1 Tesəloniki

Pwəə sɛ́bɛ́ rɛ́ nã́yéé ré ń kɛ̃ n pə

Tesəloniki

Kristə-lyì bí ni mú

Wɔ́ Tesəloniki è yʼà wɔ́ Masɛdwanɛ tənà y púlə́púlə́ cə-fɔ̀lɔ̀. Pwəə wɛ̀rhɛ́ dwã shí-èlyè ǹdə́ rə̀dù, ǹdə́ ń nə́ ń pyà ń gə́ mà n wɛ̀rhɛ́ nɛ́ n ce Tesəloniki Zhwifubá zwẽ nyí bə̀ wɔ́ Yezu ń wɔ́ lò mó mɔ̀bɔ́ Yi yʼà bwəl nyí bə̀ rə̀ la tũ̌ n bə̀ n zwẽ lũ w lyì bí mú. Bə̀ jàlà ǹdə́ lyì bí byɛ̀bɛ́ bə̀ də̀ Zhwifubá mó nánzhəzhɔ̌ zwẽ nyí bə zù Yezu. Sə Zhwifubá dwã bɛ́ yʼà nʼê dùr bwɛ̃̌, bə pyà bə̀ gə́ mʼa wɛ̀rhɛ́ nɛ́ bə ce zɔ̀mà jòm cɔ w wa. Rə̀myɛ́ ce, Pwəə ǹdə́ ń tó-dwã bɛ́ zhǐr Tesəloniki ní bə zhílí bə̀ sɔ́má y bə vò Bere, n kə́ n zhǐr gàà n vò Atɛnnɛ. N zɛ̃̀ n twĩ̀ Timote Tesəloniki Kristə-lyì bí sõ, mùnì ga n lwar ǹdə́ bə̀ gə gwẽ̌ zhí Kristə ne (Tùntúmə́ bé 17.1-15).

Rə̀myɛ́ kwã nɛ́, Pwəə zhǐr Atɛnnɛ nɛ́ n vò Kɔrɛ̃tɛ. Timote ká n shí Tesəloniki n bə̀ ǹdə́ Pwəə ŋwɛ́nɛ́ Kɔrɛ̃tɛ nɛ́, n byili mu Tesəloniki Kristə-lyì bí gə́ gwẽ̌ zhí Kristə ne né, sə Pwəə wu yàl nyɛ̀n, n zɛ̃̀ n kɛ̃ sɛ́bɛ́ rɛ́ tɛ̀bɛ́ n pə bɛ n mə n cící bi, n zɔ̀m Kristə twírí y yò, ǹdə́ Kristə-lyì bí byɛ̀bɛ́ bə̀ cù mú bùrhù mú yò n súlí.

Lwarna bə̀ Pwəə nə́ ń byẽ̀ ń tó-dwã bɛ́ mə̀dù ń sábá nɛ́ jàlà wẽ́ bə̀ Shəlvɛ̃. Sə Tùntúmə́ bé tumə né sɛ́bɛ́ rɛ́ wẽ́, bə̀ nʼê byẽ̀ Pwəə tó-dõ mó ńmyɛ̌ mɔ́ bə̀ Shəlaasɛ.

Pwəə ju kùr n ce Yi nə̀bán Tesəloniki lyì bí gə́ zwẽ Yi zɔ̀mɛ̀ rɛ́ mɔ́ yilə. Ń lyǐrh be ń gə́ bwə̀l yò-ècɔ̀nɔ̀ nyí rí Tesəloniki ní mú, n zɛ̃̀ n byili bi bə̀ ń nə́ ń yâl n ká n nə bɛ (1.1–3.13).

Rə̀myɛ́ kwã nɛ́, ń byili Kristə-lyì bí ni bə̀ gə́ mə̂ sə bə wɛ̀rhɛ́ nɛ́, mùnì ga bə̀ tùntwə̃̀ə̃̀ né yí Yi bùlə̀ (4.1-12). Rə̀myɛ́ kwã nɛ́, ń zɔ̀m Yezu Kristə twírí y yò ǹdə́ Kristə-lyì bí byɛ̀bɛ́ bə̀ cù mú bùrhù yò (4.13–5.11).

Pwəə nə́ ń ce Tesəloniki Kristə-lyì bí

¹Wɔ́ àmyɛ́ Pwəə ǹdə́ Shəlvɛ̃ ǹdə́ Timote nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ Tesəloniki Kristə-lyì gùlú w lyì bí ni pɔ. Á zhí nə́ Da Yi ǹdə́ Cinu Yezu Kristə ne. Yi bʼa cĩ́ bwəl á yó, sə rə pə ába yə̀-zùlə́!

Pwəə nə́ ń ce Yi nə̀bán Tesəloniki lyì bí gə́ zwẽ Yi zɔ̀mɛ̀ rɛ́ mɔ́ yilə

²Nə́ rʼé ce Yi nə̀bán twéé twéé á gakó yilə. Nə́ gə nʼé ce Yi gakó, nə́ tʼá swě á yò yé. ³Nə́ rʼé lyǐrh á Yi-ni-zhú tumə né ǹdʼá sónó tùntwĩ̀ĩ̀ rí yò. Nə́ rʼé lyǐrh á gə́ nʼá pyɛ́nɛ́ á cìn á mʼá dɛ̃̀ nə́ Cinu Yezu Kristə twírí y mú myɛ yò nə́ Da Yi yé né twéé gakó.

⁴Da-byâ, nə́ yě bə̀ Yi swéné ába, rə cír ába á jǐrh rə̀ lyì. ⁵Yò-ècɔ̀nɔ̀ nyí rí nə́ bwə̀l nə́ byili ába mó də̀ ǹdə́ nyì-zɔ̀mà dúdú yé; nə́ bwə̀l lè ǹdə́ jàn tɛ̀bɛ́ rə̀ nʼê shí Eshirhə náàcɛ̀nɛ́ sõ, sə nə́ yě pamparɛ̃ɛ̃ bə̀ tɛ̀bɛ́ nə́ bwə̀l mó wɔ́ zhə̀nà. Á cìcì yě nə́ gə́ yʼâ zhe nə́ cìn ní á sõ, sə rə̀myɛ́ yʼà wɔ́ ámyɛ̌ sãɔ̃ yilə, ⁶sə á kwè nə́myɛ̌ ǹdə́ Cinu nà. Á nwɛ̀nɛ̀ dɛ̃´dɛ̃´, sə ǹdə́ rə̀myɛ́ ga, á zwẽ Yi zɔ̀mɛ̀ rɛ́ ǹdə́ wu-nyɔ̃̀ kɔ̀bɔ́ ò nʼô shí Eshirhə náàcɛ̀nɛ́ sõ. ⁷Èta, Masɛdwanɛ ǹdə́ Akəyi tənèsé Kristə-lyì bí gakó nʼê kwè ámyɛ nà. ⁸Zhə̀nà, è də̀ Masɛdwanɛ ǹdə́ Akəyi ní dúdú Cinu zɔ̀mɛ̀ rɛ́ shí á sõ rə yí ní yé; lũ w lyì bí gakó yě bʼâ zhí Yi ni. Rə̀myɛ́ ce, nə́myɛ̌ kʼé bə kaka zhe nə́ la byilu á Yi-ni-zhú mú shò-kwã nɛ́ yé. ⁹Lyì bí gakó nʼê zɔ̀m nə́ gə́ tú á sõ á zwẽ nə́ zhəəlé né mó, ǹdʼá gə́ yẽ̌ wẽ̀ dé tɛ̀bɛ́ bə̀ nʼê zwə́l rə̀ də̀ Yi mú ni mú yò. Bə̀ nʼê zɔ̀m bʼâ zwẽ nyí á pyìrhí á wun á nʼá tó Yi rí tɛ̀bɛ́ rə̀ wɔ́ nã́nyì, rə jʼà wɔ́ zhə̀n mɔ́ nɛ, ¹⁰sə á nʼá dɛ̃̀ rə̀ Byǐ Yezu ń la shí Arəzana w n bà. Rə̀ bwìrhì mù n du cùùrì wẽ́. Wɔ́ ńmyɛ̌ ń mà n zwẽ nə́ba bùrsí sə̀ bwəlse Yi la kɔ́ mɔ́ yi ní.

Pwəə nə́ ń byili ń gə́ bwə̀l yò-ècɔ̀nɔ̀ nyí rí Tesəloniki ní mú

¹Da-byâ, á cìcì yě bə̀ nə́ twírí y á sõ mó yə̀ nánfò yàl yé. ²Á yě myɛ bə̀ bə̀ tùrh nə́ba, bə nwɛ̀nɛ̀ nə́ba Shilipu cɔ w wa, fòró nə́ zɛ̃̀ nə́ yí á sõ. Sə, ǹdə́ lyì nánzhəzhɔ̌ yʼà bə nə́ba só ga, Yi pɔ nə́ba wu-jɔ̀ nə́ mʼé bwə̀l rə̀ yò-ècɔ̀nɔ̀ nyí rí nə́ byili ába. ³Kɔn dɛ̀bɛ́ nə́ rʼé bwə̀l nə́ byili lyì bí ni mú tɛ̀nɛ́ kɔma sɔ́má yó yé. Rə̀ də̀ lwɛlɛ kɔn myɛ yé. È kʼê də̀ lyì nə́ rʼé yâl nə́ yǔr myɛ yé. ⁴Wɔ́ Yi rə̀ pwírí nə́ mə̂ ǹdə́ yò-ècɔ̀nɔ̀ nyí rí bwə̂l, rə zɛ̃̀ rə cír nə́ba. Wɔ́ rə̀myɛ́ è ce nə́ rʼé bwə̀l lè ǹdə Yi gə́ nʼê yâl nɛ́, bə̀ wɔ́ rə̀myɛ́ rə̀ yě nə́ wun bùlə̀ né; sə nə́ tʼá bwə̀l lè ǹdə numbyínə́ bé gə́ nʼê yâl nɛ́ yé.

⁵Á cìcì mú yě bə̀ nə́ zɔ̀mà nɛ́ də̀ lyì jə́jɔ̀rɔ́ zɔ̀mà yé; è də̀ wẽ̀ nə́ yʼâ nʼé yâl lò sõ è ce nə́ zɔ̀m nɛ̀ yé. Yi myɛ cìcì yě rə̀myɛ́. ⁶Nə́ yə̀ còrhó pyà ámyɛ̌ ráá lyì dwã sõ yé; nə́ yə̀ pyà sə lò cèrhé nə́ba gaga yé, ⁷e jà nə́ gə́ wɔ́ Kristə tùntúmə́ mó ce, nə́ yʼâ wɔ̌ nə́ ce á wɛ̀rhɛ́ rə̀myɛ́.

Ǹdə́ rə̀myɛ́ ga, nə́ gə́ yʼâ ŋwɛ́nɛ́ á sõ yi ní, nə́ wɛ̀rhɛ́ wu-bɔ̀nɔ̀ ǹdə kɛ̃ gə́ ya n nyǐ ń bə̀sɔ́ná yò né. ⁸Nə́ bwə̀l yò-ècɔ̀nɔ̀ nyí rí rə̀ shí Yi sõ mó nə́ byili ába, sə nə́ gə́ só ába dɛ̃´dɛ̃´ mɔ́ ce, nə́ yʼâ só sə nə́ pə nə́ cìn námpúm á yilə, bʼâ jǐrh nə́ lyì-twə̂rh. ⁹Da-byâ, á gwẽ̌ yě bə̀, nə́ gə́ yʼâ nʼé bwə̀l yò-ècɔ̀nɔ̀ nyí rí rə̀ shí Yi sõ mó nə́ byili ába yi ní, nə́ twĩ̀ cəcɛ̃ ǹdə́ nə̀nyɔ́nɔ́ ga, nə́ nwɛ̀nɛ̀ mùnì ga nə́ bə̀kʼá lyɛ̀ɛ̀ ámyɛ̌ mə̀dù ga ǹdə́ nə́ nyí kùjú yé.

¹⁰Nə́ zɔ nə́ cìn cɛ̀nɛ̀ ǹdʼámyɛ̌ byɛ̀bɛ́ á zù Kristə mó; nə́ yàl wu-cángá cìnə́, nə́ yə̀ dóó zal yé. Á yě rə̀myɛ́, Yi myɛ yě re. ¹¹Á yě myɛ bə̀ nə́ zɔ nə́ cìn ǹdʼába ǹdə da gə́ ya n wɛ̀rhɛ́ nɛ́ ǹdə́ ń byâ. ¹²Nə́ cící ába, nə́ zɔ á wun ni, nə́ co yə̀wâl á kùr w twéé gakó, mùnì ga á zhə̀zhə̀ə̀lé yə̀ ǹdə Yi gə́ nʼê yâl nɛ́. Wɔ́ Yi rí rə̀myɛ́ rə̀ nʼê byẽ̀ ába mùnì ga ámyɛ zù rə̀ tənà y ǹdə́ rə̀ zùwə́ y wə.

¹³Nə́ kʼé súlí nə́ rʼé ce Yi nə̀bán myɛ, á gə́ yə̀ zɔ̀mɛ̀ rɛ́ nə́ tú nə́ bwə̀l nə́ byili ába mó zwẽ ǹdə numbyíní zɔ̀mɛ̀ ta mɔ́ yilə. Á zwẽ de bʼâ yě bə̀ rə̀ wɔ́ Yi zɔ̀mɛ̀ zhə̀n zhə̀nà. Sə rə̀ nʼê twĩ̀ ámyɛ̌ byɛ̀bɛ́ á zù Kristə mó wun ní wẽ́.

¹⁴Da-byâ, Zhwifubá nwɛ̀nɛ̀ Yi gùúlí rə̀ ŋwɛ́nɛ́ Zhide né, rə̀ lyì bí zù Yezu Kristə mó. Wɔ́ èta ámyɛ dwí lyì bí nwɛ̀nɛ̀ ába nɛ́. ¹⁵Wɔ́ Zhwifubá bə̀myɛ́ bə̀ gu Cinu Yezu ǹdə́ Yi nyì-zwennə bé, bə nwɛ̀nɛ̀ nə́myɛ. Bə̀ tʼâ pyà Yi pùbùlə̀ wɔ̀rhɔ́ yé. Bə̀ wɔ́ lyì bí gakó zwə̀. ¹⁶Bə̀ nʼê pyà sə bə cə̀r nə́ba nə́ bə̀kʼá bwə̀l Yi zɔ̀mɛ̀ rɛ́ nə́ byili lyì bí byɛ̀bɛ́ bə̀ də̀ Zhwifubá mó ne mùnì ga bə nə vwârh yé. Èta, bə̀ súlí bə̀ yə̀-bəlwàálɛ́ bə̀ nʼê wɛ̀rhɛ́ twéé twéé mó, rə lyɛ̃ cɛ nɛ. Rə̀myɛ́ ce, Yi bɛ̃bɛ̃ rə ga, rə̀ lyim zɛ̃̀ ǹdə́ bɛ.

Pwəə byili bə̀ ń nə́ ń yâl n ká n nə Tesəloniki Kristə-lyì bí

¹⁷Da-byâ, nə́ zhǐr nə́ yẽ̌ ába kɔn la yə̀ námpɔ́lɛ́, sə nə́ yə̀ á yò swě yé. Á shil zhe nə́ba zhə̀n zhə̀nà. Rə̀myɛ́ ce, nə́ rʼé pyà ǹdə́ nə́ wun gakó sə nə́ kʼá bʼě nə ába. ¹⁸Zhə̀nà, nə́ yʼâ nʼé yâl nə́ bə̀ á sõ. È gə wɔ́ àmyɛ́ Pwəə yilə, à myɛrhɛ á sõ twírí twər nánzhəzhɔ̌, sə Shətana cə̀r nə́ba.

¹⁹Wɔ́ ámyɛ̌ á súlí á ce nə́ zhe wu-nyɔ̃̀, á ce nə́ yě bə̀ nə́ bʼâ nə yó-dɛ̃̌-zhõ̌ nə́ Cinu Yezu yé né ń twírí y dɛ̃ rɛ́. ²⁰Zhə̀nà, wɔ́ ámyɛ̌ á nʼá zhẽ̌ nə́ yó dɛ̃̌; ámyɛ̌ á ce nə́ zhe wu-nyɔ̃̀.

¹Rə̀myɛ́ ce, nə́ wàr nə́ bʼâ yẽ̌ kɔn dɛnɛ yé. Nə́ jʼâ pwírí kɔn mə̂ bʼàmyɛ́ ǹdə́ Shəlvɛ̃ mɛ̃ Atɛnnɛ nɛ́. ²Wɔ́ rə̀myɛ́ è ce nə́ twĩ̀ Timote á sõ. Ń wɔ́ nə́ da-byǐ ń nə́ ń tó nə́ba ń bwə̀l Kristə yò-ècɔ̀nɔ̀ nyí rí Yi yilə. Nə́ twĩ̀ mù á sõ mùnì ga n sɛ̃ ába á kwɛrhɛ á zhí Yi ní kẽkẽ, sə n súlí á wu-jɔ̀. ³Èta, á mə̀dù ga bə̀ká n tə̀ lũ w kɔ̀bɔ́ nɔ̀nɔ̀ w yil n gə ń wu yé. Á cìcì yě bə̀ nɔ̀nɔ̀ w òmyɛ́ wɔ́ Yi pùbùlə̀. ⁴Nə́ gə́ yʼâ ŋwɛ́nɛ́ á sõ yi ní, nə́ yʼâ nʼé byili ába bə̀ nyǐ nə́ bʼâ nwɛ̀nɛ̀, sʼá yě bə̀ kɔn yàl ǹdə nə́ gə́ byili ní. ⁵À yʼà kʼâ wàr à bʼa dɛ̃̀ yé. Wɔ́ rə̀myɛ́ è ce a twĩ̀ Timote á sõ, mùnì ga a lwar á gə́ zhí Yi ni ní. Ywẽ zhe ne. Dɛ̀ga Shətana swèlè ába, sə è gə swèlè ába, sə́ nyǐ nə́ tum dí nə́ twĩ̀ á sõ mó bə kùr zhe yé.

⁶Sə èlâsɛ̃´, Timote ká n shí á sõ n bà. Ń byili nə́ba á gə́ zhí Kristə ne né, ǹdʼá gə́ só dwã nɛ́. Rə̀myɛ́ ce nə́ wun nyɛ̀. Ń byili nə́ba bʼâ yə̀ nə́ yò swě yé, sə á nʼá yâl á nə nə́ba, nə́myɛ jʼâ nʼé yâl nə́ nə ába. ⁷Da-byâ, á gə́ zhí Kristə ne èta mɔ́ nʼê zal nə́ wun ni nə́ wu-zhìlù w ǹdə́ nə́ nɔ̀nɔ̀ w wẽ́. ⁸Èlâsɛ̃´, nə́ wun kʼâ jě, á gə́ gwẽ̌ zhí Cinu ni kẽkẽ mó yilə. ⁹Nə́ yə̀l nə́ gə́ mʼâ ce Yi nə̀bán nɛ́ á yil yé, bʼâ nʼá pɛ nə́ba wu-nyɔ̃̀ nánfɔ̀lɔ̀ rə̀ yé né. ¹⁰Cəcɛ̃ ǹdə́ nə̀nyɔ́nɔ́ ga, nə́ rʼé lwə̀l Yi ǹdə́ nə́ wun gakó bə̀ rə̀ ce nə́ kʼá nə ába, sə nə́ sɛ̃ ába á lwar kɔn dɛ̀bɛ́ á yə̀ ŋwɛ̀nɛ́ á lwar á Yi-ni-zhú mú shò-kwã nɛ́ mɔ́.

¹¹Nə́ Da Yi cìcì ǹdə́ nə́ Cinu Yezu bʼa kwɛrhɛ nə́ sɔ́má y mùnì ga nə́ ŋwɛ̀nɛ́ nə́ bʼâ sõ! ¹²Cinu mà n ce á kwɛrhɛ á swéné dwã, sʼá kwɛrhɛ á swéné lyì bí gakó twéé twéé, ǹdə nə́ gə́ só ába né mó. ¹³Èta, ń mà n súlí á wu-jɔ̀. Nə́ Cinu Yezu gə tú ǹdə́ ń lyì bí gakó yùwə̀, á mʼâ yə̀ nə́ Da Yi lyì námpúm, dóó tʼâ la á yó w jǒm yé.

Nə́ gə́ mə̂ sə nə́ wɛ̀rhɛ́ nɛ́ mùnì ga nə́ tùntwə̃̀ə̃̀ né yí Yi bùlə̀

¹Da-byâ, tɛ̀bɛ́ rə̀ súlí mú, á yě bə̀ nə́ byili ába á gə́ mə̂ sʼá wɛ̀rhɛ́ nɛ́ mùnì ga á tùntwə̃̀ə̃̀ né yí Yi bùlə̀. Sə zhə̀n ga, á nʼá wɛ̀rhɛ́ ǹdə nə́ gə́ byili ába né. Sə cenə jàn nɛ́ á jʼá nʼá wɛ̀rhɛ́ èta. Nə́ rʼé lwə̀l ába ǹdə́ cícú mú mə̀myɛ́ Cinu Yezu yil yilə. ²Á yě nyə́ né nyɛ̀bɛ́ nə́ pɔ ába Cinu Yezu jàn yil mó. ³Kɔn dɛ̀bɛ́ Yi nʼê yâl mɔ́ wɔ́ bʼâ yə̀ rə̀myɛ́ lyì námpúm, sʼá dɛ̃̀ á cìn ǹdə́ fwə̂l tumə, ⁴sə lò gakó lwar ǹ cìn zal cɛ̀nɛ̀ ǹdə kɔn gə́ mə̂ nɛ́, ⁵sʼá bə̀kʼá yẽ̌ á cìn nì á pə shilə námməlwâlsɛ́ nɛ ǹdə lyì byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár ta yé. ⁶Lò mə̀dù ga bə̀ká yúyǔ ǹ dõ, ráá ń myìnì mù yò w òmyɛ́ wẽ́ yé. Cinu la còrhò-tum byɛ̀bɛ́ bə̀ nʼê wɛ̀rhɛ́ èta mɔ́ gakó ne pɔ. Nə́ byili ába rə̀myɛ́, nə́ kʼá bwérhé. ⁷Yi yə̀ nə́ba byẽ̀ bə̀ nə́ wɛ̀rhɛ́ fwə̂l tumə yé; rə̀ byẽ̀ nə́ba bə̀ nə́ yál rə̀myɛ́ lyì námpúm. ⁸Wɔ́ rə̀myɛ́ è ce, lò mɔ̀bɔ́ ǹ cẽ nyə́ né nə̀myɛ́, è də̀ numbyíní nyí ni ǹ cẽ né yé; wɔ́ Yi cìcì nyí ni ǹ cẽ né. Wɔ́ rə̀myɛ́ rə̀ nʼê pɛ ába rə̀ Eshirhə náàcɛ̀nɛ́ yá.

⁹È gə wɔ́ dwã sónó w yilə, Yi cìcì byili ába á gə́ mə̂ sʼá swéné dwã nɛ́. Rə̀myɛ́ ce, kɔn kʼê də̀ nyɔ́ɔ́ bə̀ nə́ kɛ̃ sɛ́bɛ́ nə́ pə ába nə́ mʼé byili rə̀myɛ́ yé. ¹⁰Nə́ yě bʼâ só Kristə-lyì bí byɛ̀bɛ́ bə̀ ŋwɛ́nɛ́ Masɛdwanɛ tənà y wẽ́ mó púlə́púlə́ ǹdə Yi gə́ byili ába né. Da-byâ, nə́ rʼé lwə̀l ába bə̀ cenə jàn nɛ́ á jʼá nʼá wɛ̀rhɛ́ èta twéé twéé. ¹¹Cenə jàn nɛ́ á jòm ǹdə́ dwã ǹdə́ yə̀-zùlə́. Lò gakó sə́ nyǐ ǹ sə̀pwà tumə né yò, ń twĩ̀ ń nə ǹ nyí kùjú, ǹdə nə́ gə́ byili ába né. ¹²Á gə wɛ̀rhɛ́ èta, á tʼá la lò yó w nyǔ yé, sə byɛ̀bɛ́ bə̀ də̀ Kristə-lyì mú bʼa nyɛ̀ ába.

Yezu Kristə twírí y yò

¹³Da-byâ, nə́ rʼé yâl bʼâ lwar kɔn gə́ la nɛ́ yál byɛ̀bɛ́ bə̀ cù mú yilə, mùnì ga á wun bə̀kʼa zhìlì ǹdə lyì bí byɛ̀bɛ́ bə̀ tʼâ dɛ̃̀ kaka bə̀ cu kwã nɛ́ mɔ́ ta yé. ¹⁴Nə́ rʼé zwẽ nyí bə̀ Yezu cù n ká n bwìrhì; èta, nə́ rʼé zwẽ nyí bə̀ Yi mʼa bwìrhì byɛ̀bɛ́ bə̀ cù ǹdə́ bə̀ zù mù mú, bə yə̀ nɛ́ ǹdə́ mɔ.

¹⁵Kɔn dɛ́ dɛ̀bɛ́ nə́ rʼé yâl nə́ byili ába mó wɔ́ ǹdə Cinu gə́ byili ní: lwarna bə̀ nə́myɛ̌ byɛ̀bɛ́ ń ká ń bàn zal ǹdə́ nə́ gwẽ̌ yə̀ cì mú tʼá la byɛ̀bɛ́ bə̀ cù mú jɔ̀nɔ̀ ń sõ yé. ¹⁶Cinu gə ká n shí dɛ̃̌ yi w ń bànà, ń mà n pə nyí màlɛ́kabá yé né cə́bal mɔ́ nɛ n bwə̀l; Yi pɔ́lá y súlí e dom. Rə̀myɛ́ yó, byɛ̀bɛ́ bə̀ cù ǹdə́ bə̀ zù Kristə mó bʼa jɛ̀rɛ̀ bə tó yé bə bwìrhì. ¹⁷Rə̀myɛ́ yi ní, Yi bʼa kwè nə́myɛ̌ byɛ̀bɛ́ nə́ gwẽ̌ yə̀ cì mú ǹdə́ bə̀myɛ́ ga nə́ vò bə́ban wẽ́ dɛ̃̌ yi wə, nə́ jəl Cinu. Èta, nə́ bʼâ yə̀ nɛ́ ǹdə́ mɔ twéé twéé. ¹⁸Zəna zɔ̀mà nɛ́ nə̀myɛ́ á cící dwã.

¹Da-byâ, kɔn də̀ nyɔ́ɔ́ bə̀ nə́ kɛ̃ sɛ́bɛ́ nə́ mʼé byili ába yi rí ǹdə́ dɛ̃ rɛ́ tɛ̀bɛ́ Cinu bàn mɔ́ yé. ²Á cìcì mú yě pamparɛ̃ɛ̃ bə̀ dɛ̃ rɛ́ tɛ̀bɛ́ ń bàn mɔ́, ń mà n jàr nə́ba ǹdə ŋwɔ̀l-bal gə́ ya n bə̀ cəcɛ̃ nɛ nɛ́. ³Lwarna bə̀ lyì bí gə tú bə̀ nʼê wə̀l bə̀ èlâsɛ̃´ myɛ̌, yə̀-zùlə́ ŋwɛ́nɛ́, bə̀ kaka ywẽ bə bɛ zhe, wɔ́ rə̀myɛ́ yi ní cìcì zwini bʼa zə bɛ ǹdə kɛ̃ pwǐ gə́ yʼa yì ní. Bə̀ tʼâ la lú yé.

⁴Da-byâ, ámyɛ̌ tɛ̀nɛ́ cə-byín wẽ́ sə dɛ̃ rɛ́ rə̀myɛ́ bʼe jàr ába ǹdə ŋwɔ̀l-bal ta yé. ⁵Á gakó wɔ́ pwẽ̀ ǹdə́ nə̀nyɔ́nɔ́ lyì. Nə́ də̀ cəcɛ̃ ráá cə-byín lyì yé. ⁶Rə̀myɛ́ ce, nə́ bə mə̂ sə nə́ dɛ̀ɛ̀ ǹdə lyì bí dwã bɛ́ ta yé. Nə́ mə̂ sə nə́ zə nə́ yírhə́, sə nə́ zə nə́ cìn cɛ̀nɛ̀. ⁷Lyì bí byɛ̀bɛ́ bə̀ nʼê dɛ̀ɛ̀ mɔ́, wɔ́ cəcɛ̃ nɛ bə̀ nʼê dɛ̀ɛ̀. Byɛ̀bɛ́ bə̀ nʼê nywɛ̀ sɛ̃´ bə̀ tutwi tɛ̃´ mɔ́, wɔ́ cəcɛ̃ nɛ bə̀ nʼê nywɛ̀ mɔ̀. ⁸Sə nə́myɛ̌ wɔ́ pwẽ̀ lyì; nə́ mə̂ sə nə́ zə nə́ cìnə̀. Nə́ mə̂ sə nə́ zə nə́ Yi-ni-zhú mú ǹdə́ nə́ sónó w rə yə̀ kɔn dɛ̀bɛ́ nə́ la bʼé cə̀r nə́ cìcì yé ne búlə́ jàà wà. Nə́ rʼé dɛ̃̀ nə́ vwârh mɔ́. Bànà nə́ zə rə̀myɛ́ rə yə̀ ǹdə shə̀dáá cɔ̀bɔ́ yə́-pú ta nə́ pú.

⁹Yi yə̀ nə́ba byẽ̀ rə̀ la còrhò-tum pɔ yé. Rə̀ byẽ̀ nə́ba mùnì ga nə́ tó nə́ Cinu Yezu Kristə dɛnnɛ nə́ nə vwârh. ¹⁰Wɔ́ nə́myɛ̌ yil ń cùwə̀, mùnì ga, nə́ yírhə́ gə ŋwɛ́nɛ́, ráá nə́ gə cù myɛ, sə nə́ tó mo nə́ zù nyǔ mə̀ tʼâ la zhɔ̌ wẽ́. ¹¹Rə̀myɛ́ ce, zəna dwã wun ni, sʼá jʼá nʼá sɛ̃ dwã nɛ ǹdə́ cícú ǹdə á gə́ nʼá wɛ̀rhɛ́ nɛ́ dwə́l ga mɔ́.

Pwəə nə́ ń cící Tesəloniki Kristə-lyì bí

¹²Da-byâ, nə́ rʼé lwə̀l ába bə̀ nyámna byɛ̀bɛ́ bə̀ ŋwɛ́nɛ́ á yé né bə̀ nʼê twĩ̀ mú, bə̀ wɔ́ Cinu ń cír be bə̀ bə̀ yál á yé né bə cící ába. ¹³Nyámna bɛ, sʼá swéné be dɛ̃´dɛ̃´ tum dí tɛ̀bɛ́ bə nʼê twĩ̀ mú yilə. Jǒmnə ǹdə́ dwã ǹdə́ yə̀-zùlə́.

¹⁴Da-byâ, nə́ rʼé lwə̀l ába: cícínə byɛ̀bɛ́ bə̀ nʼê wɛ̀rhɛ́ yààyàà mɔ́, sʼá zə byɛ̀bɛ́ wu-zhìlù zhe mó wun ni. Sɛ̃na byɛ̀bɛ́ bə̀ jàn bə já mɔ́ nɛ, sʼá zə cìn-pyɔ́nɔ́ ǹdə́ lyì bí gakó. ¹⁵Dɛ̃̌na á cìnə̀, lò lò bə̀ká càrh lwɛlɛ ǹ dõ ne yé, sʼá pyà cɛ̀nɛ̀ ǹdə́ dwã, ǹdə́ lyì bí gakó. ¹⁶Cenə á wun yə̀ nyɛ̀n twéé twéé. ¹⁷Lwə̂lnə Yi dɛ̃ gakó. ¹⁸Cenə Yi nə̀bán kɔn gakó wẽ́. Wɔ́ èta rə̀ nʼê yâl bʼâmyɛ̌ byɛ̀bɛ́ á mù dwã nɛ ǹdə́ Yezu Kristə mó wɛ̀rhɛ́ nɛ́.

¹⁹Á bə̀kʼá cə̀r Eshirhə náàcɛ̀nɛ́ tum dí yé ne yé. ²⁰Á bə̀kʼá fulsi zɔ̀mà nɛ́ nyɛ̀bɛ́ è nʼê tó lyì bí dɛnnɛ è zɔ̀m mɔ́ yé. ²¹Nyǐnə kɔn gakó náàcɛ̀nɛ́, sʼá cír tɛ̀bɛ́ rə̀ càn mɔ́. ²²Dɛ̃̌na á cìn ǹdə́ lwɛlɛ dwí gakó.

²³Wɔ́ Yi cìcì rə̀ nʼê pɛ yə̀-zùlə́. Rə̀ bʼa ce á yə̀ rə̀myɛ́ lyì námpúm, sə rə yìlì á ywə́lsé ǹdʼá wun ní ǹdʼá yala nɛ́, á mʼá dɛ̃̀ dɛ̃ rɛ́ tɛ̀bɛ́ nə́ Cinu Yezu Kristə ká ń bàn mɔ́, mùnì ga dóó bə̀kʼa jòm á yó w yé. ²⁴Mɔ̀bɔ́ ń nə́ ń byẽ̀ ába mó wɔ́ zhə̀n-cí. Wɔ́ ńmyɛ̌ ń mà n wɛ̀rhɛ́ rə̀myɛ́ gakó.

²⁵Da-byâ, lwə̂lnə Yi nə́myɛ yilə. ²⁶Cenə Kristə-lyì bí gakó á pə nə́ba, bə̀ nə́ wɔ́ da-byâ. ²⁷À nʼâ lwə̀l ába Cinu yil lé yilə, sʼá kàrmə̀ sɛ́bɛ́ rɛ́ tɛ̀bɛ́ á byili Kristə-lyì bí gakó ne.

²⁸Nə́ Cinu Yezu Kristə mà n cĩ́ bwəl á yó!