2 Pyɛɛrɛ

Pyɛɛrɛ

sábá nə̀lyè nyân dɛ́

Lyì jàlà yʼà shí tɛ̃´ bə zɛ̃̀ bə zù Kristə-lyì gùúlí wẽ́ bə̀ nʼê gòm kɔma bə̀ pɛ Kristə-lyì bí ni, bə̀ wɔ́ kàrmɔ̀ bə̀ nʼê wɛ̀rhɛ́. Lyì bí tə̀ rə̀myɛ́ yil bə zɛ̃̀ bə zù ywâl tumə wẽ́ bə̀ nʼê twĩ̀. Wɔ́ rə̀myɛ́ yil Pyɛɛrɛ kɛ̃ sɛ́bɛ́ rɛ́ tɛ̀bɛ́ n pə Kristə-lyì bí ni, n mə n cící bi mùnì ga bə cẽ kàrmɔ́ mə̀ də̀ zhə̀n mɔ́ yò, sə bə zwẽ zhə̀n dɛ́ Kristə tùntúmə́ bé byili mú ǹdə́ bə̀ wun gakó (1.1–2.22).

Ń zɔ̀m Yezu Kristə twírí y nánkwaá y myɛ yò. Ń byili bə̀ lyì jàlà ŋwɛ́nɛ́ bə̀ nʼê mɔ̀n bɛ̀, bə̀ zhe bə̀ Yezu kə́ ń tá ń bàn yé, sə bə̀ bə̀kʼa tə̀ rə̀myɛ́ yil bə gə bə̀ wun yé, bə̀ bə̀ mə̂ sə bə pyɛ́nɛ́, bə zhìlì bə̀ yala nɛ, bə dɛ̃̀ Kristə twírí y nánkwaá yá (3.1-18).

Pyɛɛrɛ nə́ ń ce byɛ̀bɛ́ bə̀ zù Yezu Kristə mó

¹Àmyɛ́ Shəmɔ-Pyɛɛrɛ, à wɔ́ Yezu Kristə tùntùnnə̀ ǹdə́ ń tùntúm, à nʼâ kɛ̃ sɛ́bɛ́ rɛ́ tɛ̀bɛ́. Yezu Kristə wɔ́ nə́ Yi ǹdə́ nə́ Zwennə. Ń wɔ́ wu-cángá cí. Wɔ́ rə̀myɛ́ yilə, ń ce ámyɛ zù mù ǹdə nə́myɛ̌ ta. Wɔ́ ámyɛ̌ nɛ à nʼâ kɛ̃ sɛ́bɛ́ rɛ́ tɛ̀bɛ́ à la pɔ. ²Yi ǹdə́ nə́ Cinu Yezu bʼa cĩ́ bwəl á yó, sə bə̀ yə̀-zùlə́ né jʼâ nʼê súlí á yó w twéé twéé, á gə́ yě bə̀ pár mɔ́ yilə!

Nə́ mə̂ sə nə́ ce nə́ tùntwə̃̀ə̃̀ né yí Yi pùbùlə̀

³Yi gə́ wɔ́ jàn cə́bal mɔ́ ce, rə̀ pɔ nə́ba kɔn dɛ̀bɛ́ gakó rə̀ bʼa ce nə́ zhì nə́ nà y yó nə́ zhí rə̀myɛ́ nɛ, sə nə́ zə myə̂l. Rə̀ ce nə́ lwar mɔ̀bɔ́ ń byẽ̀ nə́ba mùnì nə́ nə ń zùwə́ y ǹdə́ ń cɛ̀nɛ̀ rɛ́ mɔ́ gə́ wɔ́ nɛ́. ⁴Èta, Yi pɔ nə́ba rə̀ cɛ̀nɛ̀ pansɛ́ nánfwààlɛ́ rə̀ yʼà bwəl nə́ba sə̀ nyí mú. Wɔ́ cɛ̀nɛ̀ pansɛ́ sə̀myɛ́ mɔ́ dɛnnɛ á bʼâ tó né á yẽ̌ shilə námməlwâlsɛ́ sə̀ ŋwɛ́nɛ́ sə̀ nʼê zhìlì lyì bí yò lũ w wẽ́ mó ne, á wu yə̀ òdù ǹdə́ Yi cìcì.

⁵Rə̀myɛ́ ce, cenə jàn nɛ́ á twĩ̀ tùm-ècɛ̀nà á súlí á Yi-ni-zhú mú ni. Á gə nʼá twĩ̀ tùm-ècɛ̀nà, sʼá lwar Yi pùbùlə̀ né myɛ á súlí. ⁶Á gə lwar Yi pùbùlə̀ né, sʼá yə̀ cìn-zal cìnə́ myɛ á súlí. Á gə wɔ́ cìn-zal cìnə́, sʼá yə̀ cìn-pyɔ́nɔ́ cìnə́ myɛ á súlí. Á gə wɔ́ cìn-pyɔ́nɔ́ cìnə́, sʼá zhí Yi ni ǹdʼá wun gakó á súlí. ⁷Á gə zhí Yi ni ǹdʼá wun gakó, sʼá wɛ̀rhɛ́ cɛ̀nɛ̀ ǹdə́ dwã á súlí, sʼá swéné dwã. ⁸Á gə wɔ́ rə̀myɛ́ gakó cìnə́ kɔn yí, rə̀ bʼa pə ába yə̀wâl rə ce á kwɛrhɛ á lwar nə́ Cinu Yezu Kristə párá. ⁹Sə lò mɔ̀bɔ́ ǹ də̀ rə̀myɛ́ gakó cí, ǹ wɔ́ ǹdə lyìlyǒ ta, ǹ bə yé né nɛ yé. Ǹ kə́ ǹ yə̀l bə̀ bə̀ vùr ǹ shãã ga yə̀-bəlwàálɛ́ yé.

¹⁰Da-byâ, Yi cír ába, rə byẽ̀ ába. Rə̀myɛ́ ce, cenə jàn nɛ́ á zhì á nà y yó á shɛ̀ rə̀ byə̀l lé twéé twéé. Á gə nʼá wɛ̀rhɛ́ èta, á tʼá la tɛ̃´ tu gaga yé. ¹¹Èta, á bʼâ nə sɔ́má á zù nə́ Cinu ǹdə́ nə́ Zwennə Yezu Kristə tənà y è ŋwɛ́nɛ́ byinə nə̀ bə zhɔ̌ zhe yil mó wẽ́ nàná.

Nə́ mə̂ sə nə́ zhì nə́ nà y yó zhə̀n dɛ́ bə̀ byili nə́ba mó wẽ́

¹²Wɔ́ rə̀myɛ́ è ce, ǹdʼá jɛ̀rɛ̀ á yě ywẽ̀ né nə̀myɛ́, á zhǐ á nà y yó zhə̀n dɛ́ bə̀ byili ába mó wẽ́ ga, à gwẽ̌ nʼâ lyǐrh ne ába twéé twéé. ¹³À nʼâ bùl bʼà gə́ gwẽ̌ ŋwɛ́nɛ́ lũ w wẽ́ mó, à mə̂ sʼa sɛ̃ ába á surhə né pul ywẽ̀ né nə̀myɛ́ shò-kwã nɛ́. ¹⁴Nə́ Cinu Yezu Kristə ce a lwar bʼà bwə́l zhǐr lũ w ò nʼô lyɛ̃ mɔ́ wẽ́. ¹⁵Sə à bʼa wɛ̀rhɛ́ à gə́ wɔ̌ nɛ́ gakó, mùnì ga, à gə tú à tɛ̀nɛ́ myɛ, sʼá bə̀kʼá swě ywẽ̀ né nə̀myɛ́ gaga yé.

¹⁶Nə́ gə́ byili ába nə́ Cinu Yezu Kristə jàn dɛ́ ǹdə́ ń twírí y yò mó, è də̀ səswalsɛ numbyíní tɛ́rɛ́ ǹdə́ è surhə nə́ mʼé byili ába yé. Nə́ cìcì yírhə́ nɔ ń zùwə́ yə́. ¹⁷Ń Da Yi wòwə̀: “Mɔ̀bɔ́ wɔ́ àmyɛ́ Byǐ, à só mo dɛ̃´dɛ̃´. Wɔ́ ńmyɛ̌ à cír.” Wɔ́ rə̀myɛ́ yi ní, Yi jàn-bə-swɛ̃´-zhe cə́bal mɔ́ pɔ mɔ pyɛ̀lɛ̀ ǹdə́ zùwə́ nánfɔ̀lɔ̀. ¹⁸Nə́ gə́ yʼâ tó mo nə́ ŋwɛ́nɛ́ pyɔ̀ w náàcɔ̀nɔ̀ w yó mó yi ní, wɔ́ rə̀myɛ́ yó cəl lé rə̀myɛ́ mɔ́ zhì dɛ̃̌ rə zɔ̀m, nə́ cìcì zhã̌ nyɛ̀ɛ̀.

¹⁹Wɔ́ rə̀myɛ́ è ce nə́ zwẽ Yi nyì-zwennə bé zɔ̀mà nɛ́ nə́ zhǐ kẽkẽ, tə́tɔ̀ná tɛ̀nɛ́ yé. Ámyɛ mə̂ sʼá cili ni náàcɛ̀nɛ́, bə̀ nə̀ wɔ́ ǹdə pàntɛ́mɛ́ è yə̂r cə-byín wẽ́ ta, kɔn la bʼe yí cə-lár, cə-lár nə̀ŋwɔ w du o yə̂r á wun ní. ²⁰Sə kɔn du, lwarna bə̀ lò tɛ̀nɛ́ ń wɔ̌ Yi nyì-zwennə zɔ̀mà nɛ́ nə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó kùrə̀ ń la byilu ǹdə́ ń sə̀pwà jàn yé. ²¹Lò tɛ̀nɛ́ ń zɔ̀m nyì-zwennə zɔ̀mà ǹdə́ ń sə̀pwà pùbùlə̀ yé. Wɔ́ Eshirhə náàcɛ̀nɛ́ è ce lyì zɔ̀m zɔ̀mà nɛ́ nyɛ̀bɛ́ nə̀ shí Yi sõ mó.

Kàrmɔ̀ byilnə nánkɔ̀mdɛ́ bʼa nə còrhò-tum

(Zhidi 4-13)

¹Lyì yʼà ŋwɛ́nɛ́ Esərayɛl lyì bí wẽ́ shãã ga, bə̀ nʼê gòm kɔma bə̀ bə̀myɛ́ wɔ́ Yi nyì-zwennə. Èta myɛ, kàrmɔ̀ byilnə nánkɔ̀mdɛ̀ bʼa shèè bə yə̀ ámyɛ wẽ́ bə̀ nʼê cèrhè kɔma nyə̀ná lyì bí ni. Bə̀ gaga mɔ́ bʼa zhɛ̃̀ bə̀ yó-cə́bal mɔ́ mɔ̀bɔ́ ń vwârh bɛ mɔ́. Sə bə̀ mʼa zhìlì bə̀ cìcì yò làlà. ²Lyì nánzhəzhɔ̌ bʼa tó be bə twĩ̀ yààyàà, sə bə̀ tùntwə̃̀ə̃̀ né bʼa ce lyì bí tùrh zhə̀n sɔ́má yá. ³Bə̀ mʼa zə numbyínsi surhə nyə̀ná bə jə́jɛ̀rɛ́ ába, mùnì bə nə kɔn. Sə bə̀ bùrsí kɔ́ mɔ́ ju kùr shãã ga, bə̀ yò w zhìlù mú bwəlse.

⁴Yi yə̀ màlɛ́kabá byɛ̀bɛ́ bə̀ wɛ̀rhɛ́ lwɛlɛ mɔ́ nɛ yẽ̌ yé. Rə̀ co be nɔ̀nɔ̀ ǹdə́ cə-byṹ jàà y wa, rə ce bə lyẽ be ǹdə́ nyáná bə̀ mʼê dɛ̃̀ bùrsí kɔ́ dɛ̃ rɛ́. ⁵Rə̀ yə̀ shãã ga lũ w ni yẽ̌ yé. Rə̀ ce dwà nyɔ̀ dɛ̃´dɛ̃´, nɛ̃̌ mɔ́ zhìlì byɛ̀bɛ́ bə̀ bə shɛ̀ rə̀ nyí ni zõ mó lũ wə́, sə rə̀ vwârh Nəwee mó ń nə́ ń bwə̀l cángá yò-ècɔ̀nɔ̀ nyí rí mú, e súlí lyì dwã bwàlpyɛ̀. ⁶Rə kə́ Sɔdɔm ǹdə́ Gɔmɔɔrɛ bùrsì, rə zə myǐn rə cɔ̀ cɛmɛ nɛ́ nə̀myɛ́. Rə̀myɛ́ yʼà mə̂ sə rə yə̀ myɔrhɔ byɛ̀bɛ́ bə̀ bə shɛ̀ nyí ni zõ mó yilə, mùnì bə lwar kɔn dɛ̀bɛ́ rə̀ la bɛ wɔ̀rhɔ́. ⁷Sə rə̀ zwẽ Lɔtɛ mɔ́, ń yà ń wɔ́ lyì-twə̂ y, ń ŋwɛ́nɛ́ lyì bí byɛ̀bɛ́ bə̀ yʼà bə shɛ̀ Yi nyí ni zõ mó cəcəl w twéé twéé ǹdə́ wu-zhìlù mú. ⁸Lyì-twə̂ y èmyɛ́ gə́ yʼà ŋwɛ́nɛ́ bə̀ wẽ́, ń yírhə́ nə bə̀ tùntùm-bəjə́ə́lé, ń zhã̌ myɛ jʼà nyɛ̌ nə̀ yò twéé twéé mó, ń wu yʼà zhìlì.

⁹Rə̀myɛ́ nʼê byili bə̀ Cinu wɔ̌ ń zwẽ byɛ̀bɛ́ bə̀ zhí mu bə̀ zhǐ bə̀ nà y yó mó nɔ̀nɔ̀ jɔ̃̀ wà, n zɛ̃̀ n zhìlì ń yala nɛ ǹdə́ byɛ̀bɛ́ bə̀ bə shɛ̀ ń nyí ni zõ mó, ń mə́ ń dɛ̃̀ bùrsí kɔ́ dɛ̃ rɛ́, n pə bɛ còrhò-tum. ¹⁰Sə wɔ́ byɛ̀bɛ́ bə̀ tʼâ zwẽ ń nyí ni, bə̀ nʼê wɛ̀rhɛ́ ǹdə bə̀ yala nɛ́ shilə námməlwâlsɛ́ gə́ nʼê yâl nɛ́ mɔ́ nɛ, ń la còrhò-tum pɔ du.

Kàrmɔ̀ byilnə bé nánkɔ̀mdɛ́ rə̀myɛ́ mɔ́ zhe rə̀ cìcì zhə̀nà; bə̀ wɔ́ cìn-byilu cìnə́; bə̀ nʼê tùrh jàn cìnə́ bé bə̀ ŋwɛ́nɛ́ dɛ̃̌ yi w bə̀ zhe zùwə́ mó; bə̀ tʼâ nyàm bɛ̀ yé. ¹¹Màlɛ́kabá zhe jàn ǹdə́ ŋwɔ̀nɔ́ du bə̀myɛ́. Sə ǹdə́ rə̀myɛ́ ga, bə̀ tʼâ cĩ́ yò jàn cìnə́ bé bə̀myɛ́ mɔ́ yó w bə tùrh bè Cinu yé né yé. ¹²Lyì bí bə̀myɛ́ mɔ́ wɔ́ kɔn dɛ̀bɛ́ bə̀ bùl bə̀ kùr yó bə̀ nʼê wɛ̀rhɛ́ ǹdə vwàmá ta. Bə̀ bə surhə zhe yé. Wɔ́ zal e gu dúdú yil bə̀ ŋwɛ́nɛ́. Bə̀ nʼê tùrh kɔn dɛ̀bɛ́ bə̀ yə̀l rə̀ párá, sə bə̀ yò bʼa zhìlì ǹdə vwàmá ta. ¹³Wɔ́ rə̀myɛ́ rə̀ bʼa yə̀ bə̀ còrhò-tum bə̀ tùntùm-bəjə́ə́lé yilə. Bə̀ só sə bə wɛ̀rhɛ́ bə̀ shilə námməlwâlsɛ́ pùbùlə̀ nə̀nyɔ́nɔ́ nɛ. Rə̀myɛ́ nʼê pɛ bɛ wu-nyɔ̃̀. Bə̀ gə nʼê tó ába bə̀ jí címsi, bə̀ só kɔma góm bə pə ába. Bə̀ tùntwə̃̀ə̃̀ né wɔ́ cìzhìl nyə̀ná, nə̀ bə shil zhe yé.

¹⁴Bə̀ yírhə́ tʼâ nyǐ kaka dõ jàà wà, e súlí fwə̂l tumə ne yé. Bə̀ tʼâ lyɛ̀ɛ̀ ǹdə́ yə̀-bəlwàálɛ wɔ̀rhɔ́ yé. Bə̀ nʼê jə́jɛ̀rɛ́ lyì bí byɛ̀bɛ́ bə̀ surhə né bə jàà èdù zhǐ mú, bə̀ nʼê pyà wársɛ twéé twéé, sə bə̀ yò bʼa zhìlì! ¹⁵Bə̀ yẽ̌ sɔ́má y nántwə̂ y ne bə ywə̀r bə jé. Bə̀ kwè sɔ́má y kɛ̀bɛ́ Bɔsɔɔrɛ byǐ Balaamɛ kwè mó. Balaamɛ wɔ́ Yi nyì-zwennə, sə ń swéné wársɛ, n shɛ̀nɛ́ n zwẽ se n twĩ̀ lwɛlɛ. ¹⁶Ń gə́ cẽ Yi nyí ni mú ce, bə̀na púr è nyí e zɔ̀m ǹdə́ mɔ ǹdə numbyíní ta. Bə̀na jʼà tʼâ zɔ̀m yé. Èta, è cə̀r ń tùm-fwə́ə́ré yé ne.

¹⁷Kàrmɔ̀ byilnə bé bə̀myɛ́ mɔ́ wɔ́ ǹdə bǔrh shɛ̀bɛ́ sə̀ bə nɛ̃̌ zhe ta. Bə̀ wɔ́ ǹdə bə́ban ta, zho nánfɔ̀lɔ̀ nʼô kwè, sə Yi tɛnɛ jàà rə cĩ́, è nyɛ̌ námbyṹ fúrí, rə̀ la bɛ nɛ́ co. ¹⁸Bə̀ nʼê zə bə̀ cìn-byilu zɔ̀m-fwə́ə́ré ǹdə́ bə̀ ywâl zɔ̀mà nɛ́, bə̀ mʼê vwɛ̃ lyì bí byɛ̀bɛ́ bə̀ ju kùr bə shə́r lũ w lyì bí bə̀ jé mó wẽ́ mó. ¹⁹Bə̀ nʼê bwəl nyí bə̀ bə̀ mʼa pə bɛ cìn-cìnú, bə̀myɛ́ cìcì mú jʼà wɔ́ bə̀ yala shilə né nə̀ la bə̀ yò zhìlù mú yómə́, bə̀ kɔn jàn gə du lò, ǹ wɔ́ rə̀ yóm.

²⁰Byɛ̀bɛ́ bə̀ lwar nə́ Cinu ǹdə́ nə́ Zwennə Yezu Kristə pár bə shə́r lũ w tùntùm-bəlwàálɛ́ wẽ́ mó, lyì bí bə̀myɛ́ gə yẽ̌ bə̀ cìn nì tùntwə̃̀ə̃̀ né nə̀myɛ́ jɔ̃̀ wà, nə kʼa ŋwɛ̀nɛ́ bɛ, bə̀ yò mʼa kwɛrhɛ o cɔ̀ dwini shãã ga. ²¹Bə̀ gə yʼà yə̀ sɔ́má y cángá mɔ́ pár lwar cɔ̃̀ bə̀ gə lwar è pár bə zɛ̃̀ bə cẽ Yi nyə́ né bə̀ byili bi mú. ²²Səswalá èdù ŋwɛ́nɛ́ è nʼê wə̀lə̀: “Kùlí yʼa tɔlɛ, e kʼa zhízhílí e jí è tətɔɔlɛ́.” È dõ kʼe wɔ̀: “Bə̀ gə shàrh kùkú, o kʼa vò o byíbyílí bɔ̀bɔ̀rɔ̀ wà.” Rə̀myɛ́ ce, kɔn dɛ́ dɛ̀bɛ́ rə̀ yú bi mú nʼê byili bə̀ səswalsɛ́ zɔ̀mà nɛ́ wɔ́ zhə̀nà.

Nə́ Cinu Yezu Kristə mà n ká n bə̀ zhə̀n zhə̀nà

¹Dɔwabá nántwə̂rh, tɛ̀bɛ́ wɔ́ à sábá nə̀lyè nyân dɛ́ à nʼâ kɛ̃ à la ába pɔ. Sə nə̀myɛ́ nə̀lyè y ga wẽ́, à nʼâ yâl bʼâ tó kàrmɔ́ à nʼâ lyǐrh ába mó dɛnnɛ á surhə né pul pamparɛ̃ɛ̃. ²Lyǐrhnə zɔ̀mà nɛ́ nyɛ̀bɛ́ Yi nyì-zwennə bé byili shãã ga mɔ́, ǹdə́ Cinu mú ń wɔ́ nə́ Zwennə mó nyə́ né tùntúmə́ bé byili ába mó. ³Sə tɛ̀bɛ́ rə̀ wɔ́ yò du mú, lwarna bə̀ dwã nɛ́ nánkwaá nɛ́ wẽ́, lyì mʼa zɛ̃̀ bə̀ nʼê wɛ̀rhɛ́ ǹdə bə̀ shilə námməlwâlsɛ́ gə́ nʼê yâl nɛ́. ⁴Bə̀ bʼa mɔ̀n ába bə wɔ̀: “Yezu yə̀ wə̀l bə̀ ń mà n ká n bə̀ nà? Sə wɔ́ yẽ̀ ń nə ŋwɛ́nɛ́? Nə́ nàmbala bɛ́ cùwə̀, lũ w jʼà gwẽ̌ wɔ́ ǹdə ò gə́ wɔ́ nɛ́, kaka yə̀ lyə́r yé.”

⁵Wɔ́ Yi rə̀ zə rə̀ zɔ̀mɛ̀ rɛ́, rə wɛ̀rhɛ́ dɛ̃̌ ǹdə́ cɛ shãã shãã ga, rə ce cɛ y du nɛ̃̌ cəcəl wə, rə wɛ̀rhɛ́ y ǹdə́ nɛ̃̌. Bə̀ nʼê wɛ̀rhɛ́ ǹdə wɔ́ swé bə̀ swě rə̀myɛ́ ta. ⁶Wɔ́ nɛ̃̌ mɔ́ mə̀myɛ́ cìcì Yi ce mə mɔ́lɛ́ shãã ga lũ w mə cɔ̀ wà. ⁷Wɔ́ zɔ̀mɛ̀ rɛ́ rə̀myɛ́ cìcì mú rə̀ gwẽ̌ zə dɛ̃̌ ǹdə́ cɛ y rə̀ zhǐ zà zà, rə̀ mʼê dɛ̃̀ lyì bí byɛ̀bɛ́ bə̀ bə shɛ̀ nyí zõ mó bùrsí dɛ̃ rɛ́. Wɔ́ dɛ̃ rɛ́ rə̀myɛ́ yù w Yi la dɛ̃̌ ǹdə́ cɛ y myɛ yò zhìlù ǹdə́ myǐn.

⁸Dɔwabá nántwə̂rh, kɔn rə̀dù ŋwɛ́nɛ́ á bə mə̂ sʼá swě yé: dɛ̃ rə̀dù nyɛ̌ ǹdə byinə mɔ̀rhɔ̀ ta, byinə mɔ̀rhɔ̀ zɛ̃̀ nə̀ nyɛ̌ ǹdə dɛ̃ rə̀dù ta Cinu yilə. ⁹Lyì jàlà nʼê bùl bə̀ Cinu nə́ ń dɛnɛ ǹdə́ ń nyí-bwəl lé pyǐrh, sə è də̀ èta yé. Ń nə́ ń yâl bə̀ lyì bí gakó pyìrhí bə̀ wun bə yẽ̌ lwɛlɛ wɔ̀rhɔ́ nɛ. Wɔ́ rə̀myɛ́ è ce, ń nə́ ń zhìlì ń yala nɛ ǹdʼába, mùnì lò mə̀dù ga yò bə̀kʼa zhìlì yé.

¹⁰Cinu dɛ̃ rɛ́ bʼa jàr bɛ̀ ǹdə ŋwɔ̀l-bal ta. Sə rə̀myɛ́ yùwə̀, dɛ̃̌ yi rí bʼa jé ǹdə́ sɔ̀ nánfɔ̀lɔ̀ kɔ̀bɔ́ ò nʼô zɛ̃̀ wu ni. Wẽ̀ tɛ̀bɛ́ gakó rə̀ ŋwɛ́nɛ́ dɛ̃̌ bʼa shɛ̃̀ bárhɛ́ rə yə̂l. Yi bʼa kə́ lyì bí byɛ̀bɛ́ bə̀ ŋwɛ́nɛ́ cɛ y yó mó bùrsì bə̀ tùntwə̃̀ə̃̀ né yilə.

¹¹Rə̀myɛ́ gakó gə́ la jó èta mɔ́ ce, ámyɛ cìcì mú mə̂ sʼá lwar á gə́ mʼâ zə á cìn ní á tùntwə̃̀ə̃̀ né wẽ́. Á tùntwə̃̀ə̃̀ né mə̂ sə nə yí Yi pùbùlə̀, sʼá zhí ri, ¹²á mʼá dɛ̃̀ rə̀ dɛ̃ rɛ́. Cenə jàn nɛ́ á tùntwə̃̀ə̃̀ né ce dɛ̃ rɛ́ yí làlà. Rə̀myɛ́ yùwə̀, myǐn mú bʼa cɔ̀ dɛ̃̌ yi rí, sə mə̀ lumi rí bʼa lyɛ̃ rə yə̂l wẽ̀ tɛ̀bɛ́ gakó rə̀ ŋwɛ́nɛ́ dɛ̃̌. ¹³Yi bwəl nyí bə̀ rə̀ mʼa ce dɛ̃̌ nándwə̃̀ ǹdə́ cɛ nándwə̃̀ yə̀ nɛ́, sə cángá tumə bʼa yə̀ rə̀ wẽ́. Wɔ́ rə̀myɛ́ nə́ rʼé dɛ̃̀.

¹⁴Rə̀myɛ́ ce, dɔwabá nántwə̂rh, cenə jàn nɛ́ á yə̀ wárhgáá, dóó bə̀kʼa yə̀ á yó w Yi yé né yé, sə yə̀-zùlə́ yə̀ ámyɛ̌ ǹdə́ rə̀myɛ́ ga bwə̂l wə, á bʼá dɛ̃̀ dɛ̃ rɛ́ rə̀myɛ́. ¹⁵Lwarna bə̀ nə́ Cinu gə́ nə́ ń zhìlì ń yala nɛ mɔ́, wɔ́ mùnì ga á nə vwârh. Wɔ́ èta nə́ da-byǐ nántwə̂ Pwəə kɛ̃ n byili ába né. Ń zɔ̀m ǹdə́ surhə né nyɛ̀bɛ́ Yi pɔ mɔ mɔ́. ¹⁶Ń zɔ̀m yò w òmyɛ́ sábá nɛ́ nyɛ̀bɛ́ gakó ń kɛ̃ rə̀myɛ́ yil mó wẽ́. Zɔ̀mà jàlà ŋwɛ́nɛ́ ń sábá nɛ́ wẽ́ nə̀ kùr nyɔ̀ɔ̀ zum. Rə̀myɛ́ ce, lyì bí byɛ̀bɛ́ bə̀ bə bə̀ nà yó zhǐ kẽkẽ bə̀ yə̀ kaka kùr swí mú nʼê lyə́r zɔ̀mà nɛ́ nə̀myɛ́. Bə̀ nʼê wɛ̀rhɛ́ èta Yi zɔ̀mɛ̀ rɛ́ sɛ́bɛ́ rɛ́ jààsɛ̀ dwã myɛ wẽ́, sə rə̀myɛ́ wɔ́ bə̀ cìcì yò bə̀ nʼê zhìlì.

¹⁷Wɔ́ rə̀myɛ́ à dámâ à nʼâ byili ába èlâsɛ̃´ dɔwabá nántwə̂rh. Rə̀myɛ́ ce, dɛ̃̌na á cìnə̀, á bə̀kʼá yẽ̌ á cìn nì á pə byɛ̀bɛ́ bə̀ bə shɛ̀ Yi nyə́ né zõ mó ne bə jə́jɛ̀rɛ́ yé, mùnì ga á ŋwɛ̀nɛ́ á zhì kẽkẽ. ¹⁸Cenə jàn nɛ́ á cə̀ə̀lè á yə̀ nə́ Cinu ǹdə́ nə́ Zwennə Yezu Kristə sónó w wẽ́, á lwar ń pár á súlí. Ń yil lé bʼa nə còrhó èlâsɛ̃´ ǹdə́ byinə nə̀ bə zhɔ̌ zhe yilə! Amɛ̀n!