Kɔlɔɔsɛ

Pwəə sɛ́bɛ́ rɛ́ ń kɛ̃ n pə

Kɔlɔɔsɛ

Kristə-lyì bí ni mú

Kɔlɔɔsɛ yʼà wɔ́ Azhi tənà y cɔ. Pwəə cìcì mú yà ń gwẽ̌ yə̀ ń nà Kɔlɔɔsɛ nɛ́ ji yé. Wɔ́ ń tó-dõ mó mɔ̀bɔ́ bə̀ nʼê byẽ̀ bə̀ Epafəraasɛ mɔ́ ń bwə̀l yò-ècɔ̀nɔ̀ nyí rí gàà. Sə Epafəraasɛ cìcì mú yà ń wɔ́ Kɔlɔɔsɛ lyì byǐ. Bə̀ yʼà zɔ Pwəə bə ce byə̀nə́-jù w Orɔm nɛ́. Wɔ́ gàà ń zhì ní n kɛ̃ sɛ́bɛ́ rɛ́ n pə Kɔlɔɔsɛ Kristə-lyì bí ni. Sə wɔ́ sɛ́bɛ́ rɛ́ rə̀myɛ́ ǹdə́ rə̀ dõ mó ń kɛ̃ n pə Efɛɛzɛ Kristə-lyì bí ni mú ń tó dwã n kɛ̃. Sɛ́bɛ́ rɛ́ rə̀myɛ́ wɔ́ Tishiki ǹdə́ Oneshim jɔ̃̀ w Pwəə co re né bə vò bə pa.

Dɛ̃ rə̀dù, Epafəraasɛ yà ń zhə̀l n wɔ̀ Pwəə ne bə̀ lyì yʼà tú Kɔlɔɔsɛ, sə bə̀ nʼê byili zɔ̀mà lyì bí ni, nə̀myɛ́ ǹdə́ yò-ècɔ̀nɔ̀ nyí rí nyə̀ná nɛ́ də̀ rə̀dù yé. Pwəə gə́ nyɛ̀ɛ̀ rə̀myɛ́, n zɛ̃̀ n kɛ̃ sɛ́bɛ́ rɛ́ tɛ̀bɛ́ n pə Kɔlɔɔsɛ Kristə-lyì bí ni, n mə n byili bi bə̀ nyǐ Yi gə́ tó Kristə dɛnnɛ rə vwârh nə́ba mɔ́ dúdú já, bʼè də̀ nyɔ́ɔ́ ǹdə́ nə́ba bə̀ nə́ zwẽ nyə́ dwã nə́ bʼé nə vwârh yé.

Pwəə byili bi bə̀ Kristə cǐ kɔn gakó, ń du jàn cìnə́ bé byɛ̀bɛ́ yírhə́ wàr nə̀ nɛ mɔ́ gakó. Wɔ́ ńmyɛ̌ dúdú ń wɔ́ ń gùlú w yó-cə́bal (1.15–2.5). Rə̀myɛ́ kwã nɛ́, Pwəə lyəlyɔ jə̀fɔ́lɛ́ lyì bí byɛ̀bɛ́ bə̀ nʼê byili zɔ̀mà nyɛ̀bɛ́ nə̀myɛ́ ǹdə́ yò-ècɔ̀nɔ̀ nyí rí nyə̀ná nɛ́ də̀ rə̀dù mú ni (2.6-19).

Rə̀myɛ́ kwã nɛ́, ń byili byɛ̀bɛ́ bə̀ tó Kristə ne bə cì, bə kʼa tó mo bə bwìrhì mú gə́ mə̂ sə bə zə bə̀ cìn ní (2.20–3.17), n zɛ̃̀ n byili bi bə̀ gə́ mə̂ sə bə jòm ǹdə́ dwã nɛ́, ǹdə́ bə̀ gə́ mə̂ sə bə jòm ǹdə́ lyì bí dwã bɛ́ myɛ nɛ́ (3.18–4.6).

Pwəə nə́ ń ce Kɔlɔɔsɛ Kristə-lyì bí

^1-2Àmyɛ́ Pwəə, Yi ce à wɔ́ Yezu Kristə tùntúm ǹdə rə̀ gə́ nʼê yâl nɛ́. Àmyɛ́ ǹdə́ nə́ da-byǐ Timote nʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ byɛ̀bɛ́ á wɔ́ nə́ da-byâ á ŋwɛ́nɛ́ Kɔlɔɔsɛ nɛ́, á zù Kristə á jǐrh Yi lyì mú ni pɔ. Nə́ Da Yi mà n cĩ́ bwəl á yó, sə n pə ába yə̀-zùlə́!

Pwəə nə́ ń ce Yi nə̀bán Kɔlɔɔsɛ Kristə-lyì bí yilə

³Nə́ gə nʼé lwə̀l Yi, nə́ Cinu Yezu Kristə Da mɔ́, á yil gakó, nə́ rʼé ce ń nə̀báná. ⁴Nə́ nyɛ̀ɛ̀ bʼâ zhí Yezu Kristə ne, á jʼâ só byɛ̀bɛ́ gakó bə̀ wɔ́ Yi lyì mú. ⁵Á nʼá dɛ̃̀ kɔn dɛ́ dɛ̀bɛ́ Yi tɛnɛ rə cĩ́ Arəzana w á yil mó, sə wɔ́ yò-ècɔ̀nɔ̀ nyí rí rə̀ wɔ́ zhə̀n zɔ̀mɛ̀ rɛ́ bə̀ bwə̀l bə byili ába mó rə̀ ce á lwar rə̀myɛ́. ⁶Bə̀ nʼê bwə̀l yò-ècɔ̀nɔ̀ nyí rí rə̀myɛ́ mɔ́ lũ w púlə́púlə́ wə, sə byɛ̀bɛ́ bə̀ nʼê zwẽ de mó jʼâ nʼê súlí twéé twéé. Wɔ́ èta kɔn wɔ́ nɛ́ ámyɛ sõ, á gə́ ju kùr á nyɛ̀ɛ̀ Yi sónó zɔ̀mɛ̀ rɛ́, á sú rə̀ kùr zhə̀n zhə̀n mɔ́ yi ní ga. ⁷Wɔ́ nə́ tó-dõ nántwə̂ Epafəraasɛ ń byili ába rə̀myɛ́. Wɔ́ ńmyɛ̌ ń nə́ ń twĩ̀ Kristə tum dí ǹdə kɔn gə́ mə̂ nɛ́ á sõ nə́ yilə. ⁸Ńmyɛ̌ ń byili nə́ba sónó w Eshirhə náàcɛ̀nɛ́ co á wun ní wẽ́ mó yò.

Pwəə nə́ ń ce Yi Kɔlɔɔsɛ Kristə-lyì bí yilə

⁹Wɔ́ rə̀myɛ́ è ce, nə́ gə́ nyɛ̀ɛ̀ á Yi-ni-zhú mú yò w yi ní ga, nə́ rʼé ce Yi á yil twéé gakó. Nə́ rʼé lwə̀l lè bə̀ rə̀ pə ába lárma ǹdə́ surhə nyɛ̀bɛ́ gakó nə̀ shí rə̀ cìcì Eshirhə y sõ mó, mùnì ga á ŋwɛ̀nɛ́ á lwar rə̀ pùbùlə̀ né námpúm. ¹⁰Èta, á tùntwə̃̀ə̃̀ né bʼa tó Cinu pùbùlə̀ nè, sə á bʼâ ŋwɛ̀nɛ́ á wɛ̀rhɛ́ kɔn dɛ̀bɛ́ ń nə́ ń yàlá, sʼá wɛ̀rhɛ́ tùm-ècɛ̀nà dwí gakó, á kwɛrhɛ á lwar Yi párá. ¹¹Nə́ rʼé lwə̀l Yi mùnì rə̀ jàn dɛ́ rə̀ du kɔn gakó mó pə ába jàn, mùnì ga á ŋwɛ̀nɛ́ á zhì ǹdə́ wu-jɔ̀, sʼá zə á cìnə̀. ¹²Cenə nə́ Da Yi nə̀bán ǹdə́ wu-nyɔ̃̀, bə̀ ń ce ámyɛ wɔ̌ á nɛ cəl kɔn dɛ́ tɛ̀bɛ́ ń tɛnɛ n cĩ́ ń lyì bí ni pwẽ̀ jàà w mɔ́ wẽ́. ¹³Ń vùr nə́ba cə-byín wə, cə-byín dí kʼê bə ŋwɔ̀nɔ́ zhe nə́ yó yé, ń ce nə́ zù ń Byì-sónó w tənà y wa. ¹⁴Wɔ́ Byǐ mú ńmyɛ̌ dɛnnɛ nə́ tó né nə́ nə nə́ cìnə̀, nə́ nə nə́ yə̀-bəlwàálɛ́ sǔbri.

Wɔ́ Yezu Kristə ń cǐ kɔn gakó

¹⁵Lò lò wàr Yi ń la nɔ ǹdə́ ń yírhə́ yé. Wɔ́ Kristə ń nə́ ń byili rə̀ gə́ wɔ́ nɛ́ ma cìcì. Ńmyɛ̌ ń wɔ́ Byì-cɛ, ń cǐ dɛ̀bɛ́ gakó Yi wɛ̀rhɛ́ mɔ́, ¹⁶bə̀ wɔ́ ńmyɛ̌ dɛnnɛ Yi tó né rə wɛ̀rhɛ́ kɔn dɛ̀bɛ́ gakó rə̀ ŋwɛ́nɛ́ dɛ̃̌ ǹdə́ cɛ yó, tɛ̀bɛ́ yírhə́ wɔ̌ nə̀ nɛ, ǹdə́ tɛ̀bɛ́ yírhə́ wàr nə̀ nɛ, jàn cìnə́ byɛ̀bɛ́ bə̀ ŋwɛ́nɛ́ dɛ̃̌ bə̀ zhe ŋwɔ̀nɔ́, bə̀ nʼê jí pyɛ̀lɛ̀ mɔ́ dwí gakó. Wɔ́ ńmyɛ̌ dɛnnɛ Yi tó né rə wɛ̀rhɛ́ kɔn gakó, e jʼà wɔ́ ńmyɛ̌ yil Yi wɛ̀rhɛ́ rɛ. ¹⁷Ń jɛ̀rɛ̀ kɔn gakó ń ŋwɛ́nɛ́. Wɔ́ ńmyɛ̌ jàn yil kɔn gakó zhǐ rə̀ jàà wà. ¹⁸Wɔ́ ńmyɛ̌ ń wɔ́ yala nɛ́ yó wə́. Yala nɛ́ nə̀myɛ́ mɔ́ wɔ́ ń lyì bí gùlú wə́. Wɔ́ ńmyɛ̌ ń wɔ́ kɔn gakó kùr-jirə́. Byɛ̀bɛ́ bə̀ cù mú wẽ́, wɔ́ ńmyɛ̌ ń yàl nã́yə́ə́ mó ń bwìrhì, mùnì ga n yə̀ kɔn gakó yé né. ¹⁹Kɔn yàl Yi pùbùlə̀ bə̀ rə̀myɛ́ cìcì yál rə̀ Byǐ mú wẽ́ námpúm. ²⁰Bə̀ pəpa rə̀ Byǐ mú də̀-jɔrhɔ́ yó ń jal mɔ́ ló tɛ̃´. Kɔn yàl rə̀ pùbùlə̀ bə̀ rə̀ tó ń jal mɔ́ mə̀myɛ́ dɛnnɛ rə ce yə̀-zùlə́ yə̀ nɛ́. Èta, rə̀ tó ńmyɛ̌ dɛnnɛ rə kwɛrhɛ kɔn dɛ̀bɛ́ gakó rə̀ ŋwɛ́nɛ́ cɛ yó, ǹdə́ tɛ̀bɛ́ gakó rə̀ ŋwɛ́nɛ́ dɛ̃̌ Arəzana w mɔ́ yò ǹdə́ rə̀ cìcì.

²¹Shãã ga, ámyɛ yʼâ nyɛ ǹdə́ Yi; á bùlə̀ námməlwâlsɛ́ ǹdʼá tumə námməlwâlsɛ́ ce á yʼâ wɔ́ rə̀ zwə̀. ²²Sə Yi Byǐ mú jǐrh numbyíní n cì. Èlâsɛ̃´, Yi tó ń cu mú dɛnnɛ rə kʼa kwɛrhɛ á yò ǹdə́ rə̀ cìcì, mùnì á yə̀ rə̀myɛ́ lyì, á yə̀ wárhgáá, dóó bə̀kʼa yə̀ á yó w yé, á bʼá ŋwɛ̀nɛ́ á zhì rə̀ yé né. ²³Sə á mə̂ sʼá pə á nà tɛ̃´ á zhì kẽkẽ á Yi-ni-zhú mú wẽ́. Á bə̀kʼá yẽ̌ yò-ècɔ̀nɔ̀ nyí rí bə̀ bwə̀l bə byili ába mó ne yé, bə̀ wɔ́ rə̀myɛ́ rə̀ ce nə́ rʼé dɛ̃̀ kɔn dɛ̀bɛ́ Yi la nə́ba pɔ mɔ́. Bə̀ bwə̀l yò-ècɔ̀nɔ̀ nyí rí rə̀myɛ́ mɔ́ bə byili lũ w púlə́púlə́ ne, sə àmyɛ́ wɔ́ rə̀myɛ́ yil à nʼâ twĩ̀.

Pwəə nə́ ń nwɛ̀nɛ̀ Kristə-lyì gùlú w yilə

²⁴À wu nyɛ̀ èlâsɛ̃´ à gə́ nʼâ nwɛ̀nɛ̀ á yil mó. Wɔ́ nɔ̀nɔ̀ w kɔ̀bɔ́ Kristə nwɛ̀nɛ̀ ń yala nɛ́ yil mó àmyɛ nʼâ tó à nwɛ̀nɛ̀. Yala nɛ́ nə̀myɛ́ wɔ́ ń gùlú wə́. ²⁵Yi twĩ̀ nì bʼà bwə̂l rə̀ zɔ̀mɛ̀ rɛ́ a byili lyì bí ni. Wɔ́ rə̀myɛ́ è ce à jǐrh gùlú w tùntùnnə̀, mùnì a bwə̀l lè námpúm a byili ába. ²⁶Lũ w kùr-ju yi ní ga, Yi yʼà shèè rè lyì dwí gakó yé né. Sə èlâsɛ̃´, rə̀ byili ri rə̀ lyì bí ni pamparɛ̃ɛ̃. ²⁷Zɔ̀mɛ̀ rɛ́ rə̀myɛ́ mɔ́ zhe kùr dɛ̃´dɛ̃´. Wɔ́ rə̀myɛ́ è ce Yi byili rə̀myɛ́ ǹdə́ rə̀ zùwə́ y rə̀ lyì bí ni nunə dwí gakó yilə. Zɔ̀mɛ̀ rɛ́ rə̀myɛ́ nʼê byili bə̀ Kristə ŋwɛ́nɛ́ á wẽ́; wɔ́ ńmyɛ̌ ń ce á nʼá dɛ̃̀ cəl Yi zùwə́ y wẽ́. ²⁸Wɔ́ Kristə mó ńmyɛ̌ mɔ́ yò w nə́ rʼé bwə̀l nə́ byili lyì bí gakó ne. Nə́ rʼé cící bi, nə́ rʼé byili bi ǹdə́ surhə nyɛ̀bɛ́ gakó nə́ zhe, mùnì ga nə́ sɛ̃ bɛ bə ŋwɛ̀nɛ́ bə yə̀ náàcɛ̀nà Yi yé né. ²⁹Wɔ́ rə̀myɛ́ yil à nʼâ ce jàn nɛ́ à twĩ̀ ǹdə́ jàn dɛ́ nánfɔ̀lɔ̀ w Kristə pɔ nɛ mɔ́.

¹Zhə̀nà, à nʼâ yâl bʼâ lwar bʼà nʼâ ce jàn nɛ́ ǹdə́ à wu gakó ámyɛ̌ ǹdə́ Laɔdɛɛsɛ lyì bí ǹdə́ byɛ̀bɛ́ gakó bə̀ gwẽ̌ yə̀ nɛ̀ nɛ ǹdə́ bə̀ yírh mó yilə, ²mùnì ga ámyɛ̌ ǹdə́ bə̀myɛ́ ga wun swẽ́, sʼá zə sónó ǹdə́ nyì-dwìì, sʼá zə lármɔ dɛ̃´dɛ̃´, á lwar Kristə mó ń wɔ́ kɔn dɛ̀bɛ́ Yi yʼà shèè mó párá. ³Wɔ́ ńmyɛ̌ sõ surhə ǹdə́ zhə̀n pár lwar dwí gakó ŋwɛ́nɛ́ nɛ́.

⁴À nʼâ byili ába rə̀myɛ́ mùnì ga á bə̀kʼá yẽ̌ lò zə ń zɔ̀m-ènyɛ̀là n mə n jə́jɛ̀rɛ́ ába yé. ⁵Bá nə́ gə nyɛ ǹdə́ dwã myɛ, à wu w ŋwɛ́nɛ́ ǹdʼába. À tʼâ swě á yò yé, sə à wu nyɛ̀ à gə́ nyɛ̀ɛ̀ bʼâ zhí Kristə ne kẽkẽ, á jě ǹdə́ dwã cɛ̀nɛ̀ mɔ́ yilə.

Zhínə Kristə ne kẽkẽ

⁶Á zù Yezu Kristə ń wɔ́ á Cinu, jʼá nʼá tó mo ǹdʼá wun gakó. ⁷Zhínə ńmyɛ̌ nɛ kẽkẽ ǹdə cǒ nə̀rh gə́ yʼa pə tɛ̃´ nɛ́, sʼá yẽ̌ á cìn nì námpúm á ce ń jɔ̃̀ wà. Cə̀ə̀lènə̀ á zhí mu ǹdə bə̀ gə́ cèrhè ába né, sʼá ce Yi nə̀bán dɛ̃´dɛ̃´.

⁸Dɛ̃̌na, lò bə̀ká n zə numbyínsi lármɔ ǹdə́ kɔma zɔ̀mà n jə́jɛ̀rɛ́ ába yé, bə̀ rə̀myɛ́ gakó wɔ́ numbyínsi lùl-e-pwírí ǹdə́ lũ w wẽ̀ tɛ̀bɛ́ yírhə́ wàr nə̀ nɛ wẽ́ rə̀ nʼê shí ní, sə è də̀ Kristə sõ yé. ⁹Lwarna bə̀ Yi cìcì ŋwɛ́nɛ́ Kristə yala nɛ́ wẽ́ námpúm. ¹⁰Á gə́ mù dwã nɛ ǹdə́ ńmyɛ̌ mɔ́ ce, á nɔ kɔn gakó ń sõ, bə̀ ń cǐ ŋwɔ̀nɔ́ cìnə́ ǹdə́ jàn cìnə́ byɛ̀bɛ́ gakó yírhə́ wàr nə̀ nɛ mɔ́.

¹¹Wɔ́ ńmyɛ̌ wẽ́ bə̀ gòm ába né, sə bə̀ yə̀ ába góm ǹdə numbyínsí gə́ nʼê gòm né yé.2.11 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili góm mó kùr gə́ nʼê yâl e wɔ̀ nɛ́ gàà mɔ́. Ámyɛ̌ góm mó shí Kristə sõ, sə mə̀ vùr kɔn dɛ́ dɛ̀bɛ́ rə̀ yʼà ŋwɛ́nɛ́ á wẽ́ rə̀ nʼê ce á wɛ̀rhɛ́ lwɛlɛ rɛ́ mɔ́. ¹²Bə̀ tó nɛ̃̌-shɔ mɔ́ á zwẽ mó dɛnnɛ bə mù ába Kristə ne bə ce lú-bɔ̀l wà, sə Yi bwìrhì mù n zɛ̃̀ n du cùùrì wẽ́. Á gə́ zhí Yi jàn dɛ́ nánfɔ̀lɔ̀ w nɛ mɔ́ ce, á kʼá tó mo myɛ á bwìrhì. ¹³Shãã ga, á lwɛlɛ rɛ́ ǹdə́ bə̀ gə́ yʼà yə̀ ába gòm mó ce, á yʼâ cùwə̀. Sə èlâsɛ̃´, Yi kʼá tó Kristə dɛnnɛ rə bwìrhì ába, rə pə nə́ba nə́ yə̀-bəlwàálɛ́ gakó sǔbri. ¹⁴Sɛ́bɛ́ rɛ́ tɛ̀bɛ́ nə́ yə̀-bəlwàálɛ́ yʼà kɛ̃ rə̀ wẽ́ rə̀ nʼê byili bə̀ nə́ mə̂ ǹdə́ còrhò-tum mú, Yi kâr rɛ. Kɔn nyɛ̌ ǹdə wɔ́ Kristə də̀-jɔrhɔ́ yó rə̀ pəpa rɛ nɛ́ ta. ¹⁵Èta, Yi zwẽ ŋwɔ̀nɔ́ cìnə́ ǹdə́ jàn cìnə́ byɛ̀bɛ́ yírhə́ wàr nə̀ nɛ mɔ́ jàn dɛ́, rə zə bɛ rə mʼe byili lyì bí gakó yé né bə̀ rə̀ Byǐ mú jú bɛlɛ bə̀ yó.

¹⁶Rə̀myɛ́ yilə, lò bə mə̂ sə n zɔ̀m á sõ kùjú jú, ráá sɛ̃´ nyɔ́ shò-kwã nɛ́ yé. Lò bə mə̂ sə n zɔ̀m á sõ myɛ címsi jú, ráá càn-dùlí, ráá shìrhə́ dɛ̃ rɛ́ yil yé, ¹⁷bə̀ rə̀myɛ́ gakó wɔ́ kɔn dɛ́ dɛ̀bɛ́ rə̀ bàn mɔ́ èsə̃̌yùlú, sə kɔn dɛ́ cìcì mú wɔ́ Kristə.

¹⁸Lyì ŋwɛ́nɛ́ bə̀ nʼê wùlì màlɛ́kabá yé né bə̀ nʼê cèrhé be. Bə̀ nʼê bùl bə̀ kɔn dɛ̀bɛ́ bə̀ nʼê nɛ bə̀ dàrhà wẽ́ mó wɔ́ kɔn nánfɔ̀lɔ̀. Lyì bí bə̀myɛ́ mɔ́ bùlə̀ né wɔ́ numbyínsi nyə̀ná, nə zɛ̃̀ nə ce bə̀ nʼê zhẽ̌ bə̀ cìn dɛ̃̌. Á bə̀kʼá yẽ̌ lyì bí bə̀myɛ́ mɔ́ dwĩ̀ ába á mwìrì kwândɛ́ dɛ̀bɛ́ Yi tɛnɛ rə cĩ́ ába mó yé. ¹⁹Bə̀myɛ́ tʼâ pyɛ́nɛ́ bə̀ zhí Kristə ne kẽkẽ yé, e jʼà wɔ́ ńmyɛ̌ ń wɔ́ yala nɛ́ yó wə́. Wɔ́ yó w ò nʼô pɛ yala nɛ́ kɔn dɛ̀bɛ́ gakó nə̀ zhe rə̀ tum. Wɔ́ òmyɛ́ ò ce yala nɛ́ kə̀kàlsɛ́ gakó zhí dwã nɛ náàcɛ̀nɛ́, Yi zɛ̃̀ rə̀ ce nə̀ rʼê byìl ǹdə rə̀ gə́ nʼê yâl nɛ́.

Á tó Kristə ne á cì, á tó mo á bwìrhì

²⁰Ámyɛ̌ tó Kristə ne á cì. Èta, á zwẽ á cìn lũ w wẽ̀ dé tɛ̀bɛ́ yírhə́ wàr nə̀ nɛ mɔ́ jɔ̃̀ wà. Byè yil á nə nʼá wɛ̀rhɛ́ ǹdə lũ w gwẽ̌ cǐ ába ta? Byè yil á nʼá yẽ̌ bə̀ pɛ ába nyə́ né nyɛ̀bɛ́ èta mɔ́? ²¹Nyə́ né nə̀myɛ́ mɔ́ nʼê byili: “Bə̀ká kwè tɛ̀bɛ́ yé; bə̀ká jí tɛ̀bɛ́ yé; bə̀ká dwə̀rh tɛ̀bɛ́ yé.” ²²E jʼà wɔ́ wẽ̀ tɛ̀bɛ́ ǹ gə kwè ń mə́ wɛ̀rhɛ́ kɔn, jʼâ wɔ́ rə̀ ga; wɔ́ wẽ̀ dé rə̀myɛ́ yil bə̀ nʼê pɛ nyə́ né nə̀myɛ́, e jʼà wɔ́ numbyínsi nyə́. ²³Zhə̀nà, e wùlì tɛ̃´ e cèrhé Yi ǹdə́ cìn-lwəl ǹdə ǹ gə́ nə́ ǹ yâl nɛ́, wɔ́ ǹ yala nɛ́ nɔ̀nɔ̀; rə̀myɛ́ gakó nyɛ̌ ǹdə surhə kɔn ta. Nyə́ né nə̀myɛ́ mɔ́ jʼà bə kùr zhe yé. Nə̀ wɔ́ numbyíní yala shil kɔna.

¹Á tó Kristə ne á bwìrhì. Rə̀myɛ́ ce, pyâna kɔn dɛ̀bɛ́ rə̀ ŋwɛ́nɛ́ dɛ̃̌, ń gə́ jě Yi jə̀jĩ́ ni mə̀gã̌ mɔ́. ²Cenə dɛ̀bɛ́ rə̀ ŋwɛ́nɛ́ dɛ̃̌ mɔ́ pyâ yò zù ába, sʼá bə̀kʼá yẽ̌ dɛ̀bɛ́ rə̀ ŋwɛ́nɛ́ cɛ yó mó pyâ yò zù ába yé, ³bʼâ cùwə̀, sə á nyǔ mú tó Kristə ne mə shèè Yi wẽ́. ⁴Wɔ́ Kristə ń wɔ́ á nyǔ mú. Sə ń gə ká ń túwə́, rə̀myɛ́ yó, ámyɛ bʼâ tó mo á zù ń zùwə́ y wẽ́.

⁵Rə̀myɛ́ ce, vǔrnə lũ w nyə̀ná nɛ́ á wẽ́: fwə̂l, ǹdə́ tùntùm-bəywààlɛ̀, ǹdə́ bùlə̀ námməlwâlsɛ, ǹdə́ shilə námməlwâlsɛ, ǹdə́ nə̀cɛ̀ndɛ̀ pyâ kɔn lyɛ̃ cɛ nɛ, bə̀ nə̀cɛ̀ndɛ́ pyâ kɔn lyɛ̃ cɛ nɛ mɔ́ nʼê twí è jǐrh ǹdə yi ta numbyíní yilə. ⁶Wɔ́ rə̀myɛ́ rə̀ nʼê zɛ̃̀ Yi lyim ni ǹdə́ byɛ̀bɛ́ bə̀ tʼâ zwẽ rə̀ nyí ni mú. ⁷Shãã ga, ámyɛ gə́ yʼâ gwẽ̌ ŋwɛ́nɛ́ wẽ̀ dé rə̀myɛ́ mɔ́ wẽ́ yi ní, wɔ́ èta á yʼâ nʼá wɛ̀rhɛ́ nɛ́.

⁸Sə èlâsɛ̃´, yẽ̌nə wẽ̀ dé tɛ̀bɛ́ èta mɔ́ nɛ: lyim, ǹdə́ jàn tumə, ǹdə́ wu-bárhɛ́. Dwã tùùrhì ǹdə́ zɔ̀m-bəywààlɛ̀ bə mə̂ sə nə du á nyú w yé. ⁹Á bə̀kʼá gõ kɔma á pə dwã nɛ yé, bʼâ vùr á shãã ga tùntwə̃̀ə̃̀ né ǹdə kàmə̀-zù-dwã́ ta. ¹⁰Sə èlâsɛ̃´, kɔn nyɛ̌ ǹdə wɔ́ kàmə̀-zù-dwə̃̀ á kʼá zù ta. Á jǐrh lyì-dùlə̀, byɛ̀bɛ́ bə̀ jʼâ wɔ́ nándùlə̀ twéé twéé, bə̀ nyɛrhɛ bə̀ Wârhna mɔ́, mùnì ga bə lwar ń pár náàcɛ̀nɛ́. ¹¹Èta, Zhwifubá ǹdə́ byɛ̀bɛ́ bə̀ də̀ Zhwifubá mó ga jǐrh kɔn rə̀dù; byɛ̀bɛ́ bə̀ gòm mó ǹdə́ byɛ̀bɛ́ bə̀ yə̀ gòm mó ga jǐrh kɔn rə̀dù; zhələ ǹdə́ gɔ-má ǹdə́ yómə́ ǹdə́ byɛ̀bɛ́ bə̀ cǐ bə̀ cìn mú ga jǐrh kɔn rə̀dù. Sə Kristə wɔ́ kɔn gakó, ń ŋwɛ́nɛ́ á gakó wẽ́.

¹²Yi só ába, rə̀ cír ába, mùnì ga á yə̀ rə̀myɛ́ lyì. Rə̀myɛ́ ce, cenə jàn nɛ́ á yə̀ nɔ̀nɔ̀-dǔr cìnə́, á swéné dwã. Yálna cìn-lwəl cìnə́ ǹdə́ lyì-nyɛ̀mɛ̀, ǹdə́ wu-bɔ̀nɔ̀ cìnə́, ǹdə́ cìn-pyɔ́nɔ́ cìnə́. ¹³Zəna cìn-pyɔ́nɔ́ ǹdə́ dwã. Lò mə̀dù gə tú ń zhe zɔ̀mɛ̀ ǹdə́ ń dõ, sʼá pə dwã sǔbri. Cinu pɔ ába sǔbri; ámyɛ mə̂ sʼá pə dwã sǔbri. ¹⁴Sə kɔn du, swénénə dwã, bə̀ wɔ́ sónó w ò nʼô ce nyì-dwìì námpúm yàl nɛ́.

¹⁵Cenə yə̀-zùlə́ né nyɛ̀bɛ́ Kristə nə́ ń pɛ mɔ́ yə̀ á wẽ́. Wɔ́ yə̀-zùlə́ né nə̀myɛ́ yil Yi byẽ̀ ába rə ce á ŋwɛ́nɛ́ dwã yó, mùnì ga á jǐrh kɔn rə̀dù. Cenə rə̀ nə̀bán twéé twéé. ¹⁶Yẽ̌nə Kristə zɔ̀mɛ̀ rɛ́ jòm á wẽ́ námpúm. Byilinə dwã nɛ, sʼá cící dwã ǹdə́ surhə nyɛ̀bɛ́ nə̀ càn. Núnnə núrh shɛ̀bɛ́ sə̀ nʼê shí Eshirhə náàcɛ̀nɛ́ sõ, ǹdə́ núrh dwí gakó á mʼá ce Yi nə̀bán ǹdʼá wun gakó. ¹⁷Kɔn dɛ̀bɛ́ gakó á nʼá zɔ̀mà, ǹdə́ dɛ̀bɛ́ gakó á nʼá wɛ̀rhɛ́, wɛ̀rhɛ́na rə̀ gakó Cinu Yezu yil lé yilə, á tó ńmyɛ̌ dɛnnɛ á ce nə́ Da Yi nə̀báná.

Kristə-lyì kɛ̀lɛ́ jòmə́

¹⁸Ámyɛ̌ kana bɛ́, shɛ̀nɛ́na á byə́nə́ bé nyí ni, bə̀ wɔ́ rə̀myɛ́ rə̀ wɔ́ Cinu pùbùlə̀. ¹⁹Ámyɛ̌ bala bɛ́, swénénə á kana bɛ́, sʼá bə̀kʼá gwirhi á yə́rh ǹdə́ bɛ yé. ²⁰Ámyɛ̌ bə̀sɔ́ná bɛ́, cilinə á dabá ǹdʼá nábá zɔ̀mà kɔn gakó wẽ́, bə̀ wɔ́ rə̀myɛ́ Cinu nə́ ń yàlá. ²¹Ámyɛ̌ dabá, á bə̀kʼá kwè lyim twéé twéé ǹdʼá bə̀sɔ́ná bɛ́ yé, mùnì ga bə̀ wun bə̀kʼa gə yé.

²²Ámyɛ̌ tùntùnnə̀ bé, shɛ̀nɛ́na á yó-cìnə́ bé cɛ yó mó nyí ni kɔn gakó wẽ́. Shɛ̀nɛ́na bə̀ nyí ni ǹdʼá pùbùlə̀, á gə́ nʼá nyàm Cinu mú yilə. Sə è bə̀kʼa yə̀ bə̀ yírh dǔr dúdú yil á nʼá shɛ̀nɛ́ bə̀ nyí ni, e jǐrh ǹdə wɔ́ numbyínsi nyí ni shɔ̀nɔ́ ta yé. ²³Kɔn dɛ̀bɛ́ gakó á nʼá wɛ̀rhɛ́ mɔ́, wɛ̀rhɛ́na rɛ ǹdʼá wun gakó. Á yě bə̀ wɔ́ Cinu yil á nʼá wɛ̀rhɛ́ rɛ, sə è də̀ numbyíní dúdú yil yé. ²⁴Á yě bʼâ mʼâ nə cəl kwândɛ nə̀cɛ̀ndɛ́ tɛ̀bɛ́ Yi cĩ́ rə̀ lyì bí ni mú wẽ́, bə̀ wɔ́ Kristə ń wɔ́ á yó-cə́bal mɔ́ cìcì mú; wɔ́ ńmyɛ̌ nyí ni á nʼá shɛ̀nɛ́ nɛ́. ²⁵Lò mɔ̀bɔ́ ǹ wɛ̀rhɛ́ lwɛlɛ, ǹ bʼâ nə còrhò-tum rə̀ yilə; bə̀ lyì bí gakó wɔ́ kɔn rə̀dù Yi sono.

¹Ámyɛ̌ yó-cìnə́ bé, zəna á tùntùnnə̀ bé ǹdə́ wu-cángá, sʼá bə̀kʼá cír jàlà á só, á zɛ̃̀ á bə jàlà só yé. Á yě bʼâmyɛ zhe Yó-cə́bal mə̀dù ń ŋwɛ́nɛ́ Arəzana wa.

Pwəə nə́ ń cící Kɔlɔɔsɛ Kristə-lyì bí

²Cenə jàn nɛ́ ǹdə́ Yi-co twéé gakó; zəna á yírhə́, sʼá ce Yi nə̀bán twéé twéé. ³Lwə̂lnə Yi nə́myɛ yilə, bə̀ rə̀ pə nə́ba sɔ́má nə́ bwə̀l rə̀ zɔ̀mɛ̀ rɛ́, sə nə́ bwə̀l kɔn dɛ̀bɛ́ rə̀ shèè Kristə shò-kwã nɛ́ mɔ́ nə́ byili, bə̀ wɔ́ zɔ̀mɛ̀ rɛ́ rə̀myɛ́ bwə̂l mó yil bə̀ co ne byə̀nə́-jù wə̀. ⁴Lwə̂lnə Yi mùnì ga a ŋwɛ̀nɛ́ a byili rə̀ zɔ̀mɛ̀ rɛ́ pamparɛ̃ɛ̃ ǹdə à gə́ mə̂ sʼa byili ri ní.

⁵Zəna á cìn ǹdə́ surhə nyɛ̀bɛ́ nə̀ càn ǹdə́ lyì bí byɛ̀bɛ́ bə̀ də̀ Kristə-lyì mú, sʼá wɛ̀rhɛ́ á gə́ wɔ̌ nɛ́ á zə á cìn náàcɛ̀nɛ́ twéé gakó. ⁶Cenə á zɔ̀mà nɛ́ yə̀ zɔ̀mà nyɛ̀bɛ́ nə̀ càn twéé twéé, nə̀ zhe shil, sʼá lwar náàcɛ̀nɛ́ á gə́ bʼâ lyár lò mɔ̀bɔ́ gakó ń la ába zɔ̀mɛ̀ bwə̂rh mó né.

Pwəə nə́ ń ce Kɔlɔɔsɛ lyì bí ń mə́ ń gwi ń sɛ́bɛ́ rɛ́ yó

⁷Nə́ da-byǐ nántwə̂ Tishiki mà n byili ába kɔn gə́ wɔ́ nɛ́ à sõ. Ń nə́ ń tó ne ń twĩ̀ Cinu tum dí ǹdə kɔn gə́ mə̂ nɛ́. ⁸Wɔ́ rə̀myɛ́ è ce à nʼâ twĩ̀ mù á sõ, mùnì ga n byili ába kɔn gə́ wɔ́ nɛ́ nə́ sõ, sə n pə ába cícú n súlí. ⁹À nʼâ twĩ̀ ńmyɛ̌ ǹdə́ Oneshim. Ńmyɛ wɔ́ nə́ da-byǐ nántwə̂. Wɔ́ ámyɛ̌ lò ǹdə́ mɔ. Bə̀myɛ́ bə̀lyè y ga mʼa byili ába kɔn gə́ wɔ́ nɛ́ nyɔ̀nɔ̀ mɔ́ gakó.

¹⁰Arəsətarkɛ nə́ ń ce ába. Ń tó ne ń ŋwɛ́nɛ́ byə̀nə́-jù wə̀. Barnabaasɛ nəkɔ́-byǐ Markɛ myɛ nə́ ń ce ába. Nə́ yʼâ zɔ̀m ń yò ǹdʼába. Ń gə tú á sõ, sʼá zwẽ ń zhəəlé cɛ̀nɛ̀. ¹¹Yezu mú mɔ̀bɔ́ bə̀ nʼê byẽ̀ bə̀ Zhusətuusi mú myɛ nə́ ń ce ába. Zhwifubá byɛ̀bɛ́ bə̀ jǐrh Kristə-lyì mú wẽ́, wɔ́ bə̀myɛ́ bə̀tɔ̀ y bə̀ nʼê tó ne bə̀ twĩ̀ Yi pyɛ̀lɛ̀ rɛ́ yilə, sə bə̀ pɔ nɛ wu-jɔ̀.

¹²Epafəraasɛ nə́ ń ce ába. Ńmyɛ wɔ́ ámyɛ̌ lò. Ń wɔ́ Yezu Kristə tùntùnnə̀. Ń nə́ ń lwə̀l Yi á yil dɛ̃´dɛ̃´ twéé gakó, mùnì ga á yə̀ rə̀ lyì nántwə̂rh, sʼá zhì kẽkẽ á wɛ̀rhɛ́ Yi pùbùlə̀ kɔn gakó wẽ́. ¹³Ń nə́ ń twĩ̀ dɛ̃´dɛ̃´ ámyɛ̌ ǹdə́ Laɔdɛɛsɛ Kristə-lyì bí ǹdə́ Yərəpoli nyə̀ná bɛ́ ga yilə. Àmyɛ́ cìcì mú wɔ̌ à wə̀l rə̀myɛ́. ¹⁴Nə́ dɔwa Lwiki ń wɔ́ lyìtwə́r mó ǹdə́ Dɛmaasɛ myɛ nʼê ce ába.

¹⁵Wálna Laɔdɛɛsɛ Kristə-lyì bí ǹdə́ Nəmfa ǹdə́ gùlú w lyì bí bə̀ nʼê jòm dwã yó ń sõ kɛ̀lɛ́ w mɔ́ nɛ bə̀ nyǐ nə́ rʼé ce be. ¹⁶Á gə kàrmə̀ sɛ́bɛ́ rɛ́ tɛ̀bɛ́ á zhɛ̀, sʼá pə rɛ Laɔdɛɛsɛ gùlú w lyì bí myɛ nɛ bə kàrmə̀. Sə à sɛ́bɛ́ rɛ́ tɛ̀bɛ́ bə̀ la pə rə shí Laɔdɛɛsɛ rə bə̀ á sõ mó, sə ámyɛ kàrmə̀ rɛ̀. ¹⁷Wálna Arəcipi ni bə̀ ń zə tum dí tɛ̀bɛ́ Cinu pɔ mɔ mɔ́ cɛ̀nɛ̀, sə n twĩ̌ di náàcɛ̀nɛ́ n báásɛ.

¹⁸Wɔ́ àmyɛ́ Pwəə à nʼâ zɔ̀m zɔ̀mà nɛ́ nyɛ̀bɛ́ à mʼâ ce ába. Wɔ́ àmyɛ́ cìcì jɛ̃̀ è kɛ̃ nɛ. Lyǐrhnə bə̀ nyǐ wɔ́ byə̀nə́-jù w à ŋwɛ́nɛ́.

Yi bʼa cĩ́ bwəl á yó!