Yò-ècɔ̀nɔ̀ nyí rí
Zhã
kɛ̃ mɔ́
Zhã yà ń wɔ́ Yezu kwã-lyì bí shí ǹdə́ bə̀lyè y mə̀dù. Ń gə la ń cìcì zɔ̀mà zɔ̌m, ń bə shɛ̀ ń yil lé byõ̌ yé. Ń gə tú ń nə́ ń yâl n zɔ̀m ń cìn yò, ń ya n ká n byili bə̀ wɔ́ “Yezu kwã-lò mə̀dù”. È gə də̀ rə̀myɛ́, ń ya n wɔ̀ bə̀ wɔ́ “Yezu kwã-lò mó mɔ̀bɔ́ ń yà ń só mó”.
Zɔ̀mà nɛ́ ǹdə́ tumə né nyɛ̀bɛ́ Məco ǹdə́ Markɛ ǹdə́ Lwiki byili Yezu shò-kwã nɛ́ mɔ́, Zhã yə̀ nə̀myɛ́ mɔ́ byili dɛ̃´dɛ̃´ ǹdə bə̀ ta yé. Zhã myɛ dúdú kə́ n byili ywẽ̀ dwã nə̀ wɛ̀rhɛ́, Məco ǹdə́ Markɛ ǹdə́ Lwiki myɛ yə̀ nə̀ yò zɔ̀m yé.
Zhã byili bə̀ Yezu wɔ́ Yi nyì-zɔ̀mɛ̀ rɛ́, sə ń jǐrh numbyíní. Wɔ́ Yezu ń zə pwẽ̀ dé ǹdə́ zhə̀n dɛ́ n bə̀ n byili nə́ba (1.1-18). Zhã byili myɛ bə̀ ń kɛ̃ sɛ́bɛ́ rɛ́ mùnì ga lyì bí shɛ̀nɛ́ bə zwẽ nyí bə̀ Yezu wɔ́ Yi Byǐ, lò mó mɔ̀bɔ́ Yi yʼà bwəl nyí bə̀ rə̀ la ce n bə̀ n vwârh lyì bí mú (20.30-31).
Zhã byili màmyaarhɛ kùrə̀ tàlpyɛ̀ Yezu wɛ̀rhɛ́ mùnì ga lyì bí tó rə̀ dɛnnɛ bə lwar ń gə́ wɔ́ lò ná-dwí yilə. Ń byili myɛ bə̀ Yezu jòm ǹdə́ lyì, n zhərh ǹdə́ bɛ, n cèrhè bè kàrmɔ̀ dɛ̃´dɛ̃´. Sə ǹdə́ rə̀myɛ́ ga, Zhwifubá nánzhəzhɔ̌ yə̀ shɛ̀nɛ́ bə zwẽ nyí bə̀ ń wɔ́ Yi Byǐ yé. Zhã byili cícú mú mɔ̀bɔ́ Yezu pɔ ń kwã-lyì bí ni mú, ǹdə́ zɔ̀mà nɛ́ ń zɔ̀m ń Yi-co w wẽ́ n byili ń Da nɛ, bə̀ yil mó (13.1–17.26), n súlí n zɔ̀m Yezu cu mú ǹdə́ ń bùrhù mú myɛ yò.
1Yi nyì-zɔ̀mɛ̀ rɛ́ jǐrh numbyíní
1Kùr-ju yi ní, ǹdə́ Yi nyì-zɔ̀mɛ̀ rɛ́ yʼà ŋwɛ́nɛ́. Rə̀ yʼà ŋwɛ́nɛ́ ǹdə́ Yi, sə rə̀ yʼà wɔ́ Yi. 2Kùr-ju yi ní, ǹdə́ rə̀ yʼà ŋwɛ́nɛ́ ǹdə́ Yi. 3Wɔ́ rə̀myɛ́ dɛnnɛ Yi tó né rə wɛ̀rhɛ́ kɔn gakó. Kɔn rə̀dù ga tɛ̀nɛ́ Yi yə̀ rə̀ zɔ̀mɛ̀ rɛ́ dɛnnɛ tó rə wɛ̀rhɛ́ yé. 4Wɔ́ rə̀myɛ́ rə̀ nʼê pɛ nyǔ, sə nyǔ mú mə̀myɛ́ wɔ́ numbyínə́ bé pwẽ̀. 5Pwẽ̀ dé yə̂r cə-byín wə, sə cə-byín dí yə̀ rə̀ cə̀r yé.
6Yi twĩ̀ lò mə̀dù n bà, ń yíl Zhã. 7Ń tú zhə̀n byilu, mùnì n yə̀ pwẽ̀ dé zhə̀n-cínnə, mùnì lyì bí gakó tó ń dɛnnɛ bə zwẽ nyí. 8È də̀ ńmyɛ̌ cìcì ń yà ń wɔ́ pwẽ̀ dé yé. Wɔ́ twĩ́ bə̀ twĩ̀ mù bə̀ ń yál pwẽ̀ dé zhə̀n-cínnə. 9Yi zɔ̀mɛ̀ rɛ́ dúdú rə̀ wɔ́ pwẽ̀ zhə̀nà, rə̀ tú lũ w wə, mùnì rə yə̂r lò gakó.
10Rə̀ yʼà ŋwɛ́nɛ́ lũ w wə, sə lũ w lyì bí yə̀ rə̀ pár lwar yé. E jà wɔ́ rə̀myɛ́ dɛnnɛ Yi tó né rə wɛ̀rhɛ́ lũ wə́. 11Rə̀ tú rə̀ cìcì lyì bí sõ, sə bə̀ yə̀ shɛ̀nɛ́ bə zwẽ de yé. 12Ǹdə́ rə̀myɛ́ ga, bə̀ jàlà shɛ̀nɛ́ bə zwẽ de, sə rə̀ ce bə̀myɛ́ mɔ́ jǐrh Yi byâ, bə̀ gə́ zù rì mú yilə. 13Sə bə̀ yə̀ Yi byâ jǐrh ǹdə́ numbyíní jàn ráá ǹdə́ numbyíní pùbùlə̀ yé. Bə̀ yə̀ bal ǹdə́ kɛ̃ dɛnnɛ tó bə jǐrh Yi byâ yé. Wɔ́ Yi cìcì rə̀ ce bə jǐrh rə̀ byâ.
14Yi nyì-zɔ̀mɛ̀ rɛ́ jǐrh numbyíní, sə numbyíní y èmyɛ́ jòm nə́ sõ. Nə́ yírhə́ nɔ è zùwə́ yə́. Wɔ́ Da mɔ́ ń pɔ zùwə́ y èmyɛ́ ń Byì-dùwə̀ y ne. È sónó w já dɛ̃´dɛ̃´. Wɔ́ èmyɛ́ dɛnnɛ nə́ tó né nə́ lwar Yi gə́ wɔ́ kɔn ná-dwí yil né zhə̀n zhə̀nà.
15Zhã yàl ń zhə̀n-cínnə, n bwə̀l n mə n zɔ̀m ń yò n wɔ̀: “Wɔ́ ńmyɛ̌ yò à yʼà zɔ̀m a byili bə̀ lò la tà-kwã n bà, sə ń du àmyɛ́, bə̀ ń jɛ̀rɛ̀ nɛ̀ ń ŋwɛ́nɛ́.”
16Sə nə́ gakó tó ńmyɛ̌ dɛnnɛ nə́ nə Yi sónó w námpúm ǹdə́ rə̀ pansɛ́ rə̀ nʼê pɛ nə́ba twéé twéé mó. 17Yi tó Muyiisi dɛnnɛ rə byili nə́ba rə̀ nyə́ né, sə rə̀ tó Yezu Kristə dɛnnɛ rə byili nə́ba rə̀ sónó w ǹdə́ rə̀ gə́ wɔ́ kɔn ná-dwí yilə. 18Lò lò gwẽ̌ yə̀ Yi nɛ ǹdə́ ń yírhə́ yé. Sə wɔ́ rə̀ Byì-dùwə̀ y è wɔ́ Yi, è ŋwɛ́nɛ́ ǹdə́ Da mɔ́ mɔ́, è ce numbyínə́ bé lwar rə̀ párá.
Zhã byili bʼè də̀ ńmyɛ̌ ń wɔ́ Kristə mó yé
(Məco 3.1-12; Markɛ 1.1-8; Lwiki 3.1-18)
19Zhwifubá yó-cìnə́ bé yʼà twĩ̀ Yi jì y vwĩ̀-zwə́lnə bé jàlà, ǹdə́ Levyi lyì jàlà, bə shí Zhərəzalɛm bə vò bə̀ nʼê bwə̀rh Zhã bə̀ zhe: “Ǹmyɛ́ wɔ́ mɔ̌?”
20Rə̀myɛ́ yó, Zhã byili bi pamparɛ̃ɛ̃. Ń yə̀ bɛ kaka shèè yé. Ń byili bi bə̀ è də̀ ńmyɛ̌ ń wɔ́ Kristə mó yé.
21Bə zɛ̃̀ bə bwə̀rh mò bə wɔ̀: “Ǹmyɛ́ nə wɔ́ mɔ̌? Ǹ wɔ́ Elyi?”
N wɔ̀ bɛ: “Àmyɛ́ də̀ Elyi yé.”
Bə kʼe bwə̀rh mò bə wɔ̀: “È nə wɔ́ ǹmyɛ́ ǹ wɔ́ Yi nyì-zwennə mó?”
N wɔ̀ bɛ: “Ɔ̃́ʼɔ̃, è də̀ àmyɛ́ à wɔ́ Yi nyì-zwennə mó myɛ yé.”
22Bə zɛ̃̀ bə kʼe bwə̀rh mò bə wɔ̀: “Sə ǹmyɛ́ nə wɔ́ mɔ̌? Ǹmyɛ́ cìcì byili nə́ba ǹ gə́ wɔ́ lò ná-dwí yilə, mùnì ga nə́ vò é byili byɛ̀bɛ́ bə̀ twĩ̀ nə́ba mó ne.”
23N zɛ̃̀ n wɔ̀ bɛ: “Àmyɛ́ wɔ́ mɔ̀bɔ́ Yi nyì-zwennə Ezəyi yà ń zɔ̀m ń yò mó. Ń yà ń zɔ̀m n wɔ̀:
‘Cəl nʼê bwə̀l gɔ-elũ èpòlò wə̀, rə̀ zhe:
Kwɛrhɛna Cinu sɔ́má y á ce e yə̀ cángá.’ ”
24Lyì bí byɛ̀bɛ́ bə̀ yʼà twĩ̀ Zhã sõ mó jàlà yʼà wɔ́ Farɛzhɛ̃ɛ̃bá. 25Bə zɛ̃̀ bə bwə̀rh mò bə wɔ̀: “È nə gə də̀ ǹmyɛ́ ǹ wɔ́ Kristə mó, ń jà ǹ də̀ Elyi, e jà è də̀ ǹmyɛ́ ǹ wɔ́ Yi nyì-zwennə mó myɛ, byè yil ǹ nə nə́ ǹ pɛ lyì bí nɛ̃̌-shɔ?”
26Zhã wɔ̀ bɛ: “Àmyɛ́ nʼâ zə nɛ̃̌ à pɛ ába nɛ̃̌-shɔ, sə lò mə̀dù ŋwɛ́nɛ́ á wẽ́, á jʼâ yə̀l ń pár yé. 27Àmyɛ́ jɛ̀rɛ̀ mɔ̀ a bà, sə à yə̀ yírh swí sʼà lwə̂r ń nə̀cìlə̀ né nyínsí myɛ cìcì yé.”
28Rə̀myɛ́ gakó wɛ̀rhɛ́ Betəni ní, Zhɔrdɛ̃ bwǐ y èpákɛ̀, Zhã gə́ yà ń nə́ ń pɛ lyì bí nɛ̃̌-shɔ mə̀gã̌ mɔ́.
Mɔ̀bɔ́ ń nə́ ń vùr lũ w yə̀-bəlwàálɛ́ mɔ́
29È zɛ̃̀ nəkɔkɔ́lɛ́ yá, Zhã nɔ Yezu ń bàn ń sono, n zɛ̃̀ n wɔ̀: “Nyǐnə Yi pyì-bwɛ̀lɛ́ y è nʼê vùr lũ w yə̀-bəlwàálɛ́ mɔ́.1.29 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili pyì-bwɛ̀lɛ́ gə́ wɔ́ kɔn ná-dwí yil gàà mɔ́.30Wɔ́ ńmyɛ̌ yò à yʼà zɔ̀m a byili bə̀ lò la tà-kwã n bà, sə ń du àmyɛ́, bə̀ ń jɛ̀rɛ̀ nɛ̀ ń ŋwɛ́nɛ́ nɛ́ mɔ́. 31E jʼà yʼà yə̀l ń pár yé, sə àmyɛ́ tú à nʼâ pɛ nɛ̃̌-shɔ Esərayɛl lyì bí ni, mùnì ga bə lwar ń párá.”
32Zhã kə́ n wɔ̀: “À nɔ Eshirhə náàcɛ̀nɛ́ è shí dɛ̃̌ ǹdə épwèné ta, è nʼê swé ń yó. 33À yʼà yə̀l ń pár yé, sə Yi rí tɛ̀bɛ́ rə̀ twĩ̀ nì bʼà zə nɛ̃̌ a pə lyì bí nɛ̃̌-shɔ mɔ́ wò nè: ‘Ǹ bʼâ nə lò Eshirhə náàcɛ̀nɛ́ shí dɛ̃̌ è nʼê swé ń yó. Sə́ lwar bə̀ wɔ́ ńmyɛ̌ ń mà n zə Eshirhə y n pə lyì bí nɛ̃̌-shɔ.’ 34Sə à yírhə́ nɔ mɔ. Rə̀myɛ́ ce, à nʼâ byili bə̀ ń wɔ́ Yi Byǐ zhə̀n zhə̀nà.”
Andərɛ ǹdə́ Shəmɔ ǹdə́ lò dõ jǐrh Yezu kwã-lyì
35È zɛ̃̀ nəkɔkɔ́lɛ́ kə́dò, Zhã yà ń kə́ ń zhǐ gàà, ńmyɛ̌ ǹdə́ ń kwã-lyì bə̀lyè. 36Ń gə́ nɔ Yezu ń nə́ ń lyɛ̃, n wɔ̀: “Nyǐnə Yi pyì-bwɛ̀lɛ́ yá.”
37Ń kwã-lyì bí bə̀lyè y gə́ nyɛ̀ɛ̀ ń gə́ zɔ̀m nɛ́ mɔ́, bə zhǐr bə tó Yezu ni.
38Yezu pyìrhí n pwírí bə̀ ŋwɛ́nɛ́ ń kwã nɛ́, n zɛ̃̀ n wɔ̀ bɛ: “Bə̀kɔ́n á nʼá pyà?”
Bə wɔ̀ mɔ̀: “Rəbyi, yẽ̀ ǹ nə́ ǹ zwɛ̃̀ nɛ́?” (Rəbyi kùr wɔ́: “Yó-cə́bal”.)
39N zɛ̃̀ n wɔ̀ bɛ: “Bànà á lyɛ̃ bʼâ mʼâ lwar à gə́ nʼâ zwɛ̃̀ mə̀gã̌.” Bə tó mo bə yí, bə nə ń gə́ nə́ ń zwɛ̃̀ má. È yʼà wɔ́ yi-kár bɔ̀l wà, bə jʼa mɛ̃ ń sõ dɛ̃ rɛ́ rə̀myɛ́ də̀dɛ̀nɛ́ yá.
40Zhã kwã-lyì bí bə̀lyè y bə̀ yʼà nyɛ̀ɛ̀ ń gə́ zɔ̀m nɛ́ bə zhǐr bə tó Yezu ni mú, mə̀dù y yà ń wɔ́ Shəmɔ Pyɛɛrɛ da-byǐ Andərɛ. 41Andərɛ jɛ̀rɛ̀ n vò n nə Shəmɔ n wɔ̀ mɔ̀: “Nə́ nɔ Məshi.” (Rə̀ kùr wɔ́: Kristə.)
42N zə mɔ n vò Yezu sõ. Yezu gə́ nɔ mɔ, n wɔ̀ mɔ̀: “Ǹ yíl Shəmɔ, ǹ da yíl Zhã. Sə bə̀ mʼa byẽ̀ mó bə̀ Kəfaasɛ.” (Kəfaasɛ ǹdə́ Pyɛɛrɛ ga kùr wɔ́: “Nə́kulu”.)
Shilipu ǹdə́ Natanayəə jǐrh Yezu kwã-lyì
43È zɛ̃̀ nəkɔkɔ́lɛ́ yá, Yezu zɛ̃̀ n vò Gəlile tənà y wa, n nə Shilipu, n wɔ̀ mɔ̀: “Bə̂ tó à kùrə̀.”
44Shilipu yà ń wɔ́ cɔ w bə̀ nʼê byẽ̀ bə̀ Betəsəyiidi mú lò, ńmyɛ̌ ǹdə́ Andərɛ ǹdə́ Pyɛɛrɛ ga. 45Rə̀myɛ́ kwã nɛ́, Shilipu vò n nə Natanayəə, n wɔ̀ mɔ̀: “Nə́ nɔ mɔ̀bɔ́ Muyiisi zɔ̀m ń yò Yi nyə́ né sɛ́bɛ́ rɛ́ wẽ́, Yi nyì-zwennə bé myɛ jʼa zɔ̀m ń yò bə̀ sábá nɛ́ wẽ́ mó. Nyǐ wɔ́ Nazarɛtɛ lyì bal Zhozefu byǐ Yezu.”
46Natanayəə zɛ̃̀ n wɔ̀ mɔ̀: “Kɔ̀-twə̂ wɔ̌ è bʼa shí Nazarɛtɛ?”
Shilipu wɔ̀ mɔ̀: “Bà, ǹ yírhə́ bʼa na.”
47Yezu gə́ nɔ Natanayəə ń bàn ń sõ, n zɛ̃̀ n zɔ̀m ń yò, n wɔ̀: “Nyǐ Esərayɛl lò zhə̀n zhə̀nà. Yǔyǔ yə̀ mə̀ gùlí yé.”
48Natanayəə zɛ̃̀ n bwə̀rh mò n wɔ̀: “Yẽ̀ ǹ nɔ à pár nɛ́?”
Yezu wɔ̀ mɔ: “À nɔ mɔ́ épyìlú w kùr wə̀, ǹdə́ Shilipu gwẽ̌ yə̀ twí n byẽ̀ mó yé.”
49Natanayəə zɛ̃̀ n wɔ̀ mɔ̀: “Yó-cə́bal, ǹ wɔ́ Yi Byǐ, ń jà ǹ wɔ́ Esərayɛl pyɔ̌.”
50Yezu wɔ̀ mɔ̀: “Wɔ́ à gə́ wò bʼà nɔ mɔ́ épyìlú w kùr w mó è ce, ń zwẽ nyí? Nyǐ ǹ yírhə́ bʼa nə ywẽ̀ nánfwààlɛ̀ dwã nə̀ du kɔ̀bɔ́.” 51N zɛ̃̀ n kə́ n wɔ̀ mɔ̀: “Zhə̀n zhə̀nà, à nʼâ wə̀l ába: á bʼâ nə dɛ̃̌ yi rí rə̀ pul, Yi màlɛ́kabá nʼê zɛ̃̀ bə̀ zhə̀l dɛ̃̌ bə̀ kʼâ swé Numbyíní Byǐ yó.”
2Yezu ce nɛ̃̌ jǐrh sɛ̃´
1Shilipu ǹdə́ Natanayəə gə́ jǐrh Yezu kwã-lyì mú, è dwã nə̀lyè yùwə̀, kɛ̃-jú yʼà ŋwɛ́nɛ́ Gəlile tənà y cɔ òdù wẽ́. Bə̀ nʼê byẽ̀ cɔ w òmyɛ́ bə̀ Kana. Yezu ná yà ń zhə̀l gàà, 2sə bə̀ yʼà byẽ̀ Yezu ǹdə́ ń kwã-lyì bí myɛ bə bə̀ kɛ̃-jú w címsí jàà wà.
3Sə címsí sɛ̃´ mɔ́ tú mə mwìrì. Yezu ná zɛ̃̀ n wɔ̀ mɔ̀: “Bə̀ sɛ̃´ mɔ́ zhɛ̀.”
4Yezu wɔ̀ mɔ̀: “Kɛ̃, è nə wɔ́ ǹmyɛ́ ǹ bʼâ byili ni? À yi gwẽ̌ yə̀ yí yé.”
5Ń ná zɛ̃̀ n wɔ̀ kɛ̀lɛ́ y tùntùnnə̀ bé ne: “Kɔn dɛ̀bɛ́ ń gə wò bə̀ wɛ̀rhɛ́na, sʼá wɛ̀rhɛ́.”
6Nə́kulu nə̀bwándɛ tə̀ldù yʼà zhǐ tɛ̃´ gàà, Zhwifubá yʼà nʼê ce nɛ̃̌ rə̀ wẽ́ bə̀ mʼê sàm bə̀ jɛ̀sɛ́ ǹdə bə̀ lùl-e-pwírí y gə́ yʼà nʼê byili ní. Sə nə̀bwándɛ́ rə̀myɛ́ òdù gakó yʼà yú kɔ̀lɔ́ yírhə́ nə̀lyè ráá nə̀tɔ̀. 7Yezu wɔ̀ kɛ̀lɛ́ y tùntùnnə̀ bé ne: “Tɛ̃´na nɛ̃̌ á ce nə̀bwándɛ́ dɛ̀bɛ́ wẽ́ rə sú.”
Bə tɛ̃´ nɛ̃̌ mɔ́ bə ce né rə sú pyámm. 8Yezu zɛ̃̀ n wɔ̀ bɛ: “Tɛ̃´na èlâsɛ̃´ á vò á pə mɔ̀bɔ́ ń nə́ ń nyǐ címsí yò mó ne.”
Bə tɛ̃´ bə vò e pɔ̃. 9Ń gə́ lə́lá nɛ̃̌ mɔ́ mə̀ jǐrh sɛ̃´ mɔ́, ń yà ń yə̀l sɛ̃´ mɔ́ mə̀myɛ́ mɔ́ gə́ shí mə̀gã̌ yé, sə kɛ̀lɛ́ y tùntùnnə̀ bé byɛ̀bɛ́ bə̀ tɛ̃´ nɛ̃̌ mɔ́ mɔ́ yʼà yě sɛ̃´ mɔ́ gə́ shí má, n zɛ̃̀ n byẽ̀ kɛ̃ mɔ́ byal mɔ́, 10n wɔ̀ mɔ̀: “Lò gakó ya n jɛ̀rɛ̀ n pə sɛ̃´ mɔ́ mɔ̀bɔ́ mə̀ nyɛ̀ dɛ̃´dɛ̃´ mɔ́ lyì bí ni. Bə̀ gə nyɔ̀ mɔ̀ bə súwə́, n zɛ̃̀ n pə bɛ mɔ̀bɔ́ mə̀ bə nyɛ̀ dɛ̃´dɛ̃´ mɔ́. Ǹmyɛ́ zɛ̃̀ ń cə̀r mɔ̀bɔ́ mə̀ nyɛ̀ dɛ̃´dɛ̃´ mɔ́ ń cĩ́ kɔn mʼe yí èlâsɛ̃´?”
11Wɔ́ màmyɔ w òmyɛ́ ò yàl Yezu màmyɔ nã́yóó ń wɛ̀rhɛ́ n mə n byili ń gə́ wɔ́ lò ná-dwí yilə. Ń tó òmyɛ́ dɛnnɛ n byili ń zùwə́. Wɔ́ Gəlile tənà y cɔ w bə̀ nʼê byẽ̀ bə̀ Kana mɔ́ wẽ́ ń wɛ̀rhɛ́ w nɛ́. Ń kwã-lyì bí jʼa zwẽ nyí bə̀ ń wɔ́ Kristə mó.
12Rə̀myɛ́ kwã nɛ́, ńmyɛ̌ ǹdə́ ń ná ǹdə́ ń nyáná bɛ́ ǹdə́ ń kwã-lyì bí zhǐr bə vò Kapɛrnaɔm, bə wɛ̀rhɛ́ dwã màngɛlɛ́.
Yezu jì wò-yə̀rnə̀ bé Yi jì y kɔ̀nɔ́ w wa
(Məco 21.12-13; Markɛ 11.15-17; Lwiki 19.45-46)
13Zhwifubá címsí bə̀ nʼê byẽ̀ bə̀ Pakɛ y mɔ́ gə́ tú e bwəlse, Yezu zɛ̃̀ n vò Zhərəzalɛm.2.13 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili címsi gakó gə́ nʼê jí ní gàà mɔ́.14N yí n nə lyì bə̀ zə nə̀-byərh ǹdə́ pyììsì ǹdə́ épwə̂nse bə̀ jě tɛ̃´ Yi jì y kɔ̀nɔ́ w wa, bə̀ nʼê yè. N nə sə̀byì-lyə́rnə bə̀myɛ jě tɛ̃´ bə̀ nʼê lyə́r bə̀ sə̀byâ. 15N zɛ̃̀ n kwè nyínsi n mə n wɛ̀rhɛ́ dànə̀shɔ̀rɔ́, n jì bə̀myɛ́ ǹdə́ bə̀ pyììsí ǹdə́ bə̀ nə̀-byesé gakó n ce pwẽ̀ nè, n cìrh wẽ̀ dé tɛ̀bɛ́ sə̀byì-lyə́rnə bé yʼà nʼê lyə́r sə̀byâ bɛ́ rə̀ yó mó ǹdə́ sə̀byâ bɛ́ ga n làà tɛ̃´, 16n zɛ̃̀ n wɔ̀ byɛ̀bɛ́ bə̀ yʼà nʼê yè épwə̂nsé mó ne: “Zəna wẽ̀ dé èta mɔ́ á mʼá du nyɔ̀nɔ̀. Á bə̀kʼá zə à Da kɛ̀lɛ́ y á mʼá wɛ̀rhɛ́ ya yé.”
17Rə̀myɛ́ yó, ń kwã-lyì bí zɛ̃̀ bə lyǐrh kɔn dɛ̀bɛ́ rə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó. Bə̀ kɛ̃ rə̀ wẽ́ bə wɔ̀: “À só ǹ kɛ̀lɛ́ y dɛ̃´dɛ̃´ Cinu. È sónó w nʼê jí ni ǹdə myǐn ta.”
18Zhwifubá yó-cìnə́ bé zɛ̃̀ bə wɔ̀ mɔ̀: “Wɛ̀rhɛ́ màmyɔ ń byili nə́ba, mùnì nə́ lwar bə̀ ǹ zhe sɔ́má sə́ jì lyì bí.”
19Yezu wɔ̀ bɛ: “Wǔrnə Yi jì y kɛ̀bɛ́, sʼá yẽ̌ bʼà mʼa kʼa lù y dwã nə̀tɔ̀ wẽ́ a zhɛ̀.”
20Zhwifubá yó-cìnə́ bé wɔ̀ mɔ̀: “Bə̀ wɛ̀rhɛ́ byinə shə́-èna ǹdə́ nyə̀ldù Yi jì y kɛ̀bɛ́ lú mú yó, ǹmyɛ́ zɛ̃̀ ń wɔ̀ bə̀ ǹ bʼâ ká lù y ń zhɛ̀ dwã nə̀tɔ̀ wẽ́?”
21E jà Yi jì y kɛ̀bɛ́ Yezu yà ń nə́ ń zɔ̀m è yò mó, wɔ́ ń yala nɛ́ yò ń yà ń nə́ ń zɔ̀mà. 22Sə ń gə́ tú n cì n ká n bwìrhì n du cùùrì wẽ́ kwã nɛ́, ń kwã-lyì bí zɛ̃̀ bə kʼa lyǐrh bə̀ ń yà ń byili rə̀myɛ́. Bə jʼa zwẽ kɔn dɛ́ tɛ̀bɛ́ rə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó ǹdə́ tɛ̀bɛ́ Yezu yà ń byili mú.
Yezu yě lò gakó gə́ wɔ́ nɛ́
23Yezu gə́ yà ń ŋwɛ́nɛ́ Zhərəzalɛm nɛ́ Pakɛ y címsí yi ní mú, lyì bí yʼà nə mɔ ń nə́ ń wɛ̀rhɛ́ màmyaarhɛ́. Rə̀myɛ́ ce bə̀ nánzhəzhɔ̌ zù mù. 24Sə ń gə́ yà ń yě bə̀ gakó yé-shò mó ce, ń yà ń bə bə̀ zhə̀n zhe yé. 25Ń cìcì gə́ yà ń yě kɔn dɛ̀bɛ́ rə̀ ŋwɛ́nɛ́ numbyíní wu w wẽ́ mó ce, ń yà ń tá ń pyà bə̀ lò byili mu ǹ dõ gə́ wɔ́ nɛ́ yé.
3Yezu zhərh ǹdə́ Nəkɔdɛm
1Farɛzhɛ̃ɛ̃bá lò mə̀dù yà ń ŋwɛ́nɛ́ ń yíl Nəkɔdɛm, e jà ń yà ń ŋwɛ́nɛ́ Zhwifubá yó-cìnə́ bé gùlú w wẽ́. 2Dɛ̃ rə̀dù, n zɛ̃̀ n bə̀ Yezu sono ǹdə́ cəcɛ̃, n wɔ̀ mɔ̀: “Yó-cə́bal, lò tɛ̀nɛ́ ń wɔ̌ màmyaarhɛ́ tɛ̀bɛ́ ǹ nə́ ǹ wɛ̀rhɛ́ mɔ́ ń la wɔ̀rhɔ́ ǹdə́ Yi gə tɛ̀nɛ́ ǹdə́ rə̀-ná-cí yé. Rə̀myɛ́ ce, nə́ yě bə̀ wɔ́ Yi rə̀ twĩ̀ mú ń bə̀ ǹ nə́ ǹ byili nə́ba rə̀ zɔ̀mɛ̀ rɛ́.”
3Yezu zɛ̃̀ n wɔ̀ mɔ̀: “Zhə̀n zhə̀nà à nʼâ wə̀l mó: lò mɔ̀bɔ́ bə̀ gə yə̀ mɔ́ lùl dɛ̃̌ lul mó, ǹ tá ǹ la Yi pyɛ̀lɛ̀ rɛ́ nɔ ń nyǐ ǹdə́ ǹ yírhə́ yé.”
4Nəkɔdɛm zɛ̃̀ n bwə̀rh mò n wɔ̀: “Etər bə̀ mʼa tó né bə kʼa kwɛrhɛ bə lù náncɛ y myɛ? Ń wɔ̌ ń mà n ká n zù ń ná wẽ́, ń ná lù mù kə́dò?”
5Yezu wɔ̀ mɔ̀: “Zhə̀n zhə̀nà à nʼâ wə̀l mó: lò mɔ̀bɔ́ bə̀ gə yə̀ mɔ́ lùl nɛ̃̌ ǹdə́ Eshirhə náàcɛ̀nɛ́ wẽ́, ǹ wàr ǹ mʼâ zù Yi tənà y wẽ́ yé. 6Lò mɔ̀bɔ́ bə̀ lùl numbyíní jal wẽ́, ǹ wɔ́ numbyíní jal kɔna. Lò mɔ̀bɔ́ bə̀ lùl Eshirhə náàcɛ̀nɛ́ wẽ́, ǹ wɔ́ Eshirhə kɔna. 7Zɔ̀mɛ̀ rɛ́ à zɔ̀m bə̀ wɔ́ nyɔ́ɔ́ sʼá lù dɛ̃̌ lul mó bə̀kʼa jàr mɔ́ yé. 8Zho w nʼô ce ò la ò gə́ só má. Ǹ nyɛ̌ ò dweme, ń jà ǹ yə̀l ò gə́ shí má, ǹ yə̀l ò gə́ la má myɛ yé. Kɔn mʼa yə̀ èta ǹdə́ lò mɔ̀bɔ́ bə̀ lùl Eshirhə y wẽ́ mó myɛ.”
9Nəkɔdɛm kə́ n bwə̀rh mò n wɔ̀: “Etər rə̀myɛ́ wɔ̌ rə̀ mʼa tó né rə wɛ̀rhɛ́?”
10Yezu wɔ̀ mɔ̀: “Ǹmyɛ́ ǹ nə́ ǹ cèrhè Yi zɔ̀mɛ̀ rɛ́ Esərayɛl lyì bí ni, ń zɛ̃̀ ǹ yə̀l rə̀myɛ́? 11Zhə̀n zhə̀nà à nʼâ wə̀l mó: nə́myɛ̌ nʼé zɔ̀m kɔn dɛ́ dɛ̀bɛ́ nə́ yě mó. Wɔ́ tɛ̀bɛ́ nə́ nɔ ǹdə́ nə́ yírhə́ mó nə́ rʼé byili, e jʼâ tʼá yâl á zwẽ dɛ̀bɛ́ nə́ rʼé byili ába mó yé. 12À gə nʼâ zɔ̀m kɔn dɛ̀bɛ́ rə̀ ŋwɛ́nɛ́ cɛ yó mó yò, á zɛ̃̀ á tʼá zwẽ nyí. Sə à nə gə zɔ̀m dɛ̀bɛ́ rə̀ ŋwɛ́nɛ́ dɛ̃̌ Arəzana w mɔ́ yò, etər á mʼâ tó né á zwẽ nyí? 13È gə də̀ Numbyíní Byǐ mú ń shí Arəzana w n bə̀ mɔ́, lò dõ gwẽ̌ yə̀ Arəzana w zhə̀l yé.
14“Ǹdə Muyiisi gə́ yà ń zə kã̀mɔ w n zwìrhì dɔm mɔ́ gɔ-elũ èpòlò w wẽ́, n byə́byɛ́lɛ́ mɔ dɔ̌ w nɛ n zhẽ̌ dɛ̃̌ nɛ́, wɔ́ nyɔ́ɔ́ bə̀ bə̀ zhẽ̌ Numbyíní Byǐ myɛ èta, 15mùnì ga lò mɔ̀bɔ́ gakó ǹ zù mù, sə́ nə nyǔ mə̀ tʼâ la zhɔ̌.”
16Yi swéné lũ w dɛ̃´dɛ̃´ kɔn mʼe yí rə twĩ̀ rə̀ byì-dùwə̀ y ò wẽ́, mùnì ga lò mɔ̀bɔ́ gakó ǹ zù mù sə ǹ bə̀ká jé yé, sə́ nə nyǔ mə̀ tʼâ la zhɔ̌.
17Yi yə̀ rə̀ Byǐ mú twĩ̀ lũ w wẽ́ bə̀ ń kə́ ò bùrsì n pə w còrhò-tum yé. Rə̀ twĩ̀ mù mùnì ga lũ w lyì bí tó ńmyɛ̌ dɛnnɛ bə nə vwârh. 18Lò mɔ̀bɔ́ ǹ zù mù, bə̀ tʼâ la ǹ bùrsì kɔ́ bə pɔ̃́ còrhò-tum yé. Sə lò mɔ̀bɔ́ ǹ yə̀ mɔ̀ zwì, ǹ bùrsí kɔ́wá, ǹ mʼâ nə còrhò-tum, ǹ gə́ yə̀ Yi Byì-dùwə̀ y zwì mú yilə. 19Pwẽ̀ dé tú lũ w wə, sə lũ w lyì bí só cə-byín dí du pwẽ̀ dé. Wɔ́ rə̀myɛ́ rə̀ ce Yi kɔ́ bə̀ bùrsì, rə̀ la bɛ còrhò-tum pɔ. 20Lò mɔ̀bɔ́ gakó ń nə́ ń twĩ̀ lwɛlɛ, pwẽ̀ wɔ́ ń súsúlú. Ń yě bə̀, ń gə du pwẽ̀ dé ne, lyì bí mʼa lwar ń lwɛlɛ rɛ́. Rə̀myɛ́ ce ń bə shɛ̀ pwẽ̀ dé ne du yé. 21Sə lò mɔ̀bɔ́ ń nə́ ń twĩ̀ zhə̀n wẽ́, rə̀-ná-cí nə́ ń dwi pwẽ̀ dé ne, mùnì ga lyì bí lwar pamparɛ̃ɛ̃ bə̀ wɔ́ Yi pùbùlə̀ ń nə́ ń twĩ̀.
Zhã-Bətiisi byili bə̀ Yezu du ńmyɛ̌
22Rə̀myɛ́ kwã nɛ́, Yezu ǹdə́ ń kwã-lyì bí zhǐr bə vò Zhide tənà y wa. Bə wɛ̀rhɛ́ dwã màngɛlɛ́ gàà, sə ń yà ń nə́ ń pɛ nɛ̃̌-shɔ lyì bí ni. 23Zhã myɛ yà ń nə́ ń pɛ nɛ̃̌-shɔ. Cə-byǐ èdù yʼà ŋwɛ́nɛ́ Səlyim sarh nɛ, bə̀ nʼê byẽ̀ bə̀ Enɔ̃. Nɛ̃̌ yʼà ŋwɛ́nɛ́ gàà dɛ̃´dɛ̃´. Wɔ́ rə̀myɛ́ è ce ń yà ń nə́ ń pɛ nɛ̃̌-shɔ lyì bí byɛ̀bɛ́ bə̀ yʼà nʼê twí ń sono mó ne gàà. 24Rə̀myɛ́ yi ní mú, ǹdə́ bə̀ yʼà gwẽ̌ yə̀ Zhã byə̀nə́-jù w ce yé.
25Dɛ̃ rə̀dù, Zhã kwã-lyì bí jàlà ǹdə́ Zhwifu mə̀dù zɛ̃̀ bə̀ nʼê mà nyə̀-pâr ǹdə́ dwã kɔn dɛ̀bɛ́ lò mə̂ sə n wɛ̀rhɛ́, n mə n kwɛrhɛ ń yò ǹdə́ Yi mú shò-kwã nɛ́. 26Bə zɛ̃̀ bə vò Zhã sono bə wɔ̀ mɔ̀: “Yó-cə́bal, bal mɔ́ mɔ̀bɔ́ ń yà ń tó mó ń ŋwɛ́nɛ́ Zhɔrdɛ̃ bwǐ y èpákɛ̀, ǹ yà ǹ zɔ̀m ń yò ǹdə́ nə́ba mɔ́, ńmyɛ nə́ ń pɛ nɛ̃̌-shɔ lyì bí ni èlâsɛ̃´, sə lyì bí gakó nʼê zhə̀l ń sono.”
27Zhã zɛ̃̀ n wɔ̀ bɛ: “Lò wàr ń mà n nə kɔn ǹdə́ è gə də̀ Yi rə̀ pɔ mɔ rɛ yé. 28Á cìcì yě bʼà byili ába pamparɛ̃ɛ̃ bʼè də̀ àmyɛ́ à wɔ́ Kristə mó yé. Wɔ́ twĩ́ bə̀ twĩ̀ nì a tó ń yé a bà. 29Mɔ̀bɔ́ ń jú kɛ̃ mɔ́ mɔ́, wɔ́ ńmyɛ̌ ń wɔ́ ń byal mɔ́, sə kɛ̃ mɔ́ byal mɔ́ dɔwa mɔ́ wɔ́ zhí ń zhǐ ń dɔwa mɔ́ sarh nɛ, ń nə́ ń cili ń zɔ̀mà nɛ́. Sə ń gə nyɛ̀ɛ̀ ń cəl, ń wu nyɛ̀. Èta myɛ, tɛ̀bɛ́ wɔ́ àmyɛ́ wu-nyɔ̃̀ námpúm. 30Wɔ́ ńmyɛ̌ yil lé rə̀ mə̂ sə rə du, sə àmyɛ́ nyân dɛ́ kwɛ́nɛ́ tɛ̃´.”
31Mɔ̀bɔ́ ń shí dɛ̃̌ yi w n bə̀ mɔ́ du lyì bí gakó, sə mɔ̀bɔ́ ń shí cɛ y shó w wẽ́ mó, wɔ́ cɛ y lò, ń nə́ ń zɔ̀m wẽ̀ dé tɛ̀bɛ́ rə̀ ŋwɛ́nɛ́ cɛ yó mó yò. Mɔ̀bɔ́ ń shí dɛ̃̌ Arəzana w mɔ́ du bə̀ gakó. 32Ń nə́ ń byili kɔn dɛ̀bɛ́ ń nɔ ǹdə́ ń yírhə́ ǹdə́ tɛ̀bɛ́ ń nyɛ̀ɛ̀ ǹdə́ ń zhã̌ mɔ́, sə lò lò bə shɛ̀ zhə̀n dɛ́ ń nə́ ń byili mú zõ yé. 33Sə lò mɔ̀bɔ́ ǹ shɛ̀nɛ́ ń zwẽ zhə̀n dɛ́ ń nə́ ń byili mú, ǹ lwar pamparɛ̃ɛ̃ bə̀ Yi wɔ́ zhə̀n cə́bal. 34Yi nʼê ce mɔ̀bɔ́ rə̀ twĩ̀ mú sú ǹdə́ rə̀ Eshirhə yə́. Rə̀myɛ́ ce, zɔ̀mà nɛ́ nyɛ̀bɛ́ ń nə́ ń zɔ̀m mɔ́ wɔ́ rə̀myɛ́ nyə̀ná. 35Da mɔ́ só ń Byǐ mú, n kwè kɔn gakó n ce ń jɔ̃̀ wà. 36Lò mɔ̀bɔ́ ń zù Byǐ mú, rə̀-ná-cí zhe nyǔ mə̀ tʼâ la zhɔ̌. Sə lò mɔ̀bɔ́ ń yə̀ mɔ̀ zwì, rə̀-ná-cí tá ń la nyǔ mú zal yé. Yi lyim dí bʼa mɛ̃ ń yó wə.
4Yezu zhərh ǹdə́ Samarɛ lyì kɛ̃ mə̀dù
1Yezu lwar bə̀ Farɛzhɛ̃ɛ̃bá nyɛ̀ɛ̀ bə̀ ń nə́ ń nɛ kwã-lyì ń pɛ bɛ nɛ̃̌-shɔ du Zhã. 2(È gə wɔ́ zhə̀n wál yilə, Yezu cìcì yà ń tá ń pɛ nɛ̃̌-shɔ yé. Wɔ́ ń kwã-lyì bí bə̀ yʼà nʼê pɛ.) 3Yezu zɛ̃̀ n zhǐr Zhide tənà y wa, n kə́ ń la Gəlile, 4e jà Gəlile sɔ́má y yʼà nʼê tó Samarɛ tənà y wa.
5N yí Samarɛ cɔ òdù bə̀ nʼê byẽ̀ bə̀ Səkaarɛ. Cɔ w òmyɛ́ mɔ́ ŋwɛ́nɛ́ cɛ y Zhakɔɔbɛ yà ń pɔ ń byǐ Zhozefu ni mú yala nɛ. 6Zhakɔɔbɛ zhìlí y yʼà ŋwɛ́nɛ́ gàà.
Yezu gə́ zhə̀l zhə̀l n lyɛ̀ɛ̀, n yí ń jě zhìlí y nyí ni ń nə́ ń shìrhə́. È yʼà wɔ́ nə̀nyɔ́nɔ́ cəcəl. 7Samarɛ lyì kɛ̃ mə̀dù zɛ̃̀ n bə̀ zhìlí y yó, ń la nɛ̃̌ tã́ɔ̃́. Yezu zɛ̃̀ n wɔ̀ mɔ̀: “À nʼâ lwə̀l nɛ̃̌ à la nyɔ́.”
8(Ń kwã-lyì bí yʼà lyɛ̃ bə vò cɔ w wa, bə̀ la kùjú yǒ.)
9Kɛ̃ mɔ́ wɔ̀ mɔ̀: “Etər ǹmyɛ́ Zhwifu, ń zɛ̃̀ ǹ nə́ ǹ lwə̀l nɛ̃̌ àmyɛ́ Samarɛ lyì kɛ̃ nɛ ǹ la nyɔ́?”
(Zhwifubá ǹdə́ Samarɛ lyì bí yʼà tʼâ ce dwã nɛ́ yé. Wɔ́ rə̀myɛ́ è ce kɛ̃ mɔ́ wɔ̀ èta.)
10Yezu wɔ̀ mɔ̀: “Ǹ gə yà ǹ yě pɛnɛ́ kɛ̌ ná-dwí yil Yi nʼê yâl rə pɔ̃́, ń jà ǹ yě lò mó mɔ̀bɔ́ ń nə́ ń lwə̀l mó nɛ̃̌ mɔ́ ń la nyɔ́ mɔ́ párá, wɔ́ ǹmyɛ́ ǹ yà ǹ bʼâ lwə̀l mò nɛ̃̌, sə ń yà ń bà n pɔ̃́ nɛ̃̌ mɔ̀bɔ́ mə̀ nʼê pɛ nyǔ.”
11Kɛ̃ mɔ́ zɛ̃̀ n wɔ̀ mɔ̀: “Yó-cə́bal, ǹ bə kɔ̌-zwã̌ zhe yé, zhìlí y jʼà lyìmə̀. Yẽ̀ ǹ bʼâ nə nɛ̃̌ mɔ́ mə̀ nʼê pɛ nyǔ mú ní? 12Nə́ da Zhakɔɔbɛ ń pɔ nə́ba zhìlí y kɛ̀bɛ́, ń cìcì nyɔ̀ è nɛ̃̌. Ń byâ bɛ́ ǹdə́ ń vwàmá nɛ́ myɛ nyɔ̀ è nɛ̃̌. Ǹ nə́ ǹ bùl bə̀ ǹ du mu nà?”
13Yezu wɔ̀ mɔ̀: “Lò mɔ̀bɔ́ gakó ǹ nyɔ̀ nɛ̃̌ mɔ́ mɔ̀bɔ́, nə̀nyɛ̀lsɛ̀ gwẽ̌ la mɔ́ zal. 14Sə lò mɔ̀bɔ́ ǹ nyɔ̀ nɛ̃̌ mɔ́ mɔ̀bɔ́ àmyɛ́ la mɔ́ pɔ mɔ́, nə̀nyɛ̀lsɛ̀ kʼê tʼâ la mɔ́ zal gaga yé. Nɛ̃̌ mɔ́ mɔ̀bɔ́ à la mɔ́ pɔ mɔ́ bʼa jǐrh nə̀-bùlì è nʼê bùl ǹ wẽ́, sə nə̀-bùlì y èmyɛ́ bʼa ce ń zə nyǔ mə̀ tʼâ la zhɔ̌.”
15Kɛ̃ mɔ́ zɛ̃̀ n wɔ̀ mɔ̀: “Yó-cə́bal, pɛ̃ nɛ̃̌ mɔ́ mə̀myɛ́, mùnì ga nə̀nyɛ̀lsɛ̀ bə̀kʼa kʼe zə nɛ, a bə̀ a tɛ̃´ nɛ̃̌ nyɔ̀nɔ̀ kə́dò yé.”
16Yezu wɔ̀ mɔ̀: “Zhəl ń byẽ̀ ǹ byal mɔ́ á bə̀ nyɔ̀nɔ̀.”
17Kɛ̃ mɔ́ wɔ̀ mɔ̀: “À bə byal zhe yé.”
Yezu wɔ̀ mɔ̀: “Ǹ zhe bwìrì ń bə́ wɔ̀ bə̀ ǹ bə byal zhe yé. 18Ǹ jú byə́nə́ bə̀nu, sə mɔ̀bɔ́ ǹ ŋwɛ́nɛ́ ń sõ èlâsɛ̃´ mɔ́ myɛ də̀ ǹmyɛ́ byal yé. Ǹ zɔ̀m zhə̀nà.”
19Kɛ̃ mɔ́ zɛ̃̀ n wɔ̀ mɔ̀: “Yó-cə́bal, à yě èlâsɛ̃´ bə̀ ǹ wɔ́ Yi nyì-zwennə. 20Nə́ dabá yʼà nʼê cèrhé Yi pyɔ̀ w kɔ̀bɔ́ yó, sə ámyɛ̌ Zhwifubá nʼá wə̀l bə̀ wɔ́ Zhərəzalɛm nɛ́ bə̀ mə̂ sə bə cèrhé Yi ní.”
21Yezu wɔ̀ mɔ̀: “Lwar bə̀ dɛ̃ ŋwɛ́nɛ́ rə̀ bànà, è kʼê tʼâ la yál pyɔ̀ w kɔ̀bɔ́ yó ráá Zhərəzalɛm nɛ́ á mə̂ sʼá cèrhé Da mɔ́ nɛ́ yé. 22Ámyɛ̌ Samarɛ lyì bí nʼá cèrhé mɔ̀bɔ́ á yə̀l ń párá, sə nə́myɛ̌ Zhwifubá nʼé cèrhé mɔ̀bɔ́ nə́ yě ń párá, bə̀ wɔ́ Zhwifubá dɛnnɛ Yi tó né rə byili bə̀ rə̀ mʼa vwârh numbyínə́ bé. 23Sə kɔn bwəlse, rə̀ gaga mɔ́ yúwə́, lyì byɛ̀bɛ́ bə̀ nʼê cèrhé Da mɔ́ zhə̀n zhə̀n mɔ́, bʼa cèrhé mo bə̀ wun wẽ́ ǹdə́ Eshirhə náàcɛ̀nɛ́ jàn, sə bə cèrhé mo ǹdə Byǐ mú gə́ byili ní. Lwarna bə̀ Da mɔ́ wɔ́ lyì bí byɛ̀bɛ́ bə̀ nʼê cèrhé mo èta mɔ́ dwí rí ń nə́ ń yàlá. 24Yi wɔ́ Eshirhə; byɛ̀bɛ́ bə̀ nʼê cèrhé re mó mə̂ sə bə cèrhé re bə̀ wun wẽ́ ǹdə́ Eshirhə náàcɛ̀nɛ́ jàn, sə bə cèrhé re ǹdə Byǐ mú gə́ byili ní.”
25Kɛ̃ mɔ́ wɔ̀ mɔ̀: “À yě bə̀ Məshi bànà. (Məshi kùr wɔ́: Kristə.) Ńmyɛ̌ gə túwə́, ń mà n byili nə́ba kɔn gakó.”
26Yezu wɔ̀ mɔ̀: “Wɔ́ àmyɛ́ mɔ̀bɔ́ à nʼâ zɔ̀m ǹdə́ mɔ́ mɔ́ à wɔ́ Məshi mú.”
27Rə̀myɛ́ yó, Yezu kwã-lyì bí zɛ̃̀ bə bà. Bə̀ gə́ nɔ mɔ ń nə́ ń zɔ̀m ǹdə́ kɛ̃ mɔ́, kɔn jàr bɛ̀, sə lò lò yə̀ mə̀ bwə̀rh bə̀ wɔ́ byè ń nə́ ń yàlá, ráá bə̀kɔ́n yil ń nə́ ń zɔ̀m ǹdə́ kɛ̃ mɔ́ yé.
28Rə̀myɛ́ yó, kɛ̃ mɔ́ zhǐr n yẽ̌ ń kɔ̀lɔ́ w nɛ, n vò cɔ w wa, n wɔ̀ lyì bí ni: 29“Bànà á nyǐ lò ń byili ni kɔn dɛ̀bɛ́ gakó à wɛ̀rhɛ́. È gə è də̀ ńmyɛ̌ ń wɔ́ Kristə mó?”
30Lyì bí shí cɔ w wa, bə du bə vò Yezu sono.
31Rə̀myɛ́ yi ní, ń kwã-lyì bí zɛ̃̀ bə̀ nʼê lwə̀l mò bə̀ zhe: “Yó-cə́bal, jí kùjú wə́.”
32N zɛ̃̀ n wɔ̀ bɛ: “À zhe kùjú à nʼâ jí, ámyɛ̌ yə̀l kùjú kɔ̌ ná-dwí yil yé.”
33Ń kwã-lyì bí zɛ̃̀ bə̀ nʼê zɔ̀m ǹdə́ dwã bə̀ zhe: “Lò gə ń yə̀ kùjú zə n bə̀ n pɔ̃ n jí?”
34Yezu wɔ̀ bɛ: “À kùjú w wɔ́ a wɛ̀rhɛ́ mɔ̀bɔ́ ń twĩ̀ nì mú pùbùlə̀, sʼa twĩ̀ tum dí tɛ̀bɛ́ ń twĩ̀ nì rə̀ yil mó a báásɛ. 35Á cìcì tʼá wə̀l bə̀ nyɔ̀nɔ̀ ǹdə́ cànsɛ̀ sə̀na ǹdə́ jòró w yúwə́? Sə àmyɛ́ nʼâ wə̀l ába: kwẽ̌nə á nyǐ cɛsɛ́. Sə̀ jíjí rí byìlə̀, rə̀ yú jə̂r. 36Jə̀rnə̀ mó la ń kwândɛ zõ èlâsɛ̃´. Ń mà n pwà jíjí-byâ bɛ́ n ce bə nə nyǔ mə̀ tʼâ la zhɔ̌. Èta, twã́-dùrnə̀ mó ǹdə́ jə̀rnə̀ mó ga bʼa tó dwã bə nə wu-nyɔ̃̀. 37Səswalá èdù ŋwɛ́nɛ́ è yʼa wɔ̀: ‘Mə̀dù ya n dù, ń dõ bə̀ n jə̀r.’ Səswalá y èmyɛ́ wɔ́ zhə̀nà. 38À twĩ̀ ába, á vò á jə̀r dɛ̀bɛ́ á yə̀ twĩ̀ á nwɛ̀nɛ̀ rə̀ yil mó. Lyì dwã twĩ̀ bə nwɛ̀nɛ̀, ámyɛ̌ zɛ̃̀ á tó bə̀myɛ́ nɔ̀nɔ̀ w dɛnnɛ á na.”
39Samarɛ cɔ w òmyɛ́ lyì nánzhəzhɔ̌ zù Yezu, kɛ̃ mɔ́ gə́ byili zhə̀n n wɔ̀: “Ń byili ni kɔn dɛ̀bɛ́ gakó à wɛ̀rhɛ́.” 40Wɔ́ rə̀myɛ́ è ce, bə̀ gə́ tú Yezu sono, bə zɛ̃̀ bə̀ nʼê lwə̀l mò bə̀ ń mɛ̃ bə̀ sono. N shɛ̀nɛ́ n zɔ̃̀ gàà dwã nə̀lyè.
41Lyì dwã nánzhəzhɔ̌ cili ń cìcì zɔ̀mà nɛ́, bə̀myɛ zù mù. 42Bə zɛ̃̀ bə̀ nʼê wə̀l kɛ̃ mɔ́ nɛ: “È kʼê də̀ ǹmyɛ́ zɔ̀mà nɛ́ dúdú nə̀ ce nə́ zù mù yé. Nə́ cìcì cili ń zɔ̀mà nɛ́, sə nə́ lwar bə̀ mɔ̀bɔ́ wɔ́ lũ w Zwennə zhə̀n zhə̀nà.”
Yezu wárh pyɔ̌ kwã-lò mə̀dù byǐ
43Dwã nə̀lyè rə̀myɛ́ kwã nɛ́, Yezu zhǐr gàà n vò Gəlile tənà y wa. 44Ń cìcì yà ń byili bə̀ Yi nyì-zwennə tá ń nɛ còrhó ń da-dǒ w yé. 45Gəlile lyì bí gə́ yʼà zhə̀l Zhərəzalɛm Pakɛ y címsí, bə nə kɔn dɛ̀bɛ́ ń wɛ̀rhɛ́ gàà címsí yù w mú ce, ń gə́ yú bə̀ tənà y wa, bə̀ zwẽ mo náàcɛ̀nɛ́.
46Rə̀myɛ́ kwã nɛ́, n kə́ n vò Gəlile cɔ w bə̀ nʼê byẽ̀ bə̀ Kana, ń gə́ yà ń ce nɛ̃̌ mɔ́ jǐrh sɛ̃´ mə̀gã̌ mɔ́. Pyɔ̌ kwã lyì-fɔ̀lɔ̀ òdù yʼà ŋwɛ́nɛ́ gàà, ò byǐ bə jàn zhe Kapɛrnaɔm nɛ́. 47Pyɔ̌ kwã-lò mó gə́ nyɛ̀ɛ̀ bə̀ Yezu shí Zhide n bə̀ Gəlile, n zɛ̃̀ n vò ń sono, n lwə̀l mò bə̀ ń bə̀ n wárh ń byǐ mú, nyǐ ń nə́ ń yâl n cì.
48Yezu zɛ̃̀ n wɔ̀ mɔ̀: “Á yírhə́ gə yə̀ màmyar ǹdə́ zhə̀n byilu tumə né nɛ, á tʼá yâl á zwẽ nyí yé!”
49Pyɔ̌ kwã-lò mó wɔ̀ mɔ̀: “Yó-cə́bal, bə̀ ǹdə́ à bə̀sɔ́bwɛ̀lɛ́ y gwẽ̌ yə̀ cì yé!”
50Yezu zɛ̃̀ n wɔ̀ mɔ̀: “Zhəl jè. Ǹ byǐ mú wárh.”
Bal mɔ́ zwẽ Yezu zɔ̀mɛ̀ rɛ́, n zhǐr ń la jè. 51Ń gə́ zhǐr ń la jè yi ní, ń kɛ̀lɛ́ y tùntùnnə̀ bé dùr bə jəl mo sɔ́má yó bə wɔ̀ mɔ̀: “Ǹ byǐ mú wárh.”
52N zɛ̃̀ n bwə̀rh bè bə̀ wɔ́ dǒ yi ní cìcì ń wárh?
Bə wɔ̀ mɔ̀ bə̀ wɔ́ də̀lànɛ̀ yi-kár bɔ̀l wà. 53Da mɔ́ já n pwírí wɔ́ rə̀myɛ́ yi ní cìcì Yezu yà ń wò mò bə̀ ń zhəl jè, bə̀ nyǐ ń byǐ mú wárh mɔ́. Ńmyɛ̌ ǹdə́ ń kɛ̀lɛ́ y lyì bí gakó jʼa zù Yezu.
54Wɔ́ màmyɔ w òmyɛ́ ò wɔ́ Yezu màmyar rə̀lyè nyɔ̃̌ w ń wɛ̀rhɛ́ Gəlile né, n mə n byili ń gə́ wɔ́ lò ná-dwí yilə. È yàl ń gə́ ká n shí Zhide n bə̀ Gəlile mó yó.
5Yezu wárh gwànà póló òdù nyí ni
1Rə̀myɛ́ kwã nɛ́, Zhwifubá címsi èdù yʼà ŋwɛ́nɛ́. Yezu zɛ̃̀ n vò Zhərəzalɛm. 2Póló òdù yʼà ŋwɛ́nɛ́ bwə̀rə̀ y kɛ̀bɛ́ bə̀ nʼê byẽ̀ bə̀ “Pyììsì bwə̀rə̀” mó səta. Bə̀ yʼà nʼê byẽ̀ póló w òmyɛ́ mɔ́ ǹdə́ ebərə́ bə̀ Bɛzata. Kwə̀ə́rhe rə̀nu yʼà zhǐ ò sarh nɛ. 3Nə̀bwànà nánzhəzhɔ̌ yʼà pyě kwə̀ə́rhé wə. È yʼà wɔ́ lyìlyə̂r, ǹdə́ lyì byɛ̀bɛ́ bə̀ nʼê twi cə́, ǹdə́ gwànsɛ̀. [Bə̀ nʼê dɛ̃̀ nɛ̃̌ mɔ́ gə tú mə̀ la dom. 4Twər nánzhəzhɔ̌ Yi màlɛ́ka èdù yʼà nʼê swé póló w nɛ̃̌ mɔ́ wẽ́, è nʼê dom mo, sə è gə tú è nʼê dom nɛ̃̌ mɔ́ yi ní, nə̀bwɛ̃̀ mɔ̀bɔ́ ń jɛ̀rɛ̀ ń dõ n zù mə̀ wẽ́, ńmyɛ̌ mɔ́ ya n wárh.]
5Bal mə̀dù yà ń ŋwɛ́nɛ́ gàà, címí èdù yʼà zhe mo kɔn yú byinə shə́-ètɔ̀ ǹdə́ lyɛlɛ.
6Yezu gə́ nɔ mɔ ń pyě tɛ̃´, n já n lwar bə̀ címí y gə́ zhe mo èta mɔ́ dɛnɛ dɛ̃´dɛ̃´, n zɛ̃̀ n bwə̀rh mò n wɔ̀: “Ǹ nə́ ǹ yâl ń nə bəsàzùlí?”
7Nə̀bwɛ̃̀ mɔ́ wɔ̀ mɔ̀: “Yó-cə́bal, nɛ̃̌ mɔ́ gə tú mə̀ nʼê domə, à bə lò zhe ń nə́ ń sɛ̃ nɛ a zwì póló w wẽ́ yé. À gə la zú gakó, ǹdə́ lò dõ jɛ̀rɛ̀ nɛ̀ n zù.”
8Yezu wɔ̀ mɔ̀: “Zɛ̃̀ dɛ̃̌ ń kwè ǹ pyònò w ń vò.”
9Bal mɔ́ já n wárh, n zɛ̃̀ n kwè ń pyònò w ń nə́ ń zhə̀lə̀. E jʼà yʼà wɔ́ shìrhə́ dɛ̃ yùwə̀. 10Rə̀myɛ́ ce Zhwifubá yó-cìnə́ bé zɛ̃̀ bə wɔ̀ bal mɔ́ nɛ: “Zà wɔ́ shìrhə́ dɛ̃, ǹ bə mə̂ sə́ zhĩ ǹ pyònò w yé.”
11Bal mɔ́ zɛ̃̀ n wɔ̀ bɛ: “Wɔ́ mɔ̀bɔ́ ń wárh nɛ mɔ́ ń wò nè bʼà kwě à pyònò w a vò.”
12Bə zɛ̃̀ bə bwə̀rh mò bə wɔ̀: “Mɔ̌ lò ń wò bə̀ ǹ kwě ǹ pyònò w ń vò?”
13Lyì bí yʼà já gàà dɛ̃´dɛ̃´, Yezu já n zhǐr n zù bə̀ wẽ́ n lyɛ̃. Rə̀myɛ́ ce mɔ̀bɔ́ ń wárh mɔ́ yə̀ lwar lò ná-dwí yil ń wárh mɔ yé.
14Rə̀myɛ́ kwã nɛ́, Yezu zhə̀l n nə mɔ Yi jì y kɔ̀nɔ́ w wa, n wɔ̀ mɔ̀: “Nyìwé, ǹ wárh. Sə dɛ̃̌ ǹ cìnə̀, ǹ bə̀ká kə́ wɛ̀rhɛ́ yə̀-bəlɔ̀lɔ́, mùnì ga ǹ kə́ ǹ bə̀ zwini nɛ rə̀myɛ kʼê du tɛ̀bɛ́ yé.”
15Bal mɔ́ zhǐr n vò n wɔ̀ Zhwifubá yó-cìnə́ bé ne, bə̀ wɔ́ Yezu ń wárh mɔ. 16Bə zɛ̃̀ bə̀ nʼê pyà Yezu bə̀ la nɔ̀nɔ̀, ń gə́ twĩ̀ tum dí rə̀myɛ́ shìrhə́ dɛ̃ rɛ́ yù w mú yilə.
17Rə̀myɛ́ yó, Yezu wɔ̀ bɛ: “À Da nə́ ń twĩ̀ twéé twéé, sə àmyɛ nʼâ twĩ̀.”
18Ń gə́ wò èta, bə zɛ̃̀ bə kwɛrhɛ bə̀ nʼê pyà ń gu, ń gə́ wɛ̀rhɛ́ kɔn dɛ̀bɛ́ lò bə sɔ́má zhe ń wɛ̀rhɛ́ shìrhə́ dɛ̃ rɛ́ yù w mú; kɔn súlí myɛ, ń gə́ byẽ̀ Yi bə̀ ń Da, n mə n zə ń cìn n mɛrhɛ Yi mú yilə.
Kɔn dɛ̀bɛ́ Yezu nə́ ń wɛ̀rhɛ́, wɔ́ dɛ̀bɛ́ ń Da pɔ mɔ rə̀ nyí mú
19Yezu zɛ̃̀ n kə́ n wɔ̀ bɛ: “Zhə̀n zhə̀nà, à nʼâ wə̀l ába: Byǐ mú wàr ń mà n wɛ̀rhɛ́ kɔn ǹdə́ ń sə̀pwà jàn yé, sə wɔ́ kɔn dɛ̀bɛ́ ń nɔ ǹdə́ ń Da mɔ́ nə́ ń wɛ̀rhɛ́ mɔ́, wɔ́ rə̀myɛ́ ńmyɛ nə́ ń wɛ̀rhɛ́. 20Da mɔ́ só ń Byǐ mú, ń nə́ ń byili mu kɔn dɛ̀bɛ́ gakó ń nə́ ń wɛ̀rhɛ́ mɔ́, sə ń mà n byili mu tùm-fwààlɛ̀ n wɛ̀rhɛ́, nə̀myɛ kʼê du nyɛ̀bɛ́, sə nə̀ mʼa jàr ába. 21Ǹdə Da mɔ́ gə́ nə́ ń bwìrhì byɛ̀bɛ́ bə̀ cù mú n ká n pə bɛ nyǔ ní, èta Byǐ mú myɛ nə́ ń pɛ nyǔ byɛ̀bɛ́ ń nə́ ń yâl n pə mɔ́ nɛ. 22Da mɔ́ tá ń bùr lò mə̀dù ga bùrsì yé. Ń pɔ ń ŋwɔ̀nɔ́ w gakó Byǐ mú ni bə̀ ń bǔr lyì bí gakó bùrsí, 23mùnì bə̀ gakó nyɛ̀ Byǐ mú ǹdə bə̀ gə́ nʼê nyàm Da mɔ́ nɛ́. Lò mɔ̀bɔ́ ń tá ń nyàm Byǐ mú, rə̀-ná-cí tá ń nyàm Da mɔ́ ń twĩ̀ mù mú myɛ yé.
24“Zhə̀n zhə̀nà, à nʼâ wə̀l ába: lò mɔ̀bɔ́ ǹ nə́ ǹ cili à zɔ̀mà nɛ́, ń jʼâ zhí mɔ̀bɔ́ ń twĩ̀ nì mú ni, ǹ zhe nyǔ mə̀ tʼâ la zhɔ̌. Ǹ tá ǹ la còrhò-tum nɔ yé. Ǹ tó cu wẽ́ ń lyɛ̃ ń zù nyǔ wẽ́. 25Zhə̀n zhə̀nà, à nʼâ wə̀l ába: dɛ̃ ŋwɛ́nɛ́ rə̀ bànà, rə̀ gaga mɔ́ yúwə́, byɛ̀bɛ́ bə̀ cù mú mʼa nyɛ̀ɛ̀ Yi Byǐ mú cəl, sə byɛ̀bɛ́ bə̀ la rɛ cilu mú bʼa zə nyǔ. 26Ǹdə Da mɔ́ gə́ nə́ ń pɛ nyǔ ní, èta ń ce Byǐ mú myɛ nə́ ń pɛ nyǔ. 27Ń pɔ mɔ nyí bə̀ ń bǔr bùrsì, ń gə́ wɔ́ Numbyíní Byǐ yilə. 28Rə̀myɛ́ bə̀kʼa jàr ába yé. Dɛ̃ bànà, sə rə̀myɛ́ yó, byɛ̀bɛ́ bə̀ ŋwɛ́nɛ́ lú-bɔ̀là wẽ́ mó bʼa nyɛ̀ɛ̀ ń cəl, 29sə bə̀ mʼa du pwẽ̀ nè. Byɛ̀bɛ́ bə̀ twĩ̀ cɛ̀nɛ̀ mɔ́ mʼa bwìrhì bə zə nyǔ mə̀ tʼâ la zhɔ̌. Byɛ̀bɛ́ bə̀ twĩ̀ lwɛlɛ mɔ́ myɛ bʼa bwìrhì, bə nə còrhò-tum.
30“À wàr kaka à la wɔ̀rhɔ́ ǹdə́ à sə̀pwà jàn yé. À nʼâ kɛ́ bùrsí ǹdə à Da gə́ byili ni ní. À tʼâ pyà à sə̀pwà pùbùlə̀ wɔ̀rhɔ́ yé. Wɔ́ mɔ̀bɔ́ ń twĩ̀ nì mú pùbùlə̀ wɔ̀rhɔ́ à nʼâ pyà. Rə̀myɛ́ ce, à bùrsí wɔ́ cángá.”
31Yezu súlí n wɔ̀: “À gə nʼâ byili zhə̀n à cìcì shò-kwã nɛ́, à byilu mú bə kùr zhe yé. 32Lò dõ ń nə́ ń byili zhə̀n à shò-kwã nɛ́, sə à yě bə̀ zhə̀n dɛ́ ń nə́ ń byili à shò-kwã nɛ́ mɔ́ wɔ́ zhə̀n cìcì. 33Á twĩ̀ bə vò Zhã sõ, sə ń byili zhə̀n dɛ́. 34Àmyɛ́ bə numbyíní zhə̀n byilu tum zhe yé. À nʼâ wə̀l rə̀myɛ́ gakó mùnì ga á nə vwârh.
35“Zhã yà ń wɔ́ ǹdə pàntɛ́mɛ́ ta bə̀ juwə, è pwẽ̀ dé yə̂r. Á shɛ̀nɛ́ á fùù námpɔ́lɛ́ ǹdə́ wu-nyɔ̃̀ ń pwẽ̀ dé wə. 36Sə àmyɛ́ zhe zhə̀n-kɔn rə̀ du Zhã nyân dɛ́. Wɔ́ tumə né nyɛ̀bɛ́ à Da pɔ nɛ bʼà twĩ̌, a zɛ̃̀ à nʼâ twĩ̀ nì mú, nə̀ nʼê byili bə̀ wɔ́ à Da ń twĩ̀ nì. 37Ńmyɛ̌ ń twĩ̀ nì, sə wɔ́ ń cìcì ń nə́ ń byili zhə̀n à shò-kwã nɛ́, sə á gwẽ̌ yə̀ ń cəl lé nyɛ̀ɛ̀ gaga yé. Á gwẽ̌ yə̀ mɔ nɛ ǹdʼá yírhə́ gaga yé. 38Á gə́ tʼá zwẽ mɔ̀bɔ́ Yi twĩ̀ n bə̀ mɔ́ nyí ni mú ce, á tʼá cĩ́ rə̀ zɔ̀mà nɛ́ á wẽ́ yé. 39Á nʼá kàrmə̀ Yi zɔ̀mɛ̀ rɛ́ sɛ́bɛ́ rɛ́ náàcɛ̀nɛ́, á nʼá bùl bʼâ mʼâ nə nyǔ mə̀ tʼâ la zhɔ̌ rə̀ wẽ́. Zhə̀n myɛ, wɔ́ rə̀myɛ́ rə̀ nʼê zɔ̀m à yò. 40Á jʼâ tʼá yâl á bə̀ à sõ, mùnì ga á nə nyǔ mú yé.
41“Numbyínə́ bé còrhó w tʼâ wɛ̀rhɛ́ nɛ kaka yé. 42À yě á gə́ nyɛ̌ nɛ́. À yě bʼâ bə Yi só yé. 43Àmyɛ́ tú à Da yil yilə, sə á yə̀ nɛ zwẽ yé. Sə lò dõ gə tú ń sə̀pwà yil yilə, á mʼâ zwẽ rə̀-ná-cí. 44Ámyɛ̌ nʼá pyà còrhó dwã sono, á zɛ̃̀ á tʼá pyà còrhó Yi rí rə̀ bə dõ zhe mó sono yé. Etər á mʼâ tó né á zwẽ nyí?
45“Á bə̀kʼá bù bə̀ wɔ́ àmyɛ́ à mʼa cĩ́ yò á yó w à Da yé né yé. Wɔ́ Muyiisi mú mɔ̀bɔ́ á zhí mú cìcì ń mà n cĩ́ yò á yó wə. 46Á gə yʼâ zwẽ Muyiisi zɔ̀mà nɛ́, á yʼâ bʼâ zwẽ àmyɛ nyə̀ná nɛ́ zhə̀nà, bə̀ wɔ́ àmyɛ́ yò ń zɔ̀m ń sábá nɛ́ wẽ́. 47Sə á tʼá zwẽ zɔ̀mà nɛ́ nyɛ̀bɛ́ ń kɛ̃ mɔ́ yé. Etər á mʼâ tó né á zwẽ àmyɛ́ zɔ̀mà nɛ́?”
6Yezu ce búúri rə̀nu pù rə jǐrh nánzhəzhɔ̌
(Məco 14.13-21; Markɛ 6.30-44; Lwiki 9.10-17)
1Rə̀myɛ́ kwã nɛ́, Yezu zhǐr n vò Gəlile mwə̃́ y bə̀ nʼê byẽ̀ bə̀ Təbɛrəyaadɛ mɔ́ èpákɛ̀. 2Lyì bí gə́ yʼà nʼê nɛ màmyaarhɛ́ tɛ̀bɛ́ ń yà ń nə́ ń wɛ̀rhɛ́ ń mə́ ń wárh nə̀bwànà bɛ́ mɔ́ ce, bə du nánzhəzhɔ̌ bə twèlé mo. 3Ńmyɛ̌ ǹdə́ ń kwã-lyì bí zɛ̃̀ bə jì pyɔ̀ òdù yó, bə jòm tɛ̃´ gàà. 4E jà Zhwifubá címsí bə̀ nʼê byẽ̀ bə̀ Pakɛ mɔ́ yʼà bwəlse.
5Ń kwẽ̌ ń la nyǔ, n pwírí lyì nánzhəzhɔ̌ bə̀ bàn ń sono, n zɛ̃̀ n bwə̀rh Shilipu n wɔ̀: “Yẽ̀ nə́ bʼâ nə kùjú ní nə́ yè nə́ pə lyì bí byɛ̀bɛ́ gakó ne bə jí?”
6Yezu yà ń nə́ ń bwə̀rh Shilipu èta, ń la mə n lwar ń wu. Ń cìcì jà ń yà ń yě ń gə́ la nɛ́ wɔ̀rhɔ́.
7Shilipu wɔ̀ mɔ̀: “Bá nə́ gə kwè dwã zwã̌-àlyè tum wársɛ nə́ mʼé yè kùjú myɛ, ò tʼâ la yú lò gakó nə námpɔ́lɛ́ myɛ cìcì yé.”
8Ń kwã-lò dõ ń yíl Andərɛ, Shəmɔ Pyɛɛrɛ da-byǐ, ńmyɛ̌ mɔ́ zɛ̃̀ n wɔ̀: 9“Bə̀sɔ́bwɛ̀lɛ́ èdù zə búúri rə̀nu ǹdə́ émɔ̌rh sə̀lyè è ŋwɛ́nɛ́ nyɔ̀nɔ̀, sə rə̀myɛ́ nə zhe lyì-zhɔ̌ w kɔ̀bɔ́ yàlà?”
10Yezu zɛ̃̀ n wɔ̀: “Cenə lyì bí gakó jòm tɛ̃´.” E jà gɔ yʼà já jàà y èmyɛ́ wa. Lyì bí jòm tɛ̃´, sə bala bɛ́ dúdú yʼà yú nunə mɔ̀ɔ̀rhɛ̀ rə̀nu. 11N zɛ̃̀ n kwè búúrí, n ce Yi nə̀báná, n zə rɛ n tə̀ lyì bí byɛ̀bɛ́ bə̀ yʼà jě tɛ̃´ mɔ́. N kwè émɔ̌sɛ́ myɛ n mə n tə̀ bɛ. Lò gakó nə n jí ǹdə ń gə́ nə́ ń yâl nɛ́.
12Bə̀ gə́ jú bə sú, n zɛ̃̀ n wɔ̀ ń kwã-lyì bí ni: “Pwâna yəywaalɛ́ rə̀ dàl mɔ́, mùnì kaka bə̀kʼa jé yé.”
13Bə pwà búúrí rə̀nu y lyì bí jú mú yəywaalɛ́ rə̀ dàl mɔ́ bə sú cǐrhni shí ǹdə́ nə̀lyè. 14Lyì bí bə̀myɛ́ gə́ nɔ màmyɔ w kɔ̀bɔ́ Yezu wɛ̀rhɛ́ mɔ́, bə zɛ̃̀ bə̀ nʼê wə̀lə̀: “Bal mɔ́ mɔ̀bɔ́ zhə̀n ga wɔ́ Yi nyì-zwennə mó mɔ̀bɔ́ bə̀ wò bə̀ ń bàn lũ w wẽ́ mó.” 15Bə̀ yʼà nʼê yâl bə zə mɔ jàn bə mʼe yə̀ pyɔ̌, sə Yezu gə́ lwar, n ká n jì pyɔ̀ w yə́-pɛ̀lɛ́ w ń dúdú.
Yezu zhə̀l nɛ̃̌ yó
(Məco 14.22-33; Markɛ 6.45-52)
16Də̀dɛ̀nɛ́ yi gə́ yúwə́, Yezu kwã-lyì bí shí pyɔ̀ w yó bə só tɛ̃´, bə vò mwə̃́ y bù-cǔ w yó, 17bə zù bǔ-bwəl rə̀dù wẽ́, bə̀ nʼê byɛrhɛ bə̀ la Kapɛrnaɔm. Cɛ y yʼà yìì ǹdə́ Yezu yà ń gwẽ̌ yə̀ bə̀ sono twí yé. 18Zho nánfɔ̀lɔ̀ yʼà zɛ̃̀ ò nʼô ce. Mwə̃́ y nɛ̃̌ mɔ́ yʼà nʼê zhízhǐ dɛ̃´dɛ̃´. 19Bə̀ gə́ zə bwəl lé bə zhǐr bù-cǔ w ni bə vò né mó, kɔn yʼà yú coló bə̀nu, ráá bwə̀ldù, bə̀ la nyǔ bə pwírí Yezu ń bwəlse bə̀ nyí ni, ń nə́ ń zhə̀l nɛ̃̌ mɔ́ yó. Ywẽ zɛ̃̀ rə̀ zhe be. 20Yezu zɛ̃̀ n wɔ̀ bɛ: “Á bə̀kʼá dùr ywẽ, bə̀ wɔ́ àmyɛ́.”
21Bə zɛ̃̀ bə̀ nʼê yâl bə kwè mò ǹdə́ bǔ-bwəl lé, ǹdə́ bə̀ jʼa yí bù-cǔ w yó, bə̀ gə́ yʼà la mə̀gã̌ mɔ́.
Yezu wɔ́ búrú kɔ̀bɔ́ ò nʼô pɛ nyǔ
22È zɛ̃̀ nəkɔkɔ́lɛ́ yùwə̀, lyì-zhâ bɛ́ bə̀ yʼà mɛ̃ mwə̃́ y èpákɛ̀ mɔ́ pwírí bə̀ wɔ́ bǔ-bwəl rə̀dù sásá rə̀ ŋwɛ́nɛ́ bù-cǔ w ni. Bə̀ yʼà yě bə̀ Yezu yà ń yə̀ ń kwã-lyì bí ni tó n zù bǔ-bwəl lé wẽ́ yé; wɔ́ bə̀ dúdú bə̀ yʼà zhǐr. 23Rə̀myɛ́ yi ní, ǹdə́ lyì yʼà zə bǔ-bwələ dwã bə shí Təbɛrəyaadɛ bə bə̀ jàà y kɛ̀bɛ́ Cinu yà ń kwè búrú w n ce Yi nə̀báná, n pə bɛ bə dɔ̃̀ mɔ́ nyí ni. 24Lyì-zhâ bɛ́ gə́ pwírí Yezu ǹdə́ ń kwã-lyì bí ga yʼà tɛ̀nɛ́ gàà, bə zù bǔ-bwələ né nə̀myɛ́ wẽ́, bə vò Kapɛrnaɔm, bə nʼê pyà mɔ̀. 25Bə̀ gə́ nɔ mɔ mwə̃́ y èpákɛ̀, bə bwə̀rh mò bə wɔ̀: “Yó-cə́bal, dǒ ǹ pú ń yí nyɔ̀nɔ̀?”
26Yezu wɔ̀ bɛ: “Zhə̀n zhə̀nà, à nʼâ wə̀l ába: wɔ́ á gə́ dɔ̀m búrú w á sú mú yil á nʼá pyà nɛ̀, sə è də̀ màmyaarhɛ́ á nɔ mɔ́ kùr á nyɛ̀ɛ̀ yé. 27Á bə̀kʼá twĩ̀ á mʼá pyà kùjú w kɔ̀bɔ́ ò nʼô cɔ̀ mɔ́ yé. Twĩ̌nə á mʼá pyà kùjú w kɔ̀bɔ́ ò ŋwɛ́nɛ́ twéé gakó, o jʼà nʼô pɛ nyǔ mə̀ tʼâ la zhɔ̌ mɔ́. Numbyíní Byǐ mà n pə w ába. Wɔ́ ńmyɛ̌ ń Da mɔ́ ń wɔ́ Yi mú cír, n pɔ̃ ń cìcì ŋwɔ̀nɔ́.”
28Bə zɛ̃̀ bə bwə̀rh mò bə wɔ̀: “Etər nə́ bʼâ twĩ̀ tumə né nyɛ̀bɛ́ Yi nʼê yâl bə̀ nə́ twĩ̌ mú ní?”
29Yezu wɔ̀ bɛ: “Tum dí tɛ̀bɛ́ Yi nʼê yâl bʼâ twĩ̀ mú wɔ́ á zù mɔ̀bɔ́ rə̀ twĩ̀ mú.”
30Rə̀myɛ́ yó, lyì-zhâ bɛ́ zɛ̃̀ bə bwə̀rh Yezu bə wɔ̀: “Màmyɔ kɔ̌ ǹ bʼâ wɛ̀rhɛ́ ń byili nə́ba, nə́ nə ǹdə́ nə́ yírhə́, mùnì nə́ zwẽ nyí bə̀ ǹ wɔ́ Kristə mó? Màmyɔ tum dɛ̌ ǹ bʼâ twĩ̀? 31Nə́ nàmbala bɛ́ gə́ yʼà ŋwɛ́nɛ́ gɔ-elũ w wə, bə yʼà nʼê jí kùjú kɔ̀bɔ́ bə̀ nʼê byẽ̀ bə̀ mã́nɛ mɔ́,6.31 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili mã́nɛ gə́ yʼà wɔ́ kɔn ná-dwí yil gàà mɔ́. ǹdə Yi zɔ̀mɛ̀ rɛ́ sɛ́bɛ́ rɛ́ gə́ byili ní. Bə̀ kɛ̃ rə̀ wẽ́ bə wɔ̀: ‘Ń pɔ bɛ búrú kɔ̀bɔ́ ò shí dɛ̃̌ mɔ́ bə dɔ̃̀.’ ”
32Yezu wɔ̀ bɛ: “Zhə̀n zhə̀nà, à nʼâ wə̀l ába: è də̀ Muyiisi ń pɔ ába búrú w kɔ̀bɔ́ ò shí dɛ̃̌ mɔ́ yé. Wɔ́ à Da ń nə́ ń pɛ ába Arəzana búrú w páá kɔ̀bɔ́ ò shí dɛ̃̌ mɔ́. 33Búrú w kɔ̀bɔ́ Yi nʼê pɛ mɔ́, wɔ́ mɔ̀bɔ́ ń shí Arəzana w n bə̀ ń nə́ ń pɛ nyǔ lũ w lyì bí ni mú.”
34Bə zɛ̃̀ bə wɔ̀: “Yó-cə́bal, pə nə́ba búrú w òmyɛ́ mɔ́ twéé gakó.”
35Yezu zɛ̃̀ n wɔ̀ bɛ: “Àmyɛ́ wɔ́ búrú kɔ̀bɔ́ ò nʼô pɛ nyǔ. Lò mɔ̀bɔ́ ǹ tú à sõ, nɔrh tʼâ la mɔ́ zal gaga yé. Lò mɔ̀bɔ́ ǹ zù àmyɛ́, nə̀nyɛ̀lsɛ̀ tʼâ la mɔ́ zal gaga yé. 36Sə à byili ába bʼâ nɔ nɛ, sə á tʼá zwẽ nyí yé.
37“Byɛ̀bɛ́ à Da nə́ ń pɛ nɛ mɔ́ gakó mʼa bə̀ à sono, sə lò mɔ̀bɔ́ ń bàn à sõ, à tʼâ la mɔ cǐrh a ce kwã nɛ́ yé. 38À shí Arəzana w a bə̀ mɔ̀bɔ́ ń twĩ̀ nì mú pùbùlə̀ wɔ̀rhɔ́ yilə. À yə̀ twí à cìcì pùbùlə̀ wɔ̀rhɔ́ yil yé. 39Mɔ̀bɔ́ ń twĩ̀ nì mú tá ń yâl bʼà yẽ̌ byɛ̀bɛ́ ń pɔ nɛ mɔ́ mə̀dù ga nɛ n jé yé. Ń nə́ ń yâl bʼà bwìrhì bì dɛ̃ rɛ́ nánkwɛɛ́ rɛ́ yùwə̀. 40À Da nə́ ń yâl bə̀ lyì bí byɛ̀bɛ́ gakó bə̀ nʼê nyǐ ń Byǐ mú, bə jʼa zwẽ ń zɔ̀mɛ̀ rɛ́ mɔ́, nə nyǔ mə̀ tʼâ la zhɔ̌, sʼa bwìrhì bi dɛ̃ rɛ́ nánkwɛɛ́ rɛ́ yùwə̀.”
41Rə̀myɛ́ yó, Zhwifubá zɛ̃̀ bə̀ nʼê ŋwɔ́ŋwɔ̌, ń gə́ wò bə̀ ńmyɛ̌ wɔ́ búrú w kɔ̀bɔ́ ò shí dɛ̃̌ mɔ́ yilə, 42bə̀ zhe: “Mɔ̀bɔ́ də̀ Zhozefu byǐ Yezu nà? Nə́ yě ń da ǹdə́ ń ná ga párá. Tətər yil ń nə nə́ ń wə̀l bə ń shí Arəzana wa?”
43Yezu wɔ̀ bɛ: “Yẽ̌nə á ŋwɔ́ŋwɔ̌ mɔ́ nɛ. 44Lò lò wàr ń twí à sono ǹdə́ è gə də̀ à Da mɔ́ ń twĩ̀ nì mú ń ce n bə̀ yé, sə àmyɛ́ à mʼa bwìrhì mù dɛ̃ rɛ́ nánkwɛɛ́ rɛ́ yùwə̀. 45Bə̀ kɛ̃ Yi nyì-zwennə bé sábá nɛ́ wẽ́ bə̀: ‘Yi cìcì mʼa cèrhè rə̀ nyə́ né bə̀ gakó ne.’ Lò mɔ̀bɔ́ gakó ǹ nə́ ǹ cili à Da zɔ̀mà nɛ́, ń jà ǹ nə́ ǹ zwẽ ń còrhò mó, ǹ mʼâ bə̀ à sono.
46“Rə̀myɛ́ tʼâ yâl rə wɔ̀ bə̀ lò yírhə́ nɔ à Da yé. Sə wɔ́ mɔ̀bɔ́ ń shí Yi sono mó dúdú ń nɔ Da mɔ́. 47Zhə̀n zhə̀nà, à nʼâ wə̀l ába: mɔ̀bɔ́ ǹ zù nì, ǹ zhe nyǔ mə̀ tʼâ la zhɔ̌. 48Àmyɛ́ wɔ́ búrú kɔ̀bɔ́ ò nʼô pɛ nyǔ. 49Á nàmbala bɛ́ gə́ yʼà ŋwɛ́nɛ́ gɔ-elũ w wə, bə̀ yʼà nʼê dɔ̀m mã́nɛ, sə bə̀ cùwə̀. 50Sə búrú w kɔ̀bɔ́ ò shí dɛ̃̌ mɔ́, lò mɔ̀bɔ́ ǹ dɔ̀m, ǹ tá ǹ la cú yé. 51Àmyɛ́ à wɔ́ búrú w kɔ̀bɔ́ ò nʼô pɛ nyǔ, ò shí Arəzana w mɔ́. Lò mɔ̀bɔ́ ǹ dɔ̀m búrú w òmyɛ́, ǹ tá ǹ la cú gaga yé. Búrú w kɔ̀bɔ́ à la pɔ mɔ́, wɔ́ à yala nàmá bɛ́ à nʼâ pɛ, mùnì ga lũ w lyì bí nə nyǔ.”
52Rə̀myɛ́ yó, Zhwifubá zɛ̃̀ bə̀ nʼê mà nyə̀-pâr ǹdə́ dwã, bə̀ mʼê bwə̀rh dwã bə̀ zhe: “Etər mɔ̀bɔ́ mà n tó né n ŋwɛ̀nɛ́ n pə ń yala nàmá nə́myɛ̌ nɛ nə́ dɔ̃̀?”
53Yezu zɛ̃̀ n wɔ̀ bɛ: “Zhə̀n zhə̀nà, à nʼâ wə̀l ába: á gə yə̀ Numbyíní Byǐ yala nàmá dɔ̀m, á gə yə̀ ń jal nywɛ̀, á tʼá la nyǔ zal yé. 54Lò mɔ̀bɔ́ ǹ nə́ ǹ dɔ̀m àmyɛ́ yala nàmá, ń jà ǹ nə́ ǹ nywɛ̀ à jal, ǹ zhe nyǔ mə̀ tʼâ la zhɔ̌, sə à mʼa bwìrhì mú dɛ̃ rɛ́ nánkwɛɛ́ rɛ́ yùwə̀. 55Àmyɛ́ yala nàmá bɛ́ wɔ́ kùjú zhə̀n zhə̀nà, à jal mɔ́ wɔ́ kɔ̀-nyɔ̀ɔ̀mà zhə̀n zhə̀nà. 56Lò mɔ̀bɔ́ ǹ nə́ ǹ dɔ̀m àmyɛ́ nàmá bɛ́, ń jà ǹ nə́ ǹ nywɛ̀ àmyɛ́ jal mɔ́, ǹ ŋwɛ́nɛ́ à wẽ́, àmyɛ ŋwɛ́nɛ́ ǹ wẽ́. 57À Da mɔ́ ń twĩ̀ nì mú wɔ́ nã́nyì, wɔ́ ńmyɛ̌ ń ce à ŋwɛ́nɛ́. Èta myɛ, lò mɔ̀bɔ́ ǹ nə́ ǹ dɔ̀m àmyɛ́ yala nàmá bɛ́, wɔ́ àmyɛ́ à ce ǹ ŋwɛ́nɛ́. 58Nyǐnə búrú w kɔ̀bɔ́ ò shí Arəzana w mɔ́. Ò də̀ ǹdə kɔ̀bɔ́ á nàmbala bɛ́ dɔ̀m bə jʼa cì mú ta yé. Lò mɔ̀bɔ́ ǹ nə́ ǹ dɔ̀m búrú w kɔ̀bɔ́, ǹ mʼâ yə̀ nɛ́ twéé gakó yilə.”
59Wɔ́ Yezu gə́ yà ń nə́ ń cèrhè kàrmɔ́ lyì bí ni Kapɛrnaɔm dwã-gùlú jì y wẽ́ mó yi ní, ń zɔ̀m zɔ̀mà nɛ́ nə̀myɛ́.
Yezu zɔ̀mà nɛ́ nʼê pɛ nyǔ mə̀ tʼâ la zhɔ̌
60Rə̀myɛ́ yó, Yezu kwã-lyì bí gə́ cili ń zɔ̀mà nɛ́, bə̀ nánzhəzhɔ̌ zɛ̃̀ bə wɔ̀: “Zɔ̀mà nɛ́ nyɛ̀bɛ́ zum. Mɔ̌ lò ń wɔ̌ nɛ ń la zõ?”
61Yezu tó ń wẽ́ n lwar bə̀ bə̀ nʼê ŋwɔ́ŋwɔ̌ rə̀myɛ́ yilə. N zɛ̃̀ n wɔ̀ bɛ: “Á wun zɛ̃̀ rə̀myɛ́ yilə? 62Sə á gə tú á nɔ Numbyíní Byǐ ń zɛ̃̀ ń la dɛ̃̌ ń gə́ yà ń ŋwɛ́nɛ́ mə̀gã̌ mɔ́, á mʼâ kʼá wɔ̀ byè? 63Wɔ́ Eshirhə náàcɛ̀nɛ́ è nʼê pɛ nyǔ, sə numbyíní yala nɛ́ dúdú wàr kaka nə̀ la wɔ̀rhɔ́ yé. Zɔ̀mà nɛ́ à byili ába mó wɔ́ Eshirhə náàcɛ̀nɛ́ zɔ̀mà, nə̀ nʼê pɛ nyǔ, 64sə lyì jàlà ŋwɛ́nɛ́ á wẽ́ bə̀ tʼâ zwẽ nyí yé.”
Yezu yà ń yě lyì bí byɛ̀bɛ́ bə̀ tʼâ zwẽ nyí mú, ǹdə́ lò mó mɔ̀bɔ́ ń la mɔ myìnù n pə bə zə mɔ́ pár kùr-ju yi ní ga. Wɔ́ rə̀myɛ́ è ce n zɔ̀m èta.
65N zɛ̃̀ n kə́ n súlí n wɔ̀: “Wɔ́ rə̀myɛ́ è ce, à yʼà wò ába bə̀ lò wàr ń twí àmyɛ́ sõ, ǹdə́ è də̀ à Da ń ce n bə̀ yé.”
66Kɔn zhí dɛ̃ rɛ́ rə̀myɛ́, Yezu kwã-lyì bí nánzhəzhɔ̌ jʼa pɔr ń kwã nɛ́, bə̀ kʼê tʼâ tó mo yé. 67N zɛ̃̀ n bwə̀rh byɛ̀bɛ́ shí ǹdə́ bə̀lyè y n wɔ̀: “Sə ámyɛ̌, ámyɛ nʼá yâl á pɔr à kwã nɛ́ nà?”
68Shəmɔ Pyɛɛrɛ wɔ̀ mɔ: “Cinu, mɔ̌ sõ nə́ mʼâ vò né? Ǹmyɛ́ ǹ zhe nyǔ mə̀ tʼâ la zhɔ̌ zɔ̀mà. 69Èlâsɛ̃´ nə́ rʼé zwẽ nyí, nə́ jʼâ yě myɛ bə̀ ǹmyɛ́ wɔ́ Yi lò, ǹ shí Yi sõ.”
70Yezu zɛ̃̀ n wɔ̀ bɛ: “È də̀ àmyɛ́ à cír ámyɛ̌ shí ǹdə́ bə̀lyè y ga nà? E jà ámyɛ̌ mə̀dù wɔ́ shə̀tána.”
71Wɔ́ Shəmɔ byǐ Zhidə Esəkarəyɔtɛ yò Yezu yà ń nə́ ń zɔ̀mà. Wɔ́ ńmyɛ̌ ń yà ń la mɔ myìnù, n jà ń yà ń wɔ́ Yezu kwã-lyì bí shí ǹdə́ bə̀lyè y mə̀dù.
7Yezu cèrhè kàrmɔ̀ címsi jàà wà
1Rə̀myɛ́ kwã nɛ́, Yezu zɛ̃̀ ń nə́ ń byɛ́lɛ́ Gəlile tənà y cɛmɛ nɛ́. Zhwifubá yó-cìnə́ bé gə́ yʼà nʼê pyà mɔ̀ bə̀ la gu mú ce, ń yà ń tá ń yâl n byɛ́lɛ́ Zhide tənà y cɛmɛ nɛ́ yé.
2E jà rə̀myɛ́ yi ní ǹdə́ Zhwifubá címsí shɛ̀bɛ́ bə̀ nʼê byẽ̀ bə̀ Kwə̀ə́rhe címsi mú yʼà bwəlse.7.2 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili címsi gakó gə́ nʼê jí ní gàà mɔ́.3Yezu da-byâ bɛ́ zɛ̃̀ bə wɔ̀ mɔ̀: “Zhǐr nyɔ̀nɔ̀ ń vò Zhide, mùnì ǹ kwã-lyì bí myɛ yírhə́ nə tumə né nyɛ̀bɛ́ ǹ nə́ ǹ wɛ̀rhɛ́ mɔ́. 4Lò gə nə́ ǹ yâl bə̀ bə̀ lwar ǹ yò, ǹ tá ǹ shèè ǹ wɛ̀rhɛ́ kɔn yé. Ǹ gə nə́ ǹ wɛ̀rhɛ́ tumə né nyɛ̀bɛ́ èta mɔ́ dwí rí, sə́ wɛ̀rhɛ́ rɛ ń ce lyì bí gakó yírhə́ nə mɔ́.” 5Ń da-byâ bɛ́ myɛ cìcì yʼà bə shɛ̀ mɔ zú yé.
6N zɛ̃̀ n wɔ̀ bɛ: “À yi gwẽ̌ yə̀ yí yé, sə ámyɛ̌ yi rí wɔ́ dɛ̃ gakó. 7Lũ w lyì bí wàr bə̀ mʼa jí zùùrì ǹdʼába yé, sə àmyɛ́ gə́ nʼâ byili bi pamparɛ̃ɛ̃ bə̀ bə̀ nʼê twĩ̀ kɔn dɛ̀bɛ́ rə̀ bə mə̂ mɔ́ ce, bə̀ nʼê jí zùùrì ǹdə́ nɛ. 8Ámyɛ̌ zhəlnə címsí jàà wà. È gə wɔ́ àmyɛ́ yilə, à tʼâ la yé, bʼà yi gwẽ̌ yə̀ yí yé.” 9Ń gə́ zɔ̀m ǹdə́ bɛ èta, n mɛ̃ Gəlile né.
10Sə ń da-byâ bɛ́ gə́ zhǐr bə vò címsí jàà wà, ńmyɛ zɛ̃̀ n tà-kwã n vò, sə wɔ́ shéé ń shèè, ń yə̀ shɛ̀nɛ́ bə̀ nə mɔ yé.
11Zhwifubá yó-cìnə́ bé yʼà nʼê pyà mɔ̀ címsí wẽ́, bə̀ yʼà zhe: “Yẽ̀ ń ŋwɛ́nɛ́?”
12Lyì nánzhəzhɔ̌ yʼà nʼê mà nyə̀-pâr ń yó. Jàlà zhe bə̀ ń wɔ́ lyì-twə̂; jàlà zhe bə̀ wɔ́ lyì bí ń nə́ ń yúyǔ. 13Sə Zhwifubá yó-cìnə́ bé ywẽ gə́ yʼà zhe be mó ce, bə̀ yʼà tʼâ zɔ̀m bə̀ ce dɛ̃̌ yé.
14Bə̀ gə́ jú címsí sə̀ dwã nɛ́ bʼe bwẽ̌ dwã wa, Yezu zɛ̃̀ n zhǐr n vò Yi jì y kɔ̀nɔ́ w wa, ń nə́ ń cèrhè kàrmɔ̀ lyì bí ni. 15Ń kàrmɔ́ jàr Zhwifubá yó-cìnə́ bé, bə zɛ̃̀ bə̀ zhe: “Etər mɔ̀bɔ́ tó né ń yě Yi nyə́ né èta, ǹ jà ń yə̀ nɛ̀ cèrhè?”
16Yezu zɛ̃̀ n wɔ̀ bɛ: “Zɔ̀mà nɛ́ à nʼâ byili mú də̀ àmyɛ́ nyə̀ná yé. Wɔ́ mɔ̀bɔ́ ń twĩ̀ nì mú nyə̀ná. 17Lò mɔ̀bɔ́ ǹ nə́ ǹ yâl ń wɛ̀rhɛ́ Yi pùbùlə̀, ǹ mʼâ lwar pamparɛ̃ɛ̃ ǹdə́ zɔ̀mà nɛ́ nyɛ̀bɛ́ à nʼâ byili mú gə wɔ́ Yi zɔ̀mà, ráá àmyɛ́ nyə̀ná. 18Lò mɔ̀bɔ́ ń nə́ ń zɔ̀m ń sə̀pwà yò, rə̀-ná-cí nə́ ń pyà ń cìcì còrhó. Sə mɔ̀bɔ́ ń nə́ ń yâl bə̀ bə̀ cèrhé mɔ̀bɔ́ ń twĩ̀ mù mú, rə̀-ná-cí wɔ́ zhə̀n-cí, sə kɔn dɛ̀bɛ́ ń nə́ ń byili mú gakó wɔ́ zhə̀nà. Kɔma də́-byǐ yə̀ rə̀ gùlí yé. 19È də̀ Muyiisi ń byili ába Yi nyə́ né nà? E jà ámyɛ̌ mə̀dù ga tá ń zwẽ ne yé. Byè yil á nʼá yâl á gu ni?”
20Lyì-zhâ bɛ́ wɔ̀ mɔ̀: “Nyǐ wɔ́ nə̀cílí námməlwɛ̀lɛ́ è zhe mó. Mɔ̌ lò ń nə́ ń yâl n gu mú?”
21N wɔ̀ bɛ: “À wɛ̀rhɛ́ màmyɔ òdù, o pú o jàr á gakó. 22Muyiisi pɔ ába nyí bə̀, á gə lùl bal-byǐ, sʼá gõ yə̀. Sə è də̀ Muyiisi ń ju rə̀ kùr yé, wɔ́ á nàmbala bɛ́ bə̀ ju rə̀ kùrə̀. Á zɛ̃̀ á nʼá gòm á bə̀sɔ́ná bɛ́ shìrhə́ dɛ̃ rɛ́ myɛ cìcì yùwə̀. 23Á gə nʼá gòm bə̀sɔ́bwɛ̀lɛ́ shìrhə́ dɛ̃ rɛ́ yùwə̀, wɔ́ mùnì ga á bə̀kʼá yẽ̌ Muyiisi nyí rí ni yé; è nə wɔ́ bə̀kɔ́n yil á lyimə nʼê yì àmyɛ́, à gə́ wárh lò shìrhə́ dɛ̃ rɛ́ yù w n nə ń cìn námpúm mú yilə? 24Á bə̀kʼá nyǐ lyì bí yésé á mʼá bùr yé. Á gə la bǔr, sʼá bùrsí yə̀ cángá.”
25Zhərəzalɛm lyì bí jàlà yʼà zhe: “È də̀ ńmyɛ̌ bə̀ yʼà nʼê pyà bə̀ la gu mú nà? 26Nyǐ mu ń zhǐ lyì bí yé né ń nə́ ń zɔ̀mà, sə bə̀ tʼâ wə̀l bə̀ kaka yé. Nə́ yó-cìnə́ bé myɛ gʼè zwẽ nyí bə̀ wɔ́ ńmyɛ̌ ń wɔ́ Kristə mó zhə̀n ga? 27E jà nə́ yě mɔ̀bɔ́ gə́ shí mə̀gã̌, sə Kristə mó gə túwə́, lò lò tá ń la lwar ń gə́ shí má yé.”
28Yezu jà ń yà ń nə́ ń cèrhè kàrmɔ̀ lyì bí ni Yi jì y kɔ̀nɔ́ w wa. N zɛ̃̀ n bya dɛ̃̌ dɛ̃̌ n wɔ̀: “Zhə̀nà, á yě à párá, á jʼâ yě à gə́ shí má? E jʼà də̀ à sə̀pwà yil à tú yé, sə mɔ̀bɔ́ ń twĩ̀ nì mú wɔ́ zhə̀n-cí. Á yə̀l ń pár yé, 29sə àmyɛ́ yě ń párá, bʼà shí ń sono. Wɔ́ ńmyɛ̌ ń twĩ̀ nì.”
30Bə̀ yʼà nʼê pyà sə bə zə mɔ. Sə ń yi gə́ yʼà gwẽ̌ yə̀ yí mú ce, lò lò yə̀ ŋwɛ̀nɛ́ n zə ń jɛ̃̀ n dwə̀rh mò yé. 31Lyì-zhâ bɛ́ jàlà nánzhəzhɔ̌ zù mù, bə zɛ̃̀ bə̀ zhe: “Kristə mó gə túwə́, ń mà n wɛ̀rhɛ́ màmyaarhɛ nánzhəzhɔ̌ rə dwini tɛ̀bɛ́ bal mɔ́ mɔ̀bɔ́ wɛ̀rhɛ́ mɔ́?”
32Farɛzhɛ̃ɛ̃bá nyɛ̀ɛ̀ kɔn dɛ̀bɛ́ lyì-zhâ bɛ́ yʼà nʼê ŋwúŋwùní Yezu yó mó. Bə̀myɛ́ ǹdə́ Yi jì y vwĩ̀-zwə́lnə bé yé né cìnə́ bé zɛ̃̀ bə twĩ̀ Yi jì y yìlnə̀ bé jàlà, bə̀ bə̀ zhəl bə zə mɔ.
33Yezu wɔ̀ lyì-zhâ bɛ́ nɛ: “À mʼa yə̀ nɛ́ ǹdʼába námpɔ́lɛ́ gwẽ̌, sʼa kʼa vò mɔ̀bɔ́ ń twĩ̀ nì mú sono. 34Á mʼâ zɛ̃̀ á nʼá pyà nɛ̀, sə á tʼá la nɛ nɔ yé. Á yír à gə́ la mə̀gã̌ mɔ́ yé.”
35Zhwifubá yó-cìnə́ bé zɛ̃̀ bə̀ nʼê zɔ̀m ǹdə́ dwã bə̀ zhe: “Yẽ̀ ń la nɛ́, nə́ mʼé tʼá la mɔ nɔ? È nə wɔ́ lyì bí byɛ̀bɛ́ bə̀ də̀ Zhwifubá mó cɛmɛ nɛ́ wẽ́ ń la nɛ́, n vò n jòm Zhwifubá byɛ̀bɛ́ bə̀ làà nə̀ wẽ́ mó sõ n mə n cèrhè kàrmɔ̀ nə̀ lyì bí ni? 36Ń wò bə̀ nə́ mʼâ zɛ̃̀ nə́ rʼé pyà mɔ̀, sə nə́ tʼá la mɔ nɔ yé, n jà n wɔ̀ bə̀ nə́ yír ń gə́ la mə̀gã̌ mɔ́ yé. Rə̀myɛ́ kùr wɔ́ byè?”
Yezu bwəl Eshirhə náàcɛ̀nɛ́ nyí byɛ̀bɛ́ bə̀ zù mù mú ni
37Címsí dɛ̃ rɛ́ nánkwɛɛ́ rɛ́, wɔ́ rə̀myɛ́ rə̀ yàl dɛ̃ rɛ́ nánfɔ̀lɔ̀ wá. Yezu zɛ̃̀ n zhì lyì bí gakó yé né, n bya dɛ̃̌ dɛ̃̌ n wɔ̀: “Lò mɔ̀bɔ́ nə̀nyɛ̀lsɛ̀ zhe mó, sə́ bə̀ à sono ń zwẽ nɛ̃̌ ń nyɔ̀. 38Lò mɔ̀bɔ́ ǹ zù àmyɛ́, nɛ̃̌ mɔ̀bɔ́ mə̀ nʼê pɛ nyǔ bʼa nʼê dùr ǹ wẽ́ ǹdə bwǐ nɛ̃̌ ta. Wɔ́ èta bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ né.”
39Wɔ́ Eshirhə náàcɛ̀nɛ́ y ń yà ń la byɛ̀bɛ́ bə̀ zù mù mú ni pɔ mɔ́ yò ń yà ń nə́ ń zɔ̀mà. Sə ń gə́ yà ń gwẽ̌ yə̀ ń zùwə́ y nɛ ń Da sono mó ce, ń yà ń gwẽ̌ yə̀ bɛ y pɛ yé.
Lyì-zhâ bɛ́ pɔr dwã nɛ Yezu shò-kwã nɛ́
40Rə̀myɛ́ yó, lyì jàlà zhì lyì-zhâ bɛ́ wẽ́, bə nyɛ̀ɛ̀ Yezu zɔ̀mà nɛ́ nə̀myɛ́, bə zɛ̃̀ bə̀ zhe: “Bal mɔ́ mɔ̀bɔ́ wɔ́ Yi nyì-zwennə mó mɔ̀bɔ́ nə́ yʼâ nʼé dɛ̃̀ mɔ́ zhə̀nà.”
41Jàlà zhe bə̀ wɔ́ Kristə mó. Bə̀ jàlà myɛ yʼà zhe: “Wɔ́ Gəlile tənà y wẽ́ Kristə mó la nɛ́ shú nà? 42Yi zɔ̀mɛ̀ rɛ́ sɛ́bɛ́ rɛ́ byili bə̀ Kristə mó wɔ́ Dəvyidi dwí rí wẽ́ ń la nɛ́ shú, e jà wɔ́ Bɛtələyɛm nɛ́, Dəvyidi da-dǒ wə.”
43Lyì-zhâ bɛ́ ji kùr bə pɔr dwã nɛ Yezu shò-kwã nɛ́. 44Jàlà yʼà nʼê yâl bə zə mɔ, sə lò lò yə̀ kwɛ̀nɛ́ n zə mɔ yé.
45Yi jì y yìlnə̀ bé kʼa kwɛ̃̀ bə bə̀ vwĩ̀-zwə́lnə bé yé né cìnə́ bé ǹdə́ Farɛzhɛ̃ɛ̃bá sono. Bə zɛ̃̀ bə bwə̀rh bè bə wɔ̀: “Byè yil á yə̀ mɔ zal á mʼá bà?”
46Bə lyár bə wɔ̀: “Nə́ gwẽ̌ yə̀ lò nɛ ń nə́ ń zɔ̀m ǹdə bal mɔ́ mɔ̀bɔ́ ta gaga yé.”
47Farɛzhɛ̃ɛ̃bá zɛ̃̀ bə wɔ̀: “Ámyɛ shɛ̀nɛ́ n yúyǔ ába nà? 48Lò mə̀dù myɛ cìcì tɛ̀nɛ́ nə́ yó-cìnə́ bé, ráá Farɛzhɛ̃ɛ̃bá wẽ́ ń zù mù yé. 49Lyì-zhâ bɛ́ byɛ̀bɛ́ yò zhìlì; bə̀ yə̀l Muyiisi nyə́ né yé.”
50Nəkɔdɛm mɔ́ mɔ̀bɔ́ ń yà ń tú Yezu sõ ǹdə́ cəcɛ̃ y mɔ́ myɛ yà ń tó be ń ŋwɛ́nɛ́ gàà. Ńmyɛ̌ zɛ̃̀ n bwə̀rh bè n wɔ̀: 51“Nə́ nyí rí gə́ nʼê byili ní mú, nə́ wɔ̌ nə́ kɛ́ lò bùrsì, ǹdə́ nə́ yə̀ jɛ̀rɛ̀ nə́ cili ń zɔ̀mà nɛ́, nə́ lwar kɔn ná-yil ń wɛ̀rhɛ́?”
52Bə wɔ̀ mɔ̀: “Ǹmyɛ shí Gəlile nà? Pyâ Yi zɔ̀mɛ̀ rɛ́ sɛ́bɛ́ rɛ́ wẽ́ ń nyì, ǹ bʼâ pwírí Yi nyì-zwennə mə̀dù ga yə̀ Gəlile shí yé.”
[ 53Rə̀myɛ́ kwã nɛ́, lò gakó ká n vò jè.
8Bə̀ zɔ kɛ̃ mə̀dù ǹdə́ ń nə́ ń fwə̂l bə mʼe bə̀ Yezu sõ
1Yezu zɛ̃̀ n zhǐr n vò pyɔ̀ w bə̀ nʼê byẽ̀ bə̀ Olyivyə́r pyɔ̀ mɔ́ yó. 2N ká n dùlí nəkɔkɔ́lɛ́ shãã shãã n bə̀ Yi jì y kɔ̀nɔ́ w wa. Lyì bí gakó bə̀ ń sono. N zɛ̃̀ n jòm tɛ̃´ ń nə́ ń cèrhè bè kàrmɔ̀.
3Rə̀myɛ́ yó, Muyiisi nyə́ né byilnə bé ǹdə́ Farɛzhɛ̃ɛ̃bá zə kɛ̃ mə̀dù bə̀ yʼà zɔ fwə̂l jàà wà, bə mʼe bə̀ Yezu sono, bə ce n zhì lyì bí cəcəl wə. 4Bə zɛ̃̀ bə wɔ̀ Yezu ni: “Yó-cə́bal, bə̀ zɔ kɛ̃ mɔ́ mɔ̀bɔ́ ǹdə́ ń nə́ ń fwə̀lə́. 5E jà Muyiisi pɔ nə́ba nyí ń nyə́ né sɛ́bɛ́ rɛ́ wẽ́, bə̀ nə́ dul kana bɛ́ byɛ̀bɛ́ bə̀myɛ́ èta mɔ́ ǹdə́ nə́kulə nə́ gu. Wɔ́ bə̀kɔ́n ǹmyɛ́ nə́ ǹ bùl rə̀myɛ́ yilə?”
6Bə̀ yʼà nʼê bwə̀rh mò èta bə̀ la mʼe zhẽ̀ mò, mùnì ga bə ŋwɛ̀nɛ́ bə cĩ́ yò ń yó wə.
Yezu zɛ̃̀ n kó tɛ̃´, n zə ń jə̀fɔ́lɛ́ ń mə́ ń kɛ̃ shó w wə. 7Bə̀ gə́ yʼà gwẽ̌ zhǐ bə̀ nʼê bwə̀rh mò mó ce, n zɛ̃̀ n kwẽ̌ dɛ̃̌ n wɔ̀ bɛ: “Lò mɔ̀bɔ́ ń ŋwɛ́nɛ́ ámyɛ̌ wẽ́ ń gwẽ̌ yə̀ yə̀-bəlɔ̀lɔ́ wɛ̀rhɛ́ gaga, sə rə̀-ná-cí jɛ̀rɛ̀ n zə nə́kulu n dul kɛ̃ mɔ́.”
8N zɛ̃̀ n ká n kó tɛ̃´ n zə ń jə̀fɔ́lɛ́ ń mə́ ń kɛ̃ shó w wə. 9Bə̀ gə́ nyɛ̀ɛ̀ rə̀myɛ́, bə zɛ̃̀ bə̀ nʼê zhǐr mə̀dù mə̀dù; náncɛsɛ́ jɛ̀rɛ̀ sə tó yé, bə yẽ̌ Yezu dúdú ǹdə́ kɛ̃ mɔ́ ń zhǐ ń jàà y wa. 10Yezu zɛ̃̀ n kwẽ̌ dɛ̃̌ n bwə̀rh mò n wɔ̀: “Kɛ̃, yẽ̀ byɛ̀bɛ́ bə̀ zə mɔ́ bə bə̀ mɔ́ ŋwɛ́nɛ́? Mə̀dù ga yə̀ ŋwɛ̀nɛ́ n cĩ́ dóó ǹ yó wə?”
11Kɛ̃ mɔ́ wɔ̀ mɔ̀: “Yó-cə́bal, mə̀dù ga yə̀ ŋwɛ̀nɛ́ n cĩ́ dóó à yó w yé.”
Yezu wɔ̀ mɔ̀: “Àmyɛ tʼâ la dóó ǹ yó w cṹ yé. Zhəl, sə ǹ bə̀ká kə́ bwérhé ń wɛ̀rhɛ́ yə̀-bəlɔ̀lɔ́ yé.”]
Wɔ́ Yezu ń wɔ́ lũ w pwẽ̀
12Yezu kə́ n zɔ̀m ǹdə́ lyì bi n wɔ̀: “Wɔ́ àmyɛ́ à wɔ́ lũ w pwẽ̀. Lò mɔ̀bɔ́ ǹ nə́ ǹ tó à kùrə̀, ǹ tá ǹ la cə-byín wẽ́ zhəl gaga yé, sə ǹ mʼâ nə pwẽ̀ dɛ̀bɛ́ rə̀ nʼê pɛ nyǔ mə̀ tʼâ la zhɔ̌.”
13Farɛzhɛ̃ɛ̃bá zɛ̃̀ bə wɔ̀ mɔ̀: “Ǹ nə́ ǹ byili zhə̀n ǹ cìcì shò-kwã nɛ́, sə kɔn dɛ́ tɛ̀bɛ́ ǹ nə́ ǹ byili mú bə kùr zhe yé.”
14Yezu wɔ̀ bɛ: “Bá à gə nʼâ byili zhə̀n à cìcì shò-kwã nɛ́ myɛ, sʼá lwar bə̀ kɔn dɛ̀bɛ́ à nʼâ byili mú wɔ́ zhə̀nà, bʼà yě à gə́ shí má, a jʼà yě à gə́ la má. Sə ámyɛ̌ yə̀l à gə́ shí má, á jʼâ yə̀l à gə́ la má myɛ yé. 15Á nʼá kɛ́ lyì bí bùrsí ǹdə́ numbyínə́ surhə, sə àmyɛ́ tʼâ kɛ́ lò lò bùrsì yé. 16À gə nʼâ kɛ́ bùrsì myɛ, à nʼâ kɛ́ sɛ ǹdə́ zhə̀nà, bʼè də̀ à dúdú à nʼâ kɛ́ sɛ yé. À Da mɔ́ ń twĩ̀ nì mú ŋwɛ́nɛ́ ǹdə́ nɛ. 17Bə̀ kɛ̃ á nyə́ né sɛ́bɛ́ rɛ́ wẽ́ bə wɔ̀: ‘Lyì bə̀lyè gə nʼê byili zɔ̀mɛ̀ rə̀dù kɔn shò-kwã nɛ́, sə́ nyǐ kɔn dɛ́ tɛ̀bɛ́ bə̀ nʼê byili mú zhe kùrə̀.’ 18Àmyɛ́ nʼâ byili zhə̀n à cìcì shò-kwã nɛ́. À Da mɔ́ ń twĩ̀ nì mú myɛ nə́ ń byili zhə̀n à shò-kwã nɛ́.”
19Farɛzhɛ̃ɛ̃bá zɛ̃̀ bə bwə̀rh mò bə wɔ̀: “Ǹ Da ŋwɛ́nɛ́ yẽ̀?”
Yezu wɔ̀ bɛ: “Á yə̀l àmyɛ́ pár sʼe bʼe zɔ̀m à Da zɔ̀mà yé. Á gə yʼâ yě àmyɛ́ párá, á yʼâ bʼâ lwar à Da myɛ párá.”
20Yezu zɔ̀m zɔ̀mà nɛ́ nə̀myɛ́ ǹdə́ ń yà ń jě Yi jì y kɔ̀nɔ́ w wa, bə̀ gə́ nʼê lwé Yi jì y pansɛ́ mə̀gã̌ mɔ́ səta, ń nə́ ń cèrhè kàrmɔ̀ lyì bí ni. Sə ń yi gə́ yʼà gwẽ̌ yə̀ yí mú ce, lò lò yə̀ ŋwɛ̀nɛ́ n zə mɔ yé.
Yezu byili bə̀ ń ká ń la ń Da sõ
21Yezu kə́ n wɔ̀ lyì bí ni: “À nʼâ zhìrə́. Á mʼâ tà-kwã á nʼá pyà nɛ̀, sə á mʼâ mɛ̃ á yə̀-bəlwàálɛ́ wẽ́ á cì. Á yír à gə́ la mə̀gã̌ mɔ́ yé.”
22Zhwifubá yó-cìnə́ bé zɛ̃̀ bə̀ nʼê zɔ̀m ǹdə́ dwã bə̀ zhe: “Ń gə́ wò bə̀ nə́ yír ń gə́ la mə̀gã̌ mɔ́, e zɛ̃̀ wɔ́ ń cìn ń la gu náá etəra?”
23N zɛ̃̀ n wɔ̀ bɛ: “Ámyɛ̌ wɔ́ cɛ yó lyì, sə àmyɛ́ wɔ́ dɛ̃̌ yi w à shí ní a bà. Ámyɛ̌ wɔ́ lũ w kɔ̀bɔ́ lyì, sə àmyɛ́ də̀ lũ w kɔ̀bɔ́ lò yé. 24Wɔ́ rə̀myɛ́ è ce à wò ába bʼâ mʼâ mɛ̃ á yə̀-bəlwàálɛ́ wẽ́ á cì. Á gə tʼá zwẽ nyí bʼà wɔ́ mɔ̀bɔ́ à wɔ́ mɔ́, á mʼâ mɛ̃ rə̀ wẽ́ á cì.”
25Bə zɛ̃̀ bə bwə̀rh mò bə wɔ̀: “Ǹmyɛ́ wɔ́ mɔ̌?”
Yezu wɔ̀ bɛ: “À wɔ́ mɔ̀bɔ́ à nʼâ byili ába kùr-ju yi ní ga bʼà wɔ́ mɔ́. 26Wẽ̀ nánzhəzhɔ̌ ŋwɛ́nɛ́ à nʼâ yâl a byili á shò-kwã nɛ́, a mʼa kə́ á bùrsì, sə mɔ̀bɔ́ ń twĩ̀ nì mú wɔ́ zhə̀n-cí. Wɔ́ kɔn dɛ́ tɛ̀bɛ́ ń byili ni mú dúdú à nʼâ bwə̀l à byili lũ w lyì bí ni.”
27Sə Zhwifubá yʼà yə̀l bə̀ Yezu wɔ́ ń Da yò ń nə́ ń zɔ̀m yé. 28N zɛ̃̀ n wɔ̀ bɛ: “Á gə tú á zhẽ̌ Numbyíní Byǐ á co dɛ̃̌, rə̀myɛ́ yó, á mʼâ lwar bʼà wɔ́ mɔ̀bɔ́ à wɔ́ mɔ́, sə à tʼâ wɛ̀rhɛ́ kaka à sə̀pwà nɛ̀ yé. Wɔ́ kɔn dɛ́ tɛ̀bɛ́ à Da byili ni mú dúdú à nʼâ byili. 29Mɔ̀bɔ́ ń twĩ̀ nì mú yə̀ nɛ̀ yẽ̌ à dúdú yé. Ń ŋwɛ́nɛ́ ǹdə́ nɛ, bə̀ wɔ́ dɛ̀bɛ́ rə̀ wɔ́ ń bùlə̀ mó à nʼâ wɛ̀rhɛ́ twéé gakó.”
30Yezu gə́ zɔ̀m zɔ̀mà nɛ́ nə̀myɛ́ mɔ́ yi ní, lyì nánzhəzhɔ̌ zù mù.
Lò gə zwẽ Yezu zɔ̀mà nɛ́, ǹ kə́ ǹ də̀ yóm yé
31N zɛ̃̀ n wɔ̀ Zhwifubá byɛ̀bɛ́ bə̀ zù mù mú ni: “Á gə zwẽ à zɔ̀mà nɛ́ á cĩ́ á wẽ́, á mʼâ yə̀ à kwã-lyì zhə̀n zhə̀nà. 32Á mʼâ lwar zhə̀n dɛ́ gə́ wɔ́ nɛ́, sə zhə̀n dɛ́ mʼa ce á cìní á cìnə̀.”
33Bə zɛ̃̀ bə wɔ̀ mɔ̀: “Nə́myɛ̌ wɔ́ Abəraham nɛ̀mɛ́. Nə́ yə̀ lò lò yómə́ yàl gaga yé. È nə wɔ́ byè yil ǹ nə́ ǹ wə̀l bə̀ nə́ mʼâ cìní nə́ cìnə̀?”
34Yezu wɔ̀ bɛ: “Zhə̀n zhə̀nà, à nʼâ wə̀l ába: lò mɔ̀bɔ́ gakó ń nə́ ń wɛ̀rhɛ́ yə̀-bəlɔ̀lɔ́, ń wɔ́ yə̀-bəlɔ̀lɔ́ w yə-bal. 35Bə̀ tʼâ yẽ̌ yə-bal nɛ ń jòm kɛ̀lɛ́ w twéé twéé yé, sə kɛ̀lɛ́ y byǐ nə́ ń jòm è wẽ́ twéé twéé. 36Rə̀myɛ́ ce, á gə tó Byǐ mú dɛnnɛ á cǐ á cìnə̀, á mʼâ yə̀ lyì byɛ̀bɛ́ bə̀ cǐ bə̀ cìn zhə̀n zhə̀nà. 37À yě bʼâ wɔ́ Abəraham nɛ̀mɛ́, sə á bə shɛ̀ à zɔ̀mà nɛ́ zõ yé. Wɔ́ rə̀myɛ́ è ce á nʼá yâl á gu ni. 38Kɔn dɛ́ tɛ̀bɛ́ à nɔ à Da sõ mó, wɔ́ rə̀myɛ́ à nʼâ zɔ̀mà, sə ámyɛ̌ wɔ́ kɔn dɛ́ tɛ̀bɛ́ á da cèrhè ába mó, wɔ́ rə̀myɛ́ á nʼá wɛ̀rhɛ́.”
39Bə zɛ̃̀ bə wɔ̀ mɔ̀: “Wɔ́ Abəraham ń wɔ́ nə́myɛ̌ da.”
Yezu wɔ̀ bɛ: “Á gə yʼâ wɔ́ Abəraham byâ zhə̀n ga, á yʼâ mʼâ twĩ̀ ǹdə ń ta. 40Sə èlâsɛ̃´ à byili ába zhə̀n dɛ́ Yi cĩ́ ni mú, e jà ǹdə́ rə̀myɛ́ ga, á nʼá yâl á gu ni. Abəraham yə̀ rə̀myɛ́ mɔ́ wɛ̀rhɛ́ yé. 41Sə ámyɛ̌, wɔ́ á da tùntwə̃̀ə̃̀ né cìcì á nʼá twĩ̀.”
Bə zɛ̃̀ bə wɔ̀ mɔ̀: “Nə́ də̀ ébwá-byâ yé. Yi dúdú rə̀ wɔ́ nə́ Da.”
42Yezu zɛ̃̀ n wɔ̀ bɛ: “Yi gə yʼà wɔ́ á Da zhə̀n zhə̀nà, á yʼâ mʼâ swéné ne, bə̀ wɔ́ Yi sõ à shí ní a bà. Wɔ́ rə̀myɛ́ rə̀ twĩ̀ nì, sə à yə̀ twí ǹdə́ à sə̀pwà pùbùlə̀ yé. 43Wɔ́ á gə́ wàr à zɔ̀mà nɛ́ á nʼá zwẽ á cĩ́ á wẽ́ mó è ce, á bə tɛ̀bɛ́ à nʼâ byili ába mó kùr nyɛ̌ yé.
44“Wɔ́ Shətana è wɔ́ á da. Á zɛ̃̀ á nʼá yâl á wɛ̀rhɛ́ á da mɔ́ pùbùlə̀. È wɔ́ lyì-gurnə kùr-ju yi ní ga. È gə́ də̀ zhə̀n cə́bal mɔ́ ce, è yə̀ zhə̀n wẽ́ zhì gaga yé. Èmyɛ́ è wɔ́ kɔ̀mdɛ́ da. Rə̀myɛ́ ce, è gə nʼê gòm è kɔma bɛ́, wɔ́ tɛ̀bɛ́ rə̀ mə̂ ǹdə́ y mɔ́ è nʼê zɔ̀mà, 45sə àmyɛ́ wɔ́ zhə̀n à nʼâ zɔ̀mà. Wɔ́ rə̀myɛ́ yil á tʼá zwẽ à zɔ̀mà nɛ́ yé. 46Ámyɛ̌ wẽ́ mó, wɔ́ mɔ̌ ń mà n byili bʼà dówə́? Sə è gə wɔ́ zhə̀n à nʼâ zɔ̀mà, è nə wɔ́ byè yil á tʼá zwẽ à zɔ̀mà nɛ́? 47Lò mɔ̀bɔ́ ń wɔ́ Yi lò, rə̀-ná-cí nə́ ń cili Yi zɔ̀mà nɛ́. Wɔ́ ámyɛ̌ gə́ də̀ Yi lyì mú è ce á tʼá cili yé.”
Yezu ŋwɛ́nɛ́ ǹdə́ bə̀ gwẽ̌ yə̀ Abəraham lùl yé
48Zhwifubá zɛ̃̀ bə wɔ̀ mɔ̀: “Nə́ bə bwìrì zhe nə́ mʼé wɔ̀ bə̀ ǹ wɔ́ Samarɛ lò, nə̀cílí námməlwɛ̀lɛ́ zhe mó?”
49Yezu zɛ̃̀ n wɔ̀ bɛ: “Nə̀cílí námməlwɛ̀lɛ́ bə nɛ zhe yé. Wɔ́ à Da à nʼâ cèrhé, sə ámyɛ̌ nʼá fulsi ni. 50À tʼâ pyà bə̀ bə̀ cèrhé ne yé, sə lò mə̀dù ŋwɛ́nɛ́, wɔ́ ńmyɛ̌ ń nə́ ń pyà sə bə pɛ̃ còrhó, n jà ń nə́ ń kɛ́ bùrsì. 51Zhə̀n zhə̀nà à nʼâ wə̀l ába: lò mɔ̀bɔ́ ǹ nə́ ǹ zwẽ à zɔ̀mà nɛ́, ǹ tá ǹ la cú gaga yé.”
52Zhwifubá zɛ̃̀ bə wɔ̀ mɔ̀: “Èlâsɛ̃´ myɛ̌, nə́ yě pamparɛ̃ɛ̃ bə̀ nə̀cílí námməlwɛ̀lɛ́ zhe mó. Abəraham cùwə̀, Yi nyì-zwennə bé myɛ cì, ǹmyɛ́ zɛ̃̀ ǹ zhe bə̀ lò mɔ̀bɔ́ ń nə́ ń zwẽ ǹ zɔ̀mà nɛ́, rə̀-ná-cí tá ń la cú gaga yé! 53Nə́ da Abəraham cùwə̀, ń zɛ̃̀ ǹ nə́ ǹ bùl bə̀ ǹmyɛ́ du mu? Yi nyì-zwennə bé myɛ cùwə̀, ǹmyɛ́ zɛ̃̀ ǹ nə́ ǹ kwè ǹ cìn ǹdə mɔ̌ ta?”
54Yezu wɔ̀ bɛ: “À cìcì gə yʼà nʼâ cèrhé à cìnə̀, à còrhó w yʼà bə kùr zhe yé. Sə mɔ̀bɔ́ ń nə́ ń cèrhé ne mó wɔ́ à Da. Wɔ́ ńmyɛ̌ á nʼá wə̀l bə̀ ń wɔ́ á Yi, 55e jʼâ yə̀l ń pár yé. Àmyɛ́ yě ń párá. À gə yʼà wò bʼà yə̀l ń párá, à yʼà bʼa gõ kɔma ǹdə á ta. Sə à yě ń párá; à nʼâ zwẽ ń zɔ̀mà nɛ́. 56Á da Abəraham yà ń nə́ ń fùù ǹdə́ wu-nyɔ̃̀, ń gə́ yà ń nə́ ń bùl bə̀ ń yírhə́ bʼa nə à twírí dɛ̃ rɛ́ mɔ́ yilə. Zhə̀nà, ń nɔ rɛ, sə ń wu yàl nyɛ̀n.”
57Zhwifubá zɛ̃̀ bə wɔ̀ mɔ̀: “Ǹmyɛ́ gwẽ̌ yə̀ byinə shí-ènu myɛ cìcì yí, ń jà ń wɔ̀ bə̀ ǹ nɔ Abəraham?”
58Yezu zɛ̃̀ n wɔ̀ bɛ: “Zhə̀n zhə̀nà, à nʼâ wə̀l ába: àmyɛ́ ŋwɛ́nɛ́ ǹdə́ bə̀ gwẽ̌ yə̀ Abəraham lùl yé.”
59Rə̀myɛ́ yó, bə pwà nə́kulə bə̀ la mʼe dul mo. N zɛ̃̀ n tó lyì-zhâ bɛ́ wẽ́ n shèè n du Yi jì y kɔ̀nɔ́ w wa.
9Yezu púr lyìlyǒ òdù yírhə́
1Dɛ̃ rə̀dù, Yezu yà ń nə́ ń lyɛ̃. N nə bal mə̀dù, ń ná lùl mò lyìlyǒ. 2Ń kwã-lyì bí zɛ̃̀ bə bwə̀rh mò bə wɔ̀: “Yó-cə́bal, byè yil bal mó mɔ̀bɔ́ ná lùl mò lyìlyǒ? Wɔ́ ń cìcì ń wɛ̀rhɛ́ yə̀-bəlwàálɛ, ráá ń lùlnə̀ bé bə̀ wɛ̀rhɛ́ yə̀-bəlwàálɛ, wɔ́ rə̀myɛ́ è ce ń ná lù mù lyìlyǒ?”
3Yezu wɔ̀ bɛ: “È də̀ ńmyɛ̌ ráá ń lùlnə̀ bé bə̀ wɛ̀rhɛ́ yə̀-bəlwàálɛ yé, sə wɔ́ mùnì ga Yi tumə né tó ńmyɛ̌ dɛnnɛ nə du lyì yírhə́ na. 4Wɔ́ nyɔ́ɔ́ ǹdə́ nə́ba bə̀ nə́ twĩ̌ mɔ̀bɔ́ ń twĩ̀ nì mú tumə né ǹdə́ yi rí gwẽ̌ yə̀ zwì yé. Cɛ y la yùù, sə è gə tú è yìì è zhɛ̀, lò kə́ ń wàr ń twĩ̀ yé. 5À gə́ gwẽ̌ ŋwɛ́nɛ́ lũ w wẽ́ mó, wɔ́ àmyɛ́ à wɔ́ ò pwẽ̀.”
6Ń gə́ zɔ̀m èta n zhɛ̀, n pùrh ń tə̀tàr tɛ̃´, n mə n dú bo, n fɔ́n n mə n tútǔ bal mɔ́ yírhə́ né, 7n zɛ̃̀ n wɔ̀ mɔ̀: “Zhəl ń pùl ǹ yé y Silowe póló w wə.” (Silowe kùr wɔ́ “Mɔ̀bɔ́ bə̀ twĩ̀”.)
N zhǐr n vò n pùl ń yé yə́. Sə ń gə́ kwɛ̃̀ ń bànà, ń yírhə́ né jʼa púr.
8Ń jə̀-dwã bɛ́ ǹdə́ byɛ̀bɛ́ gakó bə̀ yʼà nʼê nɛ mɔ shãã ga ń wɔ́ lwə̀lə̀ mó gə́ nɔ mɔ, bə zɛ̃̀ bə wɔ̀: “È də̀ mɔ̀bɔ́ ń yà ń jě tɛ̃´ ń nə́ ń lwə̀l mó?”
9Jàlà zhe bə̀ wɔ́ ńmyɛ̌, jàlà zhe bə̀, ɔ̃́ʼɔ̃, bə̀ wɔ́ ń nyɛrh-dõ, sə ń cìcì yà ń zhe: “Wɔ́ àmyɛ́ cìcì.”
10Bə zɛ̃̀ bə bwə̀rh mò bə wɔ̀: “Etər ǹ yírhə́ né tó né nə púr?”
11N wɔ̀ bɛ: “Bal mɔ́ mɔ̀bɔ́ bə̀ nʼê byẽ̀ bə̀ Yezu mú ń wɛ̀rhɛ́ bo n tútǔ à yírhə́ né, n zɛ̃̀ n wɔ̀ bʼà zhəl póló w bə̀ nʼê byẽ̀ bə̀ Silowe mó wẽ́ a pùl à yé yə́. A zhǐr a vò a pùl à yé y à yírhə́ né jʼa púr.”
12Bə bwə̀rh mò bə wɔ̀: “Ń ŋwɛ́nɛ́ yẽ̀?”
N wɔ̀ bɛ: “À yə̀l yé.”
13Bə zə mɔ bə vò Farɛzhɛ̃ɛ̃bá sono. 14E jà Yezu gə́ yà ń wɛ̀rhɛ́ bo w n mə n púr bal mɔ́ yírhə́ né mó yʼà wɔ́ shìrhə́ dɛ̃ yùwə̀. 15Farɛzhɛ̃ɛ̃bá myɛ kʼe bwə̀rh mò bə̀ wɔ́ etər ń yírhə́ né tó né nə púr?
N wɔ̀ bɛ: “Ń dɛ̃ bo à yírhə́ né ne, a zɛ̃̀ a vò a pùl à yé y à yírhə́ né jʼa púr.”
16Farɛzhɛ̃ɛ̃bá jàlà zɛ̃̀ bə wɔ̀: “Bal mɔ́ mɔ̀bɔ́ də̀ Yi lò yé. Ń tá ń zwẽ shìrhə́ dɛ̃ rɛ́ nyə́ né yé.”
Bə̀ dwã myɛ yʼà zhe: “Etər lò mɔ̀bɔ́ ń tá ń zwẽ Yi nyə́ né mʼa tó né e wɛ̀rhɛ́ màmyaarhɛ́ tɛ̀bɛ́ èta mɔ́?”
Bə ji kùr bə pɔr dwã nɛ. 17Bə kʼe bwə̀rh bal mɔ́ ń yà ń wɔ́ lyìlyǒ w mó bə wɔ̀: “È gə wɔ́ ǹmyɛ́ yilə, ǹ nə́ ǹ bùl bə̀ byè bal mɔ́ mɔ̀bɔ́ ń púr ǹ yírhə́ né mó yilə?”
N zɛ̃̀ n wɔ̀ bɛ: “Ń wɔ́ Yi nyì-zwennə.”
18Sə Zhwifubá yó-cìnə́ bé yʼà tʼâ yâl bə zwẽ nyí bə̀ bal mɔ́ yírhə́ né yʼà bɛ̃´ nɛ, wɔ́ púr nə̀ kʼa púr zhə̀n ga yé. Rə̀myɛ́ ce, bə byẽ̀ ń da ǹdə́ ń ná, 19bə bwə̀rh bè bə wɔ̀: “Mɔ̀bɔ́ wɔ́ á byǐ mú á wò bʼâ lùl mò lyìlyǒ mó? Etər ń tó né ń yírhə́ né bʼe púr?”
20Bə wɔ̀: “Nə́ yě bə̀ mɔ̀bɔ́ wɔ́ nə́myɛ̌ byǐ, nə́ lùl mò lyìlyǒ. 21Sə è gə wɔ́ ń yírhə́ né gə́ tó né nə púr, ǹdə́ lò mó mɔ̀bɔ́ ń púr ne mó, nə́ yə̀l rə̀myɛ́ yé. Bwə̂rhnə mo. Ń də̀ bə̀sɔ́bwɛ̀lɛ́ yé, ń mà n lyár ń cìcì nì.”
22Ń da ǹdə́ ń ná yʼà nʼê dùr Zhwifubá yó-cìnə́ bé ywẽ. Wɔ́ rə̀myɛ́ è ce bə zɔ̀m èta. Zhwifubá yó-cìnə́ bé yʼà jɛ̀rɛ̀ bə zɔ̀m ǹdə́ dwã bə cĩ́, bə̀ lò mɔ̀bɔ́ ń shɛ̀nɛ́ n wɔ̀ bə̀ Yezu wɔ́ Kristə mó, sə bə cə̀r mò, ń bə̀ká n kə́ n bə̀ dwã-gùlú jì y wẽ́ yé. 23Wɔ́ rə̀myɛ́ è ce ń da ǹdə́ ń ná wɔ̀ bə̀ ń də̀ bə̀sɔ́bwɛ̀lɛ́ yé, bə̀ bə̀ bwə̂rh mo.
24Bə kʼe byẽ̀ bal mɔ́, bə wɔ̀ mɔ̀: “Byili nə́ba zhə̀n pamparɛ̃ɛ̃ Yi yé né, bə̀ nə́myɛ̌ yě bə̀ bal mɔ́ mɔ̀bɔ́ tá ń zwẽ Yi nyə́ né yé.”
25N zɛ̃̀ n wɔ̀ bɛ: “Ń gə wɔ́ lò mɔ̀bɔ́ ń tá ń zwẽ Yi nyə́ né myɛ, àmyɛ́ yə̀l yé. Kɔn rə̀dù à yě: à yʼà wɔ́ lyìlyǒ, sə à yírhə́ né púr èlâsɛ̃´.”
26Bə bwə̀rh mò bə wɔ̀: “Byè ń wɛ̀rhɛ́ mɔ́? Etər ń púr ǹ yírhə́ nə́ né?”
27N wɔ̀ bɛ: “À jɛ̀rɛ̀ a byili ába, sə á yə̀ cili yé. Byè yil á nʼá yâl bə̀ a kʼa byili ába kə́dò? Nà ámyɛ nʼá yâl á jǐrh ń kwã-lyì?”
28Bə tùrh mò bə wɔ̀: “Ǹmyɛ́ ǹ wɔ́ mɔ̀bɔ́ kwã-lò. Nə́myɛ̌ wɔ́ Muyiisi kwã-lyì. 29Nə́ yě bə̀ Yi zɔ̀m ǹdə́ Muyiisi, sə nə́ yə̀l mɔ̀bɔ́ gə́ shí mə̀gã̌ yé.”
30Bal mɔ́ wɔ̀ bɛ: “Wɔ́ rə̀myɛ́ rə̀ wɔ́ yò wə́. Á yə̀l ń gə́ shí mə̀gã̌ yé, n jà n púr àmyɛ́ yírhə́ né. 31Nə́ yě bə̀ Yi tʼâ zwẽ lyì-bəlwɛ̀lɛ́ lwə̂l yé. Sə lò mɔ̀bɔ́ ń nə́ ń nyàm Yi, ń nə́ ń wɛ̀rhɛ́ rə̀ pùbùlə̀, rə̀ nʼê zwẽ rə̀-ná-cí lwə̂l. 32Nə́ gwẽ̌ yə̀ nyɛ̀ɛ̀ gaga bə̀ lò púr lò mɔ̀bɔ́ bə̀ lùl lyìlyǒ yírhə́ yé. 33Mɔ̀bɔ́ gə yà ń yə̀ Yi sono shí, ń yà ń wàr kaka ń la wɔ̀rhɔ́ yé.”
34Bə wɔ̀ mɔ̀: “Ǹmyɛ́ bə̀ lùl yə̀-bəlwàálɛ wẽ́, ń zɛ̃̀ ǹ nə́ ǹ yâl ń cèrhè nə́myɛ̌ kàrmɔ̀?” Bə jì mù bə ce pwẽ̀ nè.
35Yezu nyɛ̀ɛ̀ bə̀ bə̀ jì bal mɔ́ bə ce pwẽ̀ nè. Ń gə́ tú n nə mɔ, n bwə̀rh mò n wɔ̀: “Ǹ nə zhí Numbyíní Byǐ ni?”
36N bwə̀rh Yezu n wɔ̀: “Mɔ̌ lò ǹdə́ ńmyɛ̌ mɔ́ Yó-cə́bal, sʼa zhí mu?”
37Yezu wɔ̀ mɔ̀: “Ǹ nə mɔ. Wɔ́ ńmyɛ̌ ń nə́ ń zɔ̀m ǹdə́ mɔ́ mɔ́.”
38Bal mɔ́ zɛ̃̀ n wɔ̀: “À zhí mú Cinu.” N zɛ̃̀ n wùlì Yezu yé né.
39Yezu zɛ̃̀ n wɔ̀: “À tú lũ w kɔ̀bɔ́ wẽ́ bùrsì kɔ́ yilə, mùnì lyìlyə̂r yírhə́ púr, sə byɛ̀bɛ́ bə̀ yírhə́ nɛ̃´ mɔ́ jǐrh lyìlyə̂r.”
40Farɛzhɛ̃ɛ̃bá byɛ̀bɛ́ bə̀ yʼà zhǐ ń yala nɛ mɔ́ gə́ nyɛ̀ɛ̀ rə̀myɛ́, bə zɛ̃̀ bə bwə̀rh mò bə wɔ̀: “Nə́myɛ wɔ́ lyìlyə̂r?”
41Yezu wɔ̀ bɛ: “Á gə yʼâ wɔ́ lyìlyə̂r, á gə bə dóó zhe yé, sə èlâsɛ̃´ á zɛ̃̀ á zhe bʼâ yírhə́ né nɛ̃´. Rə̀myɛ́ ce, á dwə́ə́ré gwẽ̌ zhǐ á yó wə.”
10Yezu wɔ́ vwã̌-ènɔ̀n nántwə̂
1Rə̀myɛ́ yó, Yezu wòwə̀: “Zhə̀n zhə̀nà, à nʼâ wə̀l ába: lò mɔ̀bɔ́ ń nə́ ń tó pyì-jil lé jàà dõ w ń zwì, ń tá ń tó rə̀ nyí rí, rə̀-ná-cí wɔ́ ŋwɔ̀l-bal, n jà ń wɔ́ vwârhna. 2Sə lò mɔ̀bɔ́ ń nə́ ń tó pyì-jil lé nyí rí ń mə́ ń zwì mú, wɔ́ ńmyɛ̌ ń wɔ́ pyììsí nə̀nɔ̀n mɔ́. 3Mɔ̀bɔ́ ń nə́ ń yìlì pyì-jil lé ne mó nə́ ń pul pyì-jil lé ń pɛ mɔ ń zwì. Pyììsí nʼê cili ń cəl lé. Ń nə́ ń byẽ̀ sè èdù gakó ǹdə́ è yil. Sə̀ nʼê tó mo sə̀ dwi. 4Ń gə zɔ sɛ ń duwə, ń nə́ ń yàl sə̀ yé né, sə zɛ̃̀ sə tó ń kùrə̀, bə̀ sə̀ yě ń cəl lé párá. 5Sə̀ tʼâ tó lò dõ kùr yé. Sə̀ nʼê dùr sə̀ zhə̀l kwã nɛ́ sə yẽ̌ mo, sə̀ gə́ yə̀l ń cəl lé pár mɔ́ yilə.”
6Yezu ju səswalá y èmyɛ́ n pə bɛ, sə bə̀ yə̀ lwar kɔn dɛ́ tɛ̀bɛ́ ń yà ń nə́ ń yâl n byili mú yé.
7N kə́ n wɔ̀ bɛ: “Zhə̀n zhə̀nà, à nʼâ wə̀l ába: àmyɛ́ à wɔ́ pyì-jil lé nyí rí. 8Byɛ̀bɛ́ bə̀ jɛ̀rɛ̀ nɛ̀ bə bə̀ mɔ́ gakó wɔ́ ŋwɔ̀là, bə̀ jʼà wɔ́ vwârhna, sə pyììsí yə̀ bə̀ cələ né cili yé. 9Àmyɛ́ à wɔ́ pyì-jil lé nyí rí. Mɔ̀bɔ́ ń tó nyí rí rə̀myɛ́ n zù, rə̀-ná-cí mà n nə ń cìnə̀. Ń mà ń nə́ ń zwì, n jà ń nə́ ń dwi ń nɛ kùjú ń jí. 10Ŋwɔ̀l-bal wɔ́ ŋwɔ̀lɛ̀ ǹdə́ gu ǹdə́ cɔ̌ dúdú yil ń nə́ ń twí, sə àmyɛ́ túwə́, mùnì numbyínə́ bé zə nyǔ mə bɔrh.
11“À wɔ́ vwã̌-ènɔ̀n nántwə̂. Vwã̌-ènɔ̀n nántwə̂ nə́ ń pɛ ń myə̂l ń pyììsí yilə. 12Sə lò mɔ̀bɔ́ ń də̀ vwã̌-ènɔ̀n, wɔ́ kwé bə̀ kwè mò bə̀ nʼê kwɛ̃̌. Pyììsí gə́ də̀ ńmyɛ̌ nyə̂rh mɔ́ ce, ń gə nɔ gɔ-kùlí è bànà, n dùr n yẽ̌ se, gɔ-kùlí y zù sə̀ wẽ́, e zə sə̀ jàlà, shɛ̀bɛ́ sə̀ dàl mɔ́ làà dwã nɛ. 13Wɔ́ pyììsí gə́ də̀ ńmyɛ̌ nyə̂rh mɔ́ yil ń nə́ ń dùr ń yẽ̌ se, ń tá ń gá sɛ yé.
14“Àmyɛ́ wɔ́ vwã̌-ènɔ̀n nántwə̂. À yě à pyììsí párá, à pyììsí myɛ yě à párá, 15ǹdə à Da gə́ yě à párá, àmyɛ jʼà yě à Da pár nɛ́. À nʼâ pɛ à myə̂l lé à pyììsí yilə. 16À zhe pyììsì dwã, sə̀ gwẽ̌ tɛ̀nɛ́ jil lé tɛ̀bɛ́ wẽ́ yé. Sə wɔ́ nyɔ́ɔ́ ǹdə́ nɛ bʼà zə sə̀myɛ a bà a ce né, sə cili à cəl lé; pyì-jil lé yə̀ rə̀dù sá, sə vwã̌-ènɔ̀n mɔ́ myɛ yə̀ mə̀dù sá.
17“À Da só ne, à gə́ nʼâ pɛ à myə̂l lé mùnì ga a kʼa nə rɛ́ mɔ́ yilə. 18È də̀ lò ń la à myə̂l lé vǔr yé. Wɔ́ àmyɛ́ cìcì à la rɛ pɔ. À wɔ̌ à pɛ rɛ, e jʼà wɔ̌ à kʼâ zwẽ de. Wɔ́ nyí rí rə̀myɛ́ à Da pɔ nɛ.”
19Zhwifubá gə́ nyɛ̀ɛ̀ zɔ̀mà nɛ́ nə̀myɛ́ mɔ́, nyə̀-pâr kʼe zɛ̃̀ bə̀ cəcəl wə, bə pɔr dwã nɛ. 20Bə̀ nánzhəzhɔ̌ yʼà nʼê wə̀lə̀: “Nə̀cílí námməlwɛ̀lɛ́ zhe mo. Ń wɔ́ nyə̀nyà. Byè yil á nʼá cili ń zɔ̀mà nɛ́ myɛ̌?”
21Bə̀ dwã zɛ̃̀ bə̀ zhe: “Zɔ̀mà nɛ́ nyɛ̀bɛ́ də̀ lò mɔ̀bɔ́ nə̀cílí námməlwɛ̀lɛ́ zhe mo zɔ̀mà yé. Nə̀cílí námməlwɛ̀lɛ́ wɔ̌ lyìlyə̂r yírhə́ è la púr?”
Zhwifubá yə̀ shɛ̀nɛ́ bə zwẽ nyí bə̀ Yezu wɔ́ Yi Byǐ yé
22Bə̀ yʼà nʼê jí Zhərəzalɛm Yi jì y bwəl lé cṹ mú yò lyǐrh címsi,10.22 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili címsi gakó gə́ nʼê jí ní gàà mɔ́. e jà è yʼà wɔ́ wàr yi. 23Sə rə̀myɛ́ yi ní, ǹdə́ Yezu yà ń nə́ ń jíl Saləmɔ zɔ́nɔ́ w wa, Yi jì y kɔ̀nɔ́ w wẽ́. 24Zhwifubá bə̀ bə kə́kɛ́lɛ́ mɔ, bə wɔ̀ mɔ̀: “Ǹ la yẽ̌ nə́ba nə́ rʼé ce tə́tɔ̀ná kɔn mʼe yí dǒ? È gə wɔ́ ǹmyɛ́ ǹ wɔ́ Kristə mó, sə́ byili nə́ba pamparɛ̃ɛ̃.”
25Yezu wɔ̀ bɛ: “À jɛ̀rɛ̀ a byili ri ába, sə á tʼá zwẽ nyí yé. Tumə né nyɛ̀bɛ́ gakó à nʼâ twĩ̀ à Da yil lé yil mó nʼê byili bə̀ tɛ̀bɛ́ à nʼâ byili mú wɔ́ zhə̀nà. 26Sə á gə́ də̀ àmyɛ́ pyììsí mú ce á tʼá zwẽ nyí yé. 27À pyììsí nʼê cili à cəl lé. À yě sə̀ párá, sə̀ nʼê tó ne, 28sə à nʼâ pɛ sɛ nyǔ mɔ̀bɔ́ mə̀ tʼâ la zhɔ̌. Sə̀ tʼâ la cú gaga yé, sə lò myɛ wàr sɛ̀ ń la vwârh à jɔ̃̀ w yé. 29Wɔ́ à Da ń pɔ sɛ nɛ, e jà à Da du kɔn gakó. Rə̀myɛ́ ce, lò wàr sɛ ń la vwârh à Da jɔ̃̀ w yé. 30Àmyɛ́ ǹdə́ à Da ga wɔ́ rə̀dù.”
31Rə̀myɛ́ yó, Zhwifubá kʼe pwà nə́kulə bə̀ la mʼe dul Yezu. 32N zɛ̃̀ n wɔ̀ bɛ: “À twĩ̀ tùm-ècɛ̀nà nánzhəzhɔ̌ á yírh wə, ǹdə́ à Da jàn. È nə zɛ̃̀ wɔ́ dɛ̌ yil á nʼá yâl á dul ne ǹdə́ nə́kulə á gu?”
33Bə wɔ̀ mɔ̀: “È də̀ tùm-ècɛ̀nà nɛ́ rə̀dù ga yil nə́ rʼé yâl nə́ dul mó nə́ gu yé. Wɔ́ ǹ gə́ nə́ ǹ tùrh Yi mú è ce, bə̀ ǹmyɛ́ ǹ wɔ́ numbyíní, ń jà ǹ nə́ ǹ zə ǹ cìn ǹ myɛrhɛ Yi.”
34Yezu wɔ̀ bɛ: “Bə̀ kɛ̃ á nyə́ né sɛ́bɛ́ rɛ́ wẽ́ bə̀ Yi wòwə̀: ‘Ámyɛ̌ mə̀dù gakó wɔ́ yi.’ 35E jà nyə́ né sɛ́bɛ́ rɛ́ də̀ yõ̌ kɔn yé. Sɛ́bɛ́ rɛ́ rə̀myɛ́ gə nʼê byẽ̀ byɛ̀bɛ́ bə̀ cili Yi zɔ̀mɛ̀ rɛ́ mɔ́ mə̀dù mə̀dù gakó bə̀ yi, 36á nə wɔ̌ á wə̀l bʼà nʼâ tùrh Yi, à gə́ wò bʼà wɔ́ Yi Byǐ mú yilə, e jà wɔ́ Yi rə̀ cír ne rə twĩ̀ lũ w wə?
37“À gə tʼâ twĩ̀ tumə né à Da pɔ nɛ nyí bʼà twĩ̌ mú, sʼá bə̀kʼá zwẽ à zɔ̀mà nɛ́ yé. 38Sə à gə nʼâ twĩ̀ tumə né nə̀myɛ́, bá á gə tʼá zwẽ à zɔ̀mà nɛ́ myɛ, sʼá zwẽ nyí tumə né nə̀myɛ́ mɔ́ yilə, sʼá lwar náàcɛ̀nɛ́ bʼà Da ŋwɛ́nɛ́ à wẽ́, àmyɛ jʼà ŋwɛ́nɛ́ à Da wẽ́.”
39Zhwifubá kʼe zɛ̃̀ bə̀ nʼê pyà ń zal, sə ń lú bə̀ jɔ̃̀ wà.
40Rə̀myɛ́ kwã nɛ́, n kə́ n zhǐr n vò Zhɔrdɛ̃ bwǐ y èpákɛ̀, Zhã gə́ yà ń nə́ ń pɛ nɛ̃̌-shɔ lyì bí ni mə̀gã̌ mɔ́, n mɛ̃ gàà. 41Lyì nánzhəzhɔ̌ yʼà nʼê twí ń sono, bə̀ nʼê wə̀lə̀: “Zhã yə̀ màmyɔ òdù ga wɛ̀rhɛ́ yé, sə kɔn dɛ̀bɛ́ gakó ń zɔ̀m bal mɔ́ mɔ̀bɔ́ shò-kwã nɛ́ mɔ́ wɔ́ zhə̀nà.” 42Sə lyì nánzhəzhɔ̌ zù mù gàà.
11Lazaarɛ yà ń cùwə̀, sə Yezu bwìrhì mù
1Bal mə̀dù yà ń ŋwɛ́nɛ́ Betəni ní, Marɛ ǹdə́ ń zhə̃̀-kɛ̃ Martɛ da-dǒ wə, ń yíl Lazaarɛ. Ń yà ń bə jàn zhe yé. 2Wɔ́ Marɛ mɔ́ ńmyɛ̌ ń yà ń ló nwə̃̌ y è lwẽ́ nã́nyə̀nyɛ̀lɛ́ y Cinu nèsé yó, n zɛ̃̀ n zə ń ywésé n pɔ́pɔ̌ sɛ mɔ́, wɔ́ ńmyɛ̌ nəbɔ́ ǹdə́ Lazaarɛ. 3Marɛ ǹdə́ ń zhə̃̀-kɛ̃ mɔ́ zɛ̃̀ bə twĩ̀ lò n vò n wɔ̀ Yezu ni: “Cinu, nyǐ mɔ̀bɔ́ ǹ só mó bə jàn zhe yé.”
4Yezu gə́ nyɛ̀ɛ̀ rə̀myɛ́, n zɛ̃̀ n wɔ̀: “Címí y kɛ̀bɛ́ də̀ Lazaarɛ cu címí yé. Wɔ́ mùnì ga Yi tó è dɛnnɛ rə byili rə̀ zùwə́ yə́, sə rə̀ Byǐ mú myɛ tó è dɛnnɛ n nə zùwə́.”
5Yezu yà ń só Martɛ ǹdə́ ń nyɛ̃´ mɔ́ ǹdə́ Lazaarɛ ga. 6Ń gə́ nyɛ̀ɛ̀ bə̀ Lazaarɛ bə jàn zhe, n cə̀ə̀lè n mɛ̃ ń gə́ yà ń ŋwɛ́nɛ́ mə̀gã̌ mɔ́ n wɛ̀rhɛ́ dwã nə̀lyè n súlí. 7Rə̀myɛ́ kwã nɛ́, n zɛ̃̀ n wɔ̀ ń kwã-lyì bí ni: “Bànà nə́ kʼé vò Zhide.”
8Bə wɔ̀ mɔ̀: “Yó-cə́bal, è də̀ ǹmyɛ́ Zhwifubá yʼà nʼê yâl bə dul ǹdə́ nə́kulə è dwã nɛ́ gwẽ̌ bə nyɛ mɔ́, ń zɛ̃̀ ǹ kə́ ǹ la gàà kə́dò?”
9N wɔ̀ bɛ: “Cə-lár è mʼê la yi-zùr də̀ lùr shí ǹdə́ rə̀lyè nà? Lò gə nə́ ń zhə̀l nə̀nyɔ́nɔ́ nɛ, ń tá ń mà ń nà yé, bə̀ ń nə lũ w kɔ̀bɔ́ pwẽ̀ dé. 10Sə lò gə nə́ ń zhə̀l cəcɛ̃ nɛ, ń ya n mà ń nà, ń gə́ bə pwẽ̀ dé nɛ mɔ́ yilə.”
11Ń gə́ zɔ̀m rə̀myɛ́ n zhɛ̀, n zɛ̃̀ n wɔ̀ bɛ: “Lazaarɛ dɛ̌, sə à mʼa vò a zhàrh mɔ̀.”
12Ń kwã-lyì bí zɛ̃̀ bə wɔ̀ mɔ̀: “Cinu, ń gə dɛ̌, sə́ nyǐ ń mà n nə ń cìnə̀.”
13Wɔ́ Lazaarɛ cu mú zɔ̀mà Yezu yà ń nə́ ń zɔ̀mà, sə bə̀myɛ́ yʼà nʼê bùl bə̀ wɔ́ jan dɛ́ páá mɔ́ zɔ̀mà ń yà ń nə́ ń zɔ̀mà. 14Rə̀myɛ́ yó, n zɛ̃̀ n wɔ̀ bɛ pamparɛ̃ɛ̃: “Lazaarɛ cùwə̀. 15Sə à gə́ yʼà tɛ̀nɛ́ gàà ń cu mú yi ní mú ce, à wu nyɛ̀ á yilə. Èta, á bʼâ zwẽ nyí. Bànà nə́ vò ń cùù w yó.”
16Tɔma mɔ̀bɔ́ bə̀ nʼê byẽ̀ bə̀ “Nə̀cílí” mú zɛ̃̀ n wɔ̀ ń tó-dwã bɛ́ nɛ: “Bànà nə́myɛ vò nə́ tó nə́ Yó-cə́bal mɔ́ nə́ cì.”
17Yezu gə́ yú gàà, n pwírí Lazaarɛ yà ń zhe dwã nə̀na lú-bɔ̀l mɔ́ wa. 18Betəni ǹdə́ Zhərəzalɛm yʼà yú ǹdə coló bə̀tɔ̀ ta. 19Rə̀myɛ́ ce, Zhwifubá nánzhəzhɔ̌ yʼà tú Martɛ ǹdə́ Marɛ sõ, mùnì bə zə bə̀ wun ni bə̀ nəbɔ́ mɔ́ cu mú yilə. 20Martɛ gə́ nyɛ̀ɛ̀ bə̀ Yezu bànà, n vò n jəl mo, ǹdə́ Marɛ yà ń jě kɛ̀lɛ́ wa. 21Martɛ wɔ̀ Yezu ni: “Cinu, ǹ gə yà ǹ ŋwɛ́nɛ́ nyɔ̀nɔ̀, à nəbɔ́ mɔ́ gə yə̀ cì yé. 22Sə ǹdə́ rə̀myɛ́ ga, à yě bə̀ kɔn dɛ̀bɛ́ gakó ǹ lwə̀l Yi ni, èlâsɛ̃´ gwẽ̌, rə̀ mʼa pɔ̃́ dɛ.”
23Yezu wɔ̀ mɔ̀: “Ǹ nəbɔ́ mɔ́ mà n bwìrhì.”
24Martɛ wɔ̀ mɔ̀: “À yě bə̀ ń mà n bwìrhì dɛ̃ rɛ́ nánkwɛɛ́ rɛ́ yùwə̀, dɛ̃ rɛ́ tɛ̀bɛ́ cùùrí la bùrhù mú.”
25Yezu wɔ̀ Martɛ nɛ: “Àmyɛ́ à wɔ́ bùrhù mú ǹdə́ nyǔ mú. Lò mɔ̀bɔ́ ǹ zù àmyɛ́, bá ǹ gə cù myɛ, ǹ bʼâ kʼá zə nyǔ. 26Lò mɔ̀bɔ́ gakó ń wɔ́ lyì-nyì, n jà n zù àmyɛ́, ń tá ń la cú gaga yé. Ǹ nə́ ǹ zwẽ rə̀myɛ́ nyí?”
27Martɛ wɔ̀ mɔ̀: “Ɔ̃̀ɔ̃̂, à nʼâ zwẽ nyí Cinu. À nʼâ zwẽ nyí bə̀ wɔ́ ǹmyɛ́ ǹ wɔ́ Kristə, Yi Byǐ mú bə̀ wò bə̀ ń bàn lũ w wẽ́ mó.”
28Martɛ gə́ zɔ̀m èta, n zhǐr n vò n byẽ̀ ń nyɛ̃´ Marɛ, n sɔ́sɔ́mɛ́ mɔ n wɔ̀: “Yó-cə́bal mɔ́ túwə́. Ń nə́ ń byẽ̀ mó.”
29Marɛ gə́ nyɛ̀ɛ̀ rə̀myɛ́, n já n zɛ̃̀ ń la Yezu sõ. 30Yezu yà ń gwẽ̌ yə̀ cɔ w wẽ́ yí yé. Ń yà ń gwẽ̌ ŋwɛ́nɛ́ Martɛ gə́ jəl mo mə̀gã̌ mɔ́. 31Zhwifubá byɛ̀bɛ́ bə̀ yʼà ŋwɛ́nɛ́ Marɛ nyí ni kɛ̀lɛ́ w bə̀ nʼê zal ń wu ni mú, gə́ nɔ mɔ ń zɛ̃̀ làlà n du pwẽ̀ nè, bə zɛ̃̀ bə tó mo. Bə̀ yʼà nʼê bùl bə̀ wɔ́ lú-bɔ̀l mɔ́ yó ń la nɛ́ n vò n kúrh.
32Marɛ gə́ yú Yezu gə́ yà ń ŋwɛ́nɛ́ mə̀gã̌ mɔ́, n nə mɔ, n tu ń nə̀dwə́nə́ yó, n wùlì ń yé né, n wɔ̀: “Cinu, ǹ gə yà ǹ ŋwɛ́nɛ́ nyɔ̀nɔ̀, à nəbɔ́ mɔ́ gə yə̀ cì yé.”
33Yezu gə́ nɔ mɔ ń nə́ ń kúrhə́, ǹdə́ Zhwifubá byɛ̀bɛ́ bə̀ tó mo bə bə̀ mɔ́ myɛ bə̀ nʼê kúrhə́, ń wu zhìlì dɛ̃´dɛ̃´, 34n zɛ̃̀ n bwə̀rh bè n wɔ̀: “Yẽ̀ á co mo né?”
Bə wɔ̀: “Cinu, bə̂ nyǐ ń bɔ̀l mɔ́.”
35Yezu kúrh. 36Zhwifubá zɛ̃̀ bə̀ zhe: “Nyǐ ń yà ń só mo tã̀!”
37Bə̀ jàlà yʼà zhe: “Ńmyɛ̌ ń púr lyìlyǒ yírhə́, ń yà ń wàr ń ce bal mɔ́ mɔ̀bɔ́ bə̀ká n cì nà?”
38Yezu wu kʼo kwɛrhɛ o zhìlì o súlí, n zhǐr n vò lú-bɔ̀l mɔ́ yó.11.38 Zhwifubá yʼà nʼê kwì bə̀ lú-bɔ̀là bɛ́ pyɔ̀ nə̀bán nɛ. Bə̀ yʼà tʼâ kwì bì bə̀ zul tɛ̃´ yé. Wɔ́ lɔ́rh bə̀ nʼê lɔ̀rh pyɔ̀ w ǹdə myèlé ta, bə zɛ̃̀ bə shar nə́kulu námpɔ́pɔ̌ bə mʼe pyi mə̀ nyí ni. È yʼà wɔ́ pyɔ̀ wẽ́ bɔ̀l mɔ́ ŋwɛ́nɛ́, bə pyi mə̀ nyí ni ǹdə́ nə́kulu. 39N wɔ̀: “Púrnə nə́kulu w á ce kwã nɛ́.”
Lazaarɛ nəkɔ́ Martɛ wɔ̀ Yezu ni: “Cinu, ń mà n zə lwẽ́, bə̀ zà wɔ́ ń dwã nə̀na.”
40Yezu wɔ̀ mɔ̀: “À yə̀ mɔ́ wə̀l bə̀ ǹ gə zwẽ nyí, ǹ yírhə́ bʼa nə Yi zùwə́ yə́?”
41Bə púr nə́kulu wə́. Yezu zɛ̃̀ n kwẽ̌ n nyǐ dɛ̃̌, n wɔ̀: “À Da, à nʼâ ce ǹ nə̀báná, ǹ gə́ zwẽ à lwə̂l mó yilə. 42À yě bə̀ ǹ nə́ ǹ zwẽ à lwə̂l twéé twéé, sə wɔ́ lyì-zhâ bɛ́ byɛ̀bɛ́ bə̀ zhǐ bə kə́kɛ́lɛ́ nɛ èta mɔ́ yil à nʼâ zɔ̀mà, mùnì bə zwẽ nyí bə̀ wɔ́ ǹmyɛ́ ǹ twĩ̀ nì.”
43Ń gə́ wò èta, n zɛ̃̀ n bya n wɔ̀: “Lazaarɛ, du pwẽ̀ nè.”
44Lazaarɛ shí lú-bɔ̀l mɔ́ w n du, ń nèsé ǹdə́ ń jɛ̀sɛ́ yʼà lyẽ ǹdə́ kàmə̀-jɛ̀rh, ń yé y myɛ yʼà lyẽ ǹdə́ kàmə̀-jɛ̃̀. Yezu zɛ̃̀ n wɔ̀ bɛ: “Lwə̂rnə mo, sʼá yẽ̌ mo n vò.”
Zhwifubá yó-cìnə́ bé yʼà nʼê yâl bə zə Yezu bə gu
45Zhwifubá byɛ̀bɛ́ bə̀ yʼà tú Marɛ co mó nánzhəzhɔ̌ gə́ nɔ kɔn dɛ́ tɛ̀bɛ́ Yezu wɛ̀rhɛ́ mɔ́, bə zù mù. 46Bə̀ jàlà zɛ̃̀ bə vò bə nə Farɛzhɛ̃ɛ̃bá, bə cĩ́ bi kɔn dɛ̀bɛ́ gakó ń wɛ̀rhɛ́.
47Yi jì y vwĩ̀-zwə́lnə bé yé né cìnə́ bé ǹdə́ Farɛzhɛ̃ɛ̃bá zɛ̃̀ bə byẽ̀ bùrsí gùlú w nánfɔ̀lɔ̀ w lyì bí dwã yó, bə wɔ̀: “Bal mɔ́ mɔ̀bɔ́ nə́ ń wɛ̀rhɛ́ màmyaarhɛ dɛ̃´dɛ̃´. Etər nə́ mʼâ wɛ̀rhɛ́ nɛ́? 48Nə́ gə yẽ̌ mo, lyì bí gakó mʼa zù mù, sə rə̀myɛ́ kwã nɛ́, Orɔm lyì bí yó-cìnə́ bé mʼa bə̀ bə cɔ̀ nə́ Yi jì y ǹdə́ nə́ dwí rí púlə́púlə́.”
49Lò mə̀dù yà ń ŋwɛ́nɛ́ bə̀ wẽ́, ń yíl Kəyifu, ńmyɛ̌ ń yà ń wɔ́ vwĩ̀-zwə́lnə bé yé né cìnə́ bé gakó náncɛ rə̀myɛ́ byin dí. Ń zɛ̃̀ n wɔ̀ bɛ: “Ámyɛ̌ yə̀l kaka wɛ̀. 50Á yə̀l bə̀ kɔn mə̂ sə lò mə̀dù cì lyì bí gakó yilə, mùnì ga nə́ dwí rí púlə́púlə́ bə̀kʼa cɔ̀?”
51Sə è də̀ ń sə̀pwà pùbùlə̀ ń yà ń mə́ ń zɔ̀m yé. È gə́ yʼà wɔ́ ńmyɛ̌ ń wɔ́ vwĩ̀-zwə́lnə bé yé né cìnə́ bé gakó náncɛ y byin dí rə̀myɛ́ wẽ́ mó, Yi zɛ̃̀ rə tó ń dɛnnɛ rə ce ń zɔ̀m Yezu yò, n wɔ̀ bə̀ Yezu mə̂ sə n cì bə̀ dwí rí púlə́púlə́ yilə. 52Sə è də̀ bə̀myɛ́ dúdú yil yé, ń mà n ce Yi byâ bɛ́ bə̀ ŋwɛ́nɛ́ cə-yala gakó mó bə̀ dwã yó bə jǐrh kɔn rə̀dù.
53Kɔn zhí dɛ̃ rɛ́ rə̀myɛ́, Zhwifubá yó-cìnə́ bɛ́ jʼa ji kùr bə̀ nʼê yâl bə gu Yezu. 54Wɔ́ rə̀myɛ́ yil ń yà ń kə́ ń tá ń zhə̀l Zhwifubá wẽ́ pamparɛ̃ɛ̃ yé. Ń zɛ̃̀ n vò cɔ òdù ò yʼà ŋwɛ́nɛ́ gɔ sono, ò yil Efrəyim. Ńmyɛ̌ ǹdə́ ń kwã-lyì bí mɛ̃ gàà.
55Zhwifubá címsí bə̀ nʼê byẽ̀ bə̀ Pakɛ y mɔ́ yʼà bwəlse. Lyì nánzhəzhɔ̌ zɛ̃̀ bə la Zhərəzalɛm bə vò bə kwɛrhɛ bə̀ yò ǹdə́ Yi éfòró címsí mʼe yí. 56Bə zɛ̃̀ bə̀ nʼê pyà Yezu ǹdə́ bə̀ ŋwɛ́nɛ́ Yi jì y kɔ̀nɔ́ w wa, bə̀ mʼê bwə̀rh dwã bə̀ zhe: “Bə̀kɔ́n á nʼá bùlə̀? Ń bàn címsí, ráá ń tá ń bàn sɛ̀?”
57Sə vwĩ̀-zwə́lnə bé yé né cìnə́ bé ǹdə́ Farɛzhɛ̃ɛ̃bá yʼà pɔ nyí, bə̀ lò mɔ̀bɔ́ ń gə yě Yezu gə́ wɔ mə̀gã̌, sə n ce bə lwar, mùnì ga bə zə mɔ.
12Marɛ ló nwə̃̌ è lwẽ́ nã́nyə̀nyɛ̀lɛ́ Yezu nèsé yó
1Pakɛ y gə́ tú e dâl dwã nyə̀ldù, Yezu zɛ̃̀ n vò Betəni, Lazaarɛ mɔ́ mɔ̀bɔ́ ń bwìrhì mú gə́ yà ń ŋwɛ́nɛ́ mə̀gã̌ mɔ́. 2Bə̀ yʼà tɛnɛ kùjú gàà bə pə Yezu ni. Lazaarɛ yà ń ŋwɛ́nɛ́ lyì bí byɛ̀bɛ́ bə̀ yʼà tó Yezu ni bə̀ nʼê jí kùjú w mú wẽ́, sə wɔ́ Martɛ ń yà ń nə́ ń pɛ bɛ w bə̀ jí.
3Marɛ zɛ̃̀ n kwè nwə̃̌ è lwẽ́ nã́nyə̀nyɛ̀lɛ́ n ló Yezu nèsé yó, n zə ń ywésé n mə n pɔ́pɔ̌ sɛ. Wɔ́ cǒ òdù bə̀ nʼê byẽ̀ bə̀ náárɛ bə̀ yʼà mʼe wɛ̀rhɛ́ ya. È yʼà yú bútóló gòmə́, è ye y yʼà cɛ̀ dɛ̃´dɛ̃´, sə è lwẽ́ dé yʼà jʼa sú jì y kókó. 4Yezu kwã-lò mó mɔ̀bɔ́ ń yà ń la mɔ myìnù bə̀ nʼê byẽ̀ bə̀ Zhidə Esəkarəyɔtɛ mɔ́, zɛ̃̀ n wɔ̀: 5“Bə̀ gə yʼà yè nwə̃̌ y kɛ̀bɛ́, è yʼà mʼa yí dwã zwã̌-àtɔ̀ tum wársɛ bə mʼe sɛ̃ nə̀mwà nɛ̀.”
6E jʼà də̀ nə̀mwà bɛ́ sónó yil ń zɔ̀m èta yé. Wɔ́ ń gə́ yà ń wɔ́ ŋwɔ̀l-bal, e jà wɔ́ ńmyɛ̌ sõ wársɛ́ lɔ̀bɔ̀ w yʼà ŋwɛ́nɛ́ mɔ́ è ce. Ń yà ń nə́ ń vùr wársɛ́ shɛ̀bɛ́ bə̀ yʼà nʼê pɛ mɔ ń ce ò wẽ́ mó.
7Yezu zɛ̃̀ n wɔ̀ mɔ̀: “Yẽ̌ kɛ̃ mɔ́ nɛ shɛ́ɛ́. Ń yà ń cĩ́ nwə̃̌ y kɛ̀bɛ́ dɛ̃ rɛ́ tɛ̀bɛ́ bə̀ la nɛ lú-bɔ̀l w co mó yilə. 8Nyǐnə nə̀mwà bʼa yə̀ nɛ́ ǹdʼába dɛ̃ gakó, sə á tʼá la àmyɛ́ nɔ dɛ̃ gakó yé.”
Yi jì y vwĩ̀-zwə́lnə bé yé né cìnə́ bé yʼà nʼê yâl bə gu Lazaarɛ
9Zhwifubá nánzhəzhɔ̌ gə́ nyɛ̀ɛ̀ bə̀ Yezu tú Betəni, bə zɛ̃̀ bə vò gàà, sə è də̀ Yezu dúdú yil bə̀ yʼà zhə̀l yé. Bə̀ yʼà nʼê yâl bə nə Lazaarɛ mɔ́ mɔ̀bɔ́ Yezu bwìrhì mú myɛ. 10Yi jì y vwĩ̀-zwə́lnə bé yé né cìnə́ bé zɛ̃̀ bə sə̀ ǹdə́ dwã bə̀ yʼà nʼê yâl bə gu Lazaarɛ myɛ, 11bə̀ wɔ́ ńmyɛ̌ yil Zhwifubá nánzhəzhɔ̌ nʼê yẽ̌ bə̀myɛ́ nɛ bə̀ zwì Yezu.
Lyì bí cèrhé Yezu Zhərəzalɛm sɔ́má y yó
(Məco 21.1-11; Markɛ 11.1-11; Lwiki 19.28-40)
12È zɛ̃̀ nəkɔkɔ́lɛ́ yá, lyì bí nánzhəzhɔ̌ w bə̀ yʼà tú Pakɛ y címsí Zhərəzalɛm nɛ́ mɔ́ nyɛ̀ɛ̀ bə̀ Yezu bàn gàà. 13Bə zɛ̃̀ bə kə́ kwã̌ vɔr bə du bə mʼe jəl mo. Bə̀ yʼà nʼê bya bə̀ zhe:
“Yi nə còrhó!
Cinu mà n cĩ́ bwəl mɔ̀bɔ́ ń bàn ń yil lé yil mó yó!
Esərayɛl pyɔ̌ mɔ́ nə còrhó!”
14Yezu nə bə̀nə-bwɛ̀lɛ́, n zɛ̃̀ n jòm è yó, ǹdə Yi zɔ̀mɛ̀ rɛ́ sɛ́bɛ́ rɛ́ gə́ byili ní. Bə̀ kɛ̃ rə̀ wẽ́ bə wɔ̀:
15“Səyɔ̃ lyì, á bə̀kʼá dùr ywẽ yé.12.15 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili Səyɔ̃ kùr gə́ nʼê yâl e wɔ̀ nɛ́ gàà mɔ́.
Nyǐnə á pyɔ̌ mɔ́, ń jě bə̀nə-bwɛ̀lɛ́ yó ń bànà.”
16Ń kwã-lyì bí yə̀ dámâ bə sú rə̀myɛ́ mɔ́ kùr yé, sə wɔ́ ń gə́ tú n zù ń zùwə́ y wẽ́ mó kwã nɛ́, bə zɛ̃̀ bə lwar bə̀ wɔ́ Yezu yò bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́, sə rə̀ tó kɔn dɛ́ tɛ̀bɛ́ bə̀ wɛ̀rhɛ́ Yezu ni mú dɛnnɛ rə pyìrh.
17Lyì bí byɛ̀bɛ́ gakó bə̀ yʼà tó Yezu ni bə̀ ŋwɛ́nɛ́ ń gə́ bwìrhì Lazaarɛ n du lú-bɔ̀l mɔ́ w yi ní mú, yʼà nʼê byili kɔn dɛ̀bɛ́ gakó bə̀ nɔwa. 18Wɔ́ lyì-zhâ bɛ́ gə́ yʼà nyɛ̀ɛ̀ bə̀ Yezu wɛ̀rhɛ́ màmyɔ w òmyɛ́ mɔ́ è ce bə zɛ̃̀ bə du bə jəl mo. 19Farɛzhɛ̃ɛ̃bá zɛ̃̀ bə̀ nʼê zɔ̀m ǹdə́ dwã bə̀ zhe: “Á nə lyì bí gakó bə̀ ŋwɛ́nɛ́ ń kwã! Á wàr kaka á la wɔ̀rhɔ́ yé.”
Yezu zɔ̀m ń cu mú yò
20Gərɛkɛbá jàlà yʼà ŋwɛ́nɛ́ lyì bí byɛ̀bɛ́ bə̀ yʼà zhə̀l Zhərəzalɛm címsí yi ní bə̀ la Yi còrhó mó wẽ́. 21Bə zɛ̃̀ bə yí Betəsəyiidi lyì bal Shilipu nyí ni, bə wɔ̀ mɔ̀: “Yó-cə́bal, nə́ rʼé yâl nə́ vò nə́ nə Yezu.” (Betəsəyiidi wɔ́ Gəlile tənà y cɔ.)
22Shilipu zɛ̃̀ n vò n byili Andərɛ nɛ. Bə̀myɛ́ bə̀lyè y ga zɛ̃̀ bə vò e byili Yezu ni.
23Yezu wɔ̀ bɛ: “Kɔn yú èlâsɛ̃´, Numbyíní Byǐ zùwə́ y mʼa du lyì yírhə́ wə. 24Zhə̀n zhə̀nà, à nʼâ wə̀l ába: bə̀ gə yə̀ jíjí byǐ tɛ̃´ ce e bwár, è tʼâ la byâ co yé, è bʼà zhǐ è dúdú. Sə bə̀ gə co y tɛ̃´ e bwár, è nʼê ce byâ nánzhəzhɔ̌. 25Lò mɔ̀bɔ́ ǹ só ǹ myə̂l lé, rə̀ mʼa sá. Sə lò mɔ̀bɔ́ ǹ tá ǹ gá ǹ myə̂l lé ne lũ w kɔ̀bɔ́ wa, ǹ mʼâ nə nyǔ mə̀ tʼâ la zhɔ̌. 26Lò mɔ̀bɔ́ ǹ nə́ ǹ yâl ń yə̀ à tùntùnnə̀, sə́ tó à kùrə̀. Ǹmyɛ mʼâ yə̀ à gə́ la mə̀gã̌ yál mɔ́. Lò mɔ̀bɔ́ ǹ wɔ́ à tùntùnnə̀, à Da mà n zhẽ̌ ǹ yó dɛ̃̌.”
27Yezu zɛ̃̀ n súlí n wɔ̀: “Wu-zhìlù nánfɔ̀lɔ̀ zhe ne èlâsɛ̃´. Sə à nə wál bə̀ byè? À wál à Da nɛ bə̀ ń zwẽ ne nɔ̀nɔ̀ w kɔ̀bɔ́ ò bàn nɛ zal èlâsɛ̃´ mɔ́ wẽ́? E jà wɔ́ nɔ̀nɔ̀ w òmyɛ́ yil à túwə́. 28À Da, ce ǹ yil lé nə còrhó.”
Rə̀myɛ́ yó, cəl shí dɛ̃̌ yi w rə wɔ̀: “À ce rə nə còrhó, sə à gwẽ̌ bʼa ce rə nə còrhó.”
29Lyì-zhâ bɛ́ bə̀ yʼà zhǐ gàà mɔ́ gə́ nyɛ̀ɛ̀ cəl lé, bə zɛ̃̀ bə̀ zhe bə̀ wɔ́ dwà è bya. Jàlà zhe bə̀ wɔ́ màlɛ́ka è zɔ̀m ǹdə́ mɔ.
30Yezu wɔ̀ bɛ: “È də̀ àmyɛ́ yil cəl lé tɛ̀bɛ́ zɔ̀m yé. Wɔ́ ámyɛ̌ yilə. 31Èlâsɛ̃´, lũ w kɔ̀bɔ́ bùrsí kɔ́ yúwə́. Kɔn yú èlâsɛ̃´ bə̀ bə̀ jǐ ò pyɔ̌ mɔ́ bə ce pwẽ̀ nè. 32Sə è gə wɔ́ àmyɛ́ yilə, bə̀ gə tú bə̀ zhẽ̌ ne dɛ̃̌ cɛ yó, à mʼa vwɛ̃ lyì bí gakó bə bə̀ à sono.” 33Yezu zɔ̀m èta, n mə n byili ń gə́ la nɛ cú.
34Lyì-zhâ bɛ́ zɛ̃̀ bə wɔ̀ mɔ̀: “Bə̀ byili nə́ba Yi nyə́ né sɛ́bɛ́ rɛ́ wẽ́ bə̀ Kristə mó bà n yə̀ nɛ́ twéé twéé, ń tá ń la cú yé. Byè yil ǹ nə zɛ̃̀ ǹ nə́ ǹ wə̀l bə̀ wɔ́ nyɔ́ɔ́ bə̀ bə̀ zhẽ̌ Numbyíní Byǐ dɛ̃̌? Numbyíní Byǐ mú ńmyɛ̌ mɔ́ wɔ́ mɔ̌?”
35Yezu wɔ̀ bɛ: “Pwẽ̀ dé mʼa yə̀ nɛ́ ǹdʼába dwã màngɛlɛ́ gwẽ̌. Sə zhəlnə ǹdə́ rə̀ gwẽ̌ ŋwɛ́nɛ́ ǹdʼába, mùnì ga cə-byín bə̀kʼa bʼe jàr ába yé. Lò mɔ̀bɔ́ ń nə́ ń zhə̀l cə-byín wẽ́, rə̀-ná-cí yə̀l ń gə́ la mə̀gã̌ yé. 36Shɛ̀nɛ́na á zwẽ pwẽ̀ dé ǹdə́ rə̀ gwẽ̌ ŋwɛ́nɛ́ ǹdʼába, mùnì ga á jǐrh rə̀ lyì.”
Yezu gə́ wò èta n zhɛ̀, n zhǐr n jé bə̀ yé né.
Zhwifubá nánzhəzhɔ̌ yə̀ shɛ̀nɛ́ bə zù Yezu yé
37Yezu yà ń wɛ̀rhɛ́ màmyaarhɛ nánzhəzhɔ̌ Zhwifubá yírh wə. Ǹdə́ rə̀myɛ́ ga, bə̀ yʼà bə shɛ̀ mɔ zú yé. 38Kɔn yàl èta, mùnì ga Yi nyì-zwennə Ezəyi zɔ̀mɛ̀ rɛ́ pyìrh. Ń wòwə̀:
“Cinu, mɔ̌ lò ń zwẽ nə́ zɔ̀mà nɛ́?
Mɔ̌ lò nè Cinu byili ń jɛ̃̀ jàn?”
39Ezəyi súlí n byili kɔn dɛ́ tɛ̀bɛ́ rə̀ ce bə̀ wàr bə̀ la nyí zõ mó. Ń wòwə̀:
40“Yi ce bə̀ yírhə́ né pyi, mùnì ga nə̀ bə̀kʼa nə nɛ́ yé;
rə ce bə̀ surhə né myɛ pyi, mùnì ga bə̀ bə̀kʼa nyɛ̀ɛ̀ nə̀ kùrə̀,
bə pyìrhí bə̀ wun, a wárh bɛ yé.”
41Wɔ́ Ezəyi gə́ nɔ Yezu zùwə́ y mó è ce n zɔ̀m ń yò èta. 42Ǹdə́ rə̀myɛ́ ga, Zhwifubá yó-cìnə́ bé nánzhəzhɔ̌ zù mù. Sə bə̀ yʼà nʼê bùl bə̀ Farɛzhɛ̃ɛ̃bá mʼa vùr bè dwã-gùúlí jìsí wẽ́. Rə̀myɛ́ ce bə̀ yʼà tʼâ yâl bə zɔ̀m bə ce dɛ̃̌ yé, 43bə̀ bə̀ yʼà só numbyínə́ bé còrhó w du Yi nyɔ̃̌ wá.
Lò ǹ gə tá ǹ zwẽ Yezu zɔ̀mà nɛ́, wɔ́ nə̀myɛ́ cìcì nə̀ bʼa kə́ ǹ bùrsì
44Yezu zɛ̃̀ n bya dɛ̃̌ dɛ̃̌ n wɔ̀: “Lò mɔ̀bɔ́ ǹ zù àmyɛ́, è də̀ àmyɛ́ dúdú ǹ zù yé. Wɔ́ àmyɛ́ ǹdə́ mɔ̀bɔ́ ń twĩ̀ nì mú ga ǹ zùwə̀. 45Lò mɔ̀bɔ́ ǹ nɔ àmyɛ́, ǹ nɔ mɔ̀bɔ́ ń twĩ̀ nì mú myɛ. 46À tú lũ w wẽ́, à la yə̀ ò pwẽ̀, mùnì ga lò mɔ̀bɔ́ ń zù àmyɛ́, sə rə̀-ná-cí bə̀ká n mɛ̃ cə-byín wẽ́ yé. 47Lò mɔ̀bɔ́ ǹ nyɛ̀ɛ̀ à zɔ̀mà nɛ́, ń zɛ̃̀ ǹ tá ǹ wɛ̀rhɛ́ ǹdə nə̀ gə́ nʼê byili ní, è də̀ àmyɛ́ à la ǹ bùrsì kɔ́ a pɔ̃́ còrhò-tum yé; bʼà yə̀ twí à la còrhò-tum lũ w ni pɔ yé. Wɔ́ ò vwârh yil à túwə́.
48“Lò mɔ̀bɔ́ ǹ bə shɛ̀ àmyɛ́ zú, ǹ tá ǹ zwẽ à zɔ̀mà nɛ́ myɛ, ǹ nə kɔn dɛ̀bɛ́ rə̀ la ǹ bùrsí kɔ́. Zɔ̀mà nɛ́ nyɛ̀bɛ́ à zɔ̀m mɔ́, wɔ́ nə̀myɛ́ nə̀ bʼa kə́ ǹ bùrsì dɛ̃ rɛ́ nánkwɛɛ́ rɛ́ yùwə̀. 49À yə̀ nɛ̀ zɔ̀m ǹdə́ à sə̀pwà jàn yé. Wɔ́ à Da mɔ́ ń twĩ̀ nì mú ń pɔ nɛ dɛ̀bɛ́ à mə̂ sʼa zɔ̀m a byili mú nyí. 50Sə à yě bə̀ kɔn dɛ̀bɛ́ ń nə́ ń pɛ rə̀ nyí mú nʼê pɛ nyǔ mə̀ tʼâ la zhɔ̌. Èta, kɔn dɛ̀bɛ́ à nʼâ byili mú, wɔ́ dɛ̀bɛ́ à Da pɔ nɛ rə̀ nyí mú.”
13Yezu sàm ń kwã-lyì bí nèsé
1Pakɛ y címsí gə́ tú e dâl nəkɔla, Yezu yà ń yě bə̀ ń gə́ la lũ w kɔ̀bɔ́ wẽ́ zhǐr n vò ń Da sõ mó yi yúwə́. Ń yà ń só ń kwã-lyì bí bə̀ ŋwɛ́nɛ́ lũ w wẽ́ mó. Ń swéné be ǹdə́ sónó kɔ̀bɔ́ ò bə dõ zhe.
2Də̀dɛ̀nɛ́ y yi gə́ tú e yí, ńmyɛ̌ ǹdə́ ń kwã-lyì bí zɛ̃̀ bə̀ jě tɛ̃´ bə̀ nʼê jí kùjú. Rə̀myɛ́ yi ní ǹdə́ Shətana zù Shəmɔ Esəkarəyɔtɛ byǐ Zhidə wẽ́, e swèlè mò ń la Yezu myìnù n pə bə za. 3Yezu yà ń yě bə̀ ń Da co kɔn gakó ń jɔ̃̀ wà; wɔ́ ńmyɛ̌ sono ń shí ní, wɔ́ ńmyɛ̌ sono ń ká ń la nɛ́. 4N zɛ̃̀ n zhì dɛ̃̌ n lwə̂r ń kàmə̀-zwǐ y n cĩ́ tɛ̃´, n kwè kàmə̀-jɛ̃̀ n lyẽ ń cã̌ nɛ́, 5n zɛ̃̀ n tɛ̃´ nɛ̃̌ n ló nə̀bwɛ́nɛ́ wẽ́, n ji kùr ń nə́ ń sàm ń kwã-lyì bí nèsé, ń nə́ ń pɔ́pɔ̌ sɛ ǹdə́ kàmə̀-jɛ̃̀ yá.
6N yí ń la Shəmɔ Pyɛɛrɛ nyɛ̌sɛ́ sám. Pyɛɛrɛ wɔ̀ mɔ̀: “Cinu, ǹmyɛ́ ǹ mʼâ sã̀ àmyɛ́ nə̀rh?”
7Yezu wɔ̀ mɔ̀: “Ǹ gwẽ̌ yə̀l kɔn dɛ̀bɛ́ à nʼâ wɛ̀rhɛ́ èlâsɛ̃´ mɔ́ kùr yé, sə dɛ̃ ŋwɛ́nɛ́ ǹ bʼâ lwar rə̀ kùrə̀.”
8Pyɛɛrɛ wɔ̀ mɔ̀: “Gaga! Ǹ tá ǹ la àmyɛ́ nə̀rh sám yé.”
Yezu wɔ̀ mɔ̀: “À gə yə̀ ǹ nèsé sàm, ǹ tá ǹ la kaka nɔ à sono yé.”
9Shəmɔ Pyɛɛrɛ wɔ̀ mɔ̀: “Cinu, è gə wɔ́ èta, sə ǹ bə̀ká sã̀ à nèsé dúdú yé. Sám à jɛ̀sɛ́ ǹdə́ à yó w ga ń súlí.”
10Yezu wɔ̀ mɔ̀: “Lò mɔ̀bɔ́ ń shɛ nɛ̃̌, ń jǐrh zwẽ́zwẽ́. Wɔ́ ń nə̀rh zhə́zhɔ́lɔ́ dúdú tum ń zhe. Á nyɛ̌ zwẽ́zwẽ́, sə è də̀ á gakó yé.”
11Yezu yà ń yě lò mó ná-yil ń la mɔ myìnù n pə bə za. Wɔ́ rə̀myɛ́ è ce n wɔ̀ bʼè də̀ bə̀ gakó bə̀ nyɛ̌ zwẽ́zwẽ́ yé.
12Ń gə́ sàm bə̀ nèsé n zhɛ̀, n ká n kwè ń kàmə̀-zwǐ y n zù, n jòm tɛ̃´, n zɛ̃̀ n wɔ̀ bɛ: “Á yě kɔn dɛ̀bɛ́ à wɛ̀rhɛ́ ába mɔ́ kùrə̀? 13Á nʼá byẽ̀ nè bə̀ Yó-cə́bal, á jʼâ nʼá byẽ̀ nè myɛ bə̀ Cinu, sə á nʼá zɔ̀m zhə̀nà. À wɔ́ èta zhə̀n ga. 14Àmyɛ́ gə wɔ́ Cinu, à wɔ́ Yó-cə́bal, a jʼa sã̀ á nèsé, ámyɛ mə̂ dwã sʼá sã̀ dwã nə̀rh. 15À wɛ̀rhɛ́ èta a mʼa byili ába, mùnì ga ámyɛ wɛ̀rhɛ́ ǹdə à gə́ wɛ̀rhɛ́ ába nɛ́. 16Zhə̀n zhə̀nà, à nʼâ wə̀l ába: tùntùnnə̀ bə ń yó-cə́bal du yé, tùntúm myɛ bə mɔ̀bɔ́ ń twĩ̀ mù mú du yé. 17Á gə́ yě kɔn dɛ̀bɛ́ à byili ába èlâsɛ̃´ mɔ́ ce, á gə wɛ̀rhɛ́ èta, á bʼâ yə̀ wu-nyɔ̃̀ cìnə́.
18“È də̀ á gakó yò à nʼâ zɔ̀m yé. À yě byɛ̀bɛ́ à cír mó párá. E jà kɔn wɔ́ nyɔ́ɔ́ bə̀ kɔn dɛ́ tɛ̀bɛ́ Yi zɔ̀mɛ̀ rɛ́ sɛ́bɛ́ rɛ́ byili mú pyǐrh. Bə̀ kɛ̃ rə̀ wẽ́ bə wɔ̀: ‘Lò mó mɔ̀bɔ́ àmyɛ́ ǹdə́ ńmyɛ̌ yʼà nʼé jí nə̀zhõ̌ òdù wẽ́ mó pyìrhí n zə nà n tə́ nɛ.’ 19À dámâ à nʼâ byili ri ába, ǹdə́ kɔn gwẽ̌ yə̀ yí yé, mùnì ga, rə̀ gə tú rə̀ yúwə́, sʼá zwẽ nyí bʼà wɔ́ mɔ̀bɔ́ à wɔ́ mɔ́. 20Zhə̀n zhə̀nà, à nʼâ wə̀l ába: lò ǹ gə zwẽ lò mɔ̀bɔ́ àmyɛ́ twĩ̀ mú zhəəle, wɔ́ àmyɛ́ zhəəle ǹ zwẽ. Sə lò mɔ̀bɔ́ ǹ gə zwẽ àmyɛ́ zhəəle, wɔ́ mɔ̀bɔ́ ń twĩ̀ nì mú zhəəle ǹ zwẽ.”
Yezu byili bə̀ ń kwã-lyì bí mə̀dù la mɔ myìnù
(Məco 26.20-25; Markɛ 14.17-21; Lwiki 22.21-23)
21Yezu gə́ zɔ̀m n zhɛ̀, wu-zhìlù nánfɔ̀lɔ̀ zə mɔ. N zɛ̃̀ n zɔ̀m pamparɛ̃ɛ̃ n wɔ̀: “Zhə̀n zhə̀nà, à nʼâ wə̀l ába: ámyɛ̌ mə̀dù la nɛ myìnù n pə bə za.”
22Ń kwã-lyì bí zɛ̃̀ bə̀ nʼê nyǐ dwã. Bə̀ yə̀l lò mɔ̀bɔ́ ná-dwí yil yò ń nə́ ń zɔ̀m yé. 23Mɔ̀bɔ́ ń yà ń só mó yà ń jě ń yala nɛ. 24Shəmɔ Pyɛɛrɛ zɛ̃̀ n gwàr mɔ̀, bə̀ ń bwə̂rh Yezu bə̀ wɔ́ mɔ̌ lò yò ń nə́ ń zɔ̀mà?
25Kwã-lò mó ńmyɛ̌ mɔ́ zɛ̃̀ n jìnì, n bwə̀rh Yezu n wɔ̀: “Cinu, wɔ́ mɔ̌ lò yò ǹ nə́ ǹ zɔ̀mà?”
26Yezu wɔ̀ mɔ̀: “À la búrú w fɔ́n a mɔ́rh nə̀zhĩ̌ y wə, sə lò mó mɔ̀bɔ́ à la mɔ w pɔ mɔ́, wɔ́ ńmyɛ̌ yò à nʼâ zɔ̀mà.”
Rə̀myɛ́ yó, n zɛ̃̀ n fɔ́n búrú w n mɔ́rh nə̀zhĩ̌ y wə, n pə Shəmɔ Esəkarəyɔtɛ byǐ Zhidə ne. 27Zhidə gə́ zwẽ búrú w n zhɛ̀, Shətana jʼa zù ń wẽ́ rə̀myɛ́ yi ní. Yezu zɛ̃̀ n wɔ̀ mɔ̀: “Wɛ̀rhɛ́ kɔn dɛ́ tɛ̀bɛ́ ǹ la wɔ̀rhɔ́ mɔ́ làlà.”
28Byɛ̀bɛ́ bə̀ yʼà tó bə̀ jě gàà bə̀ nʼê jí kùjú w mú mə̀dù ga yə̀ kɔn dɛ́ tɛ̀bɛ́ rə̀ ce n zɔ̀m ǹdə́ Zhidə èta mɔ́ kùr lwar yé. 29È gə́ wɔ́ Zhidə ń yà ń nə́ ń nyǐ bə̀ wársɛ́ yò mó ce, bə̀ jàlà yʼà nʼê bùl bə̀ Yezu wɔ́ yál ń nə́ ń yâl n wɔ̀ mɔ̀ bə̀ ń zhəl n yè kɔn dɛ̀bɛ́ bə̀ zhe rə̀ tum címsí yil mó, ráá ń nə́ ń yâl bə̀ ń vǔr kɔn n pə nə̀mwà nɛ̀. 30Zhidə gə́ zwẽ búrú w Yezu mɔ́rh nə̀zhĩ̌ y wẽ́ mó, n já n zɛ̃̀ n du, sə è yʼà wɔ́ cəcɛ̃.
Yezu pɔ ń kwã-lyì bí nyí bə̀ bə̀ swéné dwã
31Zhidə gə́ tú n shə́r, Yezu zɛ̃̀ n wɔ̀: “Èlâsɛ̃´, Numbyíní Byǐ zùwə́ y mʼa du, sə Yi myɛ zùwə́ y mʼa tó ń dɛnnɛ e du. 32Yi zùwə́ y gə tó ń dɛnnɛ e duwə, rə̀ mʼa ce ńmyɛ zùwə́ y du rə̀ cìcì wẽ́. Kɔn mʼa yə̀ námpɔ́lɛ́, rə̀ mʼa ce e du. 33À bə̀sɔ́ná, à gwẽ̌ bʼa yə̀ nɛ́ ǹdʼába námpɔ́lɛ́. Sə à nʼâ wə̀l ába èlâsɛ̃´, ǹdə à gə́ yʼà wò Zhwifubá yó-cìnə́ bé ne né: á bʼâ zɛ̃̀ á nʼá pyà nɛ̀, e jà á yír à gə́ la mə̀gã̌ mɔ́ yé.
34“À nʼâ pɛ ába nyí nándùl: swénénə dwã. Swénénə dwã ǹdə à gə́ só ába né. 35Á gə só dwã, lyì bí gakó mʼa lwar bə̀ wɔ́ àmyɛ́ kwã-lyì ǹdʼába.”
Yezu wò bə̀ Pyɛɛrɛ mà n wɔ̀ bə̀ ń yə̀l ń pár yé
(Məco 26.31-35; Markɛ 14.27-31; Lwiki 22.31-34)
36Shəmɔ Pyɛɛrɛ zɛ̃̀ n bwə̀rh mò n wɔ̀: “Cinu, yẽ̀ ǹ la nɛ́?”
Yezu wɔ̀ mɔ̀: “Ǹ wàr ǹ la nɛ tó ń vò à gə́ la mə̀gã̌ mɔ́ èlâsɛ̃´ yé, sə tà-kwã nɛ, ǹ bʼâ tó ne ń vò.”
37Pyɛɛrɛ wɔ̀ mɔ̀: “Cinu, byè yil à wàr à la mɔ́ tó èlâsɛ̃´? À bʼa shɛ̀nɛ́ à myə̂l lé jər ǹ yilə.”
38Yezu wɔ̀ mɔ̀: “Ǹ bʼâ shɛ̀nɛ́ ǹ myə̂l lé jər àmyɛ́ yil zhə̀nà? Zhə̀n zhə̀nà, à nʼâ wə̀l mó: cə́-bya bʼà la mʼe kúrh, ǹdə́ ǹ wò twər rə̀tɔ̀ bə̀ ǹ yə̀l à pár yé.”
14Lò lò wàr ń mà n vò Yi sõ, ǹdə́ ń gə yə̀ Yezu ni tó yé
1Rə̀myɛ́ yó, Yezu zɛ̃̀ n wɔ̀ ń kwã-lyì bí ni: “Á wun bə̀kʼa zhìlì yé. Zhínə Yi ni, sʼá zhí àmyɛ nɛ. 2Jààsɛ̀ nánzhəzhɔ̌ ŋwɛ́nɛ́ à Da sõ kɛ̀lɛ́ wa. Jààsɛ̀ gə yʼà tɛ̀nɛ́, à yʼà tʼâ la ába wál bʼà la vò a kwɛrhɛ jàà a cĩ́ ába yé. 3Sə à gə zhə̀l à kwɛrhɛ y à zhɛ̀, à mʼa kʼa bʼa zə ába a mʼa vò, mùnì ga ámyɛ yə̀ à gə́ la mə̀gã̌ yál mɔ́. 4Á yě à gə́ la mə̀gã̌ mɔ́ sɔ́má y shò.”
5Tɔma zɛ̃̀ n wɔ̀ mɔ̀: “Cinu, nə́ yə̀l ǹ gə́ la mə̀gã̌ yé. Etər nə́ mʼâ tó né nə́ lwar sɔ́má y shò?”
6Yezu wɔ̀ mɔ̀: “Àmyɛ́ à wɔ́ sɔ́má yá, a jʼà wɔ́ zhə̀nà, ǹdə́ nyǔ. Lò lò wàr ń mà n vò à Da sõ, ǹdə́ ń gə yə̀ àmyɛ́ nɛ tó yé. 7Á gə yě àmyɛ́ párá, á mʼâ lwar à Da myɛ párá. Sə kɔn zhí èlâsɛ̃´, á yě ń párá, bʼâ nɔ mɔ.”
8Shilipu zɛ̃̀ n wɔ̀ mɔ̀: “Cinu, byili nə́ba ǹ Da párá, bə̀ rə̀myɛ́ dúdú yú nə́ba.”
9Yezu wɔ̀ mɔ̀: “Shilipu, è də̀ zà ga à ŋwɛ́nɛ́ ǹdʼába yé, ń jà ǹ gwẽ̌ yə̀l à párá? Lò mɔ̀bɔ́ ń nɔ àmyɛ́, rə̀-ná-cí nɔ à Da. Byè yil ǹ nə nə́ ǹ wə̀l bʼà byili ába à Da párá? 10Ǹ tá ǹ zwẽ nyí bʼà ŋwɛ́nɛ́ à Da wẽ́, à Da myɛ ŋwɛ́nɛ́ àmyɛ wẽ́? Zɔ̀mà nɛ́ nyɛ̀bɛ́ à nʼâ zɔ̀m ǹdʼába mɔ́ də̀ àmyɛ́ sə̀pwà zɔ̀mà yé. Wɔ́ à Da mɔ́ ń ŋwɛ́nɛ́ à wẽ́ mó ń nə́ ń twĩ̀ ń tumə. 11À gə́ nʼâ wə̀l ába bʼà ŋwɛ́nɛ́ à Da wẽ́, à Da myɛ ŋwɛ́nɛ́ àmyɛ wẽ́ mó, á gə tʼá zwẽ rə̀myɛ́ nyí myɛ, sʼá zwẽ nyí tumə né nyɛ̀bɛ́ à nʼâ twĩ̀ mú yilə. 12Zhə̀n zhə̀nà, à nʼâ wə̀l ába: lò mɔ̀bɔ́ ǹ zhí àmyɛ́ nɛ, ǹ mʼâ twĩ̀ tumə né nyɛ̀bɛ́ à nʼâ twĩ̀ mú. À gə́ la à Da sõ mó ce, ǹ gaga mʼâ twĩ̀ tumə nánfwààlɛ̀ nə dwini nyɛ̀bɛ́. 13Sə kɔn dɛ̀bɛ́ gakó á gə lwə̀l àmyɛ́ yil yilə, à mʼa wɛ̀rhɛ́ rɛ, mùnì Byǐ mú ce ń Da zùwə́ y du. 14Á gə lwə̀l nè kɔn àmyɛ́ yil yilə, à mʼa wɛ̀rhɛ́ rɛ.
Yezu bwəl Eshirhə náàcɛ̀nɛ́ nyí ń kwã-lyì bí ni
15“Á gə só ne, á mʼâ zwẽ à nyə́ né á cĩ́ á wẽ́, 16sə à mʼa lwə̀l à Da nɛ, bə̀ ń pə ába sanna dõ n bə̀ n yə̀ nɛ́ ǹdʼába twéé twéé. 17Sanna mɔ́ ńmyɛ̌ mɔ́ wɔ́ zhə̀n-cí Eshirhə. Lũ w lyì bí bə mɔ nɛ yé, bə jʼà yə̀l ń pár yé. Rə̀myɛ́ ce, bə̀ wàr mɔ̀ bə̀ la zõ yé. Sə ámyɛ̌ yě ń párá, bə̀ ń ŋwɛ́nɛ́ ǹdʼába, ń jě á wẽ́.
18“À tʼâ la ába yõ̌ á dúdú ǹdə bə̀tâlsɛ nɛ yé. À mʼa kʼa bə̀ á sono. 19Kɔn mʼa yə̀ námpɔ́lɛ́, lũ w lyì bí kʼê tʼâ la nɛ nɔ yé. Sə ámyɛ̌ gwẽ̌ bʼâ nə nɛ, bʼà zhe nyǔ, rə̀myɛ́ ce, ámyɛ bʼâ zə nyǔ mə̀ tʼâ la zhɔ̌. 20Dɛ̃ rɛ́ rə̀myɛ́ gə yúwə́, á mʼâ lwar bʼà ŋwɛ́nɛ́ à Da wẽ́, ámyɛ ŋwɛ́nɛ́ àmyɛ́ wẽ́, sə àmyɛ ŋwɛ́nɛ́ á wẽ́.
21“Lò mɔ̀bɔ́ ǹ nə́ ǹ zwẽ à nyə́ né, ń jà ǹ nə́ ǹ wɛ̀rhɛ́ ǹdə nə̀ gə́ nʼê byili ní, wɔ́ ǹmyɛ́ ǹ só ne. Sə lò mɔ̀bɔ́ ǹ só ne, à Da mà n swéné mó, sə àmyɛ́ mʼa swéné mó, a ce ń lwar à párá.”
22Zhidə mó dõ mó zɛ̃̀ n bwə̀rh mò n wɔ̀: “Cinu, bə̀kɔ́n yil ǹ mʼâ ce nə́myɛ̌ lwar ǹ párá, lyì bí dwã bɛ́ jʼà tʼâ la ǹ pár lwar?” (Lwarna bə̀ nyǐ Zhidə mɔ́ mɔ̀bɔ́ də̀ Esəkarəyɔtɛ mɔ́ yé.)
23Yezu wɔ̀ mɔ̀: “Lò mɔ̀bɔ́ ǹ só ne, ǹ mʼâ zwẽ à zɔ̀mà nɛ́ ń cĩ́ ǹ wẽ́. Sə à Da mà n swéné mó. Rə̀myɛ́ ce, àmyɛ́ ǹdə́ à Da ga mʼa bə̀ ǹ sõ, nə́ mɛ̃ ǹdə́ mɔ́. 24Lò mɔ̀bɔ́ ǹ bə nɛ só, ǹ tá ǹ zwẽ à zɔ̀mà nɛ́ ǹ cĩ́ ǹ wẽ́ yé. Sə zɔ̀mà nɛ́ á nyɛ̀ɛ̀ à zɔ̀m mɔ́ də̀ à sə̀pwà zɔ̀mà yé. Wɔ́ à Da nyə̀ná, bə̀ wɔ́ ńmyɛ̌ ń twĩ̀ nì.
25“À byili ába zɔ̀mà nɛ́ nə̀myɛ́ ǹdə́ à gwẽ̌ ŋwɛ́nɛ́ ǹdʼába, 26sə à Da la sanna dõ tũ̌ n bə̀ á sono. Wɔ́ ńmyɛ̌ ń mà n cèrhè ába kɔn gakó, sə n lyǐrh ába kɔn dɛ̀bɛ́ gakó à yʼà byili ába mó. Sə sanna mɔ́ ńmyɛ̌ wɔ́ Eshirhə náàcɛ̀nɛ́ à Da la tũ̌ e bə̀ àmyɛ́ yil yilə.
27“À nʼâ yẽ̌ yə̀-zùlə́ ne à pɛ ába. Yə̀-zùlə́ né nə̀myɛ́ shí àmyɛ́ cìcì sõ. Nə̀ də̀ yə̀-zùlə́ né nyɛ̀bɛ́ lũ w lyì bí nʼê pɛ mɔ́ yé. Rə̀myɛ́ ce, á wun bə̀kʼa zhìlì, sə ywẽ bə̀kʼa zə ába yé. 28Á nyɛ̀ɛ̀ à gə́ wò ába bʼà la, sə à mʼa kʼa bə̀ á sono. Á gə yʼâ só ne, á wun yʼà mʼa yə̀ nyɛ̀n dɛ̃´dɛ̃´ á gə́ lwar bə̀ wɔ́ à Da sõ à la nɛ́ mɔ́ yilə, bʼà Da du ni. 29Sə à dámâ à nʼâ byili ába èlâsɛ̃´ ǹdə́ kɔn gwẽ̌ yə̀ yí yé, mùnì ga, rə̀ gə tú rə̀ yúwə́, sʼá zwẽ nyí. 30À kʼâ tʼâ la zɔ̌m ǹdʼába kɔn dɛnɛ yé, bə̀ lũ w kɔ̀bɔ́ yó-cə́bal mɔ́ bànà, sə ń wàr nɛ kaka ń la wɔ̀rhɔ́ yé. 31E jà kɔn wɔ́ nyɔ́ɔ́ bə̀ lũ w lyì bí lwar bʼà só à Da, sə à nʼâ wɛ̀rhɛ́ ǹdə ń gə́ pɔ nɛ nyí ní. Zɛ̃̀nà dɛ̃̌ nə́ lyɛ̃ nyɔ̀nɔ̀.”
15Yezu byili bə̀ ń wɔ́ sɛ̃´-cǒ nántwə̂
1Yezu súlí n wɔ̀: “Àmyɛ́ wɔ́ sɛ̃´-cǒ nántwə̂.15.1 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili sɛ̃´-cǒ gə́ wɔ́ nɛ́ pamparɛ̃ɛ̃ gàà mɔ́. Wɔ́ à Da ń wɔ́ ò cə́bal mɔ́. 2Cǒ w jɛ̃̀ kɛ̀bɛ́ è ŋwɛ́nɛ́ àmyɛ́ wẽ́ e jʼà tʼâ ce byâ, à Da mà n kà y n ji tɛ̃´. Sə kɛ̀bɛ́ è nʼê ce byâ, ń mà n gõ y e kʼa kwɛrhɛ e púrh e ce byâ nánzhəzhɔ̌. 3Kɔn wɔ́ èta ǹdʼámyɛ: zɔ̀mɛ̀ rɛ́ à byili ába mɔ́ pú e ce á jǐrh wárhgáá. 4Mɛ̃na à wẽ́, bʼàmyɛ bʼa mɛ̃ á wẽ́. Ǹdə cǒ jɛ̃̀ gə́ wàr è mʼa ce byâ è dúdú ǹdə́ è yə̀ cǒ w ná y nɛ zhí ní, èta, ámyɛ gə yə̀ àmyɛ nɛ zhí, á wàr byâ á la co yé.
5“Àmyɛ́ à wɔ́ sɛ̃´-cǒ w ná yá. Ámyɛ̌ wɔ́ ò jɛ̀sɛ́. Á wàr kaka á la wɔ̀rhɔ́ ǹdʼá yə̀ àmyɛ́ nɛ zhí yé. Sə lò mɔ̀bɔ́ ǹ ŋwɛ́nɛ́ ǹdə́ àmyɛ́, àmyɛ ŋwɛ́nɛ́ ǹdə́ mɔ́, ǹ mʼâ ce byâ nánzhəzhɔ̌. 6Lò mɔ̀bɔ́ ǹ tɛ̀nɛ́ ǹdə́ àmyɛ́, bə̀ mʼa vùr mó bə ce pwẽ̀ nè, ǹdə bə̀ gə́ yʼa kà cǒ jɛ̀rh bə ló tɛ̃´ sə kù, bə pwà sɛ̀ bə ló dwã yó bə ji myǐn ta. 7Á gə ŋwɛ́nɛ́ ǹdə́ nɛ, á nʼá zwẽ à zɔ̀mà nɛ́ á cĩ́ á wẽ́, kɔn dɛ̀bɛ́ á nʼá yàlá, sʼá lwə̀l lè, bʼâ mʼâ nə rɛ. 8Á gə nʼá ce byâ nánzhəzhɔ̌, á mʼâ yə̀ à kwã-lyì zhə̀n zhə̀nà. Èta, à Da mà n nə còrhó.
9“À só ába ǹdə à Da gə́ só ne né. Rə̀myɛ́ ce, mɛ̃na à sónó w wẽ́. 10Á gə nʼá zwẽ à nyə́ né, á bʼâ mɛ̃ à sónó w wẽ́, ǹdə àmyɛ gə́ nʼâ zwẽ à Da nyə́ né, à ŋwɛ́nɛ́ ń sónó w wẽ́ né. 11À zɔ̀m zɔ̀mà nɛ́ nyɛ̀bɛ́ ǹdʼába, mùnì á zə àmyɛ́ cìcì wu-nyɔ̃̀ w á wẽ́, sə á wu-nyɔ̃̀ w yə̀ námpúm.
12“Swénénə dwã ǹdə à gə́ só ába né. Wɔ́ rə̀myɛ́ rə̀ wɔ́ à nyí à nʼâ pɛ ába. 13Lò gə shɛ̀nɛ́ ń pɔ ń myə̂l ń dɔwabá yilə, sónó dõ tɛ̀nɛ́ ò du sónó w òmyɛ́ yé. 14Á gə nʼá wɛ̀rhɛ́ kɔn dɛ̀bɛ́ gakó à pɔ ába nyí bə̀ wɛ̀rhɛ́na mɔ́, á mʼâ yə̀ à dɔwabá.
15“À kʼâ tʼâ byẽ̀ ába bʼà tùntùnnə̀ yé, bə̀ tùntùnnə̀ yə̀l kɔn dɛ̀bɛ́ ná-yil ń yó-cə́bal mɔ́ nə́ ń wɛ̀rhɛ́ yé. Sə à nʼâ byẽ̀ ába bʼà dɔwabá, bʼà byili ába kɔn dɛ̀bɛ́ gakó à Da byili ni mú. 16È də̀ ámyɛ̌ á cír ne yé. Wɔ́ àmyɛ́ à cír ába a twĩ̀, mùnì á vò á ce byâ byɛ̀bɛ́ bə̀ tʼâ la cɔ̌ gaga. Èta, kɔn dɛ̀bɛ́ gakó á la à Da nɛ lwə̂l àmyɛ́ yil yil mó, ń mà n pə rɛ ába. 17Swénénə dwã. Wɔ́ rə̀myɛ́ rə̀ wɔ́ à nyí à nʼâ pɛ ába.
Yezu byili ń kwã-lyì bí ni bə̀ lũ w lyì bí bʼa jí zùùrì ǹdə́ bɛ
18“Lũ w lyì bí gə nʼê jí zùùrì ǹdʼába, sə lwarna bə̀ bə̀ jɛ̀rɛ̀ bə jí ri ǹdə́ àmyɛ́. 19Ámyɛ̌ ǹdə́ lũ w lyì bí gə yʼâ wɔ́ kɔn rə̀dù, bə̀ yʼà mʼa swéné ába. Sə à cír ába lũ w lyì bí wẽ́. Rə̀myɛ́ ce, ámyɛ̌ ǹdə́ bə̀myɛ́ də̀ kɔn rə̀dù yé. Wɔ́ rə̀myɛ́ yil bə̀ nʼê jí zùùrì ǹdʼába.
20“Lyǐrhnə kɔn dɛ̀bɛ́ à yʼà byili ába mó. À yʼà wò ába bə̀ lò mɔ̀bɔ́ bə̀ kwè ń nə́ ń twĩ̀ bə ń yó-cə́bal mɔ́ du yé. Lũ w lyì bí gə́ nwɛ̀nɛ̀ nɛ̀ mɔ́ ce, bə̀ mʼa nwɛ̀nɛ̀ ámyɛ. Bə̀ gə yʼà zwẽ à zɔ̀mà nɛ́, bə̀ yʼà mʼa zwẽ ámyɛ nyə̀ná nɛ́. 21Wɔ́ àmyɛ́ yil bə̀ mʼa nwɛ̀nɛ̀ ába, bə̀ bə̀ yə̀l mɔ̀bɔ́ ń twĩ̀ nì mú pár yé.
22“À gə yʼà yə̀ twí a byili bi à Da zɔ̀mɛ̀ rɛ́, bə̀ dwə́ə́ré yʼà də̀ yò yé. Sə à gə́ byili ri mú ce, bə̀ kʼê tʼâ la wál bə̀ bə̀ yʼà yə̀l yé. 23Lò mɔ̀bɔ́ ń nə́ ń jí zùùrì ǹdə́ àmyɛ́, rə̀-ná-cí nə́ ń jí zùùrì ǹdə́ à Da myɛ.
24“À gə yʼà yə̀ màmyaarhɛ tɛ̀bɛ́ lò dõ gwẽ̌ yə̀ wɛ̀rhɛ́ gaga mɔ́ wɛ̀rhɛ́ bə̀ cəcəl wə, bə̀ dwə́ə́ré yʼà də̀ yò yé. Sə bə̀ yírhə́ nɔ rɛ, e jà bə̀ nʼê jí zùùrì ǹdə́ àmyɛ́ ǹdə́ à Da. 25Rə̀myɛ́ gakó nʼê wɛ̀rhɛ́ mùnì ga zɔ̀mɛ̀ rɛ́ tɛ̀bɛ́ rə̀ wɔ bə̀ nyə́ né sɛ́bɛ́ rɛ́ wẽ́ mó pyìrh. Bə̀ kɛ̃ rə̀ wẽ́ bə wɔ̀: ‘Bə̀ nʼê jí zùùrì ǹdə́ nɛ nánfò.’
26“À mʼa twĩ̀ sanna n shí à Da sono n bà. Sanna mɔ́ ńmyɛ̌ wɔ́ zhə̀n-cí Eshirhə. Ń gə túwə́, ń mà n byili zhə̀n àmyɛ́ shò-kwã nɛ́. 27Sə ámyɛ̌ gə́ yàl nɛ́ ǹdə́ nɛ kùr-ju yi ní ga mɔ́, ámyɛ mʼâ byili zhə̀n à shò-kwã nɛ́.
161“À byili ába rə̀myɛ́ mùnì ga, rə̀ gə tú rə̀ yú ába, sʼá wun bə̀kʼa gə yé. 2Bə̀ mʼa vùr ába dwã-gùúlí jìsí w bə ce pwẽ̀ nè, e jà dɛ̃ ŋwɛ́nɛ́ rə̀ bànà bə̀ mʼa gu ába, sə bə̀ mʼa bù bə̀ kɔn dɛ́ tɛ̀bɛ́ bə̀ nʼê wɛ̀rhɛ́ mɔ́ wɔ́ Yi tum. 3Wɔ́ bə̀ gə́ yə̀l à Da párá, e jà bə̀ yə̀l àmyɛ pár mɔ́ è ce, bə̀ mʼa wɛ̀rhɛ́ ába èta. 4À byili ába rə̀myɛ́ mùnì ga, dɛ̃ rɛ́ gə tú rə̀ yúwə́, sʼá lyǐrh bʼà jɛ̀rɛ̀ a byili ába. Wɔ́ à gə́ yʼà gwẽ̌ ŋwɛ́nɛ́ ǹdʼába mɔ́ yilə, à yə̀ kùr ji a byili ába rə̀myɛ́ yé.
Yezu byili kɔn dɛ̀bɛ́ Eshirhə náàcɛ̀nɛ́ la wɔ̀rhɔ́
5“Èlâsɛ̃´ à mʼa zhǐr a vò mɔ̀bɔ́ ń twĩ̀ nì mú sono. E jà ámyɛ̌ mə̀dù ga tá ń bwə̀rh nè bə̀ wɔ́ yẽ̀ à la nɛ́ yé. 6À gə́ byili ába rə̀myɛ́ mɔ́ ce á wun zhìlì, 7e jà wɔ́ zhə̀n à nʼâ byili ába: wɔ́ ámyɛ̌ sãɔ̃ yil à nʼâ zhǐr à la. À gə yə̀ zhə̀l, mɔ̀bɔ́ ń la ába sãɔ̃ mɔ́ tá ń bàn yé. Sə à gə zhə̀lə̀, à mʼa twĩ̀ mù n bə̀ á sono.
8“Ń gə tú ń túwə́, ń mà n ce lũ w lyì bí lwar bə̀ bə̀ yə̀l yə̀-bəlɔ̀lɔ́ gə́ wɔ́ nɛ́, bə̀ yə̀l cángá gə́ wɔ́ nɛ́, bə̀ yə̀l bùrsì kɔ́ myɛ yé-shò yé. 9Ń mà n byili bi bə̀ wɔ́ bə̀ gə́ yə̀ nɛ zhí mú è ce, bə̀ yə̀l yə̀-bəlɔ̀lɔ́ gə́ wɔ́ nɛ́ yé. 10Ń mà n byili bi bə̀ wɔ́ à gə́ kʼâ la à Da sono, á kʼá tʼá la nɛ nɔ mɔ́ è ce, bə̀ yə̀l cángá gə́ wɔ́ nɛ́ yé. 11Ń mà n byili bi bə̀ wɔ́ lũ w kɔ̀bɔ́ pyɔ̌ mɔ́ bùrsí gə́ kɔ́ sə zhɛ̀ mɔ́ è ce, bə̀ yə̀l bùrsì kɔ́ yé-shò yé.
12“À zhe zɔ̀mà nánzhəzhɔ̌ gwẽ̌ à la ába byilu, sə á wàr nɛ̀ á la zõ èlâsɛ̃´ yé. 13Sə zhə̀n-cí Eshirhə gə tú è túwə́, è mʼa cĩ́ ába zhə̀n gakó sɔ́má yó. Sə è də̀ è sə̀pwà zɔ̀mà è la zɔ̌m yé. Wɔ́ kɔn dɛ́ tɛ̀bɛ́ gakó è nyɛ̀ɛ̀ mɔ́ è la zɔ̌m, e byili ába tɛ̀bɛ́ rə̀ bànà. 14È bʼa ce a nə còrhó, bə̀ wɔ́ kɔn dɛ̀bɛ́ gakó è nyɛ̀ɛ̀ à sõ mó è la ába byilu. 15Kɔn dɛ̀bɛ́ gakó rə̀ wɔ́ à Da kɔn, rə̀ wɔ́ àmyɛ nyân. Wɔ́ rə̀myɛ́ è ce, à wò bə̀ Eshirhə y wɔ́ dɛ̀bɛ́ è nyɛ̀ɛ̀ à sõ mó è la ába byilu.
Yezu byili ń kwã-lyì bí ni bə̀ bə̀ wu-zhìlù w mʼa jé, bə kʼa nə wu-nyɔ̃̀
16“Kɔn mʼa yə̀ námpɔ́lɛ́, á kʼá tʼá la nɛ nɔ yé, sə rə̀myɛ́ kwã nɛ́, kɔn gə yàl námpɔ́lɛ́, á mʼâ kʼá nə nɛ.”
17Ń kwã-lyì bí jàlà zɛ̃̀ bə̀ nʼê zɔ̀m ǹdə́ dwã bə̀ zhe: “Ń gə́ wò bə̀ kɔn mʼa yə̀ námpɔ́lɛ́, nə́ kʼé tʼá la mɔ nɔ, sə rə̀myɛ́ kwã nɛ́, kɔn gə yàl námpɔ́lɛ́, nə́ mʼâ kʼé nə mɔ mɔ́ kùr wɔ́ byè? Sə ń gə́ wò bə̀ ń la ń Da sõ mó, rə̀myɛ kùr wɔ́ byè? 18Ń zhe bə̀ kɔn mʼa yə̀ námpɔ́lɛ́, rə̀ kùr wɔ́ byè? Nə́ bə dɛ̀bɛ́ ń nə́ ń zɔ̀m mɔ́ kùr nyɛ̌ yé.”
19Yezu lwar bə̀ bə̀ yʼà nʼê yâl bə bwə̀rh mò, n zɛ̃̀ n wɔ̀ bɛ: “Wɔ́ à gə́ wò ába bə̀ kɔn mʼa yə̀ námpɔ́lɛ́, á kʼá tʼá la nɛ nɔ, sə rə̀myɛ́ kwã nɛ́, kɔn gə yàl námpɔ́lɛ́, á mʼâ kʼá nə nɛ mɔ́ yil á nʼá bwə̀rh dwã? 20Zhə̀n zhə̀nà, à nʼâ wə̀l ába: á mʼâ nʼá kúrhə́, á nʼá wɔ́wɛ́lɛ́, ǹdə́ lũ w lyì bí nʼê fùù. Wu-zhìlù mʼa zə ába, sə á wu-zhìlù w mʼa bə̀ o jǐrh wu-nyɔ̃̀. 21Kɛ̃ gə la lúl, wu-zhìlù zhe mo, bə̀ ń yě bə̀ ń nɔ̀nɔ̀ yi yúwə́. Sə ń gə lùl ń byǐ mú ń zhɛ̀, n swě ń nɔ̀nɔ̀ w yò. Wu-nyɔ̃̀ zɛ̃̀ ò zhe mo, è gə́ wɔ́ numbyíní è tú lũ w wẽ́ mó yilə. 22Ámyɛ wɔ́ èta. Wu-zhìlù zhe ába èlâsɛ̃´, sə à mʼa kʼa bə̀ a nə ába. Rə̀myɛ́ yó, á bʼâ zə wu-nyɔ̃̀ nánfɔ̀lɔ̀ kɔ̀bɔ́ lò lò wàr ń la vǔr.
23“Dɛ̃ rɛ́ rə̀myɛ́ gə tú rə̀ yúwə́, á kʼá tʼá la nɛ kaka kùr bwə̂rh yé. Zhə̀n zhə̀nà, à nʼâ wə̀l ába: kɔn dɛ̀bɛ́ gakó á gə lwə̀l à Da nɛ àmyɛ́ yil yilə, ń mà n pə rɛ ába. 24Sə kɔn mʼe yí zà, á gwẽ̌ yə̀ kaka lwə̀l àmyɛ́ yil yil yé. Lwə̂lnə, bʼâ mʼâ na. Èta, á wu-nyɔ̃̀ w mʼa yə̀ námpúm.
25“À byili ába rə̀myɛ́ gakó ǹdə́ səswalsɛ. Sə dɛ̃ ŋwɛ́nɛ́ rə̀ bànà, à mʼa zɔ̀m à Da yò ǹdʼába pamparɛ̃ɛ̃. È kʼê də̀ səswalsɛ à la mʼa zɔ̀m ǹdʼába yé. 26-27À tʼâ wə̀l ába bʼà mʼa lwə̀l kɔn à Da nɛ á yil yé, bʼà Da cìcì só ába. Rə̀myɛ́ ce, dɛ̃ rɛ́ rə̀myɛ́ gə tú rə̀ yúwə́, á cìcì wɔ̌ á mʼâ lwə̀l mò àmyɛ́ yil yilə, á gə́ só ne, á zwẽ nyí bə̀ wɔ́ ńmyɛ̌ sõ à shí ní mú yilə. 28À shí à Da sõ a bə̀ lũ w wə, sə èlâsɛ̃´, à mʼa yẽ̌ wə, a kʼa vò ń sõ.”
29Ń kwã-lyì bí zɛ̃̀ bə wɔ̀ mɔ̀: “Nyǐ mú ǹ nə́ ǹ zɔ̀m pamparɛ̃ɛ̃ èlâsɛ̃´. È kʼê də̀ səswalsɛ ǹ nə́ ǹ ji yé. 30Nə́ lwar èlâsɛ̃´ bə̀ ǹ yě kɔn gakó, ǹ kə́ ǹ tá ǹ dɛ̃̀ bə̀ bə̀ bwə̂rh mó sə́ zɛ̃̀ ń mə́ zɔ̀m yé. Wɔ́ rə̀myɛ́ è ce nə́ rʼé zwẽ nyí bə̀ wɔ́ Yi sõ ǹ shí ní.”
31Yezu zɛ̃̀ n wɔ̀ bɛ: “Á nʼá zwẽ nyí èlâsɛ̃´? 32Nyǐnə dɛ̃ ŋwɛ́nɛ́ rə̀ bànà, rə̀ gaga mɔ́ yúwə́, á mʼâ làà dwã nɛ, lò gakó vò ń dò-sõ, á yẽ̌ ne à dúdú. Sə à də̀ à dúdú yé, bʼà Da ŋwɛ́nɛ́ ǹdə́ nɛ.
33“À byili ába rə̀myɛ́ gakó mùnì á tó ne á zə yə̀-zùlə́. Á bʼâ nwɛ̀nɛ̀ lũ w wə, sə kámna á wun, bʼà jú bɛlɛ lũ w yó.”
17Yezu lwə̀l Yi ń kwã-lyì bí yilə
1Yezu gə́ zɔ̀m n zhɛ̀, n kwẽ̌ n nyǐ dɛ̃̌ n wɔ̀: “À Da, yi rí yúwə́. Ce ǹ Byǐ mú zùwə́ y du, mùnì ga ńmyɛ ce ǹ zùwə́ y du. 2Ǹ pɔ mɔ ŋwɔ̀nɔ́ numbyínə́ bé gakó yó wə, mùnì n pə nyǔ mə̀ tʼâ la zhɔ̌ byɛ̀bɛ́ ǹ pɔ mɔ mɔ́ nɛ. 3E jà nyǔ mú mə̀ tʼâ la zhɔ̌ mɔ́ wɔ́ bə lwar ǹ párá, bə lwar bə̀ wɔ́ ǹmyɛ́ dúdú ǹ wɔ́ Yi zhə̀n zhə̀nà, sə bə lwar àmyɛ́ Yezu Kristə mó ǹ twĩ̀ mú myɛ párá. 4À twĩ̀ tumə né nyɛ̀bɛ́ ǹ pɔ nɛ nyí bʼà twĩ̌ mú gakó a báásɛ, a mʼa ce ǹ zùwə́ y du cɛ yó. 5À Da, èlâsɛ̃´, zùwə́ y kɛ̀bɛ́ à yʼà zhe ǹ sõ ǹdə́ lũ yʼà gwẽ̌ yə̀ kùr ji mú, ce a kʼa nə y ǹ sõ.
6“À ce byɛ̀bɛ́ ǹ vùr lũ w wẽ́ ń pɛ̃ mɔ́ lwar ǹ párá. Ǹmyɛ́ lyì ǹdə́ bɛ. Ǹmyɛ́ ǹ pɔ bɛ nɛ, sə bə̀ zwẽ ǹ zɔ̀mɛ̀ rɛ́. 7Èlâsɛ̃´, bə̀ yě bə̀ kɔn dɛ̀bɛ́ gakó ǹ pɔ nɛ mɔ́ shí ǹmyɛ́ cìcì sono. 8À byili bi zɔ̀mà nɛ́ nyɛ̀bɛ́ ǹ byili ni mú, sə bə̀ zwẽ ne. Bə̀ lwar bə̀ zhə̀n ga, wɔ́ ǹmyɛ́ sono à shí ní. Bə zɛ̃̀ bə zwẽ nyí bə̀ wɔ́ ǹmyɛ́ ǹ twĩ̀ nì.
9“À nʼâ lwə̀l mó bə̀myɛ́ yilə; è də̀ lũ w lyì bí yil yé. Sə wɔ́ byɛ̀bɛ́ ǹ pɔ nɛ mɔ́ yil à nʼâ lwə̀l mó. Wɔ́ ǹmyɛ́ lyì ǹdə́ bɛ. 10Kɔn dɛ̀bɛ́ gakó rə̀ wɔ́ àmyɛ́ nyân, rə̀ wɔ́ ǹmyɛ nyân. Kɔn dɛ̀bɛ́ gakó rə̀ wɔ́ ǹmyɛ́ nyân, rə̀ wɔ́ àmyɛ nyân. Sə àmyɛ́ zùwə́ y tó bə̀ dɛnnɛ e du. 11Àmyɛ́ kʼâ tʼâ la lũ w wẽ́ yál yé, sə bə̀myɛ́ ŋwɛ́nɛ́ ò wẽ́. Àmyɛ́ bàn ǹ sono. Da nántwə̂, yìlì bì ǹdə́ ǹ yil lé ǹ pɔ nɛ mɔ́ jàn, mùnì ga bə yə̀ kɔn rə̀dù ǹdə nə́myɛ̌ ta. 12À gə́ yʼà gwẽ̌ ŋwɛ́nɛ́ ǹdə́ bɛ yi ní, à yʼà nʼâ yìlì bì náàcɛ̀nɛ́ ǹdə́ ǹ yil lé ǹ pɔ nɛ mɔ́ jàn. Bə̀myɛ́ mə̀dù ga yə̀ jé yé, è gə də̀ mɔ̀bɔ́ ń yà ń mə̂ sə n jé mó. Kɔn yàl èta, mùnì kɔn dɛ́ tɛ̀bɛ́ ǹ zɔ̀mɛ̀ rɛ́ sɛ́bɛ́ rɛ́ byili mú pyìrh.
13“Sə èlâsɛ̃´, à bàn ǹ sono. Sə à nʼâ zɔ̀m rə̀myɛ́ ǹdə́ à gwẽ̌ ŋwɛ́nɛ́ lũ w wə, mùnì à wu-nyɔ̃̀ w yə̀ bə̀ wẽ́ námpúm. 14À byili bi ǹ zɔ̀mɛ̀ rɛ́, sə lũ w lyì bí nʼê jí zùùrì ǹdə́ bɛ, bə̀ bə̀ də̀ lũ w lyì yé, ǹdə àmyɛ́ gə́ də̀ ò lò né. 15À tʼâ lwə̀l mó bə̀ ǹ vǔr be lũ w wẽ́ yé, sə à nʼâ lwə̀l mó bə̀ ǹ yìlì bì, mùnì lwɛlɛ cə́bal mɔ́ bə̀ká n wɛ̀rhɛ́ bɛ kaka yé. 16Bə̀ də̀ lũ w lyì ǹdə àmyɛ gə́ də̀ ò lò né. 17Ce bə̀ námpúm yə̀ ǹmyɛ́ lyì ǹdə́ ǹ zɔ̀mɛ̀ rɛ́ jàn, bə̀ ǹ zɔ̀mɛ̀ rɛ́ wɔ́ zhə̀nà. 18À twĩ̀ bì lũ w wẽ́ ǹdə ǹ gə́ twĩ̀ nì ò wẽ́ né. 19Wɔ́ bə̀myɛ́ yil à kwè à cìn námpúm à nʼâ pɛ mɔ́, mùnì bə̀myɛ yə̀ ǹmyɛ́ lyì námpúm zhə̀n zhə̀nà.
20“Sə è də̀ bə̀myɛ́ dúdú yil à nʼâ lwə̀l mó yé. Wɔ́ ǹdə́ lũ w lyì bí byɛ̀bɛ́ gakó bə̀ mʼa tó bə̀myɛ́ zɔ̀mà nɛ́ dɛnnɛ bə zù nì mú ga yilə. 21À nʼâ lwə̀l mó bə̀ ǹ ce bə̀ gakó yə̀ kɔn rə̀dù, ǹdə ǹmyɛ́ à Da gə́ ŋwɛ́nɛ́ à wẽ́, àmyɛ ŋwɛ́nɛ́ ǹ wẽ́ né, sə bə̀myɛ yə̀ kɔn rə̀dù nə́ wẽ́, mùnì ga lũ w lyì bí zwẽ nyí bə̀ wɔ́ ǹmyɛ́ ǹ twĩ̀ nì. 22À zhẽ̌ bə̀ yó dɛ̃̌ ǹdə ǹ gə́ zhẽ̌ à yó dɛ̃̌ nɛ́, mùnì bə yə̀ kɔn rə̀dù ǹdə àmyɛ́ ǹdə́ ǹmyɛ́ gə́ wɔ́ kɔn rə̀dù ní, 23a yə̀ bə̀ wẽ́ ǹdə ǹmyɛ́ gə́ ŋwɛ́nɛ́ à wẽ́ né, mùnì bə yə̀ kɔn rə̀dù námpúm, sə lũ w lyì bí lwar bə̀ wɔ́ ǹmyɛ́ ǹ twĩ̀ nì, sə bə lwar myɛ bə̀ ǹ só be ǹdə ǹ gə́ só àmyɛ́ nɛ́.
24“À Da, wɔ́ ǹmyɛ́ ǹ pɔ bɛ nɛ. Rə̀myɛ́ ce, à nʼâ yâl bə̀ bə̀myɛ yál à gə́ la mə̀gã̌ yál mɔ́, mùnì bə nə zùwə́ y kɛ̀bɛ́ ǹ pɔ nɛ mɔ́ ǹdə́ bə̀ yírhə́, bə̀ ǹ swéné ne ǹdə́ lũ w gwẽ̌ yə̀ kùr ji yé.
25“À Da, ǹ wɔ́ wu-cángá cə́bal. Lũ w lyì bí yə̀l ǹ pár yé, sə àmyɛ́ yě ǹ párá, sə byɛ̀bɛ́ ǹ pɔ nɛ mɔ́ yě bə̀ wɔ́ ǹmyɛ́ ǹ twĩ̀ nì. 26À ce bə lwar ǹ párá, sə à gwẽ̌ bʼa ce bə lwar ǹ pár bə súlí, mùnì ga sónó w kɔ̀bɔ́ ǹ mə́ ǹ só ne mó yə̀ bə̀myɛ wẽ́, sə àmyɛ yə̀ bə̀ wẽ́.”
18Bə̀ zɔ Yezu
(Məco 26.47-56; Markɛ 14.43-50; Lwiki 22.47-53)
1Yezu gə́ zɔ̀m n zhɛ̀, ńmyɛ̌ ǹdə́ ń kwã-lyì bí zhǐr bə vò Sədərɔ̃ bwǐ y èpákɛ̀, bə zù bɔ́ɔ́ òdù wẽ́ gàà. 2E jà Zhidə mó mɔ̀bɔ́ ń la mɔ myìnù mú yà ń yě gàà mɔ́ shò, bə̀ Yezu yà ń nə́ ń zə bɛ ń zhə̀l gàà. 3Zhidə zɛ̃̀ n zə shə̀dɛ́ɛ́sɛ ǹdə́ Yi jì y yìlnə̀ bé byɛ̀bɛ́ vwĩ̀-zwə́lnə bé yé né cìnə́ bé ǹdə́ Farɛzhɛ̃ɛ̃bá yʼà twĩ̀ mú n mə n vò gàà. Bə̀ yʼà zɔ pàntámsɛ ǹdə́ myìn-pyùùlì ǹdə́ búlə́ wẽ̀ bə mʼe vò.
4Yezu yà ń yě kɔn dɛ̀bɛ́ gakó rə̀ bàn mɔ̀ zal mɔ́. N zɛ̃̀ n jəl be, n bwə̀rh bè n wɔ̀: “Mɔ̌ lò á nʼá pyà?”
5Bə wɔ̀ mɔ̀: “Nazarɛtɛ lyì bal Yezu nə́ rʼé pyà.”
Yezu zɛ̃̀ n wɔ̀ bɛ: “Nyǐnə ne. Wɔ́ àmyɛ́.”
Zhidə yà ń tó be ń zhǐ gàà. 6Sə Yezu gə́ wò bè bə̀ wɔ́ ńmyɛ̌, rə̀myɛ́ yi ní, bə̀ gakó twə̀r ǹdə́ bə̀ kwərh bə ló tɛ̃´.
7N kə́ n bwə̀rh bè n wɔ̀: “Mɔ̌ lò á nʼá pyà?”
Bə kʼe wɔ̀: “Nazarɛtɛ lyì bal Yezu nə́ rʼé pyà.”
8N wɔ̀ bɛ: “À wò ába bə̀ wɔ́ àmyɛ́. Sə è gə wɔ́ àmyɛ́ á nʼá pyà, nyǐnə ne, sʼá yẽ̌ byɛ̀bɛ́ bə̀ dàl mɔ́ nɛ.”
9Ń wò èta, mùnì zɔ̀mɛ̀ rɛ́ ń yà ń zɔ̀m mɔ́ pyìrh. Ń yà ń wòwə̀: “À Da, à yə̀ byɛ̀bɛ́ ǹ pɔ nɛ mɔ́ mə̀dù ga nɛ yẽ̌ n jé yé.”
10Shəmɔ Pyɛɛrɛ yà ń zhe shù. N fwə̂rh wə, n za Yi jì y vwĩ̀-zwə́lnə bé yé né cìnə́ bé gakó náncɛ y kɛ̀lɛ́ tùntùnnə̀ mə̀dù jə̀jĩ́ zhɛ̃̌ n pyir. Tùntùnnə̀ mó ńmyɛ̌ mɔ́ yà ń yíl Mələkuusi. 11Yezu zɛ̃̀ n wɔ̀ Pyɛɛrɛ nɛ: “Ká ce ǹ shù w ò pyá y wa! Ǹ nə́ ǹ bùl bʼà tʼâ la zə nɔ̀nɔ̀ kâ-zɔ̌m à Da pɔ nɛ mɔ́ a mʼa nyɔ̀?”
Bə̀ zə Yezu bə mʼe vò Annɛ sono
12Rə̀myɛ́ yi ní, shə̀dɛ́ɛ́sɛ́ ǹdə́ sə̀ yó-cə́bal mɔ́, ǹdə́ Zhwifubá Yi jì y yìlnə̀ bé zə Yezu bə lyẽ, 13bə jɛ̀rɛ̀ bə zə mɔ bə vò Annɛ sono. Annɛ yà ń wɔ́ Kəyifu cə́m-bal. Wɔ́ Kəyifu ń yà ń wɔ́ vwĩ̀-zwə́lnə bé yé né cìnə́ bé gakó náncɛ byin dí rə̀myɛ́ wẽ́. 14Wɔ́ ńmyɛ̌ ń yà ń cící Zhwifubá yó-cìnə́ bé, n wɔ̀ bə̀ lò mə̀dù gə cù dwí rí púlə́púlə́ yil cɔ̃̀.
Pyɛɛrɛ wò bə̀ ń də̀ Yezu kwã-lò yé
(Məco 26.69-70; Markɛ 14.66-68; Lwiki 22.55-57)
15E jà Shəmɔ Pyɛɛrɛ ǹdə́ Yezu kwã-lò dõ yʼà tó mo. Sə Yi jì y vwĩ̀-zwə́lnə bé yé né cìnə́ bé gakó náncɛ y yà ń yě Yezu kwã-lò mó ńmyɛ̌ mɔ́ párá. Bə pɔ̃ sɔ́má n tó Yezu ni n zù kɛ̀lɛ́ wa. 16Shəmɔ Pyɛɛrɛ zɛ̃̀ ń zhǐ pwẽ̀ nè bwə̀rə̀ y nyí ni. Yezu kwã-lò mó ńmyɛ̌ mɔ́ ká n du n wɔ̀ kɛ̃-byǐ y è yʼà nʼê yìlì bwə̀rə̀ y ne mó ne, bʼè ce Pyɛɛrɛ zù kɛ̀lɛ́ wa.
17Kɛ̃-byǐ y zɛ̃̀ e bwə̀rh Pyɛɛrɛ, e wɔ̀: “Ǹmyɛ də̀ bal mɔ́ kwã-lò?”
Pyɛɛrɛ wɔ̀: “Ɔ̃́ʼɔ̃, à də̀ ń kwã-lò yé.”
18Wàr yʼà ŋwɛ́nɛ́. Rə̀myɛ́ ce, kɛ̀lɛ́ y tùntùnnə̀ bé ǹdə́ Yi jì y yìlnə̀ bé yʼà jéé myǐn tɛ̃´ bə̀ nʼê ywə̀lə̀. Pyɛɛrɛ myɛ zɛ̃̀ n tó be ń nə́ ń ywə̀l myǐn mú.
Annɛ bwə̀rh zɔ̀mà Yezu ni
(Məco 26.59-66; Markɛ 14.55-64; Lwiki 22.66-71)
19Yi jì y vwĩ̀-zwə́lnə bé yé né cìnə́ bé gakó náncɛ y yà ń nə́ ń bwə̀rh Yezu ń kwã-lyì bí ǹdə́ kɔn dɛ̀bɛ́ ń yà ń nə́ ń cèrhè lyì bí ni mú shò-kwã nɛ́.
20Yezu wɔ̀ mɔ̀: “À zhì lyì bí gakó yé né a zɔ̀m ǹdə́ bɛ. À cèrhè kàrmɔ̀ lyì bí ni dɛ̃ gakó dwã-gùúlí jìsí wẽ́, ǹdə́ Yi jì y kɔ̀nɔ́ w wa, lyì bí gakó gə́ nʼê gùlí dwã mə̀gã̌. À yə̀ shèè a zɔ̀m kaka yé. 21Byè yil ǹ nə́ ǹ bwə̀rh nè? Bwə̂rh byɛ̀bɛ́ bə̀ cili à zɔ̀mà nɛ́ mɔ́. Bə̀ yě kɔn ná-dwí yil à yʼà nʼâ zɔ̀m ǹdə́ bɛ.”
22Ń gə́ wò èta, ǹdə́ Yi jì y yìlnə̀ mə̀dù yà ń zhǐ gàà, n mà mɔ̀ jə̀-sâ, n wɔ̀: “Vwĩ̀-zwə́lnə bé yé né cìnə́ bé gakó náncɛ y ǹ nə́ ǹ lyár èta?”
23Yezu wɔ̀ mɔ̀: “À gə zɔ̀m à dó, sə́ byili à dóó wə́. À gə kʼâ yə̀ zɔ̀m a dó, wɔ́ byè yil ǹ nə mà nɛ̀?”
24Annɛ ce bə zə Yezu ǹdə́ nyínsí gwẽ̌ lyẽ mo bə mʼe vò Kəyifu sono.
Pyɛɛrɛ kə́ n wɔ̀ bə̀ ń yə̀l Yezu pár yé
(Məco 26.71-75; Markɛ 14.69-72; Lwiki 22.58-62)
25Bə̀ gə́ yʼà nʼê bwə̀rh Yezu yi ní, ǹdə́ Shəmɔ Pyɛɛrɛ yà ń jě myǐn mú nyí ni ń nə́ ń ywə̀lə̀. Lyì jàlà zɛ̃̀ bə bwə̀rh mò bə wɔ̀: “Ǹmyɛ də̀ bal mɔ́ kwã-lò?”
N mà nyə̀-pɔ̌, n wɔ̀: “Ɔ̃́ʼɔ̃, à də̀ ń kwã-lò yé.”
26Mɔ̀bɔ́ Pyɛɛrɛ yà ń za ń zhɛ̃̌ rɛ́ n pyir mó dwí lò mə̀dù, ń yà ń wɔ́ vwĩ̀-zwə́lnə bé yé né cìnə́ bé gakó náncɛ y kɛ̀lɛ́ tùntùnnə̀, ńmyɛ̌ mɔ́ zɛ̃̀ n wɔ̀ Pyɛɛrɛ nɛ: “È də̀ ǹmyɛ́ à yʼà nɔ ǹ tó Yezu mú ni ǹ wɔ bɔ́ɔ́ w wẽ́ mó?”
27Pyɛɛrɛ kə́ n mà nyə̀-pɔ̌, n wɔ̀ bʼè də̀ zhə̀n yé. Rə̀myɛ́ yi ní cìcì, cə́-bya kúrh.
Pyəlatɛ kɔ́ Yezu bùrsì
(Məco 27.1-2,11-31; Markɛ 15.1-20; Lwiki 23.1-5,13-25)
28Bə zɛ̃̀ bə zə Yezu bə zhǐr Kəyifu sõ, bə vò cɔ w cə́bal mɔ́ sõ kɛ̀lɛ́ wa. È yʼà wɔ́ nəkɔkɔ́lɛ́ shãã shãã. Sə Zhwifubá gə́ yʼà bə sɔ́má zhe bə̀ nʼê zwì lò mɔ̀bɔ́ ń də̀ Zhwifu sõ kɛ̀lɛ́ w mɔ́ ce, bə̀ yə̀ shɛ̀nɛ́ bə zù bùrsí jì y wẽ́ yé, mùnì bə̀ bə̀kʼa pə jìmdì bə̀ cìn nì yé, sə bə ŋwɛ̀nɛ́ bə jí Pakɛ y címsí kùjú wə́.
29Rə̀myɛ́ ce, cɔ w cə́bal Pyəlatɛ zɛ̃̀ n du pwẽ̀ nè, n bwə̀rh bè n wɔ̀: “Bə̀kɔ́n yò bal mɔ́ mɔ̀bɔ́ wɛ̀rhɛ́, á mʼá zə mɔ á bə̀ nyɔ̀nɔ̀?”
30Bə wɔ̀ mɔ̀: “Ń gə yà ń yə̀ lwɛlɛ wɛ̀rhɛ́, nə́ yʼâ tʼá zə mɔ nə́ bàn mɔ́ pɔ yé.”
31N zɛ̃̀ n wɔ̀ bɛ: “Á cìcì zəna mɔ á vò á kə́ ń bùrsí sə tó ǹdə á nyə́ né gə́ nʼê byili ní.”
Bə wɔ̀ mɔ̀: “Nə́myɛ̌ bə sɔ́má zhe nə́ nʼé gwi lò yé.” 32Kɔn yàl èta mùnì zɔ̀mɛ̀ rɛ́ Yezu yà ń zɔ̀m n mə n byili ń gə́ la nɛ́ cú mú pyìrh.
33Pyəlatɛ ká n zù bùrsí jì y wẽ́, n byẽ̀ Yezu, n bwə̀rh mò n wɔ̀: “Ǹ wɔ́ Zhwifubá pyɔ̌?”
34Yezu myɛ bwə̀rh mɔ̀ n wɔ̀: “Ǹmyɛ́ cìcì ǹ nə́ ǹ bùl rə̀myɛ́, ráá lyì dwã bə̀ zɔ̀m à yò ǹdə́ mɔ́?”
35Pyəlatɛ wɔ̀: “À wɔ́ Zhwifu nà? Wɔ́ ǹ dwí lyì bí ǹdə́ vwĩ̀-zwə́lnə bé yé né cìnə́ bé bə zə mɔ́ bə bʼe pɛ̃. Bə̀kɔ́n ǹ wɛ̀rhɛ́?”
36Yezu zɛ̃̀ n wɔ̀ mɔ̀: “À pyɛ̀lɛ̀ rɛ́ də̀ lũ w kɔ̀bɔ́ pyɛ̀lɛ̀ yé. À pyɛ̀lɛ̀ rɛ́ gə yʼà wɔ́ lũ w kɔ̀bɔ́ pyɛ̀lɛ̀, à shə̀dɛ́ɛ́sɛ́ yʼà mʼa bú ǹdə́ Zhwifubá yó-cìnə́ bé, mùnì bə̀ bə̀kʼa zə nɛ yé. Sə à pyɛ̀lɛ̀ rɛ́ də̀ lũ w kɔ̀bɔ́ nyân yé.”
37Pyəlatɛ zɛ̃̀ n bwə̀rh mò n wɔ̀: “Ǹ nə zɛ̃̀ ǹ wɔ́ pyɔ̌?”
Yezu wɔ̀: “Ǹdə ǹ gə́ zɔ̀m nɛ́, à wɔ́ pyɔ̌. Bə̀ lùl nè a bə̀ lũ w wə, mùnì a yə̀ zhə̀n dɛ́ zhə̀n-cínnə. Lò mɔ̀bɔ́ gakó ń só zhə̀nà, rə̀-ná-cí nə́ ń cili à zɔ̀mà nɛ́.”
38Pyəlatɛ zɛ̃̀ n bwə̀rh mò n wɔ̀: “Zhə̀n wɔ́ byè?”
Ń gə́ zɔ̀m èta n zhɛ̀, n zɛ̃̀ n kə́ n du pwẽ̀ nè n wɔ̀ Zhwifubá ne: “Àmyɛ́ bə kaka nɛ rə̀ nʼê byili bə̀ bal mɔ́ mɔ̀bɔ́ dó yé. 39Á yě bə̀ nə́ myɛ̀rhɛ̀ nə́ nʼé wɛ̀rhɛ́ kɔn rə̀dù: Pakɛ címsí gə yú gakó, à yʼa vùr byə̀nə́-jì cìnə́ bé mə̀dù. Á nə nʼá yâl bʼà dwĩ̀ Zhwifubá pyɔ̌ mɔ́ nɛ?”
40Bə̀ gakó bya bə wɔ̀: “Ɔ̃́ʼɔ̃, bə̀ká dwĩ̀ mɔ̀bɔ́ nɛ yé! Vǔr Barabaasɛ!” E jà Barabaasɛ mɔ́ yà ń wɔ́ vwârhna.
191Pyəlatɛ zɛ̃̀ n pə bɛ nyí bə̀ bə̀ mâ Yezu ǹdə́ dànə̀shàárɛ. 2Shə̀dɛ́ɛ́sɛ́ kwè kàmə̀-zù-èdɔ̀lɔ̀ nánshɔ̃̀ sə zù mù, sə jéé sɔr ǹdə pyɛ̀lɛ̀ yə́-pú ta sə pú ń yó wə, 3sə zɛ̃̀ sə̀ nʼê twí ń yé né sə̀ zhe: “Nə́ rʼé ce mó Zhwifubá pyɔ̌!”. Sə zɛ̃̀ sə̀ nʼê mà mɔ̀ jə̀-sə̂rh.
4Pyəlatɛ kə́ n du pwẽ̀ nè, n wɔ̀ lyì-zhâ bɛ́ nɛ: “Nyǐnə, à zə mɔ à bàn pwẽ̀ nè mùnì ga á lwar bʼà yə̀ kaka nɛ rə̀ nʼê byili bə̀ ń dó yé.”
5Yezu du pwẽ̀ nè ǹdə́ sɔɔrɛ́ bə̀ pú ń yó w mó, ǹdə́ kàmə̀-zù-shɔ̃̀ w bə̀ zù mù mú. Pyəlatɛ zɛ̃̀ n wɔ̀ bɛ: “Nyǐnə bal mɔ́!”
6Vwĩ̀-zwə́lnə bé yé né cìnə́ bé ǹdə́ Yi jì y yìlnə̀ bé gə́ nɔ mɔ, bə zɛ̃̀ bə búbwéé bə wɔ̀: “Ce bə pəpa mɔ də̀-jɔrhɔ́ yó! Ce bə pəpa mɔ də̀-jɔrhɔ́ yó!”
Pyəlatɛ wɔ̀ bɛ: “Zwẽnə mo á cìcì pəpa də̀-jɔrhɔ́ yó, bʼè gə wɔ́ àmyɛ́ yilə, à bə ń dóó nɛ yé.”
7Bə wɔ̀ mɔ̀: “Nə́myɛ̌ zhe nyí rə̀dù, sə nyí rí rə̀myɛ́ gə́ nʼê byili ní mú, mɔ̀bɔ́ mə̂ ǹdə́ gu, ń gə́ nə́ ń zə ń cìn ń yàl Yi Byǐ mú yilə.”
8Pyəlatɛ gə́ nyɛ̀ɛ̀ rə̀myɛ́, ywẽ kwɛrhɛ rə zə mɔ. 9N ká n zù bùrsí jì y wə, n bwə̀rh Yezu n wɔ̀: “Yẽ̀ ǹ shí ní?” Sə Yezu yə̀ mɔ lyár bə̀ kaka yé.
10Pyəlatɛ zɛ̃̀ n wɔ̀ mɔ̀: “Àmyɛ́ à nʼâ zɔ̀m ǹdʼám, ǹ tá ǹ lyár nɛ? Ǹ yə̀l bʼà wɔ̌ à ce bə̀ yẽ̌ mó, à kʼâ wɔ̌ à ce bə̀ pəpa mɔ́ də̀-jɔrhɔ́ yó?”
11Yezu wɔ̀ mɔ̀: “Yi gə yə̀ dɛ̃̌ zhì rə pɔ̃́ jàn, ǹ wàr ǹ la nɛ kaka wɔ̀rhɔ́ yé. Wɔ́ rə̀myɛ́ è ce lò mó mɔ̀bɔ́ ń zɔ nɛ n pɔ̃́ mɔ́ yə̀-bəlɔ̀lɔ́ w du ǹmyɛ́ nyɔ̃̌ wá.”
12Kɔn zhí rə̀myɛ́ yi ní, Pyəlatɛ yà ń nə́ ń yâl sə n ce bə yẽ̌ Yezu ni. Zhwifubá zɛ̃̀ bə búbwéé bə wɔ̀: “Ǹ gə yẽ̌ bal mɔ́ mɔ̀bɔ́ nɛ, sə́ nyǐ ǹ də̀ Səzaarɛ dɔwa yé, bə̀ lò mɔ̀bɔ́ gakó ń nə́ ń wə̀l bə̀ ńmyɛ̌ wɔ́ pyɔ̌, rə̀-ná-cí nə́ ń jí zùùrì ǹdə́ Səzaarɛ.”
13Pyəlatɛ gə́ nyɛ̀ɛ̀ rə̀myɛ́, n ce bə zə Yezu bə du pwẽ̀ nè. N zɛ̃̀ n jòm ń bùrsí də̀gwã́ y yó, jìlú w kɔ̀bɔ́ bə̀ nʼê byẽ̀ bə̀ “Nə́kulə jìlú” mú yó. Zhwifubá nʼê byẽ̀ jìlú w òmyɛ́ bə̀ Gabata. 14N wɔ̀ Zhwifubá nɛ: “Nyǐnə á pyɔ̌ mɔ́!”
È yʼà wɔ́ nə̀nyɔ́nɔ́ cəcəl, ǹdə́ bə̀ Pakɛ y címsí dâl bə̀ nəkɔla. 15Bə̀ gakó tó dwã bə búbwéé bə wɔ̀: “Ce bə gu mu! Ce bə gu mu! Ce bə pəpa mɔ də̀-jɔrhɔ́ yó!”
Pyəlatɛ zɛ̃̀ n bwə̀rh bè n wɔ̀: “À ce bə pəpa á pyɔ̌ mɔ́ də̀-jɔrhɔ́ yó?”
Vwĩ̀-zwə́lnə bé yé né cìnə́ bé zɛ̃̀ bə wɔ̀: “Nə́ bə pyɔ̌ dõ zhe e súlí Səzaarɛ nɛ yé.”
16Rə̀myɛ́ yó, n pə bɛ nyí bə̀ bə̀ zə Yezu bə vò bə pəpa də̀-jɔrhɔ́ w yó.
Bə̀ pəpa Yezu də̀-jɔrhɔ́ yó
(Məco 27.32-56; Markɛ 15.21-41; Lwiki 23.26-49)
Bə zɛ̃̀ bə zə Yezu bə zhǐr, 17bə ce n zhĩ ń də̀-jɔrhɔ́ w n mə n du cɔ w wa, n vò jàà y kɛ̀bɛ́ bə̀ nʼê byẽ̀ bə̀ “Yó-kóló jàà” mɔ́ wa. Zhwifubá nʼê byẽ̀ jàà y èmyɛ́ bə̀ Gɔləgɔta. 18Wɔ́ gàà bə̀ pəpa mɔ də̀-jɔrhɔ́ w yó né. Sə bə̀ súlí bə pəpa lyì bə̀lyè də̀-jaárhɛ dwã yó, mə̀dù Yezu jə̀jĩ́ ni, mə̀dù ń jə̀gwã̀ nɛ̀.
19Pyəlatɛ yà ń ce bə kɛ̃ zɔ̀mà bwèlè yó, bə pəpa də̀-jɔrhɔ́ w nɛ Yezu yə́-pɛ̀lɛ́ wa. Bə̀ yʼà kɛ̃ bə wɔ̀: “Nazarɛtɛ lyì bal Yezu, Zhwifubá pyɔ̌ mɔ́”. 20Bə̀ gə́ yʼà pəpa Yezu də̀-jɔrhɔ́ w yó mə̀gã̌ mɔ́ yʼà bwə́l cɔ w nɛ. Rə̀myɛ́ ce Zhwifubá nánzhəzhɔ̌ kàrmə̀ zɔ̀mà nɛ́ nə̀myɛ́. Pyəlatɛ yà ń kɛ̃ nɛ ǹdə́ ebərə́ ǹdə́ latɛ̃´ ǹdə́ gə̀rɛ́kɛ.19.20 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́.
21Zhwifubá vwĩ̀-zwə́lnə bé yé né cìnə́ bé zɛ̃̀ bə wɔ̀ Pyəlatɛ nɛ: “Bə̀ká kɛ̃ bə̀ ‘Zhwifubá pyɔ̌’ yé. Kɛ̃ bə̀ ń wò bə̀ ń wɔ́ Zhwifubá pyɔ̌.”
22Pyəlatɛ wɔ̀ bɛ: “Tɛ̀bɛ́ à kɛ̃ mɔ́, wɔ́ rə̀myɛ́ à kɛ̃.”
23Shə̀dɛ́ɛ́sɛ́ gə́ pəpa Yezu də̀-jɔrhɔ́ w yó sə zhɛ̀, sə kwè ń gàndɛ́ sə bɔ̀n kùrə̀ nə̀na. Shə̀dáá èdù gakó jí kùr rə̀dù. E dâl ń kàmə̀-zù-èdɔ̀lɔ̀ w dúdú. Kàmə̀-zwǐ y èmyɛ́ yʼà wɔ́ námpúm, è bə nyənyɛlɛ zhe yé. 24Sə zɛ̃̀ sə wɔ̀ dwã nɛ: “Bànà nə́ bə̀kʼá kâr y yé. Nə́ mʼâ tə́ tántɛ́ɛ́, nə́ nyǐ wɔ́ mɔ̌ lò ń mà n cìní yə.”
Kɔn tó èta, mùnì ga kɔn dɛ́ dɛ̀bɛ́ Yi zɔ̀mɛ̀ rɛ́ sɛ́bɛ́ rɛ́ byili mú pyìrh. Bə̀ kɛ̃ rə̀ wẽ́ bə wɔ̀:
“Bə̀ tə̀l à gàndɛ́, bə zɛ̃̀ bə tə́ tántɛ́ɛ́,
bə nyǐ wɔ́ mɔ̌ lò ń mà n cìní à kàmə̀-zù-èdɔ̀lɔ̀ wá.”
Wɔ́ èta shə̀dɛ́ɛ́sɛ́ wɛ̀rhɛ́ nɛ́.
25Yezu ná ǹdə́ ń ná nyɛ̃´ mɔ́ ǹdə́ Kəlɔpaasɛ kɛ̃ Marɛ, ǹdə́ Magədala lyì bə̀kɔ́ Marɛ19.25 “Magədala lyì bə̀kɔ́ Marɛ”. Wɔ́ cɔ òdù ò yíl Magədala. Wɔ́ òmyɛ́ wẽ́ Marɛ yà ń shí ní. Wɔ́ Marɛ mɔ́ ńmyɛ̌ bə̀ nʼê byẽ̀ bə̀ Marɛ Madəlɛ̃ɛ̃. yʼà zhǐ Yezu də̀-jɔrhɔ́ w kùr wə̀.
26Ń gə́ nɔ ń ná ǹdə́ ń kwã-lò mó mɔ̀bɔ́ ń yà ń só mó ń zhǐ ń ná sarh nɛ, n zɛ̃̀ n wɔ̀ ń ná nɛ: “Kɛ̃, nyǐ ǹ byǐ mú.”
27N wɔ̀ ń kwã-lò mó myɛ nɛ: “Nyǐ ǹ ná.” Kɔn zhí dɛ̃ rɛ́ rə̀myɛ́, Yezu kwã-lò mó ńmyɛ̌ mɔ́ já n zwẽ Marɛ ń sono.
28Yezu yà ń yě bə̀ kɔn gakó zhɛ̀, n zɛ̃̀ n wɔ̀: “Nə̀nyɛ̀lsɛ̀ zhe ne.” Ń zɔ̀m èta mùnì ga dɛ̀bɛ́ bə̀ kɛ̃ Yi zɔ̀mɛ̀ rɛ́ sɛ́bɛ́ rɛ wẽ́ mó pyìrh.
29Kɔ̀lɔ́ òdù yʼà zhǐ tɛ̃´ gàà ò sú ǹdə́ sɛ̃´ kárɛ́. Bə mɔ́rh ku mə̀ wẽ́, bə ce lyɛ́nɛ́ nɛ bə ce ń nyí ni. 30Yezu gə́ lə́lá sɛ̃´ mɔ́ kárɛ́ mɔ́, n zɛ̃̀ n wɔ̀: “Kɔn gakó zhɛ̀.” N lwəl ń yó tɛ̃´ n já n cì.
31Shìrhə́ dɛ̃ rɛ́ yʼà dâl bə̀ nəkɔla. Dɛ̃ rɛ́ rə̀myɛ́ yʼà wɔ́ címsi nánfɔ̀lɔ̀ dɛ̃. Zhwifubá yó-cìnə́ bé yʼà tʼâ yâl bə̀ lyì bí byɛ̀bɛ́ bə̀ pəpa də̀-jaárhɛ́ yó mó mɛ̃ gàà kɔn mʼe yí dɛ̃ rɛ́ yé. Rə̀myɛ́ ce, bə zɛ̃̀ bə vò bə lwə̀l Pyəlatɛ nɛ, bə̀ ń ce bə vò bə kə́ bə̀ cə́ né,19.31 Bə̀ yʼà nʼê yâl bə kə́ bə̀ cə́ né mùnì ga bə cì làlà. sə bə só be tɛ̃´. 32Shə̀dɛ́ɛ́sɛ́ yí lyì bí bə̀lyè y bə̀ yʼà súlí Yezu ni bə pəpa də̀-jaárhɛ́ yó mó ne sə kə́ mə̀dù y cə́ né, sə lyɛ̃ sə kə́ ń dõ mó myɛ cə́ né. 33Sə̀ gə́ yú Yezu ni, sə pwírí ń cùwə̀. Sə̀ kʼê yə̀ ń cə́ né kɛ́ yé. 34Shə̀dáá èdù zɛ̃̀ e zə swé e zò ń sə́pún ni. Rə̀myɛ́ yó, jal ǹdə́ nɛ̃̌ du.
35Mɔ̀bɔ́ ń nə́ ń byili ri mú nɔ rɛ ǹdə́ ń yírhə́, sə kɔn dɛ̀bɛ́ ń nə́ ń byili mú wɔ́ zhə̀nà. E jà ń cìcì yě bə̀ dɛ̀bɛ́ ń nə́ ń byili mú wɔ́ zhə̀nà, mùnì ámyɛ zwẽ nyí. 36Kɔn tó èta, mùnì kɔn dɛ́ tɛ̀bɛ́ Yi zɔ̀mɛ̀ rɛ́ sɛ́bɛ́ rɛ́ byili mú pyìrh. Bə̀ kɛ̃ rə̀ wẽ́ bə wɔ̀: “Bə̀ tʼâ la ń kú òdù ga kɔ́ yé.” 37Bə̀ kɛ̃ sɛ́bɛ́ rɛ́ rə̀myɛ́ jàà dõ wẽ́ myɛ bə wɔ̀: “Bə̀ mʼa kwẽ̌ bə nyǐ mɔ̀bɔ́ bə̀ zò mó.”
Bə̀ co Yezu
(Məco 27.57-61; Markɛ 15.42-47; Lwiki 23.50-56)
38Arəmatɛ lyì bal mə̀dù yà ń ŋwɛ́nɛ́, ń yíl Zhozefu. Ń yà ń wɔ́ Yezu kwã-lò, sə Zhwifubá yó-cìnə́ bé ywẽ gə́ yʼà zhe mo mó ce, ń yə̀ shɛ̀nɛ́ bə lwar bə̀ ń wɔ́ Yezu kwã-lò yé. N zɛ̃̀ n vò Pyəlatɛ sõ, n lwə̀l mò, mùnì n pɔ̃ sɔ́má n vò n kwè Yezu. Sə Pyəlatɛ pɔ mɔ sɔ́má n vò n kwè mò.
39Nəkɔdɛm mɔ́ mɔ̀bɔ́ ń yà ń tú Yezu sõ ǹdə́ cəcɛ̃ y mɔ́ myɛ yà ń zə wẽ̀ nánzhəzhɔ̌ rə̀ lwẽ́ nã́nyə̀nyɛ̀lɛ́ bə̀ nʼê byẽ̀ bə̀ myííri ǹdə́ alwɛ́ɛ́sɛ n mə n bà. 40Bə̀myɛ́ bə̀lyè y sɛ̃ dwã nɛ bə kwè Yezu, bə zhɛ́rhɛ́ wẽ̀ dé rə̀ lwẽ́ nã́nyə̀nyɛ̀lɛ́ y ń yó, bə zɛ̃̀ bə zə kàmə̀-jɛ̀rh bə mʼe pyípyílí mu ǹdə Zhwifubá gə́ yʼà nʼê wɛ̀rhɛ́ nɛ́ bə̀ mʼê ce bə̀ cùùrí.
41Bə̀ gə́ yʼà pəpa Yezu də̀-jɔrhɔ́ w yó mə̀gã̌ mɔ́ yʼà bwə́l bɔ́ɔ́ òdù nì. Sə lú-bɔ̀l nándùl yʼà ŋwɛ́nɛ́ bɔ́ɔ́ w òmyɛ́ mɔ́ wẽ́, bə̀ yʼà gwẽ̌ yə̀ lò mə̀ wẽ́ ce yé.19.41 Zhwifubá yʼà nʼê kwì bə̀ lú-bɔ̀là bɛ́ pyɔ̀ nə̀bán nɛ. Bə̀ yʼà tʼâ kwì bì bə̀ zul tɛ̃´ yé. Wɔ́ lɔ́rh bə̀ nʼê lɔ̀rh pyɔ̀ w ǹdə myèlé ta, bə zɛ̃̀ bə shar nə́kulu námpɔ́pɔ̌ bə mʼe pyi mə̀ nyí ni.42Bɔ̀l mɔ́ gə́ yʼà bwə́l gàà, e jà Zhwifubá shìrhə́ y dɛ̃ rɛ́ yʼà dâl bə̀ nəkɔl mɔ́ ce, wɔ́ mə̀myɛ́ wẽ́ bə̀ kwè Yezu bə vò bə ce né.
20Yezu tɛ̀nɛ́ lú-bɔ̀l mɔ́ wẽ́ yé
(Məco 28.1-8; Markɛ 16.1-8; Lwiki 24.1-12)
1Shìrhə́ dɛ̃ rɛ́ zɛ̃̀ nəkɔkɔ́lɛ́ jə̀máásɛ́ yùwə̀, Magədala lyì bə̀kɔ́ Marɛ pyẽ̀ pyẽ̀ n zɛ̃̀ n vò lú-bɔ̀l mɔ́ yó ǹdə́ cɛ y gwẽ̌ yə̀ wárh yé, n pwírí nə́kulu w ò yʼà pyi bɔ̀l mɔ́ nyí ni mú púr. 2N zɛ̃̀ n dùr n vò Shəmɔ Pyɛɛrɛ ǹdə́ Yezu kwã-lò mó mɔ̀bɔ́ ń yà ń só mó sõ, n wɔ̀ bɛ: “Bə̀ vùr Cinu bɔ̀l mɔ́ wa, sə nə́ yə̀l bə̀ gə́ cĩ́ mu má yé.”
3Rə̀myɛ́ yó, Pyɛɛrɛ ǹdə́ Yezu kwã-lò mó dõ mó shə́r, bə̀ la bɔ̀l mɔ́ yó. 4Bə̀ ga bə̀lyè y yʼà nʼê dùrə̀, sə Yezu kwã-lò mó dõ mó dùr n lyɛ̃ Pyɛɛrɛ, n jɛ̀rɛ̀ mɔ̀ n yí bɔ̀l mɔ́ yó, 5n wùlì n gwɛ̃, n nə kàmə̀-jɛ̀sɛ́ sə̀ yʼà pyípyílí mu mú sə̀ pyě tɛ̃´ bɔ̀l mɔ́ wẽ́, sə ń yə̀ mə̀ wẽ́ zwì yé. 6Shəmɔ Pyɛɛrɛ tà-kwã n yí, n zù bɔ̀l mɔ́ wa, n nə kàmə̀-jɛ̀sɛ́ sə̀ pyě tɛ̃´. 7Sə kàmə̀-jɛ̃̀ y kɛ̀bɛ́ bə̀ yʼà mʼe bə Yezu yó w mó yʼà pyípyílí è pyě jàà dõ w è dúdú.
8Rə̀myɛ́ yó, Yezu kwã-lò mó dõ mó ń jɛ̀rɛ̀ Pyɛɛrɛ n yí bɔ̀l mɔ́ yó mó myɛ zɛ̃̀ n zù. Ń yírhə́ na, n zwẽ nyí. 9Bə̀ yʼà gwẽ̌ yə̀ kɔn dɛ́ tɛ̀bɛ́ rə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́, bə̀ Yezu mə̂ sə n bwìrhì n du cùùrì wẽ́ mó kùr swí yé.
10Rə̀myɛ́ kwã nɛ́, bə kʼa kwɛ̃̀ bə vò jè.
Yezu lyí Magədala lyì bə̀kɔ́ Marɛ
11Rə̀myɛ́ yó ǹdə́ Marɛ yà ń zhǐ pwẽ̀ nè lú-bɔ̀l mɔ́ nyí ni ń nə́ ń kúrhə́. N zɛ̃̀ n wùlì n gwɛ̃ bɔ̀l mɔ́ wa, 12n nə màlɛ́kabá bə̀lyè bə̀ zù gã̀-pwẽ̀, bə̀ jě bə̀ gə́ yʼà cĩ́ Yezu mə̀gã̌ mɔ́. Màlɛ́ka y èdù y yʼà jě ń yó w gə́ yʼà zâ má mɔ́, è dõ mó zɛ̃̀ è jě ń nèsé gə́ yʼà zâ má mɔ́. 13Màlɛ́kabá zɛ̃̀ bə bwə̀rh mò bə wɔ̀: “Kɛ̃, bə̀kɔ́n rə̀ zhe mó ǹ mə́ ǹ kúrhə́?”
N wɔ̀ bɛ: “Bə̀ vùr à Cinu, sə à yə̀l bə̀ gə́ cĩ́ mu mə̀gã̌ yé.”
14Ń gə́ wò èta, n pyìrhí n nə Yezu ǹdə́ ń zhǐ, sə ń yə̀ lwar bə̀ wɔ́ ńmyɛ̌ yé. 15Yezu zɛ̃̀ n bwə̀rh mò n wɔ̀: “Kɛ̃, bə̀kɔ́n rə̀ zhe mó ǹ mə́ ǹ kúrhə́? Mɔ̌ lò ǹ nə́ ǹ pyà?”
Marɛ yà ń nə́ ń bùl bə̀ wɔ́ bɔ́ɔ́ w yìlnə̀ mó, n zɛ̃̀ n wɔ̀ mɔ̀: “È gə wɔ́ ǹmyɛ́ ǹ vùr mò, sə́ byili ni ǹ gə́ cĩ́ mu mə̀gã̌, a vò a kwè.”
16Yezu wɔ̀ mɔ̀: “Marɛ!”
N zɛ̃̀ n pyìrhí n wɔ̀ Yezu ni ǹdə́ ebərə́: “Rəbuni!” (Rə̀ kùr wɔ́: “Yó-cə́bal”.)
17Yezu zɛ̃̀ n wɔ̀ mɔ̀: “Bə̀ká jíjírhí ni, bʼà gwẽ̌ yə̀ à Da sõ zhə̀l yé. Sə zhəl ń wɔ̀ à da-byâ bɛ́ nɛ bʼà la à Da mɔ́ ń wɔ́ bə̀myɛ Da mɔ́ sõ, à Yi rí rə̀ wɔ́ bə̀myɛ Yi mú sõ.”
18Marɛ zɛ̃̀ n vò n wɔ̀ Yezu kwã-lyì bí ni: “À nɔ Cinu.” N byili bi kɔn dɛ́ dɛ̀bɛ́ ń zɔ̀m ǹdə́ mɔ mɔ́ myɛ.
Yezu lyí ń kwã-lyì bí
(Məco 28.16-20; Markɛ 16.14-18; Lwiki 24.36-49)
19Jə̀máásɛ́ sə̀myɛ́ yù w cìcì, də̀dɛ̀nɛ́ yi gə́ yúwə́, Yezu kwã-lyì bí yʼà ŋwɛ́nɛ́ jì èdù wẽ́, sə bə̀ yʼà nʼê dùr Zhwifubá yó-cìnə́ bé ywẽ. Rə̀myɛ́ ce, bə̀ yʼà sàásɛ bwə̀ə̀lé gakó. Yezu bə̀ n zhì bə̀ cəcəl wə, n wɔ̀ bɛ: “Yə̀-zùlə́ yál nɛ́ ǹdʼába.”
20Ń gə́ wò èta n zhɛ̀, n zɛ̃̀ n byili bi ń jɛ̀sɛ́ ǹdə́ ń sə́púndí. Wu-nyɔ̃̀ nánfɔ̀lɔ̀ zə bɛ bə̀ gə́ nɔ Cinu mú yilə.
21N zɛ̃̀ n kə́ n wɔ̀ bɛ: “Yə̀-zùlə́ yál nɛ́ ǹdʼába. À nʼâ twĩ̀ ába ǹdə à Da gə́ twĩ̀ àmyɛ nɛ́.”
22Ń gə́ zɔ̀m rə̀myɛ́ n zhɛ̀, n zɛ̃̀ n fùrh zho bə̀ yó, n wɔ̀: “Zwẽnə Eshirhə náàcɛ̀nɛ́. 23Lyì byɛ̀bɛ́ gakó á gə pɔ bɛ bə̀ yə̀-bəlwàálɛ sǔbri, bə̀ mʼa nə rə̀ sǔbri, sə lyì byɛ̀bɛ́ gakó á gə yə̀ bɛ̀ sǔbri pɛ, bə̀ yə̀-bəlwàálɛ́ gwẽ̌ zhǐ ǹdə́ bɛ.”
Tɔma nɔ Yezu, n zɛ̃̀ n zwẽ nyí
24Yezu kwã-lyì bí shí ǹdə́ bə̀lyè y mə̀dù y ń yíl Tɔma, bə̀ nʼê byẽ̀ bə̀ “Nə̀cílí” mú, yà ń tɛ̀nɛ́ Yezu gə́ yà ń tú bə̀ sono mó yi ní yé.
25Ń gə́ tú rə̀myɛ́ kwã nɛ́, ń dwã bɛ́ wɔ̀ mɔ̀: “Nə́myɛ̌ nɔ Cinu.”
Tɔma zɛ̃̀ n wɔ̀ bɛ: “Àmyɛ́ gə yə̀ dàdâbsɛ́ bɔ̀là bɛ́ nɛ ń jɛ̀sɛ́ nɛ, a ce à jə̀fɔ́lɛ́ nɛ́, a ce à jɛ̃̀ ń sə́púndí bɔ̀l mɔ́ myɛ wa, à tʼâ la nyí zõ yé.”
26È dwã nyàlpyɛ̀ y yùwə̀, Yezu kwã-lyì bí yʼà kʼê ŋwɛ́nɛ́ jì y wẽ́, sə Tɔma yà ń ŋwɛ́nɛ́ rə̀myɛ́ yùwə̀. Yezu kə́ n bə̀ ǹdə́ jì y bwə̀ə̀lé sàásɛ, n zhì bə̀ cəcəl wə, n wɔ̀ bɛ: “Yə̀-zùlə́ yál nɛ́ ǹdʼába.”
27N zɛ̃̀ n wɔ̀ Tɔma nɛ: “Nyǐ dàdâbsɛ́ bɔ̀là bɛ́ à jɛ̀sɛ́ nɛ. Ce ǹ jə̀fɔ́lɛ́ y nɛ́ ń nyì, sə́ ce ǹ jɛ̃̀ y à sə́púndí bɔ̀l mɔ́ myɛ wa, ń zwẽ nyí, sə́ yẽ̌ tə́tɔ̀ná co ne.”
28Tɔma zɛ̃̀ n wɔ̀: “À Cinu ǹdə́ à Yi.”
29Yezu wɔ̀ mɔ̀: “Wɔ́ ǹ yírh gə́ nɔ yil ǹ zwẽ nyí! Wu-nyɔ̃̀ cìnə́ wɔ́ lyì byɛ̀bɛ́ bə̀ yírhə́ yə̀ nɛ, bə jʼa zwẽ nyí.”
Zhã byili ń sɛ́bɛ́ rɛ́ kùr ré
30Yezu wɛ̀rhɛ́ màmyaarhɛ dwã nánzhəzhɔ̌ ń kwã-lyì bí yírh wə, sə bə̀ yə̀ rə̀myɛ́ sɛ́bɛ́ rɛ́ tɛ̀bɛ́ wẽ́ ce yé. 31Sə tɛ̀bɛ́ bə̀ co sɛ́bɛ́ rɛ́ tɛ̀bɛ́ wẽ́ mó wɔ́ mùnì ga rə ce á zwẽ nyí bə̀ Yezu wɔ́ Kristə, Yi Byǐ mú. Á gə zwẽ nyí, á bʼâ nə nyǔ mə̀ tʼâ la zhɔ̌ ńmyɛ̌ jàn yilə.
21Yezu lyí ń kwã-lyì bí Təbɛrəyaadɛ mwə̃́ y yó
1Rə̀myɛ́ kwã nɛ́, Yezu kə́ n bə̀ n lyí ń kwã-lyì bí. Sə rə̀myɛ́ yʼà wɔ́ Təbɛrəyaadɛ mwə̃́ y yó. Nyǐnə ń gə́ tó né n mə n lyí bi: 2è yʼà wɔ́ Shəmɔ Pyɛɛrɛ ǹdə́ Tɔma (bə̀ nʼê byẽ̀ mò bə̀ “Nə̀cílí”) ǹdə́ Natanayəə (ń shí Kana, Gəlile tənà y wa) ǹdə́ Zebede byâ bɛ́, ǹdə́ Yezu kwã-lyì dwã bə̀lyè. Bə̀ gakó yʼà zhǐ ǹdə́ dwã.
3Shəmɔ Pyɛɛrɛ zɛ̃̀ n wɔ̀ bɛ: “À la vò a gwɛ̃̀.”
Bə wɔ̀ mɔ̀: “Nə́myɛ mʼâ tó mó nə́ vò.” Bə zhǐr bə vò bə zù bǔ-bwəl lé wə, bə gwɛ̃̀ gwɛ̃̀, sə bə̀ yə̀ kaka zal cəcɛ̃ y èmyɛ́ wẽ́ yé.
4Cɛ y gə́ tú è nʼê lɛ́ yó né, Yezu bə̀ ń zhǐ bù-cǔ w yó, sə ń kwã-lyì bí yʼà yə̀l bə̀ wɔ́ ńmyɛ̌ yé. 5N zɛ̃̀ n bwə̀rh bè n wɔ̀: “À bə̀sɔ́ná, á yə̀ mɔ́mɔ̌rh zal nà?”
Bə wɔ̀ mɔ̀: “Ɔ̃́ʼɔ̃.”
6N zɛ̃̀ n wɔ̀ bɛ: “Dulnə gùndwǐ rí bǔ-bwəl lé jə̀jĩ́ sõ, á bʼâ zə kɔna.”21.6 Zhwifubá gùndwə̂ né yʼà də̀ ǹdə nə́myɛ̌ nyə̀ná nɛ́ ta yé. Nə̀ yʼà wà dɛ̃´dɛ̃´, e zɛ̃̀ wɔ́ dúl bə̀ yʼà nʼê dul ne bǔ w bə̀ mʼê zal mɔ́mɔ̌sɛ́. Bə zɛ̃̀ bə dul le, bə zə mɔ́mɔ̌rh nánzhəzhɔ̌, bə̀ kʼê wàr rɛ̀ sə bə vwɛ̃ yé.
7Yezu kwã-lò mó mɔ̀bɔ́ ń yà ń só mó zɛ̃̀ n wɔ̀ Pyɛɛrɛ nɛ: “Nyǐ wɔ́ Cinu.”
E jà Shəmɔ Pyɛɛrɛ yà ń lwə̂r ń kàmə̀-zwǐ y n cĩ́ tɛ̃´. Sə ń gə́ nyɛ̀ɛ̀ bə̀ wɔ́ Cinu, n kwè y n zù, n kwè ń cã̌-tɔ̀nɔ̀ w n lyẽ ń cã̌ nɛ́, n zɛ̃̀ n fwɛ̃´ mwə̃́ y wə. 8Yezu kwã-lyì bí dwã bɛ́ yʼà bə nyɛ ǹdə́ bù-cǔ w yé. Bə̀ yʼà mə̂ dwã ǹdə́ mɛ́tər zɔ̌m. Bə zɛ̃̀ bə zhì bǔ-bwəl lé wẽ́ bə vwɛ̃ gùndwǐ rí, rə̀ yʼà sú ǹdə́ mɔ́mɔ̌sɛ́ mɔ́, bə mʼe bə̀ bù-cǔ w nyí ni.
9Bə̀ gə́ du bù-cǔ w yó, bə pwírí myǐn bə̀ jéé tɛ̃´ ǹdə́ émɔ̌rh mə̀ wẽ́. Bə nə búúri myɛ mə̀ sarh nɛ.
10Yezu zɛ̃̀ n wɔ̀ bɛ: “Vǔrnə émɔ̌sɛ́ á zɔ mɔ́ á mʼá bà.” 11Shəmɔ Pyɛɛrɛ zɛ̃̀ n ká n zù bǔ-bwəl lé wə, n lwə̂r gùndwǐ rí bǔ-bwəl lé ne, n vwɛ̃ dɛ n mə n du bù-cǔ w yó, rə̀ yʼà sú ǹdə́ mɔ́mɔ̌rh nánfwààlɛ̀, zɔ̌m ǹdə́ shí-ènu ǹdə́ sə̀tɔ̀. Sə ǹdə́ émɔ̌sɛ́ yʼà já dɛ̃´dɛ̃´ ga, gùndwǐ rí yə̀ kâr yé.
12Yezu wɔ̀ bɛ: “Bànà á dɔ̃̀ émɔ̌sɛ́ ǹdə́ búrú wə́.” Sə bə̀ gə́ yʼà yě bə̀ wɔ́ Cinu mú ce, mə̀dù ga yə̀ ŋwɛ̀nɛ́ n bwə̀rh mò bə̀ ǹmyɛ́ wɔ́ mɔ̌ yé. 13Yezu zɛ̃̀ n yí n kwè búrú w n mə n tə̀ bɛ́, n zɛ̃̀ n kwè émɔ̌sɛ́ myɛ n mə n tə̀ bɛ.
14Rə̀myɛ́ yàl Yezu twər rə̀tɔ̀ nyân dɛ́ ń byili ń cìn ń kwã-lyì bí ni ń bùrhù mú kwã nɛ́.
Yezu zhərh ǹdə́ Pyɛɛrɛ
15Bə̀ gə́ tú bə dɔ̃̀ búrú w ǹdə́ mɔ́mɔ̌sɛ́ bə zhɛ̀, Yezu zɛ̃̀ n bwə̀rh Shəmɔ Pyɛɛrɛ n wɔ̀: “Zhã byǐ Shəmɔ, ǹ só ne du byɛ̀bɛ́ bə̀ ŋwɛ́nɛ́ nyɔ̀nɔ̀ mɔ́ gakó?”
Pyɛɛrɛ wɔ̀ mɔ̀: “Ɔ̃̀ɔ̃̂, ǹ yě bʼà só mó.”
Yezu wɔ̀ mɔ̀: “Kál à pyì-bwâlsɛ́.”
16N zɛ̃̀ n kə́ n bwə̀rh mò n wɔ̀: “Zhã byǐ Shəmɔ, ǹ só ne?”
Pyɛɛrɛ kə́ n wɔ̀ mɔ̀: “Ɔ̃̀ɔ̃̂, Cinu, ǹ yě bʼà só mó.”
Yezu wɔ̀ mɔ̀: “Kál à pyììsí.”
17N kə́ n bwə̀rh mò kə́dò n wɔ̀: “Zhã byǐ Shəmɔ, ǹ só ne?”
Yezu gə́ bwə̀rh mò twər rə̀tɔ̀ ga bə̀ ń só mo mó ce ń wu zhìlì. N zɛ̃̀ n wɔ̀ Yezu ni: “Cinu, ǹ yě kɔn gakó. Ǹ yě bʼà só mó.”
Yezu wɔ̀ mɔ̀: “Kál à pyììsí. 18Zhə̀n zhə̀nà, à nʼâ wə̀l mó: ǹ gə́ yà ǹ gwẽ̌ wɔ́ bal-byǐ yi ní, ǹ yà ǹ nə́ ǹ lyẽ ǹ cã̌-tɔ̀nɔ̀ w ǹ cã̌ nɛ́ ǹ cìcì nì, ǹ nə́ ǹ zhə̀l ǹ gə́ só mə̀gã̌. Sə ǹ gə tú ǹ cɛ ǹ zhɛ̀, ǹ bʼâ zhẽ̌ ǹ jɛ̀sɛ́ dɛ̃̌, lò dõ lyẽ w ǹ cã̌ nɛ́, n zə mɔ́ n vò ǹ gə́ tá ǹ yâl mə̀gã̌.”
19Yezu wò èta n mə n byili Pyɛɛrɛ gə́ la nɛ́ cú, sə Yi zùwə́ y mʼa tó ń cu mú dɛnnɛ e du. Ń gə́ wò èta ń zhɛ̀, n zɛ̃̀ n wɔ̀ Pyɛɛrɛ nɛ: “Tó ne”.
20Bə̀ gə́ zhǐr bə̀ la, Pyɛɛrɛ zɛ̃̀ n pyìrhí, n pwírí Yezu kwã-lò mó mɔ̀bɔ́ ń só mó ń wɔ bə̀ kwã nɛ́ ń bànà. E jà wɔ́ ńmyɛ̌ ń yà ń jě n shɛlɛ Yezu ni kùjú w jú mú yi ní, n bwə̀rh Yezu bə̀ wɔ́ mɔ̌ lò ń la mɔ myìnù mú. 21Pyɛɛrɛ gə́ nɔ mɔ, n bwə̀rh Yezu n wɔ̀: “Cinu, sə mɔ̀bɔ́, etər kɔn la nɛ́ tó ńmyɛ̌ yilə?”
22Yezu wɔ̀ mɔ̀: “À gə nʼâ yâl bə̀ ń yál nɛ́ kɔn mʼe yí à twírí y nánkwaá yá, ǹ twə́r ŋwɛ́nɛ́ gàà? Ǹmyɛ́ wírí ń tó ne.”
23Nyí rí rə̀myɛ́ jʼa yí Yezu kwã-lyì bí gakó bə̀ ńmyɛ̌ mɔ̀bɔ́ Yezu só mó tá ń la cú gaga yé. E jà Yezu yə̀ Pyɛɛrɛ nɛ wə̀l bə̀ ń kwã-lò mó ńmyɛ̌ tá ń la cú gaga yé. Wɔ́ wó n wòwə̀: “À gə nʼâ yâl bə̀ ń yál nɛ́ kɔn mʼe yí à twírí y nánkwaá yá, ǹ twə́r ŋwɛ́nɛ́ gàà?”
24Wɔ́ Yezu kwã-lò mó ńmyɛ̌ mɔ́ cìcì ń kɛ̃ ywẽ̀ né nyɛ̀bɛ́ gakó ń nə́ ń byili. Sə nə́ yě bə̀ dɛ̀bɛ́ ń nə́ ń byili mú wɔ́ zhə̀nà.
Zhã sɛ́bɛ́ rɛ́ yó-gurə́
25Yezu wɛ̀rhɛ́ ywẽ̀ dwã nánzhəzhɔ̌. Bə̀ gə yʼà la òdù òdù gakó kãɔ̃, à nʼâ bùl bə̀ nə̀ sábá nɛ́ yʼà wàr lũ w wẽ́ yé.