo na útiku-nwu iye kɔyu kemo. Katɔti lɛti pɛ kani ngyi. ⁴ Na únu ala ani na ukyuli ulakana na wasɔku wasu na buláti-nya kalɔ budie. ⁵ Mɔɔtɛmi aani si ukyuli bamba na nda. Na mɔɔkun lɛmɛnɛ na nwuna lɛlɔ, ɔsika naaakun lɛmɛnɛ na ami ɔlati lɛlɔ, amu ntu lɛla lɛni muudie mina bɔsɔ taatina-mi lɛlɔ lɛti pɛ. ⁶ Na ina nnii mɔɔkun lɛmɛnɛ ni, lɛɛɛdubo ɔdɔlɔdi bɔbla. Ɔsika litemi geen lɛmmɔ na ndubo bɔsu. Nsu líni lɛmɛnɛ bɔkun, ɔsika naaayɔ ka ukyuli ɔdi ɔnu-mi utulo kalɛ nse na ala ani mɔɔbla ku ani mɔɔsu kemo. ⁷ Nsu kalɛ na ulabla aani lɛlɔ na mɔɔtalaku katɔ na ala ebendi ani na lɛ́nu lɛlɔ ɔsu ni, Katɔti úte kuƒi na ɔ́ya na ɔlɛ ɔdi úbo-mi lɛlɔ. Satan ɔ́tala nwuna ɔtu ɔdi na ɔ́bla ɔmɛni ɔni na ɔɔyá na muunú ɔlɔna ɔlɛ ɔdi kalɛ na naaatalaku lɛlɔ katɔ. ⁸ Na lɛ́kpali katɔ lívele Blɔti kɔtɛ sɔɔn na ɔmɛni lɛlɔ nnii ɔbwi-mi ɔlɛ ɔmmɔ. ⁹ Mmomu ɔ́su-mii ɔnini, “Mina lɛƒɔndia lɛdubɔda-a, ɔsika mina ɔyikun ɔɔbla ala ebendi na bekyuli bani násɔ lɛlɔ teetulo.” Ɔmɛni ɔsu lɛlɔ lɛdubɔyɔ-mi litulo si mɔɔkun lɛmɛnɛ na mina bɔsɔ lɛlɔ kalɛ na Kristo ɔyikun ɔdubɔƒɔ-mi lɛlɔ kemo ƒui. ¹⁰ Si Kristo ɔsu na ɔlɛ úbo-mi lɛlɔ, na bekyuli beedumi-mi, na muubó abi, na bekyuli beekpóku-mi, na ɔgbankpi ɔɔsiáku-mi ni, kaƒɔ kadubɔyɔ-mi. Ɔsika uwi ɔni na lɛ́sɔ ni, mɔɔkɛ́ Kristo ɔyikun. ¹¹ Mɔɔsu ala aani ɔdɔlɔdi kalɛ, nsu amii náya na úbo úte lɛni. Ɔsika amii na ɔlɛka nka bimwi-mi. Ina lɛɛɛdi lɛla lɛdi muedi ni, ńtasɔ na ulu biala lɛlɔ ku bekyuli bani mɔɔnu lɛlɔ aani batalane babuni. ¹² Lɛ́bla ala pii ku kayi buɛɛ na bina akɔ ani mɔɔtina ka ndi ɔtalane geen. Katɔti ɔ́sia-mi lɛlɔ na ɔ́bla akɔla budie taatina lidu lidu ku ala ebendi bamba lɛnɔ. ¹³ Ńtanu lɛla lɛni na baƒɔtaadine akpa adi bákɛ bétulo-mii ntu ɔni na ńtaƒɔ-mii egulabi adi na liti libunku lɛlɔ kani ɔsu. Na muuvele-mii nnii biti bɛkyiɛ-mi ka ńtabla lɛni! ¹⁴ Kɔtɛdi mɛni ka lɛ́klibi lɛlɔ na ndubo-mii kudɔ, nsu naaawia kebunku kadi. Amii alati na mɔɔwia, na ɔɔɔdi bina egulabi. Ɔsika ɔɔɔdi bebi mɔɔklibi ala teese ka banu bawɔne lɛlɔ. Mmomu bawɔne mɔɔklibi ala teese na banu bebi lɛlɔ. ¹⁵ Ɔmɛni ɔsu ndububile mina ala ani nse-mi na liti mina lɛlɔ muedi lite ku ebiti na bina lili ɔsu. Anwuɔsu ka mɔɔyɔ́-mii pii lɛni ni, bi ɔsu na ɔlɛka bina bɔyɔ bɔƒana na mina lɛlɔ? ¹⁶ Bɛdubo bɔtuna ku-mi ka ni, ńtenwini etila ńtasia-mii lɛlɔ. Nsu badi badubo bɔsu banii lɛkwɛ likpidi na lɛ́bla na lɛ́kɛ-mii lɛlɔ kɔsia na ulu ɔdi lɛlɔ. ¹⁷ Na bekyuli bani na lɛ́tala lɛ́kya-mii lɛlɔ ni, lɛ́kɛ-mii lɛlɔ kɔsia kɔdi ɔkɛnku-ma lɛlɔ? ¹⁸ Lívele Tito na lɛ́tala-nwu lɛ́kya-mii, na lɛ́tala bula ɔnwa bamba lɛnɔ nnii bebo-mii kudɔ. Bɔsu bɛda bɛnii Tito ɔ́kɛ-mii lɛlɔ kɔsia kɔbambadi kɔdi na ulu bamba lɛlɔ? Ɔɔɔdi kasusu kenwi na ami ku-nwu bɔda bɔɔbla kabla na bɔda lɛlɔ na ulu unwi lɛlɔ lɛnɔ yoo? ¹⁹ Bɛɛbu uwi ɔmɛni ƒui bɛnii lɛlɔ kenye na buudie na bina anumi? Oowo! Katɔti ɔ́bla-bu unwi ku Kristo na bɔɔsu lɛla biala na nwuna anumi. Banwa, na lɛla biala na bɔɔsu-mii ni, kalɛ kani na bina bɔƒɔtaadi bɔkɔ katɔ bubu ɔsu. ²⁰ Mɔɔyia ka si líbo mmɔ ni, ndububo mbanu ka bɛ́vumana kalɛ na mɔɔwia-mii lɛnu. Na lɛni kani na amii lɛnɔ bɛdubɔnu ka lɛ́vumana kalɛ na amii lɛnɔ bɛɛwia ka bɛnu. Mɔɔyia ka ndububo mbanu ka bɛɛdɔ, na bɛɛbla lɛnungyie likpidi, na biiti kɔnyi taakya lɛlɔ, na bɛɛwia kalɛ na ɔdia ute amii lɛti pɛ, na biidumi lɛlɔ, na bɛɛlɔ lɛlɔ anyikpi, na bɛɛtalaku lɛlɔ katɔ, na biiƒú na lɛdi biala kemo. ²¹ Mɔɔyia ka uwi ɔni na nsɔ mebo mmɔ ni, mina Katɔti ɔdubɔya na enu aƒɛ-mi na bina anumi. Na ndubuwulo na bekyuli pii lili, ɔsika bétenwini kayi na bana alaekpidi ani na bábla bábavi ɔsu. Báabla ala ani muusé lɛlɔ, na bádi kɔsɔnɔ, na baaadaku-ni na ulu biala lɛlɔ.

¹ Ɔmɛni ndi kɔtɛdi kɔni na ndubo-mii kudɔ mbanu-mii. Na Bunweni Kedee Ɔku kemo ni, bénweni banini, “Ɔdi ka nkyuli inyɔ ku kama bedie kenye na ukyuli ɔdi bɔƒiɔ lɛlɔ asa na badu-nwu kɔtɔ.” ² Muubó bekyuli bani nábla ekpidi bábavi ɔda ku babambadi ƒui lɛnɔ uwi ɔni na lɛɛɛkya-mii kudɔ mɛni. Lɛ́ɛsu-mii ɔmɛni ḿbavi na kunyɔdi kɔni na líbo-mii kudɔ. Na nsɔ mɔɔsu-mii ɔni na liiibo-mii kudɔ mɛni nnii si lɛ́sɔ líbo-mii kudɔ ni, ndubɔni bani ƒui mɔɔbla ekpidi kɔtu. ³ Ka bɛɛwia bɛnu bɛti geen ka Kristo nkɛ-mi lɛlɔ ɔɔtɛmi ku-mii ɔsu ni, bɛdubɔnu lɛla lɛni na bɛɛwia! Ulése buɛɛ ulete-mii si Katɔti ɔɔní-mii kɔtu. Na bɛdubɔti ka ubo ɔyikun na bina akɔ sɔsɔ. ⁴ Ina ka bákana Yesu bámana ugyii lɛlɔ na úkpi uwi ɔni kemo na use kpɛtɛ kpɛtɛ ni, Katɔti ɔyikun kemo na ɔ́sɔ ɔ́ta uli ngba. Na ka abu-ku Yesu bɔ́bla unwi ɔsu ni, buse kpɛtɛ kpɛtɛ aani kalɛ na anwu lɛnɔ use kpɛtɛ kpɛtɛ. Nsu bubo Katɔti ɔyikun ka bɔbla lɛla lɛni na ɔlɛka bɔbla na bina akɔ, ɔsika abu ku-nwu bulie na nwuna ɔyikun kemo. ⁵ Amii alati biduo bina lɛlɔ kemo na bɛkɔku lɛlɔ bɛnu. Na bɛti si bɛkya bɔƒɔtaadi bɔmmɔ kemo. Bɛɛɛgyi ka Yesu Kristo ɔkya-mii lɛlɔ kemo? Bɛgyi nii! Ntu bɔnu na bɛ́nu bɛ́ti ka bina lɛlɔ bɔkɔku bútedu. ⁶ Na lɛ́ƒɔ lɛ́di ka bɛdubɔnu bɔti ka abu búdu. ⁷ Buuvele Katɔti bɔnii ɔda-mii na bilabla likpidi lɛdi. Na bulévele ɔmɛni kalɛ na buti bɔtina ka abu búdu na bula batalane kabla bɔbla kemo ɔsu. Mmomu bɔɔwia ɔmɛni kalɛ na amii bitaabla lɛla lɛni ndia si ina ɔ́lɛ aani abu bútabla bula kabla na kedu. ⁸ Ɔsika bulakana bɔta bunye litemi geen lɛmmɔ lɛlɔ na ulu biala lɛlɔ, mmomu na bɔda-ni na lisie lɛtɔtɔ libu. ⁹ Lɛlɔ lɛɛyɔ́-bu si bina bɔƒɔtaadi bɔɔyu ɔkplu, na use aani si bula ɔyikun ɔɔƒana na bina lɛlɔ. Na lɛla lɛni na buuvele ndi ka bɛlɛ lili bɛwɔlɔ. ¹⁰ Muunweni-mii ɔku ɔmɛni uwi ɔni na liiibo-mii kudɔ mɛni, kalɛ na si líbo ḿbeduo-mii kudɔ ni, na naaani-mii kɔtu kpakplaa na kenyekɔ kani na Blɔti úte-mi kenye. Úte-mi kenyekɔ kamɛni kalɛ na bina bɔƒɔtaadi bɔkɔ katɔ bubu, na ɔɔɔdi kani maya na bɔyu kalɔ. ¹¹ Banwa, na kawɔlɔkɔ mɛni ni, binye momoomo na bɛlɛ lili bɛwɔlɔ. Na binu ala ani ƒui na lívele-mii na ɔku ɔmɛni kemo. Bɛbla unwi na bilieku lɛlɔ ku keyi buɛɛ, na Katɔti ɔni mɔɔyɔ́ bekyuli na ɔɔyá na keyi kaayɔ́ku-ma ni, ɔdubɔsiaku-mii. ¹² Bɛkya lɛlɔ kɔgbu aani banwa kalɛ. ¹³ Katɔti baƒɔtaadine ƒui banii beegyele-mii o-o! ¹⁴ Blɔti Yesu Kristo lɛƒɔndia ku Katɔti bɔyɔ ku Katɔti Kɔyu unwi bɔbla ɔsiaku bina ƒui.