2 Timote

Pwəə sábá nə̀lyè nyân dɛ́ ń kɛ̃ n pə

Timote

ne mó

Wɔ́ bə̀ gə́ kʼa bwérhé bə ce Pwəə byə̀nə́-jù w twər rə̀lyè nyân dɛ́ ǹdə́ ń nə́ ń bwə̀l yò-ècɔ̀nɔ̀ nyí rí Orɔm nɛ́ mɔ́ yó, ń kɛ̃ sɛ́bɛ́ rɛ́ tɛ̀bɛ́ nɛ́. Ń yà ń nə́ ń nwɛ̀nɛ̀ gàà ń dúdú. Ń yà ń nə́ ń bùl bə̀ ń gə́ la lũ w kɔ̀bɔ́ wẽ́ zhǐr mó bwəlse. Wɔ́ rə̀myɛ́ è ce ń yà ń nə́ ń yâl bə̀ Timote zhǐ ń nà y yó kẽkẽ kàrmɔ́ mɔ̀bɔ́ bə̀ cèrhè mò mó wẽ́ (1.1-18; 4.6-22).

Ń cící mu bə̀ ń shɛ̀nɛ́ n tó n zwẽ nɔ̀nɔ̀ nyí ǹdə Yezu Kristə shə̀dáá nántwə̂ ta, bə̀ ń ce jàn nɛ́ n yə̀ lò mɔ̀bɔ́ ń tumə né sú Yi yírh (2.1-26).

Rə̀myɛ́ kwã nɛ́, ń byili mu lyì bí tùntwə̃̀ə̃̀ né nə̀ bə càn mɔ́ ǹdə́ byɛ̀bɛ́ bə̀ bə shɛ̀ zhə̀n dɛ́ yò mó gə́ la nɛ́ yál dwã nɛ́ nánkwaá nɛ́ wẽ́. Ń byili mu bə̀ ń bə̀ká n shɛ̀nɛ́ n tó lyì bí bə̀myɛ́ mɔ́ kùr yé. N zɛ̃̀ n cící mu bə̀ ń zə Yi zɔ̀mɛ̀ rɛ́ ǹdə́ kàrmɔ́ bə̀ byili mu mú kẽkẽ. N lwə̀l mò bə̀ ń bwə̂l Yi zɔ̀mɛ̀ rɛ́ náàcɛ̀nɛ́ (3.1–4.5).

Pwəə nə́ ń ce Timote

^1-2À byì-sónó Timote, wɔ́ àmyɛ́ Pwəə à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ. À wɔ́ Yezu Kristə tùntúm ǹdə́ Yi pùbùlə̀. Yi twĩ̀ nì bʼà bwə̂l nyǔ mú rə̀ bwəl mə̀ nyí mú a byili. Nyǔ mú mə̀myɛ́ mɔ́ wɔ́ Yezu Kristə dɛnnɛ nə́ rʼé tó né nə́ nɛ mɔ. Nə́ Da Yi ǹdə́ nə́ Cinu Yezu Kristə bʼa cĩ́ bwəl ǹ yó, sə bə dùr ǹ nɔ̀nɔ̀, bə pɔ̃́ yə̀-zùlə́!

Pwəə nə́ ń ce Yi nə̀bán Timote yilə

³À nʼâ lyǐrh ǹ yò à Yi-co wẽ́ cəcɛ̃ ǹdə́ nə̀nyɔ́nɔ́ ga. À nʼâ ce Yi nə̀báná. Wɔ́ rə̀myɛ́ tum à nʼâ twĩ̀ ǹdə́ wu kɔ̀bɔ́ ò wɔ́ wárhgáá, ǹdə à nàmbala bɛ́ ta. ⁴À gə lyǐrh ǹ yə́-nàná nɛ́ yò, à só sʼa kʼa nə mɔ́, mùnì ga a wu yə̀ nyɛ̀n námpúm. ⁵À yě ǹ Yi-ni-zhú mú yò w à wẽ́ zhə̀n zhə̀nà. Ǹ Yi-ni-zhú mú mə̀myɛ́ wɔ́ ǹ ná náncɛ Loyiisi ǹdə́ ǹ ná Eniisi nyân mɔ́ dwí rí. À yě bə̀ rə̀myɛ́ wɔ́ zhə̀nà.

⁶Wɔ́ rə̀myɛ́ è ce, à nʼâ lyǐrh mó bə̀ ǹ zə pɛnɛ́ y Yi pɔ mɔ́ à gə́ cĩ́ à jɛ̀sɛ́ ǹ yó yi ní mú kẽkẽ. ⁷Zhə̀nà, Eshirhə y Yi pɔ nə́ba mɔ́ tʼâ ce lò dùr ywẽ yé. È nʼê pɛ jàn, ǹdə́ sónó, ǹdə́ cìn-pyɔ́nɔ́. ⁸Rə̀myɛ́ ce, ǹ bə̀ká dùr cìzhìl ǹdə́ zhə̀n cṹ Cinu mú shò-kwã nɛ́ yé. Ǹ bə̀ká dùr cìzhìl ǹdə́ àmyɛ́ mɔ̀bɔ́ à ŋwɛ́nɛ́ byə̀nə́-jù w nə́ Cinu mú yil mó myɛ yé. Ǹmyɛ́ wírí ń shɛ̀nɛ́ ń tó àmyɛ́ nɛ ń nwɛ̀nɛ̀ yò-ècɔ̀nɔ̀ nyí rí yil ǹdə́ Yi jàn. ⁹Wɔ́ Yi rə̀ vwârh nə́ba, rə byẽ̀ nə́ba bə̀ nə́ yál rə̀ lyì, sə è də̀ nə́ tùntwə̃̀ə̃̀ yil yé. Wɔ́ rə̀myɛ́ cìcì pùbùlə̀ ǹdə́ rə̀ yò-ècɔ̀nɔ̀ w yilə. Rə̀ wɛ̀rhɛ́ yò-ècɔ̀nɔ̀ w òmyɛ́ Yezu Kristə jàn yilə, ǹdə́ lũ w gwẽ̌ yə̀ kùr ji yé. ¹⁰Sə èlâsɛ̃´, yò-ècɔ̀nɔ̀ w òmyɛ́ tó nə́ Zwennə Yezu Kristə twírí y dɛnnɛ o du pamparɛ̃ɛ̃. Wɔ́ ńmyɛ̌ ń zhìlì cu mú jàn dɛ́, n tó yò-ècɔ̀nɔ̀ nyí rí dɛnnɛ n byili nə́ba nyǔ mú mə̀ tʼâ la zhɔ̌ mɔ́.

¹¹Yi cír ne bʼà yál rə̀ tùntúm, a bwə̀l rə̀ yò-ècɔ̀nɔ̀ nyí rí, sʼa cèrhè rè lyì bí ni. ¹²Wɔ́ rə̀myɛ́ è ce à nʼâ nwɛ̀nɛ̀ èlâsɛ̃´, sə à tʼâ dùr cìzhìl yé. Rə̀myɛ́ gakó wẽ́, à yě mɔ̀bɔ́ à zhe ń zhə̀n dɛ́ mɔ́ párá, sə à yě pamparɛ̃ɛ̃ bə̀ ń zhe jàn ń bà n yìlì kɔn dɛ̀bɛ́ ń pɔ nɛ mɔ́, kɔn mʼe yí dɛ̃ rɛ́ nánkwɛɛ́ rɛ́. ¹³Zɔ̀mà nɛ́ nyɛ̀bɛ́ à byili mú mú wɔ́ zhə̀nà. Cĩ́ ni ǹ wẽ́, sə́ wɛ̀rhɛ́ ǹdə nə̀ gə́ nʼê byili ní ǹdə́ Yi-ni-zhú, ǹdə́ sónó w kɔ̀bɔ́ Yezu Kristə pɔ nə́ba mɔ́. ¹⁴Zə nyə́ né nyɛ̀bɛ́ à pɔ mɔ́ mɔ́, ǹdə́ Eshirhə náàcɛ̀nɛ́ y è ŋwɛ́nɛ́ nə́ wẽ́ mó jàn, bə̀ nə̀ zhe kùr dɛ̃´dɛ̃´.

¹⁵Ǹ cìcì mú yě bə̀ Azhi tənà y lyì bí gakó dùr bə yẽ̌ ne, sə Shəzhəə ǹdə́ Erəmɔzhɛ̃ɛ̃ myɛ dùr bə yẽ̌ ne. ¹⁶Sə à nʼâ lwə̀l Cinu bə̀ ń dǔr Onəzhəfɔɔrɛ ǹdə́ ń kɛ̀lɛ́ y lyì bí nɔ̀nɔ̀, bə̀ ń zɔ à wu ni twər nánzhəzhɔ̌; ń yə̀ cìzhìl dùr bʼà ŋwɛ́nɛ́ byə̀nə́-jù w yil yé. ¹⁷Ń gə́ tú n yí Orɔm yi ní, ń tó jààsɛ́ gakó wẽ́ n pyà nɛ̀, n bə̀ n mə n nə nɛ. ¹⁸À nʼâ lwə̀l Yi bə̀ rə̀ dǔr ń nɔ̀nɔ̀ bùrsí dɛ̃ rɛ́ yù w Cinu Yezu Kristə jàn yilə. Ǹ yě kɔn dɛ̀bɛ́ dwí gakó ń wɛ̀rhɛ́ à yil Efɛɛzɛ nɛ́ mɔ́ náàcɛ̀nɛ́.

Shɛ̀nɛ́ nɔ̀nɔ̀ ǹdə Yezu Kristə shə̀dáá nántwə̂ ta

¹À byǐ Timote, pyâ sə́ zə jàn ń zhì kẽkẽ Yezu Kristə sónó w wẽ́ twéé gakó. ²Kàrmɔ́ mɔ̀bɔ́ à cèrhè mó zhə̀n-cìnə́ nánzhəzhɔ̌ yírh w mó, cèrhè mò lyì byɛ̀bɛ́ ǹ zhe bə̀ zhə̀nà, bə̀myɛ jʼà wɔ̌ mɔ bə̀ la lyì dwã nɛ còrhò mó ne.

³Shɛ̀nɛ́ ń tó ń zwẽ nɔ̀nɔ̀ w nyí, ǹdə Yezu Kristə shə̀dáá nántwə̂ ta. ⁴Shə̀dáá kɛ̀bɛ́ è nʼê twĩ̀ shə̀dáárɛ tum, e zɛ̃̀ è nʼê yâl e tó è yó-cə́bal mɔ́ pùbùlə̀ nè mó, wàr è mʼa cili lyì dwã tumə sõ yé. ⁵Lò gə nə́ ń zal zãã, ń wàr ń mà n yə̀ zam-bya ǹdə́ ń gə yə̀ zãã y nyə́ né zwẽ yé. ⁶Vwàlnà mɔ̀bɔ́ ń nə́ ń twĩ̀ dɛ̃´dɛ̃´, wɔ́ ńmyɛ̌ ń nə́ ń jɛ̀rɛ̀ ń nɛ nyɔ̀ɔ̀rhɛ́. ⁷À byǐ Timote, tɛ́rɛ́ kɔn dɛ̀bɛ́ à byili mú, bə̀ Cinu mà n ce ń ŋwɛ̀nɛ́ ń nyɛ̀ɛ̀ kɔn gakó kùr náàcɛ̀nɛ́.

Lyǐrh Yezu Kristə yò

⁸Lyǐrh Yezu Kristə yò. Wɔ́ Dəvyidi dwí rí wẽ́ ń shí ní, ń bwìrhì n zɛ̃̀ n du cùùrì wẽ́ ǹdə yò-ècɔ̀nɔ̀ nyí rí à nʼâ bwə̀l mó gə́ nʼê byili ní. ⁹Wɔ́ yò-ècɔ̀nɔ̀ nyí rí rə̀myɛ́ yil à nʼâ nwɛ̀nɛ̀, bə̀ lyẽ à gaga mɔ́ ǹdə́ nyáná ǹdə èmà-byǐ ta, sə bə̀ yə̀ Yi zɔ̀mɛ̀ rɛ́ lyẽ yé. ¹⁰Wɔ́ rə̀myɛ́ yil à nʼâ shɛ̀nɛ́ kɔn gakó byɛ̀bɛ́ Yi cír mó yilə, mùnì ga bə̀myɛ nə vwârh ǹdə́ zùwə́ kɛ̀bɛ́ è bə zhɔ̌ zhe Yezu Kristə jàn yilə. ¹¹Nyǐ zɔ̀mɛ̀ rɛ́ tɛ̀bɛ́ wɔ́ zhə̀nà:

Nə́ gə tó Kristə ne nə́ cùwə̀,

nə́ bʼâ tó mo nə́ nə nyǔ myɛ.

¹²Nə́ gə shɛ̀nɛ́ nə́ zhì kẽkẽ,

nə́ bʼâ tó mo nə́ jí pyɛ̀lɛ̀.

Nə́ gə zhɔ̃̀ mɔ̀,

ńmyɛ bà n zhɛ̃̀ nə́ba.

¹³Nə́myɛ̌ gə bə nə́ nà y yó zhǐ myɛ,

ńmyɛ̌ zhǐ ń nà y yó,

bə̀ ń zɔ̀mà nɛ́ tʼâ lyə́r yé.

Ce jàn nɛ́ ń yə̀ lò mɔ̀bɔ́ ń sú Yi yírh

¹⁴Tɛ̀bɛ́ à byili mú mú, nə́ ǹ lyǐrh re lyì bí gakó ne, sə́ lwə̀l bè Yi yé né ǹdə́ yə́-byĩ́, bə yẽ̌ zɔ̀mà nyɛ̀bɛ́ nə̀ nʼê twí ǹdə́ búlə́ ne. Bə̀ búlə́ né bə kùr zhe yé. Wɔ́ byɛ̀bɛ́ bə̀ nʼê cili ni mú yò zhìlù yil nə̀ ŋwɛ́nɛ́. ¹⁵Ce jàn nɛ́ ń yə̀ lò mɔ̀bɔ́ ǹ tumə né sú Yi yírh; yál tùntùnnə̀ mɔ̀bɔ́ ń tá ń dùr cìzhìl ǹdə́ ń tum dí yé, ń nə́ ń bwə̀l zhə̀n zɔ̀mɛ̀ rɛ́, n byili ri cángá. ¹⁶Dɛ̃̌, bə̀ká ce ǹ cìn nyə̀-pâr zɔ̀mà nɛ́ nyɛ̀bɛ́ nə̀ bə kùr zhe, nə̀ tʼâ tó Yi-ni-zhú nyə̀ná nɛ́ nɛ mɔ́ wẽ́ yé, bə̀ byɛ̀bɛ́ bə̀ nʼê wɛ̀rhɛ́ rə̀myɛ́ mɔ́ jʼâ nʼê pɔr Yi kwã nɛ́ bə̀ la gaga. ¹⁷Bə̀ zɔ̀mà nɛ́ bə̀ nʼê byili mú nyɛ̌ ǹdə nyəlɛ nyí ta. Námpɔ́lɛ́ námpɔ́lɛ́ rə̀ nʼê jǐrh nə̀-wə́rə́. Yimene ǹdə́ Shiletoose ŋwɛ́nɛ́ lyì bí bə̀myɛ́ wẽ́. ¹⁸Bə̀ pɔr bə vò kwã nɛ́ kwã nɛ́ bə yẽ̌ zhə̀n dɛ́ byilu ni, bə̀ nʼê byili bə̀ Yi bwìrhì cùùrí, bə̀ lò lò bə̀ká kə́ dɛ̃̀ cùùrì bùrhù yé. Èta, bə̀ nʼê dwĩ̀ lyì nánzhəzhɔ̌ bə̀ Yi-ni-zhú mú wẽ́. ¹⁹Sə ǹdə́ rə̀myɛ́ ga, jì-byòló Yi cĩ́ ò nà y tɛ̃´ mɔ́ zhǐ kẽkẽ. Bə̀ kɛ̃ ò yó bə wɔ̀: “Cinu yě ń lyì bí párá.” Bə̀ súlí bə kɛ̃: “Lò mɔ̀bɔ́ ń nə́ ń byili bə̀ ń zhí Cinu ni, ń mə̂ sə n yẽ̌ lwɛlɛ nɛ.”

²⁰Jì kɛ̀bɛ́ è kwɛrhɛ náàcɛ̀nɛ́, è də̀ sánə́má ǹdə́ sə̀byì-kùlì nə̀zhẽ̌ dúdú nə̀ ŋwɛ́nɛ́ è wẽ́ yé. Dɔ ǹdə́ dâr nə̀zhẽ̌ myɛ ŋwɛ́nɛ́ nɛ́. Sə è gə wɔ́ sánə́má ǹdə́ sə̀byì-kùlì nə̀zhẽ̌ yilə, wɔ́ címsi dɛ̃ bə̀ nʼê vùr nè bə̀ mʼê jí kùjú, sə nyɛ̀bɛ́ nə̀ dàl mɔ́ wɔ́ dɛ̃ gakó kùjú bə̀ mʼê jí. ²¹Lò mɔ̀bɔ́ gakó ń yẽ̌ kɔma zɔ̀mà nɛ́ nə̀myɛ́ cilu ni, ń nyɛ̌ ǹdə sánə́má ǹdə́ sə̀byì-kùlì nə̀zhĩ̌ bə̀ nʼê vùr címsi dɛ̃ bə̀ mʼê jí kùjú ta. Lò mó ńmyɛ̌ mɔ́ mà n yə̀ Yi lò. Ń mà n yə̀ lyì-twə̂ ń yó-cə́bal mɔ́ yilə, n twĩ̀ tumə nyɛ̀bɛ́ nə̀ càn.

²²Yẽ̌ bə̀swɛ́nɛ́ shilə námməlwâlsɛ́ nɛ, sə́ tó lyì bí byɛ̀bɛ́ bə̀ nʼê lwə̀l Cinu ǹdə́ wu-põ mó ne, ń pyà wu-cángá ǹdə́ Yi-ni-zhú ǹdə́ sónó ǹdə́ yə̀-zùlə́, ²³sə́ yẽ̌ nyə̀-pâr zɔ̀mà nyɛ̀bɛ́ nə̀ bə kùr zhe ne, bə̀ ǹ yě bə̀ nə̀ nʼê twí ǹdə́ búlə́. ²⁴E jà Cinu tùntùnnə̀ bə mə̂ sə n yə̀ búlə́ cí yé. Ń mə̂ sə n swéné lyì bí gakó, n ŋwɛ̀nɛ́ n cèrhè kàrmɔ̀, sə n pyɛ́nɛ́ yò-cə̀ə̀lè yi ní. ²⁵Ń mə̂ sə n cící lyì bí byɛ̀bɛ́ bə̀ bə shɛ̀ nyí zõ mó ǹdə́ wu-bɔ̀nɔ̀. Dɛ̀ga dɛ̃ ŋwɛ́nɛ́ Yi bʼa ce bə̀ wun pyìrhí, bə lwar zhə̀n dɛ́ gə́ wɔ́ nɛ́, ²⁶mùnì bə̀ surhə né pul, bə ŋwɛ̀nɛ́ bə vwârh bə̀ cìn Shətana y è lyẽ be e ce bə̀ nʼê twĩ̀ è pùbùlə̀ mó jɔ̃̀ wà.

Kɔn gə́ la nɛ́ yál dwã nɛ́ nánkwaá nɛ́ wẽ́

¹Lwar bə̀ zwini bʼa yə̀ nɛ́ dwã nɛ́ nánkwaá nɛ́ wẽ́. ²Lyì bí bʼa jǐrh sə̀cííri cìnə́, bə swéné sə̀byǐ, bə jǐrh cìn-byilu ǹdə́ cìn-dɛ̃̌-zhõ̌ cìnə́, bə zɛ̃̀ bə̀ nʼê tùrh Yi; bə̀ mʼa cẽ bə̀ dabá ǹdə́ bə̀ nábá nyí ni; bə̀ mʼa yə̀ yə̀l-cɛ̀nɛ̀ cìnə́; bə̀ tʼâ la kɔn dɛ̀bɛ́ rə̀ wɔ́ Yi nyân nyám yé; ³bə̀ mʼa yə̀ yó-kùùlì cìnə́; bə̀ tʼâ la nɔ̀nɔ̀-dǔr zal yé; bə̀ mʼa yə̀ cə-lwərse; bə̀ tʼâ la ŋwɔ̀nɔ́ bə zə bə̀ cìn yé; bə̀ mʼa yə̀ wu-myǐn cìnə́; bə̀ tʼâ la cɛ̀nɛ̀ sónó yé; ⁴bə̀ mʼa yə̀ myìnù cìnə́, yə̀l cìn-dãɔ̃ cìnə́; cìn-byilu mʼa pyi bə̀ surhə né; bə swéné lũ w wu-nyɔ̃̀ w du Yi. ⁵Bə̀ mʼa wɛ̀rhɛ́ ǹdə bə̀ zhí Yi ni ta, e jà bə̀ tʼâ zwẽ nyí bə̀ Yi zhe jàn yé. Bə̀ká tó lyì bí bə̀myɛ́ mɔ́ kùr yé.

⁶Lyì jàlà ŋwɛ́nɛ́ bə̀ wẽ́ bə̀ nʼê shèè bə̀ zhə̀l kâlsɛ wẽ́ bə̀ swèlè kana byɛ̀bɛ́ bə̀ yə̀l nə̀ kùrə̀, yə̀-bəlwàálɛ nʼê nwɛ̀nɛ̀ bɛ̀ mɔ́. Bə̀ gə́ yə̀ Yi ni zhí ǹdə́ bə̀ wun gakó mó ce, bə̀ nʼê shɛ̀nɛ́ shilə dwí gakó. ⁷Twéé gakó, kana bɛ́ bə̀myɛ́ nʼê pyà sə bə lwar zhə̀n dɛ́ gə́ wɔ́ nɛ́, sə bə̀ wàr bə̀ nʼê lwar rə̀ gə́ wɔ́ nɛ́ gaga yé. ⁸Wɔ́ èta Zhanɛɛsɛ ǹdə́ Zhambərɛɛsɛ wɛ̀rhɛ́ nɛ́ shãã ga. Bə̀ yʼà tʼâ zwẽ Muyiisi nyí rí yé. Lyì bí byɛ̀bɛ́ èta mɔ́ myɛ wɔ́ èta bə̀ nʼê wɛ̀rhɛ́ nɛ́. Bə̀ bə shɛ̀ zhə̀n dɛ́ yò yé. Bə̀ surhə né nyɛ̌ námbəjə́ə́le; bə̀ Yi-ni-zhú mú bə kùr zhe yé. ⁹Bə̀ tʼâ la yé né yú ǹdə Zhanɛɛsɛ ǹdə́ Zhambərɛɛsɛ gə́ yə̀ yé né yí ní. Lyì bí gakó bʼa lwar bə̀ kùrə̀.

Zə kɔn dɛ́ dɛ̀bɛ́ bə̀ byili mú mú kẽkẽ

¹⁰Sə ǹmyɛ́ yě à gə́ nʼâ wɛ̀rhɛ́ nɛ́ gakó; ǹ cili à kàrmɔ́; ǹ nɔ à tùntwĩ̀ĩ̀ rí gə́ yàl nɛ́; ǹ yě à pùbùlə̀ né ǹdə́ à gə́ zhí Yi ni ní; ǹ yě bʼà nʼâ zhìlì a yala nɛ; ǹ yě bʼà só lyì bí, a jʼà nʼâ pyɛ́nɛ́ à cìnə̀. ¹¹Ǹ yě bə̀ gə́ nwɛ̀nɛ̀ nɛ̀ nɛ́; ń jà ǹ yě zwini tɛ̀bɛ́ gakó à nɔ Ancɔɔsɛ nɛ́, ǹdə́ Yəkɔnəyɔm nɛ́, ǹdə́ Lyisitiri ní mú. Zhə̀nà, à nwɛ̀nɛ̀ dɛ̃´dɛ̃´, sə Cinu zwẽ ne rə̀myɛ́ gakó wẽ́. ¹²È gə wɔ́ zhə̀n yilə, lyì byɛ̀bɛ́ gakó bə̀ nʼê yâl bə tó Yezu Kristə ne ǹdə́ bə̀ wun gakó, bə̀ mʼa nə nɔ̀nɔ̀, ¹³sə lyì-bəlwâlsɛ́ ǹdə́ myìnù cìnə́ bé lwɛlɛ rɛ́ wɔ̀rhɔ́ mɔ́ bʼa jʼâ nʼê súlí. Bə̀ bʼa myìnì bə̀ dwã bɛ́, sə lyì bʼa myìnì bə̀myɛ.

¹⁴Zə kɔn dɛ́ dɛ̀bɛ́ bə̀ cèrhè mó ń jʼâ zwẽ rə̀ nyí mú kẽkẽ. Ǹ yě byɛ̀bɛ́ bə̀ cèrhè mó re mó gə́ wɔ́ nɛ́. ¹⁵Wɔ́ ǹ bə̀swɛ́nɛ́ ga ǹ ju kùr ń lwar Yi zɔ̀mɛ̀ rɛ́ sɛ́bɛ́ rɛ́. Wɔ́ rə̀myɛ́ rə̀ wɔ̌ rə̀ mʼa pɔ̃́ surhə nyɛ̀bɛ́ nə̀ bʼa ce ń nə vwârh ǹ gə́ zhí Yezu Kristə ne mó yilə. ¹⁶Yi zɔ̀mɛ̀ rɛ́ sɛ́bɛ́ rɛ́ gakó wɔ́ Yi rə̀ pul byɛ̀bɛ́ bə̀ kɛ̃ dɛ mɔ́ surhə bə mʼe kɛ̃ dɛ, mùnì rə zə kùrə̀, rə sɛ̃ mɔ́ ń cèrhè zhə̀n dɛ́ lyì bí ni; dóó gə tú ò ŋwɛ́nɛ́, sə́ byili ò cí mú ni, sə́ zwə́r mo, sə́ cèrhè lyì bí bə yə̀ wu-cángá cìnə́, ¹⁷mùnì Yi lò mó yə̀ lò mɔ̀bɔ́ ń byìl cɛ̀nɛ̀, ń wɔ̌ yò-ècɔ̀nɔ̀ dwí gakó ń mà n wɛ̀rhɛ́.

Bwə̂l Yi zɔ̀mɛ̀ rɛ́

¹À nʼâ lwə̀l mó ǹdə́ à wu gakó Yi ǹdə́ Yezu Kristə mó ń la lyì-nyìrh ǹdə́ cùùrì bùrsì bǔr mú yé né, à nʼâ lwə̀l mó ń twírí y ǹdə́ ń pyɛ̀lɛ̀ rɛ́ yilə: ²bə̀ ǹ bwə̂l Yi zɔ̀mɛ̀ rɛ́, sə́ ce jàn nɛ́ twéé gakó, jààsɛ́ gakó, rə̀ nàná ǹdə́ rə̀ zwini ga yi ní; byili lyì bí bə̀ dwə́ə́ré, sə́ bú bi. Sə́ ce jàn nɛ́ ń zhìlì ǹ yala nɛ ń cící bi, ń byili bi náàcɛ̀nɛ́, ³bə̀ dɛ̃ ŋwɛ́nɛ́ rə̀ bànà, lyì bí cìcì shilə né bʼa ce bə̀ kʼê tʼâ la shɔ̀nɔ́ bə cili kàrmɔ́ mɔ̀bɔ́ mə̀ wɔ́ zhə̀n mɔ́ yé. Bə̀ mʼa pyà kàrmɔ̀ byilnə nánzhəzhɔ̌ bə ce bə byili bi tɛ̀bɛ́ bə̀myɛ́ nʼê yâl bə cili mú. ⁴Bə̀ kʼê tʼâ la zhə̀n dɛ́ cilu yé. Wɔ́ kɔma bɛ́ bə̀ la cilu. ⁵Sə ǹmyɛ́ mə̂ sə́ dɛ̃̀ ǹ cìn kɔn gakó wẽ́. Shɛ̀nɛ́ nɔ̀nɔ̀, sə́ twĩ̀ yò-ècɔ̀nɔ̀ nyí rí bwə̂l yilə. Twĩ̌ tum dí Yi pɔ mɔ́ mɔ́ cɛ̀nɛ̀.

Pwəə twĩ̀ ń tum dí n zhɛ̀

⁶È gə wɔ́ àmyɛ́ yilə, à nʼâ pɛ à cìn Yi ni ǹdə vwĩ̀-kɔn ta, bʼà zhǐr mó yi yúwə́. ⁷À zɔ zãã nántwə̂; à dùr ywə́l mó a zhɛ̀; à Yi-ni-zhú mú yàl kẽkẽ. ⁸Èlâsɛ̃´, wɔ́ kwândɛ́ rə̀ mə̂ ǹdə́ nɛ mɔ́ à nʼâ dɛ̃̀. Wɔ́ bùrsì cángá cə́bal Cinu ń la rɛ nɛ pɔ bùrsí yùwə̀. Sə è də̀ àmyɛ́ dúdú ni ń la kwândɛ́ rə̀myɛ́ pɔ yé. Ń mà n pə rɛ lyì bí byɛ̀bɛ́ gakó bə̀ nʼê dɛ̃̀ ń twírí y ǹdə́ sónó mó myɛ nɛ.

Kɔn dɛ̀bɛ́ rə̀ yàl nɛ́ Pwəə ǹdə́ ń tó-dwã bɛ́ cəcəl wə

⁹Ce jàn nɛ́ ń bə̀ à sõ làlà. ¹⁰Dɛmaasɛ dùr n yẽ̌ ne n vò Tesəloniki, bə̀ lũ w kɔ̀bɔ́ wẽ̀ dé yò zù mù. Kərəsɛ̃ lyɛ̃ n vò Galəshi. Titi vò Dələməshi. ¹¹Lwiki dúdú ń mɛ̃ à sõ. Zə Markɛ ń mə́ súlí ń bà, bə̀ ń wɔ̌ ń mà n sɛ̃ nɛ à tum dí wẽ́. ¹²À twĩ̀ Tishiki Efɛɛzɛ nɛ́.

¹³Ǹ gə bàn sə́ kwè à kàmə̀-zù-fwɛ̀lɛ̀ y à yẽ̌ Tərəwaasɛ nɛ́ Kərəpuusi sõ mó, ǹdə́ sábá nɛ́, sə kɔn du, bə̀ká swě tàndɛ́ bə̀ kɛ̃ rə̀ yó mó yò yé. ¹⁴Yâl-bal Alɛsãdərɛ wɛ̀rhɛ́ nɛ kɔn dɛ̀bɛ́ rə̀ bə càn dɛ̃´dɛ̃´. Sə Cinu mà n càrh mɔ̀ ń lwɛlɛ rɛ́. ¹⁵Ǹmyɛ́ cìcì mú yìlì ǹ cìn ǹdə́ mɔ, bə̀ ń bə kàrmɔ́ nə́ rʼé byili mú só lyɛ́lyɛ́.

¹⁶Bə̀ gə́ zɔ nɛ bə vò bùrsí jàà w twər nã́yéé ré yi ní, lò mə̀dù ga yə̀ nɛ sɛ̃ yé. Bə̀ gakó dùr bə yẽ̌ ne, sə à nʼâ lwə̀l Yi bə̀ rə̀ bə̀kʼa cĩ́ dóó bə̀ yó rə̀myɛ́ yil yé. ¹⁷Cinu yàl nɛ́ ǹdə́ nɛ, n pɛ̃ jàn, a ŋwɛ̀nɛ́ a bwə̀l yò-ècɔ̀nɔ̀ nyí rí námpúm, rə yí byɛ̀bɛ́ bə̀ də̀ Zhwifubá mó gakó. Cinu sɛ̃ nɛ a lú bɔrɔ w yé né. ¹⁸Sə ń gwẽ̌ mà n ce a lú lwɛlɛ dwí gakó yé né, n ce a zù Arəzana w ń tənà y wẽ́. Ń mà n nə zùwə́ byinə nə̀ bə zhɔ̌ zhe yilə! Amɛ̀n!

Pwəə nə́ ń ce Kristə-lyì bí ń mə́ ń gwi ń sɛ́bɛ́ rɛ́ yó

¹⁹À nʼâ ce Pərishii ǹdə́ Akəlaasɛ, ǹdə́ Onəzhəfɔɔrɛ kɛ̀lɛ́ y lyì bí. ²⁰Eraasɛ mɛ̃ Kɔrɛ̃tɛ nɛ́. Torofyimi yà ń bə jàn zhe yé. Rə̀myɛ́ ce a yẽ̌ mo Myəlɛ nɛ́. ²¹Sə́ ce jàn nɛ́ ń bə̀ ǹdə́ wàr rɛ́ yi gwẽ̌ yə̀ yí yé. Ebuluusi ǹdə́ Pədããsɛ ǹdə́ Lyinyuusi ǹdə́ Kolojə ǹdə́ nə́ da-byâ Kristə-lyì bí gakó nʼê ce mó. ²²Cinu mà n yə̀ ǹdə́ mɔ́, sə n cĩ́ bwəl á gakó yó!