Shilipu

Pwəə sɛ́bɛ́ rɛ́ ń kɛ̃ n pə

Shilipu

cɔ w Kristə-lyì bí ni mú

Pwəə gə́ du ń twər rə̀lyè nyân dɛ́, yò-ècɔ̀nɔ̀ nyí rí bwə̂l yil mó, ńmyɛ̌ ǹdə́ ń tó-dwã bɛ́ tó cɛmɛ nánzhəzhɔ̌ wẽ́ bə mʼe yí Masɛdwanɛ tənà y wa. Bə̀ gə́ yú gàà, bə̀ jɛ̀rɛ̀ bə bwə̀l yò-ècɔ̀nɔ̀ nyí rí cɔ òdù wẽ́; bə̀ nʼê byẽ̀ cɔ w òmyɛ́ bə̀ Shilipu cɔ. Ò lyì jàlà zwẽ nyí bə zù Yezu Kristə (Tùntúmə́ bé 16).

Ńmyɛ̌ ǹdə́ ń tó-dwã bɛ́ zɛ̃̀ bə zhǐr cɔ w òmyɛ́ wa, bə gwẽ̌ súlí yò-ècɔ̀nɔ̀ nyí rí bwə̂l mó cɛmɛ dwã ǹdə́ tənə̀rh dwã wa. Sə Shilipu cɔ w lyì bí yʼà nʼê pɛ bə̀ jɛ̃̀-kɔn bə̀ zhə̀l bə̀ pɛ Pwəə ne bə̀ mʼê sɛ̃ mɔ ń tum dí wẽ́. Byinə màngɛlɛ́ rə̀myɛ́ kwã nɛ́, bə zə Pwəə bə ce byə̀nə́-jù w yò-ècɔ̀nɔ̀ nyí rí bwə̂l mó yilə. Shilipu cɔ w Kristə-lyì bí zɛ̃̀ bə pə bə̀ jɛ̃̀-kɔn bə̀ lò mə̀dù nì, ń yíl Epəfərəditi, n vò n pɔ̃. Pwəə zɛ̃̀ n kɛ̃ sɛ́bɛ́ rɛ́ tɛ̀bɛ́ n pɔ̃ n ká n vò n pə bɛ, n mə n ce bə̀ nə̀báná, n byili bi kɔn gə́ nʼê tó né ń yilə, n súlí n cící bi.

N byili bi bə̀ nyǐ ń byə̀nə́-jù w yál mɔ́ wàr è mʼa ce yò-ècɔ̀nɔ̀ nyí rí bwə̂l mó cẽ yé né zhəl yé. N cící bi bə̀ bə̀ ce jàn nɛ́ bə zhì bə̀ nà y yó kẽkẽ, sə bə zə nyì-dwìì ǹdə́ cìn-lwəl ǹdə́ dwã, sə bə bù ǹdə Yezu Kristə ta, mùnì ga bə yə̀ lyì byɛ̀bɛ́ bə̀ wɔ́ Yi byâ nántwə̂rh lũ w wə (1.1–2.18).

Rə̀myɛ́ kwã nɛ́, ń cící Kristə-lyì bí bə̀ bə̀ dɛ̃̌ bə̀ cìn ǹdə́ lyì byɛ̀bɛ́ bə̀ zɔ̀mà nɛ́ ǹdə́ yò-ècɔ̀nɔ̀ nyí rí nyə̀ná nɛ́ də̀ rə̀dù mú. Ń cící bi myɛ bə̀ bə̀ wɛ̀rhɛ́ ǹdə ńmyɛ̌ ta, sə bə swě tɛ̀bɛ́ rə̀ lyɛ̃ mɔ́, bə ce jàn nɛ́ bə nə tɛ̀bɛ́ rə̀ ŋwɛ́nɛ́ yé né mó, mùnì ga bə jǐrh ǹdə Kristə ta. N cící bi bə̀ bə̀ ce bə̀ tùntwə̃̀ə̃̀ né gakó yə̀ cángá, bə̀ Cinu twírí y bwəlse. N zɛ̃̀ n ce bə̀ nə̀bán bə̀ gə́ sɛ̃ mɔ mɔ́ yilə (3.1–4.23).

Pwəə nə́ ń ce Shilipu cɔ w Kristə-lyì bí

¹Àmyɛ́ Pwəə ǹdə́ Timote wɔ́ Yezu Kristə tùntùnnə̀. Wɔ́ nə́myɛ̌ nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ byɛ̀bɛ́ á ŋwɛ́nɛ́ Shilipu cɔ w wa, á zù Yezu Kristə, á jǐrh Yi lyì mú, ǹdʼá gùlú w yé né cìnə́ bé ǹdə́ gùlú w tùntùnnə̀ bé ne pɔ. ²Nə́ Da Yi ǹdə́ Cinu Yezu Kristə mʼa cĩ́ bwəl á yó, sə bə pə ába yə̀-zùlə́!

Pwəə nə́ ń lwə̀l Yi Kristə-lyì bí yilə

³À gə lyǐrh á yò gakó, à nʼâ ce à Yi rí nə̀báná. ⁴À gə nʼâ lwə̀l lè á yil gakó, à nʼâ lwə̀l lè ǹdə́ wu-nyɔ̃̀, ⁵á gə́ ju á jɛ̃̀ yò-ècɔ̀nɔ̀ nyí rí bwə̂l tum dí wẽ́ kùr-ju yi ní ga kɔn mʼe yí zà mɔ́ yilə. ⁶È gə́ wɔ́ Yi rə̀ ju tùm-ècɛ̀nà nɛ́ nə̀myɛ́ kùr á wun ní wẽ́ mó ce, à yě pamparɛ̃ɛ̃ bə̀ rə̀ mʼa súlí ni rə báásɛ kɔn mʼe yí dɛ̃ rɛ́ tɛ̀bɛ́ Yezu Kristə mà n ká n bə̀ mɔ́. ⁷Kɔn mâ bʼà búl rə̀myɛ́ ámyɛ̌ mə̀dù mə̀dù gakó yilə, bʼà kwè ába a ji à wẽ́, Yi gə́ pɔ ába pɛnɛ́ y kɛ̀bɛ́ rə̀ pɔ àmyɛ́ nɛ mɔ́ yilə. Rə̀ ce á sɛ̃ nɛ byə̀nə́-jù wə̀, kɔn mʼe yí à gə́ zɔ̀m a byili yò-ècɔ̀nɔ̀ nyí rí zhə̀n dɛ́ mɔ́. ⁸Yi yě bə̀ wɔ́ zhə̀nà, à só ába ǹdə́ à wu gakó ǹdə́ Yezu Kristə cìcì sónó wə́.

⁹Sə kɔn dɛ̀bɛ́ à nʼâ lwə̀l Yi ni á yil mó, wɔ́ bə̀ rə̀ ce á sónó w jʼâ nʼô súlí gaga, sə á surhə né ǹdʼá lárma mɔ́ myɛ súlí, ¹⁰mùnì ga á ŋwɛ̀nɛ́ á cír tɛ̀bɛ́ rə̀ mâ. Èta, á mʼâ yə̀ pwɛ̃´pwɛ̃´, dóó tʼâ la á yó w yál, kɔn mʼe yí dɛ̃ rɛ́ tɛ̀bɛ́ Kristə mà n ká n bə̀ mɔ́, ¹¹sə á jʼâ tó á tùm-ècɛ̀nà nɛ́ á nʼá twĩ̀ mú dɛnnɛ á byili pamparɛ̃ɛ̃ bʼâ kʼá bə dwə́ə́re zhe Yezu Kristə jàn yilə. Rə̀myɛ́ mʼa ce Yi zùwə́ y ǹdə́ rə̀ còrhó w du.

Bə̀ co Pwəə byə̀nə́-jù wə̀, sə rə̀myɛ́ yə̀ yò-ècɔ̀nɔ̀ nyí rí bwə̂l mó cə̀r yé

¹²Da-byâ, à nʼâ yâl a ce á lwar bə̀ kɔn dɛ́ tɛ̀bɛ́ rə̀ wɛ̀rhɛ́ nɛ mɔ́ gaga jʼa ce yò-ècɔ̀nɔ̀ nyí rí kwɛrhɛ rə̀ nʼê yí lyì nánzhəzhɔ̌. ¹³Èta, shə̀dɛ́ɛ́sɛ́ shɛ̀bɛ́ sə̀ nʼê yìlì pyɔ̌ mɔ́ kɛ̀lɛ́ y nɛ mɔ́ ǹdə́ lyì bí dwã bɛ́ gakó lwar bə̀ wɔ́ Kristə yil à ŋwɛ́nɛ́ byə̀nə́-jù wə̀. ¹⁴Kɔn súlí myɛ, Kristə-lyì bí gə́ nɔ nɛ bə̀ co byə̀nə́-jù w mú, nánzhəzhɔ̌ jʼa kwɛrhɛ bə zhí Cinu ni, bə̀ nʼê bwə̀l yò-ècɔ̀nɔ̀ nyí rí ǹdə́ wu-jɔ̀, ywẽ bə bɛ zhe yé.

¹⁵Zhə̀nà, lyì jàlà nʼê bwə̀l Kristə yò w ǹdə́ bwɛ̃̌-dǔr ǹdə́ nyə̀-pâr, sə jàlà nʼê bwə̀l w ǹdə́ surhə nyɛ̀bɛ́ nə̀ càn. ¹⁶Bə̀myɛ́ cìnə́ bé nʼê twĩ̀ ǹdə́ sónó, bə̀ bə̀ yě bʼà gə́ ŋwɛ́nɛ́ byə̀nə́-jù w mú, wɔ́ Yi rə̀ nʼê yâl bʼà byili yò-ècɔ̀nɔ̀ nyí rí zhə̀n dɛ́. ¹⁷Sə bə̀ dwã bɛ́ nʼê bwə̀l ń yò w ǹdə́ nyə̀-pâr, sə è də̀ ǹdə́ wu-põ yé. Bə̀ nʼê bùl bə̀ rə̀myɛ́ nʼê súlí à nɔ̀nɔ̀ w byə̀nə́-jù wə̀.

¹⁸Sə rə̀myɛ́ gakó də̀ kaka àmyɛ́ yil yé. Bá è gə wɔ́ lyì yírhə́ yilə, ráá è gə wɔ́ ǹdə́ wu-põ myɛ, wɔ́ Kristə yò w bə̀ nʼê bwə̀l. À wu nyɛ̀, o jʼà gwẽ̌ bʼa yə̀ nyɛ̀n o súlí, ¹⁹bʼà yě bə̀ wɔ́ rə̀myɛ́ rə̀ mʼa vwârh nɛ, á Yi-co w ǹdə́ Yezu Kristə Eshirhə y jàn yilə. ²⁰Kɔn dɛ̀bɛ́ à nʼâ yàlá, a jʼà nʼâ dɛ̃̀ ǹdə́ à wu gakó mó, wɔ́ à bə̀kʼa nə cìzhìl yé, sʼa kwɛrhɛ a zə wu-jɔ̀: à gə ŋwɛ́nɛ́ myɛ, à gə cù myɛ, Kristə zùwə́ y mʼa tó à tùntwə̃̀ə̃̀ né dɛnnɛ e du.

²¹À gə ŋwɛ́nɛ́ myɛ, wɔ́ Kristə ń cǐ ni; à gə cù myɛ, wɔ́ cu mú gaga mɔ́ wẽ́ à bʼa nə à cìn ní. ²²Sə à lũ w wẽ́ yál mɔ́ gə mʼa ce a twĩ̀ kɔn dɛ̀bɛ́ rə̀ zhe kùrə̀, sə́ nyǐ à yə̀l tɛ̌ yil à mʼa cír yé. ²³À ŋwɛ́nɛ́ rə̀myɛ́ ga cəcəl wə. Àmyɛ́ à nʼâ yâl a zhǐr a vò a yə̀ nɛ́ ǹdə́ Kristə, bə̀ wɔ́ rə̀myɛ́ rə̀ cɔ̃̀. ²⁴A jʼà gə ŋwɛ́nɛ́ lũ w wẽ́ à nʼâ sɛ̃ ába myɛ, rə̀myɛ́ kʼê wɔ́ nyɔ́ɔ́ du. ²⁵Sə à yě pamparɛ̃ɛ̃ bʼà mʼa yə̀ nɛ́ ǹdʼá gakó a sɛ̃ ába, mùnì ga á jʼá nʼá ce jàn nɛ́ á zhí Kristə ne ǹdə́ wu-nyɔ̃̀. ²⁶Èta, à gə kʼâ tú á sono, à twírí y bʼa pə ába wu-nyɔ̃̀ Yezu Kristə wẽ́ e súlí.

Cenə á tùntwə̃̀ə̃̀ né myɛrhɛ dwã ǹdə Kristə yò-ècɔ̀nɔ̀ nyí rí gə́ nʼê byili ní

²⁷È gə wɔ́ má má myɛ, ámyɛ̌ wírí á ce á tùntwə̃̀ə̃̀ né myɛrhɛ dwã ǹdə Kristə yò-ècɔ̀nɔ̀ nyí rí gə́ nʼê byili ní. Èta, à gə ŋwɛ̀nɛ́ à tú á sõ, ráá à gə yə̀ twí myɛ, sʼa nyɛ̀ɛ̀ bʼâ zhǐ á nà y yó kẽkẽ, á nyí wɔ́ rə̀dù, á mù dwã nɛ ǹdə́ wu òdù, á nʼá ce jàn nɛ́ mùnì ga kɔn dɛ́ dɛ̀bɛ́ á nyɛ̀ɛ̀ yò-ècɔ̀nɔ̀ nyí rí wẽ́ á zɛ̃̀ á zwẽ rə̀ nyí mú jʼâ wɔ́ èta twéé twéé. ²⁸Sə á bə̀kʼá dùr á zwə̀ bé ywẽ námpɔ́lɛ́ myɛ cìcì yé. Bə̀ mʼa tó rə̀myɛ́ dɛnnɛ bə lwar bə̀ wɔ́ jó sɔ́má yó bə̀ ŋwɛ́nɛ́, sə ámyɛ̌ wɔ́ á cìn vwârh sɔ́má yó á ŋwɛ́nɛ́. Sə rə̀myɛ́ wɔ́ Yi sõ rə̀ nʼê shí ní. ²⁹Wɔ́ Yi rə̀ pɔ ába sɔ́má bʼâ zwí Kristə; sə è də̀ ń zú mú dúdú yé, wɔ́ á nwɛ̀nɛ̀ ń yil myɛ. ³⁰Ámyɛ shɛ̀nɛ́ á nʼá nwɛ̀nɛ̀ nɔ̀nɔ̀ w kɔ̀bɔ́ á nɔ nɛ à nwɛ̀nɛ̀, á jʼâ yě bʼà gwẽ̌ nʼâ nwɛ̀nɛ̀ èlâsɛ̃´ mɔ́.

Yálna cìn-lwəl cìnə́ ǹdə Yezu Kristə ta

¹Á Kristə ne zhú mú nʼê pɛ ába wu-jɔ̀. Ń sónó w nʼô zal á wun ni. Eshirhə náàcɛ̀nɛ́ nʼê ce ába dwã yó. Á zhe wu-bɔ̀nɔ̀ ǹdə́ nɔ̀nɔ̀-dǔr ǹdə́ dwã. Rə̀myɛ́ wɔ́ zhə̀nà. ²Rə̀myɛ́ ce, zəna nyì-dwìì ǹdə́ sónó ǹdə́ wu òdù ǹdə́ bùlì rə̀dù. Èta, á mʼâ ce a zə wu-nyɔ̃̀ námpúm. ³Á bə̀kʼá wɛ̀rhɛ́ kaka ǹdə́ dùnundi ráá cìn-còrhó yé; zəna cìn-lwəl ǹdə́ dwã, sə lò gakó nyǐ ǹ dõ ǹdə ń du mú ta. ⁴Lò gakó bə̀ká nyǐ ǹ dúdú yò yé; nyǐ ǹ dwã bɛ́ myɛ yò. ⁵Búlnə ǹdə Yezu Kristə ta ǹdə́ dwã.

⁶Ńmyɛ̌ ń wɔ́ Yi twéé twéé; ńmyɛ̌ ǹdə́ Yi wɔ́ rə̀dù;

n jà ń yə̀ tə̀ rə̀myɛ́ yil n zhẽ̌ ń cìn dɛ̃̌ yé.

⁷N yẽ̌ ŋwɔ̀nɔ́ kɔ̀bɔ́ ń yà ń zhe mó ne,

n zə ń cìn n yə̀ tùntùnnə̀ n twĩ̀ n pə lyì bí ni.

Ń jǐrh numbyíní, bə nə mɔ ń yàl numbyíní ǹdə nə́ ta.

⁸Ń shɛ̀nɛ́ n lwəl ń cìn tɛ̃´ kɔn gakó wẽ́,

kɔn mʼe yí ń cu; n cì də̀-jɔrhɔ́ yó.

⁹Wɔ́ rə̀myɛ́ yilə, Yi zhẽ̌ ń yó dɛ̃̌,

rə ce mo yil dɛ̀bɛ́ rə̀ du yilə né gakó,

¹⁰mùnì ga kɔn dɛ̀bɛ́ gakó rə̀ ŋwɛ́nɛ́ dɛ̃̌, ǹdə́ tɛ̃´ ǹdə́ cɛ y kùr w ga,

sə rə wùlì tɛ̃´ rə̀ nə̀dwə́nə́ yó Yezu yé né ń yil lé nyɔ̀mɔ̀ yilə,

¹¹sə lyì dwí gakó bwə̀l bə byili bə̀ Yezu Kristə wɔ́ Cinu,

ń Da Yi còrhó yilə.

Yálna lyì byɛ̀bɛ́ bə̀ wɔ́ Yi byâ nántwə̂rh lũ w wə

¹²À dɔwabá, à gə́ yʼà ŋwɛ́nɛ́ á sõ yi ní, á yʼâ nʼá shɛ̀nɛ́ á zwẽ Yi nyí rí twéé twéé. Èlâsɛ̃´ à kʼâ tɛ̀nɛ́ á sõ yé, sə kɔn mâ bʼâ gwẽ̌ cə̀ə̀lè á shɛ̀nɛ́ á zwẽ rə̀ nyí rí. Twĩ̌nə tùntwə̃̀ə̃̀ nyɛ̀bɛ́ nə̀ mʼa byili bʼâ nɔ vwârh, sʼá wɛ̀rhɛ́ nɛ ǹdə́ ywẽ ǹdə́ wu-zɛ̃̀ɛ̃´, ¹³bə̀ wɔ́ Yi cìcì rə̀ nʼê twĩ̀ á wẽ́ mùnì ga á ŋwɛ̀nɛ́ á cír kɔn dɛ̀bɛ́ rə̀ wɔ́ rə̀myɛ́ pùbùlə̀ á wɛ̀rhɛ́.

¹⁴Kɔn dɛ̀bɛ́ gakó á gə la wɔ̀rhɔ́, sʼá bə̀kʼá wɛ̀rhɛ́ rɛ ǹdə́ ŋwɔ́ŋwɔ̌ ráá ǹdə́ sɔ̀ yé. ¹⁵Lũ w lyì bí wɔ́ yǔyǔ ǹdə́ lwɛlɛ cìnə́, sə ámyɛ̌ yálna lyì byɛ̀bɛ́ bə̀ bə yò zhe, wu-põ cìnə́; á yə̀ lyì byɛ̀bɛ́ bə̀ wɔ́ Yi byâ nántwə̂rh bə̀ cəcəl wə; á yə̀ pwẽ̀ lyì; á pwẽ̀ dé yə̂r bə̀ púlə́púlə́, ¹⁶á mʼá byili bi Yi zɔ̀mɛ̀ rɛ́ rə̀ nʼê pɛ nyǔ mú. Á gə wɛ̀rhɛ́ èta, à lyààrɛ́ tɛ̀bɛ́ gakó à lyɛ̀ɛ̀ mɔ́ tʼâ la nánfò yál yé, sə dɛ̃ rɛ́ tɛ̀bɛ́ Kristə ká ń bàn mɔ́, à wu bʼa yə̀ nyɛ̀n á yilə.

¹⁷Á gə́ zhí Yezu Kristə ne mó nyɛ̌ ǹdə wɔ́ vwĩ̀ á nʼá zwə́l á pɛ Yi ni ta. Bá à gə mə̂ sʼa cì myɛ, à cu mú bʼa yə̀ vwĩ̀ rə súlí á nyân dɛ́ nɛ. È gə wɔ́ èta, à nʼâ fùù ǹdə́ wu-nyɔ̃̀, sə à nʼâ yâl bʼâmyɛ tó ne á fùù. ¹⁸Ámyɛ fǔnə ǹdə́ wu-nyɔ̃̀, sə àmyɛ tó ába a fùù.

Pwəə nə́ ń yâl n twĩ̀ Timote ǹdə́ Epəfərəditi Shilipu cɔ w Kristə-lyì bí sõ

¹⁹Cinu Yezu gə sɛ̃, à nʼâ bùl bʼà mʼa twĩ̀ Timote á sõ dwã nɛ́ nyɛ̀bɛ́ nɛ, mùnì ga n ká n bə̀ n byili ni kɔn dɛ̀bɛ́ rə̀ nʼê wɛ̀rhɛ́ á sõ, mùnì à wu za. ²⁰È gə də̀ ńmyɛ̌ yilə, lò dõ tɛ̀nɛ́ ń nə́ ń bùl á yò ǹdə́ ń wu gakó ǹdə àmyɛ́ ta yé. ²¹È gə wɔ́ lyì bí dwã bɛ́ yilə, Yezu Kristə nyə̀ná nɛ́ yò yə̀ bɛ̀ zwì yé. Wɔ́ bə̀ sə̀pwà nyə̀ná nɛ́ yò ò zù bì. ²²Sə è gə wɔ́ Timote yilə, á cìcì mú yě bə̀ ń tó ne n twĩ̀ yò-ècɔ̀nɔ̀ nyí rí yilə, ǹdə bə̀sɔ́bwɛ̀lɛ́ gə́ nʼê sɛ̃ è da nɛ nɛ́; ń tùntwə̃̀ə̃̀ né yàl cángá. ²³À nʼâ bùl bə̀, à gə tú à lwar kɔn gə́ la nɛ́ yál à yilə, sə́ nyǐ wɔ́ ńmyɛ̌ à bʼa twĩ̀ á sõ. ²⁴Sə à yě pamparɛ̃ɛ̃ bə̀, Cinu jàn yilə, àmyɛ́ cìcì mʼa bə̀ á sõ dwã nɛ́ nyɛ̀bɛ́ nɛ.

²⁵Á yʼâ twĩ̀ nə́ da-byǐ Epəfərəditi à sõ ǹdə́ kɔn dɛ̀bɛ́ à zhe rə̀ tum; ń tó ne n twĩ̀, n tó ne n nwɛ̀nɛ̀, sə à pwírí bə̀ kɔn wɔ́ nyɔ́ɔ́ bʼà kʼa ce n bə̀ á sõ. ²⁶Ń gə́ tú n lwar bʼâ nyɛ̀ɛ̀ ń nə̀bwɛ̀nɛ̀ rɛ́ yò mó ce, ń cìcì mú yà ń nə́ ń yâl ǹdə́ ń wu gakó n bə̀ n nə ába. ²⁷Wɔ́ zhə̀nà, ń yà ń bə jàn zhe yé. Címí y yʼà zù mù dɛ̃´dɛ̃´, ń yà ń nə́ ń yâl n cì. Sə Yi dùr ń nɔ̀nɔ̀, sə è də̀ ń dúdú nɔ̀nɔ̀ rə̀ dùr yé, rə̀ dùr àmyɛ nɔ̀nɔ̀, mùnì ga à wu-zhìlù w bə̀kʼa kʼo súlí yé. ²⁸À nʼâ yâl a ce n bə̀ á sõ làlà, á nə mɔ, mùnì ga á wun kʼa yə̀ nyɛ̀n, sə àmyɛ wu swẽ́. ²⁹Rə̀myɛ́ yilə, zwẽnə mo ǹdə́ wu-nyɔ̃̀ nánfɔ̀lɔ̀ Cinu yil lé yilə. Zəna nyɔ̀mɔ̀ ǹdə́ lò mɔ̀bɔ́ gakó ń wɔ́ Cinu kwã-lò ǹdə ńmyɛ̌ ta mɔ́, ³⁰bə̀ ń zhɔ̃̀ ń myə̂l lé Kristə tum dí yilə, n ŋwɛ̀nɛ́ n sɛ̃ nɛ ǹdə́ sɛ̃ɛ̃´ kɛ̀bɛ́ á cìcì yʼâ wàr á mʼá bàn nɛ sãɔ̃.

Pwəə nə́ ń byili bə̀ wɔ́ ń gə zhí Yezu Kristə ne è ce n kə́ n bə dóó zhe yé

¹Da-byâ, nyǐnə kɔn dɛ̀bɛ́ à la ába byilu èlâsɛ̃´ mɔ́: cenə á wun yə̀ nyɛ̀n á gə́ zù Cinu mú yilə. À tʼâ lyɛ̀ɛ̀ gaga ǹdʼába rə̀myɛ́ byilu yé. Rə̀myɛ́ wɔ̌ rə̀ bʼa sɛ̃ ába mùnì ga á zhì kẽkẽ.

²Dɛ̃̌na á cìn ǹdə́ tùntùnnə̀ námməlwâlsɛ́. Bə̀ wɔ́ kǔlsi. Wɔ́ bə̀myɛ́ bə̀ nʼê cìrh ába bə̀ ce né, á ce bə̀ nʼê gòm ába, e jʼà wɔ́ kɔn dɛ̀bɛ́ rə̀ bə kùr zhe yé. ³Wɔ́ nə́myɛ̌ nə́ wɔ́ góm mó páá mɔ́ cìnə́, bə̀ nə́myɛ̌ nʼé tó Yi Eshirhə y dɛnnɛ nə́ cèrhé re. Nə́ yə̀ nə́ cìn nì yẽ̌ nə́ ce wẽ̀ dɛ̀bɛ́ numbyínsi nʼê wɛ̀rhɛ́ jɔ̃̀ w yé. Nə́ kwè nə́ cìn nə́ ce Yezu Kristə jɔ̃̀ wà. ⁴Àmyɛ jʼà yʼà wɔ̌ à mʼa kwè à cìn a ce wẽ̀ dɛ́ rə̀myɛ́ mɔ́ jɔ̃̀ wà. Sə lò gə nə́ ń bùl bə̀ ń nɔ ń cìn ń gə́ co ń cìn wẽ̀ dé rə̀myɛ́ jɔ̃̀ w mɔ́ yilə, àmyɛ́ yʼà wɔ̌ à bùl rə̀myɛ́ du, ⁵bə̀ wɔ́ Esərayɛl lyì bí dwí rí wẽ́ bə̀ lùl nè né; à dwã nyàlpyɛ̀ yù w bə̀ gõ nè; à wɔ́ Bɛ̃zhamɛ kwálá y lò; à wɔ́ Ebərə páá. È gə wɔ́ Muyiisi nyə́ né zõ yilə, à yʼà wɔ́ Farɛzhɛ̃ɛ̃. ⁶À yʼà nʼâ zwẽ ne náàcɛ̀nɛ́; rə̀myɛ́ ce, à yʼà nʼâ nwɛ̀nɛ̀ Kristə-lyì bí. Nyə́ né zõ gə yʼà nʼê ce lò cẽ dóó zal Yi yé né, à yʼà bə dóó dwí-byǐ zhe yé.

⁷À yʼà nʼâ nyǐ wẽ̀ dé rə̀myɛ́ gakó ǹdə kɔn dɛ̀bɛ́ rə̀ zhe kùr ta. Sə èlâsɛ̃´, à gə́ zù Kristə mó ce, à nʼá nyǐ ri ǹdə kɔn nánfò ta. ⁸À gə́ lwar à Cinu Yezu Kristə pár mɔ́ wɔ́ kɔn dɛ̀bɛ́ rə̀ zhe kùr du kɔn gakó; rə̀myɛ́ ce à nʼâ nyǐ kɔn dɛ̀bɛ́ gakó à zhe mó ǹdə kɔn nánfò ta. Wɔ́ Kristə yil à yẽ̌ kɔn gakó ne, à nʼâ nyǐ ri ǹdə pùlú yó ywə̀ə̀rhè ta, mùnì ga n yə̀ kɔn dɛ̀bɛ́ rə̀ zhe kùr à yilə, ⁹sə n cìní ni námpúm. À kʼâ tʼâ bùl bə̀ wɔ́ Muyiisi nyə́ zõ mó è ce à kʼâ bə dóó zhe Yi yé né yé. Wɔ́ Kristə ne zhú mú è ce. Sə rə̀myɛ́ wɔ́ Yi rə̀ nʼê pɛ rɛ byɛ̀bɛ́ bə̀ zù Kristə mó ne. ¹⁰Kɔn dɛ̀bɛ́ à nʼâ yàlá, wɔ́ a lwar Kristə párá, sʼa lwar jàn dɛ́ tɛ̀bɛ́ rə̀ ce n bwìrhì mú myɛ gə́ wɔ́ nɛ́, sʼa tó mo a nwɛ̀nɛ̀, a tó mo a cì. ¹¹Èta, à nʼâ bùl bə̀ Yi mʼa bwìrhì àmyɛ a dù cùùrì wẽ́.

¹²Zhə̀nà, à tʼâ yâl a byili bʼà gwẽ̌ nɔ dɛ̀bɛ́ à nʼâ pyà mɔ́ yé; à cɛ̀nɛ̀ rɛ́ gwẽ̌ yə̀ pyìrh kókó yé. Sə à nʼâ ce jàn nɛ́ mùnì ga a zə rə̀myɛ́ gakó à jɔ̃̀ wà, ǹdə Yezu Kristə gə́ zhe àmyɛ́ ń jɔ̃̀ w nɛ́.

¹³Da-byâ, à tʼâ bùl bʼà gwẽ̌ nɔ rɛ yé. Sə kɔn dɛ́ dɛ̀bɛ́ à nʼâ wɛ̀rhɛ́ mɔ́, wɔ́ a swě tɛ̀bɛ́ rə̀ lyɛ̃ mɔ́, sʼa ce jàn nɛ́ a nə tɛ̀bɛ́ rə̀ ŋwɛ́nɛ́ yé né mó. ¹⁴À nʼâ ce jàn nɛ́ ǹdə́ ywə́l, mùnì ga a nə kwândɛ́ tɛ̀bɛ́ Yi nʼê byẽ̀ nə́ba rə̀ la pɔ dɛ̃̌ Arəzana w Yezu Kristə jàn yil mó.

¹⁵Nə́myɛ̌ byɛ̀bɛ́ gakó nə́ zù Yezu Kristə kɔn dɛnɛ mɔ́, wɔ́ bùlə̀ né nə̀myɛ́ nə̀ mə̂ sə nə yə̀ nə́ wẽ́. Sə ámyɛ̌ jàlà gə nʼá bùl kɔn dõ, Yi bʼa pul á surhə. ¹⁶Sə sɔ́má y kɛ̀bɛ́ nə́ gakó kwè kɔn mʼe yí zà mɔ́, bànà nə́ jʼá cə̀ə̀lè nə́ yə̀ èmyɛ́ yó.

¹⁷Da-byâ, wɛ̀rhɛ́na ǹdə àmyɛ́ ta; nyǐnə lyì bí byɛ̀bɛ́ bə̀ tùntwə̃̀ə̃̀ né nʼê tó kɔn dɛ̀bɛ́ nə́ cèrhè ába mó ne mó, sʼá kwè bə̀myɛ́ nà yá. ¹⁸À yʼà jɛ̀rɛ̀ a byili ába twər nánzhəzhɔ̌, sə à kʼâ nʼâ bwérhé à byili ába ǹdə́ yə́-nàná, bə̀ lyì nánzhəzhɔ̌ ŋwɛ́nɛ́ bə̀ tùntwə̃̀ə̃̀ né nʼê byili bə̀ bə̀ wɔ́ Yezu Kristə də̀-jɔrhɔ́ w zwə̀. ¹⁹Sə bə̀ yésé gə́ zâ mə̀gã̌ mɔ́, wɔ́ jó jàà w bə̀ la nɛ́, bə̀ bə̀myɛ́ wɔ́ bə̀ pwǐsí sə̀ wɔ́ bə̀ yi. Kɔn dɛ̀bɛ́ rə̀ wɔ́ cìzhìl kɔn mɔ́, wɔ́ rə̀myɛ́ bə̀ mʼê yàl bə̀ wu-nyɔ̃̀ kɔna. Bə̀ tʼâ bùl kaka dõ yò, e súlí lũ w kɔ̀bɔ́ nyə̀ná nɛ́ dúdú ni yé.

²⁰Sə è gə wɔ́ nə́myɛ̌ yilə, wɔ́ Arəzana è wɔ́ nə́ da-dǒ. Wɔ́ gàà nə́ rʼé dɛ̃̀ nə́ Cinu Yezu Kristə ǹdə́ nə́ wun gakó ń la nɛ́ shú n bə̀ n zwẽ nə́ba. ²¹Ń mà n zə jàn dɛ́ tɛ̀bɛ́ rə̀ ce ń wɔ̌ ń mà n ce kɔn gakó shɛ̀nɛ́ ń nyí ni mú, n mə n ce nə́ yala nɛ́ nyɛ̀bɛ́ nə̀ bə kùr zhe mó jǐrh ǹdə ń nyə̀ná nɛ́ nə̀ zhe zùwə́ mó ta.

Cenə à tùntwə̃̀ə̃̀ né gakó yə̀ cángá, bə̀ Cinu twírí y bwəlse

¹Da-byâ nántwə̂rh, á nʼá pɛ nɛ wu-nyɔ̃̀ ǹdə́ yó-dɛ̃̌-zhõ̌. À só sʼa kʼa nə ába. Rə̀myɛ́ ce, zhínə Cinu ni á zhì kẽkẽ.

²È gə wɔ́ Evodi ǹdə́ Sɛ̃tiishi yilə, à nʼâ lwə̀l bè, bə̀ bə̀ ce jàn nɛ́ bə ló dwã yó, bə yə̀ wu òdù cìnə́ ǹdə da-bə̀kwá ta Cinu yil lé yilə. ³Bə̀ yʼà nʼê tó àmyɛ́ ǹdə́ Kəlɛma ǹdə́ à dwã tùntùnnə̀ bé bə̀ yilə né kɛ̃ nyǔ mə̀ tʼâ la zhɔ̌ sɛ́bɛ́ rɛ́ wẽ́ mó ne bə̀ bwə̀l yò-ècɔ̀nɔ̀ nyí rí. Rə̀myɛ́ ce, à nʼâ lwə̀l mó bə̀ ǹ sɛ̃ bɛ.

⁴Á gə́ zù Cinu mú ce, fǔnə ǹdə́ wu-nyɔ̃̀. À kʼa bwérhé à nʼâ wə̀l ába: fǔnə ǹdə́ wu-nyɔ̃̀.

⁵Wɛ̀rhɛ́na wu-bɔ̀nɔ̀ ǹdə́ lyì bí gakó, bə̀ Cinu twírí y bwəlse. ⁶Á bə̀kʼá cĩ́ kaka twə́lə́ á wẽ́ yé. Cenə Yi kɔn gakó wẽ́, á ce rə̀ nə̀báná, sʼá lwə̀l lè kɔn dɛ̀bɛ́ gakó á zhe rə̀ tum. ⁷Sə Yi yə̀-zùlə́ né nə̀ du numbyíní surhə dwí gakó mó bʼa yìlì á wun ní ǹdʼá bùlə̀ né Yezu Kristə wẽ́.

⁸Da-byâ, nyǐnə kɔn dɛ́ dɛ̀bɛ́ rə̀ dàl à la ába byilu mú: zəna kɔn dɛ̀bɛ́ gakó rə̀ càn, rə̀ mə̂ dwã ǹdə́ còrhó mó, á cĩ́ á wẽ́: dɛ̀bɛ́ gakó rə̀ wɔ́ zhə̀nà, dɛ̀bɛ́ gakó rə̀ mə̂ dwã ǹdə́ nyɔ̀mɔ̀, dɛ̀bɛ́ gakó rə̀ wɔ́ cángá, dɛ̀bɛ́ gakó rə̀ wɔ́ pwɛ̃´pwɛ̃´, dɛ̀bɛ́ gakó rə̀ mə̂ dwã ǹdə́ sónó, dɛ̀bɛ́ gakó rə̀ wɔ́ yil-dɛ̃̌-zhõ̌ kɔna; cĩ́nə rə̀myɛ́ gakó á wẽ́, ⁹sʼá ce jàn nɛ́ á wɛ̀rhɛ́ kɔn dɛ̀bɛ́ gakó á nyɛ̀ɛ̀ à byili ába mó, ǹdə́ dɛ̀bɛ́ à wɛ̀rhɛ́ á yírhə́ nə mó, ǹdə́ dɛ̀bɛ́ à cèrhè ába á zwẽ mó; sʼá yẽ̌ bə̀ Yi rí tɛ̀bɛ́ rə̀ nʼê pɛ yə̀-zùlə́ mó bʼa yə̀ nɛ́ ǹdʼába.

Pwəə nə́ ń ce Shilipu cɔ w lyì bí nə̀bán bə̀ gə́ sɛ̃ mɔ mɔ́ yilə

¹⁰À wu yàl nyɛ̀n Cinu wẽ́, á gə́ gwẽ̌ nʼá lyǐrh à yò mó yilə. À yě bʼâ yʼâ nʼá bùl à yò. Wɔ́ bɔ̀l á yə̀ nɛ á wɛ̀rhɛ́ kɔn à yil yé. ¹¹È də̀ kɔn à nʼâ yâl yil à nʼâ zɔ̀m èta yé. À wu nyɛ̀ ǹdə́ kɔn dɛ̀bɛ́ à zhe mó. ¹²À gə zhe dɛ̃´dɛ̃´, à gə bə kaka zhe myɛ, à yě à gə́ nʼâ zal à cìn ní. À gə zhe à nʼâ jí, à gə bə zhe à nʼâ jí myɛ, à gə zhe dɛ̃´dɛ̃´, à gə bə kaka zhe myɛ, à wu nyɛ̀ rə̀myɛ́ ga wẽ́. ¹³À wɔ̌ rə̀myɛ́ gakó Kristə jàn yilə. ¹⁴Sə ǹdə́ rə̀myɛ́ ga, á gə́ sɛ̃ nɛ à yə̀-cə̀ə̀lé wẽ́ mó, á wɛ̀rhɛ́ cɛ̀nɛ̀.

¹⁵Shilipu cɔ lyì, á cìcì mú yě, à gə́ ju kùr a bwə̀l yò-ècɔ̀nɔ̀ nyí rí Masɛdwanɛ tənà y wa, a zɛ̃̀ a zhǐr, rə̀myɛ́ kwã nɛ́, wɔ́ ámyɛ̌ dúdú á yàl Kristə-lyì á sɛ̃ nɛ. Lyì dwã yə̀ nɛ tó nə́ sɛ̃ dwã nɛ yé; wɔ́ ámyɛ̌ dúdú. ¹⁶À gə́ yʼà ŋwɛ́nɛ́ Tesəloniki ní yi ní myɛ, á yə̀ jíjírhí á mʼá sɛ̃ nɛ ǹdə́ kɔn dɛ̀bɛ́ à yʼà zhe rə̀ tum mú yé. Sə á gə́ sɛ̃ nɛ èta mɔ́ yə̀ twər rə̀dù yàl yé. ¹⁷È də̀ kɔn à nʼâ yâl yil yé. Tɛ̀bɛ́ à nʼâ yâl mɔ́, wɔ́ sə tɛ̀bɛ́ á nʼá wɛ̀rhɛ́ mɔ́ zə nyɔ̀ɔ̀rhɛ́ e pə ába.

¹⁸Kɔn dɛ̀bɛ́ gakó á pɔ rə bə̀ mɔ́, à nɔ rɛ. Wɔ́ rə̀myɛ́ yil à nʼâ byili ába sʼá lwar bʼà nɔ rɛ. Èlâsɛ̃´, Epəfərəditi gə́ zɔ á pansɛ́ gakó n yí mú ce, à nɔ kɔn dɛ̀bɛ́ gakó à zhe rə̀ tum mú. Rə̀ gaga mɔ́ du à gə́ yʼà nʼâ yâl nɛ́. Kɔn dɛ́ dɛ̀bɛ́ á pɔ nɛ mɔ́, wɔ́ kɔn dɛ̀bɛ́ rə̀ sú Yi yírhə́; rə̀ wɔ́ ǹdə vwĩ̀-kɔn ta Yi swéné, sə rə̀ zwẽ de. ¹⁹Kɔn dɛ̀bɛ́ gakó á zhe rə̀ tum, à Yi rí rə̀ zhe kɔn gakó mó mʼa pə rɛ ába Yezu Kristə wẽ́. ²⁰Nə́ Da Yi mà n nə còrhó byinə nə̀ bə zhɔ̌ zhe yilə! Amɛ̀n!

Pwəə nə́ ń ce Shilipu cɔ w Kristə-lyì bí ń mə́ ń gwi ń sɛ́bɛ́ rɛ́ yó

²¹Cenə lyì bí byɛ̀bɛ́ gakó bə̀ jǐrh Yi dwí mú Yezu Kristə yil lé yilə. À da-byâ bɛ́ nə́ ŋwɛ́nɛ́ ǹdə́ dwã nyɔ̀nɔ̀ mɔ́ myɛ nʼê ce ába. ²²Byɛ̀bɛ́ gakó bə̀ jǐrh Yi dwí mú nʼê ce ába. Sə wɔ́ byɛ̀bɛ́ bə̀ ŋwɛ́nɛ́ pyɔ̌ mɔ́ sõ kɛ̀lɛ́ w mɔ́ bə̀ nʼê ce ába du.

²³Cinu Yezu Kristə mà n cĩ́ bwəl á gakó yó!