2 Tesəloniki

Pwəə sábá nə̀lyè nyân dɛ́ ń kɛ̃ n pə

Tesəloniki

Kristə-lyì bí ni mú

Sɛ́bɛ́ rɛ́ tɛ̀bɛ́ wẽ́, Pwəə byili kɔn gə́ mʼa tó né dɛ̃ rɛ́ tɛ̀bɛ́ Yezu Kristə ká ń bàn lũ w bùrsì kɔ́ nɛ́. N zɛ̃̀ n byili bi kɔn dɛ̀bɛ́ rə̀ la jɛ̀rɛ̀ rə wɛ̀rhɛ́, fòró Kristə zɛ̃̀ n bà (1.1–2.12).

Rə̀myɛ́ kwã nɛ́, ń cící Kristə-lyì bí bə̀ bə̀ zhí Yi ni kẽkẽ bə mʼe dɛ̃̀ Kristə twírí yə́, sə bə̀ bə̀kʼa tó byɛ̀bɛ́ bə̀ wɔ́ nə̀wàcã̀nyɛla mɔ́ kùr yé (2.13–3.18).

Pwəə nə́ ń ce Tesəloniki Kristə-lyì bí

¹Wɔ́ àmyɛ́ Pwəə ǹdə́ Shəlvɛ̃ ǹdə́ Timote nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ Tesəloniki Kristə-lyì gùlú w lyì bí ni pɔ. Á zhí nə́ Da Yi ǹdə́ nə́ Cinu Yezu Kristə ne. ²Bə̀ mʼa cĩ́ bwəl á yó, sə bə pə ába yə̀-zùlə́!

Pwəə nə́ ń ce Yi nə̀bán Tesəloniki Kristə-lyì bí yilə

³Da-byâ, nə́ mə̂ dwã sə nə́ ce Yi nə̀bán twéé twéé á yilə, bʼâ Yi-ni-zhú mú nʼê súlí, e jà á dwã sónó w myɛ nʼô súlí ò la gaga. Rə̀myɛ́ wɔ́ kɔn dɛ̀bɛ́ rə̀ càn. ⁴Wɔ́ rə̀myɛ́ è ce, nə́ rʼé zɔ̀m á yò, nə́ rʼé ji á gar nə́ byili Yi gùúlí dwã bɛ́ lyì bí ni. Nə́ rʼé byili bə̀ nə́ wun nyɛ̀ á gə́ zhí Cinu ni á zhǐ kẽkẽ nɔ̀nɔ̀ ǹdə́ zwini tɛ̀bɛ́ á nʼá nɛ mɔ́ ga yírh w mó yilə.

⁵Rə̀myɛ́ nʼê byili pamparɛ̃ɛ̃ bə̀ lyì bí bùrsí Yi la kɔ́ mɔ́ bʼa yə̀ cángá. Rə̀myɛ́ mɔ́ yilə, nɔ̀nɔ̀ w kɔ̀bɔ́ á pyɛ́nɛ́ á nʼá nwɛ̀nɛ̀ mɔ́ ce Yi bʼa ce á zù rə̀ tənà y wa, bə̀ wɔ́ èmyɛ́ yil á nʼá nwɛ̀nɛ̀. ⁶Zhə̀nà, Yi bʼa wɛ̀rhɛ́ kɔn dɛ̀bɛ́ rə̀ wɔ́ cángá: rə̀ bʼa kʼa ce byɛ̀bɛ́ bə̀ nʼê nwɛ̀nɛ̀ ába mɔ́ nwɛ̀nɛ̀. ⁷Sə è gə wɔ́ ámyɛ̌ byɛ̀bɛ́ á nʼá nwɛ̀nɛ̀ zà zà mɔ́ yilə, Yi bʼa pə shìrhə́ nə́myɛ̌ ǹdʼámyɛ̌ ga nɛ, dɛ̃ rɛ́ tɛ̀bɛ́ Cinu Yezu ká ń bàn mɔ́ yùwə̀. Ń gə tú ń ká ń bàn yi ní, ń bà n zə ń màlɛ́kabá ǹdə́ bə̀ jàn nánfɔ̀lɔ̀ w n shí dɛ̃̌, ⁸n mə n bə̀ ǹdə́ myìn-zhù nánfɔ̀lɔ̀, n zɛ̃̀ n pə còrhò-tum byɛ̀bɛ́ bə̀ yə̀ Yi zwì, bə̀ jʼà yə̀ nə́ Cinu Yezu yò-ècɔ̀nɔ̀ nyí rí zwẽ mó ne. ⁹Nyǐnə còrhò-tum dí Yi la lyì bí bə̀myɛ́ nɛ pɔ mɔ́: rə̀ bʼa zhìlì bə̀ yò lyɛ́lyɛ́; rə̀ bʼa jì bì bə vò pyépyé; bə̀ tʼâ la rə̀ zùwə́ myɛ nyí ni bwəlse yé. ¹⁰Rə̀myɛ́ gakó bʼa wɛ̀rhɛ́ dɛ̃ rɛ́ tɛ̀bɛ́ Cinu ká ń bàn mɔ́ yùwə̀. Rə̀myɛ́ yi ní, ń lyì bí byɛ̀bɛ́ bə̀ zwẽ ń nyí mú gakó bʼa cèrhé mo. Ámyɛ bʼâ tó á yə̀ bə̀ wẽ́, á gə́ shɛ̀nɛ́ á zwẽ zɔ̀mà nɛ́ nə́ byili ába mó yilə.

¹¹Wɔ́ rə̀myɛ́ è ce nə́ rʼé lwə̀l Yi twéé twéé á yilə. È gə́ wɔ́ rə̀myɛ́ rə̀ byẽ̀ ába mó ce, nə́ rʼé lwə̀l lè bə̀ rə̀ sɛ̃ ába á ŋwɛ̀nɛ́ á wɛ̀rhɛ́ kɔn gakó rə tó rə̀ pùbùlə̀ nè. Kɔn dɛ̀bɛ́ gakó á nʼá yâl á wɛ̀rhɛ́, sə Yi sɛ̃ ába ǹdə́ rə̀ jàn dɛ́, mùnì ga á wɛ̀rhɛ́ cɛ̀nɛ̀, sə rə sɛ̃ ába á twĩ̀ á Yi-ni-zhú tumə né á báásɛ. ¹²Èta, nə́ Cinu Yezu yil lé mʼa tó á dɛnnɛ rə du ǹdə́ còrhó, sə ńmyɛ mà n ce ámyɛ yil du. Rə̀myɛ́ gakó bʼa wɛ̀rhɛ́ nə́ Yi ǹdə́ Cinu Yezu Kristə jàn yilə.

Kɔn dɛ̀bɛ́ rə̀ la jɛ̀rɛ̀ rə wɛ̀rhɛ́ fòró Cinu zɛ̃̀ n bà

¹Da-byâ, nə́ Cinu Yezu Kristə ká ń bànà, sə nə́ mʼâ gùlí dwã ǹdə́ mɔ. Rə̀myɛ́ yilə, nə́ rʼé lwə̀l ába: ²lò gə tú ń nə́ ń byili ába bə̀ Cinu twírí y dɛ̃ rɛ́ yúwə́, sʼá wun bə̀kʼá pú e zɛ̃̀ á zɛ̃̀ á nʼá kəkə yé. Dɛ̀ga myɛ, lò gə ń byili ri ába ǹdə wɔ́ kɔn dɛ̀bɛ́ Yi yʼà byili mu n zɛ̃̀ n zɔ̀m ta, ráá ń gə wò bə̀ wɔ́ nə́myɛ̌ nə́ zɔ̀m, ráá nə́myɛ̌ nə́ kɛ̃ dɛ sɛ́bɛ́ wẽ́ myɛ, ³sə á bə̀kʼá shɛ̀nɛ́ lò zə ń zɔ̀mà dwí tɛ̃̌tɛ̃̌ n bə̀ n mə n jə́jɛ̀rɛ́ ába yé. Zhə̀nà, ywẽ̀ nánzhəzhɔ̌ bʼa wɛ̀rhɛ́ fòró dɛ̃ rɛ́ rə̀myɛ́ yí. Lyì bʼa shí tɛ̃´ bə zɛ̃̀ bə cẽ Yi nyə̀ná nɛ́ yò. Lyì-bəlwɛ̀lɛ́ y kɛ̀bɛ́ Yi la è yò zhìlù mú bʼa du pwẽ̀ nè pamparɛ̃ɛ̃, lyì nə y ǹdə́ bə̀ yírhə́. ⁴Lò mó ńmyɛ̌ mɔ́ wɔ́ Yi zù-bal mɔ́. Ń mà n zhẽ̌ ń cìn dɛ̃̌ dwini kɔn dɛ̀bɛ́ gakó lyì bí nʼê byẽ̀ bə̀ yi, ǹdə́ kɔn dɛ̀bɛ́ gakó bə̀ nʼê cèrhé ǹdə Yi ta. Sə ń gaga mɔ́ mà n vò n zù n jòm Yi jì y wə, n wɔ̀ bə̀ wɔ́ ńmyɛ̌ ń wɔ́ Yi.

⁵À gə́ yʼà gwẽ̌ ŋwɛ́nɛ́ á sõ yi ní ga, à zɔ̀m yò w òmyɛ́ ǹdʼába. Á swě w nà? ⁶Á yě kɔn dɛ̀bɛ́ rə̀ cə̀r lyì-bəlwɛ̀lɛ́ y yé ne. È wàr è la du pamparɛ̃ɛ̃ ǹdə́ è yi rí gwẽ̌ yə̀ yí yé. ⁷Kɔn ŋwɛ́nɛ́ rə̀ nʼê cə̀r è yé ne. E zɛ̃̀ è nʼê shèè è mʼê twĩ̀ è tumə né. Sə kɔn dɛ́ rə̀myɛ́ mɔ́ gə tú rə̀ kʼê tɛ̀nɛ́, è kʼê tʼâ la shòò e mʼe twĩ̀ yé, ⁸è mʼa du pamparɛ̃ɛ̃. Rə̀myɛ́ yi ní, Cinu Yezu mà n bə̀ ǹdə́ jàn nánfɔ̀lɔ̀, n zə ń nyì-zho n mə n zhìlì è yò, n gu yə. ⁹Lyì-bəlwɛ̀lɛ́ y èmyɛ́ mʼa bə̀ ǹdə́ Shətana jàn, e wɛ̀rhɛ́ màmyaarhɛ ǹdə́ wò-jààrɛ̀ dwí gakó ǹdə́ wẽ̀ tɛ̀bɛ́ rə̀ nʼê zɛ̃̀ wu ni, e bʼe jə́jɛ̀rɛ́ lyì bí. ¹⁰È mʼa zə tùntùm-bəlwâlsɛ dwí gakó e bə̀ e mʼe jə́jɛ̀rɛ́ lyì bí byɛ̀bɛ́ bə̀ la jó mó. Lyì bí bə̀myɛ́ mɔ́ yə̀ zhə̀n dɛ́ rə̀ yʼà bʼa vwârh bɛ mɔ́ swéné bə zwẽ de yé. Wɔ́ rə̀myɛ́ è ce bə̀ la jó. ¹¹Yi bʼa ce kɔn dɛ̀bɛ́ rə̀ nʼê dwé lò pyi bə̀ surhə né, mùnì ga bə zwẽ kɔma nyí, bə̀ gə́ yə̀ rə̀ nyí rí zwẽ mó yilə. ¹²Rə̀ mʼa wɛ̀rhɛ́ èta mùnì ga lyì bí byɛ̀bɛ́ bə̀ swéné lwɛlɛ rɛ́ wɔ̀rhɔ́ mɔ́, bə zɛ̃̀ bə̀ yə̀ zhə̀n dɛ́ zwẽ mó nə còrhò-tum.

Zhínə Yi ni kẽkẽ

¹³Da-byâ, ámyɛ̌ byɛ̀bɛ́ Cinu só mó, nə́ mə̂ dwã sə nə́ ce Yi nə̀bán twéé gakó á yilə. Yi cír ába kùr-ju yi ní ga, mùnì rə tó rə̀ Eshirhə y dɛnnɛ rə vwârh ába, á gə́ shɛ̀nɛ́ á zwẽ zhə̀n dɛ́ mɔ́ yilə. Wɔ́ Eshirhə y èmyɛ́ è ce á jǐrh Yi lyì. ¹⁴Wɔ́ yò-ècɔ̀nɔ̀ nyí rí nə́ bwə̀l nə́ byili ába mó dɛnnɛ Yi tó né rə byẽ̀ ába, mùnì ga á nə rə̀ vwârh mɔ́. Rə̀ byẽ̀ ába myɛ mùnì ga á nə cəl nə́ Cinu Yezu Kristə zùwə́ y wẽ́. ¹⁵Da-byâ, rə̀myɛ́ ce kɔn dɛ̀bɛ́ gakó nə́ kɛ̃ sɛ́bɛ́ wẽ́ nə́ byili ába, ráá nə́ byili ába ǹdə́ nə́ nyí, sʼá zwẽ de á bʼá zhì kẽkẽ.

¹⁶Nə́ Da Yi swéné nə́ba n pə nə́ba wu-jɔ̀ twéé gakó nə́ mʼé dɛ̃̀ ń nyì-bwelé y pyǐrh mó. ¹⁷Nə́ rʼé lwə̀l ńmyɛ̌ ǹdə́ nə́ Cinu Yezu Kristə cìcì nì bə̀ bə̀ pə ába wu-jɔ̀ ǹdə́ jàn, mùnì ga á ŋwɛ̀nɛ́ á wɛ̀rhɛ́ cɛ̀nɛ̀ twéé twéé á tùntwə̃̀ə̃̀ né ǹdʼá zɔ̀mà nɛ́ ga wẽ́.

Pwəə nə́ ń lwə̀l Tesəloniki Kristə-lyì bí bə̀ bə̀ lwə̂l Yi ń yilə

¹Da-byâ, tɛ̀bɛ́ rə̀ súlí èlâsɛ̃´ mɔ́, nə́ rʼé lwə̀l ába, sʼá lwə̀l Yi nə́ yilə, mùnì ga rə sɛ̃ nə́ba Cinu zɔ̀mɛ̀ rɛ́ cə̀ə̀lè rə yí lyì bí dwã bɛ́ làlà, bə shɛ̀nɛ́ bə zwẽ de náàcɛ̀nɛ́, ǹdə ámyɛ gə́ zwẽ de né. ²Lwə̂lnə Yi nə́ yil gwẽ̌, mùnì ga rə yìlì nə́ba lyì-bəlwâlsɛ́ yé né, bʼè də̀ lyì bí gakó bə̀ nʼê shɛ̀nɛ́ bə̀ zwì Cinu yé.

³Cinu wɔ́ zhə̀n-cí. Ń mà n pə ába jàn n sɛ̃ ába mùnì ga lwɛlɛ cə́bal mɔ́ bə̀ká n ŋwɛ̀nɛ́ n wɛ̀rhɛ́ ába kaka yé. ⁴Cinu ce nə́ zhe á zhə̀nà. Ń ce nə́ lwar pamparɛ̃ɛ̃ bʼâ nʼá wɛ̀rhɛ́ kɔn dɛ́ dɛ̀bɛ́ nə́ byili ába mó, á jʼâ gwẽ̌ bʼâ cə̀ə̀lè á wɛ̀rhɛ́ rɛ. ⁵À nʼâ lwə̀l Cinu bə̀ ń byili ába Yi sónó sɔ́má yá, sə n ce á zə cìn-pyɔ́nɔ́ ǹdə Kristə ta.

Lò gakó mə̂ sə́ twĩ̀ ń pyà ǹ nyí kùjú

⁶Da-byâ, nə́ rʼé pɛ ába nyí rí tɛ̀bɛ́ nə́ Cinu Yezu Kristə yil lé yilə: á bə̀kʼá shɛ̀nɛ́ á tó Kristə-lyì bí byɛ̀bɛ́ bə̀ wɔ́ nə̀wàcã̀nyɛla mɔ́ kùr yé. Bə̀ tʼâ zwẽ zɔ̀mà nɛ́ nyɛ̀bɛ́ nə́ byili mú yé. ⁷Á cìcì mú yě á gə́ mʼâ wɛ̀rhɛ́ nɛ́ á kwè nə́ nà. Nə́ gə́ yʼâ tú á sono mó, nə́ yə̀ nə̀wàcɔ̀rɔ̀ wɛ̀rhɛ́ yé. ⁸Nə́ yə̀ lò lò yó w nyǐ ǹdə́ nə́ nyí kùjú yé. Nə́ twĩ̀ cəcɛ̃ ǹdə́ nə̀nyɔ́nɔ́ ga nə́ yə̀ shǐrh yé, mùnì ga nə́ bə̀kʼá lyɛ̀ɛ̀ á mə̀dù ga yé. ⁹È də̀ á kɔn nə́ yʼâ bə mə̂ sə nə́ jí yé, sə nə́ twĩ̀ èta mùnì ga á kwè nə́ nà. ¹⁰Á yě bə̀ nə́ gə́ yàl á sõ yi ní, nə́ yʼâ pɔ ába nyí nə́ wɔ̀: “Lò mɔ̀bɔ́ ń tá ń yâl n twĩ̀, sə ń bə̀ká n jí myɛ yé.”

¹¹Nə́ nyɛ̀ɛ̀ bə̀ lyì jàlà ŋwɛ́nɛ́ á wẽ́ bə̀ wɔ́ nə̀wàcã̀nyɛla, bə̀ tʼâ yâl tum yé. Bə jʼà nʼê zwì bə̀ dwã nyə̀ná wẽ́. ¹²Nə́ rʼé pɛ nyí lyì bí bə̀myɛ́ mɔ́ nɛ, nə́ mʼé cící bi Cinu Yezu Kristə yil lé yilə, bə̀ bə̀ zhìlì bə̀ yala nɛ bə twĩ̀, bə nə bə̀ nyí kùjú bə̀ sə̀pwà nɛ̀.

¹³Sə ámyɛ̌ da-byâ, á bə̀kʼá gə á wun yé. Cə̀ə̀lènə̀ á nʼá twĩ̀ tumə nyɛ̀bɛ́ nə̀ càn. ¹⁴Sə lò mɔ̀bɔ́ ń tá ń zwẽ tɛ̀bɛ́ nə́ kɛ̃ sɛ́bɛ́ rɛ́ tɛ̀bɛ́ wẽ́ mó, sʼá byili lyì bí gakó ne. Á bə̀kʼá kʼá jí ǹdə́ mɔ yé, mùnì ga cìzhìl zə mɔ, ¹⁵sʼá bə̀kʼá nyǐ mu ǹdə á zù-bal ta yé. Cícínə mo bə̀ ń wɔ́ á da-byǐ.

Pwəə nə́ ń gwi ń sɛ́bɛ́ rɛ́ yó ǹdə́ nə̀bán-co

¹⁶Cinu mú ń wɔ́ yə̀-zùlə́ cə́bal mɔ́ cìcì mà n pə ába yə̀-zùlə́ kɔn gakó wẽ́! Ń mà n yə̀ nɛ́ ǹdʼá gakó!

¹⁷Wɔ́ àmyɛ́ Pwəə à nʼâ ce ába ǹdə́ zɔ̀mà nɛ́ nyɛ̀bɛ́. Wɔ́ àmyɛ́ cìcì jɛ̃̀ è kɛ̃ nɛ. À nʼâ kɛ̃ à yil lé né ǹdə à gə́ nʼâ kɛ̃ dɛ à sábá nɛ́ gakó wẽ́ né. Á bʼâ tó à kəkɛ̃ɛ̃ rɛ́ dɛnnɛ á lwar bə̀ wɔ́ àmyɛ́ à kɛ̃ sɛ́bɛ́ rɛ́ tɛ̀bɛ́.

¹⁸Nə́ Cinu Yezu Kristə mà n cĩ́ bwəl á gakó yó!