1 YOHANE

1 YOHANE

¹ Katɔti ngba litemi ndi anwu ɔni nkya ɔ́si kayawi kalɔ kesekɔ. Na ngba litemi lɛmmɔ lɛsa na bɔɔkɔ́. Búnu-nwu ala bɔsu na bɔ́nu-nwu ku anumi. Na sɔsɔ ni, búti bula enu bútuku-nwu. Uwi ɔni na ɔ́da ɔ́lɛ ni, abu bɔ́nu-nwu bɔ́ti. ² Ngba litemi lɛmɛni ndi anwu ɔni náda ɔ́lɛ-bu anumi, na buudie-nwu kenye. Na anwu ɔni ndi ngba bɔni naaadubo bɔsa kudii mɛni lɛsa na bɔɔkɔ́ teete-mii. Na anwu ku Katɔti nkya asa na Katɔti údie-nwu keyi ɔ́tina-bu. ³ Na ala ani na bɔ́nu na búnu ni, ani na buudie kenye bute-mii mɛni, kalɛ na amii lɛnɔ bɛdiku-bu kɔkpana. Na bula kɔkpana bɔdi bɔkya abu ku Katɔti ku ngba litemi lɛni ndi Ubidi Yesu Kristo ntɛ. ⁴ Buunweni-mii ɔmɛni kalɛ na bula ebiti edu-bu ɔkwɛ. ⁵ Na lɛla lɛni na búnu bɔ́siku Kristo ɔmɛni kudɔ na ani na bɔɔyɔ́ ka budie kenye mɛni ni, ani ndi ka Katɔti ɔdi bukeye. Na lɛdisa lɛdi liiibo-nwu lɛlɔ kemo na ulu biala lɛlɔ. ⁶ Anwuɔsu si bɔnii abu ku-nwu bɔɔdi kɔkpana nsu bɔkɛ na lɛdisa ngba bukpidi bulie kemo ni, na bɔɔnyi ɔkɔ na bɔɔɔsiaku litemi geen lɛmmɔ kama. ⁷ Nsu si bɔkɛ na bukeye kemo aani kalɛ na anwu ɔkya bukeye kemo ni, ɔɔtina ka bɔɔdiku lɛlɔ kɔkpana. Na Ubidi Yesu ubugya ɔɔbla-bu lɛlɔ sɛɛn taalɛku ekpidi biala kemo. ⁸ Si búni bɔnii bulábla likpidi ni, na bɔɔtɔ́lɔ lɛlɔ, na litemi geen lɛmmɔ lítaƒɔ-bu lɛlɔ kemo. ⁹ Nsu ka Katɔti use siin na ɔdi bula kama kekpokɔ ɔsu ni, si búdie bula alaekpidi kalɔ bɔ́tina-nwu ni, ɔdubɔnu-bu kɔnyana na uti bula alaekpidi ɔkyiɛ-bu na ɔbla-bu sɛɛn ɔlɛku ala ani mɔɔyá na muusé lɛlɔ ƒui kemo. ¹⁰ Nsu si búni bɔnii bútabla likpidi lɛdi ni, buudie-nwu taatina aani ɔkɔ ɔnyine, na nwuna litemi lítáƒɔ-bu lɛlɔ kemo.

¹ Mina bebi bayɔne, muunweni ɔmɛni lite-mii kalɛ na bilabla ekpidi. Nsu si ɔdi ɔ́bla likpidi lɛdi ni, bubo ukyuli ɔni nnye-bu kenye uuvele Katɔti teete-bu. Na anwu ndi Yesu Kristo ɔni nse siin. ² Na Kristo ɔmmɔ ɔlati úti nwuna ngba ɔ́kpa na bula lili ɔsu, kalɛ na ɔklibi abu ku Katɔti ntɛ. Nsu ɔɔɔdi abu lɛti ekpidi lili, mmomu ku bayawine ƒui ekpidi lili. ³ Si bɔɔdi Katɔti ɔda bubo lɛlɔ ni, bɔgyi nwaa ka bɔ́ti-nwu. ⁴ Si ɔdi ɔ́su ɔnii, “Ngyi-nwu,” nsu uládi nwuna etemila lɛlɔ ni, ukyuli ɔmmɔ ɔɔnyi ɔkɔ. Na litemi geen lɛmmɔ lítaƒɔ-nwu lɛlɔ kemo. ⁵ Nsu ukyuli ɔni mɔɔdi nwuna litemi lɛlɔ ni, bɔyɔ bɔni na ubo ute Katɔti búdu bɔ́wɔlɔ. Bɛya na lɛsu-mii kalɛ na bɔɔnu taati ka buliku Katɔti. ⁶ Ukyuli ɔni mɔɔsu ɔnii uliku Katɔti ni, ɔlɛka ulie ngba aani kalɛ na Yesu Kristo úlie. ⁷ Mina bayɔne, ɔɔɔdi ɔda bubo bɔwɔdi na muunweni lite-mii. Mmomu ɔdi bɔni na bɛ́ƒɔ bɛ́si kalɔ kesekɔ. Ɔda bubo bɔkukudi bɔmɛni ndi lɛla lɛni na bɛ́ka bunu. ⁸ Nsu ɔda bubo bɔni na muunweni lite-mii ɔƒɛni ni, bɔmua bɔdi bɔwɔdi. Na ɔkɛnku Kristo ku amii lɛnɔ lɛlɔ ni, bekyuli badubɔnu bati litemi geen lɛni nkya ɔda bubo bɔmmɔ kemo. Ɔsika kayawi kamɛni lɛdisa uwi ɔdaku bɔvi, na litemi geen bukeye bɔmmɔ búuse kalɔ bɔdaku bukeye. ⁹ Na ukyuli biala ɔni masu ɔnii ɔkya bukeye kemo nsu uukisi nwuna ɔƒɔtaadine ɔkpana ni, ɔmua ɔkya lɛdisa kemo. ¹⁰ Na ukyuli biala ɔni mɔɔyɔ́ ɔƒɔtaadine ɔkpana ni, uli ngba na bukeye kemo, na lɛla lɛdi liiibo-nwu lɛlɔ lɛni maya na weduo likpidi kemo. ¹¹ Nsu ukyuli ɔni muukisi ɔƒɔtaadine ɔkpana ni, ɔkya lɛdisa kemo ku nwuna ablala ƒui. Na ɔɔɔgyi likpo lɛni na úsela, ɔsika lɛdisa ablala ammɔ áya na use aani ɔnumbwɛne. ¹² Mina bebi bayɔne, muunweni-mii ɔmɛni ɔsika mɔɔwia ka bɛti ka Katɔti úti bina ekpidi ɔ́kyiɛ-mii na Yesu Kristo ɔsu. ¹³ Na amii bati ni, muunweni-mii ɔmɛni ɔsika mɔɔwia ka bɛti ka bɛgyi Kristo ɔni nkya ɔ́si kayawi kalɔ kesekɔ. Na amii bakloƒu ni, muunweni-mii ɔmɛni ɔsika mɔɔwia ka bɛti ka bɛ́di ukisine ɔmmɔ lɛlɔ. Na amii, mina bebi bayɔne ni, muunweni-mii ɔku ɔmɛni ɔsika bɛ́ɛti Katɔti. ¹⁴ Amii bebi bati ni, muunweni-mii ɔku ɔmɛni ɔsika bɛgyi Kristo ɔni nkya ɔ́si kayawi kalɔ kesekɔ. Na amii bakloƒu ni, muunweni-mii ɔku ɔmɛni ɔsika bibo ɔyikun na Katɔti litemi lɛmmɔ lɛ́ƒɔ-mii lɛlɔ kemo, na bɛ́ɛdi ukisine ɔmmɔ lɛlɔ. ¹⁵ Bitayɔ kayawi ku kana lɛlɔ ala ani náta énye Katɔti lɛlɔ. Ɔsika ukyuli ɔni mɔɔyɔ́ kayawi lɛni ni, ulayɔ Katɔti geen. ¹⁶ Ɔsika ala amɛni udu ani nkya kayawi ni, átasi Katɔti kudɔ. Adi ala ani mɔɔda bula likyulikpi ɔlɔna ɔmɛni ɔkwɛ, ku adikpi bɔdi ala ani na bɔɔnu na aada-bu ɔkwɛ, ku kayawi ala ani kemo na ukyuli ɔɔkun lɛmɛnɛ. Ana akɔ lɛla lɛdi lítasi Katɔti kudɔ. Mmomu kayawi udunkpi kemo na ana ƒui aasí. ¹⁷ Kayawi ku kana lɛlɔ ɔkwɛ adala ƒui adaku bɔvi. Nsu ukyuli ɔni mɔɔbla Katɔti lɛƒɔyɔ ni, ɔdubulie ngba ku Katɔti uwi ƒui. ¹⁸ Mina bebi bayɔne, mɔɔsu-mii nnii kayawi kadaku kawɔlɔkɔ budu. Na aani kalɛ na bínu ka Kristo ukisine ɔmmɔ ɔdububo ni, ɔƒɛni muedi Kristo bekisine pii béebo bakya. Na ɔmmɔ ndi kalɛ na búti bɔ́ti ka kayawi kawɔlɔkɔ kammɔ kéede. ¹⁹ Na bekyuli bamɛni bálɛ bula lɛkpa lɛmɛni kemo, ɔsika baaadi bula badi. Na si bula bekyuli na badi ni, nka bamua bakya-bu akɔ. Nsu bana bɔtɔlɔ bɔmmɔ bɔ́tina geen ka bana akɔ ɔdi biala ɔɔɔdi bula badi. ²⁰ Nsu amii ni, Kristo ɔ́ya na nwuna Kɔyu kɔ́ƒɔ-mii lɛlɔ kemo, na bina ƒui bɛgyi Katɔti litemi geen. ²¹ Ńtenweni-mii ɔmɛni ka bɛɛɛgyi litemi geen lɛmmɔ ɔsu, mmomu ka bɛgyi-ni ɔsu. Na bɛgyi lɛnɔ ka ɔkɔ ɔdi ulasi litemi geen lɛmmɔ kemo. ²² Na ɔma ndi ɔkɔ ɔnyine? Ɔkɔ ɔnyine ɔmmɔ ndi ukyuli ɔni muuní ka Yesu ndi Ukyuli Ɔƒunadi ɔmmɔ. Ukyuli ɔmmɔ udu ndi ukisine ute Kristo. Na ukyuli ɔmmɔ úni Katɔti ku Ubidi ɔmmɔ ƒui. ²³ Na ukyuli ɔni muuní Ubi ɔmɛni taasu ka ɔɔɔdi Katɔti Ubidi ni, anwu ku Katɔti beeebo kɔna. Na ukyuli ɔni muudie kenye taasu ka ɔ́ƒɔ Ubi ni, ɔ́ƒɔ Katɔti lɛnɔ. ²⁴ Bɛnu kaduɛ na bɛya na ala ani na bínu ɔ́si kalɔ kesekɔ mmɔ áƒɔ-mii lɛlɔ kemo ƒui. Na si bɛda-nya kaduɛ ni, bɛdubulieku Ubidi ku Ɔti ɔmmɔ ƒui uwi biala. ²⁵ Na ngba bɔni naaadubo bɔsa ndi kenye kani na Kristo úse úte-bu. ²⁶ Bekyuli bani mɔɔkya ɔkplu ka batɔlɔ-mii ɔsu na muunweni-mii ɔmɛni. ²⁷ Nsu amii ni, Kristo Kɔyu kɔ́ƒɔ-mii lɛlɔ kemo, na Kɔyu kɔmɛni kɔmua kɔkya-mii lɛlɔ kemo. Anwuɔsu ni, bɛsɔ biláwia ka ukyuli ɔdi ɔsɔ ɔtina-mii ala adi lɛnɔ. Ɔsika nwuna Kɔyu kɔɔtina-mii ala amɛni ƒui. Na ala ani na kɔɔtina adi litemi geen lɛmmɔ, na ɔɔɔdi ɔkɔ. Anwuɔsu biliku Kristo aani kalɛ na Kɔyu kɔmmɔ kɔ́tina-mii. ²⁸ Mina bebi bayɔne, biliku Kristo kalɛ na si uwi ɔni na ɔ́da ɔ́lɛ ni, bɔdubɔkana na bunye-nwu anumi ku kaƒɔ ƒaa na kɔƒa kulékpo-bu limeyi lɛmmɔ lɛlɔ. ²⁹ Si bɛgyi ka Kristo use siin ni, ɔlɛka bɛti ka ukyuli ɔni mɔɔbla ala ani nse siin ni, ɔdi Katɔti ubidi aani Kristo kalɛ.

¹ Bɛnu kalɛ sɔɔn na Katɔti ɔɔyɔ́ abu bani mɔɔƒɔ́ Yesu taadi. Anwuɔsu na ɔɔlɔ-bu ɔnii nwuna bebi. Na búnwini Katɔti bebi sɔsɔ! Na lɛla lɛni ɔsu na kayawi bekyuli balánu-bu taati ndi ka baaagyi Katɔti. ² Mina banwa bayɔne, ɔƒɛni ni, búnwini Katɔti bebi. Nsu bekyuli bani udu na bɔdubo bunwini ni, Katɔti útedie-nwu tɔ keyi. Nsu bɔgyi ka si lebo lɛni na Kristo ɔ́da ɔ́lɛ ni, bɔdubo bɔbla aani nwuna kalɛ. Ɔsika bɔdubo-nwu bɔnu kalɛ geen na use. ³ Na ukyuli biala ɔni mɔɔsia Kristo bubo anu ni, ɔɔklibi lɛlɔ teese sɛɛn aani kalɛ na Kristo lɛnɔ use sɛɛn. ⁴ Ukyuli biala mɔɔbla likpidi ni, ɔɔƒiɔ́ Katɔti ɔda bubo bɔmmɔ. Ɔsika likpidi ndi Katɔti ɔda bubo bɔƒiɔ. ⁵ Na bɛgyi ka Kristo úbo kalɛ na ubada-bu udie ekpidi kemo. Na anwu ni, likpidi lɛdi lɛɛɛma-nwu lɛlɔ. ⁶ Anwuɔsu ukyuli ɔni nliku Kristo ni, ulélie taabla likpidi. Nsu ukyuli ɔni muulie taabla likpidi ni, ɔɔtina ka útati Kristo kudii, na ɔƒaani muedi ɔɔɔgyi-nwu. ⁷ Bitaya na ukyuli ɔdi ɔtɔlɔ-mii! Mina bebi bayɔne, ukyuli ɔni mɔɔbla ala ulu lɛlɔ ni, ɔdi ukyuli ɔni nse siin aani kalɛ na Kristo use siin. ⁸ Ukyuli ɔni muulie taabla likpidi ni, ɔdi Satan ɔdi. Ɔsika Satan nli mɔɔbla likpidi ɔ́si kayawi kalɔ kesekɔ. Na lɛla lɛni ɔsu na Katɔti Ubidi ɔmmɔ úbo ni, ani ndi ka ɔyila Satan ablala. ⁹ Ama bani ndi Katɔti bebi ni, belélie taabla likpidi. Ɔsika Katɔti udu nkya-ma lɛlɔ kemo ɔƒaani. Na ka Katɔti ndi-ma Ɔti ɔsu ni, balakana bulie butaabla likpidi. ¹⁰ Bɛya na lɛtina-mii kalɛ na bɔɔnu taati kavumana kani nkya Katɔti bebi ku Satan bebi ntɛ. Ukyuli biala ɔni naaabla ala siin ni, iye ulayɔ nwuna ɔnwa ɔƒɔtaadine ni, ɔɔɔdi Katɔti ubidi. ¹¹ Ɔmɛni ndi kenye kani na bínu bɛ́si kalɔ kesekɔ ƒui, na ani ndi ka ɔlɛka bɛyɔ lɛlɔ. ¹² Na utalɛka bɔbla lɛlɔ aani Kain kalɛ. Ɔsika anwu ɔdi Satan ɔdi, na ɔ́du ɔnwani. Na bi ɔsu na Kain ɔ́du-nwu? Ɔsika uukisi ɔnwani ka nwuna ablala ese siin ɔsu. Na anwu Kain adi eeese siin. ¹³ Anwuɔsu ni, banwa, utabla-mii dɛye dɛye si kayawi bekyuli beekisi-mii. ¹⁴ Na bɔgyi ka bɔ́ɔlɛ kukpi enu kemo, na búbo buli ngba geen, ɔsika bɔɔyɔ́ bula banwa baƒɔtaadine. Na ukyuli biala ɔni naaayɔ bekyuli ni, úkpi na kɔyu kemo. ¹⁵ Na ukyuli ɔni muukisi nwuna ukyulikpana ni, ɔdi bekyuli ɔdune. Na amii alati bɛgyi ka ukyuli biala ɔni mɔɔdú bekyuli ni, uuubo ngba bɔni naaadubo bɔsa kudii. ¹⁶ Kalɛ na Yesu Kristo úti nwuna ngba ɔ́kpa na bula lili ni, ɔmmɔ mɔɔtina-bu lɛla lɛni ndi bɔyɔ. Anwuɔsu na abu lɛnɔ ɔlɛka buti lɛlɔ bɔkpa bula banwa baƒɔtaadine lili. ¹⁷ Si ukyuli ɔdi ubo ala adi na ɔɔnu ka ɔnwani ɔɔyaki nsu útete-nwu kebunku kadi mmomu ɔ́da anumi údie ɔnwani ɔmmɔ lɛlɔ ni, dɛ na wakana bɔsu ɔnii ɔɔyɔ́ Katɔti? ¹⁸ Mina bebi bayɔne, bitaya na bɔyɔ lɛlɔ ku kenyekplu. Mmomu biteebunku lɛlɔ geen. ¹⁹ Ɔmɛni bɔbla kemo na bɔdubɔti ka bɔgyi litemi geen lɛmmɔ na bɔkɛ kayi ƒaa na Katɔti anumi. ²⁰ Na si ina bula kayi kaadú-bu kɔtɔ muedi ni, enu ataƒɛ-bu. Bɔgyi ka Katɔti ɔɔtɛ litemi biala ulu lɛlɔ teetulo-bu, na ɔgyi lɛla biala. ²¹ Anwuɔsu ni, banwa bayɔne, si bula kayi kaladu-bu kɔtɔ ni, na bɔdubɔkana na bunye Katɔti anumi ku kayi buse. ²² Na lɛla biala na buuvele-nwu ni, bɔɔkɛ́-ni ɔsika bɔɔdi nwuna ɔda bubo lɛlɔ na bɔɔbla lɛla lɛni mɔɔyɔ́-nwu kaƒɔ. ²³ Ɔda bubo bɔni na úse úte-bu ndi ka bɔƒɔ Ubidi Yesu Kristo ɔmmɔ bɔdi, na bɔyɔ bula lɛlɔ aani kalɛ kani na úbo-bu ɔda úbavi. ²⁴ Bekyuli bani mɔɔdi Katɔti ɔda bubo lɛlɔ ni, beliku Katɔti. Na Katɔti lɛnɔ uliku-ma. Na Kɔyu kɔni na Katɔti úti úte-bu ɔsu ni, bɔgyi ka Katɔti uliku-bu.

¹ Banwa bayɔne, bitaƒɔ kɔyu biala muulie ukyuli lɛlɔ bitadi. Mmomu bɛkɔku ɔdi biala bɛnu si kɔyu kɔmmɔ kɔ́si Katɔti kudɔ. Ɔsika ɔkɔ kenye bediene béegyingya bakya kayawi ekpo ƒui. ² Na ukyuli biala ɔni muudie kenye taasu ɔnii Kristo Yesu úbo aani ɔyawine kalɛ ni, ukyuli ɔmmɔ ubo Kɔyu kɔni nási Katɔti kudɔ. Na ɔmɛni ndi ulu ɔni lɛlɔ na bɛdubɔsia bɛti Katɔti Kɔyu. ³ Nsu ukyuli biala ɔni meni ka ɔsu ɔnii Yesu úbo aani ɔyawine kalɛ ni, kɔyu kɔni na ubo mmɔ kútasi Katɔti kudɔ. Kɔyu kɔmɛni kɔdi Kristo ukisine. Na bínu ka kɔyu kɔmmɔ kɔdububo kayawi, na kúubo kɔkya ɔƒaani muedi. ⁴ Nsu amii bebi bayɔne ni, bɛ́si Katɔti kudɔ, na bɛ́ɛdi ɔkɔ kenye bediene bammɔ lɛlɔ. Ɔsika Kɔyu kɔni náƒɔ-mii lɛlɔ kemo ni, kubo ɔyikun kutulo kɔyu kɔni nlie ama bani ndi kayawi badi mmɔ lɛlɔ. ⁵ Kayawi lɛlɔ bekyuli kani na badi. Na baatɛmi taasiku kayawi ala lɛlɔ. Na kayawi bekyuli lɛnɔ beenú-ma litemi. ⁶ Nsu abu ni, bɔdi Katɔti badi. Na ukyuli biala ɔni ngyi Katɔti ni, uunú-bu litemi. Na ukyuli biala ɔni nátasi Katɔti kudɔ ni, ulenu-bu litemi. Ɔmɛni buuti taanu taati Kɔyu kɔni mɔɔtina litemi geen lɛmmɔ ku kɔyu kɔni mɔɔtɔ́lɔ bekyuli. ⁷ Banwa bayɔne, bɛya na bɔyɔ lɛlɔ. Ɔsika bɔyɔ bɔ́si Katɔti kudɔ. Na ukyuli biala ɔni mɔɔyɔ́ bekyuli ɔdi Katɔti ubi, na ɔgyi Katɔti. ⁸ Na ukyuli biala ɔni naaayɔ bekyuli ni, ɔɔɔgyi Katɔti. Ɔsika Katɔti ablala ƒui adi bɔyɔ. ⁹ Ka Katɔti ɔ́yɔ ka udie nwuna bɔyɔ ɔtina-bu ɔsu ni, ɔ́tala Ubidi unwi pɛ ɔnii ubo kayawi, kalɛ na ɔkɛnku Ubidi ɔmmɔ lɛlɔ na bɔkɛ ngba bɔni nsɔ naaadubo bɔsa kudii. ¹⁰ Bɛya na lɛsu-mii lɛla lɛni geen muudie bɔyɔ keyi. Ɔɔɔdi kalɛ na bɔɔyɔ́ Katɔti muudie bɔyɔ keyi. Mmomu Katɔti ɔ́yɔ-bu, na úti Ubidi ɔ́kpa na bula ekpidi lili kalɛ na ɔklibi abu ku-nwu ntɛ. ¹¹ Banwa bayɔne, ka Katɔti ɔ́yɔ-bu geen lɛni ɔsu ni, ɔlɛka abu lɛnɔ butaayɔ lɛlɔ. ¹² Ukyuli ɔdi útanu Katɔti kudii. Nsu si bɔɔyɔ́ lɛlɔ ni, Katɔti uliku-bu, na bɔyɔ bɔni bubo bute-nwu búdu bɔ́wɔlɔ. ¹³ Bɔgyi ka buliku Katɔti geen, na anwu lɛnɔ uliku-bu, ɔsika anwu ɔlati Kɔyu na úti úte-bu. ¹⁴ Bɔ́nu bɔ́ti nwaa na buudie kenye ka Katɔti ɔ́tala Ubidi ka ubedie bayawine ɔlɛku ekpidi kemo. ¹⁵ Si ukyuli biala údie ɔ́su ɔnii Yesu ndi Katɔti Ubidi ni, ɔɔtina ka Katɔti uliku-nwu, na anwu lɛnɔ uliku Katɔti. ¹⁶ Na abu alati bɔgyi na bɔ́ƒɔ bɔ́di ka Katɔti ɔɔyɔ́-bu. Katɔti ablala ƒui adi bɔyɔ. Na ukyuli biala ɔni muulie taayɔ bekyuli ni, uliku Katɔti, na Katɔti lɛnɔ uliku-nwu. ¹⁷ Na ulu ɔmɛni lɛlɔ na bɔyɔ búdu bɔ́wɔlɔ na bula akɔ. Ɔmmɔ ɔsu na bɔdubɔkana na bunye Katɔti anumi na litemi bɔtɛ limeyi lɛmmɔ lɛlɔ ku kayi buse. Ɔsika kalɛ na Kristo use ni, lɛni kani na buse na kayawi kamɛni kemo. ¹⁸ Liƒu lɛdi liiibo bɔyɔ kemo. Mmomu bɔyɔ bɔni nédu bɔ́wɔlɔ bɔɔgyá liƒu biala. Ɔsika liƒu ku kɔtu bɔni nkɛ. Na ukyuli ɔni mbo liƒu ni, nwuna bɔyɔ bútedu bútawɔlɔ. ¹⁹ Bɔɔyɔ́ Katɔti ku bekyuli ɔsika Katɔti náka-bu bɔyɔ. ²⁰ Si ukyuli ɔdi ɔɔsu ɔnii ɔɔyɔ́ Katɔti nsu uukisi nwuna ɔnwa ɔƒɔtaadine ni, ɔkɔ ɔnyine na ɔdi. Ɔsika ukyuli biala ɔni naaayɔ ɔnwani ɔni na ɔɔnu ku nwuna anumi ni, dɛ na wakana na wayɔ Katɔti ɔni na ulánu ku anumi? ²¹ Na ɔda ɔni na Kristo úbo-bu ndi ka ukyuli biala ɔni mɔɔyɔ́ Katɔti ni, ɔlɛka ɔyɔ nwuna ɔnwa ɔƒɔtaadine lɛnɔ.

¹ Bekyuli bani ƒui náƒɔ bádi ka Yesu ndi Ukyuli Ɔƒunadi ɔmmɔ ni, badi Katɔti bebi. Na alakana ubi ɔti bɔyɔ na ekisi nwuna bebi! Anwuɔsu si aayɔ́ Katɔti ni, aayɔ́ nwuna bebi lɛnɔ. ² Na dɛ na bɔdubɔnu bɔti ka bɔɔyɔ́ Katɔti bebi? Bɔɔnu ɔmɛni taati si bɔɔyɔ́ Katɔti na bɔɔdi nwuna etemila lɛlɔ. ³ Na dɛ na bɔɔnu bɔti ka bɔɔyɔ́ Katɔti? Bɔɔnu ɔmɛni taati si bɔɔdi nwuna etemila lɛlɔ. Na nwuna etemila eeese aani etila ani nétulo-bu. ⁴ Ɔsika Katɔti ubi biala ɔɔkana na ɔɔdi kayawi lɛlɔ. Na bɔƒɔtaadi ndi lɛla lɛni na buuti taadi kayawi lɛlɔ. ⁵ Nsu ukyuli ɔdi ulakana kayawi lɛlɔ bɔdi amu ntu ɔ́ƒɔ ɔ́di ka Yesu ndi Katɔti Ubidi ɔmmɔ. ⁶ Yesu ɔmɛni ndi Ukyuli Ɔƒunadi ɔni nébo kayawi, na bɔ́nu-nwu bɔ́ti ɔkɛnku ntu bɔkpila ɔdi ɔni na ɔ́ƒɔ ku nwuna ubugya ɔni néwi kalɔ lɛlɔ ɔsu. Na ɔɔɔdi ntu lɛti pɛ lɛlɔ na ɔkɛ úbo, mmomu ntu ku ubugya ƒui lɛlɔ. Na Katɔti Kɔyu muudie-nwu kenye na ulu lɛlɔ. Ɔsika Kɔyu kɔmmɔ ablala ƒui adi litemi geen. ⁷ Ala ani muudie-nwu kenye mmɔ ebo atɛ. Na anya ndi ⁸ Katɔti Kɔyu ku ntu ku ubugya ɔni lɛlɔ na ɔ́sia úbo mmɔ. Na kenye budie ɛtɛ bɔmɛni ƒui buse unwi. ⁹ Bɔɔƒɔ́ ukyuli kenye budie taadi bɔdi. Nsu Katɔti kenye budie na ulu ɔmmɔ lɛlɔ ni, bɔdia butulo. Ɔsika kenye budie bɔmmɔ bɔdi Katɔti ɔlati bɔdi na Ubidi lɛlɔ. ¹⁰ Anwuɔsu ukyuli ɔni náƒɔ Katɔti Ubidi ɔmmɔ ɔ́di ni, ɔgyi geen na nwuna kayi kemo ka kenye budie bɔmmɔ bɔdi litemi geen. Nsu ukyuli ɔni nátaƒɔ Katɔti útadi ni, ɔɔnu Katɔti aani ɔkɔ ɔnyine, ɔsika útaƒɔ ala ani na Katɔti ɔ́su ɔ́siku Ubidi ɔmmɔ lɛlɔ útadi. ¹¹ Na kenye budie bɔni na bubo ni, amu ndi ka Katɔti úte-bu ngba bɔni nsɔ naaadubo bɔsa kudii. Na uute-bu ngba bɔmɛni ɔkɛnku Ubidi kudɔ. ¹² Ukyuli ɔni mbo kɔna ku Ubidi ɔmmɔ ni, ubo ngba bɔmɛni. Na ukyuli ɔni neeebo kɔna ku Katɔti Ubidi ɔmmɔ ni, uuubo ngba bɔmmɔ. ¹³ Muunweni ɔku ɔmɛni lite amii bani mbo ngba bɔƒɔ lɛnunsia na Katɔti Ubidi Yesu lɛnyi kemo kalɛ na bɛti ka bibo ngba bɔni nsɔ naaadubo bɔsa kudii. ¹⁴ Bɔgyi nwaa ka si buuvele Katɔti lɛla biala na nwuna bɔyɔ kenye ni, uunú-bu bɔkpali. ¹⁵ Na si bɔgyi ka uunú-bu lɛla biala na buuvele-nwu ni, bɔgyi geen ka ala ani buuvele taasiku-nwu kudɔ mmɔ éenwini bula ɔdi. ¹⁶ Si ɔdi ɔ́nu ka nwuna ɔnwa ɔƒɔtaadine ɔ́bla likpidi lɛdi lɛni na lilákpanku-nwu taatákya kukpi ƒui kemo ni, ɔkpali katɔ na nwuna lili na Katɔti ɔdubute-nwu ngba. Na ɔmɛni use ute bekyuli bani na bana ekpidi alákpanku-ma taatákya kukpi ƒui kemo. Nsu likpidi lɛdi lɛkya lɛni mɔɔkpanku bekyuli taatákya kukpi ƒui kemo. Na naaasu nnii bɛkpali katɔ na likpidi lɛmɛni lili. ¹⁷ Lɛla biala naaakɛ ulu siin lɛlɔ ni, ɔdi likpidi. Nsu ekpidi adi akya ani naaakpanku ukyuli taatákya kukpi ƒui kemo. ¹⁸ Bɔgyi ka ukyuli ɔni ndi Katɔti Ubi ni, ulélie taabla likpidi. Ɔsika Katɔti Ubidi ɔɔgyumana-nwu kalɛ na uleduo ukisine ɔmmɔ enu kemo. ¹⁹ Abu bɔgyi ka bɔdi Katɔti badi geen, na kayawi bekyuli bakladi ƒui bakya ukisine ɔmmɔ lɛlɔ bɔdi kalɔ. ²⁰ Na abu bɔgyi lɛnɔ ka Katɔti Ubidi úbo kayawi kamɛni úbedie ala kalɔ úte-bu kalɛ na bɔti anwu ɔni geen ndi Katɔti. Na ɔƒaani ni, buliku anwu ɔni geen ndi Katɔti ɔmmɔ ku nwuna Ubidi Yesu Kristo lɛnɔ. Na anwu geen ndi Katɔti ɔmmɔ ɔni ndi ngba bɔni nsɔ naaadubo bɔsa kudii. ²¹ Anwuɔsu, mina bebi bayɔne, bɛda lɛlɔ bidie lɛƒiɔkpa kemo.