Kɔn dɛ̀bɛ́ Zhã nɔ mɔ́

Kɔn dɛ̀bɛ́ Zhã nɔ mɔ́

Kristə-lyì nánzhəzhɔ̌ yʼà ŋwɛ́nɛ́ lyì bí nʼê nwɛ̀nɛ̀ bɛ̀. Orɔm pyɔ̌ mɔ́ yà ń nə́ ń yâl sə lyì bí cèrhé mo ǹdə lò gə́ ya n cèrhé Yi ní. Sə Kristə-lyì bí yʼà bə shɛ̀ rə̀myɛ́ yò yé, n zɛ̃̀ n ce bə̀ nʼê zal bɛ bə nwɛ̀nɛ̀ dɛ̃´dɛ̃´. Wɔ́ rə̀myɛ́ yil Zhã kɛ̃ sɛ́bɛ́ rɛ́ tɛ̀bɛ́ ń la mə n cící bi, n zə bə̀ wun ní, mùnì ga bə pyɛ́nɛ́ bə zhì bə̀ nà yó kẽkẽ.

Ń zɔ̀m wẽ̀ dé tɛ̀bɛ́ Yi nyì-zwennə bé zɔ̀m rə̀ yò Yi dɔbrɛ́ nándwə́l lé sɛ́bɛ́ rɛ́ wẽ́ mó kùrə̀ nánzhəzhɔ̌ yò ń sɛ́bɛ́ rɛ́ wẽ́. Ń byili bə̀ wɔ́ Yi rə̀ cǐ lũ w púlə́púlə́. Dɛ̃ ŋwɛ́nɛ́ rə̀ mʼa zhìlì Shətana yò, rə kə́ èmyɛ́ ǹdə́ byɛ̀bɛ́ bə̀ nʼê twĩ̀ è tumə né mó gakó bùrsì. N zɛ̃̀ n byili myɛ bə̀ lò mɔ̀bɔ́ ń zhí Yi ni, rə̀ nʼê yìlì rə̀-ná-cí cɛ̀nɛ̀. Bá bə̀ gə nʼê nwɛ̀nɛ̀ lò mó ńmyɛ̌ zà zà myɛ, dɛ̃ ŋwɛ́nɛ́ Yi bʼa kwɛ̃̌ mɔ, sə ń mà n tó Kristə ne n jí pyɛ̀lɛ̀ byinə nə̀ bə zhɔ̌ zhe yilə.

Sɛ́bɛ́ rɛ́ kùr-jirə́ y wẽ́, Zhã byili bə̀ Eshirhə náàcɛ̀nɛ́ só ń yó, n nə Kristə ń ŋwɛ́nɛ́ ń zùwə́ y wẽ́, ń nə́ ń zɔ̀m zɔ̀mà Kristə-lyì gùúlí tàlpyɛ̀ y rə̀ ŋwɛ́nɛ́ Azhi tənà y wẽ́ mó yilə. Wɔ́ zɔ̀mà nɛ́ nə̀myɛ́ Zhã kɛ̃ n pə gùúlí rə̀myɛ́ òdù òdù gakó ne (1.1–3.22).

Rə̀myɛ́ kwã nɛ́, Zhã byili bə̀ Yi Eshirhə y zə mɔ e mʼe vò dɛ̃̌ yi wə. N yí gàà mɔ́, n nə Yi pyɛ̀lɛ̀ də̀gwã́ yá, ǹdə́ byɛ̀bɛ́ bə̀ zhǐ bə kə́kɛ́lɛ́ y bə̀ nʼê cèrhé re mó. N zɛ̃̀ n nə Yi Pyì-bwɛ̀lɛ́ yá, Yezu Kristə, ń zhǐ bə̀ cəcəl wə, ń nyɛ̌ ǹdə wɔ́ zwə́l bə̀ yʼà zwə́l mo ta. Zhã nyɛ̀ɛ̀ byɛ̀bɛ́ bə̀ zhǐ gàà mɔ́ cələ bə̀ nʼê cèrhé Pyì-bwɛ̀lɛ́ yá, è gə́ tó è cu mú dɛnnɛ e zwẽ lyì dwí dwí, bə̀ shí lũ w tənèsé gakó wə, e ce bə jǐrh Yi lyì mú yilə (4.1–5.14).

Rə̀myɛ́ kwã nɛ́, n nə wẽ̀ kùrə̀ nánzhəzhɔ̌. Eshirhə náàcɛ̀nɛ́ tó rə̀ dɛnnɛ e zɔ̀m búlə́ né nə̀ ŋwɛ́nɛ́ Kristə-lyì bí ǹdə́ byɛ̀bɛ́ bə̀ nʼê twĩ̀ lwɛlɛ mɔ́ cəcəl w mó yò e byili Zhã nɛ. E zɛ̃̀ e byili mu kɔn gə́ la nɛ́ tó Yi Pyì-bwɛ̀lɛ́ y mʼe jí bɛlɛ mɔ́, ǹdə́ Yi gə́ la Shətana ǹdə́ byɛ̀bɛ́ bə̀ nʼê twĩ̀ lwɛlɛ rɛ́ mɔ́ bùrsì kɔ́ nɛ́ (6.1–20.15).

Rə̀myɛ́ gakó kwã nɛ́, Yi zɛ̃̀ rə byili dɛ̃̌ nándwə̃̀ y ǹdə́ cɛ nándwə̃̀ y rə̀ nʼê tɛnɛ mɔ́ Zhã nɛ, rə byili mu Zhərəzalɛm nándwə̃̀ yə́ (21.1–22.5). Rə̀myɛ́ kwã nɛ́ èlâsɛ̃´, Kristə zɛ̃̀ n byili bə̀ ń kə́ ń tá ń la jíjírhú n mə n bə̀ yé, sə Zhã byili bə̀ lò gakó mə̂ sə́ nyǐ zɔ̀mà nɛ́ nə̀ kɛ̃ sɛ́bɛ́ rɛ́ tɛ̀bɛ́ wẽ́ mó ǹdə kɔn tɛ̀bɛ́ rə̀ wɔ́ yə́-byĩ́ ta. Wɔ́ rə̀myɛ́ ń zɔ̀m n mə n gu sɛ́bɛ́ rɛ́ yó (22.6-21).

Zhã nə́ ń byili ń sɛ́bɛ́ rɛ́ kùrə̀

¹Wɔ́ kɔn dɛ́ dɛ̀bɛ́ rə̀ yʼà shèè Yezu Kristə zɛ̃̀ n byili ri pamparɛ̃ɛ̃ mɔ́ bə̀ kɛ̃ sɛ́bɛ́ rɛ́ tɛ̀bɛ́ wẽ́. Wɔ́ Yi rə̀ ce n lwar rə̀myɛ́, mùnì ga n byili kɔn dɛ̀bɛ́ rə̀ bàn rə̀ kʼê tʼâ la dɔnɔ mɔ́ ń tùntùnnə̀ bé ne. Sə ń twĩ̀ ń màlɛ́ka e byili ri ń tùntùnnə̀ Zhã nɛ. ²Zhã wɔ́ zhə̀n-cínnə ń nə́ ń wə̀l bə̀ kɔn dɛ́ dɛ̀bɛ́ ń yírh nɔ mɔ́ wɔ́ Yi zɔ̀mɛ̀ zhə̀nà, bə̀ wɔ́ Yezu Kristə ń byili bə̀ rə̀ wɔ́ zhə̀nà. ³Lò mɔ̀bɔ́ ǹ gə kàrmə̀ sɛ́bɛ́ rɛ́ tɛ̀bɛ́, ǹ bʼâ yə̀ wu-nyɔ̃̀ cí. Zɔ̀mà nɛ́ nyɛ̀bɛ́ wɔ́ Yi sõ nə̀ shí ní, ce lyì byɛ̀bɛ́ bə̀ nʼê cili ni, bə jʼà nʼê zwẽ kɔn dɛ̀bɛ́ rə̀ kɛ̃ sɛ́bɛ́ rɛ́ wẽ́, bə̀ mʼa yə̀ wu-nyɔ̃̀ cìnə́. Zhə̀nà, dɛ̃ rɛ́ tɛ̀bɛ́ Yi yʼà byili mú yú rə zhɛ̀.

Zhã nə́ ń ce Kristə-lyì gùúlí tàlpyɛ̀ yá

⁴Àmyɛ́ Zhã à nʼâ kɛ̃ sɛ́bɛ́ rɛ́ tɛ̀bɛ́ à la ámyɛ̌ Kristə-lyì gùúlí tàlpyɛ̀ y rə̀ ŋwɛ́nɛ́ Azhi tənà y wẽ́ mó lyì bí ni pɔ.

Yi rí tɛ̀bɛ́ rə̀ yʼà ŋwɛ́nɛ́, rə jʼà gwẽ̌ ŋwɛ́nɛ́, rə jʼà bàn mɔ́, ǹdə́ rə̀ éshìrhə́ né nyàlpyɛ̀ y nə̀ zhǐ rə̀ pyɛ̀lɛ̀ də̀gwã́ y yé né mó bʼa cĩ́ bwəl á yó, sə bə pə ába yə̀-zùlə́! ⁵Bə̀myɛ́ ǹdə́ Yezu Kristə mó ń wɔ́ zhə̀n-cínnə páá mɔ́ ga mʼa pə ába yə̀-zùlə́! Ńmyɛ̌ ń wɔ́ nã́yə́ə́ mó ń bwìrhì, n jà ń wɔ́ lũ w pyâ bɛ́ gakó pyɔ̌.

Ń só nə́ba, ń ló ń jal mɔ́ tɛ̃´ n mə n zwẽ nə́ba nə́ yə̀-bəlwàálɛ́ wẽ́, ⁶n ce nə́ jǐrh ń tənà y lyì, nə́ jǐrh vwĩ̀-zwə́lnə ń Da Yi tum dí yilə. Ńmyɛ̌ ń zhe zùwə́ ǹdə́ jàn, byinə nə̀ bə zhɔ̌ zhe yilə! Amɛ̀n!

⁷Nyǐnə mo ń ŋwɛ́nɛ́ bə́ban wẽ́ ń bànà, lyì bí gakó bʼa nə mɔ. Byɛ̀bɛ́ bə̀ yʼà zò mò mó myɛ cìcì bʼa nə mɔ, sə lũ w lyì bí gakó wun bʼa zhìlì ń yilə. Kɔn bʼa yə̀ èta zhə̀n zhə̀nà! Amɛ̀n!

⁸Cinu Yi wòwə̀: “Àmyɛ́ à wɔ́ Aləfa ǹdə́ Omɛga, rə̀ kùr wɔ́: kɔn gakó kùr-jirə́ ǹdə́ rə̀ yó-gurə́ ga. À wɔ́ Yi tɛ̀bɛ́ rə̀ yʼà ŋwɛ́nɛ́, rə jʼà gwẽ̌ ŋwɛ́nɛ́, rə jʼà bànà. Wɔ́ àmyɛ́ à cǐ kɔn gakó.”

Zhã nɔ Yezu Kristə ǹdə́ ń zùwə́ yə́

⁹Àmyɛ́ á da-byǐ Zhã, à nʼâ tó ába à nwɛ̀nɛ̀, sə à tó ába à wɔ́ Yi tənà y lò, à nʼâ pyɛ́nɛ́ à cìn Yezu yilə. À yʼà bwə̀l Yi zɔ̀mɛ̀ rɛ́ ǹdə́ zhə̀n dɛ́ Yezu Kristə byili mú. Wɔ́ rə̀myɛ́ è ce bə zə nɛ bə vò bə cĩ́ cɔ w ò ŋwɛ́nɛ́ nə̀-fɔ̀lɔ̀ w cəcəl w bə̀ nʼê byẽ̀ bə̀ Patəmɔɔsɛ mɔ́ wa. ¹⁰Cinu dɛ̃ rɛ́ yùwə̀, Eshirhə náàcɛ̀nɛ́ só à yó wə, a nyɛ̀ɛ̀ cəl nánfɔ̀lɔ̀ rə̀ bya à kwã nɛ́ ǹdə pɔ́lá cəl ta, ¹¹rə wɔ̀: “Kɛ̃ kɔn dɛ̀bɛ́ ǹ nə mɔ́ sɛ́bɛ́ wẽ́, sə́ pə sɛ́bɛ́ rɛ́ rə̀myɛ́ Kristə-lyì gùúlí tàlpyɛ̀ y nɛ. Gùúlí rə̀myɛ́ wɔ́ Efɛɛzɛ ǹdə́ Səmyirni, ǹdə́ Pɛrgamɛ, ǹdə́ Tiyətiiri ǹdə́ Sardɛ, ǹdə́ Filədelfi e súlí Laɔdɛɛsɛ.”

¹²A pyìrhí à la nyǐ wɔ́ mɔ̌ ń nə́ ń zɔ̀m ǹdə́ nɛ. A pwírí sánə́má pàntámsɛ shàlpyɛ̀. ¹³A nə lò ń zhǐ sə̀ cəcəl wə, ń nyɛ̌ ǹdə numbyíní byǐ ta, n zù kàmə̀-zù-èdɔ̀lɔ̀, n lyẽ sánə́má cã̌-tɔ̀nɔ̀ ń nə̀bán nɛ. ¹⁴Ń yó w ǹdə́ ń ywésé yʼà nyɛ̌ námpwə̀rh pwɛ̃´pwɛ̃´ ǹdə pyì-kur ta; ń yírhə́ né yʼà nʼê yə̂r ǹdə myìn-zhù ta. ¹⁵Ń nèsé yʼà nʼê jə́jɛ̀mɛ́ ǹdə wɔ́ kã̀mɔ bə̀ co shɔ̃́ wẽ́ bə yə̂l ta; ń cəl lé yʼà nʼê dom ǹdə nə̀-fɔ̀lɔ̀ gə́ yʼa dom né. ¹⁶Cã̀mə́sɔ̌rh shàlpyɛ̀ yʼà ŋwɛ́nɛ́ ń jə̀jĩ́ y wə, búlə́ shù ò yésé ga zhe nyí ǹdə fwɛ̀nɛ̀ ta nʼô shí ń nyú w ò dwi. Ń yé y yʼà nʼê jə́jɛ̀mɛ́ ǹdə nə̀nyɛ́n-sàmpɛ̀rɛ́ ta.

¹⁷À gə́ nɔ mɔ, a jʼa tu tɛ̃´ ń yé né a jǐrh ǹdə cùù ta. N cĩ́ ń jə̀jĩ́ y à yó, n wɔ̀: “Bə̀ká dùr ywẽ yé. Àmyɛ́ à wɔ́ kɔn gakó kùr-jirə́ ǹdə́ rə̀ yó-gurə́ ga. ¹⁸À wɔ́ nã́nyì. À yʼà cùwə̀, sə à ŋwɛ́nɛ́ èlâsɛ̃´, byinə nə̀ bə zhɔ̌ zhe yilə. À zhe ŋwɔ̀nɔ́ cu mú ǹdə́ cílú w ga yó. ¹⁹Kɛ̃ tɛ̀bɛ́ ǹ nə mɔ́: tɛ̀bɛ́ rə̀ ŋwɛ́nɛ́ èlâsɛ̃´ mɔ́, ǹdə́ tɛ̀bɛ́ rə̀ bàn rə̀myɛ́ kwã nɛ́ mɔ́. ²⁰È gə wɔ́ cã̀mə́sɔ̌sɛ́ shàlpyɛ̀ y ǹ nə à jə̀jĩ́ y wẽ́ mó ǹdə́ sánə́má pàntámsɛ́ shàlpyɛ̀ y yilə, nyǐ kɔn dɛ̀bɛ́ rə̀myɛ́ nʼê yâl e byili: cã̀mə́sɔ̌sɛ́ shàlpyɛ̀ y wɔ́ Kristə-lyì gùúlí tàlpyɛ̀ y màlɛ́kabá; pàntámsɛ́ shàlpyɛ̀ y zɛ̃̀ sə̀ wɔ́ gùúlí tàlpyɛ̀ y cìcì mú.

Efɛɛzɛ Kristə-lyì gùlú w sɛ́bɛ́ rɛ́

¹“Kɛ̃ sɛ́bɛ́ ń pə Efɛɛzɛ Kristə-lyì gùlú w màlɛ́ka y nɛ, ń byili bə̀ mɔ̀bɔ́ cã̀mə́sɔ̌sɛ́ shàlpyɛ̀ y ŋwɛ́nɛ́ ń jə̀jĩ́ y w n jà ń nə́ ń zhə̀l sánə́má pàntámsɛ́ cəcəl w mó wòwə̀:

²‘À yě ǹ gə́ nə́ ǹ twĩ̀ ní mú gakó. À yě ǹ gə́ nə́ ǹ nwɛ̀nɛ̀ nɛ́ mɔ́, ǹdə́ ǹ gə́ nə́ ǹ pyɛ́nɛ́ ǹ cìn ní mú gakó; à yě bə̀ ǹmyɛ́ ǹdə́ lyì-bəlwâlsɛ́ wàr dwã nɛ́ yé. Jàlà nʼê wə̀l bə̀ bə̀myɛ́ wɔ́ à tùntúmə́ sə ǹ dwẽ́ be n nə bə̀ kùrə̀ né, ń pwírí wɔ́ kɔma bə̀ nʼê gòmə̀. ³Ǹ nə́ ǹ pyɛ́nɛ́ ǹ cìnə̀, ǹ nə́ ǹ nwɛ̀nɛ̀ àmyɛ́ yilə, sə ǹ tá ǹ gɛ ǹ wu yé. ⁴Sə kɔn rə̀dù ŋwɛ́nɛ́ à la mɔ́ búlə́ ju rə̀ yilə: ǹ kə́ ǹ bə nɛ só èlâsɛ̃´ ǹdə ǹ gə́ yà ǹ ju kùr né yé. ⁵Ká lyǐrh ǹ gə́ yà ǹ ju kùr né mó. Ǹ yà ǹ ju kùr náàcɛ̀nɛ́, sə ǹ ká tu tɛ̃´. Pyìrhí ǹ wu, ń wɛ̀rhɛ́ ǹdə ǹ gə́ yà ǹ ju kùr ǹ nə́ ǹ wɛ̀rhɛ́ nɛ́. È gə də̀ rə̀myɛ́, à bʼa bə̀ a kwè ǹ pàntɛ́mɛ́ y è jàà y wa. ⁶E jà ǹdə́ rə̀myɛ́ ga, ǹ nə́ ǹ wɛ̀rhɛ́ kɔn rə̀dù rə̀ càn. Ǹ zhɔ̃̀ Nəkwala lyì bí tùntùm-bəlwâlsɛ́ ǹdə àmyɛ gə́ zhɔ̃̀ sɛ̀ nɛ́.

⁷‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!

‘Lò mɔ̀bɔ́ ǹ la bɛlɛ jú mú, à bʼa pɔ̃́ sɔ́má ń jí nyǔ cǒ w ò ŋwɛ́nɛ́ Yi bɔ́ɔ́ w wẽ́ mó byâ bɛ́.’

Səmyirni Kristə-lyì gùlú w sɛ́bɛ́ rɛ́

⁸“Kɛ̃ sɛ́bɛ́ ń pə Səmyirni Kristə-lyì gùlú w màlɛ́ka y nɛ, ń byili bə̀ mɔ̀bɔ́ ń wɔ́ kùr-jirə́ ǹdə́ yó-gurə́ ga, n jà ń yà ń cùwə̀, sə ń ká n bwìrhì mú wòwə̀:

⁹‘À yě ǹ nɔ̀nɔ̀ w ǹdə́ ǹ nə̀mɔ̀ɔ̀rɛ́ yò, ń jà ń wɔ́ nə̀cɛ̀m-bal. À yě bə̀ lyì jàlà nʼê zhìlì ǹ yilə. Bə̀ nʼê wə̀l bə̀ bə̀myɛ́ wɔ́ Zhwifubá, e jʼà wɔ́ kɔma. Lyì bí bə̀myɛ́ wɔ́ Shətana gùlú w lyì. ¹⁰Bə̀ká dùr ywẽ nɔ̀nɔ̀ w kɔ̀bɔ́ ǹ la nɔ mɔ́ yil yé. Nyǐnə Shətana bʼa ce á lyì jàlà byə̀nə́-jù wə̀, è la mʼe dwẽ́ ába, sə á bʼâ nwɛ̀nɛ̀ dwã shíyə́. Cə̀ə̀lè ń zhì nà èdù yó kɔn mʼe yí ǹ cu, sə́ yẽ̌ bʼà mʼa pɔ̃́ nyǔ mə̀ tʼâ la zhɔ̌ mə yə̀ ǹ kwândɛ.

¹¹‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!

‘Cu mú twər rə̀lyè nyân mɔ́ wàr kaka mə̀ la mɔ̀bɔ́ ń la bɛlɛ jú mú ni wɔ̀rhɔ́ yé.’

Pɛrgamɛ Kristə-lyì gùlú w sɛ́bɛ́ rɛ́

¹²“Kɛ̃ sɛ́bɛ́ ń pə Pɛrgamɛ Kristə-lyì gùlú w màlɛ́ka y nɛ, ń byili bə̀ mɔ̀bɔ́ ń zhe búlə́ shù w ò yésé ga zhe nyí mú wòwə̀:

¹³‘À yě ǹ gə́ ŋwɛ́nɛ́ mə̀gã̌. Wɔ́ Shətana è cǐ gàà mɔ́. Ǹdə́ bə̀ gu à zhə̀n-cínnə Antəpaasɛ á sõ, Shətana y gə́ ŋwɛ́nɛ́ mə̀gã̌ mɔ́ ga, ǹ zhì ǹ nà y yó ń zhí ni. ¹⁴Sə kɔn rə̀dù ŋwɛ́nɛ́ à la mɔ́ búlə́ ju rə̀ yilə: lyì jàlà ŋwɛ́nɛ́ ǹ sõ bə̀ zù Balaamɛ, e jà wɔ́ ńmyɛ̌ ń yà ń wò Balakɛ nɛ bə̀ ń swèlè Esərayɛl lyì bí bə dɔ̃̀ vwàmá nyɛ̀bɛ́ bə̀ zwə́l wẽ̀ tɛ̀bɛ́ rə̀ də̀ Yi yó nàmá, sə bə zù fwə̂l tumə wẽ́. ¹⁵Lyì dwã myɛ ŋwɛ́nɛ́ ǹ sõ bə̀ nʼê tó Nəkwala lyì bí kàrmɔ́. ¹⁶Pyìrhí ǹ wu, sə́ yẽ̌ tùntwə̃̀ə̃̀ né nə̀myɛ́ nɛ. È gə də̀ rə̀myɛ́, kɔn gə yàl námpɔ́lɛ́ à mʼa bə̀ ǹ sõ, sə à bʼa zə búlə́ shù w ò nʼô dwi à nyú w mú a bú ǹdə́ lyì bí bə̀myɛ́ mɔ́.

¹⁷‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!

‘Lò mɔ̀bɔ́ ǹ la bɛlɛ jú mú, à bʼa pɔ̃́ mã́nɛ è shèè,2.17 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili mã́nɛ gə́ yʼà wɔ́ kɔn ná-dwí yil gàà mɔ́. sə à bʼa pɔ̃́ nə́kul-põ, yil nándùl kɛ̃ ò yó, sə lò lò tá ń la yil lé rə̀myɛ́ lwar, è gə də̀ ǹmyɛ́ mɔ̀bɔ́ à la mɔ́ nə́kulu w pɔ mɔ́ dúdú.’

Tiyətiiri Kristə-lyì gùlú w sɛ́bɛ́ rɛ́

¹⁸“Kɛ̃ sɛ́bɛ́ ń pə Tiyətiiri Kristə-lyì gùlú w màlɛ́ka y nɛ, ń byili bə̀ Yi Byǐ mú ń yírhə́ né nʼê jə́jɛ̀mɛ́ ǹdə myǐn ta, ń nèsé jɛ̀ ǹdə wɔ́ lù bə̀ mʼe wɛ̀rhɛ́ sɛ nɛ mɔ́ wòwə̀:

¹⁹‘À yě kɔn dɛ̀bɛ́ gakó ǹ nə́ ǹ wɛ̀rhɛ́ mɔ́. À yě ǹ gə́ só ǹ dwã bɛ́ nɛ́; à yě ǹ gə́ zhí Yi ni ní; à yě ǹ tùm-ècɛ̀nà nɛ́ yò; à yě ǹ gə́ nə́ ǹ pyɛ́nɛ́ ǹ cìn ní; à yě bə̀ ǹ nə́ ǹ twĩ̀ dɛ̃´dɛ̃´ èlâsɛ̃´ du ǹ gə́ ju kùr ǹ yà ǹ nə́ ǹ twĩ̀ ní. ²⁰Sə kɔn rə̀dù ŋwɛ́nɛ́ à la mɔ́ búlə́ ju rə̀ yilə: ǹ yẽ̌ Zhəzabyəə ne ń nə́ ń twĩ̀. Kɛ̃ mɔ́ ńmyɛ̌ mɔ́ zhe bə̀ ńmyɛ̌ wɔ́ Yi nyì-zwennə, ń nə́ ń yǔr à tùntùnnə̀ bé bə yẽ̌ Yi ni, bə zù fwə̂l tumə wẽ́, sə bə dɔ̀m vwàmá nyɛ̀bɛ́ bə̀ zwə́l wẽ̀ tɛ̀bɛ́ rə̀ də̀ Yi yó nàmá. ²¹À yʼà yẽ̌ mo mùnì ga n zhɛ́rhɛ́ ń tùntwə̃̀ə̃̀ né, sə n lwə̀l sǔbri ń fwə̂l mó yilə, sə ń tá ń yâl n lwə̀l sǔbri yé. ²²Nyǐnə à bʼa ce n tu címí, n nwɛ̀nɛ̀ dɛ̃´dɛ̃´, ńmyɛ̌ ǹdə́ byɛ̀bɛ́ bə̀ nʼê fwə̂l ǹdə́ mɔ mɔ́ ga. Rə̀myɛ́ wɔ́ bə̀ gə yẽ̌ bə̀ tùntwə̃̀ə̃̀ né nyɛ̀bɛ́ bə̀ nʼê twĩ̀ ǹdə́ mɔ mɔ́ nɛ fòró a yẽ̌ be. ²³À bʼa gu ń bə̀sɔ́ná bɛ́. Rə̀myɛ́ yi ní, Kristə-lyì gùúlí bʼa lwar bʼà yě numbyínsí wun bùlə̀ né ǹdə́ sə̀ shilə né. À mʼa kwɛ̃̌ á mə̀dù mə̀dù gakó kɔn mɛrhɛ ǹdə́ ń tùntwə̃̀ə̃̀ né.

²⁴‘Sə è gə wɔ́ ámyɛ̌ Kristə-lyì bí byɛ̀bɛ́ á dàl Tiyətiiri ní, á zhɔ̃̀ lyì bí bə̀myɛ́ còrhò mó, á jʼâ yə̀ pyà sʼá lwar ywẽ̀ né nyɛ̀bɛ́ bə̀ nʼê byẽ̀ bə̀ Shətana ywẽ̀ né nə̀ shèè mó mó yilə, cilinə: à tʼâ la ába zhĩĩ dõ zhũ yé. ²⁵Jʼá zə kɔn dɛ́ dɛ̀bɛ́ á cèrhè mó kẽkẽ á mʼá dɛ̃̀ à twírí yə́. ^26-27Lò mɔ̀bɔ́ ǹ la tũ̌ àmyɛ́ yil kɔn mʼe yí cə-kɔ́lɛ́ y mɔ́, wɔ́ ǹmyɛ́ ǹ bʼâ jí bɛlɛ. À mʼa pɔ̃́ ŋwɔ̀nɔ́ ǹdə à Da gə́ pɔ àmyɛ ŋwɔ̀nɔ́ nɛ́ ń cìní tənə̀rh, ń kál sə̀ lyì bí ǹdə́ jàn nánkùlù. È bʼa yə̀ ǹdə bə̀ gə́ yʼa lo dɔ nə́kwánsɛ nɛ́. ²⁸Sə à bʼa pɔ̃́ nəkɔkɔ́lɛ́ nə̀ŋwɔ wá.

²⁹‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!’

Sardɛ Kristə-lyì gùlú w sɛ́bɛ́ rɛ́

¹“Kɛ̃ sɛ́bɛ́ ń pə Sardɛ Kristə-lyì gùlú w màlɛ́ka y nɛ, ń byili bə̀ mɔ̀bɔ́ ń zhe éshìrhə́ né nyàlpyɛ̀ y ǹdə́ cã̀mə́sɔ̌sɛ́ shàlpyɛ̀ y mɔ́ wòwə̀:

‘À yě ǹ gə́ nə́ ǹ twĩ̀ ní mú gakó. Lyì bí nʼê bùl bə̀ ǹ wɔ́ nã́nyì, ń jà ǹ wɔ́ cùù. ²Zɛ̃̀ ń wárh ǹ yala nɛ làlà ǹ Yi-ni-zhú mú wẽ́, ń zhì kẽkẽ mùnì ga ǹ nyənsɛ́ sə̀ dàl mɔ́ bə̀kʼa cì rə báásɛ yé. À pwírí, è gə wɔ́ à Yi ri yilə, ǹ tùntwə̃̀ə̃̀ né bə càn yé. ³Lyǐrh zɔ̀mɛ̀ rɛ́ bə̀ yʼà byili mú ń zwẽ de mó yò. Zə rɛ náàcɛ̀nɛ́, sə́ zhɛ́rhɛ́ ǹ tùntwə̃̀ə̃̀ né wẽ́. Ǹ gə yə̀ zɛ̃̀ ń wárh ǹ yala nɛ, à mʼa bə̀ a jàr mɔ́ ǹdə ŋwɔ̀l-bal ta, ǹ tá ǹ la à nyí ni lwar yé. ⁴Ǹ lyì jàlà ŋwɛ́nɛ́ Sardɛ nɛ́ gàà, bə̀ yə̀ bə̀ gàndɛ́ byèlè yé. Bə̀myɛ́ mɔ́ bʼa tó ne ǹdə́ bə̀ gã̀-pwèndé, bə̀ bə̀ mə̂ dwã sə bə tó ne.

⁵‘Lò mɔ̀bɔ́ ǹ la bɛlɛ jú mú, ǹmyɛ bʼâ zù kàmə̀-zù-pwã̀ èta. Sə à tʼâ la ǹ yil lé pɔ́pɔ̌ nyǔ mə̀ tʼâ la zhɔ̌ sɛ́bɛ́ rɛ́ wẽ́ yé. À mʼa byili à Da ǹdə́ ń màlɛ́kabá yé né bə̀ ǹ wɔ́ àmyɛ́ lò.

⁶‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!’

Filədelfi Kristə-lyì gùlú w sɛ́bɛ́ rɛ́

⁷“Kɛ̃ sɛ́bɛ́ ń pə Filədelfi Kristə-lyì gùlú w màlɛ́ka y nɛ, ń byili bə̀ cɛ̀nɛ̀ cə́bal mɔ́ ń nə́ ń zɔ̀m zhə̀nà, n jà ń zhe pyɔ̌ Dəvyidi bwə̀l-byǐ yə́; ń gə pul bòlò w lò wàr w ń nə́ ń pyi; ń gə pyi w lò wàr w ń nə́ ń pul mó wòwə̀:

⁸‘À yě ǹ gə́ nə́ ǹ twĩ̀ ní mú gakó. Nyǐ à pul bòlò ǹ yilə, lò wàr w ń la pyu yé. Ǹ jàn dɛ́ bə já yé. Ǹdə́ rə̀myɛ́ ga, ǹ wɛ̀rhɛ́ ǹdə à zɔ̀mɛ̀ rɛ́ gə́ nʼê byili ní, ǹ yə̀ wə̀l bə̀ ǹ yə̀l à pár yé. ⁹Shətana gùlú w lyì bí zhe bə̀ bə̀myɛ́ wɔ́ Zhwifubá, e jʼà wɔ́ kɔma. Nyìwé, à bʼa nyɛ́ɛ́ bɛ bə jòm bə̀ nə̀dwə́nə́ yó ǹ yé né, sə bə̀ mʼa lwar bʼà só mó. ¹⁰Ǹ gə́ zwẽ à zɔ̀mɛ̀ rɛ́ ń zə rɛ kẽkẽ mó ce, àmyɛ bʼa yìlì mú zwini tɛ̀bɛ́ rə̀ bàn lũ w gakó wẽ́ rə zhẽ̀ lyì bí mú yé né. ¹¹À tʼâ la dɔnɔ a mʼa bə̀ yé. Ce jàn nɛ́ ń zə tɛ̀bɛ́ ǹ zhe mó kẽkẽ, mùnì ga lò dõ bə̀ká n zwẽ kwândɛ́ tɛ̀bɛ́ rə̀ mə̂ ǹdə́ mɔ́ mɔ́ yé.

¹²‘Lò mɔ̀bɔ́ ǹ la bɛlɛ jú mú, à bʼa ce ń yə̀ ǹdə dã̀ ta à Yi rí jì y wə. Ǹ tá ǹ la du gàà gaga yé. À bʼa kɛ̃ à Yi rí ǹdə́ rə̀ cɔ w yilə né ǹ cíl lé yó. Cɔ w òmyɛ́ mɔ́ wɔ́ Zhərəzalɛm nándũ̀ w ò la dɛ̃̌ yi w shú o só tɛ̃´ mɔ́. À bʼa kɛ̃ à yil lé nándùl lé myɛ ǹ yó.

¹³‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!’

Laɔdɛɛsɛ Kristə-lyì gùlú w sɛ́bɛ́ rɛ́

¹⁴“Kɛ̃ sɛ́bɛ́ ń pə Laɔdɛɛsɛ Kristə-lyì gùlú w màlɛ́ka y nɛ, ń byili bə̀ lò mó mɔ̀bɔ́ ń wɔ́ zhə̀n-cí páá, ń wɔ́ Yi zhə̀n-cínnə, Yi tó ń dɛnnɛ rə wɛ̀rhɛ́ kɔn gakó mó wòwə̀:

¹⁵‘À yě ǹ gə́ nə́ ǹ twĩ̀ ní mú gakó. Ǹ də̀ tɔ́nɔ́nɔ́, ń jà ǹ də̀ bárhɛ́ myɛ yé. Ǹ yà ǹ wɔ̌ ǹ bʼâ yə̀ tɔ́nɔ́nɔ́ ráá bárhɛ́! ¹⁶Sə ǹ gə́ wɔ́ taltal, ǹ də̀ tɔ́nɔ́nɔ́ ǹ də̀ bárhɛ́ myɛ mɔ́, à bʼa tɔlɛ mɔ́ tɛ̃´ ǹdə́ à nyí. ¹⁷Ǹ nə́ ǹ wə̀l bə̀ ǹmyɛ́ wɔ́ nə̀cɛ̀m-bal, bə̀ ǹ jɛ̃̀ zhe kɔn dɛ̃´dɛ̃´, bə̀ kaka yə̀ mɔ́ mwìrì yé. Ń jà ǹ yə̀l bə̀ ǹ wɔ́ zúzúnú cí yé; ǹ yə̀l bə̀ ǹ wɔ́ nɔ̀nnà yé; ǹ yə̀l bə̀ ǹ wɔ́ nə̀mɔ̀ yé; ǹ yə̀l bə̀ ǹ wɔ́ lyìlyǒ yé; ǹ yə̀l bə̀ ǹ wɔ́ nánlwè yé. ¹⁸Rə̀myɛ́ ce, à nʼâ cící mú sə́ bʼà sõ ń zwẽ sánə́má bə̀ zə myǐn bə yə̂l mə jǐrh wárhgáá ń yè, mùnì ga ń jǐrh nə̀cɛ̀m-bal, sə́ yè gàndɛ̀ ń bə́ círhí ǹ cìnə̀. Èta, ǹ kə́ ǹ tá ǹ la nánlwè yál yé, cìzhìl kʼê tʼâ la mɔ́ zal yé, sə́ yè cə́m ń ce ǹ yírhə́ né wə, mùnì ga nə nɛ nɛ́ pamparɛ̃ɛ̃. ¹⁹Lyì byɛ̀bɛ́ à só mó, à yʼa cící bi, a jʼà yʼa pɛ bɛ còrhò-tum myɛ. Ce jàn nɛ́ ń zhɛ́rhɛ́ ǹ tùntwə̃̀ə̃̀ né. ²⁰Nyǐ à zhǐ étwí-ènyí ni à nʼâ kɔ́kwá. Lò mɔ̀bɔ́ ǹ nyɛ̀ɛ̀ à cəl lé, ń pul ǹ bòlò wə́, à bʼa zù ǹ sõ, sə nə́ bʼâ tó dwã nə́ jí. ²¹Àmyɛ́ jú bɛlɛ, a vò a jòm à Da pyɛ̀lɛ̀ də̀gwã́ y yó. Rə̀myɛ́ ce, lò mɔ̀bɔ́ ǹ la bɛlɛ jú mú, àmyɛ bʼa zə mɔ́ ń vò ń jòm à pyɛ̀lɛ̀ də̀gwã́ y yó.

²²‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!’ ”

Kɔn dɛ̀bɛ́ rə̀ ŋwɛ́nɛ́ dɛ̃̌ yi w mú gakó nʼê cèrhé Yi

¹Rə̀myɛ́ kwã nɛ́, a kʼa nə kɔn dõ. Bòlò pul dɛ̃̌ yi wə. Sə cəl lé à jɛ̀rɛ̀ a nyɛ̀ɛ̀ rə̀ bya ǹdə pɔ́lá cəl ta mɔ́ wò nè: “Zɛ̃̀ ń bə̀ dɛ̃̌ nyɔ̀nɔ̀, à bʼa byili mú kɔn dɛ́ dɛ̀bɛ́ rə̀ bàn rə̀myɛ́ kwã nɛ́ mɔ́.”

²Rə̀myɛ́ yi ní cìcì, Eshirhə náàcɛ̀nɛ́ só à yó wə, a nə pyɛ̀lɛ̀ də̀gwã́ è zhǐ dɛ̃̌ yi wə, sə lò yà ń jě è yó. ³Mɔ̀bɔ́ ń yà ń jě è yó mó yà ń nə́ ń jə́jɛ̀mɛ́ ǹdə nə́kul-ècɔ̀nɔ̀ ò gùlí námpùlú ǹdə́ nánshɔ̃̀ ta. Sə kɔn rə̀dù yʼà kə́kɛ́lɛ́ pyɛ̀lɛ̀ də̀gwã́ yá, rə̀ nyɛ̌ ǹdə dɔm-cɛ̃ ta, rə̀ nʼê jə́jɛ̀mɛ́ ǹdə nə́kul-ècɔ̀nɔ̀ námpùlú ta. ⁴Sə pyɛ̀lɛ̀ də̀gwə́rh shí-èlyè ǹdə́ sə̀na myɛ yʼà kə́kɛ́lɛ́ ya. Náncɛrh shí-èlyè ǹdə́ sə̀na yʼà jě sə̀ yó. Bə̀ yʼà zù kàmə̀-zù-pwə̀rh, bə pú pyɛ̀lɛ̀ yə́-púr rə̀ wɛ̀rhɛ́ ǹdə́ sánə́má. ⁵Sə pyɛ̀lɛ̀ də̀gwã́ y yʼà nʼê jə́jɛ̀mɛ́ ǹdə wɔ́ dwà è nʼê lyə́lyɔ̌ e jʼà nʼê bya, è nʼê ce sɔ̀ ta. Pàntámsɛ shàlpyɛ̀ yʼà ju sə̀ zhǐ tɛ̃´ è yé né. Sə sə̀myɛ́ yʼà wɔ́ Yi éshìrhə́ y né nyàlpyɛ̀ yá. ⁶Kɔn yʼà pyě tɛ̃´ è yé né, rə̀ nyɛ̌ ǹdə nə̀-fɔ̀lɔ̀ ta, pamparɛ̃ɛ̃ ǹdə bútóló námpõ ta, ǹdə zhə̀zhé ta.

Wò-nyìr rə̀na yʼà zhǐ rə kə́kɛ́lɛ́ ya, òdù gakó yala nɛ́ yʼà wɔ́ yírhə́ dúdú, ò yé né ǹdə́ ò kwã nɛ́ ga. ⁷Òdù w nyɛ̌ ǹdə bɔrɔ ta; rə̀lyè nyɔ̃̌ w nyɛ̌ ǹdə nə̀-bya ta; rə̀tɔ̀ nyɔ̃̌ w yé y nyɛ̌ ǹdə numbyíní yé ta; rə̀na nyɔ̃̌ w zɛ̃̀ ò nyɛ̌ ǹdə ényɛ̀lá ta. ⁸Rə̀myɛ́ rə̀na y òdù gakó yʼà zhe vɔ̀mɛ̀ nyə̀ldù. Rə̀ vɔ̀mɛ̀ nɛ́ myɛ gakó yʼà wɔ́ yírhə́ dúdú. Rə̀ nʼê nún cəcɛ̃ ǹdə́ nə̀nyɔ́nɔ́ ga rə̀ tʼâ shĩ̌ yé, rə̀ zhe:

“Cɛ̀nɛ̀ cə́bal, cɛ̀nɛ̀ cə́bal, cɛ̀nɛ̀ cə́bal,

Cinu Yi jàn-bə-swɛ̃´-zhe cə́bal,

ńmyɛ̌ ń yà ń ŋwɛ́nɛ́, n jà ń gwẽ̌ ŋwɛ́nɛ́, n jà ń bàn mɔ́.”

⁹Bə̀ yʼà nʼê cèrhé mɔ̀bɔ́ ń jě pyɛ̀lɛ̀ də̀gwã́ y yó, ń ŋwɛ́nɛ́ twéé twéé mó, bə̀ mʼê ce ń nə̀báná. ¹⁰Wò-nyùùrí rə̀na y gə cèrhé mo gakó, náncɛsɛ́ shí-èlyè ǹdə́ sə̀na y nʼê twi sə̀ nə̀dwə́nə́ yó, mɔ̀bɔ́ ń jě də̀gwã́ y yó ń ŋwɛ́nɛ́ twéé twéé mó yé né, sə̀ nʼê cèrhé mo, sə̀ nʼê dul sə̀ pyɛ̀lɛ̀ yə́-púúrí də̀gwã́ y yé né ǹdə́ sə̀ zhe:

¹¹“Nə́ Cinu ǹdə́ nə́ Yi,

ǹ mə̂ dwã ǹdə́ zùwə́, ǹdə́ còrhó, ǹdə́ jàn.

Ǹmyɛ́ ǹ wɛ̀rhɛ́ kɔn gakó.

Kɔn tó dwã ǹdə́ ǹ pùbùlə̀ ń bə́ wɛ̀rhɛ́ rɛ rə̀ ŋwɛ́nɛ́.”

Kɔn dɛ̀bɛ́ rə̀ ŋwɛ́nɛ́ dɛ̃̌ yi w mú gakó nʼê cèrhé Pyì-bwɛ̀lɛ́ y bə̀ zwə́l mó

¹A nə sɛ́bɛ́ rə̀ ŋwɛ́nɛ́ mɔ̀bɔ́ ń jě pyɛ̀lɛ̀ də̀gwã́ y yó mó jə̀jĩ́ y wə, rə̀ yé y ǹdə́ rə̀ kwã y ga kɛ̃, sə bə̀ yʼà pyípyílí ri, bə pyə́l lɛ ǹdə́ pyə́lsɛ shàlpyɛ̀ sə̀ cĩ́ myaarhɛ. ²A nə màlɛ́ka èdù è wɔ́ jàn cə́bal è nʼê bya è mʼê bwə̀rh è zhe: “Mɔ̌ lò ń mə̂ ǹdə́ pyə́lsɛ́ vǔr sə n púr sɛ́bɛ́ rɛ́?”

³Sə lò yà ń tɛ̀nɛ́ dɛ̃̌ yi wə, ráá cɛ yó, ráá cɛ y kùr w ń wɔ̌ sɛ́bɛ́ rɛ́ ń la púr n kàrmə̀ yé. ⁴À gə́ pwírí lò tɛ̀nɛ́ ń mə̂ ǹdə́ sɛ́bɛ́ rɛ́ púr n kàrmə̀, a kúrh yə́-nàná. ⁵Sə náncɛ y èdù wò nè: “Bə̀ká kúrh yé. Nyǐ pyɔ̌ Dəvyidi nɔ̃̌ w Zhidə kwálá y bɔrɔ w jú bɛlɛ. Ò wɔ̌ sɛ́bɛ́ rɛ́ pyə́lsɛ́ shàlpyɛ̀ y ò la vǔr o púr re.”

⁶Rə̀myɛ́ yi ní, à nɔ Pyì-bwɛ̀lɛ́5.6 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili pyì-bwɛ̀lɛ́ gə́ wɔ́ kɔn ná-dwí yil gàà mɔ́. è zhǐ cəcəl w pyɛ̀lɛ̀ də̀gwã́ y yé né, wò-nyùùrí rə̀na y ǹdə́ náncɛsɛ́ zɛ̃̀ bə kə́kɛ́lɛ́ ya. È nyɛ̌ ǹdə wɔ́ zwə́l bə̀ yʼà zwə́l y ta; è nyimə né yʼà wɔ́ nyàlpyɛ̀, è yírhə́ né myɛ nyàlpyɛ̀. Sə è yírhə́ né wɔ́ éshìrhə́ né nyàlpyɛ̀ y Yi twĩ̀ cɛ yó jààsɛ́ gakó wẽ́ mó. ⁷E twẽ̌ e yí e zwẽ sɛ́bɛ́ rɛ́ rə̀ yʼà ŋwɛ́nɛ́ mɔ̀bɔ́ ń jě pyɛ̀lɛ̀ də̀gwã́ y yó mó jə̀jĩ́ y w mú. ⁸È gə́ zwẽ de, wẽ̀ dé rə̀na y ǹdə́ náncɛsɛ́ shí-èlyè ǹdə́ sə̀na y tu bə̀ nə̀dwə́nə́ yó, bə wùlì è yé né. Mə̀dù gakó zhe dàkɔ̀nɔ́ ǹdə́ sánə́má nə̀zhǐrh ń jɔ̃̀ wà, wẽ̀ rə̀ lwẽ́ nã́nyə̀nyɛ̀lɛ́ yʼà sú nə̀zhĩ̌sí. Rə̀myɛ́ nʼê myɛrhɛ Yi lyì bí Yi-cəəré. ⁹Sə bə̀ ju nwə̃́ nándwə̃̀ bə̀ nʼê nún bə̀ zhe:

“Ǹmyɛ́ mə̂ ǹdə́ sɛ́bɛ́ rɛ́ tɛ̀bɛ́ kǒ,

ń vùr rə̀ pyə́lsɛ́ sə̀ pyə́l lɛ mɔ́,

bə̀ wɔ́ ǹmyɛ́ bə̀ zwə́l.

Ǹ zə ǹ jal mɔ́ ń zwẽ lyì dwí dwí,

bə̀ zɔ̀mà nɛ́ wɔ́ dúdúmə́ dúdúmə́,

bə̀ shí lũ w tənèsé gakó wə.

¹⁰Ǹ ce bə jǐrh Yi tənà y lyì,

bə jǐrh vwĩ̀-zwə́lnə Yi tum dí yilə,

sə bə̀ mʼa jí pyɛ̀lɛ̀ lũ w wẽ́.”

¹¹À yʼà gwẽ̌ nʼâ nyǐ. Sə à nyɛ̀ɛ̀ màlɛ́kabá nánzhəzhɔ̌ cələ, bə̀ yʼà wɔ́ mɔ̀rh-fwààlɛ̀ nánjə̀jóló, bə̀ kə́kɛ́lɛ́ pyɛ̀lɛ̀ də̀gwã́ y ǹdə́ wò-nyùùrí rə̀na y ǹdə́ náncɛsɛ́. ¹²Bə̀ nʼê bya bə̀ zhe:

“Pyì-bwɛ̀lɛ́ y bə̀ zwə́l mó mə̂ ǹdə́ ŋwɔ̀nɔ́, ǹdə́ nə̀cɛ̀ndɛ̀,

ǹdə́ surhə, ǹdə́ jàn, ǹdə́ zùwə́, ǹdə́ còrhó!”

¹³A nyɛ̀ɛ̀ wẽ̀ dé tɛ̀bɛ́ gakó Yi wɛ̀rhɛ́ rə̀ ŋwɛ́nɛ́ dɛ̃̌ yi wə, ǹdə́ cɛ y yó ǹdə́ cɛ y kùr w mó, ǹdə́ nə̀-fɔ̀lɔ̀ w wẽ́ mó, ǹdə́ kɔn dɛ̀bɛ́ gakó rə̀ ŋwɛ́nɛ́ lũ w wẽ́ mó cələ rə̀ nʼê wə̀lə̀:

“Mɔ̀bɔ́ ń jě pyɛ̀lɛ̀ də̀gwã́ y yó mó,

ǹdə́ Pyì-bwɛ̀lɛ́ y yil bʼa du ǹdə́ còrhó,

ǹdə́ zùwə́, ǹdə́ ŋwɔ̀nɔ́,

byinə nə̀ bə zhɔ̌ zhe yilə!”

¹⁴Sə wò-nyùùrí rə̀na y wòwə̀: “Amɛ̀n!” Náncɛsɛ́ tu sə̀ nə̀dwə́nə́ yó sə cèrhé Yi ǹdə́ Pyì-bwɛ̀lɛ́ yá.

Pyì-bwɛ̀lɛ́ y vùr sɛ́bɛ́ rɛ́ pyə́lsɛ́ shə̀ldù

¹Rə̀myɛ́ yó, à nɔ Pyì-bwɛ̀lɛ́ y è vùr sɛ́bɛ́ rɛ́ pyə́lɛ́ y nã́yə́ə́ yə́. Rə̀myɛ́ yi ní, a zɛ̃̀ a nyɛ̀ɛ̀ wẽ̀ dé rə̀na y òdù cəl, ò nʼô bya ǹdə dwà ta, o búbwéé o wɔ̀: “Bà!” ²À la nyǔ, a pwírí eshə-pwã̀, mɔ̀bɔ́ ń jě y mó zhe twã ń jɔ̃̀ wà. Ń jú bɛlɛ, sə bə̀ pɔ mɔ bɛlɛ jú yə́-pú, n zhǐr ń la vò n jí bɛlɛ kə́dò.

³Pyì-bwɛ̀lɛ́ y gə́ vùr pyə́lsɛ́ sə̀lyè nyâ yá, a nyɛ̀ɛ̀ wẽ̀ dé rə̀lyè nyɔ̃̌ w cəl ò bya o wɔ̀: “Bà!” ⁴Eshã dõ du, è nyɛ̌ nánshɛ̃̀. Bə pə mɔ̀bɔ́ ń yà ń jě y mó búlə́ shù, n nə sɔ́má ń la búlə́ ju cɛ yó, mùnì ga n ce lyì bí gu dwã.

⁵Pyì-bwɛ̀lɛ́ y gə́ vùr pyə́lsɛ́ sə̀tɔ̀ nyâ yá, a nyɛ̀ɛ̀ wẽ̀ dé rə̀tɔ̀ nyɔ̃̌ w cəl ò bya o wɔ̀: “Bà!” À kʼâ la nyǔ, a pwírí eshə-byĩ́. Mɔ̀bɔ́ ń yà ń jě y mó yà ń zhe ku kɔ̀bɔ́ bə̀ mʼê myɛrhɛ kɔn dùmì ń jɔ̃̀ wà. ⁶A nyɛ̀ɛ̀ dweme ǹdə lò cəl ta rə̀ shí wẽ̀ dé rə̀na y cəcəl w rə bya rə wɔ̀: “Búrú mún nə̀zhĩ̌ yírh wɔ́ dɛ̃ rə̀dù tum wársɛ. Mún nánfò myɛ nə̀zhĩ̌ yírhə́ nə̀tɔ̀ wɔ́ dɛ̃ rə̀dù tum wársɛ. Sə nwə̃̌ y ǹdə́ sɛ̃´ mɔ́ twə́r tɛ̀nɛ́ gàà yé.”

⁷Pyì-bwɛ̀lɛ́ y gə́ vùr pyə́lsɛ́ sə̀na nyâ yá, a nyɛ̀ɛ̀ wẽ̀ dé rə̀na nyɔ̃̌ w cəl ò bya o wɔ̀: “Bà!” ⁸À kʼâ la nyǔ, a pwírí eshə-pùlí. Mɔ̀bɔ́ ń yà ń jě y mó yíl Bəcu. Sə cílú yʼà tó mo. Bə pə bɛ ŋwɔ̀nɔ́ lũ w yó. Lũ w gə yʼà wɔ̌ ò la dwã w bɔ̌n kùkùlə̀ nə̀na, wɔ́ kùkùl lé rə̀dù y bə̀ yʼà la ŋwɔ̀nɔ́ bə zə búlə́ shù ǹdə́ nɔrh ǹdə́ címsi, e súlí gɔ-wẽ̀, bə gu rə̀ lyì bí.

⁹Pyì-bwɛ̀lɛ́ y gə́ vùr pyə́lsɛ́ sə̀nu nyâ yá, a nə byɛ̀bɛ́ bə̀ yʼà ce bə gu bə̀ gə́ bwəl Yi zɔ̀mɛ̀ rɛ́, bə jʼa yə̀ Yezu zhə̀n-cínnə yil mó, vwĩ̀-jìlú w kùr wə̀. ¹⁰Bə̀ yʼà nʼê bya ǹdə́ bə̀ jàn gakó bə̀ zhe: “Nə́ yó-cə́bal, cɛ̀nɛ̀ ǹdə́ zhə̀n cə́bal, ǹ nə́ ǹ dɛ̃̀ kɔn la mʼe yí dǒ ń bə́ bùr lũ w lyì bí bùrsí, sə́ tu ǹ lyim ni bə̀ gə́ ló nə́ jal mɔ́ tɛ̃´ mó yilə?”

¹¹Bə pə lò gakó kàmə̀-zù-pwã̀, bə zɛ̃̀ bə wɔ̀ bɛ̀ bə̀ bə̀ zhìlì bə̀ yala nɛ námpɔ́lɛ́ gwẽ̌, bə̀ lyì dwã gwẽ̌ ŋwɛ́nɛ́ bə̀ da-byâ bɛ́ byɛ̀bɛ́ bə̀myɛ nʼê twĩ̀ Kristə tum dí mú wẽ́, bə̀ la gu ǹdə bə̀ gə́ gu bə̀myɛ nɛ́. Sə bə̀ gakó gwẽ̌ tɛ̀nɛ́ yé.

¹²À kʼa nə Pyì-bwɛ̀lɛ́ y kə́dò. E vùr pyə́lsɛ́ shə̀ldù nyâ yá. Sə rə̀myɛ́ yi ní, cɛ y jʼa zhízhǐ dɛ̃´dɛ̃´. Nə̀nyɔ́nɔ́ w jǐrh námbyṹ fúrí, cànà y jǐrh nánshɔ̃̀ ǹdə jal ta. ¹³Cã̀mə́sɔ̌sɛ́ nʼê kwẽ sə̀ lwé tɛ̃´ cɛ y yó ǹdə zho nánfɔ̀lɔ̀ gə́ yʼa zɛ̃̀ ò nʼô lwé épyǐl-gwə́r tɛ̃´ nɛ́. ¹⁴Dɛ̃̌ yi rí wɛ̀rhɛ́ námpɔ́lɛ́ námpɔ́lɛ́ ǹdə bə̀ gə́ yʼa pyípyílí sá-vɔ nɛ́ rə jé. Pyààrɛ́ ǹdə́ cɛmɛ nɛ́ nə̀ ŋwɛ́nɛ́ nə̀-fɔ̀lɔ̀ cəcəl w mó gakó zhǐr rə̀ jààsɛ́ wa. ¹⁵Lũ w pyâ bɛ́ ǹdə́ lyì-fwààlɛ́, ǹdə́ shə̀dɛ́ɛ́sɛ yó-cìnə́, ǹdə́ nə̀cɛ̀nà, ǹdə́ jàn cìnə́, ǹdə́ yómə́, e súlí lyì byɛ̀bɛ́ bə̀ cǐ bə̀ cìn mú gakó dùr bə shèè myə̀lə́ wẽ́ ǹdə́ nə́kuuli bwə̀lə́ w pyâr wa. ¹⁶Sə bə̀ yʼà nʼê wə̀l pyààrɛ́ ǹdə́ nə́kuulí ni, bə̀ rə̀ wǔr rə pú bi tɛ̃´ rə shèè bè, mùnì mɔ̀bɔ́ ń jě pyɛ̀lɛ̀ də̀gwã́ y yó mó bə̀ká n nə bɛ yé, sə bə lú Pyì-bwɛ̀lɛ́ y lyim dí yé né, ¹⁷bə̀ Yi ǹdə́ Pyì-bwɛ̀lɛ́ y lyi-shùùrí dɛ̃ rɛ́ nánfɔ̀lɔ̀ w wɔ́ zà. Wɔ́ mɔ̌ lò ń mà n ŋwɛ̀nɛ́ n zhì?

Lyì bí byɛ̀bɛ́ bə̀ cĩ́ Yi myɔrhɔ w bə̀ cílə́ né ne mó

¹Rə̀myɛ́ kwã nɛ́, à nɔ màlɛ́kabá bə̀na bə̀ zhǐ lũ w vɔ̀mɛ̀ nɛ́ nə̀na y wẽ́. Bə̀ yʼà zhe lũ w zhəəré rə̀na yá, mùnì rə̀ bə̀kʼa fúfǔ cɛ y ráá nə̀-fɔ̀lɔ̀ w ráá cǒ òdù ga myɛ yé. ²A nə màlɛ́ka dõ yi-pwírhí səta, è yʼà nʼê zɛ̃̀ è la dɛ̃̌. Ku w kɔ̀bɔ́ bə̀ la mʼe cĩ́ Yi nã́nyì y myɔrhɔ w rə̀ lyì bí cílə́ né ne mó ŋwɛ́nɛ́ è jɔ̃̀ wà. E bya ǹdə́ jàn e ce màlɛ́kabá bə̀na y bə̀ yʼà nɔ sɔ́má bə̀ la cɛ y ǹdə́ nə̀-fɔ̀lɔ̀ w lwɛlɛ wɔ̀rhɔ́ mɔ́ nɛ e wɔ̀: ³“Zhǐnə shɛ́ɛ́, á bə̀kʼá wɛ̀rhɛ́ lwɛlɛ cɛ y ǹdə́ nə̀-fɔ̀lɔ̀ w ǹdə́ cèmé né ne, ǹdə́ nə́ gwẽ̌ yə̀ nə́ Yi rí myɔrhɔ w rə̀ tùntùnnə̀ bé cílə́ né ne cĩ́ yé.”

⁴Sə bə̀ byili ni lyì bí byɛ̀bɛ́ myɔrhɔ w cĩ́ bə̀ cílə́ né ne mó yó. Bə̀ yʼà wɔ́ nunə mɔ̀ɔ̀rhɛ̀ zɔ̌m ǹdə́ shə́-èna ǹdə́ rə̀na (144.000). È yʼà wɔ́ Esərayɛl kwálsɛ́ gakó lyì.

⁵Zhidə kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè (12.000),

Arəbɛn kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

Gaadɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

⁶Asɛɛrɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

Nəfətəlyi kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

Manasɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

⁷Shəmənyɔ̃ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

Levyi kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

Yəsakaarɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

⁸Zabyəlɔnɛ kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

Zhozefu kwálá y wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè,

Bɛ̃zhamɛ kwálá y myɛ wẽ́, wɔ́ lyì mɔ̀ɔ̀rhɛ̀ shí ǹdə́ rə̀lyè.

Wɔ́ bə̀myɛ́ gakó cílə́ né ne bə̀ cĩ́ Yi myɔrhɔ w nɛ́.

Tənə̀rh dwí gakó lyì zhǐ Yi pyɛ̀lɛ̀ də̀gwã́ y yé né

⁹Rə̀myɛ́ kwã nɛ́, à kʼâ la nyǔ, a pwírí lyì nánjə̀jóló, lò wàr bɛ ń la gál n nə bə̀ yó yé. È yʼà wɔ́ lũ w tənèsé gakó lyì, dwə́ kùrə̀ gakó lyì, dwə́ zɔ̀mà dúdúmə́ dúdúmə́ lyì. Bə̀myɛ́ gakó yʼà zù kàmə̀-zù-pwə̀rh, bə zɛ̃̀ bə̀ zhe kwã̌ vɔr bə̀ jɛ̀rh w bə̀ mʼê zhǐ pyɛ̀lɛ̀ də̀gwã́ y ǹdə́ Pyì-bwɛ̀lɛ́ y yé né, ¹⁰bə̀ nʼê bya bə̀ zhe: “Wɔ́ nə́ Yi rí rə̀ jě pyɛ̀lɛ̀ də̀gwã́ y yó mó ǹdə́ Pyì-bwɛ̀lɛ́ y bə̀ vwârh nə́ba.” ¹¹Màlɛ́kabá gakó yʼà zhǐ bə kə́kɛ́lɛ́ pyɛ̀lɛ̀ də̀gwã́ y ǹdə́ náncɛsɛ́ ǹdə́ wò-nyùùrí rə̀na yá. Bə̀ gakó tu bə̀ nə̀dwə́nə́ yó, bə wùlì tɛ̃´ bə cèrhé Yi, ¹²bə̀ nʼê wə̀lə̀:

“Zhə̀nà, nə́ Yi rí mə̂ ǹdə́ còrhó ǹdə́ zùwə́,

ǹdə́ surhə ǹdə́ nə̀bán-co ǹdə́ ŋwɔ̀nɔ́ ǹdə́ jàn,

byinə nə̀ bə zhɔ̌ zhe yilə! Amɛ̀n!”

¹³Náncɛsɛ́ èdù zɛ̃̀ e bwə̀rh nè e wɔ̀: “Lyì bí byɛ̀bɛ́ bə̀ zù kàmə̀-zù-pwèsé èta mɔ́ wɔ́ byɛ̌ lyì? Yẽ̀ bə̀ shí ní?”

¹⁴A wɔ̀: “Yó-cə́bal, wɔ́ ǹmyɛ́ ǹ yě wɛ̀!”

Náncɛ y wɔ̀ nɛ̀: “Lyì bí bə̀myɛ́ èta mɔ́ tó nɔ̀nɔ̀ nánfɔ̀lɔ̀ wẽ́ bə lyɛ̃, bə̀ shàrh bə̀ gàndɛ́ Pyì-bwɛ̀lɛ́ y jal mɔ́ wẽ́ rə pwèlè. ¹⁵Wɔ́ rə̀myɛ́ è ce bə̀ zhǐ Yi pyɛ̀lɛ̀ də̀gwã́ y yé né, bə̀ nʼê cèrhé re cəcɛ̃ ǹdə́ nə̀nyɔ́nɔ́ ga rə̀ jì y wẽ́. Sə mɔ̀bɔ́ ń jě pyɛ̀lɛ̀ də̀gwã́ y yó mó mà n yìlì bì. ¹⁶Nɔrh ǹdə́ nə̀nyɛ̀lsɛ̀ ǹdə́ nə̀nyɔ́nɔ́ ǹdə́ cə-lumu kʼê tʼâ la bɛ zal yé, ¹⁷bə̀ Pyì-bwɛ̀lɛ́ y è zhǐ cəcəl w pyɛ̀lɛ̀ də̀gwã́ y yé né mó bʼa yə̀ bə̀ nə̀nɔ̀n e kál bɛ e bʼe vò nɛ̃̌ mɔ̀bɔ́ mə̀ nʼê pɛ nyǔ nə̀-bùlsì jàà wà. Yi bʼa pɔ́pɔ̌ bə̀ yə́-nàná nɛ́ gakó.”

Pyə́lsɛ́ shàlpyɛ̀ nyâ y vǔr

¹Pyì-bwɛ̀lɛ́ y gə́ vùr pyə́lsɛ́ shàlpyɛ̀ nyâ yá, kɔn jʼa yə̀ shɛ́ɛ́ dɛ̃̌ yi wə, kɔn dɛnɛ e yí lù òdù kə̀kàlà. ²A zɛ̃̀ a nə màlɛ́kabá bwàlpyɛ̀ y bə̀ zhǐ Yi yé né mó. Bə pə bɛ pɔ́lsɛ shàlpyɛ̀.

³Màlɛ́ka dõ bə̀ e zhì vwĩ̀-jìlú w səta ǹdə́ sánə́má nə̀zhĩ̌ bə̀ nʼê ji wẽ̀ rə̀ lwẽ́ nã́nyə̀nyɛ̀lɛ́ è wẽ́. Bə pə y wẽ̀ nánzhəzhɔ̌ rə̀ lwẽ́ nã́nyə̀nyɛ̀lɛ́. E zə rɛ e mù dwã nɛ ǹdə́ Yi lyì bí Yi-cəəré, e pə Yi ni sánə́má vwĩ̀-jìlú w yó pyɛ̀lɛ̀ də̀gwã́ y yé né. ⁴Wẽ̀ dé rə̀ lwẽ́ nã́nyə̀nyɛ̀lɛ́ y nyɛ̀ɛ̀sɛ́ yʼà nʼê shí màlɛ́ka y jɔ̃̀ w sə̀ dwi sə̀ mwì dwã nɛ ǹdə́ Yi lyì bí Yi-cəəré sə̀ zhə̀l Yi yé né.

⁵Màlɛ́ka y kwè wẽ̀ dé rə̀ lwẽ́ nã́nyə̀nyɛ̀lɛ́ y nə̀zhĩ̌ yə́, e ce myǐn mú mə̀ ju vwĩ̀-jìlú w yó mó sú yə. E dwĩ̀ nə̀zhĩ̌ y tɛ̃´ cɛ y yó. Sə kɔn yàl ǹdə wɔ́ dwà è bya e ce sɔ̀, e lyə́lyɔ̌ ta, cɛ y gakó jʼa zhízhǐ.

Màlɛ́kabá bwàlpyɛ̀ y wúl bə̀ pɔ́lsɛ́

⁶Màlɛ́kabá bwàlpyɛ̀ y pɔ́lsɛ́ ŋwɛ́nɛ́ bə̀ jɔ̃̀ w mɔ́ yʼà nʼê tɛnɛ bə̀ la sɛ wúl.

⁷Màlɛ́ka y nã́yéé gə́ wúl è pɔ́lá yá, bədũ̀kwələ ǹdə́ myǐn ǹdə́ jal gùlí dwã rə ló tɛ̃´. Cɛ y gə yʼà bɔ̀n dwã nɛ kə̀kàlsɛ̀ sə̀tɔ̀, wɔ́ kə̀kàlà èdù è ju myǐn; cèmé né myɛ gə yʼà bɔ̀n dwã nɛ kùrə̀ nə̀tɔ̀, wɔ́ kùr rə̀dù rə̀ ju myǐn. Gɔ-lyɔ̀ w gakó súlí o ji myǐn.

⁸Màlɛ́kabá bə̀lyè nyâ y gə́ wúl è pɔ́lá yá, ku òdù ò zhe myǐn, ò nyɛ̌ nánfɔ̀lɔ̀ ǹdə pyɔ̀ ta, shí dɛ̃̌ o tu nə̀-fɔ̀lɔ̀ w wa. Nə̀-fɔ̀lɔ̀ w yʼà bɔ̀n dwã nɛ kùkùlə̀ nə̀tɔ̀. Kùkùl rə̀dù jǐrh jal. ⁹Bǔ wẽ̀ dé rə̀ yʼà ŋwɛ́nɛ́ kùkùl lé rə̀myɛ́ mɔ́ wẽ́ mó gakó jʼa cì. Bǔ-bwələ né nyɛ̀bɛ́ nə̀ yʼà ŋwɛ́nɛ́ gàà mɔ́ myɛ cɔ̀.

¹⁰Màlɛ́kabá bə̀tɔ̀ nyâ y gə́ wúl è pɔ́lá yá, bə̀ gə yʼà bɔ̀n bwǐsí ǹdə́ sə̀ nə̀-bùlsí dwã w kùkùlə̀ nə̀tɔ̀, cã̀mə́sɔ̌ nánfɔ̀lɔ̀ òdù jʼa shí dɛ̃̌ ò nʼô jí ǹdə myìn-pyìlù ta, o tu rə̀ kùkùl lé rə̀dù yó. ¹¹Cã̀mə́sɔ̌ w òmyɛ́ mɔ́ yíl “Cɛ̀ɛ́”. Bwǐsí ǹdə́ sə̀ nə̀-bùlsí kùkùl rə̀dù gə́ jǐrh cɛ̀ɛ́ mɔ́ ce, lyì bí byɛ̀bɛ́ bə̀ nyɔ̀ sə̀ nɛ̃̌ mɔ́ mɔ́ nánzhəzhɔ̌ cùwə̀.

¹²Màlɛ́kabá bə̀na nyâ y gə́ wúl è pɔ́lá yá, nə̀nyɔ́nɔ́ w gə yʼà bɔ̀n dwã nɛ kə̀kàlsɛ̀ sə̀tɔ̀, wɔ́ kə̀kàlà èdù è cɔ̀. Cànà y myɛ gə yʼà bɔ̀n dwã nɛ kùrə̀ nə̀tɔ̀, wɔ́ kùr rə̀dù rə̀ cɔ̀. Cã̀mə́sɔ̌sɛ́ myɛ gə yʼà bɔ̀n dwã nɛ kə̀kàlsɛ̀ sə̀tɔ̀, wɔ́ kə̀kàlà èdù è cɔ̀. Rə̀ kə̀kàlsɛ́ shɛ̀bɛ́ sə̀ cɔ̀ mɔ́ jǐrh námbyín. Dɛ̃ gakó myɛ gə yʼà bɔ̀n dwã nɛ kə̀kàlsɛ̀ sə̀tɔ̀, wɔ́ kə̀kàlà èdù è cɔ̀. Cəcɛ̃ y myɛ nyâ y yə̀ èta.

¹³À kʼâ la nyǔ, a pwírí zhú ò ŋwɛ́nɛ́ dɛ̃̌ dɛ̃̌ yi wə. Ò nʼô bya dɛ̃´dɛ̃´ ò zhe: “Nyǐ wɔ́ zwini, wɔ́ zwini cɛ yó lyì bí yil tã̀! Màlɛ́kabá bə̀tɔ̀ y bə̀ dàl mɔ́ gə tú bə̀ wúl bə̀ pɔ́lsɛ́ yi ní, zwini bʼa zə bɛ!”

¹Màlɛ́kabá bə̀nu nyâ y gə́ wúl è pɔ́lá yá, a pwírí cã̀mə́sɔ̀wá è shí dɛ̃̌ e tu tɛ̃´. Bə pə y gɔ́rɔ́ òdù bwə̀l-byǐ. Gɔ́rɔ́ w òmyɛ́ nyɛ̌ nánlyilyìmú dɛ̃´dɛ̃´, ò kùr tʼâ nɛ yé. ²Cã̀mə́sɔ̀wá y gə́ pul gɔ́rɔ́ wá, nyɛ̀rh shí ò wẽ́ sə̀ nʼê dwi ǹdə myìn-cɔ̀lɔ̀ nyɛ̀rh ta, sə ce nə̀nyɔ́nɔ́ w ǹdə́ cɛ y ga jǐrh bùrə̀mm. ³Səsɔ̀mɛ̀ shí nyɛ̀sɛ́ wẽ́ nə du nə sú cɛ yá. Bə pə nɛ swã̀ è wɔ́ ǹdə cɛ yó nɛ̀mɛ̀ nɛ́ swã̀ y ta. ⁴Bə pə nɛ nyí bə̀ nə̀ bə̀kʼa wɛ̀rhɛ́ kaka gaarɛ́ ǹdə́ cèmé né ǹdə́ ka kɛ̀bɛ́ è nʼê lyĩ tɛ̃´ gaga nɛ yé, sə nə wɛ̀rhɛ́ lwɛlɛ lyì bí byɛ̀bɛ́ Yi myɔrhɔ w tɛ̀nɛ́ bə̀ cílə́ né ne mó dúdú ni. ⁵Sə bə̀ yə̀ nɛ sɔ́má pɛ bə̀ nə̀ gu bi yé. Wɔ́ nɔ́nɔ́ nə̀ la bɛ nɔ̀nɔ̀ cànsɛ̀ sə̀nu wẽ́, sə nɔ̀nɔ̀ w òmyɛ́ bʼa yì bì ǹdə nɔ̃̀ gə́ yʼa dɔ̃̀ o yì ní. ⁶Cànsɛ́ sə̀myɛ́ wẽ́ numbyínə́ bé bʼa pyà cu, sə bə̀ tʼâ la mɔ nɔ yé. Bə̀ bʼa nʼê yâl bə cì, sə cu mú bʼa dùr mə vò pyépyé.

⁷Səsɔ̀mɛ̀ nɛ́ nə̀myɛ́ nyɛ̌ ǹdə shəshərh shɛ̀bɛ́ sə̀ tɛnɛ sə̀ zhǐ búlə́ yil ta. Wẽ̀ yʼà pú nə̀ yó w ǹdə pyɛ̀lɛ̀ yə́-púr bə̀ zə sánə́má bə wɛ̀rhɛ́ rɛ ta. Nə̀ yésé nyɛ̌ ǹdə numbyínsi yə́rh ta. ⁸Nə̀ ywésé nyɛ̌ ǹdə kɛ̃ ywə́rh ta. Nə̀ yə́lə́ né nyɛ̌ ǹdə bɔrɔ yə́lə́ ta. ⁹Nə̀ zù wẽ̀ nə̀ nə̀báná nɛ ǹdə cə̂brɛ ta, nə̀ vɔ̀mɛ̀ nɛ́ wùlì rí wɔ́ ǹdə shəshərh nánzhəzhɔ̌ sə̀ nʼê vwɛ̃ búlə́ zhírsi ta. ¹⁰Nə̀ nə̀byílə́ né nyɛ̌ ǹdə nɛ̀mɛ̀ nə̀byílə́ ta, nə̀ nyə́ nánsə́sɔ́msɛ. Bə̀ pɔ nɛ sɔ́má nə̀ la zə nə̀ nə̀byílə́ né nə nwɛ̀nɛ̀ numbyínə́ bé cànsɛ̀ sə̀nu wẽ́. ¹¹Wɔ́ gɔ́rɔ́ w nánlyilyìmú w màlɛ́ka y è wɔ́ nə̀ pyɔ̌. Bə̀ nʼê byẽ̀ è yil lé ǹdə́ ebərə́ bə̀ “Abadɔ̃”; bə byẽ̀ dè ǹdə́ gə̀rɛ́kɛ bə̀ “Apɔlɔyɔ̃”. Rə̀ kùr wɔ́: “Cɔ̀rnà”.

¹²Zwini rí nã́yéé ré lyɛ̃, sə́ nyǐ zwini kùrə̀ nə̀lyè gwẽ̌ ŋwɛ́nɛ́ kwã nə̀ bànà.

¹³Màlɛ́kabá bwə̀ldù nyâ y gə́ wúl è pɔ́lá yá, à nyɛ̀ɛ̀ cəl rə̀ shí sánə́má vwĩ̀-jìlú w ò zhǐ Yi yé né mó vɔ̀mɛ̀ nɛ́ nə̀na y byíl-kwə́nə́ né yó, ¹⁴rə wɔ̀ màlɛ́kabá bwə̀ldù nyâ y è zhe pɔ́lá y mɔ́ nɛ: “Lwə̂r màlɛ́kabá bə̀na y bə̀ lyẽ ǹdə́ nyáná nɛ́ Efəratɛ bwǐ y yó mó ń yẽ̌.” ¹⁵Bə lwə̂r màlɛ́kabá bə̀na y nɛ bə yẽ̌. Numbyínə́ bé gə yʼà wɔ̌ bə̀ la bɔ̌n kùrə̀ nə̀tɔ̀, wɔ́ kùr rə̀dù màlɛ́kabá bə̀myɛ́ yʼà tɛnɛ bə̀ zhǐ bə̀ la gu ǹdə́ bə̀ gu mú yi rí cìcì gə tú rə̀ yúwə́.

¹⁶Shɛ̀bɛ́ sə̀ yʼà jě eshesé mó yó w bə̀ byili ni mú yʼà wɔ́ mɔ̀rh-fwààlɛ̀ zwã̌-àlyè (200.000.000). ¹⁷À nɔ eshesé ǹdə́ sə̀ jòmnə̀ bé gə́ yʼà wɔ́ nɛ́ mɔ́ à dàrhà nɛ́ wẽ́. Sə̀ jòmnə̀ bé yʼà zù cə̂brɛ kàmə̀-zǔrh nánshɛ̀rh ǹdə myǐn ta, sə jʼà nyɛ̌ námpǔlsi myɛ, sə jʼà nyɛ̌ nánshimsi ǹdə púrhú cə́m ta. Eshesé ywẽ́ né nyɛ̌ ǹdə bwaarɛ ywẽ́ ta. Myǐn ǹdə́ nyɛ̀rh ǹdə́ púrhú cə́m nʼê shí sə̀ nyú w rə̀ dwi. ¹⁸Myǐn mú ǹdə́ nyɛ̀sɛ́ ǹdə́ púrhú w cə́m mó rə̀ nʼê shí sə̀ nyú w mú wɔ́ zwini nánfwààlɛ̀ kùrə̀ nə̀tɔ̀. Rə̀myɛ́ jʼa gu numbyínə́ bé bə̀ bɔ̀n kùrə̀ nə̀tɔ̀ w mɔ́ kùr rə̀dù. ¹⁹Eshesé lwɛlɛ rɛ́ jàn dɛ́ wɔ́ sə̀ nyə́ né ǹdə́ sə̀ nə̀byílə́ né wẽ́ rə̀ ŋwɛ́nɛ́. Sə̀ nə̀byílə́ né nyɛ̌ ǹdə dɔma ta, nə̀ zhe ywẽ́, wɔ́ nə̀myɛ́ sə̀ bʼê nwɛ̀nɛ̀ lyì bí.

²⁰Sə lyì bí byɛ̀bɛ́ bə̀ dàl zwini rí rə̀myɛ́ yə̀ gwi mú, cẽ bə̀ yə̀ bə̀ wun pyìrhí yé, bə jʼâ gwẽ̌ nʼê zwə́l nə̀cílsi námməlwâlsɛ, ǹdə́ wẽ̀ tɛ̀bɛ́ rə̀ də̀ Yi, nə̀ yírhə́ bɛ̃´ nɛ, nə̀ zhã̌ bə nyɛ̌, nə̀ jʼà tʼâ zhə̀l yé. Wẽ̀ dé rə̀myɛ́ mɔ́ wɔ́ bə̀myɛ́ cìcì bə̀ zə sánə́má ǹdə́ cə̀byì-shɔ̃̀ ǹdə́ kã̀mɔ, ǹdə́ dɔ̌ ǹdə́ nə́kulu bə mʼe wɛ̀rhɛ́ rɛ. ²¹Lyì bí bə̀myɛ́ mɔ́ jʼâ gwẽ̌ yə̀ lyì-guurí ǹdə́ càl-tumə né wɔ̀rhɔ́ mɔ́ ǹdə́ fwə̂l mó ǹdə́ ŋwɔ̀lɛ̀ rɛ́ nɛ dwĩ̀ yé.

Màlɛ́ka dõ shí dɛ̃̌, sá-pyíl yʼà púr rə̀ ŋwɛ́nɛ́ è jɔ̃̀ wà

¹Rə̀myɛ́ kwã nɛ́, a pwírí màlɛ́ka dõ è shí dɛ̃̌ ǹdə́ jàn nánfɔ̀lɔ̀ è bàn tɛ̃´. Ébɔ̃ pú yə, dɔm-cɛ̃ kə́kɛ́lɛ́ è yó w rə̀ nʼê jə́jɛ̀mɛ́, è yé y nyɛ̌ ǹdə nə̀nyɛ́nɛ́ ta, è cə́ né nyɛ̌ ǹdə myìn-zhùr ta. ²Sá-pyíl námpɔ́lɛ́ yʼà púr rə̀ ŋwɛ́nɛ́ è jɔ̃̀ wà. E cĩ́ è jə̀jĩ́ nà y nə̀-fɔ̀lɔ̀ w yó, e cĩ́ è jə̀gwã̀ nà y cɛ y yó. ³E bya dɛ̃´dɛ̃´ ǹdə wɔ́ bɔrɔ ò swər ta. Rə̀ yó, dwà jʼa bya twər tàlpyɛ̀, e zɔ̀m a nyɛ̀ɛ̀. ⁴Rə̀myɛ́ kwã nɛ́, a zɛ̃̀ à la kɔn dɛ́ dɛ̀bɛ́ dwà y byili twər tàlpyɛ̀ y mɔ́ kãɔ̃. Rə̀myɛ́ yó, cəl shí dɛ̃̌ yi w rə wɔ̀ nɛ̀: “Shèè kɔn dɛ́ dɛ̀bɛ́ dwà y byili twər tàlpyɛ̀ y mɔ́ ǹ wẽ́, sə ǹ bə̀ká ń kɛ̃ dɛ yé.”

⁵Rə̀myɛ́ yi ní, màlɛ́ka y à yʼà nɔ è zhǐ nə̀-fɔ̀lɔ̀ w ǹdə́ cɛ y yó mó, zhẽ̌ è jə̀jĩ́ e ce yi wə, ⁶e bwəl nyí Yi rí tɛ̀bɛ́ rə̀ ŋwɛ́nɛ́ twéé twéé, rə̀ wɛ̀rhɛ́ dɛ̃̌ ǹdə́ cɛ ǹdə́ nə̀-fɔ̀lɔ̀ wá, ǹdə́ wẽ̀ dé tɛ̀bɛ́ gakó rə̀ ŋwɛ́nɛ́ mɔ́, yil yilə e wɔ̀: “Yi rí yúwə́! ⁷Màlɛ́kabá bwàlpyɛ̀ nyâ y gə tú è wúl è pɔ́lá yá, Yi bʼa pyìrh ywẽ̀ né nə̀ shèè mó ǹdə rə̀ gə́ byili rə̀ nyì-zwennə bé bə̀ nʼê twĩ̀ rə̀ tum dí mú ni.”

⁸Cəl lé à jɛ̀rɛ̀ a nyɛ̀ɛ̀ rə̀ shí dɛ̃̌ yi w mú kʼe wɔ̀ nɛ̀: “Zhəl ń zwẽ sá-pyíl lé námpɔ́lɛ́ y rə̀ púr rə̀ ŋwɛ́nɛ́ màlɛ́ka y è zhǐ nə̀-fɔ̀lɔ̀ w ǹdə́ cɛ y yó mó jɔ̃̀ w mɔ́.”

⁹A zɛ̃̀ a yí màlɛ́ka y nyí ni, a lwə̀l y sɛ́bɛ́ rɛ́. E wɔ̀ nɛ̀: “Zwẽ ń dɔ̃̀ ń lyì. Rə̀ bʼa yə̀ jwàrɛ̀ ǹ nyú w ǹdə tùr ta, sə rə̀ gə yú ǹ wẽ́, rə̀ bʼa jǐrh cɛ̀ɛ́.”

¹⁰A jʼa zwẽ de è jɔ̃̀ w a dɔ̃̀ a lyì. Rə̀ yʼà nyɛ̌ jwàrɛ̀ à nyú w ǹdə tùr ta, sə rə̀ gə́ yú à wẽ́, rə jǐrh cɛ̀ɛ́.

¹¹Bə zɛ̃̀ bə wɔ̀ nɛ̀: “Ǹ gwẽ̌ mə̂ sə́ byili kɔn dɛ́ dɛ̀bɛ́ Yi nʼê yâl bə̀ ǹ byili lyì nánzhəzhɔ̌ ǹdə́ cɛmɛ nánzhəzhɔ̌ ǹdə́ dwə́ nánzhəzhɔ̌ ǹdə́ pyâ nánzhəzhɔ̌ shò-kwã nɛ́ mɔ́.”

Yi zhə̀n-cínnə bə̀lyè yə́

¹Rə̀myɛ́ kwã nɛ́, bə̀ kwè nyɔ̃ dɔ̌ nándə̀dɔ̀lɔ̀ bə̀ mʼê mɛrhɛ wẽ̀ bə pɛ̃. Bə wɔ̀ nɛ̀: “Zɛ̃̀ ń vò ń mɛrhɛ Yi jì y ǹdə́ vwĩ̀-jìlú wə́, sə́ gə̀ lyì bí byɛ̀bɛ́ bə̀ ŋwɛ́nɛ́ Yi jì y wẽ́ bə̀ nʼê cèrhé Yi mú, ²sə́ yẽ̌ Yi jì y kɔ̀nɔ́ w nɛ. Bə̀ká mɛrhɛ w yé, bə̀ bə̀ pɔ òmyɛ́ byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár mɔ́ nɛ. Bə̀ mʼa zù cɔ w à cír mó wẽ́ bə zhìlì w cànsɛ̀ shə́-èna ǹdə́ sə̀lyè. ³Sə à bʼa twĩ̀ à zhə̀n-cínnə bə̀lyè bə̀ zù wu-zhìlù kàmə̀-zǔrh, bə̀ mʼa byili zɔ̀mà nɛ́ nyɛ̀bɛ́ à byili bi mú dwã mɔ̀rhɔ̀ ǹdə́ zwã̌-àlyè ǹdə́ shí-shə̀ldù (1.260).”

⁴Zhə̀n-cínnə bé bə̀myɛ́ mɔ́ wɔ́ cèmé né nyɛ̀bɛ́ bə̀ nʼê byẽ̀ bə̀ olyivyə́r mó nə̀lyè y ǹdə́ pàntámsɛ́ sə̀lyè y sə̀ zhǐ lũ w Cinu mú yé né mó. ⁵Lò gə nə́ ń yâl n wɛ̀rhɛ́ bɛ lwɛlɛ, myǐn nʼê shí bə̀ nyú w mə̀ dwi mə gu bə̀ zwə̀ bé. Zhə̀nà, lò mɔ̀bɔ́ ń nə́ ń yâl n wɛ̀rhɛ́ bɛ lwɛlɛ, wɔ́ èta mə̀ bʼa gu ńmyɛ nɛ́. ⁶Zhə̀n-cínnə bé bə̀myɛ́ gə tú bə̀ ju kùr bə̀ nʼê byili zɔ̀mà nɛ́ nyɛ̀bɛ́ Yi byili bi mú, bə̀ zhe ŋwɔ̀nɔ́ bə̀ wɔ̌ bə̀ cə̀r dwà y è tʼâ la nyɔ́ rə̀myɛ́ yi ní yé. Bə̀ wɔ̌ bə̀ ce nɛ̃̌ jǐrh jal. Bə̀ gə nʼê yâl gakó, bə̀ wɔ̌ bə̀ ce zwini dwí gakó zal lũ wə́.

⁷Sə bə̀ gə tú bə̀ byili Yi zɔ̀mɛ̀ rɛ́ bə̀ zhɛ̀, gɔ-ku w nánjə́gɔ́rɔ́ w ò shí gɔ́rɔ́ w nánlyilyìmú w ò bə kùr zhe mó wẽ́ o du mú, bʼa zɛ̃̀ búlə́ ne ǹdə́ bɛ, sə ò bʼa ŋwɛ̀nɛ́ bɛ, o gu bi o ló tɛ̃´. ⁸Bə̀ bʼa mɛ̃ tɛ̃´ cə-fɔ̀lɔ̀ w lyì bí dwã-joló jàà wà, bə̀ gə́ pəpa bə̀ Cinu mú də̀-jɔrhɔ́ w yó mə̀gã̌. Cɔ w òmyɛ́ nyɛrhɛ Sɔdɔm ǹdə́ Ezhibti, bə zɛ̃̀ bə zə cɛmɛ nɛ́ nə̀myɛ́ yilə né bə̀ mʼê byẽ̀ wə̀.

⁹Rə̀myɛ́ yó, lũ w tənə̀rh gakó lyì, dwə́ kùrə̀ gakó lyì, dwə́ zɔ̀mà dúdúmə́ dúdúmə́ lyì mʼa bə̀ e nyǐ bə̀ cùùrí tɛ̃´ dwã nə̀tɔ̀ ǹdə́ fwã́. Bə̀ tʼâ la yõ̌ bə ce be lú-bɔ̀là wẽ́ yé. ¹⁰Sə lũ w lyì bí wun bʼa yə̀ nyɛ̀n bə̀myɛ́ bə̀lyè y cu mú yilə. Bə̀ mʼa fùù ǹdə́ wu-nyɔ̃̀, bə̀ mʼa pə pansɛ dwã nɛ bə mʼe ce dwã, bə̀ lyì bí bə̀lyè y èta mɔ́ yʼà nwɛ̀nɛ̀ bɛ̀ dɛ̃´dɛ̃´. ¹¹Sə dwã nɛ́ nə̀tɔ̀ y ǹdə́ nángwə̀mə́ y gə́ lyɛ̃, Yi ce éshìrhə́ só rə̀ nyì-zwennə bé cùùrí yó e pə bɛ nyǔ, bə zɛ̃̀ bə̀ zhǐ dɛ̃̌. Ywẽ nánfɔ̀lɔ̀ zə byɛ̀bɛ́ bə̀ yʼà nʼê nyǐ bi mú.

¹²Rə̀myɛ́ kwã nɛ́, Yi nyì-zwennə bé bə̀lyè y nyɛ̀ɛ̀ cəl nánfɔ̀lɔ̀ rə̀ shí dɛ̃̌ yi wə, rə wɔ̀ bɛ: “Zɛ̃̀nà a bə̀ dɛ̃̌ nyɔ̀nɔ̀.” Bə jʼa zɛ̃̀ bə zù bə́ban wẽ́ bə vò dɛ̃̌ yi wə, ǹdə́ bə̀ zwə̀ bé zhǐ bə̀ nʼê nyǐ. ¹³Rə̀myɛ́ yó cìcì, cɛ y zhízhǐ dɛ̃´dɛ̃´. Cɔ w gə yʼà wɔ̌ ò la dwã w bɔ̌n kə̀kàlsɛ̀ shíyə́, wɔ́ kə̀kàlà èdù è wǔr. Sə wɔ́ nunə mɔ̀ɔ̀rhɛ̀ tàlpyɛ̀ (7.000) cɛ y zhízhǔ mú guwə. Ywẽ zə byɛ̀bɛ́ bə̀ dàl mɔ́, bə zɛ̃̀ bə̀ nʼê cèrhé Yi rí rə̀ ŋwɛ́nɛ́ dɛ̃̌ mɔ́.

¹⁴Zwini kùrə̀ nə̀lyè nyân dɛ́ lyɛ̃. Sə́ nyǐ kùrə̀ nə̀tɔ̀ nyân dɛ́ myɛ yú rə zhɛ̀.

Màlɛ́kabá bwàlpyɛ̀ nyâ y pɔ́lá yá

¹⁵Màlɛ́kabá bwàlpyɛ̀ nyâ y wúl è pɔ́lá yá. Cələ shí dɛ̃̌ yi w nə bya nə wɔ̀: “Èlâsɛ̃´, wɔ́ nə́ Cinu Yi ǹdə́ ń Kristə mó bə̀ cǐ lũ wə́. Yi bʼa jí pyɛ̀lɛ̀ byinə nə̀ bə zhɔ̌ zhe yilə.”

¹⁶Náncɛsɛ́ shí-èlyè ǹdə́ sə̀na y sə̀ jě sə̀ pyɛ̀lɛ̀ də̀gwésé yó Yi yé né mó zɛ̃̀ sə tu sə̀ nə̀dwə́nə́ yó, sə zə sə̀ yə́rh sə pú tɛ̃´, sə̀ nʼê cèrhé Yi ¹⁷sə̀ zhe:

“Cinu Yi jàn-bə-swɛ̃´-zhe cə́bal,

ǹmyɛ́ mɔ̀bɔ́ ǹ yà ǹ ŋwɛ́nɛ́, ń jà ǹ gwẽ̌ ŋwɛ́nɛ́ mɔ́,

nə́ rʼé ce ǹ nə̀báná, ǹ gə́ zə ǹ jàn dɛ́ nánfɔ̀lɔ̀ w ń zwẽ lũ w ǹ cǐ mú yilə.

¹⁸Lũ w lyì bí lyimə yʼà zɛ̃̀ dɛ̃´dɛ̃´,

sə èlâsɛ̃´, wɔ́ ǹmyɛ́ nyân dɛ́ rə̀ zɛ̃̀.

Wɔ́ èlâsɛ̃´ ǹ la byɛ̀bɛ́ bə̀ cù mú bùrsí kɔ́,

ń pə kwândɛ byɛ̀bɛ́ bə̀ wɔ́ lyì-fwààlɛ̀

ǹdə́ byɛ̀bɛ́ bə̀ yə̀ yírh swí,

bə jʼà wɔ́ ǹ nyì-zwennə bə̀ twĩ̀ ǹ tum dí mú,

ǹdə́ byɛ̀bɛ́ bə̀ wɔ́ ǹ lyì bí,

bə̀ nʼê nyàm mɔ́ ǹdə́ bə̀ wun gakó mó ne.

Wɔ́ èlâsɛ̃´ ǹ la byɛ̀bɛ́ bə̀ nʼê cɔ̀ lũ w mú yò zhìlù.”

¹⁹Yi jì y Arəzana w mɔ́ pul. Bə nə Yi dɔbrɛ́ kùlkṍ w è wẽ́.11.19 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili Yi dɔbrɛ́ kùlkṍ w gə́ yʼà wɔ́ kɔn ná-dwí yil gàà mɔ́. Rə̀myɛ́ yó, dwà ce dweme, è nʼê lyə́lyɔ̌, e ce sɔ̀; cɛ y zhízhǐ; dwà nánfwɛ̀lɛ̀ nyɔ̀, e ló bədũ̀kwələ tɛ̃´.

Màlɛ́kabá yìrh Shətana ǹdə́ è màlɛ́kabá ga bə ló tɛ̃´ cɛ yó

¹Myɔrhɔ nánfɔ̀lɔ̀ du dɛ̃̌ yi wə: à nɔ kɛ̃ mə̀dù ń zù nə̀nyɛ́nɛ́ y ǹdə kàmə̀-zwǐ ta. N nɔ̀ cànà y tɛ̃´ ǹdə́ ń nə̀rh. N bə yó-kwə̀lə́ è zhe cã̀mə́sɔ̌rh shí ǹdə́ sə̀lyè. ²Ń yà ń zhe pǔ, sə ń pwǐ y yʼà nʼê yì.

³Myɔrhɔ dõ du dɛ̃̌ yi wə: à nɔ dɔm nánjə́gɔ́rɔ́ nánshɔ̃̀ ǹdə myǐn ta. Mə̀ ywẽ́ né wɔ́ nyàlpyɛ̀. Mə̀ nyimə né wɔ́ shíyə́. Mə̀ yó òdù gakó pú pyɛ̀lɛ̀ yə́-pú. ⁴Mə̀ nʼê zə mə̀ nə̀byíl lé mə̀ zwàr cã̀mə́sɔ̌sɛ́ kùkùl rə̀dù mə̀ lwé tɛ̃´ cɛ y yó, ǹdə́ bə̀ gə yʼà bɔ̀n sɛ̀ kùkùlə̀ nə̀tɔ̀. Mə̀ yʼà zhǐ kɛ̃ mɔ́ ń pwǐ y nʼê yì mú yé né, mùnì ga ń gə lùlə̀, sə mə kwè ń bə̀sɔ́bwɛ̀lɛ́ y mə lyì. ⁵Sə kɛ̃ mɔ́ lùl bal-byǐ. Wɔ́ byǐ mú ńmyɛ̌ ń mà n cìní cɛmɛ nɛ́ gakó lyì bí ǹdə́ jàn nánkùlù. Sə bə̀ gə́ lùl bə̀sɔ́bwɛ̀lɛ́ yá, Yi kwè y e vò dɛ̃̌ rə̀ sõ, rə̀ gə́ jě rə̀ pyɛ̀lɛ̀ də̀gwã́ y yó mə̀gã̌. ⁶Kɛ̃ mɔ́ dùr n vò gɔ-elũ èpòlò w wə, bə̀ Yi yʼà tɛnɛ jàà gàà mɔ́ ń yilə, mùnì bə pɔ̃ kùjú n jí dwã mɔ̀rhɔ̀ ǹdə́ zwã̌-àlyè ǹdə́ shí-shə̀ldù (1.260).

⁷Rə̀myɛ́ kwã nɛ́, búlə́ zɛ̃̀ dɛ̃̌ yi wə. Màlɛ́ka Myishəə ǹdə́ ń tó-dwã bɛ́ zɛ̃̀ búlə́ ne ǹdə́ dɔm mɔ́ nánjə́gɔ́rɔ́ w ǹdə́ òmyɛ́ màlɛ́kabá. ⁸Sə bə̀ ŋwɛ̀nɛ́ dɔm mɔ́. Mə̀myɛ́ ǹdə́ mə̀ màlɛ́kabá kʼê yə̀ jàà nɛ dɛ̃̌ yi w yé. ⁹Bə yìrh mə̀myɛ́ ǹdə́ mə̀ màlɛ́kabá ga bə ló tɛ̃´ cɛ y yó. Dɔm mɔ́ mə̀myɛ́ jʼâ ŋwɛ́nɛ́ lũ w kùr-ju yi ní ga. Bə̀ nʼê byẽ̀ mò bə̀ zù-bal ráá Shətana. Mə̀ nʼê yǔr lũ w lyì bí gakó.

¹⁰A zɛ̃̀ a nyɛ̀ɛ̀ cəl dɛ̃̌ yi w rə̀ bya rə wɔ̀: “Èlâsɛ̃´, nə́ vwârh mɔ́ yi yúwə́; èlâsɛ̃´, nə́ Yi rí nʼê jí pyɛ̀lɛ̀ ǹdə́ jàn nánfɔ̀lɔ̀; èlâsɛ̃´, mɔ̀bɔ́ rə̀ cír mó byili ń ŋwɔ̀nɔ́ wá. Nyǐnə bə̀ yìrh mɔ̀bɔ́ ń yà ń nə́ ń cĩ́ ywẽ̀ né nə́ da-byâ bɛ́ yó w Yi yé né cəcɛ̃ ǹdə́ nə̀nyɔ́nɔ́ ga mɔ́ bə ji tɛ̃´ cɛ y yó. ¹¹Nə́ da-byâ bɛ́ ŋwɛ̀nɛ́ mɔ Pyì-bwɛ̀lɛ́ y jal mɔ́ jàn yilə, ǹdə́ bə̀ gə́ yàl Yi zɔ̀mɛ̀ rɛ́ zhə̀n-cínnə mó yilə. Bə̀ shɛ̀nɛ́ cu, bə̀ yə̀ bə̀ myə̀lə́ né ne gá yé. ¹²Rə̀myɛ́ ce, dɛ̃̌ yi rí ǹdʼámyɛ̌ byɛ̀bɛ́ á ŋwɛ́nɛ́ rə̀ wẽ́ mó ga, fǔnə ǹdə́ wu-nyɔ̃̀. Sə ámyɛ̌ cɛ y ǹdə́ nə̀-fɔ̀lɔ̀ wá, zwini bʼa zə ámyɛ̌ ga, bə̀ Shətana y só tɛ̃´ á sõ ǹdə́ lyi-yìr. È yě bə̀ kɔn gə yàl námpɔ́lɛ́, è kʼê tʼâ la yé nɔ yé.”

¹³Dɔm mɔ́ gə́ pwírí bə̀ yìrh mò bə ji tɛ̃´ cɛ y yó, mə zɛ̃̀ mə pú kɛ̃ mɔ́ ń lùl bal-byǐ y mú kùr mə̀ nʼê jì. ¹⁴Bə pə zhú vɔ̀mɛ̀ kɛ̃ mɔ́ nɛ, n mə n zɛ̃̀ n vò jàà y bə̀ tɛnɛ ń yil gɔ-elũ èpòlò w wẽ́ mó wə, bə̀ gə́ la mɔ kùjú w pɔ n jí byinə né nə̀tɔ̀ ǹdə́ fwã́ y mə̀gã̌ mɔ́, mùnì ga n lú dɔm mɔ́ yé né.

¹⁵Rə̀myɛ́ yó, dɔm mɔ́ carh nɛ̃̌ tɛ̃´ kɛ̃ mɔ́ kwã nɛ́, mə jǐrh ǹdə nə̀-wùlmə̀ ta, mùnì mə kwè mò. ¹⁶Cɛ y zɛ̃̀ e wə̂rh è nyí e nyɔ̀ nɛ̃̌ mɔ́, e zwẽ kɛ̃ mɔ́ e dwĩ̀. ¹⁷Dɔm mɔ́ lyim yʼà nʼê yì mù dɛ̃´dɛ̃´, mə zɛ̃̀ mə kʼa kwɛ̃̀ mə bʼè nʼê bwí ǹdə́ ń byâ bɛ́ byɛ̀bɛ́ bə̀ dàl bə̀ nʼê zwẽ Yi nyə́ né, bə jʼà zhǐ bə̀ nà y yó zhə̀n dɛ́ Yezu byili mú wẽ́ mó. ¹⁸Mə zɛ̃̀ mə jʼa bʼè zhǐ nə̀-fɔ̀lɔ̀ w vɔ̃̀ nɛ̀.

Bǔ-ku w nánjə́gɔ́rɔ́ w ò shí nə̀-fɔ̀lɔ̀ w wẽ́ mó

¹Rə̀myɛ́ kwã nɛ́, a kʼa nə bǔ-ku nánjə́gɔ́rɔ́ ò shí nə̀-fɔ̀lɔ̀ w wẽ́ ò nʼô dwi. Ò ywẽ́ né wɔ́ nyàlpyɛ̀ ǹdə́ ò nyimə shíyə́. Ò nyu òdù gakó pú pyɛ̀lɛ̀ yə́-pú. Bə̀ kɛ̃ yilə nyɛ̀bɛ́ nə̀ nʼê tùrh Yi ò ywẽ́ né nyàlpyɛ̀ y gakó ne. ²Bǔ-ku w à nɔ mɔ́ nyɛ̌ ǹdə jə̀l ta. Ò nə̀-pyìlsí nyɛ̌ námpə́pâr ǹdə cílə́-kùlú nə̀-pyìlsì ta. Ò nyí rí zɛ̃̀ rə̀ nyɛ̌ ǹdə bɔrɔ nyí ta. Dɔm mɔ́ nánjə́gɔ́rɔ́ w pə w mə̀ jàn dɛ́ nánfɔ̀lɔ̀ w ǹdə́ mə̀ pyɛ̀lɛ̀ rɛ́, e súlí mə̀ ŋwɔ̀nɔ́ w gakó. ³Bǔ-ku w yó w òdù nyɛ̌ ǹdə ò yʼà cɛ̀mɛ̀ ò la cú ta, sə ò kʼa wárh. Lũ w lyì bí swéné rə̀myɛ́, bə jʼa tó ò kùrə̀. ⁴Lyì bí gakó wùlì tɛ̃´ bə cèrhé dɔm mɔ́ nánjə́gɔ́rɔ́ wá, mə̀ gə́ pɔ ŋwɔ̀nɔ́ w bǔ-ku w ni mú yilə. Bə zɛ̃̀ bə̀ nʼê cèrhé bǔ-ku w myɛ bə̀ zhe: “Wɔ́ mɔ̌ ń mà n zə ń cìn n myɛrhɛ bǔ-ku wə́? Mɔ̌ lò ń wɔ̌ ń mà n bú ǹdə́ wa?”

⁵Bə zɛ̃̀ bə pə sɔ́má bǔ-ku w ni, ò la mʼo zɔ̀m cìn-byilu zɔ̀mà, sə o fulsi Yi. Ò nɔ sɔ́má ò la rə̀myɛ́ tũ̌ cànsɛ̀ shə́-èna ǹdə́ sə̀lyè. ⁶O ji kùr ò nʼô tùrh Yi, ò nʼô fulsi rə̀ yil lé, ǹdə́ rə̀ gə́ jě má mɔ́, ǹdə́ lyì bí byɛ̀bɛ́ gakó bə̀ ŋwɛ́nɛ́ gàà Arəzana w mɔ́. ⁷Bə pɔ w sɔ́má ò la bú ǹdə́ Yi lyì bí myɛ, sʼo ŋwɛ̀nɛ́ bɛ. Ò nɔ ŋwɔ̀nɔ́ lũ w tənèsé gakó lyì bí yó, dwə́ kùrə̀ gakó lyì bí yó, dwə́ zɔ̀mà dúdúmə́ dúdúmə́ lyì bí yó. ⁸Lũ w lyì bí byɛ̀bɛ́ gakó bə̀ yilə né yə̀ nyǔ mə̀ tʼâ la zhɔ̌ sɛ́bɛ́ rɛ́ wẽ́ kɛ̃ kùr-ju yi ní ga mɔ́ bʼa wùlì tɛ̃´ ò yé né bə cèrhé wə. Sɛ́bɛ́ rɛ́ rə̀myɛ́ wɔ́ Pyì-bwɛ̀lɛ́ y bə̀ zwə́l mó è cǐ ri.

⁹Lò mɔ̀bɔ́ ǹ zhe zhã̌, sə́ cili! ¹⁰Kɔn gə wɔ́ Yi pùbùlə̀ bə̀ lò twĩ̌ byə̀nə́-jì, ǹ bʼâ twĩ̀ yə̀. Kɔn gə wɔ́ Yi pùbùlə̀ bə̀ bə̀ gu lò ǹdə́ shù, bə̀ bʼa gu mu ǹdə́ wa. Rə̀myɛ́ ce, byɛ̀bɛ́ bə̀ wɔ́ Yi lyì bí mú mə̂ sə bə pyɛ́nɛ́ bə zhí Yi ni.

Ku w kɔ̀bɔ́ ò shí tɛ̃´ cɛ y wẽ́ mó

¹¹Rə̀myɛ́ kwã nɛ́, à kʼa nə ku dõ ò shí tɛ̃´ cɛ y wẽ́ ò nʼô dwi. Ò yʼà zhe nyimə nə̀lyè ǹdə pyì-bwɛ̀lɛ́ nyimə ta. Sə ò yʼà nʼô zɔ̀m ǹdə dɔm nánjə́gɔ́rɔ́ ta. ¹²Ò yʼà zhe bǔ-ku w jàn dɛ́. Wɔ́ rə̀myɛ́ ò yʼà mʼô twĩ̀ bǔ-ku w yé né. Bǔ-ku w yʼà cɛ̀mɛ̀ ò la cú, sə ò kʼa wárh. Ku w kɔ̀bɔ́ ò shí tɛ̃´ cɛ y wẽ́ mó nyɛ́ɛ́ lũ w lyì bí púlə́púlə́ bə wùlì tɛ̃´ bə cèrhé bǔ-ku wə́. ¹³Ku w ò shí tɛ̃´ cɛ y wẽ́ mó yʼà nʼô wɛ̀rhɛ́ wò-jààrɛ̀. O ce myǐn shí dɛ̃̌ yi w mə só tɛ̃´ lyì bí gakó yírh wə. ¹⁴Ò yʼà nʼô zə wò-jààrɛ́ ò nɔ ŋwɔ̀nɔ́ o wɛ̀rhɛ́ bǔ-ku w yé né mó ò yǔr lũ w lyì bí, o wɔ̀ bɛ bə̀ bə̀ mɔ bǔ-ku w bə̀ yʼà cɛ̀mɛ̀ ǹdə́ swé ré o kʼa wárh mɔ́ nyɔrhɔ. ¹⁵Ku w ò shí tɛ̃´ cɛ y wẽ́ mó nə ŋwɔ̀nɔ́ o ce bǔ-ku w nyɔrhɔ w bə̀ mɔ mɔ́ zɛ̃̀ ò nʼô shìrhə́, ò nʼô zɔ̀mà. Lò mɔ̀bɔ́ gakó ń tá ń yâl n cèrhé wə, ò wɔ̌ ò gwi mu. ¹⁶O nyɛ́ɛ́ lyì bí púlə́púlə́, náncɛrh ǹdə́ bə̀sɔ́ná, nə̀cɛ̀nà ǹdə́ nə̀mwà, lyì byɛ̀bɛ́ bə̀ cǐ bə̀ cìnə̀, ǹdə́ yómə́ ga, bə cĩ́ myɔrhɔ bə̀ jə̀jĩ́sí ráá bə̀ cílə́ né ne. ¹⁷Myɔrhɔ w òmyɛ́ mɔ́ wɔ́ bǔ-ku w yil lé, ráá ò yil lé gál-byâ bɛ́. Lò mɔ̀bɔ́ ǹ gə zɛ̃̀ ǹ bə myɔrhɔ w òmyɛ́ mɔ́ zhe, ǹ wàr ǹ la dɔ̌l yé.

¹⁸Èlâsɛ̃´, wɔ́ surhə cìnə́ bə̀ wɔ̌ bə̀ mʼa lwar ywẽ né nyɛ̀bɛ́ kùrə̀. Bǔ-ku w yil lé gál-byâ bɛ́ wɔ́ numbyíní yil. Ò gál-byâ bɛ́ wɔ́ zɔ̃̌-nyə̀ldù ǹdə́ shí-shə̀ldù ǹdə́ bwə̀ldù (666). Lò mɔ̀bɔ́ ǹ zhe lárma ǹ wɔ̌ ǹ lwar rə̀ yé-shò.

Pyì-bwɛ̀lɛ́ y lyì bí nʼê nún nwə̃́ nándwə̃̀ bə̀ mʼê cèrhé Yi

¹A zɛ̃̀ à kʼâ la nyǔ, a pwírí Pyì-bwɛ̀lɛ́ y è zhǐ Səyɔ̃ pyɔ̀ w yó.14.1 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili Səyɔ̃ kùr gə́ nʼê yâl e wɔ̀ nɛ́ gàà mɔ́. Lyì mɔ̀ɔ̀rhɛ̀ zɔ̌m ǹdə́ shə́-èna ǹdə́ rə̀na (144.000) tó y bə̀ zhǐ. Sə èmyɛ́ ǹdə́ è Da ga yilə né yʼà kɛ̃ bə̀ cílə́ né ne. ²A zɛ̃̀ a nyɛ̀ɛ̀ cəl rə̀ shí dɛ̃̌ yi wə, ǹdə wɔ́ nə̀-fɔ̀lɔ̀ nɛ̃̌ mə̀ nʼê dom, ráá dwà è bya dɛ̃´dɛ̃´ ta, rə jʼà nyɛ̌ ǹdə wɔ́ dàkɔ̌ndɛ rə̀ cìnə́ nʼê dwí ta. ³Lyì bí bə̀myɛ́ nánjə̀jóló w zɛ̃̀ bə̀ nʼê nún nwə̃́ nándwə̃̀ pyɛ̀lɛ̀ də̀gwã́ y ǹdə́ wò-nyùùrí rə̀na y ǹdə́ náncɛsɛ́ yé né. È gə də̀ lyì bí mɔ̀ɔ̀rhɛ̀ zɔ̌m ǹdə́ shə́-èna ǹdə́ rə̀na y (144.000) Yi vwârh cɛ yó mó dúdú, lò lò wàr nwə̃́ y èmyɛ́ ń la nún yé.

⁴Lyì bí bə̀myɛ́ mɔ́ wɔ́ lyì byɛ̀bɛ́ bə̀ zɔ bə̀ cìn náàcɛ̀nɛ́, bə̀ yə̀ kɛ̃ dwə̀rh gaga yé. Bə̀ nʼê tó Pyì-bwɛ̀lɛ́ y nɛ bə̀ zhə̀l è gə́ la mə̀gã̌ gakó. Yi vwârh bɛ cɛ yó, rə cĩ́ bə̀ dúdú rə̀ cìcì ǹdə́ Pyì-bwɛ̀lɛ́ y yilə. ⁵Kɔma də́-byǐ yə̀ bə̀ nyú w shí yé. Bə̀ bə yò zhe lò la byilu yé.

Màlɛ́kabá bə̀tɔ̀ bwə̀l bə byili bə̀ bùrsí kɔ́ yi yúwə́

⁶Rə̀myɛ́ kwã nɛ́, a nə màlɛ́ka dɛ̃̌ dɛ̃̌ yi wə. Wɔ́ yò-ècɔ̀nɔ̀ nyí tɛ̀bɛ́ rə̀ zhe kùr twéé twéé è yʼà zhe è la byilu. Sə wɔ́ lũ w tənə̀rh gakó lyì, dwə́ kùrə̀ gakó lyì, dwə́ zɔ̀mà dúdúmə́ dúdúmə́ lyì nì è la rɛ byilu. ⁷È yʼà nʼê bya dɛ̃´dɛ̃´ è zhe: “Nyámna Yi sʼá cèrhé re, bə̀ bùrsí kɔ́ yi yúwə́. Cèrhénə mɔ̀bɔ́ ń wɛ̀rhɛ́ dɛ̃̌ yi rí ǹdə́ cɛ y ǹdə́ nə̀-fɔ̀lɔ̀ w ǹdə́ nə̀-bùlsí mú.”

⁸Màlɛ́ka dõ pú, èmyɛ́ wɔ̀: “Babyəlɔnɛ wǔr, ò wǔr, òmyɛ́ nánfɔ̀lɔ̀ w ò yǔr lũ w cɛmɛ nɛ́ gakó lyì bí, bə tó bə nyɔ̀ ò sɛ̃´ mɔ́ mə̀ wɔ́ ò fwə̂l tumə mó.”14.8 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili Babyəlɔnɛ kùr gə́ nʼê yâl e wɔ̀ nɛ́ gàà mɔ́.

⁹Màlɛ́ka dõ kʼe pú, èmyɛ́ bya e wɔ̀: “Lò mɔ̀bɔ́ ǹ cèrhé bǔ-ku w ǹdə́ ò nyɔrhɔ w bə̀ mɔ mɔ́, ń jà ǹ zhe ò myɔrhɔ ǹ cíl yó, ráá ǹ jɛ̃̀ nɛ̀, ¹⁰ǹmyɛ bʼâ nyɔ̀ Yi lyim sɛ̃´ mɔ́. Bə̀ yə̀ sɛ̃´ mɔ́ mə̀myɛ́ mɔ́ pùl ǹdə́ nɛ̃̌ yé. Yi ló mo rə̀ lyim dí kâ-zɔ̌m mɔ́ wa. Bə̀ mʼa zə myǐn mú ǹdə́ púrhú cə́m mó bə nwɛ̀nɛ̀ mɔ́ dɛ̃´dɛ̃´ Yi màlɛ́kabá ǹdə́ Pyì-bwɛ̀lɛ́ y yé né. ¹¹Myǐn mú mə̀ nʼê nwɛ̀nɛ̀ bɛ̀ mɔ́ nyɛ̀ɛ̀sɛ́ nʼê dwi byinə nə̀ bə zhɔ̌ zhe yilə. Zhə̀nà, lò mɔ̀bɔ́ ǹ cèrhé bǔ-ku w ǹdə́ ò nyɔrhɔ w bə̀ mɔ mɔ́, ò yil lé myɔrhɔ w jʼà dɛ̃ ǹ yala nɛ, ǹ bʼâ nwɛ̀nɛ̀ cəcɛ̃ ǹdə́ nə̀nyɔ́nɔ́ ga, ǹ tá ǹ la shìrhə́ nɔ yé.”

¹²Rə̀myɛ́ ce, byɛ̀bɛ́ bə̀ wɔ́ Yi lyì, bə̀ nʼê zwẽ rə̀ nyə́ né, bə jʼa zhí Yezu ni mú mə̂ sə bə zə cìn-pyɔ́nɔ́.

¹³Rə̀myɛ́ kwã nɛ́, à nyɛ̀ɛ̀ cəl dɛ̃̌ yi w rə̀ wò nè: “Kɛ̃ ń wɔ̀: ‘Kɔn zhí èlâsɛ̃´, wu-nyɔ̃̀ cìnə́ wɔ́ lyì byɛ̀bɛ́ bə̀ cù ǹdə́ bə̀ zù Cinu mú.’ Eshirhə náàcɛ̀nɛ́ wòwə̀: ‘Zhə̀nà, bə̀ bʼa yẽ̌ bə̀ lyààrɛ́ nɛ bə shǐrh, sə bə̀ tùm-ècɛ̀nà nɛ́ tó be.’ ”

Lũ w jíjí rí jòró wə́

¹⁴À gwẽ̌ la nyǔ, a pwírí ébɔ̃ námpõ ò duwə, sə à nɔ lò ǹdə wɔ́ numbyíní ta è jě ò yó. È yʼà pú sánə́má pyɛ̀lɛ̀ yə́-pú, dã̀mə̀kɔ̀lɔ̀ ŋwɛ́nɛ́ è jɔ̃̀ wà, ò zhe nyí dɛ̃´dɛ̃´. ¹⁵Màlɛ́ka dõ shí Yi jì y wẽ́ e du, e bya e ce mɔ̀bɔ́ ń jě ébɔ̃ w yó mó ne e wɔ̀: “Zə ǹ dã̀mə̀kɔ̀lɔ̀ w ń jə̀r, bə̀ jòró w yi yúwə́. Lũ w jíjí rí byìl rə yí jə̂r.” ¹⁶Rə̀myɛ́ yó, mɔ̀bɔ́ ń jě ébɔ̃ w yó mó dul ń dã̀mə̀kɔ̀lɔ̀ w lũ w wẽ́, e jʼa yə̀ jòró lũ w púlə́púlə́ wẽ́.

¹⁷Màlɛ́ka dõ shí Yi jì y è ŋwɛ́nɛ́ dɛ̃̌ Arəzana w mɔ́ wẽ́ e du. Dã̀mə̀kɔ̀lɔ̀ ŋwɛ́nɛ́ èmyɛ jɔ̃̀ wà, ò zhe nyí dɛ̃´dɛ̃´.

¹⁸Màlɛ́ka dõ zɛ̃̀ e shí vwĩ̀-jìlú w səta. Wɔ́ èmyɛ́ è yʼà cǐ myǐn mú. E bya e ce kɛ̀bɛ́ è zhe dã̀mə̀kɔ̀lɔ̀ w ò zhe nyí mú ni e wɔ̀: “Zə ǹ dã̀mə̀kɔ̀lɔ̀ w ń kwẽ sɛ̃´-cǒ byâ bɛ́ lũ w wẽ́ mó pwəərhé, bə̀ rə̀ byìlə̀.” ¹⁹Màlɛ́ka y zhə̀n ga dul è dã̀mə̀kɔ̀lɔ̀ w lũ w wẽ́, e kwẽ sɛ̃´-cǒ byâ bɛ́, e ló Yi lyim dí kùlkṍ w nánfɔ̀lɔ̀ w bə̀ mʼê wɛ̀rhɛ́ sɛ̃´ mɔ́ mɔ́ wẽ́. ²⁰Bə zə rɛ bə du cɔ w wa, bə nɔ̀ rɛ̀. Jal shí kùlkṍ w bə̀ mʼê wɛ̀rhɛ́ sɛ̃´ mɔ́ mɔ́ wẽ́ mə du mə dùr nə̀-gɔ̀lɔ̀ mə yí ǹdə coló zwã̌-àtɔ̀ ta, sə mə̀ lyìmə̀. Eshã gə zù mə̀ wẽ́, mə̀ bʼa yí è nyì-kwẽ́ ne.

Màlɛ́kabá bwàlpyɛ̀ y zwini kùrə̀ nyàlpyɛ̀ ŋwɛ́nɛ́ bə̀ jɔ̃̀ w mɔ́

¹À kʼa nə myɔrhɔ dõ nánfɔ̀lɔ̀ dɛ̃̌ yi wə, ò nʼô zɛ̃̀ wu ni: màlɛ́kabá bwàlpyɛ̀, zwini kùrə̀ nyàlpyɛ̀ ŋwɛ́nɛ́ bə̀ jɔ̃̀ wà. Wɔ́ zwini rí kùrə̀ né nyàlpyɛ̀ y nə̀myɛ́ nə̀ bʼa yə̀ Yi lyim dí yó-gurə́.

²A nə nə̀-fɔ̀lɔ̀ ò nʼô jə́jɛ̀mɛ́ ǹdə zhə̀zhé ta, ò gùlí ǹdə́ myǐn. A nə byɛ̀bɛ́ bə̀ jú bɛlɛ bǔ-ku w ǹdə́ ò myɔrhɔ w bə̀ mɔ mɔ́, ǹdə́ ò yil lé gál-byâ bɛ́ yó mó. Yi dàkɔ̌ndɛ́ ŋwɛ́nɛ́ bə̀ jɔ̃̀ w bə̀ mʼê zhǐ nə̀-fɔ̀lɔ̀ w yó. ³Bə̀ nʼê nún Yi tùntùnnə̀ Muyiisi nwə̃́ y ǹdə́ Pyì-bwɛ̀lɛ́ y nwə̃́ y bə̀ zhe:

“Cinu Yi jàn-bə-swɛ̃´-zhe cə́bal,

Ǹ tumə né wɔ́ tùm-fwààlɛ̀,

nə̀ jʼà wɔ́ cɛ̀nɛ̀ dúdú.

Tənə̀rh pyɔ̌, ǹ tumə né sɔ́msɛ́ wɔ́ cángá,

sə jʼà wɔ́ zhə̀nà.

⁴Mɔ̌ ń mà n wɔ̀ bə̀ ń tá ń la ǹmyɛ́ nyám ǹdə́ ń wu gakó?

Mɔ̌ lò ń mà n wɔ̀ bə̀ ń tá ń la ǹmyɛ́ còrhó?

Zhə̀nà, ǹmyɛ́ dúdú ǹ wɔ́ cɛ̀nɛ̀ cə́bal.

Cɛmɛ nɛ́ gakó lyì bí mʼa bə̀ bə wùlì tɛ̃´ ǹ yé né bə cèrhé mó,

bə̀ bə̀ gakó yírhə́ nɔ ǹ cángá tumə né.”

⁵Rə̀myɛ́ kwã nɛ́, à nɔ Yi jì y è ŋwɛ́nɛ́ dɛ̃̌ yi w mú è pul. Yi jì y èmyɛ́ mɔ́ wɔ́ kòrhó w ò nʼô myɛrhɛ dɔbrɛ́ Yi zɔ ǹdə́ rə̀ lyì bí mú. ⁶Màlɛ́kabá bwàlpyɛ̀ y zwini kùrə̀ nyàlpyɛ̀ y ŋwɛ́nɛ́ bə̀ jɔ̃̀ w mɔ́ shí Yi jì y wẽ́ bə du. Bə̀ zù kàmə̀-zù-pwə̀rh sə̀ bə jìmdì zhe, sə̀ nʼê jə́jɛ̀mɛ́, bə lyẽ sánə́má cã̌-tàndɛ̀ bə̀ cə̂rh né. ⁷Wò-nyùùrí rə̀na y òdù kwè sánə́má nə̀zhǐrh shàlpyɛ̀ o pə màlɛ́kabá bwàlpyɛ̀ y nɛ. Yi rí rə̀ ŋwɛ́nɛ́ twéé twéé mó lyim dí yʼà sú nə̀zhĩ̌sí. ⁸Yi zùwə́ y ǹdə́ rə̀ jàn dɛ́ ce nyɛ̀ɛ̀sɛ̀ jʼa sú Yi jì yə́, sə lò kə́ ń yə̀ ŋwɛ̀nɛ́ n zù Yi jù w kɔn mʼe yí zwini rí kùrə̀ né nyàlpyɛ̀ y màlɛ́kabá yʼà mʼe bə̀ mɔ́ yó-gurə́.

¹A nyɛ̀ɛ̀ cəl rə̀ zhì Yi jù w rə bya rə ce màlɛ́kabá bwàlpyɛ̀ y nɛ rə wɔ̀: “Zhəlnə á ló Yi lyim dí nə̀zhĩ̌sí shàlpyɛ̀ y wẽ́ mó tɛ̃´ cɛ y yó.”

²Màlɛ́ka y nã́yə́ə́ y vò e ló è nə̀zhĩ̌ y nyân dɛ́ cɛ y yó. Nyəla námməlwâlsɛ jʼa fwər lyì bí byɛ̀bɛ́ bǔ-ku w myɔrhɔ w ŋwɛ́nɛ́ bə̀ yala nɛ, bə jʼà nʼê cèrhé ò nyɔrhɔ w bə̀ mɔ mɔ́, sə nə̀ yʼà nʼê yì dɛ̃´dɛ̃´.

³Màlɛ́kabá bə̀lyè nyâ y vò e ló è nə̀zhĩ̌ y nyân dɛ́ nə̀-fɔ̀lɔ̀ w wẽ́. Nɛ̃̌ mɔ́ gakó jʼa jǐrh jal ǹdə cùù jal ta. Wẽ̀ dé tɛ̀bɛ́ rə̀ yʼà ŋwɛ́nɛ́ mə̀ wẽ́ mó gakó jʼa cì.

⁴Màlɛ́kabá bə̀tɔ̀ nyâ y vò e ló è nə̀zhĩ̌ y nyân dɛ́ bwǐsí ǹdə́ sə̀ nə̀-bùlsí wẽ́. Sə̀myɛ nàná bɛ́ jǐrh jal. ⁵A zɛ̃̀ a nyɛ̀ɛ̀ màlɛ́ka y kɛ̀bɛ́ è cǐ nɛ̃̌ mɔ́ mɔ́ cəl è wòwə̀: “Ǹmyɛ́ mɔ̀bɔ́ ǹ yà ǹ ŋwɛ́nɛ́, ń jà ǹ gwẽ̌ ŋwɛ́nɛ́ mɔ́, ǹ gə́ bùr ǹ bùrsí sə̀ yé mó nʼê byili bə̀ ǹ wɔ́ cɛ̀nɛ̀ cə́bal, ǹ wɔ́ cángá cí. ⁶Lyì gu ǹ lyì bí ǹdə́ ǹ nyì-zwennə bé, sə ǹ pɔ rə̀-ná-cìnə́ bé jal bə nyɔ̀. Wɔ́ rə̀myɛ́ rə̀ wɔ́ bə̀ kwândɛ.” ⁷A zɛ̃̀ a nyɛ̀ɛ̀ cəl rə̀ zhì vwĩ̀-jìlú w yó rə wɔ̀: “Zhə̀nà, Cinu Yi, jàn-bə-swɛ̃´-zhe cə́bal, ǹ nə́ ǹ bùr ǹ bùrsí cángá ǹdə́ zhə̀nà.”

⁸Màlɛ́kabá bə̀na nyâ y ló è nə̀zhĩ̌ y nyân dɛ́ nə̀nyɔ́nɔ́ w yó. O zɛ̃̀ o nə sɔ́má ò la zə ò myǐn mú o mɔ̌r lyì bí. ⁹Sə ò mɔ̌r lyì bí dɛ̃´dɛ̃´ ǹdə́ ò lumi rí, bə zɛ̃̀ bə̀ nʼê tùrh Yi rí tɛ̀bɛ́ rə̀ zhe ŋwɔ̀nɔ́ zwini rí yó w mó, bə jʼà bə shɛ̀ bə̀ wun pyìrhú bə yẽ̌ bə̀ lwɛlɛ rɛ́ nɛ sə bə cèrhé Yi yé.

¹⁰Màlɛ́kabá bə̀nu nyâ y vò e ló è nə̀zhĩ̌ y nyân dɛ́ bǔ-ku w pyɛ̀lɛ̀ də̀gwã́ y yó. Rə̀myɛ́ yó, cɛ y jʼa yìì bǔ-ku w gə́ cǐ mə̀gã̌ nyí rí gakó. Lyì bí zɛ̃̀ bə̀ nʼê nwɛ̀nɛ̀, bə̀ mʼê dɔ̀m bə̀ mə̀jə̀ə̀lè. ¹¹Bə zɛ̃̀ bə̀ nʼê tùrh Yi rí rə̀ ŋwɛ́nɛ́ dɛ̃̌ mɔ́ bə̀ nɔ̀nɔ̀ w ǹdə́ bə̀ nyəla nɛ́ nə̀ fwər be mó yilə. Sə ǹdə́ rə̀myɛ́ ga, bə cə̀ə̀lè bə̀ gwẽ̌ nʼê wɛ̀rhɛ́ lwɛlɛ.

¹²Màlɛ́kabá bwə̀ldù nyâ y vò e ló è nə̀zhĩ̌ y nyân dɛ́ bwǐ y nánfwɛ̀lɛ̀ y bə̀ nʼê byẽ̀ bə̀ Efəratɛ mɔ́ wẽ́. È nɛ̃̌ mɔ́ ŋwĩ. Èta, pyâ bɛ́ bə̀ nʼê shí yi-pwírhí səta mɔ́ ŋwɛ̀nɛ́ bə lyɛ̃. ¹³A zɛ̃̀ a nə nə̀cílsi námməlwâlsɛ sə̀tɔ̀. Èdù shí dɔm mɔ́ nánjə́gɔ́rɔ́ w nyǔ w e du. È dõ mó shí bǔ-ku w nyǔ w e du. È kɛ̀bɛ́ zɛ̃̀ e shí mɔ̀bɔ́ ń nə́ ń gòm kɔma bə̀ ń wɔ́ Yi nyì-zwennə mó nyǔ w e du. Nə̀cílsí sə̀myɛ́ nyɛ̌ ǹdə nyànswəəle ta. ¹⁴Nə̀cílsí sə̀myɛ́ wɔ́ Shətana è twĩ̀ sì. Sə̀ nʼê wɛ̀rhɛ́ wò-jààrɛ̀, sə vò sə nə lũ w pyâ bɛ́ gakó, mùnì ga bə wɛ̀rhɛ́ nyí rə̀dù bə mʼe bú ǹdə́ Yi jàn-bə-swɛ̃´-zhe cə́bal mɔ́ búlə́ né nánfɔ̀lɔ̀ w dɛ̃ rɛ́ yùwə̀.

¹⁵Cinu zɛ̃̀ n wɔ̀: “Nyǐnə à mʼa bə̀ ǹdə ŋwɔ̀l-bal ta. Sə lò mɔ̀bɔ́ ǹ zɔ ǹ yírhə́ ǹ yə̀ dɛ̀ɛ̀, ń zù ǹ gàndɛ́ ǹ mə́ ǹ zhǐ, ǹ mʼâ yə̀ wu-nyɔ̃̀ cí. Ǹ tá ǹ la zhəl nánlwè yé, e jà lyì bí gə nɔ mɔ́ myɛ, cìzhìl tʼâ la mɔ́ zal yé.”

¹⁶Nə̀cílsí námməlwâlsɛ́ ce pyâ bɛ́ gakó jòm jàà èdù wẽ́. Bə̀ nʼê byẽ̀ jàà èmyɛ́ ǹdə́ ebərə́ bə̀ Arəməgədɔnɛ.

¹⁷Màlɛ́kabá bwàlpyɛ̀ nyâ y vò e ló è nə̀zhĩ̌ y nyân dɛ́ dɛ̃̌ yi wə. Cəl nánfɔ̀lɔ̀ shí Yi jì y Yi gə́ jě mə̀gã̌ mɔ́, rə wɔ̀: “Èlâsɛ̃´, kɔn gakó wɛ̀rhɛ́ rə zhɛ̀.” ¹⁸Rə̀myɛ́ yi ní, dweme ce, ǹdə wɔ́ dwà è bya, e lyə́lyɔ̌, e ce sɔ̀ ta, cɛ y zhízhǐ dɛ̃´dɛ̃´. Numbyínə́ bé gə́ ŋwɛ́nɛ́ cɛ y yó yi ní ga, bə̀ gwẽ̌ yə̀ cɛ y zhízhǔ mú mə̀myɛ́ dwí rí nɛ yé. ¹⁹Cɔ w nánfɔ̀lɔ̀ w bɔ̀n dwã w kùkùlə̀ nə̀tɔ̀. Tənèsé dwã bɛ́ cɛmɛ nɛ́ gakó jʼa wǔr nə ló tɛ̃´. Sə Yi yə̀ cɔ w nánfɔ̀lɔ̀ w bə̀ nʼê byẽ̀ bə̀ Babyəlɔnɛ mó yò swě yé. Rə zɛ̃̀ rə kwè rə̀ lyim dí sɛ̃´ kâ-zɔ̌m mɔ́ rə pə cɔ w òmyɛ́ lyì bí ni bə nyɔ̀. ²⁰Cɛmɛ nɛ́ nə̀ ŋwɛ́nɛ́ nə̀-fɔ̀lɔ̀ cəcəl w mó gakó jʼa jé. Bə̀ kʼê yə̀ pyɔ̀ òdù ga nɛ yé. ²¹Bədũ̀kwələ nánfwààlɛ̀ shí dɛ̃̌ rə ló lyì bí yó, bə zɛ̃̀ bə̀ nʼê tùrh Yi, bədũ̀kwələ né gə́ nʼê nwɛ̀nɛ̀ bɛ mɔ́ yilə, bə̀ zwini rí rə̀myɛ́ yʼà já dɛ̃´dɛ̃´.

Yi kɔ́ Babyəlɔnɛ bùrsì

¹Rə̀myɛ́ yó, màlɛ́kabá bwàlpyɛ̀ y nə̀zhĩ̌sí shàlpyɛ̀ y ŋwɛ́nɛ́ bə̀ jɔ̃̀ w mɔ́ èdù zɛ̃̀ e yí à nyí ni, e wɔ̀ nɛ̀: “Bà, à mʼa byili mú cɔ w nánfɔ̀lɔ̀ w ò wɔ́ ǹdə kə-nə̀fòló ta, ò jě bǔrh nánzhəzhɔ̌ yó mó bùrsí gə́ la nɛ́ tó. ²Lũ w pyâ bɛ́ twĩ̀ ywâl tumə ǹdə́ wa. O pə ò sɛ̃´ mɔ́ lũ w lyì bí ni bə nyɔ̀ dɛ̃´dɛ̃´. Sɛ̃´ mɔ́ mə̀myɛ́ wɔ́ ò ywâl tumə né.”

³Eshirhə náàcɛ̀nɛ́ bə̀ e só à yó. Màlɛ́ka y kwè nè e mʼe vò gɔ-elũ èpòlò wə̀. A nə kɛ̃ mə̀dù ń jě bǔ-ku nánshɔ̃̀ yó. Bǔ-ku w òmyɛ́ ywẽ́ né wɔ́ nyàlpyɛ̀, ò nyimə né wɔ́ shíyə́, sə yilə nyɛ̀bɛ́ nə̀ nʼê tùrh Yi yʼà kɛ̃ ò yala nɛ́ gakó ne. ⁴Kɛ̃ mɔ́ yà ń co gɔ̀nɔ̀ nánshɔ̃̀ ò càn, n ce sánə́má cìbyǔr ń jɛ̀rh nɛ̀, n ce nə́kulə dɔ̀msɛ̀ náncə̀cânsɛ dwə́ nánzhəzhɔ̌. Sə wẽ̀ námməywààlɛ̀ yʼà ŋwɛ́nɛ́ sánə́má nə̀zhĩ̌ ń jɔ̃̀ w mɔ́ wa. Wẽ̀ dé rə̀myɛ́ mɔ́ yʼà wɔ́ ń ywâl mɔ́ tùntwə̃̀ə̃̀ né. ⁵Bə̀ yʼà kɛ̃ yil rə̀dù rə̀ kùr nɔ zum bə dɛ̃ ń cíl ne bə wɔ̀: “À wɔ́ Babyəlɔnɛ, cɔ nánfɔ̀lɔ̀, lũ w kə-nə̀fwə̀ə́lé ǹdə́ wẽ̀ dé tɛ̀bɛ́ numbyíní bə mə̂ sʼe wɛ̀rhɛ́ mɔ́ ná.”

⁶A zɛ̃̀ à la kɛ̃ mɔ́ nyǔ, a pwírí ń bə ń cìn cǐ yé, bə̀ ń nyɔ̀ Yi lyì bí bə̀ gu mú jal mɔ́ dɛ̃´dɛ̃´. Lyì bí bə̀myɛ́ mɔ́ wɔ́ Yezu zhə̀n-cínnə. À gə nɔ mɔ, à wu zɛ̃̀ dɛ̃´dɛ̃´. ⁷Màlɛ́ka y zɛ̃̀ e bwə̀rh nè e wɔ̀: “Byè yil ǹ wu zɛ̃̀ èta mɔ́? Lwar bə̀ kɛ̃ mɔ́ ń jě bǔ-ku w ò ywẽ́ né nyàlpyɛ̀ y ò nyimə né shí y mú: à mʼa byili mú ńmyɛ̌ ǹdə́ òmyɛ́ ga gə́ wɔ́ kɔn ná-dwí yilə. ⁸Bǔ-ku w kɔ̀bɔ́ ǹ nɔ mɔ́ yʼà ŋwɛ́nɛ́ shãã ga, sə ò kʼô tɛ̀nɛ́ yé. Ò bʼa du gɔ́rɔ́ w nánlyilyìmú w wẽ́ ò yò zhìlì. Cɛ yó lyì bí byɛ̀bɛ́ bə̀ yilə né yə̀ nyǔ sɛ́bɛ́ rɛ́ wẽ́ kɛ̃ lũ w kùr-ju yi ní ga mɔ́ gə nɔ bǔ-ku wə́, bə̀ wun bʼa zɛ̃̀, bʼò yʼà ŋwɛ́nɛ́, sə ò kʼô tɛ̀nɛ́ yé, o jʼà kʼâ bànà.

⁹“Nyɔ̀nɔ̀ wɔ́ surhə ǹdə́ lárma cìnə́ bə̀ wɔ̌ bə̀ mʼa lwar ywẽ̀ né nyɛ̀bɛ́ kùrə̀. Ywẽ́ né nyàlpyɛ̀ y wɔ́ pyààrɛ́ tàlpyɛ̀ y kɛ̃ mɔ́ jě rə̀ yó mó. Nə jʼà wɔ́ pyâ bwàlpyɛ̀ myɛ. ¹⁰Sə bə̀ ló pyâ bɛ́ bə̀myɛ́ mɔ́ bə̀nu tɛ̃´, bə̀ kʼê tɛ̀nɛ́ yé. Wɔ́ bwə̀ldù nyân mɔ́ ń cǐ èlâsɛ̃´, sə bwàlpyɛ̀ nyân mɔ́ gwẽ̌ yə̀ twí yé. Sə ń gə túwə́, ń tá ń la dɔnɔ yé. ¹¹Wɔ́ bǔ-ku w ò yʼà ŋwɛ́nɛ́ shãã ga, o zɛ̃̀ ò kʼô tɛ̀nɛ́ mɔ́, ò wɔ́ pyâ lyɛlɛ nyân mɔ́. O jʼà wɔ́ pyâ bɛ́ bwàlpyɛ̀ y myɛ mə̀dù, sə ò la ò yò zhìlù jàà wà.

¹²“Nyimə né shí y ǹ nɔ mɔ́, wɔ́ pyâ bə̀ gwẽ̌ bə tənə̀rh cǐ yé, sə bə̀ mʼa bʼe nə ŋwɔ̀nɔ́ bə tó bǔ-ku w ni bə cìní tənə̀rh lù òdù sásá. ¹³Sə kɔn dɛ́ dɛ̀bɛ́ pyâ bɛ́ bə̀myɛ́ gakó nʼê bùl mó wɔ́ rə̀dù; bə̀ nʼê yâl bə zə bə̀ jàn dɛ́ ǹdə́ bə̀ ŋwɔ̀nɔ́ w bə sɛ̃ bǔ-ku w ni. ¹⁴Bə̀ mʼa zɛ̃̀ búlə́ ne ǹdə́ Pyì-bwɛ̀lɛ́ yá, sə è bʼa ŋwɛ̀nɛ́ bɛ, bə̀ wɔ́ èmyɛ́ è cǐ cǐnnə bé gakó, e jʼà wɔ́ pyâ bɛ́ gakó pyɔ̌. Sə è lyì bí byɛ̀bɛ́ è byẽ̀ e cír bə̀ zhǐ bə̀ nà èdù yó mó bʼa tó y bə jí bɛlɛ.”

¹⁵Màlɛ́ka y kʼe wɔ̀ nɛ̀: “Bwǐsí shɛ̀bɛ́ ǹ nɔ kə-nə̀fòló w jě sə̀ yó mó wɔ́ dwə́ kùrə̀ gakó lyì, bə̀ wɔ́ nunə nánjə̀jóló, bə̀ shí lũ w tənèsé gakó wə, bə̀ zɔ̀mà nɛ́ wɔ́ dúdúmə́ dúdúmə́. ¹⁶Nyimə né shí y ǹ nɔ mɔ́ ǹdə́ bǔ-ku w cìcì mú bʼa jí zùùrì ǹdə́ kə-nə̀fòló wə́, bə zwẽ ò wẽ̀ dé gakó, bə lwə̂r ò gàndɛ́ bə yẽ̌ w nánlwè. Bə̀ mʼa dɔ̃̀ ò gaga mɔ́, bə ji ò wẽ́ dé tɛ̀bɛ́ rə̀ dàl mɔ́ myǐn rə jí dɔ́dɔ́. ¹⁷Wɔ́ Yi cìcì rə̀ co rə̀ pùbùlə̀ né pyǐrh mó nyimə né wẽ́, mùnì ga nə wɛ̀rhɛ́ nyí rə̀dù nə zə nə̀ ŋwɔ̀nɔ́ w nə sɛ̃ bǔ-ku w ni, kɔn mʼe yí Yi zɔ̀mà nɛ́ pyǐrh mó dɛ̃ rɛ́. ¹⁸Sə kɛ̃ mɔ́ ǹ nɔ mɔ́ wɔ́ cɔ w nánfɔ̀lɔ̀ w ò cǐ cɛ yó pyâ bɛ́ mɔ́.”

Babyəlɔnɛ wǔr

¹Rə̀myɛ́ kwã nɛ́, à nɔ màlɛ́ka dõ è shí dɛ̃̌ yi w è nʼê swé tɛ̃´ ǹdə́ jàn nánfɔ̀lɔ̀. È zùwə́ y pwẽ̀ dé yə̂r cɛ y gakó. ²E bya dɛ̃´dɛ̃´ e wɔ̀: “Babyəlɔnɛ nánfɔ̀lɔ̀ w wǔr, ò wǔr, ò wǔr o ló tɛ̃´! Ò jàà y jǐrh nə̀cílsi námməlwâlsɛ jàà. Nə̀cílsi námməlwâlsɛ dwí gakó nʼê twí sə̀ nɛ dwã gàà. Kúmdi námməywààlɛ̀ tɛ̀bɛ́ lò bə rə̀ tum zhe dwí gakó, [ǹdə́ gɔ-wẽ̀ námməywààlɛ̀ dwí gakó] nʼê twí rə̀ nɛ dwã gàà. ³Ò pɔ ò sɛ̃´ mɔ́, mə̀ wɔ́ ò tùntùm-bəywààlɛ́ nə̀ lyɛ̃ cɛ nɛ mɔ́, lũ w lyì bí ni bə nyɔ̀. Lũ w pyâ bɛ́ twĩ̀ ywâl tumə ǹdə́ wa, sə cɛ yó dɔ̌lna bɛ́ tó ò nə̀cɛ̀ndɛ́ nánzhəzhɔ̌ w dɛnnɛ bə jǐrh nə̀cɛ̀nà.”

⁴A kʼa nyɛ̀ɛ̀ cəl dõ rə̀ zhì dɛ̃̌ yi w rə wɔ̀: “À lyì, shə́rnə cɔ w kɔ̀bɔ́ wẽ́! Á twə́r bə̀kʼa yə̀ ò yə̀-bəlwàálɛ́ wẽ́ yé, mùnì á lú zwini rí tɛ̀bɛ́ rə̀ la w zal mɔ́ yé né. ⁵Ò yə̀-bəlwàálɛ́ púl lé zhì tɛ̃´ rə yí dɛ̃̌ yi wə, Yi zɛ̃̀ rə lyǐrh ò tùntùm-bəywààlɛ́ yò. ⁶Wɛ̀rhɛ́na w ǹdə ò gə́ wɛ̀rhɛ́ ò dwã bɛ́ nɛ́. Cârhna w lwɛlɛ rɛ́ tɛ̀bɛ́ ò wɛ̀rhɛ́ mɔ́ twər rə̀lyè. Kâ-zɔ̌m mɔ́ mɔ̀bɔ́ ò co sɛ̃´ mɔ́ mə̀ wẽ́ o pə ò dwã bɛ́ nɛ mɔ́, cenə sɛ̃´ mɔ̀bɔ́ mə̀ jàn dɛ́ du ò nyân mɔ́ twər rə̀lyè mó mə̀ wẽ́ á pə wa. ⁷Ò nʼô wə̀l ò cìn nì ò wẽ́: ‘À jě pyɛ̀lɛ̀ də̀gwã́ yó. À də̀ ejə̃̀-kɛ̃ yé, à tʼâ la cu wu-zhìlù nɔ gaga yé.’ Rə̀myɛ́ ce, cenə ò nɔ̀nɔ̀ w ǹdə́ ò wu-zhìlù w, mɛrhɛ ǹdə zùwə́ y ǹdə́ nə̀cɛ̀ndɛ́ ò jú mú ta. ⁸Dɛ̃ rə̀dù, zwini bʼa zə wa, sə zwini rí rə̀myɛ́ mɔ́ wɔ́ cu ǹdə́ wu-zhìlù ǹdə́ nɔrh; myǐn bʼa jí wə; bə̀ wɔ́ Cinu Yi jàn cə́bal mɔ́ ń kɔ́ ò bùrsí.”

⁹Lũ w pyâ bɛ́ bə̀ twĩ̀ tùntùm-bəywààlɛ́ ǹdə́ wa, bə jʼa jí ò nə̀cɛ̀ndɛ́ nánzhəzhɔ̌ w mɔ́ gə́ mʼa nə w ò zhe myǐn mə̀ nyɛ̀rh la dɛ̃̌, bə̀ mʼa kúrh wə. ¹⁰Zwini rí ywẽ bʼa zə bɛ, bə twə̀r bə zhì kwã nɛ́ kwã nɛ́ bə wɔ́wɛ́lɛ́ bə wɔ̀: “Nyǐ wɔ́ zwini, nyǐ wɔ́ zwini tã̀! Babyəlɔnɛ, ǹ wɔ́ cɔ nánfɔ̀lɔ̀ ǹ zhe jàn, e jà bə kə́ ǹ bùrsì lù òdù sásá!”

¹¹Cɛ yó dɔ̌lna bɛ́ myɛ wun zhìlì bə̀ nʼê kúrhə́, lò gə́ kə́ ń tɛ̀nɛ́ ń la bə̀ wẽ̀ dé yǒ mó yilə. ¹²Wẽ̀ dé rə̀myɛ́ yʼà wɔ́: sánə́má, ǹdə́ sə̀byǐ, ǹdə́ nə́kuuli ná-ècɛ̀ndɛ̀, ǹdə́ dɔ̀msɛ̀, ǹdə́ kàmə̀-jɛ̃̀-shɛ̃̀rh ná-ècânsɛ, sə̀ jàlà wɔ́ nánlyəlyansɛ, sə̀ jàlà nyɛ̌ nã́məmɔ̌rsɛ, ǹdə́ dâr tɛ̀bɛ́ rə̀ tʼâ nɛ nàná yé, ǹdə́ wẽ̀ kùrə̀ nánzhəzhɔ̌ bə̀ zə nàntú yə́lə́ bə mʼe wɛ̀rhɛ́, ǹdə́ dâr ná-ècɛ̀ndɛ̀, ǹdə́ kã̀mɔ, ǹdə́ lù, ǹdə́ nə́kuuli tɛ̀bɛ́ rə̀ nʼê jə́jɛ̀mɛ́, ¹³ǹdə́ myííri ǹdə́ ãsã́, ǹdə́ wẽ̀ dwã rə̀ lwẽ́ nã́nyə̀nyɛ̀lɛ́, ǹdə́ sɛ̃´ ǹdə́ nwə̃̌, ǹdə́ mún ǹdə́ jíjí byâ, ǹdə́ nɛ̃ ǹdə́ pyììsì, ǹdə́ shəshərh ǹdə́ eshã-zhírsi, e súlí numbyínsi. ¹⁴Dɔ̌lna bɛ́ zɛ̃̀ bə̀ nʼê zɔ̀m ǹdə́ cɔ w bə̀ zhe: “Wẽ̀ dé tɛ̀bɛ́ ǹ yà ǹ nə́ ǹ yâl mɔ́ gakó jé ǹ yé né. Wẽ̀ dé tɛ̀bɛ́ rə̀ yʼà zhe kùr rə jʼà càn mɔ́ gakó jé ǹ yé né. Bə̀ kʼê tʼâ la òdù ga nɔ gaga yé.”

¹⁵Dɔ̌lna bɛ́ byɛ̀bɛ́ bə̀ dɔ̌l bə jǐrh nə̀cɛ̀nà cɔ w òmyɛ́ wẽ́ mó bʼa vò bə zhì pyépyé bə yẽ̌ wə. Ò zwini rí ywẽ bʼa zə bɛ, bə kúrh ǹdə́ wu-zhìlù, ¹⁶bə wɔ̀: “Nyǐ wɔ́ zwini, nyǐ wɔ́ zwini cə-fɔ̀lɔ̀ w kɔ̀bɔ́ yil tã̀! Ò yʼà zù kàmə̀-zù-elyansɛ, ǹdə́ kàmə̀-jɛ̃̀-shɛ̃̀rh ná-ècânsɛ. O ce sánə́má cìbyǔr. Ò yʼà zhe nə́kulə ná-ècɛ̀ndɛ̀ kùrə̀ nánzhəzhɔ̌ ǹdə́ dɔ̀msɛ̀. ¹⁷Nə̀cɛ̀ndɛ́ rə̀myɛ́ gakó zɛ̃̀ rə jʼa cɔ̀ lù òdù sásá!”

Byɛ̀bɛ́ bə̀ yʼà cǐ bǔ-bwələ né nánfwààlɛ́ nyɛ̀bɛ́ nə̀ nʼê dùr nə̀-fɔ̀lɔ̀ w wẽ́ mó, ǹdə́ lyì bí byɛ̀bɛ́ bǔ-bwələ né nə̀myɛ́ nʼê pwà mɔ́, ǹdə́ byɛ̀bɛ́ bə̀ nʼê twĩ̀ nə̀ wẽ́ mó, e súlí byɛ̀bɛ́ gakó bə̀ nʼê twĩ̀ nə̀-fɔ̀lɔ̀ w wẽ́ bə̀ mʼê pyà bə̀ nyí kùjú mú gakó zhì kwã nɛ́ kwã nɛ́. ¹⁸Bə̀ gə́ nɔ cɔ w ò nʼô jí myǐn ò nyɛ̀rh la dɛ̃̌, bə̀ búbwéé bə wɔ̀: “Cɔ gwẽ̌ yə̀ nɛ́ yàl ò yú cə-fɔ̀lɔ̀ w kɔ̀bɔ́ gaga yé!”

¹⁹Bə zɛ̃̀ bə pwà shó bə ló bə̀ yó wə, bə̀ nʼê kúrh ǹdə́ bə̀ nʼê búbwéé bə̀ zhe: “Nyǐ wɔ́ zwini, nyǐ wɔ́ zwini, cə-fɔ̀lɔ̀ w kɔ̀bɔ́ yil tã̀! Wɔ́ òmyɛ́ dɛnnɛ byɛ̀bɛ́ bə̀ cǐ bǔ-bwələ né nyɛ̀bɛ́ nə̀ nʼê dùr nə̀-fɔ̀lɔ̀ w wẽ́ mó tó né bə jǐrh nə̀cɛ̀nà. Ò nə̀cɛ̀ndɛ́ rə̀myɛ́ gakó jʼa zɛ̃̀ rə cɔ̀ lù òdù sásá!”

²⁰Ámyɛ̌ dɛ̃̌ yi cìnə́ bé, ǹdʼámyɛ̌ Yi lyì bí, ǹdə́ rə̀ tùntúmə́ bé ǹdə́ rə̀ nyì-zwennə bé, fǔnə ǹdə́ wu-nyɔ̃̀, bə̀ Yi kɔ́ cɔ w òmyɛ́ bùrsì lwɛlɛ tɛ̀bɛ́ ò wɛ̀rhɛ́ ába mɔ́ yilə.

²¹Rə̀myɛ́ yi ní, màlɛ́ka kɛ̀bɛ́ è jɛ̀ kwè nə́kulu nánfɔ̀lɔ̀ ǹdə nə̀mú-byǐ nánfɔ̀lɔ̀ ta, e ji nə̀-fɔ̀lɔ̀ w wẽ́ e wɔ̀: “Wɔ́ èta bə bʼa ji Babyəlɔnɛ y, ò wɔ́ cə-fɔ̀lɔ̀ mɔ́ tɛ̃´ nɛ́. Lò lò kə́ ń tá ń la w nɔ ń yírh yó gaga yé. ²²Lò kə́ ń tá ń la dàkɔ̌n-dúrnə, ǹdə́ núnnə, ǹdə́ wúrh wúlnə, ǹdə́ pɔ́lsɛ wúlnə dweme nyɔ̀ɔ̀ ǹ sõ gaga yé. Bə̀ kʼê tʼâ la lò mə̀dù ga nɔ ǹdə́ ń nə́ ń twĩ̀ tum dwí tə̀ltə̀l gaga yé. Bə̀ kʼê tʼâ la nə̀mú cəl nyɔ̀ɔ̀ ǹ sõ gaga yé. ²³Pàntɛ́mɛ́ pwẽ̀ kʼê tʼâ la nɛ́ yál ǹ sõ gaga yé. Lò kə́ ń tá ń la nyɔ̀ɔ̀ bə̀ bal ǹdə́ kɛ̃ jú dwã ǹ sõ yé. Ǹ dɔ̌lna bɛ́ yʼà wɔ́ lyì-fwààlɛ̀ du lyì bí dwã bɛ́ cɛ yó mó gakó, ń jà ń zə ǹ càl-tumə né ń mə́ yǔr lyì bí gakó. Wɔ́ rə̀myɛ́ è ce rə̀myɛ́ gakó la wɔ̀rhɔ́. ²⁴Kɔn súlí myɛ, wɔ́ ǹmyɛ́ sõ Yi nyì-zwennə bé ǹdə́ Yi lyì bí byɛ̀bɛ́ bə̀ gu cɛ yó mó gakó jal mɔ́ ló né.”

Lyì nánjə̀jóló nʼê cèrhé Cinu dɛ̃̌ yi wə

¹Rə̀myɛ́ kwã nɛ́, a kʼa nyɛ̀ɛ̀ cəl nánfɔ̀lɔ̀ ǹdə lyì nánjə̀jóló dweme ta, rə̀ zhì dɛ̃̌ yi w rə wɔ̀: “Àlɛ́lɔyà! Cinu nə còrhó! Wɔ́ nə́ Yi rí rə̀ vwârh nə́ba mɔ́. Rə̀ zhe zùwə́, rə jʼà wɔ́ jàn cí. ²Rə̀ nʼê kɛ́ rə̀ bùrsí cángá ǹdə́ zhə̀nà. Rə̀ pɔ còrhò-tum kə-nə̀fòló w páá mɔ́ nɛ, bə̀ ò yʼà nʼô zə ò fwə̂l tumə né ò cɔ̀ lũ wə́. Ò gə́ gu Yi tùntùnnə̀ bé mó ce rə̀ zhìlì ò yò.” ³Bə kʼe wɔ̀: “Àlɛ́lɔyà! Cinu nə còrhó! Zhə̀nà, cɔ w nánfɔ̀lɔ̀ w ò kwɛ̃´ myǐn mú nyɛ̀rh la dɛ̃̌ yi w byinə nə̀ bə zhɔ̌ zhe yilə.”

⁴Rə̀myɛ́ yi ní, náncɛsɛ́ shí-èlyè ǹdə́ sə̀na y ǹdə́ wò-nyùùrí rə̀na y ga tu bə̀ nə̀dwə́nə́ yó, bə wùlì Yi rí rə̀ jě rə̀ pyɛ̀lɛ̀ də̀gwã́ y yó mó yé né, bə zɛ̃̀ bə̀ nʼê cèrhé re bə̀ zhe: “Amɛ̀n! Àlɛ́lɔyà! Cinu nə còrhó!”

⁵Cəl rə̀dù zɛ̃̀ rə zhì pyɛ̀lɛ̀ də̀gwã́ y gə́ zhǐ má rə wɔ̀: “Ámyɛ̌ Yi tùntùnnə̀ bé, lyì-fwààlɛ̀ ǹdə́ yə̀-yírh-swí cìnə́ ga á nʼá nyàm dɛ̀ mɔ́, cèrhénə nə́ Yi rí!”

⁶Rə̀myɛ́ kwã nɛ́, a nyɛ̀ɛ̀ cəl ǹdə lyì-zhâ nánjə̀jóló cələ ta, ráá ǹdə wɔ́ nɛ̃̌ mə̀ nʼê wùl ta, ráá ǹdə wɔ́ dwà è nʼê kúkwìrí ta, rə̀ zhe: “Àlɛ́lɔyà! Cinu nə còrhó! Èlâsɛ̃̌, wɔ́ Cinu nə́ Yi jàn-bə-swɛ̃´-zhe cə́bal mɔ́ dúdú ń wɔ́ pyɔ̌. ⁷Bànà nə́ fùù ǹdə́ wu-nyɔ̃̀, nə́ cèrhé mo, bə̀ èlâsɛ̃´ wɔ́ Pyì-bwɛ̀lɛ́ y kɛ̃-jú wə́, è kɛ̃ mɔ́ tɛnɛ n zhɛ̀. ⁸Bə̀ pɔ sɔ́má kɛ̃ mɔ́ nɛ n zù kàmə̀-zù-pwã̀ è bə jìmdì zhe, è nʼê jə́jɛ̀mɛ́. È nʼê myɛrhɛ Yi lyì bí tùntwə̃̀ə̃̀ né nə̀ wɔ́ cángá mɔ́.”

⁹Màlɛ́ka y wɔ̀ nɛ̀: “Kɛ̃ ń byili bə̀ byɛ̀bɛ́ bə̀ byẽ̀ Pyì-bwɛ̀lɛ́ y kɛ̃-jú w jàà w mɔ́ wɔ́ wu-nyɔ̃̀ cìnə́.” E kʼe wɔ̀: “Zhə̀nà, zɔ̀mà nɛ́ nyɛ̀bɛ́ wɔ́ Yi cìcì zɔ̀mà páá.”

¹⁰A zɛ̃̀ a tu à nə̀dwə́nə́ yó è yé né à la y còrhó. Sə è wò nè: “Dɛ̃̌ ǹ cìnə̀, bə̀ká wɛ̀rhɛ́ èta yé, bʼà wɔ́ Yi tùntùnnə̀ ǹdə ǹmyɛ́ ǹdə́ ǹ da-byâ bɛ́ bə̀ zhí zhə̀n dɛ́ Yezu byili mú ni mú ta. Wɔ́ Yi yé né ǹ mə̂ sə́ wùlì ní, ń cèrhé re.”

Zhə̀n dɛ́ tɛ̀bɛ́ Yezu byili mú, wɔ́ rə̀myɛ́ rə̀ nʼê ce yə̀wâl lyì bí bə̀ nʼê zɔ̀m zɔ̀mà nɛ́ nyɛ̀bɛ́ Yi byili bi mú wẽ́.

Lò ń jě eshã námpwã̀ ń nə́ ń bwí ǹdə́ bǔ-ku wə́

¹¹Rə̀myɛ́ kwã nɛ́, a nə dɛ̃̌ yi rí rə̀ pul. A pwírí eshã námpwã̀ è duwə. Mɔ̀bɔ́ ń jě y mó yíl “Zhə̀n cə́bal, lò mɔ̀bɔ́ ń zhǐ ń nà yó”. Ń nə́ ń bùr ń bùrsí cángá; ń búlə́ né ń nə́ ń bwí mú myɛ wɔ́ cángá. ¹²Ń yírhə́ né nʼê yə̂r ǹdə myǐn ta. Ń pú pyɛ̀lɛ̀ yə́-púr nánzhəzhɔ̌. Yil rə̀dù yʼà kɛ̃ rə dɛ̃ mɔ. È gə də̀ ńmyɛ̌ cìcì, lò dõ yə̀l yil lé rə̀myɛ́ yé. ¹³Ń yà ń zù kàmə̀-zù-èdɔ̀lɔ̀, ò gakó wɔ́ jal dúdú. Bə̀ nʼê byẽ̀ mò bə̀ “Yi zɔ̀mɛ̀”. ¹⁴Dɛ̃̌ yi shə̀dɛ́ɛ́sɛ́ tó mo ǹdə́ shəshərh námpwə̀rh. Shə̀dɛ́ɛ́sɛ́ gakó zù kàmə̀-zù-pwə̀rh pwɛ̃´pwɛ̃´ sə̀ bə jìmdì zhe yé. ¹⁵Búlə́ shù ò zhe nyí dɛ̃´dɛ̃´ nʼô shí mɔ̀bɔ́ ń jě eshã y mɔ́ nyú w ò dwi. Ń la zə w n mə n zhìlì tənèsé lyì bí gakó yò. Ń mà n cìní bi ǹdə́ jàn nánkùlù. Ń mà n ce sɛ̃´-cǒ byâ kùlkṍ w kɔ̀bɔ́ bə̀ mʼê wɛ̀rhɛ́ sɛ̃´ mɔ́ mɔ́ wẽ́, n zù n nɔ̀ bɛ̀ ǹdə́ ń nə̀rh. Kùlkṍ w òmyɛ́ nʼô myɛrhɛ Yi jàn-bə-swɛ̃´-zhe cə́bal mɔ́ lyim dí nánfɔ̀lɔ̀ wá. ¹⁶Bə̀ yʼà kɛ̃ yil rə̀dù ń kàmə̀-zù-èdɔ̀lɔ̀ w ǹdə́ ń cí rí ni. Bə̀ nʼê byẽ̀ mò bə̀ “Pyâ bɛ́ gakó Pyɔ̌, ǹdə́ Cǐnnə bé gakó Cinu”.

¹⁷Rə̀myɛ́ kwã nɛ́, a nə màlɛ́ka èdù è zhǐ nə̀nyɔ́nɔ́ w wẽ́, e zɛ̃̀ e búbwéé dɛ̃´dɛ̃´ e ce dɛ̃̌ yi kúmdí gakó ne e wɔ̀: “Bànà dwã yó á jí Yi címsí nánfɔ̀lɔ̀ w kùjú wə́. ¹⁸Bànà á dɔ̃̀ pyâ bɛ́ ǹdə́ jàn cìnə́ bé ǹdə́ eshesé ǹdə́ sə̀ jòmnə̀ bé gakó, sʼá dɔ̃̀ yómə́ ǹdə́ byɛ̀bɛ́ bə̀ cǐ bə̀ cìnə̀, e súlí lyì-fwààlɛ̀ ǹdə́ byɛ̀bɛ́ bə̀ yə̀ yírh swí ga.”

¹⁹A zɛ̃̀ a kʼa nə bǔ-ku w ǹdə́ cɛ yó pyâ bɛ́ ǹdə́ bə̀ shə̀dɛ́ɛ́sɛ́ gakó. Bə̀ zhǐ dwã yó bə̀ la bú ǹdə́ eshə-pwã̀ y jòmnə̀ mó ǹdə́ ń shə̀dɛ́ɛ́sɛ́. ²⁰Sə bə̀ zɔ bǔ-ku w ǹdə́ mɔ̀bɔ́ ǹ yà ń nə́ ń myìnì lyì bí bə̀ ńmyɛ̌ wɔ́ Yi nyì-zwennə mó. Ń yà ń nə́ ń wɛ̀rhɛ́ màmyaarhɛ bǔ-ku w yé né ń mə́ ń yǔr lyì bí byɛ̀bɛ́ ò myɔrhɔ w yʼà wɔ bə̀ yala nɛ, bə̀ nʼê cèrhé ò nyɔrhɔ w bə̀ mɔ mɔ́. Bə zɛ̃̀ bə ji bǔ-ku w ǹdə́ mɔ̀bɔ́ ń nə́ ń myìnì lyì bí bə̀ ńmyɛ̌ wɔ́ Yi nyì-zwennə mó ga púrhú cə́m myǐn mə̀ lɛ̀lɛ̀ tɛ̃´ ǹdə bù-sà ta wẽ́ ǹdə́ bə̀ yírhə́ ga. ²¹Búlə́ shù w ò nʼô dwi mɔ̀bɔ́ ń jě eshã y nyǔ w mú gu byɛ̀bɛ́ bə̀ dàl mɔ́ ga, kúmdí gakó bə̀ rə jí bi.

Byɛ̀bɛ́ bə̀ tó Yezu ni bə jí pyɛ̀lɛ̀ byinə mɔ̀rhɔ̀ w mɔ́

¹Rə̀myɛ́ kwã nɛ́, a nə màlɛ́ka è shí dɛ̃̌ ǹdə́ gɔ́rɔ́ w nánlyilyìmú w bwə̀l-byǐ y ǹdə́ nyɛ́nɛ́ nánfɔ̀lɔ̀ è jɔ̃̀ wà. ²E zə dɔm mɔ́ nánjə́gɔ́rɔ́ w mə̀ jʼâ ŋwɛ́nɛ́ lũ w kùr-ju yi ní ga bə̀ nʼê byẽ̀ bə̀ zù-bal ráá Shətana mɔ́. E lyẽ mo kɔn la mʼe yí byinə mɔ̀rhɔ̀. ³Màlɛ́ka y ji mu gɔ́rɔ́ w nánlyilyìmú w wẽ́, e zə bwə̀l-byǐ y e sàásɛ mə̀ nyí ni, e cĩ́ myɔrhɔ nɛ́, mùnì byinə né mɔ̀rhɔ̀ w lyɛ̃ ǹdə́ mə̀ kʼê yə̀ ŋwɛ̀nɛ́ mə myìnì lyì bí yé. Rə̀myɛ́ kwã nɛ́, bə̀ mʼa zɛ̃̀ bə vùr mò bə yẽ̌ dwã màngɛlɛ́ yilə.

⁴Rə̀myɛ́ kwã nɛ́, a nə pyɛ̀lɛ̀ də̀gwə́rh, lyì tú bə̀ jě sə̀ yó, bə pə bɛ ŋwɔ̀nɔ́ bə̀ la mʼe bùr bùrsì. A nə byɛ̀bɛ́ bə̀ zhí zhə̀n dɛ́ Yezu byili mú ni bə mʼe bwə̀l Yi zɔ̀mɛ̀ rɛ́ bə zɛ̃̀ bə gu bi rə̀myɛ́ yil mó. Bə̀ yə̀ shɛ̀nɛ́ bə wùlì bǔ-ku w ǹdə́ ò nyɔrhɔ w bə̀ mɔ mɔ́ yé né bə cèrhé yé. Bə̀ cẽ ò myɔrhɔ w bə̀ cílə́ né ǹdə́ bə̀ jɛ̀sɛ́ nɛ cṹ yò. Bə̀ kʼa bwìrhì bə̀ la tó Kristə ne bə jí pyɛ̀lɛ̀ byinə mɔ̀rhɔ̀. ⁵Wɔ́ mə̀myɛ́ mə̀ wɔ́ bùrhù mú nã́yə́ə́ mó. Cùùrí dwã bɛ́ tʼâ la tó rə bwìrhì ǹdə́ byinə né mɔ̀rhɔ̀ w yə̀ yí yé. ⁶Byɛ̀bɛ́ Yi la jɛ̀rɛ̀ rə bwìrhì mú bʼa yə̀ wu-nyɔ̃̀ cìnə́, bə̀ bə̀ mʼa yə̀ Yi lyì. Cu mú mɔ̀bɔ́ mə̀ kʼâ la bórhó mə bə̀ mɔ́ kʼê bə bə̀ yàlà zhe yé. Bə̀ mʼa yə̀ Yi ǹdə́ Kristə vwĩ̀-zwə́lnə, bə tó Kristə ne bə jí pyɛ̀lɛ̀ byinə né mɔ̀rhɔ̀ w wẽ́.

⁷Byinə né mɔ̀rhɔ̀ w gə tú è lyɛ̃, bə̀ mʼa vùr Shətana y è byə̀nə́-jì y wẽ́ bə yẽ̌, ⁸e du e vò lũ w tənèsé gakó wẽ́ e yǔr lyì bí. Bə̀ nʼê byẽ̀ tənèsé sə̀myɛ́ bə̀ Googe ǹdə́ Məgooge. Shətana y bʼa kal lyì bí gakó e cĩ́ dwã yó búlə́ yilə. Lyì bí bʼa yə̀ nánjə̀jóló ǹdə mwə̃́ y nyí ni nyɔ̀rhɔ́ ta. ⁹Bə̀ zɛ̃̀ bə làà lũ w cə-yala gakó w bə kə́kɛ́lɛ́ Yi lyì bí rə̀ só mó jàà y bə ce ecəl wə. Sə myǐn shí dɛ̃̌ yi w mə jí lyì bí byɛ̀bɛ́ Shətana y yʼà kal e cĩ́ dwã yó mó. ¹⁰Rə̀myɛ́ yó, bə̀ zɔ Shətana y è yʼà nʼê yǔr be mó bə ji púrhú cə́m myǐn mú mə̀ lɛ̀lɛ̀ tɛ̃´ ǹdə bù-sà ta mɔ́ wẽ́, bǔ-ku w ǹdə́ mɔ̀bɔ́ ń yà ń nə́ ń myìnì lyì bí bə̀ ń wɔ́ Yi nyì-zwennə mó gə́ ŋwɛ́nɛ́ mə̀gã̌. Bə̀ mʼa nwɛ̀nɛ̀ gàà dɛ̃´dɛ̃´, cəcɛ̃ ǹdə́ nə̀nyɔ́nɔ́ ga, byinə nə̀ bə zhɔ̌ zhe yilə.

Cùùrì bùrsì kɔ́

¹¹Rə̀myɛ́ kwã nɛ́, a nə pyɛ̀lɛ̀ də̀gwã́ námpwã̀ pwɛ̃´pwɛ̃´ nánfwɛ̀lɛ̀, lò jě è yó. Dɛ̃̌ ǹdə́ cɛ y ga dùr ń nyí ni rə vò pyépyé, lò lò kə́ ń yə̀ rɛ nɛ yé. ¹²A zɛ̃̀ a nə lyì-fwààlɛ̀ ǹdə́ byɛ̀bɛ́ bə̀ yə̀ yírh swí bə̀ cù mú ga bə̀ zhǐ pyɛ̀lɛ̀ də̀gwã́ y yé né. Sábá yʼà púr nə̀ zhǐ tɛ̃´. Nyǔ mə̀ tʼâ la zhɔ̌ sɛ́bɛ́ rɛ́ myɛ púr. Byɛ̀bɛ́ bə̀ cù mú bùrsí jʼa ká, lò gakó ǹdə ǹ tùntwə̃̀ə̃̀ né gə́ yàl nɛ́, ǹdə bə̀ gə́ kɛ̃ sábá nɛ́ wẽ́ né. ¹³Nə̀-fɔ̀lɔ̀ w càrh cùùrí tɛ̀bɛ́ rə̀ mɛ̃ ò wẽ́ mó gakó o ce pwẽ̀ nè. Cu mú ǹdə́ cílú w myɛ dwĩ̀ rə̀ nyân dɛ́ nɛ. Bə zɛ̃̀ bə kə́ lò gakó bùrsì ǹdə ǹmyɛ tùntwə̃̀ə̃̀ né gə́ yàl nɛ́. ¹⁴Bə cìrh cu mú ǹdə́ cílú w bə ló myǐn mú mə̀ nʼê jí ǹdə bù-sà ta mɔ́ wẽ́. Wɔ́ myǐn mú mə̀myɛ́ mɔ́ mə̀ wɔ́ cu mú bə̀lyè nyân mɔ́. ¹⁵Lò mɔ̀bɔ́ gakó ǹ yil lé yə̀ nyǔ mə̀ tʼâ la zhɔ̌ sɛ́bɛ́ rɛ́ wẽ́ kɛ̃, bə̀ mʼa ji ǹmyɛ myǐn mú mə̀myɛ́ mɔ́ wẽ́.

Dɛ̃̌ nándwə̃̀ y ǹdə́ cɛ y nándwə̃̀ yə́

¹Rə̀myɛ́ kwã nɛ́, à nɔ dɛ̃̌ nándwə̃̀ ǹdə́ cɛ nándwə̃̀. Dɛ̃̌ nándwã́ y ǹdə́ cɛ nándwã́ y kʼê tɛ̀nɛ́ yé. Nə̀-fɔ̀lɔ̀ w myɛ kʼô tɛ̀nɛ́ yé. ²À nɔ cɔ náàcɔ̀nɔ̀ ò shí dɛ̃̌ Yi sõ ò nʼô swé tɛ̃´. Wɔ́ Zhərəzalɛm nándwə̃̀ yə́. È kwɛrhɛ è cìn ǹdə kə-dùl gə́ ya n kwɛrhɛ ń cìn ń mə́ ń dɛ̃̀ ń byal nɛ́. ³Sə à nyɛ̀ɛ̀ cəl nánfɔ̀lɔ̀ rə̀ shí Yi sõ pyɛ̀lɛ̀ də̀gwã́ yó rə wɔ̀: “Nyǐnə Yi lù rə̀ kɛ̀lɛ́ numbyínə́ bé sõ. Rə̀ la jǒm ǹdə́ bɛ, sə bə̀ mʼa yə̀ rə̀ lyì, rə̀ cìcì bʼa yə̀ nɛ́ ǹdə́ bɛ. ⁴Rə̀ bʼa pɔ́pɔ̌ bə̀ yə́-nàná nɛ́ gakó. Cu ǹdə́ cìlə́ ǹdə́ wu-zhìlù ǹdə́ zwini kʼê tʼâ la nɛ́ yál yé, bə̀ wẽ̀ dé nándwẽ́ dé nyí rí lyɛ̃.”

⁵Sə mɔ̀bɔ́ ń jě pyɛ̀lɛ̀ də̀gwã́ y yó mó wòwə̀: “Nyǐnə à nʼâ lyə́r kɔn gakó, rə̀ la jǐrh nándùl.” N súlí n wɔ̀: “Kɛ̃ zɔ̀mà nɛ́ nə̀myɛ́, bə̀ nə̀ wɔ́ zhə̀n pamparɛ̃ɛ̃, nə̀ bə tə́tɔ̀ná zhe yé.”

⁶N kə́ n wɔ̀ nɛ̀: “Èlâsɛ̃´, kɔn gakó wɛ̀rhɛ́ rə zhɛ̀. Àmyɛ́ wɔ́ Aləfa ǹdə́ Omɛga, rə̀ kùr wɔ́: kɔn gakó kùr-jirə́ ǹdə́ rə̀ yó-gurə́ ga. Lò mɔ̀bɔ́ nə̀nyɛ̀lsɛ̀ zhe, à bʼa pɔ̃́ nyǔ mə̀ tʼâ la zhɔ̌ nə̀-bùlì nɛ̃̌ ń nyɔ̀ nánfò. ⁷Lò mɔ̀bɔ́ gakó ǹ ŋwɛ̀nɛ́ ń jí bɛlɛ, à mʼa pɔ̃́ pɛnɛ́ y èmyɛ́. À mʼa yə̀ ǹ Yi, sə ǹ mʼâ yə̀ à byǐ. ⁸Sə è gə wɔ́ byɛ̀bɛ́ bə̀ wɔ́ bəywẽ-nə̀pwə̀nə̀ mó, ǹdə́ byɛ̀bɛ́ bə̀ yə̀ Yi ni zhí mú, ǹdə́ byɛ̀bɛ́ bə̀ nʼê wɛ̀rhɛ́ tùntùm-bəywààlɛ̀, ǹdə́ lyì-gurnə bé, ǹdə́ nə̀fwə̀ə́lé, ǹdə́ byɛ̀bɛ́ bə̀ nʼê wɛ̀rhɛ́ càl-tumə, ǹdə́ byɛ̀bɛ́ bə̀ nʼê zwə́l vwə̃̀ wẽ̀ tɛ̀bɛ́ rə̀ də̀ Yi yó, ǹdə́ kɔ̀mdɛ́ yilə, bə̀ mʼa ce bə̀ gakó vò púrhú cə́m myǐn mú mə̀ lɛ̀lɛ̀ tɛ̃´ ǹdə bù-sà ta mɔ́ wẽ́. Wɔ́ rə̀myɛ́ rə̀ wɔ́ cu mú bə̀lyè nyân mɔ́.”

Zhərəzalɛm nándwə̃̀ yə́

⁹Rə̀myɛ́ yi ní, à nɔ màlɛ́kabá bwàlpyɛ̀ y bə̀ zhe nə̀zhĩ̌sí shàlpyɛ̀ y zwini rí nánkwaá rɛ́ kùrə̀ né nyàlpyɛ̀ y sú si mú èdù. Màlɛ́ka y zɛ̃̀ e wɔ̀ nɛ̀: “Bà! À mʼa byili mú kɛ̃ mɔ́ mɔ̀bɔ́ Pyì-bwɛ̀lɛ́ y jú mú.”

¹⁰Eshirhə náàcɛ̀nɛ́ só à yó. Màlɛ́ka y zə nɛ e jì pyɔ̀ dɛ̃̌ dɛ̃̌ yó, e byili ni cɔ náàcɔ̀nɔ̀. Sə cɔ w òmyɛ́ mɔ́ wɔ́ Zhərəzalɛm; ò shí dɛ̃̌ Yi sõ ò nʼô swé tɛ̃´. ¹¹Sə Yi zùwə́ y pwẽ̀ dé yʼà nʼê jə́jɛ̀mɛ́ ò wẽ́. Cɔ w cìcì mú yʼà nʼô jə́jɛ̀mɛ́ ǹdə nə́kulu náàcɔ̀nɔ̀ ta, o jà ò nʼô jə́jɛ̀mɛ́ ǹdə nə́kulu námpùlú myɛ ta. Ò nyɛ̌ ǹdə bútóló ta, námpõ pwɛ̃´pwɛ̃´. ¹²Bə̀ yʼà lù byílí nánkəkoro e vò dɛ̃̌ dɛ̃̌ bə mʼe kə́kɛ́lɛ́ wa. O ce ò bwə̀rsè shí ǹdə́ sə̀lyè. Màlɛ́kabá shí ǹdə́ bə̀lyè yʼà nʼê yìlì bwə̀rsé ne, sə Esərayɛl lyì bí kwálsɛ́ shí ǹdə́ sə̀lyè y yilə né yʼà kɛ̃ bwə̀rsé yó. ¹³Ò bwə̀rsé sə̀tɔ̀ yʼà zâ yi-pwírhí səta, sə̀tɔ̀ zâ yi-zùr səta, sə̀tɔ̀ zâ lũ jə̀jĩ́ səta, sə̀tɔ̀ zâ lũ jə̀gwã̀ səta. ¹⁴Bə̀ yʼà zə nə́kulə shí ǹdə́ nə̀lyè bə mʼe ji ò byílí y jì-byòló wə́, sə Pyì-bwɛ̀lɛ́ y tùntúmə́ bé shí ǹdə́ bə̀lyè y yilə né yʼà kɛ̃ nə́kulə né nə̀myɛ́ shí ǹdə́ nə̀lyè y yó.

¹⁵Màlɛ́ka y è yʼà nʼê zɔ̀m ǹdə́ nɛ mɔ́ yʼà zhe sánə́má də̀-dɔ̀lɔ̀ è jɔ̃̀ wà, è la mʼe mɛrhɛ cɔ w ǹdə́ ò bwə̀rsé, ǹdə́ ò byílí yə́. ¹⁶Ò vɔ̀mɛ̀ nɛ́ nə̀na y ga dwɛ̀lɛ̀ rɛ́ mə̂ dwã. Màlɛ́ka y zə sánə́má də̀-dɔ̀lɔ̀ w e mʼe mɛrhɛ cɔ w twər mɔ̀ɔ̀rhɛ̀ shí ǹdə́ rə̀lyè (12.000). Ò dwɛ̀lɛ̀ rɛ́ ǹdə́ ò wɛ̀n dɛ́ ǹdə́ ò dɛ̃̌-zhìyə́ y ga wɔ́ kɔn rə̀dù. ¹⁷Màlɛ́ka y zɛ̃̀ e mɛrhɛ byílí y jə̀-tórhó yírhə́ zɔ̌m ǹdə́ shə́-èna ǹdə́ nə̀na (144), ǹdə lyì bí gə́ yʼà nʼê mɛrhɛ nɛ́ gaga mɔ́.

¹⁸Bə̀ yʼà zə nə́kulə námpǔlsi bə mʼe lù cɔ w byílí yə́. Cɔ w cìcì mú yʼà nyɛ̌ ǹdə sánə́má páá mɔ́ nɛ, è nʼê jə́jɛ̀mɛ́ ǹdə zhə̀zhé ne. ¹⁹Bə̀ yʼà zə nə́kulə námpǔlsi kùrə̀ nánzhəzhɔ̌ bə mʼe kwɛrhɛ byílí y jì-byòló w nə́kulə né nə jǐrh námpɔ̀pɔ̀ɔ̀lɛ̀. Nə́kulu w nã́yóó w yala nɛ́ yʼà nyɛ̌ ǹdə yá-vɔ ta; nə̀lyè nyɔ̃̌ w yʼà nyɛ̌ námpùlú; nə̀tɔ̀ nyɔ̃̌ w yʼà nyɛ̌ námpɔ̀pɔ̀lɔ̀; nə̀na nyɔ̃̌ w yala nɛ́ yʼà nyɛ̌ ǹdə yá-vɔ ta ò nʼô jə́jɛ̀mɛ́; ²⁰nə̀nu nyɔ̌ w yʼà nyɛ̌ nánshɔ̃̀ ǹdə jal ta; nyə̀ldù nyɔ̃̌ w yʼà nyɛ̌ nánshɔ̃̀ gwɛ̃´gwɛ̃´; nyàlpyɛ̀ nyɔ̃̌ w yala nɛ́ yʼà nyɛ̌ ǹdə yá-vɔ ta, o jʼa gùlí námpwã̀; lyɛlɛ nyɔ̃̌ w yʼà la ǹdə nánshɔ̃̀ ta; nə̀bɔ́ nyɔ̃̌ w yʼà nyɛ̌ nánshimú; shí nyɔ̌ w myɛ yʼà nyɛ̌ nánshimú, o jʼà yʼà la ǹdə yá-vɔ ta; shí ǹdə́ òdù nyɔ̃̌ w yʼà nyɛ̌ nánshɔ̃̀, o jʼà yʼà la ǹdə nánshimú ta; shí ǹdə́ nə̀lyè nyɔ̃̌ w yʼà nyɛ̌ ǹdə nyam ta. ²¹Bwə̀rsé shí ǹdə́ sə̀lyè y yʼà wɔ́ nə́kuuli ǹdə dɔ̀msɛ̀ nánfwààlɛ̀ shí ǹdə́ sə̀lyè ta bə̀ mʼe lù sì. Bwə̀rə̀ èdù gakó wɔ́ dɔ̀mɛ̀ èdù bə̀ mʼe lù yə̀. Cɔ w lyì bí dwã-joló jàà y nyɛ̌ ǹdə sánə́má páá mɔ́ nɛ, è nʼê jə́jɛ̀mɛ́ ǹdə zhə̀zhé ne.

²²À yə̀ Yi jì nɛ cɔ w wẽ́ yé; wɔ́ Yi jàn-bə-swɛ̃´-zhe cə́bal mɔ́ ǹdə́ Pyì-bwɛ̀lɛ́ y bə̀ wɔ́ ò Yi jì. ²³Ò bə nə̀nyɔ́nɔ́ ráá cànà pwẽ̀ tum zhe yé; wɔ́ Yi zùwə́ y pwẽ̀ dé rə̀ nʼê yə̂r wə, sə wɔ́ Pyì-bwɛ̀lɛ́ y è wɔ́ ò pàntɛ́mɛ́. ²⁴Ò pwẽ̀ dé bʼa yə̂r lũ w tənèsé lyì bí bə̀ mʼê zhə̀lə̀. Cɛ yó pyâ bɛ́ gakó bʼa zə bə̀ nə̀cɛ̀ndɛ́ bə bə̀ ò wẽ́. ²⁵Ò bwə̀ə̀lé pul twéé twéé. Rə̀ kʼê tʼâ la pyu gaga yé, bə̀ cɛ kʼê tʼâ yìì gàà yé. ²⁶Bə̀ mʼa zə lũ w lyì bí nə̀cɛ̀ndɛ́ ǹdə́ kɔn dɛ̀bɛ́ gakó rə̀ nʼê zhẽ̌ bə̀ yó dɛ̃̌ mɔ́ bə mʼe bə̀ gàà. ²⁷Kɔn dɛ̀bɛ́ rə̀ zhe jìmdì tʼâ la cɔ w òmyɛ́ wẽ́ zú yé. Lyì bí byɛ̀bɛ́ bə̀ nʼê twĩ̀ tumə námməywààlɛ̀ mɔ́ ǹdə́ kɔ̀mdɛ́ myɛ tʼâ la ò wẽ́ zú yé. Wɔ́ byɛ̀bɛ́ bə̀ yilə né kɛ̃ nyǔ sɛ́bɛ́ rɛ́ wẽ́ mó dúdú bə̀ mʼa zù ò wẽ́. Sɛ́bɛ́ rɛ́ rə̀myɛ́ wɔ́ Pyì-bwɛ̀lɛ́ y nyân.

¹Màlɛ́ka y zɛ̃̀ e byili ni bwǐ è nɛ̃̌ mɔ́ nʼê pɛ nyǔ. Mə̀ nyɛ̌ zwẽ́zwẽ́ ǹdə bútóló námpõ ta. Mə̀ nʼê shí Yi ǹdə́ Pyì-bwɛ̀lɛ́ y pyɛ̀lɛ̀ də̀gwã́ y kùr wə̀. ²Mə̀ nʼê dùr mə̀ tó cɔ w lyì bí dwã-joló jàà y cəcəl wə. Bwǐ y yʼà ywə̀r dwã nɛ nə̀gwààlɛ̀ rə̀lyè. Wɔ́ rə̀myɛ́ cəcəl w cǒ w kɔ̀bɔ́ ò byâ bɛ́ nʼê pɛ nyǔ mú yʼà zhǐ ní. Ò nʼô ce byâ twər shí ǹdə́ rə̀lyè byin gakó. Ò nʼô ce byâ cànà cànà gakó, sə ò vɔɔrɛ́ myɛ wɔ́ cə́m rə̀ nʼê shili lũ w lyì bí. ³Sə kɔn dɛ̀bɛ́ rə̀ nʼê ce Yi zhìlì numbyíní yò mó kʼê tʼâ la nɛ́ yál gaga yé.

Yi ǹdə́ Pyì-bwɛ̀lɛ́ y pyɛ̀lɛ̀ də̀gwã́ y bʼa zhì cɔ w wa, sə Yi tùntùnnə̀ bé bʼa cèrhé re. ⁴Bə̀ mʼa nə rɛ ǹdə́ bə̀ yírhə́, sə rə̀ yil lé bʼa kɛ̃ bə̀ cílə́ né yó. ⁵Cə-byṹ kʼê tʼâ la nɛ́ yál, sə bə mʼe zə pàntɛ́mɛ́ ráá nə̀nyɔ́nɔ́ pwẽ̀ tum yé, bə̀ Cinu Yi mà n ce ń pwẽ̀ dé yə̂r be, bə jí pyɛ̀lɛ̀ byinə nə̀ bə zhɔ̌ zhe yilə.

Yezu twírí yə́

⁶Màlɛ́ka y kʼe wɔ̀ nɛ̀: “Zɔ̀mà nɛ́ nyɛ̀bɛ́ wɔ́ zhə̀nà, nə̀ bə tə́tɔ̀ná zhe yé. Cinu Yi mɔ̀bɔ́ ń nə́ ń pɛ ń Eshirhə y ń nyì-zwennə bé ne mó twĩ̀ ń màlɛ́ka y e bə̀ e byili kɔn dɛ̀bɛ́ rə̀ bàn rə̀ kʼê tʼâ la jíjírhú mú ń tùntùnnə̀ bé ne.”

⁷Yezu wòwə̀: “Nyǐ à kʼâ tʼâ la jíjírhú a mʼa bə̀ yé. Lò mɔ̀bɔ́ ǹ zwẽ Yi zɔ̀mà nɛ́ nə̀ ŋwɛ́nɛ́ sɛ́bɛ́ rɛ́ tɛ̀bɛ́ wẽ́ mó, ǹ mʼâ yə̀ wu-nyɔ̃̀ cí.”

⁸Wɔ́ àmyɛ́ Zhã à nyɛ̀ɛ̀ ywẽ̀ né nyɛ̀bɛ́ a jʼa nə nɛ ǹdə́ à yírhə́ mó. À gə́ nyɛ̀ɛ̀ nɛ̀ a jʼa nə nɛ ǹdə́ à yírhə́, rə̀myɛ́ kwã nɛ́, a zɛ̃̀ a wùlì màlɛ́ka y è byili ni ywẽ̀ né nə̀myɛ́ mɔ́ yé né à la y còrhó, ⁹sə è wò nè: “Dɛ̃̌ ǹ cìnə̀, bə̀ká wɛ̀rhɛ́ èta yé, bʼà wɔ́ Yi tùntùnnə̀ ǹdə ǹmyɛ́ ǹdə́ ǹ da-byâ Yi nyì-zwennə bé ǹdə́ lyì bí byɛ̀bɛ́ gakó bə̀ nʼê zwẽ Yi zɔ̀mà nɛ́ nə̀ ŋwɛ́nɛ́ sɛ́bɛ́ rɛ́ tɛ̀bɛ́ wẽ́ mó ta. Wɔ́ Yi yé né ǹ mə̂ sə́ wùlì ní, ń cèrhé re.”

¹⁰E kʼe wɔ̀ nɛ̀: “Bə̀ká shèè Yi zɔ̀mà nɛ́ nə̀ ŋwɛ́nɛ́ sɛ́bɛ́ rɛ́ tɛ̀bɛ́ wẽ́ mó yé, bə̀ yi rí tɛ̀bɛ́ Yi yʼà byili mú yú rə zhɛ̀. ¹¹Lò mɔ̀bɔ́ ń nə́ ń twĩ̀ lwɛlɛ, sə n já n cə̀ə̀lè ń nə́ ń twĩ̀ dì. Lò mɔ̀bɔ́ ń só tùntùm-bəywààlɛ̀ tũ̌, sə n já n cə̀ə̀lè ń nə́ ń twĩ̀ dì. Sə lò mɔ̀bɔ́ ǹ wɔ́ wu-cángá cə́bal, sə́ cə̀ə̀lè ǹ nə́ ǹ wɛ̀rhɛ́ rɛ. Sə lò mɔ̀bɔ́ ǹ wɔ́ Yi lò, sə́ já ń cə̀ə̀lè ǹ wɔ́ rə̀ lò.”

¹²Yezu wòwə̀: “Nyǐ à kʼâ tʼâ la jíjírhú a mʼa bə̀ yé, sə à mʼa bə̀ a kwɛ̃̌ lò gakó kɔn mɛrhɛ ǹdə́ ǹ tùntwə̃̀ə̃̀ né. ¹³Àmyɛ́ wɔ́ Aləfa ǹdə́ Omɛga; à wɔ́ nã́yə́ə́ mó ǹdə́ nánkwaá mɔ́, kɔn gakó kùr-jirə́ ǹdə́ rə̀ yó-gurə́ ga.”

¹⁴Wu-nyɔ̃̀ cìnə́ wɔ́ byɛ̀bɛ́ bə̀ shàrh bə̀ gàndɛ́ mɔ́, bə̀ bə̀ mʼa nə sɔ́má bə jí nyǔ cǒ w byâ bɛ́, sə bə ŋwɛ̀nɛ́ bə tó cɔ w bwə̀rsé bə zù ò wẽ́. ¹⁵È gə wɔ́ byɛ̀bɛ́ bə̀ nʼê twĩ̀ tùntùm-bəywààlɛ́ mɔ́, ǹdə́ byɛ̀bɛ́ bə̀ nʼê twĩ̀ càl-tumə né mó, ǹdə́ nə̀fwə̀ə́lé, ǹdə́ lyì-gurnə bé, ǹdə́ byɛ̀bɛ́ bə̀ nʼê cèrhé wẽ̀ tɛ̀bɛ́ rə̀ də̀ Yi mú, ǹdə́ byɛ̀bɛ́ gakó bə̀ nyí só kɔma góm mó yilə, bə̀ mʼa ce be pwẽ̀ nè, bə̀ tʼâ la cɔ w wẽ́ zú yé.

¹⁶“Àmyɛ́ Yezu, à twĩ̀ à màlɛ́ka y bʼè bwə̂l rə̀myɛ́ e byili ába á gùúlí wẽ́. Wɔ́ àmyɛ́ à wɔ́ pyɔ̌ Dəvyidi dwí rí lò mó, à wɔ́ cə-lár nə̀ŋwɔ ò nʼô jə́jɛ̀mɛ́.”

¹⁷Eshirhə náàcɛ̀nɛ́ ǹdə́ kə-dùl mó zɛ̃̀ bə wɔ̀: “Bà!”

Lò mɔ̀bɔ́ ǹ nyɛ̀ɛ̀ zɔ̀mà nɛ́ nyɛ̀bɛ́, sə ǹmyɛ wɔ̀: “Bà!”

Lò mɔ̀bɔ́ nə̀nyɛ̀lsɛ̀ zhe mó, sə́ bà. Lò mɔ̀bɔ́ ǹ gə nə́ ǹ yàlá, sə́ bə̀ ń zwẽ nɛ̃̌ mɔ̀bɔ́ mə̀ nʼê pɛ nyǔ mú ń nyɔ̀ nánfò.

¹⁸Ámyɛ̌ byɛ̀bɛ́ gakó á nyɛ̀ɛ̀ Yi zɔ̀mà nɛ́ nə̀ ŋwɛ́nɛ́ sɛ́bɛ́ rɛ́ tɛ̀bɛ́ wẽ́ mó, àmyɛ́ Zhã, à nʼâ wə̀l ába: lò mɔ̀bɔ́ ǹ súlí kɔn zɔ̀mà nɛ́ nə̀myɛ́ yó wə, Yi bʼa pɔ̃́ còrhò-tum ǹdə zwini rí bə̀ zɔ̀m rə̀ yò w sɛ́bɛ́ rɛ́ tɛ̀bɛ́ wẽ́ mó ta. ¹⁹Lò mɔ̀bɔ́ ǹ gə kə́ ǹ vùr kɔn Yi zɔ̀mà nɛ́ nə̀ kɛ̃ sɛ́bɛ́ rɛ́ tɛ̀bɛ́ wẽ́ mó wə, Yi bʼa võ mó kɔn dɛ́ dɛ̀bɛ́ rə̀ bwəl rə̀ nyí sɛ́bɛ́ rɛ́ tɛ̀bɛ́ wẽ́ mó: ǹ tá ǹ la cəl nɔ nyǔ cǒ w byâ bɛ́ wẽ́ yé, ń jà ǹ tá ǹ la jàà nɔ Yi cɔ w wẽ́ yé.

²⁰Mɔ̀bɔ́ ń wɔ́ ywẽ̀ né nə̀myɛ́ zhə̀n-cínnə mó nə́ ń wə̀lə̀: “Zhə̀nà, à kʼâ tʼâ la jíjírhú a mʼa bə̀ yé.”

Wɔ́ zhə̀nà. Cinu Yezu, bà!

²¹Cinu Yezu mà n cĩ́ bwəl á gakó yó!