1 TESALONIKAƑUƆ

¹ Ami Paulo ku Silivano ku Timoteo búnweni ɔku ɔmɛni buute amii bani ndi Katɔti ku Blɔti Yesu Kristo badi na Tesalonika. Na bɔɔkpali katɔ bɔnii Blɔti lɛƒɔndia ku keyi buɛɛ kasiaku-mii. ² Bɔɔgyá Katɔti enu na bina lili. Na uwi biala si bɔɔkpali katɔ ni, buuvele lɛnɔ na bina lili. ³ Na buláyiƒla Katɔti bɔsu kalɛ na bɛda bina bɔƒɔtaadi bɛɛbla kabla. Bɔɔsu lɛnɔ kalɛ na biibunku bekyuli na bɔyɔ kemo, na bɛsia Blɔti Yesu Kristo anu kpakplaa. ⁴ Banwa, bɔgyi ka Blɔti ɔɔyɔ́-mii geen na ɔ́ƒuna-mii aani nwuna badi. ⁵ Na litemi buni lɛni búbasu-mii ni, ɔɔɔdi kenyekplu kani na kadi. Mmomu kadanku Katɔti Kɔyu ɔyikun budie taatina ɔni na bɔ́ya na béti ka sɔsɔ na ɔdi. Bɔgyi ka bɛ́nu kalɛ na bɔ́da bula lɛlɔ na bina akɔ, na ɔmɛni ɔdi bina kebunku. ⁶ Na sɔsɔ ni, amii lɛnɔ bɛ́tɛya-bu na bɛsiaku Blɔti udu kama. Na ina ka biibó abi muedi ni, bɛ́ƒɔ litemi lɛmɛni ku ebiti ani na Katɔti Kɔyu kúte-mii. ⁷ - ⁸ Ɔmɛni ɔsu na baƒɔtaadine bani nkya Makedonia ku Akaia kalɔ lɛlɔ ƒui ni, baanu-mii taatɛya. Nsu ɔɔɔdi Blɔti litemi lɛmɛni lɛti néegyingya lɛ́si-mii kudɔ lísie Makedonia ku Akaia ƒui. Mmomu bina Katɔti bɔƒɔtaadi lɛnɔ bɔ́ɔƒɔ kesi kesii. Na ɔɔɔdi abu nsɔ masu lɛla lɛdi, ɔsika bekyuli ƒui béenu-ni. ⁹ Na ama alati mɔɔtɛmi taasiku kalɛ na bɛ́ƒɔ-bu uwi ɔni na búbo-mii kudɔ ku kalɛ na bɛ́da baƒiɔ bɔkpa bɛ́ya, na bíti lɛlɔ bíte Katɔti ɔni lɛti mbo ngba. ¹⁰ Na binye bɛgya Ubidi Yesu ɔni na ɔ́gyila ɔ́lɛku bekpine akɔ, na úbo uli ngba ku Katɔti, na ɔsɔ ɔdubɔsi Katɔ Ɔga Ɔma mmɔ ubo. Yesu ɔmɛni kani ndubɔkana na ɔƒɔ-bu ɔlɛku kɔtu bɔni bɔni na Katɔti ɔdubute ekpidi bablane ƒui kemo.

¹ Banwa, amii alati bɛgyi ka kabla kani ɔsu na búbo-mii kudɔ ni, kánwu ebi geen. ² Na bɛgyi kalɛ na búbo abi na béwi-bu anumi kalɔ na Ƒilipi asa na búbedu bina kudɔ na Tesalonika mɛni. Nsu ina ka békpoku-bu mɛni lɛnɔ ni, Blɔti ɔ́kya-bu ɔkplu na bɔ́su-mii nwuna litemi buni. ³ Na bula bɔlɛ bɔni na bɔɔlɛ-mii ni, bútasi katɔlɔ iye kasusu kekpidi kemo. ⁴ Mmomu litemi geen lɛmmɔ na bɔ́su-mii. Na bɔɔtɛmiku-mii uwi biala aani kalɛ na Katɔti ɔɔwia ka bɔbla. Ɔsika anwu ɔlati nákɔ-bu ɔ́nu ka bɔmanku ka bɔsu nwuna litemi buni. Na ɔɔɔdi aani kalɛ na bekyuli lɛƒɔyɔ lɛɛtina, mmomu aani kalɛ na Katɔti ɔni ngyi ukyuli biala kayi kemo lɛyɔla lɛɛtina. ⁵ Bɛgyi kaduɛ ka ɔɔɔdi kenye emini etemila na búti búboku-mii. Na bútasu-mii litemi buni lɛmɛni kalɛ na bɔkɛ kɔsia kɔdi bɔsiku-mii kudɔ. Na Katɔti ɔlati ndubunye-bu litemi lɛmɛni kama. ⁶ Bútawia bumwi bútasiku amii iye bekyuli bamba kudɔ. Ina ka bubo kuƒi aani Kristo batalane kalɛ na bula lɛlɔ bɔnu bunwini etila bɔsia-mii lɛlɔ muedi ni, ⁷ bɔ́da lɛlɔ aani kalɛ na uwele ɔɔnu nwuna bebi lɛlɔ. ⁸ Ka bɔɔyɔ́-mii ku kaƒɔ nwaa ɔsu ni, bɔɔwia ka amii lɛnɔ binu litemi buni lɛmɛni. Na ɔɔɔdi Katɔti litemi buni lɛmmɔ lɛti. Mmomu búti bula ngba lɛnɔ bɔ́kpa na bina lili, ɔsika bɛ́ƒɔ-bu kuye geen. ⁹ Banwa binyimo ka uwi ɔni na bɔ́kya-mii kudɔ na bɔ́su-mii litemi buni lɛmɛni ni, búni ewulu usien ku ɔƒɛ na bɔ́bla kabla na bútenwini etila bútasia-mii lɛlɔ. ¹⁰ Amii alati ku Katɔti ndubunye-bu litemi lɛmɛni kama ka bɔ́da bula lɛlɔ kedee na bina akɔ. Bɔ́bla ala abuni. Na ukyuli ɔdi útanu bɔƒiɔ bɔdi na bula lɛlɔ. ¹¹ Bɛgyi lɛnɔ ka bɔ́da bina ɔdi biala aani kalɛ na ubi ɔti ɔɔda nwuna bebi. ¹² Bɔ́kya-mii ɔyikun ku ogya na bútaalɛ-mii bɔnii bilie ngba bɔni na kaƒɔ kayɔ Blɔti, ɔsika anwu ɔlati nálɔ-mii kalɛ na bɛkɛ bɔƒɔ na nwuna lɛga bɔdi ku bukeye kemo. ¹³ Na lɛla lɛni ɔsu na bɔ́sɔ bɔɔgyá Katɔti enu lɛnɔ ndi ka ni, uwi ɔni na bɔ́su-mii litemi buni lɛmɛni ni, bíteti-ni aani litemi likpludi. Mmomu bɛ́ƒɔ-ni aani Katɔti litemi. Na ɔdi nwuna litemi sɔsɔ. Na líboku kavumana geen lɛnɔ na amii baƒɔtaadine bammɔ ngba bulie kemo. ¹⁴ Banwa, ala ani mɔɔlɛ́ku-mii mɛni ni, anya kani nálɛku Katɔti bekyuli na Yudea kalɔ lɛlɔ. Na abi ani na amii biibó na bina bekyuli enu kemo ni, anya kani na Yudea kalɔ bekyuli bani náƒɔ Yesu bádi bébo na Yudaƒuɔ lɛkɔkɔ. ¹⁵ Yudaƒuɔ bamɛni nádu Katɔti kenye bediene, na báya na bádu Blɔti Yesu lɛnɔ. Ama kani nsia beekpóku-bu na baawia-bu badu. Bana ablala áta énye Katɔti lɛlɔ na badi liƒula lɛni nétile bekyuli ƒui ulu. ¹⁶ Béti básia lɛlɔ banii butasu bani naaadi Yudaƒuɔ litemi buni lɛmɛni kalɛ na bakɛ ngba ƒui. Na baatɛ ekpidi etila taasia ekpidi kama teete lɛlɔ ani nédu kesii kani na Katɔti kɔtu bɔni bubo-ma lɛlɔ. ¹⁷ Banwa uuduo-bu geen ka bɔ́di emeyi alɛɛ na bɔ́sɔ bútasa tɔ anumi ku anumi. Nsu bɛkya-bu kayi kemo. Na bɔ́ɔkya kɔkwɛ kɔni ƒui bɔ́nɔ. ¹⁸ Anwuɔsu bɔ́yɔ ka bɔsɔ bubo bubanu-mii. Na ami Paulo geen ni, lɛ́wia ulu kɔlɛ kɔlɛ ka libo. Nsu ukisine ɔmmɔ únye útile ulu. ¹⁹ Mɔɔwia geen ka mbanu-mii, ɔsika amii ndi bula lɛnumi. Na bɛɛda-bu kubiti, ɔsika amii ku baƒɔtaadine bakladi ndi bula kɔsia kɔni ɔsu na bɔdubuƒu uwi ɔni na Blɔti Yesu wasɔ webo. ²⁰ Sɔsɔ ni, amii mɔɔyá lɛlɔ lɛɛyɔ́-bu, na buuƒú lɛnɔ na amii ɔsu.

¹ Na ka bina takana tɔ bɔnu lɛƒɛda lítulo-bu ɔsu ni, bɔ́tuna bɔnii bula inyɔ bɔɔsɔ bɔkya Atene. ² Na bɔtala Timoteo na ubo ubakya-mii ɔkplu, na ubunku-mii na bina bɔƒɔtaadi kemo. Anwu ndi bula ɔnwa ɔni muubunku-bu na Katɔti kabla ku Kristo litemi buni lɛmɛni bɔsu kemo. ³ Bɔ́bla lɛni ɔsika buláwia ka bukpoku bɔmɛni bɔƒɛ ɔdi enu. Amii alati bɛgyi bise ka bukpoku bɔmɛni buse bute Kristo kama basiakune ƒui. ⁴ Bɛdubunyimo ka uwi ɔni na bɔkya-mii kudɔ ni, bɔ́lɛ-mii ɔmɛni lɛlɔ búse ka bukpoku bɔmɛni bɔdububo. Na aani kalɛ bɛgyi ni, úbo lɛni sɔsɔ. ⁵ Ala amɛni ɔsu na lɛ́tala Timoteo nnii ubanu si bɛmua bɛda bɔƒɔtaadi bɔmmɔ kpakplaa. Ɔsika litemi lɛmɛni liléte-mii bɔlɛɛ. Na mɔɔyia ka ɔƒɛni kalɛ ukisine ɔmmɔ úbo úbeƒu-mii kasusu na bula lɛbibo ƒui lɛ́bla keeke. ⁶ Nsu Timoteo ɔ́sɔ úbo ku kubiti úbasu-bu ka bina bɔƒɔtaadi ku bina bakpana bɔyɔ bútavumana. Mmomu bɛɛkali-bu geen na binye kuƒi bɛɛyɔ́ ka bɛnu-bu aani kalɛ abu lɛnɔ bɔɔwia-mii bɔnu. ⁷ Ɔmɛni ɔsu ni, banwa, ina ka buubó abi na ala amɛni ényimi-bu muedi ni, bina bɔƒɔtaadi bɔɔkya-bu kubiti na kayi kaayɔ́-bu. ⁸ Ɔƒɛni na bula ngba bulie bɔ́sɔ bɔ́bla ɔwɔdi, ɔsika búnu kalɛ na binye kpakplaa na Blɔti bɔƒɔtaadi lɛlɔ. ⁹ Bulakana Katɔti enu bɔgya na bina lili na wedu ebiti ani na úte-bu na amii ɔsu. ¹⁰ Buuvele Blɔti kpakplaa usien ku ɔƒɛ bɔnii ɔya na bɔsɔ bɔsa na bɔkya-mii bɔƒɔtaadi unu. ¹¹ Na ɔƒɛni ni, Unwoti Katɔti ɔlati ku Blɔti Yesu balɛmi ulu bete-bu na bubo-mii kudɔ. ¹² Na Blɔti ɔya na bina bɔyɔ bɔni bibo bite lɛlɔ bumomo bubu. Na bɛyɔ bekyuli bamba lɛnɔ aani kalɛ na bɔɔyɔ́-mii. ¹³ Ɔmɛni ndubɔya na Unwoti Katɔti ɔkya-mii ɔkplu na uveli-mii lɛlɔ ekpidi ƒui na ɔbla-mii kedee na nwuna anumi ute limeyi lɛni na Blɔti Yesu Kristo wasɔ webo kayawi kamɛni ku nwuna badi kedee.

¹ Banwa, mina lɛla likplodi lɛni muuvele-mii ndi ka ni, bilie ngba bɔni mɔɔyɔ́ Katɔti kaƒɔ aani kalɛ na bɔ́tina-mii. Bɛdaku ɔkplu bɔkya bɔdi, nsu bɔɔkya-mii ogya na Blɔti Yesu lɛnyi kemo bɔnii bɛbla bitulo lɛni. ² Ɔsika bɛgyi ala ani na bɔ́tina-mii ɔkɛnku Blɔti Yesu ɔyikun kemo. ³ Katɔti ɔɔwia ka bɛbla lɛlɔ kedee na bɛda lɛlɔ bidie lɛsɔnɔdi kemo ƒui. ⁴ Ɔnana biala ku ulekudi bati lɛlɔ bɔda kaduɛ na belie ngba kedee. ⁵ Na bitasiaku ɔlɔna emini kama aani bekyuli bani naaayia Katɔti kalɛ. ⁶ Ɔkɛnku ɔmɛni lɛlɔ ni, ɔdi biala lɛnumi litegyie na ɔnwani ulekudi lɛlɔ kalɛ na waƒiɔ-nwu. Bɔ́su-mii na bɔ́lɛ-mii na ɔmɛni lɛlɔ búse kpakplaa ka ni, Blɔti ɔdubɔni bani mɔɔbla ala amɛni kɔtu geen. ⁷ Katɔti ɔ́lɔ-bu ka bɔbla bekyuli kedee. Anwuɔsu bɛya bɔda lɛlɔ budie kɔbɔ ala bɔbla kemo. ⁸ Anwuɔsu si bina akɔ ɔdi útadi ɔmɛni lɛlɔ ni, ɔɔɔdi bekyuli lɛlɔ na ɔ́ta únye. Mmomu Katɔti ɔni néti nwuna Kɔyu úte-mii lɛlɔ na ɔ́ta únye. ⁹ Na bina banwa baƒɔtaadine lɛlɔ bɔyɔ ni, útalɛka bunweni-mii lɛla lɛdi na ɔmmɔ lɛlɔ. Ɔsika Katɔti ɔ́tina-mii ɔmɛni ƒui. ¹⁰ Na sɔsɔ ni, ɔdi litemi geen ka bɛɛyɔ́ bina banwa baƒɔtaadine bani nkya Makedonia. Nsu bɔsɔ buuvele-mii bɔnii bɛbla bitulo lɛni! ¹¹ Bilie ngba ku lɛlɔ kalɔ buboku, na ɔdi biala anu asia nwuna kabla lɛlɔ, na biti bina enu bɛwia bina lɛdila aani kalɛ kani na bɔ́su-mii. ¹² Ɔmɛni ndubɔya na bani nátaƒɔ bátadi bataaƒalɛ-mii na bilayaki lɛla lɛdi. ¹³ Banwa, bɔɔyɔ́ ka bɔsu-mii lɛla lɛni ndubɔlɛku bekyuli bani néekpi, kalɛ na biléteewulo kɔnyana aani bekyuli bani neeebo lɛnunsia. ¹⁴ Bɔ́ƒɔ bɔ́di ka Yesu úkpi na ɔ́sɔ ɔ́ta uli ngba na ɔdubɔsɔ ɔsi katɔ mmɔ ubo lɛnɔ. Anwuɔsu bɔ́ƒɔ bɔ́di ka baƒɔtaadine bani ƒui nékpi ni, badubɔsɔ bata. Na Katɔti ɔdubɔsia Yesu ɔmmɔ kani lɛlɔ na ɔƒɔ-ma na bebelieku-nwu ngba. ¹⁵ Lɛla lɛni na Blɔti ɔɔtina ni, nina lɛlɔ na bunye bɔɔsu-mii ka ni, abu bani nli ngba na Blɔti bɔsɔ bubo kemo ni, bulaka bani néekpi katɔ busie. ¹⁶ Uwi ɔmmɔ kemo ni, bɔdubunu Blɔti bubo kɔku ku kudu kubendi. Bɔdubunu Katɔti ɔtu unengudi lɛdi. Na Katɔti kakpɛɛ kadubɔku. Na Blɔti ɔlati ɔdubɔda ɔlɛ kayaa. Na bekyuli bani náƒɔ Kristo bádi asa na békpi ni, badubɔka bɔta buli ngba. ¹⁷ Ɔmɛni kama ni, Katɔti ɔdubutiku abu bani nébu buli ngba na uti-bu utásalaku bekyuli bani náta na butásiaku Blɔti na kayaa. Na bɔdubulieku Blɔti uwi ƒui. ¹⁸ Anwuɔsu biti etemila amɛni bitaasia lɛlɔ kɔnu.

¹ Banwa, útalɛka linweni-mii lɛla lɛdi ɔ́si uwi iye emeyi ani na ala amɛni adubɔlɛ lɛlɔ. ² Ɔsika amii alati bɛgyi geen ka Blɔti limeyi lɛmmɔ lɛdububo aani kalɛ na uyune uuyú ukyuli taatu usien. ³ Na uwi ɔni kemo na bekyuli baasu banii lɛla biala lɛ́ɛtɛ ni, uwi ɔmmɔ geen na ɔgbankpi adubɔlɛku-ma ɔni na baaagyi beeese. Ɔdububo aani kalɛ na kawɔƒɔ kaadu ɔƒɔdane. Na kekelikɔ kadi keeebo. ⁴ Nsu ni, banwa, amii bɛɛɛkya lɛdisa kemo. Anwuɔsu limeyi libendi lɛmmɔ liléyu-mii lilatu aani uyune kalɛ. ⁵ Ɔsika bina ƒui bɛkya bukeye kemo. Na bɔɔɔdi aani bekyuli bani náƒɔ lɛlɔ bákya likpidi kemo na baabla ala taabɛ. ⁶ Anwuɔsu bitaya na bɔlɛɛ na budie lɛlɔ atu aani ama bani naaagyi Blɔti. Mmomu bɛya bunye kagyumana na bɔda lɛlɔ kaduɛ. ⁷ Ɔsika ama bani mɔɔlɛɛ ni, usien na baalɛɛ. Na ama bani muukpi ntɛ ni, usien na beekpi-mu. ⁸ Nsu abu bani nkya bukeye kemo ni, bɛya na bɔda lɛlɔ kaduɛ. Na buti bula bɔƒɔtaadi ku bula bɔyɔ butaagyumana lɛlɔ aani kalɛ na kekpo adala aagyumana ukpone. Na butaasia anu ka Blɔti ɔdubɔƒɔ-bu, aani kalɛ na kekpo kabwa kaagyumana ukpone lili. ⁹ Ɔsika Katɔti útedie-bu ɔnii nwuna kɔnyi kubo-bu lɛlɔ. Mmomu ɔnii bɔsia Blɔti Yesu Kristo lɛlɔ na bɔkɛ bɔƒɔ. ¹⁰ Yesu ɔmɛni nékpi na bula lili ɔni na si bulie o-o, si bukpi o-o ni, bɔdubulie ku Blɔti na nwuna bɔsɔ bubo kemo. ¹¹ Ɔmɛni ɔsu ni, bitaakya lɛlɔ ogya na biteebunku lɛlɔ aani kalɛ na biwi-nwu lɛlɔ ɔƒaani. ¹² Banwa, buuvele-mii bɔnii biti ɔbu geen bite bina batɔnkune bani mɔɔtina-mii Kristo ngba bulie ala lɛlɔ. ¹³ Bɛyɔ-ma na bɛbu-ma kaduɛ na bana ulu ɔbuni ɔni na béti-mii baasiaku ɔsu. Na bilieku lɛlɔ ku keyi buɛɛ. ¹⁴ Lɛnɔ ni, banwa, bɔɔwia kpakplaa ka bɛkɛ litemi bɛsu bakɔsɔne. Na bɛkya bani na liƒu lɛɛda ɔkplu. Na bibunku bani mɔɔwia kebunku. Na bɛkɛ kayi buɛɛ bite ukyuli biala. ¹⁵ Bɛnu kaduɛ na ɔdi uteti likpidi utaƒɔ likpidi kayu. Mmomu uwi biala kemo ni, bitaabla lɛbuni teete lɛlɔ ku bekyuli ƒui. ¹⁶ Bɛya na lɛlɔ litaayɔ-mii uwi biala. ¹⁷ Bitaya na enu aƒɛ-mii na katɔ bɔkpali kemo. ¹⁸ Na biti enugya bite Blɔti na lɛla biala kemo. Ɔsika amɛni ndi ala ani na Katɔti ɔɔwia taasiku amii bani ƒui nsiaku Yesu Kristo kama. ¹⁹ Bitetile Katɔti Kɔyu ɔyikun ulu na bina akɔ. ²⁰ Biteni Katɔti kenye bediene ala kalɔ budie aani lɛla keeke. ²¹ Mmomu bɛwia lɛla biala kalɔ binu na bɛsiaku lɛbuni kama. ²² Bɛda lɛlɔ bidie likpidi ulu biala lɛlɔ. ²³ Na buuvele Katɔti ɔni muute-bu keyi buɛɛ bɔnii ɔbla-mii kedee na ulu biala lɛlɔ. Na ɔgyumana bina kɔyu ku kasusu ku ɔlɔna ƒui kalɛ na bɛlɛ kɔtɔ bɔdu kemo uwi ɔni na Blɔti Yesu Kristo wasɔ webo. ²⁴ Na Katɔti ɔni nálɔ-mii ɔnii binwini nwuna bekyuli ni, ɔdububunku-mii utédu kawɔlɔkɔ. Ɔsika lɛla lɛni na ɔ́nya ɔ́su ka wabla ni, ani kani na ɔdubɔbla. ²⁵ Banwa, bitaakpali katɔ na bula lili. ²⁶ Bɛkya lɛlɔ kɔgbu na bigyele lɛlɔ ku kaƒɔ ƒaa. ²⁷ Mɔɔsu-mii kpakplaa aani Blɔti Yesu Kristo kenye unyene nnii bɛka ɔku ɔmɛni bite baƒɔtaadine bammɔ ƒui. ²⁸ Muuvele Blɔti Yesu Kristo nnii ɔda-mii kɔkɔɔkɔ na nwuna lɛƒɔndia kemo.