Galəshi

Pwəə sɛ́bɛ́ rɛ́ ń kɛ̃ n pə

Galəshi

Kristə-lyì bí ni mú

Pwəə gə́ yà ń nə́ ń byɛ́lɛ́ cɛmɛ nɛ́ ń mə́ ń bwə̀l yò-ècɔ̀nɔ̀ nyí rí yi ní, ń zhə̀l Galəshi tənà y cɛmɛ nánzhəzhɔ̌ wẽ́. Sə lyì nánjə̀jóló zwẽ ń zɔ̀mà nɛ́ bə zù Yezu Kristə. Ń gə́ tú n zhǐr Galəshi ní, lyì dwã tà-kwã bə vò gàà, bə̀ nʼê wə̀l lyì bí ni bə̀ ń də̀ Kristə tùntúm páá yé. Bə̀ yʼà nʼê cèrhè Kristə-lyì bí ni bə̀ lò mɔ̀bɔ́ gakó ń ŋwɛ́nɛ́ bə̀ wẽ́, n jà ń də̀ Zhwifu, bə̀ mə̂ sə bə gõ mò, sə bə ce n tó Zhwifubá lùl-e-pwírí y nyə́ né. Pwəə yə̀ rə̀myɛ́ èta mɔ́ yò shɛ̀nɛ́ yé, n zɛ̃̀ n kɛ̃ sɛ́bɛ́ rɛ́ tɛ̀bɛ́ n mə n kwɛrhɛ n byili bi pamparɛ̃ɛ̃ bə̀ nyǐ wɔ́ lò mɔ̀bɔ́ ǹ zù Kristə dúdú ǹ mʼâ nə vwârh.

Ń byili bi bə̀ yò-ècɔ̀nɔ̀ nyí rí ń nə́ ń bwə̀l mó, wɔ́ Yezu Kristə cìcì ń byili mu ri. N byili bi myɛ bə̀ Kristə tùntúmə́ bé dwã bɛ́ shɛ̀nɛ́ yò-ècɔ̀nɔ̀ nyí rí ń nə́ ń bwə̀l mó yò (1.1–2.14).

Rə̀myɛ́ kwã nɛ́, ń ce bə lwar bə̀ lò mɔ̀bɔ́ ǹ zhí Kristə ne, ǹ gə wɔ́ Zhwifu, ǹ gə də̀ Zhwifu myɛ, ǹ bʼâ nə vwârh, bə̀ Yi zɔ̀mɛ̀ rɛ́ sɛ́bɛ́ rɛ́ nʼê byili pamparɛ̃ɛ̃ bə̀ è də̀ Muyiisi nyə́ né zõ mó è mʼa ce lò nə vwârh yé. Wɔ́ ǹ gə zhí Yezu Kristə ne dúdú è mʼa ce ń nə vwârh (2.15–4.31).

Pwəə byili bi bə̀ Kristə zwẽ nə́ba, nə́ zɛ̃̀ nə́ cǐ nə́ cìnə̀. N zɛ̃̀ n cící bi bə̀ bə̀kʼa kʼe shɛ̀nɛ́ lyì bí cìrh bè bə ce yómdé wẽ́ kə́dò yé. N lwə̀l bè sə bə̀ yẽ̌ bə̀ cìn nì Eshirhə náàcɛ̀nɛ́ jɔ̃̀ wà (5.1–6.18).

Pwəə nə́ ń ce Galəshi Kristə-lyì bí

^1-2Àmyɛ́ Pwəə, à wɔ́ Yezu Kristə tùntúm, sə à yə̀ ń tùntúm jǐrh ǹdə́ numbyíní pùbùlə̀ yé. È kʼê də̀ numbyíní cã̌ nɛ à zɔ nɛ́ a mʼa jǐrh ń tùntúm yé. Wɔ́ ńmyɛ̌ ǹdə́ nə́ Da Yi rí rə̀ bwìrhì mù mú jàn yil à jǐrh ń tùntúm. Àmyɛ́ ǹdə́ nə́ da-byâ bɛ́ bə̀ ŋwɛ́nɛ́ nyɔ̀nɔ̀ mɔ́ gakó, nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ Yi gùúlí rə̀ ŋwɛ́nɛ́ Galəshi ní mú lyì bí ni pɔ, nə́ mʼé ce ába. ³Nə́ Da Yi ǹdə́ Cinu Yezu Kristə mʼa cĩ́ bwəl á yó, sə bə pə ába yə̀-zùlə́!

⁴Kristə pɔ ń myə̂l lé n mə n vwârh nə́ba nə́ yə̀-bəlwàálɛ́ wẽ́, mùnì n zwẽ nə́ba èlâsɛ̃´ lũ w ò bə càn mɔ́ wẽ́, ǹdə nə́ Da Yi gə́ nə́ ń yâl nɛ́. ⁵Yi bʼa nə còrhó byinə nə̀ bə zhɔ̌ zhe yilə! Amɛ̀n!

Yò-ècɔ̀nɔ̀ nyí rí wɔ́ rə̀dù sá

⁶Yi byẽ̀ ába Kristə sónó w yilə. Sə kɔn jàr nɛ̀ dɛ̃´dɛ̃´, á gə́ yàl làlà á pú á yẽ̌ de, á kʼá vò á zwẽ yò-ècɔ̀nɔ̀ nyí dõ mó yilə. ⁷À yě bə̀ lyì ŋwɛ́nɛ́ bə̀ nʼê zhizhiri á wun ní. Bə̀ nʼê yâl bə lyə́r Kristə yò-ècɔ̀nɔ̀ nyí rí zɔ̀mà nɛ́, sə lwarna bə̀ yò-ècɔ̀nɔ̀ nyí dõ tɛ̀nɛ́ yé. ⁸Kɔn gə lyɛ̃ yò-ècɔ̀nɔ̀ nyí rí tɛ̀bɛ́ nə́ bwə̀l nə́ byili ába mó, lò gə bwə̀l kɔn dõ, bá è gə wɔ́ nə́myɛ̌ cìcì, bá è gə wɔ́ màlɛ́ka è shí dɛ̃̌ myɛ, sə Yi zhìlì rə̀-ná-cìnə́ bé yò! ⁹Nə́ jɛ̀rɛ̀ nə́ byili ába rə̀myɛ́, sə èlâsɛ̃´, à kʼâ nʼâ byili ába rə̀myɛ́ kə́dò: lò gə bwə̀l yò-ècɔ̀nɔ̀ nyí dõ n byili ába, rə̀myɛ́ ǹdə́ tɛ̀bɛ́ á zwẽ mó də̀ rə̀dù, sə Yi zhìlì rə̀-ná-cí yò!

¹⁰Á nʼá bùl bə̀ à gə́ zɔ̀m èta mɔ́, wɔ́ numbyíní pùbùlə̀ ráá Yi pùbùlə̀ wɔ̀rhɔ́ à nʼâ pyà? Wɔ́ numbyíní wu-nyɔ̃̀ à nʼâ pyà nà? È gə yʼà wɔ́ numbyíní wu-nyɔ̃̀ à nʼâ pyà, à gə kʼâ də̀ Kristə tùntùnnə̀ yé.

Wɔ́ Yi rə̀ cír Pwəə n jǐrh Kristə tùntúm

¹¹Da-byâ, à nʼâ yâl sʼá lwar bə̀ yò-ècɔ̀nɔ̀ nyí rí à nʼâ bwə̀l mó də̀ numbyíní nyân yé. ¹²Wɔ́ Yezu Kristə ń byili ri ni, sə è də̀ numbyíní è cèrhè rè nè yé.

¹³Á nyɛ̀ɛ̀ à tùntwĩ̀ĩ̀ rí gə́ yʼà wɔ́ nɛ́, ǹdə́ à yʼà gwẽ̌ ŋwɛ́nɛ́ Zhwifubá Yi-sɔ́má y wẽ́ mó. Á yě bʼà yʼà nʼâ nwɛ̀nɛ̀ Yi gùlú w lyì bí dɛ̃´dɛ̃´, à yʼà nʼâ yâl a zhìlì bə̀ yò. ¹⁴Rə̀myɛ́ yi ní, à yʼà nʼâ zwẽ Zhwifubá Yi-sɔ́má y nyə́ né du à shí-dwã bɛ́ nánzhəzhɔ̌. À yʼà zhe yə̀wâl dɛ̃´dɛ̃´ du bi nə́ nàmbala bɛ́ lùl-e-pwírí y nyə́ né wẽ́.

¹⁵Sə Yi cír ne ǹdə́ à gwẽ̌ ŋwɛ́nɛ́ à ná wẽ́, rə byẽ̀ nè ǹdə́ wu-bɔ̀nɔ̀. ¹⁶Rə̀ yʼà nʼê yâl rə byili ni rə̀ Byǐ mú párá, mùnì ga a bwə̀l ń yò w a byili byɛ̀bɛ́ bə̀ də̀ Zhwifubá mó ne. Dɛ̃ rɛ́ rə̀myɛ́ gə́ yúwə́, à kʼâ yə̀ zhì sʼa pyà bə̀ lò sɛ̃ nɛ ǹdə́ cícú yé. ¹⁷À yə̀ Zhərəzalɛm zhə̀l a nə byɛ̀bɛ́ bə̀ jɛ̀rɛ̀ nɛ̀ bə jǐrh tùntúmə́ mó myɛ yé, a jʼa zhì à kùr yó gàà mɔ́, a vò Arəbyi, a zɛ̃̀ a zhì gàà a kwɛ̃̀ a bə̀ Damaasɛ. ¹⁸A wɛ̀rhɛ́ byinə nə̀tɔ̀. Rə̀myɛ́ kwã nɛ́, a zɛ̃̀ a vò Zhərəzalɛm mùnì ga a lwar Pyɛɛrɛ párá, a wɛ̀rhɛ́ dwã shí ǹdə́ nə̀nu ń sono. ¹⁹À yə̀ tùntúm dõ nɛ gàà yé. Wɔ́ Cinu da-byǐ Zhakɛ dúdú à nɔwa. ²⁰Kɔn dɛ́ dɛ̀bɛ́ à nʼâ kɛ̃ à la ába pɔ èta mɔ́, à nʼâ byili Yi yé né bʼè də̀ kɔma à nʼâ gòm yé.

²¹Rə̀myɛ́ kwã nɛ́ kə́dò, a zhǐr a vò Siri ǹdə́ Shilishi tənèsé wə, ²²sə rə̀myɛ́ yi ní ǹdə́ Zhide tənà y Kristə-lyì gùúlí yʼà gwẽ̌ yə̀l à pár yé. ²³Sə wɔ́ nyɛ́ bə̀ yʼà nyɛ̌ lyì jàlà nʼê zɔ̀m à yò bə̀ zhe: “Shãã ga, bal mɔ́ mɔ̀bɔ́ èta mɔ́ yà ń nə́ ń nwɛ̀nɛ̀ nə́ba, ńmyɛ̌ ń zɛ̃̀ èlâsɛ̃´ ń nə́ ń bwə̀l Yi-ni-zhú yò-ècɔ̀nɔ̀ nyí rí, e jà ń yà ń nə́ ń yâl n cɔ̀ rə̀ yò.” Wɔ́ rə̀myɛ́ dúdú bə̀ yʼà yě, ²⁴sə bə̀ yʼà nʼê cèrhé Yi rə̀myɛ́ yilə.

Zhərəzalɛm Kristə-lyì gùlú w yé né cìnə́ bé byili bə̀ bə̀myɛ́ ǹdə́ Pwəə ga nyí wɔ́ rə̀dù

¹Byinə shí ǹdə́ nə̀na rə̀myɛ́ kwã nɛ́, à kʼa kwɛ̃̀ a vò Zhərəzalɛm, àmyɛ́ ǹdə́ Barnabaasɛ. A zə Titi a mʼa súlí. ²Wɔ́ Yi rə̀ byili ni rə̀myɛ́, sə à zhə̀l a nə Kristə-lyì bí gùlú w yé né cìnə́ bé bə̀ dúdú, a byili bi yò-ècɔ̀nɔ̀ nyí rí à nʼâ bwə̀l à byili byɛ̀bɛ́ bə̀ də̀ Zhwifubá ne mó. À yʼà tʼâ yâl bʼà tum dí à twĩ̀ mú ǹdə́ tɛ̀bɛ́ à gwẽ̌ nʼâ twĩ̀ mú yál kɔn nánfò yé.

³Titi mú ń yà ń tó ne mó wɔ́ Gərɛkɛ. Sə ǹdə́ rə̀myɛ́ ga, bə̀ yə̀ mɔ nyɛ́ɛ́ bə ce góm mó wẽ́ yé. ⁴Sə lyì jàlà bə̀ wɔ́ surhə námməlwâlsɛ cìnə́ yʼà tú bə zù nə́ wẽ́ ǹdə lyì-twə̂rh ta, bə̀ nʼê gòm kɔma bə̀ bə̀ wɔ́ nə́ da-byâ, e jʼà wɔ́ nə́ yǔr yil bə̀ yʼà túwə́. Bə̀myɛ́ mɔ́ yʼà nʼê yâl bə̀ ń góm. Bə̀ yʼà nʼê yâl bə ce nə́ jǐrh ǹdə yómə́ ta, e jʼà cìn-cìnú mú mɔ̀bɔ́ nə́ zhe mó wɔ́ Yezu Kristə sõ mə̀ shí ní. ⁵Sə nə́ yə̀ shɛ̀nɛ́ nə́ zwẽ bə̀ nyə̀ná nɛ́ námpɔ́lɛ́ myɛ cìcì yé, bə̀ nə́ yʼâ nʼé yâl bʼâ mɛ̃ Kristə yò-ècɔ̀nɔ̀ nyí rí zhə̀n dɛ́ wẽ́.

⁶È gə wɔ́ byɛ̀bɛ́ Kristə-lyì bí nʼê nyǐ ǹdə bə̀ gùlú w yé né cìnə́ bé ta mɔ́ yilə, bə̀ yə̀ nɛ nyɛ́ɛ́ bʼà wɛ̀rhɛ́ kɔn dõ a súlí yé. (Bə̀ gə́ yʼà wɔ́ nɛ́ mɔ́ də̀ kaka àmyɛ́ yil yé, bə̀ è gə wɔ́ Yi yilə, lyì bí gakó wɔ́ kɔn rə̀dù.) ⁷Yé né cìnə́ bé bə̀myɛ́ mɔ́ lwar bə̀ wɔ́ Yi rə̀ pɔ nɛ nyí bʼà bwə̂l yò-ècɔ̀nɔ̀ nyí rí a byili byɛ̀bɛ́ bə̀ də̀ Zhwifubá mó ne, ǹdə rə̀ gə́ pɔ nyí Pyɛɛrɛ myɛ nɛ bə̀ ń bwə̂l yò-ècɔ̀nɔ̀ nyí rí n byili Zhwifubá ne né. ⁸Yi ce Pyɛɛrɛ jǐrh rə̀ tùntúm Zhwifubá yilə, rə ce àmyɛ́ jǐrh rə̀ tùntúm byɛ̀bɛ́ bə̀ də̀ Zhwifubá mó yilə.

⁹Kristə-lyì bí yʼà nʼê nyǐ Zhakɛ ǹdə́ Pyɛɛrɛ ǹdə́ Zhã ǹdə bə̀ gùlú w yé né cìnə́ ta, sə bə̀myɛ lwar bə̀ wɔ́ Yi rə̀ pɔ nɛ tum dí rə̀myɛ́ mɔ́ rə̀ sónó w yilə. Bə zɛ̃̀ bə ce jɛ̃̀ àmyɛ́ ǹdə́ Barnabaasɛ jɔ̃̀ wà, bə mʼe byili bə̀ nə́myɛ̌ ǹdə́ bə̀myɛ́ ga nyí wɔ́ rə̀dù, bə̀ nə́myɛ̌ mə̂ sə nə́ vò byɛ̀bɛ́ bə̀ də̀ Zhwifubá mó sono, sə bə̀myɛ́ vò Zhwifubá sono. ¹⁰Sə tɛ̀bɛ́ bə̀ lwə̀l nə́ba bə̀ nə́ wɛ̀rhɛ́ mɔ́, wɔ́ nə́ lyǐrh Zhərəzalɛm gùlú w nə̀mwà bɛ́ yò, sə à yʼà nʼâ yâl a wɛ̀rhɛ́ rə̀myɛ́ ǹdə́ à wu gakó.

Lò mɔ̀bɔ́ ǹ zhí Kristə ne, ǹ gə wɔ́ Zhwifu, ǹ gə də̀ Zhwifu myɛ, ǹ bʼâ nə vwârh

¹¹Sə Pyɛɛrɛ gə́ tú n yí Ancɔɔsɛ, à bú mu lyì bí gakó yé né, bə̀ ń yà ń dówə́. ¹²Ń yà ń ju kùr ń nə́ ń tó Kristə-lyì bí byɛ̀bɛ́ bə̀ də̀ Zhwifubá mó ne ń jí. Rə̀myɛ́ kwã nɛ́, lyì dwã zɛ̃̀ bə shí Zhakɛ sono bə bà. Ywẽ zɛ̃̀ rə̀ zhe mo, ń kə́ ń bə shɛ̀ Kristə-lyì bí byɛ̀bɛ́ bə̀ də̀ Zhwifubá mó ne tó n jí yé, bə̀ byɛ̀bɛ́ bə̀ yʼà shí Zhakɛ sõ mó yʼà nʼê nyɛ́ɛ́ byɛ̀bɛ́ bə̀ də̀ Zhwifubá mó bə̀ bə̀ góm. ¹³Kristə-lyì bí dwã bɛ́ byɛ̀bɛ́ bə̀ wɔ́ Zhwifubá mó gakó zɛ̃̀ bə̀myɛ tó bə zù tùntwə̃̀ə̃̀ né nyɛ̀bɛ́ nə̀ yə̀ tó ǹdə́ kɔn dɛ̀bɛ́ bə̀ yě bə̀ rə̀ wɔ́ zhə̀n mɔ́ nɛ yé. Rə̀myɛ́ ce Barnabaasɛ myɛ tó n zù bə̀ nyə̀ná nɛ́. ¹⁴À gə́ pwírí bə̀ tʼâ zhə̀l zhə̀n sɔ́má y yó ǹdə yò-ècɔ̀nɔ̀ nyí rí gə́ nʼê byili ní mú, à wò Pyɛɛrɛ nɛ lyì bí gakó yé né: “Ǹmyɛ́ wɔ́ Zhwifu, sə ǹ jòm nyɔ̀nɔ̀ ǹdə lò mɔ̀bɔ́ ń də̀ Zhwifu ta. Ǹ yə̀ wɛ̀rhɛ́ ǹdə Zhwifubá ta yé. Bə̀kɔ́n yil ǹ nə zɛ̃̀ ǹ nə́ ǹ yâl ń nyɛ́ɛ́ byɛ̀bɛ́ bə̀ də̀ Zhwifubá mó bə wɛ̀rhɛ́ ǹdə Zhwifubá ta?”

¹⁵Nə́myɛ̌ wɔ́ Zhwifubá; nə́ də̀ ǹdə lyì bí dwã bɛ́ byɛ̀bɛ́ bə̀ yə̀l Yi nyə́ né mó ta yé. ¹⁶Sə ǹdə́ rə̀myɛ́ ga, nə́ yě bʼè də̀ Muyiisi nyə́ né zõ mó è bʼa ce numbyíní cẽ dóó zal yé. Wɔ́ ǹ gə zhí Yezu Kristə ne dúdú, fòró Yi ce ǹ kə́ ǹ bə dóó zhe yé. Wɔ́ rə̀myɛ́ è ce, nə́myɛ zù Yezu Kristə, mùnì ga nə́ gə́ zhí mu, sə Yi ce nə́ bə̀kʼá kʼé zə dwə́ə́re yé; sə è də̀ Muyiisi nyə́ né zõ è bʼa ce yé, bə̀ nyə́ né nə̀myɛ́ zõ mó wàr è bʼa ce lò cẽ dóó zal yé.

¹⁷Nə́myɛ̌ byɛ̀bɛ́ nə́ wɔ́ Zhwifubá, nə́ rʼé pyà sə Yi ce nə́ bə̀kʼá kʼé zə dwə́ə́re Kristə jàn yil mó, lyì bí gə tə̀ rə̀myɛ́ yil bə̀ nʼê nyǐ nə́myɛ ǹdə yə̀-bəlwàálɛ cìnə́ ta, è nə zɛ̃̀ wɔ́ Kristə ń ce nə́ jǐrh yə̀-bəlwàálɛ cìnə́? Rə̀myɛ́ də̀ zhə̀n yé. ¹⁸À gə zɛ̃̀ à kʼâ zwẽ Muyiisi nyə́ né à zhɔ̃̀ mɔ́, wɔ́ àmyɛ́ à nʼâ cĩ́ dóó à cìcì yó wə. ¹⁹Wɔ́ Muyiisi nyə́ né cìcì nə̀ ce a jǐrh ǹdə wɔ́ cú à cù ta, a du nə̀ wẽ́. Kɔn yàl èta, mùnì ga a yə̀ nɛ́ Yi yilə. À tó Kristə ne a cì də̀-jɔrhɔ́ yó. ²⁰Àmyɛ́ cìcì mú kʼâ tɛ̀nɛ́ yé. Wɔ́ Kristə ń ŋwɛ́nɛ́ à wẽ́. À gə́ ŋwɛ́nɛ́ cɛ yó èlâsɛ̃´ mɔ́, wɔ́ Yi Byǐ mú ń swéné ne n pə ń myə̂l à yil mó ne à zhí. ²¹À tʼâ yâl a zhɛ̃̀ Yi sónó w yé. Zhə̀nà, Muyiisi nyə́ né zõ mó gə yʼà wɔ̌ è ce lò cẽ dóó zal, sə́ nyǐ Kristə cu mú wɔ́ nánfò, mə̀ bə kùr zhe yé.

Muyiisi nyə́ né ǹdə́ Yi-ni-zhú mú də̀ rə̀dù yé

¹Galəshi lyì, bə surhə zhe cìnə́, wɔ́ mɔ̌ lò ń pyìrhí á surhə né èta mɔ́? E jà bə byili bə̀ gə́ pəpa Yezu Kristə də̀-jɔrhɔ́ w yó né mó pamparɛ̃ɛ̃ á gakó yé né á yírhə́ na. ²À nʼâ yâl a bwə̀rh ába zɔ̀mɛ̀ rə̀dù sásá sʼá lyár nɛ: wɔ́ Muyiisi nyə́ né zõ mó è ce Eshirhə náàcɛ̀nɛ́ só á yó wə, ráá yò-ècɔ̀nɔ̀ nyí rí á nyɛ̀ɛ̀ á zɛ̃̀ á zwẽ de mó è ce? ³Surhə mwìrì ába nà? Á ji kùr ǹdə́ Eshirhə náàcɛ̀nɛ́ jàn, èlâsɛ̃´ á zɛ̃̀ á nʼá yâl á báásɛ ǹdʼá sə̀pwà jàn? ⁴Kɔn dɛ́ tɛ̀bɛ́ Yi tó á dɛnnɛ rə wɛ̀rhɛ́ mɔ́ gakó bʼa yə̀ nánfò? Rə̀ wàr rə̀ bʼa yə̀ nánfò yé. ⁵Yi gə́ nʼê ce rə̀ Eshirhə y swé á yó wə, rə jʼà nʼê wɛ̀rhɛ́ màmyaarhɛ nánzhəzhɔ̌ á sõ mó, wɔ́ byè yilə? Wɔ́ Muyiisi nyə́ né zõ mó è ce, ráá yò-ècɔ̀nɔ̀ nyí rí á nyɛ̀ɛ̀ á zɛ̃̀ á zwẽ de mó è ce?

⁶Abəraham myɛ yàl èta. Bə̀ zɔ̀m ń yò Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Ń zɔ Yi zhə̀nà. Rə zɛ̃̀ rə nyǐ mu ǹdə ń bə dóó zhe ta, ń gə́ zhí ri mú yilə.” ⁷Lwarna bə̀ wɔ́ byɛ̀bɛ́ bə̀ zhí Yi ni mú bə̀ wɔ́ Abəraham nɛ̀mɛ́. ⁸Bə̀ dámâ bə byili Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ byɛ̀bɛ́ bə̀ də̀ Zhwifubá mó gə zù Yi, rə̀ bʼa ce bə̀ kʼê tʼâ la dwə́ə́re zal yé. Wɔ́ rə̀myɛ́ è ce, rə̀ dámâ rə byili yò-ècɔ̀nɔ̀ nyí rí Abəraham nɛ. Rə̀ wò mò: “À bʼa tó ǹmyɛ́ dɛnnɛ a cĩ́ bwəl lũ w lyì bí gakó yó.” ⁹Abəraham gə́ yà ń zhí Yi ni mú ce rə̀ cĩ́ bwəl ń yó. Èta, lò mɔ̀bɔ́ gakó ǹmyɛ zhí ri ǹdə Abəraham ta, rə̀ bʼa cĩ́ bwəl ǹ yó ǹdə rə̀ gə́ cĩ́ bwəl Abəraham yó né.

¹⁰Sə lò mɔ̀bɔ́ gakó ń nə́ ń bùl bə̀ Muyiisi nyə́ né zõ mó bʼa ce n nə vwârh, rə̀-ná-cí yò zhìlì. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Lò mɔ̀bɔ́ ǹ tá ǹ wɛ̀rhɛ́ ǹdə bə̀ gə́ byili nyə́ né sɛ́bɛ́ rɛ́ wẽ́ né dɛ̃ gakó, ǹ yò bʼa zhìlì.” ¹¹Bə̀ byili pamparɛ̃ɛ̃ bə̀ Muyiisi nyə́ né zõ mó wàr è bʼa ce lò cẽ dóó zal yé. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Lò mɔ̀bɔ́ ǹ zhí Yi ni, rə̀ bʼa ce ǹ kə́ ǹ tá ǹ la dóó zal yé. Ǹ bʼâ nə nyǔ.” ¹²Muyiisi nyə́ né zõ mó ǹdə́ Yi-ni-zhú mú də̀ rə̀dù yé. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Lò mɔ̀bɔ́ ǹ wɛ̀rhɛ́ kɔn dɛ̀bɛ́ gakó nyə́ né byili mú, ǹ bʼâ zə nyǔ nyə́ né jàn yilə.”

¹³Kristə lwə̂r nə́ba nyə́ né nə̀ yʼà lyẽ nə́ba mó wẽ́. Ń zwẽ dɛ̀bɛ́ rə̀ yʼà zhìlì nə́ yò mó n cĩ́ ń cìcì yó wə. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Lò mɔ̀bɔ́ ń tɔ̌r nyíní cǒ yó, ń yò zhìlì.” ¹⁴Kɔn yàl èta mùnì ga byɛ̀bɛ́ bə̀ də̀ Zhwifubá mó nə bwəl lé Yi yʼà bwəl rə̀ nyí Abəraham nɛ mɔ́ Yezu Kristə jàn yilə. Nə́ gə zhí Yi ni, nə́ bʼâ nə kɔn dɛ́ tɛ̀bɛ́ Yi yʼà bwəl rə̀ nyí mú. Kɔn dɛ́ rə̀myɛ́ mɔ́ wɔ́ Eshirhə náàcɛ̀nɛ́.

Muyiisi nyə́ né wàr nə̀ bʼa cɔ̀ Yi nyì-bwelé y yé

¹⁵Da-byâ, à bʼa zə kɔn rə̀dù rə̀ ŋwɛ́nɛ́ nə́myɛ̌ numbyínə́ bé cìcì tùntwə̃̀ə̃̀ né wẽ́ a bʼa myɛrhɛ: lwarna bə̀ lò gə bwəl nyí ǹdə nyə́ né gə́ nʼê byili ní, lò dõ wàr ń mà n shí kwã nɛ́ n cɔ̀ rɛ̀, ráá n súlí kɔn dõ né yé. ¹⁶Èta myɛ, Yi bwəl nyí bə̀ rə̀ la kɔn Abəraham ǹdə́ ń nɔ̃̌ nɛ pɔ. Wɔ́ Abəraham ǹdə́ ń nɔ̃̌ nɛ Yi bwəl nyí rí. Bə̀ yə̀ kɛ̃ bə̀: “Abəraham ǹdə́ ń nɛ̀mɛ́”, ǹdə wɔ́ lyì nánzhəzhɔ̌ yò bə̀ nʼê zɔ̀m ta yé. Bə̀ kɛ̃ bə̀: “Abəraham ǹdə́ ń nɔ̃̌.” Rə̀myɛ́ nʼê byili bə̀ wɔ́ lò mə̀dù yò bə̀ zɔ̀m. Lwarna bə̀ nɔ̃̌ w òmyɛ́ mɔ́ wɔ́ Kristə. ¹⁷Wɔ́ yál à nʼâ yâl a wɔ̀ bə̀ nyǐ Yi yʼà bwəl nyí, rə wɔ̀ bə̀ nyì-bwelé y èmyɛ́ tʼâ la kwârh gaga yé. Rə̀ pɔ rə̀ nyə́ né Muyiisi ni ǹdə́ rə̀ gə́ wɛ̀rhɛ́ rə̀ nyì-bwelé y mó zhe byinə zwã̌-àna ǹdə́ shə́-ètɔ̀. Nyə́ né nə̀myɛ́ wàr nə̀ bʼa cɔ̀ rə̀ nyí rí rə̀ bwəl mó rə jǐrh kɔn nánfò yé. ¹⁸È gə wɔ́ nyə́ né dɛnnɛ lò mà n tó né n nə kɔn dɛ́ dɛ̀bɛ́ Yi yʼà byili bə̀ rə̀ la rə̀ lyì bí ni pɔ mɔ́, sə́ nyǐ lò kə́ ń wàr ń mà n nə rɛ nyí rí rə̀ yʼà bwəl mó yil yé. E jʼà wɔ́ nyí rí rə̀ bwəl mó dɛnnɛ rə̀ tó né rə byili rə̀ sónó w Abəraham nɛ.

Wɔ́ bə̀kɔ́n yil Muyiisi nyə́ né ŋwɛ́nɛ́?

¹⁹Wɔ́ bə̀kɔ́n yil nyə́ né ŋwɛ́nɛ́? Nə̀myɛ́ wɔ́ súlí nə̀ súlí ní, mùnì ga nə sɛ̃ lyì bí ni bə lwar kɔn dɛ̀bɛ́ ná-dwí yil rə̀ də̀ Yi pùbùlə̀, bə̀ mʼê dɛ̃̀ nɔ̃̌ w Yi bwəl ò nyí Abəraham nɛ mɔ́. È gə wɔ́ Yi nyə́ né yilə, wɔ́ màlɛ́kabá bə̀ tó numbyíní dɛnnɛ bə bə̀ e byili ni lyì bí ni. ²⁰Sə è gə wɔ́ rə̀ nyì-bwelé y yilə, rə̀ yə̀ lò dɛnnɛ tó yé; wɔ́ rə̀ cìcì rə̀ zɔ̀m.

²¹Rə̀myɛ́ nə zɛ̃̀ è nʼê yâl e byili bə̀ Muyiisi nyə́ né nʼê cə̀r Yi nyì-bwelé yə́? È də̀ èta yé. Nyə́ né bə̀ pɔ mɔ́ gə yʼà wɔ̌ nə̀ nʼê pɛ nyǔ numbyíní ni, lyì bí yʼà wɔ̌ bə̀ mʼa tó nə̀ dɛnnɛ bə cẽ dwə́ə́re zal yé. ²²Yi zɔ̀mɛ̀ rɛ́ sɛ́bɛ́ rɛ́ byili bə̀ yə̀-bəlɔ̀lɔ́ cǐ lũ w lyì bí gakó. Wɔ́ rə̀myɛ́ è ce, kɔn dɛ́ dɛ̀bɛ́ Yi bwəl rə̀ nyí mú, rə̀ bʼa pə rɛ byɛ̀bɛ́ bə̀ zù Kristə mó ne, bə̀ gə́ zhí mu mú yilə.

²³Shãã ga, wɔ́ Muyiisi nyə́ né nə̀ yʼà nʼê yìlì nə́ba ǹdə byə̀nə́-jì lyì ta, nə́ mʼé dɛ̃̀ Yi-ni-zhú mú cə-kɔ́lɔ́ wá, mùnì ga, cə-kɔ́lɔ́ w òmyɛ́ gə yúwə́, sə Yi byili nə́ba nə́ gə́ bʼâ zhí ri ní. ²⁴Wɔ́ èta nyə́ né yìlì nə́ba né, kɔn bʼe yí Kristə twírí yə́, mùnì ga Yi ce nə́ bə̀kʼá kʼé zə dwə́ə́re, nə́ gə́ zhí ri mú yilə. ²⁵Sə èlâsɛ̃´, Yi-ni-zhú mú cə-kɔ́lɔ́ w gə́ yú mú ce, nə́ kʼé bə yìlnə̀ mó ńmyɛ̌ mɔ́ tum zhe yé.

²⁶Ámyɛ̌ gakó wɔ́ á gə́ zù Yezu Kristə mó è ce, á wɔ́ Yi byâ. ²⁷Ámyɛ̌ byɛ̀bɛ́ gakó á zwẽ nɛ̃̌-shɔ Yezu Kristə wẽ́ mó, wɔ́ zú á zù mù ǹdə kàmə̀-zwǐ ta. ²⁸È kʼê bə zhe bə̀ mɔ̀bɔ́ wɔ́ Zhwifu, mɔ̀bɔ́ də̀ Zhwifu yé; è bə zhe bə̀ mɔ̀bɔ́ wɔ́ yóm, mɔ̀bɔ́ cǐ ń cìn yé; è kʼê bə zhe bə̀ mɔ̀bɔ́ wɔ́ bal, mɔ̀bɔ́ wɔ́ kɛ̃ yé, bʼâ gakó jǐrh kɔn rə̀dù sá Yezu Kristə wẽ́. ²⁹Á gə́ wɔ́ Kristə lyì mú ce, á wɔ́ Abəraham nɛ̀mɛ́, sə á bʼâ nə cəl kɔn dɛ́ dɛ̀bɛ́ Yi bwəl nyí bə̀ rə̀ la Abəraham nɛ pɔ mɔ́ wẽ́.

¹Sə àmyɛ́ nʼâ bùl bə̀ bə̀sɔ́bwɛ̀lɛ́ gə la bə̀ e cìní è da jɛ̃̀-kɔn myɛ, è gə́ gwẽ̌ wɔ́ námpɔ́lɛ́ mɔ́ ce, è nyɛ̌ ǹdə yóm ta, e jʼà wɔ́ èmyɛ́ è la bə̀ e cìní kɔn gakó. ²È mə̂ sʼe zwẽ lyì bí byɛ̀bɛ́ bə̀ nʼê nyǐ èmyɛ́ ǹdə́ è kɔn dɛ́ ga yò mó nyí ni, kɔn bʼe yí yi rí tɛ̀bɛ́ è da byili mú. ³Nə́myɛ wɔ́ èta. Nə́ gə́ yʼà gwẽ̌ wɔ́ ǹdə bə̀sɔ́ná ta yi ní, nə́ yʼâ wɔ́ lũ w wẽ̀ dé tɛ̀bɛ́ yírhə́ wàr nə̀ nɛ mɔ́ yómə́. ⁴Sə yi rí gə́ tú e yí, Yi twĩ̀ rə̀ Byǐ mú. Wɔ́ kɛ̃ ń lùl mò; ń lùl mò Zhwifubá wẽ́, n zwẽ bə̀ nyə́ né, ⁵mùnì n vwârh byɛ̀bɛ́ bə̀ wɔ́ nyə́ né yómə́ mó, sə nə́myɛ ŋwɛ̀nɛ́ nə́ tó rə̀myɛ́ dɛnnɛ nə́ jǐrh Yi byâ.

⁶Yi twĩ̀ rə̀ Byǐ mú Eshirhə y nə́ wun ní wẽ́, rə mʼe byili bʼâ wɔ́ rə̀ byâ zhə̀nà, sə Eshirhə y ce nə́ rʼé bya nə́ zhe: “Aba”, rə̀ kùr wɔ́: “À Da”. ⁷Rə̀myɛ́ ce, ǹ kə́ ǹ də̀ yóm yé. Ǹ wɔ́ Yi byǐ. Sə ǹ gə́ wɔ́ Yi byǐ mú ce, ǹ bʼâ nə cəl kɔn dɛ́ dɛ̀bɛ́ Yi tɛnɛ rə̀ byâ bɛ́ yil mó wẽ́.

Pwəə wu nʼô zɛ̃̀ Galəshi Kristə-lyì bí yilə

⁸Á yʼâ yə̀l Yi pár shãã ga yé. Á yʼâ wɔ́ wẽ̀ dé tɛ̀bɛ́ yírhə́ bə nɛ, rə jʼà də̀ yə mó yómə́. ⁹Sə èlâsɛ̃´, á lwar Yi párá. Kɔn du, Yi cìcì mú myɛ yě bʼâ wɔ́ rə̀myɛ́ byâ. Byè yil á nə zɛ̃̀ á kʼá nʼá yâl á zù wẽ̀ dé rə̀myɛ́ tɛ̀bɛ́ rə̀ bə ŋwɔ̀nɔ́ zhe, rə jʼà bə kùr zhe mó? E zɛ̃̀ wɔ́ yál á kʼá nʼá yâl á jǐrh rə̀ yómə́, náá etəra? ¹⁰Á nʼá bùl bə̀ dwã ǹdə́ cànsɛ̀ ǹdə́ byinə jàlà ŋwɛ́nɛ́ nə̀ zhe kùr du nə̀ dwã bɛ́. Á nʼá bùl myɛ bə̀ yə jàlà ŋwɛ́nɛ́ nə̀ du nə̀ dwã bɛ́. ¹¹À tʼâ yâl bə̀ tum dí à twĩ̀ á yil mó yál nánfò yé. Wɔ́ rə̀myɛ́ ywẽ è zhe ne.

¹²Da-byâ, à jǐrh ǹdə á ta. Rə̀myɛ́ ce, à nʼâ lwə̀l ába: wɛ̀rhɛ́na ǹdə à ta. Á yə̀ nɛ lwɛlɛ də́-byǐ wɛ̀rhɛ́ yé. ¹³Á yě bə̀ à gə́ jɛ̀rɛ̀ a bwə̀l yò-ècɔ̀nɔ̀ nyí rí a byili ába mó, wɔ́ à gə́ yʼà bə jàn zhe mó yi ní. ¹⁴À yala nɛ́ gə́ yʼà nyɛ̌ nɛ́ mɔ́ yʼà wɔ̌ rə̀ bʼa ce á nyɛ̃´ nɛ, ráá á dùr á yẽ̌ ne, sə á yə̀ èta wɛ̀rhɛ́ yé. Á zwẽ à zhəəlé ǹdə Yi màlɛ́ka ta. Á gaga mɔ́ zwẽ ne ǹdə Yezu Kristə ta. ¹⁵Á wu-nyɔ̃̀ w shãã ga mɔ́ tó yẽ̀? Á gə yʼâ wɔ̌ á yírhə́ né á la jârh á pɛ̃ rə̀myɛ́ yi ní myɛ, á gə jàrh nɛ̀. Àmyɛ́ cìcì mú wɔ́ rə̀myɛ́ zhə̀n-cí. ¹⁶E zɛ̃̀ wɔ́ à gə́ nʼâ byili ába zhə̀n dɛ́ mɔ́ è ce a jǐrh á zù-bal èlâsɛ̃´?

¹⁷Lyì ŋwɛ́nɛ́ bə̀ nʼê wɛ̀rhɛ́ ǹdə wɔ́ só bə̀ só ába ta, e jʼà wɔ́ kɔma. Wɔ́ yál bə̀ nʼê yâl bə pɔr ába àmyɛ́ kwã nɛ́, á kʼá tó bə̀myɛ́ nɛ. ¹⁸Á mə̂ sʼá zə yə̀wâl twéé twéé ǹdə́ cɛ̀nɛ̀ wɔ̀rhɔ́, sə è bə̀kʼa yə̀ à gə ŋwɛ́nɛ́ á sõ yi ní dúdú yé. ¹⁹À byâ, zwini kʼê zhe ne dɛ̃´dɛ̃´ á yilə, ǹdə kɛ̃ pwǐ gə́ yʼa yì ní, sə rə̀ nʼê nwɛ̀nɛ̀ nɛ̀ kɔn la mʼe yí Kristə jòm á wẽ́ pamparɛ̃ɛ̃. ²⁰À yʼà só ǹdə́ à wu gakó sʼa yə̀ á sõ a kwɛrhɛ a zɔ̀m ǹdʼába, bʼà wu nʼô zɛ̃̀ á yilə.

Agaarɛ ǹdə́ Sara wɔ́ dɔbrɛ kùrə̀ nə̀lyè myɔrhɔ

²¹Ámyɛ̌ byɛ̀bɛ́ á nʼá yâl á yə̀ Muyiisi nyə́ né yómə́ mó, wálna àmyɛ́ nɛ: á bə kɔn dɛ́ dɛ̀bɛ́ bə̀ kɛ̃ nyə́ né sɛ́bɛ́ rɛ́ wẽ́ mó kùr nyɛ̌ nà? ²²Rə̀ nʼê byili bə̀ Abəraham nɔ bala-byâ bə̀lyè. Mə̀dù y wɔ́ Agaarɛ ń lùl mò; ń dõ mó wɔ́ Sara ń lùl mò. Sə Agaarɛ mɔ́ yà ń wɔ́ yóm. Wɔ́ Sara ń yà ń wɔ́ Abəraham kɛ̃ mɔ́ páá mɔ́. ²³Byǐ mú mɔ̀bɔ́ Agaarɛ lùl mó, yàl numbyíní pùbùlə̀ kɔna, sə mɔ̀bɔ́ Sara lùl mó wɔ́ Yi nyì-bwelé y pyǐrh kɔna.

^24-25Rə̀myɛ́ nʼê byili nə́ba bə̀ kana bɛ́ bə̀lyè y nʼê myɛrhɛ dɔbrɛ́ kùrə̀ nə̀lyè yə́. Agaarɛ byâ bɛ́ wɔ́ yómə́. Ń nə́ ń myɛrhɛ dɔbrɛ́ tɛ̀bɛ́ Yi zɔ Sənəyi pyɔ̀ w yó mó. Pyɔ̀ w òmyɛ́ ŋwɛ́nɛ́ Arəbyi ní, n jà ń nə́ ń myɛrhɛ Zhərəzalɛm. Cɔ w òmyɛ́ ŋwɛ́nɛ́ zà zà, òmyɛ́ ǹdə́ ò lyì bí ga wɔ́ yómə́. ²⁶Sə Zhərəzalɛm, cɔ w kɔ̀bɔ́ ò ŋwɛ́nɛ́ dɛ̃̌ Arəzana w mɔ́, cǐ ò cìnə̀. Wɔ́ òmyɛ́ ò wɔ́ nə́ ná mɔ́. ²⁷Èta, bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:

“Ǹmyɛ́ kɛ̃ mɔ́ mɔ̀bɔ́ ǹ yə̀ lùl mó, ce ǹ wu yə̀ nyɛ̀n.

Ǹmyɛ́ mɔ̀bɔ́ ǹ yə̀ byǐ lul zúzúnú pár lwar mɔ́, búbwéé ǹdə́ wu-nyɔ̃̀;

bə̀ kɛ̃ mɔ̀bɔ́ bə̀ yârh tɛ̃´, bə̀ tʼâ cili ń sõ, ń mà n nə bə̀sɔ́ná nánzhəzhɔ̌ du mɔ̀bɔ́ ń byal mɔ́ só mó.”

²⁸Da-byâ, è gə wɔ́ ámyɛ̌ yilə, á wɔ́ Yi nyì-bwelé y byâ ǹdə Yəzakɛ ta. ²⁹Sə shãã ga, byǐ mú mɔ̀bɔ́ bə̀ yʼà lùl ǹdə́ numbyíní pùbùlə̀ mó, yà ń nə́ ń nwɛ̀nɛ̀ mɔ̀bɔ́ ń yàl Yi Eshirhə y kɔn mɔ́, sə zà zà myɛ, kɔn gwẽ̌ wɔ́ èta. ³⁰Wɔ́ bə̀kɔ́n Yi zɔ̀mɛ̀ rɛ́ sɛ́bɛ́ rɛ́ nʼê byili? Rə̀ wòwə̀: “Vǔr yə-kɛ̃ mɔ́ ǹdə́ ń byǐ mú ga ǹ sono, bə̀ yə-kɛ̃ mɔ́ byǐ mú bə mə̂ sə n zə cəl ń da jɛ̃̀-kɔn dɛ́ wẽ́ yé. Wɔ́ da mɔ́ kɛ̃ mɔ́ páá mɔ́ byǐ mú ń mə̂ sə n cìní ri.” ³¹Da-byâ, nə́ də̀ yə-kɛ̃ mɔ́ byâ yé. Nə́ wɔ́ kɛ̃ mɔ́ páá mɔ́ byâ.

Kristə zwẽ nə́ba, nə́ zɛ̃̀ nə́ cǐ nə́ cìnə̀

¹Kristə zwẽ nə́ba, mùnì ga nə́ cìní nə́ cìn zhə̀n zhə̀nà. Rə̀myɛ́ ce, zhǐnə kẽkẽ, á bə̀kʼá shɛ̀nɛ́ á kʼá ce á cìn yómdé jɔ̃̀ w yé.

²Cilinə kɔn dɛ̀bɛ́ àmyɛ́ Pwəə la ába byilu: á gə ce bə̀ nʼê gòm ába, sʼá lwar bə̀ Kristə nyə̀ná nɛ́ kʼê tʼâ la kùr zal á yil yé.5.2 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili góm mó kùr gə́ nʼê yâl e wɔ̀ nɛ́ gàà mɔ́.³À gwẽ̌ nʼâ bwérhé à byili ába bə̀ lò mɔ̀bɔ́ gakó ǹ nə́ ǹ ce bə gòm mó, kɔn wɔ́ nyɔ́ɔ́ sə́ zwẽ Muyiisi nyə́ né gakó. ⁴Ámyɛ̌ byɛ̀bɛ́ á nʼá yâl á zwẽ Muyiisi nyə́ né mùnì ga á bə̀kʼá kʼá zə dwə́ə́re mó, á pɔr Kristə kwã nɛ́, ce á kʼá wàr á bʼâ nə Yi pɛnɛ́ y yé. ⁵Sə è gə wɔ́ nə́myɛ̌ yilə, Yi bʼa ce nə́ kʼé tʼá la dwə́ə́re zal yé. Wɔ́ rə̀myɛ́ nə́ rʼé dɛ̃̀ ǹdə́ Eshirhə náàcɛ̀nɛ́ jàn, nə́ gə́ zhí Kristə ne mó yilə. ⁶Lò ǹ gə zù Yezu Kristə, ǹ gə gòm ráá ǹ yə̀ gòm, rə̀myɛ́ də̀ kaka yé. Tɛ̀bɛ́ rə̀ zhe kùr du mú, wɔ́ ǹ gə zhí Yi ni ń zɛ̃̀ ǹ nə́ ǹ twĩ̀ sónó tumə.

⁷Á ju kùr cɛ̀nɛ̀. È nə wɔ́ yẽ̀ lò ń ce á yẽ̌ zhə̀n dɛ́ zõ mó ne? ⁸Bùlə̀ né nə̀myɛ́ mɔ́ yə̀ Yi rí tɛ̀bɛ́ rə̀ byẽ̀ ába mó sõ shí yé. ⁹Bə̀ yʼa wɔ̀ bə̀ sã̀-nə̀byẽ̌ námpɔ́lɛ́ gə co mún wẽ́, mə̀ gakó nʼê zɛ̃̀. ¹⁰Sə Cinu jàn yil à zhe á zhə̀nà. Ń ce à yě pamparɛ̃ɛ̃ bʼâ bùlə̀ né ǹdə́ à nyə̀ná nɛ́ ga wɔ́ rə̀dù. Sə è gə wɔ́ lò mó mɔ̀bɔ́ ń nə́ ń zhízhǐ á wun ní mú yilə, ń gə wɔ́ mámá myɛ, Yi bʼa pɔ̃ còrhò-tum.

¹¹Da-byâ, lwarna bʼè gə wɔ́ àmyɛ́ cìcì mú yilə, à gə yʼà gwẽ̌ nʼâ bwə̀l à byili lyì bí ni bə̀ kɔn wɔ́ nyɔ́ɔ́ sə bə gõ bè, wɔ́ bə̀kɔ́n yil bə̀ yʼà mʼa cə̀ə̀lè bə̀ nʼê nwɛ̀nɛ̀ nɛ̀? À gə yʼà nʼâ byili èta, Kristə də̀-jɔrhɔ́ w nyə̀ná nɛ́ yʼà kʼê tʼâ la yò yál lò lò sõ yé. ¹²Sə è gə wɔ́ lyì bí byɛ̀bɛ́ bə̀ ŋwɛ́nɛ́ á wẽ́ bə̀ nʼê zhizhiri á wun ní mú yilə, bə̀ mə̂ sə bə ce bə kɔkwa bɛ!

Yẽ̌nə á cìn nì á ce Eshirhə náàcɛ̀nɛ́ jɔ̃̀ wà

¹³Da-byâ, è gə wɔ́ ámyɛ̌ yilə, Yi byẽ̀ ába mùnì ga á cìní á cìnə̀, sə á bə mə̂ sʼá zə á cìn-cìnú mú mə̀myɛ́ á bʼá twĩ̀ á yala nɛ́ pùbùlə̀ yé. Zəna zɔ̀mɛ̀ rɛ́ rə̀myɛ́ á mʼá sɛ̃ dwã nɛ ǹdə́ sónó. ¹⁴Kɔn dɛ̀bɛ́ Muyiisi nyə́ né nʼê byili mú gakó ŋwɛ́nɛ́ zɔ̀mɛ̀ rə̀dù wẽ́. Zɔ̀mɛ̀ rɛ́ rə̀myɛ́ nʼê wə̀lə̀: “Swéné ǹ dõ ǹdə ǹ cìcì ta.” ¹⁵Sə dɛ̃̌na á cìnə̀. Á gə zɛ̃̀ á nʼá vwar dwã ǹdə kǔlsi ta, á nʼá nwɛ̀nɛ̀ dwã, á nʼá cɛ̀mɛ̀ dwã, lwarna bʼâ mʼâ zhìlì dwã yò.

¹⁶Wɔ́ rə̀myɛ́ è ce, à nʼâ wə̀l ába: yẽ̌nə á cìn nì á ce Eshirhə náàcɛ̀nɛ́ jɔ̃̀ wà, e zə ába e mʼe vò. Èta, á kʼá tʼá la á yala nɛ́ shilə námməlwâlsɛ́ pùbùlə̀ wɔ̀rhɔ́ yé. ¹⁷Lwarna bə̀ kɔn dɛ̀bɛ́ á yala nɛ́ shilə né nʼê yâl mɔ́, Eshirhə náàcɛ̀nɛ́ tʼâ yâl lɛ yé. Tɛ̀bɛ́ Eshirhə náàcɛ̀nɛ́ myɛ nʼê yâl mɔ́, á yala nɛ́ shilə né tʼâ yâl lɛ yé. Yala nɛ́ shilə né ǹdə́ Eshirhə náàcɛ̀nɛ́ nʼê bwí dwã. Wɔ́ rə̀myɛ́ è ce, cɛ̀nɛ̀ rɛ́ á nʼá yâl á wɛ̀rhɛ́ mɔ́, á wàr rɛ̀ sʼá wɛ̀rhɛ́ yé. ¹⁸Sə è gə wɔ́ Eshirhə náàcɛ̀nɛ́ è nʼê zə ába è zhə̀lə̀, á kʼá tʼá la nyə́ né yómə́ yál yé.

¹⁹Á cìcì mú yě kɔn ná-dwí yil yala nɛ́ shilə né námməlwâlsɛ́ nʼê ce lyì bí wɛ̀rhɛ́. Sə̀ nʼê ce bə̀ wɛ̀rhɛ́ fwə̂l tumə; bə̀ nʼê twĩ̀ tùntùm-bəywààlɛ̀; bə̀ nʼê twĩ̀ ǹdə bə̀ gə́ só né; ²⁰bə̀ nʼê wùlì tɛ̃´ bə̀ cèrhé wẽ̀ tɛ̀bɛ́ rə̀ də̀ Yi; bə̀ nʼê wɛ̀rhɛ́ cə́mə́ námməlwâlsɛ; bə̀ nʼê súl dwã; bə̀ nʼê bwí dwã; bə̀ nʼê dùr dwã bwɛ̃̌; bə̀ nʼê kwè lyimə ǹdə́ dwã; bə̀ nʼê yâl sə lyì bí gakó nə bɛ́; bə̀ nʼê pɔr dwã nɛ kùkùl kùkùl, bə̀ gə́ bə dwã zɔ̀mà kùr nyɛ̌ yilə; ²¹bə̀ nʼê dùr bə̀ dwã bɛ́ wẽ̀ dé bwɛ̃̌; bə̀ nʼê nywɛ̀ sɛ̃´ kɔn lyɛ̃ cɛ nɛ; bə̀ nʼê jí dɛ̃´dɛ̃´. Wẽ̀ dé rə̀myɛ́ dwí rí dwã myɛ súlí rə̀ ŋwɛ́nɛ́ bə̀ nʼê wɛ̀rhɛ́. À kʼâ nʼâ byili ába, ǹdə à gə́ jɛ̀rɛ̀ a byili ní: lyì bí byɛ̀bɛ́ bə̀ nʼê wɛ̀rhɛ́ tumə né nə̀myɛ́ mɔ́ dwí rí gakó tʼâ la jàà nɔ Yi tənà y wẽ́ yé.

²²Sə kɔn dɛ̀bɛ́ Eshirhə náàcɛ̀nɛ́ nʼê pɛ mɔ́, wɔ́ dwã sónó, wu-nyɔ̃̀, yə̀-zùlə́, yala nɛ zhìlù, cɛ̀nɛ̀ wɔ̀rhɔ́, dwã nɛ sãɔ̃, e zə dwã zhə̀nà, ²³wu-bɔ̀nɔ̀, ǹdə́ cìn-zal. Muyiisi nyə́ né tʼâ cẽ rə̀myɛ́ yò yé. ²⁴Byɛ̀bɛ́ bə̀ zù Yezu Kristə mó, bə̀ pəpa bə̀ yala nɛ́ shilə námməlwâlsɛ́ sə̀ nʼê zə bɛ sə̀ zhə̀l mó də̀-jɔrhɔ́ yó. ²⁵Wɔ́ Eshirhə náàcɛ̀nɛ́ è ce nə́ ŋwɛ́nɛ́. Rə̀myɛ́ ce, yẽ̌nə e zə nə́ba e mʼe vò.

²⁶Nə́ bə̀kʼá yə̀ cìn-byilu cìnə́ yé. Nə́ bə̀kʼá bú dwã yé, sə nə́ bə̀kʼá dùr dwã bwɛ̃̌ myɛ yé.

Sɛ̃na dwã nɛ á yò-cə̀ə̀lé wẽ́

¹Da-byâ, wɔ́ Eshirhə náàcɛ̀nɛ́ è nʼê zə ába è zhə̀lə̀. Rə̀myɛ́ ce, á gə nɔ lò mɔ̀bɔ́ ń nə́ ń dwé, sʼá kʼá zə mɔ ǹdə́ wu-bɔ̀nɔ̀ á cĩ́ sɔ́má kɛ̀bɛ́ è càn yó. Sə à nʼâ wə̀l ámyɛ̌ cìcì mú mə̀dù mə̀dù gakó ne: á yʼâ dɛ̃̀ á cìnə̀, bə̀ ǹ cìcì mú wɔ̌ ǹ twi sòlò wẽ́. ²Sɛ̃na dwã nɛ á yò-cə̀ə̀lé wẽ́. Á gə nʼá wɛ̀rhɛ́ èta, wɔ́ Kristə nyə́ né á nʼá zwẽ. ³Lò mɔ̀bɔ́ ǹ nə́ ǹ bùl bə̀ ǹ wɔ́ kɔna, ń jà ǹ də̀ kaka, wɔ́ ǹ cìn ǹ nə́ ǹ jə́jɛ̀rɛ́. ⁴Lò gakó mə̂ sə́ nyǐ tɛ̀bɛ́ ǹ nə́ ǹ wɛ̀rhɛ́ mɔ́ cɛ̀nɛ̀. Rə̀ gə bʼa pɔ̃́ wu-nyɔ̃̀, sʼe yə̀ ǹ dúdú wẽ́, sə ǹ bə̀ká zə rɛ ń myɛrhɛ ǹ dõ nyân nɛ yé, ⁵bə̀ lò gakó mə̂ sə́ cili ǹ cìcì nyə̀ná nɛ́ sõ.

⁶Lò mɔ̀bɔ́ bə̀ nʼê cèrhè kàrmɔ̀, ń mə̂ sə n vùr ń jɛ̃̀-kɔn n pə mɔ̀bɔ́ ń nə́ ń cèrhè mò mó ne.

⁷Á bə̀kʼá jə́jɛ̀rɛ́ á cìn yé. Zhə̀nà, Yi bə shɛ̀ rə̀ mɔ̌n yò yé. Kɔn dɛ̀bɛ́ lò dùwə̀, wɔ́ rə̀myɛ́ ń la jə̂r. ⁸Lò ǹ gə dù ǹ yala nɛ́ shilə né, wɔ́ ǹ yò zhìlù nə̀ bʼa ce rə yə̀ ǹ lyààrɛ́ kɔn ń jə̀r. Sə ǹ gə dù tɛ̀bɛ́ rə̀ wɔ́ Eshirhə náàcɛ̀nɛ́ pùbùlə̀ mó, è mʼa ce ń jə̀r nyǔ mə̀ tʼâ la zhɔ̌. ⁹Bànà nə́ bə̀kʼá gá lyààrɛ̀ nɛ̀ ǹdə́ cɛ̀nɛ̀ wɔ̀rhɔ́ yé. Zhə̀nà, nə́ gə pyɛ́nɛ́ dɛ̃ rɛ́ bʼe yí, nə́ bʼâ nə kwândɛ. ¹⁰Rə̀myɛ́ ce, bànà nə́ zə bɔ̀l mɔ́ mɔ̀bɔ́ mə̀ dàl nə́ yil mó, nə́ mʼé twĩ̀ cɛ̀nɛ̀ lyì bí gakó ne, sə kɔn du, nə́ twĩ̀ cɛ̀nɛ̀ byɛ̀bɛ́ bə̀ wɔ́ nə́ da-byâ Kristə-lyì mú ni.

Pwəə nə́ ń cící Galəshi Kristə-lyì bí ń mə́ ń gwi ń sɛ́bɛ́ rɛ́ yó

¹¹Á gə la nyǔ èlâsɛ̃´, á mʼâ pwírí kəkɛ̃ɛ̃ rɛ́ tɛ̀bɛ́ nyɛ̌ nánfwààlɛ̀, bə̀ wɔ́ àmyɛ́ cìcì à nʼâ kɛ̃ dɛ. ¹²Byɛ̀bɛ́ bə̀ nʼê yâl bə nyɛ́ɛ́ ába bə ce góm mó wẽ́ mó, wɔ́ cìn-byilu bə̀ nʼê yâl bə tó numbyínsí nyə̀ná nɛ́ dɛnnɛ bə wɛ̀rhɛ́. Tɛ̀bɛ́ bə̀ nʼê pyà mɔ́, wɔ́ bə cə̀r nɔ̀nɔ̀ w kɔ̀bɔ́ bə̀ la nɔ Kristə də̀-jɔrhɔ́ w yil mó yé ne. ¹³Bə̀myɛ́ byɛ̀bɛ́ bə̀ nʼê ce bə̀ gòm bè mó cìcì tʼâ zwẽ Muyiisi nyə́ né yé. Bə jʼà nʼê yâl sə bə gõ ába, sə bə zɛ̃̀ bə zə rə̀myɛ́ bə̀ mʼê zhẽ̌ bə̀ cìn dɛ̃̌. ¹⁴Sə è gə wɔ́ àmyɛ́ yilə, à zhe nə́ Cinu Yezu Kristə də̀-jɔrhɔ́ w zhə̀nà, bə̀ ò ce a zɛ̃̀ à nʼâ nyǐ lũ w ǹdə wɔ́ cú ò cù ta à yilə, ǹdə wɔ́ cú àmyɛ cù ta lũ w yilə. ¹⁵Bə̀ gə gòm lò, bə̀ gə yə̀ mɔ̀ gòm myɛ, rə̀myɛ́ də̀ kaka yé. Tɛ̀bɛ́ rə̀ zhe kùr mó, wɔ́ ǹ gə jǐrh lyì-dùl. ¹⁶Yi bʼa dùr byɛ̀bɛ́ bə̀ nʼê zwẽ nyí rí rə̀myɛ́ mɔ́, ǹdə́ rə̀ dwí rí púlə́púlə́ nɔ̀nɔ̀, sə rə̀ yə̀-zùlə́ né yə̀ nɛ́ ǹdə́ bɛ!

¹⁷Sə kɔn zhí zà, lò bə̀ká n kə́ n bə̀ n nwɛ̀nɛ̀ nɛ̀ yé, bə̀ Yezu nɔ̀nɔ̀ w dɛ̃ nɛ à mʼâ zhə̀lə̀. Sə rə̀myɛ́ nʼê byili bʼà wɔ́ ń tùntùnnə̀.

¹⁸Da-byâ, nə́ Cinu Yezu Kristə mà n cĩ́ bwəl á yó! Amɛ̀n!