1 Timote

Pwəə sɛ́bɛ́ rɛ́ nã́yéé ré ń kɛ̃ n pə

Timote

ne mó

Pwəə gə́ du ń twər rə̀lyè nyân dɛ́ yò-ècɔ̀nɔ̀ nyí rí bwə̂l yil mó, ń zhə̀l n yí cɔ òdù wẽ́ bə̀ nʼê byẽ̀ bə̀ Lyisitiri, n nə ébɔ́-dâl mə̀dù gàà ń yíl Timote. Kristə-lyì bí byɛ̀bɛ́ bə̀ yʼà ŋwɛ́nɛ́ gàà mɔ́ yʼà nʼê zɔ̀m ń yil náàcɛ̀nɛ́ (Tùntúmə́ bé 16.1-3). Pwəə yà ń nə́ ń yâl bə̀ ń tó mo, bə vò jààsɛ̀ nánzhəzhɔ̌ wẽ́ bə bwə̀l yò-ècɔ̀nɔ̀ nyí rí. Sə zwini gə tú è ŋwɛ́nɛ́ Kristə-lyì gùlú wẽ́, ń ya n ce Timote nyǐ rə̀ yò (Tùntúmə́ bé 17.14-15; 18.5; 19.22; Shilipu 2.19-24; 1 Tesəloniki 3.2-6).

Pwəə yà ń pɔ nyí Timote ne bə̀ ń mɛ̃ Efɛɛzɛ nɛ, mùnì ga n cə̀r lyì bí byɛ̀bɛ́ bə̀ ŋwɛ́nɛ́ gàà bə̀ nʼê byili kɔn dɛ̀bɛ́ rə̀myɛ́ ǹdə́ Kristə yò-ècɔ̀nɔ̀ nyí rí də̀ rə̀dù mú. Ń cící mu, n byili mu ń gə́ mə̂ sə n zə ń cìn ní (1.1–2.15; 4.1-16).

N byili Timote ne n súlí, ń gə́ mə̂ sə n cící lyì bí ní Yi-co w shò-kwã nɛ́. N zɛ̃̀ n byili mu Kristə-lyì gùúlí yé né cìnə́ bé ǹdə́ byɛ̀bɛ́ bə̀ nʼê twĩ̀ gùlú w tum dí mú gə́ mə̂ sə bə zə bə̀ cìn ní (3.1-16).

Rə̀myɛ́ kwã nɛ́, ń pɔ cícú náncɛsɛ́, ǹdə́ ejə̀nə̀ bé, ǹdə́ yómə́ bé ǹdə́ bə̀ yó-cìnə́ bé, e súlí nə̀cɛ̀nà bɛ́ ǹdə́ lyì bí byɛ̀bɛ́ bə̀ nʼê yâl bə yə̀ nə̀cɛ̀nà mɔ́ shò-kwã nɛ́ (5.1–6.21).

Pwəə nə́ ń ce Timote

^1-2Timote, wɔ́ àmyɛ́ Pwəə à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ. Nə́ Zwennə Yi ǹdə́ Yezu Kristə mó nə́ zhí mú pɔ nɛ ŋwɔ̀nɔ́ a jǐrh Yezu Kristə tùntúm. Ǹ wɔ́ à byǐ zhə̀n zhə̀nà Yi-ni-zhú mú wẽ́. Nə́ Da Yi ǹdə́ nə́ Cinu Yezu Kristə bʼa cĩ́ bwəl ǹ yó, sə bə dùr ǹ nɔ̀nɔ̀, bə pɔ̃́ yə̀-zùlə́!

Cə̂r byɛ̀bɛ́ bə̀ nʼê byili kɔn dɛ̀bɛ́ rə̀ də̀ zhə̀n mɔ́

³À nʼâ lwə̀l mó bə̀ ǹ mɛ̃ Efɛɛzɛ nɛ́, ǹdə à gə́ pɔ mɔ́ nyí a bʼa zhǐr a vò Masɛdwanɛ nɛ́ mɔ́, mùnì ga ń cə̀r lyì bí byɛ̀bɛ́ bə̀ ŋwɛ́nɛ́ gàà bə̀ nʼê byili kɔn dɛ̀bɛ́ rə̀myɛ́ ǹdə́ Kristə yò-ècɔ̀nɔ̀ nyí rí də̀ rə̀dù mú. ⁴Byili bi bə̀ bə̀ yẽ̌ kɔma bɛ́ ǹdə́ nə́ nàmbala bɛ́ nyə̀ná nɛ́ nə̀ tʼâ zhɛ̀ bə̀ nyú w mú ni, bə̀ nə̀ nʼê twí ǹdə́ nyə̀-pâr. E jà nyə̀-pàárɛ́ tʼâ la ce Yi tum dí vò yé. Wɔ́ Yi-ni-zhú dúdú mə̀ bʼa ce rə vò. ⁵Nyí rí tɛ̀bɛ́ à pɔ mɔ́ èta mɔ́, wɔ́ mùnì ga sónó w ò nʼô shí wu kɔ̀bɔ́ ò bə dóó zhe, ǹdə́ Yi-ni-zhú páá wẽ́ mó yə̀ nɛ́. ⁶Lyì jàlà ywə̀r bə yẽ̌ sɔ́má y èmyɛ́ nɛ, bə̀ kʼâ nʼê zɔ̀m zɔ̀mà nyɛ̀bɛ́ nə̀ bə kùr zhe. ⁷Bə̀ nʼê yâl bə yə̀ Muyiisi nyə́ né byilnə, bə jʼà yə̀l nə̀ kùrə̀ yé. Bə̀ nʼê zɔ̀m ǹdə́ bə̀ jàn gakó, bə jʼà yə̀l dɛ̀bɛ́ bə̀ nʼê zɔ̀m mɔ́ myɛ kùr yé.

⁸Nə́ yě bə̀, nə́ gə nʼé zə nyə́ né nə́ kwè nə̀ sɔ́má, nə̀ càn. ⁹Nə́ mə̂ sə nə́ lwar bə̀ Yi yə̀ rə̀ nyə́ né pɛ wu-cángá cìnə́ yil yé. Rə̀ pɔ nɛ byɛ̀bɛ́ bə̀ tʼâ zwẽ rə̀ nyí ni mú, ǹdə́ byɛ̀bɛ́ bə̀ tʼâ nyàm dɛ̀ mɔ́, ǹdə́ lyì-bəlwâlsɛ́ ǹdə́ yə̀-bəlwàálɛ́ cìnə́ yilə, e súlí byɛ̀bɛ́ bə̀ tʼâ dùr rə̀myɛ́ ǹdə́ kɔn dɛ̀bɛ́ rə̀ wɔ́ rə̀myɛ́ nyân mɔ́, ǹdə́ byɛ̀bɛ́ bə̀ nʼê gwi bə̀ dabá ǹdə́ bə̀ nábá mɔ́, ǹdə́ lyì-gurnə bé gakó yilə. ¹⁰Yi pɔ rə̀ nyə́ né byɛ̀bɛ́ bə̀ nʼê fwə̂l mó ǹdə́ bala bɛ́ byɛ̀bɛ́ bə̀ nʼê jí dwã ǹdə bə̀ gə́ yʼa jí kɛ̃ nɛ́ mɔ́, ǹdə́ byɛ̀bɛ́ bə̀ nʼê zal bə̀ dwã bɛ́ bə yè mó, ǹdə́ byɛ̀bɛ́ bə̀ nʼê gòm kɔma mɔ́ yilə, e súlí byɛ̀bɛ́ bə̀ yʼa bwəl nyí bə jʼà tʼâ pyìrh rè mó, ǹdə́ byɛ̀bɛ́ gakó bə̀ tùntwə̃̀ə̃̀ né tʼâ tó kàrmɔ́ mɔ̀bɔ́ mə̀ wɔ́ zhə̀n mɔ́ yilə. ¹¹Kàrmɔ́ mə̀myɛ́ mɔ́ nʼê shí yò-ècɔ̀nɔ̀ nyí rí rə̀ ce nə́ lwar Yi zùwə́ y pár mɔ́ wẽ́. Wɔ́ Yi rí tɛ̀bɛ́ rə̀ ce à nʼâ bwə̀l yò-ècɔ̀nɔ̀ nyí rí mú sõ wu-nyɔ̃̀ w ò bə dõ zhe mó nʼô shí ní.

Pwəə nə́ ń ce Yezu Kristə nə̀bán ń wu-bɔ̀nɔ̀ w yilə

¹²À nʼâ ce nə́ Cinu Yezu Kristə nə̀báná, ń gə́ pɔ nɛ jàn, n jà n nyǐ ni, n bù bʼà wɔ̌ ń tum dí à la tũ̌, n kwè rè n pɛ̃ mɔ́ yilə. ¹³E jà shãã ga, à yʼà nʼâ fulsi mu, à nʼâ tùrh mò, à nʼâ nwɛ̀nɛ̀ ń kwã-lyì bí. À gə́ yʼà gwẽ̌ yə̀ mɔ zhí mú ce à yʼà yə̀l dɛ̀bɛ́ à nʼâ wɛ̀rhɛ́ mɔ́ kùr yé, sə nə́ Cinu dùr à nɔ̀nɔ̀. ¹⁴Ń yò-ècɔ̀nɔ̀ w já dɛ̃´dɛ̃´ ǹdə́ nɛ, ń ce a zhí mu, n jà n pɛ̃ sónó kɔ̀bɔ́ ò nʼô shí Yezu Kristə wẽ́.

¹⁵Bə̀ nʼê byili bə̀ Yezu Kristə tú lũ w wẽ́, mùnì n vwârh yə̀-bəlwàálɛ́ cìnə́. Sə zɔ̀mɛ̀ rɛ́ rə̀myɛ́ wɔ́ zhə̀n cìcì. Lyì bí gakó mə̂ dwã sə bə zwẽ de. Wɔ́ àmyɛ́ à yə̀-bəlwàálɛ́ já du. ¹⁶Sə Yi gə́ dùr àmyɛ́ mɔ̀bɔ́ à yə̀-bəlwàálɛ́ já mɔ́ nɔ̀nɔ̀ mɔ́, wɔ́ mùnì ga Yezu Kristə jɛ̀rɛ̀ n tó àmyɛ́ dɛnnɛ n byili ń wu-bɔ̀nɔ̀ wá. Èta, àmyɛ́ jǐrh myɔrhɔ lyì bí byɛ̀bɛ́ bə̀ bàn mɔ zú bə nə nyǔ mə̀ tʼâ la zhɔ̌ mɔ́ yilə. ¹⁷Yi nə còrhó! Rə̀ wɔ́ pyɔ̌ mɔ̀bɔ́ ń pyɛ̀lɛ̀ rɛ́ bə zhɔ̌ zhe, n jà ń tá ń cì yé. Lò lò wàr mɔ ń la nɔ ǹdə́ ń yírhə́ yé. Wɔ́ ńmyɛ̌ dúdú ń wɔ́ Yi, ń mə̂ ǹdə́ còrhó ǹdə́ zùwə́, byinə nə̀ bə zhɔ̌ zhe yilə! Amɛ̀n!

¹⁸À byǐ Timote, kɔn dɛ́ dɛ̀bɛ́ à la mɔ́ byilu mú wɔ́ ǹdə dɛ̀bɛ́ Yi nyì-zwennə bé yʼà jɛ̀rɛ̀ bə byili ǹ shò-kwã nɛ́ mɔ́ nɛ. Rə̀ bʼa sɛ̃ mɔ́ ń bú búlə́ nyɛ̀bɛ́ nə̀ càn ¹⁹ǹdə́ Yi-ni-zhú ǹdə́ wu kɔ̀bɔ́ ò wɔ́ wárhgáá. Lyì jàlà tʼâ wɛ̀rhɛ́ kɔn dɛ̀bɛ́ bə̀ nʼê bùl bə̀ wẽ́ bə̀ rə̀ càn mɔ́ yé, bə̀ Yi-ni-zhú mú jʼa tó gàà mə zhìlì. ²⁰Yimene ǹdə́ Alɛsãdərɛ ŋwɛ́nɛ́ lyì bí bə̀myɛ́ mɔ́ wẽ́, sə à co be Shətana jɔ̃̀ wà, mùnì ga bə lwar bə̀ bə̀ bə mə̂ sə bə tùrh Yi yé.

Pwəə nə́ ń cící Timote Yi-co shò-kwã nɛ́

¹Kɔn dɛ̀bɛ́ à la jɛ̀rɛ̀ a byili mú mú wɔ́, bə̀ lò gakó wɛ̀rhɛ́ Yi-co lyì bí gakó yilə, n zə Yi cã̌ nɛ, n lwə̀l lè, sə n ce rə̀ nə̀báná, ²n lwə̀l rə̀ sãɔ̃ pyâ bɛ́ ǹdə́ lyì byɛ̀bɛ́ gakó bə̀ wɔ́ yé né cìnə́ mó yilə, mùnì ga nə́ ŋwɛ̀nɛ́ nə́ jòm shɛ́ɛ́ ǹdə́ yə̀-zùlə́, nə́ zə nə́ cìn náàcɛ̀nɛ́ nə́ mʼé tó Yi ni. ³Wɔ́ rə̀myɛ́ rə̀ càn, rə̀ mâ, sə rə̀ yú Yi nə́ Zwennə mó pùbùlə̀. ⁴Yi nʼê yâl bə̀ lyì bí gakó nə bə̀ cìnə̀, sə bə lwar kɔn dɛ̀bɛ́ rə̀ wɔ́ zhə̀n mɔ́ gə́ wɔ́ nɛ́.

⁵Zhə̀nà, Yi wɔ́ rə̀dù sá, cã̌-zalna mɔ́ myɛ wɔ́ mə̀dù sa, Yi ǹdə́ numbyínə́ bé cəcəl wə. Cã̌-zalna mɔ́ ńmyɛ̌ wɔ́ numbyíní, wɔ́ Yezu Kristə. ⁶Ń pɔ ń cìn ǹdə vwĩ̀-kɔn ta, mùnì lyì bí gakó nə bə̀ cìnə̀. Wɔ́ yi rí tɛ̀bɛ́ Yi yʼà cír mó gə́ yú yó ń wɛ̀rhɛ́ èta nɛ́, mùnì ga n yə̀ yò w òmyɛ́ zhə̀n-cínnə. ⁷Wɔ́ rə̀myɛ́ yil Yi cír ne bʼà yál zhə̀n dɛ́ rə̀myɛ́ bwə̀lnə̀ ǹdə́ rə̀ tùntúm, a byili Yi-ni-zhú mú ǹdə́ zhə̀n dɛ́ byɛ̀bɛ́ bə̀ də̀ Zhwifubá mó ne. È də̀ kɔma à nʼâ gòm yé, wɔ́ zhə̀n à nʼâ zɔ̀mà.

⁸Rə̀myɛ́ ce, à nʼâ yâl bə̀ jààsɛ́ gakó bala bɛ́ zhẽ̌ bə̀ jɛ̀rh dɛ̃̌ bə ce Yi ǹdə́ wu-põ, sə lyim ǹdə́ bùlə̀ námməlwâlsɛ bə̀kʼa yə̀ bə̀ wẽ́ yé.

⁹À nʼâ yâl bə̀ kana bɛ́ myɛ ce bə̀ gàndɛ́ cɛ̀nɛ̀. Bə̀ mə̂ sə bə ce gàndɛ́ tɛ̀bɛ́ rə̀ mâ. È bə̀kʼa yə̀ cìn-byilu gàndɛ̀ yé. Bə̀ bə mə̂ sə bə ce sánə́má cìbyǔr, ráá dɔ̀msɛ̀ ráá gàndɛ̀ tɛ̀bɛ́ rə̀ ye cɛ̀ dɛ̃´dɛ̃´ yé. ¹⁰Bə̀ mə̂ sə bə tó bə̀ tùntwĩ̀-ècɛ̀nà dɛnnɛ bə byili bə̀ cɛ̀nɛ̀ rɛ́. Wɔ́ èta kana byɛ̀bɛ́ bə̀ nʼê wə̀l bə̀ bə̀ só Yi mú mə̂ sə bə wɛ̀rhɛ́ nɛ́.

¹¹Kàrmɔ́ gə tú mə̀ nʼê wɛ̀rhɛ́ yi ní, sə kana bɛ́ jòm shɛ́ɛ́ bə cili ǹdə́ nyɔ̀mɔ̀. ¹²Sɔ́má tɛ̀nɛ́ sə bə cèrhè kàrmɔ̀ ráá bə byili kɔn dɛ̀bɛ́ bala bɛ́ mə̂ sə bə wɛ̀rhɛ́ yé. Bə̀ mə̂ sə bə jʼâ jě shɛ́shɛ́. ¹³Yi wɔ́ Adəma rə̀ jɛ̀nɛ̀ rə wɛ̀rhɛ́, fòró rə zɛ̃̀ rə wɛ̀rhɛ́ Awa. ¹⁴È də̀ Adəma ń shɛ̀nɛ́ jə́jɔ̀rɔ́ mɔ́ yé, wɔ́ kɛ̃ mɔ́ ń shɛ̀nɛ́ n mə n cẽ Yi nyí rí. ¹⁵Sə kɛ̃ gə nɔ bə̀sɔ́ná, ǹdə́ ń gə zhì ń nà y yó kẽkẽ ń Yi-ni-zhú mú wẽ́ ǹdə́ sónó, kɔn súlí myɛ ǹdə́ ń tùntwə̃̀ə̃̀ né gə càn nə̀ nʼê swí Yi yírh, ń mà n nə vwârh.

Kristə-lyì gùúlí yé né cìnə́ bé

¹Nyǐnə zɔ̀mɛ̀ rɛ́ tɛ̀bɛ́ à la byilu mú wɔ́ zhə̀n cìcì: lò mɔ̀bɔ́ ń nə́ ń yâl n yə̀ Kristə-lyì gùlú yé né cə́bal, wɔ́ tum tɛ̀bɛ́ rə̀ càn ń nə́ ń yâl n twĩ̀. ²Kristə-lyì gùlú yé né cə́bal bə mə̂ sə n yə̀ lò mɔ̀bɔ́ ń zhe yò bə̀ nʼê byili yé. Ń mə̂ sə n yə̀ kɛ̃ mə̀dù byal, ń bə̀ká n nyǐ ń dõ yó w yé, sə n yə̀ lò mɔ̀bɔ́ ń zhe ń cìn cɛ̀nɛ̀, ń tumə né myɛ jʼà nʼê swí yírh, sə n yə̀ lò mɔ̀bɔ́ ń nə́ ń zwẽ zhələ cɛ̀nɛ̀. Ń mə̂ sə n yə̀ lò mɔ̀bɔ́ ń wɔ̌ Yi zɔ̀mɛ̀ rɛ́ ń nə́ ń byili. ³Ń bə mə̂ sə n yə̀ sə̀-nyɔ̀rɔ́ yé; ń bə mə̂ sə n yə̀ búlə́ cə́bal yé; ń mə̂ sə n yə̀ wu-bɔ̀nɔ̀ ǹdə́ sónó cə́bal. Ń bə mə̂ sə n yə̀ wɛ́rɛ́ yóm yé. ⁴Ń mə̂ sə n nyǐ ń kɛ̀lɛ́ yò cɛ̀nɛ̀, sə ń byâ bɛ́ yə̀ lyì byɛ̀bɛ́ bə̀ nʼê nyàm lò. ⁵Lò gə wàr ǹ kɛ̀lɛ́ yò ǹ nə́ ǹ nyǐ cɛ̀nɛ̀, etər ǹ bʼâ tó né ń nyǐ Yi gùlú w yò cɛ̀nɛ̀?

⁶Ń bə mə̂ sə n yə̀ lò mɔ̀bɔ́ ń zù Kristə dùlìdùlì yé, mùnì ga cìn-dɛ̃̌-zhõ̌ bə̀kʼa ce n jǐrh ǹdə lyìlyǒ ta Yi nyə̀ná nɛ́ wẽ́, n tó rə̀myɛ́ dɛnnɛ n nə còrhò-tum ǹdə Shətana ta yé. ⁷Sə kɔn wɔ́ nyɔ́ɔ́ bə̀ lyì bí byɛ̀bɛ́ bə̀ də̀ Kristə-lyì mú tó ń tùntwə̃̀ə̃̀ né dɛnnɛ bə nyɛ̀ mɔ̀. Rə̀myɛ́ mʼa ce lò gakó zɔ̀m ń yil náàcɛ̀nɛ́, mùnì ń bə̀ká n tu Shətana sòlò wẽ́ yé.

Kristə-lyì gùúlí tùntùnnə̀ bé

⁸Kristə-lyì gùúlí tùntùnnə̀ bé myɛ mə̂ sə lyì bí nyɛ̀ bɛ̀ bə̀ tùntwə̃̀ə̃̀ né yilə, sə bə jʼa yə̀ zhə̀n-cìnə́. Bə̀ bə mə̂ sə bə nyɔ̀ sɛ̃´ kɔn lyɛ̃ cɛ nɛ yé, sə bə̀ bə̀kʼa pyà wársɛ ǹdə́ yǔyǔ tumə yé. ⁹Bə̀ mə̂ sə bə zə kɔn dɛ̀bɛ́ Yi byili nə́ Yi-ni-zhú mú shò-kwã nɛ́ mɔ́ kẽkẽ ǹdə́ wu-põ zhə̀n zhə̀nà. ¹⁰Bə̀ mə̂ sə bə jɛ̀rɛ̀ bə nyǐ bə̀ tùntwĩ̀ĩ̀ rí yò náàcɛ̀nɛ́. Bə̀ gə pwírí bə̀ bə yò zhe lò la byilu, e fòró bə zɛ̃̀ bə pə bɛ sɔ́má bə twĩ̀ bə̀ tum dí.

¹¹Kana bɛ́ byɛ̀bɛ́ bə̀ wɔ́ Kristə-lyì gùúlí tùntùnnə̀ mó myɛ mə̂ sə lyì bí tó bə̀ tùntwə̃̀ə̃̀ né dɛnnɛ bə nyɛ̀ bɛ̀. Bə̀ bə mə̂ sə bə zɔ̀m bə̀ dwã bɛ́ yil námməlwɛ̀lɛ́ yé. Bə̀ mə̂ sə bə zə bə̀ cìn náàcɛ̀nɛ́ kɔn gakó wẽ́.

¹²Kristə-lyì gùlú tùntùnnə̀ mə̂ myɛ sə n yə̀ kɛ̃ mə̀dù byal, ń bə̀ká n nyǐ ń dõ yó w yé. Ń mə̂ sə n nyǐ ń kɛ̀lɛ́ y ǹdə́ ń byâ bɛ́ yò náàcɛ̀nɛ́. ¹³Kristə-lyì gùlú tùntùnnə̀ bé gə nʼê twĩ̀ bə̀ tum dí náàcɛ̀nɛ́, lyì bí gakó mʼa cèrhé be. Bə̀ gə́ zhí Yezu Kristə ne mó ce, bə̀ mʼa ŋwɛ̀nɛ́ bə byili Yi zɔ̀mɛ̀ rɛ́ ǹdə́ wu-jɔ̀.

Kɔn dɛ́ dɛ̀bɛ́ nə́ Yi-ni-zhú mú ce nə́ lwar mɔ́ já dɛ̃´dɛ̃´

¹⁴À nʼâ yâl a bə̀ a nə mɔ́ dwã nɛ́ nyɛ̀bɛ́ nyí ni, sə ǹdə́ rə̀myɛ́ ga, à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ. ¹⁵Sə à gə yə̀ twí làlà, ǹ gə kàrmə̀ sɛ́bɛ́ rɛ́ rə̀myɛ́, ǹ bʼâ lwar ǹ gə́ mʼâ zə ǹ cìn ní ǹdə́ gùlú w ò wɔ́ Yi nã́nyì kwálá y mɔ́. Wɔ́ gùlú w òmyɛ́ ò zhe Yi zhə̀n dɛ́ ò nʼô byili. ¹⁶Zhə̀nà, kɔn dɛ́ dɛ̀bɛ́ nə́ Yi-ni-zhú mú ce nə́ lwar mɔ́ já dɛ̃´dɛ̃´:

Kristə jǐrh numbyíní n ce bə lwar ń párá.

Eshirhə náàcɛ̀nɛ́ byili pamparɛ̃ɛ̃ bə̀ ń bə dóó zhe yé.

Màlɛ́kabá myɛ cìcì nɔ mɔ.

Bə̀ bwə̀l ń yò w bə byili lũ w lyì bí gakó ne.

Lyì bí zwẽ nyí bə zù mù cɛ yó,

sə ń nɔ zùwə́ dɛ̃̌ Arəzana wa.

Kɔn dɛ̀bɛ́ Yi wɛ̀rhɛ́ mɔ́ gakó càn

¹Eshirhə náàcɛ̀nɛ́ nʼê byili pamparɛ̃ɛ̃, bə̀ lyì jàlà mʼa zɛ̃̀ dwã nɛ́ nánkwaá nɛ́ wẽ́, bə yẽ̌ Yi-ni-zhú ni, bə tó kɔma cìnə́ ne bə zwẽ còrhò mɔ̀bɔ́ mə̀ nʼê shí nə̀cílsí námməlwâlsɛ́ sono mó. ²Lyì mʼa yǔr bi ǹdə́ kɔma zɔ̀mà. Kaka kʼê tʼâ la bə̀ wun ní wẽ́ yál rə ce bə dùr cìzhìl ǹdə́ kɔn wɔ̀rhɔ́ yé. ³Lyì bí bə̀myɛ́ mɔ́ nʼê wə̀l bə̀ kɛ̃-jú wɔ́ kɔ̀-bəlwɛ̀lɛ́, bə̀ kùjúr jàlà ŋwɛ́nɛ́ rə̀ jú súlə́, e jà kùjúúrí rə̀myɛ́ mɔ́ wɔ́ Yi rə̀ wɛ̀rhɛ́ rɛ. Lyì bí byɛ̀bɛ́ bə̀ zhí Yi ni, bə̀ yě rə̀ zhə̀n dɛ́ gə́ wɔ́ nɛ́ mɔ́ wɔ̌ bə̀ jí wẽ̀ dé rə̀myɛ́, bə̀ mʼê ce rə̀ nə̀báná. ⁴Zhə̀nà, kɔn dɛ̀bɛ́ Yi wɛ̀rhɛ́ mɔ́ gakó càn. Lò wàr ń vùr wẽ̀ dé rə̀myɛ́ òdù ga ń dwĩ̀ kwã nɛ́ yé. Ń mə̂ sə n jí rə̀ gakó n mə n ce Yi nə̀báná, ⁵sə n lwə̀l lè n mə n jí ri kɔn tó ǹdə rə̀ zɔ̀mɛ̀ rɛ́ gə́ byili ní. Èta, rə̀myɛ́ bʼa ce kɔn gakó tó ǹdə rə̀ gə́ nʼê yâl nɛ́.

Yál Yezu Kristə tùntùnnə̀ nántwə̂

⁶Ǹ gə byili rə̀myɛ́ gakó nə́ da-byâ bɛ́ nɛ, ǹ mʼâ yə̀ Yezu Kristə tùntùnnə̀ nántwə̂. Bə̀ mʼa lwar bə̀ Yi-ni-zhú zɔ̀mɛ̀ rɛ́ ǹ zwẽ ǹ nə́ ǹ tó re mó pɔ mɔ́ jàn, bə̀ ǹ nə́ ǹ byili ri ǹdə bə̀ gə́ cèrhè mó Yi nyə̀ná nɛ́ zhə̀n dɛ́ nɛ́. ⁷Sə́ zhɛ̃̀ kɔma zɔ̀mà nɛ́ nə̀ wɔ́ ǹdə səswalsɛ nɛ mɔ́. Ce jàn nɛ́ ń zə yə̀wâl ǹdə́ Yi-ni-zhú kẽkẽ. ⁸Lò gə nə́ ǹ wɛ̀rhɛ́ ǹ yala nɛ́ cɛ̀nɛ̀, kɔn càn, sə nə̀ tʼâ sɛ̃ mɔ́ dɛ̃´dɛ̃´ yé. Wɔ́ Yi-ni-zhú kẽkẽ mə̀ zhe kùr du, bə̀ Yi bwəl nyí bə̀ nə́ gə zhí ri kẽkẽ, rə̀ bʼa pə nə́ba nyǔ, èlâsɛ̃´ ǹdə́ byinə nə̀ bə zhɔ̌ zhe yilə. ⁹Zɔ̀mɛ̀ rɛ́ rə̀myɛ́ wɔ́ zhə̀nà. Lyì bí gakó mə̂ dwã sə bə zwẽ de. ¹⁰Wɔ́ rə̀myɛ́ è ce, nə́ rʼé pyɛ́nɛ́ nə́ cìn nə́ twĩ̀, nə́ rʼé twĩ̀ jàn tumə, bə̀ nə́ zhí Yi nã́nyì y ni ǹdə́ nə́ wun gakó, nə́ rʼé dɛ̃̀ rə̀ nyì-bwelé y pyǐrh mó. Rə̀ nʼê yâl rə zwẽ lò gakó, sə wɔ́ lò mó mɔ̀bɔ́ ǹ zù rì mú rə̀ nʼê zwẽ.

¹¹Wɔ́ rə̀myɛ́ ǹ mə̂ sə́ byili lyì bí ni, sə́ ce bə zwẽ rə̀ nyí. ¹²Bə̀ká yẽ̌ lò mə̀dù ga fulsi mú ǹ gə́ wɔ́ bə̀sɔ́bwɛ̀lɛ́ yil yé. Ce ǹ zɔ̀mà nɛ́ ǹdə́ ǹ tùntwə̃̀ə̃̀ né, ǹdə́ ǹ sónó w ǹdə́ ǹ Yi-ni-zhú mú, ǹdə́ ǹ wu-põ w yə̀ myɔrhɔ byɛ̀bɛ́ bə̀ zù Kristə mó gakó yilə.

¹³Ce jàn nɛ́ ǹ nə́ ǹ kàrmə̀ Yi zɔ̀mɛ̀ rɛ́ sɛ́bɛ́ rɛ́ ǹ byili Kristə-lyì bí ni, ǹ mə́ ǹ zal bə̀ wun ni ǹdə́ cícú, ǹ mə́ ǹ dɛ̃̀ à twírí yə́. ¹⁴Bə̀ká swě Eshirhə náàcɛ̀nɛ́ pɛnɛ́ y è pɔ mɔ́ mɔ́ yò yé. Ǹ nɔ pɛnɛ́ y èmyɛ́ mɔ́ Yi nyì-zwennə bé gə́ zɔ̀m è yò w, Kristə-lyì gùlú w yé né cìnə́ bé zɛ̃̀ bə cèlè bə̀ jɛ̀sɛ́ ǹ yó w mó yi ní. ¹⁵Twĩ̌ tum dí rə̀myɛ́ cɛ̀nɛ̀, sə́ twĩ̀ dì ǹdə́ ǹ wu gakó, mùnì ga lyì bí lwar bə̀ ǹ tum dí nʼê zhə̀l cɛ̀nɛ̀. ¹⁶Dɛ̃̌ ǹ cìn ǹ tùntwə̃̀ə̃̀ né ǹdə́ ǹ kàrmɔ́ wɔ̀rhɔ́ mɔ́ wẽ́. Yál wu-cángá cə́bal rə̀myɛ́ gakó wẽ́. Zhə̀nà, ǹ gə nə́ ǹ wɛ̀rhɛ́ èta, ǹ bʼâ zwẽ ǹmyɛ́ cìcì, ǹdə́ byɛ̀bɛ́ bə̀ nʼê cili ǹ zɔ̀mà nɛ́ mɔ́ ga.

Cící Kristə-lò gakó

¹Bə̀ká zɔ̀m jàn ǹdə́ náncɛ yé. Zɔ̌m ǹdə́ mɔ ǹdə ǹ da ta, sə́ cící ébwá-dàlá bɛ́ ǹdə ǹ da-byâ ta. ²Zɔ̌m ǹdə́ kana náncɛsɛ́ ǹdə ǹ nábá ta, sə́ cící kə-bwə̃́ə̃́ bé gwẽ̌ mó ǹdə ǹ nəkwá ta, ǹdə́ wu-põ.

Ejə̀nə̀ sõ cilu

³Ce jàn nɛ́ ń nyǐ ejə̀nə̀ bé byɛ̀bɛ́ bə̀ bə lò zhe zhə̀n zhə̀n ga mɔ́ yò. ⁴Sə ejə̃̀-kɛ̃ mɔ̀bɔ́ ń gə zhe byâ ráá nɛ̀mɛ́, bə̀ mə̂ sə bə wɛ̀rhɛ́ ǹdə bə̀ Yi-ni-zhú mú gə́ nʼê byili ní. Bə̀ dabá ǹdə́ bə̀ dabá náncɛrh, ǹdə́ bə̀ nábá ǹdə́ bə̀ nábá náncɛrh nyǐ bə̀ yò. Rə̀myɛ́ ce, bə̀myɛ mə̂ sə bə nyǐ bə̀ yò. Wɔ́ rə̀myɛ́ Yi nʼê yàlá. ⁵Ejə̃̀-kɛ̃ mɔ̀bɔ́ ń bə lò zhe ń nə́ ń cili ń sõ zhə̀n zhə̀n mɔ́, ń kwè ń cìn námpúm n pə Yi ni, ń mə́ ń lwə̀l rə̀ sãɔ̃ nə̀nyɔ́nɔ́ ǹdə́ cəcɛ̃ ga. ⁶Sə ejə̃̀-kɛ̃ mɔ̀bɔ́ ń ŋwɛ́nɛ́ e jà lũ w wẽ̀ dé shil zù mù mú nyɛ̌ ǹdə ń cù ta. ⁷Wɔ́ rə̀myɛ́ ǹ mə̂ sə́ byili bi, mùnì ga bə̀ bə̀kʼa zə yò lò byili yé. ⁸Lò mɔ̀bɔ́ ń tá ń nyǐ ń kɛ̀lɛ́ y lyì bí cìcì sõ, sʼe bʼe zɔ̀m dwí nánfò w yò, rə̀-ná-cí zhɔ̃̀ ń Yi-ni-zhú mú, ce lò mɔ̀bɔ́ ń yə̀ Kristə zwì mú gaga cɔ̃̀ mɔ̀.

⁹Bə̀ká súlí ejə̃̀-kɛ̃ dõ yil ejə̀nə̀ bé yilə né sɛ́bɛ́ rɛ́ wẽ́ ǹdə́ ń yə̀ byinə shí-shə̀ldù lyɛ̃ yé. Ń mə̂ sə n yə̀ kɛ̃ mɔ̀bɔ́ ń yà ń jú byal mə̀dù, ń yə̀ ń dõ yó w nyǐ yé, ¹⁰sə n yə̀ kɛ̃ mɔ̀bɔ́ bə̀ yě ń tùm-ècɛ̀nà nɛ́ nyɛ̀bɛ́ ń twĩ̀ mú yò: ń kɔn ń byâ bɛ́ cɛ̀nɛ̀, ń zwẽ zhələ ń sõ náàcɛ̀nɛ́, n sã̀ Yi lyì bí nə̀rh, n sɛ̃ lyì byɛ̀bɛ́ bə̀ yʼà nʼê nwɛ̀nɛ̀ nɛ̀, n wɛ̀rhɛ́ tùm-ècɛ̀nà dwí gakó.

¹¹Bə̀ká shɛ̀nɛ́ ń kɛ̃ ejə̀nə̀ bé byɛ̀bɛ́ bə̀ gwẽ̌ wɔ́ kə-bwə̃́ə̃́ mó ejə̀nə̀ bé sɛ́bɛ́ rɛ́ wẽ́ yé, bə̀ bə̀ bùlə̀ né gə tú nə zhɛ́rhɛ́ bə̀ nʼê yâl byə́nə́ bə jí, bə yẽ̌ Kristə kùr tó ne. ¹²Rə̀myɛ́ yi ní, yò bʼa zhì bə̀ yó wə, bə̀ gə́ yə̀ bə̀ nyí-bwəl lé bə̀ yʼà bwəl Kristə kùr tó yil mó pyìrh yilə. ¹³Kɔn súlí myɛ, bə̀ myɛ̀rhɛ̀ bə̀ tʼâ wɛ̀rhɛ́ kaka yé, bə̀ nʼê tó kâlsɛ wẽ́ bə̀ zhə̀lə̀, bə̀ mʼê ce sɔ̀, bə̀ nʼê twĩ̀ tumə nyɛ̀bɛ́ nə̀ də̀ bə̀ yé. ¹⁴Wɔ́ rə̀myɛ́ è ce, à nʼâ yâl sə ejə̀nə̀ bé byɛ̀bɛ́ bə̀ gwẽ̌ wɔ́ kə-bwə̃́ə̃́ mó jí byə́nə́ bə lù byâ, sə bə cili bə̀ kâlsɛ́ sõ, mùnì ga nə́ zwə̀ bé bə̀kʼa nə bɔ̀l bə zɔ̀m nə́ sõ yé. ¹⁵Nyǐnə ejə̀nə̀ jàlà yẽ̌ sɔ́má kɛ̀bɛ́ è wɔ́ zhə̀n nyâ y mɔ́ nɛ, bə̀ kʼâ nʼê tó Shətana nɛ.

¹⁶Kɛ̃ mɔ̀bɔ́ ń wɔ́ Kristə-lò, ejə̀nə̀ jʼà ŋwɛ́nɛ́ ń sõ kɛ̀lɛ́ wa, ń bə̀ká n yẽ̌ be n ce Kristə-lyì gùlú w jɔ̃̀ w yé, ń mə̂ sə n nyǐ bə̀ yò, mùnì ga Kristə-lyì gùlú w ŋwɛ̀nɛ́ o nyǐ ejə̀nə̀ bé byɛ̀bɛ́ bə̀ bə lò zhe ń nə́ ń sɛ̃ bɛ mɔ́ yò.

Kristə-lyì gùúlí yé né cìnə́ bé tum

¹⁷Kristə-lyì gùlú yé né cìnə́ bé byɛ̀bɛ́ bə̀ nʼê twĩ̀ gùlú w tum dí cɛ̀nɛ̀ mɔ́, lyì bí mə̂ sə bə nyɛ̀ bɛ̀ bə kʼa bwérhé. Sə wɔ́ byɛ̀bɛ́ bə̀ nʼê bwə̀l Yi zɔ̀mɛ̀ rɛ́ bə jʼà nʼê byili ri mú ni bə̀ mə̂ sə bə wɛ̀rhɛ́ rə̀myɛ́. ¹⁸Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Nɔ̃ gə nʼô twĩ̀ kɛ́lɛ́ w jíjí jòró yi ní, sə ǹ bə̀ká cə̀r w bʼò bə̀kʼa dɔ̃̀ jíjí rí yé.” Bə̀ kʼe wɔ̀ bə̀: “Tùntùnnə̀ mə̂ ǹdə́ kwândɛ́.” ¹⁹Bə̀ká shɛ̀nɛ́ bə cĩ́ dóó Kristə-lyì gùlú yé né cə́bal yó wə, ǹdə́ lyì bə̀lyè ráá lyì bə̀tɔ̀ yə̀ ń yò w zhə̀n byili yé. ²⁰Ji lyì bí byɛ̀bɛ́ bə̀ wɛ̀rhɛ́ yə̀-bəlwàálɛ mɔ́ búlə́ lyì bí gakó yé né, mùnì ga ywẽ zə bə̀ dwã bɛ́.

²¹À nʼâ lwə̀l mó rə̀myɛ́ ǹdə́ à wu gakó, Yi ǹdə́ Yezu Kristə ǹdə́ Yi màlɛ́kabá yé né: wɛ̀rhɛ́ rə̀myɛ́ gakó ǹdə à gə́ byili mú ní, sə bə̀ká zə ǹ yírh ń cír lyì bí yé. ²²Bə̀ká yə̀ làlà ń cèlè ǹ jɛ̀rh lò yó w ń pɔ̃ tum Kristə-lyì gùlú w wẽ́ yé. Zə ǹ cìn wárhgáá, ǹ bə̀ká ce ǹ twə́r lyì dwã yə̀-bəlwàálɛ wẽ́ yé.

²³Ǹ wu w gə́ bə shɛ̀ mɔ́ ce, bə̀ká kə́ nyɔ̀ nɛ̃̌ mɔ́ dúdú yé. Nə́ ǹ nywɛ̀ sɛ̃´ mɔ́ myɛ námpɔ́lɛ́ námpɔ́lɛ́ ǹ yala nɛ́ gə́ bə nyɛ̀ mɔ́ yilə.

²⁴Bə̀ nʼê lwar lyì bí jàlà yə̀-bəlwàálɛ́ yò làlà, ǹdə́ bə̀ gwẽ̌ yə̀ bə̀ bùrsí kɛ́ yé. Sə kɔn yʼa dɛnɛ fòró bə lwar jàlà nyân dɛ́ yò. ²⁵Kɔn wɔ́ èta ǹdə́ tùntwə̃̀ə̃̀ né nyɛ̀bɛ́ nə̀ càn mɔ́ myɛ. Bə̀ nʼê lwar nə̀ jàlà yò kùr yó, sə nə̀ jàlà yʼa dɛnɛ fòró bə lwar nə̀ yò.

Yóm mə̂ sə n nyɛ̀ ń yó-cə́bal

¹Lò mɔ̀bɔ́ gakó ǹ wɔ́ yóm, ǹ mə̂ sə́ nyɛ̀ ǹ yó-cə́bal mɔ́, mùnì ga lyì bí bə̀kʼa zɔ̀m Yi yil lé ǹdə́ nə́ kàrmɔ́ yò námməlwɛ̀lɛ́ yé. ²Yómə́ bé byɛ̀bɛ́ bə̀ yó-cìnə́ bé wɔ́ Kristə-lyì mú, bə̀kʼa tə̀ bə̀ bə̀ wɔ́ da-byâ yil bə cẽ be nyám yé. Bə̀ mə̂ sə bə kwɛrhɛ bə nyɛ̀ bɛ́, bə̀ wɔ́ Kristə-lyì byɛ̀bɛ́ bə̀ só ne bə̀ nʼê twĩ̀ bə̀ pɛ.

Wɔ́ shilə námməlwâlsɛ́ sə̀ nʼê dwĩ̀ numbyíní

Kɔn dɛ̀bɛ́ gakó à byili mú mú, wɔ́ rə̀myɛ́ ǹ mə̂ sə́ byili lyì bí ni, ń ce bə wɛ̀rhɛ́ rɛ.

³Lyì jàlà ŋwɛ́nɛ́ bə̀ kàrmɔ́ bə̀ nʼê cèrhè mó tə̀ sɔ́má yó yé. Bə̀ tʼâ tó zhə̀n dɛ́ tɛ̀bɛ́ nə́ Cinu Yezu Kristə kàrmɔ́ byili mú ni yé. Bə̀ kàrmɔ́ còrhò mó tʼâ tó nə́ Yi-ni-zhú nyân mɔ́ nɛ yé. ⁴Bə̀ cìn-dɛ̃̌-zhõ̌ mó ce bə̀ wɔ́ ǹdə lyìlyə̂r ta. Bə̀ yə̀l kaka Yi nyə̀ná nɛ́ wẽ́ yé. Wɔ́ nyə̀-pâr zɔ̀mà címí è zhe be. Wɔ́ rə̀myɛ́ è ce bwɛ̃̌-dǔr, búlə́, dwã tùùrhì, dwã cə̀rh ceré, ⁵ǹdə́ nyə̀-pâr mâ kɔn lyɛ̃ cɛ nɛ ŋwɛ́nɛ́ bə̀ cəcəl wə. Bə jǐrh ǹdə lyì byɛ̀bɛ́ bə̀ surhə jé, bə̀ kʼê yə̀l zhə̀n dɛ́ gə́ wɔ́ nɛ́ ta. Bə zɛ̃̀ bə̀ nʼê bùl bə̀ Yi-ni-zhú mú wɔ́ kɔn dɛ̀bɛ́ rə̀ mʼa ce numbyíní jǐrh nə̀cɛ̀m-bal.

⁶Sə zhə̀nà, Yi-ni-zhú mú wɔ́ nə̀cɛ̀ndɛ̀ nánfɔ̀lɔ̀ numbyíní yilə, ǹdə́ è gə nʼê bùl bə̀ tɛ̀bɛ́ è zhe mó yú yə. ⁷Nə́ yə̀ kaka zal nə́ mʼé bə̀ cɛ yó yé. Nə́ kʼé tʼá la kaka zal nə́ mʼé kwɛ̃̀ myɛ yé. ⁸Nə́ gə zhe kùjú nə́ rʼé jí, nə́ zhe gɔ̀nɔ̀ nə́ mʼé círhí nə́ yala nɛ, rə̀myɛ́ já ǹdə́ nə́ba. ⁹Sə byɛ̀bɛ́ bə̀ nʼê pyà sə bə jǐrh nə̀cɛ̀nà nánfwààlɛ́ mɔ́ nʼê twi sòlò wẽ́. Sə shilə né námməlwâlsɛ́ shɛ̀bɛ́ sə̀ bə kùr zhe sə̀ nʼê swèlè numbyíní è jé, è yò zhìlì mú, nʼê jə́jɛ̀rɛ́ bɛ. ¹⁰Zhə̀nà, zwini tɛ̀bɛ́ gakó rə̀ nʼê zal numbyíní mú kùr nʼê shí wɛ́rɛ́ sónó dɛ̃´dɛ̃´ wẽ́. Lyì nánzhəzhɔ̌ pyà y kɔn lyɛ̃ cɛ nɛ. Wɔ́ rə̀myɛ́ è ce bə jé bə̀ Yi-ni-zhú mú wẽ́, bə pə nɔ̀nɔ̀ nánfɔ̀lɔ̀ bə̀ cìn nì, e jʼa wɔ́ bə̀ cìcì yò.

Zə Yi-ni-zhú zãã y náàcɛ̀nɛ́

¹¹Ǹmyɛ́ mɔ̀bɔ́ ǹ wɔ́ Yi lò mó, yẽ̌ rə̀myɛ́ gakó né. Pyâ sə́ yə̀ wu-cángá cí, ń pə ǹ cìn námpúm Yi ni, ń zhí ri. Zə sónó ǹdə́ cìn-pyɔ́nɔ́ ǹdə́ wu-bɔ̀nɔ̀. ¹²Zə Yi-ni-zhú zãã y náàcɛ̀nɛ́. Zə nyǔ mú mə̀ tʼâ la zhɔ̌ mɔ́ kẽkẽ, bə̀ wɔ́ mə̀myɛ́ yil Yi byẽ̀ mó, ǹ gə́ wɛ̀rhɛ́ ǹ nyí-bwəl náàcɛ̀nɛ́ y zhə̀n-cìnə́ nánzhəzhɔ̌ yé né dɛ̃ rɛ́ yùwə̀. ¹³Sə èlâsɛ̃´, à nʼâ pɛ mɔ́ nyí Yi rí tɛ̀bɛ́ rə̀ nʼê pɛ myə̂l kɔn dwí gakó ne mó yé né, ǹdə́ Yezu Kristə mó ń yàl Yi-ni-zhú mú zhə̀n-cínnə Pɔ̃s-Pyəlatɛ yé né mó yírh wə: ¹⁴zwẽ nyə́ né nə̀myɛ́, sə́ yə̀ wárhgáá, dóó bə̀kʼa yə̀ ǹ yó w yé, kɔn mʼe yí dɛ̃ rɛ́ tɛ̀bɛ́ nə́ Cinu Yezu Kristə mà n ká n bə̀ mɔ́. ¹⁵Mɔ̀bɔ́ ń la ce Kristə bə̀ ǹdə́ yi rí gə tú è yú mú, wɔ́ Yi. Wɔ́ rə̀myɛ́ sõ wu-nyɔ̃̀ w ò bə dõ zhe mó nʼô shí ní. Rə̀myɛ́ dúdú rə̀ wɔ́ pyɔ̌, rə̀ cǐ kɔn gakó. Rə̀ wɔ́ pyâ bɛ́ gakó pyɔ̌, yó-cìnə́ bé gakó yó-cə́bal. ¹⁶Rə̀myɛ́ dúdú rə̀ tʼâ cì yé. Rə̀ jě pwẽ̀ wẽ́. Lò lò wàr ń nə́ ń bwəlse re yé. Lò lò yírh gwẽ̌ yə̀ rɛ nɛ yé, e jà lò lò yírh tʼâ la rɛ nɔ myɛ yé. Wɔ́ rə̀myɛ́ rə̀ zhe zùwə́ ǹdə́ jàn, byinə nə̀ bə zhɔ̌ zhe yilə! Amɛ̀n!

Cící nə̀cɛ̀nà bɛ́ bə zə bə̀ cìn cɛ̀nɛ̀

¹⁷Byili lũ w kɔ̀bɔ́ nə̀cɛ̀nà bɛ́ nɛ bə̀ bə̀ bə̀kʼa zhẽ̌ bə̀ cìn dɛ̃̌, bə zə nə̀cɛ̀ndɛ́ zhə̀n yé, sə bə zə Yi zhə̀n dɛ́, bə̀ wɔ́ Yi rə̀ nʼê pɛ nə́ba kɔn dwí gakó nánzhəzhɔ̌ nə́ jí. ¹⁸Byili bi bə̀ bə̀ twĩ̌ cɛ̀nɛ̀, sə bə yə̀ nə̀cɛ̀nà bə̀ tùntwə̃̀ə̃̀ né wẽ́, sə bə tə̀ bə̀ jɛ̃̀-kɔn ǹdə́ lyì bí dwã bɛ́ ǹdə́ wu-nyɔ̃̀. ¹⁹Èta, bə̀ mʼa ŋwɛ̀nɛ́ bə tɛnɛ nə̀cɛ̀ndɛ́ tɛ̀bɛ́ rə̀ càn rə̀ tʼâ la zhɔ̌ mɔ́, mùnì ga bə nə nyǔ mú páá mɔ́.

Zə tɛ̀bɛ́ Yi pɔ mɔ́ mɔ́ cɛ̀nɛ̀

²⁰À byì-sónó Timote, zə tɛ̀bɛ́ Yi pɔ mɔ́ mɔ́ cɛ̀nɛ̀. Dɛ̃̌ ǹ cìn ǹdə́ zɔ̀m-fwə́ə́ré tɛ̀bɛ́ rə̀myɛ́ ǹdə́ Yi-ni-zhú mú də̀ rə̀dù mú. Sə́ dɛ̃̀ ǹ cìn myɛ ǹdə́ kɔn dɛ̀bɛ́ lyì bí yʼa wɔ̀ bə̀ bə̀ yě, rə jʼà bə kùr zhe mó. ²¹Jàlà jə́jɛ̀rɛ́ bə̀ cìn bə̀ bə̀ yě, rə̀myɛ́ ce bə jé bə̀ Yi-ni-zhú mú wẽ́ dɛ̃´dɛ̃´.

Yi bʼa cĩ́ bwəl á gakó yó!