1 PETRO

¹ Ami Petro ɔni ndi Blɔti Yesu Kristo ɔtalane muunweni ɔku ɔmɛni lite Katɔti baƒɔtaadine bani nátɔlɔ bana lɛma bésie belie Romaƒuɔ kɔlɔ kɔni ndi Ponto ku Galatia ku Kapadokia ku Asia ku Bitinia lɛlɔ. ² Unwoti Katɔti ɔlati náƒuna-mii na nwuna bɔyɔ kenye. Na ɔ́ya na nwuna Kɔyu kɔ́bla-mii nwuna bekyuli kedee ka bɛ́di Yesu Kristo litemi lɛlɔ ɔsu. Na nwuna ubugya ɔ́bla-mii lɛlɔ sɛɛn. Muuvele nnii Katɔti lɛƒɔndia ku keyi buɛɛ kasiaku bina ƒui uwi biala kemo. ³ Bɛya na bɔgya Katɔti ɔni ndi Blɔti Yesu Kristo Ɔti enu. Ka Katɔti ɔɔnu-bu kɔnyana geen ɔsu ni, ɔ́ya na bɔdubulie ngba bɔwɔdi na kɔyu kemo, ɔsika ɔ́gyila Yesu Kristo ɔ́lɛku kekpine. Anwuɔsu na bubo lɛnunsia lɛni naaayii udu kudii. ⁴ Na bɔɔnu anumi ka bɔdubɔdi ala ani na Katɔti ɔ́klibi úse na katɔ, na adi ala ani neeebie na alanyi taakpi iye ayii udu lɛnɔ. ⁵ Amii ndubo ala ammɔ bɔdi, ɔsika Katɔti ɔɔgyumana-mii teete ngba bɔƒɔ limeyi lɛni ndububo ka bɛ́ƒɔ Blɔti Yesu Kristo bɛ́di ɔsu. ⁶ Lɛlɔ litaayɔ-mii na ɔmɛni lɛlɔ ina ka bɛdubo abi buteebo uwi uwi na bekpoku-mii lɛnɔ. ⁷ Ala ani ndubɔsiaku-mii ndubɔtina kalɛ na bɛ́ƒɔ bɛ́di geen. Sika ugyiedi ɔni muubie muedi ni, ogya kemo na beeti-nwu taakya taanu-nwu taati kalɛ na ɔdia. Anwuɔsu bina bɔƒɔtaadi bɔni náƒɔ kuye butulo sika ugyiedi ɔmɛni ni, ɔlɛka bakɔku-mu banu asa na bɔkana bunye kpakplaa. Na si bina bɔƒɔtaadi bɔmmɔ bɔ́kana na búnye ni, Katɔti ɔdubumwi-mii na ɔtalaku-mii katɔ, na ɔbu-mii na Yesu bɔsɔ bubo limeyi lɛmmɔ lɛlɔ. ⁸ Bítanu-nwu kudii, nsu bɛɛyɔ́-nwu. Na bilánu-nwu ɔƒɛni lɛnɔ, nsu bɛɛƒɔ́-nwu taadi. Anwuɔsu bɛya na lɛlɔyɔ lɛni náƒɔ kuye geen na ukyuli ɔdi biala ulakana-ni kalɔ budie lɛnɔ ni, lɛkya-mii kemo. ⁹ Ɔsika kalɛ na bɛ́ƒɔ Kristo bɛ́di ɔsu ni, Katɔti ɔdubɔya na bina ayu akɛ ngba. ¹⁰ Katɔti kenye bediene béwi lɛlɔ báwia kalɛ na Katɔti ɔdubɔƒɔ-bu ngba kemo, na béduo-nwu kemo kaduɛ na básu-bu bése kalɛ na Katɔti lɛƒɔndia lɛdubɔsiaku-bu. ¹¹ Básia ulu biala lɛlɔ ka bati uwi ku ukyuli ɔni lɛlɔ na ala amɛni adubɔlɛ. Na Kristo Kɔyu náƒɔ-ma lɛlɔ kemo na kɔ́ya na básu-bu ala bése. Kɔyu kɔmmɔ kɔ́su kúse kalɛ na Kristo ɔdubo abi bubo ku kalɛ na lɛlɔ lɛdubo-nwu bɔyɔ na ɔmmɔ kama. ¹² Katɔti údie ɔ́tina kenye bediene bammɔ ka etemila ani na baasu mɛni aaadi bana uwi lɛlɔ litemi, mmomu ɔdi bina ɔdi. Na ala ani na básu mmɔ ni, abu ndi nwuna batalane na bɔdanku litemi buni lɛmmɔ bɔɔkɔ́ lɛsa teete-mii nwaa. Na bɔɔsu ala amɛni ɔkɛnku Katɔti Kɔyu kɔni na ɔ́tala ɔ́kya-bu ɔyikun kemo. Na anumi eegyie ayu muedi ka nka beduo ala amɛni kemo bati. ¹³ Anwuɔsu ni, da lɛlɔ bise bite kabla. Na binye kagyumana na bitaanu ulu teete lɛbuni lɛni na Katɔti ɔdubɔbla ute-mii lɛlɔ uwi ɔni na Yesu wasɔ webo wabaƒɔ-mii ngba. ¹⁴ Binu Katɔti litemi, na bɛda udu ukpidi ɔni kemo na bɛ́kya uwi ɔni na bítenwini tɔ baƒɔtaadine mmɔ bɛya. ¹⁵ Na aani kalɛ na Katɔti ɔni nálɔ-mii use kedee ni, amii lɛnɔ bɛbla lɛlɔ kedee na bina ablala ƒui kemo. ¹⁶ Na Bunweni Kedee Ɔku kemo ni, bénweni ka Katɔti ɔ́su nwuna bekyuli ɔnini, “Bɛbla lɛlɔ kedee, ɔsika Ami nse kedee.” ¹⁷ Bɛɛsu bɛnii, “Bula Ɔti” si bɛɛkpali katɔ. Anwuɔsu binyimo ka anwu ndubɔtɛku ukyuli biala litemi na ala ani na ɔɔbla kenye. Na ulanu bekyuli anumi asa na watɛku-mii litemi. Lɛni ɔsu ni, biti bina uwi ɔkladi ɔni nébu na bilie ngba mɛni aani baƒɔ kalɛ bitaabu-nwu. ¹⁸ Ɔsika bɛgyi ka kayu kani na Katɔti ɔ́ƒɔ na bina lili asa na údie-mii ɔ́lɛku ngba bukpidi bɔni na bɛ́ƒɔ bɛ́siku bina bati kuuku kudɔ ni, ɔɔɔdi sika ugyiedi iye ɔƒualadi ɔni muutili na ɔdi. ¹⁹ Mmomu Kristo ubugya ɔni náƒɔ kuye na ɔdi. Anwu ndi Koƒonu Ubi ɔni námanku lɛkpa na bina lili. ²⁰ Katɔti ɔ́ƒuna Kristo úse asa na údie kayawi. Na amii ɔsu na Katɔti údie-nwu keyi na uwi ukplodi ɔmɛni kemo. ²¹ Na ɔkɛnku Kristo ɔmɛni lɛlɔ ɔsu na bɛ́ƒɔ Katɔti bɛ́di. Na anwu nágyila-nwu ɔ́lɛku kekpine na úte-nwu keliekɔ kenengudi geen. Ɔmmɔ geen ɔsu na bɛ́ƒɔ Katɔti bɛ́di na bɛsia-nwu anu. ²² Ka bɛɛdi litemi geen lɛmmɔ lɛlɔ na bɛ́bla lɛlɔ sɛɛn ka Katɔti úti bina ekpidi ɔ́kyiɛ-mii na bɛɛyɔ́ lɛlɔ ɔƒɛni ɔsu ni, bɛya na bina baƒɔtaadine bakpana bɔyɔ bɔkɔ katɔ bubu ku kayi ƒui. ²³ Katɔti ɔ́ya na bínwini nwuna badi, ɔsika bɛ́kɛ ngba bɔwɔdi bɔni nsɔ naaadubo bɔsa na ɔɔɔdi bɔni mɔɔsa. Bɛ́kɛ ngba bɔmɛni bɛ́siku nwuna litemi lɛni mbo ngba geen kemo na lise lísela uwi ƒui. ²⁴ Na aani kalɛ na Bunweni Kedee Ɔku ɔmmɔ ɔɔsu ɔnii, “Bekyuli ƒui bese aani lɛku kemo alakpi, na ukyuli bɔdia buse aani alakpi anwula. Alakpi aayɛyɛ na anwula aanú. ²⁵ Nsu Katɔti litemi ani lise lite uwi ƒui.” Na ɔmɛni ndi litemi buni lɛni lɛsa na bákɔ béte-mii.

¹ Anwuɔsu bɛda kasusu kekpidi ƒui buti na bekyuli lɛlɔ bɛya. Na bɛsɔ bitanyi ɔkɔ iye bɛtɔlɔ bekyuli. Anumi etegyie-mii bekyuli ala lɛlɔ. Na bitalɔ lɛlɔ anyikpi. ² Bɛya na anumi egyie-mii na Kɔyu kemo etemila geen amɛni lɛlɔ aani kalɛ na ɔkaƒɔ ɔɔwia lɛnyi ntu. Ɔmmɔ ndubɔya na bɛlɛ lili bɛwɔlɔ kalɛ na Katɔti ɔɔwia. ³ Ɔsika amii alati bɛ́ɛnu bɛ́ti kalɛ na Blɔti kaƒɔ kadia. ⁴ Bibo Blɔti kudɔ. Anwu ndi lɛtabi lɛni mbo ngba, nsu batune béni-ni. Na anwu na Katɔti ɔ́ƒuna na ɔ́ƒɔ-nwu kuye geen. ⁵ Biti lɛlɔ bite Katɔti na ɔtu Kɔyu kemo kakpakɔ aani kalɛ na ɔtune uuti atabi taatu ɔtɔ. Bɛdubɔbla bakpane kedee bani muuti Kɔyu kemo akpala ani námanku teete Katɔti ɔkɛnku Yesu Kristo lɛlɔ. ⁶ Ɔsika Bunweni Kedee Ɔku ɔ́su ɔnini, “Lɛ́ƒuna lɛtabi lɛni náƒɔ kuye, na líti mɔɔbala Sion kowodu likpo. Na ukyuli biala ɔni maƒɔ-nwu madi ni, kɔƒa kulékpo-nwu kudii.” ⁷ Na lɛtabi lɛmɛni lɛ́ƒɔ kuye geen líte amii bani náƒɔ-nwu bɛ́di. Nsu bekyuli bani nátaƒɔ-nwu bátadi ni, bati banii, “Lɛtabi lɛni na batune béni báva ni, ani mmomu nébenwini lɛtabi lɛni náƒɔ kuye litulo ƒui.” ⁸ Na Bunweni Kedee Ɔku likpo bamba lɛɛsu lɛnini, “Ɔdi lɛtabi lɛni ndubɔya na bekyuli betulo, na ani kani ndubɔya na begyiile bebuli.” Bétulo, ɔsika bátadi litemi lɛmmɔ lɛlɔ. Na lɛni na Katɔti ɔ́su úse ka walɛku-ma. ⁹ Nsu amii ni, bɛdi bekyuli bani na Katɔti ɔ́ƒuna. Na bɛdi bakpane bani muumwi Katɔti ɔni ndi Ɔga. Bɛdi Katɔti bekyuli kedee bani na ɔ́lɔ ɔnii binwini anwu badi. Na amii ndububo nwuna ablala ebendi kudu bubo. Ɔsika anwu geen nálɔ-mii ɔ́lɛku likpidi lɛdisa kemo úsienku ngba bɔƒɔ bukeye kemo. ¹⁰ Uwi ɔdi kemo ni, bɛɛɛdi Katɔti bekyuli. Anwuɔsu Katɔti útanu-mii kɔnyana. Nsu ɔƒɛni ka bɛdi nwuna bekyuli ɔsu ni, Katɔti ɔɔnu-mii kɔnyana. ¹¹ Bayɔne, mɔɔlɛ-mii aani si baƒɔ ku belusiene na bɛdi na kayawi mɛni nnii bɛda lɛlɔ bidie ɔlɔna ɔkwɛ adala ani muukpóku-mii kudɔ. ¹² Na bilie ngba bɔni nse sɛɛn na bani naaadi baƒɔtaadine akɔ. Na ina baasu-mii lɛlɔ litemi likpidi muedi ni, badubɔnu bina ablala bati ka bɛdi bekyuli babuni. Na badubɔgya Katɔti enu na litemi bɔtɛ limeyi lɛmmɔ lɛlɔ. ¹³ Unwoti ɔni na biimwi ɔsu ni, biboku lɛlɔ kalɔ bite bina lɛlɔ badine ƒui ku Roma aban ɔgadine unengu na kalɔ kammɔ lɛlɔ ¹⁴ ku Roma aban benengu bani na béte kenyekɔ ka bani bekyuli bani mɔɔƒiɔ́ kɔtu na bemwi bani mɔɔbla lɛbuni lɛnɔ. ¹⁵ Ɔsika lɛni na Katɔti ɔɔyɔ́ ɔnii bɛbla lɛbuni na biti bɛdu ala ani na badɔlɔdi baasu kɔƒa ka baaagyi lɛla lɛdi ɔsu. ¹⁶ Bilie aani bekyuli bani naaakya bekyuli bamba kalɔ. Nsu bitabla likpidi ka bilie bite lɛlɔ ɔsu. Mmomu bilie ngba aani Katɔti kabla bablane. ¹⁷ Bɛbu bekyuli ƒui. Bɛyɔ bina banwani. Na bɛyia Katɔti. Na bɛbu Ɔga Unengudi lɛnɔ. ¹⁸ Amii kabla bablane, biboku lɛlɔ kalɔ bite bina benwoti na bitaabu-ma kaduɛ. Na ɔɔɔdi benwoti bani mɔɔnu-mii kɔnyana na baayɔ́-mii lɛti, mmomu ku bani mɔɔbla-mii ulikplu lɛnɔ. ¹⁹ Si ukyuli ɔdi use kayi na úbo abi ani na utalɛka ubo na bekyuli lɛkɔkɔ ka ɔɔyɔ́ Katɔti ɔsu ni, Katɔti ɔdubumwi-nwu. ²⁰ Nsu si ƒula ekpidi ɔsu na bekyuli báni-ɔ kɔtu ni, ɔɔɔdi-ɔ bumwi. Nsu si bítabla likpidi asa na biibó abi ni, Katɔti ɔdubute-mii kusɛ kusɛ. ²¹ Na ɔmɛni na Katɔti ɔ́lɔ-mii ɔnii bibabla. Ɔsika Kristo ɔlati úbo abi na bina lili na ɔ́tina-mii ɔnii bɛsia nwuna kasiakɔ. ²² “Anwu útabla likpidi lɛdi, na útanyi ɔkɔ ɔdi lɛnɔ kudii.” ²³ Bédumi-nwu, nsu anwu útedumi ɔdi. Úbo abi, nsu útewida nwuna bekisine. Mmomu úti lɛla biala úte Katɔti ɔni mɔɔtɛ litemi na ulu lɛlɔ. ²⁴ Kristo ɔlati náƒɔ bula ekpidi lɛbibo ɔ́sia lɛlɔ útédu ka bákana-nwu bámana ugyii lɛlɔ na bádu-nwu. Ɔ́bla ɔmɛni kalɛ na bɔlɛ likpidi kemo kalɛ na likpidi lɛsɔ liladi-bu lɛlɔ. Na bulie ngba na butaabla ala ani mɔɔyɔ́ Katɔti kaƒɔ. Abi ani na Kristo úbo na bula lili mɛni náya na abu bɔ́yu ɔkplu na kɔyu kemo. ²⁵ Bílie ngba dii ani baƒonu bani náyii ulu. Nsu ɔƒaani ni, Katɔti ɔ́sɔku-mii úboku bina ɔdane ɔni mɔɔgyumana-mii kɔyu kudɔ.

¹ Na amii beleku lɛnɔ ni, ɔlɛka biboku lɛlɔ kalɔ bite bina bagya. Ɔmɛni ndubɔya na si ɔdi útaƒɔ útadi ni, ɔdubuti lɛlɔ ute Katɔti ɔkɛnku bina udu buni ɔsu. Na ɔɔɔdi ɔni na bitemi bite-ma. ² Mmomu ama alati badubɔnu kalɛ na bina udu use sɛɛn ku lɛlɔ kalɔ buboku. ³ Bitatina bina bɔdia na ala ani na bɛɛda ku kalɛ na biinyimi lili linwini iye asɛɛ ku adala ani bɛɛkya kemo. ⁴ Mmomu ni, bɛya na kalɛ na bɛda lɛlɔ ku udu buɛɛ udie bina bɔdia ɔtina. Ɔmɛni ndi udu ɔni mɔɔda kubiti uwi biala na ɔ́ƒɔ Katɔti kuye geen. ⁵ Lɛni kani na kuuku beleku bani néti lɛlɔ básia Katɔti lɛlɔ báda bana adala, na béboku lɛlɔ kalɔ béte bana bagya. ⁶ Sara ɔ́bla lɛni, ɔsika únu Abraham litemi na ɔ́lɔ-nwu ɔnii, “Mina unwoti.” Bɛdubunwini Sara ɔmɛni bebi belekubi geen si bilie ngba bɔbuni na enu aláƒɛ-mii si lɛla lɛdi liikpóku-mii. ⁷ Amii bagya lɛnɔ ni, bɛya ala kalɔ bunu bɔkya amii ku bina beleku ntɛ, ɔsika beeebo ɔyikun aani bina kalɛ. Biti ɔbu bite-ma, ɔsika amii ku-ma ƒui na Katɔti ɔ́su úse ka ɔdubuti ngba bɔni nsɔ naaadubo bɔsa kudii ute. Na si amii bagya bɛ́bla ɔmɛni ni, Katɔti ɔdubunu bina ƒui katɔ bɔkpali. ⁸ Na ɔmɛni kawɔlɔkɔ ni, bina ƒui bɛkɛ kɔyu kemo kasusu kenwi bɛyɔ lɛlɔ aani banwani kalɛ na bɛnu ɔdi biala kɔnyana, na biboku lɛlɔ kalɔ bite lɛlɔ. ⁹ Biteti likpidi bitaƒɔ bani mɔɔbla-mii ekpidi kayu, iye bidumi bani muudumi-mii. Na mmomu bivele Katɔti na ute-ma keyi buɛɛ. Ɔsika ɔmɛni na Katɔti ɔɔwia ka bɛbla. Na ɔ́su bula ƒui úse ka ɔmɛni ɔsu na ɔdubute-bu keyi buɛɛ. ¹⁰ Bunweni Kedee Ɔku ɔɔtina ɔnii, “Ukyuli ɔni mɔɔwia ka ulie ngba na lɛlɔ litaayɔ-nwu na nwuna ngba emeyi ayɔku-nwu buɛɛ ni, utataalɔ bekyuli anyikpi na utataanyi ɔkɔ lɛnɔ. ¹¹ Ɔda likpidi bɔbla ɔya na utaabla lɛbuni, na ɔsia ulu biala lɛlɔ na nwuna kayi kabla ƒaa ku bekyuli ƒui. ¹² Ɔsika Katɔti ɔɔnu bekyuli bani nse siin lɛlɔ, na uunú bana bɔkpali. Nsu bekyuli bani mɔɔbla likpidi ni, bana lɛlɔ liláda Katɔti ebiti.” ¹³ Si anumi eegyie-mii ka bɛbla lɛbuni uwi biala kemo ni, ɔma ndubukpoku-ɔ? ¹⁴ Nsu si eebó abi adi na lɛbuni lɛni na aabla ɔsu ni, ya na lɛlɔ litaayɔ-ɔ. Tayia bekyuli bammɔ, na kayi lɛnɔ ketekpoku-ɔ. ¹⁵ Mmomu bitaabu Kristo aani Blɔti. Na si ukyuli ɔdi uuye-mii lɛla lɛni lɛlɔ na bɛsia anu lɛni ni, binye kagyumana na bidie lɛlɔ kenye. Nsu bɛbla ɔmɛni ku udu buɛɛ ku lɛlɔ kalɔ buboku. ¹⁶ Bɛya na bina kayi kemo keteese ƒaa uwi biala kalɛ na si beedumi-mii ka bɛsiaku Kristo kama ni, na kɔƒa kukpo bekyuli bani mɔɔlɔ-mii anyikpi mmɔ. ¹⁷ Ɔdia si biibó abi na lɛbuni lɛni bɛɛbla ɔsu si Katɔti lɛnɔ ɔ́tuna lɛni utulo si biibó abi na ala ekpidi ani na bɛɛbla ɔsu. ¹⁸ Ɔsika Kristo ɔni nse siin ni, úkpi na bekyuli bani neeese siin lili. Na kunwi kɔni kani na úkpi mmɔ ni, ɔ́ƒɔ ala ekpidi ƒui kayu na ɔ́klibi abu ku Katɔti ntɛ. Bekyuli bádu Kristo. Nsu ɔkɛnku Katɔti Kɔyu lɛlɔ ni, Katɔti ɔ́sɔku-nwu úboku ngba. ¹⁹ Na Kɔyu kemo na Yesu úsie útébo nwuna lɛlɔ bɔdi kudu úte ayu ani nkya kekpine. ²⁰ Ama ndi bani nétenu Katɔti bɔlɛ uwi ɔni na ɔ́kɛku-ma kayi na Noa ɔkya ɔɔnwí nwuna ɔkɔlɔ ubendi ɔmmɔ. Nkyuli ɛlɛɛ bani bumomo mabla aani nkyuli maane kani nákɛ ngba na ntu búteti-ma. ²¹ Na ɔmmɔ mɔɔtina-bu lɛla lɛni na bula ngba bɔƒɔ ntu bɔkpila ɔdi ɔmɛni ɔdanku. Ɔɔɔdi ɔlɔna lɛlɔ bɔkpi na ɔdi, mmomu ɔkɛnku kenye kani na búse búte Katɔti ku kayi kani nse sɛɛn lɛlɔ na ɔdi. Katɔti ɔɔƒɔ́-bu ɔkɛnku kalɛ na bɔ́ƒɔ Yesu Kristo bɔsɔ bɔta bɔlɛ bekpine akɔ bɔ́di ɔsu. ²² Kristo ɔmɛni nésie katɔ na ulie Katɔti kɔdianu. Na katɔ batu ku lɛlɔ badine ku kayaa bayikune ƒui bakya-nwu kalɔ.

¹ Na ɔ́si ɔni na Kristo úbo abi na ɔlɔna kemo na bula lili ɔsu ni, amii lɛnɔ bɛda lɛlɔ bise na biti kasusu kammɔ udu kani bɛda. Ɔsika ukyuli ɔni muubó abi na ɔlɔna kemo ni, ɔɔɔda likpidi bɔbla taaya. ² Na si bɛ́da lɛlɔ bíse lɛni ni, ɔdubɔya na bilie ngba ɔ́si ɔƒɛni úsela bitaabla lɛla lɛni mɔɔyɔ́ Katɔti kaƒɔ. Na ɔlɔna kemo ala asɔ alátaada-mii ɔkwɛ. ³ Bɛya na kalɛ na bílie ngba bítaabla ala ekpidi uwi pii ɔni návi ɔwɔ ɔƒɛni. Bɛ́bla likyulikpi ku lɛyalɛ, na bítaani ntɛ teekpi. Bɛ́kpa baƒiɔ bɛ́vili ntu, na bɛ́di kɔkpana kukpidi, na bɛ́bla ala ekpidi lidu lidu aani bekyuli bani naaasiaku Katɔti. ⁴ Na ka bɛsɔ biláblaku-ma unwi na bitaabla ala ammɔ udu ɔsu ni, ɔ́bla-ma kalɛ kadi! Anwuɔsu na beetemi teewi-mii lɛlɔ. ⁵ Nsu badubudie lɛlɔ kenye na Katɔti ɔni ndubɔtɛku ngba beliene ku bekpine ƒui litemi anumi na ala ammɔ lɛlɔ. ⁶ Ɔsika ɔmɛni ɔsu na Yesu Kristo ɔ́kɔ litemi buni lɛmmɔ lɛsa úte bekyuli bani nékpi lɛnɔ. Katɔti úti kukpi ɔ́ni-ma kɔtu aani kalɛ na ɔdubɔlɛku bekyuli ƒui. Nsu Yesu Kristo ɔ́kɔ litemi buni lɛmmɔ lɛsa úte-ma kalɛ na baƒɔ-ni na bakɛ kɔyu kemo ngba aani kalɛ na Katɔti ɔɔwia. ⁷ Kawɔlɔkɔ kammɔ kéede. Anwuɔsu bɛya na ukyuli biala kasusu kemo kabla nwaa, na ɔda lɛlɔ use utaakpali katɔ. ⁸ Na ɔni ntulo ƒui ni, bitaayɔ lɛlɔ ku kaƒɔ nwaa. Ɔsika si bɛɛyɔ́ lɛlɔ ni, bɛsɔ bilátaanu bina banwa ekpidi pii. ⁹ Bɛbla lɛƒɔ bite bina bakpana na bɛƒɔ-ma na beduo-mii kudɔ ƒaa na bitakyaku-ma unyeƒi. ¹⁰ Katɔti úte-ma etela lidu lidu na ukyuli biala ɔda nwuna lɛdi kaduɛ na uti ubunku nwuna bakpana ƒui. ¹¹ Lɛsa ɔkɔne biala ni, utaakɔ Katɔti litemi buni lɛmmɔ lɛsa. Na ukyuli ɔni muubunku bekyuli ni, uti ɔyikun ɔni na Katɔti úte-nwu ƒui uteebunku-ma. Na bekyuli basia Yesu Kristo lɛlɔ bemwi Katɔti na ulu biala lɛlɔ. Bumwi ku ɔyikun ɔdi Yesu Kristo ɔdi uwi ƒui. Ɔsia lɛni. ¹² Banwa bayɔne, abi kpakplaa ani na biibó mɛni ni, anya ndubɔya na bɛkana binye kpakplaa. Na utabla-mii kalɛ kadi ka lɛla lɛni nétebo tɔ dii mɔɔlɛ́ku-mii. ¹³ Mmomu ni, bɛya na lɛlɔ litaayɔ-mii ka amii lɛnɔ biibó abi aani Kristo kalɛ. Ɔsika ebiti adubɔda-mii na lɛlɔ lɛyɔ-mii geen uwi ɔni na wasɔ webo na nwuna bukeye bonwu kemo. ¹⁴ Lɛlɔ litaayɔ-mii si bekyuli beedumi-mii ka bɛsiaku Kristo ɔsu. Ɔsika Katɔti Kɔyu nsiaku-mii ku nwuna bukeye. ¹⁵ Bitaya na bina kemo ɔdi ubo abi aani bekyuli ɔdune iye uyune, iye likpidi ɔblane, iye ukyuli ɔni neeete bekyuli bɔnwuna kalɛ. ¹⁶ Nsu ni, si eebó abi ka adi ɔƒɔtaadine ɔsu ni, taya na kɔƒa kukpo-ɔ. Mmomu gya Katɔti enu ka akya nwuna badi akɔ ɔsu. ¹⁷ Litemi bɔtɛ limeyi lɛmmɔ líide, na Katɔti ɔdubɔka nwuna bekyuli litemi bɔtɛku. Na si abu nwuna bekyuli lɛlɔ na wese kalɔ lɛni ni, dɛ na ɔdubɔwɔlɔku bekyuli bani na bétemonku nwuna litemi buni lɛmmɔ bɔƒɔ bɔdi. ¹⁸ Bénweni na Bunweni Kedee Ɔku kemo banii, “Si ɔdubɔyu bekyuli babuni muedi ɔkplu geen asa na Katɔti waƒɔ-ma ni, bi malɛku ala ekpidi bablane ama?” ¹⁹ Anwuɔsu ni, bɛya na bekyuli bani muubó abi kalɛ na Katɔti uute kuƒi beti bana ayu bakya bana Ɔƒɔne ɔni mɔɔdi nwuna linyese lɛlɔ uwi ƒui lɛkɔkɔ.

¹ Muuvele amii bani ndi baƒɔtaadine benengu na bina akɔ, ɔsika ami ɔlati lɛ́nu kalɛ na Kristo úbo abi na muudie ɔmmɔ kenye. Na mina anu asia ka ami ku-nwu bɔdubɔdi lɛga na nwuna bukeye bɔmmɔ kemo na uwi ɔni na wasɔ webo. ² Na mɔɔsu-mii nnii bɛda bina baƒɔtaadine bani na Katɔti úti úte-mii kaduɛ aani kalɛ na baƒonu ɔdane ɔɔnu nwuna baƒonu lɛlɔ. Bɛda-ma aani kalɛ na Katɔti ɔɔwia, na utabla aani si ukyuli ɔdi nnye-mii lɛlɔ. Na bitabla kabla kammɔ na lɛyuƒɔla ɔsu, mmomu ka bɛɛyɔ́ ka bibunku bekyuli ɔsu. ³ Bitanya bekyuli bani lɛlɔ bɛɛnu bitamana, mmomu bɛbla bekyuli bani na banu-mii udu batɛya. ⁴ Na uwi ɔni na Kristo ɔni ndi Baƒonu Ɔdane Unengudi ƒui wada walɛ ni, na wete-mii kagabwa kani muukeye na kana udu ulávumana. ⁵ Lɛni kani na ɔlɛka amii bani ndi baƒɔtaadine bawɔdi lɛnɔ biboku lɛlɔ kalɔ bite baƒɔtaadine benengu bammɔ. Na bina ƒui bɛda lɛlɔ na biboku lɛlɔ kalɔ na biteebunku lɛlɔ. Ɔsika Bunweni Kedee Ɔku ɔɔsu ɔnini, “Katɔti uléte bekyuli bani mɔɔtalaku lɛlɔ katɔ kuƒi. Mmomu uubunku bani muuboku lɛlɔ kalɔ.” ⁶ Anwuɔsu bɛya na Katɔti ɔyikun utaadi-mii lɛlɔ. Na watalaku-mii katɔ na uwi ɔni lɛlɔ na ɔɔyɔ́. ⁷ Biti bina ala ani muukpóku-mii ƒui bɛkya Katɔti enu kemo, ɔsika anwu uuti-mii lɛlɔ kasusu uwi biala. ⁸ Bɛda kayi bɛva kalɔ buɛɛ na binye kagyumana! Ɔsika bina ukisine ɔni ndi ɔbɔnsamu mmɔ ɔsiaku-mii aani gyata ɔni nkɛ mɔɔva taavi na ɔɔwia ukyuli ɔni na uƒie. ⁹ Binye kpakplaa na bina bɔƒɔtaadi kemo na bitile-nwu kuƒi, ɔsika abi amɛni udu kani na bina bakpana baƒɔtaadine bani nkya kayawi mɛni ƒui beebó. ¹⁰ Na si bíbo abi ammɔ uwi klukui ɔdi kama ni, Katɔti ɔni kaƒɔ ndia geen na ɔ́lɔ-mii ɔnii bibelie ngba ƒui na nwuna bukeye kemo ɔkɛ Blɔti Yesu Kristo ɔsu ni, ɔsɔ ɔdubɔbla-mii kedee, na ute-mii ɔyikun, na bɛsɔ binye kpakplaa. ¹¹ Anwu mbo ɔyikun úsela ƒui. Ɔsia lɛni. ¹² Silvano ɔni na mɔɔbu aani ɔƒɔtaadine ɔnwa ɔni mɔɔdi bɔƒɔtaadi bammɔ lɛlɔ geen ni, anwu nébunku-mi na búnweni ɔku klukui ɔmɛni buute-mii. Na mɔɔwia ka lɛkya-mii ogya na lidie kenye lɛsu-mii ka ni, ala ani lɛlɔ na línweni ɔku ɔmɛni lɛ́siku ni, adi kalɛ na Katɔti kaƒɔ kadia kete-bu. Anwuɔsu binye kpakplaa. ¹³ Bina baƒɔtaadine bakpana bani lɛnɔ na Katɔti ɔ́ƒuna na Babilon kalɔ lɛlɔ ku Marko banii beegyele-mii o-o. ¹⁴ Bɛkya lɛlɔ kɔgbu bɛtina ka bɛɛyɔ́ lɛlɔ na bigyele lɛlɔ. Keyi buɛɛ kasiaku amii bani ƒui náblaku Kristo unwi.