2 Zhã

Zhã

sábá nə̀lyè nyân dɛ́ ń kɛ̃ mɔ́

Sɛ́bɛ́ rɛ́ tɛ̀bɛ́ myɛ wɔ́ Zhã ń kɛ̃ dɛ. Sə ń byẽ̀ ń cìn rə̀ wẽ́ bə̀ “Kristə-lyì gùlú w yé né cə́bal”. Ń kɛ̃ sɛ́bɛ́ rɛ́ n pə “kɛ̃ mə̀dù ǹdə́ ń byâ” nɛ. Kɛ̃ mɔ́ wɔ́ Yi rə̀ cír mo. Lwarna bʼè də̀ kɛ̃ páá nɛ ń kɛ̃ sɛ́bɛ́ rɛ́ n pə yé. Wɔ́ Kristə-lyì gùlú òdù ń byẽ̀ bə̀ “kɛ̃”, ò lyì bí zɛ̃̀ bə̀ wɔ́ “kɛ̃ mɔ́ byâ bɛ́”.

Lyì yʼà tú Kristə-lyì gùlú w wẽ́ bə̀ nʼê byili ò lyì bí zɔ̀mà nyɛ̀bɛ́ nə̀myɛ́ ǹdə́ yò-ècɔ̀nɔ̀ nyí rí nyə̀ná nɛ́ də̀ rə̀dù. Wɔ́ rə̀myɛ́ è ce n kɛ̃ sɛ́bɛ́ rɛ́ n pə bɛ mùnì bə dɛ̃̀ bə̀ cìn ǹdə́ lyì bí bə̀myɛ́ mɔ́. N cící bi bə̀ bə̀ swéné dwã, sə bə zə kɔn dɛ̀bɛ́ gakó bə̀ cèrhè bè Yezu Kristə shò-kwã nɛ́ mɔ́ kẽkẽ.

¹Kɛ̃, wɔ́ àmyɛ́ gùlú w yé né cə́bal mɔ́, à nʼâ kɛ̃ sɛ́bɛ́ rɛ́ tɛ̀bɛ́ à la ǹmyɛ́ mɔ̀bɔ́ Yi cír mó ǹdə́ ǹ byâ bɛ́ ga nɛ pɔ. À só ába zhə̀n zhə̀nà. È də̀ àmyɛ́ dúdú à só ába yé; lyì bí byɛ̀bɛ́ bə̀ yě zhə̀n dɛ́ gə́ wɔ́ nɛ́ mɔ́ myɛ só ába. ²Wɔ́ zhə̀n dɛ́ tɛ̀bɛ́ rə̀ ŋwɛ́nɛ́ nə́ wẽ́ mó rə̀ ce nə́ só ába, sə rə̀ bʼa jʼâ ŋwɛ́nɛ́ ǹdə́ nə́ba twéé twéé.

³Nə́ Da Yi ǹdə́ ń Byǐ Yezu Kristə bʼa cĩ́ bwəl nə́ yó, bə pə nə́ba sǔbri ǹdə́ yə̀-zùlə́ zhə̀n ǹdə́ sónó wẽ́!

⁴À pwírí ǹ byâ bɛ́ jàlà ŋwɛ́nɛ́ zhə̀n sɔ́má yó ǹdə nə́ Da mɔ́ gə́ pɔ nə́ba nyí ní. Rə̀myɛ́ ce à wu nyɛ̀ dɛ̃´dɛ̃´. ⁵Sə èlâsɛ̃´, à nʼâ lwə̀l mó bə̀: swénénə nə́ swéné dwã. Rə̀myɛ́ də̀ nyí nándùl à nʼâ kɛ̃ à la ába pɔ yé. Wɔ́ nyí rí nándwə́l lé nə́ nɔ kùr-ju yi ní ga mɔ́. ⁶Nyí rí tɛ̀bɛ́ á nyɛ̀ɛ̀ kùr-ju yi ní ga mɔ́ nʼê wə̀lə̀: “Swénénə dwã.” E zɛ̃̀ á gə só dwã, wɔ́ Yi nyə́ né á nʼá zwẽ.

⁷Lyì sú lũ w wẽ́, bə̀ tʼâ zwẽ nyí bə̀ Yezu Kristə jǐrh numbyíní zhə̀n ga yé, sə lyì bí bə̀myɛ́ mɔ́ wɔ́ kɔ̀mdɛ̀, bə jʼà wɔ́ Kristə zwə̀. ⁸Dɛ̃̌na á cìnə̀, á bə̀kʼá ce nə́ tum dí yə̀ tùm-fóó yé, mùnì á nə á kwândɛ́ gakó.

⁹Lò mɔ̀bɔ́ ǹ tá ǹ yâl ń zhì nà èdù yó Kristə kàrmɔ́ wẽ́, ń zɛ̃̀ ǹ nə́ ǹ súlí kɔn dõ né, Yi tɛ̀nɛ́ ǹ wẽ́ yé. Sə lò mɔ̀bɔ́ ǹ zhǐ nà èdù yó Kristə kàrmɔ́ wẽ́, Da mɔ́ ǹdə́ Byǐ mú ga ŋwɛ́nɛ́ ǹ wẽ́. ¹⁰Lò gə bàn á sõ, e jʼà də̀ kàrmɔ́ mə̀myɛ́ ń mə́ ń bànà, sʼá bə̀kʼá zwẽ ń zhəəle yé, á bə̀kʼá ce mo náàcɛ̀nɛ́ myɛ cìcì yé. ¹¹Lò ǹ gə co mo náàcɛ̀nɛ́, ǹ twə́r ŋwɛ́nɛ́ ń lwɛlɛ rɛ́ wẽ́.

¹²Ywẽ̀ nánzhəzhɔ̌ gwẽ̌ ŋwɛ́nɛ́ à la ába byilu, sə à tʼâ yâl a kɛ̃ nɛ sɛ́bɛ́ wẽ́ a pə ába yé. À nʼâ bùl bʼà mʼa bə̀ á sõ, nə́ jòm tɛ̃´ nə́ zɔ̀m, mùnì ga nə́ wun yə̀ nyɛ̀n námpúm.

¹³Ǹ ná-bə̀kɔ́ mɔ́ Yi cír mó byâ bɛ́ nʼê ce mó.