1 TIMOTEO

¹ Ami Paulo ɔni ndi Yesu Kristo ɔtalane ɔkɛ bula Ɔƒɔne Katɔti ku Kristo Yesu ɔni lɛlɔ na bɔsia anu na muunweni ɔmɛni. ² Na líti muute awɔ Timoteo. Agyi ka ubi na adi-mi na bɔƒɔtaadi kemo. Na muuvele Unwoti Katɔti ku Blɔti Yesu nnii bana lɛƒɔndia lɛsiaku-ɔ na banu-ɔ kɔnyana na bete-ɔ keyi buɛɛ. ³ Na ɔƒɛni ni, mɔɔwia ka asɔ akya Eƒeso mmɔ aani kalɛ na lɛ́su-ɔ uwi ɔni na lɛ́si mmɔ lísela Makedonia. Ɔsika agyi ka bekyuli badi bakya bani mɔɔtina ala ani muuƒú bula ala bɔtina na Kristo bɔƒɔtaadi lɛlɔ. Ɔlɛka abɔku bekyuli bamɛni na bada udu ɔmmɔ baya. ⁴ Su-ma na bada kuuku atɛ bɔnwi ku kaba kasikɔ lɛmɛnɛ bɔkun baya. Ala amɛni udu muuti unyeƒi taakya bekyuli akɔ. Na aaakɛnku Katɔti kasusu lɛlɔ. Kasusu kani na ɔkɛnku bɔƒɔtaadi lɛlɔ kani na bɔdubɔnu bɔti. ⁵ Na lɛla lɛni ɔsu na líti kabla kamɛni lɛ́kya-a enu kemo ndi ka bɔyɔ bula baƒɔtaadine bakpana ku kaƒɔ ƒaa ku kayi kani naaadu-bu kɔtɔ na likpidi lɛdi bɔbla kemo. Na bula Kristo bɔƒɔtaadi lɛnɔ bɔbla ɔbuni ɔmmɔ geen. ⁶ Nsu bekyuli badi bénwini kama bákya ala amɛni. Anwuɔsu báyila ulu ɔbuni ɔmɛni. Na baakya kɔdɔlɔ unyeƒi. ⁷ Baawia ka benwini Mose ɔda bubo ala batinane. Nsu ni, belenu ama alati etemila muedi kalɔ. Baasu ala kpakplaa taasiku ɔda bubo bɔmmɔ lɛlɔ, nsu ama alati belenu-nya kalɔ. ⁸ Bula ƒui bɔgyi ka Mose ɔda bubo bɔdia, nsu ɔlɛka bɔdi ɔda bubo bɔmmɔ lɛlɔ aani kalɛ na bɔɔtina. ⁹ Na ɔlɛka buteenyimo lɛnɔ ka ni, ɔɔɔdi bekyuli babuni na bébo ɔda béte, mmomu batuɔkplune bani mɔɔƒiɔ́ Katɔti ɔda bubo ku bakantankpine ku bana udu bani ngba néyi ku ekpidi bɔbla. Badi bekyuli bani naaasiaku bɔƒɔtaadi bɔdi kama ku bani mɔɔdú bana bati ku beni ku bekyuli badune babambadi lɛnɔ. ¹⁰ Na badi bekyuli bani mɔɔdi kɔsɔnɔ ku banana bani mɔɔtɛnku lɛlɔ. Badi bekyuli bani muuyú bekyuli teetéye ku ɔkɔ banyine ku ama bani mɔɔnyi ɔkɔ taakpali ala. Na ama bani ƒui naaasiaku ala bɔtina bɔbuni kama ni, ama na bébo ɔda ɔmɛni béte. ¹¹ Na Katɔti litemi buni lɛni bɔsu na úti ɔ́kya-mi enu kemo ni, nina kemo kani na bɔdubɔkɛ ala bɔtina bɔbuni bɔmmɔ bɔni nási Katɔti ɔmmɔ ɔlati bukeye kemo. Na anwu na bɔɔgyá enu. ¹² Naaakana Blɔti Yesu Kristo enu bɔgya na ɔyikun ɔni na úte-mi ɔnii ntaabla kabla kamɛni ɔsu. Na sɔsɔ ni, úti-ka ɔ́kya-mi enu kemo. Ɔsika ɔ́nu-mi ɔ́ti ka naaalɛ-nwu kama. ¹³ Ina ka líkpoku-nwu na lɛ́tɛmi enyekpi ku edumi na nwuna lɛlɔ dii asa na ḿbenwini kayi ni, Katɔti ɔ́nu-mi kɔnyana. Ɔsika uwi ɔmmɔ kemo ni, ńtaƒɔ-nwu tɔ ńtadi na ńtati lɛla lɛni lɛnɔ na ńtaabla. ¹⁴ Mina tati tati ɔ́ya na lɛ́du-nwu kaƒɔ, na ɔ́ya na lɛ́nu Kristo Yesu lɛ́ti na lɛ́ƒɔ-nwu lɛ́di na lɛ́blaku-nwu unwi. Ɔmɛni ɔsu na ami lɛnɔ mɔɔyɔ́ bekyuli. ¹⁵ Kenye kani na ndubo bɔsu mɛni kadi litemi geen, na ɔlɛka ukyuli biala ɔƒɔ-ka ɔdi. Yesu ɔni ndi Ukyuli Ɔƒunadi úbo kayawi kamɛni kemo ɔnii ubedie bekyuli ɔlɛku bana ekpidi ani na baabla kemo. Na ala ekpidi bablane bammɔ ƒui akɔ ni, ami ntulo. ¹⁶ Ɔmɛni ɔsu geen na Katɔti ɔ́nu-mi kɔnyana kalɛ na ɔkɛnku ami ɔni ntulo-ma akɔ ƒui lɛlɔ ni, Kristo Yesu ɔdubɔya na bekyuli banu kalɛ na ubo bɔyɔ bɔni muuti taakyiɛ ute ekpidi bablane bani maƒɔ-nwu madi. Na ɔdubute-ma ngba bɔni nsɔ naaadubo bɔsa lɛnɔ kudii. ¹⁷ Anwuɔsu ni, bɛya na buteemwi bula Katɔ Ɔga ɔni na bulánu ku bula anumi na uli ngba úsela ƒui. Na butaakɔliku anwu ɔni neeekpi kudii lɛnyi katɔ uwi ƒui. Ɔsia lɛni. ¹⁸ Mina ubi Timoteo, kabla ku ɔda bubo bɔni na líti muute-ɔ mɛni ni, kadanku ala ani na bula kenye bediene básu básiku-ɔ lɛlɔ. Ƒie etemila amɛni da na adubɔdi likpidi lɛlɔ na Blɔti kekpo kamɛni kemo. ¹⁹ Da ƒula bɔƒɔtaadi kaduɛ kalɛ na ƒula kayi kaládu-ɔ kɔtɔ. Ɔsika bekyuli bani na bétenu bana kayi bɔlɛ ni, bayii bana bɔƒɔtaadi ulu. ²⁰ Na bana akɔ badi ndi Himeneo ku Aleksandro. Lɛ́ni-ma kɔtu na líti-ma líte ukisine ɔmmɔ kalɛ na bebo abi na nwuna enu kemo. Ɔmɛni ndubɔya na batɛya lɛla na bada enyekpi bɔtɛmi taasiku Katɔti lɛlɔ baya.

¹ Lɛla lideedi lɛni na mɔɔyɔ́ ka bɛti ndi ka bitaakpali katɔ na biteevele na bekyuli ƒui lili. Na biteeti amii ku-ma ƒui awiala taava Katɔti anumi. ² Na bitaakpali katɔ teete baga ku bekyuli bani ƒui mɔɔdi bekyuli lɛlɔ kalɛ na bula ƒui bɔkɛ atu bɔyɔ ku keyi buɛɛ. Na buboku lɛlɔ kalɔ bute Katɔti na buti ɔbu bute ukyuli biala. ³ Katɔ bɔkpali bɔmɛni mɔɔyɔ́ bula Ɔƒɔne Katɔti kaƒɔ. ⁴ Ɔsika ɔɔwia ka ukyuli biala ɔnu nwuna litemi geen lɛmmɔ ɔti kalɛ na ɔƒɔ-nwu ngba. ⁵ Sɔsɔ ni, Katɔti unwi kani nkya. Na kɔnu ɔsiane lɛnɔ unwi kani nkya. Anwu ndi ukyuli ɔni baalɔ banii Kristo Yesu. Anwu mɔɔklibi abu ku Katɔti ntɛ. ⁶ Anwu néti lɛlɔ ɔ́kpa na bayawine ƒui lili. Na Yesu ɔ́bla ɔmɛni na uwi ɔni lɛlɔ geen na Katɔti úse ka udie nwuna bekyuli bɔƒɔ keyi ɔtina bayawine ƒui. ⁷ Na ɔmɛni ɔsu na Katɔti ɔ́bla-mi lɛsa ɔkɔne ku ɔtalane. Na ɔɔɔdi ɔkɔ na mɔɔnyi. Mɔɔsu-mii geen nnii údie-mi aani ala ɔtinane ɔnii mbedie bɔƒɔtaadi kenye ntina bekyuli bani naaadi Yudaƒuɔ. ⁸ Na baƒɔtaadine kasalakɔ biala ni, mɔɔwia ka banana bataakpali katɔ ku kayi kedee kalɛ na si Katɔti ɔɔnu bina enu katɔ ni, na ɔti ka bɛ́da lɛlɔ bídie likpidi kemo. Na kɔnyi iye unyeƒi ɔdi uuubo-mii akɔ. ⁹ Mɔɔwia lɛnɔ ka beleku banu kaduɛ na bana adala lɛlɔ, na batina ka beeboku lɛlɔ kalɔ. Ɔɔɔdi ka beteenyimi lili ku kunweni lidu lidu ku sika ugyiedi adala lidu lidu ani náƒɔ kuye na aatina ka baakɔliku lɛlɔ katɔ. ¹⁰ Mmomu ni, bana ɔbladu ɔbuni udie-ma ɔtina aani beleku bani mɔɔsu banii basiaku Blɔti. ¹¹ Na uleku biala uboku lɛlɔ kalɔ na ɔtɛya ala, na utakya lɛsɛ. ¹² Ńtete-ma kuƒi nnii batina banana ala iye badi banana lɛlɔ. Mmomu ɔlɛka bada bana inye. ¹³ Ɔsika Adam na Katɔti ɔka budie asa na údie Eva. ¹⁴ Na ɔɔɔdi Adam na ukisine ɔmmɔ ɔ́tɔlɔ, mmomu uleku na ɔ́tɔlɔ. Na ɔ́ya na ɔ́bla likpidi. ¹⁵ Nsu si uleku wenye kpakplaa na nwuna bɔƒɔtaadi kemo ku bɔyɔ na wada lɛlɔ kedee na weboku lɛlɔ kalɔ ni, ɔdubɔvi nwuna kɔwɔ lɛbibo kemo buɛɛ.

¹ Lɛsugba lɛmɛni lɛdi litemi geen ka ni, si ukyuli ɔdi ɔɔwia ka unwini baƒɔtaadine ɔtɔnkune ni, ɔɔwia kabla kabuni. ² Na baƒɔtaadine ɔtɔnkune ni, ɔlɛka ɔbla ukyuli ɔni na litemi lɛdi lɛɛɛda-nwu, na úti uleku unwi, na ɔ́da anu, na ɔda lɛlɔ, na bekyuli baabu-nwu. Ɔɔbla lɛƒɔ na ɔdi ala ɔtinane buni. ³ Utalɛka utaani ntɛ teekpi, na ulekpo udi. Mmomu ɔlɛka ɔbla ukyuli ɔni nse buɛɛ, na ulayɔ kadɔ, na uuubo sika lɛnungyie lɛnɔ. ⁴ Ɔlɛka ɔkana nwuna kaduli bekyuli bɔda, na ɔya na nwuna bebi beteenu litemi na ulu biala lɛlɔ. ⁵ Na si ukyuli ɔdi ɔkya na ulákana nwuna kaduli bekyuli lɛlɔ bɔnu ni, agyi anii ulakana na watɔnku Katɔti baƒɔtaadine. ⁶ Utalɛka ɔbla ɔƒɔtaadine ɔwɔdi kalɛ na ulatalaku lɛlɔ katɔ, na ɔkɛnku lɛlɔ bɔtina bɔmmɔ ɔsu na webuli, na Katɔti wani-nwu kɔtu aani kalɛ na ɔ́ni ukisine ɔmmɔ kɔtu. ⁷ Ɔlɛka ɔbla ukyuli ɔni na ubo lɛnyi buni na bekyuli bani naaadi baƒɔtaadine lɛnɔ anumi, kalɛ na balasu lɛla likpidi lɛdi na nwuna lɛlɔ na weduo ukisine ɔmmɔ kakpagyuɛ kemo. ⁸ Na baƒɔtaadine kasala bebunkune ni, ama lɛnɔ ɔlɛka babla bekyuli bani nda udu buni, na bada kabla kammɔ lɛnɔ kpakplaa. Na badi bekyuli bani naaani ntɛ teekpi, na anumi elégyie-ma na egulabi lɛlɔ. ⁹ Na ɔlɛka bada bɔƒɔtaadi litemi buni lɛni na bédie keyi mɛni kpakplaa ku kayi kani naaadu-ma kɔtɔ. ¹⁰ Na ɔdi ka bɛka-ma udu bɔkɔku bɔnu. Na si bana lɛlɔ liiibo litemi lɛdi ni, bɛya-na benwini baƒɔtaadine bebunkune. ¹¹ Bana beleku lɛnɔ ni, ɔlɛka babla beleku bani nda udu buni, na baaadi bekyuli lɛlɔ atɛ batɛmine. Mmomu ɔlɛka babla beleku bani náda anu, na baabla lɛla biala kaduɛ. ¹² Bɛnu ka bebunkune bamɛni ɔdi biala úti uleku unwi, na ɔɔnu nwuna bebi ku kaduli bekyuli ƒui lɛlɔ kaduɛ. ¹³ Na bebunkune bani mɔɔda bana kabla kaduɛ ni, ama alati bebo kenyekɔ kabuni na Katɔti anumi. Na baakana na beesé kayi taasu bana bɔƒɔtaadi etemila ɔ́si Yesu Kristo bɔƒɔtaadi lɛlɔ. ¹⁴ - ¹⁵ Na nsia lɛnu ka ndububo uwi klukui kemo mbanu-ɔ. Nsu muunweni ala amɛni lite-ɔ kalɛ na si mɔɔkpɛ kama ni, na ebunku-ɔ na ati kalɛ na ada ƒula lɛlɔ aani ɔtɔnkune na Katɔti ɔtɔ bebi akɔ. Na ngba ƒui Katɔti ɔtɔ bebi bani ndi baƒɔtaadine kasala ni, baagyumana nwuna litemi geen. ¹⁶ Katɔti litemi kedee lɛni na bédie keyi ni, lɛ́ƒɔ kuye geen na ukyuli biala ulakana na weni-ni. Ani ndi ka, “Blɔti úbo aani ɔyawine ubi. Katɔti Kɔyu kɔ́gyila-nwu na kúte-nwu ubo. Na katɔ batu bánu-nwu. Na bekyuli bákɔ-nwu lɛlɔ lɛsa na kadi ƒui akɔ. Bekyuli pii báƒɔ-nwu bádi na kayawi. Na Katɔti úti-nwu úsienku katɔ.”

¹ Katɔti Kɔyu kuudie taasu-bu nwaa ka ni, asa na emeyi ekplodi adubudu ni, bekyuli badi badubɔlɛ bɔƒɔtaadi litemi geen lɛmɛni kama na basiaku ayu ekpidi katɔlɔ ku bani néti lɛlɔ béte ukisine ɔmmɔ ala bɔtina kama. ² Bekyuli bamɛni mɔɔtina ɔkɔ ala, na baabɛla ama alati bana likyulikpi, ɔsika bana kayi kaladu-ma kɔtɔ. ³ Na baatina banii utalɛka bekyuli beti beleku. Na baasu banii batadi adila lidu lɛdi bene lɛnɔ. Nsu Katɔti nédie adila ƒui úse kalɛ na bani náƒɔ-nwu litemi geen bádi na basiaku-nwu kama ni, badi-nya ku linugya. ⁴ Na sɔsɔ ni, lɛla biala na Katɔti údie ni, lɛdia. Anwuɔsu útalɛka bekyuli beni lɛdila lɛdi. Mmomu ɔlɛka baka Katɔti enu bɔgya na ana lili. ⁵ Ɔsika Katɔti litemi ku bula linugya lɛ́bla adila ammɔ kedee. ⁶ Si átina ƒula banwa ala amɛni ni, mmɔ na adubɔbla Yesu Kristo kabla ubunkune buni. Na bɔƒɔtaadi etemila amɛni ku bula ala bɔtina bɔni kama na asia ni, anya muute-ɔ kenyekɔ kamɛni. ⁷ Anwuɔsu da lɛlɔ mami kɔbɔ ala batɛmine ku atɛ keeke ani neeebo kɔsia lɛlɔ. Na ataatɛya Katɔti etemila na asiaku-nya kama kpakplaa, na elie ngba buni aani ɔƒɔtaadine kalɛ. ⁸ Ɔlɔna lɛlɔ ɔkplu ɔdia bɔdi, nsu kalɛ na baatɛya Katɔti etemila kama bɔsiaku bubo kɔsia butulo ƒui. Ɔsika uute-ɔ kɔsia na ngba bɔmɛni ku kekpima ngba lɛnɔ kemo. ⁹ Ɔmɛni ɔdi litemi geen lɛni na ɔlɛka ukyuli biala ɔƒɔ ɔdi. ¹⁰ Ɔmɛni ɔsu na bunye kabla lɛlɔ kpakplaa na buubó abi. Ɔsika bula anu asia ngba ƒui Katɔti ɔni ndi bekyuli ƒui Ɔƒɔne lɛlɔ. Na bani geen na ɔdubo bɔƒɔ ndi bani náƒɔ-nwu bádi. ¹¹ Na ala amɛni na ɔlɛka atina-ma. ¹² Taya na ukyuli ɔdi ɔnu-ɔ ɔnii ásɔ ka adi ɔnamu ɔsu. Mmomu ni, nwini kanu te baƒɔtaadine bammɔ ƒui na ƒula kɔtɛ ku udu ku ƒula bekyuli bɔyɔ ku bɔƒɔtaadi kemo ku ƒula kedee bulie lɛnɔ kemo. ¹³ Nye kpakplaa na ataaka Katɔti litemi lɛmmɔ na ataakɔ-ni lɛsa teete baƒɔtaadine ƒui. Na eteedie-ni kalɔ na ataatina-ma ala ammɔ wetédu uwi ɔni na mebo. ¹⁴ Na Katɔti Kɔyu kemo kabla etela ani na úti ɔ́kya-a lɛlɔ kemo ɔkɛnku nwuna kenye bediene ku baƒɔtaadine benengu bani néti enu básia-a lɛlɔ ni, tada-nya aya. ¹⁵ Ya na ƒula kasusu kasia ɔmɛni lɛlɔ, na ataabla-nya taasia kama kalɛ na bekyuli ƒui banu ƒula ngba buni bulie lɛtɔtɔ busie bati. ¹⁶ Da lɛlɔ kaduɛ ku ala ani na aatina. Nye kabla kammɔ lɛlɔ kpakplaa. Ɔsika si ábla lɛni ni, adubudie awɔ ku bekyuli bani ƒui muunú ƒula litemi lɛmmɔ alɛku kɔtu bɔni kemo.

¹ Tadɔnku ukyuli ɔni nábi lɛlɔ utulo-ɔ momoomo. Mmomu die ala kalɔ te-nwu ku kayi buɛɛ aani ƒula ɔti kalɛ. Na ada bakloƒu aani banwani kalɛ. ² Da beleku bani nábi lɛlɔ bétulo-ɔ aani ƒula beni kalɛ. Na ada begblebi lɛnɔ aani ƒula banwani belekubi, na ataabla lɛlɔ kedee. ³ Bekpinele bani neeebo bebunkune ni, da-ma kaduɛ ku ɔbu. ⁴ Nsu si ukpinele ɔdi ubo bebi iye bawɔ ni, bebi bammɔ bese kalɔ bataatɛya bana kaduli bekyuli bɔda ku bana bawɔne bɔda aani bana bɔƒɔtaadi kabla kalɛ. Ɔmmɔ mɔɔtina ka beesé bana bawɔne kɔdɛ. Ɔmɛni mɔɔyɔ́ Katɔti kaƒɔ. ⁵ Na ukpinele ɔni neeebo ubunkune ni, uuti nwuna anu ƒui taasia Katɔti lɛlɔ na ɔɔkpali Katɔti usien ku ɔƒɛ ka ɔɔwia-nwu kebunku ɔsu. ⁶ Nsu ukpinele ɔni mɔɔbla lɛyalɛ ni, uuubo ngba na Katɔti anumi ina ka uli ngba. ⁷ Bo-ma ɔda na ala amɛni lɛlɔ kalɛ na beletemi belewi-ma. ⁸ Na si bina akɔ ɔdi úni na uláda nwuna kaduli bekyuli kaduɛ ni, agyi anii ɔɔɔsiaku bɔƒɔtaadi bɔmmɔ kama, na nwuna litemi líbie litulo ukyuli ɔni nátaƒɔ útadi. ⁹ Teti ukpinele ɔni nátaƒɔ tɔ akwa liti ku leevu lɛnyi tebunku bekpinele lɛkpa lɛni nkya baƒɔtaadine bammɔ akɔ. Na ɔni nsia ni, ukpinele ɔni néduo lɛkpa lɛmmɔ kemo ɔlɛka ɔbla uleku ɔni nélie kɔgya kunwi. ¹⁰ Ɔlɛka bekyuli bataalɔ-nwu lɛnyi lɛbuni na nwuna ala abuni bɔbla ɔsu. Na ɔdi uleku ɔni nányuɛ nwuna bebi kaduɛ na ɔɔƒɔ́ baƒɔ. Ɔlɛka ɔbla uleku ɔni na ubo kɔnu ute nwuna baƒɔtaadine bakpana. Na uute bekyuli ƒui kebunku na bana lɛbibo kemo. Na sɔsɔ ni, úti nwuna ngba bulie ƒui úte lɛbuni bɔbla. ¹¹ Bekpinele bani nétedu tɔ akwa liti ku leevu ni, teti bana anyi tebunku bekpinele lɛkpa lɛmɛni. Ɔsika si ɔlɔna kɔgya bulie emini eekpóku-ma ni, badubɔlɛ Kristo kama na betélie agya bamba. ¹² Na ɔmɛni ɔdubɔya na baƒiɔ linyese lɛni nkya ama ku Katɔti ntɛ na ɔdu-ma kɔtɔ. ¹³ Ɔmmɔ kama ni, badububile uwi na bakɛ kɔnu bete bekyuli kɔduli bɔvi bataatɛmi atɛ keeke. Na ukpidi ƒui ndi ka ni, badubutaalɔ bekyuli anyikpi na beteekeyi atɛ. Na bataatɛmi bekyuli lɛlɔ kɔtɛ ku ala abambadi ani na útalɛka basu. ¹⁴ Anwuɔsu ni, mɔɔyɔ́ ka bekpinele bamɛni udu belie agya na bawɔ bebi na bataanu bana kɔduli ala lɛlɔ mmomu. Ɔmɛni ɔdubɔya na balabla ala ani nátamanku na wete bula bekisine kuƒi na bataasu ala taasiku-bu lɛlɔ. ¹⁵ Ɔsika bekpinele badi bénwini basiaku Satan kama. ¹⁶ Si ukpinele ɔdi ɔkya ɔƒɔtaadine ɔdi kaduli ni, anwu ɔnu-nwu lɛlɔ kalɛ na etila ammɔ asɔ alasia Katɔti baƒɔtaadine lɛlɔ. Na ɔya na baƒɔtaadine bamɛni bataanu bekpinele bakladi bani neeebo bebunkune lɛlɔ. ¹⁷ Na baƒɔtaadine batɔnkune bani mɔɔtɔnku bekyuli kaduɛ ni, ɔlɛka bakɛ lɛyuƒɔla lɛni nésie anumi. Na ɔni ntulo ƒui ndi bani mɔɔtina ala na baasu litemi buni lɛnɔ. ¹⁸ Ɔsika básu na Bunweni Kedee Ɔku kemo banini, “Tenyimi ebuo ɔni muuwile edula teete-ɔ kenye si unye kabla lɛlɔ.” Lɛnɔ ni, “Ɔlɛka kabla biala ɔblane ɔkɛ nwuna kabla lɛlɔ lɛyuƒɔla.” ¹⁹ Si ukyuli ɔdi úbo ɔɔdá ɔtɔnkune ɔdi kenye ni, taƒɔ taadi si bétedu nkyuli inyɔ ku kama. ²⁰ Na bekyuli bani nli nte ekpidi bɔbla ni, ɔlɛka edie alɛ-ma na adɔnku-ma na baƒɔtaadine ƒui anumi. Na ɔmɛni ɔdubɔkya bakladi liƒu. ²¹ Anwuɔsu mɔɔlɛ-ɔ na Katɔti ku Kristo ku Katɔti batu ƒui anumi nnii sia ala amɛni anu kaduɛ na alanu ukyuli ɔdi anumi alabla lɛla lɛdi. ²² Wi lɛlɔ buɛɛ na tababla eti enu asia ɔdi lɛlɔ na ese-nwu likpo ete Katɔti kabla. Na tenye ekpidi bablane kama, mmomu da lɛlɔ sɛɛn. ²³ Na ƒula kaƒɔ ɔlɛ ɔsu ni, tasu anii ataani ntu lɛti. Ɔdia ka ataani ntɛ blii blii kuvo kalɛ. ²⁴ Bekyuli badi ekpidi eeebo ɔbɛ ɔni na anya alati áaka bana litemi kɔtɔ bɔdu budie bɔtina. Nsu badi ama ni, kama kama asa na ama adi lɛnɔ aalɛ́ keyi. ²⁵ Lɛni kani na ala abuni adi bɔbla lɛnɔ eeebo ɔbɛ, na ani nábɛ lɛnɔ adubɔlɛ keyi.

¹ Su baƒɔtaadine bani mɔɔbla bekyuli bamba kabla ƒui anii ɔlɛka beboku lɛlɔ kalɔ bete bana benwoti na kabla biala kemo, kalɛ na bekyuli bamba balatɛmi kɔbɔ ala balásiku Katɔti ku bula bɔƒɔtaadi ulu ala bɔtina lɛlɔ. ² Na bekyuli bani mɔɔbla kabla teete benwoti bani ndi baƒɔtaadine ni, beteti bana bɔƒɔtaadi kɔnwa bɔdi batata betenye bana benwoti lɛlɔ. Mmomu ɔlɛka beboku lɛlɔ kalɔ na bete-ma kebunku bebu. Ɔsika bekyuli bani na beete kebunku mɛni ni, basiaku Yesu kama. Na ama ku-ma ƒui badi nwuna ala badine bani na ɔɔyɔ́ geen. Ɔmɛni na ɔlɛka atina-ma anii babla na akya-ma ogya. ³ - ⁴ Si ukyuli ɔdi ɔɔtina ala bamba ani naaasiaku bula bɔƒɔtaadi ulu ɔni nkɛnku Blɔti Yesu Kristo litemi geen lɛlɔ ni, ukyuli ɔmmɔ ɔɔtalaku lɛlɔ katɔ na ɔɔɔgyi lɛla lɛdi. Unyeƒi ukpludi ku kadɔ kani na ɔɔkya. Ɔmɛni ɔɔyá na anumi ekpidi eegyie bekyuli, na baadɔ, na beedumi lɛlɔ, na beeti lɛlɔ kasusu kekpidi. ⁵ Na baaní ala teenene uwi biala. Bekyuli bamɛni kasusu kékpi-ma na báyila litemi geen lɛmmɔ. Baakali banii badubɔsia bɔƒɔtaadi ulu lɛlɔ na beyile bana aƒo. ⁶ Nsu ni, si anumi eegyie ukyuli na Katɔti kama bɔsiaku kemo na ala ani na ubo aaƒɔ́-nwu anu ni, uunwíni ɔlakɛne. ⁷ Ɔsika ɔni na báwɔ-bu ni, bɔɔɔda lɛla lɛdi búteboku kayawi. Na si búkpi lɛnɔ ni, buleti lɛla lɛdi bulatɔlɔku. ⁸ Anwuɔsu bɛya na bula adala ku adila ani bubo emo-bu. ⁹ Nsu bekyuli bani na anumi eegyie-ma na lɛkɛ lɛlɔ ni, baanú kakpagyuɛ kani na Satan ɔ́kywɛ-ma. Na beeduo adɔlɔla bɔbla kemo, na ɔlɔna alaekpidi ala bɔbla aada-ma ɔkwɛ na eebile bana ngba keliela na beekpi taayii ku udu. ¹⁰ Ɔsika sika lɛnungyie kemo na ekpidi lidu lidu lɛɛkwɛ́ taasi. Ɔmɛni ɔsu na bekyuli badi báyila bɔƒɔtaadi ulu geen ɔmmɔ. Na bana ngba ƒui búduo lɛbibo kemo. ¹¹ Nsu ka adi ukyuli ɔni na éti lɛlɔ éte Katɔti ɔsu ni, die ala amɛni ƒui atu na eti ƒula anu asia lɛbuni bɔbla lɛlɔ. Sia Blɔti kama na bɔƒɔtaadi ku bɔyɔ kemo. Kɛ kayi na ada bekyuli buɛɛ. ¹² Nye bɔƒɔtaadi kabla lɛlɔ kpakplaa na adi lɛlɔ na akɛ ngba bɔni nsɔ naaadubo bɔyii kudii. Ngba bɔmɛni ɔsu na Katɔti ɔ́ƒuna-a uwi ɔni na édie ƒula lɛlɔ kalɔ na baƒɔtaadine bakladi anumi. ¹³ Na Katɔti ɔni nédie lɛla biala ku Yesu Kristo ɔnii nése kayi na údie nwuna bɔƒɔtaadi keyi na Pontio Pilato anumi muudie-mi kenye ka muute-ɔ ɔda bubo bɔmɛni. ¹⁴ Na mɔɔsu-ɔ nnii da ala amɛni kaduɛ kalɛ na ukyuli ɔdi ulasu lɛla likpidi lɛdi na ƒula lɛlɔ wetédu uwi ɔni na Yesu Kristo wasɔ webo. ¹⁵ Na Katɔti ɔdubɔya na Yesu Kristo wasɔ webo na uwi ɔni námanku lɛlɔ. Katɔti Ɔyɔne ɔmɛni lɛti mɔɔdi lɛla biala lɛlɔ, na anwu ndi bagadine ƒui Ɔga. Na lɛla biala lɛɛlɔ-nwu lɛnii Unwoti. ¹⁶ Anwu lɛti nli ngba ɔni na ulekpi kudi kudii. Na uukeye ɔni na ukyuli ɔdi ulakana-nwu anumi bɔda bɔlɛ. Ukyuli ɔdi útanu-nwu kudii na ɔdi lɛnɔ ulakana-nwu bɔnu. Na bumwi ku ɔyikun ɔdi anwu ɔdi úsela ƒui. Ɔsia lɛni. ¹⁷ Su ama bani mbo kayawi ala pii anii batatalaku lɛlɔ katɔ na beteti bana anu batasia ala ani udu naaakana-ma bɔƒɔ lɛlɔ. Mmomu beti bana anu basia Katɔti lɛlɔ. Anwu muute-bu lɛla biala ku kaƒɔ ƒaa kalɛ na bɔkɛ lɛlɔyɔ. ¹⁸ Su-ma anii bataabla lɛbuni kalɛ na benwini balakɛne na lɛƒɔndia bɔbla kemo. Na beteete bekyuli ala ku kaƒɔ ƒaa. ¹⁹ Si bábla lɛni ni, badubɔkɛ ala ani naaayii udu bese lɛlɔ kama. Na badubuƒie ngba geen bɔmmɔ bada. ²⁰ Timoteo, nu ka ágyumana ala ani na béti béte-ɔ bɔda kaduɛ. Takya atɛ keeke ku kɔdɔlɔ unyeƒi kenye. Anya na bekyuli badi beeti taatɔlɔ bekyuli banii lɛlati lɛdi kenye. ²¹ Ɔsika badi baasu banii bagyi ala amɛni. Nsu ɔkɛnku ɔmɛni ɔsu na báyila bɔƒɔtaadi ulu ɔmmɔ. Muuvele Katɔti nnii ɔda-mii kaduɛ na nwuna lɛƒɔndia kemo.