1 KORINTOƑUƆ

¹ Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ku bula ɔnwa Sostene muunweni-mii ɔku ɔmɛni. ² Búnweni ɔku ɔmɛni buute Korintoƒuɔ baƒɔtaadine bani na ɔkɛnku Yesu Kristo lɛlɔ na Katɔti údie úse na ɔ́lɔ-ma ɔnii babla nwuna bekyuli kedee. Lɛni na ɔ́bla bekyuli bani ƒui lɛnɔ mɔɔkpali Blɔti Yesu Kristo. Anwu ndi Blɔti ute abu ku-ma ƒui. ³ Buuvele bɔnii bula Unwoti Katɔti ku Blɔti Yesu Kristo lɛƒɔndia ku keyi buɛɛ kasiaku-mii. ⁴ Mɔɔgyá Katɔti enu uwi biala na bina lili ɔkɛnku lɛƒɔndia lɛni na úte-mii ɔ́siaku Yesu Kristo lɛlɔ ɔsu. ⁵ Ɔni bɛ́bla unwi ku Kristo ɔsu ni, bɛɛtí litemi buni lɛmmɔ na biidie-ni keyi na bínwini Kɔyu kemo balakɛne lɛnɔ. ⁶ Yesu Kristo lɛlɔ litemi lɛmɛni lɛ́kɛ keliekɔ na bina akɔ kaduɛ. ⁷ Ɔmɛni ɔsu ni, bilayaki litela lɛdi ɔni na binye bɛgya ka Katɔti ɔya na Blɔti Yesu Kristo ɔ́da ɔ́lɛ. ⁸ Na ɔdubɔgyumana-mii na bɛda bina bɔƒɔtaadi kaduɛ utédu kawɔlɔkɔ. Anwu ndubɔya na si Blɔti Yesu Kristo úbo ubatɛku bayawine litemi ni, kɔtɔ bɔdu bɔdi bulebo-mii lɛlɔ. ⁹ Katɔti ɔni nálɔ-mii ɔnii bɛbla unwi ku Ubidi Blɔti Yesu Kristo ni, ɔdi ukyuli ɔni lɛlɔ na bɛkada bikpo. ¹⁰ Na kenyekɔ kani na Blɔti Yesu Kristo úte-mi kenye ni, mɔɔsu-mii kpakplaa aani mina banwa baƒɔtaadine kalɛ nnii bina ƒui binu lɛlɔ kalɔ kalɛ na lɛlɔ bule bɔdi bulakya-mii akɔ. Na bɛbla unwi na ala ani na bɛɛkali ku ala ani na bɛwia lɛlɔ. ¹¹ Ɔsika ni, banwa, bekyuli badi bási Klo kaduli na básu-mi nwaa banii kadɔ kakya-mii ntɛ. ¹² Lɛla lɛni mɔɔtina ndi ka bina akɔ ɔdi biala ku lɛla lɛni na ɔɔsu. Ɔdi ɔnii, “Ami Paulo kama na nsia.” Na ɔbambadi ɔnii, “Ami Apolo kama na nsia.” Na ɔbambadi lɛnɔ ɔnii, “Ami Petro kama na nsia.” Na ɔbambadi lɛnɔ ɔnii, “Ami Kristo kama na nsia.” ¹³ Muuye-mii nnii Kristo ule lɛlɔ kemo akpa akpa? Munuu ni, Paulo nékpi na ugyii lɛlɔ na bina lili? Iye bákpila ɔdi ntu na Paulo lɛnyi kemo? Oowo! ¹⁴ Mɔɔgyá Katɔti enu ka ńtabla ntu bɔkpila ɔdi ɔmmɔ ńtete bina akɔ ɔdi ntu Krispo ku Gaio lɛti pɛ. ¹⁵ Anwuɔsu ukyuli ɔdi ulakana bɔsu ɔnii mina lɛnyi kemo na bákpila-nwu ntu bɔmmɔ. ¹⁶ Línyimo ka Steƒana lɛ́bla ntu bɔkpila ɔdi ɔmmɔ líte ku nwuna kaduli bekyuli na nsɔ neeenyimo si lɛ́kpila ukyuli ɔbambadi ɔdi lɛnɔ. ¹⁷ Kristo útatala-mi ɔnii mbo mbataabla ntu bɔkpila ɔdi teete bekyuli. Mmomu ɔ́tala-mi ɔnii mbakɔ litemi buni lɛmmɔ lɛsa nte bekyuli. Na naaasu-ni na kayawi lɛnunda ulu ɔdi lɛlɔ. Ɔsika naaayɔ ka ɔyikun ɔni nkɛnku kalɛ na Yesu Kristo úkpi na ugyii lɛlɔ mmɔ wayi udu na ɔbla keeke. ¹⁸ Bekyuli bani na bana ɔbladu ɔ́ya na badaku bukpi na kɔyu kemo ni, Kristo kukpi na ugyii lɛlɔ kɔtɛ kɔdi adɔlɔla kute-ma. Nsu abu bani na Katɔti ɔɔyá na bɔɔkɛ́ bɔƒɔ ni, bɔgyi ka Katɔti litemi lɛmmɔ lɛdi Katɔti ɔyikun ɔni na úte-bu. ¹⁹ Na Bunweni Kedee Ɔku kemo ni, Katɔti ɔ́su ɔnini, “Ndubo banundane lɛnunda udu bɔyila. Na lídie lɛ́tina ka bakutine lɛnunda lɛɛɛdi lɛla lɛdi.” ²⁰ Ɔmɛni ɔɔtina ka kayawi kamɛni banundane ku bakutine ku bekyuli bani mbo kenye ogya ƒui lɛnunda lɛdi adɔlɔla. ²¹ Katɔti ɔkɛnku nwuna lɛnunda lɛlɔ na ɔ́bla bekyuli lɛni kalɛ na balasia bana kayawi lɛnunda lɛlɔ na bati-nwu. Na nwuna litemi lɛni lɛsa na bɔɔkɔ́ mɛni lɛdi badi adɔlɔla. Nsu Katɔti ɔɔsia-ni lɛlɔ na ɔɔƒɔ́ bekyuli bani na báƒɔ bádi ngba. ²² Yudaƒuɔ baawia akɔla budie taatina. Na Helaƒuɔ ama kayawi lɛnunda kani na ama baawia bati. ²³ Nsu abu ni, Yesu ɔni na bákana bámana ugyii lɛlɔ litemi na bɔɔsu. Na litemi lɛmɛni lɛɛtu Yudaƒuɔ kayi. Na bekyuli bani naaadi Yudaƒuɔ lɛnɔ ni, beenú-ni aani adɔlɔla. ²⁴ Nsu ni, bekyuli bani na Katɔti ɔ́ƒuna ɔ́lɛku bani ndi Yudaƒuɔ ku Helaƒuɔ akɔ ni, Kristo ɔni lɛlɔ litemi na bɔɔsu mɛni ɔdi Katɔti ɔyikun ku nwuna lɛnunda. ²⁵ Ɔsika lɛla lɛni na bekyuli baanu banii ɔdi Katɔti kɔdɔlɔ ni, lɛdi lɛnunda litulo bekyuli lɛdi. Na Katɔti bɔbla kpɛtɛ kpɛtɛ ni, bubo ɔyikun butulo bekyuli lɛlɔ ɔkplu. ²⁶ Banwa, asa na Katɔti waƒuna-mii ni, binyimo kalɛ na bíse na bekyuli anumi! Bina pii biiibo lɛnunda ku ɔyikun. Iye bítasi kaba kani náƒɔ kuye kadi kemo. ²⁷ Mmomu Katɔti úse ɔ́ƒuna bekyuli badɔlɔdi na bayawine anumi kalɛ na uti-ma ɔkya kayawi kamɛni banundane kɔƒa. Na ɔ́ƒuna bekyuli bani neeebo ɔyikun ɔdi na bayawine anumi kalɛ na uti ɔkya kayawi kamɛni bayikune kɔƒa. ²⁸ Katɔti ɔ́ƒuna bekyuli bani neeebo kenyekɔ kadi na bayawine anumi, na balábu-ma lɛnɔ taakya lɛla lɛdi kemo kalɛ na uti ɔyila bekyuli bani na bayawine baabu na báƒɔ kuye udu. ²⁹ Ɔmɛni ndubɔya na ukyuli biala ulakana lɛlɔ katɔ bɔtalaku na Katɔti anumi. ³⁰ Katɔti náya na bɛ́bla unwi ku Yesu Kristo. Na Kristo ɔmmɔ ndi bula lɛnunda lɛni na Katɔti úti úte-bu. Na ɔkɛnku Kristo ɔmmɔ lɛlɔ ɔsu na Katɔti ɔɔnu-bu ka buse siin. Na búnwini Katɔti bekyuli kedee. Na ɔ́ƒɔ-bu lili kayu ɔ́lɛku ekpidi kemo. ³¹ Ɔmɛni ɔsu na Bunweni Kedee Ɔku ɔɔsu ɔnii, “Ukyuli ɔni mɔɔkun lɛmɛnɛ ni, ɔkun lɛmɛnɛ na lɛla lɛni na Blɔti ɔ́bla lɛlɔ.”

¹ Banwa, uwi ɔni na líbo-mii kudɔ na ḿbakɔ Katɔti etemila geen abɛdi lɛsa líte-mii ni, ɔɔɔdi kenyemini iye kayawi lɛlati lɛdi kemo na líti lɛ́tɛmiku-mii. ² Na uwi ɔni na ḿbakya-mii kudɔ ni, lɛ́tɛmiku-mii na Yesu Kristo ɔmmɔ lɛti pɛ lɛlɔ. Na ɔni ntulo ƒui ndi nwuna kukpi na ugyii lɛlɔ. ³ Anwuɔsu ka líbo-mii kudɔ ni, lɛlɔ lɛ́bla-mi kpɛtɛ kpɛtɛ. Na liƒu lɛ́da-mi. Na lɛlɔ lɛnɔ lɛ́tɔ-mi. ⁴ Na bɛdubɔnu ka mina ala ani na lɛ́tina ƒui ni, eeese aani ukyuli ɔni na kenye káda-nwu na úbo lɛnunda. Mmomu mina etemila bɔsu búdie bɔ́tina geen kalɛ na Katɔti Kɔyu ɔyikun use. ⁵ Ɔmɛni ɔsu ni, ɔɔɔdi ɔyawine lɛnunda lɛlɔ na bɛ́sia bɛ́ƒɔ Kristo bɛ́di, mmomu Katɔti ɔyikun lɛlɔ. ⁶ Nsu ni, mina kenye kani na mɔɔsu ni, kadanku bekyuli bani náda anu na béesie anumi na kɔyu kemo ala kalɔ bunu kemo. Na kaaadanku kayawi kamɛni kemo lɛnunda iye bayikune bani mɔɔdi kayawi kamɛni lɛlɔ na baayii ku udu lɛlɔ. ⁷ Lɛnunda lɛni kenye na muudie mɛni ni, lɛdi Katɔti lɛnunda lɛni nábɛ bekyuli. Nsu Katɔti ɔ́ƒuna-ni úse kukuuku ka lɛƒɔ-bu asa na údie kayawi. ⁸ Kayawi kamɛni bayikune ɔdi biala útati lɛnunda lɛmɛni. Ɔsika si bɔti na báti-ni ni, nka bátakana Blɔti bátamana ugyii lɛlɔ. ⁹ Nsu Bunweni Kedee Ɔku ɔɔsu ɔnii, “Lɛla lɛni na ɔdi útanu iye útenu, na ɔdi útakali lɛnɔ ka lɛdubɔlɛ ni, ani geen ndi lɛla lɛni na Katɔti ɔ́klibi úse úte bekyuli bani mɔɔyɔ́-nwu.” ¹⁰ Nsu abu ɔsu na Katɔti údie nwuna abɛla amɛni keyi ɔkɛnku nwuna Kɔyu lɛlɔ. Katɔti Kɔyu kɔɔwia lɛla biala kemo ɔti, na ɔgyi Katɔti abɛla muedi. ¹¹ Kalɛ na ukyuli kɔyu kɔni nkya-nwu lɛlɔ kemo kɔgyi lɛla biala na nwuna lɛlɔ ni, lɛni kani na Katɔti Kɔyu kɔgyi lɛla biala na Katɔti lɛlɔ. ¹² Na abu ni, ɔɔɔdi kɔyu kɔni mɔɔdi alaekpidi bablane lɛlɔ nkya-bu lɛlɔ kemo. Mmomu Katɔti Kɔyu kɔni ndubɔya na bɔti etela ani na bɔ́kɛ bɔ́siku-nwu kudɔ ku kaƒɔ ƒaa ni, aku nkya-bu lɛlɔ kemo. ¹³ Ɔmɛni ɔsu ni, ɔɔɔdi kayawi kammɔ lɛnunda ala ani bekyuli baatina kemo na búti bɔɔtɛmiku-mii. Mmomu buudie ala amɛni kalɔ teete-mii aani kalɛ na Katɔti Kɔyu kúdie ala ammɔ kalɔ kɔ́tina-bu. ¹⁴ Ukyuli biala ɔni na Katɔti Kɔyu kɔmɛni kútaƒɔ-nwu lɛlɔ kemo ni, ulakana na waƒɔ etela ani na Katɔti Kɔyu kuute. Na ukyuli ɔmmɔ lɛnɔ ulénu ala ammɔ kalɔ, ɔsika ala ammɔ adi-nwu adɔlɔla sɔɔn. Na Katɔti Kɔyu lɛlɔ kani na ukyuli ɔdubɔsia na ɔnu etela ammɔ ɔti kalɛ na áƒɔ kuye. ¹⁵ Ukyuli ɔni na Katɔti Kɔyu kɔ́ƒɔ-nwu lɛlɔ kemo ni, ɔɔkana na ɔɔnu lɛla biala taati. Nsu anwu ni, bekyuli balakana-nwu bɔnu bɔti. ¹⁶ Bunweni Kedee Ɔku ɔɔsu ɔnini, “Ukyuli ɔdi ɔɔɔgyi Katɔti lili kemo. Na ɔdi lɛnɔ ulakana-nwu lɛla lɛdi bɔtina.” Nsu abu ni, Kristo kakali kakya-bu lɛlɔ kemo.

¹ Banwa, na litemi geen bɔsu kenye ni, naaakana na matɛmiku-mii aani kalɛ na mɔɔtɛmiku bekyuli bani na Katɔti Kɔyu kɔ́ƒɔ-ma lɛlɔ kemo. Mmomu ndubɔtɛmiku-mii aani bekyuli bani na bana anu amua asia kayawi ala lɛlɔ. Na bɛmua bɛdi banamu wɛlɛ wɛlɛ na Kristo bɔƒɔtaadi bɔmmɔ kemo. ² Mina ala ani matina-mii ni, ɔlɛka ese kpɛtɛ kpɛtɛ aani kalɛ na lɛnyintu lɛ́manku líte ubiwɔ. Na ɔɔɔdi ala ani kalɔ bunu mbo ɔkplu aani kalɛ na ukyuli ɔni nálɛ lili ɔɔdi ala ani mbo unu kalɛ. ³ Ɔsika bɛmua bilie ngba aani bekyuli bani néti bana kasusu básia kayawi kamɛni lɛlɔ ala lɛti pɛ lɛlɔ. Na si lɛnungyie lɛkya-mii akɔ na bɛɛdɔ ni, ɔmmɔ lɛti muedi ɔɔtina ka kayawi kamɛni lɛlɔ ala na bilie bite. ⁴ Si bina akɔ ɔdi ɔ́su ɔnii, “Ami Paulo kama nsia,” na ɔbambadi lɛnɔ ɔnii, “Ami Apolo kama nsia” ni, bɛɛbla ala aani bekyuli bani na kayawi kasusu kani ńaƒɔ-ma lɛlɔ kemo. ⁵ Na amɛni ƒui kama ni, ɔma ndi Apolo? Na ɔma ndi Paulo? Katɔti kabla bablane kani na bɔdi. Na bula lɛlɔ na bɛ́sia bɛ́ƒɔ bɛ́di. Na bula akɔ ɔdi biala ɔdanku kabla kani na Katɔti úte-nwu ɔnii ɔbla. ⁶ Ami nése kabla kammɔ kalɔ aani kalɛ baavá kugyii kebi. Na Apolo néwi-ka ntu. Nsu Katɔti náya na kálɛ lili. ⁷ Ɔmɛni ɔsu ni, ukyuli ɔni náva ku ukyuli ɔni néwi ntu ni, bana ƒui baaadi lɛla lɛdi. Na mmomu Katɔti ɔdi nda, ɔsika anwu náya na kálɛ lili. ⁸ Kavumana kadi keeebo ukyuli ɔni náva ku ɔni néwi-ka ntu kemo. Katɔti kani ndubɔƒɔ bana ƒui kayu na bana kabla kenye. ⁹ Ɔsika bɔdi bakpana na kabla kenwi kemo. Na bɔ́sala bɔɔbla-ka teete Katɔti. Na amii bise aani Katɔti kemo kani lɛlɔ na bunye bɔɔtuma. Na bise lɛnɔ aani ɔtɔ ɔni na Katɔti ɔ́tu. ¹⁰ Na Katɔti lɛla lɛni na úte-mi kenye ni, lɛ́bla kabla aani ɔtɔ ɔtune ɔbuni kalɛ. Na lɛ́kya ɔtɔ kalɔ lɛtabi. Na ukyuli bamba úbo ɔɔtú taasia. Nsu ɔdi ka ɔdi biala ɔnu kaduɛ kalɛ na ɔɔtú taasia ɔtɔ ɔmmɔ lɛlɔ. ¹¹ Ɔsika Yesu Kristo na Katɔti úti ɔ́bla ɔtɔ kalɔ lɛtabi lɛni kani lɛlɔ na bekyuli batu ɔtɔ basia. Na ɔdi ɔsɔ ulakana na wakya lɛtabi lɛbambadi lɛdi kalɔ. ¹² Badi badubuti sika ugyiedi iye ɔƒualadi iye atabi ani náƒɔ kuye iye ligyii iye livo batu ɔtɔ ɔmmɔ. ¹³ Nsu si ɔtɔ ɔni na ɔdi biala ɔ́tu ɔdia iye ɔɔɔdia ni, Kristo limeyi bonwu lɛmmɔ ndubudie bana kabla bɔtina. Ɔsika limeyi lɛmmɔ lɛlɔ ni, ogya ndubo ɔdi biala kabla keyi budie. Ogya ɔmɛni ndubo kabla biala bɔkɔku bɔnu na ɔnu si kabla kammɔ kadia. ¹⁴ Si lɛla lɛni na ɔdi úti ɔ́tu ɔtɔ ɔ́sia ɔtɔ kalɔ lɛtabi lɛmɛni lɛlɔ lɛ́kana bunye si ogya ɔ́kywi ɔ́vi-ni lɛlɔ ni, ɔtune ɔmmɔ ɔdubɔƒɔ lɛyuƒɔla. ¹⁵ Nsu si ɔdi atula ani na úti ɔ́tu ɔtɔ ɔmmɔ ákywi ni, ulákɛ lɛyuƒɔla lɛdi. Nsu anwu ɔlati ɔdubɔkɛ bɔƒɔ aani si úkeli ɔ́lɛ ogya ɔmmɔ kemo. ¹⁶ Bɛti nwaa ka amii alati ndi Katɔti kakpakɔ. Na Katɔti Kɔyu kɔkya-mii lɛlɔ kemo. ¹⁷ Ɔsika Katɔti kakpakɔ kese kedee, na amii ndi nwuna kakpakɔ kammɔ. Anwuɔsu si ɔdi úgyingya Katɔti kakpakɔ kammɔ ni, Katɔti ɔdubɔyila-nwu udu. ¹⁸ Bina akɔ ɔdi utatɔlɔ lɛlɔ. Si bina akɔ ɔdi ɔɔnu lɛlɔ aani kayawi kamɛni ɔnundane ni, ɔbla lɛlɔ ɔdɔlɔdi mmomu na bekyuli anumi kalɛ na wenwini ɔnundane geen sɔsɔ na Katɔti anumi. ¹⁹ Ɔsika lɛla lɛni na bayawine baanu aani lɛnunda na kayawi ni, ani ndi kɔdɔlɔ na Katɔti anumi. Na lɛni na Bunweni Kedee Ɔku ɔ́su ɔnini, “Banundane kakwɛ na Katɔti uuti taakywɛ ama alati kakpagyuɛ.” ²⁰ Na básɔ bénweni banii, “Katɔti ɔgyi ka banundane bamɛni kasusu kaaadi lɛla lɛdi.” ²¹ Ɔmɛni ɔsu ni, utalɛka ukyuli ɔdi utaakun lɛmɛnɛ na lɛla lɛni na bekyuli bakana bɔbla lɛlɔ. Ɔsika geen geen ni, lɛla biala lise lite bina bɔdia. ²² Paulo iye Apolo iye Petro iye kayawi kamɛni o-o iye kukpi ku ngba o-o iye ɔƒɛni ku uwi ɔni mebo ni, ala ammɔ ƒui adi amii adi. ²³ Na Kristo ɔdi na bɛdi. Na Kristo lɛnɔ ɔdi Katɔti ɔdi.

¹ Bitaanu-bu aani Kristo kabla bablane bani mɔɔnu Katɔti etemila geen aani na útedie keyi dii lɛlɔ. ² Na lɛlakpa linwi lɛni kani na unwoti ɔɔwia taasiku nwuna ala lɛlɔ ɔnune ɔmɛni udu kudɔ ndi ka ɔ́bla kabla kammɔ ulu lɛlɔ. ³ Ɔƒɛni ni, lɛɛɛdaku-ni si ɔdi ɔɔtɛku-mi litemi iye ɔdi ɔkɛnku kayawi lɛnunda lɛdi kenye ɔɔnu ɔnii lɛ́ƒiɔ. Naaatɛku ami ɔlati lɛlɔ muedi litemi. ⁴ Mina kayi kaladu-mii kɔtɔ kɔdi. Nsu ɔmɛni uléte-mi ubo ɔnii lɛ́ɛlɛ sɛɛn na likpidi ku litemi bɔtɛ kemo. Ɔsika Blɔti ndubɔtɛku-mi litemi. ⁵ Anwuɔsu ni, ɔdi utatɛku ɔkpanadi litemi wetédu ka uwi ɔbuni ɔmmɔ webo. Si uwi ɔni na Blɔti úbo ni, anwu ndubɔtɛku ukyuli biala litemi na limeyi likplodi lɛmmɔ lɛlɔ. Na anwu ndubudie kasuudikɔ ala abɛdi keyi na ɔdubudie ala ani na bekyuli kakali kadanku ɔtina. Mmɔ na Katɔti ɔdubumwi ukyuli biala kalɛ na ɔ́bla nwuna kabla ɔ́vinku. ⁶ Banwa, kalɛ na binu ala ani na mɔɔsu kalɔ ɔsu na líti ami ku Apolo línwini lɛla lɛni na bɛnu bɛtɛya. Na bɛtɛya ala ani kalɔ na etemila amɛni eedie taatina ɔni na bénweni banii, “Bɛbla ala bɛsiaku ulu lɛlɔ.” Ɔmɛni ɔsu bitatalaku ukyuli ɔdi katɔ bitetulo ɔbambadi. ⁷ Ɔma nédie-ɔ na áƒɔ kuye étulo ƒula ɔkpana? Ala ani na ebo ƒui ni, Katɔti néti-nya úte-ɔ. Na si lɛni na ɔdi ni, bi ɔsu na aakun lɛmɛnɛ aani si ɔɔɔdi Katɔti néte-ɔ ala ani na ébo? ⁸ Bɔsa na ala ani ƒui na bɛɛwia áasa-mii? Munuu balakɛne na biinwíni? Bɛ́ɛta bínwini baga ina ka bɔɔɔdi baga? Awo! Mɔɔyɔ́ si nka banii baga na bíinwini. Na abu lɛnɔ bunwini baga aani bina kalɛ! ⁹ Ɔsika use-mi aani si abu batalane ni, keliekɔ kekplodi na Katɔti úti ute-bu. Na buse aani bekyuli bani na bádu-ma kukpi kɔtɔ ka badu-ma na kadi anumi. Na kayawi ƒui ku Katɔti batu benye banu. ¹⁰ Bɔdi badɔlɔdi na Kristo ɔsu. Nsu amii bɛdi banundane ka bɛ́bla unwi ku Kristo ɔsu. Abu buse aani bekyuli bani na ekubi eeebo-ma lɛlɔ kemo. Nsu amii ni, lɛlɔ lɛ́sa-mii. Bɔɔɔdi lɛla lɛdi na bekyuli anumi. Nsu amii ni, bibo ɔbu. ¹¹ Úti úbalɛ ku ɔƒɛni ni, bɔkɛ ku kɔka ku utukwɛ. Na buuubo adala abuni adi. Na bekyuli beebó-bu. Na buuubo keliekɔ kadi. ¹² Na bɔɔbla kabla kpakplaa na buutú lɛlɔ. Si bekyuli béwida-bu ni, abu buute-ma kusɛ kusɛ. Ina dɛ na basiaku-bu beekpóku-bu ni, bɔɔkya ɔkplu. ¹³ Si bédumi-bu ni, kayi buɛɛ etemila na buuti teedie lɛlɔ kenye. Bɔɔɔdi lɛla lɛdi buuutulo kayawi kamɛni kebu. Kalɔ kamɛni alaekpidi kewiakunkɔ na bɔdi úti úbalɛku ɔƒɛni. ¹⁴ Ɔɔɔdi kɔƒa na nnii mɔɔkya-mii ɔsu na muunweni-mii ɔku ɔmɛni udu. Mmomu mɔɔlɛ-mii aani mina bebi bayɔne kalɛ. ¹⁵ Ɔsika si ina bibo bekyuli mpimu leevu muedi bani mɔɔnu-mii lɛlɔ na bina bɔƒɔtaadi ngba bɔni na bilie kemo ni, ɔɔɔdi bati pii náwɔ-mii. Ɔsika kalɛ na bilie ngba na bɛ́bla unwi ku Kristo ɔsu ni, ami nénwini bina ɔti na ɔni na lɛ́ka litemi buni lɛmmɔ buti buboku-mii ɔsu. ¹⁶ Anwuɔsu ni, muuvele-mii nnii bɛsiaku mina ɔbladu kama. ¹⁷ Ɔmɛni lɛlɔ geen ɔsu na mɔɔtala Timoteo lɛkya-mii. Ɔdi-mi ubi ɔyɔne geen ɔni mɔɔbla Blɔti kabla ulu lɛlɔ. Ɔdubo ubenyimene-mii Kristo ngba bɔwɔdi ulu ɔni kama na nsia. Na ɔmmɔ na mɔɔtina baƒɔtaadine ƒui na kesii biala. ¹⁸ Bina akɔ badi báta bénwini bekyuli bani mɔɔtina lɛlɔ teetulo bakpanadi, ɔsika bákali banii nsɔ lɛɛɛdubo naaabanu-mii. ¹⁹ Na si Blɔti ɔ́tuna ni, ndubo mbanu-mii na uwi klukui ɔdi kemo. Na ami ɔlati ndubɔnu ɔyikun ɔni na bekyuli bani mɔɔtina lɛlɔ mɛni bebo, na lɛnu si ɔɔɔdi atɛ keeke kani na baatɛmi. ²⁰ Ɔsika Katɔti lɛga bɔdi bɔɔɔdanku atɛ keeke bɔtɛmi. Mmomu bɔdanku ɔyikun. ²¹ Bɛɛyɔ́ ka libo-mii kudɔ na mbani-mii kɔtu, munuu mbo-mii kudɔ ku anumi buɛɛ na bɔyɔ kemo?

¹ Na ɔƒɛni ni, bekyuli baasu nwaa ka ni, bina akɔ badi baadi kɔsɔnɔ kɔni ntulo bɔsu. Na bekyuli bani naaadi baƒɔtaadine muedi balakana ɔmmɔ udu bɔbla. Básu-mi banii ɔnana ɔdi ku ɔti ulekudi baatɛ! ² Na bi ɔsu na bɛɛtina lɛlɔ? Ɔlɛka biteewulo kɔnyana mmomu. Na ukyuli ɔni nábla lɛla lɛmɛni udu ni, ɔdi ka bɛda-nwu bidie bina baƒɔtaadine akɔ. ³ Ina ka lɛ́gyunku-mii na bulánu lɛlɔ anumi ku anumi muedi ni, nkya-mii kudɔ mmɔ na kɔyu kemo. Na ka nkya-mii akɔ ɔsu ni, lɛ́du ukyuli ɔni nábla udu ukpidi ɔmɛni kɔtɔ ⁴ na Blɔti Yesu Kristo ɔyikun kemo. Si bɛ́sala lɛlɔ ni, na ɔbla-mii ka ami lɛnɔ nkya-mii akɔ na kɔyu kemo. Na Blɔti Yesu Kristo ɔyikun ɔdubɔkya-bu akɔ. ⁵ Ɔdi ka bɛnyonu ukyuli ɔmmɔ bite Satan na nwuna ɔyikun ususu-nwu ɔlɔna. Na ina úkpi muedi ni, ukyuli ɔmmɔ kɔyu kɔkɛ bɔƒɔ na limeyi lɛni lɛlɔ na Yesu watɛku kayawi bekyuli ƒui litemi. ⁶ Útalɛka bitaatina lɛlɔ. Bɛɛɛgyi bɛnii bɔnyii blii mɔɔsálaku ɔlaaƒɔ ɔni na bánwu na ɔɔyá na ɔna ƒui uuƒu? ⁷ Bɛda bɔnyii biala bɔni ndi likpidi bidie bina akɔ. Na bɛbla aani ɔlaaƒɔ ɔwɔdi ɔni na bánwu, na bɔnyii bɔdi buuubo-nwu kemo aani kalɛ na ngyi ka bise sɔsɔ kalɛ. Ɔsika bula Kukpi Lili Bɔvia Limeyi líidu. Na ɔƒɛni ni, báadu bula Kukpi Lili Bɔvia Lɛkpa Koƒonu Ubi ɔni ndi Kristo. ⁸ Anwuɔsu ni, bitaya na bɔdi bula Kukpi Lili Bɔvia Limeyi ku bodobodo ɔni kemo na bɔnyii bɔkukudi bɔni ndi likpidi ku likyulikpi ala ani bɔɔbla akya. Mmomu bɔɔdi limeyi lɛmɛni ku bodobodo ɔni kemo na bɔnyii buuubo na bɔɔtina ka bɔɔɔdi anumi lɛlɔ bekyuli. Mmomu bɔkɛnku litemi geen lɛmmɔ. ⁹ Na ɔku ɔni na línweni-mii kemo ni, lɛ́su-mii nnii bitasala lɛlɔ ku bekyuli bani mɔɔdi kɔsɔnɔ. ¹⁰ Ɔƒɛni ni, ɔɔɔdi bekyuli bani naaadi baƒɔtaadine na nda. Badi bekyuli bani mɔɔdi kɔsɔnɔ na bebo lɛnungyie ku bani muuti bekyuli egulabi taadi, na baakpá baƒiɔ lɛnɔ. Na si bɛnii bɛɛmami-ma lɛlɔ bɔdi anwu ni, ɔdi ka bɛvi bɛlɛ kayawi kemodi kammɔ ƒui kemo. ¹¹ Mmomu lɛla lɛni mɔɔtina ndi ka ukyuli ɔni na ɔɔlɔ lɛlɔ ɔnii ɔnwa ɔƒɔtaadine nsu ɔɔdi kɔsɔnɔ iye ubo lɛnungyie iye ɔɔkpá baƒiɔ iye ɔɔlɔ bekyuli anyikpi iye uukpi ntɛ iye uuyú ni, awɔ ku-nwu bitabla lɛla lɛdi bitasala. Na bitakya kɔnu lɛkyami linwi kemo bitadi muedi. ¹² - ¹³ Use nwaa ka ni, ɔɔɔdi mina kabla kadi ka lɛtɛku bekyuli bani naaadi bula baƒɔtaadine bakpana litemi. Mmomu Katɔti ndubɔtɛku-ma litemi. Nsu ɔdi ka bɔtɛku bula baƒɔtaadine bakpana litemi aani kalɛ na Bunweni Kedee Ɔku ɔɔsu ɔnii, “Bɛgya ukyuli ukpidi bidie bina kasala kemo.”

¹ Si bina akɔ ɔdi ɔ́kɛku ɔƒɔtaadine ɔkpana litemi ni, útalɛka uti litemi lɛmmɔ usienku bekyuli bani naaadi baƒɔtaadine kudɔ ka basu-ni bete-nwu. Mmomu bina akɔ ɔdi ɔlɛka ɔsu-ni. ² Bɛgyi ka Katɔti bekyuli ndubɔtɛku kayawi bekyuli litemi. Na si bɛgyi ka amii ndubɔtɛku kayawi bekyuli litemi ni, ɔdi ka bɛkana na bɛtɛ etemila wɛlɛ wɛlɛ. ³ Bɛgyi nwaa ka abu baƒɔtaadine ndubɔtɛku katɔ batu litemi. Ɔmɛni ɔsu na útalɛka kayawi etemila wɛlɛ wɛlɛ amɛni étulo-bu. ⁴ Anwuɔsu si etemila amɛni udu akya bina akɔ ni, ina bekyuli bani na bilábu na bina akɔ muedi na bɛƒuna ka basu-ni muedi ni, nka ɔdia utulo ka bise ɔgbami. ⁵ Mɔɔsu-mii ɔmɛni na kɔƒa kukpo-mii. Ukyuli unwi pɛ ɔdi anwu ɔkya bina akɔ ɔni ndubɔkana na ɔklibi etemila amɛni na baƒɔtaadine ntɛ. ⁶ Nsu ɔnwa ɔƒɔtaadine uuti ɔkpanadi teesienku bekyuli bani naaadi baƒɔtaadine kudɔ banii batɛ bana etemila. ⁷ Kasusu kani na bɛdanku asa na biiti lɛlɔ teesienku litemi katɛkɔ lɛti pɛ ɔɔtina ka bina bɔƒɔtaadi bɔ́sɔ ƒui. Aani ɔƒɔtaadine kalɛ ni, si ukyuli ɔdi ɔɔƒiɔ́-ɔ na ákya ɔkplu na átakya-nwu kenye ni, ɔdia utulo. Lɛni kani si ukyuli ɔdi úti-ɔ lɛla lɛdi ni, takpete ukyuli ɔmmɔ. ⁸ Nsu amii alati mmomu mɔɔƒiɔ́ lɛlɔ. Na biiyú bina banwa baƒɔtaadine ala muedi. ⁹ - ¹⁰ Na bɛgyi geen ka bekyuli bani mbo likyulikpi balákɛ Katɔti lɛga kadikɔ. Bitabu bina lɛlɔ kɔdɔlɔ! Ɔsika bekyuli bani mbo lɛyalɛ iye bani mɔɔkpá baƒiɔ iye baadi kɔsɔnɔ iye bani néti lɛlɔ kudɔ bɔtɛ bénwini liyedi iye banana bani mɔɔtɛnku lɛlɔ aani beleku kalɛ iye bani muuyú iye bani mbo lɛnungyie iye bani mɔɔní ntɛ teekpi iye beebile bekyuli anyi iye bani muuti bekyuli egulabi taadi ni, bana akɔ ɔdi biala uléduo Katɔti lɛga kadikɔ. ¹¹ Lɛni na nka amii badi bíse. Nsu Blɔti ɔ́ƒɔ-mii ekpidi údie-mii lɛlɔ kemo na ɔ́bla-mii kedee úte Katɔti. Na amii ku Katɔti ntɛ bɔ́sɔ bɔ́dia ɔkɛ Blɔti Yesu Kristo ku Katɔti Kɔyu ɔsu. ¹² Bina akɔ ɔdi ɔdubɔsu ɔnii, “Mbo kuƒi ka lɛbla lɛla biala.” Sɔsɔ na ɔdi. Nsu lɛla biala lɛɛɛdia liiite-ɔ. Lɛkana na lɛsu nnii, “Mbo kuƒi na lɛbla lɛla biala.” Nsu útalɛka lɛla biala lɛdi-mi lɛlɔ. ¹³ Ukyuli bamba lɛnɔ ɔdubɔkana na ɔsu ɔnii, “Kaƒɔ ɔsu na bédie adila, na kaƒɔ na adila ese ete.” Sɔsɔ na ɔdi, nsu Katɔti ɔdubɔya na ana ƒui uwi ubavi. Na ɔɔɔdi ka buti bula ɔlɔna butaabla kɔsɔnɔ bɔdi ala. Mmomu ɔdi ka buti butaabla Blɔti kabla. Na anwu ɔdubute ɔlɔna ɔmmɔ lɛla lɛni námanku-nwu. ¹⁴ Katɔti ɔ́gyila Blɔti ɔ́lɛku bekpine akɔ, na ɔdubɔgyila abu lɛnɔ ku nwuna ɔyikun. ¹⁵ Bɛgyi ka bina ɔlɔna ɔdi Kristo ɔlɔna kakɛ kadi. Na útamanku ka eti Kristo ɔlɔna kakɛ kadi atámanaku ukyuli ɔni ndi lɛyalɛ ala ɔblane lɛlɔ. ¹⁶ Bɛgyi lɛnɔ ka si ukyuli úti nwuna ɔlɔna útámanaku ɔyalɛ ɔdi lɛlɔ ni, ɔ́blaku-nwu unwi na ɔlɔna kemo. Bunweni Kedee Ɔku ɔ́su nwaa ɔnii, “Bana inyɔ badubɔbla ɔlɔna unwi.” ¹⁷ Nsu ukyuli ɔni na úti lɛlɔ ɔ́mana Blɔti lɛlɔ ni, ɔ́blaku-nwu unwi na kɔyu kemo. ¹⁸ Bɛsɔ bitabla kɔsɔnɔ ala. Likpidi bamba udu biala na ukyuli ɔ́bla ni, lɛɛɛdanku nwuna ɔlɔna. Nsu ukyuli ɔni mɔɔdi kɔsɔnɔ ni, ɔɔbla nwuna ɔlɔna ɔlati likpidi. ¹⁹ Bɛgyi nwaa ka ni, bina ɔlɔna ɔdi kakpakɔ ute Katɔti Kɔyu kɔni na Katɔti úti úte-mii na kulie-mii lɛlɔ kemo. Ɔɔɔdi amii alati mbo bina lɛlɔ. ²⁰ Ɔsika Katɔti ɔ́ƒɔ kayu bonwu na bina lili. Anwuɔsu biti bina ɔlɔna bɛbla ala ani muute Katɔti ɔbu.

¹ Na ɔkɛnku ɔku ɔni na bínweni-mi etemila lɛlɔ ni, mɔɔsu-mii nnii si ɔnana ɔdi elie na átawia anii eeti uleku ni, agyi anii ábla-nwu kaduɛ. ² Nsu ka lɛsɔnɔdi lɛ́bɔ ɔsu ni, ɔlɛka ɔnana biala ɔkɛ nwuna uleku. Na uleku biala lɛnɔ ɔkɛ nwuna ɔgya. ³ Útalɛka ɔnana uni ulekudi kudɔ buse. Na útalɛka uleku lɛnɔ uni ɔgyani kudɔ bɔtɛ. ⁴ Ɔsika uleku ɔlɔna ɔɔɔdi anwu lɛti ɔdi. Mmomu ɔdi ɔgyani lɛnɔ ɔdi. Na lɛni kani na ɔnana ɔlɔna lɛnɔ ɔɔɔdi anwu lɛti ɔdi. Mmomu ulekudi lɛnɔ ɔdi na ɔdi. ⁵ Si bana akɔ ɔdi ɔɔda ɔdi ɔkwɛ ni, ɔtuna ute-nwu amu ntu bɔka na bɛ́ka lɛlɔ kalɔ bunu ka bɛbla lɛni na biti uwi ɔmmɔ bite katɔ bɔkpali. Na ɔmmɔ kama ni, ɔdi ka bɛsɔ bilie kalɛ kani na bilie kukuuku. Si bɛ́bla lɛni ni, bileduo ukisine ɔmmɔ kakpagyuɛ kemo. Ɔsika bilakana lɛlɔ lɛlɔ bɔdi na bɛsɔ bilie lɛni ƒui. ⁶ Ɔmɛni ɔɔɔdi ɔda na muubó-mii. Mmomu kasusu kadi na muute-mii. ⁷ Geen geen ni, ɔdia ute-mii si banii ɔdi biala use aani kalɛ na ami nse. Nsu ni, ɔdi biala ku lɛla lɛni na Katɔti úte-nwu. Ukyuli ɔdi ubo litela lɛdi, na ɔdi lɛnɔ ubo lɛbambadi. ⁸ Amu na bakinsi ku bekpinele ni, mɔɔsu-mii ka si bɛ́ƒɔ lɛlɔ bíse na bítelie agya iye bíteti beleku aani mina kalɛ ni, ɔdia utulo. ⁹ Nsu si bilakana lɛlɔ bɔda ɔ́si ala ani mɔɔda-mii ɔkwɛ ɔsu ni, bɛkana na bilie agya iye biti beleku. Ɔsika si bɛ́bla lɛni ni, ɔdia utulo ɔni na bitaabla lɛyalɛ ala taavi. ¹⁰ Na bagya ku bele ni, muubó-ma ɔda ɔni naaadi mina ɔdi. Mmomu Blɔti na muubó-ma ɔda ɔmɛni. Ɔɔɔdi ka uleku ɔlɛ ɔgyani kesii. ¹¹ Na si ɔ́lɛ ni, ɔdi ka anwu lɛti pɛ ɔsɔ ulie iye anwu ku ɔgyani ɔmmɔ basɔ babla unwi. Na utalɛka ɔnana lɛnɔ ɔnyonu ulekudi. ¹² Na amii bakladi ni, mɔɔsu-mii ɔmɛni, nsu ɔɔɔdi Blɔti ɔda bubo. Si ɔƒɔtaadine ɔdi ubo uleku ɔni naaadi ɔƒɔtaadine na uleku ɔmmɔ ɔ́tuna ka basɔ belie ni, tanyonu-nwu. ¹³ Lɛni kani si uleku ɔƒɔtaadine ɔdi úlieku ɔnana ɔni naaadi ɔƒɔtaadine na ɔnana ɔmmɔ únu kalɔ ka basɔ belie ni, uleku ɔmmɔ utalɛ-nwu kesii. ¹⁴ Ɔsika ɔgyani ɔni nátaƒɔ útadi mmɔ ni, Katɔti ɔdubɔbla-nwu kedee ɔkɛnku uleku ɔni náƒɔ ɔ́di mmɔ ɔsu. Na lɛni kani na Katɔti ɔdubɔbla uleku ɔni nátaƒɔ útadi mmɔ kedee na awɔ ɔnana ɔni náƒɔ ádi mmɔ ɔsu. Si ɔɔɔdi lɛni ni, bana bebi balabla kedee. Nsu kalɛ na use ni, Katɔti ɔɔbla bebi bamɛni kedee. ¹⁵ Nsu si ukyuli ɔni naaadi ɔƒɔtaadine mmɔ ɔɔwia ka ɔtɔlɔ ɔni ndi ɔƒɔtaadine ɔmmɔ kudɔ ni, ɔkana na ɔtɔlɔ ƒaa. Na ulu ɔmɛni udu lɛlɔ ni, uleku ɔƒɔtaadine ɔmmɔ iye ɔnana ni, ubo kuƒi ka ɔbla lɛla lɛni na ɔɔyɔ́. Katɔti ɔ́lɔ-bu ɔnii bubelie ngba ku keyi buɛɛ. ¹⁶ Anwuɔsu awɔ uleku ɔƒɔtaadine si élieku ƒ^ɔgyani lɛni ni, ɔƒaalɛ adubudie-nwu alɛku ekpidi kemo. Lɛni kani na awɔ ɔnana ɔƒɔtaadine lɛnɔ ni, si awɔ ku ƒ^ulekudi bílie lɛni ni, ɔƒaalɛ adubudie-nwu alɛku ekpidi kemo. Lie ngba ku kuƒi kɔni na ebo asa na Katɔti úte-ɔ ƒula uleku. ¹⁷ Lɛla lɛni na mɔɔtina na baƒɔtaadine akpa ƒui akɔ ni, anwu ndi ka ɔdi biala usie anumi na ulie ngba na kuƒi kɔni na Blɔti úte-nwu ɔkɛnku nwuna kenyekɔ lɛlɔ uwi ɔni na Katɔti ɔ́lɔ-nwu. ¹⁸ Si ékulo lego asa na Katɔti ɔ́lɔ-ɔ ni, na eti-nwu lɛni kani. Na si étekulo tɔ lego asa na Katɔti ɔ́lɔ-ɔ ni, awɔ lɛnɔ sɔ tasu anii etékulo lego. ¹⁹ Ɔsika si ɔdi ékulo lego iye étekulo lego ni, ɔmmɔ ɔɔɔda. Mmomu kalɛ na abla lɛla lɛni na Katɔti ɔ́su-bu ka bɔbla ni, anwu nda. ²⁰ Anwuɔsu kuƒi kɔni na ebo na ƒula kenyekɔ uwi ɔni na Katɔti ɔ́lɔ-ɔ ni, da-nwu lɛni kani. ²¹ Si ukyuli bamba kabla na aabla asa Katɔti ɔ́lɔ-ɔ ni, ɔmmɔ utekpoku-ɔ. Nsu si ákɛ ulu ɔni na ada ukyuli bamba kabla bɔbla aya na akɛ bɔnwuna ni, sia ulu ɔmmɔ lɛlɔ. ²² Si aabla ukyuli bamba kabla asa na Blɔti ɔ́lɔ-ɔ ni, énwini ukyuli ɔni na ebo bɔnwuna na Blɔti kudɔ. Na lɛni kani na si aabla awɔ ɔlati kabla asa na Blɔti ɔ́lɔ-ɔ ni, énwini ukyuli ɔni mɔɔbla Blɔti kabla. ²³ Na Katɔti ɔ́ƒɔ kayu bonwu na bina lili. Anwuɔsu bɛsɔ bitenwini bekyuli bamba kabla bablane. ²⁴ Banwa, bina akɔ ɔdi biala ɔbla unwi ku Katɔti na kuƒi kɔni na ebo na ƒula kenyekɔ kenye asa ɔ́lɔ-ɔ. ²⁵ Ɔƒɛni na lɛla lɛni na bíye na bakinsi lɛlɔ ni, ńtaƒɔ ɔda bubo bɔdi ńtasiku Blɔti kudɔ. Nsu ka Blɔti ɔ́nu-mi kɔnyana na ndi ukyuli ɔni na lɛ́manku ɔsu ni, mina kasusu ndi kamɛni. ²⁶ Si ukyuli ábu ánu kalɛ na beekpóku bekyuli uwi ɔmɛni kemo ni, mɔɔbu nnii ɔdia ute ɔnana utulo si ɔdi ɔkinsi. ²⁷ Na si éti uleku ni, tasu anii aanyonu-nwu. Na si eeeti ni, tasu anii atáwia uleku ɔdi eti. ²⁸ Nsu ni, si éti uleku ni, átabla likpidi lɛdi. Na si uleku ɔni na nka uuulie kɔgya úlie kɔgya ni, útabla likpidi lɛdi. Nsu mɔɔyɔ́ ka lɛda-mii lidie abi ani na ɔgya ku ule beebó na bana ngba kemo. ²⁹ Lɛla lɛni na mɔɔsu-mii ni, ani ndi ka uwi ɔ́sɔ útene. Na ɔ́si ɔƒɛni úsela ni, ɔdi ka amii beleku bagya bilie ngba aani bakinsi. ³⁰ Na bekyuli bani muuwulo ni, babla aani si bana lɛlɔ liiibo kɔnyana. Na bani mɔɔmá ni, babla aani si kubiti kuláda-ma. Na bekyuli bani muuyé ala ni, babla aani si ala ani na béye ƒui aaadi bana ɔdi. ³¹ Na bani nnye kayawi kamɛni akɛla kenye ni, beteti anu batasia-nya lɛlɔ. Ɔsika kalɛ na bɔɔnu kayawi kamɛni ɔƒɛni ni, ɔɔɔdi lɛni na kadubo buse na uwi klukui ɔdi kama. ³² Mɔɔwia ka bɛda kasusu bidie lɛla biala lɛlɔ. Ɔsika ɔnana ɔkinsi ni, uuti nwuna kasusu taasia Blɔti kabla lɛlɔ na ɔɔkya ɔkplu ka ɔbla lɛla lɛni mayɔ Blɔti kaƒɔ. ³³ Nsu ɔnana ɔni nti uleku anwu ni, nwuna kasusu kaasia kayawi ala lɛlɔ. Ɔsika ɔɔwia ka ɔbla lɛla lɛni mayɔ ulekudi kaƒɔ. ³⁴ Ɔmmɔ ɔsu ni, ala ammɔ aaní-nwu teenene ɔƒɛnyi ɔni ku ɔni ƒui. Na uleku ɔkinsi iye adagyaa ni, uuti nwuna kasusu taasia Blɔti kabla lɛlɔ. Ɔsika ɔɔwia ka uti lɛlɔ ƒui ute na kɔyu ku ɔlɔna kemo. Na uleku ɔni na ulie kɔgya ni, nwuna kasusu kaasia kayawi ala lɛlɔ, ɔsika ɔɔwia ka ɔbla lɛla lɛni mayɔ ɔgyani kaƒɔ. ³⁵ Mɔɔwia ka libunku-mii. Ɔmɛni ɔsu na mɔɔsu-mii ala amɛni. Neeenyimi-mii ku ɔda bubo bɔdi. Mmomu mɔɔyɔ́ ka bilie ngba na ulu geen ɔmmɔ lɛlɔ. Na bɛkana na biti lɛlɔ bite Blɔti lɛti ƒui kede kede ku bina kayi ƒui. ³⁶ Na si ɔnana ku uleku ɔni na bálɛ lɛlɔ kegye bánu ka basɔ balakana bulie kpoo na betu uwi kalɛ na nka bákali ni, bakana na beti lɛlɔ. Na ɔɔdi likpidi. ³⁷ Nsu ɔnana ɔni nábla kasusu kpakplaa ka uleti-nwu na wakana na wada lɛlɔ lɛni ni, ɔkana na ɔda-nwu buti ɔya. Ɔnana ɔmɛni lɛnɔ ɔ́bla kaduɛ. ³⁸ Anwuɔsu ni, ɔnana ɔni néti uleku mmɔ ni, ɔ́bla kaduɛ. Nsu ɔni néteti uleku mmɔ ni, ɔ́bla kaduɛ útulo. ³⁹ Uleku ɔni na ulie kɔgya ni, uuubo kuƒi ka ulie kɔgya bamba na uwi ɔni na ɔgyani ɔmua uli ngba. Na si ɔgyani ɔmmɔ úkpi ni, mmɔ asa na ɔdubɔkana na ulieku ɔnana ɔbambadi biala na ɔɔyɔ́. Nsu ɔdi ka ɔnana ɔmmɔ ɔbla ɔƒɔtaadine. ⁴⁰ Na si ɔ́kana na ɔ́sɔ útelie kɔgya ni, ɔdubɔkɛ ebiti utulo. Ɔmɛni na mina kasusu kaatina-mi, na lɛ́ƒɔ lɛ́di ka ɔdi Katɔti Kɔyu lɛƒɔyɔ lɛnɔ.

¹ Na ɔƒɛni ni, mɔɔyɔ́ ka lɛsu-mii lɛla lɛdi na adila ani na béti bákpa na baƒiɔ abi lɛlɔ. Bɔɔsu bɔnii bula ƒui bubo lɛlati. Nsu bɔgyi lɛnɔ ka lɛlati lɛmɛni lɛɛyá na ukyuli uuƒu na ɔɔtina lɛlɔ. Nsu lɛla lɛni mɔɔkya-bu ogya ni, ani ndi si aayɔ́ bekyuli. ² Ukyuli biala ɔni mɔɔkali ɔnii ɔgyi lɛla lɛdi ni, geen geen ni, ɔɔɔgyi-ni kalɛ na ɔlɛka ɔti. ³ Nsu ukyuli ɔni mɔɔyɔ́ Katɔti ni, Katɔti ɔgyi-nwu. ⁴ Na ɔmɛni ndi lɛla lɛni mɔɔsu-mii na adila ani na béti bákpa na baƒiɔ abi lɛlɔ bɔdi lɛlɔ. Bɔgyi ka ala ani na bekyuli bábla bése baakpá ni, aaadi lɛla lɛdi na kayawi kamɛni kemo. Ɔsika bɔgyi ka Katɔti unwi pɛ kani nkya. ⁵ Ina bekyuli baasu banii baƒiɔ bakya katɔ iye kalɔ mɛni na ina ka baƒiɔ bamɛni lidu limomo ku kalɔ benwoti muedi ni, ⁶ abu bɔgyi ka Katɔti unwi pɛ na bubo. Anwu ndi Ati ɔni nédie ala ana ƒui. Na anwu na bulie ngba bute. Na Blɔti unwi pɛ kani nkya, na anwu ndi Yesu Kristo ɔni lɛlɔ na Katɔti ɔkɛ údie ala ƒui. Na ɔkɛ anwu ɔsu na buli ngba. ⁷ Ɔɔɔdi ukyuli biala ngyi litemi geen lɛmɛni. Ala ani na bekyuli bábla bése baakpá ni, ése áƒɔ badi lɛlɔ kemo ɔni na úbedu ɔmwi kadi si bádi adila amɛni udu ni, baabu banii baƒiɔ adila na adi. Na bana kasusu kpɛtɛ kpɛtɛ kaadú-ma kɔtɔ ka adila ammɔ aayá beesé lɛlɔ. ⁸ Ɔɔɔdi adila adi bɔdi ndubɔya na abu ku Katɔti ntɛ bɔdia bubu. Na bulayila lɛla lɛdi si bútadi. Na lɛni kani na bulákɛ lɛla lɛdi si bɔdi adila adi. ⁹ Bɛnu kaduɛ na bina kuƒi kɔni na bibo lɛlɔ kalɛ na uleboku ukyuli ɔni na nwuna bɔƒɔtaadi buuubo ɔkplu kalɔ na wabla likpidi lɛdi. ¹⁰ Kali nu si ukyuli ɔni na nwuna bɔƒɔtaadi buuubo ɔkplu ɔnu-ɔ aani ukyuli ɔni na ƒula lɛnunda lísie anumi ka aadi adila ani bákpa béte baƒiɔ na nwuna ɔtɔ. Anwu lɛnɔ ɔdubɔkɛ ɔyikun na ɔdi adila ani na béti bákpa béte baƒiɔ mmɔ. ¹¹ Ɔmmɔ ɔsu ni, ƒula ɔnwani ɔni ɔsu na Kristo úkpi na nwuna bɔƒɔtaadi buse kpɛtɛ kpɛtɛ ɔdubɔyii ku udu na ƒula lɛla lɛni na aanu anii lɛlati ɔsu. ¹² Si úbo lɛni ni, na aabla likpidi taaƒiɔ ƒula baƒɔtaadine bakpana. Na áya na bani bɔƒɔtaadi neeebo ɔkplu bɔdubo-ma buteekpoku na bana kɔyi kemo. Na si úbo lɛni ni, aabla likpidi taaƒiɔ Kristo. ¹³ Anwuɔsu si adila ani na mɔɔdi adubɔya na mina ɔnwani ɔbla likpidi ni, nsɔ lɛɛɛdubo adila ani na béti bákpa béte baƒiɔ bɔdi kudii kalɛ na mina ɔnwani weduo likpidi kemo.

¹ Bɛɛbu bɛnii liiibo kuƒi na lɛbla lɛla lɛni mɔɔyɔ́? Munuu lɛɛɛdi ɔtalane na ńtanu Blɔti Yesu? Na ɔɔɔdi amii ndi mina ebi ani na lɛ́nwu na mina kabla kani na lɛ́bla líte Blɔti kemo? ² Si ina badi balaƒɔ-mi aani Blɔti ɔtalane ni, amii bɛ́ƒɔ-mi lɛni. Na kalɛ na bɛ́bla unwi ku Blɔti ni, ɔmmɔ lɛti pɛ ɔ́ya na amii alati biidie ɔmɛni taatina nwaa ka ndi Blɔti ɔtalane. ³ Na si bekyuli baakyaku-mi ɔmɛni lɛlɔ unyeƒi ni, lɛni na muudie mina lɛlɔ kenye. ⁴ Bubo kuƒi kɔni na bete-bu adila ku ntu na bula kabla kenye. ⁵ Bubo kuƒi ka abu lɛnɔ buti bula beleku bɔda aani kalɛ na batalane bakladi ku Blɔti banwani ku Petro lɛnɔ baabla. ⁶ Munuu ami ku Barnaba lɛti kani nálɛka bɔnu bula lɛlɔ lɛlɔ? ⁷ Ukpone ɔdi biala uláƒɔ nwuna lili kayu na bekpone kakyakɔ. Na umonsene biala ni, ubo kuƒi ka ɔdi nwuna kemo edula. Na bebuo lɛlɔ ɔnune biala ubo kuƒi na uti bebuo bammɔ anyi ntu ɔbla lɛdila. ⁸ Liiinye ala ani na abu bekyuli kasusu kaanu taati mɛni lɛti pɛ lɛlɔ. Na lɛni kani na ɔda bubo bɔmmɔ bɔɔsu. ⁹ Bɔ́ka na Mose ɔda bubo ɔku kemo ka ni, ebuo ɔni na biiti teesienku katumakɔ ni, tenyimi-nwu kenye si unye kabla lɛlɔ. Nsu ni, ɔɔɔdi bebuo bamɛni geen lɛlɔ na Katɔti ɔɔtɛmi taasiku. ¹⁰ Bula lɛlɔ litemi na Katɔti ɔɔsu. Na sɔsɔ ni, abu ɔsu na bénweni litemi lɛmɛni. Ukyuli ɔni mɔɔtuma ku ukyuli ɔni mɔɔƒɛ edula ni, ɔdi ka babla kabla kammɔ ku lɛnunsia ka ɔdi biala wakɛ edula ammɔ adi. ¹¹ Bɔ́va kɔyu kemo ebi bɔ́kya-mii akɔ. Na si amii lɛnɔ bíte-bu ɔlɔna lɛlɔ ala ni, úbie? ¹² Si bekyuli bamba bébo kuƒi ka bakɛ kɔsia kɔdi basiku-mii kudɔ ni, na abu bubo kuƒi kɔmmɔ udu butulo-ma muedi. Nsu abu búteti kuƒi kɔmmɔ bútablaku lɛla lɛdi. Mmomu abu búti lɛla biala bɔ́sia lɛlɔ kalɛ na Kristo litemi buni lɛmmɔ lɛkɛ ulu na ligyingya lisie kesii biala. ¹³ Bɛgyi kede kede ka bekyuli bani mɔɔbla kabla na Katɔti kakpakɔ ni, mmɔ na baakɛ́ bana lɛdila. Na bekyuli bani muuti akpala taatásia lɛkpabi lɛmmɔ lɛlɔ ni, beete-ma bana kadikɔ. ¹⁴ Lɛni kani geen na Blɔti úbo ɔda ɔnii bekyuli bani mɔɔkɔ́ litemi buni lɛmmɔ lɛsa teete bekyuli ni, lɛsa lɛni baakɔ́ kemo na ɔlɛka badi. ¹⁵ Nsu ńtablaku kuƒi kɔmɛni lɛla lɛdi. Munuu muunweni-mii ɔku ɔmɛni na lɛwia lɛla lɛdi lɛsiku-mii kudɔ? Si ɔmmɔ ɔsu ni, si líkpi muedi ɔdia-mi utulo. Ɔsika naaawia nnii lɛla lɛni lɛlɔ na mbo kuƒi ka lɛkun lɛmɛnɛ ni, ukyuli ɔdi uti-ni unwini etemila keeke. ¹⁶ Liiibo kuƒi kɔni na ntaakun lɛmɛnɛ ka mɔɔkɔ́ litemi buni lɛmmɔ lɛsa ɔsu. Blɔti ɔdubɔni-mi kɔtu si ńtakɔ litemi buni lɛmmɔ lɛsa ńtete bekyuli! ¹⁷ Si banii ami ɔlati náƒuna kabla kamɛni na mina bɔyɔ kenye ni, nka ndubɔsia anu ka baƒɔ-mi kayu. Nsu ɔdi kabla kani na Blɔti nnye-mi lɛlɔ ɔnii mbla. Ɔsika Katɔti néti-mi únyene-ka kenye. ¹⁸ Na bi kayu baaƒɔ-mi? Lɛyuƒɔla lɛni na mbo ndi ka lɛkɔ litemi buni lɛmmɔ lɛsa ku kaƒɔ ƒaa. Na lɛɛɛdubo mina kadikɔ ƒui kama bɔsia na litemi buni lɛni mɔɔsu mɛni kemo. ¹⁹ Mbo mina lɛlɔ kuƒi biala ɔni na lɛɛɛkya ukyuli bamba ɔdi kalɔ. Nsu lɛ́bla lɛlɔ aani ukyuli ɔni mɔɔbla bekyuli ƒui kabla kalɛ na lɛƒɔ bekyuli pii lite Blɔti. ²⁰ Uwi ɔni na mɔɔbla kabla na Yudaƒuɔ akɔ ni, lílie ngba aani Yudani kalɛ na lɛkana lɛƒɔ-ma lite Blɔti. Na ina ka lɛɛɛkya Mose ɔda bubo kalɔ muedi ni, lílie ngba lɛni ku bani mɔɔdi nwuna ɔda bubo bɔmmɔ lɛlɔ uwi ɔni na lɛ́kya-ma akɔ kalɛ na lɛkana na lɛƒɔ-ma lite Blɔti. ²¹ Lɛni kani na mɔɔbla ku bekyuli bani naaadi Yudaƒuɔ lɛnɔ. Na lílie-ma akɔ aani ukyuli ɔni naaadi Yudani. Na naaadi Yudaƒuɔ ɔda bubo bɔdi lɛlɔ kalɛ na lɛƒɔ-ma lite Blɔti. Ɔmɛni ulátina ɔnii lɛ́ta línye Katɔti ɔda bubo lɛlɔ. Ɔsika geen ni, Kristo ɔda bubo lɛlɔ na mɔɔdi. ²² Si nkya bani na bana bɔƒɔtaadi buse kpɛtɛ kpɛtɛ akɔ ni, mɔɔbla lɛlɔ aani ama kani kalɛ na lɛkana lɛƒɔ-ma lite Blɔti. Ɔmɛni ɔsu lɛ́manku-ma na línwini bekyuli ƒui ɔkpana kalɛ na lɛsia ulu biala lɛlɔ na lɛƒɔ bekyuli badi lite Blɔti. ²³ Ala amɛni ƒui na mɔɔbla na litemi buni lɛmmɔ ɔsu kalɛ na ami lɛnɔ lɛkɛ lɛlɔyɔ lɛni nkɛnku kabla kammɔ kemo. ²⁴ Bɛgyi nwaa ka bekyuli pii muusié usi kekelikɔ. Nsu ukyuli unwi pɛ mɔɔdi lɛlɔ taaƒɔ lɛyuƒɔla. Anwuɔsu bikeli usi ɔmmɔ kalɛ na bɛdi lɛlɔ na bɛkɛ lɛyuƒɔla. ²⁵ Ukyuli biala ɔni mɔɔklibi lɛlɔ ka úsela utékeli usi ni, uuboku lɛlɔ kalɔ na baatina-nwu kɔkwɛ kɔna ƒui kalɛ na ɔƒɔ lɛlɔ bɔdi kabwa kani neeetu uwi asa na keebie. Nsu abu ni, bɔɔsa lɛlɔ bute kabwa kani na kelebie kudii. ²⁶ Ɔmɛni ɔsu na muukeli siin kalɛ na ntékulo kabuli. Na nse aani ukyuli ɔni muukpó lɛvu ɔni na ulébeyi nwuna lɛvu na kayaa ukpludi. ²⁷ Lɛ́ya na lɛvu lɛma-mi kalɛ na mina ɔlɔna ɔkana na ɔƒɔ lɛbibo biala. Ɔsika si lɛ́kɔ litemi buni lɛmɛni lɛsa líte bekyuli bamba na búbasa bɔnii bɔɔkɔ́ku lɛlɔ ni, naaawia ka bada-mi bedie na lɛyuƒɔla lɛmmɔ kenye!

¹ Banwa, mɔɔwia ka binyimo lɛla lɛni nálɛku bula bati kuuku bani násiaku Mose. Uyɔlɔ ɔ́tɔnku-ma, na ɔ́gyumana-ma ƒui. Na bávi Ɛpugyie ntɛ. ² Katɔti úti uyɔlɔ ku Ɛpugyie ɔmmɔ ɔ́bla-ma ntu bɔkpila ɔdi aani bekyuli bani nsiaku Mose kama. ³ Bana ƒui bádi Kɔyu kemo adila enwi pɛ ammɔ. ⁴ Na báni Kɔyu kemo ntu bunwi pɛ bɔmmɔ. Báni ntu básiku Kɔyu kemo lɛtakpɛ lɛni nkɛ nsiaku-ma mmɔ kemo. Na lɛtakpɛ lɛmmɔ lɛdi Kristo ɔmmɔ ɔlati. ⁵ Uwi ɔmmɔ muedi kemo ni, lɛlɔ lítayɔ Katɔti na bana ketulodikɔ ɔbladu lɛlɔ. Anwuɔsu ni, békpi ketele kemo. ⁶ Ɔmɛni ɔdi ala ani na bɔnu bɔtɛya kalɛ na alaekpidi emini asɔ alátaada-bu ɔkwɛ aani bana kalɛ, ⁷ iye buti lɛlɔ bute lɛƒiɔkpa ala bɔbla aani bana kalɛ. Lɛni na Bunweni Kedee Ɔku ɔ́su ɔnini, “Bekyuli bammɔ bádu bebuo na báni ntɛ na badi adikpi limeyi, na bátɔ béte baƒiɔ.” ⁸ Útalɛka butaabla kɔsɔnɔ bɔdi ala aani kalɛ na bana badi bábla, na nkyuli mpimu aavlanyɔ ɛtɛ békpi limeyi linwi. ⁹ Na ɔɔɔdi ka bɔkɔku Blɔti bɔnu. Lɛni na bana badi bábla, na balakpi bádu-ma na békpi. ¹⁰ Na ɔɔɔdi ka butaata teenye Katɔti lɛlɔ aani kalɛ na bana badi bábla ɔsu, na Katɔti ɔtu ɔni nda kukpi ɔyikun ɔ́kyula-ma. ¹¹ Ala amɛni ƒui álɛku-ma kalɛ na abu bɔnu bɔtɛya. Na bénweni-nya bése kalɛ na buti-nya bɔlɛ lɛlɔ. Ɔsika bula uwi ɔni kemo na bɔkya mɛni ni, úudu kawɔlɔkɔ. ¹² Ɔdi biala ɔni mɔɔkali ɔnii unye kpakplaa ni, ɔnu kaduɛ kalɛ na ulebuli. ¹³ Lɛla biala lɛni nékpoku-ɔ lɛ́nu ni, nina udu lɛɛkana na liibo ukyuli biala lɛlɔ. Nsu ni, Katɔti ɔɔdi nwuna linyese lɛlɔ. Na ɔdubute-ɔ ɔyikun ɔni na eti enye lɛla lɛni mekpoku-ɔ manu kenye, na liletulo ƒula ɔyikun kalɛ na enye kpakplaa ete-nwu. Uwi ɔni kemo na lɛla lɛdi liikpóku-ɔ taanu ni, Katɔti ɔdubute-ɔ ɔyikun ɔni na eti enye ala ammɔ ƒui kenye, na ɔtina-a ulu ɔni lɛlɔ na asia na alɛ-nwu kemo. ¹⁴ Anwuɔsu ni, banwa, bɛda lɛlɔ bidie lɛƒiɔkpa biala kemo. ¹⁵ Mɔɔtɛmiku-mii aani bekyuli bani náda anu. Anwuɔsu bɛbu ala ani na mɔɔsu-mii mɛni kemo bɛnu. ¹⁶ Ɔɔƒɛɛ ɔni na buuti taagya Katɔti enu ni, unye ute Blɔti ubugya. Na bodobodo ɔni na bɔɔbwɛ si bɔɔdi Blɔti adila kedee ni, ɔɔtina ka abu ku Kristo bɔɔbla unwi. ¹⁷ Na ina ka bumomo ni, bɔdi ɔlɔna unwi pɛ. Ɔsika bodobodo unwi kani na bula ƒui bɔɔdi. ¹⁸ Bɛbu bɛnu Israelƒuɔ ka ni, bekyuli bani mɔɔdi adila ani na béti bákpa béte Katɔti ni, báblaku Katɔti unwi. Ɔsika anwu na bákpa ala ammɔ béte na nwuna lɛkpabi lɛlɔ. ¹⁹ Na ɔƒɛni ni, bɛɛkali bɛnii bɔɔsu na nda nnii baƒiɔ bani bávɔ béte lɛlɔ ni, ama lɛnɔ badi Katɔti ɔdi geen? Munuu adila ani na béti bákpa béte ala bamba amɛni adi lɛla geen lɛdi? ²⁰ Oowo! Lɛla lɛni na mɔɔsu-mii ni, ani ndi ka ala ani na béti bákpa na akpabi amɛni lɛlɔ ni, béti-nya bákpa béte ayu ekpidi, na ɔɔɔdi Katɔti. Na naaawia-mii nnii bɛbla unwi ku ayu ekpidi amɛni. ²¹ Ɔɔɔdia ka ani asiku Blɔti ɔɔƒɛɛ kemo na asɔ atáni asiku ayu ekpidi lɛnɔ ɔɔƒɛɛ kemo. Útalɛka adi adila na Blɔti kakpakɔ na asɔ atádi adila na ayu ekpidi kakpakɔ lɛnɔ. ²² Munuu bɛɛyɔ́ ka Blɔti uti nwuna kɔnyi ɔkya-bu? Bitaya bɔkali bɔnii bubo ɔyikun butulo-nwu. ²³ Bubo lɛsugba banii, “Kuƒi kɔtɛ na bɔbla lɛla biala.” Sɔsɔ na ɔdi. Nsu ɔɔɔdi lɛla biala ndia. Kuƒi kɔtɛ na bɔbla lɛla biala, nsu ɔɔɔdi lɛla biala mbo kɔsia lite-bu. ²⁴ Ɔƒɔtaadine ɔdi utawia anwu lɛti bɔdia, mmomu ɔwia lɛla lɛni madia mete nwuna ɔkpana lɛnɔ. ²⁵ Ebo kuƒi na eye lɛna lɛdi biala na beeyé na kuye na akun. Na ɔɔɔdi ka eye lɛla lɛdi enu na ati si lɛna lɛmmɔ lise kedee iye liiise. ²⁶ Ɔsika Bunweni Kedee Ɔku ɔɔsu ɔnii, “Kalɔ ku kana ala ani nkya-nya kemo ƒui ni, adi Blɔti adi.” ²⁷ Si ukyuli ɔni naaadi ɔƒɔtaadine ɔdi ɔ́lɔ-ɔ ɔnii baadi ku-nwu na átuna na ésie ni, lɛla biala na úte-ɔ ɔnii di ni, di na teye lɛla lɛdi enu ati si adila ammɔ ese kedee iye eeese. ²⁸ Mmomu si ukyuli ɔdi ɔ́su-ɔ ɔnii béti adila ammɔ bákpa béte baƒiɔ badi ni, tadi-nya. Ɔmɛni ɔdubɔya na kayi kelékpoku ukyuli ɔmmɔ. ²⁹ Ɔsika ɔɔɔdi awɔ ɔni nádi adila ammɔ na kayi kadubo bukpoku. Mmomu ukyuli ɔni nánu ɔ́su-ɔ na kayi kadubo bukpoku. Ukyuli ɔdi ɔdubɔkana na uye ɔnii, “Bi ɔsu na si mbo kuƒi na lɛbla lɛla lɛdi na ukyuli bamba kayi kani mekpoku-nwu ɔsu na ɔdi ka lɛda lɛla lɛmmɔ bɔbla lɛya? ³⁰ Si lɛ́gya Katɔti enu na lɛdila lɛni na úte-mi ɔsu ni, bi ɔsu na ukyuli ɔdi ɔnu ɔnii lɛ́ƒiɔ na ɔmɛni lɛlɔ ka lɛ́ɛgya Katɔti enu?” ³¹ Nsu nyimo ka lɛla biala na ɔdi aabla iye aadi iye aaní ni, ɔlɛka abla ana ƒui kalɛ na eti ɔbu ete Katɔti. ³² Bitabla lɛla lɛni maya na Yudaƒuɔ iye bani naaadi Yudaƒuɔ iye baƒɔtaadine belebo Katɔti kudɔ. ³³ Bɛbla kalɛ kani na mɔɔbla lɛla biala. Mɔɔsia anu kalɛ na naaata neeenye ɔdi lɛlɔ. Naaakali taanu mina lɛkɛ, mmomu lɛla lɛni madia mete ɔdi biala kalɛ na bakɛ bɔƒɔ.

¹ Bɛnu mina ɔbladu bɛtɛya aani kalɛ na ami lɛnɔ mɔɔnu Kristo ɔdi taatɛya. ² Muumwi-mii ɔsika bina anu asia-mi lɛlɔ uwi biala na biinyimo ala ani na lɛ́tina-mii na bɛɛbla taasiaku-nya lɛlɔ uwi biala. ³ Nsu mɔɔwia ka binu kalɔ nwaa ka ni, Kristo ɔdi ukyuli biala lili. Na ɔgya lɛnɔ ɔdi uleku lili. Na Katɔti ndi Kristo lili. ⁴ Anwuɔsu ɔnana ɔni mɔɔkpali katɔ iye ɔɔkɔ́ Katɔti litemi buni lɛsa na Katɔti kakpakɔ na úti lɛla lɛdi úbi lili ni, ɔɔkya Kristo kɔƒa. ⁵ Na uleku ɔni mɔɔkpali katɔ iye ɔɔkɔ́ Katɔti litemi buni lɛsa na kakpakɔ na útamana lɛdiku lili ni, ɔɔkya ɔgyani kɔƒa. Na kavumana kadi keeebo anwu ku uleku ɔni nékpeyi lili na ɔɔɔda lɛlɔ ntɛ. ⁶ Si uleku ɔmmɔ útamana lɛdiku lili ni, na ɔlɛka ɔkpɛ lili linwini. Na ka ɔdi lɛla lɛni muuwi uleku anumi kalɔ si úkpeyi lili iye ɔ́kpɛ lili ɔsu ni, ɔdi ka ɔmana lɛdiku lili. ⁷ Útalɛka ɔnana ubi lɛla lɛdi lili, ɔsika Katɔti údie ɔnana na nwuna udu kenye. Na uudie Katɔti ɔbu keyi. Nsu ulekudi anwu uudie ɔnana ɔbu keyi. ⁸ Ɔsika Katɔti útaka ɔnana budie bɔlɛku uleku kemo. Mmomu uleku na údie ɔ́lɛku ɔnana kemo. ⁹ Na ɔɔɔdi uleku ɔsu na Katɔti údie ɔnana. Mmomu ɔnana ɔsu na Katɔti údie uleku. ¹⁰ Na kayaa batu ɔsu ni, ɔlɛka uleku ɔmana lɛdiku lili uti ɔtina ka ɔkya ɔnana kalɔ. ¹¹ Na bula baƒɔtaadine ngba bulie kemo ni, uleku ulesie taaya ɔnana, na ɔnana lɛnɔ ulesie taaya uleku. ¹² Ɔsika kalɛ na bábla uleku bálɛku ɔnana kemo ni, lɛni kani na uleku lɛnɔ ɔ́wɔ ɔnana. Nsu lɛla biala ni, Katɔti kudɔ kani na lɛɛsí. ¹³ Amii alati bɛbu bɛnu si ɔ́manku uleku ka unye utaakpali katɔ ɔni na útamana lɛla lɛdi lili? ¹⁴ Kalɛ na Katɔti údie kayawi ala ni, ɔmmɔ lɛti ɔɔtina-bu lɛla lɛdi. Na útamanku ka ɔnana ɔda nwuna lili linwini use na liyi line gyɔlɔɔ. Ɔdi kɔƒa lɛla. ¹⁵ Nsu si uleku linwini ani líne-nwu lɛni ni, ɔdi-nwu ɔbu. Ɔsika Katɔti úte-nwu linwini gyɔlɔɔ lɛmmɔ aani lɛla lɛni nébi-nwu lili. ¹⁶ Nsu si ukyuli ɔdi ɔɔkya unyeƒi na ɔmɛni lɛlɔ ni, lɛla lɛni kani na ami masu-nwu ndi ka abu ku Katɔti baƒɔtaadine akpa ƒui bɔsɔ buuubo ulu ɔbambadi ɔdi na bula bɔsala bɔmmɔ kemo. ¹⁷ Nsu na ala ani ndubo bɔtina mɛni kemo ni, ɔɔɔdi bumwi na nda-mii. Ɔsika si uwi ɔni na bíbasala ni, ɔɔɔdi lɛbuni mɔɔlɛ́ taasiku bina bɔsa bɔmmɔ kemo. Mmomu ala muubie teebu. ¹⁸ Ɔsika kudeedi ni, línu ka si bɛ́sala aani baƒɔtaadine ni, biile lɛlɔ kemo akpa akpa. Na use-mi ka sɔsɔ na ɔdi. ¹⁹ Unyeƒi ɔdi uuubo ka ɔdi ka kavumana kadi kakya-mii akɔ uti ɔtina bani ndi baƒɔtaadine geen kalɛ na bekyuli banu-ma bati. ²⁰ Na si bɛ́sala aani lɛkpa ni, ɔɔɔdi Blɔti adila kedee na bíbo bibadi. ²¹ Ɔsika si bɛɛdi ni, bilénye taagya lɛlɔ asa na ɔdi biala uti nwuna adila ɔdi. Ɔmɛni ɔɔyá na kɔka kɔɔda badi na badi ama baaní ntɛ teekpi. ²² Bubo na biiibo kɔduli kɔni kemo na bilie bɛdi na bɛni? Munuu bɔyɔ na bɛɛyɔ́ ka biwi lɛkpa lɛmmɔ anumi kalɔ na bɛkya baƒɔtaadine bani mɔɔyaki ala kɔƒa. Bi na ɔlɛka lɛsu-mii? Bumwi na ɔlɛka limwi-mii na ɔmɛni ɔsu? Oowo! ²³ Ɔsika lɛla lɛni na lɛ́ƒɔ lɛ́siku Blɔti kudɔ ni, ani kani na lɛ́tina-mii. Na usien ɔmmɔ asa na badubɔkya-nwu kakya ni, úti bodobodo, ²⁴ na ka ɔ́gya Katɔti enu ni, ɔ́ƒɛ-nwu kemo na ɔ́su ɔnini, “Ɔmɛni ndi mina ɔlɔna ɔni na ndubuti lɛkpa lite Katɔti na bina lili. Bɛƒɔ bɛdi na biti biteenyimo-mi.” ²⁵ Lɛni kani na adila ammɔ kama ni, úti ɔɔƒɛɛ na ɔ́su ɔnini, “Ɔɔƒɛɛ ɔmɛni ndi Katɔti bunyimi bɔwɔdi bɔni na úti mina ubugya úse likpo. Na uwi biala na bɛdubɔni-nwu ni, bɛni na biti biteenyimo-mi.” ²⁶ Ɔmɛni ɔɔtina ka uwi biala na bɛɛdi iye bɛɛní na ɔɔƒɛɛ ɔmɛni kemo ni, biibó Blɔti kukpi kudu wetédu uwi ɔni na wasɔ webo. ²⁷ Anwuɔsu ukyuli biala madi Blɔti adila amɛni iye wani na ɔɔƒɛɛ ɔmɛni kemo na ulu ɔni nátamanku lɛlɔ ni, ɔdubɔtina ka ɔ́bla likpidi ka útabu Blɔti ɔlɔna ku ubugya ɔmmɔ ɔsu. ²⁸ Ɔmɛni ɔsu ni, ɔdi biala ɔka nwuna lɛlɔ kemo buduo asa na ɔdi bodobodo na ɔni na Blɔti ɔɔƒɛɛ ɔmmɔ kemo. ²⁹ Ɔsika si útanu lɛla lɛni na Blɔti ɔlɔna ɔmɛni ɔdanku útati uwi ɔni na ɔɔdi bodobodo ɔmmɔ iye ɔɔní na ɔɔƒɛɛ ɔmmɔ kemo ni, ɔɔdi na ɔɔní na uuti litemi bɔtɛ teewi lɛlɔ. ³⁰ Ɔmmɔ náya na bina akɔ pii biiƒi na lɛlɔ liiibo-mii ɔkplu. Na pii lɛnɔ békpi. ³¹ Na si bɔdubɔsia anu na bɔka lɛlɔ kemo buduo bɔnu ni, nka Katɔti ulatɛku-bu litemi. ³² Nsu Blɔti ɔɔtɛku abu litemi na ɔɔní-bu kɔtu kalɛ na Katɔti ulayila-bu udu ku bekyuli bani nátaƒɔ bátadi. ³³ Ɔmɛni ɔsu ni, banwa, si bɛ́sala bɛnii bɛɛdi Blɔti adila ni, binye bɛgya lɛlɔ. ³⁴ Na si kɔka mɔɔda ɔdi ni, ɔlɛka ɔdi na nwuna kaduli kalɛ na Katɔti ulatɛku-mii litemi si bɛ́sala aani lɛkpa linwi kalɛ. Na etemila akladi anya ni, si líbo mmɔ ni, bɔdubɔda-nya bɔnu.

¹ Na ɔƒɛni ni, na ala ani ndanku Katɔti Kɔyu etela lɛlɔ ni, banwa, mɔɔyɔ́ ka bɛti litemi geen lɛni nkya-nya kemo. ² Bɛgyi nwaa ka uwi ɔni na bɛɛɛgyi tɔ Katɔti ni, bɛ́ya na ala ani neeebo ngba átaadi-mii lɛlɔ na bitaakpa-nya na bɛ́yii ulu ɔmmɔ. ³ Na ɔdi ka bɛnu bɛti ka ukyuli biala na Katɔti Kɔyu mɔɔdi-nwu lɛlɔ ni, ulakana na wasu ɔnii, “Yesu ɔdubɔnuku-ni.” Lɛni kani na ukyuli ɔdi lɛnɔ ulakana na wasu ɔnii, “Yesu ndi Blɔti,” si ɔɔɔdi Katɔti Kɔyu mɔɔdi-nwu lɛlɔ. ⁴ Katɔti Kɔyu kuute etela pii, nsu Kɔyu kunwi kɔmmɔ kani na kɔdi. ⁵ Lilu pii lɛkya na bɔɔbla kabla teete Katɔti, nsu Katɔti unwi ɔmmɔ kani na ɔdi. ⁶ Na kabla lidu lidu lɛnɔ lɛkya, nsu Katɔti unwi ɔmmɔ kani mɔɔtina ɔdi biala nwuna kabla. ⁷ Litela lɛni na ɔdi biala ubo ni, Katɔti Kɔyu néte-nwu litela lɛmmɔ kalɛ na bekyuli ƒui bakɛ-nwu lɛlɔ kɔsia. ⁸ Ɔdi anwu ni, Katɔti Kɔyu kúte-nwu litela lɛni náya na ɔti butemi ku lɛnunda ɔkɛnku Kɔyu kɔmmɔ lɛlɔ. Na ɔdi lɛnɔ ni, Kɔyu kɔmmɔ kúte-nwu litela lɛni náya na ɔti butemi ku lɛlati ɔkɛnku Kɔyu kɔmmɔ kani lɛlɔ. ⁹ Na ɔbambadi ubo bɔƒɔtaadi ɔkɛnku Kɔyu kɔmmɔ kani lɛlɔ. Na ɔdi ni, ubo litela lɛni na uti ɔbwi ɔlɛ ɔkɛnku Kɔyu kɔmmɔ kani lɛlɔ. ¹⁰ Ukyuli bamba ni, ɔɔkana na ɔɔbla akɔla budie taatina. Na ɔdi ni, kalɛ na ɔsu Katɔti litemi. Na ɔbambadi ni, ayu lidu bɔnu taati. Na ɔdi ni, adi lidu bɔtɛmi. Na ɔbambadi ni, adi lidu kalɔ budie. ¹¹ Ala amɛni ƒui ni, adi Katɔti Kɔyu kunwi kɔmmɔ ablala. Na kuule ala ammɔ teete ɔdi biala kalɛ kani na kɔɔyɔ́. ¹² Kristo use aani ukyuli ugyii ɔni mbo lɛlɔ ekpo pii. Ɔlɔna unwi kani na ɔdi ina ka lɛlɔ ekpo pii násala. ¹³ Lɛni kani na use na abu bani ndi Yudaƒuɔ ku kadi bamba bekyuli akɔ ku bani mɔɔbla bekyuli bamba kabla ku bani mɔɔbla ama alati kabla lɛnɔ akɔ. Kɔyu kunwi kɔmmɔ kani na béti bábla-bu ntu bɔkpila ɔdi ɔmmɔ na bɔdi ɔlɔna unwi. Na Kɔyu kunwi kɔmmɔ na béte bula ƒui na bɔ́ni. ¹⁴ Ɔsika ɔlɔna ɔmmɔ ɔlati ni, ɔɔɔdi lɛlakpa linwi kani na lɛdi. Mmomu lɛlɔ ekpo pii násala ɔ́bla-nwu unwi. ¹⁵ Si ɔgba ɔ́su ɔnii, “Ka ami lɛɛɛdi kɔnu ɔsu ni, ami lɛɛɛkɛ ɔlɔna ɔmmɔ kemo” ni, ɔmmɔ ulátina ka sɔsɔ na anwu ɔɔɔdi ɔlɔna ɔmmɔ kakɛ kadi. ¹⁶ Na si kɔtu lɛnɔ kɔnii, “Ka ami lɛɛdi lɛnumi ɔsu ni, ami lɛɛɛkɛ ɔlɔna ɔmmɔ kemo” ni, ɔmmɔ ulátina ka sɔsɔ na ɔɔɔdi ɔlɔna ɔmmɔ kakɛ kadi. ¹⁷ Na si ɔlɔna ɔmmɔ ƒui ɔdi lɛnumi kani ni, dɛ na wabla asa na wenu lɛla lɛdi? Na si kɔtu lɛti lɛnɔ na ɔdi ni, dɛ na wabla asa na wenu ɔnyi? ¹⁸ Nsu si bɔ́sia anumi ni, bɔdubɔnu ka Katɔti úti lɛlɔ ekpo bun bun ɔ́bla ɔlɔna umodi ɔmmɔ kalɛ na anwu ɔlati ɔɔyɔ́ ka use. ¹⁹ Lɛlɔ ugyii ɔdi uuubo si ɔna ƒui ɔdi likpo linwi! ²⁰ Nsu kalɛ na bɔɔnu-nwu ni, ɔdi ekpo pii. Nsu ɔdi lɛlɔ ugyii unwi. ²¹ Ɔmmɔ ɔsu na lɛnumi lilakana kɔnu bɔsu ɔnii, “Naaawia-a na mina lɛla lɛdi kemo.” Na lɛni kani na lili lɛnɔ lilakana lɛgba bɔsu lɛnii, “Naaawia-a na mina lɛla lɛdi kemo.” ²² Lɛlɔ ekpo ani nse kpɛtɛ kpɛtɛ ntulo ni, anya mmomu na si eeebo-bu lɛlɔ na bulakana lɛla lɛdi bɔbla. ²³ Na ekpo ani na bulábu ni, anya na bɔɔtí bɔda kaduɛ mmomu. Na ekpo ani naaadia ka budie keyi ni, anya na bɔɔda buɛɛ. ²⁴ Na bulábla ɔmmɔ udu teete ekpo ani na bekyuli baanu uwi biala. Nsu Katɔti násala lɛlɔ ekpo lɛni na ɔ́ya na buuti ɔbu teete ekpo ani mmomu na bɔɔnu ka átaƒɔ kuye. ²⁵ Ɔmɛni ɔsu bule bɔdi buuubo lɛlɔ ekpo ntɛ. Mmomu ekpo ana ƒui adanku kɔsia ete lɛlɔ. ²⁶ Na si lɛlɔ kakɛ kadi kakya lɛbibo kemo ni, ɔlɔna ugyii ɔmmɔ ƒui uunú ɔlɛ na lɛlɔ ekpo akladi lɛnɔ eebó abi. Na si beemwi kakɛ kadi ni, lɛlɔ ekpo ana ƒui aakɛ́ ebiti ammɔ. ²⁷ Anwuɔsu bina ƒui násala bɛ́bla Kristo ɔlɔna ugyii ɔmmɔ na bɛdi-nwu lɛlɔ ekpo unwi unwi. ²⁸ Na baƒɔtaadine lɛkpa kemo ni, Katɔti úti bula ƒui úse ekpo ani námanku-bu. Udeedi ni, batalane. Na unyɔdi ni, kenye bediene. Na ɔtɛdi ni, ala batinane, asa na bani mɔɔbla akɔla budie taatina. Na bani mbo ɔyikun ɔni na babwi lɛlɛ iye bebunku bekyuli iye banu kabla lɛlɔ iye batɛmi adi lidu lidu lɛnɔ basia-ma kama. ²⁹ Ɔɔɔdi bekyuli ƒui ndi batalane iye kenye bediene iye ala batinane. Na ɔɔɔdi ɔdi biala mbo ɔyikun ɔni na uti ɔbla akɔla budie taatina. ³⁰ Na ɔɔɔdi ɔdi biala mbo ɔyikun ɔni na uti ɔbwi lɛlɛ iye ɔtɛmi adi lidu iye udie ala ani básu kalɔ. ³¹ Ɔmɛni ɔsu ni, biti bina kayi bɛsia etela ani náƒɔ kuye etulo lɛlɔ. Ala ani náƒɔ kuye etulo ƒui ndi ani na ndubo-mii bɔtina mɛni.

¹ Si lɛ́kana na mɔɔtɛmi adi lidu lidu ani na bekyuli ku Katɔti batu ƒui bebo na naaayɔ bekyuli ni, mina kenye kani mɔɔsu ƒui kadi lɛsɛ likpludi aani kalɛ na lebomo iye kabontobi kaaku. ² Na si muudie Katɔti kenye na muunú abɛla ku lɛlati ƒui kalɔ, na mbo bɔƒɔtaadi bɔni na lɛkana na lɛ́gyu abi muedi na ana kenyekɔ nsu naaayɔ bekyuli ni, lɛɛɛdi lɛla lɛdi. ³ Na si ina líti mina ala ani nse-mi ƒui líte bawabane na lɛ́ya na bekyuli muedi bakyula-mi nsu naaayɔ bekyuli ni, lɛɛɛdi lɛla lɛdi. ⁴ Bɔyɔ bɔɔkɛ́ kayi na bɔɔbla kaƒɔ buni. Buuubo lɛnungyie na bulákun lɛmɛnɛ iye bɔtalaku lɛlɔ katɔ. ⁵ Bɔyɔ bulábla atu ɔkplu na bulánwanɛ ala teete lɛlɔ iye buléti kɔnyi. Na bɔyɔ buléti likpidi taakya kasusu kemo. ⁶ Na lɛlɔ lilayɔ-nwu na likpidi lɛlɔ. Mmomu ɔɔkɛ́ lɛlɔyɔ na lɛbuni lɛlɔ. ⁷ Enu aláƒɛ bɔyɔ na nwuna bɔƒɔtaadi ku lɛnunsia ku nwuna bunye kpakplaa buláyuɛ. ⁸ Bɔyɔ buuubo kawɔkɔ. Katɔti ala kenye budie bɔkya, nsu bɔdubo bɔwɔ ulu. Adi lidu lidu bɔtɛmi lɛnɔ bɔkya, nsu anwu lɛnɔ ɔdubo ulu bɔwɔ. Lɛlati lɛkya bɔdi, nsu nwuna uwi ɔdubo bɔvi. ⁹ Ɔsika lɛlati ku kenye budie litela lɛni na Katɔti úte-bu ni, útedu útawɔlɔ. ¹⁰ Nsu si lɛla lɛni nédu lɛ́wɔlɔ lɛ́da lɛ́lɛ ni, lɛni nétedu mmɔ lɛyii taakya. ¹¹ Uwi ɔni na ndi ɔnamu ni, kalɛ na mɔɔtɛmi ku kalɛ muunú ala kɔku na mina ɔlɔna kemo ku kalɛ na mɔɔbla kasusu ni, adi anamula bɔbla. Ɔƒɛni ka línwini ɔnana ni, anamula ammɔ asɔ eeebo-mi kɔsia kɔdi. ¹² Ala ani na bɔɔnu ɔƒɛni ni, ese aani kalɛ na baanu lɛla lɛdi ƒlu ƒlu na kanu kemo. Na kama asa na bɔdubɔnu-ni nwaa anumi ku anumi. Na lɛla lɛni na ngyi ɔƒɛni ni, lítedu lítawɔlɔ. Nsu kama ni, lɛdubo libedu lɛwɔlɔ na ɔbla nwaa aani kalɛ kani na Katɔti ɔgyi-mi ƒui. ¹³ Geen ni, alakpa atɛ amɛni kani ndubɔkya. Na anya ndi bɔƒɔtaadi ku lɛnunsia ku bɔyɔ. Nsu nwuna unengudi ƒui ndi bɔyɔ.

¹ Anwuɔsu ni, bɔyɔ na ɔdi ka bina ƒui bɛwia kpakplaa na bɛkɛ. Na biti bina anu ƒui bɛsia Kɔyu kemo etela lɛlɔ. Na litela lɛni ntulo ƒui ndi ka bidie Katɔti litemi kenye. ² Ukyuli ɔni muutemi adi lidu ni, ulátɛmiku bekyuli, mmomu Katɔti na ɔɔtɛmiku. Ɔsika ukyuli ɔdi ulenu-ni kalɔ, na bɔsu na ɔɔsu ala abɛdi ɔkɛnku Katɔti Kɔyu ɔyikun lɛlɔ. ³ Nsu ukyuli ɔni muudie Katɔti litemi kenye teete bekyuli ni, uubunku-ma na ɔɔkya-ma ogya na ɔɔsia-ma kɔnu. ⁴ Ukyuli ɔni mɔɔtɛmi adi ani kalɔ na bekyuli belenu ni, anwu lɛti pɛ lɛlɔ kani na uubunku. Nsu ukyuli ɔni muudie Katɔti litemi kenye ni, uubunku baƒɔtaadine lɛkpa lɛmmɔ ƒui. ⁵ Mɔɔyɔ́ si bina ƒui bɛɛkana na bɛɛtɛmi adi lidu. Nsu si bɛ́kana na biidie Katɔti litemi kenye teete bekyuli ni, ɔdia-mi utulo. Ɔsika ukyuli ɔni muudie Katɔti litemi kenye teete bekyuli ni, ubo kɔsia utulo ukyuli ɔni mɔɔtɛmi adi lidu lidu, amu ntu ukyuli ɔni makana nwuna ala ani na ɔɔsu kalɔ budie ɔkya-ma akɔ mmɔ, kalɛ na baƒɔtaadine lɛkpa lɛmmɔ lɛkɛ kebunku. ⁶ Ɔmɛni ɔsu, banwa, si líbo-mii kudɔ na mɔɔtɛmi adi lidu lɛni na ɔdi ulenu kalɔ ni, bi kɔsia na bɛdubɔkɛ na ɔmmɔ kemo? Bilákɛ kɔsia kɔdi munu munu, amu ntu lídie lɛla lɛdi kalɔ líte-mii ɔ́si Katɔti kudɔ, iye lɛ́ya na bɛ́ti lɛla lɛdi, iye lídie Katɔti litemi lɛdi kenye, iye lɛ́tina-mii ala adi. ⁷ Bɛkali bɛnu ala ani na bɔɔgyá ani na ngba bɔdi buuubo-nya kemo aani kakpɛɛ iye ɔsankuo ani na anya alati alakana lɛnu budie. Dɛ na ukyuli ɔdi ɔdubunu na ɔgyi ɔnu ɔni na beedie si ukyuli ɔni mɔɔvwii kakpɛɛ iye ɔɔgyá ɔsankuo ɔmmɔ ulagya-nwu kaduɛ kalɛ na akana na enu ɔnu ɔmmɔ lɛdi ati nwaa? ⁸ Na si ukyuli ɔni mɔɔvwii kakpɛɛ ulávwii-ka taalɔ ala ammɔ kaduɛ ni, dɛ na wabla asa na bekyuli baklibi lɛlɔ bete kekpo? ⁹ Lɛni kani na use ka ukyuli ɔni muudie lɛla lɛdi kenye na adi lidu lidu kemo ni, bekyuli belénu lɛla lɛni na ɔɔsu mmɔ kalɔ. Mmomu ɔdubo bunwini ɔƒɛƒɛɛ na ɔyii ɔkya kayaa. ¹⁰ Adi pii akya kayawi, na lɛdi lɛdi liiibo lɛni neeebo kalɔ budie. ¹¹ Nsu si ɔdi ulénu lɛdi lɛni na mɔɔtɛmi kalɔ ni, na línwini ɔƒɔ na nwuna kudɔ, na anwu lɛnɔ únwini ɔƒɔ na mina kudɔ. ¹² Ka bina ƒui anumi égyie ka bɛkɛ Kɔyu kemo etela ni, bɛya na anumi egyie-mii na bɛkɛ etela ani mebunku baƒɔtaadine lɛkpa lɛmmɔ lɛtɔtɔ busie mmomu utulo. ¹³ Na ukyuli ɔni mɔɔtɛmi na adi lidu lidu kemo ni, uvele Katɔti na ute-nwu litela lɛni na uti udie ala ani na ɔɔsu mmɔ kalɔ. ¹⁴ Ɔsika si lɛ́sia ulu ɔmɛni lɛlɔ lɛ́kpali katɔ ni, mina kɔyu aku kɔɔkpali katɔ bɔdi, nsu ɔɔɔdi ku mina kasusu. ¹⁵ Anwuɔsu bi na ɔdi ka lɛbla? Ndubɔkpali katɔ ku mina kɔyu bɔdi, nsu ndubɔkpali katɔ ku mina kasusu lɛnɔ. Na ndubudie lɛnu ku mina kɔyu, nsu ndubudie lɛnu ku mina kasusu lɛnɔ. ¹⁶ Na si enye aagyá Katɔti enu na ƒula kɔyu kemo kani ni, dɛ na wabla asa na ukyuli ɔni nkya-a kudɔ unu lɛla lɛni na aasu asa na wasu ɔnii ƒula katɔ bɔkpali bɔsia lɛni aani kalɛ na aagyá Katɔti enu ka ulenu lɛla lɛni geen na aasu mmɔ kalɔ? ¹⁷ Na si ina ƒula enu ani na aagyá Katɔti adia muedi ni, bekyuli bamba balákɛ kɔsia kɔdi munu munu. ¹⁸ Mɔɔgyá Katɔti enu ka mɔɔtɛmiku-nwu na adi lidu lidu kemo teetulo bina akɔ ɔdi biala. ¹⁹ Nsu na bula kasalakɔ ni, ndubɔyɔ ka lɛsu etemila alɔ ani kalɔ na bekyuli badubunu na liti lɛtina bekyuli bamba ala litulo ka ntaasu etemila pii na adi lidu lidu kemo. ²⁰ Banwa, bitabla lɛlɔ aani banamu na bina kasusu kemo. Mmomu bɛbla lɛlɔ aani benengu si biiti kasusu. Nsu na likpidi lilu lɛlɔ ni, bɛbla lɛlɔ aani banamu. ²¹ Na Bunweni Kedee Ɔku kemo ni, Blɔti ɔ́su ɔnini, “Ndubɔtɛmiku mina kadi bekyuli ɔkɛnku bekyuli bani mɔɔtɛmi na adi lidu lidu kemo. Na ndubɔtɛmi lɛsiaku baƒɔ kenye kemo, nsu belénu-mi lɛdi.” ²² Anwuɔsu ni, adi lidu bɔtɛmi ɔdi lɛla lɛni nse nte bani nátaƒɔ bátadi. Nsu Katɔti litemi kenye budie ni, ɔdi lɛla lɛni nse nte baƒɔtaadine na ɔɔɔdi bani nátaƒɔ bátadi. ²³ Ɔmɛni ɔsu si baƒɔtaadine bammɔ ƒui bása na ɔdi biala úse kalɔ ɔɔtɛmi na adi lidu lidu kemo na banii ukyuli bamba ɔdi ɔkya-mii akɔ iye bekyuli bani naaadi baƒɔtaadine badi bébo-mii akɔ ni, bilánu ka badubɔsu banii biikpi libuo yoo? ²⁴ Nsu si bina akɔ ɔdi biala uudie Katɔti litemi kenye na ukyuli keeke iye ukyuli ɔni nátaƒɔ útadi ɔdi úbo-mii akɔ ni, ɔdubɔnu nwuna likpidi ɔti ɔkɛnku lɛla lɛni na uunú ɔsu. Ala ani na uunú adubɔtina-nwu ka Katɔti ɔɔtɛku-nwu litemi. ²⁵ Na anwu ɔlati ndubudie nwuna ala abɛdi keyi na ɔdubɔyu ɔtɛ kalɔ na umwi Katɔti na udie kenye ɔnini, “Sɔsɔ ni, Katɔti ɔkya-mii akɔ!” ²⁶ Banwa, mɔɔwia ka liti lɛla lɛdi libunku ɔmɛni na bina bɔsa kemo. Si uwi ɔni na bɛ́sa bɛnii bɛɛkpali katɔ ni, ɔdi ubo ɔnu ɔni na ɔɔyɔ́ ka udie, na ɔdi lɛnɔ ubo lɛla lɛdi na ɔɔyɔ́-ka ɔtina. Na ɔdi lɛnɔ ɔɔyɔ́ ka udie Katɔti lɛla lɛdi ɔtina. Na ɔdi lɛnɔ ɔdanku kenye kadi na adi lidu lidu kemo, na ɔdi lɛnɔ kalɛ na udie ala ammɔ kalɔ. Nsu ɔlɛka bɛbla ala amɛni ƒui kalɛ na ute baƒɔtaadine lɛkpa lɛmmɔ kebunku. ²⁷ Si ɔdi ubo kenye kadi na ɔɔyɔ́ ka ɔsu na adi lidu lidu kemo ni, nkyuli aani inyɔ iye ɛtɛ si bémomo bágya basu bana kenye kani badanku atɔ asia. Na bakɛ ukyuli bamba ɔni lɛnɔ medie ala ani básu mmɔ kalɔ. ²⁸ Na si ɔdi uuubo na wedie ala ammɔ kalɔ bɔdi ni, ukyuli ɔni mɔɔtɛmi na adi lidu lidu kemo mmɔ ɔda ɔya na anwu ku Katɔti kani batɛmiku lɛlɔ. ²⁹ Nkyuli inyɔ iye ɛtɛ bani ndanku kenye kadi ɔ́si Katɔti kudɔ basu bana kenye na bakladi bawia etemila ammɔ kemo banu kaduɛ. ³⁰ Na si bani nlie kasalakɔ mmɔ ɔdi ɔ́ƒɔ linyesia lɛdi ɔ́siku Katɔti kudɔ ni, ɔdi ka ukyuli ɔni mɔɔtɛmi na adi lidu lidu kemo mmɔ ɔda nwuna kenye bɔsu ɔya na ute ukyuli ɔmmɔ kuƒi. ³¹ Bina ƒui bɛkana na bɛsu bina kenye kani bɛda unwi unwi kalɛ na ɔdi biala ɔtɛya lɛla lɛdi na ɔkɛ ɔyikun bɔkya. ³² Bekyuli bani muudie Katɔti kenye baakana bana lɛlɔ bɔda na kenye kani na baasu kemo. ³³ Ɔsika Katɔti ɔɔwia ka bɔbla ala ulu lɛlɔ. Na ɔɔyɔ́ ka amanku keyi buɛɛ. Na lɛni na ɔlɛka use na Katɔti baƒɔtaadine akpa ƒui akɔ. ³⁴ Ɔdi ka beleku baba lɛsɛ na ɔɔɔdi ka beteetemi na kasalakɔ. Mmomu ɔdi ka beboku lɛlɔ kalɔ aani kalɛ na Katɔti ɔda bubo bɔɔtina. Na beeebo kuƒi ka batɛmi. ³⁵ Na si baawia ka beye lɛla lɛdi kalɔ benu ni, bana bagya na ɔlɛka beye na kaduli. Ɔsika ɔdi kɔƒa ka uleku unye utaatɛmi na baƒɔtaadine lɛkpa lɛmmɔ anumi. ³⁶ Munuu ni, bɔsu bɛda bɛnii bina kudɔ na Katɔti litemi lɛmmɔ lɛ́kwɛ lɛ́si? Munuu bina kudɔ kani na litemi lɛmmɔ líbedu? ³⁷ Si bina akɔ ɔdi ɔɔkali ɔnii Katɔti kenye udiene na ɔdi iye ubo Kɔyu kemo litela lɛdi ni, ɔdi ka ɔnu ɔti ka lɛla lɛni na muunweni-mii lɛdi ɔda ɔni na Katɔti úbo. ³⁸ Na si ukyuli ɔmmɔ uuní litemi lɛmɛni ni, ɔdi ka amii lɛnɔ bini-nwu. ³⁹ Anwuɔsu ni, banwa, biti bina anu ƒui bɛsia Katɔti litemi kenye budie lɛlɔ. Nsu bitetile adi lidu bɔtɛmi ulu. ⁴⁰ Na ɔdi ka bɛbla lɛla biala na ulu ɔbuni lɛlɔ.

¹ Banwa, ɔƒɛni ni, mɔɔyɔ́ ka binyimo litemi buni lɛni lɛsa na lɛ́kɔ líte-mii. Litemi lɛmɛni na bɛ́ƒɔ bɛ́di na binye bɔƒɔtaadi bɔmmɔ lɛlɔ kpakplaa. ² Na ani ndi litemi buni lɛmmɔ na nina lɛsa na lɛ́kɔ líte-mii. Litemi lɛmmɔ ndubɔƒɔ-mii ngba si bɛ́da-ni kpakplaa amu ntu ukpludi na bɛnii bɛ́ƒɔ-ni bɛ́di. ³ Lɛla lɛni na lɛ́ƒɔ lɛ́siku Blɔti kudɔ ni, ani kani na líti muute-mii. Na ani ndi lɛla lɛni náƒɔ kuye lítulo ƒui, ka Kristo úkpi úte-bu na bula alaekpidi ɔsu aani kalɛ na bénweni bákya Bunweni Kedee Ɔku kemo. ⁴ Na báva-nwu, na Katɔti ɔ́gyila-nwu ɔ́lɛku bekpine akɔ emeyi atɛ kama, na úbo uli ngba aani kalɛ na ɔkya Bunweni Kedee Ɔku kemo. ⁵ Na údie lɛlɔ ɔ́tina Petro ku batalane leevu-inyɔ bammɔ. ⁶ Ɔmmɔ kama ni, údie lɛlɔ ɔ́tina nwuna basiakune bani ntulo nkyuli eti leevu na mmɔ. Na bana akɔ badi bamua belie ngba ɔmwi, ina ka badi béekpi. ⁷ Na ɔmmɔ kama údie lɛlɔ ɔ́tina Yakobo ku batalane bammɔ ƒui. ⁸ Na kekplokɔ ni, údie lɛlɔ ɔ́tina ami lɛnɔ ina ka lɛlɛ ukyuli ɔni na nwuna bɔwɔ bɔ́bla kekuma. ⁹ Ɔsika ami ndi batalane bammɔ akɔ ubliidi ƒui. Na ńtamanku ka balɔ-mi banii ɔtalane muedi, ɔsika ami líkpoku Katɔti baƒɔtaadine lɛkpa lɛmmɔ. ¹⁰ Nsu ɔkɛnku Katɔti lɛƒɔndia ɔsu ni, ndi ukyuli ɔni ndi ɔƒɛni. Na nwuna kaƒɔbuni ala ani na úte-mi ni, ánwu ebi. Na lɛ́bla kabla kpakplaa lítulo batalane bakladi ɔni na bekyuli baaasia anu ina ka ɔɔɔdi ami ɔlati ɔyikun kemo na ɔdi. Mmomu Katɔti ɔyikun nkɛ-mi lɛlɔ na lɛ́bla ɔmɛni. ¹¹ Anwuɔsu si ami násu-mii lɛla lɛdi o-o, iye ama násu-mii o-o ni, lɛlakpa linwi lɛmɛni kani na bɔɔsu. Na ani na bɛ́ƒɔ bɛ́di. ¹² Ɔƒɛni ka kenye kani na bɔɔsu ndi ka Katɔti ɔ́gyila Kristo ɔ́lɛku bekpine akɔ ni, bi ɔsu na bina badi bɛɛsu bɛnii Katɔti ulágyila bekpine na basɔ bebelie ngba? ¹³ Si sɔsɔ na use lɛni ni, na ɔɔtina ka Katɔti útagyila Kristo útalɛku bekpine akɔ. ¹⁴ Na si Katɔti útagyila Kristo útalɛku bekpine akɔ bɔdi ni, na lɛsa lɛdi liiibo na bɔɔkɔ́ bute-mii. Na lɛla lɛdi lɛnɔ liiibo na bɛƒɔ bɛdi. ¹⁵ Na ɔni nsɔ mbo ɔkplu ntulo ndi ka ɔɔtina ka bɔɔnyi ɔkɔ taasia Katɔti ka anwu nágyila Yesu ɔ́lɛku bekpine akɔ. Nsu si sɔsɔ na ɔdi ka bekpine baláta teelie ngba ni, na útagyila Yesu. ¹⁶ Anwuɔsu si sɔsɔ na ɔdi ka ulágyila bekpine taasiku kekpine ni, na bɛgyi bɛnii útagyila Yesu útalɛku bekpine akɔ. ¹⁷ Na si Katɔti útagyila Yesu útalɛku bekpine akɔ bɔdi ni, na bina bɔƒɔtaadi buuubo kɔsia kɔdi, na bɛmua bɛkya bina ekpidi kemo. ¹⁸ Na nwuna kalɔ ndi ka Kristo baƒɔtaadine bani nékpi lɛnɔ báyii. ¹⁹ Na si kayawi kamɛni ngba bulie kani ɔsu na bula anu aasia Kristo lɛlɔ ni, na bula lɛlɔ libo kɔnyana litulo bekyuli ƒui. ²⁰ Nsu litemi geen lɛmmɔ ndi ka Katɔti ɔ́gyila Kristo ɔ́lɛku bekpine akɔ. Na ɔmɛni ndi bula kama kekpokɔ ka bani ƒui ntɛ kekpine badubɔsɔ bɔta. ²¹ Ɔsika kalɛ na kukpi kɔkɛnku ukyuli lɛlɔ na kúduo bekyuli akɔ ni, lɛni kani na bekpine badubo bɔsɔ bɔta ɔkɛnku ukyuli kani lɛlɔ. ²² Kalɛ na bekyuli bani nálɛ bási Adam kemo ƒui békpi ka báblaku-nwu unwi ɔsu ni, lɛni kani na Katɔti ɔdubɔsɔ ɔgyila bekyuli ƒui ɔlɛku kekpine na belie ngba ɔkɛnku bana unwi bɔbla ku Kristo ɔsu. ²³ Nsu Katɔti ɔdubɔgyila ɔdi biala na ulu ɔni na Katɔti ɔlati úse úse lɛlɔ. Na Kristo ndi udeedi. Na uwi ɔni lɛlɔ na wasɔ webo ni, bani na béti lɛlɔ béte Kristo ɔmmɔ na ɔdubɔsɔ ɔgyila. ²⁴ Ɔmmɔ kama ni, kawɔlɔkɔ kammɔ kadububo. Na Kristo ɔdubɔyila bayikune ku kenyekɔ ku ɔyikun ƒui udu. Na Kristo ɔdubuti lɛga kadikɔ kammɔ ɔkya Katɔti ɔni ndi Ɔti enu kemo. ²⁵ Ɔsika Kristo ɔdubo lɛlɔ butaadi wetédu ka Katɔti úti nwuna bekisine ƒui ɔ́kya Yesu lɛgba kalɔ. ²⁶ Na ukisine ukplodi ɔni udu na ɔdubɔyila ndi kukpi. ²⁷ Ɔsika Bunweni Kedee Ɔku ɔ́su ɔnini, “Katɔti úti ala ƒui ɔ́kya-nwu lɛgba kalɔ.” Na use nwaa ka si básu banii ala ƒui ni, ɔmmɔ ulátina ka Katɔti ɔni néti ala ammɔ ɔ́kya Kristo lɛgba kalɔ lɛnɔ ubunku. ²⁸ Na si uwi ɔni na Katɔti úti ala ƒui ɔ́kya Kristo kalɔ ɔ́wɔlɔ ni, anwu Kristo ɔni ndi Katɔti Ubidi ɔmmɔ ɔdubuti lɛlɔ ɔkya Katɔti ɔmmɔ kalɔ na Katɔti ɔmmɔ ɔdi ala ƒui lɛlɔ kede kede. ²⁹ Ɔƒɛni ni, na bekyuli bani mɔɔƒɔ́ ntu bɔkpila ɔdi na bekyuli bani néekpi lili ni, bi na ɔbladu ɔmmɔ ɔdanku? Na bi mɔɔlɛ́ taasiku ɔmmɔ kemo. Si sɔsɔ na ɔdi kalɛ na badi baasu banii basɔ balata balálɛ kekpine na bebelie ngba ni, bi ɔsu na baakpila bekyuli bammɔ ntu na bani néekpi lili? ³⁰ Na abu batalane nɔɔ? Bi ɔsu na bula ngba bɔkya ɔgbankpi kemo uwi biala? ³¹ Banwa, kukpi ɔgbankpi ɔsiaku-mi kadi biala megye! Na mɔɔkɔliku lɛlɔ katɔ na amii ɔsu ɔkɛnku kalɛ na bɔ́bla unwi ku Kristo ɔsu. Anwuɔsu na muudie ɔmɛni keyi nwaa. ³² Nsu si kayawi kamɛni kasusu kani ɔsu na líkpoku bekyuli bani nse aani beƒiebuo na Eƒeso ni, bi kɔsia na lɛ́kɛ? Na si bekyuli basɔ balata balálɛ kekpine na bebelie ngba bɔdi ni, na bɛgyi bɛnii ɔlɛka bɔbla aani kalɛ na lɛsugba lɛdi lɛɛsu lɛnii, “Bɛya bɔdi na bɔni, ɔsika kɔnaadi bɔdubo bukpi.” ³³ Bitabla susuusu. Kɔkpana kukpidi kuubile udu buni. ³⁴ Bɛsɔku kasusu buni bɛbla, na bɛda bina ekpidi lilu bɛva. Mɔɔsu-mii nwaa kalɛ na kɔƒa kukpo-mii ka bina badi bɛɛɛgyi Katɔti. ³⁵ Ukyuli ɔdi ɔdubuye ɔnii, “Dɛ na baasɔ taagyila bekpine na baasɔ teebelie ngba? Na ɔlɔna ɔmani udu ndubo-ma bɔkya?” ³⁶ Bekyuli susuusu! Si bɛ́va edula kebi bɛ́kya kalɔ ni, lilakwɛ teenwini lɛla lɛni mbo ngba si útebu. ³⁷ Na lɛla lɛni na bɛɛvá ni, edula kebi kani na kadi ɔƒaalɛ lɛntabi na lɛdi iye edula kebi kabambadi kadi. Na ɔɔɔdi kebi kammɔ kugyii na bɛɛkya kalɔ asa na ɔɔlɛ́ lili kama. ³⁸ Katɔti muute kebi kammɔ ugyii udu ɔni na ɔɔyɔ́. Uute kebi biala ku kana kugyii udu ɔni námanku-ka. ³⁹ Na ala ani ƒui nli ngba ni, ɔlɔna ɔɔɔdi ɔlɔna udu unwi. Bekyuli bebo bana ɔlɔna bun. Na bebuo lɛnɔ bebo bana ɔlɔna bun. Baasɛ lɛnɔ bebo bana ɔlɔna, na kɔbɛ lɛnɔ kubo kuna ɔlɔna bun. ⁴⁰ Katɔ ala akya. Na kayawi kamɛni lɛlɔ ala lɛnɔ akya. Katɔ ala bɔdia bɔvumana ku kalɔ lɛlɔ ɔlɔna bɔdia. ⁴¹ Ɔƒɛ ɔdanku nwuna bukeye, na kɔbuli lɛnɔ kɔdanku bukeye bɔbambadi. Na ayabi lɛnɔ ana bukeye buse bun. Na ayabi ammɔ akɔ muedi kavumana kakya ana bukeye kemo. ⁴² Lɛni kani na ɔdubo buse uwi ɔni na Katɔti ɔdubɔgyila bekpine na basɔ bebelie ngba. Si báva ukyuli ɔlɔna ni, ɔdi lɛla lɛni muubie taayii udu. Na si bágyila-nwu ni, ɔsɔ ulekpi. ⁴³ Si uwi ɔni na báva-nwu ni, údubie na use kpɛtɛ kpɛtɛ. Na si uwi ɔni na bágyila-nwu básiku kekpine ni, ɔdubɔdia bɔnu na ɔyu ɔkplu. ⁴⁴ Uwi ɔni na báva-nwu ni, ɔdi kayawi ɔlɔna ɔni muukpi. Na si bágyila-nwu ni, únwini kɔyu kemo ɔlɔna. Si kayawi ɔlɔna ɔkya ni, na bɛgyi bɛnii kɔyu kemo ɔlɔna lɛnɔ ɔkya. ⁴⁵ Ɔsika ɔkya Bunweni Kedee Ɔku kemo ka ni, “Ukyuli udeedi ɔni ndi Adam ni, Katɔti nédie-nwu na úte-nwu ngba aani ɔyawine.” Na Adam ukplodi ɔmɛni anwu ni, ɔdi Kɔyu kɔni muute ngba geen. ⁴⁶ Ɔɔɔdi kɔyu kemo lɛla mɔɔgyú taatɔ. Mmomu ɔlɔna kemo lɛla mɔɔtɔ. Kama asa na kɔyu kemo lɛdi lɛɛsia. ⁴⁷ Adam udeedi ɔni na Katɔti úti lɛti ɔ́vɔ ni, kalɔ lɛlɔ na ɔ́si. Na Adam unyɔdi ni, katɔ na ɔ́si. ⁴⁸ Na bekyuli bani na kalɔ lɛlɔ mɛni na bási ni, bese aani ukyuli ɔni na béti lɛti bávɔ-nwu. Na bani na katɔ na bási ni, ama lɛnɔ bese aani ukyuli ɔni nási katɔ. ⁴⁹ Kalɛ kani na bubo ukyuli ɔni nási kalɔ lɛlɔ mɛni udu ni, lɛni kani na ukyuli ɔni nási katɔ ɔdubɔya na bɔkɛ nwuna udu. ⁵⁰ Banwa, lɛla lɛni kalɔ na muudie ndi ɔmɛni. Lɛla lɛni ndi ɔlɔna ku ubugya ni, lilakana Katɔti lɛga kadikɔ ala bɔdi. Na lɛla lɛni muubie taayii udu ni, lilakana na lɛkya kesii kani na lɛla lɛni neeebie taayii udu. ⁵¹ Binu lɛbɛla lɛmɛni. Ɔɔɔdi bula ƒui ndubukpi. Nsu si kakpɛɛ kekplodi káku ni, Katɔti ɔdubo bula ƒui udu bɔvumana kɔnakunwi. ⁵² Na ɔdubɔbla aani kalɛ na beebó anumi. Ɔsika si kakpɛɛ kammɔ káku ni, Katɔti ɔdubɔgyila bekpine ɔni na basɔ belekpi kudii. Na ɔdubo bula ƒui udu bɔvumana. ⁵³ Ɔsika lɛla lɛni muubie taayii udu ni, badubo-ni bɔvumana bunwini lɛla lɛni nsɔ neeebie taayii udu. Na lɛla lɛni muukpi lɛnɔ ni, ɔdubo-ni bɔvumana bunwini lɛla lɛni nsɔ naaadubo bukpi. ⁵⁴ Anwuɔsu si ala amɛni álɛ na bávumana ala ebiedi na énwini ani nsɔ neeebie ni, na Bunweni Kedee Ɔku kemo etemila ani mɔɔsu anii, “Báyila kukpi udu na bɔdi lɛlɔ!” ébo éte lɛni sɔsɔ. ⁵⁵ Na bénweni lɛnɔ banii, “Kukpi, wɛ na ƒula lɛlɔ bɔdi bɔkya. Na wɛ na ƒula ɔyikun ɔni mɔɔta-bu mmɔ ɔkya?” ⁵⁶ Kukpi kɔɔkɛ́ ɔyikun ɔni na ɔda ɔɔta-bu taasiku likpidi kudɔ. Na likpidi lɛnɔ lɛɛkɛ́ nwuna ɔyikun taasiku ɔda bubo kudɔ. ⁵⁷ Nsu bɔɔgyá Katɔti enu. Anwu náya na bɔ́di lɛlɔ ɔkɛnku Blɔti Yesu Kristo lɛlɔ! ⁵⁸ Anwuɔsu ni, banwa, binye kpakplaa na bitagbanta. Na binye Blɔti kabla lɛlɔ uwi biala. Ɔsika bɛgyi ka lɛla lɛdi liiibo na bɛdubɔbla na Blɔti kabla kemo na wabla keeke.

¹ Ɔƒɛni ni, bínweni lɛla lɛdi bɛ́siku egulabi ani na bɛɛyɔ́ ka biyi bɛsala na biti bibunku Katɔti bekyuli bani nkya Yudea kalɔ lɛlɔ. Na ɔdi ka bɛbla lɛla lɛni na lɛ́su Galatiƒuɔ baƒɔtaadine nnii babla. ² Na Kwasida limeyi biala ni, ɔdi biala ɔklibi lɛla lɛdi use sɛsɛɛ na kalɛ na ɔ́kɛ kenye na ɔklibi-nya use kalɛ na ɔ́sɔ ulabla egulabi adi buyi si líbo-mii kudɔ. ³ Na si líbo ḿbeduo ni, ndubute bekyuli bani na amii alati bɛ́ƒuna kakunkɛ kani na badubuti bada asa beti bina etela ammɔ beteesienku Yerusalem. ⁴ Na si ɔ́manku ka ami lɛnɔ lisie ni, na bɔsiaku lɛlɔ. ⁵ Ndubɔsia Makedonia asa na mebedu-mii kudɔ, ɔsika ɔdi ka lɛka mmɔ bɔsia. ⁶ Use-mi aani ndubɔdi emeyi alɛɛ adi na bina kudɔ mmɔ. Ɔƒɛni kalɛ kɔyɔ uwi ɔmmɔ ƒui ni, ndubɔkya-mii kudɔ. Na ɔmmɔ kama ni, bɛdubudie-mi ulu na lisie kesii biala na ɔ́manku ka lisie. ⁷ Naaawia ka likeli mbavi-mii kudɔ kani. Mmomu mɔɔyɔ́ ka lɛkya-mii kudɔ na uwi utu blii si Blɔti úte kuƒi kɔmmɔ. ⁸ Ndubo Eƒeso mɛni bɔkya butédu Pentekoste limeyi lɛlɔ. ⁹ Kuƒi kɔbuni kɔkya mɛni geen ute kabla kenengudi kani náƒɔ kuye geen, ina ka bekyuli bani mɔɔta teenye-mi lɛlɔ na kabla kani mɔɔbla na mɛni bemomo. ¹⁰ Si Timoteo úbeduo-mii kudɔ ni, na bɛƒɔ-nwu kaduɛ. Ɔsika ɔɔbla kabla teete Blɔti aani kalɛ kani na ami lɛnɔ mɔɔbla. ¹¹ Ɔdi biala utanu-nwu anumi klukui. Mmomu bibunku-nwu na usie anumi na nwuna ulu busie kemo ku keyi buɛɛ kalɛ na wasɔ wenwini webo-mi kudɔ. Ɔsika mɔɔnu-nwu anumi ka unwini ubo ku nwuna banwa baƒɔtaadine. ¹² Ɔƒɛni na bula ɔnwa Apolo litemi lɛlɔ ni, lɛ́ɛkya-nwu ogya kɔlɛ kɔlɛ ka ubo-mii kudɔ ku banwa badi. Nsu útenu tɔ kalɔ kaduɛ ka ubo uwi ɔmɛni kemo. Nsu lɛ́ƒɔ lɛ́di ka si kuƒi kɔ́tɛ ni, ɔdububo. ¹³ Binye kagyumana na binye kpakplaa na bɔƒɔtaadi bɔmmɔ kemo. Bise kayi na bɛyu ɔkplu. ¹⁴ Na bɛbla bina kabla ƒui na bɔyɔ kemo. ¹⁵ Bɛgyi Steƒana ku nwuna kaduli bekyuli. Ama ndi bekyuli bedeedi bani nénwini kayi na Akaia kalɛkɛ lɛlɔ mmɔ. Na béti lɛlɔ béte ka beteebunku Katɔti bekyuli. Banwa, muuvele-mii nnii, ¹⁶ biti ɔbu bite batɔnkune bamɛni ku babambadi bani muubunku-ma kabla kammɔ. ¹⁷ Lɛlɔ lɛɛyɔ́-mi ka Steƒana ku Ƒotunato ku Akaiko bébeduo, na ɔ́bla-mi aani amii na lɛ́nu. ¹⁸ Báya na lɛ́sɔ lɛ́kɛ ɔkplu aani kalɛ kani na bákya-mii ɔkplu. Na bekyuli bamɛni udu bámanku ka babu-ma geen. ¹⁹ Baƒɔtaadine bani nkya Asia kalɛkɛ lɛlɔ ƒui beegyele-mii o-o! Akwila ku Priskila ku lɛkpa lɛni mɔɔsa na bana kaduli beegyele-mii kaduɛ na Blɔti lɛnyi kemo. ²⁰ Banwa bani nkya mɛni ƒui beegyele-mii o-o! Bɛkya lɛlɔ kɔgbu na bigyele lɛlɔ aani banwa kalɛ. ²¹ Ami ɔlati mina kɔnu na líti muunweni ɔmɛni nnii, “Ami Paulo muugyele-mii o-o!” ²² Ukyuli biala na ulayɔ Blɔti ni, ɔdubɔnuku-ni! O Blɔti, bo! ²³ Blɔti Yesu Kristo lɛƒɔndia lɛsiaku-mii. ²⁴ Líti bɔyɔ geen muute-mii na Yesu Kristo lɛnyi kemo. Ɔsia lɛni.