Efɛɛzɛ

Pwəə sɛ́bɛ́ rɛ́ ń kɛ̃ n pə

Efɛɛzɛ

Kristə-lyì bí ni mú

Efɛɛzɛ yʼà wɔ́ Azhi tənà y cə-fɔ̀lɔ̀. Pwəə gə́ du ń twər rə̀lyè nyân dɛ́, yò-ècɔ̀nɔ̀ nyí rí bwə̂l yil mó, ń mɛ̃ gàà dwã màngɛlɛ́ n zɛ̃̀ n zhǐr (Tùntúmə́ bé 18.19-21). Rə̀myɛ́ kwã nɛ́, ń ká n kwɛ̃̀ n bə̀ gàà, n wɛ̀rhɛ́ byinə nə̀tɔ̀ (Tùntúmə́ bé 19 ǹdə́ 20). Sə Kristə-lyì gùúli dwã nánzhəzhɔ̌ myɛ ju kùr tənà y èmyɛ́ wẽ́. Lyì bí nʼê bùl bʼè də̀ Efɛɛzɛ Kristə-lyì gùlú w dúdú ni Pwəə kɛ̃ sɛ́bɛ́ rɛ́ tɛ̀bɛ́ n pə yé. Ń kɛ̃ dɛ n pə gùúlí dwã bɛ́ rə̀ ŋwɛ́nɛ́ Azhi tənà y wẽ́ mó myɛ nɛ. Ń kɛ̃ dɛ ǹdə́ bə̀ co mo byə̀nə́-jù w Orɔm nɛ́. Wɔ́ Tishiki jɔ̃̀ w ń co re né n vò n pa.

Ń zɔ̀m ywẽ̀ né nyɛ̀bɛ́ nánfwààlɛ́ gakó Yi tó Kristə dɛnnɛ rə wɛ̀rhɛ́ rə̀ sónó w wẽ́ mó yò. Ń lwə̀l Yi Kristə-lyì bí yilə, mùnì ga bə sú ywẽ̀ né nə̀myɛ́ kùrə̀, sə Yi sónó w ǹdə́ rə̀ jàn dɛ́ yə̀ nɛ́ ǹdə́ bɛ námpúm. Ń byili Yi gə́ tó né rə ce Zhwifubá ǹdə́ byɛ̀bɛ́ bə̀ də̀ Zhwifubá mó tó Kristə cu mú dɛnnɛ bə jǐrh dwí rə̀dù Kristə wẽ́ mó (1.1–3.21).

Rə̀myɛ́ gakó kwã nɛ́, ń cící Kristə-lyì bí bə̀ bə̀ ce jàn nɛ́ bə zə nyì-dwìì rí tɛ̀bɛ́ Eshirhə náàcɛ̀nɛ́ nʼê pɛ mɔ́. Ń byili bə̀ bə̀kʼa kʼe wɛ̀rhɛ́ ǹdə lyì byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár ta yé (4.1–5.20).

Rə̀myɛ́ kwã nɛ́, ń cící bi bal ǹdə́ ń kɛ̃ ǹdə́ bə̀ byâ gə́ mə̂ sə bə zə bə̀ cìn ní bə̀ kɛ̀lɛ́ y jòmə́ y wẽ́, e súlí tùntùnnə̀ bé ǹdə́ bə̀ yó-cìnə́ bé myɛ gə́ mə̂ sə bə zə bə̀ cìn ní ǹdə́ dwã. Rə̀myɛ́ kwã nɛ́, ń cící bi bə̀ bə̀ kwě Yi búlə́ wẽ̀ dé bə mʼe bú ǹdə́ Shətana (5.21–6.20).

Pwəə nə́ ń ce Kristə-lyì bí

¹Àmyɛ́ Pwəə, Yi ce à wɔ́ Yezu Kristə tùntúm ǹdə rə̀ gə́ nʼê yâl nɛ́. Wɔ́ àmyɛ́ à nʼâ kɛ̃ sɛ́bɛ́ rɛ́ tɛ̀bɛ́ à la ámyɛ̌ byɛ̀bɛ́ á wɔ́ Yi lyì, á ŋwɛ́nɛ́ Efɛɛzɛ nɛ́, á zù Yezu Kristə mó ne pɔ. ²Nə́ Da Yi ǹdə́ nə́ Cinu Yezu Kristə mʼa cĩ́ bwəl á yó, sə bə pə ába yə̀-zùlə́!

Yi cĩ́ bwəl dwí gakó nə́ yó Kristə jàn yilə

³Bànà nə́ cèrhé nə́ Cinu Yezu Kristə Da Yi rí, bə̀ rə̀ cĩ́ bwəl dwí tɛ̀bɛ́ gakó rə̀ nʼê shí dɛ̃̌ Arəzana w mɔ́ nə́ yó. Bwəl lé rə̀myɛ́, wɔ́ Eshirhə náàcɛ̀nɛ́ sõ rə̀ nʼê shí ní, Kristə jàn yilə. ⁴Yi tó Kristə dɛnnɛ rə cír nə́ba ǹdə́ rə̀ gwẽ̌ yə̀ lũ w wɛ̀rhɛ́ yé, rə ce nə́ jǐrh rə̀ lyì zhə̀nà, dóó bə̀kʼá jòm nə́ yó w rə̀ yé né yé. ⁵Rə̀ gə́ só nə́ba mó ce, rə̀ gu rə̀ wẽ́ rə̀ nʼê yâl bə̀ nə́ tó Yezu Kristə dɛnnɛ nə́ jǐrh rə̀ byâ. Rə̀myɛ́ yàl rə̀ pùbùlə̀, rə̀ gə́ wɔ́ wu-bɔ̀nɔ̀ cí mú yilə. Rə̀ wɛ̀rhɛ́ èta nə́ yilə, ⁶mùnì ga nə́ cèrhé re rə̀ gə́ tó rə̀ Byì-sónó w dɛnnɛ rə pə nə́ba rə̀ pɛnɛ́ y nánfɔ̀lɔ̀ w mɔ́ yilə.

⁷Kristə zə ń cìn n yə̀ vwĩ̀-kɔna. Nə́ zɛ̃̀ nə́ tó ń jal mɔ́ dɛnnɛ nə́ nə nə́ cìnə̀, nə́ jà nə́ nə nə́ dwə́ə́ré sǔbri. Èta, Yi byili rə̀ yò-cɔ̀nɔ̀ w nánfɔ̀lɔ̀ w rə̀ wɛ̀rhɛ́ ǹdə́ nə́ba mɔ́. ⁸Rə̀ yò-cɔ̀nɔ̀ w já dɛ̃´dɛ̃´, rə̀ pɔ nə́ba surhə ǹdə́ lárma dwí gakó. ⁹Kɔn ŋwɛ́nɛ́ rə̀ yʼà shèè, Yi yʼà dámâ rə gu rə̀ wẽ́ rə̀ la tó Kristə dɛnnɛ rə wɛ̀rhɛ́, rə̀ gə́ wɔ́ wu-bɔ̀nɔ̀ cí mú yilə. Wɔ́ rə̀myɛ́ Yi ce nə́ lwar. ¹⁰Yi nʼê yâl rə pyìrh kɔn dɛ́ rə̀myɛ́ mɔ́ ǹdə́ rə̀ yi rí gə tú rə̀ yúwə́. Rə̀myɛ́ yi ní, Yi bʼa mù kɔn dɛ̀bɛ́ rə̀ ŋwɛ́nɛ́ dɛ̃̌ ǹdə́ cɛ yó mó dwí gakó dwã w rə ce Kristə jɔ̃̀ w n cìní.

¹¹Yi nʼê wɛ̀rhɛ́ kɔn gakó rə tó ǹdə rə̀myɛ́ cìcì gə́ nʼê yâl nɛ́. Wɔ́ rə̀myɛ́ è ce rə tó Kristə dɛnnɛ rə cír nə́ba mùnì nə́ jǐrh rə̀ sə̀pwà lyì. Wɔ́ èta rə̀ yʼà dámâ rə gu rə̀ wẽ́ rə̀ la nɛ́ wɔ̀rhɔ́, ¹²mùnì ga nə́myɛ̌ byɛ̀bɛ́ nə́ tó yé nə́ rʼé dɛ̃̀ kɔn Kristə sõ mó cèrhé re rə̀ zùwə́ y nánfɔ̀lɔ̀ w yilə.

¹³Kɔn wɔ́ èta ǹdʼámyɛ; á nyɛ̀ɛ̀ zɔ̀mɛ̀ rɛ́ tɛ̀bɛ́ rə̀ wɔ́ zhə̀n mɔ́. Wɔ́ rə̀myɛ́ rə̀ wɔ́ yò-ècɔ̀nɔ̀ nyí rí Yi tó rə̀ dɛnnɛ rə vwârh ába mɔ́. Á zù Kristə, Yi ce Eshirhə náàcɛ̀nɛ́ y rə̀ yʼà bwəl è nyí mú só á yó wə. Eshirhə y èmyɛ́ wɔ́ rə̀ cìcì myɔrhɔ rə̀ cĩ́ á yala nɛ. ¹⁴Yi gə́ ce Eshirhə náàcɛ̀nɛ́ só nə́ yó mó nʼê byili bə̀, dɛ̃ rɛ́ tɛ̀bɛ́ Yi lyì bí la vwârh nɔ námpúm mú gə yúwə́, rə̀ bʼa pə nə́ba kɔn dɛ́ dɛ̀bɛ́ rə̀ bwəl nyí bə̀ rə̀ la nə́ba pɔ mɔ́ gakó, mùnì ga nə́ cèrhé re rə̀ zùwə́ y nánfɔ̀lɔ̀ w yilə.

Pwəə nə́ ń lwə̀l Yi Efɛɛzɛ Kristə-lyì bí yilə

¹⁵Wɔ́ rə̀myɛ́ gakó è ce, èlâsɛ̃´ à gə́ nyɛ̀ɛ̀ bʼâ zhí Cinu Yezu ni, á jʼâ só byɛ̀bɛ́ bə̀ wɔ́ ń lyì mú, ¹⁶à nʼâ ce Yi nə̀bán twéé gakó á yilə. À gə la Yi-co wɔ̀rhɔ́ gakó, à tʼâ swě á yò yé. ¹⁷À nʼâ lwə̀l mɔ̀bɔ́ ń wɔ́ nə́ Cinu Yezu Kristə Yi rí, n jà ń wɔ́ ń Da, ń mə̂ ǹdə́ còrhó mó ne, bə̀ ń ce Eshirhə náàcɛ̀nɛ́ pə ába surhə á lwar ń pár náàcɛ̀nɛ́. ¹⁸À nʼâ lwə̀l mò bə̀ ń pul á wun ní pamparɛ̃ɛ̃, mùnì á sú kɔn dɛ̀bɛ́ ń byẽ̀ ába á nʼá dɛ̃̀ ń sõ mó kùrə̀, sʼá lwar kɔn dɛ́ nánfɔ̀lɔ̀ w kɔ̀bɔ́ ń bwəl nyí bə̀ ń la ń lyì bí ni pɔ mɔ́ myɛ gə́ wɔ́ nɛ́, ¹⁹sʼá jʼâ lwar jàn dɛ́ nánfɔ̀lɔ̀ w rə̀ ŋwɛ́nɛ́ nə́myɛ̌ byɛ̀bɛ́ nə́ zù mù mú wẽ́ rə̀ nʼê twĩ̀ mú yé-shò. Yi ce jàn nánfɔ̀lɔ̀ w òmyɛ́ mɔ́ nʼô twĩ̀. ²⁰Rə̀ tó rə̀ gə́ bwìrhì Kristə rə ce n zɛ̃̀ n vò dɛ̃̌ Arəzana w ń jě rə̀ jə̀jĩ́ ní mú dɛnnɛ, rə byili rə̀ jàn nánfɔ̀lɔ̀ wá. ²¹Èta, rə̀ ce Kristə cǐ jàn cìnə́ bé bə̀ ŋwɛ́nɛ́ dɛ̃̌ bə̀ zhe ŋwɔ̀nɔ́, bə̀ nʼê jí pyɛ̀lɛ̀ mɔ́ dwí gakó. Ń zhe ŋwɔ̀nɔ́ du kɔn dɛ̀bɛ́ dwí gakó rə̀ ŋwɛ́nɛ́ èlâsɛ̃´ lũ w wẽ́, ǹdə́ tɛ̀bɛ́ rə̀ la lũ w kɔ̀bɔ́ ò bàn mɔ́ wẽ́ yál mɔ́ gakó. ²²Yi co kɔn gakó Kristə nə̀rh kùr w ń cǐ. Rə̀ ce ń wɔ́ ń lyì bí gùlú w yó-cə́bal. ²³Gùlú w wɔ́ Kristə yala. Ń ŋwɛ́nɛ́ ò wẽ́ námpúm. Yi cìcì zɛ̃̀ rə̀ ŋwɛ́nɛ́ Kristə wẽ́ námpúm.

Yi ce nə́ tó Kristə né nə́ bwìrhì

¹Shãã ga á dwə́ə́ré ǹdʼá yə̀-bəlwàálɛ́ yʼà ce á cì. ²Á yʼâ nʼá nyǐ lũ w kɔ̀bɔ́ lyì bí tùntwə̃̀ə̃̀ né nə̀ wɔ́ lwɛlɛ nyə̀ná mɔ́, á zɛ̃̀ á tó á nʼá wɛ̀rhɛ́ ǹdə bə̀ ta. Á yʼâ nʼá wɛ̀rhɛ́ jàn cìnə́ námməlwâlsɛ́ sə̀ ŋwɛ́nɛ́ dɛ̃̌ mɔ́ yó-cə́bal mɔ́ pùbùlə̀. Wɔ́ ńmyɛ̌ ń ŋwɛ́nɛ́ lyì bí byɛ̀bɛ́ bə̀ tʼâ wɛ̀rhɛ́ Yi pùbùlə̀ mó wẽ́ èlâsɛ̃´ ń nə́ ń twĩ̀.

³Shãã ga nə́myɛ̌ gakó yʼâ wɔ́ ǹdə lũ w lyì bí ta. Nə́ tùntwə̃̀ə̃̀ né yʼà wɔ́ ǹdə nə́ wun ní gə́ nʼê yâl nɛ́. Èta, nə́ yʼâ nʼé tó nə́ shilə námməlwâlsɛ ǹdə́ nə́ wun bùlə̀ námməlwâlsɛ gə́ nʼê yâl nɛ́. Nə́myɛ̌ gə́ yʼâ wɔ́ èta mɔ́ ce, Yi lyim yʼà zɛ̃̀ ǹdə́ nə́ba rə̀ la nə́ba còrhò-tum pɔ ǹdə bə̀ ta.

⁴Sə Yi nɔ̀nɔ̀-dǔr mó já dɛ̃´dɛ̃´. Rə̀ só nə́ba kɔn lyɛ̃ cɛ nɛ. ⁵Nə́ dwə́ə́ré yʼà ce nə́ cì, sə Yi ce nə́ tó Kristə né nə́ bwìrhì. Wɔ́ rə̀ gə́ só ába dɛ̃´dɛ̃´ mɔ́ è ce rə vwârh ába. ⁶Rə̀ tó Yezu Kristə dɛnnɛ rə bwìrhì nə́ba, mùnì nə́ tó mo nə́ jòm Arəzana w nə́ jí pyɛ̀lɛ̀. ⁷Èta, Yi wɛ̀rhɛ́ cɛ̀nɛ̀ ǹdə́ nə́ba Kristə jàn yilə, mùnì ga byinə né nyɛ̀bɛ́ nə̀ bàn mɔ́ gakó wẽ́, lyì dwí gakó lwar bə̀ rə̀ tó Yezu Kristə dɛnnɛ rə byili rə̀ nɔ̀nɔ̀-dǔr mó ǹdə́ rə̀ sónó wə́. ⁸Wɔ́ Yi gə́ só ába dɛ̃´dɛ̃´ mɔ́ è ce rə vwârh ába, á gə́ zhí Kristə ne mó yilə. Rə̀myɛ́ wɔ́ Yi pɛnɛ́. È də̀ ámyɛ̌ sõ rə̀myɛ́ shí ní yé. ⁹È də̀ á tùm-ècɛ̀nà nə̀ ce á nə vwârh yé. Èta, lò lò wàr ń mà n zhẽ̌ ń cìn dɛ̃̌ yé. ¹⁰Wɔ́ Yi rə̀ wɛ̀rhɛ́ nə́ba. Rə̀ wɛ̀rhɛ́ nə́ba Yezu Kristə jàn yilə, mùnì ga nə́ twĩ̀ tùntũ̀-ècɛ̀nà. Wɔ́ rə̀myɛ́ cìcì rə̀ dámâ rə tɛnɛ tùntwə̃̀ə̃̀ né nə̀myɛ́ rə cĩ́ nə́ba.

Kristə cu mú ce Zhwifubá ǹdə́ byɛ̀bɛ́ bə̀ də̀ Zhwifubá mó ga jǐrh kɔn rə̀dù

¹¹Ámyɛ̌ byɛ̀bɛ́ bə̀ yə̀ lùl Zhwifubá dwí rí wẽ́ mó, bə̀ yʼà tʼâ gòm ába yé. Sə bə̀ gə́ yʼà nʼê gòm Zhwifubá mó ce, bə̀ tə̀ rə̀myɛ́ yil bə̀ nʼê byẽ̀ ába bə̀ “lyì byɛ̀bɛ́ bə̀ yə̀ gòm”, bə zɛ̃̀ bə̀ nʼê byẽ̀ bə̀ cìn bə̀ “lyì byɛ̀bɛ́ bə̀ gòmə̀”, kɔn dɛ́ dɛ̀bɛ́ bə̀ nʼê gòm bə̀ yala nɛ mɔ́ yilə. Lyǐrhnə bə̀ wɔ́ èta á yʼâ wɔ́ nɛ́ shãã ga. ¹²Lwarna bə̀, rə̀myɛ́ yi ní, á yʼâ gwẽ̌ yə̀ Kristə zwì yé; á yʼâ wɔ́ zhələ; á yʼâ tɛ̀nɛ́ Yi lyì bí rə̀ cír mó wẽ́ yé. Yi yʼà zɔ dɔbrɛ ǹdə́ rə̀ lyì bí, rə bwəl be nyí, sə ámyɛ̌ twə́r yʼà tɛ̀nɛ́ nyì-bwelé y èmyɛ́ wẽ́ yé. Á yʼâ ŋwɛ́nɛ́ lũ w wẽ́, á yə̀l Yi párá, á tʼá dɛ̃̀ kɔn rə̀ sõ myɛ yé. ¹³Sə èlâsɛ̃´, á gə́ zù Yezu Kristə mó ce, á tó ń jal mɔ́ mə̀ ló tɛ̃´ mɔ́ dɛnnɛ á bwəlse Yi ni, e jà shãã ga á yʼâ nyɛ ǹdə́ rɛ.

¹⁴Wɔ́ Kristə cìcì ń pɔ ń myə̂l, n mə n ce yə̀-zùlə́ jòm Zhwifubá ǹdə́ byɛ̀bɛ́ bə̀ də̀ Zhwifubá mó bwə̂l wə. N vùr kɔn dɛ́ dɛ̀bɛ́ rə̀ yʼà ŋwɛ́nɛ́ bə̀ cəcəl w rə̀ nʼê pɔr bɛ dwã nɛ, e ce zùùrì ŋwɛ́nɛ́ bə̀ bwə̂l w mó. N ce bə̀myɛ́ kùrə̀ nə̀lyè y ga dwã yó bə jǐrh dwí rə̀dù. ¹⁵N ce Zhwifubá nyə́ né ǹdə́ nə̀ gə́ nʼê byili ní mú gakó kʼê bə kùr zhe yé. Ń wɛ̀rhɛ́ èta, n mə n ce dwə́ né nə̀myɛ́ kùrə̀ nə̀lyè y ga jǐrh dwí nándùl kùr rə̀dù, bə̀ gə́ zù mù mú yilə. Wɔ́ èta ń tó né n ce yə̀-zùlə́ né ŋwɛ́nɛ́ bə̀ bwə̂l wə. ¹⁶Ń cù də̀-jɔrhɔ́ yó n mə n vùr kɔn dɛ̀bɛ́ rə̀ yʼà ce bə̀ nʼê súl dwã mɔ́, bə zɛ̃̀ bə jǐrh kɔn rə̀dù. Ń ce bə̀myɛ́ kùrə̀ nə̀lyè y ga yò kʼa kwɛrhɛ ǹdə́ Yi. ¹⁷Èta ń zɔ yə̀-zùlə́ nyí rí n mə n bə̀ n byili ámyɛ̌ byɛ̀bɛ́ á yʼâ nyɛ ǹdə́ Yi mú, ǹdə́ byɛ̀bɛ́ bə̀ yʼà bwə́l le mó ne. ¹⁸Wɔ́ ńmyɛ̌ dɛnnɛ nə́myɛ̌ byɛ̀bɛ́ nə́ wɔ́ Zhwifubá mó, ǹdʼámyɛ̌ byɛ̀bɛ́ á də̀ Zhwifubá mó bʼâ tó né nə́ bwəlse Yi ni, Eshirhə náàcɛ̀nɛ́ y èdù y jàn yilə.

¹⁹Wɔ́ rə̀myɛ́ è ce, á kʼá də̀ zhələ yé. Á kʼá də̀ lyì byɛ̀bɛ́ bə̀ shí kwã nɛ́ yé. Á zù Yi dwí rí wẽ́ èlâsɛ̃´. Ámyɛ̌ ǹdə́ rə̀ dwí rí ga jǐrh kɔn rə̀dù. ²⁰Bə̀ zə ámyɛ bə súlí bə̀ mʼê lwì Yi dwí rí jì yə́, sə wɔ́ Kristə tùntúmə́ bé ǹdə́ Yi nyì-zwennə bé bə̀ mʼe cĩ́ jì y kùr ré. Wɔ́ Yezu Kristə cìcì mú ń wɔ́ jì-byòló w nə́kulu wə́. ²¹Wɔ́ ńmyɛ̌ yó bə̀ nʼê zhílí jì y bəkwâ bɛ́ nɛ bə̀ lwì, mùnì ga e zə è jàn nɛ̀, e yə̀ Cinu nyâ. ²²Á gə́ zù mù mú ce, bə̀ zə ámyɛ bə súlí bə̀ mʼê lwì jì y kɛ̀bɛ́ Yi tó rə̀ Eshirhə y dɛnnɛ rə̀ ŋwɛ́nɛ́ è wẽ́ mó.

Wɔ́ Yi rə̀ ce Pwəə nə́ ń bwə̀l yò-ècɔ̀nɔ̀ nyí rí ń byili byɛ̀bɛ́ bə̀ də̀ Zhwifubá mó ne

¹Wɔ́ rə̀myɛ́ è ce àmyɛ́ Pwəə nʼâ lwə̀l Yi á yilə. Bə̀ co ne byə̀nə́-jù wə̀, à gə́ nʼâ twĩ̀ Yezu Kristə tum dí à pɛ ámyɛ̌ byɛ̀bɛ́ á də̀ Zhwifubá ne mó yilə. ²Zhə̀nà, à yě pamparɛ̃ɛ̃ bʼâ nyɛ̀ɛ̀ tum dí tɛ̀bɛ́ Yi tó rə̀ sónó w dɛnnɛ rə pɛ̃ bʼà twĩ̌ á yil mó. ³Yi byili ni kɔn dɛ́ dɛ̀bɛ́ rə̀ yʼà nʼê yâl rə wɛ̀rhɛ́ mɔ́. Rə̀ jʼa yə̀ ce lò lò lwar rə̀myɛ́ shãã ga yé. À zɔ̀m kɔn dɛ́ rə̀myɛ́ mɔ́ yò ǹdʼába námpɔ́lɛ́. ⁴Á gə kàrmə̀ à sɛ́bɛ́ rɛ́, á bʼâ pwírí à lwar kɔn dɛ́ dɛ̀bɛ́ Yi byili ni rə̀ yʼà shèè Kristə shò-kwã nɛ́ mɔ́ kùrə̀. ⁵Shãã ga, Yi yə̀ ce lyì bí lwar kɔn dɛ́ rə̀myɛ́ kùr yé. Sə èlâsɛ̃´, rə̀ byili ri rə̀ tùntúmə́ bé ǹdə́ rə̀ nyì-zwennə bé rə̀ cír mó ne ǹdə́ Eshirhə náàcɛ̀nɛ́ jàn. ⁶Kɔn dɛ́ rə̀myɛ́ mɔ́ wɔ́: byɛ̀bɛ́ bə̀ də̀ Zhwifubá mó gə́ tó yò-ècɔ̀nɔ̀ nyí rí dɛnnɛ bə zù Yezu Kristə mó ce, bə̀myɛ bʼa nə cəl kɔn dɛ́ dɛ̀bɛ́ Yi yʼà bwəl rə̀ nyí rə̀ la rə̀ lyì bí ni pɔ mɔ́ wẽ́. Bə̀myɛ́ ǹdə́ Zhwifubá ga jǐrh kɔn rə̀dù. Bə̀myɛ twə́r ŋwɛ́nɛ́ kɔn dɛ́ dɛ̀bɛ́ Yi bwəl rə̀ nyí rə̀ la pɔ mɔ́ wẽ́.

⁷Wɔ́ Yi rə̀ ce à nʼâ bwə̀l yò-ècɔ̀nɔ̀ nyí rí. Wɔ́ rə̀myɛ́ rə̀ tó rə̀ sónó w ǹdə́ rə̀ jàn dɛ́ nánfɔ̀lɔ̀ w dɛnnɛ rə pɛ̃ tum dí rə̀myɛ́. ⁸Àmyɛ́ à wɔ́ Kristə-lyì bí gakó námpɔ́lɛ́. Sə ǹdə́ rə̀myɛ́ ga, Yi pɔ nɛ sɔ́má à nʼâ bwə̀l Kristə yò-ècɔ̀nɔ̀ nyí rí à byili byɛ̀bɛ́ bə̀ də̀ Zhwifubá mó ne. Kɔn dɛ́ dɛ̀bɛ́ yò-ècɔ̀nɔ̀ nyí rí nʼê pɛ mɔ́ wɔ́ nə̀cɛ̀ndɛ̀ nánfɔ̀lɔ̀; rə̀ kùr nyɔ̀ɔ̀ zum ǹdə́ lyì bí. ⁹Yi ce à nʼâ byili lyì bí gakó ne kɔn dɛ́ dɛ̀bɛ́ rə̀ yʼà shèè shãã ga mɔ́ gə́ la nɛ́ wɔ̀rhɔ́. Wɔ́ Yi rí tɛ̀bɛ́ rə̀ wɛ̀rhɛ́ kɔn gakó mó rə̀ yʼà shèè kɔn dɛ́ rə̀myɛ́ kɔn mʼe yí zà. Lyì bí yə̀ rə̀ kùr lwar yé. ¹⁰Yi wɛ̀rhɛ́ èta mùnì ga, èlâsɛ̃´, jàn cìnə́ byɛ̀bɛ́ bə̀ ŋwɛ́nɛ́ dɛ̃̌ bə̀ zhe ŋwɔ̀nɔ́ mɔ́ dwí gakó tó Kristə-lyì gùlú w dɛnnɛ bə lwar bə̀ Yi surhə né já dɛ̃´dɛ̃´. ¹¹Rə̀ tó nə́ Cinu Yezu Kristə dɛnnɛ rə wɛ̀rhɛ́ rə̀myɛ́ ǹdə rə̀ gə́ nʼê yâl bə̀ kɔn tó né ǹdə́ lũ w yʼà gwẽ̌ yə̀ kùr ji yé. ¹²Nə́ gə́ mù dwã nɛ ǹdə́ Kristə, nə́ zhí mu mú ce, nə́ wɔ̌ nə́ bwəlse Yi ni ǹdə́ nə́ wun gakó, ywẽ kʼê bə nə́ba zhe yé. ¹³Wɔ́ rə̀myɛ́ è ce, à nʼâ lwə̀l ába, á bə̀kʼá tə̀ nɔ̀nɔ̀ w kɔ̀bɔ́ à nʼâ nwɛ̀nɛ̀ á yil mó yil á gə á wun yé. Nɔ̀nɔ̀ w òmyɛ́ bʼa ce á nə cəl Yi zùwə́ y wẽ́.

Pwəə nə́ ń lwə̀l Yi bə̀ rə̀ ce Kristə-lyì bi lwar Kristə sónó w gə́ wɔ́ nɛ́

¹⁴Wɔ́ rə̀myɛ́ è ce, à nʼâ wùlì nə́ Da Yi yé né. ¹⁵Ń ce dwí tɛ̀bɛ́ gakó rə̀ ŋwɛ́nɛ́ dɛ̃̌ ǹdə́ cɛ yó zhe rə̀ yilə. ¹⁶Yi zhe zùwə́ dɛ̃´dɛ̃´, rə̀ zhe kɔn gakó. Wɔ́ rə̀myɛ́ yil à nʼâ lwə̀l lè bə̀ rə̀ pə ába wu-jɔ̀, mùnì á tó rə̀ Eshirhə y dɛnnɛ á zə jàn nánfɔ̀lɔ̀, ¹⁷sə Kristə yə̀ á wun ní wẽ́, á gə́ zhí mu mú yilə. Zhǐnə kẽkẽ, á swéné dwã, á nə̀rh pə tɛ̃´, á bə̀kʼá zhízhǐ yé. ¹⁸Èta, á bʼâ ŋwɛ̀nɛ́ á tó Yi lyì bí dwã bɛ́ gakó ne á lwar Kristə sónó w ò já dɛ̃´dɛ̃´, ò də̀ zhɔ̌ kɔn mɔ́ gə́ wɔ́ nɛ́. ¹⁹Á bʼâ lwar ń sónó w ò kùr lwar zum mú gə́ wɔ́ kɔn ná-dwí yilə; e jʼà wɔ́ kɔn dɛ̀bɛ́ numbyíní wàr è kùr è nʼê swí yé. Èta, Yi cìcì bʼa yə̀ á wẽ́ námpúm.

²⁰Yi nə còrhó! Rə̀ jàn dɛ́ nánfɔ̀lɔ̀ w gə́ ŋwɛ́nɛ́ ǹdə́ nə́ba mɔ́ ce, nə́ gə lwə̀l lè kɔn, rə̀ yʼa pə nə́ba kɔn dwini nə́ gə́ lwə̀l né, ráá nə́ gə́ nʼé bùl né. ²¹Yi nə còrhó twéé gakó Kristə-lyì gùlú w wẽ́ Yezu Kristə jàn yilə, byinə nə̀ bə zhɔ̌ zhe yilə! Amɛ̀n!

Nə́ mə̂ sə nə́ ce jàn nɛ́ nə́ zə nyì-dwìì tɛ̀bɛ́ rə̀ nʼê shí Eshirhə náàcɛ̀nɛ́ sõ

¹Àmyɛ́ mɔ̀bɔ́ bə̀ co byə̀nə́-jù w à gə́ nʼâ twĩ̀ Cinu tum dí yil mó, à nʼâ lwə̀l ába ǹdə́ à wu gakó Yi yò-ècɛ̀nà nɛ́ yilə: zəna á cìn cɛ̀nɛ̀ á yə̀ ǹdə Yi gə́ byẽ̀ ába bʼâ yál nɛ́ mɔ́. ²Yálna cìn-lwəl ǹdə́ wu-bɔ̀nɔ̀ ǹdə́ cìn-pyɔ́nɔ́ cìnə́. Swénénə dwã, sʼá zə cìn-pyɔ́nɔ́ ǹdə́ dwã. ³Cenə jàn nɛ́ á tó yə̀-zùlə́ né nə̀ co ába dwã nɛ́ mɔ́ dɛnnɛ á zə nyì-dwìì rí tɛ̀bɛ́ rə̀ nʼê shí Eshirhə náàcɛ̀nɛ́ sõ mó. ⁴Nə́ gakó wɔ́ kɔn rə̀dù; nə́ zhe Eshirhə náàcɛ̀nɛ́ èdù; kɔn dɛ́ dɛ̀bɛ́ Yi byẽ̀ nə́ba nə́ rʼé dɛ̃̀ rə̀ sõ mó myɛ wɔ́ rə̀dù; ⁵nə́ Cinu mú wɔ́ mə̀dù; nə́ Yi-ni-zhú mú wɔ́ mə̀dù; nə́ nɛ̃̌-shɔ mɔ́ myɛ wɔ́ mə̀dù; ⁶nə́ Yi rí myɛ wɔ́ rə̀dù; rə̀ wɔ́ nə́ gakó Da; rə̀ cǐ nə́ gakó, rə̀ nʼê tó nə́ gakó dɛnnɛ rə̀ twĩ̀, rə̀ ŋwɛ́nɛ́ nə́ gakó wẽ́.

⁷Nə́ gakó nɔ Yi pɛnɛ́ y ǹdə Kristə gə́ tə̀l n pə lò gakó ne né. ⁸Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:

“Ń gə́ zɛ̃̀ n vò dɛ̃̌ yi ní,

ń zɔ yómə́ n mə n vò

n pə pansɛ lyì nì.”

⁹Ń dɛ̃̌ zhəl mó nʼê yâl e wɔ̀ bə̀ byè? Rə̀ nʼê yâl e wɔ̀ bə̀ nyǐ ń jɛ̀rɛ̀ n shí dɛ̃̌ dɛ̃̌ n só tɛ̃´ cɛ y yó. ¹⁰Mɔ̀bɔ́ ń shí dɛ̃̌ n só tɛ̃´ mɔ́, wɔ́ ńmyɛ̌ ń kə́ n vò dɛ̃̌ n lyɛ̃ cɛ nɛ gaga, mùnì ga n sú lũ w púlə́púlə́.

¹¹Wɔ́ ńmyɛ̌ ń tə̀l pansɛ́ n pə lò gakó ne. Ń ce lyì jàlà wɔ́ ń tùntúmə́, jàlà wɔ́ Yi nyì-zwennə, jàlà wɔ́ yò-ècɔ̀nɔ̀ nyí rí bwə̀lnə̀, jàlà nʼê nyǐ ń gùlú w lyì bí yò e jà bə̀ nʼê byili Yi zɔ̀mɛ̀ rɛ́. ¹²Ń pɔ pansɛ́ sə̀myɛ́ mɔ́ ń lyì bí ni mùnì bə ŋwɛ̀nɛ́ bə twĩ̀ ń tum dí cɛ̀nɛ̀. Èta, gùlú w ò wɔ́ ń yala nɛ́ mɔ́ mʼa vò yé né.

¹³Èta, nə́ gakó bʼâ jǐrh kɔn rə̀dù nə́ Yi-ni-zhú mú ǹdə́ Yi Byǐ mú pár lwar mɔ́ ga wẽ́, nə́ yə̀ námpwə̀lə́ Kristə wẽ́, nə́ yə̀ ǹdə ń ta námpúm. ¹⁴Nə́ kʼé tʼá la yál ǹdə bə̀sɔ́ná ta, sə bə mʼe yə́yɛ́lɛ́ nə́ba dɛ̃̌ ǹdə zho nánfɔ̀lɔ̀ gə́ yʼa zə bǔ-bwəl o mʼo vò, ò gə́ zâ má ta yé. Èta, lyì bí byɛ̀bɛ́ bə̀ nʼê gòm kɔma mɔ́ kʼê wàr nə́ba bə̀ la jə́jɔ̀rɔ́ ǹdə́ zɔ̀mà dwí tə̀ltə̀l yé. ¹⁵Sə nə́ gə nʼé byili zhə̀n nə́ dwã bɛ́ nɛ ǹdə́ sónó, nə́ bʼâ byì kɔn gakó wẽ́ nə́ jǐrh ǹdə Kristə ta. Wɔ́ ńmyɛ̌ ń wɔ́ ń lyì bí gùlú w yó wə́. ¹⁶Wɔ́ ńmyɛ̌ jàn yil yala nɛ́ kə̀kàlsɛ́ gakó zhí dwã nɛ sə̀ wɔ́ kɔn rə̀dù. Yala nɛ́ kə̀kàlsɛ́ já, sə sə̀ gakó zhí dwã nɛ, sə jǐrh kɔn rə̀dù. Wɔ́ rə̀myɛ́ è ce, yala nɛ́ kə̀kàlà èdù gakó gə nʼê twĩ̀ è tum dí cɛ̀nɛ̀, nə̀ gakó nʼê byìl sónó wẽ́.

Kristə-lò tùntwĩ̀ĩ̀ bə mə̂ sʼe yə̀ ǹdə lò mɔ̀bɔ́ ń yə̀l Yi pár tùntwĩ̀ĩ̀ ta yé

¹⁷À nʼâ lwə̀l ába ǹdə́ à wu gakó Cinu yil lé yilə, sʼá bə̀kʼá kʼá wɛ̀rhɛ́ ǹdə byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár mɔ́ ta yé. Bə̀ nʼê tó bə̀ wun bùlə̀ né nə̀ bə kùr zhe mó ne. ¹⁸Bə̀ surhə né pyi, bə̀ ywẽ́ né myɛ jʼà nyɛ̌ nánkùùlì, bə̀ yə̀l nə̀ kùrə̀ yé. Bə̀ twə́r tɛ̀nɛ́ nyǔ mú mɔ̀bɔ́ Yi nʼê pɛ mɔ́ wẽ́ yé. ¹⁹Bə̀ kʼê yə̀l kɔn dɛ̀bɛ́ rə̀ càn ǹdə́ dɛ̀bɛ́ rə̀ bə càn pár dwã w yé. Bə̀ kʼê yə̀l cìzhìl myɛ pár yé. Bə̀ nʼê twĩ̀ ywâl tumə, bə̀ tʼâ dùr ywẽ yé.

²⁰Sə è də̀ èta bə̀ byili ámyɛ̌ nɛ nɛ́ Kristə shò-kwã nɛ́ yé. ²¹Ámyɛ̌ byɛ̀bɛ́ á mù dwã nɛ ǹdə́ Yezu Kristə mó, bə̀ yə̀ ába zhə̀n dɛ́ ń shò-kwã nɛ́ mɔ́ byili nà? ²²Á mə̂ sʼá yẽ̌ á shãã ga tùntwə̃̀ə̃̀ né ne. Wɔ́ á yò zhìlù jàà w tùntwə̃̀ə̃̀ né nə̀myɛ́ yʼà zə ába nə̀ la nɛ́. Yẽ̌nə ne ǹdə lò gə́ yʼâ ji ǹ yala gɔ̀nɔ̀ kɔ̀bɔ́ ò kʼô bə càn myǐn ní. ²³Yẽ̌nə Yi Eshirhə y pyìrhí á surhə né ǹdə è gə́ nʼê yâl nɛ́. ²⁴Yálna lyì-dùlə̀, ǹdə wɔ́ kàmə̀-zù-dùrh á zù ta. Lyì-dùlə̀ bé bə̀myɛ́ mɔ́ wɔ́ Yi rə̀ wɛ̀rhɛ́ bɛ ǹdə rə̀ gə́ nʼê yâl nɛ́. Bə̀ tó zhə̀n dɛ́ dɛnnɛ bə jǐrh Yi lyì, wu-cángá cìnə́.

²⁵Rə̀myɛ́ ce, á bə̀kʼá kʼá gõ kɔma yé. Lò gakó mə̂ sə́ byili zhə̀n ǹ dõ ne, bə̀ nə́myɛ̌ gakó wɔ́ kɔn rə̀dù Kristə yala nɛ́ wẽ́. ²⁶Á lyimə gə tú è zɛ̃̀ yi ní, sʼá bə̀kʼá wɛ̀rhɛ́ yə̀-bəlɔ̀lɔ́ yé. Bá á gə kwè lyim myɛ, sə yi bə̀kʼá zù ǹdə́ rə̀ gwẽ̌ nʼê yì yé. ²⁷Á bə̀kʼá pə bɔ̀l Shətana nɛ e zù á wẽ́ yé.

²⁸Lò mɔ̀bɔ́ ń yà ń nə́ ń ŋwɔ̀là, sə ń bə̀ká n kə́ n ŋwɔ̀ yé, sə n ce jàn nɛ́ n twĩ̀ ǹdə́ ń sə̀pwà jɛ̀sɛ́. Ń bə̀ká n wɛ̀rhɛ́ yǔyǔ yé. Èta, ń bà n ŋwɛ̀nɛ́ n nə kɔn n mə n sɛ̃ lò mɔ̀bɔ́ ń bə zhe ne.

²⁹Zɔ̀mà nyɛ̀bɛ́ nə̀ bə càn bə mə̂ sə nə shí á nyú w yé. Zɔ̌mna zɔ̀mà nyɛ̀bɛ́ nə̀ zhe kùr nə̀ wɔ̌ nə̀ bʼa sɛ̃ lyì bí byɛ̀bɛ́ á nʼá zɔ̀m nɛ̀ á byili mú ni, mùnì ga bə̀ Yi-ni-zhú mú jàn dɛ́ súlí.

³⁰Yi zə rə̀ Eshirhə y rə cĩ́ rə̀ cìcì myɔrhɔ á yala nɛ. Á bə̀kʼá zhìlì è wu ni yé, bə̀ wɔ́ èmyɛ́ è ce á yě bə̀ Yi bʼa vwârh ába námpúm á yə̀-bəlwàálɛ́ wẽ́ dɛ̃ rə̀dù.

³¹Lò gə wɛ̀rhɛ́ ába lwɛlɛ, sʼá bə̀kʼá cĩ́ di á wẽ́ yé. Á bə̀kʼá kwè lyim, á bʼá pupwiri tɛ̃´ yé. Á bə̀kʼá bya dwã yé, á bə̀kʼá tùrh dwã yé. Dɛ̃̌na á cìn ǹdə́ wu-bárhɛ́ tùntwə̃̀ə̃̀ dwí gakó. ³²Wɛ̀rhɛ́na cɛ̀nɛ̀ dwã nɛ, sʼá zə wu-bɔ̀nɔ̀ ǹdə́ dwã. Pəna dwã sǔbri ǹdə Yi gə́ tó Kristə dɛnnɛ rə pə ába sǔbri ní.

Nə́ wɔ́ pwẽ̀ lyì

¹Á wɔ́ Yi byì-swénnə. Rə̀myɛ́ ce, cenə jàn nɛ́ á wɛ̀rhɛ́ ǹdə rə̀ ta. ²Swénénə dwã, ǹdə Kristə gə́ só nə́ba né. Ń pɔ ń cìn Yi ni ǹdə vwĩ̀-kɔn dɛ̀bɛ́ rə̀ zhe lwẽ́ nã́nyə̀nyɛ̀lɛ́ rə̀ sú Yi yírh ta nə́ yilə.

³Á wɔ́ Yi lyì. Fwə̂l tumə ǹdə́ tùntùm-bəywààlɛ̀ ǹdə́ nə̀cɛ̀ndɛ̀ pyâ kɔn lyɛ̃ cɛ nɛ, rə̀myɛ́ èta mɔ́ yò bə mə̂ sʼo púr nyú w myɛ cìcì á sõ yé. ⁴Á bə̀kʼá púr zɔ̀m-bəywààlɛ̀ ráá zɔ̀mà nyɛ̀bɛ́ nə̀ bə kùr zhe myɛ cìcì á nyú w yé. Zɔ̀mà nɛ́ nə̀myɛ́ gakó bə mə̂ sə nə zɔ̀m yé. Á gə la zɔ̌m, sʼe yə̀ Yi nə̀bán co. ⁵Lwarna bə̀ nə̀fòló ǹdə́ lyì-bəyɔ̀lɔ̀ ǹdə́ bwɛ̃̌-dǔr cí tʼâ la jàà nɔ Kristə ǹdə́ Yi tənà y wẽ́ yé, bə̀ wẽ̀ dé tɛ̀bɛ́ lò mó nə́ ń dùr rə̀ bwɛ̃̌ mɔ́ nʼê jǐrh ǹdə ń yi ta.

⁶Á bə̀kʼá yẽ̌ lyì zə zɔ̀m-fwə́ə́re bə mʼe jə́jɛ̀rɛ́ ába yé. Wɔ́ rə̀myɛ́ gakó yil Yi lyim nʼê zɛ̃̀ ǹdə́ lyì bí byɛ̀bɛ́ bə̀ tʼâ zwẽ rə̀ nyí ni mú. ⁷Á bə̀kʼá jí ǹdə́ lyì bí bə̀myɛ́ mɔ́ dwí rí yé. ⁸Shãã ga, á yʼâ ŋwɛ́nɛ́ cə-byín wə. Sə èlâsɛ̃´, á gə́ zù Cinu mú ce, á ŋwɛ́nɛ́ pwẽ̀ wə̀. Rə̀myɛ́ ce, wɛ̀rhɛ́na ǹdə pwẽ̀ lyì gə́ mə̂ sə bə wɛ̀rhɛ́ nɛ́, ⁹bə̀ cɛ̀nɛ̀ dwí gakó, ǹdə́ cángá dwí gakó, ǹdə́ zhə̀n dwí gakó, wɔ́ pwẽ̀ wẽ́ rə̀ nʼê shí ní. ¹⁰Cenə jàn nɛ́ á lwar kɔn dɛ̀bɛ́ rə̀ wɔ́ Yi pùbùlə̀. ¹¹Á bə̀kʼá ce á cìn cə-byṹ tùntwə̃̀ə̃̀ né wẽ́ yé, bə̀ nə̀ bə kùr zhe yé. Á gaga mɔ́ mə̂ sʼá byili byɛ̀bɛ́ bə̀ nʼê twĩ̀ tùntwə̃̀ə̃̀ né nə̀myɛ́ mɔ́ nɛ bə̀ nyǐ nə̀ bə mə̂ yé. ¹²Kɔn dɛ̀bɛ́ bə̀myɛ́ cìnə́ bé nʼê shèè bə̀ wɛ̀rhɛ́ mɔ́ byilu myɛ wɔ́ cìzhìlə̀. ¹³Sə pwẽ̀ gə tú è yə̂r tùntwə̃̀ə̃̀ né nə̀myɛ́ gakó, kɔn gakó nʼê dwi pwẽ̀ nè pamparɛ̃ɛ̃. ¹⁴Zhə̀nà, kɔn dɛ̀bɛ́ gakó rə̀ du pwẽ̀ nè pamparɛ̃ɛ̃, rə̀ nʼê jǐrh pwẽ̀. Wɔ́ rə̀myɛ́ è ce, bə̀ nʼê wə̀lə̀:

“Ǹmyɛ́ mɔ̀bɔ́ ǹ dɛ̌ mɔ́, zɛ̃̀ tɛ̃´;

zɛ̃̀ ń yẽ̌ cùùrí ni;

Kristə mà n yə̂r mó ǹdə́ ń pwẽ̀ dé.”

¹⁵Dɛ̃̌na á cìn á tùntwə̃̀ə̃̀ né wẽ́. Yálna surhə cìnə́, sʼá bə̀kʼá wɛ̀rhɛ́ ǹdə bə-surhə-zhe cìnə́ ta yé. ¹⁶Cenə jàn nɛ́ á wɛ̀rhɛ́ cɛ̀nɛ̀ twéé twéé, bə̀ lũ w nə́ ŋwɛ́nɛ́ ò wẽ́ èlâsɛ̃´ mɔ́ bə càn yé. ¹⁷Wɔ́ rə̀myɛ́ è ce, á bə̀kʼá yə̀ lyì byɛ̀bɛ́ bə̀ yə̀l nə̀ kùrə̀ yé. Cenə jàn nɛ́ á lwar kɔn dɛ̀bɛ́ Cinu nə́ ń yâl bʼâ wɛ̀rhɛ́ mɔ́ kùrə̀.

¹⁸Á bə̀kʼá nyɔ̀ sɛ̃´ kɔn lyɛ̃ cɛ nɛ yé, bə̀ sɛ̃´ nyɔ́ kɔn lyɛ̃ cɛ nɛ nʼê ce numbyíní yààyàà tùntwə̃̀ə̃̀ wẽ́. Cenə á wun ní sú ǹdə́ Eshirhə náàcɛ̀nɛ́. ¹⁹Á gə tú dwã yó gakó, sʼá nún núrh shɛ̀bɛ́ gakó sə̀ nʼê shí Eshirhə náàcɛ̀nɛ́ sõ, ǹdə́ núrh dwí gakó, á mʼá ce Cinu nə̀bán ǹdʼá wun gakó. ²⁰Cenə nə́ Da Yi nə̀bán twéé twéé kɔn gakó wẽ́, Cinu Yezu Kristə yil yilə.

Pwəə nə́ ń cící kana bɛ́ ǹdə́ bə̀ byə́nə́ bé ga

²¹Shɛ̀nɛ́na dwã nyí ni Kristə nyɔ̀mɔ̀ w yilə. ²²Ámyɛ̌ kana bɛ́, zwẽnə á byə́nə́ bé nyí ni, ǹdə á gə́ nʼá zwẽ Cinu nyí ni ní, ²³bə̀ bal wɔ́ ń kɛ̃ yó-cə́bal ǹdə Kristə gə́ wɔ́ ń gùlú w yó-cə́bal nɛ́. Gùlú w wɔ́ Kristə yala. Wɔ́ ńmyɛ̌ cìcì ń wɔ́ ò Zwennə. ²⁴Kana bɛ́ myɛ mə̂ sə bə zwẽ bə̀ byə́nə́ bé nyí ni, ǹdə gùlú w gə́ nʼô zwẽ Kristə nyí ni ní.

²⁵Ámyɛ̌ bala bɛ́, swénénə á kana bɛ́, ǹdə Kristə gə́ só ń gùlú w n pə ń myə̂l lé ò yil né. ²⁶Ń zə nɛ̃̌ ǹdə́ ń nyì-zɔ̀mɛ̀ n mə n shàrh w o jǐrh wárhgáá ǹdə Yi gə́ nʼê yâl nɛ́. ²⁷Ń nə́ ń yâl bʼò yál cɛ̀nɛ̀ ò kɔn gakó wẽ́, o yə̀ wárhgáá, dóó dwí-byǐ bə̀kʼa gùlí w o mʼo zhì ńmyɛ̌ cìcì yé né yé.

²⁸Èta myɛ, bala bɛ́ mə̂ sə bə swéné bə̀ kana bɛ́ ǹdə bə̀ gə́ só bə̀ cìcì ní, bə̀ lò mɔ̀bɔ́ ǹ só ǹ kɛ̃, wɔ́ ǹ cìcì ǹ só. ²⁹Lò tɛ̀nɛ́ ń nə́ ń wə̀l bə̀ ń twə́r tɛ̀nɛ́ ǹdə́ ń sə̀pwà yala nɛ́ yé. Lò gakó nə́ ń cili ń yala nɛ́ sõ, n kwɛrhɛ nɛ cɛ̀nɛ̀, ǹdə Kristə gə́ nə́ ń wɛ̀rhɛ́ ń gùlú w ní. ³⁰Nə́myɛ̌ wɔ́ Kristə yala nɛ́ kə̀kàlsɛ̀. ³¹Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Rə̀myɛ́ yilə, bal mà n yẽ̌ ń da ǹdə́ ń ná nɛ, n jòm ǹdə́ ń kɛ̃ mɔ́, sə bə̀myɛ́ bə̀lyè y ga bʼa mù dwã nɛ bə jǐrh kɔn rə̀dù.” ³²Zɔ̀mɛ̀ rɛ́ rə̀myɛ́ nʼê byili nə́ba kɔn nánfɔ̀lɔ̀ dɛ̀bɛ́ rə̀ zhe kùrə̀, sə àmyɛ́ nʼâ bùl bə̀ wɔ́ Kristə ǹdə́ ń gùlú w yò rə̀ nʼê zɔ̀mà. ³³Sə rə̀ nʼê zɔ̀m ámyɛ yò, bə̀ bal gakó mə̂ sə́ swéné ǹ kɛ̃ ǹdə ǹ cìcì ta, sə kɛ̃ myɛ mə̂ sə́ nyɛ̀ ǹ byal.

Pwəə nə́ ń cící bə̀sɔ́ná bɛ́ ǹdə́ bə̀ dabá bɛ́ ga

¹Ámyɛ̌ bə̀sɔ́ná bɛ́, zwẽnə á dabá ǹdʼá nábá nyí ni, ǹdə Cinu gə́ nə́ ń yâl nɛ́. Rə̀myɛ́ wɔ́ kɔn dɛ̀bɛ́ rə̀ mâ. ²Yi nyə́ né gakó wẽ́, wɔ́ nyí rí tɛ̀bɛ́ rə̀ nʼê wə̀l bə̀: “Nyám ǹ da ǹdə́ ǹ ná” mɔ́ nɛ rə̀ jɛ̀nɛ̀ rə bwəl nyí rə bʼe súlí. ³Rə̀ wòwə̀: “Ǹ gə nə́ ǹ nyàm ǹ da ǹdə́ ǹ ná, ǹ bʼâ nə wu-nyɔ̃̀, ǹ myə̂l jʼa zə dwɛ̀lɛ̀ cɛ yó.”

⁴Ámyɛ̌ dabá, bə̀kʼá wɛ̀rhɛ́ á bə̀sɔ́ná bɛ́, á ce bə̀ lyimə zɛ̃̀ yé. Kɔ́nna bɛ, sʼá cící bi, á cèrhè bè, ǹdə́ Cinu cìcì surhə né.

Pwəə nə́ ń cící tùntùnnə̀ bé ǹdə́ bə̀ yó-cìnə́ bé ga

⁵Ámyɛ̌ tùntùnnə̀ bé, zwẽnə á yó-cìnə́ bé cɛ yó mó nyí ni. Nyámna bɛ ǹdə́ wu-põ, ǹdə á gə́ nʼá zwẽ Kristə nyí ni ní. ⁶È bə̀kʼa yə̀ bə̀ gə zhǐ bə̀ yírhə́, á zɛ̃̀ á nʼá twĩ̀ á pɛ bɛ ǹdə wɔ́ numbyínsi pùbùlə̀ wɔ̀rhɔ́ á nʼá pyà ta yé. Wɛ̀rhɛ́na kɔn dɛ̀bɛ́ Yi nʼê yàlá, ǹdʼá wun gakó á tumə né wẽ́, ǹdə Kristə tùntùnnə̀ ta. ⁷Twĩ̌nə á pə á yó-cìnə́ bé ne ǹdə́ wu òdù, ǹdə wɔ́ Kristə ne á nʼá twĩ̀ á pɛ ta, sə è bə̀kʼa yə̀ ǹdə wɔ́ numbyínsi dúdú ni á nʼá twĩ̀ á pɛ ta yé. ⁸Lwarna bə̀ lò mɔ̀bɔ́ ń nə́ ń wɛ̀rhɛ́ cɛ̀nɛ̀, rə̀-ná-cí gə wɔ́ lò tùntùnnə̀, ráá ń gə cǐ ń cìn myɛ, ń bʼa nə cɛ̀nɛ̀ rɛ́ ń wɛ̀rhɛ́ mɔ́ Cinu sõ.

⁹Ámyɛ̌ yó-cìnə́ bé, ámyɛ wɛ̀rhɛ́na cɛ̀nɛ̀ ǹdʼá tùntùnnə̀ bé. Á bə̀kʼá bya bɛ yé. Lwarna bʼâmyɛ̌ ǹdə́ bə̀myɛ́ ga zhe yó-cə́bal mə̀dù, ń ŋwɛ́nɛ́ Arəzana w ń cǐ ámyɛ̌ ga. Lyì bí gakó wɔ́ kɔn rə̀dù ń sono.

Nə́ mə̂ sə nə́ kwè búlə́ né wẽ̀ dé Yi nʼê pɛ mɔ́

¹⁰À zɔ̀mɛ̀ nánkwɛɛ́rɛ́ à la byilu mú, wɔ́ lwə́l à nʼâ lwə̀l ába, sʼá zhí Cinu ni á bʼá pyà wu-jɔ̀ ń jàn dɛ́ nánfɔ̀lɔ̀ w wẽ́. ¹¹Kwěnə Yi búlə́ wẽ̀ dé gakó á zə á jɔ̃̀ wà, mùnì á ŋwɛ̀nɛ́ á zhì á cẽ Shətana sòlò mó. ¹²Nə́ tʼá bwí ǹdə́ numbyínsi yé. Nə́ rʼé bwí ǹdə́ jàn cìnə́ námməlwâlsɛ́ shɛ̀bɛ́ dwí gakó sə̀ ŋwɛ́nɛ́ dɛ̃̌, yírhə́ wàr nə̀ nɛ, sə̀ zhe jàn ǹdə́ ŋwɔ̀nɔ́ cə-byín lũ w wẽ́ mó. ¹³Rə̀myɛ́ ce, kwěnə Yi búlə́ wẽ̀ dé gakó á zə á jɔ̃̀ w èlâsɛ̃´, mùnì dwã nɛ́ nyɛ̀bɛ́ nə̀ bə càn mɔ́ gə tú nə̀ yúwə́, sʼá ŋwɛ̀nɛ́ á zhì á bú búlə́ né kɔn mʼe yí nə̀ zhɔ̌, sʼá zhì á nà y yó kẽkẽ.

¹⁴Zɛ̃̀nà á zhì dɛ̃̌ á dɛ̃̀. Cenə zhə̀n dɛ́ á cã̌ nɛ́ ǹdə cã̌-tɔ̀nɔ̀ ta. Zwínə cángá tumə né nə yə̀ ǹdə kàmə̀-zwǐ kɛ̀bɛ́ á mʼá cə̀r á cìn búlə́ jàà w ta. ¹⁵Cenə yə̀wâl á nə̀rh né ǹdə nə̀cìlə̀ ta, á mʼá bwə̀l yò-ècɔ̀nɔ̀ nyí rí rə̀ nʼê pɛ yə̀-zùlə́ mó. ¹⁶Zəna á Yi-ni-zhú mú mə yə̀ ku á mʼá cə̀r á cìn kɔn gakó wẽ́ twéé gakó. Shətana gə tú è la zə è swé ré ǹdə́ rə̀ myǐn mú e dul ába, sə ku w cə̀r rè. ¹⁷Zwẽnə Yi vwârh mɔ́ á pú ǹdə cɔ̀bɔ́ yə́-pú ta, sʼá zwẽ Yi zɔ̀mɛ̀ rɛ́ Eshirhə náàcɛ̀nɛ́ nʼê pɛ ába ǹdə búlə́ shù ta mɔ́.

¹⁸Cenə Yi dɛ̃ gakó, á lwə̀l lè ǹdə́ Eshirhə náàcɛ̀nɛ́ jàn, sʼá zhìlì á yala nɛ kɔn gakó wẽ́, á lwə̀l lè dɛ̃ gakó rə̀ lyì bí gakó yilə. ¹⁹Lwə̂lnə re àmyɛ yilə, mùnì à gə la zɔ̌m, sə rə sɛ̃ nɛ ǹdə́ zɔ̀mà nyɛ̀bɛ́ nə̀ mʼa ce a byili yò-ècɔ̀nɔ̀ nyí rí rə̀ yʼà shèè mó ǹdə́ wu-jɔ̀. ²⁰À wɔ́ yò-ècɔ̀nɔ̀ nyí rí rə̀myɛ́ bwə̀lnə̀. Wɔ́ rə̀myɛ́ yil bə̀ zɔ nɛ bə ce byə̀nə́-jù wə̀. Lwə̂lnə Yi à yilə, mùnì a zɔ̀m ǹdə à gə́ mə̂ sʼa zɔ̀m nɛ́ ǹdə́ wu-jɔ̀.

Pwəə nə́ ń ce Kristə-lyì bí ń mə́ ń gwi ń sɛ́bɛ́ rɛ́ yó

²¹Tishiki wɔ́ nə́ da-byǐ nántwə̂. Ń nə́ ń twĩ̀ Cinu tum dí ǹdə kɔn gə́ mə̂ nɛ́. Ń mà n zɔ̀m à yò ǹdʼába, n byili ába kɔn dɛ̀bɛ́ à nʼâ wɛ̀rhɛ́. ²²À nʼâ twĩ̀ mù á sõ, mùnì n byili ába kɔn dɛ̀bɛ́ rə̀ ŋwɛ́nɛ́ nə́ sono, sə n súlí n zə á wun ní.

²³Nə́ Da Yi ǹdə́ Cinu Yezu Kristə mʼa ce bə̀ yə̀-zùlə́ né ǹdə́ bə̀ sónó w yə̀ nɛ́ ǹdʼámyɛ̌ ǹdə́ nə́ da-byâ bɛ́ gakó, á kwɛrhɛ á zhí bi. ²⁴Yi mʼa cĩ́ bwəl lyì byɛ̀bɛ́ gakó bə̀ só nə́ Cinu Yezu Kristə ǹdə́ sónó páá mɔ́ yó!