2 Kɔrɛ̃tɛ

Pwəə sábá nə̀lyè nyân dɛ́ ń kɛ̃ n pə

Kɔrɛ̃tɛ

Kristə-lyì bí ni mú

Pwəə gə́ kɛ̃ ń sɛ́bɛ́ rɛ́ bə̀ nʼê byẽ̀ bə̀ “Sɛ́bɛ́ nã́yéé ré ń kɛ̃ n pə Kɔrɛ̃tɛ Kristə-lyì bí ni mú” kwã nɛ́, n zhǐr n vò bə̀ sõ, sə ń yə̀ jíjírhí yé. Ń gə́ yú gàà yi ní, bə̀ jàlà yə̀ shɛ̀nɛ́ bə zwẽ ń zɔ̀mà nɛ́ yé. Rə̀myɛ́ zhìlì ńmyɛ̌ ǹdə́ Kɔrɛ̃tɛ Kristə-lyì bí dwã bɛ́ wun ni.

N zɛ̃̀ n zhǐr gàà n lyɛ̃ n vò Efɛɛzɛ; ń yà ń zhì gàà mɔ́ n kɛ̃ sɛ́bɛ́ dõ n pə Titi ni ń la vò n pə Kɔrɛ̃tɛ Kristə-lyì bí ni. Ń zɔ̀m n pə lyì bí byɛ̀bɛ́ bə̀ bə ń zɔ̀mà nɛ́ só mó ne dɛ̃´dɛ̃´ sɛ́bɛ́ rɛ́ rə̀myɛ́ wẽ́. Titi gə́ yà ń zə sɛ́bɛ́ rɛ́ ń mə́ ń la yi ní, Pwəə wu yʼà bə jě yé, ce ń yà ń nə́ ń dɛ̃̀ sə Titi ká n bà, mùnì n lwar kɔn dɛ̀bɛ́ rə̀ ŋwɛ́nɛ́. Sə Titi gə́ ká n bà, ń byili Pwəə ne bə̀ Kɔrɛ̃tɛ Kristə-lyì bí shɛ̀nɛ́ bə zwẽ kɔn dɛ̀bɛ́ ń kɛ̃ n byili bi mú nyí.

Rə̀myɛ́ kwã nɛ́, Pwəə zɛ̃̀ n kə́ n kɛ̃ sɛ́bɛ́ rɛ́ tɛ̀bɛ́ èta mɔ́ n pə bɛ, n ce Yi nə̀bán rə̀ gə́ nʼê zal nə́ wun ni nɔ̀nɔ̀ dwí gakó wẽ́ mó yilə. Sə wɔ́ Kristə cìcì ń cír mo ń wɔ́ ń tùntúm. Rə̀myɛ́ ce ń zhe wu-jɔ̀ twéé gakó nɔ̀nɔ̀ w wẽ́ (1.1–5.10).

Rə̀myɛ́ kwã nɛ́, ń byili bi Yi gə́ tó Kristə dɛnnɛ rə kwɛrhɛ nə́ yò ǹdə́ rə̀ cìcì ní, n zɛ̃̀ n byili bə̀ bə̀kʼa wɛ̀rhɛ́ ǹdə lyì byɛ̀bɛ́ bə̀ yə̀ Yi ni zhí ta yé (5.11–7.1). N zɛ̃̀ n zɔ̀m wársɛ́ shɛ̀bɛ́ bə̀ yʼà nʼê lɛ bə̀ la dwã yó co bə vò bə pə Zhərəzalɛm Kristə-lyì bí ni mú yò. N lwə̀l bè, bə̀ bə̀ pə bə̀ jɛ̃̀-kɔn dɛ́ ǹdə́ bə̀ wun gakó (8.1–9.15).

Rə̀myɛ́ kwã nɛ́, n zɛ̃̀ n zɔ̀m zɔ̀mà nyɛ̀bɛ́ nə̀ cɛ̀ dɛ̃´dɛ̃´ n pə lyì bí byɛ̀bɛ́ bə̀ nʼê wə̀l bə̀ ń də̀ Kristə tùntúm zhə̀n zhə̀n ga mɔ́ nɛ. N tə̀ rə̀myɛ́ yil n zɔ̀m kɔn dɛ̀bɛ́ rə̀ nʼê byili bə̀ ń wɔ́ Kristə tùntúm pamparɛ̃ɛ̃ mɔ́ n byili (10.1–12.21).

Pwəə nə́ ń ce Kɔrɛ̃tɛ Kristə-lyì bí

¹Àmyɛ́ Pwəə à wɔ́ Yezu Kristə tùntúm ǹdə Yi gə́ nʼê yâl nɛ́. Wɔ́ àmyɛ́ ǹdə́ nə́ da-byǐ Timote nə́ rʼé kɛ̃ sɛ́bɛ́ rɛ́ tɛ̀bɛ́ nə́ la Yi gùlú w lyì bí bə̀ ŋwɛ́nɛ́ Kɔrɛ̃tɛ nɛ́ mɔ́ nɛ pɔ. È də̀ ámyɛ̌ dúdú yé. Wɔ́ ǹdə́ Yi lyì bí byɛ̀bɛ́ gakó bə̀ ŋwɛ́nɛ́ Akəyi tənà y púlə́púlə́ wẽ́ mó. ²Nə́ Da Yi ǹdə́ Cinu Yezu Kristə bʼa cĩ́ bwəl á yó, sə bə pə ába yə̀-zùlə́!

Pwəə nə́ ń ce Yi nə̀báná

³Bànà nə́ cèrhé nə́ Cinu Yezu Kristə Da Yi rí! Ń wɔ́ nə́ Da ǹdə́ nə́ Yi. Ń zhe wu-bɔ̀nɔ̀ dɛ̃´dɛ̃´. Ń nə́ ń pɛ nə́ba wu-jɔ̀ twéé twéé. ⁴Ń nə́ ń zal nə́ wun ni zwini dwí gakó wẽ́, mùnì ga nə́myɛ ŋwɛ̀nɛ́ nə́ zə lyì byɛ̀bɛ́ bə̀ ŋwɛ́nɛ́ zwini dwí gakó wẽ́ mó wun ni ǹdə́ wu-jɔ̀ w kɔ̀bɔ́ Yi nʼê pɛ nə́ba mɔ́. ⁵Nə́ rʼé nɛ wu-jɔ̀ dɛ̃´dɛ̃´ Kristə jàn yilə, ǹdə nə́ gə́ nʼé tó mo nə́ nwɛ̀nɛ̀ dɛ̃´dɛ̃´ nɛ́. ⁶Sə nə́ gə́ nʼé nwɛ̀nɛ̀ èta mɔ́, wɔ́ á wun ni zal ǹdʼá vwârh yilə. Nə́ gə́ nɔ wu-jɔ̀ mɔ́, wɔ́ mùnì ga nə́ zə ámyɛ wun ni, á ŋwɛ̀nɛ́ á pyɛ́nɛ́ á zhì kẽkẽ á nɔ̀nɔ̀ w wẽ́ ǹdə nə́myɛ ta. ⁷Nə́ yě náàcɛ̀nɛ́ bʼâ gə́ nʼá tó á nwɛ̀nɛ̀ mɔ́ ce, á bʼâ tó á nə wu-jɔ̀ w myɛ.

⁸Da-byâ, nə́ rʼé yâl bʼâ lwar bə̀ nə́ nwɛ̀nɛ̀ dɛ̃´dɛ̃´ Azhi tənà y wa. Nɔ̀nɔ̀ w kɔ̀bɔ́ nə́ nɔ gàà mɔ́ yʼà du nə́ jàn. Nə́ yʼà nʼê bùl bə̀ nə́ mʼâ cì. ⁹Nə́ yʼâ nʼé bùl bə̀ bə̀ kɔ́ nə́ bùrsì bə̀ la nə́ba gu. Rə̀myɛ́ ce, nə́ yʼâ kʼé bə nə́ cìcì zhə̀n zhe yé. Wɔ́ Yi zhə̀n nə́ yʼâ zhe, bə̀ rə̀myɛ́ nʼê bwìrhì cùùrì. ¹⁰Wɔ́ rə̀myɛ́ rə̀ zwẽ nə́ba cu jɔ̃̀ w rə̀myɛ́ yi ní, sə rə̀ gwẽ̌ bʼa zwẽ nə́ba. Zhə̀nà, nə́ yě náàcɛ̀nɛ́ bə̀ rə̀ gwẽ̌ bʼa zwẽ nə́ba. ¹¹Ámyɛ nʼá sɛ̃ nə́ba ǹdə́ Yi lwə̂l. Èta, lyì nánzhəzhɔ̌ Yi-co jàn yilə, Yi bʼa wɛ̀rhɛ́ nə́ba cɛ̀nɛ̀, sə nunə nánzhəzhɔ̌ mʼa tó rə̀myɛ́ dɛnnɛ bə ce Yi nə̀bán nə́ yilə.

Pwəə nə́ ń byili kɔn dɛ́ dɛ̀bɛ́ rə̀ ce n lyə́r ń sɔ́má y zhəl mó mó

¹²Kɔn dɛ̀bɛ́ rə̀ nʼê pɛ nə́ba wu-nyɔ̃̀ mɔ́, wɔ́ nə́ gə́ pwèlè nə́ wun nə́ zə nə́ cìn lũ w wẽ́ ǹdə́ cɛ̀nɛ̀ ǹdə́ zhə̀n dɛ́ tɛ̀bɛ́ rə̀ nʼê shí Yi sono mó. Sə kɔn du, wɔ́ nə́ gə́ nʼé wɛ̀rhɛ́ èta ǹdʼámyɛ mɔ́. Rə̀myɛ́ wɔ́ Yi pɛnɛ́, sə è də̀ numbyíní surhə tum yé. ^13-14Nə́ yə̀ kɔn dõ nə́ sábá wẽ́ kɛ̃ nə́ pə ába yé. Wɔ́ tɛ̀bɛ́ á nʼá kàrmə̀ á nyɛ̌ rə̀ kùr mó dúdú, sə à nʼâ bùl bʼâ mʼâ jʼá sú rə̀ gakó kùr náàcɛ̀nɛ́. Èlâsɛ̃´, á nyɛ̌ rə̀ kùr námpɔ́lɛ́, sə dɛ̃ rɛ́ tɛ̀bɛ́ Cinu Yezu ká ń bàn mɔ́ yùwə̀, á wun bʼa yə̀ nyɛ̀n ǹdə́ nə́ba, sə nə́myɛ wun bʼa yə̀ nyɛ̀n ǹdʼámyɛ.

^15-16Wɔ́ à gə́ yʼà yě rə̀myɛ́ pamparɛ̃ɛ̃ mɔ́ è ce à yʼà nʼâ yâl a jɛ̀rɛ̀ a tó á sono, sʼa zhì á sono a lyɛ̃ a vò Masɛdwanɛ; à gə shí gàà mɔ́, sʼa kʼa tó á sono, mùnì ga á wun kwɛrhɛ nə zə nyɛ̀n nə súlí, sə á sɛ̃ nɛ a lyɛ̃ a yí Zhide. ¹⁷À gə́ byili bʼà la rə̀myɛ́ wɔ̀rhɔ́ mɔ́, à yə̀ tɛ́rɛ́ a mʼa byili ri nà? Nà a gə gu à wẽ́ à la kɔn wɔ̀rhɔ́, a gə zɛ̃̀ a wɔ̀ bə̀ “ɔ̃̀ɔ̃̂”, a kʼa wɔ̀ bə̀ “ɔ̃́ʼɔ̃”, wɔ́ numbyíní pùbùlə̀ tum nà? ¹⁸Yi wɔ́ à zhə̀n-cí. Rə̀ cìcì yě bə̀ kɔn dɛ̀bɛ́ à byili mú də̀ wò à wò bə̀ “ɔ̃̀ɔ̃̂” a jʼa kʼa wɔ̀ bə̀ “ɔ̃́ʼɔ̃” myɛ yé. ¹⁹Àmyɛ́ ǹdə́ Shəlaasɛ ǹdə́ Timote gə́ bwə̀l Yi Byǐ Yezu Kristə yò w nə́ byili ába mó, rə̀ yə̀ “ɔ̃̀ɔ̃̂” yàl rə kʼa yə́yɛ́lɛ́ rə yə̀ “ɔ̃́ʼɔ̃” yé. Ń zɔ̀mà nɛ́ yàl “ɔ̃̀ɔ̃̂” twéé twéé yilə.

²⁰Zhə̀nà, Yezu zɔ̀mà nɛ́ wɔ́ “ɔ̃̀ɔ̃̂” Yi nyə́ né rə̀ bwəl mó gakó yilə. Wɔ́ ńmyɛ̌ dɛnnɛ nə́ rʼé tó né nə́ cèrhé Yi nə́ wɔ̀ bə̀: “Amɛ̀n”. ²¹Wɔ́ Yi cìcì rə̀ nʼê súlí nə́myɛ̌ ǹdʼámyɛ̌ ga jàn Kristə jàn yilə. Wɔ́ rə̀myɛ́ rə̀ cír nə́ba rə cĩ́ nə́ dúdú rə̀ cìcì yilə. ²²Rə cĩ́ rə̀ myɔrhɔ nə́ yó, rə jɛ̀rɛ̀ rə ce rə̀ Eshirhə y nə́ wun ní wẽ́, rə mʼe byili bə̀ rə̀ bʼa pə nə́ba kɔn dɛ̀bɛ́ gakó rə̀ bwəl nə́ba rə̀ nyí mú.

²³Zhə̀n zhə̀nà, Yi wɔ́ à zhə̀n-cí. À gə gòm kɔma, sʼa cì! Wɔ́ à gə́ tʼâ yâl a zhìlì á wun ni mú è ce, à kʼa yə̀ kwɛ̃̀ a bə̀ Kɔrɛ̃tɛ yé. ²⁴Á zhí Yi ni kẽkẽ, nə́ zɛ̃̀ nə́ rʼé yâl nə́ mù dwã nɛ ǹdʼába nə́ pyà á wu-nyɔ̃̀, sʼe də̀ yál nə́ rʼé yâl nə́ byili ába á Yi-ni-zhú mú gə́ mə̂ sə mə yə̀ nɛ́ yé.

¹Wɔ́ rə̀myɛ́ è ce, à gu à wẽ́ à kʼâ yə̀ á sõ tó, mùnì ga à bə̀kʼa zhìlì á wun ni kə́dò yé. ²Àmyɛ́ gə zhìlì á wun ni, wɔ́ mɔ̌ ń mà n pɛ̃ wu-nyɔ̃̀? Wɔ́ ámyɛ̌ byɛ̀bɛ́ à zhìlì á wun ni mú á yʼâ mə̂ sʼá pɛ̃ wu-nyɔ̃̀. ³Wɔ́ rə̀myɛ́ è ce, à byili ába sɛ́bɛ́ rɛ́ tɛ̀bɛ́ à jɛ̀rɛ̀ a kɛ̃ a pə ába mɔ́ wẽ́, bə̀ nyǐ à tʼâ yâl a bə̀ á sõ mùnì byɛ̀bɛ́ bə̀ yʼà mə̂ sə bə pɛ̃ wu-nyɔ̃̀ mɔ́ wun bə̀kʼa zhìlì yé. Zhə̀nà, à yě pamparɛ̃ɛ̃ bʼà wu gə nyɛ̀, ámyɛ wun bʼa yə̀ nyɛ̀n. ⁴Zhə̀nà, wɔ́ wu-zhìlù nánfɔ̀lɔ̀ ǹdə́ yə́-nàná à mʼa kɛ̃ sɛ́bɛ́ rɛ́ rə̀myɛ́, sʼe jà à yə̀ rɛ kɛ̃ à la mʼa zhìlì á wun ni yé. À kɛ̃ dɛ a pə ába mùnì á lwar bʼà só ába dɛ̃´dɛ̃´.

Pwəə nə́ ń cící Kɔrɛ̃tɛ lyì bí bə̀ bə̀ mə̂ sə bə pə mɔ̀bɔ́ ń dó mó sǔbri

⁵Lò mó mɔ̀bɔ́ ń ce wu-zhìlù w ŋwɛ́nɛ́ mɔ́, è də̀ à dúdú wu ni ń zhìlì yé. Wɔ́ á gakó. Sə à tʼâ yâl a wɔ̀ bə̀ wɔ́ á gakó á wun zhìlì yé. Wɔ́ á jàlà wun nə̀ zhìlì. ⁶Sə lyì nánzhəzhɔ̌ gə́ pɔ mɔ còrhò-tum mú, rə̀myɛ dúdú já. ⁷Rə̀myɛ́ ce, á mə̂ sʼá pɔ̃ sǔbri èlâsɛ̃´, sʼá cící mu. È gə də̀ rə̀myɛ́, ń wu gə zhìlì ò lyɛ̃ cɛ nɛ, ń wu wɔ̌ ò gɛ. ⁸Wɔ́ rə̀myɛ́ è ce à nʼâ lwə̀l ába, sʼá ce n lwar bʼâ só mo.

⁹À kɛ̃ sɛ́bɛ́ rɛ́ a pə ába à la bʼa dwẽ́ ába, a nyǐ ǹdʼá gə bʼâ zwẽ kɔn dɛ̀bɛ́ gakó à byili ába mó. ¹⁰Mɔ̀bɔ́ á pɔ mɔ sǔbri mú, àmyɛ nʼâ pɛ mɔ sǔbri. À gə mə̂ sʼa pə sǔbri lò nè, à gə pɔ mɔ, wɔ́ ámyɛ̌ yil à pɔ mɔ sǔbri Kristə yé né. ¹¹Èta mɔ́, Shətana tʼâ la bɔ̀l nɔ è zù nə́ bwə̂l w yé. Zhə̀nà, nə́ yě è surhə né gə́ wɔ́ nɛ́ náàcɛ̀nɛ́.

Pwəə nə́ ń byili kɔn dɛ́ dɛ̀bɛ́ rə̀ yʼà ce n zhǐr Tərəwaasɛ nɛ́

¹²À gə́ yú Tərəwaasɛ à la Kristə yò-ècɔ̀nɔ̀ nyí rí bwə̂l mó, à pwírí Cinu yà ń pul sɔ́má n pɛ̃ mùnì a ŋwɛ̀nɛ́ a twĩ̀ gàà. ¹³Sə à gə́ yə̀ à da-byǐ Titi nɛ mɔ́ ce, à wu yə̀ nyɛ̀n yàl yé. Wɔ́ rə̀myɛ́ è ce a kʼa zhǐr gàà a vò Masɛdwanɛ.

Kristə nə́ ń tó nə́ dɛnnɛ ń byili bə̀ ń jú bɛlɛ

¹⁴Cèrhénə nə́ cèrhé Yi, bə̀ rə̀ tó Kristə mó ń jú bɛlɛ mɔ́ dɛnnɛ rə sɛ̃ nə́ba nə́ ŋwɛ́nɛ́ Kristə mó ńmyɛ̌ mə̀dù y kwã nɛ́ twéé twéé. Rə̀ nʼê tó nə́ dɛnnɛ rə ce ń pár lwar mɔ́ sáa jààsɛ́ gakó wə, ǹdə lwẽ́ nã́nyə̀nyɛ̀lɛ́ ta. ¹⁵Zhə̀nà, nə́ wɔ́ ǹdə lwẽ́ nã́nyə̀nyɛ̀lɛ́ ta Kristə nə́ ń pɛ Yi ni. Lwẽ́ dé rə̀myɛ́ wɔ́ byɛ̀bɛ́ Yi nʼê vwârh mɔ́ ǹdə́ byɛ̀bɛ́ bə̀ yò nʼô yâl o zhìlì mú yilə. ¹⁶Sə lwẽ́ dé rə̀myɛ́ mɔ́ wɔ́ cu lwẽ́, rə̀ nʼê twí ǹdə́ cu byɛ̀bɛ́ bə̀ yò nʼô zhìlì mú yilə. Rə zɛ̃̀ rə̀ wɔ́ nyǔ lwẽ́ rə̀ nʼê pɛ nyǔ byɛ̀bɛ́ Yi nʼê vwârh mɔ́ nɛ. Sə è nə wɔ́ mɔ̌ ń wɔ̌ ń mà n twĩ̀ tum dí rə̀myɛ́? ¹⁷Nə́myɛ̌ də̀ ǹdə lyì nánzhəzhɔ̌ byɛ̀bɛ́ bə̀ nʼê zə Yi zɔ̀mɛ̀ rɛ́ bə̀ dɔ̌l mɔ́ ta yé. Nə́myɛ̌ wɔ́ Yi rə̀ twĩ̀ nə́ba nə́ rʼé byili rə̀ zɔ̀mɛ̀ rɛ́ ǹdə́ wu-põ rə̀ yé né, Kristə jàn yilə.

Dɔbrɛ́ nándùl lé nyí rí bwə̂l

¹Nə́ gə́ zɔ̀m èta mɔ́, á zɛ̃̀ á nʼá bùl bə̀ wɔ́ nə́ cìn nə́ kʼé ji kùr nə́ rʼé zhẽ̌ dɛ̃̌ náá etəra? Ráá nə́ mə̂ sə nə́ zə sábá nə́ bʼě byili ába mùnì ga á lwar bə̀ nə́ wɔ́ Kristə tùntúmə́, ráá ámyɛ mə̂ sʼá pə nə́ba sábá mùnì ga lyì bí lwar bə́ nə́ wɔ́ Kristə tùntúmə́, ǹdə lyì jàlà gə́ nʼê wɛ̀rhɛ́ nɛ́? ²Wɔ́ ámyɛ̌ cìcì á wɔ́ nə́ sɛ́bɛ́, rə̀ kɛ̃ nə́ wun ní wẽ́; lyì bí gakó wɔ̌ bə̀ lwar rə̀ párá bə kàrmə̀. ³Bə̀ lwar pamparɛ̃ɛ̃ bʼâ wɔ́ sɛ́bɛ́ Kristə cìcì kɛ̃ nə́ zə nə́ mʼé bà, sə è də̀ numbyíní è kɛ̃ sɛ́bɛ́ rɛ́ rə̀myɛ́ zɔ̀mà nɛ́ yé. Wɔ́ Yi nã́nyì y Eshirhə y è kɛ̃ nɛ. Nə̀ yə̀ kɛ̃ nə́kuuli yó yé. Wɔ́ numbyínsi wun wẽ́ nə̀ kɛ̃ nɛ́.

⁴Nə́ rʼé tó Kristə dɛnnɛ nə́ zɔ̀m èta ǹdə́ zhə̀n dɛ́ tɛ̀bɛ́ nə́ zhe ǹdə́ Yi mú. ⁵È də̀ búl nə́ rʼé bùl bə̀ nə́ wɔ̌ kɔn nə́ la wɔ̀rhɔ́ ǹdə́ nə́ sə̀pwà jàn yé. Nə́ ŋwɔ̀nɔ́ w wɔ́ Yi sõ ò nʼô shí ní, ⁶bə̀ wɔ́ rə̀myɛ́ rə̀ ce nə́ ŋwɛ̀nɛ́ nə́ jǐrh rə̀ tùntùnnə̀ nə́ rʼé bwə̀l dɔbrɛ́ nándùl lé nyí rí nə́ byili. Dɔbrɛ́ nándùl lé rə̀myɛ́ nʼê shí Eshirhə náàcɛ̀nɛ́ sõ. Rə̀ tʼâ shí nyə́ né nə̀ kɛ̃ nə́kuulí yó mó wẽ́ yé. Nyə́ né nə̀ kɛ̃ mɔ́ nʼê zə cu nə̀ twí, sə Eshirhə y nʼê pɛ nyǔ.

⁷Muyiisi yà ń nə́ ń bwə̀l nyə́ né zɔ̀mà nɛ́ nə̀ kɛ̃ nə́kuulí yó mó, sə nə̀ yʼà nʼê zə cu nə̀ twí. Ǹdə́ rə̀myɛ́ ga, tum dí rə̀myɛ́ mɔ́ yʼà nʼê byili Yi zùwə́ yə́. Rə̀ zùwə́ y èmyɛ́ yʼà nʼê ce Muyiisi yé y jə́jɛ̀mɛ́. Rə̀myɛ́ ce, Esərayɛl lyì bí yʼà kʼê kwàl ń yé y bə̀ nʼê nyǐ yé. È jə́jɔ̀mɔ́ mɔ́ jʼà yʼà tʼâ dɛnɛ yé, ⁸sə zùwə́ y kɛ̀bɛ́ Eshirhə náàcɛ̀nɛ́ tum dí nʼê pɛ mɔ́ já dɛ̃´dɛ̃´ du. ⁹Nyə́ né nyɛ̀bɛ́ nə̀ yʼà nʼê zə cu nə̀ twí mú bwə̂l e byili mú gə yʼà nʼê ce nə̀ bwə̀lnə̀ mó nə zùwə́, sə́ nyǐ Eshirhə y è nʼê ce nə́ kʼé bə dwə́ə́re zhe mó bwə̀lnə̀ bé nə zùwə́ nánfɔ̀lɔ̀ du. ¹⁰Zùwə́ y kɛ̀bɛ́ è ŋwɛ́nɛ́ èlâsɛ̃´ mɔ́ du shãã ga nyâ yá. Rə̀myɛ́ ce shãã ga nyâ y kʼê bə kùr zhe yé. ¹¹Kɔn dɛ̀bɛ́ rə̀ tʼâ dɛnɛ rə̀ mʼê jé mó gə zhe zùwə́, sə́ nyǐ tɛ̀bɛ́ rə̀ jʼâ ŋwɛ́nɛ́ gaga mɔ́ zhe zùwə́ du.

¹²Nə́ gə́ nʼé dɛ̃̀ Yi nyì-bwelé y pyǐrh mó ce nə́ zhe wu-jɔ̀. ¹³Nə́ tʼâ wɛ̀rhɛ́ ǹdə Muyiisi ta yé. Ń yà ń nə́ ń zə kàmə̀-jɛ̃̀ ń mə́ ń círhí ń yé ne, mùnì ga Esərayɛl lyì bí bə̀kʼa nə ń yé y jə́jɔ̀mɔ́ mɔ́ gə́ la nɛ́ zhɔ̌ yé, e jʼà tʼâ dɛnɛ yé. ¹⁴Sə bə̀ surhə né yʼà pyi. Zà zà myɛ gwẽ̌ wɔ́ èta. Bə̀ gə nʼê kàrmə̀ dɔbrɛ́ nándwə́l lé sɛ́bɛ́ rɛ́, kàmə̀-jɛ̃̀ y èmyɛ́ cìcì mú nʼê pyi bə̀ surhə né. Lò mɔ̀bɔ́ ń zù Kristə, wɔ́ ńmyɛ̌ dúdú surhə né kàmə̀-jɛ̃̀ y èmyɛ́ tʼâ pyi yé.

¹⁵Zà zà gwẽ̌, bə̀ gə nʼê kàrmə̀ Muyiisi sábá nɛ́, kàmə̀-jɛ̃̀ gwẽ̌ nʼê pyi bə̀ wun ní. ¹⁶Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Lò mɔ̀bɔ́ ǹ pyìrhí ǹ wu ń zù Cinu, kàmə̀-jɛ̃̀ y nʼê púrə́.” ¹⁷Nyɔ̀nɔ̀, bə̀ gə wò bə̀ Cinu, wɔ́ ń Eshirhə y yò bə̀ nʼê zɔ̀mà, sə Cinu Eshirhə y gə ŋwɛ́nɛ́ mə̀gã̌, cìn-cìnú ŋwɛ́nɛ́ gàà. ¹⁸Nə́myɛ̌ byɛ̀bɛ́ gakó kàmə̀-jɛ̃̀ y yə̀ nə́ yésé ne círhí mú, nə́ rʼé nɛ Cinu zùwə́ y ǹdə lò gə́ nə́ ń nyǐ ń cìn zhèzhé wẽ́ ta. Ńmyɛ̌ mɔ̀bɔ́ ń wɔ́ Eshirhə mó ce nə́ rʼé nɛ zùwə́ dɛ̃´dɛ̃´. Èta, nə́ zɛ̃̀ nə́ nyɛrhɛ ń cìcì.

Nə́ nyɛ̌ ǹdə dɔ nə̀zhẽ̌ ta Yi co rə̀ pɛnɛ́ y nə́ wẽ́

¹Wɔ́ Yi gə́ wɔ́ nɔ̀nɔ̀-dǔr cə́bal mɔ́ è ce rə pə nə́ba tum dí rə̀myɛ́. Rə̀myɛ́ yilə, nə́ wun tʼâ gɛ yé. ²Nə́ zhɔ̃̀ tùntwə̃̀ə̃̀ né nyɛ̀bɛ́ gakó nə̀ wɔ́ cìzhìl nyə̀ná bə̀ nʼê shèè bə̀ twĩ̀ mú. Nə́ tʼá wɛ̀rhɛ́ yǔyǔ yé, nə́ tʼá lyə́r Yi zɔ̀mɛ̀ rɛ́ rə̀ gùlí kɔma nɛ yé. Nə́myɛ̌ gaga mɔ́ nʼé byili rə̀ zhə̀n dɛ́ pamparɛ̃ɛ̃, mùnì ga lò gakó tó ń wu-cəl lé dɛnnɛ n lwar bə̀ nə́ wɔ́ zhə̀n-cìnə́ Yi yé né. ³Sə yò-ècɔ̀nɔ̀ nyí rí nə́ rʼé bwə̀l mó gə shèè, wɔ́ lyì byɛ̀bɛ́ bə̀ yò la zhìlù mú yil rə̀ shèè. ⁴Bə̀ yə̀ Yi ni zhí yé, bə̀ lũ w kɔ̀bɔ́ lwɛlɛ cə́bal mɔ́ pyi bə̀ surhə né, bə zɛ̃̀ bə̀ kʼê bə yò-ècɔ̀nɔ̀ nyí rí pwẽ̀ dé nɛ yé. Yò-ècɔ̀nɔ̀ nyí rí rə̀myɛ́ nʼê byili Kristə mó ń wɔ́ Yi nyɔrhɔ mɔ́ zùwə́ yə́. ⁵Nə́myɛ̌ də̀ nə́ cìcì yò nə́ rʼé bwə̀l nə́ byili yé. Wɔ́ Yezu Kristə ń wɔ́ Cinu mú nə́ rʼé bwə̀lə̀. Nə́myɛ̌ zɛ̃̀ nə́ rʼé byili bə̀ nə́ wɔ́ á tùntùnnə̀ ńmyɛ̌ yil yilə. ⁶Yi rí tɛ̀bɛ́ rə̀ wò bə̀ pwẽ̀ yə̂r cə-byṹ wẽ́ mó, wɔ́ rə̀myɛ́ cìcì rə̀ zə rə̀ pwẽ̀ dé rə yə̂r nə́ wun ní, rə ce nə́ wɔ̌ nə́ rʼé nɛ rə̀ zùwə́ y è nʼê jə́jɛ̀mɛ́ Kristə yé-zwã̌ w mɔ́.

⁷Sə nə́myɛ̌ byɛ̀bɛ́ nə́ zhe Yi pɛnɛ́ y nánfwɛ̀lɛ̀ y èmyɛ́ mɔ́, nə́ nyɛ̌ ǹdə dɔ nə̀zhẽ̌ ta Yi co rə̀ pɛnɛ́ y nə́ wẽ́, rə mʼe byili bə̀ wɔ́ rə̀ jàn dɛ́ nánfɔ̀lɔ̀ w ò ŋwɛ́nɛ́ ǹdə́ nə́ba, sə è də̀ nə́ sə̀pwà jàn yé. ⁸Lyì bí nʼê jí zùùrì dwí gakó ǹdə́ nə́ba, sə bə̀ tʼâ ŋwɛ̀nɛ́ nə́ba yé. Yò-cə̀ə̀lè nʼê zal nə́ba, sə nə́ wun tʼâ gɛ yé. ⁹Bə̀ nʼê nwɛ̀nɛ̀ nə́ba, sə Yi tʼâ yẽ̌ nə́ba yé. Bə̀ nʼê zal nə́ba bə̀ fwàl tɛ̃´, sə rə̀myɛ́ tʼâ gwi nə́ba yé. ¹⁰Yezu cu mú nɔ̀nɔ̀ w dɛ̃ nə́ba nə́ mʼé zhə̀l twéé twéé, mùnì bə nə ń nyǔ mú myɛ nə́ yala nɛ́ wẽ́. ¹¹Nə́ ŋwɛ́nɛ́ lũ ní, sə ǹdə́ rə̀myɛ́ ga, nə́ nyɛ̌ ǹdə wɔ́ cu nyí ni nə́ zhǐ ní dɛ̃ gakó Yezu yil ta. Kɔn wɔ́ èta mùnì ga bə ŋwɛ̀nɛ́ bə nə ń nyǔ mú myɛ nə́ yala nɛ́ nə̀ la cú mú wẽ́. ¹²Èta, cu mú nʼê twĩ̀ mə̀ tum nə́myɛ̌ wẽ́; nyǔ mú zɛ̃̀ mə̀ nʼê twĩ̀ mə̀ tum ámyɛ̌ wẽ́.

¹³Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “À zwẽ nyí. Wɔ́ rə̀myɛ́ yil à zɔ̀m.” Nə́myɛ wɔ́ èta. Nə́ rʼé zwẽ nyí. Wɔ́ rə̀myɛ́ yil nə́ rʼé zɔ̀mà. ¹⁴Zhə̀nà, nə́ yě bə̀ mɔ̀bɔ́ ń bwìrhì Cinu Yezu mú mà n súlí n bwìrhì nə́myɛ, sə nə́myɛ̌ ǹdʼámyɛ̌ ga bʼâ du nə́ zhì Yezu yala nɛ. ¹⁵Wɔ́ ámyɛ̌ yil rə̀myɛ́ gakó la wɔ̀rhɔ́, mùnì ga Yi yò-ècɔ̀nɔ̀ w jʼâ nʼô yí lyì nánjə̀jóló. Èta, á mʼâ yə̀ nánzhəzhɔ̌ á mù dwã nɛ á ce Yi nə̀báná, sʼá cèrhé re.

Wɔ́ nə́ Yi-ni-zhú mú yil nə́ ŋwɛ́nɛ́

¹⁶Wɔ́ rə̀myɛ́ è ce, nə́ wun tʼâ gɛ gaga yé. Bá nə́ yala nɛ́ jàn dɛ́ gə nʼê bɔ̀ námpɔ́lɛ́ námpɔ́lɛ́ myɛ, nə́ yě nə́ wẽ́ bə̀ nə́ yò nʼô kwɛrhɛ ǹdə́ Yi twéé twéé. ¹⁷Zhə̀nà, èlâsɛ̃´ mɔ́, nɔ̀nɔ̀ zhe nə́ba námpɔ́lɛ́, sə ò tʼâ la dɔnɔ yé. Nɔ̀nɔ̀ w òmyɛ́ bʼa ce nə́ nə zùwə́ nánfɔ̀lɔ̀ è tʼâ la zhɔ̌, sə zùwə́ y nə́ la nɔ mɔ́ bʼa dwini nɔ̀nɔ̀ w kɔ̀bɔ́ nə́ rʼé nwɛ̀nɛ̀ èlâsɛ̃´ mɔ́ dɛ̃´dɛ̃´. ¹⁸Nə́myɛ̌ tʼá pyà kɔn dɛ̀bɛ́ yírhə́ wɔ̌ nə̀ nɛ yé. Wɔ́ dɛ̀bɛ́ yírhə́ wàr nə̀ nɛ mɔ́ nə́ rʼé pyà, bə̀ dɛ̀bɛ́ yírhə́ nə mɔ́ bəbwâ cɔ̌ yé, sə dɛ̀bɛ́ yírhə́ bə nɛ mɔ́ tʼâ cɔ̀ gaga yé.

¹Nə́ yě myɛ bə̀ nə́ cɛ yó yala nɛ́ nyɛ̌ ǹdə wɔ́ kòrhó wẽ́ nə́ ŋwɛ́nɛ́ ta. Nə́ yě bə̀, kòrhó w òmyɛ́ gə cɔ̀ myɛ, Yi cìcì lù jì rə cĩ́ nə́ba dɛ̃̌ Arəzana wa, sə jì y èmyɛ́ tʼâ la wǔr gaga yé, bə̀ è də̀ numbyínsi jɛ̃̀ tum yé. ²Wɔ́ rə̀myɛ́ è ce, nə́ rʼé kúrh nə́ yala nɛ́ nə̀ wɔ́ kòrhó w mɔ́ wẽ́, nə́ rʼé yâl ǹdə́ nə́ wun gakó nə́ zù nə́ jì y Arəzana w mɔ́ ǹdə kàmə̀-zwǐ ta. ³Bə̀ nə́ gə zù jì y èmyɛ́ ǹdə kàmə̀-zwǐ ta, nə́ kʼé tʼá la nánlwə̀rh yál Yi yé né yé.

⁴Zhə̀nà, nə́ gə́ ŋwɛ́nɛ́ nə́ cɛ yó kòrhó w wẽ́ mó ce, nə́ wun zhìlì, nə́ rʼé kúrh ǹdə wɔ́ zhĩĩ tɛ̀bɛ́ rə̀ dùm nə́ zhĩ ta. Sə rə̀myɛ́ tʼâ yâl e byili bə̀ nə́ rʼé yâl nə́ dùr nə́ yẽ̌ nə́ cɛ yó yala nɛ́ nɛ yé. Wɔ́ yál nə́ rʼé yâl nə́ zù Arəzana yala nɛ́ ǹdə kàmə̀-zwǐ ta, mùnì ga nə́ yala nɛ́ nə̀ rʼê cì mú zù nyǔ mú mə̀ tʼâ la zhɔ̌ mɔ́ wẽ́. ⁵Wɔ́ Yi cìcì rə̀ kwɛrhɛ nə́ba rə ce nə́ rʼé dɛ̃̀ kɔn dɛ́ rə̀myɛ́ mɔ́, rə ce rə̀ Eshirhə y só nə́ yó wə. Wɔ́ èmyɛ́ è ce nə́ yě bə̀ nə́ bʼâ nə kɔn dɛ́ dɛ̀bɛ́ gakó Yi byili bə̀ rə̀ la nə́ba pɔ mɔ́.

⁶Wɔ́ rə̀myɛ́ è ce, nə́ zhǐ kẽkẽ ǹdə́ wu-jɔ̀ twéé twéé. Nə́ yě bə̀, nə́ gə́ gwẽ̌ ŋwɛ́nɛ́ ǹdə́ nə́ yala nɛ́ mɔ́, nə́ gwẽ̌ tɛ̀nɛ́ Cinu sõ yé. ⁷Sə wɔ́ nə́ Yi-ni-zhú mú yil nə́ ŋwɛ́nɛ́, è də̀ nə́ yírhə́ nə̀ nə kɔn yil yé. ⁸Zhə̀nà, nə́ zhǐ kẽkẽ ǹdə́ wu-jɔ̀, sə tɛ̀bɛ́ nə́ yʼâ mʼâ swéné du mú, wɔ́ nə́ gə yʼâ zhǐr nə́ yẽ̌ nə́ cɛ yó yala nɛ́ nɛ, nə́ vò nə́ jòm Cinu yala nɛ, rə̀myɛ́ yʼà cɔ̃̀. ⁹Sə ǹdə́ rə̀myɛ́ ga, nə́ gə ŋwɛ́nɛ́ ǹdə́ nə́ yala nɛ́ myɛ, ráá nə́ gə zhǐr nə́ yẽ̌ ne myɛ, nə́myɛ̌ wírí nə́ tùntwĩ̀ĩ̀ sú Cinu yírh, wɔ́ rə̀myɛ́ nə́ rʼé pyà du. ¹⁰Lò ǹ gə wɛ̀rhɛ́ cɛ̀nɛ̀ ráá lwɛlɛ ǹdə́ ǹ cɛ yó yala nɛ́ ǹdə́ ǹ gwẽ̌ ŋwɛ́nɛ́ lũ ní myɛ, kɔn wɔ́ nyɔ́ɔ́ bə̀ nə́ gakó zhǐ Kristə yé né, n bùr nə́ bùrsì. Rə̀myɛ́ yó, lò gakó bʼâ nə tɛ̀bɛ́ rə̀ mə̂ dwã ǹdə́ ǹ tùntwə̃̀ə̃̀ né mó.

Yi kwɛrhɛ nə́ yò ǹdə́ rə̀ cìcì Kristə jàn yilə

¹¹Bə̀ gə wò bə̀ lò nə́ ń nyàm Cinu, nə́myɛ̌ yě zɔ̀mɛ̀ rɛ́ rə̀myɛ́ mɔ́ gə́ nʼê yâl rə wɔ̀ nɛ́. Wɔ́ rə̀myɛ́ è ce nə́ rʼé ce jàn nɛ́ nə́ byili lyì bí ni mùnì ga bə nyɛ̀ɛ̀ nə́ zɔ̀mà nɛ́ kùrə̀. Yi yě nə́ gə́ wɔ́ nɛ́ pamparɛ̃ɛ̃, sə à nʼâ bùl bʼâmyɛ yě à gə́ wɔ́ nɛ́ mɔ́ pamparɛ̃ɛ̃. ¹²È də̀ yál nə́ kʼé nʼé yâl nə́ zhẽ̌ nə́ cìn dɛ̃̌ á yé né yé. Wɔ́ sɔ́má nə́ rʼé yâl nə́ pul nə́ pə ába, mùnì ga á wun yə̀ nyɛ̀n ǹdə́ nə́ba. Èta, á bʼâ ŋwɛ̀nɛ́ á lyár byɛ̀bɛ́ bə̀ nʼê zhẽ̌ bə̀ cìn dɛ̃̌ wẽ̀ dé tɛ̀bɛ́ numbyínsi yírhə́ nə mɔ́ yilə, bə̀ twə́r jʼà tɛ̀nɛ́ ǹdə́ tɛ̀bɛ́ rə̀ wɔ wu w wẽ́ mó. ¹³Nə́myɛ̌ gə wɔ́ ǹdə nyə̀nyə̀rh ta myɛ, wɔ́ Yi yilə, sə nə́ gə zhe surhə, wɔ́ ámyɛ̌ yilə. ¹⁴Kristə sónó w cǐ nə́ba, bə̀ nə́ yě pamparɛ̃ɛ̃ bə̀ lò mə̀dù cù lyì bí gakó yilə, sə rə̀myɛ́ nʼê byili bə̀ bə̀ gakó tó mo bə cì. ¹⁵Ń cù lyì bí gakó yilə, mùnì ga byɛ̀bɛ́ bə̀ ŋwɛ́nɛ́ mɔ́ bə̀kʼa kʼe yə̀ nɛ́ bə̀ cìn yil yé, sə bə yə̀ nɛ́ mɔ̀bɔ́ ń cù n ká n bwìrhì bə̀ yil mó yilə.

¹⁶Wɔ́ rə̀myɛ́ è ce, nə́ kʼé tʼá nyǐ lò lò ǹdə́ numbyíní surhə yé. Nə́ gə yʼâ nʼé nyǐ Kristə shãã ga èta myɛ, èlâsɛ̃´, nə́ kʼé tʼá nyǐ mu ǹdə nə́ gə́ yě né yé. ¹⁷Èta, lò mɔ̀bɔ́ ń zù Kristə, ń jǐrh lyì-dùl. Tùntwə̃̀ə̃̀ nándwə́lə́ né jé; e jǐrh tùntwə̃̀ə̃̀ nándùlə̀ nə̀ ŋwɛ́nɛ́. ¹⁸Sə rə̀myɛ́ gakó wɔ́ Yi sõ rə̀ nʼê shí ní, rə̀myɛ́ rə̀ kwɛrhɛ nə́ yò ǹdə́ rə̀ cìcì Yezu Kristə jàn yilə, sə rə̀ pɔ nə́ba nyí bə̀ nə́ bwə̂l nə́ byili lyì bí dwã bɛ́ nɛ, bə̀ rə̀ nʼê yâl rə kwɛrhɛ bə̀ yò ǹdə́ rə̀ cìcì. ¹⁹Yi kwɛrhɛ lũ w lyì bí yò ǹdə́ rə̀ cìcì Kristə jàn yilə, rə zə bə̀ dwə́ə́ré rə cɛ̃´ bɛ. Sə rə̀ pɔ rə̀ zɔ̀mɛ̀ rɛ́ nə́myɛ̌ nɛ bə̀ nə́ bwə̂l nə́ byili lyì bí ni, bə̀ rə̀ nʼê yâl rə kwɛrhɛ bə̀ yò ǹdə́ rə̀ cìcì.

²⁰Zhə̀n zhə̀nà, nə́myɛ̌ wɔ́ Kristə nyì-zwennə. Wɔ́ Yi rə̀ tó nə́ dɛnnɛ rə̀ nʼê lwə̀l ába dɛ̃´dɛ̃´ Kristə yil lé yilə: yẽ̌nə rə kwɛrhɛ á yò ǹdə́ rə̀ cìcì. ²¹Kristə yə̀ yə̀-bəlɔ̀lɔ́ wɛ̀rhɛ́ gaga yé, sə Yi zwẽ nə́ yə̀-bəlwàálɛ́ rə cĩ́ ń yó wə, mùnì ga rə tó ń dɛnnɛ rə ce nə́ bə̀kʼá kʼé zə dwə́ə́re yé.

¹Nə́myɛ̌ byɛ̀bɛ́ nə́ rʼé tó Yi ni nə́ twĩ̀ mú nʼé lwə̀l ába: bə̀kʼá shɛ̀nɛ́ pansɛ́ Yi pɔ ába mɔ́ yə̀ nánfò yé. ²Bə̀ kɛ̃ Yi zɔ̀mɛ̀ rɛ́ sɛ́bɛ́ ré wẽ́ bə̀ Yi wòwə̀:

“Yi rí tɛ̀bɛ́ à só mó gə́ tú e yí, à zwẽ ǹ lwə̂l mó;

vwârh mɔ́ dɛ̃ rɛ́ gə́ tú e yí, à tú a sɛ̃ mɔ́.”

Nyǐnə, yi rí yúwə́; nyǐnə, dɛ̃ rɛ́ tɛ̀bɛ́ á mə̂ sʼá nə vwârh mɔ́ yúwə́.

³Nə́ rʼé dɛ̃̀ nə́ cìnə̀, mùnì ga lò lò bə̀ká ń tu tɛ̃´, bə zɛ̃̀ bə tó rə̀myɛ́ dɛnnɛ bə zɔ̀m nə́ sõ nə́ tum dí shò-kwã nɛ́ yé. ⁴Nə́ rʼé byili kɔn gakó wẽ́ bə̀ nə́ wɔ́ Yi tùntùnnə̀. Nə́ rʼé pyɛ́nɛ́ nə́ cìn yò-cə̀ə̀lè ǹdə́ zwini ǹdə́ nɔ̀nɔ̀ dwí gakó wẽ́. ⁵Bə̀ nʼê mà nə́ba; bə̀ nʼê ce nə́ba byə̀nə́-jù wə̀; bə́ nʼê ce lyì bí zɛ̃̀ búlə́ ne ǹdə́ nə́ba; bə̀ nʼê ce nə́ twĩ̀ tùm-kùlə̀; nə́ tʼá dɛ̀ɛ̀ nə́ swí yé; nə́ tʼá jí nə́ swí yé. ⁶Nə́ wɔ́ wu-põ cìnə́; nə́ yě Yi zhə̀n dɛ́; nə́ zhe cìn-pyɔ́nɔ́; nə́ zhe wu-bɔ̀nɔ̀; Eshirhə náàcɛ̀nɛ́ ŋwɛ́nɛ́ ǹdə́ nə́ba; nə́ zhe sónó zhə̀n zhə̀nà. ⁷Yi nʼê pɛ nə́ba jàn nə́ mʼé bwə̀l zhə̀n dé nə́ byili. Cángá nyə̀ná nɛ́ nə̀ wɔ́ nə́ búlə́ wẽ̀ nə́ mʼé bwí nə́ jʼâ mʼé cə̀r nə́ cìn yé ne. ⁸Bə̀ nʼê cèrhé nə́ba, bə̀ jʼà nʼê ce nə́ba cìzhìlə̀. Bə̀ nʼê zɔ̀m nə́ yil náàcɛ̀nɛ́, bə̀ jʼà nʼê zhìlì nə́ yilə. Bə̀ nʼê nyǐ nə́ba ǹdə kɔ̀mdɛ̀ ta, e jà wɔ́ zhə̀n nə́ rʼé zɔ̀mà. ⁹Bə̀ nʼê wɛ̀rhɛ́ ǹdə bə̀ yə̀l nə́ pár ta, lyì bí gakó jʼà yě nə́ pár náàcɛ̀nɛ́. Bə̀ nʼê nyǐ nə́ba ǹdə cùùrì ta, nə́ jʼâ yə̀ cì yé. Bə̀ pɔ nə́ba còrhò-tum, sə bə̀ yə̀ nə́ba gwi yé. ¹⁰Bə̀ nʼê nyǐ nə́ba ǹdə lyì byɛ̀bɛ́ bə̀ wun zhìlì ta, nə́ wun jʼà nyɛ̀ twéé twéé. Bə̀ nʼê nyǐ nə́ba ǹdə nə̀mwà ta, e jà lyì nánzhəzhɔ̌ tó nə́ dɛnnɛ bə jǐrh nə̀cɛ̀nà. Bə̀ nʼê nyǐ nə́ba ǹdə nə́ bə kaka zhe ta, e jà nə́ zhe kɔn gakó.

¹¹Da-byâ Kɔrɛ̃tɛ lyì, nə́ pul nə́ wun nə́ zɔ̀m ǹdʼába pamparɛ̃ɛ̃. ¹²Nə́ yə̀ kaka shèè nə́ wẽ́ yé. Wɔ́ ámyɛ̌ á yə̀ á wun ní pul ǹdə́ nə́ba yé. ¹³À nʼâ zɔ̀m ǹdʼába ǹdə lò gə́ nə́ ń zɔ̀m ǹdə́ ń byâ nɛ́. Wɛ̀rhɛ́na ǹdə nə́myɛ ta: pulnə á wun ní pamparɛ̃ɛ̃ ǹdə́ nə́ba.

Nə́ bə̀kʼá wɛ̀rhɛ́ ǹdə lyì byɛ̀bɛ́ bə̀ yə̀ Kristə zwì ta yé

¹⁴Á bə̀kʼá tó lyì byɛ̀bɛ́ bə̀ yə̀ Yi ni zhí ni á wɛ̀rhɛ́ ǹdə bə̀ ta yé. Kɔn dɛ̀bɛ́ rə̀ wɔ́ cángá ǹdə́ dɛ̀bɛ́ rə̀ də̀ cángá wɔ̌ rə̀ bʼa tó dwã? Pwẽ̀ ǹdə́ cə-byín wɔ̌ rə̀ zhə̀l ǹdə́ dwã? ¹⁵Kristə ǹdə́ Shətana nyí wɔ̌ è mʼa yə̀ rə̀dù? Ráá lò mɔ̀bɔ́ ń zù Kristə ǹdə́ mɔ̀bɔ́ ń yə̀ Kristə zwì tùntwĩ̀ĩ̀ wɔ̌ è yàl rə̀dù? ¹⁶Yi jì y ǹdə́ wẽ̀ tɛ̀bɛ́ rə̀ də̀ Yi mú jààsɛ́ wɔ̌ è yàl rə̀dù? Nə́myɛ̌ wɔ́ Yi nã́nyì y jì. Yi cìcì wòwə̀:

“À bʼa yə̀ nɛ́ ǹdə́ bɛ a tó be à nʼâ zhə̀lə̀,

a yə̀ bə̀ Yi, sə bə̀ mʼa yə̀ à lyì.”

¹⁷Wɔ́ rə̀myɛ́ yil Cinu kə́ n wɔ̀:

“Dunə á yẽ̌ be, á vò á jòm kwã nɛ́.

Á bə̀kʼá dwə̀rh kɔn dɛ̀bɛ́ rə̀ zhe jìmdì yé.

Rə̀myɛ́ yi ní, à mʼa zwẽ ába.

¹⁸À mʼa yə̀ á Da,

sə ámyɛ mʼâ yə̀ à byâ ǹdə́ à bə̀kwá.

Wɔ́ Cinu jàn-bə-swɛ̃´-zhe cə́bal mɔ́ ń zɔ̀m èta.”

¹À lyì nántwə̂rh, nyə́ né nyɛ̀bɛ́ Yi bwəl èta mɔ́ gakó zhe kùr nə́ yilə. Wɔ́ rə̀myɛ́ è ce, nə́ mə̂ sə nə́ kwɛrhɛ kɔn dɛ̀bɛ́ gakó rə̀ nʼê pɛ jìmdì nə́ yala nɛ́ ǹdə́ nə́ ywə́lsé ne mó yò ǹdə́ Yi, sə nə́ zɛ̃̀ nə́ ce jàn nɛ́ nə́ yə̀ náàcɛ̀nà námpúm nə́ wɛ̀rhɛ́ Yi pùbùlə̀.

Pwəə nə́ ń byili bə̀ ń wu nyɛ̀ Kɔrɛ̃tɛ Kristə-lyì bí yilə

²Pulnə á wun ní ǹdə́ nə́ba, bə̀ nə́ yə̀ lò lò gwar yé, nə́ yə̀ lò lò Yi-ni-zhú cɔ̀ yé, nə́ yə̀ lò lò kɔn zwẽ nə́ jí yé. ³À tʼâ zɔ̀m èta à la mʼa cĩ́ yò á yó w yé. À jɛ̀rɛ̀ a byili bə̀ nyǐ nə́ só ába dɛ̃´dɛ̃´; è gə wɔ́ cu myɛ, nə́ ŋwɛ́nɛ́ ǹdə́ dwã; è gə də̀ cu myɛ, nə́ ŋwɛ́nɛ́ ǹdə́ dwã twéé twéé. ⁴À zhe á zhə̀n námpúm; à só á yò dɛ̃´dɛ̃´. À wu zɔ kẽkẽ; à wu nyɛ̀ dɛ̃´dɛ̃´ nə́ yò-cə̀ə̀lè ga yírh wə.

⁵Zhə̀nà, nə́ gə́ tú nə́ yí Masɛdwanɛ nə́ zhɛ̀, nə́ yə̀ shìrhə́ nɛ gaga yé. Nə́ nɔ zwini dwí gakó: lyì pyà zɔ̀mà nə́ nyí ni, ywẽ myɛ yʼà zhe nə́ba. ⁶Sə Yi nʼê swẽ́ wu-zhìlù cìnə́ wun ni. Rə̀ tó Titi twírí y dɛnnɛ rə swẽ́ nə́myɛ wun ni. ⁷È də̀ ń twírí y dúdú yil nə́ wun swẽ́ yé. Ń byili nə́ba myɛ bʼâ zɔ ń wu ni. Wɔ́ rə̀myɛ́ gakó rə̀ swẽ́ nə́ wun ní. Ń byili myɛ bʼâ nʼá yâl á nə nɛ ǹdʼá wun gakó. Ń zɔ̀m á wu-zhìlù w yò n byili nə́ba; n byili myɛ bʼâ só à yò dɛ̃´dɛ̃´ èlâsɛ̃´. Rə̀myɛ́ ce à wu zɛ̃̀ o kwɛrhɛ ò nyɛ̀.

⁸Sɛ́bɛ́ rɛ́ dõ mó à kɛ̃ a pə ába mɔ́ gə zhìlì á wun ni myɛ, à tʼâ gá rə̀myɛ́ nɛ kə́dò yé. Á gə́ nɔ rɛ yi ní, rə̀ yʼà zhìlì á wun ni námpɔ́lɛ́. Wɔ́ rə̀myɛ́ yó à yʼà nʼâ gá nɛ́. ⁹Sə èlâsɛ̃´, à wu nyɛ̀. Sə è də̀ á wun ní gə́ zhìlì yil à wu nyɛ̀ yé. Wɔ́ á wu-zhìlù w gə́ ce á wun kʼa pyìrhí mú yilə. Wɔ́ wu-zhìlù w òmyɛ́ dwí rí ò nʼô tó ǹdə Yi pùbùlə̀ né gə́ nʼê yâl nɛ́. Rə̀myɛ́ nʼê byili bə̀ nə́ yə̀ lwɛlɛ wɛ̀rhɛ́ á mə̀dù ga nɛ yé. ¹⁰Zhə̀nà, wu-zhìlù w òmyɛ́ dwí rí tʼâ yàl kɔn nánfò numbyíní yil yé. Ò nʼô ce è wu pyìrhí e nə vwârh. Sə wu-zhìlù kɔ̀bɔ́ ò nʼô tó ǹdə lũ w pùbùlə̀ né gə́ nʼê yâl nɛ́ mɔ́, òmyɛ́ nʼô zə numbyíní ò zhə̀l è cu sɔ́má yó. ¹¹Á wu-zhìlù w tó ǹdə Yi pùbùlə̀ né gə́ nʼê yâl nɛ́ zhə̀n zhə̀nà. Wɔ́ rə̀myɛ́ rə̀ co yə̀wâl á wẽ́ á pú á lwar làlà bʼâ dówə́. Á wun zhìlì, ywẽ zə ába; á zɛ̃̀ á nʼá yâl á nə nɛ; á jʼâ nʼá yâl á pə còrhò-tum mɔ̀bɔ́ ń dó mó myɛ nɛ ǹdʼá wun gakó. Zhə̀nà, á tó rə̀myɛ́ gakó dɛnnɛ á byili bə̀ dóó dwí-byǐ yə̀ ába gùlí yé.

¹²È də̀ lò mó mɔ̀bɔ́ ń dó mó yil à kɛ̃ sɛ́bɛ́ rɛ́ yé, e jʼà kʼê də̀ mɔ̀bɔ́ bə̀ dó mo mó myɛ yil yé. À kɛ̃ dɛ mùnì a byili Yi yé né bə̀ nyǐ á shɛ̀nɛ́ á zwẽ nyí, á nʼá ce jàn nɛ́ á twĩ̀ nə́ yilə. ¹³Wɔ́ rə̀myɛ́ è ce nə́ wun swẽ́.

È də̀ rə̀myɛ́ dúdú rə̀ swẽ́ nə́ wun ni yé. Á gə́ zɔ Titi wu ni, ń wu yə̀ nyɛ̀n mɔ́, súlí e pə nə́ba wu-nyɔ̃̀ nánfɔ̀lɔ̀. ¹⁴Zhə̀nà, à byili Titi ni bə̀ nyǐ à wu nyɛ̀ dɛ̃´dɛ̃´ ǹdʼába. Sə á yə̀ nɛ̀ cìzhìl pɛ yé. Nə́ rʼé zɔ̀m zhə̀n nə́ byili ába twéé twéé. Rə̀myɛ́ ce à zhe bwìrì a mʼa byili Titi ni bə̀ nyǐ à wu nyɛ̀ dɛ̃´dɛ̃´ á yilə. ¹⁵Titi gə lyǐrh á gə́ zwẽ mo á sono ǹdə́ ywẽ ǹdʼá nʼá kəkə, á gakó zɛ̃̀ á shɛ̀nɛ́ á zwẽ nyí mú, ń wu kwɛrhɛ o nyɛ̀ ǹdʼába. ¹⁶À wu nyɛ̀ dɛ̃´dɛ̃´ bʼà nʼâ nyǐ á yó w kɔn gakó wẽ́.

Pwəə nə́ ń byili Kɔrɛ̃tɛ Kristə-lyì bí ni bə̀ bə̀ mə̂ sə bə sɛ̃ bə̀ da-byâ bɛ́ Zhərəzalɛm nɛ́ mɔ́ nɛ

¹Da-byâ, nə́ rʼé yâl nə́ byili ába yò-ècɔ̀nɔ̀ w kɔ̀bɔ́ Yi wɛ̀rhɛ́ Masɛdwanɛ Kristə-lyì gùúlí ni mú. ²Zwini zɔ bɛ dɛ̃´dɛ̃´, sə ǹdə́ rə̀myɛ́ ga, bə̀ wun yàl nyɛ̀n dɛ̃´dɛ̃´. Bə̀ wɔ́ nə̀mwà, sə ǹdə́ rə̀myɛ́ ga, bə̀ pɔ bə̀ jɛ̃̀-kɔn dɛ̃´dɛ̃´ ǹdə́ bə̀ wun gakó. ³Bə̀ pɔ ǹdə bə̀myɛ gə́ zhe né; bə̀ gaga mɔ́ pɔ kɔn dwini bə̀ gə́ zhe né. Àmyɛ́ cìcì mú nɔ bə̀ gə́ pɔ nɛ́ ǹdə́ à yírh: bə̀ pɔ ǹdə́ bə̀ sə̀pwà pùbùlə̀. ⁴Bə̀ lwə̀l nə́ba ǹdə́ bə̀ wun gakó bə̀ nə́ zwẽ bə̀ pansɛ́, nə́ vò nə́ pə Zhərəzalɛm nɛ́ bə mʼe sɛ̃ Kristə-lyì bí ni. ⁵Bə̀ jɛ̀rɛ̀ bə pə bə̀ cìn Cinu ni, fòró bə zɛ̃̀ bə pə bə̀ cìn nə́myɛ nɛ ǹdə Yi gə́ nʼê yâl nɛ́. Bə̀ pɔ bə̀ cìn dɛ̃´dɛ̃´ kɔn lyɛ̃ nə́ gə́ yʼâ nʼé bùl né. ⁶Nə́ lwə̀l Titi bə̀ ń já n twĩ̀ nɔ̀nɔ̀-dǔr tum dí tɛ̀bɛ́ ń ju rə̀ kùr á sõ Zhərəzalɛm lyì bí yil mó, n báásɛ. ⁷Á zhí Kristə ne ǹdʼá wun gakó, á mʼá nʼá wɛ̀rhɛ́ kɔn gakó cɛ̀nɛ̀: á nʼá bwə̀l Yi zɔ̀mɛ̀ rɛ́ cɛ̀nɛ̀, á yě zhə̀n dɛ́ gə́ wɔ́ nɛ́, á zhe yə̀wâl, á só nə́ba. Rə̀myɛ́ gakó wɔ́ nə̀cɛ̀ndɛ̀ nánfɔ̀lɔ̀ á zhe. Sə nə́ rʼé yâl sʼá ce jàn nɛ́ á zə yə̀wâl ǹdə́ nɔ̀nɔ̀-dǔr tum dí rə̀myɛ́ mɔ́ myɛ.

⁸È də̀ nyí à nʼâ pɛ ába yé. Wɔ́ yál à nʼâ yâl bʼâmyɛ zə yə̀wâl ǹdə Kristə-lyì gùúlí dwã bɛ́ ta, mùnì ga á byili bʼâ zhe sónó zhə̀nà. ⁹Á yě nə́ Cinu Yezu Kristə gə́ só nə́ba nɛ́. Ń yà ń zhe kɔn gakó, sə ń shɛ̀nɛ́ n zə ń cìn n yə̀ nə̀mɔ̀ ámyɛ̌ yilə, mùnì n tó nə̀mɔ̀ɔ̀rɛ́ rə̀myɛ́ dɛnnɛ n ce á jǐrh nə̀cɛ̀nà.

^10-11Wɔ́ kɔn dɛ̀bɛ́ à nʼâ bùl yò w òmyɛ́ shò-kwã nɛ́ mɔ́ à nʼâ byili ába. Wɔ́ ámyɛ̌ á tó yé á tɛ́rɛ́ tum dí rə̀myɛ́ yò jẽ̀ nè ga, á jʼâ jɛ̀rɛ̀ lyì bí gakó á twĩ̀ dì. Èlâsɛ̃´, cə̀ə̀lènə̀ á nʼá twĩ̀ tum dí rə̀myɛ́ ǹdʼá wun gakó, á pə kɔn dɛ̀bɛ́ á zhe mó kɔn tó ǹdə á gə́ ju kùr á bù ní. Wɔ́ rə̀myɛ́ rə̀ wɔ́ kɔn dɛ̀bɛ́ rə̀ zhe kùr á yilə. ¹²Lò gə nə́ ǹ pɛ kɔn dɛ̀bɛ́ ǹ zhe ǹdə́ ǹ pùbùlə̀, Yi nʼê zwẽ de. È də̀ tɛ̀bɛ́ ǹ bə zhe mó rə̀ nʼê yí Yi pùbùlə̀ yé. Wɔ́ tɛ̀bɛ́ ǹ zhe ń pə rɛ mɔ́ rə̀ nʼê yí rə̀ pùbùlə̀.

¹³È də̀ yál à nʼâ yâl bʼâ kwě kɔn dɛ̀bɛ́ á zhe mó gakó á bʼá sɛ̃ lyì dwã nɛ, ámyɛ̌ zɛ̃̀ á jǐrh zúzúnú cìnə́ yé. Wɔ́ yál à nʼâ yâl bʼâmyɛ̌ ǹdə́ bə̀myɛ́ ga myɛrhɛ dwã. ¹⁴Èlâsɛ̃´, ámyɛ̌ gə́ zhe dɛ̃´dɛ̃´ mɔ́ ce, á wɔ̌ á mʼâ sɛ̃ byɛ̀bɛ́ bə̀ bə kaka zhe mó ne. Èta, ámyɛ gə tú á kʼá bə kaka zhe, ǹdə́ bə̀myɛ gə zhe dɛ̃´dɛ̃´, bə̀ wɔ̌ bə̀ mʼa sɛ̃ ámyɛ nɛ. Èta, á gakó bʼâ myɛrhɛ dwã. ¹⁵Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Lò mɔ̀bɔ́ ń yà ń pwà kùjú dɛ̃´dɛ̃´ myɛ, ò myɛrhɛ ǹdə́ ń jú. Lò mɔ̀bɔ́ ń yà ń kə́ ń pwà námpɔ́lɛ́ myɛ, ò yə̀ ń jú mwìrì yé.”

¹⁶À nʼâ ce Yi nə̀báná, bə̀ wɔ́ rə̀myɛ́ rə̀ co yə̀wâl Titi wẽ́ ń nə́ ń yâl n sɛ̃ ába ǹdə àmyɛ ta. ¹⁷Titi shɛ̀nɛ́ kɔn dɛ́ dɛ̀bɛ́ nə́ lwə̀l mò mó nyí. Ń zwẽ nyí ǹdə́ ń sə̀pwà pùbùlə̀ ń bàn á sõ ǹdə́ ń wu gakó. ¹⁸Sə nə́ bʼâ ce nə́ da-byǐ mə̀dù tó mo ń bà. Nə́ da-byǐ mú ńmyɛ̌ mɔ́ nə́ ń bwə̀l yò-ècɔ̀nɔ̀ nyí rí ǹdə́ yə̀wâl, ce Kristə-lyì gùúlí nʼê zɔ̀m ń yil náàcɛ̀nɛ́. ¹⁹Wɔ́ gùúlí lyì bí bə̀ súlí bə cír mo ń la nə́ba tó nə́ zə pansɛ́ nə́ mʼé vò nə́ pə Zhərəzalɛm Kristə-lyì bí ni. Wɔ́ tum dí rə̀myɛ́ nə́ rʼé twĩ̀ nə́ mʼé sɛ̃ lyì bí dwã bɛ́ nɛ Cinu yil lé còrhó yilə.

²⁰Bə̀ pɔ nə́ba wársɛ dɛ̃´dɛ̃´ sə nə́ bʼâ nyǐ sə̀ yò cɛ̀nɛ̀. Wɔ́ rə̀myɛ́ è ce nə́ tʼá yâl sə bə tó sə̀ dɛnnɛ bə zhìlì nə́ yil yé. ²¹Nə́ rʼé pyà sə nə́ twĩ̀ cɛ̀nɛ̀. È bə̀kʼa yə̀ Cinu dúdú yírh w yé. Nə́ rʼé pyà sə nə́ twĩ̀ cɛ̀nɛ̀ numbyínsi myɛ yírh wə.

²²Nə́ ce nə́ da-byǐ dõ la bɛ tó ń bà. Ń zhe dwã nɛ sãɔ̃ tum dí yə̀wâl. Nə́ cìcì mú nɔ rə̀myɛ́ twər nánzhəzhɔ̌ ǹdə́ nə́ yírhə́. Ń gə́ zɛ̃̀ ń zhe á zhə̀n dɛ̃´dɛ̃´ èlâsɛ̃´ mɔ́ ce, ń gaga mɔ́ nə́ ń yâl n ce yə̀wâl nɛ́ ǹdə́ tum dí rə̀myɛ́ dwini shãã ga. ²³È gə wɔ́ Titi yilə, ńmyɛ̌ wɔ́ à tó-dõ, nə́ rʼé tó dwã nə́ twĩ̀ á yilə. Sə byɛ̀bɛ́ bə̀ tó mo bə̀ bàn mɔ́ wɔ́ Kristə-lyì gùúlí rə̀ twĩ̀ bì. Bə̀ wɔ́ lyì byɛ̀bɛ́ bə̀ nʼê twĩ̀ Kristə yil lé còrhó yilə. ²⁴Cenə bə lwar bʼâ só be zhə̀n zhə̀nà. Gùúlí lyì bí gə nyɛ̀ɛ̀ rə̀myɛ́, bə̀ mʼa lwar bə̀ nə́ gə́ byili bi bə̀ nə́ wun nyɛ̀ ǹdʼába mɔ́ wɔ́ zhə̀nà.

¹È gə wɔ́ pansɛ́ shɛ̀bɛ́ bə̀ nʼê ce dwã yó bə̀ la vò bə pə Yi lyì bí bə̀ ŋwɛ́nɛ́ Zhərəzalɛm nɛ́ mɔ́ yilə, kɔn də̀ nyɔ́ɔ́ bʼà kɛ̃ sɛ́bɛ́ a pə ába rə̀myɛ́ yil yé. ²À yě bʼâ nʼá yâl á pə zhə̀n zhə̀nà. Wɔ́ rə̀myɛ́ è ce à wu yàl nyɛ̀n a zɔ̀m á yò Masɛdwanɛ Kristə-lyì bí sono, a wɔ̀ bə̀ nyǐ Akəyi tənà y Kristə-lyì bí wɔ́ jẽ̀ nè ga bə̀ ju kùr bə̀ nʼê yâl bə pa. Á gə́ nʼá yâl á pə ǹdə́ á wun gakó mó nʼê ce yə̀wâl Kristə-lyì gùúlí lyì nánzhəzhɔ̌ wẽ́. ³Wɔ́ à gə́ jɛ̀rɛ̀ a zɔ̀m á yò mó è ce a twĩ̀ nə́ da-byâ bɛ́ á sõ, sʼá ce jàn nɛ́ á tɛnɛ, mùnì ga à gə́ zɔ̀m á yò a byili ní mú bə̀kʼa yə̀ kɔma yé. ⁴È gə də̀ rə̀myɛ́, Masɛdwanɛ Kristə-lyì bí gə tó ne bə tú á sõ, bə pwírí á yə̀ tɛnɛ á zhɛ̀, è mʼa yə̀ cìzhìl àmyɛ́ mɔ̀bɔ́ à zhe á zhə̀n mɔ́ ǹdə́ ámyɛ̌ cìcì mú ga yilə. ⁵Wɔ́ rə̀myɛ́ è ce, à pwírí kɔn mə̂ bʼà lwə̂l nə́ da-byâ bɛ́ bə tó yé bə bə̀ á sõ, mùnì á tɛnɛ pɛnɛ́ y á bwəl è nyí mú á cĩ́. Nə́ gə tú nə́ pwírí á tɛnɛ á zhɛ̀, nə́ mʼâ lwar bə̀ wɔ́ á pùbùlə̀ á mʼá pa, è də̀ lò ń nyɛ́ɛ́ ába yé.

Yi só lò mɔ̀bɔ́ ń nə́ ń pɛ ǹdə́ wu-nyɔ̃̀

⁶Kɔn rə̀dù ŋwɛ́nɛ́ á mə̂ sʼá lwar: lò mɔ̀bɔ́ ǹ dù námpɔ́lɛ́, wɔ́ námpɔ́lɛ́ ǹ yʼâ jə̀r; sə lò mɔ̀bɔ́ ǹ dù dɛ̃´dɛ̃´, wɔ́ dɛ̃´dɛ̃´ ǹ yʼâ jə̀r. ⁷Yi só lò mɔ̀bɔ́ ń nə́ ń pɛ ǹdə́ wu-nyɔ̃̀. Rə̀myɛ́ ce, kɔn dɛ̀bɛ́ lò gakó bùl ǹ wẽ́ ǹ la pɔ mɔ́, sə́ pa. Ǹ bə̀ká pə ǹdə́ wu-zhìlù ǹdə wɔ́ lò ń nə́ ń nyɛ́ɛ́ mɔ́ ta yé. ⁸Yi wɔ̌ rə̀ mʼa pə ába rə̀ pansɛ́ shɛ̀bɛ́ dwí gakó á zhe sə̀ tum mú sə yí ába dɛ̃ gakó sə dàl, á mʼá twĩ̀ tùm-ècɛ̀nà dwí gakó. ⁹Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:

“Ń nə́ ń pɛ ń kɔn nə̀mwà nɛ̀ ǹdə́ ń wu gakó;

ń tùm-ècɛ̀nà nɛ́ bə zhɔ̌ zhe yé.”

¹⁰Wɔ́ Yi rə̀ nʼê pɛ jíjí dwí vwàlnà nɛ̀ ń dwì; wɔ́ rə̀myɛ́ rə̀ nʼê pɛ nyí kùjú w myɛ. Rə̀ bʼa pə jíjí dwí ámyɛ nɛ á dù, rə ce rə lyĩ rə byì rə ce byâ nánzhəzhɔ̌. Á tùm-ècɛ̀nà nɛ́ myɛ bʼa ce byâ nánzhəzhɔ̌ èta. ¹¹Yi mʼa tó rə̀myɛ́ dɛnnɛ rə ce á jǐrh nə̀cɛ̀nà kɔn gakó wẽ́, mùnì ga á ŋwɛ̀nɛ́ á nʼá pɛ ǹdʼá wun gakó. Èta, nə́ gə zhə̀l nə́ pɔ bɛ á jɛ̃̀-kɔn dɛ́, bə̀ nánzhəzhɔ̌ bʼa ce Yi nə̀bán á yilə. ¹²Pɛnɛ́ y èmyɛ́ mɔ́ wɔ́ Zhərəzalɛm Kristə-lyì bí ni á la mʼá sɛ̃, tɛ̀bɛ́ rə̀ mwìrì bi mú yilə. Kɔn súlí myɛ, bə̀ nánzhəzhɔ̌ bʼa tó èmyɛ́ dɛnnɛ myɛ bə ce Yi nə̀báná. ¹³Kɔn dɛ́ dɛ̀bɛ́ á la bɛ pɔ èta mɔ́ zhe kùr dɛ̃´dɛ̃´. Rə̀myɛ́ nʼê byili bʼâ zhí Kristə ne ǹdʼá wun gakó yò-ècɔ̀nɔ̀ nyí rí jàn yilə. Á nʼá tó rə̀myɛ́ dɛnnɛ myɛ á byili bʼâmyɛ̌ ǹdə́ Zhərəzalɛm Kristə-lyì bí nyí wɔ́ rə̀dù, e súlí Kristə-lyì bí dwã bɛ́ gakó. Á tum dí rə̀myɛ́ mʼa ce bə cèrhé Yi. ¹⁴Sə bə̀ mʼa lwə̀l Yi á yilə, mùnì ga á lwar bə̀ bə̀ wun ní ŋwɛ́nɛ́ ǹdʼába, yò-ècɔ̀nɔ̀ w nánfɔ̀lɔ̀ w kɔ̀bɔ́ Yi wɛ̀rhɛ́ ǹdʼába mɔ́ yilə. ¹⁵Yi nə còrhó, rə̀ pɛnɛ́ y nánfɔ̀lɔ̀ w è bə dõ zhe mó yilə!

Pwəə nə́ ń byili bə̀ ń wɔ́ Kristə tùntúm zhə̀n zhə̀nà

¹Wɔ́ àmyɛ́ Pwəə à nʼâ lwə̀l ába ǹdə́ wu-bɔ̀nɔ̀ w kɔ̀bɔ́ ò nʼô shí Kristə sono. Lyì jàlà nʼê wə̀l bə̀ à gə ŋwɛ́nɛ́ á sono, à nʼâ zɔ̀m ǹdʼába ǹdə kwàlmə̀-yúrhú cə́bal ta, sə à gə kʼâ tɛ̀nɛ́ á sõ, a zɛ̃̀ à nʼâ zɔ̀m jàn. ²À nʼâ lwə̀l ába, à gə tú á sõ, sʼá bə̀kʼá pyɛ́nɛ́ nɛ á ce a zɔ̀m ǹdə́ jàn yé. À gə la jàn zɔ̌m myɛ, wɔ́ lyì bí byɛ̀bɛ́ bə̀ nʼê bùl bə̀ nə́ tùntwə̃̀ə̃̀ né wɔ́ numbyínsi nyə̀ná mɔ́ yilə. ³Zhə̀nà, nə́ wɔ́ numbyínsi, sə búlə́ né nyɛ̀bɛ́ nə́ rʼé bwí mú də̀ numbyínsi nyə̀ná yé. ⁴Búlə́ né wẽ̀ dé tɛ̀bɛ́ nə́ mʼé bwí mú myɛ də̀ numbyíní nyân yé. Wɔ́ Yi sõ rə̀ jàn dɛ́ nʼê shí ní, nə́ mʼé zhìlì kɔn dɛ̀bɛ́ gakó rə̀ tʼâ zwẽ Kristə nyí ni mú, ǹdə́ bùlə̀ nyɛ̀bɛ́ nə̀ bə kùr zhe mó yò, ⁵e súlí cìn-byilu zɔ̀mà nyɛ̀bɛ́ gakó nə̀ nʼê cə̀r lò yé ne ǹdə́ Yi pár lwar mɔ́. Nə́ rʼé yâl nə́ pyìrhí lyì bí wun ní mùnì ga bə wɛ̀rhɛ́ Kristə pùbùlə̀. ⁶Sə á gə tú á nʼá wɛ̀rhɛ́ Kristə pùbùlə̀ námpúm, rə̀myɛ́ yi ní, lò mɔ̀bɔ́ ń tá ń wɛ̀rhɛ́ Kristə pùbùlə̀ nə́ mʼâ pɔ̃ còrhò-tum.

⁷Nyǐnə, lò mɔ̀bɔ́ ǹ yě ǹ wẽ́ zhə̀n zhə̀n ga bə̀ ǹ wɔ́ Kristə lò, sə́ ce jàn nɛ́ ń lwar bə̀ nə́myɛ wɔ́ Kristə lyì ǹdə ǹ ta. Rə̀myɛ́ wɔ́ pamparɛ̃ɛ̃. ⁸Cinu pɔ nə́ba ŋwɔ̀nɔ́, sə è də̀ á yò zhìlù yil ń pɔ nə́ba w yé. Wɔ́ á yò kɔrhɔ yilə. À zɔ̀m á yil náàcɛ̀nɛ́, sə rə̀ cìzhìl bə nɛ zhe yé. ⁹À sábá nɛ́ à nʼâ kɛ̃ à pɛ ába mɔ́, è də̀ yál à nʼâ yâl a zə nɛ a ce ywẽ á wẽ́ yé. ¹⁰Lyì jàlà nʼê wə̀l bʼà sábá nɛ́ zɔ̀mà nɛ́ wɔ́ lyim nyə̀ná, bʼà zɔ̀mà nɛ́ wɔ́ nánkùlə̀. E jà à cìcì gə túwə́, a zɛ̃̀ à nʼâ zɔ̀m ǹdə nə̀bwɛ̃̀ ta; à zɔ̀mà nɛ́ cilu bə shíl zhe yé. ¹¹Lò mɔ̀bɔ́ ń nə́ ń zɔ̀m rə̀myɛ́, ń mə̂ sə n lwar bə̀ kɔn dɛ̀bɛ́ nə́ rʼé kɛ̃ sábá nɛ́ wẽ́ mó ǹdə́ tɛ̀bɛ́ nə́ rʼé twí nə́ zɔ̀m nə́ cìcì nì mú ga wɔ́ rə̀dù.

¹²Zhə̀nà, lyì jàlà ŋwɛ́nɛ́ bə̀ nʼê cèrhé bə̀ cìn dɛ̃´dɛ̃´. Nə́myɛ̌ tʼá yâl nə́ zə nə́ cìn nə́ myɛrhɛ ǹdə bə̀ ta yé. Bə̀ gə la zə bə̀ cìn bə mʼe myɛrhɛ kɔn, wɔ́ bə̀ cìcì. Kɔn tɛ̀nɛ́ bə̀ nʼê zə bə̀ cìn bə̀ myɛrhɛ ǹdə́ è də̀ bə̀ cìcì yé. Bə̀ wɔ́ lyì byɛ̀bɛ́ bə̀ bə surhə zhe yé. ¹³Sə è gə wɔ́ nə́myɛ̌ yilə, nə́ tʼá yâl nə́ zhẽ̌ nə́ cìn dɛ̃̌ nə́ lyɛ̃ nə́ swɛ̃´ yé. Yi ce nə́ bə̀ á sono. Rə byili nə́ba tum dí tɛ̀bɛ́ rə̀ pɔ nə́ba mɔ́ swɛ̃´ rɛ́. ¹⁴Nə́ gə́ tú á sõ yi ní, nə́ yə̀ tum dí twĩ̀ nə́ lyɛ̃ nə́ swɛ̃´ yé. Wɔ́ nə́myɛ̌ nə́ jɛ̀rɛ̀ nə́ zə Kristə yò-ècɔ̀nɔ̀ nyí rí nə́ yí á sono. ¹⁵Nə́ yə̀ nə́ cìn dɛ̃̌ zhẽ̌ lyì dwã tum yil yé. Sə nə́ rʼé bùl bʼâ Yi-ni-zhú mú gə́ nʼê súlí mú ce, nə́ tum dí bʼa vò yé né á cəcəl wə, sə rə̀ bə̀kʼa lyɛ̃ rə̀ swɛ̃´ yé. ¹⁶Èta, nə́ bʼâ ŋwɛ̀nɛ́ nə́ lyɛ̃ nə́ vò nə́ bwə̀l yò-ècɔ̀nɔ̀ nyí rí cɛmɛ nɛ́ dwã bɛ́ wẽ́. Nə́ tʼá yâl nə́ zù tumə nyɛ̀bɛ́ lyì dwã jɛ̀rɛ̀ bə twĩ̀ wẽ́ nə́ zhẽ̌ nə́ cìn yé.

¹⁷Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Lò mɔ̀bɔ́ ǹ nə́ ǹ yâl ń cèrhé ǹ cìnə̀, sə́ cèrhé ǹ cìn kɔn dɛ́ dɛ̀bɛ́ Cinu wɛ̀rhɛ́ mɔ́ yilə.” ¹⁸È də̀ lò mɔ̀bɔ́ ń nə́ ń cèrhé ń cìn mú ń sú Yi yírh yé. Wɔ́ mɔ̀bɔ́ Cinu nə́ ń cèrhé mó.

Dɛ̃̌na á cìn ǹdə́ byɛ̀bɛ́ bə̀ nʼê gòm kɔma bə̀ bə̀ wɔ́ Kristə tùntúmə́ mó

¹À yʼà só sʼá shɛ̀nɛ́ bʼà zɔ̀mà nɛ́ wɔ́ ǹdə nyə̀nyà zɔ̀mà ta! Zhə̀nà, shɛ̀nɛ́na! ²Á nyɛ̌ ǹdə kɛ̃-byǐ kɛ̀bɛ́ è yə̀l bal pár ta, à kwè à la byal nɛ pɔ. Byal mɔ́ ńmyɛ̌ mɔ́ wɔ́ Kristə. À só ába dɛ̃´dɛ̃´, sə sónó w kɔ̀bɔ́ à zhe ǹdʼába mɔ́ wɔ́ Yi sõ ò nʼô shí ní. ³Ywẽ zhe ne, dɛ̀ga lyì bʼa jə́jɛ̀rɛ́ ába á wun pyìrhí, á zɛ̃̀ á yẽ̌ á gə́ ju kùr á zhí Kristə ne ǹdə́ wu-põ mó ne, ǹdə Awa gə́ yẽ̌ ń cìn nì n pə dɔm mɔ́ nɛ mə jə́jɛ̀rɛ́ ǹdə́ mə̀ kɔma bɛ́ nɛ́. ⁴Lò dõ gə tú ń bwə̀l Yezu dõ, mɔ̀bɔ́ nə́myɛ̌ yə̀ bwə̀l nə́ byili ába gaga mɔ́ yò ń byili ába, á zɛ̃̀ á nʼá zwẽ nyí, ráá á shɛ̀nɛ́ á zwẽ éshìrhə́ kɛ̀bɛ́ á gwẽ̌ yə̀ zwẽ gaga. Bə̀ gə bwə̀l yò-ècɔ̀nɔ̀ nyí tɛ̀bɛ́ á gwẽ̌ yə̀ rə̀ yò nyɛ̀ɛ̀ gaga bə byili ába, á nʼá shɛ̀nɛ́ á zwẽ nyí.

⁵À tʼâ bùl bʼà yə̀ yírh swí á tùntúmə́ bé nánfwààlɛ́ kùr w yé. ⁶Dɛ̀ga, wɔ́ à nyí rə̀ wàr zɔ̀mà yé. Sə ǹdə́ rə̀myɛ́ ga, à yě kɔn dɛ̀bɛ́ à nʼâ zɔ̀m mɔ́ kùrə̀. Nə́ ce á lwar rə̀myɛ́ pamparɛ̃ɛ̃ twéé gakó kɔn dɛ̀bɛ́ nə́ wɛ̀rhɛ́ gakó wẽ́.

⁷À gə́ tú a bwə̀l Yi yò-ècɔ̀nɔ̀ nyí rí á sõ yi ní, à lwəl à cìn tɛ̃´, mùnì ga a zhẽ̌ á yó dɛ̃̌. À bwə̀l lè nánfò. À gə́ wɛ̀rhɛ́ èta mɔ́ wɔ́ dóó nà? ⁸À shɛ̀nɛ́ a yẽ̌ Kristə-lyì gùúli dwã kwɛ̃̌ nɛ. Wɔ́ bə̀myɛ́ jɛ̃̀-kɔn à zwẽ a mʼa sɛ̃ ába. ⁹À gə́ yʼà ŋwɛ́nɛ́ á sõ yi ní, à yʼà tú à zhe wɛ́rɛ́ tum, sə à yə̀ lò yó w nyǐ yé. Wɔ́ nə́ da-byâ bɛ́ bə̀ shí Masɛdwanɛ mɔ́ bə̀ sɛ̃ nɛ ǹdə́ kɔn dɛ̀bɛ́ gakó à yʼà zhe rə̀ tum mú. À zɔ à cìnə̀, mùnì à bə̀kʼa nyǐ á yó w kɔn dɛ̀bɛ́ gakó à zhe rə̀ tum yil yé. À nʼâ yâl a jʼa zhe à cìn èta twéé gakó. ¹⁰Lò lò wàr ń la nɛ cə̂r Akəyi tənà y vɔ̃̀ òdù ga wẽ́ ǹdə́ wu-nyɔ̃̀ w òmyɛ́ byilu yé. Rə̀myɛ́ wɔ́ zhə̀n à nʼâ byili Kristə jàn yilə. ¹¹À gə́ nʼâ wɛ̀rhɛ́ èta mɔ́, wɔ́ só à bə ába só? È də̀ èta yé; Yi cìcì yě bʼà só ába.

¹²À mʼa jʼâ nʼâ wɛ̀rhɛ́ kɔn dɛ̀bɛ́ à nʼâ wɛ̀rhɛ́ mɔ́ gaga, mùnì ga lyì bí byɛ̀bɛ́ bə̀ nʼê yâl bə zhẽ̌ bə̀ cìn dɛ̃̌ bə wɛ̀rhɛ́ ǹdə nə́ ta mɔ́ lyɛ̃̀ bɔ̀l. ¹³Lyì bí bə̀myɛ́ də̀ Kristə tùntúmə́ yé. Bə̀ wɔ́ tùntùnnə̀ byɛ̀bɛ́ bə̀ nyɛ̌ yǔyǔ. Bə̀ nʼê zə bə̀ cìn bə̀ yàl ǹdə Kristə tùntúmə́ ta. ¹⁴Rə̀myɛ́ tʼâ jàr lò yé, bə̀ Shətana cìcì nʼê zə è cìn è yàl ǹdə màlɛ́ka kɛ̀bɛ́ è shí pwẽ̀ wẽ́ ta. ¹⁵Rə̀myɛ́ ce, è kwã-lyì bí gə nʼê wɛ̀rhɛ́ ǹdə bə̀ tùntwə̃̀ə̃̀ né wɔ́ cángá ta, rə̀ tʼâ jàr lò yé. Sə bə̀ yó-gurə́ yə́, wɔ́ tɛ̀bɛ́ bə̀ twĩ̀ mú bə̀ mʼa na.

Pwəə nə́ ń zɔ̀m nɔ̀nɔ̀ w kɔ̀bɔ́ ò zɔ mɔ ń gə́ wɔ́ Kristə tùntúm mú yil mó yò

¹⁶À kʼa bwérhé à nʼâ wə̀l ába: bə̀kʼá bù bʼà wɔ́ nyə̀nyà yé. Á gə cẽ, sʼá nyǐ ni ǹdə nyə̀nyà ta, mùnì ga àmyɛ ŋwɛ̀nɛ́ a zhẽ̌ à cìn dɛ̃̌ námpɔ́lɛ́. ¹⁷Zhə̀nà, à tʼâ zɔ̀m ǹdə Cinu gə́ nə́ ń yâl nɛ́ yé. À nʼâ zɔ̀m ǹdə nyə̀nyà ta, mùnì ga a tó rə̀myɛ́ dɛnnɛ a zhẽ̌ à cìn dɛ̃̌. ¹⁸Lyì nánzhəzhɔ̌ ŋwɛ́nɛ́ bə̀ nʼê tó numbyínsí tùntwə̃̀ə̃̀ né dúdú dɛnnɛ bə̀ zhẽ̌ bə̀ cìn dɛ̃̌. ¹⁹Ámyɛ̌ byɛ̀bɛ́ á zhe surhə mó zɛ̃̀ á shɛ̀nɛ́ á ŋwɛ́nɛ́ ǹdə́ nyə̀nyə̀rh! ²⁰Á yẽ̌ bə̀ nʼê wɛ̀rhɛ́ ába ǹdə yómə́ ta, bə̀ nʼê myìnì ába, bə̀ nʼê zwẽ á wẽ̀ dé, bə̀ nʼê tùrh ába, bə̀ nʼê mà ába jə̀-sə̂rh! ²¹È gə wɔ́ nə́myɛ̌ yilə, nə́ yə̀ wu-jɔ̀ zal ǹdə́ rə̀myɛ́ wɔ̀rhɔ́ yé. Cìzhìl zhe ne ǹdə́ rə̀ zɔ̌m.

Ǹdə́ rə̀myɛ́ ga, kɔn gə ŋwɛ́nɛ́ lò wɔ̌ ń zhẽ̌ ń cìn rə̀ yilə, sə́ nyǐ àmyɛ wɔ̌ à zhẽ̌ à cìnə̀, bá ǹdə́ à gə nʼâ zɔ̀m ǹdə nyə̀nyà ta, ²²Bə̀ wɔ́ Ebərəbá? Àmyɛ wɔ́ Ebərə. Bə̀ wɔ́ Esərayɛl lyì? Àmyɛ wɔ́ Esərayɛl lò. Bə̀ wɔ́ Abəraham dwí rí lyì? Àmyɛ wɔ́ Abəraham dwí rí lò. ²³Bə̀ wɔ́ Kristə tùntùnnə̀? Àmyɛ́ wɔ́ Kristə tùntùnnə̀ du bi. À gə́ nʼâ byili rə̀myɛ́ mɔ́, wɔ́ zɔ́m à nʼâ zɔ̀m ǹdə nyə̀nyà ta kɔn lyɛ̃ cɛ nɛ. À twĩ̀ dɛ̃´dɛ̃´ du bi. Bə̀ co ne byə̀nə́-jù w twər nánzhəzhɔ̌ du bi. Bə̀ mà nɛ̀ dɛ̃´dɛ̃´ du bi. Twər nánzhəzhɔ̌ myɛ kɔn yʼà dàl námpɔ́lɛ́ y sə bə gu ni.

²⁴Zhwifubá zɔ nɛ bə mà dàməshɔ̀rɔ́ yírhə́ shə́-ètɔ̀ ǹdə́ nə̀bɔ́ nə̀bɔ́ kùrə̀ nə̀nu. ²⁵Orɔm lyì bí myɛ zə nɛ bə mà ǹdə́ də̀-dààlɛ̀ twər rə̀tɔ̀. Dɛ̃ rə̀dù, bə̀ yʼà zɔ nə́kuuli bə dul ne bə̀ la gu. À zù bǔ-bwəl rə gə nɛ̃̌ mɔ́ wẽ́ twər rə̀tɔ̀. Sə dɛ̃ rə̀dù, à mɛ̃ nɛ̃̌ mɔ́ wẽ́ a zɔ̃̀. ²⁶À zhə̀l jààsɛ̀ nánzhəzhɔ̌ wẽ́. À yʼà dàl námpɔ́lɛ́ y sʼa mɛ̃ bǔrh wẽ́. Èmà-byâ yʼà la nɛ gu. À da-byâ Zhwifubá ǹdə́ byɛ̀bɛ́ bə̀ də̀ Zhwifubá ga yʼà nʼê pyà à gu. Bə̀ yʼà nʼê pyà nɛ̀ cɛmɛ nɛ́ wẽ́ ǹdə́ gɔ nɛ́ bə̀ la gu. À yʼà dàl námpɔ́lɛ́ y sʼa mɛ̃ nə̀-fɔ̀lɔ̀ w wẽ́. Byɛ̀bɛ́ bə̀ nʼê gòm kɔma bə̀ bə̀ wɔ́ Kristə-lyì mú myɛ yʼà nʼê pyà à gu.

²⁷À twĩ̀ tumə nyɛ̀bɛ́ nə̀ jɛ̀, nə̀ nʼê lyɛ̀ɛ̀ numbyíní. Dədɛ̃̌nɛ, à tʼâ dɛ̀ɛ̀ yé. Nɔrh ǹdə́ nə̀nyɛ̀lsɛ̀ zɔ nɛ. Dədɛ̃̌nɛ, kɔn wɔ́ nyɔ́ɔ́ sʼa zhɛ̃̀ kùjú. Dədɛ̃̌nɛ, wàr yʼà zə nɛ, gɔ̀nɔ̀ myɛ jʼa tɛ̀nɛ́ yé. ²⁸Sə kɔn dɛ́ dɛ̀bɛ́ rə̀ yò zù nì du rə̀myɛ́ gakó mó, wɔ́ Kristə-lyì gùúlí. Wɔ́ rə̀myɛ́ yò ò zù nì dɛ̃ gakó. ²⁹Lò gə yə̀ Yi ni zhí kẽkẽ, àmyɛ yʼa yə̀ ǹdə ń ta. Lò gə tu yə̀-bəlɔ̀lɔ́ wẽ́, à wu yʼa zhìlì dɛ̃´dɛ̃´.

³⁰È gə wɔ́ cìn-dɛ̃̌-zhõ̌ yilə, wɔ́ à gə́ bə kùr zhe yil à nʼâ zhẽ̌ à cìnə̀. ³¹Nə́ Cinu Yezu Da Yi yě bə̀ wɔ́ zhə̀n à nʼâ zɔ̀mà. Ń yil lé bʼa nə còrhó twéé gakó! ³²À gə́ yʼà ŋwɛ́nɛ́ Damaasɛ nɛ́ yi ní, cɔ w yó-cə́bal mɔ́, pyɔ̌ Arətaasɛ yà ń cĩ́ gàà mɔ́, ce lyì zɛ̃̀ bə cə̀r cɔ w jààsɛ́ gakó ne, mùnì ga bə zə nɛ. ³³Rə̀myɛ́ yó, bə̀ zɛ̃̀ bə ce a zù sə́yâ wa, bə kwè nè bə tó byílí y bə̀ lù bə mʼe kə́kɛ́lɛ́ cɔ w mɔ́ túkwə́rə́ èdù, bə cĩ́ pwẽ̀ nè. Wɔ́ gàà mɔ́ à tó né a lù cɔ w cə́bal mɔ́ yé né.11.32-33 Kàrmə̀ Tùntúmə́ bé 9.23-25.

Pwəə nə́ ń yâl n zhẽ̌ ń cìn dɛ̃̌ ń bə-jàn-zhəəre yilə

¹À mə̂ sʼa zhẽ̌ à cìn dɛ̃̌, sə rə̀myɛ́ bə kùr zhe yé. E jà ǹdə́ rə̀myɛ́ ga, à mʼa byili ába kɔn dɛ̀bɛ́ Cinu byili ni, n jà n ce a lwar rə̀ pár mɔ́. ²À yě Kristə-lò mə̀dù párá. Yi kwè mò rə mʼe vò dɛ̃̌ dɛ̃̌ è zhe byinə shí ǹdə́ nə̀na. È gə wɔ́ zhə̀n zhə̀n ga Yi kwè mò rə mʼe vò dɛ̃̌, ráá wɔ́ ǹdə dàrhà ta, à yə̀l yé. Wɔ́ Yi dúdú rə̀ yě. ³Zhə̀nà, à yě bə̀ Yi kwè bal mɔ́ ńmyɛ̌ rə mʼe vò dɛ̃̌. Sə à nʼâ byili gwẽ̌, è gə wɔ́ zhə̀n zhə̀n ga Yi kwè mò rə mʼe vò, ráá wɔ́ ǹdə dàrhà ta, à yə̀l rə̀myɛ́ yé. Wɔ́ Yi dúdú rə̀ yě. ⁴Ń nyɛ̀ɛ̀ zɔ̀mà gàà, sə nə̀ də̀ kɔn dɛ̀bɛ́ numbyíní wɔ̌ è mʼa byili yé. E jʼà bə sɔ́má myɛ zhe è zɔ̀m nɛ̀ yé. ⁵È gə wɔ́ bal mɔ́ ńmyɛ̌ yilə, à mʼa zhẽ̌ à cìnə̀. Sə à tʼâ la à cìn zhõ̌ à cìcì yil yé. Ǹdə́ à gə la à cìn zhõ̌, wɔ́ à bə-jàn-zhəəré yilə. ⁶Bá à gə la à cìn dɛ̃̌ zhõ̌ myɛ, rə̀myɛ́ də̀ tum dɛ̀bɛ́ à nʼâ twĩ̀ à yə̀l rə̀ kùr yé, bə̀ wɔ́ zhə̀n à nʼâ zɔ̀mà. Sə à nʼâ dɛ̃̀ à cìn ǹdə́ cìn dɛ̃̌ zhõ̌ mó, bʼà tʼâ yâl sə lyì bí tó à tumə né ǹdə́ à zɔ̀mà nɛ́ dɛnnɛ bə bù bʼà du bi yé.

⁷Kɔn zù à yala nɛ́ wẽ́ rə̀ nʼê yì nì. Kɔn wɔ́ ǹdə wɔ́ Shətana è nʼê mà nɛ̀ ta. Kɔn dɛ́ dɛ̀bɛ́ Cinu byili ni mú zhe kùr dɛ̃´dɛ̃´. Wɔ́ rə̀myɛ́ è ce n yẽ̌ nɔ̀nɔ̀ w òmyɛ́ yí ni, mùnì ga à bə̀kʼa zhẽ̌ à cìn dɛ̃̌ kɔn dɛ́ rə̀myɛ́ yil yé. ⁸À lwə̀l mò, twər rə̀tɔ̀ gakó, sə n vùr nɔ̀nɔ̀ w òmyɛ́ à yala nɛ. ⁹Sə ń wò nè: “À gə́ só mó mó myɛ dúdú já. Wɔ́ ǹ bə-jàn-zhəəre yi ní à nʼâ ce à jàn dɛ́ yàl nɛ́ ǹdə́ mɔ́ dɛ̃´dɛ̃´.” Wɔ́ rə̀myɛ́ è ce à bʼa zhẽ̌ à cìn dɛ̃̌ à bə-jàn-zhəəre yilə, mùnì ga Kristə jàn dɛ́ yìlì nì. ¹⁰Wɔ́ rə̀myɛ́ è ce, bə-jàn-zhəəre ga, tùùrhì ga, yò-cə̀ə̀lè ga, lyì bí gə́ nʼê nwɛ̀nɛ̀ nɛ̀ mɔ́ ga, twə́lə́ né ga; à gə nʼâ nɛ rə̀myɛ́ gakó Kristə yilə, à wu nyɛ̀. Zhə̀nà, wɔ́ à bə-jàn-zhəəre yi ní à nʼâ nɛ jàn nɛ́.

Pwəə nə́ ń byili bə̀ ń nə́ ń yâl n ká n vò n byɛ́lɛ́ Kɔrɛ̃tɛ Kristə-lyì bí ni

¹¹À gə zɛ̃̀ à nʼâ zɔ̀m ǹdə nyə̀nyà ta, wɔ́ ámyɛ̌ á ce à nʼâ wɛ̀rhɛ́ èta. Bə̀ wɔ́ ámyɛ̌ á yʼâ mə̂ sʼá zwẽ à nyí ni. Bá àmyɛ́ gə də̀ kaka myɛ, byɛ̀bɛ́ á nʼá bùl bə̀ bə̀ wɔ́ Kristə tùntúmə́ nánfwààlɛ̀ mɔ́ myɛ bə nɛ du yé. ¹²À wɛ̀rhɛ́ kɔn dɛ̀bɛ́ rə̀ bʼa ce á lwar bʼà wɔ́ Kristə tùntúm mú á yírhə́ na. À zhìlì à yala nɛ dɛ̃´dɛ̃´. Wò-jààrɛ̀ ǹdə́ màmyaarhɛ ǹdə́ tùm-fwààlɛ̀ gakó wɛ̀rhɛ́ á sõ. ¹³Wɔ́ bə̀kɔ́n à wɛ̀rhɛ́ Kristə-lyì gùúlí dwã bɛ́ nɛ du ámyɛ̌? Kɔn rə̀dù à yě: à yə̀ á yó w nyǐ yé. E zɛ̃̀ wɔ́ rə̀myɛ́ á pwírí rə̀ bə càn ná etəra? È gə wɔ́ èta, sə́ nyǐ à nʼâ lwə̀l ába sǔbri.

¹⁴Nyǐnə à nʼâ tɛnɛ à bàn á sõ. Rə̀myɛ́ bʼa ce né wɔ́ twər rə̀tɔ̀ à gə́ nʼâ twí á sõ né. Sə kɔn bʼa yə̀ ǹdə twéé twéé mó ta, à tʼâ la ába lyɔ̀ɔ̀ ǹdə́ kɔn dɛ̀bɛ́ à zhe rə̀ tum yé. È də̀ á kɔn à nʼâ yâl yé. Wɔ́ á cìcì mú à nʼâ yàlá. È də̀ bə̀sɔ́bwɛ̀lɛ́ námpɔ́lɛ́ è nʼê pyà è pɛ è da nɛ́ yé. Wɔ́ da ń ya n pyà n pə ń bə̀sɔ́bwɛ̀lɛ́ námpɔ́lɛ́ nɛ. ¹⁵È gə wɔ́ àmyɛ́ yilə, à bʼa pə ába kɔn dɛ̀bɛ́ à zhe, e súlí à cìcì námpúm. E zɛ̃̀ wɔ́ à gə́ só ába dɛ̃´dɛ̃´ mɔ́ yilə, á sónó w nʼê bɔ̀ ǹdə́ nɛ?

¹⁶Dɛ̀ga lyì jàlà nʼê zɔ̀m bʼà də̀ cángá yé, bə̀ wɔ́ kɔma à gòm a mʼa jə́jɛ̀rɛ́ ába. A jʼà yə̀ ába lyɛ̀ɛ̀ ǹdə́ kɔn dɛ̀bɛ́ à zhe rə̀ tum yé. ¹⁷Á gə nʼá yâl sʼá nyǐ lyì bí byɛ̀bɛ́ à twĩ̀ á sõ mó, à yə̀ ce mə̀dù ga yǔr ába n zwẽ á kɔn n bə̀ n pɛ̃ yé. ¹⁸À lwə̀l Titi a twĩ̀ ńmyɛ̌ ǹdə́ nə́ da-byǐ mú á yě ń pár mɔ́ á sõ. Bə̀ nə gə́ tú mú, Titi yǔr ába n zwẽ á kɔn nà? Á nʼá bùl bʼàmyɛ́ ǹdə́ ńmyɛ̌ tùntwĩ̀ĩ̀ rí yə̀ rə̀dù yàl, ráá nə́ bùlə̀ né nə̀ yə̀ rə̀dù yàl?

¹⁹Dɛ̀ga á ju kùr shãã shãã ga á nʼá bùl á wẽ́ bə̀ wɔ́ bwìrì nə́ rʼé pyà á sõ? E jʼà də̀ èta yé. Nə́ rʼé zɔ̀m Yi yé né ǹdə Kristə gə́ nə́ ń yâl nɛ́. Dɔwabá nántwə̂rh, nə́ rʼé zɔ̀m rə̀myɛ́ gakó ámyɛ̌ sãɔ̃ yilə, mùnì ga á kwɛrhɛ á zhí Yi ni. ²⁰Ywẽ zhe ne, dɛ̀ga à gə́ mʼa bə̀ á sõ, a pwírí á də̀ ǹdə à gə́ nʼâ yâl nɛ́ yé, dɛ̀ga ámyɛ pwírí àmyɛ də̀ ǹdə á gə́ nʼá yâl nɛ́ yé. Kɔn súlí myɛ, ywẽ zhe ne, ǹ gə só a mʼa pwírí nyə̀-pâr ǹdə́ bwɛ̃̌-dǔr, ǹdə́ lyim, ǹdə́ búlə́, ǹdə́ dwã yil zhìlù, ǹdə́ wu-bárhɛ́ zɔ̀mà, ǹdə́ cìn-byilu, ǹdə́ yààyàà tumə ŋwɛ́nɛ́ á cəcəl wə. ²¹Ywẽ zhe ne myɛ, à gə́ mʼa kʼa bə̀ á sõ, a zɛ̃̀ à la cìzhìl nɔ Yi yé né á yilə. Dɛ̀ga lyì jàlà ŋwɛ́nɛ́ bə̀ gwẽ̌ nʼê fwə̀lə́, bə̀ nʼê wɛ̀rhɛ́ lwɛlɛ, bə̀ nʼê wɛ̀rhɛ́ yààyàà ǹdə bə̀ shãã ga mɔ́ ta, bə̀ yə̀ shɛ̀nɛ́ bə pyìrhí bə̀ wun yé. Rə̀myɛ́ zɛ̃̀ rə̀ la à wu ni zhìlù.

Pwəə nə́ ń ce Kɔrɛ̃tɛ Kristə-lyì bí, n cící bi n mə n gu sɛ́bɛ́ rɛ́ yó

¹À bàn á sõ, sə rə̀myɛ́ bʼa ce né wɔ́ twər rə̀tɔ̀ à gə́ nʼâ twí á sõ né. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Yò gə la kɔrhɔ gakó, sʼe yə̀ zhə̀n-cìnə́ bə̀lyè ráá bə̀tɔ̀ yírh wə.” ²À zhe zɔ̀mɛ̀ à la byɛ̀bɛ́ bə̀ wɛ̀rhɛ́ yə̀-bəlwàálɛ́ shãã ga mɔ́ ǹdə́ lyì bí dwã bɛ́ nɛ byilu. À gə́ yʼà kʼa bwérhé a bə̀ á sõ yi ní, à yʼà byili ri. Wɔ́ rə̀myɛ́ à kʼâ nʼâ byili bi kə́dò ǹdə́ à tɛ̀nɛ́ á sõ ga. À gə tú èlâsɛ̃´, sǔbri tʼâ la nɛ́ yál lò mə̀dù ga yil yé. ³Á nʼá yâl bʼà wɛ̀rhɛ́ kɔn dɛ̀bɛ́ rə̀ bʼa ce á lwar bə̀ Kristə nə́ ń tó à dɛnnɛ ń zɔ̀mà. Sə à nʼâ byili ába, Kristə də̀ bə-jàn-zhəəre cí yé. Rə̀myɛ́ ce, ń gə la ń tum dí tũ̌ á wẽ́, ń nə́ ń byili ń jàn dɛ́. ⁴Zhə̀nà, ń shɛ̀nɛ́ n yə̀ ǹdə bə-jàn-zhəəre cí ta bə pəpa mɔ də̀-jɔrhɔ́ yó. Sə ń bwìrhì ń ŋwɛ́nɛ́ Yi jàn yilə. Èta, nə́ mù dwã nɛ ǹdə́ mɔ, nə́ shɛ̀nɛ́ nə́ yə̀ bə-jàn-zhəəre cìnə́. Sə á bʼâ tó nə́ tùntwə̃̀ə̃̀ né dɛnnɛ á lwar bə̀ nə́ mù dwã nɛ ǹdə́ Kristə nə́ ŋwɛ́nɛ́ Yi jàn yilə.

⁵Bwə̂rhnə á cìnə̀, sʼá tɛ́rɛ́ á wẽ́ á nyǐ ǹdə́ á gə nʼâ wɛ̀rhɛ́ ǹdə lyì byɛ̀bɛ́ bə̀ zhí Kristə ne ta? Èta á mʼâ pwírí Yezu Kristə ŋwɛ́nɛ́ á wẽ́. È gə də̀ rə̀myɛ́, sə́ nyǐ kaka tɛ̀nɛ́ rə̀ nʼê byili bʼâ zhí mu yé. ⁶È gə wɔ́ nə́myɛ̌ yilə, kɔn ŋwɛ́nɛ́ rə̀ nʼê byili bə̀ nə́ zhí mu. À nʼâ bùl bʼâ cìcì mú yě rə̀myɛ́. ⁷Nə́ rʼé lwə̀l Yi sʼá bə̀kʼá wɛ̀rhɛ́ kɔn dɛ̀bɛ́ rə̀ bə càn yé. Nə́ tʼá wɛ̀rhɛ́ rə̀myɛ́ nə́ la mʼé pə bwìrì nə́ cìn nì yé. Wɔ́ yál nə́ rʼé yâl bʼâ wɛ̀rhɛ́ cɛ̀nɛ̀. Á gə tə̀ rə̀myɛ́ yil á nʼá wə̀l bə̀ nə́ dówə́, rə̀myɛ́ də̀ yò yé. ⁸Nə́ wàr zhə̀n dɛ́ yé ne nə́ la cə̂r yé. Kɔn dɛ́ dɛ̀bɛ́ nə́ wɔ̌ mɔ́, wɔ́ nə́ twĩ̀ zhə̀n dɛ́ byilu yilə. ⁹Ámyɛ̌ gə wɔ́ jàn cìnə́, nə́myɛ̌ zɛ̃̀ nə́ wɔ́ bə-jàn-zhəəre cìnə́, nə́ wun nyɛ̀ nə́ bə-jàn-zhəəré yilə. Sə kɔn dɛ̀bɛ́ nə́ rʼé lwə̀l Yi ni á yil mó gakó wɔ́ sʼá yə̀ náàcɛ̀nà námpúm Yi yilə. ¹⁰Wɔ́ rə̀myɛ́ è ce à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ ǹdə́ à gwẽ̌ yə̀ á sõ yí yé. Bá à gə tú á sõ myɛ, à tʼâ yâl a ji ába búlə́ kɔn lyɛ̃ cɛ nɛ yé. Zhə̀nà, Cinu pɔ nɛ ŋwɔ̀nɔ́ á yò kɔrhɔ yilə, sə è də̀ á yò zhìlù yil yé.

¹¹Da-byâ, tɛ̀bɛ́ rə̀ dàl mɔ́, cenə á wun yə̀ nyɛ̀n, sʼá yə̀ náàcɛ̀nà námpúm. Cícínə dwã. Wɛ̀rhɛ́na nyì-dwìì, sʼá jòm ǹdə́ dwã ǹdə́ yə̀-zùlə́. Èta, Yi bʼa yə̀ nɛ́ ǹdʼába. Wɔ́ rə̀myɛ́ rə̀ wɔ́ sónó ǹdə́ yə̀-zùlə́ cí mú.

¹²Cenə dwã, á kwə̀ə̀lè dwã náàcɛ̀nɛ́ ǹdə da-byâ ta. Yi lyì bí gakó nʼê ce ába.

¹³Cinu Yezu Kristə mà n cĩ́ bwəl á yó! Nə́ Da Yi sónó w ǹdə́ nyì-dwìì rí tɛ̀bɛ́ Eshirhə náàcɛ̀nɛ́ nʼê pɛ mɔ́ bʼa yə̀ nɛ́ ǹdʼá gakó!